1 KORINETO’BAI

1 KORINETO’BAI

¹ Ni Paulo, se äzite ole Lu rosi a’done lazo’ba Kristo Yesu ro resi, ago ni ädrupi amaro Sosetene resi. ² Känisa Lu ro se orivoya Korineto ya ri, vona se cini äzite a’done lidri alokado Lu ro, se a’dote ndaro rumora ya Kristo Yesu be, troalo lidri cini vo cini yasi se kabe Opi amaro Yesu Kristo mätu, Opi ànyaro ago amaro. ³ Ka’do inye Lu Täpi amaro ago Opi Yesu Kristo ro kozo tai’dwero ndi taliatokpe be ämiri. ⁴ Ondoalo ma aro’boya oye Lu maro ri ta amiro ta tana ta tai’dwero se nda kozote ämiri Kristo Yesu si rota. ⁵ Tana rumora Kristo be si nya’dote ŋgadriamba be ŋga cini yasi, ata cini ndi tauni cini be. ⁶ Lazokado ta Kristo rota a’dote ŋgyiri ya amiro ya, ⁷ ago taepe ami kote ni äṛu alodi uruvoya oso nyàbe ruka’da Opi amaro Kristo Yesu ro ugu kotena ono ronye. ⁸ Nda ätina ami kpa ŋgyiri le äduna ya, tana ’dooko nya’dona ’da taenjiako tu Opi amaro Yesu Kristo ro rosi. ⁹ Beṛo ta oyine Lu ya, Lu se kuzi ami te a’done rudro’be be Ŋgwa ndaro Yesu Kristo, Opi amaro be ono. ¹⁰ Drikaca Opi amaro Yesu Kristo ro rosi ma rulo’ba ami cini ri, ädrupii maro, tadriolene tase nyàbe atana be, tana rulonyi ka’do robe i’do ami lako. Nya’do kpeye rudro’bedro’bero, a’done toto tavousu alodi be ago ta alodi be. ¹¹ Tana lidri rukä ni katidri Kuloe ro yasi itiyi tate märi ŋbelero, ädrupii maro, anjioko ekye kalaope orivoya ami lako. ¹² Mi’ba miti tana te liti ono yasi, ami alo alo nyà ta toto ata. Alo ka ata ekye, “Ma oso Paulo vo;” aza ka ata ekye, “Ma oso Apolo vo;” aza ka ata ekye, “Ma oso Petero vo;” ago aza ka ata ekye, “Ma oso Kristo vo.” ¹³ Inye’do Kristo a’do ndi lonyilonyi ro gboko ro ya? Inye’do Paulo dra ni taka dri ta amiro ta ya? Inye’do abapatisi ami te taeri’bai Paulo ro roya? ¹⁴ Maye aro’boya Lu ri tana mabapatisi aza amiro ko e’be gialo Kurisepo ndi Gayo be ayani. ¹⁵ Ka’do inye, ’diaza unina ko atane ekye, abapatisi ami te taeri’bai maro ro. ¹⁶ (Aba owo! mabapatisi Setepano ndi katidri ndaro be kpa; oko mäni ko tana oyine kode mabapatisi ’diazaka kpa ndi.) ¹⁷ Kristo zo ma kote bapatisi oyene. Nda zo ma te Lazokado opene, ago tana itine ko kala tavouni lidri ro rosi, tana ukyi o’ba odra Kristo ro taka dri ana mbara na apa ’da. ¹⁸ Tana lazo ta odra Kristo ro taka dri ro orivoya ta awi yi ànya se kujete ri; oko ama se apate ri anya orivoya mbara Lu ro yi. ¹⁹ Taegyi ka ata ekye: “Meperena tavouni tavouni’bai ro ’da, ago tauni tavotenyi’ba ro manana ’da.” ²⁰ Ka’do inye, e’be tavouni’ba te eŋwaro ya? Kode tavotenyi’ba e’bete eŋwaro ya? Kode kaladiṛi’bai tauniekye ’bädri ono ro eŋwaro ya? Lu ka’date anjioko tavouni ’bädri ono ro orivoya amaama yi! ²¹ Tana Lu tavouni ndaro ya ’ba te rritiro lidri ri nda unine tavouni modo ànyaro rosi. Oko, ŋgase abe uzina lazo amama se mabe opena ono si, Lu ratate ànya se kabe taoma opaza. ²² Yudai leyi talaro ro tana ka’daza, ago Girikii kayi tavouni uṛi. ²³ Oko ama, ma Kristo se otote ana ope, lazo se ono a’dote o’de toromoga ro Yudai ri ago ta awi ro Atrai ri; ²⁴ oko ànya se Lu kuzite, Yudai ndi riti Atrai be ri, lazo ono orivoya ni Kristo, nda se orivoya ni mbara Lu ro ago tavouni Lu ro owo. ²⁵ Tana ŋgase kabe landre oso amaama Lu ro orivoya tavouni ndra be ni tavouni lidri ro ri, ago ŋgase kabe landre oso mbaraako Lu ro orivoya mbara be ndrani mbara lidri ro ri. ²⁶ Ka’do inye miyi a’do se nyà’do be tana, ädrupii maro, tuse Lu kuzi ami be si ana. Ŋgaondre lidri ro voro ami fere orivoya tavouniekye yi kode mbaraekye yi kode ’di’desi para yi. ²⁷ Lu njite ŋgase ’bädri kabe tana o’ba ŋga amamaro ayani tana ko’ba tavouni’bai robe driupiro, ago nda njite ŋgase ’bädri kabe ondrena mbaraako ayani tana ko’ba mbara’bai robe driupi ro. ²⁸ Nda njite ŋgase ’bädri kabe voondre driigye vuru ro ago kabe mawona ago kabe tana usu ta awi ro ’do ayani, tana kepere ŋgase ’bädri kabe tana o’ba tapara ro iyi robe. ²⁹ Ta ono ro ’diaza unina ko driuŋgyine Lu kandra. ³⁰ Oko Lu ezi ami te le rumora Kristo Yesu be ya, ago Lu ’ba Kristo te a’done tavouni amaro. Nda si a’ba ama te ŋgye Lu be; ma’dote lidri alokado Lu ro ago a’bate dritai ro. ³¹ Ka’do inye, oso taegyi kabe ata ronye ekye: “Nda se kolebe driuŋgyine beṛo ndäri driuŋgyine tase Opi koyete ya ayani.”

¹ Tuse mikyibe amire, ädrupii maro, ta dämbidämbi taŋgye Lu ro ro opene, mape kote ata ’desi si ago tauni para si. ² Tana ma bedri orivoya ami yibe, ma’ba tauni drî maro rote ta ŋga cini ro ijene e’be gialo Yesu Kristo ago ndrana odra ndaro taka dri. ³ Tana tuse mikyibe amire, ma mbaraako ago mälä’bite turi amba be, ⁴ ago ŋgaemba maro ndi lazo maro be mozo kote ata tavouni lidri ro rosi se ka ’di leye; oko orivoya taka’daro mbara Tori Lu ro robe. ⁵ Ka’do inye, taoma amiro, ka ko ori tavouni lidri ro dri oko mbara Lu ro dri ayani. ⁶ Caoko mà lazo tavouni ro opena ànya se konde omba ori tori voro rote ri. Oko ko tavouni se ’bädri ono rosi kode mbara yi se kabe ’bädri ono mirina rosi, mbara yi se mbarana kate okye ono. ⁷ Oko tavouni se mabe opene orivoya tavouni dämbidämbiro Lu ro yi, se ada’dote ni lidri cini ri, oko se nda njite ṛo nja ta ama oro rota kpa ṛo teinye ’bädri o’baako. ⁸ ’Dimiri’bai aza ’bädri ono ro niyi tavouni ono ko. Ondro aba ànya kuniyi gwo, ànyari Opi orooro ro otone i’do. ⁹ Caoko, oso taegyi kabe ata ronye ekye: “Tase ’diaza ndre ko kode eri ko, tase ’diaza usutavona ko ekye unina ndi a’done, ṛoni orivoya ŋgase Lu edete ànya se kabe nda lu ri owo.” ¹⁰ Oko Lu ’ba ta dämbidämbiro ndaro te ämäri unine Tori ndaro si. Tori kani ŋgacini uṛi ca ta da’doda’doro gyuru Lu ro. ¹¹ E’be gialo tori ’dialo modo ro se orivoya ya nda modo roya ’do kani ta cini ndaro unina, kpa oso inye, e’be gialo Tori Lu ro ni ta Lu ro cini ni. ¹² Mùsu kote tori ’bädri ono ro ayani, oko mùsute Tori se ni Lu resi ayani, tana mä̀ni ŋgase cini Lu kozobe ämäri robe. ¹³ Ka’do inye, mà ko taope ata se embabe tavouni lidri ro si si, oko ata se embabe Tori si si, mà taŋgye ori tori voro ro tazevona edrena ànya se Tori be ri. ¹⁴ Nda se orivoya Tori ako unina ko ŋgapäṛi se kabe ikyi ni Tori Lu ro resi usune. Lidri nonye ono endaro ni ànya ko; ànya orivoya ta awi yi ndäri, tana kado ànyaro apena vurena toto ori se tori voro si. ¹⁵ Nda se Tori be, caoko, nda orivoya mbara be kado ŋgacini ro vurena opene, oko ’diaza i’do mbara be vure ndaro opene. ¹⁶ Oso taegyi kabe ata ronye ekye: “A’di ni tauni drî Opi ro ro niya? A’di ni mbara be tavoka’dane ndäri ya? Caoko, ama orivoya drî tauni ro Kristo robe.”

¹ Endaro, ädrupii maro, mänina ko atane ämiri oso mabe ata lidri se Tori be ri ronye, matana te ämiri oso ami orivoya ’bädri ono ro ronye; oso ŋgàgaŋwai taoma Kristo roya ronye. ² Meca ami te leyi si, ko ŋgaonya ṛatara rosi, tana ami ko nja tana ro. Ago ca yauono ami ko nja tana ro, ³ tana nyà dri ’du ori oso lidri ’bädri ono ro kabe ori ronye. Ondro yaoko orivoya ami lako ago nyà kalaope azi be, ono ka’da ṛo ko anjioko ami orivoya ’bädri ono ro, nyà ṛo ko ori ori anyaro ronye ya? ⁴ Ondro alo amiro ka ata ekye: “Ma oso Paulo vo,” ago aza ekye: “Ma oso Apolo vo,” inye’do nyà ṛo ko taoye oso lidri ’bädri ono ro ronye ya? ⁵ Inye’do, Apolo a’di owo ya? Ago Paulo a’di owo ya? Ama orivoya toto ruindu’bai Lu ro, se kelepe ami be taomane ono. Ama cini ba alo alo ka losi se Opi kozobe ndäri oyena. ⁶ Mikyi’di kwari te, Apolo so gyi te se koŋgabe dri, oko Lu ’ba se koŋgabe ’do ni ombane. ⁷ Nda se kabe kyi’dina ago nda se kabe gyi oso ko ta amba yi. Lu ni ta para yi, tana nda kani se koŋgabe o’bana ombane. ⁸ A’do toto i’do lakole mano se kikyi’di be ndi mano se koso gyi be driigye be; Lu ozona päläti ’da ’di alo alo ri oso losi se nda koyebe ronye. ⁹ Tana ama orivoya losioye’baazii mà ugu losi oye tro Lu ri ago ami orivoya ämvu Lu royi. Ami kpa orivoya zo Lu ro. ¹⁰ Ŋgapäṛi se Lu kozobe märi ono ugu losi oye sina si, maye losi te zo obe’ba tauniekye ronye ago ma be kotopa te, ago mano aza ka ugu obena driigye. Oko ama alo alo ri a’done taoti be kode nda ka obena ’bo eŋwanye. ¹¹ Tana Lu ’ba Yesu Kristo ṛote nja kotopa alo ro ago nda toto ni kotopa yi, ago kotopa to aza änina ko obene. ¹² Rukäna obena vo ’da kotopa dri logo läguläguro si kode mo’di si kode kunii lagyeamba be si; azaka oyena ’da ce si kode käyi si kode kyekyepa si. ¹³ Ago beti losi ’dialo ro andrena ’da Tu Kristo ro kaka’da te si. Tana tu gi ana si asi ka’dana losi ’dicini ro ’da; asi ojona a’do losi se ’dialo alo koyebe ro ’da. ¹⁴ Ondro ŋgase nda kobebe kotopa dri ana kedre ndi ŋgyiri ni asi risi, obe’ba usuna päläti ndi. ¹⁵ Oko ondro losi ’diaza ro kujete, ’dooko nda ije anya te, oko nda andivo apana ’da, oko gialo toto oso ’diaza se ka vo opa ni asi yasi ronye. ¹⁶ Endaro mini ndi anjioko ami ni yekalu Lu ro, ago anjioko Tori Lu ro ka ori ami ya! ¹⁷ Ago ondro ’diaza ka yekalu Lu ro perena, Lu perena nda ’da. Tana yekalu Lu ro orivoya alokado, ago andivo amiro orivoya yekalu ndaro owo. ¹⁸ Beṛo ko ’diaza ri andivo ndaro o’bane amama ro. Ondro ’diaza ami lako ka tavousu ekye nda orivoya tavouni’ba yi a’do ’bädri ono ro ronye, beṛo ndäri a’done amama ro, tana nda ka’do robe tavouni’ba ro. ¹⁹ Tana tavouni ’bädri ono ro orivoya ta awi yi Lu mile. Oso taegyi kabe ata ronye ekye: “Lu ka tavouni’bai uru tauni ànyaro yasi”; ²⁰ ago taegyi aza ka ata ekye: “Opi ni tavousu tavouni’bai rote anjioko ṛo orivoya takado ako.” ²¹ Ka’do inye, beṛo ko, ’diaza ri driuŋgyine ŋgase lidri kabe oyena ta. Tana endaro ŋgacini ro amiro; ²² Paulo, Apolo, ndi Petero be, ’bädri ono, adri ndi odra be, tase yauono ndi mileya be, vona cini kwoi orivoya amiro, ²³ ago ami ni Kristo ro ago Kristo ni Lu ro.

¹ Beṛo ämiri tavousune ta amaro ta anjioko ama orivoya ruindu’bai Kristo ro, se a’bate dri’ba ro taŋgye ta dämbidämbi Lu rota. ² Ŋga alodi se alebe ruindu’ba oso ono ronye rigyesi, anjioko ndäri a’done ’diri ’desi ndaro ri. ³ Ko orivoya ta amba yi märi ondro mìpe vure maro ca kode vureope’bai ’bädri ono ro kope ca owo, ago mapena vure andivo maro ro kpa ko. ⁴ Tavousu ya maro ro ṛo orivoya ŋbelero, oko anjioko ’do ka’da ko ekye ma orivoya taenjiako. Opi ni se kabe vure maro opena owo. ⁵ Ka’do inye, beṛo ko ämiri vure ’diaza ro opene teinye tu ŋgyena ri esaako. Beṛo vure äduro ri edrene madale Opi esana ni; nda ewena ta dämbidämbiro vouni ya ’da ŋgaeyi ya ago ka’dana ta da’doda’do ro tauni drî lidri ro ro ’da. Ago ’dooko ’dicini usuna räṛu se ta sibe ndäri usune ’da ni Lu resi. ⁶ Ta amiro ta, ädrupii maro, maka’da ta cini ono te Apolo ndi mabe si, ma’ba ama ritu te oso taka’daro ronye, tana mìni takaci ta ata ono ro robe se ekye: “Nyoyi go ndra ŋgase egyibe kundusi.” Beṛo ko aza alo amiro ri a’done driuŋgyi be ta ’dialo rota ago azana mawone. ⁷ A’di ’ba mi ni ndra azi drisi ya? Inye’do Lu ozo ŋgase cini mi be sina ṛoko ni ya? Ka’do inye, minina driuŋgyine eŋwanye, ŋgase mi be sina ṛo ko ŋgapäṛi yi ya? ⁸ Inye’do ami ṛote nja ŋga cini se milebe be ya? Ami ṛote nja ŋgadriamba be ya? Inye’do, nya’dote ’bädri’bai ro, teinye ama ako ya? Male ndi ämiri a’done ’bädri’bai ro, tana anjioko ma’do robe troalo ’bädri’bai ro ami yibe. ⁹ Tana landrebe märi anjioko Lu ozo vo tipari te ama lazo’bai ri, oso lidri se ape vurena te ufune miamba ya ondrene ’bädri cini malaikai ro ri ndi lidri robe ri. ¹⁰ Tana ta Kristo rota ama orivoya amama yi; oko ami orivoya tavouni’bai rudro’be ya Kristo be! Ama orivoya mbaraako, oko ami orivoya mbara be! Amawo ama te, oko aro ami te! ¹¹ Ca gile yauono ama täbiri ro ndi gyilu be; aso boŋgo nyakaca rote ama lomvo; a’bi ama te; màbate vo cini yasi wairowairo; ¹² màrwe tawi ni losi oye mbarasi ri. Ondro atri ama te, mä̀ṛu ’di ṛo äṛu, ondro eza ama te, mìŋgyi ya te, ¹³ olo’da ama te, màza tadrina te ata kado si. Ama ko ndrani ŋga undiro ’bädri ono ro ri; ama orivoya kaŋwa ro ’bädri ri gi le yauono! ¹⁴ Megyi ta ono ämiri, ko tana male ami o’bane driupiro, oko ami embaza oso ŋgwai modo maro mulube ronye. ¹⁵ Tana ondro nyà’do gica voondre’bai kutu ’butealo be ori amiro Kristo’ba roya, ami toto Täpi alodi be. Tana ori amiro ya rudro’be ya Kristo Yesu be ma’dote täpi amiro Lazokado ezi si ämiri. ¹⁶ Ka’do inye, ma rulo’ba ämiri osone taka’daro maro vo. ¹⁷ Tana ta ono ro ma Timoteo ozo amire, nda ni se modo maro mulu tawi ago ŋgwa ’diri ro yi ori Kristo’ba roya. Nda logona ta ’desii se mabe oso voigye ori to’di ya rudro’be ya Kristo Yesu be ndi tase memba be känisa cini ya vo cini yasi be, tana ’da ämidri. ¹⁸ Rukä amiro a’dote driuŋgyi be tana nyusutavote mikye mänina ko ukyine ami täkyine. ¹⁹ Caoko, ondro Opi kole gini, mäkyina ’da amire ndriro, ago ’dooko andivo maro mänina mbara se lidri se driuŋgyi’ba ro ka’do be sina tana ’da, ago ko gialo tase ànya kabe atana ayani. ²⁰ Tana Miri ’Bädri’ba Lu ro ro ko ta ata si oko mbara ya ayani. ²¹ Mile eŋwani ayani ya? Inye’do mäkyina amire co’da be kode tori ŋgalu rosi ndi tokyeako be ya?

¹ Oko, iti tana te märi yauro ekye ta ronyi ro orivoya ami lako koziro para se betina kpa i’do taomaako’bai lako. Iti tana te märi anjioko manoago ka ugu u’du endreazi ndaro toko täpi ndaro robe. ² Ka’do inye, mìnina a’done driuŋgyi be eŋwanye ya? Tana beṛo ämiri a’done tusu ro, ago mano se koye ta nonye ono be, beṛo usine ni rumora amiro yasi. ³ Ago ma gica lozo ni ami resi lomvo ya, ma ’du orivoya ami yibe tori ya. Ago mape vure mano se koye tase koziro para ono rote nja osoago ma orivoya lau. ⁴ Ondro nyòtokalate ävuru Opi amaro Yesu roya ago ma orivoya ami yibe tori ya ago mbara Opi amaro Yesu ro orivoya, ⁵ ämiri mano ’do ozone Satani ri tana enji lomvo na robe, tana apa tori ndaro robe Tu Opi rosi. ⁶ Ko kado ämiri a’done driuŋgyi be! Mini tase ata be te se ekye: “Loŋga giṛiŋwa kani ambata o’ba upine.” ⁷ Beṛo ämiri loŋga uku takozi ro onane tana nya’do robe cu wäṛiro. ’Dooko nya’dona ’da oso duŋguṛu to’di ronye teinye loŋga aza ako, mänite endaro ami orivoya oso inye. Tana Karama Lävu Odra ro amaro te orivoya nja, yauono Kristo, ni timelegogo Lävu Odra ro amaro, alo ṛote. ⁸ Mì’de màye Karama Lävu Odra ro ro amaro, oko, ko ambata se loŋga uku takozi ndi taenji be rosi, oko ambata se loŋgaako si, ambata wäṛiro ndi taŋgye be rosi. ⁹ Taegyi se megyibe ämiri ana ya megyite ämiri mititate ämiri ko rudro’bene lidri ronyi’ba be. ¹⁰ Ma ko ta taomaako’bai se ronyi’ba ro, kode yagäru’ba ro kode kugu’ba ro kode ànya se kabe lui edeedero ’bädri ono ro mätuna tana atana ayani. Ka’do be ämiri ruonane ni ànya resi, e’be gialo ämiri ofone ni ’bädri ono yasi. ¹¹ Tase musube ni ono anjioko beṛo ko ämiri rudro’bene ’dise kuzi andivo ndaro te ädrupi oko orivoya ronyi’ba yi kode orivoya yagäru’ba yi kode orivoya lui awi mätu’ba yi kode orivoya kyere’ba yi kode orivoya yi ufu’ba yi wa si kode orivoya kugu yi. Ko ämiri orine ŋgaonyane lidri oso nonye ono be. ¹² Ko losi maro vure tesi’bai ro opene. Inye’do ṛo ko ämiri gboko modo rumora amiro ro vurena opena ya? ¹³ Lu opena vure anya se tesisi’bai ro ni. Oso taegyi kabe ata ronye ekye: “Mìna mano kozi ni gboko amiro yasi.”

¹ Ondro alo aza amiro kalaope be Kristo’ba azi be, nda le gwo tana ugune vureope’bai taomaako’bai ro kandra ago lidri Lu ro edre tana ko ni etaya? ² Inye’do mini ṛo ko lidri Lu ro opena vure ’bädri ro ’da ya? Ondro ka’do, nyà ni oye vure ’bädri ro opena, inye’do ami ṛo ko tauni be vure tase giṛiŋwa ro ro opene ya? ³ Inye’do mìni ṛo ko anjioko màpena vure malaikai ro ’da ya? Se ndrani vure ori ono ro opene ri! ⁴ Ondro ta nonye ono ka’dote, inye’do nyà oye ànya ugune tana edrene lidri se vo ako känisa ya siya? ⁵ Driupi ka’do ämidri! Endaro ’diaza orivoya ami lako rumora amiro ya tavouni be unina ndi ta kalaope ro Kristo’bai azi be tana edrene. ⁶ Oko, Kristo’bai azi ka oyi vure ya azi kicune ago ’ba taomaako’bai gwo ni vure opene! ⁷ Ndi endaro tase ami orivoya kalaope be andivo amiro lako ono ka’date anjioko ta pe ami te cu ṛe. Inye’do a’do ṛo ko kado ni ami oyene koziro ya? Inye’do a’do ṛo ko kado ni ŋga amiro topane ya? ⁸ Oko, ami andivo miye azi te koziro ago nyotopa ŋga azi rote, ca ädrupii modo amiro ro! ⁹ Mìni ṛote takozi’ba unina ko Miri ’Bädri’ba Lu ro ro urune. Mì’ba andivo amiro ko amama ro, lidri se orivoya ronyi’ba yi kode se kabe lui edeedero mätu ago kode ronyi oye’ba yi ago kode toko drisi kode se kabe ronyi oye manoago azi be ¹⁰ kode kabe ŋga kugu kode orivoya yagäru be kode orivoya yi ufu’ba yi wa si kode azi kyere’ba yi kode orivoya kugu’ba yi alo aza ’di kwoi ro uruna Miri ’Bädri’ba Lu ro ro ko. ¹¹ Rukä amiro orivoya oso inye. Oko äwäṛi ami teni takozi ri; adi ami te to Lu ri Opi Yesu Kristo si ago Tori Lu amaro rosi. ¹² ’Diaza atana ’da ekye: “Aletadrite märi ŋga cini oyene.” Owo; oko ŋga cini ko kado ämiri. Mänina ndi atane makye aletadrite märi ŋga cini oyene, oko mänina ko tadriolene ŋga aza ri ma o’bane iyeäṛi ndaro. ¹³ ’Diaza atana ’da ekye: “Ŋgaonya orivoya tana ya, ago ya tana ŋgaonya.” Owo; oko Lu perena ànya riti ’da. Lomvo ko ronyi oyeza, oko ruinduza Opi ri; ago Opi kani ŋga ozo lomvo ri. ¹⁴ Lu eŋga Opi teni avo yasi, ago nda eŋgana ama kpa ’da mbara ndaro si. ¹⁵ Mìni ndi anjioko lomvo amiro orivoya telesi lomvo Kristo ro ro. Inye’do märuna telesi lomvo Kristo ro ro gwo ago ma’bana gwo a’done telesi lomvo märänyi’ba ro roya? Rritiro! ¹⁶ Kode mìni ṛo ko anjioko mano se kabe lomvo ndaro dro’bena märänyi’ba be ronyi oyene ka ṛo a’do lomvo alo ro anya be ya? Taegyi ata ṛo ŋbelero ekye: “Riti a’dona ndi lomvo alo ro.” ¹⁷ Oko nda se kabe andivo ndaro dro’be Opi be a’dona ndi tori alo ro nda be. ¹⁸ Mina ta ronyi ro. Takozi aza se lidri kabe oyena enji lomvo ndaro ko, oko mano se kabe taenji ronyi oyesi ka lomvo modo ndaro ro enjina. ¹⁹ Inye’do mìni ṛo ko lomvo amiro ni yekalu Tori Alokado ro, se kabe ori ami ya ago se ozote ämiri Lu si ya? Ami ko andivo amiro ro oko Lu ro; ²⁰ nda gye ami te lagye amba si. Ka’do inye mìro Lu lomvo amiro si.

¹ Oko ta tase nyegyibe ono ro ta: Orivoya kado manoago ri ko lagye ogyene. ² Oko tana ta ronyi ro te orivoya amba ami lako ono, beṛo manoago alo ri a’done toko modo ndaro robe, ago beṛo toko alo ri a’done ago andivo anyaro robe. ³ Beṛo manoago ri kama ndaro a’doro agoro oyene, ago beṛo toko ri kama anyaro a’doro toko ro oyene, ago ’dialo kozo se beṛo ozone azi ri ’do. ⁴ Toko ko orivoya ni ’desi lomvo modo anyaro ro, oko ago anyaro ayani; kpa inye ago ko ’desi lomvo modo ndaro ro, oko toko anyaro ayani. ⁵ Nyalaga andivo amiro ko azi ri, e’be gialo miletadri käti oyene inye tuna fere tana nyozo tu robe mätu oyeza; ago ’dooko migo nyeto ami dro’be. Ugu oyena si nonye nyagagana ami ndi ni ugu ruozovoya taojoro Satani ro ri ta andivo amiro rita akona rota. ⁶ Ma ta ono iti ämiri ko ota ro, oko gialo tavo ozoro. ⁷ Endaro male ṛo aba a’done ami cini ri oso ma ronye; oko ’di alo alo ŋgapäṛi iro be ni Lu resi, ’dialo ŋgapäṛi ono be azana ŋgapäṛi ana be. ⁸ Oko ma ata ruogyeako’bai ndi ävuzii be ri anjioko aba ni kado ämiri orine iṛe oso ma ronye. ⁹ Oko ondro mini kote ami ritane migye ami ri, tana orivoya kado para ami ogyene ni tausune tana ro. ¹⁰ Ma ta be lidri se gyeyi iyi te ri se ko ni ta ma modo ro oko ni Opi ro; beṛo ko toko ri ago anyaro e’bene; ¹¹ oko ondro koyete inye, beṛo anyari orine iṛe kode kogo kodro’be iyi ago anyaro be; ago beṛo ko ago ri toko ndaro onjine. ¹² Ma ata azaka ri (ma andivo owo, ko Opi owo); makye: Ondro mano aza Kristo’ba ro toko be se orivoya taomaako’ba yi ago anya le ndi ugu orine nda be, beṛo ko ndäri toko ndaro onjine. ¹³ Ago ondro Kristo’ba toko ro kuru mano se taomaako’ba ro te ago nda lendi ugu orine anya be, beṛo ko anyari nda e’bene. ¹⁴ Tana ago taomaako a’ba nda te alokado Lu ri taoma toko ndaro ro si, ago toko taomaako a’ba anya te alokado Lu ri taoma ago anyaro rosi. Ondro ono ka’do kote inye ŋgwai ànyaro a’dona oso ŋgwai taomaako’bai ro ronye; oko oso ka’dobe ronye, ànya orivoya alokado Lu ri. ¹⁵ Caoko, ondro nda se i’do taoma’ba yi kole ndi ori’baazi se Kristo’ba yi e’bene, mi’ba nda koye ndi inye. Ta anya oso ’do ronye, oriazi se Kristo’ba ro kode manoago yi kode toko yi, orivoya dritai ro tase oyero oyene. Lu zi ami te orine liatokpe ro. ¹⁶ Toko Kristo’ba ro inye’do endaro minina ko ago miro opane ya? Kode ago Kristo’ba ro, inye’do endaro minina ko toko miro opane ya? ¹⁷ Beṛo ’dialo ri ugu orine ŋgapäṛi Opi ro ndäri voro, ago oso nda ka’dobe tuse Lu kuzi nda be si ronye. Ono ni ota se mabe embana känisa cini yasi owo. ¹⁸ Ondro mano se alote ŋbiṛiro kole läzi Lu ro tadrina te, beṛo ko ndäri mbere oloŋbiṛiro ro onane. Ondro mano se oloako ŋbiṛiro kole läzi Lu ro tadrina te, beṛo ko nda olone ŋbiṛiro. ¹⁹ Tana olo ŋbiṛiro kode oloako ko ta amba yi, oko tase ta amba yi ota Lu ro orone. ²⁰ Beṛo ’dicini ri orine oso nda ka’dobe tuse nda kole läzi Lu ro tadrina be sina ana si ronye. ²¹ Tuse Lu kuzi mi be sina si mi iyeäṛi yi ya? Ka’do inye, miru tana ko, oko ondro nya’do te kandrakado be a’done dritai ro, miye inye. ²² Tana iyeäṛi se äzite Opi si orivoya mano dritai ro Opi ro. Kpa oso inye mano se äzite dritai ro Kristo si orivoya iyeäṛi ndaro. ²³ Lu gye ama te lagyeamba si, ka’do inye, nyà’do ko iyeäṛi lidri ro. ²⁴ Ädrupii maro, beṛo ’dialo alo ri orine rumora ya Lu be a’do se äzi nda be kigye ya. ²⁵ Oko tase nyegyibe märi ta ruogyeako’bai rota, ma ota ako ni Opi resi tana ro, oko ma tavousu maro ozona oso ’dise yauni Opi rosi sindi taoyine tana ya ronye. ²⁶ Rriti se yauono ugu tazevona usu si, musu maro be ni kado manoago ri orine oso nda ka’do be ronye. ²⁷ Inye’do mi toko be ya? Ka’do inye nyojo ko anya onjine. Inye’do mi toko ako ya? Ka’do inye miṛi toko ko. ²⁸ Oko ondro nya toko ogye, miye kote takozi yi, ago ondro toko ogyeako ka ago uru, anya ye kote takozi yi. Oko male ami opane ni rriti se lidri se kogye lagye be kabe usuna yasi. ²⁹ Tase musube ni no, ädrupii maro, tu e’bete fere, etoni yauono oyigwo mileya ro beṛo ’dise toko be ri orine oso ànya toko ako ronye; ³⁰ ànya se kayibe liyi, oso ànya a’do ko tusuro ronye; ànya se kayibe ugu, oso ànya a’do ko yai’dwesi ronye; ànya se kayibe ŋga ogye, oso ànya a’do ŋga ako ronye; ³¹ ànya se kabe ŋga ’bädri ono ro tana otina, a’do oso ànya ŋga aza ako amba ronye. Tana ’bädri ono, oso kabe a’do yauono ronye, orina ko madaro. ³² Male ämiri a’done dritai ro milo’be ako. Mano se gye lagye ko orivoya ondoalo taoti be losi Opi ro ta, tana nda ka ruutri ta ndaro ri Opi usine. ³³ Oko mano se kogye lagye be ka ta ŋga ’bädri ro otina ayani, tana nda le ta ndaro ri toko usine; ³⁴ ago tausu ndaro elewe te ritu. Toko ogyeako kode ŋgutikodroŋwa andivo anyaro ti ta losi Opi ro ro, tana anya le yi ozone Opi ri lomvo ndi riti tori be; oko toko se agyete andivo anyaro ti ta ŋga ’bädri ro ro, tana anya le ta anyaro ri ago usine. ³⁵ Ma ugu ta ono atana tana male ami opane. Ma ko ojo ami lagane. Oko male ämiri tase ŋgye kado oyene, ago andivo amiro ozone cu ruindu Opi ri ya teinye ruetaako. ³⁶ Oko ta rulu’bu ’di ritu se ratate ko ruogyene rota; ondro manona kusu tate ekye ya ko taoye ŋgyero ŋguti iro ri ondro ka’do anya konde omba te ago nda kusu tate beṛo lagye ogyene, anjioko beṛo ànyari ruogyene; oso nda kolebe ronye. Takozi i’do ta ono ya. ³⁷ Oko ondro mano aza se kole ko oyene inye, ago ko’ba ta ndaro te tavousu ya ndaro rosi ko lagye ogyene, ago ondro ole ndaro si nda kirita yi te ago koratate tavousu modo ndaro rosi tase oyene ta, ’dooko nda yete kado ko ŋguti ’do ogyene. ³⁸ Ago mano se kabe lagye ogye yete kado, oko nda se gye lagye ko yete kadopara. ³⁹ Toko se agyete ko orivoya dritai ro, ondro ka’do ago ànyaro ka’do drigi lidriidriro owo; oko ondro ago anyaro kodrate; ’dooko anya te orivoya dritai ro yi ogyene mano se anya kolebe ri, oko gialo ondro nda orivoya Kristo’ba yi owo. ⁴⁰ Caoko, anya a’dona yai’dwesi ndra, ondro anya kori gwo yi ogyeako owo. ’Do orivoya tavousu maro, ago musube anjioko ma kpa orivoya Tori Lu robe.

¹ Oko, tase nyegyibe ta ŋgaonya se ozobe lui awi ri rota, ndi endaro, anjioko “vo amaro cini ndi tauni be,” oso ànya kayibe ata ronye. Caoko, tauni nonye ono ka ’di o’ba ovane driuŋgyi be, oko ŋgalu kani ’di omo voaloya. ² Nda se kabe tausu nda ni ŋga cini te endaro nda ni ko oso se beṛo unine ronye. ³ Oko ’dise kabe Lu lu Lu ni nda te. ⁴ Ka’do inye, ta ŋgaonya se ozote lui awi ri ugu onyana rota; mäni ndi anjioko lu awi ŋga awi yi se a’do ko endaro; mäni ndi anjioko Lu toto alodi. ⁵ Ondro äzi ŋga amba ca orivoya “lui” ’bädri ya kode vo’buyakuru ya, ago ŋgase amba kwoi ka’do gi ca “lui” ago “opii,” ⁶ caoko ämäri Lu toto alodi, Täpi, se orivoya O’ba’ba ŋga cini ro ago mà ori nda si; ago Opi orivoya toto alodi, Yesu Kristo, se a’ba ŋga cini te nda si ago mà ori nda si. ⁷ Oko ’dicini ni taŋgye ono ko. Rukä lidri ro ka losi oye lui awi ri gile tu yauono si ondro ànya kayite ŋgaonya se nonye ono onyana ànya kayi ’du tana usuna ekye ŋgaonya lu awi ro; tavousu ya ànyaro ro orivoya mbaraako, ago ànya kayibe usuna enji ànya te undiro ŋgaonya si. ⁸ Caoko, ŋgaonya, o’bana ama ko a’done ti Lu be; mä̀nina ko ŋga aza ijene ondro mànya ŋgaonya ca ko owo kode ŋga aza usune ondro mànya ŋgaonya ca owo. ⁹ Caoko nyà’do taoti be, mì’ba dritai taoye amiro ro ko’ba ànya se mbaraako taoma ya ko o’dene takozi ya. ¹⁰ Aba ’diaza se tavousu ya ndaro ro orivoya mbaraako kondre mi, se äzibe “tauni” be, ka ugu ŋgaonya yekalu lu awi roya, inye’do ta ono o’bana nda ṛo ko ŋgaonya se ozote lu awi ri onyane ya? ¹¹ Ta ono si ’dise mbaraako, ädrupi amiro se Kristo kodrabe tana ro ono, enjiruna ndi ta tauni miro rosi! ¹² Ago ta ono si nyà ugu takozi oye Kristo lomvo ugu takozi oye si ädrupii amiro Kristo’bai lomvo ago nyà ugu tavousu mbaraako ya ànyaro ro enjina. ¹³ Ka’do inye, ondro ŋgaonya kani ädrupi maro o’bana takozi oyene märi ogone iza onyane tona te i’do, tana ukyi ma’ba ädrupi maro ’da o’dene takozi ya.

¹ Inye’do ma ṛo ko mano dritai ro yi ya? Inye’do ma ṛo ko lazo’ba yi ya? Inye’do mandre Yesu Opi amaro ṛo ko ya? Ago Inye’do ami ṛo ko ni ’dise losi oye maro Opi ri kezibe owo ya? ² Ondro ’diazaka kuruyi ma ca ko lazo’ba ro oko, endaro miru ma ndi! Tana ta rudro’bero amiro Opi be si andivo amiro ka’da taŋgyena te anjioko ma orivoya lazo’ba yi. ³ Ondro lidri kokozi ma te oko, medretazevo maro te andivo maro ta nonye. ⁴ Inye’do ozo drikaca dritai ro ko ŋgaonya ndi ŋgaumvu be ozone märi ta losi maro rota ya? ⁵ Inye’do ma ṛo ko dritai be osone taka’daro lazo’bai azaka ndi ädrupii Opi ro ndi Petero be ro vo, toko Kristo’ba ro uru si ma be aba maro ya ya? ⁶ Kode Baranaba ndi ma be toto ni ’dise losi oyene ta ori amaro rota owo ya? ⁷ Kyila’ba eŋwani kani ŋga ozo ta päläti modo ndaro rota ya? Ämvuoso’ba eŋwani nya doŋgo ko ni ämvu kono ro modo ndaro ro yasi ya? Lekye’ba eŋwani mvu leyi tii modo ndaro ro ko niya? ⁸ Male ko andivo maro etane taka’daro tu cini oriro kwoi si, tana Ota ata kpa nonye. ⁹ Mäzite ni Ota Musa ro yasi ekye: “Nyembe kala ’daŋgo ro ko ondro nyate losi oye sina inya olovoya owo.” Inye’do Lu ndre gialo vo ’daŋgo ro ayani ya? ¹⁰ Inye’do nda kabe ta ono atana nda ata ṛo ko ta amaro ta ya? Endaro egyite ta amaro ta. Mano se kabe ämvu oso ago mano se kabe olona beṛo losi ànyaro oyene mio’ba si anjioko ŋgase kowa be la’done. ¹¹ Màri kwari Tori rote ami lako, inye’do orivoya ta amba yi ondro mùsu ŋga lomvo ro bete ni ami rigyesi ya? ¹² Ondro ’di azaka dritai ro mio’ba be ŋga usune ni ami rigyesi, inye’do ama ṛo ko dritai be ndra ya? Caoko màye losi kote dritai ono si, oko mìŋgyi ŋga cini te tana ukyi màlaga Lazokado ta Kristo rota ’da. ¹³ Endaro mìni ṛo te anjioko lidri se kayibe losi oye Yekalu ya usuyi ŋgaonya ànyaro teni Yekalu ya ago ànya se kayibe tori olo vo tori oloro ya usuyi ŋga teni vo tori oloro ya. ¹⁴ Kpa oso inye, Lu ta ànya se kayibe lazo ope te, beṛo ànyari ŋga ori ànyaro ori ro usune ni kigye. ¹⁵ Oko dritai se kwoi maye ŋga alo aza ko sina, mugu ta ono egyina be yauono ma kpa ko taeji ta ŋga rota andivo maro ri. A’dona kadopara märi odrane ni ’diaza ri driuŋgyi maro ono tozane ata awi ro! ¹⁶ Ma mbaraako driuŋgyine tana mabe lazo ope ono ro. Caoko ma orivoya ota zele oyene inye. Ago a’dona ndi koziro märi ondro mape lazo kote owo! ¹⁷ Ondro maye losi maro te dritai ro ole maro si, ’dooko mänina ndi mio’bane päläti ta; oko moyena ta kama rota, tana Lu yitate ma ya ta losi ono rota. ¹⁸ Ka’do inye, päläti se musuna tana ro ’bo e’diya? Orivoya ni takado Lazokado opero teinye ugu päläti eji ako tana ro, mugu driovi kote ta ŋga usu rota ta losi maro lazokado opero ta. ¹⁹ Ma orivoya mano dritai ro yi, ko iyeäṛi ’diaza ro; oko ma’ba andivo maro te a’done iyeäṛi ’dicini ro tana mezi lidri robe amba Yesu re. ²⁰ Mabe ugu losi oye Yudai be, ma ori oso Yudai ronye, tana mezi ànya robe Yesu re; ago andivo maro ca i’do Ota Musa ro zele, mari ndi oso mabe ugu losi oye ànya se Ota zele be ronye, tana mezi ànya robe Yesu re. ²¹ Kpa oso inye, mabe ugu losi oye Atrai be, mari kpa oso Atra ronye se i’do Ota Yudai ro zele ronye, tana Atrai ezine, ono ko ekye tana maro Ota Lu ro ko; ma orivoya endaro Ota Kristo ro zele. ²² ’Dise mbaraako taoma ya lako ma’do kpa mbaraako oso ànya ronye, tana mezi ànya robe. Ma’dote ŋgacini ro lidri cini ri, tana mapa rukä ànyaro robe, ondro ka’do ndi rritiako owo. ²³ Ta cini ono mayete ta lazo opero ta, tana mala’do äṛu anyaro robe. ²⁴ Endaro mini ndi anjioko umu’bai amba ciyite umukyekye ya oko toto alodi ànyaro kani ŋgapäṛi uru. Ka’do inye, mimu oso ’do ronye miru ŋgapäṛi robe. ²⁵ Ojioye’bai cini uguyi iyi embate iyi laga si ŋga cini ya, tana tagyia se o’dio’di kabe ori fere ono osoza, oko mà amaro oyena tagyia se kabe ori äduako ta. ²⁶ Ono ni tase mabe umu ŋgyero masa robe ondevona ya owo; ono ni tase malaba be oso ’dise kabe kyila oye ’diudi si drí si se si vo awi ko ronye. ²⁷ Mesi lomvo maro te ṛo ruudivoya, ago mirita anya te kpeye, andivo maro gaga si ukyi azi uzi kyekye ya vosi oko anja ma te.

¹ Male ämiri ta ono tana oyine ädrupii maro, tase ka’dobe zutui amaro se kesobe Musa vo ri ana. Ànya cini a’dote ŋgagaga ’dikolo ro zele, ago vona cini lävute londro ro Gyi’desi Okaro yasi. ² Vona cini abapatisite ’dikolo ndi gyi’desi be ya oso’bai ro Musa vo. ³ Vona cini nyayi ambata tori rote ⁴ ago mvuyi ŋgaumvuro tori ro kpate. Ànya mvuyite ni luutu tori ro se oyibe ànya be ana yasi; ago luutu se ana ni Kristo andivo owo. ⁵ Caoko Lu ko yai’dwesi amba ànyaro be, ago avo ànyaro eperete vocowa ya. ⁶ Ago tase cini ono taka’daro yi ämäri, ama embaza ko ŋgakozi olene, oso ànya koyebe ronye, ⁷ ko lui awi mätune, oso rukä ànyaro koyebe ronye. Oso taegyi katabe ronye ekye: “Lidri rite vuru karama onyane se zarute ta ’diufuro wa si ro ndi ronyi be.” ⁸ Beṛo ko ämiri taenji ronyi oyero oyene, oso rukä ànyaro koyebe ronye ago kutu ’buteritu fonätu ànyaro todrate u’du alo ya. ⁹ Beṛo ko ämäri ta Opi ro ojone, oso rukä ànyaro koyebe ronye, ago utufu ànya te ini si. ¹⁰ Beṛo ko ämäri driovine, oso rukä ànyaro koyebe ronye, ago utufu ànya te Malaika Odra rosi. ¹¹ Tase cini ka’dobe ànyari kwoi orivoya taka’daro yi azii ri, ago egyi ànya te vuru miomba ozoza ämäri. Tana mà ori tuse ädu ’bädri ro ka oyebe ikyine sina ya. ¹² Nda se kabe tausu ekye ya edre ŋgyiri ka’do taoti be kadoro ukyi nda o’de ’da. ¹³ Taojoro se cini kabe drio’be ami be ni se kabe ikyi ondoalo lidri ri owo. Oko Lu ka tao’ba ndaro ätina, ago nda o’bana ami ko ojone ndrani mbara amiro edrero ŋgyiri drisi; tuse a te ami ojo sina si, nda ozona mbara ’da ämiri anya iŋgyiza, ago ozona liti ruoparo ’da ämiri vo opaza. ¹⁴ Ka’do inye bereazii maro, mina ami pere ni mätu lui awi ro yasi. ¹⁵ Ma ata ämiri oso lidri tauni be ri ronye; mìpe vure tase mabe atana ro andivo amiro si. ¹⁶ Kofo se màbe ŋga umvu sina Ŋgaonya Tandrwedri Opi roya ago se màbe aro’boya ozo Lu ri tana ro; ondro mà te ŋga umvu ni kigyesi; mà kari Kristo ro la’dona. Ago ambata se mà be towana; ondro mà te onyana, mà ugu lomvo Kristo ro la’dona. ¹⁷ Tana duŋguṛu ambata ro orivoya alodi, ama cini, ca amba; orivoya lomvo alodi yi, tana ama cini mà duŋguṛu alodi na ’do la’do. ¹⁸ Nyusu ta lidri Yisaraele ro; ànya se kabe ŋgase alote tori ro onyana, la’doyi ruindu se vo tori oloro ya Lu ri te. ¹⁹ Ka’do inye, matana ’bo ndi makye lu awi kode ŋgaonya se ozote rigye gindi endaro ŋga yi ya? ²⁰ Hwa! Ma ugu ata makye ŋgase alote tori ro vo tori oloro taomaako’ba ro dri ozote demonai ri, ko Lu ri. Ago male ko ämiri a’done ŋga la’do’bai ro demonai be. ²¹ Minina ko ŋgaumvune ni kofo Opi ro yasi ago kpa ni kofo demonai ro yasi; minina ko ŋgaonyane ni tara’biza Opi ro drisi ago kpa ni tara’biza demonai ro drisi. ²² Kode inye’do male Opi o’bane a’done yaoko be ya? Inye’do musube mbara amaro ndrani nda drisi ya? ²³ Ànya ekye: “Aletadrite ämäri ŋga cini oyene.” ’Do ndi endaro, oko ŋga cini ko orivoya kado. “Aletadrite ämäri ŋga cini oyene” Oko ŋga cini orivoya ko ’diopaoparo. ²⁴ Beṛo ko ’dialo ri ugu ŋga uṛine ta modo ndaro rota, oko ta azii rota ayani. ²⁵ Ami orivoya dritai ro ŋga cini se agyete vo iza logyero ya onyane, teinye ta azaka ejiako tana ro tana ta tavousu ya amiro rota. ²⁶ Tana oso taegyi katabe ronye ekye: “’Bädri ndi ŋgase cini kigye ono be orivoya Opi ro.” ²⁷ Ondro taomaako’ba keji mi te ŋgaonya onya ago miratate oyine, minya ŋgase a’babe mikandra ’do, teinye taejiako tana ro tana ta tavousu ya miro rota. ²⁸ Oko ondro ’diaza katate miri ekye: “Ŋgaonya ono ozote lui awi ri,” ka’do inye minya ŋgaonya ana ko, ta nda se kititabe miri rota ago ta tavousu ya rota, ²⁹ ’do ko, tavousu ya modo miro rota, oko ta tavousu ya ’dina ’do ro rota. Ka’do inye, ’dooko, mano aza keji ta gwo ekye: “Dritai maro a drina o’bina tausu ’diazi rota etaya? ³⁰ Ondro ma aro’boya oye Lu ri ta ŋgaonya maro rota, ka’do inye ’diaza mawona ma gwo ta ŋgaonya se maye aro’boya be oye tana ro ono ta etaya?” ³¹ Ka’do inye, ŋgase nyàbe oyena, kode nyà onyana kode umvuna, miye ri cini räṛu Lu rota. ³² Miri ori liti se kunina ko o’de toromoga ozone Yudai ri kode Atrai ri kode känisa Lu ro ri ’do aya. ³³ Miye kpa oso mabe oyena ronye, mojote lidri o’bane riyä ro ŋgase cini mabe oyena ya, ko takado modo maro ro ugu tavona usune, oko takado ’dicini ro ayani, tana apa ànya robe.

¹ Ka’do inye, mìso taoye maro vo, kpa oso mabe oso taoye Kristo ro vo ronye. ² Märäṛu ami tana ondoalo nyà ta maro oyina ago nyà oso ŋgaemba se mozobe ämiri vo. ³ Male ämiri unine anjioko Kristo orivoya dri’ba lidri cini ro, ago orivoya dri’ba toko ndaro ro, ago Lu orivoya dri’ba Kristo ro. ⁴ Tana manoago se ka mätu oye kode ka lazo Lu ro opena miamba ya drî ndaro takotako ro, ro Kristo ko. ⁵ Ago toko se ka mätu oye kode ka lazo Lu ro opena miamba ya tako drî anyaro ko ro ago anyaro ko; a’do toto i’do lakole ànyaro ya ndi toko se ävu drî na te be. ⁶ Ondro toko katako drî anyaro kote, ni kado anyari drî anyaro uvune. Ago ondro ka’do te driupiro toko ri drî anyaro uvune, beṛo anyari drî anyaro takone. ⁷ Ko kado manoago ri drî ndaro takone, tana nda ni beti ndi liŋgyi Lu ro owo; ⁸ tana a’ba manoago kote ni toko yasi, oko toko ni manoago yasi. ⁹ A’ba manoago ko ta toko rota, oko a’ba toko te ta manoago rota. ¹⁰ Ta malaika rota, anjioko beṛo toko ri drî anyaro takone taka’daro ro anjioko anya orivoya drikaca ago anyaro ro zele. ¹¹ Ta ori amaro Opi ya rota, caoko, toko ko dritai ro manoago ako, ca manoago ko dritai ro toko ako. ¹² Tana oso a’ba toko ni manoago yasi ronye, kpa inye äti manoago te toko si; ago Lu ni orivoya se ko’ba ŋga cini be ni a’done owo. ¹³ Mìpe vurena andivo amiro si kode ndi kado ’ditoko ri Lu mätune miamba ya ŋga aza ako drî anyaro ya ya? ¹⁴ O’ba ŋga ro emba ami te anjioko drikyiri kaca manoago dri ’ba nda ndi driupiro, ¹⁵ oko toko dri orivoya ta liŋgyi ro yi. Drikyiri kaca ozote anyari drî anyaro takoza. ¹⁶ Oko ondro ’diaza kolete kalawasane tana ro, tase cini märi atane anjioko ni ’do tana ca ama kode känisai Lu ro la’bii aza ako mätu ya. ¹⁷ Ŋgaemba ono voro, caoko, märäṛu ami ko, tana kalaoto amiro ta mätu rota ye takozi ṛo ndrani takado drisi. ¹⁸ Käti ono, iti tate märi anjioko rulewe orivoya kalakoto amiro ya; ago mama ndi telesi tana ro orivoya endaro. ¹⁹ (Kowe i’do, beṛo rulonyi ri a’done ami lako tana nda se orivoya taŋgye be andre robe ŋbelero.) ²⁰ Ondro nyòtokalate voaloya, ’do nyà ko Ŋgaonya Tandrwedri Opi ro onyana. ²¹ Tana nyàbe onyana, ’dialo ugu ṛo ŋgaonya modo ndaro ro onyana, ago rukäna orivoya täbiri ro ago azakana fuyi iyi te wa si. ²² Inye’do ami ’ba modo amiro ro ako ŋgaonyaza ago ŋgaumvuza kigye ya? Kode mile ṛo känisa Lu ro mawone ago driupi o’bane lidri se lemeri be dri ya? Mile märi te e’di atane ämiri ta ono ta ya? Märäṛuna ami gindi ya? Märäṛu ami ko! ²³ Ŋgaemba se mocopebe ämiri ono musute ni Opi resi; anjioko Opi Yesu, ŋgäkyi se ozo drí ndaro te sina ana si, ru kye’beŋwa ambata ro gwo, ²⁴ ozo aro’boya te Lu ri, wate, ago atate ekye: “Ono orivoya lomvo maro, ta amiro ta. Miye ono ta maro oyiza.” ²⁵ Kpa oso inye, ŋgaonya tandrwedri ro vosi oko nda ru kofo gwo ago atate ekye: “Kofo ono orivoya tao’baro to’di Lu ro, a’bate kari maro si. Nyà te umvuna oko, mìye ndi inye ta maro oyiza.” ²⁶ Tu cini se nyàbe ambata ono onya sina ago nyàbe ŋgaumvu ni kofo ono yasi nyà odra Opi ro tana opena madale nda egona ni. ²⁷ Ondro ’diaza ka ambata Opi ro onyana kode ka ŋgaumvu ni kofo ndaro yasi liti se tana kusi nda be ko yasi, nda orivoya taenji takozi robe lomvo Opi ro lomvo ndi kari ndaro be. ²⁸ Ka’do inye, beṛo ’dicini ri andivo ndaro enane käti, ’dooko ko’de gwo ambata onyane ago ko’de gwo ŋgaumvune ni kofo yasi. ²⁹ Tana ondro nda kuni takaci lomvo Opi ro ro kote ondro nda kate ambata onya ago kate ŋgaumvu ni kofo yasi, nda ka vure ezi andivo ndaro dri ambata ndi ŋgaumvu robe si. ³⁰ Ta’dota amba amiro orivoya adravoro ago mbaraako, ago amba todrate. ³¹ Ondro mèna andivo amaro te käti, ämäri ikyine vure Lu ro zele i’do. ³² Oko ape vure amaro te ago Opi eza ama te, tana ukyi ago apena vure amaro ’da troalo ’bädri be. ³³ Ka’do inye, ädrupii maro, ondro nyà te kalakoto voaloya Ŋgaonya Tandrwedri Opi ro onyane oko, nyokote azi. ³⁴ Ago ondro ’diaza ka’dote täbiri ro; beṛo ndäri ŋgaonyane ’bäru, tana ukyi nyikyi ’da vure Lu ro zele ondro nyà te kalakoto voaloya owo. Ago ta ta azaka rota, mandena tana ’da ondro masate owo.

¹ Tase nyegyite ta ŋgapäṛi ni Tori Alokado resi rota. Male ämiri taŋgye ànyaro unine, ädrupii maro, ² Mìni ndi ami bedri Lu uniako’bai, elepe ami te wairo liti amba lui awi adriako mätu rosi. ³ Male ämiri unine anjioko ’diaza se elepete Tori Lu rosi ni ko atane ekye: “Latri orivoya Yesu dri!” Ago ’diaza ni ko taeṛone ekye: “Yesu orivoya Opi yi,” e’be gialo elepe nda te Tori Alokado si. ⁴ Beti ŋgapäṛi tori ro ba toto, oko Tori alona ’do kani ànya ozo. ⁵ Liti ruindu ro ba orivoya toto, oko a ruindu Opi alo ri. ⁶ Tauni ba orivoya toto ruinduza, oko Lu alona ’do kani tauni ozo ’dicini ri ta ruindu gi ànyaro ’do rota. ⁷ A’do lototi Tori ro aka’date liti azaka yasi ’dialo alo ri ta takado ro vona cini ri rota. ⁸ ’Diaza ri Tori ka lazo tavouni amba be ozo, ago aza ri, Tori gi alona ’do ka kpani lazo tauni amba be ozona. ⁹ Aza ri Tori gi alona ’do kani taoma ozo ’dina ’do ri, ago aza ri nda kani mbara ’di edero ozona. ¹⁰ Tori kani mbara ozo aza ri talaro ro oyeza, aza ri ŋgapäṛi lazo Lu ro opero, ago aza ri tauni a’do toto lakole ŋgapäṛi se kabe ikyi ni Tori resi ana tana itine ànya se kuni ko ri. Aza ri nda kani tauni ozo kala atraro ataza, ago aza ri nda kani tauni ozo tase atabe tazevona edreza. ¹¹ Oko Tori gi alona ’do kani ta cini ono oye, oso nda kolebe ronye, nda kani ŋgapäṛi toto ozo ’di alo alo ri. ¹² Kristo oso lomvo alodi ronye, se orivoya telesi amba be, caoko orivoya lomvo alodi yi, a’ba gica telesi be toto owo. ¹³ Kpa oso inye, vo amaro cini, kode Yudai kode Atrai, kode iyeäṛi yi kode dritai ro, abapatisite lomvo alo ya Tori alona ’do si, ago ozo Tori alona ’do te ama cini ri umvune. ¹⁴ Tana a’ba lomvo kote toto telesi alo si oko telesi amba si. ¹⁵ Ondro pa kata gwo ekye: “Ma i’do drí yi, ma ko lomvo ro,” ’do laga anya kozo ni a’dovoya telesi lomvo ro. ¹⁶ Ago ondro bi kata gwo ekye: “Tana ma ko mi yi, ma ko lomvo ro,” ’do laga anya kozo ni a’dovoya telesi lomvo ro. ¹⁷ Ondro lomvo cini ka’do gwo mi yi, anya unina taerine eŋwanye ya? Ago ondro anya ka’do toto bi yi, anya unina ŋga äŋgune eŋwanye ya? ¹⁸ Oso ka’dobe ronye, caoko Lu ’ba telesi lomvo rote lomvo ya oso nda kolebe a’done ronye. ¹⁹ Lomvo a’dona i’do ondro vona cini ka’do gwo telesi alo yi owo. ²⁰ Oso ka’dobe ronye, telesi lomvo ro amba oko lomvo alo yi. ²¹ Ka’do inye mi unina ko atane drí ri ekye: “Male mi ko!” Drî unina kpa ko atane pa ri ekye: “Ka’do inye male mi ko!” ²² Ko inye, mänina ko taoyene teinye telesi lomvo ro se kalandrebe a’dona mbaraako ’do ako, ²³ ago telesi lomvo ro se màbe tana usuna màkye kadona i’do amba ’do orivoya ni se màbe tana otina ndra, ago telesi lomvo ro se landre ko liŋgyiekye ’do ro aso boŋgo te lomvoigye, ²⁴ se telesi lomvo ro se liŋgyibe ndra le ko. Lu andivo ’ba lomvo te troalo oyena nonye ono si kozo taoro ndra robe telesi se ale ko ana ri. ²⁵ Ago ka’do inye rulewe i’do lomvo ya, oko telesi cini anyaro toto ono orivoya taoti be azi ta. ²⁶ Ondro telesi alo lomvo ro kate rueza, telesi cini lomvo ro ka kpa rueza sina, ondro telesi aza äräṛute, telesi cini ka kpa riyä ana la’do. ²⁷ Yauono, vo amiro cini orivoya lomvo Kristo ro, ago vona cini alo alo orivoya telesi na yi. ²⁸ Lu ’ba vona cini te voaloya känisa ya, vo käti ya lazo’bai, vo ṛiri ya nebii, vo nina ya miemba’bai, ’dooko ànya se kayibe talaro ro oyena, ànya se ozo mbara ’diedero be kode azi oparo kode ànya lepero kode kala to ata robe rigye kai soyigwo. ²⁹ Ànya cini i’do lazo’bai kode nebii kode miemba’bai. ’Dicini ko orivoya mbara be talaro ro oyene ³⁰ kode adravo edene kode kala to atane kode tase atabe tazevona edrene. ³¹ Ka’do inye, mi’ba ya amiro, ŋgapäṛi parandra olene ayani. Ago yauono ma oye liti se taoye ro kadopara ndra lävu vona cini be ka’dane ämiri.

¹ Ma’dona ndi mbara be kala lidri ro atane ndi malaikai robe, oko ondro ma teinye ŋgalu ako, ta ata maro orivoya oso kporo araca usiro ndi laŋga o’biro be ronye. ² Ma’dona ndi ŋgapäṛi taopero mbarana be, ma’dona ndi tauni cini be ago mänina ta dämbidämbiro cini ndi, ma’dona ndi taoma cini alebe ’bereŋwa ushwene sina robe, oko ondro ma ŋgalu ako, ma orivoya ŋga awi yi. ³ Mozona ŋgase cini mabe sina ca ati’bai ri, ago mozona lomvo maro ca ujene, oko ondro ma ŋgalu ako, ’do ye takado ko märi. ⁴ Ŋgalu orivoya yaiŋgyi be ago kado; orivoya yaoko ako mäwuako kode driuŋgyiako; ⁵ ŋgalu ko yaoso be ye ta ko ta ndäri ta ago ŋga ko kyilaro ndri; yi ta taenji ro ko madaro; ⁶ ŋgalu ko riyä si ta takozi rota, oko riyä be ta taŋgye rota. ⁷ Ŋgalu ozo vo ko; ago taoma anyaro, mio’ba, ndi yaiŋgyi be kyeko alona. ⁸ Ŋgalu orivoya äduako. Lazo ni Lu resi orivoya, oko ànya orivoya toto tiko ro, ŋgapäṛi kala to ataro orivoya, oko anya edrena ’da; tauni orivoya, oko okyena ’da. ⁹ Tana ŋgapäṛi amaro tauni ro ndi lazo ope mbarasi robe orivoya toto telesina yi, ¹⁰ oko ondro ŋgase kadopara ’do kate ikyi oko, ’dooko ŋgase orivoya telesi na yi ’do anaruna ’da. ¹¹ Mabe orivoya ŋgaga ro, ata maro, vousu maro ndi tavousu maro be vona cini orivoya ŋgaga ro ronye; yauono ma te mano ’desi yi, maye ta ŋgagaaga ro kote. ¹² Tase màbe ondrena yauono orivoya oso beti fuyifuyi taratara ya ronye; ’dooko, mandreruna ’da miya miya. Tase mänibe yauono toto telesina yi; oko a’dona ’da kpeye, kpeye oso tauni Lu ro mata ronye. ¹³ Oko ŋga nätu kwoi kani ori; taoma, mio’ba, ago ŋgalu ago se fopara kwoi drisi ni ŋgalu.

¹ Ŋgalu orivoya ni se ämäri ruutrine tana ro owo. Mì’ba ya amiro ŋgapäṛi Tori rota, para ndrana ŋgapäṛi ugu lazo Lu ro opero. ² Nda se kabe kala to ata ka ko ata azii ri oko Lu ri, tana ’diaza eri ta ndaro ko. Nda ka ugu ta dämbidämbi taŋgyero atana mbara Tori rosi. ³ Oko nda se kabe lazo Lu ro ope ka ata lidri ri ago ka ànya opa, ago ka agoago ozo, ndi tai’dwero be ànyari. ⁴ Nda se kabe ata kala to si ka toto andivo ndaro opana, oko nda se kabe taope ka känisa cini Lu ro opana. ⁵ Male ndi ami cini ri kala to atane; oko ndrana male ämiri a’done ŋgapäṛi ugu lazo Lu ro opero be. Tana ’dise kabe lazo Lu ro opena kadona orivoya ndrani nda se kabe kala to ata ri, e’be gialo ’diaza orivoya loto se unina ndi tase nda kabe atana tazevona edrene, tana apa känisa Lu ro robe. ⁶ Ago ondro mikyite amire oko, ädrupii maro, mayena ami kado eŋwanye ondro mata gwo ämiri kala to siya? Mayena ami giṛiŋwana ko kado, e’be gialo mezina rulofo aza ni Lu resi ndi tauni aza be kode lazo ni Lu resi be kode ŋgaemba aza be lutu. ⁷ Miru ŋga azaka loŋgo oŋgoro adriako oso toro’ba kode kudi ronye te, inye’do ’diaza unina uwi o’binaro kode ovona ro eŋwanye e’be gialo uwi ovona ro ago o’bina ro yasi ya? ⁸ Ago ka’do ondro mano se kabe cekuṛe ovo kovo ovona läzi uzi ro ko kadoro, a’di ederuna ni kyila ta ya? ⁹ Kpa oso inye, a’di unina tase nyabe ugu tana atana ni ondro ka’do lazo se mipebe kala to si ka’do ko ŋbelero ya? Ata miro pereruna ṛo oli ya! ¹⁰ Kala toto amba orivoya ’bädri ya, caoko aza alo ànyaro ko teinye takaci ako. ¹¹ Oko ondro kala se abe atana mäni takacina ko, ’dise kabe atana a’dona ṛo atra ro märi ago ma’dona ṛo atra ro ndäri. ¹² Oko oso ami ṛote nja mio’ba be ŋgapäṛi Tori rota ono ronye, beṛo ämäri ojone ndrani ŋga cini drisi a’done ŋgapäṛi se kabe känisa o’ba ombane ’do be ndra. ¹³ Ka’do inye ’dise kabe ata kala to si, beṛo mätune ta ŋgapäṛi rota tase nda kabe tana atana tazevona edreza. ¹⁴ Tana ondro ma mätu oye liti ono yasi, tori maro ka mätu oye endaro, oko tauni drî maro ro usu ta ko kigye. ¹⁵ ’Dooko beṛo märi e’di oyene ya? Märi mätune tori maro si, oko kpa märi mätune tauni drî maro rosi, märi loŋgo oŋgone tori maro si, oko kpa märi loŋgo oŋgone tauni drî maro rosi. ¹⁶ Ondro nyà aro’boya ozo Lu ri toto tori si, ’diawi se orivoya vo kalakoto roya unina mätu miro aro’boya oyero “Amen” na oyene eŋwanye ya? Nda ni tase nyabe ugu atana ko. ¹⁷ Endaro, mätu miro aro’boya oyero Lu ri ka’do gica kado oko, ye ŋgaopa aza kote alona ’di kinjo ’do ri. ¹⁸ Maye aro’boya Lu ri tana ma kala to ata ndrani ami drisi. ¹⁹ Oko kalakoto känisa roya malena ata nji se äni takacina be atane ayani, tana memba azii robe, ni märi ata kuturo kala to si atane ri. ²⁰ Nyà’do ko oso ŋgàgaŋwai ronye tavousu ya, ädrupii maro, nyà’do orivoya ŋgagaŋwà ro takozi ri, oko nyà’do ombaombaro tavousu amiro ya. ²¹ Taegyi ya egyi tate ekye: “Opi kani ata nonye ekye: Matana ’da lidri maro ri lidri se kabe ata kala to si, ago kala atrai ro si si, oko caoko lidri maro erina ta maro ko.” ²² Ka’do inye, ŋgapäṛi ugu ta ata ro kala to si taka’da yi taomaako’bai ri, ko taoma’bai ri, oko ŋgapäṛi ugu lazo Lu ro opero orivoya taka’da yi taoma’bai ri, ko taomaako’bai ri. ²³ Ondro, ka’do, känisa cini kokotokalate voaloya ago ’dicini keto ugu ta ata gwo kala to si, ago ondro ’diazaka ’diawi yi kode taomaako’bai keciyi gwo, inye’do atanayi ko ekye ami cini orivoya amama yi ya? ²⁴ Oko ondro ’dicini ka ugu lazo Lu ro opena ondro ’diaza taomaako kode ’diawi yi keci gwo, ulukuna nda ’da takozi ndaro ta tase cini nda kabe erina si. Apena vure ndaro ’da tase cini nda kabe erina si, ²⁵ tavousu dämbidämbiro ndaro olofona ’da ŋbelero, ago nda ändina ’da vuru ago mätuna Lu ’da, ugu ta eṛo si ekye: “Endaro Lu orivoya noŋwa ami lako!” ²⁶ Ono ni orivoya tase malebe atane owo, ädrupii maro. Ondro nyà te kalakoto ta mätu rota, ’diaza ka’do loŋgo be, aza ta ŋgaembaro be, aza ta taka’daro be ni Lu resi, aza lazo kala to robe, ago aza iro ta tazevoedrero ta tase atabe rota. Beṛo ŋga cini kwoi ri a’done ŋgaoparo känisa ya. ²⁷ Ondro ’diaza koye ta atane kala to si, lidri ritu kode nätu kata ta ni oko ba alo alo azi vosi, ago beṛo ’dialo aza ri tase abe atana ’do tazevona edrene. ²⁸ Oko ondro ’dise unina ndi tazevo edrene ka’do te i’do lau, ’dooko nda se kabe kala to ata ’do beṛo a’done titiro ago kata toto andivo ndaro ri ago Lu ri. ²⁹ ’Di ritu kode nätu se ozo lazo Lu ro be rigye beṛo taopene, ago azii ri tase ànya kabe atana vurena opene. ³⁰ Oko ondro ’diaza se koribe kalakotovoya kusu lazo teni Lu resi, nda se aza kabe ugu taope ’do beṛo odrine. ³¹ Vo amiro cini ri lazo Lu ro opene, ba alo alo, tana ’dicini kuni ta robe ago ka’do robe agoago be. ³² Ŋgapäṛi ugu lazo Lu ro opero beṛo ritane taope’ba zele, ³³ tana Lu e’be ama ko a’done patakayi ro oko a’done tadriole alo be ago a’done liatokpero. Oso känisa cini lidri Lu ro roya ronye, ³⁴ beṛo ’ditoko ri a’done titiro vo kalakoto roya. Ko ànya o’bane atane, oso Ota Yudai ro kabe ata ronye, anjioko beṛo ko ànyari a’done drikaca be. ³⁵ Ondro ànya koleyite ta aza unine, beṛo ànyari àgo ànyaro ejine ’bäru. Orivoya driupiro ’ditoko ri atane kalakoto känisa roya. ³⁶ Kode ata Lu ro unina ko efone ni ami resi ya? Kode ikyi toto ämiri? ³⁷ Ondro ’diaza kusute ekye nda orivoya lazo’ba Lu ro kode ŋgapäṛi tori robe, beṛo ndäri unine anjioko tase ma ugu egyina be ämiri ono orivoya Ota Opi ro. ³⁸ Oko ondro nda koga bi kote ta ono erine, migabi ko ta ndaro erine. ³⁹ Ka’do inye, ädrupii maro, mi’ba ya amiro ugu lazo Lu ro opene, oko nyalaga ta ata kala to si ko. ⁴⁰ Beṛo ŋga cini oyene kado ago ŋgyero.

¹ Ago yauono male talogone drî amiro ya, ädrupii maro, ta Lazokado se mapebe ämiri rota, se mirute, ago se taoma amiro edrete ŋgyiri kigye. ² Se ni lazokado yi, lazo se mapete ämiri owo. Apa ami te lazokado si ondro nyätite anda owo, e’be gialo ondro taoma amiro ni awi. ³ Mocope tase musube ono te ämiri, se ni orivoya parandra anjioko Kristo drate takozi amaro ta, oso egyibe Taegyi ya ronye. ⁴ Anjioko ase nda te ago eŋga nda te adri ya u’du nina si, oso egyibe Taegyi ya ronye, ⁵ ago nda ka’darute Petero ri ago ’dooko lazo’bai cini ’butealo foritu ri. ⁶ ’Dooko nda ka’darute oso’bai nda vo se ndrani kama nji (500) drisi ri saa alo si, ambana dri gi’du lidriidriro, rukäna dra gica owo. ⁷ ’Dooko nda ka’darute Yakoba ri, ago ono vosi lazo’bai cini ri. ⁸ Äduro nda ka’daru kpate märi, malaba gica oso ’dise ätite tu utina ro osaako ronye. ⁹ Tana ma ni tipari lazo’bai cini lakosi; si ko ma uzine lazo’ba tana meza känisa Lu rote. ¹⁰ Oko yauni Lu rosi nda ’ba mate oso ma’dobe yauono ronye ago yauni se nda kozobe märi ono ko teinye ta ako. Oko vona ro, maye losi te mbara ndrani lazo’bai azi drisi, caoko ṛo ko ni taoye andivo maro ro, oko yauni Lu ro ka ugu losi oye ni ma be. ¹¹ Ka’do inye, kode anya ikyi ni maresi kode ànya resi, ono ni tase ama cini màbe opena, ago ono ni tase nyàbe omana owo. ¹² Yauono, lazo amaro orivoya ni anjioko olofo Kristo teni odra yasi, ka’do inye rukä amiro ka ata ekye avo eŋgane adri ya i’do ’do eŋwanye ya? ¹³ Ondro ka’do gindi endaro inye, anjioko olofo Kristo kote, ¹⁴ ago ondro olofo Kristo kote ni odra yasi, ’dooko ama ta aza ako opene ago ami ta aza ako omane. ¹⁵ Ndrani ono risi, aka’da ama te a’done koweoga’bai ro ta Lu rota, tana matate makye nda eŋga Kristo teni odra yasi, oko ondro ka’do gindi endaro ekye eŋga avo kote adri ya, ’dooko nda eŋga Kristo kote. ¹⁶ Tana ondro eŋga avo kote, anjioko eŋga Kristo kote. ¹⁷ Ago ondro eŋga Kristo kote, ’dooko taoma amiro orivoya awi ago ami orivoya ’du ujeujero takozi amiro ya. ¹⁸ Ago anjioko taoma’bai se Kristo ya kodrate iyi jeyi kpate. ¹⁹ Ondro mio’ba amaro Kristo ya orivoya kado toto ori ono ya ago aza tona i’do ’dooko màle yauni te ndrani ’dise azaka orivoya ’bädri cini ya drisi. ²⁰ Oko taŋgye orivoya ni ono anjioko eŋga Kristo teni odra yasi, tao’baro ro ànya se kabe u’du odra ya ri anjioko eŋgana ànya kpa ’da. ²¹ Tana kpa oso odra, ikyite ’dialo si ronye, kpa oso inye oŋga ni odra yasi ikyi kpa ’dialo si. ²² Tana kpa oso ’dicini kabe odra tana rudro’be ànyaro Adama be ’ba ni ’do ronye, kpa oso inye eŋgana vona cini ’da adri ya ta rudro’bero ànyaro Kristo be rota. ²³ Oko ’dicini alo alo eŋgana gi a’do ndaro ronye. Käti ono, Kristo, ’dooko ikyi tu ndaro si ànya se ndaro iyi. ²⁴ ’Dooko tu ädu esana ’da; Kristo opena ’dimiri’bai cini tori voro, drikaca’bai, ndi mbara’bai be ’da ṛe, ago ozona Miri ’Bädri’ba ro ’da Lu Täpi ri. ²⁵ Tana beṛo Kristo ri vo mirine madale Lu opena kyila’baazii cini gwo ṛe ago o’bana ànya gwo pa ndaro zele. ²⁶ Kyila’baazi se opene ṛe äduro ni odra. ²⁷ Tana taegyi ka ata ekye: “Lu ’ba ŋga cini te pa ndaro zele.” Orivoya ŋbelero anjioko ata gi (ŋga cini) ono loci Lu modo ko kigye, nda se kabe ŋga cini o’ba Kristo zele. ²⁸ Ondro a’ba ŋga cini te miri Kristo ro zele oko, ’dooko nda, Ŋgwa andivo, o’bana andivo ndaro ’da Lu zele; se ko’ba ŋga cini be nda zele ono; ago Lu mirina ŋga cini ’da kpeye. ²⁹ Ka’do inye, lidri se abapatisi te ta avo rota oyena e’di ya? Ànya kayi mio’ba e’di ta ya? Ondro ka’do ndi endaro, oso rukäna kabe ata ronye, ekye eŋga avo ko adri ya, abapatisi lidri kai te avo ta etaya? ³⁰ Ago ta amaro ta, tana e’di mà umu rriti odra roya tu cini si niya? ³¹ Ädrupii maro, ma drio’be odra be tu cini si! Driuŋgyi se ma sina ami ya, ori amaro ya rudro’be Kristo Yesu Opi amaro be ya, kani ma o’ba ta ono atane. ³² Aba ondro ka’do kyila se lakole adri ndi odra be ro se maye be Epeso ya noŋwa ono, maye gwo tavousu lidri rosi ŋgase musube e’diya? Oko ondro eŋga avo kote adri ya, ’dooko oso ugu atana be ronye ekye: “Mi’de manya ŋga, ago mämvu ŋga, tana ondo madrana ’da.” ³³ Mi’ba odo ami ko. “Bereazi ’dikozi be ka taoye kado enjini.” ³⁴ Nyego tauni kado ya ago nye’be litii takozi oyero. Ma ta ono ayo ko’ba ami robe driupi ro tana rukä amiro ni Lu ko. ³⁵ ’Diaza ejina ta ’da ekye: “A lidri se kodrate eŋgana eŋwanye adri ya ya? Ànya a’dona beti lomvo ro eŋwani be ya?” ³⁶ Mi amama yi! Ondro nyikyi’di kwari te gyini ya, anya unina ko oŋgane adri be e’be gialo odrana lutu. ³⁷ Ago ŋgase nyikyi’dibe orivoya toto keci yi, kode keci kyifo ro kode keci inya azaka ro, ondro nyate ŋga kyi’di, nya ko lomvo se ka oyebe a’done kyi’di. ³⁸ Lu kani lomvo ozo rigye oso nda kolebe ronye, beti keci alo ri nda ozo lomvo modo ànyaro rote. ³⁹ Ago iza ŋga cini lidriidriro ro vona cini ojo ko rere beti alo ro, lidri orivoya beti iza robe alo, koronyai ro azana, arii ro azana, ago ti’bi ro azana. ⁴⁰ Ago lomvo vo’buyakuru ro orivoya ndi lomvo ’bädri robe. Liŋgyi se lomvoi vo’buyakuru ro orivoya to ni liŋgyi se lomvoi ’bädri ro ro ri. ⁴¹ Kitu orivoya liŋgyi modo iro robe, imba orivoya liŋgyi aza be, ago ’bi’bii orivoya liŋgyi to be, ago ca ’bi’bii lako beti toto liŋgyi ro orivoya. ⁴² Ka oye a’done oso ’do ronye ondro eŋga avo te adri ya owo. Ondro ase lomvo te, anya ŋgwa te; ondro eŋga anya te anya a’dona ’da oŋgwaako. ⁴³ Ondro asete, anya te orivoya liŋgyiako ago mbaraako, ondro eŋgate, anya a’dona ’da liŋgyiekye ago mbara be. ⁴⁴ Ondro asete, anya orivoya lomvo lomvo robe, ondro eŋgate, anya a’dona ’da lomvo tori robe, lomvo, lomvo ro orivoya, ago lomvo tori ro a’dona ndi. ⁴⁵ Tana taegyi ka ata ekye: “Mano käti, Adama, a’bate lidri ro;” oko Adama äduro orivoya Tori adri ozoro. ⁴⁶ Tori ikyi ko ni käti, oko lomvo ayani, ago ’dooko tori. ⁴⁷ Adama käti a’bate ni gyini yasi, efo ni gyini yasi; Adama ṛiri ikyite ni vo’buyakuru ya. ⁴⁸ Ànya se ’bädri ro laba orivoya oso nda se a’bate gyini si ronye; ànya se vo’buyakuru ro laba oso nda se ikyite ni vo’buyakuru yasi ronye. ⁴⁹ Kpa oso maso a’do mano se edebe gyini si robe ronye, kpa inya masona a’do Mano se ikyite ni vo’buyakuru yasi ro ’da. ⁵⁰ Tase mabe atana ni no, ädrupii, anjioko ŋgase a’bate iza ndi kari be si unina ko ŋga la’done Miri ’Bädri’ba Lu ro roya, ago ŋgase kabe oŋgwaoŋgwa unina ko oŋgwaako urune drimbi ro. ⁵¹ Nyèri ma tandrwiro ono tana itina ämiri; ama cini madrana ko, oko otozana ama cini ’da, ⁵² dori ndriŋwa oso miobi ronye ondro cekuṛe äduro kotrete owo. Tana ondro cekuṛe kotrete, avo efona ’da, go dra kote alona, ago otozana ama cini ’da. ⁵³ Tana ŋgase ka oŋgwaoŋgwa beṛo tozane oŋgwaako; ŋgase ka odraodra beṛo tozane ŋgase unina ko odrane ro. ⁵⁴ Ondro tase ono ka’dote, ago ŋgase oŋgwaoŋgwa ro otozate oŋgwaako ro, ’dooko taegyi a’dona ’da endaro, se ekye: “Epere odrate; ŋgaopeṛe ndete!” ⁵⁵ “Odra, ŋgaopeṛe miro gaŋwaro ya? Odra, mbara luwu miro ro gaŋwaro ya?” ⁵⁶ Odra ka mbara iro usuna ni takozi resi, ago takozi ka mbara iro usu ni Ota resi. ⁵⁷ Oko aro’boya ka’do Lu ri! Nda ozo ŋgaopeṛe te ämäri Opi amaro Yesu Kristo si! ⁵⁸ Ka’do inye ädrupii maro, nyedre ŋgyiri. Mì’ba ŋga aza kuswe ami ko. Nyà’do ondoalo losi amiro ta Opi rota ya, tana mini ṛote anjioko ŋgase nyàbe oyena ruindu Opi riya ko orivoya ta awi yi.

¹ Yauono, ta tase nyegyibe märi ta parata ozo rota lidri Lu ro Yuda ya opaza. Beṛo ämiri tase mitibe känisa Galatia ya ri oyene. ² U’du njidrieri cini si beṛo ami alo alo ri parata azaka odine oso ’dina ’do kabe usuna ronye, ago komba driigye, tana mesate oko ukyi okoto parata ’da. ³ Ka’do inye ondro mesate oko mozona waraga ’dika’daro ’da lidri se nyàka’da be ri, ago azo ànya robe ŋgapäṛi amiro ugune Yerusalema ya. ⁴ Ondro ka’do tana ko’de ndi märi ree oyine, ’dooko ànya uninayi ndi oyine ma be. ⁵ Mäkyina ’da amire oyi maro Makedonia yasi vosi, tana ṛo märi oyine Makedonia yasi. ⁶ Kode azayi marina ’da ami yibe tuna fere, kode meṛi ṛo cu, ago ’dooko minina ndi ma opane ’duro aba maro ya vo kinja se malebe oyine kigye ya. ⁷ Male ami ondrene ga kadoro ndrani ugu lävune äruäru risi; ma mio’ba be orine ga madaro ami yibe, ondro Opi kole gindi owo. ⁸ Moye orine Epeso ya noŋwa madale tu Penetikoseta rosi. ⁹ Endaro kandrakado orivoya noŋwa ta ’desi ndi losi kado be oyeza, kyila’baazii ka’do gica owo. ¹⁰ Ondro Timoteo kikyi gwo te ami resi oko mi’ba nda kori uruuru ro kadoro ami lako, tana nda ka ugu losi oye Opi ri, kpa oso ma ronye. ¹¹ Beṛo ko ’diaza ri voondrene ndra nda drisi, oko beṛo ämiri nda opane ugu oyine aba ndaro be liatokpe ro, tana nda kego robe kovole mare; tana ma mio’ba be ego ndaro ta ndi tro ädrupii be. ¹² Oko, ta ädrupi Apolo rota, ondoalo mozo agoago te ndäri ami täkyine ndi ädrupii azaka be, oko nda dri ole ako ukyine tu ono si, ondro nda kusu kandrakado te oko, oyina ’da. ¹³ Nyà’do vookwa be, nyedre ŋgyiri taoma ya, nyà’do turiako, nyà’do mbara ro. ¹⁴ Miye losi cini amiro ŋgalu si. ¹⁵ Mini ta Setepano ndi katidri ndaro robe te, ànya orivoya ni Kristo’bai käti se etayidrite Akaya ya ago ozoyi andivo ànyaro te ruindune lidri Lu ro ri owo. Molo’baru ämiri, ädrupii maro, ¹⁶ osone lidri dri’ba ro kwoi ronye vo, ago kpa ’diaza se kabe losi oye ago kabe ruindu ànya yibe vo. ¹⁷ Ma orivoya yai’dwesi ta ikyi Setepano, Foretunatusa ndi Akaiku robe rota; ànya yeyi ŋgase aba ämiri oyene te, ¹⁸ ago ànya i’dweyi ya maro te, kpa oso ànya ki’dweyi ya amiro be ronye. Lidri oso kwoi ronye tana otine kadoro. ¹⁹ Känisa wari Asia ro ro zoyi mede ànyaro ämiri Akwila ndi Pirisila be ndi känisa se kabe kalakoto zo ànyaro ya be zoyi mede Kristo’ba ro ya cini si ämiri. ²⁰ Ädrupii cini noŋwa ono zoyi mede ämiri. Mìye mede azi ri ’di njunju ädrupii rosi. ²¹ Megyi ta ono ni drí modo maro si; mede ni Paulo resi. ²² Nda se kulu Opi ko, latri ka’do driigye! Marana-ta; Anjioko Opi amaro nyikyi! ²³ Tai’dwero Opi Yesu ro ka’do ami yibe. ²⁴ Ŋgalu maro ami cini ri Kristo Yesu si.