Ḍɔɔm

¹ Gena ‘ya Buuluc kiewan worga ɛkkɛti neeni. ‘Ya a kɛɛngɔn Yaccu Kiṭɔ. ‘Ya muŋŋa Jwaŋa Tolan naŋŋa a cuuda ɛkɛ. ‘Ya muona ɛkɛ bora ‘wonna kanŋa lali jyeka wonkɛn jyeka pwadin. ² Jyeka neeniyɛ, gena jyeka guaŋŋɛ Jwaŋa Tolan mati te baaṭi te Kaci ɛkɛy. Gena jyeka kiiwɛ bɔwan Jwaŋa Tolan worganjiy. ³ Jyeka wonkɛn jyeka pwadin neeniyɛ, gena jyek Kaci Jwaŋa Tolan. Ne ɛkɛ aŋŋi men baanyɛ, ɛkɛ bɛɛn te yɔr ɛkkɛn Daawud ḍuaŋa tolanti. ⁴ Te oŋŋa ɛkɛ jɔŋni ñaalɔ te koolji tɛɛti mokiyɛ, ɛkɛ ŋeejji ma ɛkɛ a Kaci Jwaŋa Tolan awarɛ, ɔci pwani Jwaŋa Tolan bala ɛkɛti. Mena guagdi ‘ya neeniyɛ, gena Yaccu Kiṭɔ Ciɛggɔn ikin. ⁵ Ɔci te yom ɛkɛ yoma pwadanyɛ, ‘ya ‘wonna Juaŋ kanŋa, ɔci ‘ya naŋŋa ɛkɛ aŋi cuuda Yaccu te yenti ɛkɛ aŋka ‘ya maka Kɛɛna Pookɛn myetka aŋka ɛkkɛn jyeddi waakɛnda ɔci noŋdi ba jyek Juaŋo. ⁶ Ɔci ɛkkɛ daŋkun bornɛ Juaŋo, ɔci ɛkkɛ aŋŋɛ ma Yaccu Kiṭɔ. ⁷ Maka ani Juaŋ ban Ḍɔɔm maka muonɛ Juaŋ bora waakɛnda ɔci naŋŋɛ aŋi ma ɛkɛ nɛ, ‘ya kiewan worga ɛkkɛti. Wey ikin Jwaŋa Tolan ɔci Ciɛggɔn ikin Yaccu Kiṭɔyɛ, dala ɛkkɛn ɛkkɛ ‘wontɛ naŋki pwani ɔci coodi pwanno. ⁸ Acca ɛkkɛ myettin, te ñamu ne ‘ya baala cɔka Juaŋti te yenti Yaccu Kiṭɔyɛ, ‘ya yomu pwanna pwani Juaŋti te ɛkkɛ, acaan ma bonk jitin tieŋŋin agi ɛkkɛ jyetcɛ Juaŋti doki. ⁹ Ɔci Jwaŋa Tolan mena kanŋa ɛkɛ naŋdi ‘ya neeniyɛ, jyeka guagdi ‘ya neeni ŋeejɛ ɛkɛ a jyeka awarɛ. Oŋkanda ne ‘ya baala cɔkayɛ, ‘ya cɔk te ɛkkɛ daŋkun. ¹⁰ Oŋkanda ne ‘ya baala cɔka Juaŋtiyɛ, ‘ya tooc ɛkɛti ka dala ɛkɛ ‘ya noŋda pɔy ba yom ɛkɛ aŋka ne oŋ gɛɛltiyɛ, ikin yɔɔrtin iki ɛkkɛ, ¹¹ ɔci ɛkkɛ magdin ‘ya te jyek Juaŋ aŋka ɛkkɛ yomgɔ tɛɛtɛ. ¹² Ne ikin baltin iki ‘yayɛ, ikin ṭeettin yɔtin pookɔ te jyek Juaŋ acaan ikin akin maka jyeti jyek ɛkɛy. ¹³ Modg ɔɔn, ‘ya buaga jwalla parɛ gɛɛl ŋeeddɛ ɛkkɛ daŋkun. ‘Ya baal gɔk jyek woon oŋkanda ka ‘ya bɛɛd aŋka ɛkkɛ magdin te jyek Juaŋ aŋka ma gɛɛg ɛkkɛti jyeddi Juaŋti daŋkun ba jyeka mugɛ Keedin Pookɛn gɛɛg neeni. Yeti woon tɛy tɛy aŋa ‘yati men. ¹⁴ Acaan jyeka neeni bala ‘ya ḍwaŋuti aŋka eed keedin pookɛnti waakɛnda ɔci ma ‘yati. Kan ɛkkɛn a maka ñingɛn tɛyan ɔci walla kan ɛkkɛn a maka ñingɛn morŋanyɛ, ‘ya buaga jiek eed ɛkkɛnti ɔɔn. ¹⁵ ’Ya cyegga woon ban Ḍɔɔm ka ‘ya bɛɛd aŋka ‘ya pocca ɛkkɛ laldin te jyeka wonkɛn jyeka pwadin neeni daŋkun. ¹⁶ ’Ya buay te miti ma te jyeka wonkɛn jyeka pwadin neeni bɛɛ. Te jyeka wonkɛn jyeka pwadin neeniyɛ, Jwaŋa Tolan yaakinti yuoci maka jyeddi jyeka neenitiy. Kan ɛkkɛn a ma Icrayiil walla kan a Keedin Pookɛnyɛ, ɛkkɛn yɔɔdɛ Juaŋ waakɛnda ɔɔn. ¹⁷ Te ñamu jyek pɔya ma pwatti Jwaŋa Tolan ñamɛtiyɛ, ŋeecɔn ɛkkɛn ne pwadan bɛɛ. Ɔci acca te jyeka wonkɛn jyeka pwadin neeniyɛ, jyek pɔy ŋeennin ikin doki. Pɔya neeniyɛ, gena pɔya jyetti ma Juaŋtiy. A ɔɔnyɛ, bala ba jyeka kiigin ne gɔkki agi, “Maka pwadgin Juaŋ ñamɛti neeniyɛ, ɛkkɛn uda te jyenna ɛkkɛn jyetki Juaŋti neeni.” ¹⁸ Jwaŋa Tolan looñi maka nɔɔtk maka noŋi naŋka yeyin neeniti, acaan jyek ɛkɛ jyeka awarɛ yiegin ɛkkɛnti aŋi ba jyeka budan. ¹⁹ Ne ɛkkɛn noŋti a ɔɔn, ɛkkɛn jyek Juaŋ kwoyɔn bɛɛ. Ɛkkɛn nɔɔnnɛ Juaŋ te jyek ɛkɛ doki. ²⁰ Ɔci te oŋŋa ɛkɛ okki noon warda, ɔci ne acca ɔɔnyɛ, kan ma gɔrti waka aŋŋɛ ɛkɛyɛ, ŋeettan ɛkkɛn a Jwaŋa Tolan bala, ɔci ŋeettan ma Juaŋ tɛɛna tɛɛno. Kan ɛkkɛn noŋi ne yaayan oŋkanda a ɔɔnyɛ, ɛkkɛn yaakinti waakɛn byɛrtan te genga Juaŋti bɛɛ. ²¹ Acaan ɛkkɛn Juaŋ ŋeeckɔn doki, yeti ɛkkɛn noŋi ba ɛkɛ agi Jwaŋa Tolan bɛɛ, ɔci ɛkkɛn gɔkti Juaŋti a pwatcin bɛɛ. Paŋi ɛkkɛn aŋi paŋŋa budan ɔci wyetk ɛkkɛn wyetka baaki jiek neeni aŋi myelko. ²² Ɛkkɛn bala poŋi ba paŋi ɛkkɛn pookɛn budan. Ɔci acaan a ɔŋŋiyɛ, ɛkkɛn bala ba maka ñingɛn tɛyan, yeti ɛkkɛn ñingɛn tɛɛcin awarɛ bɛɛ, ɛkkɛn bala ba maka aamman. ²³ Jwaŋa Tolan pwanna pwanno. Ɔci ɛkɛ bala oŋkanda ɔɔn baadi bɛɛ, yeti ma yookɔn te ɛkɛ. Ɔci ma bala moṭi waka pɔɔtan ɛkkɛn a pɔɔt waka naŋtan ma ba ma baan, ɔci ba ḍiirg, ɔci ba leyi, ɔci ba kogi ɔɔny. ²⁴ Ɔci ne ɛkkɛn Juaŋ dalkiti a ɔɔnyɛ, Juaŋ daŋkun ɛkkɛn dalnɛ noŋi ba yomg ɛkkɛn pookɛn budan te naŋki tommo. Ɔci ɛkkɛn bala noŋi ne yaayan waak ɛkkɛnti. ²⁵ Ɛkkɛn yookɔn te jyek Juaŋ ɔci jyeti gena jyeka jomginti. Ɔci ɛkkɛn bala moṭi waka cɔnnɛ Juaŋ a cɔniy. Ɔci Juaŋ Mena Oki Waak mena pwadan mena bala yuonginda neeniyɛ, ɛkɛ aŋka dalji ɛkkɛn te mallo. ²⁶ Ɔci acaan a ɔŋŋiyɛ, ɛkkɛn dalnɛ Jwaŋa Tolan noŋi ba naŋki ɛkkɛn pookɛn neeni. Naŋki ɛkkɛn a tommo. Maka moongyɛ, yookɔn te ‘uay ɛkkɛn, ɔci ɛkkɛn bala noŋi amaam waak ɛkkɛnti pookɛn. ²⁷ Maka ‘uayyɛ, ɛkkɛn moong ɛkkɛn daljɛ, ɔci ɛkkɛn bala tob yɔtin pookɛn. Yomg ɛkkɛn buagɔn ɛkkɛn tob yɔtin pookɛn ne pɛñan. Ɔci te naŋka neeniyɛ, maka ‘uay yiegin ne pɛñan. Ɛkkɛn aŋi ba maka amgin te naŋka neeni doki, ɔci naŋki ɛkkɛn neeni ɛkkɛn yaaññɛ bala ba ywobji Juaŋ bɛɛn ɛkkɛnti doki. ²⁸ Ɔci ne ɛkkɛn yookɛti waakɛn te ŋeejjin ɛkkɛn Jwaŋa Tolan ŋeettitiyɛ, ɛkkɛn dalnɛ Juaŋ poŋi ba paŋi ɛkkɛn, ɔci noŋi ba naŋki ɛkkɛn. Paŋi ɛkkɛn ɔci naŋki ɛkkɛn neeni yeyɔ ne tolan. ²⁹ Nɔji ɛkkɛn tol tolo. Naŋka yaayan gɛɛl dalji ɛkkɛn bɛɛ. Ɛkkɛn waakɛn ḍigɔ. Ɛkkɛn cooddɛn yeyɔ acaan ɛkkɛn a ywobko. Ɛkkɛn korkɛn modɔ. Ɛkkɛn ani nooŋi mako. Ɛkkɛn woowɔ yɔtin pookɛn. Ɛkkɛn noŋi ma ñingɛn. Ɛkkɛn yomgɛn yeyɔ mati. Ɛkkɛn lɔṭi ma waakɛn. ³⁰ Ɛkkɛn wooki maka pookɛn. Ɛkkɛn yomgɛn yeyɔ Jwaŋa Tolanti. Ɛkkɛn wyetkɛn yeyɔ. Ɛkkɛn poŋi agi ɛkkɛn pwadginti ɔci maka pookcɛn aŋka yiegɔ. Ɛkkɛn jieyi waakɛn pookɛn. Maka neeni etti naŋka wonkɛn naŋka yeyin. Ɛkkɛn tyeŋi jyek weyyɛn ɔci jyek mɛyyɛn bɛɛ. ³¹ Ɛkkɛn ciyi amaam budan. Ɛkkɛn tieci jiek waakɛn bɛɛ. Ɛkkɛn ani ma bɛɛ. Ɛkkɛn yomgɛn baaw mati. ³² Ɛkkɛn jiek ŋeecɔn ne Juaŋ gɔki agi kan mena noŋdi ba nɔjja neeniyɛ, ɛkta tuudɔ. Jiek ŋeecɔn ɛkkɛn, yeti ɛkkɛn noŋi men ɔɔn. Yeti maka noŋi nɔjja neeniyɛ, kan maka pookɛn noŋdi ba naŋka neeniyɛ, ɔci ɛkkɛn gɔki agi a ɔŋŋiyɛ, pwadɔ.

¹ Hay, i gɔk kaapun agi ɛkɛ pwadjɛ, ɔci maka pookcɛn aŋka yiegɔ acaan i a men ma Icrayiil kaapun. Kan i gɔk agi maka pookɛn yeyɔyɛ, bala ba i wook war i paru, acaan naŋki i bala ba naŋki ɛkkɛn daŋkun ɔɔn. ² Çeecin ikin kan ma noŋdi nɔjja neeniyɛ, ywobji Jwaŋa Tolan bɛya ɛkkɛn wyetkɛnti, ɔci a ɔɔn yaayɛ bɛɛ, yɔmjin. ³ Kan i gɔk maka pookɛn noŋi amaam ɔci kan nɔji i bala ba nɔji ɛkkɛn daŋkunyɛ, i poŋ gɔk ywobji Jwaŋa Tolan bɛya iti bɛɛ? Bɛya, hay! ⁴ Jwaŋa Tolan yomɛ pwad pwad mati. Ɛkɛ mwondi te ma ne pɛñan bɛɛ. Acaan ywobji Juaŋ bɛɛn mati men bɛɛyɛ, ɛkkɛ poŋɛ gɔkɛ agi ywobji ɛkta bɛɛdɔ moki bɛɛ. Jwaŋa Tolan buagɔn ɛkkɛ waakɔ yaldɛ te nɔji ɛkkɛ aŋka ɛkɛ yomɛ pwanni a pwani ɛkkɛti neeni. ⁵ Kan ɛkkɛ ciyɛ wyetkɔ tɛy tɛy ɔci kan ɛkkɛ wiaktɛ te nɔji ɛkkɛ bɛɛyɛ, ne baaṭi oŋŋa Juaŋ ywobji ɛkɛ lɛɛldɛ borayɛ, ywobji ɛkɛ yuardɛ ɛkkɛ pookɔ daŋkun. Kan Juaŋ noŋdi godan matiyɛ, naŋki ɛkɛ neeni a nɔji bɛɛ. ⁶ Acaan ne ɛkɛ noŋdi godan matiyɛ, “Juaŋ ma ‘wondɛ waak menga da ba naŋki ɛkɛ, ɔci menga da ba naŋki ɛkɛ.” ⁷ Maka noŋi ne pwadan oŋkanda a ɔɔnyɛ, ɛkkɛn ‘wondɛ Juaŋ tɛɛtin, ɔci tɛɛtin neeniyɛ, baadi oŋgati bɛɛ. Maka neeniyɛ, ɛkkɛn a maka lieṭi jyeka pwadin. Ɛkkɛn buagɔn agi dala Jwaŋa Tolan gɔkti agi ɛkkɛn pwadginti. Ɔci ɛkkɛn moki lieṭi tɛɛtin baadi bɛɛy. ⁸ Maka noŋi ba yomg ɛkkɛn pookɛn ɔci yookɔn te jyeka pwadin ɔci tyeŋi gena jyeka yeyin oŋkandayɛ, ɛkkɛn ywobji Juaŋ yuartan ne baaṭi, acaan Juaŋ looñi te naŋki ɛkkɛn. ⁹ Ma waakɛnda maka noŋi ne yaayan neeni kan a ma Icrayiil walla kan a Keedin Pookɛnyɛ, taab ɛkkɛn pɛñ pɛñ ɛkkɛnti pwatcin bɛɛ, ɔci ɛkkɛn yomgɛn yiegdi ne pɛñan. ¹⁰ Maka noŋi ne pwadan oŋkandayɛ, kan a ma Icrayiil walla kan a Keedin Pookɛnyɛ, waka pwadin yuartan ɛkkɛn. Juaŋ jieddi ɛkkɛn ɔci andi ɛkkɛn ɔci coodda pwadan bala ɛkkɛnti. ¹¹ Jwaŋa Tolanyɛ, ɛkɛ kɛɛb ma jitkɛn bɛɛ. Ɛkɛ gɔki agi ma balgi bolja ne cyɛɛlɔ waakcinda. ¹² Maka balki ganuun Muuca bɛɛyɛ, ɔci kan ɛkkɛn noŋi nɔji oŋkandayɛ, ɛkkɛn ḍakti daŋkun. Maka balki ganuun Muucayɛ, ɔci kan ɛkkɛn noŋi nɔji men ɔɔnyɛ, godan ɛkkɛn bala daŋkun, ɔci nona godantiyɛ, Jwaŋa Tolan jiek lɛɛldɛ bora ɛkkɛnti te ganuun Muuca ganuun bala ɛkkɛntiy. ¹³ Kan ma tieŋdi jyek ganuun a tieŋŋin oŋkanda te jyetkɛn budan ɔci noŋi ba jyek ganuun bɛɛyɛ, ɛkkɛn pwaddi Juaŋ ñamɛti bɛɛ. Gena maka tieŋdi ɔci noŋi ba jyek ganuun aŋka pwaddi Juaŋ ñamɛtiy. ¹⁴ Keedin Pookɛn ɛkkɛn balki ganuun Muuca bɛɛ. Yeti kan naŋka naŋtan ɛkkɛn neeni bala ba ganuunyɛ, a ɔɔn bala ba ɛkkɛn balki ganuun doki. ¹⁵ Ɔci a ɔɔnyɛ, bala ba ganuun jitkɛn bala ɛkkɛn yomgɛnti doki. Ɔci ne ɛkkɛn noŋti gengayɛ, jiek gɔkti ɛkkɛn yomgɛnti agi naŋka neeniyɛ, pwatcin, walla naŋka neeniyɛ, yaayɛ. ¹⁶ Jyeka neeni bɛya bora te oŋa Jwaŋa Tolan gɔrti jyeka bala a coggɔn ma yomgɛnti te naŋki godan bala ba jyeka loṭa ‘ya ma a jyeka wonkɛn jyeka pwadin neeni. Godan neeni ‘wonnɛ Juaŋ Yaccu bieŋɛti aŋka naŋdɛ ɛkɛ. ¹⁷ Hay i, i bor war i agi i a men Ma Yahuud, ɔci i tier waru jyek ganuunti, ɔci i jieyi waru agi i ag men Jwaŋa Tolan, ¹⁸ ɔci naŋki Juaŋ naŋka ɛkɛ buagiti ŋeej i, ɔci jyek naŋka pwadan ŋeej i acaan i lalki ma te ganuun. ¹⁹ I gɔk agi maka kɛɛna pookcɛnyɛ, ɛkki balgi ba maka ñingɛn ulɔ, ɔci agi ɛkki balgi ba maka ciyi nona mielo. Ɔci i gɔk agi i a mena wɛɛyi maka neeni, ɔci agi i a mena dɛki maka ciyi nona ulan neeniti. ²⁰ I gɔk agi i a mena loṭi maka jiek kwoyɔny, ɔci agi i a mena loṭi maka ḍyɛrin moki. Çeej i ne pwadan te ganuunyɛ, i waak ŋeeji, ɔci naŋka awarɛ moki ŋeej i. ²¹ Ne i loṭi maka pookɛn a ɔɔn wannay, oŋ i daŋkun waru lala bɛɛ? I lor ma agi, “Naa ma korti waak bɛɛ. Yeti ne i loṭi ma a ɔɔn wan, i waanu kor waak bɛɛ?” ²² I gɔk maka pookɛnti ne pɛñan agi, “Naa ma noŋdi tomi bɛɛ.” Yeti i noŋ tomi bɛɛ? Ɛkkɛ dɛyɛ ma agi naa ma mortɔ jɔkinti bɛɛ, ɛkkɛ gɔkɛ agi dala ma morti aŋa Jwaŋa Tolanti pardan. Oŋ ɛkkɛ woodgɔ jitkɔ moṭɛ Jwaŋa Tolanti te yoma awarɛ bɛɛ ogo? ²³ I poŋ gɔk agi i baal ñamu acaan i balki worga Jwaŋa Tolan, yeti i lɛɛwi ganuun Juaŋ jitkɛn dɔki bɛɛ? Ɔci a ɔɔn i noŋ ne yaayan Jwaŋa Tolanti bɛɛ? ²⁴ Jyeka kiigin gɔki agi, “Te naŋki ɛkkɛyɛ, maka keedin Pookɛn neeniyɛ, ḍori agi yenti Jwaŋa Tolan yaayɔ.” ²⁵ I poŋ kaapun agi acaan i ŋutki mayɛ, i a men Juaŋ waanɛ te naŋka wanna. Hayɛllɛ! Yeti ne i jyek Juaŋ tiidi ñinyɛ, a ɔɔn aŋka pwatcin bala ba ne i ŋutkiti ma no. Kan i ganuun Juaŋ tiyayɔyɛ, jyek ŋwoti yɔmdi iti. Yeti kan i bɛɛy ganuun Juaŋ jitkɛnyɛ, i baal ba mena ciyi budan te jyek ŋwotto. ²⁶ Yeti kan mena ŋudi ma bɛɛ jyek ganuun tiidɛ ñinyɛ, a ɔɔn pwatcin. ²⁷ Kan i jyek ganuun tiya ñin bɛɛyɛ, mena ŋudi ma bɛɛ neeni aŋka pwatcin ne tolan te i nɔñji. ²⁸ I a men Juaŋ acaan i a men ma Icrayiil budan bɛɛ, ɔci walla acaan ma gɔki agi i pwadji acaan i ŋutki ma iñuti bɛɛ. ²⁹ I a men Juaŋ acaan yom i pwatcin. A ɔɔnyɛ, Juaŋ oŋ gɔkti agi i pwadji oŋo. Gena jyek naŋki Jwaŋa Tolan te Boŋ ɛkɛ ma yomgɛnti. Maka neeni buagɔn naa ma baan gɔki agi ɛkkɛn pwadginti bɛɛ. Ɛkkɛn buagɔn gena Juaŋ aŋka gɔkti agi ɛkkɛn pwadginti.

¹ Ɛkkɛ toocɛ agi ma Icrayiil bala ñamu te genga boki? Ɔci moki ɛkkɛ gɔkɛ agi jyek ŋwoti neeni yɔmjin te genga boki? ² Ɛɛ, dala ŋeeddɛ ɛkkɛ ma Icrayiil neeniyɛ, ɛkkɛn bala ñamu te worga Juaŋo, acaan gena ɛkkɛn ‘wonnɛ ɛkɛ worga ɛkɛ te ñamuy. ³ Yeti ma Icrayiil gɛɛgyɛ, ɛkkɛn jyek Juaŋ tiiyɛyɔ bɛɛ. Ɔci kan ne ɛkkɛn jiek bɛɛkitiji a ɔɔnyɛ, ɔci Juaŋ daŋkun jyeka guaŋŋɛ ɛkɛ te ma Icrayiil neeni agdɛyɔ? ⁴ Hayɛllɛ! Kan ikin gɔkin agi ma waakɛnda jomi jiekyɛ, naa ikin gɔktin a ɔɔn Jwaŋa Tolanti bɛɛ. Jwaŋa Tolanyɛ, ɛkɛ a Mena awarɛ. A ɔɔnyɛ, bala ba jyeka kiigin ne gɔkki te Juaŋ agi, “Jyeka guaŋŋi iyɛ, dala ɛkkɛn ŋeettan ma ɛkkɛn a jyeka awarɛ. Kan ma gɔkti a naŋki i bala a ɔɔn walla a ɔɔnyɛ, dala jyek i jyek ɛkkɛn bwantan.” ⁵ Ma gɛɛg gɔki agi ikin akin nɔɔtko. Ɔci acaan a ɔŋŋiyɛ, ne ma gɔkki agi ikin akin nɔɔtk ɔci Jwaŋa Tolan aŋka pwad pwad parɛ a ɔɔnyɛ, bala ba jwalla pwadan bɛɛn Juaŋti. Ɔci kan jwalla pwadan bɛya Juaŋtiyɛ, oŋ ɛkɛ moki noŋdi ywobji ikinti ogo? Ywobji ɛkɛ yaayɛ bɛɛ? ⁶ Hayɛllɛ! Ywobji Juaŋ yaayɛ bɛɛ. Kan ywobji ɛkɛ yaayɛyɛ, oŋ ɛkɛ noŋdi godan maka ciyi ṭɛɛrji a ɔki? ⁷ Kan jomi jiek ‘ya pwani Juaŋ lɛɛldɛ boray, oŋ jiek dɔɔkti ‘ya wyeñuti moki ba mena nɔɔdɔn ɔɔn ogo? ⁸ Oŋ ba ikin gɔktin agi dala ikin noŋtin ne yaayan aŋka naŋka pwadan bɛya ikinti bɛɛ? Ma gɛɛg gɔki agi ‘ya lorcɔ ma a ɔɔn. Jyeka bɛya ɛkkɛn wyetkɛnti wanna yaayɛ bɛɛ. Yɔmjin. ⁹ Jiek bala a ɔki? Ikin ma Icrayiil pwatkin te Keedin Pookɛn? Hayɛllɛ! A ɔɔn bɛɛ. ‘Ya gɔkkan ɛkkɛti doki ka ma waakɛnda a nɔɔtko. ¹⁰ Jyeka kiigin gɔki agi, “Mena pwadan gɛɛl bala bɛɛ. ¹¹ Ɔci men gɛɛl tieŋŋin jyek Juaŋ bɛɛ, ɔci menga bala lieṭi jyek Juaŋ bɛɛ. ¹² Ɛkkɛn jyetcin ɔntɔ waakɛnda. Ɛkkɛn yeyɔ waakɛnda. Menga bala noŋi ne pwadan ne cyɛɛlɔ bɛɛ. Baawo. ¹³ Jyek ɛkkɛn bala ba kool tukɛ ne pɔkkiti ma ɔci ŋooyi ne yaayany. Ɔci te lɛmi ɛkkɛnyɛ, jyeka guaktan ɛkkɛn a jyeka a jomgin budan. Jyek ɛkkɛn bala ba ñaang kaaŋ ɛkkɛn tuggɛnti. ¹⁴ Ɛkkɛn tuggɛn kumgin te ‘wali ma te jyeka yeyin. ¹⁵ Ɛkkɛn ani nooŋi mako. ¹⁶ Nona ootti ɛkkɛnyɛ, jiek yiegdi te naŋki ɛkkɛn, ɔci ma cooddɛn yiegdi doki. ¹⁷ Ɛkkɛn jyek coodda pwadan ŋeecɔn bɛɛ. ¹⁸ Ɛkkɛn buayi Jwaŋa Tolan bɛɛ.” ¹⁹ Jwaŋa Tolan ma ‘wonnɛ ganuun. Gena jyek naŋki ɛkɛ naŋka ɛkɛ buagiti naŋtan may. Ganuun jitkɛn waakɛnda bɛɛn maka neeniti budan bɛɛ. Juaŋ ma myennɛ te naŋka neeni aŋka ŋeettan ɛkkɛn naŋki ɛkkɛn yɔmjin bɛɛ. Ɔci a ɔŋŋiyɛ, menga yaakinti gɔɔdi agi ɛkɛ pwadjɛ bɛɛ. Ɔci iñɔ baanji wɛnniyɛ, menga yaakinti gɔɔdi agi godan ɛkɛ baawɔ ne baaṭi Juaŋti bɛɛ. ²⁰ Menga yaakinti pwada Jwaŋa Tolan ñamɛti te jyek ganuun bɛɛ. Te jyek ganuunyɛ, ŋeettan ma naŋki ɛkkɛn yaayɛ a nɔjjo. ²¹ Pɔya ma baan pwatti Jwaŋa Tolan ñamɛtiyɛ, yuarɛ ma doki. Gena jyek ganuun bɛɛ. Pɔya neeni guagɛ maka a bɔwan Jwaŋa Tolan te baaṭi, ɔci guaŋŋɛ Muuca daŋkun. ²² Pɔya ma baan pwatti Jwaŋa Tolan ñamɛti neeniyɛ, gena jyenna ma jyetti Yaccu Kiṭɔtiy. Pɔya neeni bala te ma waakɛnda maka jyeddi ɛkɛtiy. Acaan ma waakɛnda bala bolja ne cyɛɛlɔ. ²³ Acaan ma waakɛnda noŋi nɔji doki. Ɔci men gɛɛl bala pwad pwad ba Jwaŋa Tolan bɛɛ, naŋki ma waakɛnda bɔɔnjin. ²⁴ Ɔci acaan a ɔŋŋiyɛ, men gɛɛl yaakinti pwada parɛ bɛɛ. Ma pwaddi te naŋki Jwaŋa Tolan naŋka pwadan naŋka naŋŋɛ ɛkɛ te yom ɛkɛ parɛ oŋŋa ɛkɛ ikin wanninti ɛkɛ te yimg Yaccu Kiṭɔy. ²⁵ Ɔci a ɔŋŋiyɛ, maka jyeddi ɛkɛtiyɛ, ɛkkɛn yaakinti ŋeedi iki ɛkɛ. Ɔci te naŋki ɛkɛ neeniyɛ, ɛkɛ ŋeejji ma ɛkɛ pwad pwado. Te ñamu ma bala poŋi agi naŋki ɛkta baali a ɔki ne ɛkɛ ñingɛ yalnɛ ɔntɔ te nɔji ma baanti neeniy. ²⁶ Ɔci te lyen Yaccuyɛ, Jwaŋa Tolan pwani ɛkɛ lɛɛlnɛ bora mati aŋka pwani ɛkɛ ŋeettan ma. A ɔŋŋiyɛ, Jwaŋa Tolan mieti a ɛkɛ maka jyeddi ɛkɛti te yenti Yacuuyɛ, naŋdɛ pwaddi ɛkɛ ñamɛti. ²⁷ Men gɛɛl yaakinti jieyi warɛ parɛ agi ɛkɛ pwadjɛ Jwaŋa Tolan ñamɛti bɛɛ. Jyek jiɛta jieki ma waakɛn neeniyɛ, bala moki bɛɛ. Bawwin doki. Bawwin te jyek naŋka naŋtin ikinyɛ? A’a, bawwin te jyek jyenna ma jyetti Yaccu Kiṭɔtiy. ²⁸ Ikin gɔkin agi ma pwaddi Juaŋ ñamɛti te jyenna ma jyetti Yaccuti neeni parɛ, ma pwaddi te tiit jyek ganuun bɛɛ. ²⁹ Jwaŋa Tolan a Juaŋ ma Icrayiil pookɛn? Walla ɛkɛ a Juaŋ Keedin Pookɛn daŋkun? Ɛɛ, ɛkɛ a Juaŋ Keedin Pookɛn daŋkun. ³⁰ Maka jyeddiyɛ, kan ɛkkɛn a ma Icrayiil, walla kan ɛkkɛn a Keedin Pookɛnyɛ, ɛkkɛn pwaddi Juaŋ ñamɛti te jyenna ɛkkɛn jyetki Juaŋti neeni. Jwaŋ ɛkkɛn a Jwaŋa ne cyɛɛlɔ. ³¹ Te jyenna ma jyetki Juaŋti neeniyɛ, ganuun aŋi jyeka budan doki? A’a, aŋi jyeka budan bɛɛ. Ganuun pwad pwado, ɔci kanŋa ɛkɛ bala daŋkun.

¹ Oŋ ikin gɔktin a ɔki te Abrahim mena yɔr ikin neeni? ² Kan te Abrahim pwanni Jwaŋa Tolan ñamɛti te naŋki ɛkɛ parɛyɛ, te Abrahim aŋka jieddi warɛ parɛ. Yeti ɛkɛ yaakinti jieyi warɛ Juaŋ ñamɛti bɛɛ acaan gena Juaŋ aŋka ɛkɛ naŋŋɛ pwani wanna. ³ Jyeka kiigin neeni gɔki a ɔki te jyek Abrahim? Jyeka kiigin gɔki agi, “Abrahim jyeti Juaŋti ɔci ɛkɛ pwani Juaŋ ñamɛti.” ⁴ Kan men noŋi kanŋayɛ, ɛkɛ ‘wontan ma waak budan bɛɛ. Ɛkɛ ‘wontan ma waak ba kanŋa ɛkɛ. ⁵ Jwaŋa Tolanyɛ, ɛkɛ a mena yomɛ pɔktɛ noŋi naŋki ɛkɛ naŋka pwadan maka nɔɔtkti aŋka ɛkkɛn pwatti ɛkɛ ñamɛti neeni. Maka naŋdi ɛkɛ pwaddi neeniyɛ, gena maka jyeddi ɛkɛtiy. Juaŋ noŋi a ɔɔn te yom ɛkɛ. Ɛkɛ noŋi a ɔɔn te naŋki ma baan bɛɛ. ⁶ Maka naŋdi Juaŋ ɔci pwaddi ɛkɛ ñamɛti te yom ɛkɛ parɛ pwaddi te naŋki ɛkkɛn pookɛn bɛɛ, ɛkkɛn ciyi yomgɛn ñɔɔna ñɔɔn ba jyeka guaŋŋɛ Daawud ne ɛkɛ gɔki agi, ⁷ “Kan mena bɔɔktɛ Juaŋ te nɔji ɛkɛyɛ, ɔci kan nɔji ɛkɛ kwomdi ñin Juaŋyɛ, ɛkɛ ciyi yomɛ ñɔɔna ñɔɔno. ⁸ Kan mena bɔɔŋnɛ Juaŋ te nɔji ɛkɛ dokiyɛ, kan Juaŋ jiek duaktɛ ɛkɛ wyeñɛti bɛɛyɛ, ɛkɛ yomɛ niin ñɔɔna ñɔɔno.” ⁹ Gena ma yomgɛn ñɔɔki neeni bala te ma Icrayiil maka ŋuodɛ ma pookɛn? Walla bala te Keedin Pookɛn maka ŋuodɛ ma bɛɛ daŋkun? Ikin gɔkin agi Abrahimyɛ, ɛkɛ pwani Juaŋti te jyenna jyetti ɛkɛ neeni. ¹⁰ Oŋŋa ɛkɛ pwanni Juaŋti neeniyɛ, ɛkɛ ŋudɛ ma doki? Walla ɛkɛ ŋudɛ ma men bɛɛ? Ɛkɛ pwani Juaŋti te ñamu ne ɛkɛ ŋutkiti ma men bɛɛy. ¹¹ Ɛkɛ ŋudi ma ne ŋoyɔ. Ɛkɛ ‘wonnɛ Juaŋ jyek ŋwoti aŋka ɛkɛ ŋeettan ma ɛkɛ pwani Juaŋti te ñamu doki te jyenna jyetti ɛkɛ Juaŋti neeni. Abrahim naŋŋɛ Juaŋ aŋi yɔr maka pwadgin Juaŋ ñamɛti waakɛnda te jyenna ɛkkɛn jyetki Juaŋti neeni. Gena maka ciyi budan te jyek ŋwotiy. ¹² Ɔci ɛkɛ aŋi yɔr maka balki jyek ŋwoti daŋkun. Maka balki jyek ŋwoti neeniyɛ, ɛkkɛn jyeti Juaŋti ba Abrahim ɔɔn ne Abrahim ŋutkiti ma men bɛɛy. ¹³ Ne Juaŋ gɔŋni Abrahimti agi dala ṭɛra neeni agdɔ ṭɛr ma ɛkta baan wardandayɛ, Juaŋ gɔki a ɔɔn acaan Abrahim pwani ɛkɛti te jyenna jyetti ɛkɛ neeni. Jyeka neeni a ganuun bɛɛ. ¹⁴ Kan ɛkkɛ poŋɛ gɔki agi gena ḍuaññɛ Juaŋ te jwali neeni aga gen maka tieci ganuunyɛ, a ɔŋŋiyɛ, bala ba ɛkkɛ gɔkɛ agi jyenna ma jyetki Juaŋti neeniyɛ, a genga moki bɛɛ, ɔci jyeka guaŋŋɛ Juaŋ Abrahimti neeniyɛ, aŋi jyeka budan daŋkun. ¹⁵ Ma pwaddi Juaŋti te ganuun bɛɛ. Gena jyek ywobji aŋka bɛya mati te ganuun. Te jyek ganuun baaki matiyɛ, te genga bala lɛktan ma jitin bɛɛ. ¹⁶ Jyeka guaŋŋɛ Juaŋ Abrahimti agi dala ṭɛra neeni agdɔ ṭɛr ma ɛkta baan kondan warda neeniyɛ, bala te jyenna ma jyetki Juaŋti, acaan Juaŋ yomɛ pwad pwado. Ɔci a ɔɔnyɛ, jyeka guaŋŋɛ Juaŋ Abrahimti neeniyɛ, bala te kɛɛgin Abrahim waakɛnda. Gena maka balki ganuun ɔci maka jyeti Juaŋti ba Abrahim ɔɔn. Ɛkɛ a yɔr ikin waakida, ¹⁷ bala ba jyeka kiigin jyeka guaŋŋɛ Juaŋ Abrahimti agi, “I naŋdin ‘ya agdi yɔr kɛɛna coŋin.” Jyenna Abrahim jyetti Juaŋti neeniyɛ, yɔmjin, acaan jyeka guaŋŋɛ Juaŋ Abrahimti neeniyɛ, a jyeka budan bɛɛ. Gena jyek mena yaakinti ma luoldɛ ñaalɔ te lientiy. Ɔci ɛkɛ yaakinti moki ma myettɛ te jyeka bɛya ne ŋoyɔy. ¹⁸ Ne pɔy jiedi kaci baawi menyɛ, Abrahim bala kɛɛy naŋki Juaŋ men. Ɔci a ɔŋŋiyɛ, ɛkɛ aŋi ‘yɔr kɛɛna coŋin bala ba jyeka guaŋŋɛ Juaŋ ɛkɛti agi, “Kɛɛgin i coŋdi ɔci ma yaaktanti poki ɛkkɛn bɛɛ.” ¹⁹ Çeejɛ Abrahim ɛkɛ aŋi daan doki, kaci bɛya te ɛkɛti moki bɛɛ, acaan yuong ɛkɛ aŋi miyya ne cyɛɛlɔ (100) doki. Yeti ɛkɛ bala poŋi jiek bɛɛ. Ɛkɛ jyeti jyeka guaŋŋɛ Juaŋ ɛkɛti te ñamuy. Ɔci ŋeejɛ Abrahim daŋkun ɛŋ ɛkɛ Caara yaakinti jieda moki bɛɛ. ²⁰ Yeti Abrahim yomɛ yaañi oŋ gɛɛlti tieki jyeka guaŋŋɛ Juaŋ ɛkɛti neeni bɛɛ, ɛkɛ yomɛ tɛy tɛy te jyenna ɛkɛ jyetti Juaŋti neeni. Ɔci ɛkɛ bala jieyi Juaŋ agi Juaŋ yaakiti noŋdɔ ba jyeka guaŋda ɛkta te ñamu ɛkɛti neeni. ²¹ Abrahim gɔki a ɔɔn, acaan ŋeejɛ ɛkɛ yomɛti Juaŋ yaakinti noŋdi ba jyeka guaŋŋɛ ɛkɛ ɛkɛti neeni. ²² Ne Abrahim jyetti Juaŋti a ɔɔnyɛ, bala ba jyeka guaŋŋɛ Juaŋ agi, “Ɛkɛ pwani Juaŋ ñamɛti te jyenna ɛkɛ jyetti neeni.” ²³ Ne jyeka kiigin gɔkki agi “Abrahim pwani Juaŋtiyɛ,” jyek pwani neeni bala te ɛkɛ parɛ bɛɛ. ²⁴ Jyek pwani bala te ikin maka jyeti Juaŋti daŋkuny. Kan ma jyeddi Juaŋti ba Abrahimyɛ, ɛkkɛn pwaddi Jwaŋa Tolan mena Ciɛggɔn ikin Yaccu Kiṭɔ luolnɛ ñaalɔ te koolji tɛɛti neeni ñamɛti daŋkun. ²⁵ “Yaccu tuun te nɔji ikin, ɔci ɛkɛ luolnɛ Juaŋ ñaalɔ, aŋka ikin pwannin Juaŋ ñamɛti te naŋki ɛkɛ neeni.”

¹ Acaan ikin pwannin Juaŋti te jyenna ikin jyettin ɛkɛti neeniyɛ, ikin ŋeenin iki Juaŋ doki te naŋki Ciɛggɔn ikin Yaccu Kiṭɔ. Jiek bala moki bɛɛ. ² Te naŋki Yaccuyɛ, Juaŋ yomɛ pwada a pwani ikinti. Ɛkɛ yomɛ pwanna a pwani ikinti oŋkanda ɔɔn te yom ɛkɛ parɛ. Ɔci coodi ikin neeniyɛ, pwad pwado. Ɔci ikin ciyin yomgɔ ñɔɔna ñɔɔn oŋkanda acaan ikin jyettin ɔci balkin kɛɛyin pwani Juaŋ pwanna bɛya ne baaṭi ikintiy. ³ Ikin yomgɔ ñɔɔna ñɔɔn te jyeka bɛya ne ŋoyɔ neeni pookɛn bɛɛ, te jyeka acca daŋkun. Kan taab bala ikintiyɛ, ikin yaakinti yomgɔ ñɔɔna ñɔɔn men. Çeecin ikin kan taab bala ikinti ɔci kan ikin yomgɔ pwadɔ men ɔɔnyɛ, ikin yomgɔ tɛya te taab neeni. ⁴ Ɔci te yom tɛɛn neeniyɛ, ikin balkin ba kɛɛgin moki bɛɛ. Ikin loonnin doki, ɔci acaan a ɔŋŋiyɛ, ikin yaakinti poŋin paŋi Jwaŋa Tolan ne pwadan, ɔci ikin jyettin kɛɛyin te naŋki ɛkɛ. ⁵ Ɔci kɛɛna ikin kɛɛyin naŋki Juaŋ neeniyɛ, cwamnɛ ɛkɛ doki. Acaan ani Juaŋ bala ikin yomgɔti te naŋki Boŋ Jwaŋa Tolan boŋa ikin ‘wonninti Juaŋ neeni. ⁶ Ne ikin balkin ciyin te war koñi budanyɛ, Kiṭɔ bɛɛn ɔci tuun te nɔji ikin waakida. Oŋŋa ɛkɛ bɛɛni neeniyɛ, yɔmjin. ⁷ Çeecin ikin menga warɛ ‘wondɛ lien acaan te mena parɛ gɛɛl a maam budan bɛɛ. Yeti a oŋki dita menga tuwa acaan te mena pwadan gɛɛl. ⁸ Yeti naŋki Juaŋ da parɛ. Anna ɛkɛ ani ikinyɛ, ŋeecin ikin ne pwadan te naŋki Yaccu ne ɛkɛ tuuni te ikin ne ikin akin nɔɔtk meny. ⁹ Acaan ne Yaccu tuuni te ikin ne ikin akin nɔɔtk menyɛ, acca ikin buayin ywobji Juaŋ moki bɛɛ, acaan ikin pwannin ɛkɛti doki. ¹⁰ Te ñamu ikin yoyyin ñin iki Jwaŋa Tolan. Yeti te lyen Kaci ɛkɛ Yaccu Kiṭɔ neeniyɛ, ikin ŋeenin iki ɛkɛ doki. Ikin aŋŋin mung Jwaŋa Tolan doki. Ɔci a ɔŋŋiyɛ, ŋeecin ikin ne pwadan ikin yɔɔtin Yaccu te tɛɛtin ɛkɛ tɛɛtin woonɛ neeni. ¹¹ Ɔci jwalla parɛ gɛɛl bala daŋkun agi ikin yomgɔ ñɔyɔ Jwaŋa Tolanti oŋkanda, acaan ikin ŋeenin iki ɛkɛ te lyen Yaccu. ¹² Te nɔji Adam parɛyɛ, ma waakɛnda aŋi nɔɔtko, aŋka a ɔŋŋiyɛ, lien bɛɛn mati baan warda acaan ma waakɛnda noŋi nɔjjo. ¹³ Ne ganuun Muuca baawi mati menyɛ, nɔji bala mati te baaṭi doki. Yeti acaan ma ‘wonnɛ Jwaŋa Tolan ganuun men bɛɛyɛ, Juaŋ bala poki nɔji ɛkkɛn bɛɛ. ¹⁴ Lien bala te oŋŋa Adam baali, ɔci ne Muuca bɛɛni moki ɔɔn. Menga ɛkkɛnti yaakinti lien oldɛ ɔntɔ bɛɛ. Ɛkkɛn waakɛnda buannɛ lieno. Ɔci kan mena nɔji ɛkɛ da parɛ bala ba nɔji Adam bɛɛyɛ, jyek lien bala ɛkɛti daŋkun. Ɔci ba jyek Adam neeniyɛ, bala ba jyek Yaccu daŋkun. ¹⁵ Bɔɔkin ikin bɔɔŋninti Juaŋ te nɔji ikin budan te yom ɛkɛ neeniyɛ, bala ba jyeka bɛɛn te Adamti bɛɛ, naŋki Adam a nɔjjo. Ɔci te nɔji mena ne cyɛɛlɔ neeniyɛ, lien bɛɛn ma baanti. Naŋki Adam tol tolo, yeti naŋki ɛkɛ tol tol bala ba naŋki Juaŋ bɛɛ. Juaŋ yomɛ pwad pwad mati waakɛnda. Ɔci gena ‘wonnɛ ɛkɛ ma te yom ɛkɛ budanyɛ, bala mati waakɛnda. Ɔci acaan ɛkɛ yomɛ pwanna pwani mati a ɔɔnyɛ, ɛkɛ maka coŋin ‘wonnɛ gena neeni budan te yom ɛkɛ. Juaŋ noŋi a ɔɔn te naŋka naŋŋi mena ne cyɛɛlɔ neeni. Gena Yaccu Kiṭɔ. ¹⁶ Jyek naŋki Yaccu ɔci jyek naŋki Adam ɛkkɛn kɛɛptin. Ɔci te nɔjja naŋŋɛ Adam parɛ neeniyɛ, ma waakɛnda ḍɛɛmdin iñɔ. Ɔci te naŋka naŋŋɛ Yaccu parɛ neeniyɛ, maka balki nɔji ne tolanyɛ, ɛkkɛn pwadgin Juaŋ ñamɛti doki. Ma ‘wonnɛ Yaccu naŋka neeni budan te yom ɛkɛ. ¹⁷ Te nɔji mena ne cyɛɛlɔ neeniyɛ, lien bɛɛni, ɔci menga yaakinti lien oldɛ ɔntɔ bɛɛ. Jyek lien tɛy tɛy mati oŋkanda. Yeti maka Juaŋ yomɛ pwanna pwani ɛkkɛnti neeniyɛ, maka pwadgin ɛkɛ ñamɛti neeniyɛ, ɛkkɛn aŋka ciyi ne pwadan. Ɛkkɛn bwandɛ genga bɛɛ. ¹⁸ Yeti te naŋka ne cyɛɛlɔ yaayan a nɔji neeniyɛ, jiek bɛɛn ma wyetkɛnti waakɛnda. Ɔci te naŋka naŋŋɛ Yaccu te lyen ɛkɛ pwadan ne cyɛɛlɔ neeniyɛ, ma waakɛnda yaakinti pwaddi Juaŋ ñamɛti, ɔci ɛkkɛn ‘wondɛ ɛkɛ tɛɛtin. ¹⁹ Yeti mena ne cyɛɛlɔ aŋka jyek Juaŋ bɛɛññɛji. Ɔci te naŋki ɛkɛ ma waakɛnda aŋi nɔɔtko. Ɔci mena parɛ gɛɛl bala jyek Juaŋ tiiññiyɔ, ɔci te naŋki ɛkɛyɛ, ma waakɛnda pwadgin Juaŋ ñamɛti. ²⁰ Worga ganuun bala, ɔci ma yookɔn te worga ganuun, a ɔɔnyɛ, ɛkkɛn nɔji ‘uotkiti, ɔci nɔji toli ne pɛñan. Nɔji tol tol awarɛ, yeti ɛkɛ tol tol ba yom pwani Jwaŋa Tolan mati bɛɛ. ²¹ Te ñamu ma a kɛɛnk nɔjjo, ɔci jyek lien bala. Accayɛ, jyek yom pwani Juaŋ bala mati. Ɔci te yom pwani Juaŋ neeniyɛ, ma pwadgin ɛkɛ ñamɛti, ɔci a ɔŋŋiyɛ, tɛɛtin Juaŋ bala mati te Yaccu Kiṭɔ, ɔci tɛɛtin neeni baadi ywongati bɛɛ.

¹ Oŋ acca ikin noŋtin a ɔki? Ikin noŋtin nɔji oŋkanda aŋka Jwaŋa Tolan ikin ‘uottinti yom pwani ɛkɛ? ² A’a, a ɔɔn bɛɛ. Oŋ kan jyek nɔji a jyek ikin moki bɛɛy, oŋ ikin noŋtin nɔji moki a ɔki? ³ Jyeka neeni ŋeejɛ ɛkkɛ doki, oŋŋa ikin buulkin mayɛ, ikin aŋŋin yoŋŋa ne cyɛɛlɔ iki Yaccu Kiṭɔ. A ɔŋŋiyɛ, lyena tuuni ɛkɛ neeni aŋi ba lyen ikin daŋkun. ⁴ Te bulta neeniyɛ, ikin jokkin ma i Yaccu a cyɛɛlɔ. Ɔci moki, ba lulta Yaccu luolnɛ Weegɛn ñaalɔ te koolji tɛɛti moki te naŋki ɛkɛ naŋka tɛyan naŋka pwadan neeniyɛ, bala ba jyek ikin daŋkun. Ikin jɔŋnin ñaalɔ iki ɛkɛ a cyɛɛlɔ, ɔci acca coodi ikin aŋi coodda woonɛ ba coodi ɛkɛ ɔɔn. ⁵ Acaan jyek ikin ñoowin iki jyek Yaccu te jyek lyen ɛkɛyɛ, ɔci unna ɛkɛ unni te oŋŋa ɛkɛ jɔŋni ñaalɔ te lienti neeni aŋi ba uni ikin daŋkun. Ikin unnin ba ɛkɛ ɔɔn. ⁶ Çeecin ikin yom ikin yoma buagɔn noŋi nɔji neeniyɛ, tuun iki Yaccu a cyɛɛlɔ. Ikin tuunin iki ɛkɛ a ɔɔn aŋka yoma buagɔn noŋi nɔji neeniyɛ, baadi. Ɔci a ɔŋŋiyɛ, ikin akin kɛɛnk nɔji moki bɛɛ. ⁷ Kan men gɛɛl tuun dokiyɛ, pɔya ɛkɛ tieŋdi jyek nɔji bala moki bɛɛ. ⁸ Kan ikin tuunin iki Kiṭɔ a cyɛɛlɔyɛ, ɔci jyek tɛɛtin ŋeecin ikin daŋkun, agi ne Yaccu unniyɛ, ɔci ikin da unnin te ɛkɛ. ⁹ Çeecin ikin Kiṭɔ neeniyɛ, luolnɛ Juaŋ ñaalɔ te koolji tɛɛti moki, ɔci ɛkɛ tuwa ywongati moki bɛɛ. Lien yaakinti ɛkɛ nogdɛ moki bɛɛ. ¹⁰ Oŋŋa Yaccu tuuniyɛ, ɛkɛ tuun te jyek nɔji ma baano. Ɛkɛ tuun oŋi ne cyɛɛlɔ budan, ɔci te oŋŋa tuuni ɛkɛ wannayɛ, jyek nɔji bawwin ɛkɛti doki. Ɔci acca ɛkɛ ciyi iki Jwaŋa Tolan oŋkanda a cyɛɛlɔ. ¹¹ Ɔci ɛkkɛ daŋkun dala paŋŋa neeni bala ɛkkɛti a ɔɔn. Dala ŋeeddɛ ɛkkɛ jyek nɔji neeniyɛ, a jyek ɛkkɛ moki bɛɛ. Dala ŋeeddɛ ɛkkɛ ɛkkɛ aŋŋɛ maka tɛɛti Jwaŋa Tolanti te naŋki Yaccu Kiṭɔ. ¹² Naa nɔji aga ciɛggŋ waak ɛkkɛ moki bɛɛ, acaan ciɛggɔn neeni buagɔn ɛkkɛ tieŋdɛ jyek yomg ɛkkɛ yomga buagɔn noŋi nɔji neeni. ¹³ Naa ɛkkɛ Jwaŋa Yaayan ‘wondɛ waak ɛkkɛ noŋdi nɔji waak ɛkkɛti bɛɛ. Ɛkkɛ balgɛ ba maka luolnɛ Juaŋ ñaalɔ ɔci ‘wonnɛ tɛɛtin ɛkɛ. Ɔci a ɔŋŋiyɛ, dala waak ɛkkɛ ‘wondɛ Jwaŋa Tolan bieŋɛti aŋka Jwaŋa Tolan noŋdi kanŋa te waak ɛkkɛ. ¹⁴ Ɔci nɔji aga ciɛggɔn ɛkkɛ moki bɛɛ. Jyek ganuunyɛ, ɛkkɛ pwaddɛ te ɛkkɛn bɛɛ, gena yom pwani Jwaŋa Tolan parɛ. ¹⁵ Oŋ kan Juaŋ yuoci ikin te tiid jyek ganuun moki bɛɛy, oŋ ikin noŋtin a ɔki? Ikin noŋtin nɔji oŋkanda ɔɔn acaan Juaŋ yomɛ pwani ikinti doki? Hayɛllɛ! ¹⁶ Kan ɛkkɛ waakɔ ‘wondɛ genga oŋkanda ɔci ɛkkɛ noŋdɛ ba jyek ɛkɛyɛ, ɛkkɛ aŋŋɛ kɛɛnk ɛkɛ doki. Kan a jyek nɔjiyɛ, ɛkkɛ nogdɛ lien ne baaṭi. Kan gena jyek Jwaŋa Tolan tiidɛyɔ ɛkkɛ wannayɛ, ɛkkɛ pwaddɛ Juaŋ ñamɛti. ¹⁷ Ikin gɔktin Juaŋti a pwatcin, acaan acca ɛkkɛ agɛ kɛɛnk nɔji moki bɛɛ. Jyeka ɛkkɛ lalkɛ ma neeniyɛ, tiiññɛyɔ ɛkkɛ doki te yoma pwadan. ¹⁸ Ɔci oŋŋa ɛkkɛ pɔŋnɛ Juaŋ te jyek nɔji ɛkkɛ neeniyɛ, ɛkkɛ aŋŋɛ kɛɛnk naŋka pwadin. ¹⁹ ’Ya gɔk ɛkkɛti te jyeka guaktan ma baan iñɔ baanji neeni aŋka ɛkkɛ tieŋdɛ jyek Juaŋ ne pwadan. Te ñamu waak ɛkkɛ a kɛɛnk nɔjjo. Ɛkkɛ agɛ kɛɛnk nɔji te yomg ɛkkɛ pookɔ. Ɛkkɛ balgɛ noŋɛ nɔjja yaayan. Ɔci ɛkkɛ balgɛ bɛɛyɛ jyek Juaŋ a ñaccu gɔ ɛkkɛ moki bɛɛdjɛ ɔɔn. Yeti acca dala ɛkkɛ waakɔ byerdi te naŋka pwadin. Dala ɛkkɛ agdɛ kɛɛnk naŋka pwadin te yomg ɛkkɛ. Ɔci a ɔŋŋiyɛ, ɛkkɛ pwaddɛ awarɛ. ²⁰ Ne ɛkkɛ men agɛ kɛɛnk nɔjiyɛ, jyek naŋka pwadin yaakinti noŋi genga ɛkkɛti bɛɛ. ²¹ Ɔci acca kan ɛkkɛ ñingɔ ñiektɛ te naŋka naŋŋɛ ɛkkɛ ne ɛkkɛ agɛ kɛɛnk nɔji men neeniyɛ, ɛkkɛ lɔɔddɛ. Kan ne ɛkkɛ noŋɛ a ɔɔn wannayɛ, naŋka neeni yɔmjin te genga boki? A’a, yɔmjin te genga bɛɛ, hay! Naŋka neeni etti gena lien budan. ²² Yeti acca jiek ooki da pookɛn. Acca ɛkkɛ pɔŋnɛ Jwaŋa Tolan te nɔji ɛkkɛ doki, ɔci ɛkkɛ aŋŋɛ kɛɛnk ɛkɛ doki. Ɔci a ɔŋŋiyɛ, ɛkkɛ aŋŋɛ maka pwadin, ɔci ɛkkɛ moki tuudɛ bɛɛ. Tɛɛtin neeni bala ɛkkɛti yuonginda baadi bɛɛ. ²³ Kan ɛkkɛ noŋdɛ naŋki nɔji oŋkandayɛ, ɛkkɛ ‘wondi nɔji gena lien budan. Yeti gena ma ‘wondi Juaŋ te yom ɛkɛ budanyɛ, gena tɛɛtin. Tɛɛtin neeni baadi ywongati bɛɛ. Ɛkɛ ma ‘wonnɛ tɛɛtin neeni te naŋki Ciɛggɔn ikin Yaccu Kiṭɔ.

¹ Modg ɔɔn, maka jyek ganuun ŋeecɔny, kwoyɛ ɛkkɛ? Kan men tuun dokiy ganuun yaakinti noŋi genga ɛkɛti moki? Acaan ɛkɛ bawwin doki. ² Mena ɛɛŋ kan ‘war ɛkɛ bala menyɛ, ɛkkɛn ciy yaakkɛn ba jyek ganuun. Yeti kan ‘war ɛkɛ tuun dokiyɛ, jyek ḍɛɛwin ɛkkɛn bawwin doki. ³ Mena ɛɛŋ kan ‘war ɛkɛ bala men ɔci kan ɛkɛ ḍɛɛdɛ ‘wana parɛyɛ, ɛkɛ bartan ma agi ɛŋa toban. Yeti kan ‘war ɛkɛ tuun dokiyɛ, ɛkɛ oŋ ḍɛɛtan ma oŋo. Acaan ḍɛɛwin iki ‘wana te ñamu bawwin dokiyɛ, a ɔɔn ma gɔki agi ɛŋa neeni a ɛŋa toban moki bɛɛ. ⁴ Ba jyek ɛŋa neeniyɛ, bala ba jyek ɛkkɛ daŋkun. Oŋŋa ɛkkɛ tuunɛ iki Yaccu a cyɛɛlɔyɛ, ɛkkɛ pɔŋnɛ Juaŋ te jyek ganuun doki. Jyek ganuun yaakinti noŋi genga ɛkkɛti moki bɛɛ. Ɛkkɛ pɔŋnɛ Juaŋ a ɔɔn aŋka ɛkkɛ agdɛ ma mena parɛ, mena luolnɛ Juaŋ ñaalɔ te koolji tɛɛti mokiy, ɔci moki aŋka ɛkkɛ yomgɔ kuma te naŋka pwadin ba jana wyeñɛ kuumi te ṭɔlgɛy. ⁵ Yomg ikin yomga buagɔn nɔji neeniyɛ, bala gɔki waak ikinti te jyek nɔjjo. Ɔci naŋki waak ikin neeni etti gena lien budan. Te ñamu ne ikin balkin ciyin amaam te yomg ikin pookɔ budanyɛ, yomg ikin buagɔn nɔjjo, ɔci te jyek ganuunyɛ, ikin pɛɛnnin te nɔjjo. ⁶ Yeti acca ikin pɔŋnin Juaŋ te jyek ganuun. Acaan ikin tuunin iki Yaccu a cyɛɛlɔyɛ, ikin akin kɛɛnk ganuun moki bɛɛ. Acca ikin noŋin kanŋa te Boŋ Jwaŋa Tolan te yoma pwadan. ⁷ Jiek bala a ɔki? Jyek ganuun yeyɔ? Hayɛllɛ! Jyek ganuun yeyɔ bɛɛ. Kan te jyek ganuun baakiyɛ, te jyek naŋka yeyin ŋeej ‘ya bɛɛ. Jyek ganuun gɔki agi, “Naa ma ani wak maka pookɛn bɛɛ.” Yeti ‘ya baal an wak maka pookɛn ɔɔn, ɔci te jyek ganuun neeniyɛ, ŋeejjan ‘ya naŋki ‘ya neeniyɛ, a nɔjjo. ⁸ Ne jyek ganuun ŋeenna ‘yayɛ, ɔci jyek nɔji ŋeejjan ‘ya. Ɔci ŋeejjan ‘ya yom ‘ya buagɔn waka budan ne pɛñan. ⁹ Kan te jyek ganuun baakiyɛ, te nɔji bala niin ma yomgɛnti lieda ɔɔn. Ɔci ‘ya daŋkun, ne jyek ganuun baaki ‘yati menyɛ, ‘ya baal ba mena tɛɛta. Ɔci ne jyek ganuun ŋeenna ‘yayɛ, nɔji ŋeejjan ‘ya yomuti a ‘ya yaakati noŋ gena pwadan gɛɛl bɛɛ. ‘Ya aŋi ba mena tuuta doki. ¹⁰ Jwaŋa Tolan buagɔn dala ma uda te jyek ganuun. Yeti jyek ganuun neeniyɛ, eccin gena lien ‘yati, ¹¹ acaan te oŋŋa jyek ganuun ŋeenna ‘yayɛ, nɔji warɛ lɛɛlnɛ bora, ɔci a ɔŋŋiyɛ, ‘ya aŋi ba mena tuuta doki. ¹² Jyek ganuun pwadɔ. Gena naŋka Juaŋ buagiti ikin noŋtin neeni. Ɛkkɛn pwadɔ waakɛnda, ɔci yɔmjin moki. ¹³ Gena pwadan neeni eccin lien ‘yatɛ? A’a, a ɔɔn bɛɛ. Gena nɔji aŋka bala ‘ya yomuti yaayɛy. Acaan ne jyek ganuun bɛɛki borayɛ, nɔji yaakinti niin lieda ‘ya yomuti moki bɛɛ. Jyek nɔji bɛɛn bora, ɔci a ɔŋŋiyɛ, ‘ya aŋi ba mena tuuta. Jyek ganuun bɛɛn aŋka ‘ya jyek nɔji ŋeenna ‘ya ɛkɛ yaayɛ ne pɛñan ‘yati wanna. ¹⁴ Çeecin ikin jyek ganuun bɛɛn te Jwaŋa Tolanti. ‘Ya aŋka a men baan budan. ‘Ya a kɛɛngɔn nɔjjo. ¹⁵ Naŋka naŋdi ‘yayɛ, yuarca ‘ya bɛɛ. Kan ‘ya buaga noŋja gengayɛ, ‘ya yaakati bɛɛ. Kan ‘ya buaga naŋka yaayan daljayɛ, ‘ya yaakati bɛɛ, ‘ya noŋ ɔɔn. ¹⁶ Ne ‘ya noŋa naŋka yaayan a ɔɔnyɛ, ɔci ne yom ‘ya yookiti te naŋka wannayɛ, a ɔɔn bala ba ‘ya gɔk ka jyek ganuun aŋka pwadɔ. ¹⁷ Gena ‘ya noŋ naŋka yaayan neeni bɛɛ. Gena nɔjja niin ‘ya yomuti oŋkanda aŋka noŋi naŋka yaayan neeniy. ¹⁸ Çeej ‘ya ‘ya yaayo. ‘Ya buaga noŋja naŋka pwadan, yeti ‘ya yaakati noŋ a ɔɔn bɛɛ. ¹⁹ ’Ya noŋ naŋka yaayan naŋka yom ‘ya yookɛtiy. ²⁰ Kan ‘ya noŋ naŋka ‘ya buaga bɛɛyɛ, gena ‘ya waanu noŋ naŋka neeni bɛɛy, gena nɔjja niin ‘ya yomuti aŋka noŋi naŋka neeniy. ²¹ Jiek tɛy tɛyo. Kan yom ‘ya buagɔn noŋdi ne pwadanyɛ, ɔci ‘ya kɛkta yom ‘ya yoma yaayan agi naa ‘ya noŋji ne pwadan bɛɛ. Ɔci a ɔŋŋiyɛ, ‘ya aŋi kɛɛngɔn te nɔjja bala ‘ya yomuti neeni. ²² Yom ‘ya yoma awarɛyɛ, gɔki agi ganuun Jwaŋa Tolan pwad pwado. ²³ Yeti yoma parɛ bala men. Gena yoma yaayan yoma neeni aŋka yookɔny. Yomg ‘ya noowɔ a ɔɔn. ²⁴ ’Ya yomu yaayɛ, hay! ‘Ya pɔkta menɛ yeti te yoma buagɔn noŋi naŋka yaayan naŋka etti lien neeniy? ²⁵ ’Ya gɔk Juaŋti a pwatcin acaan ‘ya pɔŋna ɛkɛ doki te naŋka naŋŋi Ciɛggɔn ikin Yaccu Kiṭɔy. ‘Ya noŋ kanŋa Juaŋ te war ‘ya ɔci te paŋi ‘ya moki, ɔci war ‘ya war ma baan noŋi kanŋa ganuun nɔjjo.

¹ Maka Yaccu bala ɛkkɛnti dokiyɛ, jyek godan Juaŋ bɛya ɛkkɛnti moki bɛɛ. ² Jyek nɔji tɛy tɛyo. Ɔci jyek lien tɛy tɛy moki. Yeti acaan Yaccu Kiṭɔ bala ikintiyɛ, ikin pɔŋnin Boŋ Jwaŋa Tolan te jyeka neeni, acaan Boŋ ɛkɛ tɛy tɛyo, ɔci ikin ‘wonnin ɛkɛ tɛɛtin. ³ Naŋka jyek ganuun yaaŋnɛti naŋŋɛ bɛɛ acaan war ma baan koocinyɛ, cwamnɛ Jwaŋa Tolan. Jwaŋa Tolan naŋka neeni naŋŋɛ te cuoññin ɛkɛ kaci ɛkɛ waanɛ cuonnɛ iñɔ aŋŋi ba men baan mena a nɔɔdɔn neeni aŋka aga ‘yɛṭa nɔjiy. A ɔŋŋiyɛ, Juaŋ nɔji men baan nuuññɛji. ⁴ Ɔci a ɔŋŋiyɛ, kan ikin tieŋtin jyek yomg ikin yomga yeyin bɛɛ, ɔci kan ikin tieŋtin gena jyek Boŋ Jwaŋa Tolanyɛ, ikin yaakinti jyek ganuun tiitinyɔ. ⁵ Maka noŋi ba yomg ɛkkɛn budanyɛ, ɛkkɛn ani naŋki ɛkkɛn. Maka noŋi ba jyek Boŋ Juaŋyɛ, ɛkkɛn ani jyek ɛkɛ. ⁶ Maka poŋi ba paŋi ɛkkɛn neeniyɛ, lien yuartan ɛkkɛn. Maka poŋi ba jyek Boŋ Jwaŋa Tolanyɛ, tɛɛtin bala ɛkkɛnti, ɔci coodda pwadan bala ɛkkɛnti moki. ⁷ Jiek bala a ɔɔn kan ma poŋi ba paŋi ɛkkɛn pookɛnyɛ, a ɔɔn bala ba ɛkkɛn yookɔn te Jwaŋa Tolan. Yomg ma baan yomga buagɔn noŋi ne yaayanyɛ, ɛkkɛn tieŋdi ganuun Juaŋ bɛɛ, ɛkkɛn yookɔn. ⁸ Maka noŋi ba yomg ɛkkɛn pookɛn budanyɛ, ɛkkɛn yaakinti noŋi naŋka pwadan Juaŋti bɛɛ. ⁹ Ɛkkɛyɛ, jyek ɛkkɛ da pookɛn. Kan Boŋ Jwaŋa Tolan bala ɛkkɛti awarɛyɛ, ɛkkɛ yaakɛti ciyɛ te jyek yoma te baaṭi moki bɛɛ. Ɛkkɛ ciyɛ te war tɛɛn Boŋ Jwaŋa Tolan. Mena Boŋ Yaccu Kiṭɔ baaw ɛkɛtiyɛ, ɛkɛ a men Yaccu Kiṭɔ bɛɛ. ¹⁰ Acaan ne Yaccu Kiṭɔ baali ɛkkɛtiyɛ, yoma te baaṭi tuun doki. Ɔci yoma woonɛ aŋka bala ɛkkɛti te naŋki Yaccu, ɔci acca ɛkkɛ balgɛ noŋɛ naŋka pwadin. ¹¹ Ne Boŋ mena Yaccu luolnɛ ñaalɔ te koolji tɛɛti moki neeni baali ɛkkɛtiyɛ, ɛkkɛ da ‘wondɛ ɛkɛ tɛɛtin te Boŋ ɛkɛ Boŋ Jwaŋa Tolan mena bala ɛkkɛti neeni. ¹² Modg ɔɔn, jiek bala aŋka naŋtin ikin. Yeti gena jyek yomg ikin pookɔ bɛɛ. ¹³ Acaan kan ɛkkɛ noŋdɛ ba jyek yomg ɛkkɛ pookɔ budanyɛ, ɛkkɛ tuudɛ. Yeti kan naŋki ɛkkɛ naŋka yaayan lɛgdɛ ɛkkɛ jitin te Boŋ Jwaŋa Tolanyɛ, ɛkkɛ uddɛ. ¹⁴ Maka wɛɛdɛ Boŋ Jwaŋa Tolan oŋkandayɛ, ɛkkɛn a kɛɛgin Jwaŋa Tolan waakɛnda. ¹⁵ Acca ɛkkɛ buayɛ ɛkɛ ba maka kɛɛnk moki bɛɛ. Ɛkkɛ pirŋɛ Jwaŋa Tolan, ɔci ɛkkɛ yaakɛti gɔktɛ Juaŋti agi, “Wey ɔɔn!” ¹⁶ Boŋ Jwaŋa Tolan ɛkɛ waanɛ parɛ gɔkti ikin yomgɔti agi ikin akcin kɛɛgin Jwaŋa Tolan. ¹⁷ Ɔci kan ikin akin kɛɛgin Jwaŋa Tolan a ɔɔnyɛ, wak ɛkɛ aga wak ikin daŋkun. Ɔci waka aga wak Yaccu Kiṭɔyɛ, aga wak ikin daŋkun. Kan taab Yaccu aŋi taab ikin daŋkunyɛ, ne baaṭi jyeka pwadin jyeka bɛya ɛkɛtiyɛ, bɛya ikinti daŋkun. ¹⁸ Paŋi ‘ya neeni, jyeka bɛya ikinti ne baaṭiyɛ, pwanna pwanno. Ɔci taab bala wɛnni ikinti accayɛ, ɛkɛ a genga bɛɛ. ¹⁹ Ɔci waak waakɛnda, waka cɔnnɛ Juaŋyɛ, ɛkkɛn kɛɛy oŋŋa pwani bɛɛdi bora kɛɛgin Jwaŋa Tolantiy. ²⁰ Waka cɔnnɛ Juaŋ neeniyɛ, ɛkkɛn yiegin te jyek ɛkkɛn pookɛn budan bɛɛ. Gena naŋki Jwaŋa Tolan ɛkkɛnti. Yeti ɛkkɛn jyeti kɛɛy oŋŋa jyeka pwadin bɛɛti ɛkkɛnti daŋkuny. ²¹ Oŋŋa kɛɛtan ɛkkɛn neeniyɛ, gena oŋŋa ɛkkɛn pɔktɛ Juaŋ te jyeka yeyin. Ba jyek pɔkkin Juaŋ ma pɔŋni neeniyɛ, jyek pɔkkin neeni ooddi waka cɔnnɛ ɛkɛti daŋkun, ɔci ɛkkɛn pwada. ²² Çeecin ikin waka cɔnnɛ Juaŋ waakɛndayɛ, ɛkkɛn bala wiak waakɛnda bolja ne cyɛɛlɔ oŋkanda kɛɛy oŋŋa Juaŋ ɛkkɛn pɔktɛ, ɔci ne acca ɔɔn. ²³ Ɔci jwalla parɛ bala daŋkun. Ikinyɛ, ikin akin maka dɛccin Boŋ Jwaŋa Tolan a dɛccin wɛnni. Ɔci Boŋ Jwaŋa Tolan yuartin ikin ne tolan ne baaṭi. Ɔci ikin wiakin yomgɔti ne ikin kɛɛyin oŋŋa bɛya neeniy. Ikin kɛɛyin oŋŋa ikin aktin kɛɛgin ɛkɛ ne pwadany. Gena oŋŋa waak ikin akti waaka wonkɛny. ²⁴ Ikin jyettin jyeka guaŋŋɛ Juaŋ te naŋka bɛya ne baaṭi, ɔci ikin yɔɔññin ɛkɛ doki. Yeti ikin jyettin kɛɛyin yɔɔta bɛya ne ŋoyɔy. Kan gen yuarɛ ma te woŋgɛnyɛ, ma yaakinti jyeddi kɛɛy ɛkɛ moki bɛɛ. ²⁵ Ɔci ikinyɛ, ne ikin kɛɛyin gena yuarŋin ikin te woŋgɔ men bɛɛ neeniyɛ, naa ikin yomgɔ tieki agi gen bɛɛdɔ baaw bɛɛ. Dala ikin kɛɛyin te yoma pwadan ɔɔn. ²⁶ Ne ikin waakɔ kooki men ɔɔnyɛ, ikin maktin Boŋ Jwaŋa Tolan te cɔŋŋo. Ne ikin cɔkin Juaŋti ɔci ne jyeka cɔkin ikin neeni ŋeecin ikin ne pwadan bɛɛyɛ, Boŋ Jwaŋa Tolan Boŋa bala ikin yomgɔti neeni cɔkti Juaŋti te ikin te jyeka ikin yaakinti gɔɔtin bora te tugi ikin bɛɛy. ²⁷ Ɔci Jwaŋa Tolan mena yomg ma baan ŋeejɛyɛ, paŋŋa paŋdi Boŋ Jwaŋa Tolanyɛ, ŋeejɛ ɛkɛ ne ɛkɛ cɔki te ma ɛkɛ ba yom Jwaŋa Tolany. ²⁸ Ɔci moki ŋeecin ikin maka ani Jwaŋa Tolan maka muonɛ ɛkɛ bora ba jyeka naŋŋɛ ɛkɛ te ñamu neeniyɛ, naŋka bɛya ɛkkɛnti waakɛnda naŋdɛ Juaŋ etti naŋka pwadin ɛkkɛnti. ²⁹ Ne ma baaki menyɛ, maka jyeddi Juaŋti ne baaṭi ŋeejɛ Juaŋ doki. Ɔci ɛkkɛn oonɛ ɛkɛ bora te maka pookɛnti ɔci aŋi ma ɛkɛ. Ɛkkɛn oonɛ Juaŋ bora acaan ɛkɛ buagɔn ɛkkɛn aga ba Kaci ɛkɛ Yaccu. Ɔci a ɔŋŋiyɛ, Kaci ɛkɛ neeni aga ba mod ikin moda tolan waakida. ³⁰ Maka oonɛ Juaŋ bora te ñamu neeniyɛ, ɛkkɛn oonɛ ɛkɛ, ɔci ɛkkɛn jiek ywaŋɛ iki ɛkɛ. Ɔci ɛkkɛn pwadgin ɛkɛ ñamɛti te naŋki ɛkɛ neeni. Ɔci maka pwadgin Juaŋ ñamɛti neeniyɛ, coodi ɛkkɛn pwanna pwani te naŋki ɛkɛ ɛkkɛnti neeni. ³¹ Oŋ acca ikin gɔktin a ɔki te jyeka neeni? Kan Juaŋ buagɔn ikin a ɔɔny, oŋ men gɛɛl yaakinti noŋdi gena yaayan ikinti boki? A’a, ³² Jwaŋa Tolan jyek taab bɛya Kaci ɛkɛ Yaccutiyɛ, ŋeejɛ ɛkɛ. Yeti ɛkɛ yookɔn bɛɛ. Ɛkɛ ikin ‘wonnin Yaccu ɔɔn. Oŋ acaan a ɔŋŋiyɛ, ɛkɛ ikin da ‘wontin waak waakɛnda te yoma pwadan bɛɛ? Ikin ‘wontin, hay! ³³ Maka oonɛ Juaŋ bora neeni menga yaakinti ɛkkɛn tiagdɛyɔ Juaŋtɛ? A’a, menga yaakinti ɛkkɛn tiagdɛyɔ bɛɛ. Acaan ɛkkɛn pwadgin Juaŋ ñamɛti doki te naŋki ɛkɛ. ³⁴ Ɔci menga yaakinti jiek kɔɔdɛ ɛkkɛn ḍɔɔggɛnti moki? A’a, Yaccu Kiṭɔ mena tuun ɔci luolnɛ Juaŋ ñaalɔ moki neeniyɛ, ɛkɛ bala ciyi Juaŋ taaŋɛti te byeŋa byerɔn, ɔci ɛkɛ bala cɔki Juaŋti te ikin oŋkanda. ³⁵ A menɛ yaakinti ikin kɛptin jitin te anna Kiṭɔ ani ikin? Menga bala bɛɛ. Baawo. Kan a taab bɛya ikinti te jyek Juaŋ, ɔci kan a coodi tɛɛnɛ, ɔci kan a naŋka noŋki ma ne yaayan ikinti te jyek Juaŋ, ɔci kan a koñ, ɔci kan ikin ankin, ɔci kan waka etti taab ɔci lien ikin waakɔti bala, ɔci kan ma noki ikinyɛ, jyeka neeni yaakinti ikin kɛptin jitin iki Yaccu Kiṭɔ te anna ani ɛkɛ ikin neeni bɛɛ. ³⁶ Jyek taab neeniyɛ, bala ba jyeka kiigin te baaṭi. Jyeka kiigin gɔki agi, “Ɔɔn balgɔn lien jitin oŋkanda te jyek i. Ɔɔn balgɔn ba kulin ŋartan ma a ŋarto.” ³⁷ Kan taab neeni bala ikinti waakidayɛ, ikin yaakinti yɔɔttin ne tɛyan te mena ani ikiny. Ikin bwantin genga bɛɛ. ³⁸ Lien walla coodi ikin iñɔ wɛnni, walla malɛɛkan, walla ḍuaŋan ñaalɔ pɔliji, walla war tɛɛn pookɛn gɛɛg war tɛɛn bala ñaalɔ neeni bɛɛ. Waka neeni yaakinti ikin kɛptin jitin iki Jwaŋa Tolan te anna ani ɛkɛ ikin neeni bɛɛ. Gena ikin kɛptin jitin iki Juaŋ bala bɛɛ, ɔci gɛɛl bala ne baaṭi daŋkun bɛɛ. ³⁹ Jɔkin yeyinyɛ, kan bala ñaalɔ pɔliji walla kan bala iñɔ ṭɛɛrjiyɛ, ɛkkɛn gɛɛl yaakinti ikin kɛptin jitin iki Juaŋ te anna ani ɛkɛ ikin neeni bɛɛ. Ɔci moki waka cɔnnɛ Juaŋ waakɛndayɛ, gen gɛɛl yaakinti ikin kɛptin jitin iki ani Juaŋ neeni bɛɛ. Anna Juaŋ ani ikin neeniyɛ, ŋeecin ikin te naŋki Ciɛggɔn ikin Yaccu Kiṭɔ.

¹ Gɔṭṭɛ, ‘ya gɔkka ɛkkɛti awarɛ Kiṭɔ ñamɛti. Çeejɛ Boŋ Jwaŋa Tolan Boŋa bala ‘ya yomuti neeni jyeka guagdi ‘ya ɛkkɛti neeni a jyeka awarɛ. ² ’Ya gɔk ka ‘ya yomu yaayɛ. ‘Ya yomu wiak oŋkanda te modg ɔɔn ma Icrayiil. ³ Kan te ma baan yaakinti yuoci makɛn te yaata ɛkkɛn waakɛn yaatɛti nuotti jitinyɛ, te war ‘ya doki ‘woñgan Juaŋ yiɛmnɛ bana yaayan aŋka ma ɔɔn ma Icrayiil eedɛ Juaŋ ban ɛkɛ te naŋki ‘ya neeni. ⁴ Ma Icrayiil myennɛ Juaŋ agi ɛkɛ buagiti dala ɛkki agdi kɛɛgin ɛkɛ. Juaŋ bala iki ɛkkɛn te baaṭi doki. Jwaŋa Tolan jiek naŋɛ iki ɛkkɛn agi ɛkɛ noŋji naŋka pwadan ɛkkiti. Ɛkkɛn myennɛ ɛkɛ te ganuun ɛkɛ buagiti naŋtan ɛkkɛny. Ɔci ɛkkɛn ‘wonnɛ Juaŋ mali ɛkɛ. Ɔci ɛkkɛn myennɛ ɛkɛ te jyeka pwadin jyeka bɛya ɛkkɛnti ne baaṭiy. ⁵ Yɔrg ɛkkɛn te baaṭi, ɛkkɛn a maka ḍwaŋin. Ɔci Yaccu Kiṭɔ daŋkunyɛ, ɛkɛ a kɛɛn ɛkkɛn. Yaccu Kiṭɔ ɛkɛ a Jwaŋa Tolan. Waak waakɛnda buannɛ ɛkɛ. Ɛkɛ pwad pwad yuonginda ɔɔn. Ɛɛ, dala bala a ɔɔn. ⁶ Jyeka naŋŋɛ Juaŋ te ñamu aŋi jyeka budan bɛɛ. Kɛɛgin Icrayiilyɛ, kɛɛptin jitin, ɛkkɛn waakɛnda a ma Juaŋ bɛɛ. ⁷ Kɛɛgin Abrahim kɛɛptin jitin acaan jiek naŋŋɛ Juaŋ te ñamu iki Abrahim. Juaŋ gɔki ɛkɛti agi, “Kɛɛgin bɛya te kaci i Icaaktiyɛ, ɛkkɛn owwa ‘ya bora.” ⁸ Maka bɛɛn te Abrahimtiyɛ, ɛkkɛn a ma Juaŋ acaan ɛkkɛn a kɛɛgin Abrahim? A’a, a ɔɔn bɛɛ. Ma Juaŋyɛ, gena maka bornɛ Jwaŋa Tolan ba jwalla ḍuaññɛ ɛkɛ Abrahimti te ñamuy. Ɛkkɛn aŋka a kɛɛgin Abrahim kɛɛgin awarɛ. ⁹ Jyeka guaŋŋɛ Juaŋ Abrahimti te ñamu te jyek kaci ɛkɛ Icaak parɛ neeni gɔki agi, “Ne ywoniti ba wɔɔka ḍuañi ‘yayɛ, ‘ya dɔɔkka wɛnni, ɔci ɛŋ i Caara jieda kacca ‘uano.” ¹⁰ Ɔci jwalla parɛ gɛɛl bala daŋkun. Gena jwali Ribɛɛka acaan kɛɛgin ɛkɛ kɛɛgin ne yyɛɛwɔ neeni bɛɛn te weya ne cyɛɛlɔ. Gena kɛɛgin yɔr ikin Icaak. ¹¹ Ɔci ne ɛkɛ jienni men bɛɛyɛ, ɛkɛ myennɛ Juaŋ te kɛɛgin laayi ɛkɛ neeni agi, ¹² “Kacca jieda i ne ŋoyɔyɛ, ɛkɛ aŋka aga ba kacca tolan, ɔci kacca jieda i ñamuyɛ, ɛkɛ aga ba kacca ḍiɛran.” Ne Juaŋ noŋŋi jyeka neeniyɛ, ɛkɛ poŋi te naŋka naŋtan kɛɛgin neeni bɛɛ. Acaan ɛkkɛn noŋi gena pwadan walla gena yaayan gɛɛl men bɛɛ. Ɛkkɛn baaw men bala te mɛɛgɛn konɛti men. Jyeka kiigin jyeka guaŋŋɛ Juaŋ te baaṭi gɔki agi, “‘Ya an Yaakub, ɔci ‘ya yomu baaw Icɔti.” Jyek naŋki Juaŋ bala a ɔɔn kɛɛgin neeniti ogo? Naŋki Juaŋ bala a ɔɔn acaan ɛkɛ ma oodɛ bora aga ma ɛkɛ te naŋka naŋtan ma baan bɛɛ. Ɛkɛ ma oodɛ bora te yom ɛkɛ parɛ. ¹⁴ Oŋ acca ikin gɔktin a ɔki te jyeka neeni? Ne Juaŋ noŋi a ɔɔnyɛ, ɛkɛ noŋi amaamɔ? Hayɛllɛ! ¹⁵ Acaan Juaŋ gɔki Muucati agi, “Kan ‘ya buaga yomu pɔkka mengatiyɛ, gena yom ‘ya.” Ɔci agi, “Kan ‘ya buaga menga magdiyɛ, gena yom ‘ya.” ¹⁶ Menga dɛndi ban Jwaŋa Tolan te yom ɛkɛ parɛ bɛɛ. Kan men kanŋan ne pɛñanyɛ, kanŋa neeni yɔmdi bɛɛ. Kan Jwaŋa Tolan yomɛ pɔktɛ mentiyɛ, mena neeni ɛkɛ dɛndi ban Juaŋo. ¹⁷ Jyeka guaŋŋɛ Juaŋ Pɛɛrɔti neeniyɛ, bala worgaji agi, “I ḍuannin ‘ya aŋŋi ḍuaŋa tolan aŋka ma gɔrti naŋka tɛyan naŋka naŋdi ‘ya iti aŋka yenti ‘ya ooddi baan konɛ warda.” ¹⁸ Te naŋka naŋŋi Juaŋ neeniyɛ, ŋeecin ikin kan Juaŋ buagɔn yomɛ pɔktɛ matiyɛ, ɛkɛ yomɛ pɔktɛ ba yom ɛkɛ. Ɔci kan ɛkɛ buagɔn noŋdi naŋka tɛyan mati aŋka ma wyetkɛn tɛɛtiyɛ, ɛkɛ moki noŋdi a ɔɔn ba yom ɛkɛ parɛ. ¹⁹ Ɛkkɛ toottɛ ‘yati kaapun gɔktɛ agi, “Oŋ kan Jwaŋa Tolan noŋi ba yom ɛkɛ parɛ mati a ɔɔny, men gɛɛl yaakinti dɛyi ɛkɛ boki? Oŋ kan a ɔɔnyɛ, Juaŋ wooki ma te naŋka naŋtan ɛkkɛn ogo?” ²⁰ Kan ɛkkɛ toottɛ a ɔɔnyɛ, a ɔɔn pwatcin bɛɛ. Mug ɔɔn, i a menɛ aŋka i gɔki a ɔɔn Juaŋti wan? Lomma eeki ma waak ɛkɛ yaakinti gɔkti mena eyi waakti agi, “I ‘ya eeda a ɔɔn ogo?” Hayɛllɛ! Ɛkɛ gɔkti a ɔɔn bɛɛ. ²¹ Ɔci kan mena eyi waak buagɔn eyi gena parɛ gɛɛl mokiyɛ, ɛkɛ ooddi etti lomi te lomi mɛɛgɛnti, ɔci ɛkɛ eedi gena parɛ neeni moki. Yeti ɛka parɛ neeniyɛ, pwad pwad ba ɛki ñontan ɔɔn bɛɛ. Yeti ɛkkɛn bɛɛn te lomma ne cyɛɛlɔti. Mena eyi waak neeniyɛ, ɛkɛ yaakinti waak kɛbdɛ jitin te een ba yom ɛkɛ. ²² Maka cɔnnɛ Juaŋyɛ, ɛkkɛn bala ba lomi Jwaŋa Tolan bieŋɛti. Ɔci ɛkɛ noŋi ɛkkɛnti ba yom ɛkɛ. Ɔci ba waka eetan ma gɛɛg ne damkiti ma te eenyɛ, bala ba maka nɔɔtk daŋkun. Ɛkkɛn bala Juaŋ bieŋɛti, ɔci ne baaṭi ywobji Juaŋ bɛya ɛkkɛnti, ɔci te naŋka neeniyɛ, Juaŋ ŋeettan ma ne ɛkɛ tɛyi awarɛy. Yeti acaan Juaŋ loomgɛ tɛy tɛy maka yeyintiyɛ, ɛkkɛn bala ciyi men ɔɔn. ²³ Ma gɛɛg muonɛ Juaŋ bora te baaṭi doki, ɔci ɛkɛ yomɛ pɔŋnɛ ɛkkɛnti, ɔci ɛkɛ buagɔn dala pwani ɛkɛ ŋeettan ma acaan ɛkɛ tol tolo. ²⁴ Maka muonɛ ɛkɛ bora neeniyɛ, gena ikin. Ma gɛɛg ikinti ɛkkɛn a ma Icrayiil, ɔci maka pookɛn gɛɛg moki ikintiyɛ, ɛkkɛn a Keedin Pookɛn. ²⁵ A ɔɔnyɛ, bala ba jyeka kiinɛ Hɔɔca mena a bɔwa Jwaŋa Tolan agi, “Maka a ma ‘ya bɛɛyɛ, ɛkkɛn bardi ‘ya a ma ‘ya. Ɔci maka ana ‘ya bɛɛyɛ, ɛkkɛn bardi ‘ya a maka ana ‘yay.” ²⁶ Te ñamu Juaŋ gɔki Keedin Pookɛnti agi ɛkki agi ma ɛkɛ bɛɛ. Ɔci oŋŋa parɛ moki ɛkɛ gɔki agi, “Maka neeni bartan ma agi ɛkki agi kɛɛgin Jwaŋa tɛɛti.” ²⁷ Icaaya ma nɔɔnnɛ te jyek ma Icrayiil agi, “Ma Icrayiilyɛ, ɛkkɛn kɔɔna kɔɔni bala ba ŋɔmi ñingɛ. Yeti ɛkkɛn waakɛnda dɛndi ban Jwaŋa Tolan bɛɛ. ²⁸ Acaan Juaŋ noŋdi godan ma baanti baan warda, ɔci Juaŋ jiek kɔɔktɛ ɛkkɛn wyetkɛnti. Juaŋ noŋdi godan ne pɛñan ɛkkɛnti. Ɛkɛ jwali gɛɛl daldɛ bɛɛ.” ²⁹ Jwalla guaŋŋɛ Icaaya gɛɛl bala moki. Gena jwali jyeka gɛɛka bɛya ne ŋoyɔ agi, “Kan te Juaŋ ma ikin gɛɛg dɔɔnɛ bora te lienti bɛɛyɛ, te ikin balkin ba ma Caduum, ɔci ma Gamɔɔra daŋkun.” ³⁰ Oŋ acca ikin gɔktin a ɔki te jyeka neeni? Keedin Pookɛnyɛ, te ñamu ɛkkɛn bala lieṭi pɔya ɛkkɛn pwatti Juaŋ ñamɛti bɛɛ. Yeti acca ɛkkɛn pwadgin Juaŋ ñamɛti doki te jyenna ɛkkɛn jyetki Jwaŋa Tolantiy. ³¹ Ɔci ma Icrayiilyɛ, ɛkkɛn poŋi gɔki agi kan ɛkkɛn jyek ganuun tiidintiyɔyɛ, a ɔɔn ɛkkɛn pwaddinti Juaŋ ñamdanti. Yeti ɛkkɛn pwadgin Juaŋ ñamɛti men bɛɛ. ³² Ɛkkɛn pwadgin Juaŋ ñamɛti men bɛɛ ogo? Acaan ɛkkɛn gɔki agi ma pwaddɔ Juaŋ ñamdanti te jyenna ma jyetki neeni bɛɛ. Ɛkkɛn gɔki agi ɛkkɛn pwaddinti pookɛn te naŋki ɛkkɛn. A ɔŋŋiyɛ, ɛkkɛn tworŋɛ guonan tuor ma. ³³ Ma Icrayiilyɛ, ɛkkɛn jiek pɔɔdɛ. Ɛkkɛn bala ba maka twordɛ guonan ɔci ḍɛɛmdi iñɔy. Acaan jyeka guaŋŋɛ Juaŋ bala worgaji gɔki agi, “Gɔṭṭɛ, guonan tuor ma ḍuaccan ‘ya ban ma Icrayiilji ɔci ma twordɛ ɛkɛ. Ɛkɛ a guonan yooci ma yomgɛn. Yeti kan mena jyeddi ɛkɛtiyɛ, ɛkɛ yomɛ wiakti oŋgati bɛɛ.”

¹ Modg ɔɔn, ‘ya yomu wiak te ma Icrayiil ma ɔɔn. ‘Ya baal cɔk Juaŋti oŋkanda te ɛkkɛn aŋka dala ɛkkɛn yɔɔdɛ Juaŋo. ² Çeej ‘ya ɛkkɛn waakɛn byerɔ te jyek Juaŋo, yeti paŋi ɛkkɛn bala ɔntɔ, acaan ɛkkɛn jyek Juaŋ ŋeecɔn ne pwadan bɛɛ. ³ Pɔya naŋŋɛ Juaŋ aŋka ma pwatti ɛkɛ ñamɛtiyɛ, ŋeecɔn ɛkkɛn bɛɛ. Ɛkkɛn poŋi gɔki agi ɛkkɛn pwadginti Juaŋ ñamdanti te naŋki ɛkkɛn pookɛn. Ɔci acaan a ɔŋŋiyɛ, pɔya naŋŋɛ Juaŋ aŋka ma pwatti neeniyɛ, dalji ɛkkɛn doki. ⁴ Naa ma poŋi gɔki agi ɛkkɛn pwanninti Juaŋ ñamdanti te tiit jyek ganuun waakɛn bɛɛ. Jyeka neeni bawwin doki. Yaccu aŋka a pɔyo. Maka jyeddi ɛkɛtiyɛ, ɛkkɛn pwaddi Juaŋ ñamɛti. ⁵ Muuca ikin ‘wonnin gena jwalla tɛyan jwalla gɔki agi, “Kan i jyek ganuun tiya ñin waakɛndayɛ, i uddi.” ⁶ Yeti Jwali jyeniyɛ, ɛkɛ tɛɛcin a ɔɔn bɛɛ. Ɛkɛ gɔki agi, “I yaakiti kaacca ñaalɔ pɔliji” (aŋka Yaccu owwa iñɔ aŋka i yɔɔdi bɛɛ.) ⁷ “I yaakiti ootta iñɔ” (aŋka Yaccu luolla ñaalɔ ɔci dɔwwa te lienti bɛɛ.) ⁸ “Yeti jwali bala cualcinti iti, i yaakiti gɔkca ɛkɛ ɔci jyedda ɛkɛ.” Gena jyenna neeni ɔɔn nɔɔtɔn i te ɛkɛ neeni. ⁹ Kan i gɔŋni te tuk i agi Yaccu agi Ciɛggɔn ɔci kan i jyetti te yoma awarɛ agi Yaccu luolnda Juaŋ ñaalɔ te koolji tɛɛti mokiyɛ, i yɔɔdi Juaŋo. ¹⁰ Kan ma jyeddi te yomg ɛkkɛn awarɛyɛ, ɛkkɛn pwaddi Juaŋ ñamɛti, ɔci kan ɛkkɛn ma nɔɔttan a ɔɔnyɛ, ɛkkɛn yɔɔdɛ Juaŋ awarɛ. ¹¹ A ɔɔnyɛ, bala ba jyeka kiigin ne gɔkki agi, “Kan mena jyeddi ɛkɛtiyɛ, ɛkta lɔɔddɔ oŋgati bɛɛ.” ¹² Ma Icrayiil ɔci Keedin Pookɛnyɛ, ɛkkɛn waakɛnda a maka ne cyɛɛlɔ acaan Jwaŋ ɛkkɛn a Jwaŋa ne cyɛɛlɔ. Ɔci kan ma cɔkti ɛkɛtiyɛ, ɛkɛ yomɛ pwanna pwani ɛkkɛnti waakɛnda. ¹³ Jyeka kiigin gɔki agi, “Maka borti te yenti Juaŋyɛ, ɛkkɛn yɔɔdɛ ɛkɛ waakɛnda.” ¹⁴ Yeti kan ma jyeti menti men bɛɛyɛ, ɛkkɛn yaakinti cɔkti ɛkɛti boki? A’a, ɔci kan ma tieŋŋin jyek mena neeni men bɛɛyɛ, ɛkkɛn yaakinti jyeddi ɛkɛti boki? A’a, ɔci kan ma ooddi ɛkkɛn myettan bɛɛyɛ, ɛkkɛn yaakinti tieŋdi jyek ɛkkɛn boki? A’a. ¹⁵ Ɔci kan ma cundɛ Juaŋ bɛɛyɛ, ɛkkɛn yaakinti ooddi mieti ma boki? A’a, jyeka kiigin gɔki agi, “Maka etti jyeka wonkɛn jyeka pwadin jyeka etti coodda pwadanyɛ, ɛkkɛn ciegɛn pwanna pwanno.” ¹⁶ Yeti ma waakɛnda jyeti jyeka wonkɛn jyeka pwadin neeni bɛɛ. Bala ba jyeka guaŋŋɛ Icaaya ne ɛkɛ baali cɔki Juaŋti agi, “Ciɛggɔn, men gɛɛl jyeti jyeka ɔɔn ɛkkɛn myennɔn neeni boki?” ¹⁷ Jyeni bɛya te tieŋŋin jyek Yaccu Kiṭɔ. ¹⁸ Yeti ‘ya toocca ɛkkɛti, jiek ati mati bɛɛ? Ɛɛ, jiek ati mati baan konɛ warda pɔli ŋwayyɛ waakɛnda. “Pɔɔdg ɛkkɛn ati baan konɛ warda ɔci jyek ɛkkɛn ati baan konɛ warda moki.” ¹⁹ ’Ya toocca ɛkkɛti moki, ma Icrayiil tieŋŋin jiek jitkɛn ne pwadan boki? A’a, Juaŋ gɔkcin mati te lɛmi Muuca agi, “Ma Icrayiil yomgɛn yiegdi keedin pookɛnti te naŋka naŋdi ‘ya pwandin keedin pookɛntiy. Gena maka guaktan ɛkkɛn agi maka budany. Ma Icrayiil loondi maka kɛɛna ñingɛn morŋanti te naŋki ‘ya ɛkkɛnti.” ²⁰ Ɔci Juaŋ gɔkcin te lɛmi Icaaya daŋkun, ɔci Icaaya buayi ma te miti ma bɛɛ. Juaŋ gɔki agi, “Maka bala lieṭi ‘ya te ñamu bɛɛyɛ, ɛkkɛn ‘ya yuarka doki, ɔci maka bala tooci ‘ya bɛɛyɛ, ɛkkɛn ‘ya ŋeecka doki te naŋki ‘ya.” ²¹ Yeti Icaaya gɔki te ma Icrayiil agi, “‘Ya baal boor ma ‘ya oŋkanda oŋkanda ɔɔn, yeti ma tieŋdi bɛɛ. Ɛkkɛn wyetkɛn tɛy tɛyo.”

¹ ’Ya toocca ɛkkɛti, Jwaŋa Tolan mwonnin te ma ɛkɛ ma Icrayiil waakɛnda boki? Hayɛllɛ! Ɛkɛ mwonnin te ɛkkɛn bɛɛ. Acaan ‘ya daŋkun a men ma Icrayiil. ‘Ya a kaci Abrahim, ɔci ‘ya bɛɛn te kɛɛn Benjaminti. ² Maka jyek ɛkkɛn ŋeejɛ Juaŋ te ñamuyɛ, Juaŋ mwonnin te ɛkkɛn bɛɛ. Jyeka bala worgaji a jyek Iliiya ŋeejɛ ɛkkɛ bɛɛ? ³ Iliiya bala tɛki ma Icrayiil waakɛn Juaŋti agi, “I, Ciɛggɔn, ma Icrayiilyɛ, ɛkkɛn bɔwan i nogɛ waakɛnda, ɔci nonka ɛrki ma waak itiyɛ, lɛɛkci ɛkkɛn iñɔ doki. ‘Ya dalka ɛkkɛn paru, ɔci acca ɛkkɛn buagɔn noki ‘ya daŋkun.” ⁴ Ɔci Juaŋ ṭwokcin ɛkɛti a ɔki? Juaŋ ṭwokcin ɛkɛti agi, “Te naŋka naŋi ‘ya neeniyɛ, maka ‘uay bala men a alpn ne dɔɔyɔ wyetkɛn ne yyɛɛwɔ (7,000). Ɛkkɛn a ma ‘ya. Ɛkkɛn ḍwoñjin iñɔ morcin jwaŋa yenti Baalti oŋgati bɛɛ.” ⁵ Ɔci bala ba te baaṭi, ɔci acca moki, ma Icrayiil gɛɛgyɛ, ɛkkɛn a ma Juaŋo. Juaŋ yomɛ pwad pwad ɛkkɛnti, ɔci ɛkkɛn kɛnnɛ ɛkɛ bora te yom ɛkɛ parɛ. ⁶ Acaan maka neeni kɛnnɛ Juaŋ bora te yom ɛkɛ parɛyɛ, ɔci acaan ɛkɛ yomɛ pwad pwad ɛkkɛntiyɛ, ŋeecin ikin ɛkkɛn kɛnnɛ Juaŋ bora te kanŋa ɛkkɛn bɛɛ. Kan ma kɛndɛ Juaŋ bora te kanŋa ɛkkɛnyɛ, jyek yom pwani Juaŋ bala a ɔki? ⁷ Kan a ɔŋŋiyɛ, oŋ ikin poŋtin a ɔki? Gena liltan ma Icrayiil maka coŋin neeniyɛ, yuarɛ ɛkkɛn men bɛɛ. Ɛkkɛn bala lieṭi men. Maka kɛnnɛ Juaŋ borayɛ, ɛkkɛn aŋka gena neeni yuarɛ doki. Yeti ma Icrayiil maka coŋin neeniyɛ, ɛkkɛn wyetkɛn tɛɛna tɛɛno. ⁸ A ɔɔnyɛ, bala ba jyeka bala worgaji te baaṭi ne gɔkki agi, “Jwaŋa Tolan ma dalda ma wyetkɛn tɛyɔ. Ɔci a ɔɔnyɛ, ɛkkɛn yaakinti gɔṭi te woŋgɛn moki bɛɛ, ɔci yaakinti tyeŋi te jyetkɛn moki bɛɛ, ne acca neeniti men ɔɔn.” ⁹ Ɔci Daawud gɔki agi, “Dala waka amtin aga ba gena yiecki ma waak ɛkkɛnti. Ɔci a ɔɔnyɛ, bala ba ɛkkɛn ḍɛɛmdi kola loorɛ ɛkkɛn pookɛn dɔkiy. Ɔci a ɔɔnyɛ, ywobji bɛɛn ɛkkɛnti doki. ¹⁰ Dala ɛkkɛn ñingɛn ula, naa ɛkkɛn gɔrti noon moki bɛɛ. Ɔci dala ɛkkɛn jualtan iñɔ waka eetan ɛkkɛn oŋkanda.” ¹¹ ’Ya gɔkka ɛkkɛti moki, ne ma Icrayiil ḍɛɛmki iñɔy, ɛkkɛn kookinti jɔllin ñaalɔ moki? Hayɛllɛ, a ɔɔn bɛɛ! Te oŋŋa ɛkkɛn ḍɛɛmki iñɔ neeniyɛ, jyek yɔɔd Jwaŋa Tolan ati Keedin Pookɛnti doki aŋka dala ma Icrayiil yomgɛn bwagdɛ naŋka naŋdɛ Juaŋ pwadin Keedin Pookɛntiy. ¹² Oŋŋa ɛkkɛn ḍɛɛmki iñɔyɛ, jyeka pwadin ati maka pookɛnti baan warda. Oŋŋa kɛɛn Icrayiil yiekiyɛ, Keedin Pookɛn ati ñamu doki. Ɔci ne baaṭi ne ma Icrayiil waakɛn yaltiti Juaŋti waakɛndayɛ, Juaŋ yaakinti noŋdi aŋka jyeka neeni pwaddi ne pɛñan mati baan warda. ¹³ Keedin Pookɛn, ‘ya gɔkka ɛkkɛti. ‘Ya kanŋ ne tolan ¹⁴ acaan ‘ya buaga maka a kɛɛn ‘ya dala ɛkkɛn yomgɛn bwagdɛ naŋka naŋdɛ Juaŋ Keedin Pookɛnti neeni aŋka ɛkkɛn yɔɔdɛ Juaŋ daŋkun. ¹⁵ Te jyek kyɛŋŋa Juaŋ kɛŋni te ma Icrayiilyɛ, maka pookɛn maka ciyi baan konɛ wardayɛ, ɛkkɛn ŋeewin iki Juaŋo. Ɔci oŋŋa bɛya ne ŋoyɔ oŋŋa ma Icrayiil akti ma Juaŋyɛ, jyeka pwadin ooddi mati, ɔci jyeka neeni pwadɔ te ɛkkɛn te ñamu. Acaan maka ‘wondɛ Juaŋ tɛɛtin ɛkɛyɛ, ɛkkɛn bala ba maka tuutan moki bɛɛ. ¹⁶ Kan ma etti poñña ñamuyɛ, poñña neeni a poñi Juaŋo, ɔci a ɔɔnyɛ, bala ba pokkin pookɛn waakɛnda aŋi pokkin Juaŋ doki. Kan jaan bɛɛkkɛ pwadɔyɛ, ɔci jaan jyetkɛ pwadɔ daŋkun, a ɔɔnyɛ, bala ba ma Icrayiil daŋkun Juaŋti ne ɛkkɛn dɔɔkti ɛkɛtiyɛ, ɛkkɛn pwaddi. ¹⁷ Ma Icrayiilyɛ, gɛɛg bala ɔntɔ te Jwaŋa Tolanti. Ɛkkɛn yookɔn te Yaccu Kiṭɔ, ɔci a ɔɔnyɛ, ɛkkɛn bala ba jaan kɛrka yiegin ne tɔɔckiti ma ɔntɔy. Ɔci ɛkkɛ Keedin Pookɛnyɛ, ɛkkɛ cɔɔckɛ ma nona neeniti aŋka ɛkkɛ ñoowɛ i ma Icrayiil a cyɛɛlɔ, ɔci a ɔɔnyɛ, ɛkkɛ balgɛ ba jan jɛtuun kɛrkɛ jana yuli bora budan ne cɔɔckiti ma jana parɛ neenitiy. Ɔci ba kɛrka neeni ne tɛɛtki te jaan mɛɛgɛnyɛ, ɔci bala ba ɛkkɛ daŋkun. Jyek Juaŋ bɛɛn ma Icrayiilti te ñamu, ɔci acca bala ɛkkɛti daŋkun. ¹⁸ Ɔci a ɔŋŋiyɛ, naa ɛkkɛ jieyɛ waakɔ pookɔ agi ɛkkɛ pwadgɛ te ma Icrayiil maka ḍɛɛmdin iñɔ neeni bɛɛ. Kan ɛkkɛ buagɛ jieyɛ waakɔyɛ, dala ɛkkɛ poŋdɛ te jyek ma Icrayiil neeni ñamu. Acaan ba ne jaan kɛrkɛ yɔɔtki ne tɛyan te jaan mɛɛgɛnyɛ, ɔci ɛkkɛ da yɔɔdɛ ne tɛyan te jyeka bɛɛn te ma Icrayiilti te ñamu neeni. ¹⁹ Ɔci ɛkkɛ gɔkɛ kaapun, agi jaan kɛrka wanna tɔɔnnɛ Juaŋ ɔntɔ aŋka dala ɛkkɛ cɔttɛti ɛkɛ non ɛkkɛn kaapun. ²⁰ Awarɛ, kɛrka wannayɛ, ɛkkɛn tɔɔnnɛ Juaŋ ɔntɔ acaan jyenna ɛkkɛn jyetki Yaccuti bala bɛɛ. Ɛkkɛyɛ, ɛkkɛ balgɛ ciyɛ jaan warɛti te naŋki ɛkkɛ pookɔ bɛɛ. Ɛkkɛ balgɛ jaan warɛti oŋkanda te jyenna ɛkkɛ jyettɛ Yaccuti neeni. Ɔci acaan a ɔŋŋiyɛ, naa ɛkkɛ jieddɛ waak ɛkkɛ pookɔ bɛɛ. Dala ɛkkɛ buayɛ te ḍɛɛmdin ɛkkɛ ḍɛɛmdɛ iñɔ ba ɛkkɛn ɔɔny. ²¹ Jaan kɛrkɛ woodgɛn jitkɛn tɔɔnnɛ Juaŋ ɔntɔ doki, ɔci ɛkkɛ poŋɛ gɔkɛ agi kɛrka oonɛ ɛkɛ ɔci cɔɔnnɛti ɛkɛ jaanti neeni kan ɛkkɛn yeyɔyɛ, ɛkkɛn daldɛ ɛkɛ boki? A’a. ²² Dala Juaŋ ŋeeddɛ ɛkkɛ ne ɛkɛ yomɛ pwadi matiy, ɔci dala ŋeeddɛ ɛkkɛ moki jyek ɛkɛ a jyeka a ñiek bɛɛ. Jyek ɛkɛ tɛy tɛyo. Ma Icrayiil maka ḍɛɛmdin iñɔyɛ, jyek Juaŋ tɛy tɛy ɛkkɛnti. Yeti ɛkkɛ, kan ɛkkɛ ciyɛ te yom pwani Juaŋ oŋkandayɛ, ɛkɛ da yomɛ pwad pwad ɛkkɛti oŋkanda ɔɔn daŋkun. ²³ Ɔci maka ḍɛɛmdin iñɔ a ma Icrayiil neeniyɛ, ne ɛkkɛn mwonti te yookin jyek jyeniyɛ, ɔci Juaŋ yaakinti ɛkkɛn cɔttɛti jaan mɛɛgɛnti moki. ²⁴ Ɛkkɛ Keedin Pookɛnyɛ, ɛkkɛ balgɛ ba jan jɛtuun kɛrkɛ jana yuli luom jitin parɛ ne kɛnɛ tɔɔkiti ma ɔci olkiti ma jana pwadantiy. Kan Juaŋ yaakinti noŋi a ɔɔnyɛ, oŋ ɛkɛ yaakinti jaan kɛrkɛ woodgɛn cɔttɛti bɛɛ? Yaakinti, hay! ²⁵ Modg ɔɔn, ‘ya buaga dala ɛkkɛ poŋdɛ te jwalla guaŋi ‘ya neeni. Naa ɛkkɛ poŋɛ gɔkɛ agi ɛkkɛ jiek waakɛnda ŋeejɛ bɛɛ. Wyeñ tɛɛn ma Icrayiilyɛ, bala yuonginda bɛɛ. Ɛkkɛn wyetkɛn tɛy tɛy acca ɔɔn ne Keedin Pookɛn maka muonɛ Juaŋ bora neeni jyetti ɔɔn. ²⁶ Ɔci ma Icrayiil oŋ yɔɔdɛ Juaŋ oŋo. A ɔɔnyɛ, bala ba jyeka kiigin ne gɔkki agi, “Mena Yuoci Ma bɛya te ban Icrayiil ɔci yuoci ma Icrayiil. Ɔci te naŋki ɛkɛyɛ, ma Icrayiil mwondi te nɔjja naŋtan ɛkkɛn Juaŋti neeni.” ²⁷ Jwaŋa Tolan gɔki agi, “Ne ‘ya nɔji ɛkkɛn eeda ɔntɔyɛ, ‘ya jiek naŋdin iki ɛkkɛn a cyɛɛlɔ te jyek yɔɔta neeni.” ²⁸ Ma Icrayiil maka yookɔn te jyeni jyeka wonkɛn jyeka pwadin neeniyɛ, ɛkkɛn yoyi ñin iki Juaŋ agi ɛkkɛ Keedin Pookɛn aŋka aŋŋɛ mung Juaŋo. Yeti Juaŋ ani ma Icrayiil men ɔɔn acaan Juaŋ jiek naŋɛ iki yɔrg ma Icrayiil te baaṭi. Ɔci acaan ma Icrayiil muonɛ ɛkɛ bora te baaṭiyɛ, ɛkɛ jiek agdiyɔ te ɛkkɛn moki bɛɛ. ²⁹ Acaan Juaŋyɛ, kan ɛkɛ boor mayɛ, ɔci kan ɛkɛ buagɔn ma ‘wondɛ waakyɛ, ɛkɛ jiek agdiyɔ bɛɛ. ³⁰ Te baaṭiyɛ, ɛkkɛ balgɛ noŋɛ ba jyek Juaŋ bɛɛ. Yeti accayɛ, ɛkkɛ ciyɛ te jyek ɛkɛ acaan ɛkɛ yomɛ pɔŋnɛ ɛkkɛti. Ɔci ma Icrayiil maka muonɛ Juaŋ bora te baaṭi neeniyɛ, ɛkkɛn aŋka yookɔn te jyek ɛkɛ. ³¹ Ɔci acca ma Icrayiil yookɔn men te yom pɔkkin Juaŋ ɛkkɛnti men ɔɔn, yeti acaan Juaŋ yomɛ pɔŋnɛ ɛkkɛti dokiyɛ, ɔci ma Icrayiil poŋdi te naŋka neeni. Ɔci ne oŋ gɛɛltiyɛ, ɛkkɛn waakɛn yaltan Juaŋti, ɔci Juaŋ yomɛ pɔktɛ ɛkkɛnti daŋkun. ³² Ma Icrayiil ɔci Keedin Pookɛnyɛ, ɛkkɛn bɛɛyi jyek Juaŋ oŋkanda, ɔci ɛkkɛn yaakinti waakɛn pɔktan pookɛn te bɛɛn jiek bɛɛ. A ɔɔnyɛ, Jwaŋa Tolan ɛkkɛn dalnɛ nɔji jitin aŋka ɛkkɛn pɔktɛ ɛkɛ waakɛnda te naŋki ɛkɛ ne ɛkɛ yomɛ pɔktɛ ɛkkɛntiy. ³³ Paŋi Jwaŋa Tolan tol tol ne pɛñan hay! Ɔci ñing tɛɛn ɛkɛyɛ, tɛy tɛy ne pɛñan. Ɛkɛ waak ŋeejɛ waakɛnda. Gena kwoyi ɛkɛ gɛɛl bala bɛɛ. Menga yaakinti paŋi Juaŋ pagdɛ bɛɛ. Menga yaakinti naŋki ɛkɛ ŋeeddɛ bɛɛ. ³⁴ A ɔɔnyɛ, bala ba jyeka kiigin ne gɔkki agi, “A menɛ paŋi Juaŋ ŋeejɛy? Juaŋ tooccin mengati te jwali gɛɛl aŋka ɛkɛ maktan ma te jwali gɛɛl boki? A’a.” ³⁵ “Jwaŋa Tolan balki dɛɛn mengati boki? A’a, ɛkɛ eci genga te mengati boki? A’a.” ³⁶ Waak waakɛnda bɛɛn te ɛkɛti, ɔci te war tɛɛn ɛkɛyɛ, waak waakɛnda bala oŋkanda ɔɔn. Ɔci waak waakɛnda aŋŋɛ ɛkɛ te ḍwaŋ ɛkɛ parɛ. Dala ma jieyi ɛkɛ oŋkanda yuonginda ɔɔn. Amɛɛn.

¹ Modg ɔɔn, Jwaŋa Tolan yomɛ pɔŋnɛ ikinti, ɔci acaan a ɔɔnyɛ, ‘ya gɔk ɛkkɛti dala ɛkkɛ Juaŋ ‘wondɛ waak ɛkkɛ. Dala waak ɛkkɛ daldɛ, dala Juaŋ noŋdi ba yom ɛkɛ, ɔci a ɔɔnyɛ, yɔmjin Juaŋti. Ne ɛkkɛ Juaŋ ‘wondɛ waak ɛkkɛ a ɔɔnyɛ, bala ba ɛkkɛ gɔkɛ yomgɔti agi Jwaŋa Tolanyɛ, ɛkɛ parɛ a Juaŋo. ² Naa ɛkkɛ noŋɛ ba naŋki maka ciyi budan te jyek Juaŋ bɛɛ. Paŋŋa yaayan daldɛ. Dala ɛkkɛ ooktɛ paŋŋa parɛ paŋŋa woonɛ aŋka ɛkkɛ agdɛ maka wonkɛn, ɔci a ɔŋŋiyɛ, jyeka Juaŋ buagiti agi naŋji ɛkkɛyɛ, ŋeeddɛ ɛkkɛ jyek naŋka naŋdɛ ɛkkɛ neeniyɛ, pwadɔ, ɔci Juaŋ yomɛ ñɔya te naŋka neeni. Ɔci a ɔɔnyɛ, jyeka neeni yɔmjin. ³ Jwaŋa Tolan yomɛ pwad pwad ‘yati, acaan a ɔŋŋiyɛ, ‘ya gɔkka ɛkkɛti, naa ɛkkɛ yomgɔ ḍwaŋdi bɛɛ. Ɔci naa ɛkkɛ gɔkɛ agi ɛkkɛ pwadgɛ bɛɛ. Ɛkkɛ ‘wonnɛ Juaŋ jyenno, ɔci magga jyeti ne tolan ɔci magga jyeti ne ḍiɛran. Ɔci maka jyeti ne ḍiɛran neeniyɛ, naa ɛkkɛn gɔki agi jyeni ɛkkɛn tolɔ bɛɛ. Dala ŋeettan ɛkkɛn waakɛnda ne jyenna ɛkkɛn ‘wonnɛ Juaŋ neeni baali a ɔkiy. ⁴ Men warɛyɛ, balki jyetkɛ, ɔci woŋgɛ, ɔci ‘womgɛ, ɔci tukɛ, ɔci waka pookɛn daŋkun. Ɔci waka bala men warɛti neeniyɛ, balki kanŋan, genga da te kanŋa ɛkɛ, ɔci genga da te kanŋa ɛkɛ. ⁵ Ɔci a ɔɔnyɛ, bala ba ikin daŋkun. Ikinyɛ, coŋkin, yeti acaan ikin balkin Yaccu Kiṭɔtiyɛ, ikin balkin ba mena ne cyɛɛlɔ. Ɔci moki ikin kɛɛptin jitin te kanŋa, menga da te kanŋa ɛkɛ, ɔci menga da te kanŋa ɛkɛ. Ɔci ikin moowin yɔtin pookɔ. ⁶ Juaŋ yomɛ pwad pwad ikinti. Ikinyɛ, ‘wonnin ɛkɛ ñing tɛɛno, menga da te ñing tɛɛn ɛkɛ, ɔci menga da te ñing tɛɛn ɛkɛ. Ɔci acaan a ɔŋŋiyɛ, dala ikin kantin te ñing tɛɛna ‘wonninti ɛkɛy. Kan men gɛɛl ‘wonnɛ Juaŋ ñing tɛɛn te kanŋa mieti ɛkɛ mayɛ, dala ɛkɛ mieti ma ne pwadan ba ñing tɛɛn ɛkɛ ‘wonnɛ Juaŋ neeni. ⁷ Ɔci kan men gɛɛl ‘wonnɛ Juaŋ ñing tɛɛn te kanŋa maŋi ma Juaŋ te kanŋa waakyɛ, dala ɛkɛ kandi ne pwadan. Ɔci kan men gɛɛl ‘wonnɛ Juaŋ ñing tɛɛn te lali ma te jiekyɛ, dala ɛkɛ loṭi ma ne pwadan. ⁸ Ɔci mena ṭeyi mayɛ, dala ɛkɛ waŋɛ tiittɛ te ṭeen mako. Mena ‘woñi ma te waakyɛ, dala ɛkɛ ma ‘wondɛ waak te yoma pwadan yoma bɔwan. Ɔci mena ḍuaŋayɛ, dala ɛkɛ noŋdi kanŋa ɛkɛ ne byeran. Ɔci mena moki mayɛ, dala ɛkɛ moki ma te yoma ñɔyan. ⁹ Dala ɛkkɛ anɛ ma te yoma awarɛ. Ɔci dala ɛkkɛ yookɛ te jyek naŋka yeyin, ɔci dala ɛkkɛ woŋgɔ tiittɛ te jyek naŋka pwadin. ¹⁰ Dala ɛkkɛ oondɛ yɔtin ne pwadan bala ba oonnin maka modin. Dala maka pookɛn bala ñamu te ɛkkɛ. ¹¹ Naa ɛkkɛ noŋɛ kanŋa Jwaŋa Tolan morndɛ a morŋin a ɔɔn bɛɛ. Dala ɛkkɛ byerdɛ a byergin te kanŋa ɛkɛ. ¹² Dala ɛkkɛ yomgɔ ñɔɔgdi ne ɛkkɛ balgi kɛɛyɛ jyeka pwadin jyeka bɛya ne ŋoyɔ neeniy. Ɔci ne taab baali ɛkkɛti te jyek Yaccuyɛ, naa ɛkkɛ yomgɔ yiegdi ne pɛñan bɛɛ. Dala ɛkkɛ yomgɔ tɛya. Dala ɛkkɛ cɔktɛ Juaŋti oŋkanda ɔɔn. Naa cɔŋi daldɛ bɛɛ. ¹³ Ɔci kan wak Ma Kiṭɔ bɔɔnjinyɛ, dala ɛkkɛ ɛkkɛn magdɛ te waako. Ɔci kan maka wɛlg bala ciyi ban ɛkkɛyɛ, dala ɛkkɛ ɛkkɛn magdɛ te waka amtin, ɔci te nona ninki ɛkkɛn daŋkun. ¹⁴ Kan ma noŋi ne yaayan ɛkkɛtiyɛ, dala ɛkkɛ gɔktɛ ne pwadan ɛkkɛnti. Naa ɛkkɛ ɛkkɛn ḍardɛyɔ bɛɛ. Dala ɛkkɛ gɔktɛ ne pwadan ɛkkɛnti ɔɔn. ¹⁵ Kan ma yomgɛn ñɔyɔyɛ, dala ɛkkɛ yomgɔ ñɔɔgdi iki ɛkkɛn daŋkun. Ɔci kan ma bala wiakyɛ, dala ɛkkɛ wiaktɛ iki ɛkkɛn daŋkun. ¹⁶ Dala ɛkkɛ ciedɛ ba yoma ne cyɛɛlɔ. Naa ɛkkɛ poŋɛ gɔkɛ agi maka pookɛn yeyɔ bɛɛ. Naa ɛkkɛ yookɛ te maka ŋoyɔ bɛɛ. Dala ɛkkɛ ñoodɛ iki ɛkkɛn. Naa ɛkkɛ noŋɛ ba maka yɛcin ɔɔn bɛɛ. ¹⁷ Kan ma noŋdi ne yaayan ɛkkɛtiyɛ, naa ɛkkɛ noŋdɛ ne yaayan ɛkkɛnti bɛɛ. Dala ɛkkɛ woŋgɔ tiittɛ te coodi ɛkkɛ aŋka coodi ɛkkɛ pwada ma ñomgɛnti waakɛnda. ¹⁸ Dala ɛkkɛ ciedɛ ba maka nɔji ɛkkɛn baaw ɔci ywobji ɛkkɛn baawo. Kan maka pookɛn balki jiekyɛ, aŋi ba jyek ɛkkɛn pookɛn doki. ¹⁹ Maka ana ‘yay, kan ma noŋdi ne yaayan ɛkkɛtiyɛ, naa ɛkkɛ noŋdɛ ne yaayan ɛkkɛnti bɛɛ. Dala ɛkkɛ jyeka neeni oldɛ aŋa Juaŋti, ɔci kan ɛkɛ buagɔn noŋdi ywobji ɛkkɛntiyɛ, gena yom ɛkɛ. Jyeka kiigin jyeka guaŋŋɛ Juaŋ gɔki agi, “‘Ya waru yoddo, ‘ya jiek olji ma wyetkɛnti.” ²⁰ Ɔci worga gɔki moki agi, “Kan men gɛɛl yookɔn te ɛkkɛ ɔci kan ɛkɛ amɛ koñyɛ, dala ɛkkɛ ɛkɛ ‘wondɛ waka amtin. Ɔci kan ɛkɛ amɛ yiɛnyɛ, dala ɛkɛ ‘wondɛ pieg motti. Ɔci a ɔɔnyɛ, naŋki ɛkkɛ neeni pɛñ pɛñ ɛkɛti, ɔci ɛkɛ warɛ aga lɔɔno.” ²¹ Naa ɛkkɛ bwantɛ naŋka yeyin bɛɛ. Dala ɛkkɛ aŋka naŋka yeyin bwandɛ te naŋka pwadin.

¹ Dala ma waakɛnda noŋdi ba jyek akuuma ban ɛkkɛn, acaan gena Jwaŋa Tolan ‘woñi ma te jyek akuumay. ² Ɔci kan men gɛɛl yookɔn te jyek akuumayɛ, a ɔɔn bala ba ɛkɛ yookɔn te jyek naŋka ma ‘wonnɛ Juaŋy. Ɔci maka yookɔn te naŋki Juaŋ neeniyɛ, jiek bɛya ɛkkɛn wyetkɛnti. ³ Maka noŋi ne pwadanyɛ, ɛkkɛn buayi jyek akuuma bɛɛ. Gena maka noŋi ne yaayan aŋka buayi jyek akuumay. Kan ɛkkɛ buayɛ jyek akuumayɛ, dala ɛkkɛ naŋka yeyin neeni daldɛ ɔci ɛkkɛ noŋdɛ naŋka pwadin, ɔci jyek bwajja neeniyɛ, bɛya ɛkkɛti moki bɛɛ. Ɔci akuuma gɔkti ne pwadan ɛkkɛti. ⁴ Ma akuumayɛ, ɛkkɛn a kɛɛnk Juaŋo. Ɛkkɛn gɔṭi ɛkkɛ aŋka naa ɛkkɛ ciyɛ ne yaayan bɛɛ. Kan ɛkkɛ noŋɛ ne yaayanyɛ, dala ɛkkɛ woŋgɔ tiittɛ. Ma akuuma jiek oltan ma wyetkɛnti budan bɛɛ. Ɛkkɛn a kɛɛnk Juaŋ awarɛ, kan men gɛɛl noŋdi ne yaayanyɛ, jiek duaktɛ akuuma ɛkɛ wyeñɛti. ⁵ Acaan a ɔŋŋiyɛ, dala ɛkkɛ tieŋdɛ jyek ma akuuma. Naa ɛkkɛ tieŋdɛ jyek akuuma te bwaji ywobji Jwaŋa Tolan parɛ bɛɛ. Dala ɛkkɛ tieŋdɛ jyek akuuma te jyek Juaŋ daŋkun, aŋka naa jyeka yeyin neeni bɛya ɛkkɛ yomgɔti bɛɛ. ⁶ Ɔci moki te jyeka neeniyɛ, dala ɛkkɛ ma akuuma ‘wondɛ bilk tulba. Acaan ma akuumayɛ, ɛkkɛn a kɛɛnk Juaŋ ɔci ɛkkɛn bala gɔṭi jyek kanŋa Juaŋo. ⁷ Ma akuuma waakɛnda kan ɛkkɛn buagɔn tulba te ɛkkɛtiyɛ, dala ɛkkɛ ɛkkɛn ‘wondɛ. Ɔci moki kan ma akuuma buagɔn tulba te wak ɛkkɛyɛ, dala ɛkkɛ ɛkkɛn ‘wondɛ. Naa ɛkkɛ ñieyɛ a ñiek te jyek maka ḍwaŋin bɛɛ. Dala ɛkkɛ tieŋdɛ jyek ɛkkɛn ne pwadan te yoma pwadan. ⁸ Kan dɛɛn bala itiyɛ, naa dɛna neeni ḍwaya ḍuad budan ɔci ‘uotkati i ɛka parɛ a ɔɔn bɛɛ. Yeti gena bala ɛkkɛ ḍɔɔggɔti ba dɛɛnyɛ, gena anno. Dala ɛkkɛ oondɛ yɔtin pookɔ oŋkanda, ɔci a ɔɔnyɛ, bala ba naŋki ganuun. ⁹ Jyek ganuun jitkɛn gɔki agi, “Naa ɛkkɛ noŋdɛ tomi bɛɛ, ɔci naa ɛkkɛ nokkɛ ma bɛɛ, ɔci naa ɛkkɛ kortɛ waak bɛɛ, ɔci naa ɛkkɛ buagɛ wak maka pookɛn bɛɛ.” Jyek ganuun jitka neeni ɔci jyek ganuun jitka pookɛnyɛ, ɛkkɛn waakɛnda a jyeka ne cyɛɛlɔ i jwali ṭɔɔlɛ neeni, “Dala anna ɛkkɛ anɛ maka pookɛnyɛ, yoomdi i anna ɛkkɛ ani waak ɛkkɛy.” ¹⁰ Kan mena ani mayɛ, ɛkɛ noŋi ne yaayan mati bɛɛ. Mena ani mayɛ, ɛkɛ yaakinti Jyek ganuun tiidɛyɔ ne pwadan. ¹¹ Dala ɛkkɛ ciedɛ a ɔɔn ba jyeka neeni. Ɔci dala ɛkkɛ woŋgɔ tiittɛ te coodi ɛkkɛ. Naa ɛkkɛ ciyɛ ba maka wici budan ɔɔn bɛɛ. Dala ɛkkɛ jiek ŋeeddɛ ne pwadan acaan oŋŋa Yaccu bɛɛdi ɔci ikin yɔɔtintiyɛ, looncin moki bɛɛ. Oŋŋa neeni bɛya ne cwakanti. ¹² Ween jiñɛ looncin moki bɛɛ. Noon noŋi bɔwa doki. Naa ikin noŋtin ba naŋka naŋtan ma te ween jiñɛ nona mielti wanna bɛɛ. Dala ikin cietin ne pwadan ba maka ciyi te nona bɔwan. ¹³ Dala ikin noŋtin naŋka pwadan ba maka ciyi te nona bɔwan. Naa ikin noŋin amaam ba maka nokkin mooy, walla ba maka noŋi tomi, ɔci walla ba maka balki jyek pɛɛdin, ɔci walla ba maka korkɛn modin bɛɛ. ¹⁴ Yeti dala ikin wɛɛtin gena Ciɛggɔn ikin Yaccu Kiṭɔti ne pwadan. Naa ikin poŋin te paŋi yoma te baaṭi aŋka paŋi yoma te baaṭi neeni bɛya ikinti moki bɛɛ.

¹ Kan men gɛɛl tɛy tɛy te jyek Jwaŋa Tolan men bɛɛyɛ, dala ɛkɛ balgɛ iki ɛkkɛ a cyɛɛlɔ oŋkanda ɔɔn. Kan ɛkɛ buayi gengayɛ, naa ɛkkɛ wookɛ ɛkɛ bɛɛ. ² Ma Kiṭɔ gɛɛg yaakinti omi waak waakɛnda. Yeti ma gɛɛg kan ɛkkɛn tɛy tɛy te jyek Juaŋ men bɛɛyɛ, ɛkkɛn buayi te ami waka pookɛn ba yoŋgi ɔɔn. Ɛkkɛn omi waka jang ṭɔlgɛn pookɛn budan. ³ Maka omi waakyɛ, ɔci maka omi bɛɛyɛ, naa ɛkkɛ woowɛ yɔtin pookɔ bɛɛ, acaan Juaŋ ani ɛkkɛ waakida. ⁴ I a menɛ aŋka i wooki kɛɛngɔn Juaŋy? Kanŋa mena kɛɛngɔn kan pwatcin walla kan yaayɛyɛ, gena jyek i bɛɛ. Gena jyek kɛɛngɔn Weegɛn. Ɔci ɛkɛ magdɛ Ciɛggɔn ɔci yɔɔtti iñɔ acaan Ciɛggɔn yaakinti ɛkɛ magdɛ. ⁵ Ma gɛɛg gɔki agi oŋki iidn gɛɛg ḍwaŋgɔ. Ɔci maka pookɛn gɛɛg moki gɔki agi oŋki iidn waakcinda balgɔ bolja ne cyɛɛlɔ. Dala ɛkkɛ waakida menga da jyek yom ɛkɛ ŋeejɛ ne pwadan. ⁶ Kan men gɛɛl poŋi gɔki agi oŋ gɛɛl tolɔ ɛkɛtiyɛ, oŋŋa neeni tolcin ɛkɛti te Juaŋo. Mena omi waakyɛ, ɛkɛ omi waak budan bɛɛ, ɛkɛ omi waak te Juaŋo. Ɔci ɛkɛ gɔkti ɛkɛti agi pwatcin. Ɔci mena gwoṭi koñyɛ, ɛkɛ gwoṭi koñ budan bɛɛ. Ɛkɛ gwoṭi koñ te Juaŋo. Ɔci ɛkɛ da gɔkti ɛkɛti a pwatcin daŋkun. ⁷ Ikin menga yaakinti ciyi parɛ budan bɛɛ. Ɔci ikin menga tuwa parɛ budan bɛɛ, acaan Juaŋ bala. ⁸ Kan ikin balkin meni, ɔci walla kan ikin tuunin dokiyɛ, ikin akin ma ɛkɛ men ɔɔn. ⁹ Yaccu Kiṭɔ aŋi Ciɛggɔn maka tɛɛtan ɔci maka tuutan. Gena jyek cyɛgja neeni aŋka Yaccu tuuni ɔci jɔlni ñaalɔ tɛɛti moki neeni. ¹⁰ Te gena yeti aŋka i wooki mod ɛkkɛy? Ɔci te gena yeti i noŋ ba ne mod ɛkkɛ a genga bɛɛy? Ne baaṭi godan bala ikinti waakida. Ɔci ikin yɔɔttin Juaŋ ñamɛti te godan ikin. ¹¹ Jyek Ciɛggɔn jyeka kiigin gɔki agi, “Awarɛ, ne oŋ gɛɛltiyɛ, ma waakɛnda ḍwondi iñɔ ‘ya ñamuti, ɔci ma waakɛnda jieddi ‘ya.” ¹² Ɔci te oŋŋa wannayɛ, ikin waakida Juaŋ myettin te naŋki ikin. ¹³ Acaan a ɔŋŋiyɛ, naa ikin woowin yɔtin pookɔ moki bɛɛ. Dala ikin poŋtin jiek yomgɔti aŋka naa mod ikin gɛɛl ḍɛmdi iñɔ bɛɛ. ¹⁴ Acaan ‘ya baal Yaccutiyɛ, ŋeej ‘ya ne pwadan genga yaayɛ mengati budan bɛɛ, yeti kan men gɛɛl yookɔn te gengayɛ, ɔci gena neeni da yaayɛ ɛkɛti daŋkun. ¹⁵ Kan mod ɛkkɛ gɛɛl bala poŋi jiek te waka amdɛ ɛkkɛ a waka ‘yɛrtan ma jɔkinti ɔci kan ɛkɛ gɔki agi a ɔɔn yaayɔ Juaŋti ɔci kan ɛkkɛ omɛ men ɔɔnyɛ, a ɔɔnyɛ, bala ba ɛkkɛ yomgɔ baaw mod ɛkkɛti neeni. Naa mod ɛkkɛ gɛɛl lɛgdɛ ɛkkɛ jitin te jyek waka amdɛ ɛkkɛ bɛɛ, acaan Yaccu tuun te ɛkɛ daŋkun. ¹⁶ Kan naŋki i pwad pwad ɔci kan maka pookɛn poŋi gɔki agi naŋka neeni pwadɔ bɛɛyɛ, dala naŋki i neeni dalja acaan te ɛkkɛn. ¹⁷ Jyek cyɛgji Juaŋyɛ, gena jyek waka amtin bɛɛ, ɔci a jyek waka maattan ma bɛɛ. Gena jyek naŋka pwadin, ɔci jyek coodi pwani mati ɔci jyek yom ñɔɔno. Yom ñɔɔn neeniyɛ, bɛɛn te Boŋ Juaŋti. ¹⁸ Ne ɛkkɛ kanŋi Juaŋti ɔci waka pwadin balki ɛkkɛtiyɛ, a ɔɔn pwatcin Juaŋti ɔci pwatcin mati daŋkun. ¹⁹ Acaan a ɔŋŋiyɛ, dala ikin jyek coodda pwadan tiitinyɔ, ɔci dala moki ikin woŋgɔ tiittin te jyek moowin yɔtin pookɔ aŋka ikin yɔɔttin ne tɛyan te jyek Yaccu. ²⁰ Naa ɛkkɛ kanŋa Juaŋ lɛgdɛ jitin te jyek waka amdɛ bɛɛ. Waka amtin pwadɔ waakɛnda, gen gɛɛl yaayɛ budan bɛɛ. Yeti kan men gɛɛl bala omi genga ɔci kan mena parɛ poŋi jiek ɔci ḍɛmdi iñɔ te naŋka neeniyɛ, a ɔɔn bala ba ɛkɛ lɛɛŋŋɛ men jitin, ɔci a ɔɔn amma ɛkɛ omi neeniyɛ, yaayɛ. ²¹ Kan i poŋ gɔk men gɛɛl ḍɛmdi te naŋki i ne i omdi yoŋga ‘yɛrtan ma jɔkinti, ɔci walla ne i motti mooy, ɔci kan i waka neeni dalja te mod ɛkkɛyɛ, a ɔɔn yɔmjin. ²² Kan ŋeej i yomuti gen gɛɛl pwatcin Juaŋtiyɛ, dala i noŋja Juaŋ ñamɛti parɛ. Kan i noŋ genga, ɔci kan yom i poŋi jiek bɛɛyɛ, a ɔɔnyɛ, i yomu pwanna pwanno. ²³ Kan men gɛɛl omi genga ɔci kan ɛkɛ poŋi jiek yomɛti te gena amdɛ ɛkɛ neeni ɔci kan ɛkɛ omi men ɔɔnyɛ, a ɔɔn yaayɛ. A ɔɔnyɛ, bala ba naŋki ɛkɛ neeniyɛ, bɛɛn te jyenna ɛkɛ jyetti Juaŋti neeni bɛɛ. Kan ikin noŋtin genga ɔci kan ikin jyettin yomgɔti bɛɛyɛ, a ɔɔn a nɔjjo.

¹ Ikin maka yomgɛn tɛɛn te jyek Juaŋyɛ, dala ikin maka yomgɛn koyan maktin daŋkun. Naa ikin poŋin te waak ikin pookɔ bɛɛ. Dala ikin poŋtin te maka pookɛn daŋkun. ² Ɔci dala ikin waakida noŋtin ne pwadan ɛkkɛnti aŋka ɛkkɛn kooptin ñaalɔ aŋka ɛkkɛn yomgɛn tɛya te jyek Juaŋ daŋkun. ³ Dala ikin noŋtin a ɔɔn acaan ne Kiṭɔ baaliyɛ, ɛkɛ bala poŋi te war ɛkɛ parɛ bɛɛ. Ɛkɛ bala poŋi te ikin daŋkun. Naŋki ɛkɛ neeni bala ba jyeka kiigin ne ɛkkɛn gɔkki agi, “Jyeka wookki ma iyɛ, bɛɛn ‘ya wyeñuti doki”. ⁴ Jyeka kiiwɛ ma te baaṭi waakɛndayɛ, ɛkkɛn bala ikinti aŋka ikin laltin ɛkkɛn. Te jyek Juaŋ jyeka kiigin neeniyɛ, Juaŋ bala ṭeyi ikin aŋka naa ikin mwontin ne pɛñan te jyek ɛkɛ bɛɛ. Dala ikin kɛɛyin naŋki ɛkɛ te yoma pwadan. ⁵ Jwaŋa Tolanyɛ, ma yɔɔda ne tɛyan te ɛkɛ. Ɔci ma ṭeedɛ ɛkɛ. Dala ɛkɛ ɛkkɛ magdɛ aŋka ɛkkɛ ciedɛ ne pwadan oondɛ yɔtin oŋkanda. ⁶ Ɔci a ɔŋŋiyɛ, ɛkkɛ yaaktɛti jieyɛ Jwaŋa Tolan Wey Ciɛggɔn ikin Yaccu Kiṭɔ. Ɛkkɛ yaaktɛti jieddɛ ɛkɛ te lɛmma ne cyɛɛlɔ. ⁷ Dala ɛkkɛ oondɛ yɔtin pookɔ bala ba Kiṭɔ ne ani ɛkkɛ wanna ɔɔn. Ɔci a ɔɔnyɛ, maka pookɛn jieddi Jwaŋa Tolan agi Juaŋ pwadɔ. ⁸ Kiṭɔ aŋi kɛɛngɔn ma Icrayiil aŋka ŋeettan ma jyeka guaŋŋɛ Juaŋ neeni a jyeka awarɛ, ɔci aŋka jyeka naŋŋɛ Juaŋ iki yɔrg ɛkkɛn te baaṭi neeniyɛ, bɛya bora. ⁹ Ɔci moki Kiṭɔ aŋi kɛɛngɔn ma Icrayiil aŋka Juaŋ yomɛ pɔktɛ maka pookɛnti daŋkun, ɔci te naŋki ɛkɛ neeniyɛ, Keedin Pookɛn neeniyɛ, jieddi ɛkɛ daŋkun. A ɔɔnyɛ, bala ba jyeka kiigin ne gɔkki agi, “‘Ya jiey i Keedin Pookɛnti. Ɔci ‘ya ‘ualja ɔɔlla gɔki agi yenti i pwadɔy.” ¹⁰ Ɔci moki agi, “Keedin Pookɛnyɛ, dala ɛkkɛn yomgɛn ñɔya i ma ɛkɛ a cyɛɛlɔ.” Ɔci moki jyeka kiigin gɔki agi, ¹¹ “Keedin Pookɛn waakɛnda dala ɛkkɛ jieddi Ciɛggɔn. Dala maka pookɛn waakɛnda jieddi Ciɛggɔn.” ¹² Ɔci Jyek Icaaya daŋkun gɔki agi, “Men gɛɛl bala bɛya te ma Daawud kaci Jɛciti, ɔci ɛkɛ aga Ciɛggɔn Keedin Pookɛn, ɔci Keedin Pookɛn neeniyɛ, ɛkkɛn jyeddi kɛɛddi gena ɛkɛ parɛ.” ¹³ Jwaŋa ikin jyettin kɛɛyin naŋki ɛkɛ neeniyɛ, dala ɛkkɛ ‘wondɛ ɛkɛ yom ñɔɔn ɔci coodi pwani ne tolan te jyenna ɛkkɛ jyettɛ ɛkɛti neeni. Ɔci te war tɛɛn Boŋ Jwaŋa Tolanyɛ, ɛkkɛ yaakɛti ciedɛ ne pwadan ne ɛkkɛ kɛɛyɛ naŋki ɛkɛ ɔɔn. ¹⁴ Modg ɔɔn, ŋeej ‘ya te yom ‘ya ne ɛkkɛ balgɛ ciyɛ ne pwadany. Ɛkkɛ ñingɔ tɛy tɛy te jyek Juaŋo, ɔci ɛkkɛ yaakɛti ṭeyɛ waakɔ pookɔ. ¹⁵ Yeti ‘ya kiewan worga ɛkkɛti te jiek gɛɛg aŋka ɛkkɛ ñingɔ ñiektɛ te jyeka neeni. ‘Ya gɔkkan a ɔɔn ɛkkɛti acaan Juaŋ yomɛ pwad pwad ‘yati te yom ɛkɛ, ¹⁶ ’ya naŋŋa ɛkɛ a gaciic. ‘Ya a gaciic Yaccu Kiṭɔ Keedin Pookɛnti, acaan ‘ya ma myetka te jyeka wonkɛn jyeka pwadin. Ɔci acaan ‘ya a gaciic ɛkkɛnyɛ, ‘ya buaga dala ɛkkɛn pwaddi Juaŋ ñamɛti te naŋki Boŋ Jwaŋa Tolan ɛkkɛn yomgɛnti. ‘Ya ɛkkɛn ‘woñga Jwaŋa Tolan. ¹⁷ ’Ya yomu ñɔɔna ñɔɔn te naŋka naŋŋɛ Juaŋ mati te kanŋa ‘ya ne ‘ya baala noŋa kanŋa Yaccu Kiṭɔy. ¹⁸ ’Ya yomu tɛya ɔci gɔkca te gena waka naŋŋɛ Yaccu te ‘ya pookɛn aŋka Keedin Pookɛn noŋdi ba jyek Juaŋo. Naŋka neeni naŋŋɛ ɛkɛ te jiek ɔci te naŋko, ¹⁹ ɔci te naŋka tɛyan ɔci naŋka ñyecki ma Jwaŋa Tolan, ɔci te war tɛɛn Boŋ Juaŋ aŋka ma jyetki ɛkɛti neeni. Bonka wɛnni waakɛndayɛ, ɛkkɛn ḍaaŋi ‘ya te lallo. Gena ban Urcaliim, ɔci bonka pookɛn bonka yomɔ waakɛnda ne ban Iliirikom ɔɔn. ²⁰ Yom ‘ya buagɔn loṭi ma bonka pookɛn bonka jyeka wonkɛn jyeka pwadin baaw matiy. Yom ‘ya buagɔn naŋka neeni ne pɛñan. Ɔci kan mena parɛ gɛɛl mɔkca bala loṭi ma bana parɛ gɛɛlti te jyek Yaccu dokiyɛ, ‘ya ootta non ɛkɛti moki bɛɛ. Ɔci ba jyek lali ‘ya neeniyɛ, bala ba jyek ono. Kan men gɛɛl cuoti on dokiyɛ, ‘ya ootta non ɛkɛ byɛldi bɛɛ. ‘Ya da ootta cuotca on nona parɛ daŋkun. ²¹ Ɔci a ɔɔnyɛ, maka pookɛn tieŋdi jyek Juaŋ daŋkun bala ba jyeka guaŋŋɛ Icaaya agi, “Maka nɔɔtki ma men bɛɛyɛ, dala jiek ooddi ɛkkɛnti, ɔci maka tieŋŋin men bɛɛyɛ, dala ɛkkɛn tieŋdi.” ²² ’Ya baal poŋ oŋkanda ka ‘ya bɛɛd ban ɛkkɛ, yeti te kanŋa jyek lali ma bonka pookɛn neeniyɛ, wɔɔka bɛɛda ‘ya gɔ bala bɛɛ. ²³ Yeti acca kanŋa ‘ya bawwin nonka neeniti. Acca ‘ya buaga bɛɛdo. Yuonga coŋin neeniyɛ, ‘ya baal gɔk ka ‘ya bɛɛd ban ɛkkɛ. ²⁴ Ne ‘ya bɛɛda oodda ban Icpeenyɛ, ‘ya ɛɛra ikin yɔɔrtin iki ɛkkɛ. Ɔci ɛkkɛ ‘ya ‘wondata waagga eca pɔy yomɛ ne ban Icpeenti. ²⁵ Yeti acca ‘ya baal pɔɔjɔ ootta ban Urcaliim aŋka mok Ma Kiṭɔ aŋan. ²⁶ Ma kaniica Macɛdɔɔnya ɔci ma kaniica Akeeya, ɛkkɛn bilk limiyɔ te ma kaniica maka anin ban Urcaliim. ²⁷ Ne ɛkkɛn balki lyemki bilka neeniyɛ, ɛkkɛn yomgɛn ñɔɔna ñɔɔno. Ne ɛkkɛn ma Urcaliim makkiti te waka neeniyɛ, te ñamu ɛkkɛn aŋka magɛ ma Urcaliim. Maka neeniyɛ, Jyek Juaŋ bɛɛn ɛkkɛnti te maka ban Urcaliim. Ɔci kan ɛkkɛn ma Urcaliim maktan daŋkunyɛ, a ɔɔn yɔmjin. ²⁸ Ne ma Urcaliim ‘wonda ‘ya bilka limiyɔ ma neeni ɔci ne naŋka neeni ḍagda ‘yayɛ, ‘ya oŋ bɛɛd ootta ban Icpeen oŋo. Ɔci ‘ya ɛɛra ban ɛkkɛ. ²⁹ Çeej ‘ya ne ‘ya bɛɛda ɛkkɛtiyɛ, ikin maktin Kiṭɔ ne pwadan. ³⁰ Modg ɔɔn, ‘ya buaga dala ɛkkɛ cɔktɛ te ‘ya ne tolan te wona ‘ya oodda ban Urcaliimji neeni. ‘Ya tooc ɛkkɛti te yenti Ciɛggɔn ikin Yaccu Kiṭɔ. Ɔci ‘ya tooc ɛkkɛti moki te anna ɛkkɛ ‘wonnɛ Boŋ Jwaŋa Tolany. ³¹ Dala ɛkkɛ cɔktɛ Juaŋti te ‘ya aŋka naa ywobji maka yookɔn te jyek Juaŋ neeniyɛ, bɛya ‘yati bɛɛ. Gena maka ban Urcaliim. Ɔci moki dala ɛkkɛ cɔktɛ te ma Juaŋ ban Urcaliim te bilka eed ‘ya ɛkkɛnti neeni, aŋka bilka neeni lultan ɛkkɛn te yoma pwadan. ³² Kan ne naŋka neeni baatiyɛ, ɔci kan Juaŋ buagɔn ‘ya bɛɛd ban ɛkkɛyɛ, ‘ya oŋ bɛɛd oŋo. ‘Ya bɛɛd te yoma ñɔyan, ɔci ‘ya wowwa ban ɛkkɛ ne ḍiɛran ṭɔɔlɛ lakun. ³³ Jwaŋ ikin mena ma ‘wondɛ coodda pwadanyɛ, dala ɛkɛ baldɛ iki ɛkkɛ oŋki waakɛnda ɔɔn. Amɛɛn.

¹ Acca ɛkkɛ myettin ‘ya te kow ikin Piibi mena noŋi kanŋa kaniica ban Cɛnkriyati neeni. ² Ɛkkɛ myettin ‘ya te ɛkɛ aŋka ɛkkɛ ɛkɛ ñiibdɛ aŋka ɛkkɛ woŋgɔ tiittɛ te ɛkɛ, acaan ɛkɛ a men Kiṭɔ. Ne Ma Kiṭɔ noŋti a ɔɔnyɛ, a ɔɔn yɔmdi. Kan jyeka tɛyan gɛɛg balayɛ, dala ɛkkɛ ɛkɛ magdɛ, acaan ɛkɛ maka pookɛn maŋŋɛ a ḍiɛkan bɛɛ, kɔɔna kɔɔnno. Ɔci ‘ya daŋkun maŋŋa ɛkɛ daŋkun. ³ Dala ɛkkɛ Pricilla ɔci Akwilla ñiibdɛ te ‘ya, ɛkkɛn bala ciyi boki? Ɛkkɛn a maka noŋin iki ‘ya kanŋa Yaccu Kiṭɔ. ⁴ Ne ma noŋki ‘ya noktatayɛ, maka neeni ɛkkɛn buayi lien bɛɛ. ‘Ya makka ɛkkɛn ɔɔn. ‘Ya yomu pwad pwad ɛkkɛnti te naŋki ɛkkɛn. ‘Ya yomu pwad pwad ɛkkɛnti paru bɛɛ. Ma kaniican Keedin Pookɛn waakɛndayɛ, ɛkkɛn gɔki a pwatcin te ɛkkɛn. ⁵ Maka ḍwoṭi wyetkɛn te jyek Juaŋ on ɛkkɛn neeniyɛ, dala ɛkkɛn ñiibdɛ te ‘ya, ɛkkɛn bala ciyi boki? Mug ɔɔn Ɛpeenatac ñiibdɛ daŋkun. Ɛkɛ a mena jyeti Kiṭɔti ñamu ban Ecya. ⁶ Moryam ñiibdɛ daŋkun te ‘ya, ɛkɛ bala ciyi boki? Ɛkɛ bala noŋi kanŋa ne tolan ɛkkɛti. ⁷ Andronaaykac ɔci Junyac ɛkkɛn ñiibdɛ te ‘ya daŋkun, ɛkkɛn bala ciyi boki? Ɛkkɛn a maka ban ɔɔn. Ɛkkɛn balgin iki ‘ya ciginji a cyɛɛlɔ. Cuudan Yaccu jieyi maka neeni agi ɛkki pwadgɔ. Ne ‘ya jyetta men bɛɛyɛ, ɛkkɛn jyeti Kiṭɔti doki ñamu. ⁸ Mug ɔɔn Ampliiyatac ñiibdɛ te ‘ya, ɛkɛ a men Kiṭɔ. ⁹ Orbeenoc ñiibdɛ te ‘ya. Ɛkɛ bala kanŋin iki ‘ya a cyɛɛlɔ te kanŋa Kiṭɔ. Icteekic mug ɔɔn mena onga ‘ya ñiibdɛ daŋkun, ɛkɛ bala ciyi boki? ¹⁰ Apɛllɛc mena guaktan ma agi ɛkta anɔ Kiṭɔ ne pwadanyɛ, ɛkɛ ñiibdɛ te ‘ya. Ɔci ma Ɛrictobyuuloc ñiibdɛ daŋkun. ¹¹ Ɛrɔɔdyan mena bɛɛn te ban ɔɔn, ñiibdɛ te ‘ya. Ɔci ma Narciicac Ma Kiṭɔ ñiibdɛ te ‘ya, ɛkkɛn bala ciyi boki? ¹² Tripiina ɔci Tripɔɔca, moonga bala kanŋan ne tolan oŋkanda te kanŋa Kiṭɔ neeniyɛ, ñiibdɛ te ‘ya. Mug ɔɔn Pɛrcic ñiibdɛ te ‘ya. Ɛkɛ ‘wota a ɛŋa bala kanŋan ne tolan te kanŋa Kiṭɔy. ¹³ Rupac ñiibdɛ daŋkun. Ɛkɛ a mena ñingɛ tɛyan te jyek Kiṭɔ. Ɔci mɛy ɛkkɛn ñiibdɛ daŋkun. Ɛkɛ bala ba mɛy ɔɔn daŋkun ‘yati. ¹⁴ Aciiŋkritac ñiibdɛ, ɔci Pligɔn, ɔci Ɛrmic, ɔci Patrɔbac ɔci Ɛrmac, ɛkkɛn ñiibdɛ, ɔci maka bala iki ɛkkɛn a modgɛnyɛ, ñiibdɛ daŋkun. ¹⁵ Pilɔɔlogoc ɔci Julya ñiibdɛ, ɔci Nireeyoc ɔci kow ɛkkɛn ñiibdɛ, ɔci Ɔliimpac, ɔci Ma Kiṭɔ maka bala iki ɛkkɛn waakɛnda, ɛkkɛn ñiibdɛ daŋkun, ɛkkɛn bala ciyi boki? ¹⁶ Dala ɛkkɛ ñiebdɛ yɔtin pookɔ te yoma pwadan. Kaniican Kiṭɔ ñiepi ɛkkɛ waakɛnda. ¹⁷ Modg ɔɔn, dala ɛkkɛ tieŋdɛ ne pwadan jyeka gɔwwa ‘yay, dala ɛkkɛ woŋgɔ tiittɛ te maka kɛɛbi ma jitkɛn te jieko, ɔci te maka noŋi ne yaayan, aŋka naa ɛkkɛ ḍɛɛmdɛ iñɔ bɛɛ. Maka noŋi a ɔɔnyɛ, jyek ɛkkɛn bala ba jyeka ɛkkɛ lalkɛ ma te ñamu neeni bɛɛ. Naa jyek ɛkkɛ ñoodi i jyek ɛkkɛn bɛɛ. ¹⁸ Maka neeniyɛ, ɛkkɛn kanŋan te kanŋa Ciɛggɔn ikin Kiṭɔ bɛɛ. Ɛkkɛn noŋi ba yomg ɛkkɛn pookɛn budan. Ɛkkɛn gɔki te lɛmma milan ɔci maka pookɛn naŋtan ñin doki. ¹⁹ Ma waakɛnda tieŋŋin agi ɛkkɛ baljɛ noŋjɛ ba jyeka wonkɛn jyeka pwadin ne pwadan. Ɔci a ɔɔnyɛ, ‘ya yomu ñɔɔna ñɔɔn te jyek ɛkkɛ. Yeti ‘ya buaga dala ɛkkɛ ñingɔ tɛya te jyeka pwadin. Naa jyeka yeyin bala ɛkkɛti bɛɛ. ²⁰ Jwaŋa Tolan mena ma ‘wondɛ coodda pwadanyɛ, ɛkɛ Jwaŋa Yaayan bwandɛ ne cwakanti. Accayɛ, dala Ciɛggɔn ikin Yaccu Kiṭɔ yomɛ pwada pwani ɛkkɛti. ²¹ Timutawuc mena noŋin kanŋa iki ‘yayɛ, ɛkɛ gɔki agi ‘ya ɛkkɛ ñiibjɛ te ɛkɛ daŋkun, ɛkɛ gɔki agi ɛkkɛ niinjɛ boki? Ɔci Luciiyoc, ɔci Jɛcan, ɔci Cɔciipatɛr, ɛkkɛn a maka ban ɔɔn. Ɛkkɛn gɔki agi ‘ya ɛkkɛ ñiibjɛ te ɛkkɛn daŋkun agi ɛkkɛ niinjɛ boki? ²² Gena ‘ya Tɛrcyac, mena Buuluc kieŋnɛ worga neeni, ‘ya ñieb ɛkkɛ daŋkun, acaan ‘ya a men Kiṭɔ daŋkun ba ɛkkɛ ɔɔn, ɛkkɛ niinnɛ boki. ²³ Gayac mena onɛ ciya ‘ya neeniyɛ, ɛkɛ ñiepi ɛkkɛ. Gayac neeniyɛ, ɛkɛ a mena moki Ma Kiṭɔ wɛnni waakɛnda. Iraactac, mena gɔṭi bilk akuuma ban ɔɔn neenitiyɛ, ɛkɛ ñiepi ɛkkɛ. Ɔci mod ikin Kwartoc, ɛkɛ ñiepi ɛkkɛ daŋkun. [ ²⁴ Modg ɔɔn, dala ɛkkɛ magdɛ Ciɛggɔn ikin Yaccu Kiṭɔ yomgɔti waakida. Amɛɛn.] ²⁵ Dala ikin jieyin Jwaŋa Tolan. Ɛkɛ yaakinti ɛkkɛ yɔɔttɛ iñɔ ne tɛyan te jyeni ɛkkɛ. ‘Ya lor ma te Yaccu Kiṭɔ ba jyeka wonkɛn jyeka pwadin, ɔci ba jyek liɛlti naŋka awarɛ naŋka niin lieda warɛ a coggɔn te baaṭi loonan neeni. ²⁶ Acca naŋka neeni warɛ lɛɛlnɛ bora te worgan kiiwɛ maka a bɔwan Jwaŋa Tolan, ɔci te jwalla guaŋŋɛ Jwaŋa Tolan mena ciyi yuonginda neeniy. Naŋka neeni mieddɛ ma bora keedinti waakɛnda, a ɔŋŋi aŋka ma waakɛnda tieŋdi ɔci jyeddi. ²⁷ Dala Jwaŋa Tolan mena nɔɔti ne cyɛɛlɔ a ñing tɛɛn neeniyɛ, jiɛtan ma te Yaccu Kiṭɔ ne baaṭi ɔɔn. Amɛɛn.