Liɛlto

Liɛlto

¹ Liɛlta neeni gena liɛlta ‘wonnɛ Jwaŋa Tolan Yaccu Kiṭɔ aŋka lɛɛldɛ ɛkɛ bora maka moṭi ɛkɛti te gena bala bɛya ne pɛñan neeni, ɔci ɛkɛ malɛɛka cuonnɛ aŋka kɛɛngɔn ɛkɛ Yɔhanna nɔɔttɛ, ² ɔci Yɔhanna ma myennɛ te jwali Juaŋ ɔci te jwali Yaccu Kiṭɔ te waka yuarŋɛ ɛkɛ waakɛnday. ³ Yom ñɔɔn bala mena poki ɔci maka tieŋdi jyeka guaŋŋɛ mena a bɔwa Jwaŋa Tolan neeni, ɔci pwatcin ne tolan te maka noŋi ba jyeka neeniy. ⁴ Gena ‘ya Yɔhanna kiew worga neeni ɛkkɛti maka ban Ecya kaniican ne dɔɔyɔ wyetkɛn ne yyɛɛwɔtiy. Dala naŋki pwani ɔci coodi pwani bala ɛkkɛti te Jwaŋa Tolan men bala acca, ɔci te baaṭi, ɔc mena bala bɛya neeni, ɔci te boŋka ne dɔɔyɔ wyetkɛn ne yyɛɛwɔ boŋka bala yɔdi Jwaŋa Tolan ñamɛ neeni, ⁵ ɔci te Yaccu Kiṭɔ mena pwadan mena gɔki awarɛ, mena a Kacca a kɛɛgɔn neeniy. Ɔci ɛkɛ a mena jɔŋŋin ñamu te lienti, ɔci ɛkɛ a Ciɛggɔn Tolan Ciɛggɔn ḍuaŋan ḍwaŋin waakɛnda iñɔ ṭɛɛrji wɛnni. Ɛkɛ a mena ani ikin, ɔci ikin pɔŋnin ḍɔɔggɔti te nɔji ikin. ⁶ Ɔci ɛkɛ ikin naŋŋin aŋŋin ḍuaŋan ḍwaŋin. Ɔci ɛkɛ ikin naŋŋin aŋŋin ba maka gaciicin Jwaŋa Tolan Wey ɛkkɛnti aŋka ikin cɔkin ɛkɛti. Dala naŋka pwadan bala Yaccu Kiṭɔti, ɔci war tɛɛn moki ne baaṭi ɔɔn, baadi bɛɛ! Amɛɛn. ⁷ Ɛkɛ bala bɛya te pɔllo! Ɔci ɛkɛ yuartan ma waakɛnda te woŋgɛn, ɔci maka ɛkɛ dɔkki daŋkun, ɛkkɛn ɛkɛ yuartan te woŋgɛn, ɔci maka bala iñɔ ṭɛɛrji waakɛnda wiakti ne pɛñan. Dala bala a ɔɔn. Amɛɛn. ⁸ Ciɛggɔn Ikin Jwaŋa Tolan Mena Balki War Tɛɛn Waakɛnda neeni gɔki agi, “‘Ya a mena bala te ñamu, ɔci ‘ya a mena bala ne ŋoyɔ. ‘Ya a mena bala acca, ɔci te baaṭi, ɔci bala bɛyay.” ⁹ Gena ‘ya Yɔhanna mod ɛkkɛ te bolja ‘ya aga mena bootcin Yaccutiy. ‘Ya a mena ñoowɛ iki ɛkkɛ te yom tiekin ikin yomgɔ tieŋnin te taab bɛya maka a ma cyɛgji ɛkɛtiy. ‘Ya baal ḍuacka ma Kaŋ Patmac Wyeñɛti aŋan, acaan ‘ya ma myetkan te jwalla awarɛ jwalla lɛɛlnɛ Yaccu bora ‘yati neeni. ¹⁰ Ɔci ‘ya eñña Boŋ Juaŋ te Oŋ Juaŋ, ɔci ‘ya tieŋjan pwan wiaŋi ne tolan ‘ya ŋoyuti bala ba pwan ṭuoŋ gɔki agi, ¹¹ “Dala waka yuarca i waakɛnda neeniyɛ, dala ɛkkɛn kiijja jiju worgaji waakɛnda, ɔci cuña i kaniican ne dɔɔyɔ wyetkɛn ne yyɛɛwɔ neeniti. Gena kaniica ban Ɛpacac, ɔci kaniica ban Camiirna, ɔci kaniica ban Pargaamom, ɔci kaniica ban Tayataayra, ɔci kaniica ban Cardic, ɔci kaniica ban Piladɛɛlpya, ɔci kaniica ban Lɛyoduciiya.” ¹² Ɔci ‘ya waru yali aŋka gɔrca pwana gɔkkin ‘yati neeni, ɔci ne ‘ya waru yallayɛ, dyɛkan gɛɛg yuarcan ‘ya bala yɔɔd ne dɔɔyɔ wyetkɛn ne yyɛɛwɔ, ɔci dyɛkan neeni naŋi ma te dahab. ¹³ Ɛkkɛn bala yɔɔd gena bala ba men baan ɔɔn yudiyɔ, ɔci ɛkɛ ɛŋi bworŋa bɔwan bworŋa beyan ooddi ne ɛkɛ ciegɛti, ɔci ɛkɛ yomɛ ḍyɛŋŋɛ te buarñan naŋi ma te dahab. ¹⁴ Ɔci jyeyi ɛkɛ wyeñɛ bɔɔna bɔɔn bala ba ŋwoltɔn, ɔci ɛkɛ woŋgɛ bala ba maañ lɛmmɛ. ¹⁵ Ɔci ɛkɛ ciegɛ bala ba bila garan ne piɛlkiti ma maccu ɔɔn, ɔci pwan ɛkɛ bala ba pwan pyega coŋin ne yiŋki a ŋañy. ¹⁶ Ɔci ɛkɛ bala tieci kɛltan ne dɔɔyɔ wyetkɛn ne yyɛɛwɔ te byeŋa byerɔn, ɔci jwali ɛkɛ kuawin bora te ɛkɛ tukɛti bala ba byeŋgaaran beyan a ñɔɔny. Ɔci woŋgi ɛkɛ bala ba oŋ ne dɛki a dyɛŋi ne pɛñany. ¹⁷ Ɔci ne ‘ya ɛkɛ yuarnayɛ, ‘ya ḍɛmman iñɔ ɛkɛ ciegɛti bala ba ‘ya tuuna tuun doki no, ɔci ɛkɛ byeŋa byerɔn tannɛ ‘yati ɔci gɔkcin agi, “Naa buay bɛɛ! ‘Ya a mena bala te ñamu, ɔci mena bala ne ŋoyɔy. ¹⁸ ’Ya a tɛɛta! Ɔci ‘ya tuuno, yeti acca ‘ya tɛɛto, tuud oŋgati moki bɛɛ. Lien bala ‘ya bieŋuti, ɔci non lien moki bala ‘ya bieŋuti. ¹⁹ Ɔci dala waka yuarca i neeni kiijja jiju worgaji waakɛnda, gena waka bɛya ne baaṭiy. ²⁰ Ɔci kɛltan yuarca i ‘ya bieŋuti neeniyɛ, gena maka bala wɛɛyi ma kaniican ne dɔɔyɔ wyetkɛn ne yyɛɛwɔ neeniti, ɔci dyɛkan ne dɔɔyɔ wyetkɛn ne yyɛɛwɔ neeniyɛ, gena kaniican ne dɔɔyɔ wyetkɛn ne yyɛɛwɔy.

¹ “Dala i kiejja mena bala wɛɛyi ma kaniica ban Ɛpacacti agi, Gena jyeka guagdɛ mena mwoki kɛltan ne dɔɔyɔ wyetkɛn ne yyɛɛwɔ te byeŋa a byerɔn neeni, ɔci mena bala ati yeccu dyɛkan a dɔɔyɔ wyetkɛn ne yyɛɛwɔ dyɛkan naŋi ma te dahaby. ² Naŋki i ŋeej ‘ya, ɔci kanŋa i kanŋa pɛñan ɔci kɛɛna i kɛɛyi moki ŋeej ‘ya. Ɔci ŋeej ‘ya i buagi maka yeyin bɛɛ, ɔci i gɔrni naŋki maka gɔki agi ɛkkɛn aginti cuudan Yaccuy, yeti ɛkkɛn a cuudan Yaccu bɛɛ. Ɛkkɛn yuarŋi i ɛkkɛn jomi jiek a jomi budan. ³ I baal kɛɛy ne pwadan, ɔci i taabni ne pɛñan te yenti ‘ya, ɔci i kanŋa dalni bɛɛ. ⁴ Yeti ‘ya balka genga aŋka gɔkka iti, i ani i anna ñamu dalni i. ⁵ Ɔci dala i poŋja i ḍɛmni aŋɛ, ɔci dala i waru yala, ɔci noŋja ba naŋki i naŋka te baaṭiy. Kan i waru yala bɛɛyɛ, ‘ya baal bɛɛd ɔci dyɛka i eed ɔntɔ te noonɛti. ⁶ Yeti naŋka neeni aŋka bala iti, i yooki te naŋki maka bartan ma a ma ‘Nikɔla’ naŋka yookati ‘ya daŋkuny. ⁷ Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicanti agi, ‘Mena naŋka yeyin bwandɛyɛ, ɛkɛ ‘woñga ‘ya omdi jana tɛɛtki ma Bal Jwaŋa Tolanti.’ ⁸ “Dala i kiejja mena bala wɛɛyi ma kaniica ban Camiirnati agi, Gena jyeka guagdɛ mena bala te ñamu ɔci mena bala ne ŋoyɔy. Ɛkɛ a mena tuuny, yeti ɛkɛ jɔŋŋin ñaalɔ bala tɛɛti acca. ⁹ Taab i ŋeej ‘ya, ɔci bɔɔna i bɔwi te waak moki ŋeej ‘ya, yeti i a mena cyɛgan te wak Jwaŋa Tolan! Ɔci ŋɛɛgga ḍorki ma yeyin neeniyɛ, ŋeej ‘ya moki, gena maka gɔki agi ɛkkɛn aginti Ma Yahuud, yeti ɛkkɛn a Ma Yahuud bɛɛ! Ɛkkɛn a ma Jwaŋa Yaayan! ¹⁰ Naa i buay naŋka bɛya iti pɛñan neeni bɛɛ! Yeti ɛkkɛ magga oldɛ Jwaŋa Yaayan jiju ciginji aŋka ɛkɛ poci ɛkkɛ, ɔci ɛkkɛ taabdɛ ba nink ne inyaakkɛn ɔɔn. Dala i yomu pwada ne i tuudi ɔɔn, ɔci ‘ya i ‘wondin tɛɛtin baadi bɛɛy. ¹¹ Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicanti agi, ‘Kan mena naŋka yeyin neeni bwandɛ waakɛndayɛ, jyeka bɛya ma wyetkɛnti ne ŋoyɔ neeniyɛ, bɛya ɛkɛ wyeñɛti moki bɛɛ.’ ¹² “Dala i kiejja mena bala wɛɛyi ma kaniica ban Pargaamomti agi, Gena jyeka guagdɛ mena jwali ɛkɛ bala ba byeŋgaaran beyan byeŋgaaran lɛkɛ a ñɔdgy. ¹³ Nona ciyi i ŋeej ‘ya, non cyɛgji Jwaŋa Yaayan bala nona wannatiy, yeti i baal tiec yenti ‘ya awarɛ, ɔci jyenna jyetti i ‘yati ɛkɛ dalni i bɛɛ. Antipac mena pwadan neeni nogɛ ma nona ciyi Jwaŋa Yaayan bana ciyi wanna. ¹⁴ Yeti ‘ya balka genga aŋka gɔkka iti, acaan ma gɛɛg bala ɛkkɛti noŋi naŋki Balaam naŋka loṭi ɛkɛ Baalak aŋka Baalak noŋdɔ ne yaayan ma Icrayiilti aŋka ma Icrayiil noŋdɔ nɔjiy. Ɔci moki aŋka ɛkki omdɔ waka ‘yɛrtan ma boŋka yeyinti, ɔci noŋdi tommo. ¹⁵ Ɔci i balki maka bootcin naŋki ma Nikɔla maka yookati ‘yay. ¹⁶ Yeti dala i waru yala, ɔci kan i waru yalli ne pɛñan bɛɛyɛ, ‘ya baal bɛɛd ne cwakanti aŋka noowin i ɛkkɛn te jwali ‘ya jwalla bala ba byeŋgaaran neeni. ¹⁷ Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicanti agi, ‘Kan mena naŋka yeyin bwandɛ waakɛndayɛ, ɛkɛ ‘woñga ‘ya ama ñaalɔ pɔliji ama yuartan ma bɛɛy, ɔci ɛkɛ ‘woñga ‘ya guonan ṭɔɔlɛ bɔwan, ɔci guonan neeni balki yenti warɛti, ɔci yenta neeni menga yaakinti poki bɛɛ, gena mena eci ɛkɛ aŋka yaakinti paŋi ɛkɛ parɛ.’ ¹⁸ “Dala i kiejja mena bala wɛɛyi ma kaniica ban Tayataayrati agi, Gena jyeka guagdɛ Kaci Jwaŋa Tolan mena woŋgi ɛkɛ bala ba maañ ne omi a ami, ɔci cieg ɛkɛ bala ba bila garan ne piɛlkiti ma maccuy. ¹⁹ Naŋki i ŋeej ‘ya, ɔci ŋeej ‘ya moki ne i balkiti ani ɔci jyeni ɔci naŋka pwadin, ɔci ne i baali kɛɛy moki ɔɔn. Ɔci ŋeej ‘ya naŋki i naŋka ñamu buannɛ naŋka ŋoyɔ. ²⁰ Yeti ‘ya balka genga aŋka gɔkka iti, i Jɛcabɛl ɛŋa gɔki agi ɛkɛ agjɛ bɔwa neeni ‘wonni wɔɔka ɔci ɛkɛ maka moṭi ‘yati naŋŋiyɔ, ɔci ɛkɛ ɛkkɛn lallɛ agi dala ɛkki noŋdɔ tomi, ɔci omdɔ waka ‘yɛrdi ma jɔkin yeyinti. ²¹ Ɔci ɛkɛ ‘woñgan ‘ya wɔɔka ka aŋka ɛkɛ warɛ yaldɛ, yeti ɛkɛ yookɔn buagɔn warɛ yaldɛ tomi ɛkɛ neeni daldɛ bɛɛ. ²² Ɔci a ɔŋŋiyɛ, ɛkɛ yiɛpca ‘ya iñɔ, ɔci ‘woñga waka pɛñin warɛti, ɔci maka noŋi tomi neeniyɛ, ɛkkɛn yiɛpca nona yaayan nona pɛñanti neeni, kan ɛkkɛn waakɛn yaltan te naŋki ɛkkɛn naŋka yaayan neeni bɛɛy. ²³ Ɔci ‘ya kɛɛgin ɛkɛ nogdi aŋka ŋeettan kaniican waakɛnda ‘ya a mena waak waakɛnda yuartɛ, ɔci yomg ma moki yuarca ‘ya, ɔci ɛkkɛ waakida ‘wondin ‘ya waak menga da ba naŋki ɛkɛ. ²⁴ Yeti ‘ya gɔkka ɛkkɛti ɔci maka pookɛn maka bala ban Tayataayra, maka balki jyeka neeni bɛɛy, ɔci maka Jwaŋa Yaayan ŋeecɔn bɛɛy. Ɛkkɛ urnɛti waka bartan ɛkkɛn agi wak Jwaŋa Yaayan waka kuolinwi ma neeni bɛɛ. ‘Ya waka cyɛgan gɛɛg olja ɛkkɛ ḍɔɔggɔti moki bɛɛ. ²⁵ Yeti dala gena bala ɛkkɛti neeni tiidɛyɔ ɛkkɛ ne ‘ya bɛɛda ɔɔn. ²⁶ Ɔci mena naŋka yeyin bwandɛ, ɔci naŋki ‘ya tiidɛyɔ ne baaṭi ɔɔnyɛ, ‘ya da ɛkɛ ‘woñga wɛɛn warda bieŋɛti. ²⁷ Ɔci ɛkɛ ɛkkɛn bwandɛ, ɔci ɛkɛ ɛkkɛn lɛgdɛ jitin bala ba waka eetan ma te lomi ne ɛkkɛn wɛttiti ma jitiny. A ɔɔn bala ba war tɛɛn muŋi ‘ya te Wey ɔɔntiy. ²⁸ Ɔci ɛkɛ ‘woñga ‘ya war ‘ya, wara bala ba kɛɛlla bɛya te liidɔy. ²⁹ Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicantiy.

¹ “Dala i kiejja mena bala wɛɛyi ma kaniica ban Cardicti agi, Gena jyeka guagdɛ mena balki boŋki Jwaŋa Tolan boŋka ne dɔɔyɔ wyetkɛn ne yyɛɛwɔ, ɔci kɛltan ne dɔɔyɔ wyetkɛn ne yyɛɛwɔ neeniy. Naŋki i ŋeej ‘ya. I tɛɛt te yenti budan, yeti i ag tuuta. ² A ɔŋŋiyɛ, dala i ṭiewwa, ɔci dala i waka bala iti tɛɛti neeni yɔɔtca iñɔ ne tɛyan wona lien bɛɛni ɛkkɛnti men bɛɛy. Ɔci moki ‘ya naŋka awarɛ gɛɛl yuarŋ ‘ya iti Juaŋ ñamɛti bɛɛ. ³ Ɔci dala i poŋja te gena lalli iy, ɔci ɛkɛ muŋŋi i a ɔki, ɔci dala ɛkɛ naŋa i, ɔci dala i waru yala nɔji dalja. Kan i winniyɛ, ‘ya baal bɛɛd ba mena ɛɛno, oŋ waŋa bɛɛda ‘ya ne pɛñan neeni ŋeej i bɛɛ. ⁴ Yeti ma gɛɛg bala iti ban Cardic aŋan, ɛkkɛn yomgɛn cuuliyɔ bɛɛ. Ɔci ne oŋgati ɛkkɛn ooddin iki ‘ya te yoma bɔwan te yɔmjin ɛkkɛn yɔmki neeni. ⁵ Maka naŋka yeyin bwantanyɛ, ɛkkɛn ɛɛŋdi bworŋin bɔwan, ɔci ‘ya yeng ɛkkɛn nuutca bora te worga kiewi Juaŋ yeng maka ‘wondɛ ɛkɛ tɛɛtinti neeni bɛɛ. Yeti ‘ya gɔkca Wey ɔɔnti ɔci malɛɛkan ɛkɛti te maka neeni, ka maka neeni ɛkkɛn a ma ‘ya. ⁶ Kan mena balki jyetkɛyɛ, dala ɛkɛ tieŋdi jyeka guagdɛ Boŋ Jwaŋa Tolan ma kaniicantiy! ⁷ “Dala i kiejja mena bala wɛɛyi ma kaniica ban Piladɛɛlpyati agi, Gena jyeka guagdɛ mena pwadan ɔci mena awarɛy. Ɛkɛ a mena mwoki waka bɛɛn te Daawudtiy. Ɛkɛ a mena balkɛ war tɛɛn aŋka ma kaattɛ Ban Juaŋ ñaalɔ pɔliji, walla ma kaaktɛti aŋka naa ɛkkɛn kaatti ban Juaŋ bɛɛy. ⁸ Naŋka naŋa i wanna ŋeej ‘ya. ‘Ya pɔy tukɛ pɔkkan te kanŋa iti kanŋa neeni menga yaakinti ɛkɛ uuldɛti bɛɛ. War koñi i ŋeej ‘ya, yeti i jwali ‘ya tiiññiyɔ, ɔci yenti ‘ya yiɛmni i ɔntɔ bɛɛ. ⁹ Ɔci ne oŋgati ma Jwaŋa Yaayan maka gɔki agi ɛkkɛn aginti Ma Yahuud, ɔci ɛkkɛn jomi jiek neeniyɛ, ‘ya ɛkkɛn naŋdi bɛya, ɔci ḍwondi iñɔ i ñamuti, ɔci ŋeettan ɛkkɛn ‘ya an i awarɛ. ¹⁰ Ɔci acaan i baal kɛɛy ba jwalla guaŋi ‘ya itiyɛ, ‘ya i tiidinyɔ ne oŋŋa naŋka yaayan bɛɛdi iñɔ maka bala ciyi ṭɛra neeni wyeñɛtiy. ¹¹ ’Ya baal bɛɛd ne cwakanti doki, ɔci dala gena bala iti neeni tiyayɔ aŋka naa waka ‘ya buaga ‘wondin i pwadin neeni luldi menga bɛɛ. ¹² Mena naŋka yeyin bwandɛyɛ, ɛkɛ naŋdi ‘ya tɛya a tɛɛn non Juaŋ ɔci ɛkɛ koodi bora te ɛkɛti bɛɛ. Ɔci ‘ya yenti Jwaŋ ‘ya kiija ɛkɛti, ɔci yenti ban Jwaŋ ‘ya moki kiija ɛkɛti. Gen ban Urcaliim woonɛ bana bɛɛn te ñaalɔ Juaŋtiy. Ɔci ‘ya moki yenti ‘ya kiija ɛkɛti. ¹³ Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicantiy! ¹⁴ “Ɔci dala i kiejja mena bala wɛɛyi ma kaniica ban Lɛyoduciiyati agi, Gena jyeka guagdɛ mena pwadan neeni, ɛkɛ a mena waak cɔnnɛ Juaŋ waakɛnda te ɛkɛy. ¹⁵ Naŋki i ŋeej ‘ya, ɔci moki ŋeej ‘ya i luy bɛɛ ɔci i myɛl bɛɛ. Ɔci dala te i luuni walla te myɛlli. ¹⁶ Ɔci a ɔŋŋiyɛ, ‘ya i ŋuuldin ɔntɔ te ‘ya tukuti te poli i neeni. Dala te i myɛlli walla luuni. ¹⁷ I gɔk waruti agi, ‘‘Ya cyɛgo, ‘ya buaga genga moki bɛɛ.’ Yeti war i ŋeej ne i agi mena baaki waak bɛɛ, ɔci moki ŋeej i ne i agi ulli ɔci baakiti waka ‘yɛŋa i bɛɛy. ¹⁸ ’Ya gɔkka iti, dala i toocca ‘yati te waka ñaalɔ pɔliji aŋka i agdi mena cyɛgan awarɛ. Ɔci i ɛɛŋja bworŋin bɔwan aŋka lɔn i kwomgayɔ, ɔci dala toocca ‘yati te dowa juoki ma woŋgɛn aŋka i woŋgɔ jwoya te ɛkɛ aŋka i ñorca noon ne pwadan. ¹⁹ ’Ya gɔkca ne pɛñan mena ana ‘yati, ɔci ɛkɛ ṭeed ‘ya, ɔci dala i byerdi ɔci waru yala nɔji i dalja. ²⁰ Gɔṭṭɛ, ‘ya baal yɔɔd on tukɛti ɔci booro, ɔci kan menga tieŋŋin pwan ‘ya ɔci on tukɛ pɔŋŋɛyɛ, ‘ya kaacca orɔ ɛkɛti, ɔci ɔɔn omdɔn yaakkɔ, ɔci ɛkɛ da omdin i ‘ya. ²¹ Mena naŋka yeyin bwandɛyɛ, ɛkɛ ‘woñga ‘ya noon cootti ‘ya taaŋuti aŋka ɛkɛ noŋin iki ‘ya kanŋa cyɛgji Juaŋo, ba ‘ya ne naŋka neeni buannayɛ, ‘ya cooccan Wey ɔɔn taaŋɛti. ²² Kan mena balki jyetkɛyɛ, dala ɛkɛ tieŋdi jyeka guagdɛ Boŋ Jwaŋa Tolan ma kaniicantiy!”

¹ Ɔci ‘ya gɔrcan ‘yeŋi tukɛ warɛ pɔŋŋɛ ñaalɔ pɔliji, ɔci ‘ya tieŋŋan pwan gɔkkin ‘yati bala ba pwan ṭuoŋ gɔki agi, “Bɛɛd wɛnni aŋka i nɔttin gena bɛya ne ŋoyɔ neeni.” ² Ɔci ne pɛñan ‘ya eñña Boŋ Juaŋ, ɔci kaakci gɛɛl bala ñaalɔ pɔliji, ɔci men gɛɛl bala ciyi kaakca neeni wyeñɛti. ³ Ɔci mena ciyi kaakciti neeniyɛ, ɛkɛ dɛki galdan ne tidan bala ba liŋñan a ḍɔŋi warɛ a cyenga tidan, ɔci cyenga ṭeyan. Ɔci Jwaŋa yɔɔd ñaalɔ pɔliji neeni bala yɔɔd dɛki ne ṭeyan ɛkɛ warɛti. ⁴ Ɔci kaakca neeni warɛti kokin pookɛn bala ɛkɛ yuugɛ ñin a men baan wyetkɛn ne ŋaanɔ (24), ɔci kokin neeni wyetkɛnti maka cyekin bala ciyi a men baan wyetkɛn ne ŋaanɔ (24) ɛŋi bworŋin bɔwan, ɔci ɛkkɛn ɛŋi taaggan cyɛgji naŋi ma te dahab wyetkɛnti. ⁵ Ɔci kaakca neeni wildan, ɔci pwan bala wiak te ɛkɛti ne pɛñan, ɔci dyɛkan ne dɔɔyɔ wyetkɛn ne yyɛɛwɔ bala yɔɔd dɛki a dyɛŋi ɛkɛ ñamɛti. Ɔci dyɛkan neeni gena boŋki Jwaŋa Tolan boŋka ne dɔɔyɔ wyetkɛn ne yyɛɛwɔy. ⁶ Ɔci puol bala yɔɔd kaakci ñamɛti wyeñɛ poorŋɛ a porti bala ba kajaaja. Ɔci nona kaakciti wannayɛ, waka tɛɛti gɛɛg bala yɔɔd ne ŋaanɔ kaakci yudiyɔ, ɔci ɛkkɛn woŋgɛn kɔɔna kɔɔnno, woŋga pookɛn ŋoyɔ. ⁷ Ɔci gena ñamu bala ba loono, ɔci ɛka akki yyɛɛwɔ bala ba yaan ṭɔɔlɛ, ɔci ɛka akki ḍoogɔ bala ba men baano, ɔci ɛka akki ŋaanɔ bala ba yan goow tolan peyi ñaalɔy. ⁸ Ɔci waka tɛɛti ne ŋaanɔ neeniyɛ, ɛkkɛn yaakinti peyi noon warda, ɔci ɛkkɛn yaakinti noon yuartan warda, ɔci ɛkkɛn bala jieyi Juaŋ woodi bɛɛ, ween jiñɛ ɔci oŋ konɛ. Ɛkkɛn gɔki agi, “Pwatcin, pwatcin, pwatcin Ciɛggɔn ɔci Jwaŋa yaakinti Naŋki Waak Waakɛnday, ɛkɛ bala te baaṭi, ɔci acca, ɔci ɛkɛ bɛya moki.” ⁹ Ɔci waka tɛɛti ne ŋaanɔ neeni, ne balki jieki mena ciyi te kaakci, mena balki tɛɛtin baadi bɛɛ neeni ne pwadanyɛ, ¹⁰ cyekin a men baan wyetkɛn ne ŋaanɔ (24) neeni, ḍɛɛmdin ñingɛn kuomjɛ iñɔ mena ciyi te kaakci ñamɛti, ɔci morcin mena ciyi tɛɛti yuongindatiy. Ɔci ɛkkɛn taaggan cyɛgji ɛkkɛn guoddɛ bora. Ɔci yiɛpcɛ iñɔ kaakci ñamɛti, ɔci ɛkkɛn gɔki agi, ¹¹ “Hay, Ciɛggɔn ɔɔn ɔci Jwaŋ ɔɔn. I yɔmni aŋka dala pwani, ɔci jied, ɔci war tɛɛn bala iti. Gena i cɔtti waak waakɛnday, ɔci ɛkkɛn bala ba naŋka naŋŋi i ba yom iy.”

¹ Ɔci ‘ya worga yuarcan bala tiidɛ mena ciyi te kaakci neeni bieŋɛti byeŋa a byerɔn. Ɔci worga neeni kiikan bala konɛti ɔci ŋoyɛti, ɔci ɛkɛ balkɛ jitkɛ ne dɔɔyɔ wyetkɛn ne yyɛɛwɔ, ɔci jiña ne cyɛɛlɔ da marciti ma te waka moorki ma waaky. ² Ɔci malɛɛka warɛ tɛyan gɛɛl yuarcan ‘ya, ɔci ɛkɛ bala boor te pwana tolan agi, “A menɛ yaakinti waka marci ma ɛkɛti neeni puattɛ ɔntɔ ɔci worga neeni pɔgdɛy?” ³ Ɔci menga ne cyɛɛlɔ yaakinti waka bala marci ma worgati neeni pɔɔnnɛ bora bɛɛ, worga neeni pɔŋŋɛ menga bɛɛ. Gena maka bala ñaalɔ pɔliji, ɔci maka bala iñɔ ṭɛɛrji, ɛkkɛn gɛɛl yaaŋnɛti naŋka neeni naŋŋɛ aŋka ɛkɛ gɔrti waka bala jiju neeni bɛɛ. ⁴ Ɔci ‘ya baal wiak ne tolan acaan menga bala yaakinti worga neeni pɔgdɛ aŋka jyeka bala jiju neeni pagdɛ, ɔci walla gɔrti worgati bɛɛ. ⁵ Ɔci mena ciɛggɔn gɛɛl gɔkkin ‘yati agi, “Naa wiak bɛɛ, acaan Yaccu Kiṭɔ mena bartan ma a jiɛl bɛɛn te kɛɛn Yahuujati ɔci ma Daawudti neeniyɛ, ɛkɛ yaakinti waka marci ma worgati ne dɔɔyɔ wyetkɛn ne yyɛɛwɔ neeniyɛ, pɔɔktɛ ɔntɔ waakɛnda ɔci worga neeni pɔgdɛ.” ⁶ Ɔci Kalŋ yuarcan ‘ya bala yɔɔd yiika cyekin i waka tɛɛti ne ŋaanɔ neeni, ɔci ɛkɛ bala ba ŋaarkiti ma a ŋarti ɔɔn. Ɔci Kalŋa neeni balki woŋgɛ ne dɔɔyɔ wyetkɛn ne yyɛɛwɔ, ɔci ṭwoŋkɛ ne dɔɔyɔ wyetkɛn ne yyɛɛwɔ. Ɛkɛ noon yuartɛ warda awarɛ, ɔci ɛkɛ warɛ tɛɛcin awarɛ. Ɔci waka neeni gena boŋki Jwaŋa Tolan boŋka cuonnɛ ɛkɛ iñɔ ṭɛɛr konɛ warday. ⁷ Ɔci Kalŋa neeni bɛɛn ɔci worga luullɛ te Mena ciyi te kaakci neeni bieŋɛti byeŋa a byerɔn. ⁸ Ɔci ne ɛkɛ worga luullɛyɛ, waka tɛɛti ne ŋaanɔ, ɔci cyekin a men baan wyetkɛn ne ŋaanɔ (24) neeni ḍɛɛmdin ñingɛn kuomjɛ iñɔ Kalŋa neeni ñamɛti. Ɔci ɛkkɛn waakɛnda balki coŋkɔn byeŋkɛnti, ɔci paltan ṭɔlgɛn naŋi ma te dahab, ɔci waka neeni kuomgɛ ɛkkɛn te ḍɔŋi poomo. Ɔci ḍɔka ṭultan ma neeni gena cɔŋi maka jyeti Juaŋtiy. ⁹ Ɔci ɛkkɛn bala ‘uali ɔɔlla woonɛ gɔki agi, “Te lyen iyɛ, ma waakɛnda keedin jitkɛn waakɛnda magga da te tuk ɛkkɛn ɔci ma da te ban ɛkkɛn wanni i te yimg i neeni. A ɔŋŋiyɛ, i yɔmni aŋka worga lula ɔci pɔga. ¹⁰ Ɔci ɛkkɛn naŋŋi i aŋi ḍuaŋan ɔci gaciicin Juaŋti ɔci ɛkkɛn aga ḍuaŋan ṭɛra neeni ne cwakanti.” ¹¹ Ɔci ‘ya gɔrcan, ɔci ‘ya tieŋŋan pwan malɛɛkan a alpn coŋgin a coŋgin. Ɛkkɛn bala yɔdi kaakci yuugiyɔ i waka tɛɛti ne ŋaanɔ ɔci cyekin. ¹² Ɔci ɛkkɛn bala ‘uali te pwana tolan agi, “Kalŋa ŋaarɛ ma neeni ɛkɛ yɔmjin aŋka dala war tɛɛn bala ɛkɛti, ɔci dala ɛkɛ aga mena cyɛgan, ɔci dala ñing tɛɛn bala ɛkɛti, ɔci dala ɛkɛ tɛya a tɛɛn, ɔci dala ma jieyi ɛkɛ!” ¹³ Ɔci ‘ya tieŋŋan waka cɔnnɛ Juaŋ ñaalɔ pɔliji ɔci iñɔ ṭɛɛrjiy, ɔci waka bala toolji baan konɛ warda ‘uali agi, “Mena ciyi te kaakci neeni, naŋka pwadan bala ɛkɛti ɔci Kalŋti, ɔci war tɛɛn moki yuonginda baadi bɛɛ.” ¹⁴ Ɔci waka tɛɛti ne ŋaanɔ gɔkcin agi, “Amɛɛn!” Ɔci cyekin ḍɛɛmdin ñingɛn kuomjɛ iñɔ morcin ɛkɛti.

¹ Ɔci ‘ya gɔrcan Kalŋ waka marci ma worgati ne dɔɔyɔ wyetkɛn ne yyɛɛwɔ neeni gɛɛl pɔɔnnɛ bora, ɔci ‘ya tieŋŋan waka tɛɛti ne ŋaanɔ neeni gɛɛl gɔkcin, ɔci pwan ɛkɛ bala ba ñaal ne wiagi a joony. Ɛkɛ gɔkcin mena taab muntanti neeni agi, “Bɛɛdi!” ² Ɔci ‘ya gɔrcan ɔci muntan bɔwan gɛɛl bɛɛni, ɔci mena taab ɛkɛti eci kay bieŋɛti, ɔci ɛŋi taagga bɔnnin, ɔci kaaccin bora aŋka ma bwandɛ. ³ Ɔci ne gena akki yyɛɛwɔ pɔɔnnɛ bora Kalŋyɛ, ‘ya tieŋŋan gena tɛɛti akki yyɛɛwɔ gɔki agi, “Bɛɛdi!” ⁴ Ɔci muntan tidan bɛɛn bora, ɔci mena taab ɛkɛti balki war tɛɛn aŋka naŋka pwadin eedɛ ɛkɛ te ṭɛɛr wyeñɛti, ɔci ma noogdi ɔci tuwa, ɔci ɛkɛ ‘woñgi ma byeŋgaaran beyan byeŋgaaran tolan. ⁵ Ɔci ne gena akki ḍoogɔ ne pɔŋŋɛ Kalŋyɛ, ‘ya tieŋŋan gena tɛɛti akki makɛn ne ḍoogɔ gɔki agi, “Bɛɛdi!” Ɔci ‘ya gɔrcan, ɔci muntan ulan bɛɛni, ɔci mena taab ɛkɛti neeni eci cyerñi bieŋɛti (Gena kɛɛrki ma waak aŋka waak ninti a tyɛlgay.) ⁶ Ɔci ‘ya tieŋŋan pwan te yeccu waka tɛɛti ne ŋaanɔ neeniti gɔki agi, “Cigga pok tuka ne cyɛɛlɔ eci bilk kanŋa oŋ kona ne cyɛɛlɔ waakɛnda, ɔci cigga pokkin tuggɛ ne ḍoogɔ eci bilk kanŋa oŋ kona ne cyɛɛlɔ waakɛnda. Yeti ñɔɔn ɔci mooy naa ɛkkɛn naŋa a ɔŋka bɛɛ.” ⁷ Ɔci ne gena akki ŋaanɔ ne pɔɔnnɛ Kalŋ borayɛ, ‘ya tieŋŋan gena tɛɛti akki makɛn ne ŋaanɔ gɔki agi, “Bɛɛdi!” ⁸ Ɔci ne ‘ya gɔrnayɛ, muntan ṭeyan yuarcan ‘ya, ɔci mena taab ɛkɛti neeni yenti Lieno, ɔci Non Lien bala booti ɛkɛ, ɔci ɛkkɛn ‘woñgi ma war tɛɛn aŋka ɛkkɛn ṭɛɛr taaŋɛ gɛɛl noktan te byeŋgaaran ɔci ṭwaŋ, ɔci koñ, ɔci waja, ɔci wak luom waka bala iñɔ ṭɛɛrji wɛnniy. ⁹ Ɔci ne gena akki dɔɔyɔ ne pɔɔnnɛ Kalŋ borayɛ, ‘ya gɔrcan ɔci gena ɛrki ma waak pwanɛtiyɛ, boŋki maka tuutan gɛɛg bala nini, gena maka ŋaarɛ ma te bolja ɛkkɛn jyetki jwali Jwaŋa Tolanti, ɔci te jyeka lorki ɛkkɛn may. ¹⁰ Ɔci ɛkkɛn yaajjin te pwana tolan agi, “Ne tuwa, hay, Ciɛggɔn, Ciɛggɔn pwadan awarɛ ɔci balki war tɛɛny! I jiek olja maka bala ciyi iñɔ ṭɛɛrji wɛnni wyetkɛnti ɔci noŋja ne yaayan ɛkkɛnti aŋka yimg ɔɔn dɔwwa i bora bɛɛ?” ¹¹ Ɔci ɛkkɛn waakɛnda ‘wonnɛ Ciɛggɔn bworŋin bɔwan, ɔci ɛkɛ gɔkcin ɛkkɛnti agi ɛkki woodɔ ne ḍiɛran ne modg ɛkkɛn Ma Kiṭɔ makɛn noktiti ma ba ɛkkɛn ɔɔn. ¹² Ɔci ‘ya gɔrcan Kalŋ gena akki dɔɔyɔ wilin ne cyɛɛlɔ pɔŋnɛ bora, ɔci noon warɛ Jiɛññɛ ne tolan, ɔci oŋ waŋɛ uli bala ba bworŋa ulan, ɔci paan tinna tini ba yimgo. ¹³ Ɔci kɛltan bala ñaalɔ ḍɛɛmdin iñɔ ṭɛɛrji bala ba ŋuami ṭɔlgɛ ne Jiɛññɛyɔ jwamma tolan ɔɔn. ¹⁴ Ɔci pɔli tukɛ pɔŋnɛ bala ba gaan ne wiñkiti ma ne beyany, ɔci pomk ɔci kaki wyetkɛn waakɛnda waakɛn uutci ɔntɔ te nonkɛnti. ¹⁵ Ɔci ḍuaŋan ṭɛɛrji wɛnni, ɔci maka ḍwaŋin ɔci maka ñingɛn tɛyan, ɔci maka cyɛgan ɔci ‘uay ṭwaŋ ɔci maka kɛɛnk ɔci maka a kɛɛnk bɛɛyɛ, ɛkkɛn waakɛnda yooŋdi kɔki jitin, ɔci waakɛn yiiktan pomk jitin. ¹⁶ Ɔci ɛkkɛn gɔkti pomkti agi, “Dala ɛkkɛ ḍɛɛmdɛ ɔɔn wyetkɔti aŋka ɔɔn kwomdintiyɔ te woŋgi mena ciyi te kaakci neeni, ɔci te loñk Kalŋo! ¹⁷ Oŋ loñk ɛkɛ oŋŋa tolan bɛɛn doki, ɔci a menɛ yaakinti yɔɔtti iñɔy?”

¹ Ɔci ne naŋka neeni baaniyɛ, malɛɛkan ne ŋaanɔ bala yɔɔd ṭɛɛr toŋka ne ŋaanɔ neeniti, ɔci ɛkkɛn jwamtan bala ṭɛɛrji ne ŋaanɔ neeni muogɛyɔ aŋka naa ɛkkɛn yiŋi ṭɛɛrji moki bɛɛ, kan bora, walla galŋji, walla jang jitin moki bɛɛ. ² Ɔci ‘ya gɔrcan malɛɛka gɛɛl bala bɛya te pɔya tyɛrñanti aŋan eci mañ Jwaŋa Tolan mena tɛɛti neeni bieŋɛti. Ɔci ɛkɛ gɔkcin malɛɛkan ne ŋaanɔ malɛɛkan ‘wonnɛ Juaŋ war tɛɛnti aŋka noŋdi ne yaayan nona iwanti, ɔci galŋji, ɔci jangti neeni te pwana tolan. ³ Ɔci ɛkɛ gɔkcin ɛkkɛnti agi, “Naa ɛkkɛ noŋdɛ ne yaayan nona iwanti, ɔci toolji, ɔci jangti meni bɛɛ, yɔɔddɛ lakun ɔɔn maka moṭi Jwaŋa Tolanti noŋdɔn maañ ñomgɛnti lakun waakɛnda.” ⁴ Ɔci ‘ya tieŋŋan maka naŋi ma te mañ Jwaŋa Tolan ñomgɛnti kɔɔna kɔɔnno. Ɛkkɛn a alpn a miyya ne cyɛɛlɔ ɔci alpn a ma baan ne yyɛɛwɔ wyetkɛn ne ŋaanɔ (144,000), gena keedin ma Icrayiil waakɛnda, kɛɛna ne cyɛɛlɔ balki ma a alpn ne inyaakkɛn wyetkɛn ne yyɛɛwɔ (12,000). Ɔci keedin neeni jitk ɛkkɛn bala a ɔŋŋi, Kɛɛn Yahuuja, Kɛɛn Ḍubɛn, Kɛɛn Gaad, Kɛɛn Acar, Kɛɛn Naptali, Kɛɛn Manaaca, Kɛɛn Cimyan, Kɛɛn Laawi, Kɛɛn Icikar, Kɛɛn Jɛbuluun, Kɛɛn Yuocip, Kɛɛn Benjamin. ⁹ Ɔci ‘ya gɔrcan, ɔci poli ma polla tolan yuarcan ‘ya, ɔci maka neeni menga yaakinti ɛkkɛn pagdɛ bɛɛ. Keedin pookɛn, ɔci bonk waakɛnda, ɔci maka coŋin magga da te tuk ɛkkɛn, ɔci ɛkkɛn bala yɔɔd kaakci Ciɛggɔn Tolan ñamɛti, malɛɛkan coŋin neeni ŋotkɛnti, ɔci Kalŋ ñamɛti daŋkun. Ɛkkɛn ɛŋi bworŋin bɔwan ɔci eci tuum jyetkɛ byeŋkɛnti. ¹⁰ Ɔci ɛkkɛn bala yaadan te pwana tolan agi, “Yɔɔt bala Jwaŋ ikin Jwaŋa ciyi te kaakci neenitiy, ɔci bala Kalŋti daŋkun!” ¹¹ Ɔci malɛɛkan bala yɔɔd kaakci yudiyɔ, ɔci cyekin, ɔci waka tɛɛti ne ŋaanɔ neeni yudiyɔ. Ɔci ɛkkɛn ḍɛɛmdin ñingɛn kuomjɛ iñɔ ɔci morcin Juaŋti. ¹² Ɔci gɔki agi, “Amɛɛn! Dala bala a ɔɔn. Dala jied, ɔci pwani, ɔci ñing tɛɛn bala ɛkɛti, ɔci dala ma gɔkti a pwatcin ɛkɛti, ɔci dala ma noŋdi ne pwadan ɛkɛti, ɔci dala war tɛɛn bala Jwaŋ ikinti oŋkanda ɔɔn. Amɛɛn!” ¹³ Ɔci maka cyekin neeni gɛɛl tooccin ‘yati agi, “A makɛ ɛŋi bworŋin bɔwan wannay? Ɔci ɛkkɛn bɛɛn te aŋɛ?” ¹⁴ Ɔci ‘ya ṭwokcan ɛkɛti agi, “Çeej ‘ya bɛɛ. Çeej i, Ciɛggɔn.” Ɔci ɛkɛ gɔkkin ‘yati agi, “Maka neeniyɛ, gena maka uni te taab tolantiy, bworŋin ɛkkɛn tuogɛ te yimg Kalŋo, ɔci ɛkkɛn bɔɔna bɔɔno. ¹⁵ A ɔŋŋiyɛ, ɛkkɛn bala kaakci Juaŋ ñamɛti orɔ on Juaŋ ñaalɔ moṭi ɛkɛti te oŋ konɛ, ɔci te ween konɛ. Ɔci mena ciyi te kaakci neeni ɛkkɛn kɛɛdiyɔ. ¹⁶ Ɔci ɛkkɛn amdɛ koñ bɛɛ, ɔci ɛkkɛn amdɛ yiɛn bɛɛ, ɔci oŋ ɛkkɛn amdɛ bɛɛ, walla nona myɛlan gɛɛl bɛɛ. ¹⁷ Acaan Kalŋa bala yeccu kaakciti neeniyɛ, a ḍɛɛnin ɛkkɛn, ɔci ɛkɛ ɛkkɛn wɛɛdɛ nona balki pyega tɛɛtki ma, ɔci Juaŋ ɛkkɛn puudɛ ñingɛnti te pieg waakɛnda.”

¹ Ɔci ne waka marci ma worgati ne ɛka akki dɔɔyɔ wyetkɛn ne yyɛɛwɔ ne pɔɔnnɛ bora Kalŋyɛ, waka bala pɔliji coon lieda waakɛnda, genga warɛ jaŋŋɛ ne cyɛɛlɔ bɛɛ, bala ba oŋ ḍulnɛ ɔɔn. ² Ɔci ‘ya gɔrcan, ɔci malɛɛkan ne dɔɔyɔ wyetkɛn ne yyɛɛwɔ neeni yuarcan ‘ya bala yɔɔd Juaŋ ñamɛti, ɔci ɛkkɛn ‘wonnɛ ɛkɛ ṭwoŋki byeŋkɛnti waakɛnda. ³ Ɔci malɛɛka gɛɛl yuarcan ‘ya moki, ɔci ɛkɛ eci gena ṭuorki ma maañ bieŋɛti, gena neeni naŋi ma te dahab, ɔci ɛkɛ yɔɔtcin gena ɛrki ma waak wyeñɛti. Ɔci ɛkɛ ‘woñgi ma ḍɔŋi poom ne tolan aŋka ṭuuldɛ ɛkɛ maccu iki cɔŋi ma Juaŋ maka pwadin neeni gena ɛrki ma waak wyeñɛti, Jwaŋa Tolan ñamɛti. ⁴ Ɔci jien ati ñaalɔ iki cɔŋi ma Juaŋ maka pwadin neeni te byeŋ malɛɛka Jwaŋa Tolan ñamɛti. ⁵ Ɔci moki malɛɛka gena ṭuorki ma jien luullɛ, ɔci kuomnɛ te maañ nona ɛrki ma waak neeni, ɔci yiɛmnɛ iñɔ ṭɛɛrji, ɔci pwan bala wiak ne pɛñan, ɔci noon wildan ne tolan, ɔci ṭɛɛr warɛ ḍiedan ne tolan. ⁶ Ɔci malɛɛkan ne dɔɔyɔ wyetkɛn ne yyɛɛwɔ neeni waakɛn ywaŋɛ aŋka kuotti ṭwoŋko, gena ṭwoŋka ne dɔɔyɔ wyetkɛn ne yyɛɛwɔ neeni. ⁷ Ɔci ne malɛɛka ñamu kuonni ṭwoŋ ɛkɛyɛ, ɔci tomŋin ɔci maañ ḍɛɛmdin iñɔ ṭɛɛrji, ɔci ɛkkɛn waakɛn a yimgo, ɔci ṭɛɛr taaŋɛ gɛɛl ammɛ maaño, ɔci jang taaŋɛn gɛɛl ammɛ maaño, ɔci lwomk waakɛnda ammɛ maañ iki lwomka ṭeyan. ⁸ Ɔci malɛɛka akki ne yyɛɛwɔ neeni kuotcin ṭwoŋ ɛkɛ, ɔci gen gɛɛl ḍɛmmin te ñaalɔ ḍɛmmin galŋji bala ba poma tolan, ɔci bala koldan ne tolan, ɔci galŋ konɛ taaŋɛ gɛɛl aŋi yimgo. ⁹ Ɔci waka cɔnnɛ Juaŋ ciyi galŋji gɛɛg tuuni, ɔci murkan ati galŋji a murkan ḍwaŋin gɛɛg lɛɛktin jitin. ¹⁰ Ɔci malɛɛka akki ne ḍoogɔ kuotcin ṭwoŋ ɛkɛ, ɔci kɛɛlla tolan gɛɛl ḍɛmmin te ñaalɔ pɔliji, ɔci ɛkɛ dɛki bala ba maañ lɛmmɛ ne koldi a koldin. Ɛkɛ ḍɛmmin toolji wɔɔrg gɛɛg woŋgɛnti. ¹¹ (Ɔci kɛɛlla neeni yenti “Jana Cyɛyan.”) Ɔci ɛkɛ pieg naŋŋɛ cyɛñña cyɛñño. Ɔci maka moti pyega neeniyɛ, ma gɛɛg tuun ne coŋɔn te cyɛñi piego. ¹² Ɔci malɛɛka akki ne ŋaanɔ kuotcin ṭwoŋ ɛkɛ, ɔci oŋ waŋɛ ɔci paan ɔci kɛltan monnɛ Jwaŋa Tolan aŋka naa ɛkkɛn dɛki ne tolan moki bɛɛ, ɔci oŋ konɛ ɔci ween konɛ ɛkkɛn yaakinti dɛkti ne tolan moki bɛɛ. ¹³ Ɔci ‘ya gɔrcan, ɔci ‘ya tieŋŋan yan goow tolan gɛɛl bala peyi yeccu ñaalɔ pɔliji, ɔci ɛkɛ gɔki te pwana tolan agi, “Ywobjo! Ywobjo! Ywobji bala bɛya maka ciyi iñɔ ṭɛɛrji wɛnniti ne malɛɛkan ne ḍoogɔ neeni kuotti ṭwoŋki ɛkkɛny!”

¹ Ɔci malɛɛka akki dɔɔyɔ kuotcin ṭwoŋ ɛkɛ, ɔci ‘ya gɔrcan gen gɛɛl bala ba kɛɛli ḍɛmmin te ñaalɔ pɔliji ḍɛmmin iñɔ ṭɛɛrji. Ɔci ɛkɛ ‘woñgi ma mɔpta kola beyan. ² Ɔci kɛɛlla neeni kola beyan pɔŋŋɛ tukɛti, ɔci jien bɛɛn bora ne tolan bala ba jien ḍwoŋa tolany. Ɔci pɔli konɛ kuumi te jien koolo, ɔci oŋ waŋɛ moki aŋi mielo. ³ Ɔci ṭooŋgi wɔɔwwin bora te jienti ɔci ṭɛɛr wyeñɛ kuumi warda, ɔci ɛkkɛn ‘wonnɛ menga war tɛɛn bala ba war tɛɛn jiidga bala iñɔ ṭɛɛrji wɛnniy. ⁴ Ɔci menga gɔkcin ɛkkɛnti agi, “Naa i jang ɔci lwomk ɔci waka ṭeyan iñɔ ṭɛɛrji wɛnni gɛɛl naŋa ɔŋka bɛɛ. A’a, gena maka baaki mañ Jwaŋa Tolan ñomgɛnti aŋka kootan ṭooŋgi pookɛny.” ⁵ Ɔci ɛkkɛn noktan bɛɛ, yeti ɛkkɛn ñaktanji waak te kood ponk ne dɔɔyɔ. Ɔci ṭooŋga neeni tuggɛn bala ba jiidg te pɛñño. ⁶ Ɔci te oŋŋa wannayɛ, ma bwagdɛ lieno, yeti lien kwaya te ɛkkɛnti, ɔci ɛkkɛn kɛɛdi agi dala ɛkkɛn tuudintɛ, yeti lien kwaya te ɛkkɛnti. ⁷ Ɔci ṭooŋga neeni bala ba muntan ne ɛɛŋkiti ma wak ṭwaŋy. Ɔci waka bala ɛkkɛn wyetkɛnti bala ba taaggan cyɛgji taaggan naŋi ma te dahab, ɔci ɛkkɛn woŋgɛn bala ba woŋgi ma baano. ⁸ Ɔci jyeyi ɛkkɛn bala ba jyeyi maka moongo, ɔci ɛkkɛn lɛkɛn bala ba jiɛl gɔrŋgɛ. ⁹ Ɔci ɛkkɛn jɔtkɛn bala ba kɔɔrjin naŋi ma te bily, ɔci ɛkkɛn kɔggɛn wiak bala ba babin wuatan muntan ne atki ootti ṭwaŋtiy. ¹⁰ Ɔci ɛkkɛn wilkɛn balki kuwi bala ba kun jiin ɔɔn, ɔci ɛkkɛn balki war tɛɛn aŋka noŋdi ne yaayan mati ponk ne dɔɔyɔ. ¹¹ Ɔci ɛkkɛn balkɔn ḍuaŋa ɛkkɛn, gena men Jwaŋa Yaayan mena mwoki kola beyan, ɔci ɛkɛ yenti Abaadon te tuk Ma Icrayiil, ɔci ɛkɛ yenti Apɔɔlyɔn te tuk Giriik. (Ɔci yenta neeni kon ɛkɛ te tuk Mabaan agi, “Mena Yooci Noono.”) ¹² Ywobja ñamu ati doki, ɔci ywobja pookɛn bala bɛya ne yyɛɛwɔ men. ¹³ Ɔci malɛɛka akki ne dɔɔyɔ wilin ne cyɛɛlɔ kuotcin ṭwoŋ ɛkɛ, ɔci ‘ya tieŋŋan pwan bɛɛn te gena ɛrki ma waak ṭwoŋka ne ŋaanɔ neeniti, ɔci gena neeni naŋi ma te dahab, ɔci bala yɔɔd Jwaŋa Tolan ñamɛti. ¹⁴ Ɔci ɛkɛ gɔkcin malɛɛka akki makɛn ne dɔɔyɔ wilin ne cyɛɛlɔ malɛɛka eci ṭuoŋ bieŋɛti neeni agi, “Dala i malɛɛkan ne ŋaanɔ malɛɛkan bala toolji Tol Yuprɛɛtic tola tolan byeŋkɛn a ḍɛɛggin neeni lookka!” ¹⁵ Ɔci ne pɛñan wyeng waakɛn lookkɛ, ɔci malɛɛkan neeni waakɛn ywaŋɛ aŋka ɛkkɛn ma noktan te cani jiña wanna, ɔci te ninka wanna, ɔci te ponka wanna, ɔci te yuonga wanna, gena oŋŋa ḍuaññɛ Jwaŋa Tolany. Ɔci ɛkkɛn ma noktan ne coŋɔn. ¹⁶ Ɔci ‘ya tieŋŋan pwan gɔki agi, “Ackan taab te muntan a alpn coŋgin a coŋgin bala ba milyuunn a miyyan ne yyɛɛwɔ.” ¹⁷ Ɔci muntan waakɛn lɛɛllɛ bora ‘yati, ɔci maka taab ɛkkɛnti neeni waka dooŋki ɛkkɛn waak bala ba maañ lɛmmɛ, ɔci ɛkkɛn garŋa a garŋ bala ba ḍoŋ pɛɛpkɛ. Ɔci muntan neeni wyetkɛn bala ba jyeṭo. Ɔci maaño, ɔci jiena yaayan bɛya bora te ɛkkɛn tuggɛnti. ¹⁸ Ɔci te waka ne ḍoogɔ neeniyɛ, ma tuun ne coŋɔn te maañ, ɔci jiena yaayan jiena bɛɛn bora te muntan tuggɛntiy. ¹⁹ Ɔci war tɛɛn bala muntan tuggɛntiyɛ, bala ba war tɛɛn bala ɛkkɛn wilkɛntiy. Ɛkkɛn kooyi ma te wilkɛn ba kogi, ɔci noŋi ne yaayan mati te wyetk ɛkkɛn neeni. ²⁰ Ɔci maka uni te naŋka neenitiyɛ, ɛkkɛn waakɛn yali te mali waka naŋi ɛkkɛn te byeŋkɛn neeni bɛɛ, ɔci ɛkkɛn mwonnin te mali jɔkin yeyin bɛɛ, ɔci walla te mali waka pɔɔyi ɛkkɛn te byeŋkɛn te dahab, ɔci te bilk, ɔci te bilka tidan, ɔci te gwoyi, ɔci te jang neeni bɛɛ. Ɔci waka neeni yaakinti gɔṭi bɛɛ, ɔci walla tieŋdi bɛɛ, ɔci walla ati bɛɛ. ²¹ Ɔci walla ɛkkɛn waakɛn yali mwonnin te nooŋi ma bɛɛ, ɔci walla te omji bɛɛ, ɔci walla te tomi bɛɛ, ɔci walla te kali waak bɛɛ.

¹ Ɔci malɛɛka warɛ tɛyan gɛɛl yuarcan ‘ya bala bɛya te ñaalɔ pɔliji ɛŋi pɔli warɛti, ɔci jwaŋa yɔɔd ñaalɔ bala yɔɔd ɛkɛ wyeñɛti. Ɔci ɛkɛ woŋgɛ bala ba oŋ waŋɛ, ɔci tɛrkɛ bala ba maaño. ² Ɔci ɛkɛ balki worga ḍiɛran bieŋɛti, ɔci worga neeni a pɔggɔn. Ɔci ɛkɛ ciya a byerɔn yɔɔnnɛ galŋji pieg wyetkɛnti, ɔci ciya a aam yɔɔnnɛ nona iwan. ³ Ɔci ɛkɛ yaadjin te pwana tolan bala ba jiɛl ne wiagi a joony. Ɔci waka ṭɛɛntan ne dɔɔyɔ wyetkɛn ne yyɛɛwɔ neeni, ɛkkɛn bala gɔki ṭɛɛntan ne pɛñan. ⁴ Ɔci ne waka neeni balki ṭɛɛnkiyɛ, ɔci ‘ya buaga ka jyeka guaktan ɛkkɛn neeni kiido, yeti ‘ya tieŋŋan pwan te ñaalɔ pɔliji, gɔki agi, “Dala jyeka guagɛ waka ne dɔɔyɔ wyetkɛn ne yyɛɛwɔ waka ṭɛɛntan neeni kuomjati, naa kiijja jiju worgaji bɛɛ!” ⁵ Yeti malɛɛka yuarcan ‘ya yɔɔd galŋji pieg wyetkɛnti ɔci nona iwan neeniyɛ, ɛkɛ byeŋa byerɔn laŋnɛ ñaalɔ pɔliji, ⁶ ɔci ɛkɛ gɔkcin te yenti Jwaŋa Tolan mena tɛɛti yuonginda, mena cɔti pɔli ɔci waka bala pɔlijiy, ɔci ṭɛɛr ɔci waka bala ṭɛɛrjiy, ɔci galŋ ɔci waka bala galŋji neeni agi, “Wɔɔka gɛɛl bala moki bɛɛ! ⁷ Yeti ne wɔɔka neeni cɔɔldiyɛ, malɛɛka akki makɛn ne dɔɔyɔ wyetkɛn ne yyɛɛwɔ kuotti ṭwoŋ ɛkɛ, ɔci jyek Juaŋ jyeka jitkɛn a coggin, jyeka mietki maka a bɔwan Jwaŋa Tolan ma neeni jitkɛn gorti bora.” ⁸ Yeti pwana tieŋŋan ‘ya te ñaalɔ pɔliji neeniyɛ, gɔkkin ‘yati moki agi, “Ɔgdi ootta worga ḍiɛran konɛ a pɔggɔn wanna lula te malɛɛka yɔɔd ciya parɛ yɔɔnnɛ galŋji pieg wyetkɛnti, ɔci ɛka parɛ yɔɔnnɛ nona iwanti neeni.” ⁹ Ɔci ‘ya ati malɛɛkati, ɔci gɔkcan ɛkɛti agi, “Dala i ‘ya ‘wonda worga ḍiɛran neeni.” Ɔci ɛkɛ gɔkkin ‘yati agi, “Anti, lula ɔci ama, ɔci ɛkɛ milla mili ba cyeñ i tukuti, yeti i juugdi konuti!” ¹⁰ Ɔci ‘ya worga luuli ɔci ammo, ɔci ɛkɛ milla mili ‘ya tukuti bala ba cyeño, yeti ne ɛkɛ amma ‘ya dokiyɛ, ɛkɛ ‘ya juuŋŋa konuti. ¹¹ Ɔci ɛkɛ gɔkkin ‘yati agi, “Dala i gɔkca jyek Juaŋ mati moki, gena maka coŋin maka kɛɛna pookɛn ɔci ma baan jitkɛn waakɛnda, ɔci keedin, magga da te tuk ɛkkɛn, ɔci maka ḍuaŋan ḍwaŋin ne coŋɔn.”

¹ Ɔci malɛɛka gɛɛl te ɛkkɛnti ‘ya ‘wonna jaan bala ba kɔmñi ɔɔn, ɔci ɛkɛ gɔkkin ‘yati agi, “Jɔŋŋa ñaalɔ on Juaŋ ona tolan neeni pɔya iki gena ɛrki ma waako. Ɔci maka bala moṭi Juaŋti orɔ ona neenitiyɛ, dala i ɛkkɛn paga. ² Yeti nona kaañji borayɛ, naa ɛkɛ pɔya bɛɛ, ɛkɛ ‘wonnɛ Jwaŋa Tolan Keedin Pookɛn, ɔci ɛkkɛn bana tolan bana pwadan neeni moortan iñɔ yuong ne ḍoogɔ ɔci ponk ne dɔɔyɔ wilin ne cyɛɛlɔ. ³ Ɔci ma gɛɛg cuondɛ Juaŋ ne yyɛɛwɔ, ɔci ɛkkɛn ma nɔɔttan jyek Juaŋ yuong ne ḍoogɔ ɔci ponk ne dɔɔyɔ wilin ne cyɛɛlɔ. Ɔci ɛkkɛn bɛya ɛŋi bworŋin cieki ma waakɛnti.” ⁴ Maka ne yyɛɛwɔ neeniyɛ, ɛkkɛn bala ba jang jɛtuun janga ne yyɛɛwɔy, ɔci ɛkkɛn bala ba dyɛkan ne yyɛɛwɔ dyɛkan bala yɔdi Jwaŋa Tolan Ciɛggɔn ṭɛɛr ñamɛtiy. ⁵ Ɔci kan menga buagɔn noŋdi ne yaayan ɛkkɛntiyɛ, maañ bɛya bora te ɛkkɛn tuggɛnti. Ɔci maka yoyi ñin iki ɛkkɛn neeni amdɛ, ɔci kan menga buagɔn noŋdi ne yaayan ɛkkɛntiyɛ, ɛkɛ noktan ma. ⁶ Ɔci maka neeni yaakkɛn balki war tɛɛn aŋka pɔli tukɛ uultan. Ɔci te ninka mietki ɛkkɛn ma neeniyɛ, ñaal yaakinti bɛya moki bɛɛ. Ɔci ɛkkɛn balki war tɛɛn aŋka pieg yaltanyɔ aga yimgo. Ɔci kan ɛkkɛn buagɔnyɛ, ɛkkɛn yaakinti ṭɛɛr eektan naŋka yeyin korkɛn ne coŋɔn. ⁷ Ɔci ne jyeka nɔɔtki ɛkkɛn neeni baatiyɛ, mena bartan ma a gen luom bɛya bora te kola beyanti, ɔci noŋdi iki ɛkkɛn ywobjo, ɔci ɛkɛ ɛkkɛn bwandɛ, ɔci nogdɛ. ⁸ Ɔci ɛkkɛn waakɛn yiɛptɛ gen luom pɔɔjɔ ban Urcaliim bana tolan neeniji nona tuuni Ciɛggɔn ɛkkɛn kakantiy. Bana neeni ɛkɛ yaayɛ ba ban Caduum ɔci ban Macor. ⁹ Ɔci keedin jitkɛn ne coŋɔn, makan da te kɛɛn ɛkkɛn, ɔci makan da te tuk ɛkkɛn, ɔci makan da te ban ɛkkɛn bɛya, ɔci gɔrti waak ɛkkɛn nink ne ḍoogɔ ɔci nini ḍulnɛ. Ɔci ɛkɛ menga daldɛ maka neeni joktɛ koolji bɛɛ. ¹⁰ Ɔci maka ciyi iñɔ ṭɛɛrji wɛnni yomgɛn pwada, te lyen maka ne yyɛɛwɔ neeni, ɔci ɛkkɛn yomgɛn ñɔya ñɔɔn, ɔci ‘uondi yɔtin te waak te bolja bɔwan ne yyɛɛwɔ neeni maka iñɔ ṭɛɛrji wɛnni taabkiti ne pɛñany. ¹¹ Ɔci ne ninka ne ḍoogɔ ɔci nini ḍulnɛ neeni baakiyɛ, boŋa tɛɛtki ma bɛɛn ɛkkɛnti te Jwaŋa Tolanti, ɔci ɛkkɛn jɔŋŋin ñaalɔ yɔɔtcin te ciegɛn, ɔci maka bala yɔɔd gɔṭi ɛkkɛn neeni buañi, kuaŋnɛji lien ne tolan. ¹² Ɔci ɛkkɛn tieŋjin pwan ne tolan pɔliji bala boor ɛkkɛn yaakkɛn agi, “Bɛɛdɛ wɛnni!” Ɔci ɛkkɛn ati ñaalɔ pɔliji te pɔli yuarcɛ maka yoyi ñin iki ɛkkɛn te woŋgɛn. ¹³ Ɔci te oŋŋa ṭɛɛr warɛ Jiɛññɛ ne tolan te war tɛɛn Juaŋyɛ, baan taaŋɛ gɛɛl lɛɛktin jitin. Ɔci kɛɛn bana tolan neeni ma tuun a alpn ne dɔɔyɔ wyetkɛn ne yyɛɛwɔ (7,000). Ɔci maka pookɛn buañi, ɔci ɛkkɛn bala jieyi Jwaŋa Tolan ñaalɔ pɔliji neeni. ¹⁴ Ywobja akki ne yyɛɛwɔ ati doki, yeti ywobja akki ne ḍoogɔ bala bɛya ne pɛñan! ¹⁵ Ɔci malɛɛka akki ne dɔɔyɔ wyetkɛn ne yyɛɛwɔ kuotcin ṭwoŋ ɛkɛ, ɔci pɔɔdg bala wiak ne pɛñan te pɔliji gɔki agi, “Cyɛgja iñɔ wɛnni aŋi cyɛgji Ciɛggɔn ikin Jwaŋa Tolan ɔci Kiṭɔ Mena Muonɛ ɛkɛ boray. Ɔci ɛkɛ aga Ciɛggɔn yuonginda, yuonginda!” ¹⁶ Ɔci cyekin a men baan wyetkɛn ne ŋaanɔ (24) neeni kooyin iñɔ te kokin wyetkɛnti, ɔci ɛkkɛn ñingɛn kuomjɛ iñɔ ɔci morcin Juaŋti. ¹⁷ Ɔci ɛkkɛn gɔkcin Jwaŋa Tolanti agi, “Ɔɔn gɔktɔn iti a pwatcin, hay, Ciɛggɔn ɔɔn Jwaŋa Tolan! I a Mena bala te baaṭi ɔci acca, ɔci i balki war tɛɛn, ɔci aŋŋi Ciɛggɔn Tolan. ¹⁸ Kɛɛna pookɛn looñi iti, yeti acca i daŋkun loonni ɛkkɛnti. Wɔɔka bɛɛn a wɔɔka i jiek oldi maka tuun wyetkɛnti, ɔci aŋka kɛɛnk i maka a bɔwan, ɔci maka pwadin, ɔci maka buayi yenti iyɛ, ɛkkɛn ‘woñga i waak ba kanŋa ɛkkɛn. Gena maka ḍyɛrin ɔci maka ḍwaŋin. Ɔci te oŋŋa wannayɛ, maka yooci ṭɛɛr wyeñɛ neeniyɛ, ɛkkɛn tuwa.” ¹⁹ Ɔci on Jwaŋa Tolan ona ñaalɔ pɔliji tukɛ pɔŋnɛ, ɔci canduuk jyeka ḍyɛgɛ Jwaŋa Tolan iki ma, warɛ liɛllɛ bala yɔɔd orɔ. Ɔci noon bala wildan, ɔci pɔɔdg bala wiak, ɔci noon warɛ Jiɛññɛ ne tolan, ɔci tomŋin ḍɛɛmdin.

¹ Ɔci naŋka tɛyan warɛ liɛllɛ pɔliji. Ɛɛŋ gɛɛl bala ɛŋi oŋ waŋɛ warɛti, ɔci paan bala yɔɔd ɛkɛ ciegɛti, ɔci kɛltan a inyaakkɛn wyetkɛn ne yyɛɛwɔ neeni bala ‘yɛŋdɛ ɛkɛ wyeñɛti a tɔŋi cyɛgjo. ² Ɔci ɛkɛ laaccin, ɔci ɛkɛ bala yaadan te pɛñi kaci ne ɛkɛ baali jiediy. ³ Ɔci gena parɛ moki warɛ liɛllɛ ñaalɔ pɔliji. Kaŋa tolan tidan ba maañ yuarcan ‘ya, ɛkɛ balki wyetkɛ ne dɔɔyɔ wyetkɛn ne yyɛɛwɔ, ɔci ṭwoŋka ne inyaakkɛn, ɔci wyetka neeni balki taaggan cyɛgji waakɛnda. ⁴ Ɔci ɛkɛ kɛltan gɛɛg ne coŋɔn te pɔliji wɔɔnɛ iñɔ te wiilɛ, ɔci yiɛmnɛ ɛkɛ iñɔ ṭɛɛrji. Ɔci kaaŋ bala yɔɔd ɛŋa ami jiedi neeni ñamɛti kɛɛy aŋka ne ɛɛŋ jieddiyɛ, ɛkɛ kaci laddɛ. ⁵ Ɔci ɛɛŋ jieni kacca ‘uan aŋka aga ciɛggɔn ma waakɛnda. Ɔci cyɛgji ɛkɛ tɛya tɛɛn ba bilo. Yeti kacca neeni ɛkɛ eññɛ Juaŋ non kaakci ɛkɛti. ⁶ Ɔci ɛɛŋ yiŋi wɔɔŋji nona ywaŋŋɛ Juaŋ te ɛkɛ aŋka ɛkɛ ciya aŋan yuong ne ḍoogɔ ɔci ponk ne dɔɔyɔ wyetkɛn ne yyɛɛwɔ. ⁷ Ɔci ṭwaŋ bɛɛn pɔliji. Malɛɛka yenti Maykal iki malɛɛkan ɛkɛ, ɛkkɛn bala noowɔ iki kaŋa neeni ɔci jɔkin yeyin ɛkɛ. ⁸ Ɔci ɛkkɛn buannɛ Maykal, ɔci a ɔŋŋiyɛ, ɛkkɛn balki noon gɛɛl ñaalɔ pɔliji moki bɛɛ. ⁹ Ɔci kaŋa a daan mena bartan ma agi Jwaŋa Yaayan Cɛtan neeni yiemnɛ Jwaŋa Tolan iñɔ ṭɛɛrji wɛnni i malɛɛkan ɛkɛ. Ɔci ɛkɛ a mena maka ṭɛɛrji diennɛ ñin waakɛnda ɔci ɛkkɛn ḍɛɛmdin iñɔ iki ɛkɛ waakɛnda. ¹⁰ Ɔci ‘ya tieŋjan pwan ne tolan te pɔliji gɔki agi, “Te oŋŋa neeni yɔɔd Jwaŋ ikin bɛɛn doki! Ɔci war tɛɛn ɛkɛ, ɔci cyɛgji ɛkɛ, ɔci war tɛɛn Kiṭɔ Mena Muonɛ ɛkɛ bora neeni bɛɛn moki! Acaan mena bala tɛki modg ikin waakɛn Jwaŋa Tolan ñamɛti te oŋ jiñɛ ɔci te ween jiñɛyɛ, yiɛmnɛ Jwaŋa Tolan ɔntɔ te pɔliji doki. ¹¹ Ɔci modg ikin ɛkɛ buanɛ te yimg Kalŋ Jwaŋa Tolan, ɔci te jwalla mietkɛ ɛkkɛn may. Ɔci ɛkkɛn ani waak ɛkkɛn bɛɛ, walla buayi lien bɛɛ. ¹² A ɔŋŋiyɛ, dala ɛkkɛ yomgɔ ñɔya. Hay, maka ciyi pɔlijiy, dala ɛkkɛ yomgɔ ñɔya! Yeti naŋka yaayan bɛya ṭɛɛrji ɔci galŋji te bolja Jwaŋa Yaayan kooni iñɔ ɛkkɛtiy. Ɔci ɛkɛ balki loñk yomɛti ne tolan, acaan ŋeejɛ ɛkɛ ninka ɛkɛ ḍakti cɔɔllin doki.” ¹³ Ɔci ne kaaŋ gɔrni ɛkɛ ḍɛmni iñɔ ṭɛɛrjiyɛ, ɛkɛ bala ŋɔɔṭi ɔci noŋjin ne yaayan ɛŋa jieni kacca a ‘uan neenitiy. ¹⁴ Ɔci ɛɛŋ ‘wonnɛ Jwaŋa Tolan kɔgi yan goowa tolan aŋka ɛkɛ peya wɔɔŋji non ɛkɛ, ɔci ɛkɛ ciya aŋan yuong ne ḍoogɔ ɔci ponk ne dɔɔyɔ wilin ne cyɛɛlɔ te kaaŋo. ¹⁵ Ɔci ne ɛɛŋ baali atiyɛ, kaaŋ pieg ŋwaŋnɛ ɛɛŋ ŋoyɛti bala ba tool aŋka ɛɛŋ eedɛ. ¹⁶ Yeti ṭɛɛr ɛɛŋ maŋŋɛ, ṭɛɛr tukɛ pɔŋnɛ ɔci pieg lannɛ. ¹⁷ Ɔci kaaŋ looñjin ɛɛŋti ne tolan, ɔci ɛkɛ ati aŋka noowɔ iki kɛɛgin ɛɛŋ kɛɛgin pookɛn maka noŋi ba jyek Juaŋ ɔci balki jwali Yaccu Kiṭɔ waakɛnday. ¹⁸ Ɔci kaaŋ bala yɔɔd kɔmi ḍwaŋɛti.

¹ Ɔci ‘ya gen luom gɛɛl yuarcan bala koodi wu te galŋji, ɛkɛ wyetkɛ a dɔɔyɔ wyetkɛn ne yyɛɛwɔ, ɔci ṭwoŋkɛ ne inyaakkɛn. Ɔci ṭwoŋka ne inyaakkɛn neeni balki taaggan waakɛnda. Ɔci yenga yeyin kiijji ma ɛkɛ wyetkɛti. Yenga neeniyɛ, ḍori Jwaŋa Tolan. ² Ɔci gen luom gena yuarcan ‘ya neeniyɛ, ɛkɛ bala ba kaño, ɔci ciegɛ kɛyyɛn tɛɛna tɛɛno, ɔci ɛkɛ tukɛ bala ba jiɛlo. Ɔci gen luom ‘wonnɛ kaaŋ war tɛɛn ɛkɛ, ɔci kaakci ɛkɛ, ɔci cyɛgji ɛkɛ cyɛgja tolan. ³ Ɔci ɛkɛ wyeñɛ gɛɛl yuarcan ‘ya bala ba ŋaarkiti ma a ŋarti noŋi tuudi doki no, yeti kɔɔŋ tuka noŋi ɛkɛ nogdi neeniyɛ, polli. Ɔci maka iñɔ ṭɛɛrji wɛnni yomgɛn poni ɔci bootcin gen luomti waakɛnda. ⁴ Ɔci ma waakɛnda morcin kaaŋti acaan ɛkɛ gen luom ‘wonnɛ cyɛgji ɛkɛ. Ma morcin gen luomti, ɔci ɛkkɛn gɔki agi, “A menɛ bala ba gen luomy? Ɔci a menɛ yaaktanti noogdi iki ɛkɛy?” ⁵ Ɔci gen luom ‘woñgi ma tuka gɔki ne yaayan, ɔci ɛkɛ noŋi warɛ. Ɔci ɛkɛ ‘woñgi ma war tɛɛn aŋka kandi yuong ne ḍoogɔ ɔci ponk ne dɔɔyɔ wilin ne cyɛɛlɔ. ⁶ Ɔci ɛkɛ bala gɔki ne yaayan Jwaŋa Tolan ɔci ḍori yenti Jwaŋa Tolan ɔci non Jwaŋa Tolanti ɔci maka ñaalɔ pɔliji moki waakɛnda. ⁷ Ɔci ɛkɛ ‘woñgi ma war tɛɛn aŋka noŋdi ṭwaŋ iki Ma Juaŋo, ɔci ɛkɛ Ma Juaŋ bwandɛ. Ɔci maka kɛɛna pookɛn ɔci keedin waakɛnda, makan da te tuk ɛkkɛn, ɔci makan da te ban ɛkkɛn ɔci ma baan jitkɛn waakɛnda mugdɛ ɛkɛ bieŋɛti. ⁸ Ɔci maka ciyi ṭɛɛrji morti gen luomti waakɛnda. Oŋ yeti gena maka yeng ɛkkɛn bala jiju worga Kalŋa ŋaarɛ ma worga tɛɛtinti ne wona ṭɛɛr cɔnnɛ Juaŋ men bɛɛyɛ, ɛkkɛn aŋka morti gen luomti bɛɛ. ⁹ Mena balki jyetkɛyɛ, dala ɛkɛ tieŋdi! ¹⁰ Kan men gɛɛl buagɔn ɛkɛ kuatayɛ, ɛkɛ kuatan ma. Ɔci kan men gɛɛl buagɔn ɛkɛ noktanyɛ, ɛkɛ noktan ma. Ɔci a ɔŋŋiyɛ, dala Ma Kiṭɔ balti jyeni ɔci kɛɛno. ¹¹ Ɔci gen luom gena akki ne yyɛɛwɔ yuarcan ‘ya bala koodi wu te ṭɛɛrji. Ɔci ɛkɛ balki ṭwoŋkɛ ne yyɛɛwɔ. Ɛkkɛn bala ba ṭwoŋki kalŋo, yeti ɛkɛ gɔki ba kaaŋo. ¹² Ɔci ɛkɛ kandi te war tɛɛn gen luom ñamuy, ɔci ɛkɛ ṭɛɛr ɔci maka ciyi ṭɛɛrji wɛnni waakɛnda iirtɛ morti gen luom ñamuti, gena mena balki kɔŋa noŋi ɛkɛ nogdɛ ɔci kɔɔŋ poli dokiy. ¹³ Ɔci gen luom gena akki ne yyɛɛwɔ noŋjin naŋka tɛyan ma ñomgɛnti. Ɔci maañ bɛɛn te ñaalɔ pɔliji, bɛɛn iñɔ ṭɛɛrji yuarcɛ ma waakɛnda. ¹⁴ Ɔci te naŋka neeniyɛ, maka ciyi ṭɛɛrji wɛnni diennɛ ñin ɛkɛ, ɔci ɛkkɛn jyetcin ɔntɔ te naŋka tɛyan naŋŋɛ ɛkɛ gen luom ñamu ñamɛti neeni. Ɔci gen luom gɔkcin mati waakɛnda agi dala ɛkki genga pɔɔdɛ ba bolji gen luom balki bilgin byeŋgaaran beyan wyeñɛti ɔci uni dɔki wanna. ¹⁵ Ɔci gen luom gena akki ne yyɛɛwɔ ‘woñgi ma war tɛɛn aŋka booŋ kuuttɛ pɔɔyama neeni konɛti aŋka ɛkɛ gɔkti jiek, ɔci maka morti ɛkɛti bɛɛyɛ, nogdɛ. ¹⁶ Ɔci pɔɔyama neeni ma eedɛ waakɛnda, maka ḍwaŋin ɔci maka ḍyɛrin, maka cyɛgan ɔci maka bɔwan, maka kɛɛnk ɔci maka kɛɛnk bɛɛy. Maka neeni eedi ɛkɛ aŋka ɛkkɛn noŋtan ma maañ byeŋkɛnti byeŋa byerɔn, walla ñomgɛnti. ¹⁷ Ɔci menga yaakinti wɛrdi genga moki bɛɛ, walla menga yaakinti genga wiɛldɛŋɔ moki bɛɛ, gena mena balki cyeni yenti gen luom walla mañ ɛkɛ aŋka wɛrdi ɔci wɛɛrtiy. ¹⁸ Dala ñing tɛɛn bala wɛnni. Mena ñingɛ tɛyanyɛ, dala ɛkɛ nimra yenti gen luom neeni pagdɛ. Ɛkɛ a nimra yenti men baano, ɔci nimra ɛkɛ a miyyan ne dɔɔyɔ wilin ne cyɛɛlɔ ɔci ma baan ne ḍoogɔ ɔci ne dɔɔyɔ wilin ne cyɛɛlɔ (666).

¹ Ɔci ‘ya ñorcan, ɔci Kalŋ yuarcan ‘ya bala yɔɔd Pom Ciyɔn wyeñɛti ban Urcaliimji iki maka coŋin a alpn a miyya ne cyɛɛlɔ ɔci alpn a ma baan ne yyɛɛwɔ wyetkɛn ne ŋaanɔ (144,000). Ɔci yenti kalŋ ɔci yenti Weegɛn ɛkɛ bala kiinnɛ Juaŋ maka neeni ñomgɛnti. ² Ɔci ‘ya tieŋŋan pwan te ñaalɔ pɔliji bala ba pɔɔkɔ ne yiŋi wiagi a joony, ɔci bala ba ñaal ne wiagi ṭɛɛnti a ṭɛɛntin ne tolany. Ɔci pwana tieŋŋan ‘ya neeni bala ba pwan maka ciepi coŋkɔn ne ɛkkɛn ciepkiy. ³ Ɔci ɛkkɛn bala ‘uali ɔɔlla woonɛ Jwaŋa Tolan ñamɛti, ɔci waka tɛɛti ne ŋaanɔ ñomgɛnti, ɔci cyekin kaniica ñomgɛnti. Ɔci menga bala yaakinti ɔɔlla neeni bɛɛ, yeti maka coŋin neeni pookɛn a alpn a miyya ne cyɛɛlɔ ɔci alpn a ma baan ne yyɛɛwɔ wyetkɛn ne ŋaanɔ (144,000) aŋka urkinti ɔɔlla neeni pookɛny, ɛkkɛn a maka wannɛyɔ Juaŋ te iñɔ ṭɛɛrji wɛnniy. ⁴ Maka neeni ɛkkɛn waakɛn yaayi te naŋki maka moong bɛɛ, ɔci ɛkkɛn a maka yeyin bɛɛ, maka neeni ɛkkɛn a maka bootcin Kalŋtiy, nona ɛkɛ ooddi gɔ ɛkkɛn moki bootcin ɔɔn. Maka neeni ɛkkɛn wannɛyɔ Juaŋ te ma jitin. Ɔci ɛkkɛn a ma ɛkɛ maka lɔɔnnɛ Juaŋ boray, ɔci ɛkkɛn a ma Kalŋ moki. ⁵ Ɛkkɛn pwadgin Juaŋ ñamɛti doki. A ɔŋŋiyɛ, ɛkkɛn balki jomi jiek bɛɛ. ⁶ Ɔci malɛɛka parɛ yuarcan ‘ya bala pey yeccu ñaalɔ pɔliji eci jyeka wonkɛn jyeka pwadin jwalla baadi bɛɛ neeni aŋka ɛkɛ maka bala ciyi ṭɛɛrji wɛnni myettɛ, ma baan jitkɛn waakɛnda ɔci keedin waakɛnda, magga te ban ɛkkɛn, ɔci magga te kɛɛn ɛkkɛn, ɔci magga da te tuk ɛkkɛn. ⁷ Ɔci ɛkɛ bala yaadan te pwana tolan agi, “Buattɛ Juaŋ ɔci jieddɛ pwani ɛkɛ! Oŋ ywobji Juaŋ bɛɛn doki, ɔci dala ɛkkɛ mortɛ mena oki pɔli ɔci ṭɛɛr ɔci tool ɔci bɔɔdgti!” ⁸ Ɔci malɛɛka parɛ malɛɛka akki ne yyɛɛwɔ bootcin ɛkɛti ɔci bala yaadan gɔki agi, “Aa, cca cca cca! Ban Baabil bana tolan ḍɛmmin. Ɛkɛ ḍɛmmin te motta ɛkɛ keedin pookɛn moonnɛ te mooya noŋi ɛkɛ tomiy.” ⁹ Ɔci malɛɛka parɛ, malɛɛka akki ne ḍoogɔ boottin ɛkɛti, ɔci yaajjin te pwana tolan agi, “Mena morti gen luomti ɔci pɔɔyama ɛkɛti, ɔci balki mañ ɛkɛ ñamɛti walla bieŋɛtiyɛ, ¹⁰ ɛkɛ daŋkun motti mooy ywobji Jwaŋa Tolan mooya bala ḍwan ṭɔɔlɛ ywobji ɛkɛji mooya ñaagɛyɔ ma iki pieg bɛɛ neeni! Ɔci ɛkɛ beeldɛ Juaŋ te maañ ɔci jiena yaayan malɛɛkan pwadin ñomgɛnti ɔci Kalŋ ñamɛti. ¹¹ Ɔci jien ɛkkɛn bala ṭuul oŋkanda, baadi bɛɛ. Maka moṭi gen luomti ɔci pɔɔyama ɛkɛtiyɛ, ɛkkɛn balki wowwin bɛɛ. Taab ɛkkɛn bala oŋkanda te ween jiñɛ ɔci te oŋ jiñɛ. Ɔci maka balki yenti gen luom ñomgɛnti walla byeŋkɛntiyɛ, ɛkkɛn balki wowwin daŋkun bɛɛ.” ¹² Wɛnniyɛ, dala Ma Kiṭɔ maka pwadin, maka tieci jyek Juaŋ waakɛn, maka jyeti Yaccu Kiṭɔtiyɛ, dala ɛkkɛn yomgɛn tiektan. ¹³ Ɔci ‘ya tieŋŋan pwan te ñaalɔ pɔliji gɔki agi, “Kiejja agi, Yom ñɔɔn bala maka tuwa acca ne ɛkkɛn a maka kanŋan kanŋa Ciɛggɔny!” Ɔci Boŋ Juaŋ gɔkti agi, “Ɛɛ, aŋka ɛkkɛn waakɛn wooktan te taab ɛkkɛn ba bolja ɛkkɛn balki noŋki ne pwadan ne ɛkkɛn balki iñɔ ṭɛɛrji wɛnniy.” ¹⁴ Ɔci ‘ya gɔrcan, ɔci pɔlla bɔwan bɛɛni. Ɔci menga bala taab pɔliti bala ba Yaccu Mena bartan ma agi, “Kaci Ma Baano.” Ɔci ɛkɛ ɛŋi taagga cyɛgji taagga naŋi ma te dahab, ɔci ɛkɛ eci ‘yɛra lɛkɛ a ñɔdg bieŋɛti. ¹⁵ Ɔci malɛɛka parɛ kooyin bora te on Juaŋ ona bala ñaalɔ, ɔci ɛkɛ bala yaadan ne pɛñan mena ciyi te pɔliti agi, “Jyɛm i lula ɔci ɛrca. Oŋŋa ɛrki ma waak bɛɛn doki, ɔci waka ‘yɛrtan ma iñɔ ṭɛɛrji wɛnni ‘yɛggin doki!” ¹⁶ Ɔci mena taab te pɔli neeni jyɛm ɛkɛ wimnɛ iñɔ ṭɛɛrji, ɔci waka bala iñɔ ṭɛɛrji wɛnni ‘yɛrŋɛ ɛkɛ. ¹⁷ Ɔci malɛɛka parɛ kooyin wu te on Juaŋ ona bala ñaalɔ pɔlijiy, ɔci ɛkɛ eci jyɛma lɛkɛ a ñɔdg bieŋɛti daŋkun. ¹⁸ Ɔci malɛɛka parɛ kooyin wu te nona ɛrki ma waakti. Ɛkɛ a mena mwoki maañy. Ɔci ɛkɛ yaajjin ne pɛñan malɛɛka tieci jiɛmti agi, “Jyɛm i lula, ɔci luutkin cuarkɛn ŋuodda wu te balk jitin, ɛkkɛn ‘yɛggin doki!” ¹⁹ Ɔci malɛɛka jyɛm ɛkɛ wimnɛ ṭɛɛrji, ɔci ɛkɛ luutkin ṭɔlgɛn limmiyɔ, ɔci pwoŋnɛ nona wyeṭi Jwaŋa Tolan luutkin loñka pɛñan loñk ɛkɛ neeni. ²⁰ Ɔci luutkin buuri ma jitin baan ŋoyɛti aŋan te gena wyerki ma luutkiny. Ɔci yimg bɛɛn te gena wyerki ma luutkinti kɔɔna kɔɔni, ati ñaalɔ ne jiŋgin wɛnki ma muntan tuggɛnti ɔɔn. Ɔci yimga neeni jooti ne nona loonan ba jali ati ba wɔɔkan a miyyan ne yyɛɛwɔ (200).

¹ Ɔci ‘ya naŋka tɛyan naŋka parɛ yuarcan ñaalɔ pɔliji, ɛkɛ tol tol ɔci parɛ. Malɛɛkan ne dɔɔyɔ wyetkɛn ne yyɛɛwɔ bala eci ink tuggɛn ne dɔɔyɔ wyetkɛn ne yyɛɛwɔ neeni, gena ink tuggɛn ne ŋoyɔ aŋka Juaŋ loñk ɛkɛ cwamdɛ matiy. ² Ɔci genga yuarcan ‘ya bala ba puol ne naŋkiti ma te kajaaja iki maañy. Ɔci ‘ya maka gen luom ɔci pɔɔyama ɛkɛ ɔci mañ ɛkɛ ɔci nimra yenti ɛkɛ buanɛyɛ, yuarcan. Ɛkkɛn bala yɔdi pwol kajaaja neeni taaŋɛti, ɔci ɛkkɛn tieci coŋkɔn ɛkkɛn ‘wonnɛ Juaŋ byeŋkɛnti. ³ Ɔci ɛkkɛn bala ‘uali ɔɔli Muuca kɛɛngɔn Juaŋ, ɔci ɔɔli Kalŋ, ɔci ɛkkɛn gɔki agi, “Hay, Ciɛggɔn, i a Jwaŋa Yaakinti Naŋki Waak Waakɛnda, Naŋki i tol tol ɔci ɛkɛ da parɛ! Ciɛggɔn keedin waakɛnda. Pɔy i a tyɛlga ɔci awarɛ! ⁴ A menɛ buayi i bɛɛy, hay Ciɛggɔn? A menɛ noŋi ne pwadan yenti iti bɛɛy? I pwad paru. Kɛɛna pookɛn waakɛnda bɛya ɔci morti iti, acaan naŋki i naŋka pwadin waakɛn liɛli doki yuarcɛ ma te woŋgɛn waakɛnda.” ⁵ Ɔci ‘ya gɔrcan on Juaŋ nona pwadan ne tolan tukɛ pɔŋnɛ ñaalɔ pɔliji. ⁶ Ɔci malɛɛkan ne dɔɔyɔ wyetkɛn ne yyɛɛwɔ malɛɛkan eci ink tuggɛn ne dɔɔyɔ wyetkɛn ne yyɛɛwɔ neeni kooyin wu te orɔ on Juaŋo. Ɛkkɛn ɛŋi bworŋa tiil bɔwan, ɔci bworŋa neeni pwanna pwani ɔci galla gallo. Ɔci ɛkkɛn yomgɛn ḍɛɛgɛ te buarka naŋi ma te dahab. ⁷ Ɔci waka tɛɛti ne ŋaanɔ neeni gɛɛl ne cyɛɛlɔyɛ, ɛkɛ malɛɛkan ne dɔɔyɔ wyetkɛn ne yyɛɛwɔ neeni ‘wonnɛ ilban ṭɔlgɛn ilban naŋi ma te dahab ne dɔɔyɔ wyetkɛn ne yyɛɛwɔ byeŋkɛnti, menga da te ɛki ɛkɛ. Ɛkkɛn kuumi te ywobji Jwaŋa Tolan mena tɛɛti yuonginda yuonginda neeni. ⁸ Ɔci on Juaŋ ñaalɔ konɛ kuumi te jien naŋka pwadan Juaŋ, ɔci te war tɛɛn ɛkɛ moki. Ɔci menga yaaktanti kaatti orɔ moki te jien bɛɛ, ne ink tuggɛn eetan malɛɛkan ne dɔɔyɔ wyetkɛn ne yyɛɛwɔ neeni baati ɔɔn.

¹ Ɔci ‘ya tieŋjan pwan ne tolan te on Juaŋ ñaalɔ gɔkcin malɛɛkan ne dɔɔyɔ wyetkɛn ne yyɛɛwɔti agi, “Ɔgdɛ ooddɛ waka bala ḍwayi ṭɔlgɛn ywobji Juaŋji neeni pwoktɛ ṭɛɛr wyeñɛti!” ² Ɔci malɛɛka ñamu ati, ɔci waka bala elba ɛkɛji pwoŋnɛ ṭɛɛr wyeñɛti. Ɔci kɔɔgga yeyin kɔɔgga noki ne pɛñan bɛɛn maka moṭi pɔɔyama gen luomti, ɔci maka balki mañ ɛkɛti daŋkun. ³ Ɔci malɛɛka akki ne yyɛɛwɔ waka bala ilba ɛkɛji pwoŋnɛ galŋji. Ɔci pieg waakɛn naŋɛ aŋi yimg bala ba yimg mena tuuta. Ɔci waka tɛɛti galŋji waakɛnda tuuni. ⁴ Ɔci malɛɛka akki ne ḍoogɔ waka bala ḍwayi ṭɔlgɛn ɛkɛji pwoŋnɛ bɔɔdg woŋgɛnti, ɔci pieg aŋi yimgo. ⁵ Ɔci ‘ya tieŋŋan malɛɛka mwoki pieg gɔki agi, “Ywobji i neeniyɛ, ɛkɛ awarɛ. Hay Mena Pwadan, i a mena bala te baaṭi ɔci acca! ⁶ Te lyena ɛkkɛn Ma Kiṭɔ ɔci maka a bɔwan Jwaŋa Tolan nokkitiyɛ, ɛkkɛn ‘wonni i yimg aŋka maattan ɛkkɛn. A ɔɔn yɔmjin te ɛkkɛn doki. Yɔmjin.” ⁷ Ɔci pwana parɛ tieŋŋan ‘ya te nona ɛrki ma waak gɔki agi, “Ɛɛ, hay Ciɛggɔn Jwaŋa yaakinti Naŋki Waak Waakɛnday, ywobji i a tyɛlga ɔci awarɛ!” ⁸ Ɔci malɛɛka akki ne ŋaanɔ waka bala ilba ɛkɛji pwoŋnɛ oŋ waŋɛti, ɔci ma ammɛ oŋ waŋɛ ne pɛñan ba maaño. ⁹ Ɔci ma ammɛ oŋ ne tolan, ɔci ɛkkɛn bala ḍori yenti Juaŋ mena balki war tɛɛn ink tuggɛn neenitiy. Yeti ɛkkɛn waakɛn yali aŋka jieddi naŋki pwani ɛkɛ bɛɛ. ¹⁰ Ɔci malɛɛka akki ne dɔɔyɔ waka bala ilba ɛkɛji pwoŋnɛ kaakci gen luomti. Ɔci cyɛgji ɛkɛ aŋi mielo. Ɔci ma bala kooyi lɛpɛn te pɛñi noono. ¹¹ Ɔci te waka pɛñin ɛkkɛnti neeniyɛ, ɛkkɛn bala ḍori Jwaŋa Tolan Jwaŋa ñaalɔ. Yeti te kɔɔgi ɛkkɛn neeniyɛ, ɛkkɛn waakɛn yali te naŋki ɛkkɛnti bɛɛ. ¹² Ɔci malɛɛka akki ne dɔɔyɔ wilin ne cyɛɛlɔ waka bala ilba ɛkɛji pwoŋnɛ tola tolan, Tol Yuprɛɛtic. Ɔci ɛkɛ piegɛ iinɛ aŋka aga pɔy ḍuaŋan ḍwaŋin bonka pɔya tyɛrñantiy. ¹³ Ɔci ‘ya gɔrcan jɔkin yeyin gɛɛg ne ḍoogɔ bala ba ɔɔŋan. Ɛkkɛn bala koodi bora te gen luom tukɛti, ɔci te kaaŋ tukɛti, ɔci te bɔwa jomi jiek tukɛti. ¹⁴ Ɛkkɛn a boŋki jɔkin ṭɔlgɛn, ɔci ɛkkɛn noŋi naŋka tɛyan naŋka ñyecki may. Ɔci ɛkkɛn maka ḍuaŋan ḍwaŋin ṭɛɛrji waakɛnda ḍɔɔltanyɔ ɛkkɛn te oŋ ṭwaŋ oŋŋa tolan, oŋ Ciɛggɔn Jwaŋa yaakinti Naŋki Waak Waakɛnday. ¹⁵ Ɔci Yaccu gɔki agi, “Tieŋdɛ, ‘ya bɛɛd ba mena ɛɛn neeni! Yom ñɔɔn bala mena wici bɛɛti ɔci ɛkɛ bworŋin ɛkɛ ywaŋdɛyɔ aŋka naa ɛkɛ ooddi warɛ budan ɔci war ɛkɛ yuartan ma bɛɛ.” ¹⁶ Ɔci jɔkin yeyin neeni ḍuaŋan ḍwaŋin ḍɔɔltanyɔ nona bartan ma te tuk Ma Icrayiil agi Armagɛdan. ¹⁷ Ɔci malɛɛka akki ne dɔɔyɔ wyetkɛn ne yyɛɛwɔ waka bala ilba ɛkɛji pwoŋnɛ jwamiji ñaalɔ. Ɔci pwan bɛɛn te on Juaŋ ñaalɔ te kaakciti gɔki agi, “Bawwin!” ¹⁸ Ɔci pɔɔdg bala ṭɛɛntan, ɔci noon wildan ne pɛñan, ɔci warɛ ḍiedan ne tolan. Ɔci ḍiedin neeni yuarŋi menga oŋgati, ṭɛɛr wyeñɛti wɛnni wona men baan aŋŋɛ Juaŋ bɛɛ! ¹⁹ Ɔci bana tolan ŋuottin jitin korki ne ḍoogɔ, ɔci bonk keedin pookɛn waakɛnda ḍɛɛmdin iñɔ. Juaŋ poŋjin te ban Baabil bana tolan aŋka moottɛ ɛkɛ kubaaya mooy ywobji ɛkɛ. ²⁰ Ɔci kaki wyetkɛn waakɛnda ɔci pomk waakɛnda yien doki. ²¹ Ɔci tomŋin ḍwaŋin ḍɛɛmdin ma wyetkɛnti te ñaalɔ pɔliji, ɔci tamñan ne cyɛɛlɔ eci gena kierki ma waak tuggɛ a miyya ne cyɛɛlɔ (100). Ɔci ma bala ḍori Juaŋ te ḍɔŋ tomŋin neeni.

¹ Ɔci malɛɛkan ne dɔɔyɔ wyetkɛn ne yyɛɛwɔ malɛɛkan balki ilban byeŋkɛnti neeni gɛɛl bɛɛn ‘yati, ɔci gɔkkin ‘yati agi, “Bɛɛd, ɔci i lɛɛrtin ‘ya jyeka bɛya ɛŋa tommi tolan ɛŋa ciyi pyega coŋin wyetkɛnti neeni wyeñɛtiy. ² Ɔci ḍuaŋan ḍwaŋin bala iñɔ ṭɛɛrji wɛnni noŋi tomi iki ɛkɛ, ɔci maka bala ciyi ṭɛɛrji wɛnni nogɛ mooya noŋi ɛkɛ tomiy.” ³ Ɔci ‘ya eñña malɛɛka wɔɔŋji te Boŋ Juaŋo. Ɔci ɛɛŋ gɛɛl bala taab gen luom tidanti aŋan, gena gen luom warɛ kuumi te yenga yeyin yenga ḍori Jwaŋa Tolany. Ɛkɛ balki wyetkɛ ne dɔɔyɔ wyetkɛn ne yyɛɛwɔ, ɔci ṭwoŋkɛ ne inyaakkɛn. ⁴ Ɔci ɛŋa neeni ɛŋi bworŋa buol ɔci bworŋa tidda, ɔci ɛkɛ ɛŋi dahab, ɔci gwoyya wiɛlɛn pɛñan, ɔci luulan. Ɔci ɛkɛ eci kubaaya naŋi ma te dahab bieŋɛti, ɔci kubaaya neeni kuumi te waka yeyin ne tolan wak tomi ɛkɛy. ⁵ Ɔci kiikan neeni bala ɛkɛ ñamɛti agi, “Baabil A Mɛy Maka Noŋi Naŋka Yeyin Ne Tolan Iñɔ Šɛɛrji Wɛnniy.” ⁶ Ɔci ‘ya gɔrcan ɛɛŋ nogɛ yimg maka pwadin, ɔci yimg maka tuun te yenti Yaccuy. Ɔci ne ɛkɛ yuarna ‘yayɛ, ‘ya yomu buañi ne tolan. ⁷ Ɔci malɛɛka gɔkkin agi, “I buay ogo? Ɛŋa neeni konɛ lɛɛlla ‘ya bora iki gen luom taabi ɛkɛ neeni iti, gena gen luom balkɛ wyetkɛ ne dɔɔyɔ wyetkɛn ne yyɛɛwɔ, ɔci ṭwoŋkɛ ne inyaakkɛny. ⁸ Gena neeni oŋ gɛɛlti ɛkɛ lakun tɛɛti, yeti acca ɛkɛ tɛɛti moki bɛɛ. Ɛkɛ noŋi koodi bora te kola beyan, ɔci ooddi bora aŋka nuotti jitin. Ɔci ne maka ciyi iñɔ ṭɛɛrji wɛnni gen luom yuartitiyɛ, ɛkkɛn yomgɛn buaya. Gena maka yeng ɛkkɛn baaw worga tɛɛtinti te wona ṭɛɛr cɔnnɛ Juaŋ men bɛɛy. Gen luom neeni ɛkɛ bala tɛɛti lakun, ɔci acca ɛkɛ bala bɛɛ, yeti ɛkɛ warɛ lɛɛldɛ bora moki. ⁹ “Ɔci wɛnniyɛ, dala ñing tɛɛn bala ɔci wyeñ wɔŋŋo. Wyetka ne dɔɔyɔ wyetkɛn ne yyɛɛwɔ neeniyɛ, gena pomka ne dɔɔyɔ wyetkɛn ne yyɛɛwɔ ciyi ɛŋa neeniy. Ɔci ɛkkɛn a ḍuaŋan ḍwaŋin ne dɔɔyɔ wyetkɛn ne yyɛɛwɔ mokiy. ¹⁰ Ɔci ɛkkin ne dɔɔyɔ ḍɛɛmdin, ɔci ɛka ne cyɛɛlɔ aŋka bala mwoki noon men, ɔci ɛka parɛ bala bɛya. Ɔci ɛkɛ ne bɛɛdiyɛ, ɛkɛ noon mugdɛ wɔɔka ne ḍuulan budan. ¹¹ Oŋ yeti gen luom mena bala te baaṭi oŋ baaw acca dɔɔkti moki neeniyɛ, ɛkɛ a ḍuaŋa tolan akki makɛn a dɔɔyɔ wyetkɛn ne ḍoogɔ. Yeti ɛkɛ te ɛkkin ne dɔɔyɔ wyetkɛn ne yyɛɛwɔ neeniti, ɔci ɛkɛ ooddi tuwa. ¹² “Ɔci ṭwoŋka yuarca i a inyaakkɛn neeniyɛ, gena ḍuaŋan ḍwaŋin ne inyaakkɛn, ḍuaŋan kanŋa ɛkkɛn mugɛ men bɛɛy, yeti ɛkkɛn aga ḍuaŋan ḍwaŋin wɔɔka ne ḍuulan iki gen luomo. ¹³ Maka neeni ɛkkɛn jiek ñaagɛyɔ aŋka gen luom ‘wontan ɛkkɛn war tɛɛn ɛkkɛn ɔci ḍwaŋji ɛkkɛn. ¹⁴ Ɔci ɛkkɛn noŋdi ṭwaŋ iki Kalŋo, yeti Kalŋ ɛkkɛn bwandɛ acaan Kalŋ a Ciɛggɔn ḍuaŋan ḍwaŋin waakɛnda, ɔci maka bala moki ɛkɛ neeniyɛ, gena maka borni ɛkɛy, ɔci maka kɛnnɛ ɛkɛ boray, ɔci maka jyeti ɛkɛtiy.” ¹⁵ Ɔci malɛɛka ‘ya myenna te pyega ciyi ɛŋa toban neeni agi, “Pyega neeni a maka coŋin, ɔci kɛɛna pookɛn, ɔci keedin, makan da te tuk ɛkkɛn. ¹⁶ Yeti ṭwoŋka yuarca i gen luomti a inyaakkɛn neeniyɛ, ɛkkɛn yooktan te ɛŋa toban neeni, ɔci ɛkɛ yaatan ɛkkɛn, ɔci ɛkɛ daltan ɛkkɛn warɛ budan. Ɔci yoŋgi ɛkɛ tontan ɛkkɛn maaño. ¹⁷ Ɔci acaan Juaŋ ɛkkɛn naŋŋɛ yomgɛnti aŋka paŋi ɛkkɛn ñaaktanyɔ, ɔci ɛkkɛn gen luom ‘wontan ḍwaŋji ɛkkɛn ne jyeka guaŋŋɛ Juaŋ neeni baati ɔɔn. ¹⁸ “Ɔci ɛŋa yuarca i neeniyɛ, ɛkɛ a bana tolan. Ɔci ḍuaŋan ḍwaŋin ṭɛɛrji wɛnni bala ɛkɛ bieŋɛti waakɛnda.”

¹ Ɔci ne naŋka neeni baaniyɛ, malɛɛka parɛ yuarcan ‘ya moki kooyin iñɔ te pɔliji. Ɛkɛ balki war tɛɛn ne tolan, ɔci ṭɛɛr dyɛŋŋɛji ne tolan te dyɛŋi ɛkɛ. ² Ɔci ɛkɛ yaajjin te pwana tolan agi, “Ḍɛmmin! Ban Baabil bana tolan, ḍɛmmin! Non ɛkɛ aŋi nona cieki jɔkin ṭɔlgɛn, ɔci jɔkin yeyin i ḍiirga yeyin yookiti may. ³ Acaan kɛɛn waakɛnda moti mooya noŋi ɛkɛ tomiy. Ɔci ḍuaŋan ḍwaŋin iñɔ ṭɛɛrji noŋi tomi iki ɛkɛ. Ɔci maka taajin iñɔ ṭɛɛr konɛ warda, ɛkkɛn cyɛŋi te wak ɛkɛ waka yeyin.” ⁴ Ɔci ‘ya tieŋŋan pwana parɛ moki te pɔliji gɔki agi, “Koodɛ bora te ɛkɛti hay, ma ‘ya, naa ɛkkɛ ñoodɛ i ɛkɛ te nɔji ɛkɛ bɛɛ, ɔci naa naŋka bɛya ɛkɛti yaayan neeni bɛya ɛkkɛti bɛɛ. ⁵ Nɔji ɛkɛ kɔɔni dɛñjin ne ñaalɔ pɔliji, ɔci Juaŋ poŋjin te nɔji ɛkɛ neeni. ⁶ Dala ɛkkɛ noŋdɛ ɛkɛti bala ba naŋka naŋdɛ ɛkɛ ɛkkɛtiy. Ɔci ɛkɛ ‘uottɛti ɛkkɛ oŋki ne yyɛɛwɔ, ba naŋka naŋŋɛ ɛkɛ waakɛnda. Ɔci ɛkɛ ‘wondɛ ɛkkɛ oŋki ne yyɛɛwɔ, bala ba mooya loommiyɔ ɛkɛ kubaayaji neeni. ⁷ Ɔci dala ɛkkɛ noŋdɛ ne yaayan ɛkɛti bala ba jiɛta jieyi ɛkɛ warɛ agi ɛkɛ pwadjɛ wanna, ɔci dala ɛkɛ yaadɛ yomɛti. Ɛkɛ gɔki agi, ‘‘Ya ciy ba ɛŋa a ḍuaŋa! ‘Ya a ɛŋa cieñ bɛɛ, ɔci ‘ya yom yoñ ŋeej bɛɛ!’ ⁸ A ɔŋŋiyɛ, naŋka yeyin bɛya ɛkɛti te oŋŋa ne cyɛɛlɔ. Gena waja, ɔci yom yoño, ɔci koño. Ɔci ɛkɛ amdɛ maañ acaan Ciɛggɔn mena ɛkɛ wannɛ neeniyɛ, gena Jwaŋa Tolan Mena Yaakɛnti Naŋki Waak Waakɛnday. ⁹ “Ɔci ḍuaŋan ḍwaŋin noŋi iki ɛkɛ tomi ɛkkɛn wiakti te ɛkɛ, ɔci ɛkkɛn yomgɛn yiegdi ne ɛkkɛn gɔrti jien ɛkɛ ḍuuŋiy. ¹⁰ Ɔci ɛkkɛn buaya, ɔci yɔɔtti te nona loonan, ɔci gɔkti agi, ‘Aa, cca cca cca! Hay, i bana tolan ban Baabil! Ywobji bɛɛn iti te oŋŋa ne cyɛɛlɔ doki!’ ¹¹ “Ɔci taajin iñɔ ṭɛɛrji wɛnni wiakti waakɛnda moki, acaan wak ɛkkɛn menga bala wɛɛṭi moki bɛɛ. ¹² Wak ɛkkɛn neeni gena dahab, ɔci bil pɔddan, ɔci gwoyya pwadin, ɔci luulan, ɔci tiil bɔwan, ɔci bworŋa a buol, ɔci bworŋa tidan, ɔci janga piedgɛn milin jitkɛn waakɛnda, ɔci waka naŋi ma te liañ lɛkɛ waakɛnda, ɔci waka naŋi ma te janga wiɛlɛn pɛñan, ɔci bila noŋki ma girin tidan, ɔci bila tɛyan, ɔci gwoyya cɔtki ma oorg pwadin, ¹³ ɔci girpa ɔci janga noŋki ma kilk, ɔci waka ṭultan ma, ɔci ḍɔŋi poom, ɔci mooy, ɔci ñɔɔn, ɔci ḍuobja liŋñan, ɔci pok, ɔci dok, ɔci kulin, ɔci muntan, ɔci babin wuatan muntan, ɔci maka kɛɛnk, ɔci ma baano. ¹⁴ “Ɔci taajin gɔkti ɛkɛti agi, ‘Acca naŋka war i buagiti ne pɛñan neeni waakɛnda ati te iti doki. Ɔci wak i waka coŋin ɔci pwani i ḍakcin budan doki, menga ɛkkɛn yuarŋɛ moki bɛɛ!’ ¹⁵ Ɔci maka wɛɛṭi waka neeni ɔci aŋi maka cyɛgan neeni, ɛkkɛn yɔɔtti te nona loonan. Ɛkkɛn buayi te taab bɛɛn ɛkɛti yaayan neeni. Ɛkkɛn wiakti ɔci kuuddi ne tolan. ¹⁶ “Ɔci gɔkti agi, ‘Aa cca, cca cca! Ɛkɛ a bana tolan, ɛkɛ bala ɛŋi bworŋa tiil, ɔci bworŋa eci bilk ne coŋɔn bworŋa buol, ɔci bworŋa tidan. Ɔci ɛkɛ ɛŋi dahab, ɔci gwoyya wiɛlɛn pɛñan, ɔci luulan! ¹⁷ Ɔci te wɔɔka ḍuulan neeni wak ɛkɛ waka cyɛgan neeni ḍakcin!’ “Ɔci maka ‘uoti murkan ḍwaŋin, ɔci maka bala murkan jitin, ɔci maka kanŋan murkan jitin. Ɛkkɛn bala yɔɔd te nona loonan, ¹⁸ ɔci yaadan ne ɛkkɛn gɔrki jien maañy, ɔci ɛkkɛn gɔki agi, ‘A bana ɔki pari bala ba bana tolan neeniy!’ ¹⁹ Ɔci ɛkkɛn ṭɛrk tuokci wyetkɛnti, ɔci bala yaadan, ɔci kuuyi, ɔci wiak gɔki agi! ‘Aa cca cca cca! Hay, i bana tolan! Maka ati galŋji korkɛn kuumi te wak ɛkɛ waka pwadin. Ɔci te wɔɔka ne ḍuulan ɛkɛ yaañi doki! ²⁰ Hay, ɛkkɛ maka pɔliji, dala ɛkkɛ yomgɔ ñɔya te lɛɛktin ɛkɛ neeni! Hay, ma Juaŋ ɔci cuudan Juaŋ ɔci maka a bɔwan Jwaŋa Tolan, dala ɛkkɛ yomgɔ ñɔya! Juaŋ ywobji olnɛ ɛkɛ wyeñɛti te naŋka naŋŋɛ ɛkɛ ɛkkɛtiy!’ ” ²¹ Ɔci malɛɛka tolan guonan tolan ba pom jien ɔɔn luolnɛ ñaalɔ, ɔci yiɛmnɛ galŋji, ɔci ɛkɛ gɔki agi, “Baabil bana tolan neeni, ɛkɛ yiɛptɛ Juaŋ iñɔ ne pɛñan a ɔɔn, ɔci ɛkɛ yuartan ma oŋgati moki bɛɛ. ²² Ɔci pwan maka ciepi coŋkɔn, ɔci maka ‘uali, ɔci maka kuoti luañ, ɔci maka kuoti ṭwoŋki gɛɛg tieŋtan ma iti moki bɛɛ! Ɔci maka a gɔɔñk yuartan ma iti moki bɛɛ, ɔci walla pom jien gɛɛl tieŋtan ma iti moki bɛɛ! ²³ Ɔci dyɛka gɛɛl dɛkti moki bɛɛ, ɔci pwan mena ñooni ɔci ‘war ñooni gɛɛl tieŋtan ma moki bɛɛ, acaan taajin i ɛkkɛn a maka iñɔ wɛnni, ɔci oomk i kɛɛna pookɛn jyɛnni i ɔntɔ waakɛnda! ²⁴ Yimg maka a bɔwan Jwaŋa Tolan yuarɛ ma ban Baabil i yimg ma Juaŋ, ɔci yimg maka noŋŋɛ ɛkɛ ṭɛɛr wyeñɛti waakɛnda.”

¹ Ɔci ne naŋka neeni baaniyɛ, ‘ya tieŋŋan pwana tolan, bala ba pwan maka coŋin, gɔki te ñaalɔ pɔliji agi, “Jieddɛ Juaŋo! Yɔɔd bala Jwaŋ ikinti, ɔci war tɛɛn ɔci jied bala ɛkɛti moki! ² Ywobji ɛkɛ awarɛ, ɔci a tyɛlga! Ywobji ɛkɛ olnɛ ɛŋa toban ɛŋa ṭɛɛr konɛ yaaññɛ te tomi ɛkɛ neeni wyeñɛti. Ɔci Juaŋ yimg maka moṭi ɛkɛti dɔɔnɛ bora!” ³ Ɛkkɛn gɔkcin moki agi, “Jieddɛ Juaŋo! Jien ɛkɛ ṭuula ne baaṭi ɔɔn, baadi bɛɛ!” ⁴ Ɔci cyekin a men baan wyetkɛn ne ŋaanɔ (24) i waka tɛɛti ne ŋaanɔ neeni ḍɛɛmdin ñingɛn kuomjɛ iñɔ, ɔci morcin Juaŋti mena ciyi te kaakci neeniti gɔki agi, “Ɛɛ, dala bala a ɔɔn. Jieddɛ Juaŋo!” ⁵ Ɔci pwan bɛɛn te kaakciti gɔki agi, “Jieddɛ Jwaŋ ikin hay, maka kanŋan ɛkɛti waakɛnda, ɔci ɛkkɛ maka buayi ɛkɛ maka ḍwaŋin ɔci maka ḍyɛrin!” ⁶ Ɔci moki ‘ya tieŋŋan pwan bala ba pwan polla tolan, ɔci bala ba pwan pyega coŋin, ɔci bala ba pwan ñaal ne wiagi ne pɛñan gɔki agi, “Jieddɛ Jwaŋo! Ciɛggɔn ikin Jwaŋa Tolan Mena balki War Tɛɛn Waakɛnda neeniyɛ, ɛkɛ a Ciɛggɔn Tolan! ⁷ Ɔci dala ikin yomgɔ ñɔya, ɔci jiettin ɛkɛ! Acaan oŋ ḍɛɛn Kalŋ bɛɛn doki, ɔci ñooni ɛkɛ warɛ ‘yɛɛŋŋɛ doki. ⁸ Ɔci ɛkɛ ‘woñgi ma bworŋ ḍɛɛn bworŋa bɔwan aŋka ‘yɛɛŋdɛ ɛkɛ.” Bworŋa neeni, ɛkɛ a naŋki ma Juaŋ naŋka pwadin. ⁹ Ɔci malɛɛka gɔkkin ‘yati moki agi, “Kiejja agi, ‘Yom ñɔɔn bala maka bornɛ Juaŋ te oŋ ḍɛɛn Kalŋy!’ ” Ɔci malɛɛka gɔkkin ‘yati moki agi, “Gena jyek Jwaŋa Tolan jyeka awarɛ neeni.” ¹⁰ Ɔci ‘ya ḍwoñjan iñɔ ɛkɛ ñamɛti ka morca ɛkɛti, yeti ɛkɛ gɔkkin ‘yati agi, “A’a, naa i ḍwoñja iñɔ ‘yati bɛɛ! Ya a mena kanŋan Juaŋti ba i, ɔci ba modg ɛkkɛ maka balki jwali Yaccu Kiṭɔy. Yeti dala i ḍwoñja iñɔ gena Jwaŋa Tolanti! Acaan lali Yaccuyɛ, ɛkɛ a jyek Boŋ Juaŋ jyeka guagɛ ma te baaṭiy.” ¹¹ Ɔci ‘ya gɔrcan pɔli tukɛ pɔŋnɛ, ɔci muntan bɔwan yuarcan ‘ya, ɔci mena taab ɛkɛti neeni yenti Mena Pwadan ɔci Awarɛy. Ɔci ɛkɛ woni ma awarɛ, ɔci ɛkɛ noŋi ṭwaŋ awarɛ. ¹² Ɛkɛ woŋgɛ bala ba maañ lɛmmɛ, ɔci ɛkɛ ɛŋi taaggan cyɛgji wyeñɛti ne coŋɔn. Ɔci ɛkɛ balki yenti kiijji ma ɛkɛti, ɔci yenta neeni menga yaakinti paŋi ɛkɛ bɛɛ, gena mena balki yenta neeni aŋka yaakinti paŋi ɛkɛ parɛy. ¹³ Ɔci ɛkɛ ɛŋi bworŋa warɛ jali te yimgo, ɔci ɛkɛ yenti “Jwali Juaŋo.” ¹⁴ Ɔci ackan ñaalɔ pɔliji bootcin ɛkɛti bala taab te muntan bɔwan, ɔci ɛkkɛn ɛŋi bworŋa bɔwan pwadan. ¹⁵ Ɔci jwali Kiṭɔ bɛɛn bora te ɛkɛ tukɛti aŋka kɛɛna pookɛn moddɛ ɛkɛ te jwali ɛkɛ neeni. Ɔci ɛkɛ ɛkkɛn ciddɛ te kɔmña naŋi ma te bila tɛyan. Ɔci ɛkɛ ywobji Jwaŋa Tolan oldɛ ma wyetkɛnti iñɔ wɛnni. ¹⁶ Ɔci ɛkɛ balki yenti kiinɛ omɛti ɔci bworŋ ɛkɛti gɔki agi, “CIƐGGƆN CYEKIN ḌWAÇIN WAAKƐNDA.” ¹⁷ Ɔci malɛɛka gɛɛl ne cyɛɛlɔ yuarcan ‘ya bala yɔɔd oŋ waŋɛti. Ɔci ɛkɛ yaajjin ne pɛñan te pwana tolan gɔkcin wɛjjin peyi ñaalɔ yeccu pɔliji waakɛndati agi, “Bɛɛdɛ wyetkɔ ḍɔɔldɛ oomdin Jwaŋa Tolanti! ¹⁸ Bɛɛdɛ aŋka ɛkkɛ omdɛ yoŋgi maka a ḍuaŋan ḍwaŋin, ɔci yoŋgi maka wɛɛyi ma, ɔci yoŋgi maka ackan, ɔci yoŋgi maka taab te muntan, ɔci yoŋgi muntan, ɔci yoŋgi maka a kɛɛnk bɛɛy, ɔci yoŋgi maka a kɛɛnk, ɔci yoŋgi maka ḍyɛrin ɔci maka ḍwaŋin!” ¹⁹ Ɔci ‘ya gɔrcan gen luom ɔci ḍuaŋan ḍwaŋin iñɔ ṭɛɛrji wɛnni wyetkɛn ḍɔɔlɛ aŋka noŋi noow iki mena taab te muntan, i ackan ɛkɛ. ²⁰ Ɔci gen luom i bɔwa jomi jiek mena noŋi naŋka tɛyan naŋka ñyecki ma aŋka maka jyeti mañ gen luomti diennɛ ñin ɛkɛ ɔci morcin pɔɔyama ɛkɛti neeniyɛ, ɛkkɛn goomiyɔ malɛɛkan, ɛkkɛn yiɛpcɛ galŋji galŋ maña koldan ɔci jiena yaayan. ²¹ Ɔci ackan ɛkkɛn noŋŋɛ jwalla bɛɛn bora te mena taab te muntan tukɛtiy, ɔci wɛjjin waakɛnda korkɛn kuumi te yoŋgi ɛkkɛn.

¹ Ɔci ‘ya gɔrcan, ɔci malɛɛka yuarcan ‘ya kooyin te ñaalɔ pɔliji. Ɛkɛ eci mɔpta ṭɔɔli kola beyan bieŋɛti i jiŋgɔn tolan. ² Ɔci ɛkɛ kaaŋ muŋŋɛyɔ ɔci ḍɛɛŋŋɛ aŋka ciya a ḍɛɛggɔn yuong a alp ne cyɛɛlɔ (1,000). (Gena Jwaŋa Yaayan mena noŋi ma ñingɛn.) ³ Ɔci malɛɛka ɛkɛ yiɛmnɛ jiju jiidɔ kola beyanti ɔci ‘uornɛti, ɔci mornɛ kitim aŋka naa kɛɛna pookɛn jyɛttɛ ɛkɛ ɔntɔ moki bɛɛ. Ɔci naŋka neeni bala a ɔɔn ne yuong a alp ne cyɛɛlɔ (1,000) neeni baati ɔɔn. Ɛkɛ oŋ pɔktɛ Juaŋ ne ḍiɛran te wɔɔka ne ḍuulan budan. ⁴ Boŋki maka morcin gen luomti, ɔci walla morcin pɔɔyama ɛkɛti bɛɛ, ɔci walla mañ gen luom mugɛ ɛkkɛn ñomgɛnti walla byeŋkɛnti bɛɛ neeniyɛ, yuarcan ‘ya. Ɛkkɛn nogɛ ma te mitta ɛkkɛn ma myetkɛti te jwalla awarɛ jwalla lɛɛlnɛ Yaccu Kiṭɔ boray. Ɔci ɛkkɛn ma myetkɛ te jwali Jwaŋa Tolan. Ɛkkɛn ‘uowin, ɔci cooccin kokin wyetkɛnti. Ɛkkɛn wonnɛ Juaŋ war tɛɛn aŋka ɛkkɛn ma gottan, ɛkkɛn noon mugɛ i Kiṭɔ yuong a alp ne cyɛɛlɔ (1,000). ⁵ (Maka pookɛn maka tuunyɛ, ɛkkɛn ‘uowin moki bɛɛ ne yuonga a alp ne cyɛɛlɔ (1,000) neeni baaki ɔɔn.) Gena jɔŋŋin ma jɔŋti ñaalɔ ñamu neeni. ⁶ Maka balki genga jɔŋŋin ma jɔŋti ñamuti neeniyɛ, yom ñɔɔn bala ɛkkɛnti, ɔci ɛkkɛn pwad pwado. Ɔci lyena ne ŋoyɔ bala ɛkkɛnti moki bɛɛ, yeti ɛkkɛn aga gaciicin Juaŋ ɔci Yaccu Kiṭɔ. Ɔci ɛkkɛn noon muktan i ɛkɛ yuong a alp ne cyɛɛlɔ (1,000). ⁷ Ɔci ne yuong a alp ne cyɛɛlɔ (1,000) neeni baatiyɛ, Jwaŋa Yaayan oŋ pɔktan ma te ciginji, ⁸ ɔci ɛkɛ koodi bora aŋka kɛɛna pookɛn maka ciyi ṭɛɛrji pɔli ŋwayyɛ waakɛnda neeni jyɛttɛ ɔntɔ ɛkɛ moki. (Gena Gɔɔg ɔci Mɛgɔg.) Ɔci Jwaŋa Yaayan ɛkkɛn limdiyɔ ṭwaŋti. Ɔci ɛkkɛn kɔɔna kɔɔni bala ba ŋɔmi galŋo. ⁹ Ɔci ɛkkɛn ati ṭɛɛr konɛ warda, ɔci ɛkkɛn non ma Juaŋ yudiyɔ, ɔci bana anki ɛkkɛn moki yudiyɔ. Yeti maañ bɛɛn te ñaalɔ Juaŋti ɔci ɛkkɛn ammɛ. ¹⁰ Ɔci Jwaŋa Yaayan mena ɛkkɛn jyɛnnɛ ɔntɔ neeni yiɛpcɛ malɛɛkan galŋ maañ ɔci jiena yaayanti. Ɔci nona neenitiyɛ, gen luom ɔci bɔwa jomi jiek bala wɛnan. Ɔci ɛkkɛn ciyi aŋan aŋka taabdi yuonginda yuonginda ne baaṭi ɔɔn. ¹¹ Ɔci kaakca bɔwan tolan yuarcan ‘ya moki. Ɔci mena ciyi te kaakca neeniyɛ, yuarcan ‘ya moki. Ɔci ɛkɛ a mena waka bala ṭɛɛrji ɔci pɔliji yiŋi ɔntɔ te ɛkɛ ñamɛti, ɔci ṭɛɛr ɔci pɔli baaw yieni. ¹² Ɔci ‘yeeñga bala galŋji kooyin bora. Ɔci lien ɔci non lien maka naŋki ɛkkɛn yeyin bala ɛkkɛn korkɛntiyɛ, kooyin bora te nona tuuki ɛkkɛny. Ɔci maka tuutan maka naŋki ɛkkɛn yeyin, maka ḍwaŋin ɔci maka ḍyɛrin, ɛkkɛn yuarcan ‘ya bala yɔɔd mena ciyi te kaakci ñamɛti. Ɔci worgan korkɛn pɔɔggɛ, ɔci worga parɛ konɛ pɔŋnɛ, gena worga tɛɛtin. Ɔci jiek olnɛ Juaŋ maka tuun maka yeyin neeni wyetkɛnti bala ba jyeka bala worga neeni konɛti, menga da ba naŋki ɛkɛ. ¹⁴ Ɔci lien i bana maañyɛ, ɛkkɛn yiɛmnɛ Juaŋ galŋ maaño. (Ɔci ba jyek galŋa neeniyɛ, gena lyena ma oldɛ Juaŋ maccuy. Gena lyena akki ne yyɛɛwɔy.) ¹⁵ Ɔci maka yengɛn baaw worga tɛɛtinjiyɛ, ɛkkɛn yiɛmnɛ Juaŋ galŋji galŋ maaño.

¹ Ɔci ‘ya pɔlla woonɛ ɔci ṭɛra woonɛ yuarcan. Acaan pɔlla ñamu ɔci ṭɛra ñamu baaw yien doki, ɔci galŋ bala moki bɛɛ. ² Ɔci ‘ya Yɔhanna bana pwadan Urcaliim woonɛ yuarcan bɛɛn te pɔlla ñaalɔ Juaŋti. Ɛkɛ warɛ ywaŋŋɛ bala ba ñooni ne luoṭṭi ‘uarɛtiy. ³ Ɔci ‘ya tieŋjan pwan ne tolan te ñaalɔ pɔliji gɔki agi, “Gɔrtɛ on Juaŋ bala iki mako! Ɔci ɛkɛ cootti iki ma a cyɛɛlɔ, ɔci ɛkkɛn aga ma ɛkɛ. Ɔci Juaŋ waanɛ aga Jwaŋ ɛkkɛn. ⁴ Ɔci Juaŋ ɛkkɛn puudɛ ñingɛnti te piego. Ɔci lien bala moki bɛɛ. Ɔci yom yoñ, ɔci yook, ɔci pɛñi ɛkkɛn gɛɛl bala moki bɛɛ. Acaan naŋka ñamu bawwin doki.” ⁵ Ɔci mena ciyi te kaakci gɔkcin agi, “Gɔṭṭi, ‘ya waak naŋdi aga waka wonkɛn waakɛnda!” Ɔci ɛkɛ gɔkkin ‘yati moki agi, “Kiejja jyeka neeni a jyeka awarɛ ɔci pwadɔ.” ⁶ Ɛkɛ gɔkkin ‘yati moki agi. “Bawwin. ‘Ya a mena bala te ñamu, ɔci ‘ya a mena bala ne ŋoyɔ. ‘Ya mena ami yiɛn ‘woñga pieg budan te bwan waŋi pyega tɛɛtki may. ⁷ Mena naŋka neeni bwandɛyɛ, ‘ya agdi Jwaŋ ɛkɛ ɔci ɛkɛ aga kaci ‘ya. ⁸ Yeti maka buayi ɔci maka jyeti bɛɛ, ɔci maka yeyin, ɔci maka noki ma, ɔci maka noŋi tomi, ɔci maka oomk, ɔci maka moṭi jɔkin pɔɔtan ma a pɔɔt, ɔci maka jomi jiek waakɛndayɛ, gen ɛkkɛn waakɛnda a coodi galŋa koldan maañ ɔci jiena yaayany. (Ɛkɛ a lyena akki ne yyɛɛwɔy.)” ⁹ Malɛɛkan a dɔɔyɔ wyetkɛn ne yyɛɛwɔ gɛɛl bɛɛn ‘yati moki, gena malɛɛkan tieci ilban kuumi te ink tuggɛn ne dɔɔyɔ wyetkɛn ne yyɛɛwɔ ink tuggɛn ne ŋoyɔ byeŋkɛntiy. Ɔci ɛkɛ gɔkkin ‘yati agi, “Bɛɛd ɔci ‘ya i lɛɛrtin Ñoonno, gena ɛŋ Kalŋo.” ¹⁰ Ɔci ɛkɛ ‘ya eñña te Boŋ Juaŋ ne poma tolan beyanti, ɔci ɛkɛ ‘ya lɛɛrna bana tolan ban Urcaliim bana pwadan bɛɛn te ñaalɔ pɔliji te Jwaŋa Tolantiy. ¹¹ Ɛkɛ balki pwani Jwaŋa Tolan. Ɔci ɛkɛ galdan bala ba guonan pwadan lirŋany. ¹² Ɔci bana tolan neeni balki kaña tolan beyany, ɔci kañ ɛkɛ balki tuggɛ a inyaakkɛn wyetkɛn ne yyɛɛwɔ. Ɔci ‘yegin tuggɛn neeni balkin malɛɛkan a inyaakkɛn wyetkɛn ne yyɛɛwɔ. Ɔci yeng bala kiinnɛ Juaŋ ‘yeginti, gena yeng keedin ma Icrayiil keedin a inyaakkɛn wyetkɛn ne yyɛɛwɔy. ¹³ Taaŋŋa ne cyɛɛlɔ balki ‘yegin ne ḍoogɔ. ‘Yegin ne ḍoogɔ yoṭi pɔya tyɛrñanti, ɔci ɛkkɛn ne ḍoogɔ yoṭi pɔya cuayati, ɔci ɛkkɛn ne ḍoogɔ yoṭi pɔya ‘wollanti, ɔci ɛkkɛn ne ḍoogɔ yoṭi pɔya kooriyati. ¹⁴ Ɔci kañ baan balki gwoyi kaañ ŋwayyɛ a inyaakkɛn wyetkɛn ne yyɛɛwɔ, ɔci balki yeng Cuudan Kalŋ a inyaakkɛn wyetkɛn ne yyɛɛwɔ. ¹⁵ Ɔci malɛɛka gɔwwin i ‘ya neeni balkɔn kɔmña naŋi ma te dahab bieŋɛti aŋka poṭṭi ɛkɛ bana tolan neeni i kaak tuggɛn ɔci kaañ waanɛ daŋkun. ¹⁶ Ɔci bana tolan neeni pɔɔyi ma a mɔɔlla, ɛkɛ lɛkɛ poorŋɛ a porto. Ɔci malɛɛka baan poorŋɛ te kɔmñi yomgɛ bɛɛn wɔɔkan a alpn a inyaakkɛn wyetkɛn ne yyɛɛwɔ (12,000). Ɔci beñi baan i baan yomɛ i wara ñaalɔ yoom a yoommin. ¹⁷ Ɔci ɛkɛ kaañ pɔɔññɛ, ɔci bɛɛn duran a miyya ne cyɛɛlɔ ɔci ma baan ne yyɛɛwɔ ɔci ne ŋaanɔ (144). Malɛɛka bala poci te duran pocki may. ¹⁸ Ɔci kaañ cɔdi ma te gwoyya pwadin galdan gwoyya wiɛlɛn pɛñan yenti alyaacib. Ɔci baan da cɔdi ma te dahab pwadin ne tolan lirŋin a lirŋin bala ba kajaajay. ¹⁹ Ɔci kañ baan ŋwayyɛ waakɛnda naŋiyɔ ma te gwoyya pwadin. Ɛkkɛn cyɛli ma a cyɛli te gwoyya pwadin galdan gwoyya wiɛlɛn pɛñany. Ɛkkɛn menga da te cyeni ɛkɛ parɛ. Çwaya ñamu naŋi ma te alyaacib, ɔci ɛka akki yyɛɛwɔ naŋi ma te yakuut ulan, ɔci ɛka akki ḍoogɔ naŋi ma te akik bɔwan, ɔci ɛka akki ŋaanɔ naŋi ma te jamurd. ²⁰ Ɔci ɛka akki dɔɔyɔ naŋi ma te akik katim, ɔci ɛka akki wilin ne cyɛɛlɔ naŋi ma te akik tidan, ɔci ɛka akki wyetkɛn ne yyɛɛwɔ naŋi ma te jabriij, ɔci ɛka akki wyetkɛn ne ḍoogɔ naŋi ma te jaca, ɔci ɛka akki wyetkɛn ne ŋaanɔ naŋi ma te yakuut garan, ɔci ɛka akki inyaakkɛn naŋi ma te yakuut ṭeyan, ɔci ɛka akki inyaakkɛn wilin ne cyɛɛlɔ naŋi ma te piruuc, ɔci ɛka akki inyaakkɛn wyetkɛn ne yyɛɛwɔ naŋi ma te jamacti. ²¹ Ɔci ‘yegin a inyaakkɛn wyetkɛn ne yyɛɛwɔtiyɛ, luulan bala a inyaakkɛn wyetkɛn ne yyɛɛwɔ. Ɔci ‘yegin waakɛnda men da naŋɛ ma te luula ne cyɛɛlɔ. Ɔci pɔy bana tolan naŋi ma te dahab pwadin lirŋin a lirŋin bala ba kajaaja pwadany. ²² ’Ya on Juaŋ ona tolan gɛɛl yuarcan baanji bɛɛ. Acaan Jwaŋa Tolan ɔci Kalŋ ɛkkɛn bana tolan neeni kuomgɛ warda. ²³ Bana neeni buagɔn oŋ waŋɛ ɔci paan aŋka dɛki ɛkɛti bɛɛ, gena pwani Jwaŋa Tolan ɔci pwani Kalŋ aŋka bala dɛki ɛkɛtiy. ²⁴ Keedin iñɔ baanji wɛnni ati te dyɛŋi ɛkkɛn, ɔci ḍuaŋan ḍwaŋin ṭɛɛrji wɛnni cyɛŋi ɛkkɛn ootan ɛkɛti. ²⁵ Kaak tuggɛn bana neeniyɛ, yɔɔd a pɔkin oŋkanda, ɛkkɛn uultan bɛɛ, acaan ween jiñɛ bala aŋan bɛɛ. ²⁶ Keedin waakɛnda ḍɔŋ ɛkkɛn i cyɛŋi ɛkkɛnyɛ, ootan bana neeniji. ²⁷ Yeti gena a giikin gɛɛl kaatti bana neeniji bɛɛ, walla mena noŋi waka etti lɔɔn walla jomi jiek gɛɛl kaatti bana neeniji bɛɛ. Gena maka yengɛn bala worga Kalŋ worga tɛɛtinji aŋka kaatti bana neeniji pookɛny.

¹ Ɔci moki malɛɛka ‘ya lɛɛrna tol tɛɛtin lirŋin a lirŋin bala ba kajaaja. Tola neeni wɔɔdi bora te kaakci Jwaŋa Tolan ɔci Kalŋti. ² Ɔci tool bala yiŋi pɔy bana tolan neeni konɛti, ɔci jana tɛɛtki ma bala yɔɔd tool ḍɔɔggɛti. Ɔci ɛkɛ jied ṭɔlgɛ jitkɛn a inyaakkɛn wyetkɛn ne yyɛɛwɔ, ɛkɛ jied ṭɔlgɛ ponk waakɛnda. Ɔci keedin waakɛn pwaddi te aamk ɛkɛ. ³ Naŋka yaayan gɛɛl bala moki bɛɛ. Kaakci Jwaŋa Tolan ɔci Kalŋ bala bana tolan neeniti, ɔci maka moṭi ɛkɛti ḍwondi iñɔ ɛkɛti. ⁴ Ɔci ɛkkɛn gɔrti woŋgi ɛkɛ, ɔci yenti ɛkɛ bala ɛkkɛn ñomgɛnti. ⁵ Ween jiñɛ baawo, ɛkkɛn buagɔn dyɛka ɔci oŋ waŋɛ moki bɛɛ, Jwaŋa Tolan Ciɛggɔn ikin ɛkɛ dɛki ɛkkɛn. Ɔci ɛkkɛn noon muktan aga ḍuaŋan ḍwaŋin yuonginda yuonginda ɔɔn. ⁶ Ɔci malɛɛka gɔkkin ‘yati agi, “Jyeka neeni ɛkkɛn a jyeka awarɛ. Ɔci Ciɛggɔn Jwaŋa Tolan, mena maka a bɔwan ɛkɛ ‘wonnɛ Boŋ ɛkɛ neeniyɛ, malɛɛka ɛkɛ cuonnɛ aŋka maka moṭi ɛkɛti neeni myettɛ te gena bala bɛya ne pɛñan neeniy.” ⁷ Yaccu gɔki ‘yati agi, “‘Ya baal bɛɛd ne pɛñan. Yom ñɔɔn bala maka bala noŋi ba jyeka jiju worga neeni konɛtiy.” ⁸ Ɔci ‘ya Yɔhannayɛ, tieŋjan ɔci gɔrcan. Ɔci ne ‘ya tieŋna waka neeniyɛ, ‘ya ḍɛmman iñɔ malɛɛka ciegɛti ka morca ɛkɛti. ⁹ Yeti ɛkɛ gɔkkin ‘yati agi, “Naa noŋja a ɔɔn bɛɛ! ‘Ya a kɛɛngɔn Juaŋ ba i, ɔci ba modg ɛkkɛ maka a bɔwan Jwaŋa Tolan, ɔci maka noŋi ba jyeka bala worga neenijiy. Dala i morca gena Juaŋti parɛ! ¹⁰ Naa i jyeka bala worga neeni konɛti gɛɛl cogayɔ bɛɛ, oŋŋa bɛɛdɛ Juaŋ cɔɔllin doki. ¹¹ Mena omi ma korkɛn te waakyɛ, dala ɛkɛ noŋdi ba naŋki ɛkɛ wanna ɔɔn. Ɔci mena noŋi ne pwadanyɛ, dala ɛkɛ noŋdi ba naŋki ɛkɛ wanna ɔɔn. Ɔci mena noŋi waka yeyinyɛ, dala ɛkɛ noŋdi ba naŋki ɛkɛ wanna ɔɔn, ɔci mena pwadanyɛ, dala ɛkɛ ciya ba pwani ɛkɛ wanna ɔɔn, ɔci mena giikin baaw yomɛtiyɛ, dala ɛkɛ ciya ba bolji ɛkɛ wanna.” ¹² Yaccu gɔkkin ‘yati moki agi, “Tieŋŋa. ‘Ya baal bɛɛd ne cwakanti! ‘Ya bɛɛd aŋka ‘ya ma ‘woñga waak ba naŋki ɛkkɛn, menga da ba naŋki ɛkɛ, menga da ba naŋki ɛkɛ, kan ɛkɛ noŋi ne pwadan walla ne yaayany. ¹³ ’Ya a mena bala te ñamu, ɔci ‘ya a mena bala ne ŋoyɔ. ¹⁴ “Yom ñɔɔn bala maka bala noŋi ba jyek Juaŋ aŋka ɛkkɛn aga maka mwoki jan tɛɛtin, ɔci aŋka ɛkkɛn kaatti bana tolanti neeni te kaañ tuggɛ. ¹⁵ Yeti maka bala bana tolan neeni ŋoyɛtiyɛ, ɛkkɛn bala ba gɔkko, ɔci oomko, ɔci nɔɔtko, ɔci maka noki mako, ɔci maka moṭi jɔkin yeyinti, ɔci maka jomi jieko, ɔci maka ani jyeka a jomgin waakɛnda. ¹⁶ “‘Ya Yaccu, malɛɛka ‘ya cuoññan aŋka ɛkɛ ma myettɛ te naŋka neeni kaniican jitin. ‘Ya bɛɛn te Daawudti ɔci te kɛɛgin ɛkɛti. ‘Ya a kɛɛli liin, kɛɛlla dɛkiy.” ¹⁷ Boŋ Juaŋ ɔci Ñooni gɔkti agi, “Bɛɛdɛ!” Mena tieŋŋinyɛ, dala ɛkɛ gɔkti agi, “Bɛɛdɛ!” Mena ami yiɛnyɛ, dala ɛkɛ bɛya. Ɔci mena buagɔnyɛ, dala ɛkɛ pyega tɛɛtki ma neeni eedɛ budan. ¹⁸ Ɔci ‘ya Yɔhanna gɔkka maka tyeŋi jyeka guagɛ ma jiju worga neeni konɛti neeni waakɛnda aŋka naa ɛkkɛn jwali gɛɛl jiettanti ne cyɛɛlɔ bɛɛ, dita Juaŋ ɛkkɛn jiedditi ink tuggɛn ywobji ɛkɛ ink tuggɛn guagɛ ma worga neeni konɛti neeni dita. ¹⁹ Ɔci kan men gɛɛl jwali waŋɛ gɛɛl kyɛññɛyɔ ne cyɛɛlɔ te jyeka neenitiyɛ, gena da ɛkɛ ‘wonnɛ Juaŋ te jan tɛɛtinti neeni, cyɛndɛ ñin Juaŋ te ɛkɛti daŋkun, ɔci te bana tolanti bana pwadanti neeni, ɔci waka guagɛ ma jiju worga neeni konɛtiy. ²⁰ Mena te jyeka neen neeniyɛ, gɔki agi, “Ɛɛ, ‘ya baal bɛɛd ne pɛñan.” Ɛɛ, dala i bɛɛdi, hay, Ciɛggɔn Yaccu! ²¹ Dala Ciɛggɔn Yaccu yomɛ pwada a pwani ɛkkɛti waakida. Amɛɛn.