Tituc

Tituc

¹ Gena ‘ya Buuluc kɛɛngɔn Jwaŋa Tolan. ‘Ya a cuuda Yaccu Kiṭɔ te jyek jyenna ma jyetki Juaŋti neeni. Gena maka muonɛ Juaŋ boray. Ɔci ɛkɛ ‘ya cuonna aŋka ‘ya lor ma te jyek ɛkɛ jyeka awarɛ, ɔci coodda ɛkɛ buagɛ ma cootɛ a ɔki te jyek ɛkɛy. ² Ikin jyettin kɛɛyin jyek tɛɛtin Juaŋ tɛɛtin baadi bɛɛ neeniy, acaan Juaŋ gɔki te baaṭi doki wona ṭɛɛr men baawi agi ikin ‘wontinti ɛkɛ tɛɛtin neeni. Ɔci Jwaŋa Tolan yaakinti dyeti ma ñingɛn bɛɛ. ³ Ɔci ɛkɛ jyek tɛɛtin ɛkɛ lɛɛlnɛ bora mati te oŋŋa pwadan oŋŋa ɛkɛ buagɛtiy. Gena jyeka loṭa ‘ya ma a jyek Jwaŋa Tolany. Jwaŋa Tolan Mena Yuoci ikinyɛ, ɛkɛ ‘ya ‘wonna kanŋa miti ma te jyeka neeni bieŋuti. ⁴ Hay! Kaci ‘ya Tituc, ‘ya kiewan worga neeni iti. I aŋŋi kaci ‘ya te jyenna i jyetti Kiṭɔti neeni. Ikin jyettin Juaŋti yaakkɔ. Dala Jwaŋa Tolan Wey ikin, ɔci Cieggɔn Yaccu Kiṭɔ Mena Yuoci ikin neeni yomgɛn pwada a pwani iti, ɔci dala ɛkkɛn i ‘wonti coodi pwanno. ⁵ Ɛɛ, gɔṭṭi, Tituc, i dolninyɔ ‘ya Kaŋ Kriit wyeñɛti aŋka kanŋa dollanyɔ ‘ya wanna cwamja, ɔci aŋka i ma maga te jyek cyɛgji kaniicanji, bonka neeniti waakɛnda ba jyeka i myennin ‘ya te ñamuy. ⁶ Cyekin kaniicanyɛ, naa ɛkkɛn naŋa i a maka waaktan ma bɛɛ. Ɔci maka neeni dala ɛkkɛn balki moong ne ciṭin. Dala kɛɛgin ɛkkɛn a maka jyeti Jwaŋa Tolanti. Naa ɛkkɛn balki kɛɛgin guaktan ma a kɛɛgin cooddɛn yeyin bɛɛ, ɔci walla kɛɛgin yookɔn te jyek weyyɛn bɛɛ. ⁷ Mena gaciicyɛ, naa ɛkɛ a mena waaktan ma bɛɛ, acaan ɛkɛ a mena Ma Kiṭɔ bala ɛkɛ bieŋɛti. Walla naa ɛkɛ a mena yyɛcan bɛɛ. Ɔci walla naa ɛkɛ a mena loomgɛ cwalŋan bɛɛ. Ɔci walla naa ɛkɛ a mena ani mooy bɛɛ. Ɔci walla naa ɛkɛ a mena cooddɛ yaayan bɛɛ. Ɔci walla naa ɛkɛ a mena warɛ ḍigan ani waak bɛɛ. ⁸ Dala ɛkɛ a mena yomɛ pwadan mena gɔṭi wɛlgo. Dala ɛkɛ a mena ani naŋka pwadin, ɔci dala ɛkɛ a mena mwoki warɛ ne pwadan. Dala ɛkɛ a mena pwadan Juaŋ ñamɛti. Dala ɛkɛ a mena ciyi noŋi ba naŋka Juaŋ buagɛy. Ɔci dala ɛkɛ a mena yaakinti poŋi te warɛ. ⁹ Dala ɛkɛ waŋɛ tiittɛ te jyeka pwadin jyeka loṭɔn ɔɔn ma neeni, aŋka ɛkɛ ṭeyi ma ɔci loṭi ma te jyeka pwadin neeni, ɔci moki aŋka maka tieki jiek bwandɛ ɛkɛ. ¹⁰ Ma Kiṭɔ maka coŋin gɛɛg bala noŋi ba yomg ɛkkɛn pookɛn. Ɛkkɛn tieŋdi jyek menga bɛɛ. Ɔci maka coŋin neeniyɛ, ɛkkɛn gɛɛg a Ma Yahuud. Ɛkkɛn balki jyeka coŋin tuggɛnti, ɔci ɛkkɛn noŋi ma ñingɛn. ¹¹ Dala ɛkkɛn yɔddɛ ñin te lali jyeka yeyin neeni. Acaan maka coŋin gɛɛg bala jyetcin ɔntɔ doki te jyek ɛkkɛn. Ɛkkɛn bala loṭi ma amaamo. Ɛkkɛn loṭi ma a ɔɔn acaan ɛkkɛn buagɔn ‘wontan ma waako. Naŋki ɛkkɛn neeni a labjo. ¹² Jyeka neeni bala ba men gɛɛl bɛɛn te ma maka neeniti, ɔci ɛkɛ gɔki te ma Kriit agi ma Kriityɛ, ɛkkɛn jomi jiek waakɛnda. Ɔci moki ɛkɛ gɔki agi ɛkki agi ywobk ba leyi gɛɛg, ɔci agi ɛkki waakcin pɛñgɔ te kanŋa waak ne tolan, yeti ɛkkɛn ati booti omi gena oomdin mati. ¹³ Jyeka guaŋŋɛ mena neeni te ɛkkɛn neeni a jyeka awarɛ, hay! Ɔci acaan a ɔŋŋiyɛ, dala i ɛkkɛn ṭeya ne pɛñan te jyeka neeni aŋka ɛkkɛn yomgɛn tɛya te jyenna ɛkkɛn jyetkɛ Juaŋti neeni. ¹⁴ Ɔci dala Ma Kiṭɔ mwondi te jyeka guaktan Ma Yahuud a jyeka budan neeni. Maka yookɔn te jyeka awarɛyɛ, ɛkkɛn bala gɔki mati te jyeka ɛkkɛn buagɛti dala naŋtan may. Jyeka neeni bɛɛn te Jwaŋa Tolanti bɛɛ. A’a, jyeka neeni bɛɛn te ma baanti budan. Dala i ma myetka naa ɛkkɛn tieŋdi jyek ɛkkɛn neeni bɛɛ. ¹⁵ Yeti maka yomgɛn pwadinyɛ, waak waakɛnda pwadɔ ɛkkɛnti, ɔci maka jyeti jyek Juaŋti bɛɛyɛ, waak waakɛnda yeyɔ ɛkkɛnti, acaan maka neeniyɛ, ɛkkɛn waka pwadin walla waka yeyin ŋeecɔn yomgɛnti bɛɛ. Ɔci ɛkkɛn yaakinti poŋi paŋŋa pwadan bɛɛ. ¹⁶ Ɛkkɛn gɔki te tuggɛn agi ɛkkɛn Jwaŋa Tolan ŋeejinti katan. Yeti te naŋka naŋtan ɛkkɛn yaayan neeniyɛ, ɔci ŋeecɔn ma ɛkkɛn Juaŋ ŋeecɔn awarɛ bɛɛ. Hay! Ɛkkɛn yeyɔ, ɛkkɛn bɛɛyi jyek Juaŋ neeni. Ɛkkɛn yaakinti noŋdi gena pwadan gɛɛl bɛɛ.

¹ Ɔci iyɛ, hay Tituc! Dala i lorca ma te jyeka pwadin jyek coodi Ma Kiṭɔ. ² Dala i ‘uaya ḍwaŋin myetka dala ɛkkɛn tuggɛn luya. Dala ɛkkɛn yaakinti muŋi waakɛn. Dala ɛkkɛn poŋdi jiek ne pwadan. Dala ɛkkɛn jyeddi Juaŋti ne pwadan. Dala ani Juaŋ bala ɛkkɛn yomgɛnti, ɔci dala ɛkkɛn yɔdi ne tɛyan. ³ Ɔci moonga ḍwaŋinyɛ, dala i ɛkkɛn myetka dala ɛkkɛn woŋgɛn tiittan ciyi ba maka moṭi Juaŋti awarɛ. Naa ɛkkɛn ati booti ma wyetkɛnti wooki maka pookɛn bɛɛ. Ɔci naa ɛkkɛn aga maka nokkin mooy bɛɛ. Dala ɛkkɛn loṭi ma te naŋka pwadin. ⁴ Dala moonga neeni ɛkkɛn moonga ḍyɛrin laltan aŋka dala ɛkkɛn andi ‘uay ɛkkɛn, ɔci dala andi kɛɛgin ɛkkɛn daŋkun. ⁵ Ɔci dala ɛkkɛn waakɛn muktan ne pwadan, ɔci naa paŋŋa yaayan gɛɛl bala ɛkkɛnti bɛɛ. Dala ɛkkɛn gɔṭi oorg ɛkkɛn jitkɛn ne pwadan, ɔci dala ɛkkɛn yomgɛn pwadɔ mati. Dala ɛkkɛn tieŋdi jyek ‘uay ɛkkɛn ne pwadan. Ɔci a ɔɔnyɛ, ma yaaktanti wooki jyek Jwaŋa Tolan neeni moki bɛɛ. ⁶ Ɔci dala i ‘uaya ḍyɛrin ṭeyayɔ daŋkun aŋka naa ɛkkɛn noŋdi amaam bɛɛ. Dala ɛkkɛn waakɛn muktan ne pwadan. ⁷ Ɔci i waanuyɛ, dala naŋki i waakɛnda pwaddi aŋka maka pookɛn lɔkti ba naŋki i. Ɔci oŋkanda ne i loṭi mayɛ, dala i lorca ɛkkɛn ne pwadan, ɔci a ɔɔn jyeka loṭi i ɛkkɛn neeniyɛ, ŋeettan ɛkkɛn jyeka neeni a jyeka a ñiek bɛɛ. ⁸ Ne i loṭi mayɛ, dala i lorca ɔci gɔkca te jyeka menga yaakinti wooki jyeka lala i neeni bɛɛ. A ɔɔnyɛ, maka yookɔn te ikin neeni ɛkkɛn yaakinti wooki ikin te genga moki bɛɛ, ɔci a ɔɔnyɛ, ɛkkɛn waakɛn aga lɔɔno. ⁹ Dala i maka kɛɛnk myetka dala ɛkkɛn noŋdi ba jyek maka ḍɔci ɛkkɛn. Dala naŋka naŋtan ɛkkɛn waakɛnda neeniyɛ, dala pwaddi maka ḍɔci ɛkkɛnti neeni. Ɔci kan maka ḍɔci ɛkkɛn gɔkti genga ɛkkɛntiyɛ, naa ɛkkɛn koogdi i ɛkkɛn bɛɛ. ¹⁰ Dala i ɛkkɛn myetka naa ɛkkɛn kɛndi wak maka ḍɔci ɛkkɛn neeni te yomg ɛkkɛn pookɛn budan bɛɛ. Dala ɛkkɛn noŋdi gena naŋka pwadin oŋkanda aŋka ɛkkɛn ŋeettiti ma ɛkkɛn labjin baawo. Ɔci te naŋka naŋtan ɛkkɛn pwadin waakɛnda neeniyɛ, jyek Jwaŋa Tolan Mena Yuoci ikin neeniyɛ, pwaddi mati. ¹¹ Acaan yɔɔta yuoci Jwaŋa Tolan ma neeniyɛ, bɛɛn mati waakɛnda acca doki ba yom pwani ɛkɛ. ¹² Ɔci yom pwani Juaŋ neeni loṭi ikin agi dala ikin mwoncin te naŋki coodi ikin coodda te baaṭi wona ikin balkin ciyin budan te jyek Juaŋ neeni, ɔci moki agi dala ikin mwoncin te paŋi jyek waka ikin buaginti ne coŋɔn ba maka ciyi baan konɛti neeni. Ɔci agi dala ikin cieccin noŋcin naŋka pwadin naŋka Juaŋ buagɛ aŋka naŋtin ikin ne wonta ikin ciyin tɛɛtin men ɔŋ. ¹³ Acaan acca ikin jyettin kɛɛyin te naŋki Jwaŋ ikin naŋka pwadan neeni. Ɔci oŋŋa kɛɛtin ikin neeniyɛ, gena oŋŋa Jwaŋ ikin ɔci Cieggɔn ikin Yaccu Kiṭɔ Mena Yuoci ikin bɛɛdi pwanni a pwani, ɔci warɛ lɛɛldi bora ikintiy. ¹⁴ Yaccu tuun te ikin te yom ɛkɛ, acaan ɛkɛ buagɔn woni ikin te nɔji waakɛnda, ɔci naŋtin a maka giikin baaw yomgɛnti te nɔji waakɛnda. Ɛkɛ buagɔn dala maka neeni aga ma ɛkɛ woodgɛn. Ɔci ɛkɛ buagɔn dala ma ɛkɛ waakɛn byerdi te naŋka pwadin. ¹⁵ Dala i ma myetka te jyeka neeni. Dala i ma ṭeyayɔ, ɔci kan men gɛɛl ciyi ne pwadan bɛɛyɛ, dala i gɔkca ɛkɛti. Dala i noŋja naŋka neeni ne pwadan acaan i balki war tɛɛn bieŋuti doki. Ɔci naa menga wooki i bɛɛ.

¹ Dala i ma myetka jiek dala ɛkkɛn noŋdi ba jyek akuuma ɔci jyek ma kuuma maka ḍwaŋin. Dala ɛkkɛn bwagdɛ naŋka pwadin. ² Naa ɛkkɛn wooki menga bɛɛ. Dala ɛkkɛn ciyi iki ma te pwani, ɔci dala ɛkkɛn poŋi te maka pookɛn, ɔci dala ɛkkɛn noŋdi mati waakɛnda te wara bala iñɔ. ³ Te baaṭiyɛ, ikin wyetkɔ bala ɔntɔ daŋkun. Ikin balkin tyeŋin jyek menga bɛɛ. Ikin noŋin ba yomg ikin pookɔ. Ɔci waka ikin buaginti ne tolan neeniyɛ, ikin mukkinyɔ naŋkin ba kɛɛnk ɛkkɛn, ɔci ikin balkin lieṭin waka ikin yomgɔ ñɔɔki ne pɛñany. Ɔci oŋkandayɛ, ikin balkin ciyin amaamo. Ɔci ikin korkɔ modɔ, ɔci ikin yookin te maka pookɛn, ɔci ikin balkin yoyyin ñin pookɔ daŋkun. ⁴ Yeti oŋŋa Jwaŋa Tolan noŋni ne pwadan ikinti te anna ɛkɛ ani ikin neeniyɛ, ⁵ ɛkɛ ikin yɔɔññin doki. Ikin yɔɔññin ɛkɛ acaan naŋki ikin pwad pwad ɛkɛti pookɔ bɛɛ. Ikin yɔɔññin ɛkɛ acaan ɛkɛ yomɛ pwad pwad ikinti. Ɛkɛ ikin yɔɔññin te Boŋ ɛkɛ Boŋa ikin luaŋŋin yomgɔti te nɔji, Boŋa ikin jiennin te jiedda woonɛ aŋka ikin aŋŋin maka wonkɛny. ⁶ Ikin ‘wonnin Jwaŋa Tolan Boŋ ɛkɛ ne tolan te naŋka naŋŋɛ Yaccu Kiṭɔ Mena Yuoci ikiny. ⁷ Ikin yɔɔññin ɛkɛ a ɔɔn acaan ɛkɛ buagɔn dala ikin pwattin Juaŋ ñamɛti te yom pwani ɛkɛ ikinti neeni. Ɔci a ɔŋŋiyɛ, ŋeecin ikin tɛɛtin baadi bɛɛ, tɛɛtin jyettin kɛɛtin ikin neeniyɛ, yuartin ikin ne baaṭi. ⁸ Ikin yaakinti jyettin jyeka neeni acaan ɛkkɛn a jyeka awarɛ waakɛnda. Ɔci te jyeka neeniyɛ, ‘ya buaga dala i ma myetka te jyeka neeni ne pwadan aŋka naa ɛkkɛn yeya bɛɛ. Acaan maka jyeti Jwaŋa Tolanti dokiyɛ, dala ɛkkɛn woŋgɛn tiittan te kanŋa pwadin neeni. Kanŋa neeni pwad pwado, ɔci etti naŋka pwadin mati. ⁹ Dala i ma myetka naa ma tyewɔ iki maka pookɛn te jyeka budan neeni bɛɛ. Naa ɛkkɛn tyewɔ te jyek yɔrg ɛkkɛn bɛɛ. Ɔci moki naa ɛkkɛn wɛyyɔ bɛɛ. Ɔci naa ɛkkɛn tyewɔ te jyek tiit jyek ganuun Ma Yahuud bɛɛ. Acaan tyewwinyɛ, etti jyeka pwadin mengati bɛɛ. Naŋka neeni a naŋka budan. ¹⁰ Kan men gɛɛl buagɔn Ma Kiṭɔ kɛbdɛ jitin kaniicajiyɛ, dala i ɛkɛ ṭeya, ɔci kan ɛkɛ tieŋdi bɛɛyɛ, dala i ɛkɛ ṭeya moki. Ɔci kan ɛkɛ yookɔn men ɔɔnyɛ, dala i ɛkɛ dorka warɛti, ɔci naa i ñoodi iki ɛkɛ te genga moki bɛɛ. ¹¹ Çeecin ikin kan men gɛɛl naŋki ɛkɛ bala a ɔɔnyɛ, ɔci kan paŋi ɛkɛ bala ɔntɔ mokiyɛ, ɔci a ɔɔnyɛ, a nɔjjo. Ɔci te naŋki ɛkɛ wannayɛ, ɛkɛ warɛ lyɛldɛ ne naŋki ɛkɛ agi damgin awarɛy. ¹² Gɔṭṭi, ne Artɛmac walla Ticcikoc cuonda ‘ya ɛkkɛtiyɛ, dala i pocca bɛɛd ‘yati ne pɛñan. Ikin kooktin ban Nikɔɔpolic acaan ‘ya buaga coocca wɛnan te ñaal konɛ. ¹³ Jinac mena kanŋa ɛkɛ a jyek ganuun, ɔci Apɔɔlɔcyɛ, dala i ɛkkɛn maga ne pwadan ne ɛkkɛn bwagdɛ woony. Dala i ɛkkɛn maga te waak aŋka naa genga bɔɔndi ɛkkɛnti bɛɛ. ¹⁴ Ma ikinyɛ, dala ɛkkɛn kandi ne pwadan oŋkanda aŋka dala waak bala ɛkkɛnti aŋka ɛkkɛn moki maka pookɛn te wak ɛkkɛn, ɔci a ɔɔnyɛ, coodi ɛkkɛn aga coodda budan bɛɛ. ¹⁵ Maka bala ‘yati wɛnniyɛ, ɛkkɛn waakɛnda ñiepi i. Ɔci iyɛ, dala i ma ñiiba te ɔɔn daŋkun. Gena maka ani ikiny, maka jyeti Juaŋti dokiy. Dala Juaŋ yomɛ pwada a pwani ɛkkɛti oŋkanda waakida. Bawwin.