Pilibbi

Pilibbi

¹ Hay! Ɛkkɛ modg ɔɔn Ma Kiṭɔ waakɛnda ban Pilibbi, ɔɔn kienɔn worga ɛkkɛti, ɔci gaciicinti daŋkun, ɔci dikannti daŋkun. Gena ‘ya Buuluc ɔci mod ikin Timutawuc kɛɛnk Yaccu Kiṭɔ kienɔn worga ɛkkɛti neeni. ² Jwaŋa Tolan Wey ikin i Ciɛggɔn ikin Yaccu Kiṭɔyɛ, dala ɛkkɛn yomgɛn pwada a pwani ɛkkɛti, ɔci ɛkkɛ ‘wontɛ coodi pwani daŋkun. ³ Gɔṭṭɛ, modg ɔɔn, oŋkanda ne ‘ya baala poŋa te ɛkkɛyɛ, ‘ya gɔk Jwaŋa Tolanti a pwatcin te ɛkkɛ. ⁴ Ɔci oŋkanda ne ‘ya baala cɔka Juaŋti te ɛkkɛ waakida a ɔɔnyɛ, ‘ya cɔk te yoma ñɔyan. ⁵ ’Ya yomu ñɔy ñɔy acaan ɛkkɛ balgɛ mokɛ ‘ya oŋkanda te jyek Jwaŋa Tolan te oŋŋa ɛkkɛ tieŋnɛ jyek Juaŋ wanna ne acca neeniti ɔɔn. ⁶ Çeej ‘ya ne pwadan, Jwaŋa Tolan mena poccin noŋi kanŋa pwadan ɛkkɛ yomgɔti neeniyɛ, ɛkɛ kanŋa neeni daldɛ budan amaam bɛɛ. Ɛkɛ kandi ne pwadan ɛkkɛti ɔɔn ne oŋŋa Yaccu Kiṭɔ bɛɛdi ɔɔn. ⁷ Ɛkkɛ balgɛ ‘ya yomuti oŋkanda! A ɔŋŋiyɛ, yɔmjin ‘yati doki ne ‘ya noŋa a ɔɔn ɛkkɛtiy, acaan ɛkkɛ waakida ñoonin iki ‘ya te wɔɔka ‘ya ‘wonnata Juaŋ neeni. Kan ‘ya baal ciginji walla kan ‘ya baal borayɛ, ‘ya yuoc jyeka wonkɛn jyeka pwadin neeni. A ɔŋŋiyɛ, ɛkkɛ ñoonin iki ‘ya te jyeka neeni aŋka ‘ya jyeka neeni yɔɔtca iñɔ ne tɛyan. ⁸ Yom ‘ya ŋeejɛ Juaŋ ne ‘ya baala ana ɛkkɛ a ɔkiy. ‘Ya yomu bala ɛkkɛti ne tolan ba ne Yaccu Kiṭɔ yomɛ baali ɛkkɛti wanna ɔɔn. ⁹ ’Ya cɔk Juaŋti te ɛkkɛ ka dala anna ɛkkɛ anɛ Juaŋ ɔci anna ɛkkɛ anɛ ma baan dala tola daŋkun. Ɔci ŋeejin ɛkkɛ jiek ŋeejɛ neeniyɛ, dala ciɛña a ciɛnñi gɔ moki ciɛñji ñamu ɔɔn. Dala ɛkkɛ ñingɔ tɛya gɔ moki ñingɔ tɛyin ɔɔn ¹⁰ aŋka jiek jitkɛn ŋeeddɛ ɛkkɛ, jyeka neeni pwadɔ walla yeyɔ. Naa jyeka pookɛn gɛɛg bala ɛkkɛ yomgɔti bɛɛ. Dala ɛkkɛ ciedɛ te yoma ne cyɛɛlɔ ne oŋŋa Yaccu Kiṭɔ bɛɛdi ɔɔn. Ɔci dala ɛkkɛ ciedɛ ne pwadan, naa maka pookɛn ḍɛɛmdi iñɔ te naŋki ɛkkɛ bɛɛ. ¹¹ Ɔci ba bolji jana wyeñɛ kuumi te ṭɔlgɛ neeniyɛ, dala ɛkkɛ daŋkun yomgɔ kuma te naŋka pwadin naŋki Yaccu Kiṭɔ. Ɔci a ɔɔnyɛ, ma gɔrti ne naŋki Juaŋ pwadiyɛ, ɔci ɛkkɛn jieddi ɛkɛ. ¹² Hay! Modg ɔɔn, dala ŋeeddɛ ɛkkɛ ne ‘ya olkata ma ciginji a ɔɔnyɛ, ‘ya kanŋa Juaŋ yaañi te naŋka neeni bɛɛ. A ɔɔnyɛ, aŋka jiek ooddi baan konɛ warda. ¹³ Jyek coodi ‘ya jiju ciginji te jyek Kiṭɔyɛ, ŋeecɔn ackan i ma akuuma nona neeni wɛnni waakɛnda. Ɔci jyek ‘ya ati baan konɛti warda daŋkun. ¹⁴ Modg ikin modga coŋinyɛ, ne ɛkkɛn tieŋki jyek coodi ‘ya jiju ciginjiyɛ, ɛkkɛn yomgɛn tɛɛn te jyek Yaccu Kiṭɔ. Ɔci ɛkkɛn bala mieti ma te jyek Jwaŋa Tolan ne pwadan. Ɛkkɛn buayi menga moki bɛɛ. ¹⁵ Awarɛ, hay! Modg ɔɔn, ma gɛɛg mieti ma te jyek Kiṭɔ te yoma pwadan bɛɛ. Ɛkkɛn korkɛn modɔ te naŋka naŋŋɛ Jwaŋa Tolan ‘yati neeni, ɛkkɛn yomgɛn pwadɔ mati bɛɛ. Yeti maka pookɛnyɛ, ɛkkɛn loṭi ma te yoma pwadan. ¹⁶ Ɛkkɛn ani ‘ya acaan te kanŋa naŋdi ‘ya a kanŋa Kiṭɔ neeni, ɔci ŋeecɔn ɛkkɛn ‘ya baal jiju wɛnni te jyek kanŋa Yaccu. ¹⁷ Maka loṭi ma te yoma yaayan neeniyɛ, ɛkkɛn korkɛn modɔ ‘yati, ɔci ɛkkɛn loṭi ma te yoma awarɛ bɛɛ. Ɛkkɛn poŋi gɔki agi ne ɛkkɛn lortinti ma a ɔɔnyɛ, agi aŋka ‘ya taabjɔ ne tolan ciginji wɛnni. ¹⁸ Yeti baatɔ! Ne ma balki lorki ma te yoma yaayan walla te yoma awarɛyɛ, jyek Kiṭɔ bala ooddi mati men ɔɔn, ɔci acaan a ɔŋŋiyɛ, ‘ya yomu ñɔɔna ñɔɔno. ¹⁹ Yom ‘ya mwondi te ñɔɔn bɛɛ. ‘Ya yomu ñɔɔna ñɔɔn oŋkanda ɔɔn. Ɛkkɛ balgɛ cɔkɛ Juaŋti te ‘ya, ɔci Boŋ Yaccu Kiṭɔ bala ‘yati, ɔci acaan a ɔŋŋiyɛ, ŋeej ‘ya ‘ya pɔkta Juaŋo. ²⁰ Yom ‘ya buagɔn dala ‘ya gɔkca mati ne pwadan acca, ɔci oŋkanda ɔɔn lɔɔdja bɛɛ. Kan ‘ya nokta ma, walla kan ‘ya ciy tɛɛt men ɔɔnyɛ, ‘ya buaga dala Kiṭɔ ŋeettan ma a Kiṭɔ tol tol te naŋki ‘ya neeni. ²¹ Kan ‘ya ciy tɛɛt ɔɔnyɛ, ‘ya ciy noŋ kanŋa Yaccu Kiṭɔ. Yeti kan ‘ya tuudyɛ, pwatcin ne tolan nɔñji, acaan Juaŋ ‘woñi ‘ya te waka pwadin. ²² Kan ‘ya ciy tɛɛtyɛ, ɔci ‘ya yaakati ma magdi te jyek Juaŋo. ²³ A ɔŋŋiyɛ, ‘ya waru yikcan ñaalɔ gena naŋdi ne cyɛɛlɔ yuarca bɛɛ, ‘ya yaakati gɔkca lien pwatcin, walla jyek tɛɛtin aŋka pwatcin bɛɛ. Yomg ‘ya a yyɛɛwɔ. Yoma ne cyɛɛlɔ gɛɛl buagɔn ‘ya ciy meni. Ɔci yoma parɛ buagɔn ‘ya tuudo. Ɔci gena yom ‘ya buagiti ne pɛñanyɛ, gena lyena ‘ya tuuda ɔci oodda ban Yaccuti ɛkɛ aŋka pwatcin ne tolan te coodda ciya ‘ya iñɔ wɛnniy. ²⁴ Yeti kan ‘ya yadi wɛnni te ɛkkɛyɛ, a ɔɔn yɔmjin. ²⁵ Ɛɛ, jwali gɛɛl ŋeej ‘ya ne pwadan, ‘ya yaddo. Ɔci ɛkkɛ magdin ‘ya aŋka ɛkkɛ ‘uottɛ ñamu, ɔci aŋka ɛkkɛ yomgɔ ñɔɔgdi te jyek jyenna ɛkkɛ jyettɛ Juaŋti neeni. ²⁶ Ɔci a ɔɔnyɛ, ne ‘ya bɛɛda ɛkkɛti mokiyɛ, ɛkkɛ jieddɛ Yaccu Kiṭɔ te naŋki ɛkɛ neeni. ²⁷ Yeti kan ‘ya bɛɛd ɛkkɛti ɔci walla kan ‘ya bɛɛd ɛkkɛti bɛɛyɛ, ‘ya buaga dala ɛkkɛ ciedɛ ne pwadan te yoma ne cyɛɛlɔ. Dala naŋka naŋdɛ ɛkkɛ oŋkanda neeniyɛ, dala bala ba naŋki jyeka wonkɛn jyeka pwadin neeni. Ɔci ne ɛkkɛ mietɛ ma te jyeka wonkɛn jyeka pwadin neeniyɛ, dala paŋi ɛkkɛ aga paŋŋa ne cyɛɛlɔ. ²⁸ Ɔci ne ma tiekti te jyeka neeniyɛ, naa ɛkkɛ yomgɔ yeyɔ te jyek ɛkkɛn neeni bɛɛ. Ɔci a ɔɔnyɛ, ŋeettan ɛkkɛn jiek bɛya ɛkkɛn wyetkɛnti ne baaṭi. Ɔci te naŋka wanna mokiyɛ, ŋeeddɛ ɛkkɛ, ɛkkɛ yɔɔdɛ Juaŋo. ²⁹ Ɛkkɛ jyettɛ Kiṭɔti doki, ɔci a ɔɔn pwatcin. Yeti jyek jyenna ɛkkɛ jyetti Kiṭɔti neeniyɛ, bala parɛ bɛɛ, jyek taab bala ɛkkɛti daŋkun. Kan taab bala ɛkkɛti te yenti Kiṭɔyɛ, a ɔɔn yaayɛ bɛɛ. A ɔɔn pwatcin daŋkun. ³⁰ Taab yuarŋɛ ɛkkɛ ‘yati te kanŋa Yaccu neeniyɛ, ɛkɛ bala ɛkkɛti daŋkun, ɔci bala ‘yati acca men ɔɔn. Ɛkɛ bawwin men bɛɛ.

¹ Tieŋdɛ, modg ɔɔn Ma Kiṭɔ, kan ɛkkɛ yomgɔ tɛy tɛy te naŋki ɛkɛ, ɔci kan lati ma korkɛn ŋeejɛ ɛkkɛ, ɔci kan Boŋ Juaŋ bala ɛkkɛti, ɔci kan yomg ɛkkɛ bala mati ne pwadanyɛ, ² dala ‘ya yomu ñɔya te naŋki ɛkkɛ neeni. Dala ɛkkɛ oondi yɔtin waakida. Ɔci dala yomg ɛkkɛ aga ba yoma ne cyɛɛlɔ, ɔci dala ɛkkɛ ciedɛ ba maka ne cyɛɛlɔ. ³ Naa ɛkkɛ anɛ waak ɛkkɛ pookɔ bɛɛ. Ɔci naa ɛkkɛ noŋɛ naŋki yyɛji bɛɛ. Naa ɛkkɛ waakɔ naŋdɛ ba maka ḍwaŋin bɛɛ. Dala ɛkkɛ yomgɔ bala ba maka ḍyɛrin, ɔci dala ɛkkɛ poŋdɛ agi maka pookɛn ɛkkɛn aŋka pwadɔ te ɛkkɛ. ⁴ Naa ɛkkɛ mokɛ waak ɛkkɛ pookɔ bɛɛ. Dala ɛkkɛ maka pookɛn magdɛ daŋkun. ⁵ Dala yomg ɛkkɛ bala ba yom Yaccu Kiṭɔ ɔɔn. ⁶ Ɛkɛ a Jwaŋa Tolan. Ɛkɛ a wara ne cyɛɛlɔ iki Jwaŋa Tolan, yeti ɛkɛ yookɔn te jyek ḍyɛrji bɛɛ. Ɛkɛ bala ‘yeṭi warɛ aŋka warɛ poortɛti Juaŋti te war tɛɛn ɛkɛ parɛ bɛɛ. ⁷ Ɛkɛ warɛ naŋŋɛ ba ne ɛkɛ a genga bɛɛ no. Ɔci ɛkɛ aŋi ba bolji mena kɛɛngɔn. Ɛkɛ warɛ aaŋŋɛ aŋi men baano. ⁸ Ɔci ɛkɛ jyek Juaŋ tiiññiyɔ waakɛnda iki jyek lyen ɛkɛ ɔɔn. Gena lyena tuuni ɛkɛ kakantiy. ⁹ Ɔci a ɔŋŋiyɛ, Yaccu koomnɛ Jwaŋa Tolan ñaalɔ ɔci ‘wonnɛ Juaŋ yenta tolan. Ɔci yenta neeniyɛ, ɛkɛ tol tol te yenga pookɛn waakɛnda. ¹⁰ Ɔci ne oŋ gɛɛltiyɛ, ma ḍwondi iñɔ ɛkɛ ñamɛti morti ɛkɛti waakɛnda. Gena maka ñaalɔ pɔliji i maka bala iñɔ ṭɛɛrji wɛnni, ɔci maka bala kolk jitin waakɛnda. ¹¹ Ɔci ma waakɛnda gɔkti te lɛmma ne cyɛɛlɔ waakɛnda, agi Yaccu Kiṭɔ ɛkta agi Ciɛggɔn tolɔ. Ɔci a ɔɔnyɛ, bala ba ma jieyi Wey ɛkkɛn Jwaŋa Tolan daŋkun. ¹² Munga ana ‘yay, ba bolja ɛkkɛ jyek ‘ya tiiññɛ ñin ne ‘ya balkin iki ɛkkɛ aŋan neeniyɛ, dala ɛkkɛ Jiek tiidɛyɔ ne pwadan waakɛnda ne ‘ya baawa loona ɔntɔ te ɛkkɛti ɔɔn. Jwaŋa Tolan bala kanŋan ɛkkɛ yomgɔti, ɔci te kanŋa ɛkɛ neeniyɛ, ɛkkɛ buagɛ noŋdɛ ba jyek ɛkɛ, noŋdɛ ba yomg ɛkkɛ pookɔ moki bɛɛ. Dala ɛkkɛ buattɛ Juaŋ te yoma awarɛ. Ɔci dala ɛkkɛ woŋgɔ tiittɛ te naŋki ɛkkɛ aŋka ɛkkɛ ‘uottɛ ñamu te yɔɔd Jwaŋa Tolan. ¹⁴ Gɔṭṭɛ, gena ɛkkɛ buagɛ naŋdɛyɛ, naa ɛkkɛ noŋdɛ te yoma yaayan ywoñɛ waakɔ bɛɛ, ɔci naa ɛkkɛ tyewwɛ bɛɛ. Dala ɛkkɛ ciedɛ budan te nɔjjo. ¹⁵ Naa ɛkkɛ a maka waaktan ma a maka noŋi naŋka yeyin bɛɛ. Ɛkkɛ agɛ kɛɛgin Jwaŋa Tolan, ɔci dala ɛkkɛ ciedɛ ne pwadan. Maka coŋinyɛ, ɛkkɛn ciyi amaam budan. Naŋki ɛkkɛn yeyɔ. Noon yaayɛ ɛkkɛn te nɔjjo. Nɔjiyɛ, ɛkɛ bala ba nona mielo. Yeti ɛkkɛyɛ, ɛkkɛ balgɛ ba kɛltan ne dɛkki nona mielti, ¹⁶ acaan ɛkkɛ mietɛ ma te jyeka tɛɛtki ma neeni. Kan ɛkkɛ ciedɛ ne pwadanyɛ, ɔci ne oŋŋa Kiṭɔ bɛɛdiyɛ, ‘ya lɔɔdja te ɛkkɛ Juaŋ ñamɛti bɛɛ. ‘Ya aŋka yomu ñɔya ñɔɔn te naŋki ɛkkɛ neeni, acaan coodi ‘ya iñɔ wɛnni a coodda budan bɛɛ, ɔci kanŋa ‘ya iñɔ wɛnni aŋi kanŋa budan bɛɛ. ¹⁷ Kan lyen ‘ya jyeni ɛkkɛ ‘uottɛtiyɛ, ‘ya yomu ñɔya ñɔɔn ne tolan. Ɔci ne ɛkkɛ yomgɔ ñɔɔki daŋkunyɛ, ɔci ‘ya daŋkun yomu ñɔɔna ñɔɔno. ¹⁸ Ɔci ‘ya buaga dala ɛkkɛ yomgɔ ñɔya daŋkun ba ‘ya ɔɔn. ¹⁹ Gɔṭṭɛ poca, ‘ya buaga Timutawuc cuoñña ɛkkɛti. Kan Ciɛggɔn ikin Yaccu buagɔn a ɔɔn daŋkunyɛ, ‘ya ɛkɛ cuoñña ɛkkɛti aŋan aŋka ɛkɛ ‘ya eekta jiek ṭɔlgɛn gɛɛg te ɛkkɛti aŋka ‘ya yomu luudɛ parun. ²⁰ Mena parɛ gɛɛl bala wɛnni yomɛ bala ɛkkɛti ba Timutawuc ɔɔn bɛɛ. ²¹ Maka pookɛn waakɛnda ɛkkɛn poŋi te jyek kanŋa wak ɛkkɛn pookɛn budan. Ɛkkɛn bala poŋi te kanŋa wak Yaccu Kiṭɔ bɛɛ. ²² Oŋ yeti Timutawucyɛ, ɛkɛ ŋeejɛ ɛkkɛ ne ɛkɛ pwadiy. Ɔci ŋeejɛ ɛkkɛ ne ɛkɛ baali kanŋin iki ‘ya ba kaci ne kanki iki weegɛn ɔɔn. ²³ Ne ‘ya gɔrta jyek godan ‘ya ne baali a ɔkiyɛ, ‘ya oŋ Timutawuc cuoñña ɛkkɛti oŋo. ²⁴ Dala ɛkkɛ ciedɛ ɔɔn, ŋeej ‘ya, ‘ya bɛɛd ooda Juaŋ ne cwakanti ḍieŋŋa ɛkkɛti. ²⁵ ’Ya poŋ gɔk ka Ipaprodaaytoc cuoñña dɔwwa ‘ya nona ɛkkɛti ne cwakanti moki. Ɛkɛ bala ba mod ɔɔn, ɔci ɛkɛ bala kanŋin iki ‘ya, ɔci ɛkɛ a ackan Juaŋ ba ‘ya ɔɔn. Ɛkkɛ ɛkɛ cuonnɛ ‘yati wɛnni, ɔci ɛkɛ bala moki ‘ya. ²⁶ Ɛkɛ ñingɛ boŋi te ɛkkɛ ne tolan. Ne ɛkɛ tieŋni agi ma ɛkɛ tieŋnɔ agi ɛkɛ warɛ yaayɔyɛ, ɛkɛ bala poŋi jiek yomɛti. ²⁷ Ɛkɛ warɛ yaayɛ ne tolan, ɛkɛ noŋi tuwa doki. Yeti Juaŋ yomɛ pɔŋnɛ ɛkɛti, ɔci ɛkɛ warɛ pwani doki. Ɔci Juaŋ yomɛ pɔŋnɛ ‘yati daŋkun te ywaŋŋa ɛkɛ ‘wana neeni ywaŋŋɛy. Ɔci a ɔɔnyɛ, taab ‘ya bala moki bɛɛ. ²⁸ Ɔci acca ‘ya yomu noki warɛ ne tolan te bwakta ‘ya buagati ɛkɛ cuonda ɛkkɛtiy. Acaan ‘ya buaga dala ɛkkɛ yomgɔ ñɔya ɔci gɔktɛ a pwatcin ne ɛkkɛ ɛkɛ yuardɛy, ɔci a ɔɔnyɛ, ‘ya yomu pwada daŋkun. ²⁹ A ɔŋŋiyɛ, dala ɛkkɛ ɛkɛ magdɛ te yom ñɔɔn ba mod ɛkkɛ te yenti Ciɛggɔn. Maka pwadin ba Ipaprodaaytoc neeniyɛ, dala ɛkkɛ anɛ ɛkkɛn. ³⁰ Acaan Ipaprodaaytoc neeniyɛ, ɛkɛ noŋi tuwa te kanŋa Ciɛggɔn ikin Yaccu Kiṭɔ. Ɛkkɛ buagɛ ‘ya magdatɛ, yeti acaan ban ɛkkɛ looncin ɔntɔyɛ, aŋka ɛkkɛ Ipaprodaaytoc cuonnɛ ‘yati moki ‘ya neeni. Taab ɛkɛ tol tolo, yeti ɛkɛ buayi lyen ḍwaŋ ɛkɛ moki bɛɛ. Ɛkɛ bala moki ‘ya men ɔɔn.

¹ Jwali ṭɔɔlɛ gɛɛl bala ne cyɛɛlɔ. Modg ɔɔn, dala ɛkkɛ yomgɔ ñɔya oŋkanda, acaan ɛkkɛ balgɛ Ciɛggɔn ikinti doki. Kan ‘ya kiewa jyeka neeni ɛkkɛti oŋki ne coŋɔn ɔɔnyɛ, a ɔɔn yaayi ‘yati bɛɛ. Ɔci kan ɛkkɛ woŋgɔ tiittɛ te jyek ‘ya neeniyɛ, ɛkkɛ ciedɛ ne pwadan. ² Dala ɛkkɛ woŋgɔ tiittɛ te maka bala ba gɔki maka yeyin a laaban neeni. Acaan ɛkkɛn buagɔn ŋwoti ɛkkɛ aŋka ɛkkɛ naŋtɛ a Ma Yahuud ba ɛkkɛn budan ɔɔn. ³ Ikin maka moṭi Jwaŋa Tolanti te Boŋ ɛkɛyɛ, ikin aŋka balkin jyek ŋwoti awarɛ. Ikin yomgɔ ñɔyɔ te Yaccu Kiṭɔ parɛ. Ɔci ikin poŋin gɔkin agi ikin yaakinti naŋka pwadan te waak tɛɛn ikin pookɔ bɛɛ. ⁴ Kan men gɛɛl gɔki jieyi warɛ agi ɛkɛ yaakiti warɛ udjɛ te war tɛɛn ɛkɛ parɛ budanyɛ, ‘ya yaakati jyek ɛkɛ bwandi ‘ya daŋkun. ⁵ Tieŋdɛ, ɛkkɛ poktin naŋki war ‘ya. Ne ‘ya jiennata mɛy ɔɔn, ɔci ne nink ne dɔɔyɔ wyetkɛn ne yyɛɛwɔ bɛɛki bora ba naŋki yɔrg ɔɔnyɛ, ‘ya ŋutka ma doki te ninna akki ne dɔɔyɔ wyetkɛn ne ḍoogɔ. ‘Ya jietka ma Icrayiil. ‘Ya bɛɛn te kɛɛn Benjaminti. ‘Ya jietka ma Icrayiil. ‘Ya a Pɛriciy, ɔci ba naŋki ma Pɛriciinyɛ, ‘ya baal tiec Jyek ganuun waakɛn ne pwadan. ⁶ ’Ya waru byerŋa byerŋ te kanŋa yɔɔro, ɔci ‘ya baal noŋ ne yaayan ma kaniicanti. Jyek ganuun jitkɛn tiiñiyɔ ‘ya waakɛnda. Gɛɛl bɛɛñiji bɛɛ. ⁷ Gɔṭṭɛ, jyek yɔrg ɔɔn, ɔci jyek naŋki ‘ya neeniyɛ, ɛkkɛn pwadɔ ‘yati, yeti ɛkkɛn daljan ‘ya ɔntɔ waakɛnda a kucin te jyek Kiṭɔ. ⁸ Awarɛ, jyeka pookɛn waakɛnda aŋi ba jyeka budan ‘yati. Gena jyek ŋeejiin Ciɛggɔn Yaccu Kiṭɔ ŋeeja ‘ya neeni aŋka pwatciny. Acaan ‘ya buaga jyek Yaccu Kiṭɔyɛ, waak waakɛnda yorkan ‘ya ŋoyu, yom ‘ya bala ɛkkɛnti moki bɛɛ. Dala ɛkkɛn ɔga ḍakti doki. ‘Ya buaga ɛkkɛn moki bɛɛ. ‘Ya buaga gena Yaccu Kiṭɔ parɛ. ⁹ ’Ya buaga dala ɛkɛ bala ‘yati. ‘Ya poŋ ka ‘ya pwani Juaŋ ñamɛti te naŋki ‘ya paru bɛɛ, walla te tiit jyek ganuun waakɛn bɛɛ. ‘Ya pwani ɛkɛ ñamɛti te jyenna ‘ya jyetta Kiṭɔti neeni. Acaan maka jyeddi Yaccu Kiṭɔtiyɛ, ɛkkɛn naŋdɛ Juaŋ pwaddi ɛkɛ ñamɛti. ¹⁰ ’Ya buaga dala Kiṭɔ ŋeejja ‘ya ne pwadan. Ɔci ‘ya buaga dala war tɛɛn jɔlni ɛkɛ ñaalɔ neeni ŋeejja ‘ya daŋkun. Ɔci ‘ya buaga dala taab Yaccu ŋeejja ‘ya daŋkun, ɔci dala lyen ɛkɛ aga ba lyen ‘ya, ¹¹ ɔci dala ‘ya jɔŋŋa ñaalɔ moki ba ɛkɛ ɔɔn. ¹² ’Ya gɔkca te war ‘ya ka jyeka neeni ḍaaŋi ‘ya waakɛnda men bɛɛ. ‘Ya a mena domi jiek men. Yeti ‘ya ciɛñ ‘uocca ñamu te jyek Yaccu a ‘uoccin gɔ moki ‘uocci ɔɔn, aŋka gena odga ‘ya ñamuti neeni aga gen ‘ya bala ba ne ‘ya koonati Yaccu Kiṭɔ bora aŋŋa men ɛkɛ dokiy. Ɔci ‘ya buaga naŋka ‘ya koonati ɛkɛ bora neeniyɛ, dala ɛkɛ bala ‘yati. ¹³ Modg ɔɔn, ‘ya gɔk ka naŋka neeni ḍaaŋi ‘ya waakɛnda doki bɛɛ. A’a. Naŋka coŋin bala men, yeti gen gɛɛl aŋka bala ne cyɛɛlɔ naŋdi ‘ya oŋkanda. Waka dollanyɔ ‘yayɛ, ‘ya poŋ te jyek ɛkkɛn moki bɛɛ. ‘Ya poŋ te waka bala ñamu, ¹⁴ ɔci ‘ya ciɛñ ‘uocca ñamu a ‘uoccin gɔ moki ‘uocci ɔɔn. ‘Ya muona Jwaŋa Tolan bora te naŋki Yaccu Kiṭɔ, ɔci ‘ya buaga jyek naŋka pwadin neeni pookɛn. ¹⁵ Ikin maka loonnin ñamu doki te jyek Yaccuyɛ, dala paŋŋa neeni bala ikinti oŋkanda ɔɔn. Ɔci kan men gɛɛl ɛkkɛti paŋi ɛkɛ bala ɔntɔyɛ, ɛkɛ myettɛ Jwaŋa Tolan agi paŋi ɛkta neeni baalɔ ɔntɔ. ¹⁶ Dala ikin noŋtin ne pwadan ba jyeka ŋeecin ikiny. ¹⁷ Modg ɔɔn, dala ɛkkɛ lɔktɛ ba naŋki ‘ya ɔɔn. Gena ɔɔn agɔn maka lwaktan ma te naŋka pwadin neeni. Dala ɛkkɛ gɔrtɛ maka lɔki naŋka neeni wanna ne pwadan. ¹⁸ Ɛkkɛ myennin ‘ya te jyeka neeni oŋki kɔɔna kɔɔnno, ɔci ‘ya ɛkkɛ myettin acca moki ɔɔn. Ɔci gɔṭṭɛ maka coŋin maka yeyinyɛ, ɛkkɛn yookɔn te kakan Yaccu Kiṭɔ. Ne ‘ya baala gɔka ɛkkɛti te jyeka neeniyɛ, ‘ya baal gɔk a ɔɔn ne pieg bala ‘ya woŋguti ɔɔn. ¹⁹ Ne baaṭi ɛkkɛn ñɔɔdi ɔci ḍakti budan. Jyek bwakti waak bala ñamu ɛkkɛn yomgɛnti aŋi ba jwaŋ ɛkkɛn. Ɛkkɛn jieyi waakɛn te naŋka naŋtan ɛkkɛn yaayan neeni budan. Ɛkkɛn bala poŋi te jyek waka bala iñɔ baanji ṭɛɛrji wɛnni budan. ²⁰ Ikinyɛ, ikin aŋka akin maka bana ñaalɔ pɔliji. Ɔci ikin kɛɛyin mena bɛya te aŋany, gena Ciɛggɔn ikin Yaccu Kiṭɔ. ²¹ Ɔci ne ɛkɛ bɛɛdiyɛ, ɛkɛ waak ikin waaka yeyin neeniyɛ, agdiyɔ ɛkɛ aga ba war ɛkɛ wara pwadan neeni. Ikin aktinyɔ ɛkɛ te war tɛɛn ɛkɛ. Ɔci te war tɛɛn ɛkɛ neeniyɛ, ɛkɛ aga Ciɛggɔn noon warda, ɔci waak waakɛndayɛ, noŋdi ba jyek ɛkɛ.

¹ Modg ɔɔn Ma Kiṭɔ modga ana ‘yay, te naŋka bɛya neeniyɛ, dala ɛkkɛ yɔɔddɛ ne tɛyan te jyek Ciɛggɔn ikin. ‘Ya ñingu boŋi te ɛkkɛ. ‘Ya yomu ñɔɔna ñɔɔn te ɛkkɛ. ² ’Ya gɔk Yuadyati yaakkɛn i Cintiki, dala ɛkkɛn ciya te yoma ne cyɛɛlɔ te jyek Yaccu, naa ɛkkɛn yoyi ñin yaakkɛn a ɔɔn bɛɛ. ³ Hay! Mena kanŋin iki ‘yay, ‘ya gɔkka iti, dala moonga neeni magdɛ te jyek ɛkkɛn, acaan moonga neeniyɛ, ɛkkɛn bala kanŋin iki ‘ya te jyeka wonkɛn jyeka pwadin neeni. Ɛkkɛn bala kanŋin iki ‘ya i Klɛmanti i maka pookɛn daŋkun, maka yeng ɛkkɛn bala worgajiy. Worga neeniyɛ, a worga balki yeng maka tɛɛtiy. ⁴ Dala ɛkkɛ ciyɛ te yoma ñɔyan te jyek Ciɛggɔn ikin oŋkanda ɔɔn. ‘Ya gɔkka ɛkkɛti moki ka dala ɛkkɛ ciedɛ te yoma ñɔyan! ⁵ Dala ŋeettan ma waakɛnda yomg ɛkkɛ pwadɔ mati, ɔci dala ŋeeddɛ ɛkkɛ Ciɛggɔn ikin bala bɛya ne cwakanti ikinti. ⁶ Naa ɛkkɛ poŋɛ jiek te jyek waagga bɛɛ. Dala yeti ɛkkɛ aŋka cɔktɛ gena Jwaŋa Tolanti te jiek waakɛnda. Ɔci oŋkanda ne ɛkkɛ cɔktɛ ɛkɛtiyɛ, dala ɛkkɛ toottɛ te waka ɛkkɛ buagɛy. Dala ɛkkɛ gɔkti ɛkɛti a pwatcin. ⁷ Kan ɛkkɛ noŋi a ɔɔnyɛ, ɔci ɛkkɛ ‘wondɛ ɛkɛ coodi pwanno. Ɔci Yaccu Kiṭɔ waŋɛ tiittɛ te yomg ɛkkɛ, ɔci te paŋi ɛkkɛ moki. Naŋki ɛkɛ neeniyɛ, da parɛ. Naŋka neeni jiñɛ yuartanji ma baan te wyetk ɛkkɛn bɛɛ. ⁸ Modg ɔɔn, jwali gɛɛl bala ne cyɛɛlɔ. Dala ɛkkɛ poŋdɛ te waka pwadin jitkɛn waakɛnda. Waka pwadin neeniyɛ, gena naŋka awarɛ, ɔci naŋka pwadan, ɔci ani mako, ɔci yenta pwadan, ɔci naŋka balki yom pwani, ɔci jiɛt Juaŋ jiɛta pwadan. Dala ɛkkɛ ñingɔ caŋdɛ te gena paŋi waka neeni. ⁹ Dala ɛkkɛ ciedɛ noŋdɛ ba jyeka ɛkkɛ lallin ‘ya neeni. Ɛkkɛ tieŋnɛ jyek ‘ya, ɔci ɛkkɛ gɔrnɛ naŋki ‘ya. Ɔci dala ɛkkɛ noŋdɛ a ɔɔn daŋkun. Ɔci a ɔŋŋiyɛ, Jwaŋa Tolan mena ‘woñi ma te coodi pwani ɛkɛ neeniyɛ, ɛkɛ baldɛ iki ɛkkɛ. ¹⁰ Ɛɛ, te baaṭi ɛkkɛ balgɛ poŋɛ te ‘ya, ɔci ‘ya maŋŋata ɛkkɛ. Ɔci acca ‘ya yomu ñɔɔna ñɔɔn acaan ɛkkɛ balgɛ poŋɛ te ‘ya ɔci mokɛ ‘ya men. Çeej ‘ya ɛkkɛ yomgɔ bala ‘yati ɔci buagɛ mokɛ ‘ya oŋkanda, yeti pɔya ɛkkɛ ‘ya magdatɛ gɔ bala bɛɛ. ¹¹ ’Ya gɔk a ɔɔn ɛkkɛti acaan ‘ya bɔw bɛɛ. Acca ‘ya poŋ te jyek waka ciya ‘ya acca moki bɛɛ. Acca kan waak bala, ɔci walla kan waak baaw ‘yatiyɛ, ‘ya men yomu pwad pwad ɔɔn. ¹² ’Ya yaakati ciy ba mena bɔwan waak baaw ɛkɛtiy, ɔci ‘ya yaakati ciy ba mena cyɛgan waak bala ɛkɛtiy. Naŋka neeni yuarŋ ‘ya doki. Kan baan yooŋ yoŋ, walla kan baan yaayɛ moki a koñyɛ, ‘ya yaakati ciy ne pwadan men ɔɔn. ¹³ ’Ya yaakati naŋki waakɛnda te war tɛɛna ‘ya ‘wondata Kiṭɔ oŋkanday. ¹⁴ Ɛkkɛ yomgɔ pwanna pwani ‘yati ne ɛkkɛ ‘ya maŋŋata te oŋŋa taab baali ‘yatiy. Taab ‘ya aŋi ba taab ɛkkɛ doki. ¹⁵ Ɛkkɛ maka ban Pilibbi, jiek ŋeejɛ ɛkkɛ doki. Ne ɛkkɛ lallin ‘ya te ñamu, ɔci ne ‘ya koona bora te ban Macɛdɔɔnyayɛ, ‘ya makka ma kaniican gɛɛg bɛɛ, ‘ya maŋŋata gena ɛkkɛ pookɔ. ¹⁶ Ɔci moki ne ‘ya baala ban Tacalunikayɛ, ‘ya maŋŋata ɛkkɛ oŋki aŋi ne yyɛɛwɔ doki. ¹⁷ Yom ‘ya buagɔn ɛkkɛ ‘ya ‘wondata waka neeni budan bɛɛ. Yom ‘ya buagɔn dala Juaŋ aŋka noŋdi ne pwadan ɛkkɛti te naŋka naŋdɛ ɛkkɛ pwadin neeni. ¹⁸ Ɛkkɛ ‘ya cuonnata bilk ne coŋɔn. Ɔci waka ‘ya cuonnata ɛkkɛ te byeŋ Ipaprodaaytoc neeniyɛ, yɔmjin te ‘ya doki. Ne ɛkkɛ ‘ya ‘wonnata waka neeniyɛ, bala ba ɛkkɛ ne Jwaŋa Tolan ‘wonnɛ gena ‘yɛrŋɛ ɛkkɛ gena pwadan gena ɛkkɛ buagɛ neeni, ɔci Juaŋ yookɔn te naŋka neeni bɛɛ. Naŋka neeni pwanna pwani ɛkɛti. ¹⁹ Dala Jwaŋ ‘yayɛ, ɛkɛ ɛkkɛ ‘wondɛ waka baaw ɛkkɛti neeni ba bolja ɛkɛ agi mena cyɛgan neeni te byeŋ Yaccu Kiṭɔ. ²⁰ Jwaŋ ikin ɔci Wey ikinyɛ, dala ma jieddi ɛkɛ oŋkanda yuonginda ɔɔn. ²¹ Dala ɛkkɛ ma Yaccu Kiṭɔ ñiibdɛ waakɛnda te ‘ya. Modg ikin modga bala wɛnniyɛ, ɛkkɛn ñiepi ɛkkɛ daŋkun. ²² Ma Kiṭɔ maka bala wɛnniyɛ, ɛkkɛn waakɛnda ñiepi ɛkkɛ. Ɔci maka bala on Kɛɛcartiyɛ, ɛkkɛn ñiepi ɛkkɛ ne pɛñan daŋkun. ²³ Dala yom pwani Ciɛggɔn ikin Yaccu Kiṭɔ bala ɛkkɛti oŋkanda ɔɔn.