Mark

Mark

¹ Gena ‘ya Mark, ‘ya buaga ɛkkɛ myettin te jyek bɛɛn Ciɛggɔn ikin Yaccu Kiṭɔ, Kaci Jwaŋa Tolan te oŋŋa jyeka wonkɛn jyeka pwadin bɛɛki mati te ñamu. ² Juaŋ gɔki te tuk Icaaya mena a bɔwa Jwaŋa Tolan agi “Jwaŋa Tolan gɔkcin Kaci ɛkɛti agi ɛkɛ men gɛɛl cuoñjɛ ɛkta ñamdanti, aŋka ɛkta yɔŋda pɔyo.” ³ “Ɔci cuuda neeni yaadan wɔɔŋji agi, ‘Dala ɛkkɛ waakɔ ywaŋdɛ te bɛɛna bɛɛdɛ Ciɛggɔn Kiṭɔy. Dala pɔɔk ywaŋdɛ nina ne pwadan.’” ⁴ A ɔŋŋiyɛ, Yɔhanna bala buoṭi ma wɔɔŋji, ɔci ɛkɛ bala loṭi ma agi dala ma yomgin wiaktɔ te nɔji ɛkki ɔci waakcin yaldɛ te nɔji ɛkki. Ɔci dala ɛkki buldi ma acaan ɛkki bɔɔŋda Juaŋ doki. ⁵ Maka ban Yahuudiya ɔci maka ban Urcaliimyɛ, ɛkkɛn ɔɔci nona ɛkɛti waakɛnda. Ɔci te oŋŋa wannayɛ, ma bala lɛɛṭi nɔji ɛkkɛn bora. Ɔci ɛkkɛn buullɛ ɛkɛ Tol Urdun. ⁶ Yɔhanna bworŋ ɛkɛ naŋɛ ma te jyeyi kolŋan ba bɔwan Jwaŋa Tolan bɔwan pookɛn daŋkun, ɔci buarñan bala ɛkɛ tɛyɛti. Ɔci ɛkɛ bala omi ṭooŋgi ɔci ciek daŋkun. ⁷ Ɔci ɛkɛ bala loṭi ma gɔki agi, “Men gɛɛl bala bɛya bootti ‘ya ŋoyuti. Ɛkɛ tolcin te ‘ya. ‘Ya baal ba ḍwonda iñɔ wɛyi ɛkɛ looda ‘ya bora bɛɛ. ⁸ Ɛkkɛ buldin ‘ya te piego, yeti ɛkkɛ buldɛ ɛkɛ te Boŋ Jwaŋa Tolan.” ⁹ Ɔci te oŋŋa wannayɛ, Yaccu bɛɛn te ban Najarɛt ban Jaliilji. Ɔci ɛkɛ buullɛ Yɔhanna Tol Urdun. ¹⁰ Ɔci ne ɛkɛ koonɛ bora te pietinyɛ, ne pɛñan ɛkɛ gɔrcin pɔli warɛ pɔŋnɛ, ɔci Boŋ Jwaŋa Tolan bɛɛn cooccin ɛkɛti bala ba boom ɔɔn. ¹¹ Ɔci pwan Jwaŋa Tolan bɛɛn te ñaalɔ pɔliji gɔki agi, “I a Kaci ‘ya Kacca ana ‘yay. ‘Ya yomu pwanna pwani iti.” ¹² Ɔci ne pɛñan Yaccu wɛɛññɛ Boŋ Jwaŋa Tolan wɔɔŋji. ¹³ Ɔci ɛkɛ bala ciyi aŋan i leyi wɔɔŋji nink a ma baan ne yyɛɛwɔ (40). Ɔci Jwaŋa Yaayan bala mooṭi ɛkɛ. Ɔci malɛɛkan gɛɛg bɛɛn ɔci Yaccu ‘woñgi am ɔci piego. ¹⁴ Ɔci ne baaṭi ne Yɔhanna mukkiti ma olkiti ma jiju ciginjiyɛ, Yaccu bɛɛn ban Jaliil, ɔci ɛkɛ bala loṭi ma te jyek Juaŋ jyeka wonkɛn jyeka pwadin neeni oŋkanda. Gena jyek cyɛgji Juaŋo. ¹⁵ Ɔci Yaccu gɔki agi, “Oŋ bɛɛn bora doki, gena oŋŋa Juaŋ buagɛ ɛkkɛ bɛɛdɛ non cyɛgji ɛkɛtiy. Dala ɛkkɛ yomgɔ wiakti ɔci waakɔ yaldɛ. Dala ɛkkɛ tieŋdɛ jyeka wonkɛn jyeka pwadin neeniti.” ¹⁶ Ɔci oŋ gɛɛlti Yaccu bala ati goṭi Galŋ Jaliil ḍwaŋɛti, ɔci Butruc (ɛkɛ yenti Cimaan te tuk Ma Icrayiil) i mod ɛkkɛn Andarawuc, ɛkkɛn mɔŋnɛ ɛkɛ bala wiewi mali wyeci yako. Acaan kanŋa ɛkkɛn a kanŋa yako. ¹⁷ Ɔci Yaccu gɔkcin ɛkkɛnti agi, “Bɛɛdɛ, boottɛ ‘yati, ɔci ‘ya ɛkkɛ naŋdin agdɛ maka etti ma ‘yati te jyek ‘ya.” ¹⁸ Ɔci ɛkkɛn morin ɛkkɛn dalji doki. Ɔci ɛkkɛn ati bootcin ɛkɛti. ¹⁹ Ɔci ne Yaccu ‘uonni ñamu ne ḍyɛṭ ṭɔɔlɛyɛ, ɛkɛ ma gɛɛg mɔŋnɛ. Gena Jɛbadi i kɛɛgin ɛkɛ Yaakub ɔci Yɔhanna. Ɛkkɛn mɔŋnɛ ɛkɛ bala yɔŋi morin murka konɛti. ²⁰ Ɔci Yaccu borcin ɛkkɛnti, ɔci ɛkkɛn wey ɛkkɛn Jɛbadi dalji te murkaji iki maka kanŋan ɛkɛti, ɔci ɛkkɛn bootcin Yaccuti aŋka etti ma Jwaŋa Tolanti te jyek ɛkɛ. ²¹ Ɔci ɛkkɛn dɔɔki ban Kapɛrnyam. Ɔci ne Oŋ Cabit bɛɛniyɛ, Yaccu kaaccin ona morki ma Juaŋo. Ɔci ɛkɛ bala loṭi ɛkkɛn. ²² Ɔci ma korkɛn buañi noon acaan ɛkɛ bala loṭi ma ba mena war tɛɛn bala ɛkɛ bieŋɛti. Lali ɛkɛ bala ba lali maka loṭi worga Juaŋ bɛɛ. ²³ Ɔci ne Yaccu baali loṭi mayɛ, ‘uan gɛɛl bala orɔ ona morki ma Juaŋo. Ɛkɛ muŋŋɛ Jwaŋa Yaayan. ²⁴ Ɔci ɛkɛ yaajjin ne pɛñan agi, “Hay i Yaccu men ma Najarɛt, i ŋeejin ‘ya i a men Jwaŋa Tolan mena pwadan. I buagi gena ɔɔnti yeti? I buagi ɔɔn nogdɔn?” ²⁵ Ɔci Yaccu gɔkcin ɛkɛti ne pɛñan agi, “Hay, cied lieda! Dala i kooya bora te menti.” ²⁶ Ɔci Jwaŋa Yaayan men wyeŋnɛ iñɔ, ɔci ɛkɛ tɛɛni, ɔci Jwaŋa Yaayan yaajjin, ɔci ɛkɛ oŋ kooyin bora te ɛkɛti oŋo. ²⁷ Ɔci ma yomgɛn buañi ne pɛñan waakɛnda. Ɔci ɛkkɛn bala toyi yɔtin pookɛn agi, “Yaccu neeni ɛkɛ a menɛ yeti? Jyeka loṭi ɛkɛ ma neeniyɛ, ɛkkɛn a jyeka wonkɛn bɛɛ? Acaan jyek ɛkɛ bala ba jyek mena war tɛɛn bala ɛkɛ bieŋɛti. Ɔci ma tieŋdi, ɔci jɔkin yeyin moki tieŋdi jyek ɛkɛ, ɔci ɛkkɛn noŋi ba jyek ɛkɛ.” ²⁸ Ɔci jyek naŋka naŋŋɛ Yaccu neeniyɛ, ati peen bonka ban Jaliilji korkɛn waakɛnda ne pɛñan. ²⁹ Ne ɛkɛ jɔkin yeyin koonɛ bora dokiyɛ, ɛkɛ kooyin bora te ona morki ma Juaŋo, ɔci ɛkɛ kaaccin orɔ on Butruc yaakkɛn i Andarawuc. Ɛkɛ kaaccin i Yaakub ɔci Yɔhanna. ³⁰ Ɔci mari Butruc bala niin iñɔ warɛ yaayɛ. Ɛkɛ warɛ myɛlla myɛllo. Ɔci Yaccu myetkɛ ma te ɛkɛ aŋka ɛkɛ pɔktɛ Yaccu te waja neeni. ³¹ Ɔci Yaccu ati nona ɛkɛti, ɔci ɛkɛ muŋŋɛ te bieŋɛ, ɔci luolnɛ ñaalɔ. Ɔci ɛkɛ warɛ luun ne pɛñan, ɔci ɛkɛ jɔllin ñaalɔ, ɔci ɛkɛ ma ‘wonnɛ am doki. ³² Ne tɛɛnɔ ne oŋ waŋɛ unni ɔci ne Oŋ Cabit baaniyɛ, maka luudgin daŋkun owwɛ ma Yaccuti waakɛnda. Ɔci ma eccin maka waakɛn yeyin Yaccuti. Maka ciyi bana wannatiyɛ, ɛkkɛn ɔɔccin waakɛnda wyetkɛn ḍɔɔlɛ on tukɛti. ³⁴ Ɔci ma ywaŋŋɛ Yaccu a ḍiɛkan bɛɛ, kɔɔna kɔɔnno, menga da te waja ɛkɛ, ɔci menga da te waja ɛkɛ. Ɔci jɔkin yeyin koonɛ ɛkɛ bora te mati. Ɔci ɛkɛ dɛyi ɛkkɛn agi naa ɛkki gɔktɔ jiek bɛɛ. Yaccu noŋi a ɔɔn acaan ɛkɛ ŋeecɔn jɔkin yeyin ne ɛkɛ agi Kaci Jwaŋa Tolany. ³⁵ Ɔci te tinnɔ ne noon men bɔɔni bɛɛyɛ, Yaccu jɔllin ñaalɔ ati nona wɔɔgan nona baaki may, ɔci ɛkɛ bala cɔki parɛ aŋan. ³⁶ Butruc ɔci maka balki iki ɛkɛyɛ, ɛkkɛn jɔŋŋin ati bootcin ɛkɛti. ³⁷ Ɔci ne ɛkkɛn Yaccu yuarkitiyɛ, ɛkkɛn gɔkcin ɛkɛti agi, “Ma waakɛnda bala lieṭi i aŋka i noŋja kanŋa ɛkkɛnti moki.” ³⁸ Ɔci ɛkɛ gɔkcin ɛkkɛnti agi, “Çeej ‘ya ɛkkɛn buagɔn ‘ya, yeti dala ɛkkɛ bɛɛdɛ ikin oottin bonka waayiti aŋka ‘ya lorca maka ciyi aŋan daŋkun, gena te naŋka neeni aŋka ‘ya bɛɛna iñɔ te pɔliji neeni.” ³⁹ Ɔci ɛkɛ ati booti ban Jaliil konɛti warda. Ɛkɛ bala loṭi ma oorga morki ma Juaŋy. Ɔci ɛkɛ jɔkin yeyin koonɛ bora te maka muogɛ jɔkin yeyinti. ⁴⁰ Ɔci mena naŋŋɛ cyɛcyɛ, bɛɛn nona Yaccuti ɔci ḍwonjin iñɔ ɛkɛ ñamɛti, ɔci gɔkcin ɛkɛti agi, “Kan i buagi war ‘ya pɔkka te waja neeniyɛ, i yaakiti.” ⁴¹ Ɔci Yaccu yomɛ pɔŋnɛ ɛkɛti, ɔci ɛkɛ bieŋɛ laŋnɛ ɛkɛti, ɔci topcin ɛkɛti. Ɔci ɛkɛ gɔkcin ɛkɛti agi, “‘Ya buaga, i ywaŋdin.” ⁴² Ɔci cyɛc bawwin te ɛkɛti ne pɛñan ɔci ɛkɛ warɛ pwani doki. ⁴³ Ɔci ɛkɛ cuuññɛ Yaccu baanji, ɔci Yaccu gɔkcin ɛkɛti ne pɛñan agi, ⁴⁴ “I ɔgdi ootta, yeti naa menga myetka te naŋka neeni bɛɛ. Dala i waru lɛɛrka gena gaciic Ma Yahuud. Ɔci dala i ɛkɛ ‘woñga gena guaŋŋɛ Muuca agi ‘wondi ma gaciic Ma Yahuudy. Ɔci a ɔŋŋiyɛ, ŋeettan ma waakɛnda ne pwadan i waru pwani te cyɛc awarɛ.” ⁴⁵ Yeti ‘wana neeni ati mati, ɔci bala mieti ma te jyeka neeni, ɔci jiek ati noon warda. Ɔci Yaccu yaakinti gorti kaatti baan konɛti moki bɛɛ. Ɛkɛ bala ciyi wɔɔŋji nonka baaki may, yeti ma bɛɛn ɛkɛti kɔɔna kɔɔni te noon warda.

¹ Oŋ gɛɛlti ne nink gɛɛg bɛɛki borayɛ, Yaccu dɔɔkkin ban Kapɛrnyam, ɔci jwali ati baan konɛ warda agi Yaccu bɛɛnɔ baanji. ² Ɔci maka coŋin bɛɛn ɔɔccin orɔ on ɛkɛ, ɔci on konɛ mitcɛ ñaalɔ warda. Ɔci maka pookɛn gɛɛg bala te bora men, ɔci nona bora on tukɛti kuumi te ma daŋkun. Ɔci Yaccu bala loṭi ma te jieko. ³ Ɔci ma bɛɛn eccin mena warɛ yaayan mena a puono. Ɛkɛ ḍuorɛ maka ‘uay ne ŋaanɔ. ⁴ Ɔci ne ɛkkɛn bɛɛki ne orkitiyɛ, nona kaatti ɛkkɛn orɔ Yaccuti gɛɛl bala bɛɛ. Ɔci ɛkkɛn kaaccin ñaalɔ on wyeñɛti, ɔci on wyeñɛ noonɛ gɛɛl laakci ɔntɔ, ɔci men ḍuurcɛ iñɔ te aŋgan niini ɛkɛ neeni. ⁵ Ɔci ne Yaccu gɔrni maka neeni jyetki ɛkɛtiyɛ, ɛkɛ gɔkcin ‘wana warɛ yaayan neeniti agi, “Kaci ‘ya, i bɔɔŋnin ‘ya te nɔji i doki.” ⁶ Ɔci maka loṭi worga Juaŋ gɛɛg bala ciyi wɛnan, ɔci ɛkkɛn bala poŋi jiek yomgɛnti agi, ⁷ “Te gena yeti aŋka ‘wana neeni gɔki a ɔɔny? Jyek ɛkɛ neeni a ŋɛɛgi Juaŋti ne tolan. A menɛ yaakinti ma bɔɔktɛ te nɔjiy, a Juaŋ parɛ bɛɛ?” ⁸ Ne ma balki poŋki a ɔɔnyɛ, paŋi ɛkkɛn ŋeejɛ Yaccu doki. Ɔci ɛkɛ gɔkcin ɛkkɛnti agi, “Te gena yeti aŋka ɛkkɛ poŋɛ jyeka neeni yomgɔti a ɔɔny? ⁹ Kan ‘ya gɔkca ‘wana warɛ iin neeniti agi ɛkɛ bɔɔka ‘ya te nɔji ɛkɛ, ɔci moki kan ‘ya gɔkca ɛkɛti agi dala ɛkɛ jɔŋdi ñaalɔ potti woony, jwali gɛɛl koy koy te jyeka neeniti yaakkɛn boki? ¹⁰ Dala ŋeeddɛ ɛkkɛ ‘ya Kaci Ma Baan yaakati maka ciyi ṭɛɛrji wɛnni bɔɔka te nɔji ɛkkɛn.” Ne Yaccu gɔŋni a ɔɔnyɛ, ɛkɛ warɛ yallɛ ‘wana warɛ yaayan neeniti ɔci gɔkcin ɛkɛti agi, ¹¹ “‘Ya gɔkka iti, jɔŋŋa ñaalɔ ɔci aaran lula ɔgdi ootta baanji.” ¹² Ɔci ɛkɛ jɔŋŋin ñaalɔ ɔci aaran luullɛ, ɔci kaaccin bora goṭi ma ñomgɛnti waakɛnda. Ɔci ma yomgɛn buañi waakɛnda, ɔci ɛkkɛn bala jieyi Jwaŋa Tolan gɔki agi, “Naŋka neeni gɛɛl yuarŋɔn ɔɔn oŋgati a ɔɔn bɛɛ.” ¹³ Ɔci Yaccu ati tool ḍwaŋɛti moki, ɔci ma wyetkɛn ḍɔɔlɛ nona ɛkɛti, ɔci ɛkɛ bala loṭi ɛkkɛn. ¹⁴ Ɔci ne ɛkɛ ḍookki te lali ɔci baali ati goṭi pɔɔjɔyɛ, ɛkɛ men gɛɛl mɔŋnɛ, ɛkɛ yenti Matta, (ɛkɛ yenti Laawi te tuk Ma Icrayiil) kaci Alpyac. Ɛkɛ bala ciyi ona ḍɔcki ma bilk tulba. Ɔci Yaccu gɔkcin ɛkɛti agi, “Bɛɛd bootta ‘yati.” Ɔci ɛkɛ jɔllin ñaalɔ bootcin ɛkɛti. ¹⁵ Ne Yaccu baali ciyi omi am orɔ on Mattayɛ, maka lyemi tulba bala ciyi iki ɛkɛ kɔɔna kɔɔnno, ɔci maka yeyin bala ciyi daŋkun iki Yaccu i maka laldɛ ɛkɛy. Oŋŋa wannayɛ, ma bootcin Yaccuti kɔɔna kɔɔnno. ¹⁶ Ɔci ne maka loṭi worga Juaŋ ma Pɛriciin gɛɛg gɔrki Yaccu baali omki i maka yeyin ɔci maka lyemi tulbayɛ, ɛkkɛn tooccin maka laldɛ Yaccuti agi, “Yaccu omi i maka lyemi tulba ɔci maka yeyin ogo?” ¹⁷ Ɔci ne Yaccu tieŋni jyeka toocki ma neeniyɛ, ɛkɛ gɔkcin ɛkkɛnti agi, “Maka waakɛn pwadinyɛ, ɛkkɛn magdɛ kiimi bɛɛ, gena maka waakɛn yeyin aŋka magdɛ kiimiy. ‘Ya bɛɛn aŋka ‘ya boor maka pwadin bɛɛ, ‘ya bɛɛn aŋka ‘ya boor maka nɔɔtko.” ¹⁸ Oŋ gɛɛltiyɛ, maka laldɛ Yɔhanna ɔci ma Pɛriciinyɛ, ɛkkɛn bala gwoṭi koño. Ɔci ma bɛɛn Yaccuti, ɔci gɔkcin ɛkɛti agi, “Maka laldɛ Yɔhannayɛ, ɛkkɛn gwoṭi koño, ɔci ma Pɛriciin, ɛkkɛn daŋkun gwoṭi koño. Oŋ maka lala i ba ɛkkɛn da gworki koñ bɛ?” ¹⁹ Ɔci Yaccu gɔkcin ɛkkɛnti agi, “Kan ‘war ñooni bala menyɛ, maka bɛɛn jumati yaakinti gwoṭi koñ boki? A’a, kan ‘war ñooni bala menyɛ, maka bɛɛn jumati yaakinti gwoṭi koñ bɛɛ. ²⁰ ’Ya baal ba ‘war ñoonno. Yeti oŋŋa bɛya a oŋŋa ‘war ñooni eetiti mayɛ, ɔci ma yaakinti gworti koñ oŋo. ²¹ “Kan jibba aŋi daan ɔci jiettin jitinyɛ, ɛkɛ kiɛttanti ma bworŋa woonɛti bɛɛ. Kan kiɛttanti ma bworŋa woonɛtiyɛ, ɛkɛ jietti jitin ne tolan nɔñji. ²² Mooya wonkɛn ma luayi te kucin a donk bɛɛ. Kan ɛkkɛn luattan ma kucin a donktiyɛ, ɛkkɛn caaba ɔci kucin ṭontan jitin, ɔci mooy pwoktɛ iñɔ, ɔci ḍakti budan. Acaan a ɔŋŋiyɛ, ma luayi mooya wonkɛn te kucin wonkɛn.” ²³ Oŋ gɛɛlti te Oŋ Cabityɛ, Yaccu ati goṭi yelk jitin i maka laldɛ ɛkɛ. Ɔci ne ɛkkɛn balki atki a woon a ɔɔnyɛ, maka laldɛ Yaccu bala wɔɔpi pok wyetkɛn. ²⁴ Ma Pɛriciin gɛɛg bala ati iki ɛkkɛn ɔci ɛkkɛn gɔkcin Yaccuti agi, “Hay, gɔrca! Maka lala iti, ɛkkɛn jyek ganuun jyeka guagɛ ma te Oŋ Cabit neeni, bɛɛyɛji ɛkkɛn ogo?” ²⁵ Ɔci Yaccu ṭwokcin ɛkkɛnti gɔki agi, “Ɛkkɛ pokkɛ jyeka kiiwɛ ma te jyek naŋki Daawud neeni boki? Gena jyek oŋŋa ɛkɛ ammɛ koñ i maka atki iki ɛkɛy? ²⁶ Ne Abaayatar baali agi gaciic tolan on Juaŋ menyɛ, Daawud kaaccin kañ on Juaŋti, ɔci ɛkɛ ‘wonnɛ Abaayatar byedga ḍuattan ma orɔ Juaŋti, ɔci ɛkɛ byedga neeni ammɛ. Byedga neeni mena parɛ gɛɛl omi bɛɛ. Gena gaciicin Ma Yahuud aŋka omi ɛkkɛn pookɛn ba jyek ganuuny. Ɔci Daawud maka atki i ɛkɛ kɛnnɛ byedg daŋkun. Ɔci Juaŋ gɔkcin genga te naŋka neeni bɛɛ.” ²⁷ Ɔci Yaccu gɔkcin ɛkkɛnti moki agi, “Juaŋ Oŋ Cabit oŋnɛ mako. Juaŋ ma aŋŋɛ oŋnɛ Oŋ Cabit bɛɛ. ²⁸ Gɔṭṭɛ, ba jyeka neeniyɛ, ‘ya Kaci Ma Baanyɛ, ‘ya a Ciɛggɔn Oŋ Cabit acaan ɛkɛ bala ‘ya bieŋuti.”

¹ Ɔci Yaccu kaaccin orɔ ona morki ma Juaŋ moki, ɔci mena ‘uan gɛɛl mɔŋnɛ ɛkɛ aŋan moki, ɛkɛ bieŋɛ aŋi aamma. ² Ɔci ma Pɛriciin bala gɔṭi booti Yaccu warɛ. Ɛkkɛn gɔki agi, “Kan Yaccu mena neeni ywaŋdɛ te Oŋ Cabityɛ, ɔɔn jiek eedɔn akuumati doki.” ³ Ɔci Yaccu gɔkcin ‘wana bieŋɛ puottinti neeni agi, “Bɛɛd wɛnni. Yɔɔtca ma ñomgɛnti.” ⁴ Ɔci Yaccu tooccin ma Pɛriciinti agi, “Jyek ganuun jyeka guaktan ma te Oŋ Cabit wanna jitkɛn bala a ɔki? A jyek maŋi ma walla jyek ywaŋi ma waakɛn, walla a jyek naŋka yaayan walla a jyek nooŋi mako? Ba jyeka pwadin ɛkkɛti neeni bɛ?” Yeti ɛkkɛn gɔkcin genga moki bɛɛ. ⁵ Ɔci Yaccu bala gɔṭi ɛkkɛn, ɔci looñi ɛkkɛnti, ɛkɛ yomɛ yaayɛ acaan ɛkkɛn yomgɛn baaw mati. Ɔci ɛkɛ gɔkcin mena ‘uanti neeni agi, “Bieŋu miɛtca bora.” Ɔci ɛkɛ bieŋɛ miɛnnɛ bora, ɔci ɛkɛ bieŋɛ pwani doki. ⁶ Ma Pɛriciin kaaccin bora te loñko, ɔci ɛkkɛn ati ne pɛñan ati ma Hiruuducti, ɔci ɛkkɛn jiek ñaagɛyɔ te jyek nooŋi Yaccu. ⁷ Ɔci Yaccu ati ɔntɔ te nona mati. Ɛkɛ ati galŋji i maka laldɛ ɛkɛ. Ɔci poli ma polla tolan ɔɔccin bora te ban Jaliilji ne coŋɔn ati bootcin ɛkɛti. Maka ban Yahuudiya, ⁸ ɔci maka ban Urcaliim, ɔci maka ban Idumiiya, ɔci maka ciyi kuocɔ Tol Urdun ŋoyɛti, ɔci maka ban Tayir, ɔci maka ban Ciḍɔɔn, ne ɛkkɛn tieŋki jyek naŋka naŋdɛ Yaccu ne coŋɔn neeniyɛ, ɛkkɛn bɛɛn nona ɛkɛti. ⁹ Ɔci Yaccu gɔkcin maka laldɛ ɛkɛti agi, “Dala ‘ya eektata murka gɛɛl wɛnni. Dala murka yɔɔtti wɛnni nona ‘yati, aŋka ne ma kɛɛktiyɛ, ‘ya taapca ɛkɛti aŋka ‘ya tiittati ma bɛɛ.” ¹⁰ Ɛkɛ gɔki a ɔɔn acaan maka coŋin ywaŋŋɛ ɛkɛ doki. Maka waakɛn yeyin bɛɛn orcinti ɛkɛti. Ɛkkɛn buagɔn topti ɛkɛti waakɛnda. ¹¹ Ɔci maka muogɛ jɔkin yeyinyɛ, ne jɔkin yeyin Yaccu yuarkitiyɛ, ɛkkɛn ḍɛɛmdin iñɔ ɛkɛ ñamɛti, ɔci yaajjin ne tolan te yoma yaayan agi, “I a Kaci Jwaŋa Tolan.” ¹² Ɔci Yaccu gɔkcin ɛkkɛnti ne pɛñan agi, “Naa ɛkkɛ mietɛ ma te ‘ya aŋka ‘ya ŋeetta ma a ɔɔn bɛɛ.” ¹³ Ɔci te oŋŋa wannayɛ, Yaccu ati kaaccin ñaalɔ pomk jitin, ɔci ɛkɛ borcin maka ɛkɛ buagiti, ɔci ɛkkɛn ati ɛkɛti. ¹⁴ Ɔci ma kɛnnɛ Yaccu bora a Inyaakkɛn Wyetkɛn Ne yyɛɛwɔ. Ɔci ɛkkɛn naŋŋɛ ɛkɛ a maka atki iki ɛkɛ oŋkanday. Ɔci ɛkkɛn naŋŋɛ ɛkɛ a maka ooddi loṭi may. ¹⁵ Ɔci ɛkkɛn ‘wonnɛ Yaccu war tɛɛn byeŋkɛnti aŋka ɛkkɛn jɔkin yeyin kootan bora te mati. ¹⁶ Maka A Inyaakkɛn Wyetkɛn Ne yyɛɛwɔ neeniyɛ, gena Butruc (ɛkɛ yenti Cimaan te tuk Ma Icrayiil), ¹⁷ ɔci kɛɛgin Jɛbadi Yaakub ɔci Yɔhanna. (Yaakub i mod ɛkkɛn Yɔhanna, ɛkkɛn ooŋnɛ Yaccu yenga pookɛn agi “Kɛɛgin Ñaal Šɛɛntan.” Ɛkkɛn barŋɛ Yaccu a ɔɔn acaan ɛkkɛn a ywopko.) ¹⁸ Ɔci Andarawuc, ɔci Pilibuc, ɔci Bartɔɔlamawuc, ɔci Matta, ɔci Tɔmac, ɔci Yaakub kaci Alpyac (ɔci nona parɛti ɛkɛ bartan ma a Mena Ḍiɛran), ɔci Tadawuc (ɔci nona parɛti ɛkɛ bartan ma a Yahuuja Kaci Yaakub), ɔci Cimaan (ɔci ɛkɛ bartan ma a “Mena Byeran”), ¹⁹ ɔci Yahuuja Ickɛɛryuti mena Yaccu Kiṭɔ ‘wonnɛ ma byeŋkɛnti aŋka noktan may. ²⁰ Ne Yaccu maka neeni kɛnnɛ bora dokiyɛ, ɛkɛ oŋ ati baanji oŋo. Ɔci ne ɛkɛ atti baanjiyɛ, polla tolan bɛɛn ne coŋɔn, ɔci a ɔɔnyɛ, ɛkkɛn yɔṭi wɔɔka omki moki bɛɛ. ²¹ Ɔci ne modg Yaccun tieŋki jyeka neeniyɛ, ɛkkɛn ati nona Yaccuti acaan ɛkkɛn buagɔn ɛkɛ eetan baanji, acaan ɛkkɛn gɔki agi, “Ɛkɛ wyeñɛ yaayɛ pwatcin bɛɛ.” ²² Maka loṭi worga Juaŋ ɛkkɛn bɛɛn te ban Urcaliim, ɔci ɛkkɛn gɔki agi ɛkta muŋda jwaŋa yaayɔ katan. Ɔci agi te yenti ciɛggɔn jɔkin yeyin, Byɛljabul neeniyɛ, (gena yenti Jwaŋa Yaayan yenta parɛ) ɛkta jɔkin yeyin koodda bora te mati. ²³ Ɔci Yaccu ma bornɛ nona ɛkɛti. Ɔci bala loṭi ɛkkɛn te jyeka a caagin agi, “Jwaŋa Yaayan yaakinti warɛ koodɛ bora parɛ te mati boki? A’a. ²⁴ Kan ma ḍuaŋa ne cyɛɛlɔ gɛɛl jiekɛn ñoowɔ bɛɛyɛ, ban ḍuaŋa neeni yaakinti yɔɔda ne tɛyan bɛɛ. ²⁵ Kan ma ona ne cyɛɛlɔ ñoowɔ te jiek bɛɛyɛ, ɛkkɛn yaakinti ciyi nona ne cyɛɛlɔ bɛɛ. ²⁶ Ɛkkɛ gɔkɛ Jwaŋa Yaayan ‘ya ‘wonna war tɛɛn ɛkɛ? A’a. Kan Jwaŋa Yaayan ‘ya ‘wonda war tɛɛn ɛkɛyɛ, tɛɛn ɛkɛ nuottin jitin doki. ²⁷ “Gɔṭṭɛ ‘wota, kan ‘wana warɛ tɛyan bala orɔ on ɛkɛyɛ, menga yaakinti kaatti orɔ kordi genga on ɛkɛ boki? Kan ‘wana warɛ tɛyan neeni ḍɛktan ma ñamuyɛ, ma oŋ kaatti orɔ kordi waak on ɛkɛ oŋo. ²⁸ “Tieŋdɛ, Jwaŋa Tolan yaakinti ma bɔɔktɛ te naŋki waakɛnda. Kan a ŋɛɛgi, ɔci kan a jyeka pookɛn gɛɛgyɛ, ɛkɛ yaakinti ma bɔɔktɛ ɔɔn men. ²⁹ Yeti kan men gɛɛl wooki naŋki Boŋ Jwaŋa Tolanyɛ, ɛkɛ bɔɔktɛ Juaŋ bɛɛ. Nɔjja neeniyɛ, bala ɛkɛti oŋkanda ɔɔn. Baadi bɛɛ.” ³⁰ Yaccu gɔkcin mati a ɔɔn acaan ɛkkɛn bala ḍori Boŋ Jwaŋa Tolan ne ɛkkɛn gɔkki ɛkɛti agi ɛkta muŋda Jwaŋa Yaayany. ³¹ Mɛy Yaccun ɔci modg Yaccun ɛkkɛn bɛɛni. Ɔci maka coŋin bala ciyi iki Yaccu. Ɔci ɛkkɛn bala yɔdi bora, ɔci men gɛɛl cuuñɛ ɛkkɛn orɔ acaan Yaccu bortɛ. ³² Ɔci ne ɛkkɛn tieŋki jyek mena cuuñɛ ma Yaccuti neeniyɛ, ɛkkɛn gɔkcin Yaccuti agi, “Yaccu, mɛy ɛkkɛ ɔci modg ɛkkɛ, ɛkkɛn bala yɔdi bora tooci i.” ³³ Ɔci Yaccu ṭwokcin maka bala cieki iki ɛkɛti agi, “Ɛɛ, ɛkɛ a mɛy ɔɔn ɔci ɛkkɛn a modg ɔɔn. Yeti gɔṭṭɛ, mena neeniyɛ, ɛkɛ a mɛy ɔɔn, ɔci maka neeniyɛ, ɛkkɛn a modg ɔɔn daŋkun! ³⁵ A ɔɔn mena noŋi ba naŋka ṭagdɛ Juaŋyɛ, ɛkɛ a mɛy ɔɔn, ɔci a mod ɔɔn, ɔci a kow ɔɔn.”

¹ Ɔci Yaccu bala loṭi ma moki bora Galŋ Jaliil ḍwaŋɛti. Ɔci ne ɛkɛ baali loṭi ma a ɔɔnyɛ, polla tolan bɛɛn wyetkɛn ḍɔɔlɛ nona ɛkɛti. Acaan a ɔŋŋiyɛ, ɛkɛ taapcin murkaji ɔci cooccin murkaji galŋji, ɔci maka coŋin neeni bala ciyi galŋ ḍwaŋɛti. ² Ɔci ɛkɛ bala loṭi ɛkkɛn a lali men ɔɔn. Ɛkɛ bala loṭi ma te jyeka a caagin gɛɛg. Ɛkɛ gɔkcin mati agi, ³ “Tieŋdɛ, mena ‘wayi kookinyɛ, ɛkɛ ati bora aŋka ‘wayi kookin. ⁴ Ɔci ne ɛkɛ baali ‘wayi a ɔɔnyɛ, kookin ñingɛn gɛɛg ḍɛɛmdin pɔɔjɔ pɔy konɛti, ɔci ḍiirg bɛɛn ɔci ɛkkɛn amɛ doki. ⁵ Ɔci kookin pookɛn gɛɛg moki ḍɛɛmdin nona gwoyiti, ɔci ɛkkɛn ywollin ne pɛñan acaan ṭɛɛr a ḍiɛran. ⁶ Ɔci ne oŋ waŋɛ myɛlliyɛ, kookin neeni ammɛ oŋ te wɔɔka ḍuulan budan, acaan ɛkkɛn bɛɛkkɛn ati iñɔ bɛɛ. Acaan a ɔŋŋiyɛ, aŋka ɛkkɛn tuuki ɔci iiki wanna. ⁷ Ɔci kookin pookɛn gɛɛg ḍɛɛmdin nona guobgin. Ɔci guobgin ne ɛkkɛn ḍwaŋki dokiyɛ, ɛkkɛn kookin gworɛyɔ, ɔci kookin ñingɛn bɛɛn bɛɛ. ⁸ Ɔci kookin pookɛn gɛɛg ḍɛɛmdin nona balki ṭɛra pwadan, ɔci ɛkkɛn aŋka eccin ñingɛn acaan ɛkkɛn ywollin ne pwadan ɔci ḍwaŋgin ne pwadan. Ɔci eccin ñingɛn ne coŋɔn. Ɔci kookin pookɛn gɛɛg moki eccin ñingɛn bala ñamu ne ḍyɛṭ ṭɔɔlɛ moki. Ɔci kookin pookɛn gɛɛg moki eccin ñingɛn bala ñamu te kookin waakɛnda.” ⁹ Ɔci Yaccu gɔkcin mati agi, “Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan.” ¹⁰ Ne maka coŋin neeni atki dokiyɛ, ma gɛɛg bala ne ḍiɛkan i maka a Inyaakkɛn Wyetkɛn Ne yyɛɛwɔ neeni men. Ɔci ɛkkɛn tooccin Yaccuti te jyeka a caagin neeni gɛɛg. ¹¹ Ɔci ɛkɛ gɔkcin ɛkkɛnti agi, “Ɛkkɛ ‘wonnin ‘ya ñing tɛɛn aŋka jyek cyɛgji Juaŋ jitkɛn yuartɛ ɛkkɛ ne pwadan. Yeti ‘ya jyeka neeni jitkɛn owwa bora maka yookɔn te naŋki jyek cyɛgji Juaŋ neeniti bɛɛ. ¹² ‘Naŋka neeni bala aŋka dala ɛkkɛn gɔṭi a gwali budan, ɔci dala ɛkkɛn tieŋdi a tieŋŋin budan moki, aŋka naa ɛkkɛn waakɛn yaltan ɔci bɔɔktɛ Juaŋ bɛɛ.’” ¹³ Ɔci Yaccu tooccin mati agi, “Jwalla a caagɔn guaŋi ‘ya acca neeni jiñɛ yuarnɛ ne pwadan bɛɛ? Kan a ɔɔnyɛ, jyeka a caagin pookɛn waakɛnda tieŋdɛ ɛkkɛ a ɔki? ¹⁴ Yɔɔddɛ ɛkkɛ myettin jwali konɛ ne pwadan. Mena ‘wayi kookinyɛ, ɛkɛ bala ba mena loṭi ma te jyeka Juaŋ buagiti aŋka naŋtan may. ¹⁵ Ɔci ba jyek kookin ḍɛɛmdin pɔy konɛti neeniyɛ, bala ba maka tieŋŋin jyek Jwaŋa Tolan, ɔci ne ɛkkɛn tieŋki dokiyɛ, Jwaŋa Yaayan bɛya ne pɛñan, ɔci jiek kaldɛ ɔntɔ te ɛkkɛn yomgɛnti. ¹⁶ Ɔci moki ba jyek kookin ḍɛɛmdin nona gwoyiti ɔci bɛɛkkɛn ati iñɔ bɛɛ neeniyɛ, bala ba jyek maka tieŋŋin jieko, ɔci te ñamu ɛkkɛn yomgɛn ñɔɔna ñɔɔno. Ɔci ɛkkɛn bala yɔdi ne ḍiɛran ṭɔɔlɛ, yeti oŋŋa pɔɔd bɛɛdi ɛkkɛnti te jyenna ɛkkɛn jyetki jyek Juaŋtiyɛ, ɛkkɛn ḍɛɛmdi iñɔ ne pɛñan doki waakɛnda. ¹⁸ Ɔci ba jyek kookin ḍɛɛmdin nona guobginyɛ, bala ba maka tieŋŋin jyek ‘ya, ¹⁹ yeti jyeka pookɛn bɛya ɛkkɛn yomgɛnti, ɔci jyek ‘ya gwortanyɔ jyeka pookɛn neeni. Jyeka pookɛn neeni gena jyek naŋka cooŋi ma ñingɛn. Kan ma poŋi jiek oŋkanda ne tolan acaan wak ɛkkɛn a ḍiɛkanyɛ, jyek ‘ya gwortanyɔ paŋŋa neeni. Ɔci moki, maka maalɛn tolanyɛ, kan paŋi ɛkkɛn a paŋi jyek maal budanyɛ, jyek ‘ya gwortanyɔ paŋŋa neeni moki. Ɔci moki, kan ma poŋi waka iñɔ baanji wɛnni budan, ɔci ma yomgɛn ani waka iñɔ baanji wɛnni ne tolanyɛ, jyek ‘ya gwortanyɔ paŋŋa neeni. Ɔci jyek ‘ya noŋdi gena pwadan gɛɛl ɛkkɛn yomgɛnti bɛɛ. ²⁰ Ba jyek kookin ḍɛɛmdin ṭɛra pwadanti neeniyɛ, bala ba maka tieŋŋin jyek ‘ya ɔci jiek mugɛ ne pwadan, ɔci jyek ‘ya neeniyɛ, noŋdi naŋka pwadin ɛkkɛn yomgɛnti. Ma gɛɛgyɛ, naŋki ɛkkɛn naŋka pwadin bala ne ḍyɛṭ ṭɔɔlɛ, ɔci maka pookɛn gɛɛg naŋki ɛkkɛn naŋka pwadin bala ñamu moki, ɔci maka pookɛn gɛɛg moki naŋki ɛkkɛn naŋka pwadin bala ñamu te ma waakɛnda.” ²¹ Ɔci Yaccu gɔkcin ɛkkɛnti agi, “Gɔṭṭɛ, kan dyɛka gɛɛl tontan ma maañyɛ, dyɛka neeni kwomtanwi ma piil boki? Ɔci ɛkɛ oltan ma aŋgan pwanɛti boki? A’a, ɛkɛ ḍuattan ma ñaalɔ nona ḍɔcki ma ɛkɛy. ²² Gen gɛɛl konɛ kuoltanji ma bɛɛ. Gena konɛ kuoltanji mayɛ, ne baaṭi ɛkɛ bɛya bora dɔki. Ɔci moki gena a coggin neeni bɛya bora dɔki. ²³ Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan.” ²⁴ Ɛkɛ gɔkcin ɛkkɛnti moki agi, “Dala ɛkkɛ woŋgɔ tiittɛ te jwalla tieŋdɛ ɛkkɛ neeni, ɔci kan ɛkkɛ jwalla neeni konɛ yuartɛ ne pwadan ɔci naŋdɛyɛ, Jwaŋa Tolan ɛkkɛ pɔktɛ ñingɔti aŋka ɛkkɛ nona bɔwan yuartɛ ne tolan. Ɔci ɛkkɛ laldɛ ɛkɛ te waka jitkɛn loonan waka ɛkɛ buagɔn aŋka ŋeeddɛ ɛkkɛy. ²⁵ Dala ɛkkɛ woŋgɔ tiittɛ te waka ɛkkɛ ‘wondɛ Jwaŋa Tolan, ɔci dala ɛkkɛn naŋdɛ. Kan ɛkkɛ noŋɛ waka ɛkkɛ ‘wondɛ Jwaŋa Tolanyɛ, ɛkɛ ɛkkɛ ‘uottɛti moki. Yeti kan ɛkkɛ waka neeni naŋdɛ bɛɛyɛ, Jwaŋa Tolan mañ ɛkɛ maña dɛki ɛkkɛti, wanna oodɛ bora te ɛkkɛti, ɔci waka ɛkkɛ ‘wonnɛ ɛkɛ neeni aga waka budan.” ²⁶ Ɔci ɛkɛ gɔkcin ɛkkɛnti agi, “Jyek cyɛgji Jwaŋa Tolan bala ba jyek mena ‘uan mena ati ‘wayi kookin. ²⁷ Ne ɛkɛ pok ‘uanɛ dokiyɛ, ɛkɛ ati baanji, ɔci ɛkɛ noŋi genga kookɛnti moki bɛɛ. Ne ɛkɛ baali wicci ɔɔnyɛ, kookin ywoldi pookɛn ɔci ḍwaŋdi. Yeti yuli kookin neeniyɛ, ŋeejɛ mena neeni bɛɛ. ²⁸ Šɛɛr aŋka kanŋan parɛ, ɔci te kanŋa ṭɛɛr neeniyɛ, kookin ṭɛṭṭi bora, ɔci ɛkkɛn ḍwaŋdi, ɔci leeddi doki, ɔci ñingɛn bɛya, yeti a gɔɔn men. ²⁹ Ɔci ne ḍyɛṭ ṭɔɔlɛ ɛkkɛn ‘yɛgdi. Ɔci ne ɛkkɛn ‘yɛkti doki, ɔci kan wɔɔka ɛrki ma ɛkkɛn bɛɛn dokiyɛ, ‘uan ooddi ɛkkɛn ‘yɛrdɛ.” ³⁰ Ɔci Yaccu tooccin ɛkkɛnti agi, “‘Ya jyek cyɛgji Jwaŋa Tolan poorcati i jwalla bɛ? ‘Ya gɔkca jwalla a caagɔn ɛka ɔki moki aŋka menin neeni konɛ gorti boray? ³¹ Cyɛgji Jwaŋa Tolanyɛ, ɛkɛ bala ba kardala waŋɛ. Ñing kardala neeniyɛ, ḍyɛrgin a ḍyɛrgin ba ñing kɔba. Ɔci ɛkkɛn ḍyɛrɔ te ñing janga pookɛn waakɛnda. Ɔci kan ɛkɛ piinnɛ men gɛɛl bal ɛkɛjiyɛ, ³² ɛkɛ ywoldi ɔci tola, ɔci janga pookɛn bwandɛ ɛkɛ. Ɔci ɛkɛ balki kɛrk ɛkɛ beccin a beccin. Ɔci ḍiirg yaakinti eyi kwork ṭiebji ɛkɛti. A ɔɔnyɛ, bala ba jyek cyɛgji Juaŋ daŋkun. Jyek cyɛgji Juaŋ ɛkkɛn jɔɔtcin ne ḍiɛran te maka ne ḍiɛkan, ɔci ɛkɛ poni jitin ne ma coŋki a coŋgin ɔɔn.” ³³ Ɔci Yaccu bala loṭi ɛkkɛn te jyeka a caagin ɛkkin pookɛn gɛɛg men ɔɔn ba bolja ɛkkɛn yaakɛntijiek jitkɛn yuartany. ³⁴ Ɔci Yaccu maka coŋin neeniyɛ, lallɛ te jyeka a caagin neeni, yeti ma ɛkɛ woodgɛn aŋka myennɛ ɛkɛ te jiek jitkɛn woodgɛn waakɛnda. ³⁵ Oŋ gɛɛlti ne oŋ unniyɛ, Yaccu gɔkcin maka laldɛ ɛkɛti agi, “Dala ikin oottin kuocɔ galŋ taaŋŋa parɛti.” ³⁶ Yaccu bala ciyi murkaji, ɔci maka laldɛ ɛkɛ kaaccin murkaji, ɔci ɛkɛ eyɛ ɛkkɛn te murka neeni i ɛkkɛn. Ɛkkɛn maka coŋin dalji ɔci ɛkkɛn atti. Ɔci murkan pookɛn gɛɛg ati i ɛkɛ. ³⁷ Ɔci jwamma tolan bɛɛn ɔci pɔɔgi ati murka konɛti, ɔci murka noŋi kuma te piego. ³⁸ Ɔci Yaccu bala murka ŋwayɛti. Ɛkɛ wyeñɛ tɛɛlnɛti kaakciti, ɔci ɛkɛ wiccin doki. Ɔci ma bala jieci ɛkɛ warɛ gɔki agi, “Mena loṭi may, i niin a ɔɔn ogo? Ikin tuutin acca!” ³⁹ Ɔci ɛkɛ ṭiewin ɔci gɔkcin jwamiti ne pɛñan, ɔci jwami yɔɔni doki. Ɔci ɛkɛ gɔkcin pɔɔgga ḍwaŋinti moki, ɔci pɔɔgi yɔɔni moki. Genga bala moki bɛɛ. ⁴⁰ Ɔci ne pieg waakɛn ḍiepkiti iñɔ dokiyɛ, ɛkɛ tooccin mati agi, “Ɛkkɛ buayɛ a ɔɔn ogo? Ɛkkɛ jyettɛ ‘yati bɛɛ?” ⁴¹ Ɔci ɛkkɛn korkɛn buañi ɔci bala gɔwwi yɔtin pookɛn agi, “Mena neeni tolcin awarɛ hay! Jwami ɔci pɔɔgi tieŋŋin jyek ɛkɛ.”

¹ Yaccu ɔci maka laldɛ ɛkɛ ati Galŋ Jaliil kwoña parɛti. Nona dɛñki ɛkkɛn neeniyɛ, gena ban Gadara. (Bana neeni ma boṭi ‘wota agi Gɛraca.) ² Nona neenitiyɛ, mena ‘uan gɛɛl bala wɛnan, ɔci ɛkɛ mugɛ jɔkin yeyin. ³ Ɛkɛ bala ciyi bora pomk jitin nona jokki ma maka tuway. Ɛkɛ ḍɛɛgɛ ma oŋki kɔɔna kɔɔni te waka ḍɛɛki ma may, ɔci ɛkɛ waak buannɛ ɔci waak ɛɛrŋɛ jitin. Menga yaakinti ɛkɛ mugdɛ bɛɛ. Ɛkɛ warɛ tɛɛna tɛɛno. Menga yaakinti ḍɛɛwi ɛkɛ bɛɛ. Jiŋgin ɔci bilk buannɛ ɛkɛ. ⁵ Ɛkɛ bala ḍɔki pomk jitin ɔci nona jokki ma maka tuway, ɔci ɛkɛ yaadan a yook te oŋ jiñɛ ɔci te ween jiñɛ, ɔci ɛkɛ jieb war ɛkɛ parɛ te gwoyi, ɔci ɛɛri warɛ te tomŋin. ⁶ Ne Yaccu kooni bora te murkatiyɛ, ɛkɛ yuarnɛ ‘wana neeni. Ɔci ne ɛkɛ Yaccu yuarnɛ te nona loonanyɛ, ɛkɛ yiŋi ɛkɛti, ɔci ḍwoñjin iñɔ ɛkɛ ñamɛti ɔci morcin ɛkɛti. Ɔci Yaccu gɔkcin ɛkɛti agi, “I, Jwaŋa Yaayan, dala i kooya bora te menti.” Ɔci Jwaŋa Yaayan neeni yaajjin te pwana tolan, ɔci jɔkin yeyin gɔkcin te tuk mena neeni Yaccuti agi, “I Yaccu Kaci Jwaŋa Tolan ñaalɔ, i buagi gena ‘yati yeti? ‘Ya ḍɔnna iti te yenti Jwaŋa Tolan, naa i noŋja ne yaayan ‘yati bɛɛ.” ⁹ Ɔci Yaccu tooccin ɛkɛti agi, “I yenti ɔki?” Ɔci ɛkɛ ṭwokcin ɛkɛti agi, “‘Ya yenta ‘Ɔɔn Coŋgɔn’ acaan ɔɔn coŋgɔn.” ¹⁰ Ɔci te oŋŋa wannayɛ, poli kwotin polla tolan bala yɔdi poom taaŋɛti omi luomo. Ɔci jɔkin yeyin neeni tooccin Yaccuti agi, “Ɔɔn cundɔn i kwotinti te jyek i aŋka ɔɔn kaattɔn ɛkkɛnti.” ¹³ Ɔci Yaccu gɔkcin jɔkin yeyinti agi, “Ɔgdɛ ooddɛ kaattɛ.” Ɔci jɔkin yeyin neeniyɛ, kooyin bora te menti, ɔci ɛkkɛn ati kaaccin kwotinti. Ɔci kwotin a alpn ne yyɛɛwɔ (2,000) neeniyɛ, ɛkkɛn yoŋŋin te ñaalɔ poom wyeñɛti, ḍɛɛmdin iñɔ galŋji waakɛnda, ɔci ḍakcin waakɛnda galŋji. ¹⁴ Ɔci maka gɔṭi kwotin neeniyɛ, ɛkkɛn buañi ɔci ɛkkɛn maka bora balk jitin myetkɛ, ɔci ɛkkɛn yiŋi maka baanji moki myetkɛ te naŋka neeni. Ɔci ma bɛɛn ɔci gɔrcin naŋka neeni. ¹⁵ Ɛkkɛn bɛɛn nona Yaccuti, ɔci mena luudɔn neeniyɛ, mɔkci ɛkkɛn bala ciyi i Yaccu. Ɛkɛ bala ɛŋi bworŋin pwadin, ɔci ɛkɛ wyeñɛ pwani moki. Ɔci ma korkɛn buaññi. ¹⁶ Ɔci maka naŋka naŋŋɛ Yaccu neeni yuarɛ ɛkkɛnyɛ, ɛkkɛn ma myetkɛ te jyek mena mugɛ jɔkin yeyin, ɔci te jyek kwotin. ¹⁷ Ɔci maka te baanɛn neeni gɔkcin Yaccuti agi, “Dala i ɔgdi ootta te ban ɔɔn wɛnni.” (Ɛkkɛn gɔki a ɔɔn acaan ɛkkɛn buañi te naŋka neeni.) ¹⁸ A ɔŋŋiyɛ, Yaccu dɔɔkcin kaaccin jiju murkaji. Ɔci ne Yaccu noŋi taapti murkatiyɛ, mena mugɛ jɔkin yeyin te ñamu neeniyɛ, gɔkcin Yaccuti agi, “‘Ya buaga woon oottin iki ‘ya.” ¹⁹ Ɔci Yaccu yookɔn ɔci kɛkcin ɛkɛti agi, “A’a, i ɔgdi ootta ban ɛkkɛ, ɔci ma ɛkkɛ myetka te naŋka naŋŋɛ Ciɛggɔn iti neeni. Ɛkkɛn myetka Juaŋ yomɛ pɔŋnɛ iti a ɔki.” ²⁰ Ɔci ɛkɛ ati bonk ma ɛkkɛn Bonka Ne Inyaakkɛnti. Ɔci ɛkɛ bala mieti maka bonka neeniti te naŋka naŋŋɛ Yaccu ɛkɛti neeni waakɛnda. Ɔci ma yomgɛn moottin waakɛnda. ²¹ Ɔci Yaccu ati dɔɔki kwoña parɛti moki te murka i maka laldɛ ɛkɛ. Ɔci polla tolan bɛɛn nona ɛkɛti. Ɛkɛ bala te tool ḍwaŋɛti men. ²² Ɔci men gɛɛl bɛɛn te maka a ḍuaŋan ona morki ma Juaŋ neeni. Ɛkɛ yenti Jayroc. Ɛkɛ bɛɛn Yaccuti, ɔci ne ɛkɛ Yaccu yuarŋiyɛ, ɛkɛ ḍwoñjin iñɔ ɛkɛ ñamɛti. ²³ Ɔci ɛkɛ gɔkcin ɛkɛti agi, “Kaci ‘ya kacca ɛɛŋ ṭɔɔlɛ warɛ yaayɛ. Ɛkɛ amɛ lieno. I bɛɛd aŋka i byeŋku tapca ɛkɛti aŋka ɛkɛ warɛ pwada.” ²⁴ Ɔci ɛkkɛn ati yaakkɛn. Ɔci ne polla tolan neeni gɔrki ɛkkɛn atki yaakkɛn a ɔɔnyɛ, ɔci ɛkkɛn bootcin daŋkun. Ɛkkɛn bala ati ñoowi a ñoowin ne cwakanti. ²⁵ Ɔci mena ɛɛŋ gɛɛl bala daŋkun wɛnan, ɛkɛ warɛ yaayɛ yuong a inyaakkɛn wyetkɛn ne yyɛɛwɔ. Ɛkɛ warɛ yaayɛ yimg wɔyi a wɔɔno. ²⁶ Ɛkɛ ati kimtan jitkɛn kɔɔna kɔɔnno, ɔci ɛkɛ taabbin te naŋki ɛkkɛn doki. Mal ɛkɛ ḍakcin waakɛnda te kanŋa maka kimtan. Yeti ɛkɛ warɛ pwani men bɛɛ. Ɛkɛ warɛ pɛɛdin a pɛɛdin nɔñji oŋo. ²⁷ Ɛkɛ tieŋŋin jiek mati te naŋka naŋdɛ Yaccu ɔci ɛkɛ bɛɛni. Ne ɛkɛ bɛɛniyɛ, ma a ḍiɛkan bɛɛ, ɔci ɛkɛ ati te ma jitkɛn, ɔci ɛkɛ ati pɔya Yaccu ŋoyɛti ɔci topcin bworŋ ɛkɛti. ²⁸ Ɛkɛ noŋi a ɔɔn acaan ɛkɛ poŋi gɔki agi ne ɛkɛ topci bworŋ Yaccutiyɛ, ɛkɛ warɛ pwaddɔ lakun doki. ²⁹ Ɔci ne ɛkɛ tomni bworŋ ɛkɛti a ɔɔnyɛ, ɔci ne pɛñan yimga wɔyi neeni yɔɔni doki, ɔci ŋeejɛ ɛkɛ ɛkɛ warɛ pwani te naŋki Yaccu. ³⁰ Ɔci ŋeejɛ Yaccu ɛkɛ men gɛɛl ywaŋŋɛ te war tɛɛn ɛkɛ, ɔci ɛkɛ warɛ yallɛ ne pɛñan, ɔci ɛkɛ gɔkcin agi, “Hay! A menɛ topcin bworŋ ‘yati nɛ?” ³¹ Ɔci maka laldɛ ɛkɛ gɔkcin ɛkɛti agi, “I tooc a ɔɔn ne ma bala kɔɔna kɔɔni nona iti ogo?” ³² Ɔci ɛkɛ bala gɔṭi lieṭi toŋkɛ acaan buagɔn gɔrti mena noŋi a ɔɔn nɛ. ³³ Ɔci ɛɛŋyɛ, naŋka naŋŋɛ Yaccu ɛkɛ warɛtiyɛ, ŋeejɛ ɛkɛ. Ɔci ɛkɛ buayi warɛ ḍiedan, ɔci ɛkɛ bɛɛn Yaccuti ɔci ḍwoñjin iñɔ ɛkɛ ñamɛti, ɔci ɛkɛ Yaccu myennɛ te jiek waakɛnda. ³⁴ Ɔci Yaccu gɔkcin ɛkɛti agi, “Kaci ‘ya, i waru pwani te jyenna i jyetti ‘yati neeni. I ɔgdi ootta te yoma pwadan, ɔci dala i cied waru ne pwadan oŋkanda ɔɔn.” ³⁵ Ɔci ne Yaccu baali gɔki jyeka neeni ɛɛŋti menyɛ, ma gɛɛg bɛɛn te on Jayroc, man a ḍuaŋa ona morki ma Juaŋti, ɔci gɔkcin ḍuaŋati agi, “Kaci i kacca ɛɛŋyɛ, ɛkɛ buannɛ warɛ doki. Te gena yeti i mena loṭi ma taabba owwa budan mokiy?” ³⁶ Ɔci ne Yaccu tieŋni jyeka neeniyɛ, ɛkɛ gɔkcin Jayrocti agi, “Naa i buay bɛɛ. Dala i jyedda ‘yati men ɔɔn.” ³⁷ Ɔci Yaccu maka coŋin dɛɛnɛ, acaan ɛkɛ buagɔn naa ɛkkɛn bootti ɛkɛti waakɛnda bɛɛ. Ɔci maka atki iki ɛkɛyɛ, gena Butruc ɔci Yaakub ɔci Yɔhanna mod Yaakubn. Gena ɛkkɛn aŋka ati i ɛkɛy. ³⁸ Ne ɛkkɛn dɛñki on Jayrocyɛ, ɛkkɛn ma mɔkci kɔɔna kɔɔnno. Ɔci ɛkkɛn bala wiak a joono. Ɔci ma gɛɛg bala wiak yaadan a yooko. ³⁹ Ɔci ne Yaccu kaanni orɔyɛ, ɛkɛ gɔkcin mati agi, “Hay, te gena yeti aŋka ɛkkɛ wiagɛ yaadɛ a ɔɔny? Kaci tuun bɛɛ. Ɛkɛ wiccin a wiccin budan.” ⁴⁰ Ɔci ɛkkɛn lɛɛṭi te jyek ɛkɛ. Ɔci ɛkɛ ɛkkɛn ŋualnɛ bora waakɛnda. Ɔci ɛkɛ kaci weegɛn ɔci kaci mɛɛgɛn, ɔci maka bɛɛki iki ɛkɛyɛ, ɛkkɛn aŋka eññɛ nona baali kaciy. ⁴¹ Ɔci Yaccu kaci muŋŋɛ te bieŋɛ, ɔci gɔkcin ɛkɛti agi, “Šɔɔl ṭɔɔlɛ, i jɔŋŋa ñaalɔ.” (Te tuk Ma Icrayiil Yaccu gɔkcin agi, “Talita, gumi.”) ⁴² Ɔci ne pɛñan ṭɔɔl ṭɔɔlɛ neeni jɔŋŋin ñaalɔ ɔci ati parɛ. Ɔci ma yomgɛn moottin ne pɛñan. Yuong ṭɔla neeni a inyaakkɛn wyetkɛn ne yyɛɛwɔ. ⁴³ Ɔci Yaccu ma myennɛ agi naa ɛkki ma nɔɔtti te naŋka neeni bɛɛ. Ɔci ɛkɛ ɛkkɛn myennɛ moki agi dala kaci ‘wondi ma genga amda.

¹ Ɔci Yaccu bana neeni dalnɛ, ɔci ɛkɛ ati ban ɛkkɛn ban Najarɛt moki, ɔci maka laldɛ ɛkɛ bootcin ɛkɛti. ² Ɔci te Oŋ Cabityɛ, ɛkɛ ati ɔci bala loṭi ma ona morki ma Juaŋy. Ɔci maka coŋin maka tieŋŋin jyek ɛkɛ neeniyɛ, ɛkkɛn korkɛn buañi noon ne tolan, ɔci ɛkkɛn gɔki agi, “Mena neeni jyeka neeni oonɛ te aŋɛ yeti? Ñing tɛɛn ɛkɛ neeni bala a ɔki a ɔɔn? Ɛkɛ yaakinti naŋka tɛyan te byeŋki ɛkɛ a ɔki? ³ Mena neeni a mena gɔɔñgɔn bɛɛ? Mɛy ɛkkɛn a Moryam bɛɛ? Ɔci modg ɛkkɛn a Yaakub ɔci Yuocip ɔci Yahuuja ɔci Cimaan bɛɛ? Ɔci kowi ɛkkɛn bala ciyi baanji ikinti wɛnni bɛɛ?” Ɔci ma ɛkɛ ñyɛlɛ te jiek yookɔn te ḍɔŋ ɛkɛ ɛkkɛnti. ⁴ Ɔci Yaccu gɔkcin ɛkkɛnti agi “Bonka pookɛnyɛ, ma ani bɔwa. Yeti ban ɛkkɛn waanɛtiyɛ, maka ban ɛkkɛn, ɔci ma ɛkkɛn, ɔci maka on ɛkkɛn ani ɛkɛ bɛɛ.” ⁵ Ɔci Yaccu yaakinti noŋi naŋka tɛyan wɛnan moki bɛɛ. Maka waakɛn yeyin gɛɛg bala, ɔci ɛkkɛn aŋka ywaŋŋɛ ɛkɛ ne ḍiɛkan. ⁶ Ɔci ɛkɛ konɛ buañi noon acaan ɛkkɛn jyeti ɛkɛti bɛɛ. Ɔci Yaccu bala ati booti bonk jitkɛn loṭi ma. ⁷ Ɔci ɛkɛ Maka A Inyaakkɛn Wyetkɛn Ne Yyɛɛwɔ neeniyɛ, bornɛ nona ɛkɛti, ɔci ɛkɛ ɛkkɛn cuuññɛ ma da atin ne yyɛɛwɔ, ɔci ma da atin ne yyɛɛwɔ. Ɔci ɛkɛ ɛkkɛn ‘wonnɛ war tɛɛn byeŋkɛnti ɔci jwali ɛkɛ aŋka jɔkin yeyin kootan bora te mati. ⁸ Ɔci ɛkɛ gɔkcin ɛkkɛnti agi, “Gɔṭṭɛ, naa ɛkkɛ eedɛ gɔlk bɛɛ, walla cowaaln bɛɛ, walla oomdin bɛɛ, walla bilk kucin korkɛnti bɛɛ. ⁹ Ɔci dala ɛkkɛ ɛɛŋdɛ wɛyi ciegɔti, yeti naa ɛkkɛ ɛɛŋdɛ jibban ne yyɛɛwɔ bɛɛ.” ¹⁰ Ɔci ɛkɛ gɔkcin ɛkkɛnti agi, “Kan ɛkkɛ ooddɛ ɔci dɛndɛ baanjiyɛ, naa ɛkkɛ ḍɔkɛ a ḍwaŋi oorga pookɛnti bɛɛ. Dala ɛkkɛ ciedɛ ona ne cyɛɛlɔ ɔɔn ne ɛkkɛ jɔŋdɛ ooddɛ bonka pookɛnti ɔɔn. ¹¹ Ɔci kan maka bana parɛ gɛɛg ñiebdi iki ɛkkɛ ne pwadan bɛɛyɛ, ɔci kan ɛkkɛn yookɔn te tieŋŋin jyek ɛkkɛyɛ, dala ɛkkɛ ciegɔ ṭyaŋdɛ te ṭɛra ban ɛkkɛn neeni aŋka ŋeettan ma ɛkkɛn kɛki te jyeka awarɛ neeni.” ¹² Ɔci ɛkkɛn atti. Ɔci ɛkkɛn bala loṭi ma agi dala ma waakcin yaldɛ te nɔji ɛkki. ¹³ Ɔci ɛkkɛn jɔkin yeyin kooyɛ bora te mati kɔɔna kɔɔnno. Ɔci maka coŋin maka waakɛn yeyinyɛ, jwoyi ɛkkɛn te ñɔɔno, ɔci ma waakɛn pwadgin doki. ¹⁴ Ɔci ḍuaŋa tolan yenti Hiruuduc Antipac, ɛkɛ tieŋŋin jyek naŋki Yaccu, acaan yenti Yaccu ati baan konɛti doki. Ɔci ɛkɛ gɔkcin agi, “Mena noŋi naŋka neeniyɛ, gena Yɔhanna Mena buoṭi Ma te ñamuy. Ɛkɛ jɔŋŋin ñaalɔ te lienti aŋka ɛkɛ balkiti naŋka tɛyan wanna.” ¹⁵ Yeti maka pookɛn gɛɛg gɔki agi, “Gena Iliiya, dɔɔkkin tɛɛti moki ba jwalla guaŋŋɛ Jwaŋa Tolan agi ɛkta bɛɛdɔ dɔɔktɔ dɔkɔy.” Ɔci maka pookɛn gɛɛg moki gɔki agi, “Ɛkɛ a bɔwa Jwaŋa Tolan ba bɔwan te baaṭi.” ¹⁶ Yeti ne Hiruuduc tieŋni jyek Yaccuyɛ, ɛkɛ gɔki agi, “Gena Yɔhanna mena wyeñɛ ŋutcan ‘ya ɔntɔ ɛkɛ jɔŋŋin ñaalɔ te koolji wanna.” ¹⁷ Hiruuduc Antipac poŋi a ɔɔn acaan gena ɛkɛ gɔkcin mati agi Yɔhanna nogdi may. Naŋka neeni bɛɛn a ɔɔn acaan Hiruuducyɛ, mod ɛkkɛn gɛɛl bala yenti Pilibuc. Pilibuc neeni balki ɛɛŋ yenti Ɛrɔɔdya, yeti Ɛrɔɔdya Pilibuc dalnɛ, ɔci ɛkɛ ḍɛɛnɛ Hiruuduc mod Pilibucn. ¹⁸ Oŋ gɛɛlti Yɔhanna Mena buoṭi Ma neeni ṭejjin Hiruuducti ne pɛñan agi, “I Hiruuduc, i ɛŋ mod ɛkkɛ ḍɛya ogo? Naŋki i neeni bala ba naŋki ganuun Juaŋ ba.” ¹⁹ Ɛrɔɔdya looñjin Yɔhannati ne tolan te jyeka neeni, ɔci ɛkɛ buagɔn Yɔhanna nogdɛ. Yeti Hiruuduc buayi Yɔhanna. Çeejɛ ɛkɛ Yɔhanna neeni a men Juaŋ mena pwadan. Yeti Hiruuduc ma cuuññɛ Yɔhannati, ɔci Yɔhanna mugɛ ma. Yeti ɛkɛ Yɔhanna kɛɛññɛ ñin te Ɛrɔɔdya ɛŋa buagɔn noki ɛkɛ neeni. Ɔci a oŋki ne Hiruuduc baali gɔɔki i Yɔhannayɛ, ɛkɛ wyɛñɛ yɔɔda, ɔci gena naŋdɛ gɛɛl yuartɛ bɛɛ. Yeti ɛkɛ yomɛ ñɔɔcin buagɔn tieŋdi jyeka guadɛ Yɔhanna neeni men ɔɔn. ²¹ Ɔci oŋ gɛɛltiyɛ, pɔya lildi Ɛrɔɔdya aŋka Yɔhanna nogdiyɛ, warɛ yuarŋɛ doki. Te oŋ iid oŋŋa Hiruuduc jietkiti mayɛ, ɛkɛ ma bornɛ agi ma bɛɛdɔ jumati. Gena cyekin akuuma ɔci ḍuaŋan ackan, ɔci maka ḍwaŋin baanji ban Jaliil. ²² Ɔci ne ɛkkɛn balki nona ɛkkɛn ‘uommɛ Hiruuducyɛ, kaci Ɛrɔɔdya, kacca ṭɔɔl bɛɛn ɔci kaaccin orɔ nona mati, ɔci ɛkɛ ñiɛljin, ɔci wɛɛli ɛkɛ pwad pwad Hiruuducti, ɔci wɛlg ɛkɛti. Ɔci Hiruuduc gɔkcin ṭɔɔlti agi, “Kan i toocca ‘yati te genga gena i buagiyɛ, i ‘wondin.” ²³ Ɔci ɛkɛ ḍuaññɛ Hiruuduc te jwali a warɛ agi, “Kan i buagi genga ‘yatiyɛ, i ‘wondin. Kan i buagi taaŋi mal ‘yayɛ, i wɛttin.” ²⁴ Ɔci ṭɔɔl kaaccin bora ati mɛɛgɛnti, ɔci tooccin mɛɛgɛnti agi, “‘Ya toocca Hiruuducti te gena?” Ɔci mɛɛgɛn gɔkcin ɛkɛti agi, “Dala i toocca ɛkɛti te wyeñ Yɔhanna Mena buoṭi May.” (Ɛkɛ tooccin te wyeñ Yɔhanna a ɔɔn acaan ɛkɛ buagɔn aŋka ŋeeddɛ ɛkɛ ne pwadan a Yɔhanna tuun doki.) ²⁵ Ɔci ṭɔɔl bɛɛn kooyin orɔ moki nona ḍuaŋa tolanti ne pɛñan wowwin bɛɛ, ɔci gɔkcin ɛkɛti agi, “‘Ya buaga wyeñ Yɔhanna Mena buoṭi May. Dala ‘ya eekta wyeñ ɛkɛ te ḍwan acca ɔŋ.” ²⁶ Ɔci ḍuaŋa tolan yomɛ yaañi ne pɛñan, yeti acaan ɛkɛ jiek naŋɛ i ṭɔɔl doki, ɔci moki acaan maka on ɛkɛ a wɛlg tieŋŋin jyek ɛkɛyɛ, ɛkɛ buagɔn jiek agdiyɔ moki bɛɛ. ²⁷ Ɔci Hiruuduc gɔkcin ackan gɔṭi ɛkɛ neeni gɛɛlti agi, “Dala i ootta wyeñ Yɔhanna ŋwodda bora owwa.” Ɔci ackan neeni ati ciginji, ɔci Yɔhanna wyeñɛ ŋwonnɛ bora, ²⁸ ɔci wyeñ Yɔhanna oonɛ ɛkɛ te ḍwan ɔci ‘wonnɛ ṭɔɔl eññɛ ṭɔɔl mɛɛgɛnti, ɔci ‘wonnɛ ɛkɛ. ²⁹ Ɔci ne maka laldɛ Yɔhanna tieŋki jyek lyen ɛkɛyɛ, ɛkkɛn ati ciginji, ɔci war Yɔhanna eyɛ, ɔci jokci koolji. ³⁰ Cuudan Yaccuyɛ, ɛkkɛn dɔɔkkin nona ɛkɛti, ɔci Yaccu myetkɛ ɛkkɛn te jyeka ɛkkɛn atki bonk jitin neeni. Ɛkɛ myetkɛ te jyek naŋki ɛkkɛn, ɔci te jyek lali moki. ³¹ Ɔci Yaccu gɔkcin ɛkkɛnti agi, “Dala ɛkkɛ bɛɛdɛ pookɔ, ikin oottin nona wɔɔgan wootin ne ḍiɛran ṭɔɔlɛ lakun.” Ɛkɛ gɔki a ɔɔn acaan ma ñɔɔlŋan a ñɔɔlŋin nona ɛkkɛnti. Ɔci nona wooti ɛkkɛn bala bɛɛ, ɔci nona omki ɛkkɛn bala bɛɛ. ³² Ɔci ɛkkɛn ati te murka pookɛn, bala ooddi nona wɔɔgan. ³³ Ɔci maka coŋin neeniyɛ, ne ɛkkɛn gɔrki ma balki atki ootti nona ootti ɛkkɛn neeniyɛ, ɔci ɛkkɛn yiŋi te ciegɛn, acaan nona ootti ma ŋeecɔn ɛkkɛn. Ɔci maka ciyi yomu bonka ḍyɛrintiyɛ, ɛkkɛn ati daŋkun, ɔci ɛkkɛn dɛñjin ñamu aŋan. ³⁴ Ɔci ne Yaccu dɛnniyɛ, ɛkɛ ma mɔŋnɛ kɔɔna kɔɔnno. Ɔci Yaccu yomɛ wiak acaan ɛkkɛn bala ba kulin ḍɛɛnɔn ɛkkɛn baawo. Ɔci ɛkɛ bala loṭi ɛkkɛn te jyeka coŋin. ³⁵ Ɔci ne ɛkkɛn ɛɛni coodiyɛ, maka laldɛ Yaccu bɛɛn ɛkɛti, ɔci gɔkcin ɛkɛti agi, “Nona neeni a wɔɔŋ jiñɛ budan, ɔci ma ɛɛni coodi doki. ³⁶ Dala i ɛkkɛn cuña ooddi bonka ḍyɛrinti, ɔci bonka bora aŋka ɛkkɛn wɛrdi byedg amtan ɛkkɛn.” ³⁷ Ɔci Yaccu ṭwokcin ɛkkɛnti agi, “Ɛkkɛn ‘wondɛ ɛkkɛ waka amtan.” Ɔci ɛkkɛn gɔkcin ɛkɛti agi, “Byedga amtan maka neeni eedi bilk kanŋa mena ne cyɛɛlɔ ponk ne dɔɔyɔ wyetkɛn ne ḍoogɔ! I buagi ɔɔn ooddɔn bilka neeni ‘uattɔnyɔ te oomdin nɛ?” ³⁸ Ɔci Yaccu tooccin ɛkkɛnti agi, “Ɛkkɛ balkɛ byedg a ñiṭin? Ɔgdɛ ooddɛ gɔrtɛ.” Ɔci ne ma atki gɔrki byedg dokiyɛ, ɔci ɛkkɛn bɛɛn ɔci gɔkcin Yaccuti agi, “Byedg bala ne dɔɔyɔ budan, ɔci yaka ‘yɛggin bala ne yyɛɛwɔ.” ³⁹ Ɔci Yaccu gɔkcin maka laldɛ ɛkɛti agi, “Dala ɛkkɛ gɔktɛ ma cootti iñɔ lwoma ṭeyan neeni wyetkɛti, dala ɛkkɛn cootti iñɔ magga da te noonɛn, ɔci magga da te noonɛn.” ⁴⁰ Ɔci nona ne cyɛɛlɔyɛ, ma cooccin iñɔ a miyya (100), ɔci nona ne cyɛɛlɔyɛ, ma cooccin iñɔ a miyya (100), ɔci taaŋŋa parɛti moki, ma cooccin iñɔ a ma baan ne yyɛɛwɔ mena parɛ byeŋkɛ (50), ɔci nona parɛti moki, ma cooccin iñɔ a ma baan ne yyɛɛwɔ mena parɛ byeŋkɛ (50) a ɔɔn moki. ⁴¹ Ɔci Yaccu byedga ne dɔɔyɔ neeni luullɛ byeŋkɛti iki yaka ‘yɛggin ne yyɛɛwɔ neeni daŋkun. Ɔci Yaccu ñorcin ñaalɔ pɔliji, ɔci gɔkcin a pwatcin Jwaŋa Tolanti, ɔci ɛkɛ byedg wɛɛnnɛ jitin, ɔci ‘wonnɛ maka laldɛ ɛkɛ, ɔci ‘woñgi maka ciyi iñɔ neeni. Ɔci ɛkɛ ma wɛɛnnɛ yaka ‘yɛggin daŋkun. ⁴² Ɔci ɛkkɛn omjin waakɛnda ne ɛkkɛn yɔmki ɔɔn. ⁴³ Ɔci ɛkkɛn tiɛdɛ oomdin. Ɔci oomdin ɛkkɛn tiɛtki neeniyɛ, limiyɔ ma, ɔci ɔdin kumgin a inyaakkɛn wyetkɛn ne yyɛɛwɔ te byedga ne dɔɔyɔ ɔci yaka ‘yɛggin daŋkun neeni. ⁴⁴ Maka omi oomdin neeniyɛ, ɛkkɛn a ḍiɛkan bɛɛ. Ɛkkɛn kɔɔna kɔɔnno. Maka ‘uay pookɛn bala a alpn ne dɔɔyɔ (5,000). ⁴⁵ Ɔci ne pɛñan ne ɛkkɛn omki ḍookki dokiyɛ, Yaccu gɔkcin maka laldɛ ɛkɛti agi, “Ɛkkɛ ɔgdɛ ooddɛ ñamu ne pɛñan taaptɛ murkati, ooddɛ kuocɔ ban Bɛtceeyida.” Ɔci Yaccu maka coŋin neeni myennɛ agi, “Dala ɛkkɛ ɔgdɛ ooddɛ baanji.” ⁴⁶ Ɔci ne Yaccu gɔŋni mati a ɔɔnyɛ, ɛkɛ ma dalnɛ, ɔci ɛkɛ ati ñaalɔ poom wyeñɛti aŋka cɔkti Juaŋti. ⁴⁷ Ɔci ne oŋ waŋɛ unniyɛ, murka bala yeccu galŋ yiɛŋɛji. Ɔci Yaccu bala parɛ galŋ ḍwaŋɛti. ⁴⁸ Ɔci Yaccu ɛkkɛn yuartɛ ne ɛkkɛn gɔɔpki murka te taab te jwamiy. Ɔci ne tinnɔyɛ, Yaccu ati nona ɛkkɛnti. Ɛkɛ bala ati ñaalɔ pieg wyetkɛnti, ɔci ɛkɛ noŋi ba ne ɛkɛ ɛkkɛn gordiyɔ ɔɔn. ⁴⁹ Yeti ne ɛkkɛn ɛkɛ yuarkiti baali ati ñaalɔ pieg wyetkɛntiyɛ, ɛkkɛn poŋi gɔki agi, “Gena ‘yeeññan, hay!” Ɔci ɛkkɛn yaadan a yooko. ⁵⁰ Acaan ɛkɛ yuarcɛ ɛkkɛn waakɛnda, ɔci ɛkkɛn buayi ne tolan. Ɔci ne pɛñan Yaccu gɔkcin ɛkkɛnti agi, “Dala ɛkkɛ yomgɔ tɛya. Gena ‘ya. Naa ɛkkɛ buayɛ bɛɛ.” ⁵¹ Ɔci ɛkɛ taapcin murkaji iki ɛkkɛn. Ɔci jwami yɔɔni ne pɛñan doki. Ɔci ɛkkɛn yomgɛn moottin ne pɛñan. Ɛkkɛn korkɛn buañi noon acaan naŋki Yaccu naŋka tɛyan neeni ŋeecɔn ɛkkɛn ne pwadan bɛɛ. ⁵² Ɔci naŋka naŋŋɛ Yaccu te byedg neeniyɛ, ŋeecɔn ɛkkɛn ne pwadan daŋkun bɛɛ. Ɛkkɛn wyetkɛn tɛy tɛy men. ⁵³ Ɔci ɛkkɛn ati ne dɛñki kuocɔ ban Gɛnɛɛcarɛt ɔɔn. Ɔci ɛkkɛn murka wiɛnji iñɔ. ⁵⁴ Ɔci ne ɛkkɛn kooki bora te murkatiyɛ, ɛkkɛn ñiyɛ ma ne pɛñan. ⁵⁵ Ɔci ma yiŋi baan konɛ warda, ɔci ɛkkɛn maka waakɛn yeyin owwɛ ḍuorɛ te aŋgann, nona tieŋki ɛkkɛn agi Yaccu baaliy. ⁵⁶ Ɔci noon warda nona baali ɛkɛ, kan a bana ḍiɛran, walla kan a bana tolan, ɔci kan a nona cieki ma bora nona baan taaŋɛtiyɛ, maka waakɛn yeyin owwɛ ḍuacci ma nona cieki ma dukkan jitin. Ɔci ma tooccin Yaccuti agi, “Dala maka waakɛn yeyin neeniyɛ, dala ɛkkɛn daŋkun topti bworŋ i lɛkɛti.” Ɔci maka neeniyɛ, ɛkkɛn topcin bworŋ ɛkɛ lɛkɛti. Ɔci ɛkkɛn waakɛn pwadgin waakɛnda.

¹ Ma Pɛriciin ɔci maka loṭi worga Juaŋ maka bɛɛn te ban Urcaliimjiyɛ, ɛkkɛn wyetkɛn ḍɔɔlɛ nona Yaccuti. ² Ɔci maka laldɛ Yaccu gɛɛg yuarɛ ɛkkɛn omi byedg byeŋkɛn luagɛ ba jyek ganuun Ma Yahuud bɛɛ. ³ Ma Pɛriciin ɔci Ma Yahuud ɛkkɛn waakɛndayɛ, ne ɛkkɛn omti waakyɛ, ɛkkɛn byeŋkɛn luaktan te ñamu, hayya ɛkkɛn oŋ omti waak oŋo. A ɔɔnyɛ, ɛkkɛn noŋi ba naŋki yɔrg ɛkkɛn te jyek ganuun. ⁴ Ɔci ne ɛkkɛn bɛɛti te dukkanji, bɛɛti ootti baanjiyɛ, ɛkkɛn omdi men bɛɛ. Ɛkkɛn byeŋkɛn luaktan ñamu ba naŋki yɔrg ɛkkɛn, hayya ɛkkɛn oŋ omti oŋo. ⁵ Ɔci ma Pɛriciin ɔci maka loṭi worga Juaŋyɛ, ɛkkɛn tooccin Yaccuti agi, “Maka lala iyɛ, ɛkkɛn noŋi ba naŋki yɔrg ikin Ma Yahuud bɛɛ. Ɔci ɛkkɛn omi byedg ne byeŋkɛn a giikin ogo? Ba ɛkkɛn lɔkki byeŋkɛn ba naŋki Ma Yahuud bɛ?” ⁶ Ɔci Yaccu gɔkcin ɛkkɛnti agi, “Ɛkkɛ agɛ laaban! Jyeka guaŋŋɛ Icaaya te baaṭi te naŋka bɛya ne ŋoyɔyɛ, yɔmjin te ɛkkɛ. Icaaya gɔki agi, ‘Jwaŋa Tolan gɔki agi, maka neeni gɔki jieyi ‘ya te tuggɛn budan, yeti ɛkkɛn yomgɛn lonɔ ɔntɔ te ‘yati. ⁷ Ɛkkɛn moṭi ‘yati te labjo, ɔci ɛkkɛn loṭi ma te jyeka naŋi ma baan budan, ɔci ɛkkɛn gɔki agi jyeka neeni agi jyek ‘ya Juaŋo.’” ⁸ Ɔci Yaccu gɔkcin mati agi, “Oŋ ɛkkɛ daŋkun ɛkkɛ jyek Juaŋ dalnɛ budan, ɔci ɛkkɛ tiecɛ gena naŋki yɔrg ɛkkɛ oŋkanda.” ⁹ Ɔci Yaccu gɔkcin mati moki agi, “Ne ɛkkɛ jyek Juaŋ daldɛ budan, ɔci jyek ma baan aŋka tiidiyɔ budan neeniyɛ, a ɔɔn pwatcin boki? ¹⁰ Muuca gɔki agi, ‘Dala ɛkkɛ tieŋdɛ jyek weyi ɛkkɛ, ɔci jyek mɛyi ɛkkɛ ne pwadan.’ ‘Kan men gɛɛl gɔki ne yaayan weegɛntiyɛ, ɔci kan gɔki ne yaayan mɛɛgɛntiyɛ, dala ɛkɛ noktan ma.’ ¹¹ Yeti ɛkkɛ loṭɛ ma agi kan men gɛɛl ɛkkɛti balki genga aŋka te ɛkɛ weegɛn ɔci mɛɛgɛn magdɛ, oŋ yeti ɛkɛ gɔkti agi, ‘Gena neeni a Kɔrban.’ (Ɔci Kɔrban neeni kon ɛkɛ agi gena neeni a gen Jwaŋa Tolan doki.) ¹² Ɛkɛ yaakinti weegɛn ɔci mɛɛgɛn magdɛ moki bɛɛ. Ɛkɛ ɛkkɛn daldɛ amaam budan. ¹³ A ɔŋŋiyɛ, jyek Juaŋ aŋi ba jyeka budan ɛkkɛti doki acaan jyek yɔrg ɛkkɛ aŋka aŋi ba jyeka ñamu ɛkkɛ yomgɔti. Ɔci ɛkkɛ loṭɛ kɛɛgin ɛkkɛ aŋka ɛkkɛn noŋdi a ɔɔn daŋkun ne baaṭi. Ɔci jyek Juaŋ aŋka daltan ɔntɔ. Ɔci naŋki ɛkkɛ naŋka coŋin naŋka pookɛn bala moki.” ¹⁴ Ɔci Yaccu ma bornɛ moki, ɔci gɔkcin ɛkkɛnti agi, “Gɔṭṭɛ! Dala ɛkkɛ waakida tieŋdɛ jyek ‘ya ne pwadan. ¹⁵ Waka amtan ma a waka ooddi ma korkɛntiyɛ, ɛkkɛn ma cuultanyɔ bɛɛ. Gena jiek ɔci naŋka bɛya bora te ma yomgɛnti aŋka ma cuultanyɔy. [ ¹⁶ Kan maka balki jyetkɛnyɛ, dala ɛkkɛn tieŋdi ne pwadan.]” ¹⁷ Ɔci Yaccu maka coŋin neeni dolnɛyɔ, ɔci ɛkɛ bɛɛn ɔci kaaccin orɔ. Ne ɛkɛ kaanni orɔ dokiyɛ, maka laldɛ ɛkɛ neeniyɛ, tooccin ɛkɛti te jwalla a caagɔn guaŋŋɛ ɛkɛ neeni. ¹⁸ Ɔci ɛkɛ ṭwokcin ɛkkɛnti agi, “Ɛkkɛ daŋkun tieŋnɛ bɛɛ? Kwoyɛ ɛkkɛ ne waka amtan ma ootti ma korkɛnti ɔci ne ɛkkɛn etti nɔji baawyɛ? ¹⁹ Acaan ɛkkɛn ooddi ma yomgɛnti bɛɛ, ooddi ma korkɛnti budan, ɔci ooddi te pɔy ɛkkɛn.” Ne Yaccu gɔŋni a ɔɔnyɛ, ɛkɛ gɔki agi waka amtan ma waakɛndayɛ, pwadɔ. ²⁰ Ɔci ɛkɛ gɔki moki agi, “Waka bɛya bora te ma baantiyɛ, ɛkkɛn aŋka ma cuultanyɔ. ²¹ Waka bɛya bora te ma yomgɛntiyɛ, gena paŋŋa yaayan, paŋŋa ɛkkɛn noŋti waka yeyin. Ɔci waka neeniyɛ, gena tomi maka ṭɔlgti, ɔci ɛɛjjo, ɔci nooŋi ma, ²² ɔci tomi moong maka pookɛn ɔci ‘uay maka pookɛn daŋkun, ɔci war ḍiŋŋo, ɔci naŋka yeyin jitkɛn waakɛnda bala ba naŋki ma ñingɛn, ɔci wyeñ yoño, ɔci kon moni, ɔci waaŋi ma, ɔci naŋki waakɔ, ɔci wyeñ boojo. ²³ Naŋka yeyin waakɛnda neeniyɛ, bɛya te ma yomgɛnti, ɔci ma cuultanyɔ ɛkkɛn Jwaŋa Tolan ñamuti.” ²⁴ Ɔci Yaccu jɔŋŋin te aŋan, ɔci ati nona ban Tayir taaŋɛtiy. Ɔci ɛkɛ bala ciyi wɛnan. Ɔci ɛkɛ kaaccin orɔ on gɛɛlti, ɔci ɛkɛ buagɔn naa ɛkɛ ŋeettan ma a ɛkɛ bala aŋan bɛɛ. Yeti ɛkɛ yaakinti warɛ cogdɛ te maka coŋin neeniti bɛɛ. ²⁵ Mena ɛɛŋ gɛɛl kaci ɛkɛ mugɛ jɔkin yeyin, ɔci ɛkɛ tieŋŋin agi Yaccu bɛɛnɔ, ɔci ɛkɛ bɛɛn nona Yaccuti, kwaccin bɛɛ. Ɔci ɛkɛ ḍwoñjin iñɔ Yaccu ñamɛti. ²⁶ Ɛŋa neeniyɛ, ɛkɛ a men maka Keedin Pookɛn. Ɛkɛ jiedi ma ban Kɛna. Ɔci ɛkɛ bala tooci a taat Yaccuti a ñaccu agi, “Jwaŋa Yaayan ŋualja bora te kaci ‘ya, kacca ɛɛŋti.” ²⁷ Ɔci Yaccu gɔkcin ɛkɛti agi, “Dala kɛɛgin ɔɔn Ma Yahuud omdi ñamu parun. Kan kɛɛgin omi ñamu men bɛɛyɛ, ɔci kan oomdin yieptan ma gɔkiyɛ, a ɔɔn yɔmjin bɛɛ.” ²⁸ Ɔci ɛɛŋ ṭwokcin ɛkɛti agi, “Ɛɛ, Ciɛggɔn, ŋeej ‘ya. Yeti kan gɔki bala nona omki may, ɛkkɛn ‘wontan kɛɛgin oomdin ṭɔlgɛn daŋkun bɛɛ?” ²⁹ Ɔci Yaccu gɔkcin ɛkɛti agi, “Te jwali ṭɔɔlɛ guaŋŋi i neeniyɛ, jwaŋa yaayan neeni bɛɛn bora te kaci i kacca ɛɛŋti doki. Dala i ɔgdi ootta.” ³⁰ Ɔci ɛkɛ ati baanji, ɔci kaci mɔŋnɛ ɛkɛ bala niin aŋgan wyeñɛti, ɔci jwaŋa yaayan ati ɔntɔ te ɛkɛti doki. ³¹ Ɔci Yaccu dɔɔki te ban Tayir taaŋɛti, ɔci ɛkɛ ati goṭi yeccu ban Ciḍɔɔn konɛti, ɔci ɛkɛ ati goṭi Nona Balki Bonka Ne Inyaakkɛn, ɔci ɛkɛ ati ne Galŋ Jaliilti ɔɔn. ³² Ɔci ɛkkɛn men gɛɛl owwɛ Yaccuti. Ɛkɛ a miiŋo. Ɔci ɛkɛ lɛmmɛ tɛy tɛyo, yaakinti gɔki jiek bɛɛ. Ɔci ɛkkɛn tooccin Yaccuti agi, “Dala i byeŋku tapca mena neeniti.” ³³ Ɔci Yaccu men eññɛ ɔntɔ parɛ te nona maka coŋin neeniti. Ɔci ɛkɛ byeŋkɛ ṭɔlgɛn olnɛ men jyetkɛti, ɔci ɛkɛ ñaang ŋuulnɛ bieŋɛti, ɔci ɛkɛ topcin men lɛmmɛti. ³⁴ Ɔci ɛkɛ ñorcin ñaalɔ pɔliji, ɔci ɛkɛ booŋ toonnɛ bora ɔci gɔkcin ɛkɛti agi, “Apta.” (Ɔci apta neeniyɛ, te jyek Mabaan agi, “Dala i jyetku waakɛn pɔktan.”) ³⁵ Ɔci ne pɛñan miiŋ jyetkɛ waakɛn pɔkkɛ, ɔci lɛmmɛ moki warɛ pɔŋnɛ, ɔci ɛkɛ yaakinti gɔki jieko. ³⁶ Ɔci Yaccu gɔkcin mati agi, “Naa ɛkkɛ men gɛɛl myettɛ bɛɛ.” Yeti ne Yaccu ma myettɛ a ɔɔn oŋkandayɛ, ɔci ma dɔki gɔ ma myetkin ne coŋɔn ɔɔn. ³⁷ Ɔci ɛkkɛn korkɛn buañi noon pwatcin bɛɛ, ɔci ɛkkɛn gɔki agi, “Naŋka naŋdɛ ɛkɛ waakɛnda neeniyɛ, pwadɔ. Ɛkɛyɛ, maka miŋki pɔktɛ jyetkɛnti, ɔci maka lɛpɛn tɛyan moki pɔktɛ lɛpɛnti moki.”

¹ Ɔci te oŋŋa wannayɛ, polla tolan wyetkɛn ḍɔɔlɛ nona ɛkɛti moki, ɔci oomdin bawwin ɛkkɛnti. Ɔci Yaccu borcin maka laldɛ ɛkɛti agi bɛɛdɔ nona ɛkɛti, ɔci ɛkɛ gɔkcin ɛkkɛnti agi, ² “‘Ya baal poŋ jyek maka coŋin neeni, ɔci ‘ya yomu wiak te ɛkkɛn, acaan ɛkkɛn balgin iki ‘ya wɛnni nink aŋi ne ḍoogɔ doki. Ɔci waka amtan baaw ɛkkɛnti. ³ Ɔci kan ‘ya ɛkkɛn cundi bonk ɛkkɛn ne ɛkkɛn amɛ koñ ɔɔnyɛ, ɛkkɛn dɛndi boki? Ɛkkɛn ḍɛɛmdi yomu te koñ dita. Ɔci ma gɛɛgyɛ, ɛkkɛn bɛɛn te bonka lonin.” ⁴ Ɔci maka laldɛ Yaccu tooccin ɛkɛti agi, “Ikin ‘uaya neeni ‘wontin oomdin te aŋɛ ne nona neeni niin a wɔɔŋ budan ɔɔn?” ⁵ Ɔci Yaccu tooccin ɛkkɛnti agi, “Byedg bala ɛkkɛti a ñiṭin?” Ɔci ɛkkɛn gɔkcin ɛkɛti agi, “Bala ne dɔɔyɔ wyetkɛn ne yyɛɛwɔ.” ⁶ Ɔci Yaccu gɔkcin mati agi, “Dala ma cootti iñɔ.” Ɔci ɛkɛ byedga ne dɔɔyɔ wyetkɛn ne yyɛɛwɔ neeni luullɛ byeŋkɛti. Ɔci ne ɛkɛ gɔŋni a pwatcin Juaŋtiyɛ, ɛkɛ oŋ byedg wɛɛnnɛ jitin ɔci ‘wonnɛ maka laldɛ ɛkɛ, ɔci ɛkɛ gɔkcin ɛkkɛnti agi, “Byedg eedɛ eektɛ maka ciyi iñɔ neeni.” Ɔci ɛkkɛn byedg eyɛ ɛkkɛnti. ⁷ Ɔci ɛkkɛn balki yak ṭɔlgɛnn a ‘yɛggin gɛɛg ne ḍiɛkan daŋkun, ɔci Yaccu gɔkcin a pwatcin te yak daŋkun, ɔci ɛkkɛn wɛɛnnɛ Yaccu jitin, ɔci eyɛ maka laldɛ ɛkɛ mati daŋkun. ⁸ Ɔci ne ɛkkɛn korkɛn yoŋki dokiyɛ, ɔci oomdin tɛɛti neeni limiyɔ ma ɔdin kumgin ne dɔɔyɔ wyetkɛn ne yyɛɛwɔ. ⁹ Ma bala a alpn ne ŋaanɔ (4,000). ¹⁰ Ɔci maka neeni cuuññɛ Yaccu baanji. Ɔci ne pɛñan Yaccu taapcin murkaji iki maka laldɛ ɛkɛ, ɔci ɛkkɛn ati kuocɔ ban Dalmanuuta taaŋɛti. ¹¹ Ɔci ma Pɛriciin bɛɛn ɔci ɛkkɛn bala tyewɔ i Yaccu. Ɛkkɛn bala tooci ɛkɛti acaan ɛkkɛn buagɔn gɔrti naŋka bɛya te ñaalɔ Juaŋti naŋka ñyecki ma ɛkɛy. Ɔci ne ɛkkɛn balki toocki Yaccu a ɔɔnyɛ, ɛkkɛn bala yieci ɛkɛ a yiiñño. ¹² Ɔci Yaccu yomɛ wiak, ɔci ɛkɛ gɔkcin ɛkkɛnti agi, “Hay, ɛkkɛ maka neeni, ɛkkɛ lieṭɛ naŋka ñyecki ma waak ogo? ‘Ya gɔkka ɛkkɛti awarɛ, maka acca neeniyɛ, naŋka ñyecki ma waakyɛ, yuartan ɛkkɛn bɛɛ.” ¹³ Ɔci ɛkɛ ɛkkɛn dalnɛ bala ooddi kuocɔ te murka moki. ¹⁴ Ɔci maka laldɛ Yaccu bala murkaji daŋkun, ɔci ɛkkɛn wierɛ byedgo, ɔci ɛkkɛn balki gɛɛl ne cyɛɛlɔ budan murkaji. ¹⁵ Ɔci Yaccu gɔkcin ɛkkɛnti agi, “Woŋgɔ tiittɛ hay! Ɔci dala ɛkkɛ woŋgɔ tiittɛ moki te ñamg ma Pɛriciin, ɔci te ñamg Hiruuduc Antipac.” ¹⁶ Ɔci ɛkkɛn bala gɔwwɔ yɔtin pookɛn agi, “Ɛkɛ gɔki a ɔɔn acaan ikin balkin byedg gɛɛg bɛɛ.” ¹⁷ Ɔci ne Yaccu gɔrni ɛkkɛn gɔɔki yɔtin pookɛn te jyek byedg a ɔɔnyɛ, ɔci ɛkɛ gɔkcin ɛkkɛnti agi, “Te gena yeti ɛkkɛ gɔwwɛ agi byedg baagiy? Ɛkkɛ, jiek kwoyɛ ɛkkɛ men? Ɛkkɛ jiek tieŋdɛ ne pwadan boki? Ɛkkɛ wyetkɔ baawɔ? ¹⁸ Ɛkkɛ balkɛ woŋgɔ, ɔci ɛkkɛ yaakɛti gwali bɛɛ? Ɛkkɛ balkɛ jyetkɔ, ɔci ɛkkɛ yaakɛti tyeŋɛ jiek bɛɛ? ¹⁹ Ɛkkɛ poŋdɛ te byedga ne dɔɔyɔ wɛɛni ‘ya jitin ɔci ‘woñgan ‘ya maka coŋin maka a alpn ne dɔɔyɔ (5,000) wanna bɛɛ? Ɔci ɔdin kumgin te waka tɛɛti neeni ɛkkɛn a ñiṭin katan?” Ɔci ɛkkɛn gɔki agi, “A inyaakkɛn wyetkɛn ne yyɛɛwɔ.” ²⁰ Ɔci Yaccu tooccin moki agi, “Byedga ne dɔɔyɔ wyetkɛn ne yyɛɛwɔ, byedga ‘woñgan ‘ya maka a alpn ne ŋaanɔ wannay, waka tɛɛti limmɛyɔ ɛkkɛ ɔdin kumgin a ñiṭin?” Ɔci ɛkkɛn gɔki agi, “A dɔɔyɔ wyetkɛn ne yyɛɛwɔ.” ²¹ Ɔci ɛkɛ gɔkcin ɛkkɛnti agi, “Ɛkkɛ tieŋnɛ men bɛɛ?” ²² Ɔci ɛkkɛn dɛñjin ban Bɛtceeyida. Ɔci mena ‘uan mena ulliyɛ, owwɛ ma Yaccuti, ɔci ɛkkɛn bala tooci ɛkɛti agi, “Dala i topca ɛkɛti.” ²³ Ɔci Yaccu ‘wana ñingɛ ulan neeni muŋŋɛ te bieŋɛ, ɔci ɛkɛ lwannɛ Yaccu baan taaŋɛti. Ɔci ne ɛkɛ ñaang ŋuulnɛ ɛkɛ ñingɛtiyɛ, ɔci ɛkɛ bieŋɛ tamnɛ men ñingɛti, ɔci Yaccu tooccin ɛkɛti agi, “I noon yuarca boki?” ²⁴ Ɔci ɛkɛ gɔki agi, “‘Ya ma yuarca, yeti ɛkkɛn bala ba jang ne atki a woon no.” ²⁵ Ɔci Yaccu topcin ɛkɛ ñingɛti moki, ɔci ɛkɛ gɔrcin noono, ɔci waak waakɛnda yuarnɛ ɛkɛ ne pwadan doki. ²⁶ Ɔci Yaccu mena neeni cuuññɛ baanɛnti ɔci gɔkcin ɛkɛti agi, “Naa i gora baan konɛti bɛɛ.” ²⁷ Ɔci Yaccu jɔŋŋin te aŋan i maka laldɛ ɛkɛ, ɔci ɛkkɛn bala ooddi bonka ḍyɛrin ban Cɛcariiya Pilibbi taaŋɛti. Ɔci ne ɛkkɛn balki yom menyɛ, Yaccu tooccin ɛkkɛnti agi, “Ma gɔki agi ‘ya agji menɛ?” ²⁸ Ɔci ɛkkɛn ṭwokcin ɛkɛti agi, “Ma gɛɛg gɔki agi i agji mena tolan gɛɛl bɛɛnɔ dɔɔŋnɔ te lienti. Ma gɔki agi i agji Yɔhanna Mena Buoṭi May. Ɔci maka pookɛn gɔki agi i agji Iliiya, ɔci maka pookɛn moki gɔki agi i agji bɔwa Jwaŋa Tolan gɛɛl.” ²⁹ Ɔci ɛkɛ tooccin ɛkkɛnti agi, “Oŋ ɛkkɛ da gɔkɛ ‘ya a menɛ?” Ɔci Butruc ṭwokcin agi, “I a Kiṭɔ Mena Muonɛ Jwaŋa Tolan Boray.” ³⁰ Ɔci Yaccu ɛkkɛn myennɛ agi, “Naa ɛkkɛ ma nɔɔttɛ te jyeka neeni bɛɛ.” ³¹ Ɔci ɛkɛ poccin lorcin maka laldɛ ɛkɛ te jyek lyen ɛkɛ agi, “Taabn bɛya ‘ya Kaci Ma Baanti ne coŋɔn. Ne baaṭi maka ḍwaŋin, ɔci gaciicin ḍwaŋin Ma Yahuud, ɔci maka loṭi worga Juaŋyɛ, ɛkkɛn yooktan te ‘ya. Ɔci ‘ya nokta ma, ɔci ne nink ne ḍoogɔ bɛɛti borayɛ, ‘ya oŋ jɔŋŋa ñaalɔ moki.” ³² Ɛkɛ ma myennɛ ne pwadan te jyeka neeni. Ɔci Butruc Yaccu eññɛ nona parɛ, ɔci gɔkcin ɛkɛti ne pɛñan te jyeka guaŋŋɛ ɛkɛ te lyen ɛkɛ neeni. ³³ Yeti Yaccu warɛ yallɛ, ɔci ñorcin maka laldɛ ɛkɛti, ɔci ɛkɛ gɔkcin Butructi ne pɛñan agi, “Hay, ootta ɔntɔ te ‘yati wɛnni, i gɔk jyek Jwaŋa Yaayan, acaan i buagi naŋki Juaŋ bɛɛ! I buagi naŋki ma baan budan!” ³⁴ Ɔci Yaccu borcin maka coŋinti neeni agi bɛɛdɔ nona ɛkɛti, ɔci maka laldɛ ɛkɛ bornɛ ɛkɛ daŋkun. Ɔci ɛkɛ gɔkcin ɛkkɛnti agi, “Kan men gɛɛl buagɔn bootti ‘yatiyɛ, dala ɛkɛ mwondi te caŋti ñingɛ te war ɛkɛ parɛ, ɔci dala ɛkɛ kakan ɛkɛ luldɛ, ɔci ɛkɛ bɛya bootti ‘yati ne lien bɛɛdɛ ɛkɛti ɔɔn. ³⁵ Kan mena boottin ‘yati gɛɛl jyek ‘ya daldɛ aŋka naa ɛkɛ nogditi ma bɛɛyɛ, mena neeni yɔɔrdi tɛɛtin bala ñaalɔ pɔliji neeni bɛɛ. Yeti kan men gɛɛl boottin ‘yati, ɔci noŋdi ba jyek ‘ya, ɔci jyek ‘ya tiidiyɔ, oŋ kan te ɛkɛ noktan ma ɔɔnyɛ, mena neeni ɛkɛ aŋka yɔɔrdi tɛɛtin bala ñaalɔ pɔliji neeni. ³⁶ Kan men gɛɛl balki waka bala iñɔ baanji wɛnni waakɛndayɛ, ɔci kan tɛɛtin bala ñaalɔ baaw ɛkɛtiyɛ, oŋ waka bala ɛkɛti a waka budan neeni yɔmdi a ɔki? Yɔmjin bɛɛ. ³⁷ Tɛɛtin bala ñaalɔ ma wɛɛṭi boki? A’a. ³⁸ Kan men gɛɛl buayi ma ñingɛn te aŋŋa ɛkɛ agi men ‘yayɛ, ɔci te nɔɔtkin ma te lali ‘ya te yuonga cieki maka yeyin tobin pɔy Jwaŋa Tolan kuoki ŋotkɛn neeniyɛ, ɔci ne baaṭi ne ‘ya Kaci Ma Baan bɛɛdɔn iki malɛɛkanyɛ, Wey ɔɔn ‘ya naŋda galdi a gallo. Ɔci ‘ya poŋja naŋki mena neeni, ɔci kɛkca te ɛkɛ daŋkun.”

¹ Ɔci ɛkɛ gɔkcin ɛkkɛnti agi, “Gɔṭṭɛ! ‘Ya gɔkka ɛkkɛti awarɛ, ma gɛɛg bala ɛkkɛti wɛnni, ɔci ɛkkɛn tuwa bɛɛ, yeti te ñamu ɛkkɛn gɔrti cyɛgji Jwaŋa Tolan ne ɛkɛ bɛɛdi ma baantiy. Ɔci naŋka tɛyan naŋki Juaŋ yuartan ɛkkɛn.” ² Ɔci ne nink ne dɔɔyɔ wilin ne cyɛɛlɔ bɛɛki borayɛ, Butruc ɔci Yaakub ɔci Yɔhanna eññɛ Yaccu poom wyeñɛti pookɛn. Poma neeniyɛ, wyeñɛ bey beyo. Ɔci ɛkɛ aaŋŋɛyɔ Jwaŋa Tolan warɛti ɛkkɛn ñomgɛnti. ³ Ɔci bworŋin ɛkɛ galla gali, ɔci bɔɔna bɔɔn ne pɛñan. Bworŋin bɔwan iñɔ ṭɛɛrji wɛnniyɛ, buanɛ bworŋin ɛkɛ waakɛnda te bɔɔno. ⁴ Ɔci Iliiya yaakkɛn i Muuca waakɛn lɛɛllɛ bora maka eññɛ Yaccu ne ḍoogɔ neeniti. Ɛkkɛn bala gɔwwɔ i Yaccu. ⁵ Ɔci ne ḍyɛṭ ṭɔɔlɛ Butruc gɔkcin Yaccuti agi, “Ciɛggɔn, kan ikin cietin oŋkanda te wɛnni ɔɔnyɛ, pwatcin hay! Dala ɔɔn noŋdɔn doŋki ne ḍoogɔ, ɛka ne cyɛɛlɔ te i, ɔci ɛka ne cyɛɛlɔ te Muuca, ɔci ɛka ne cyɛɛlɔ te Iliiya.” ⁶ Ɛkɛ gɔki amaam budan ɔɔn, acaan ɛkkɛn korkɛn buañi noon ne pɛñan. ⁷ Ɔci pɔli bɛɛn ɔci ɛkkɛn kwommɛyɔ dɛki ne bɔwan, ɔci pwan gɔkkin te pɔliti agi, “Mena neeniyɛ, gena Kaci ‘ya Kacca ana ‘ya cuoññan ‘yay. Dala ɛkkɛ tieŋdɛ jyek ɛkɛ!” ⁸ Ɔci ne pɛñan ne ɛkkɛn tieŋki pwana neeniyɛ, ɛkkɛn bala gɔṭi noon a gwallo, yeti menga yuarcɛ ɛkkɛn bɛɛ. Yaccu aŋka bala yɔɔd parɛ. ⁹ Ɔci ne ɛkkɛn balki kooti iñɔ te poom wyeñɛti menyɛ, Yaccu gɔkcin ɛkkɛnti ne pɛñan agi, “Naa ɛkkɛ men gɛɛl myettɛ te naŋka yuarnɛ ɛkkɛ neeni bɛɛ. Yeti ne ‘ya Kaci Ma Baan jɔlda ñaalɔ te lientiyɛ, ɛkkɛ oŋ ma myettɛ oŋo.” ¹⁰ Ɔci ɛkkɛn jyeka neeni cogiyɔ. Yeti ɛkkɛn bala toyɔ yɔtin pookɛn te jyeka guaŋŋɛ Yaccu agi ɛkɛ jɔŋji ñaalɔy. ¹¹ Ɔci ɛkkɛn tooccin Yaccuti agi, “Ne maka loṭi worga Juaŋ gɔkki agi Iliiya aŋka bɛɛdɔ ñamu wannay, jyek ɛkkɛn bala a ɔki a ɔɔn?” ¹² Ɔci ɛkɛ gɔkcin ɛkkɛnti agi, “Iliiya bɛya ñamu awarɛ, acaan ɛkɛ yɔŋi waak waakɛnda te ñamu ne pwadan. Jyeka kiigin, ne ɛkkɛn gɔkki te ‘ya Kaci Ma Baan agi ‘ya taabjɔ ne pɛñan, ɔci agi ma yooktɛ te ‘yayɛ, jyeka neeni jitkɛn bala a ɔki ɛkkɛti? ¹³ Tieŋdɛ! Iliiyayɛ, ɛkɛ bɛɛn doki. Ɔci ma noŋi ɛkɛti ne yaayan ba yomg ɛkkɛn. Ɔci a ɔŋŋiyɛ, bala ba jyeka kiigin te baaṭi ne gɔkki te ɛkɛy.” ¹⁴ Ɔci ne ɛkkɛn dɛñki nona maka laldɛ Yaccu ɛkkin pookɛntiyɛ, ɛkkɛn ma mɔkci wyetkɛn ḍɔɔlɛ nona ɛkkɛnti kɔɔna kɔɔnno. Ɔci maka loṭi worga Juaŋ bala tyewɔ iki ɛkkɛn. ¹⁵ Ɔci ne Yaccu yuarkiti maka coŋin neeniyɛ, ɛkkɛn yomgɛn moottin ɔci ɛkkɛn yiŋi ɛkɛti, ɔci ɛkɛ ñiibɛ ɛkkɛn. ¹⁶ Ɔci ɛkɛ tooccin ɛkkɛnti agi, “Ɛkkɛ balgɛ gɔwwɛ te jyek waaka?” ¹⁷ Ɔci men gɛɛl bala nona maka coŋin neeniti ṭwokcin ɛkɛti agi, “Mena loṭi may, ‘ya baal ecca kaci ‘ya iti, acaan ɛkɛ muŋŋɛ jwaŋa yaayan ɔci ɛkɛ gɔki jiek bɛɛ. ¹⁸ Ɔci kan ɛkɛ bala noongatiyɛ, ɔci kan ɛkɛ mugdɛ jwaŋa yaayanyɛ, ɛkɛ yiɛptɛ ɛkɛ iñɔ ṭɛɛrji, ɔci ɛkɛ tukɛ coopi juotan, ɔci ɛkɛ ŋɛyi lɛkɛ, ɔci oŋkanda ɛkɛ warɛ pɛɛdin ɔci warɛ tɛɛna tɛɛn ba jaan te naŋka neeni. Ɔci ‘ya tooccan maka lala iti, ka dala ɛkkɛn jwaŋa yaayan neeni ŋɔɔltan bora te kaciti, yeti ɛkkɛn yaaŋnɛti bɛɛ.” ¹⁹ Ɔci Yaccu ṭwokcin gɔkcin mati agi, “Hay, ɛkkɛ maka jyeni ɛkkɛn baaw nɛ! Ɛkkɛ baltin iki ‘ya wɛnni yuong ne ñiṭin moki aŋka ɛkkɛ jyeddɛy? ‘Ya kɛɛjja ɛkkɛ yuong ne ñiṭin moki aŋka ɛkkɛ jyeddɛy? Kaci oodɛ ‘yati wɛnni!” ²⁰ Ɔci ɛkkɛn kaci eyɛ Yaccuti. Ɔci ne pɛñan ne Yaccu yuarnɛ ɛkɛyɛ, jwaŋa yaayan neeni kaci gwonnɛ ne pɛñan, ɔci kaci ḍɛmmin iñɔ, ɔci ɛkɛ bala ñiyi a ñiin te ṭɛɛrji, ɔci ɛkɛ tukɛ coopi juotan. ²¹ Ɔci Yaccu tooccin weegɛnti agi, “Kaci noŋi a ɔɔn te tua doki?” Ɔci ɛkɛ gɔkcin ɛkɛti agi, “Woonɛ bɛɛ, ne wona ɛkɛ ḍiɛri men. ²² Ɔci jwaŋa yaayan kaci yiɛptɛ maccu a ñaccu, ɔci yiɛptɛ pietin moki, acaan ɛkɛ buagɔn noki ɛkɛ. Yeti kan i yaakiti noŋja genga ɛkɛtiyɛ, dala i yomu pɔkka ɔɔnti, ɔci ɔɔn magdɔn!” ²³ Yaccu gɔkcin ɛkɛti agi, “Te gena yeti i gɔk agi ‘ya yaakati boki? Kan mena jyeddi Juaŋtiyɛ, ɛkɛ tɛɛkti genga bɛɛ.” ²⁴ Ɔci ne pɛñan kaci weegɛn yaadan gɔki agi. “‘Ya jyetto. Yeti jyeni ‘ya a ḍiɛran. ‘Ya magda dala ‘ya jyedda ne pwadan!” ²⁵ Ɔci ne Yaccu gɔrni maka coŋin bɛɛti tyentiti nona ɛkɛtiyɛ, ɛkɛ gɔkcin jwaŋa yaayanti ne pɛñan agi, “I jwaŋa yaayan, mena noŋi aŋka ma kookinti jiek ɔci aŋka ma akti miŋkiy, dala i kooya bora te kacca neeniti. Ɔci naa i ɛkɛ muga oŋgati moki bɛɛ!” ²⁶ Ɔci jwaŋa yaayan yaajjin ne tolan, ɔci kaci gwonnɛ ne pɛñan moki ba te ñamu ɔɔn, ɔci ɛkɛ oŋ kooyin bora te kaciti oŋo. Ɔci kaci warɛ bala ba mena tuuta. Ɔci ma gɛɛg ne coŋɔn gɔki agi ɛkta tuunɔ doki. ²⁷ Yeti Yaccu kaci muŋŋɛ te bieŋɛ ɔci kaci luolnɛ ñaalɔ, ɔci ɛkɛ jɔŋŋin ñaalɔ doki. ²⁸ Ɔci ne Yaccu kaanni orɔyɛ, maka laldɛ ɛkɛ tooccin ɛkɛti lieda agi, “Ɔɔn kookɔnti jwaŋa yaayan neeni koodɔn bora ogo?” ²⁹ Ɔci Yaccu gɔkcin ɛkkɛnti agi, “Jɔkin yeyin ba jwaŋa yaayan neeniyɛ, kootan ma bora budan bɛɛ, yeti te cɔŋi ɛkkɛ.” ³⁰ Ɔci Yaccu i maka laldɛ ɛkɛ jɔŋŋin te bana wannati, ɔci ɛkkɛn ati goṭi ban Jaliil konɛti. Ɔci Yaccu buagɔn naa nona ɛkɛ baali ŋeettan ma bɛɛ, ³¹ acaan ninka waayiti ɛkɛ bala loṭi ɛkkɛn te jyek lyen ɛkɛ agi, “‘Ya Kaci Ma Baanyɛ, ‘ya ‘wonta ma ma byeŋkɛnti, ɔci ‘ya nokta ma, ɔci ne nink ne ḍoogɔ bɛɛti borayɛ, ‘ya oŋ jɔŋŋa ñaalɔ moki oŋo.” ³² Yeti ɛkkɛn tieŋŋin jyeka guaŋŋɛ Yaccu neeni ne pwadan bɛɛ, ɔci ɛkkɛn buayi tootti ɛkɛti te jiek jitkɛn moki bɛɛ. ³³ Ɔci Yaccu i maka laldɛ ɛkɛ ne ɛkkɛn dɔɔkki ɔci dɛñki ban Kapɛrnyam, ɔci ne ɛkkɛn kaacki orɔyɛ, Yaccu tooccin maka laldɛ ɛkɛti agi, “Ɛkkɛ balgɛ gɔwwɛ te jyek gena yomɔ?” ³⁴ Yeti ɛkkɛn bala ciyi lieda, ɛkkɛn gɔkcin genga bɛɛ, acaan ne ɛkkɛn balki yomɔ menyɛ, ɛkkɛn bala gɔwwɔ yɔtin pookɛn agi, “‘Ya a mena tolan te ɛkkɛ!” ³⁵ Ɔci Yaccu cooccin iñɔ, ɔci Maka A Inyaakkɛn Wyetkɛn Ne yyɛɛwɔ neeni bornɛ agi dala ɛkki bɛɛdɔ nona ɛkɛti. Ɔci ɛkɛ gɔkcin ɛkkɛnti agi, “Kan men gɛɛl buagɔn aga mena bala ñamuyɛ, dala ɛkɛ aga mena bootti ne ŋoyɔ, ɔci dala ɛkɛ aga mena noŋi kanŋa mati waakɛnda.” ³⁶ Ɔci kaci gɛɛl yɔɔnnɛ Yaccu yeccu ma ñomgɛnti, ɔci ɛkɛ kaci luolnɛ ñaalɔ, ɔci ñiɛŋnɛ ɛkɛ warɛti, ɔci ɛkɛ gɔkcin mati agi, ³⁷ “Tieŋdɛ poca! Kan men gɛɛl kaci gɛɛl mugdɛ te yenti ‘yayɛ, a ɔɔn bala ba ‘ya da mugda ɛkɛ wanna. Ɔci mena noŋi ne pwadan ‘yatiyɛ, ɔci ɛkɛ da noŋi ne pwadan Wey ɔɔn mena ‘ya cuonnatiy.” ³⁸ Ɔci Yɔhanna gɔkcin ɛkɛti agi, “Mena loṭi may, mena ‘uan gɛɛl yuarŋɔn ɔɔn, ɔci ɛkɛ bala kootti jɔkin yeyin bora te yenti i. Ɔci ɔɔn kɛŋnɔn ɛkɛti, acaan ɛkɛ a men ikin bɛɛ.” ³⁹ Yeti Yaccu gɔkcin ɛkkɛnti agi, “Ɛkɛ daldɛ! Naa ɛkkɛ kɛkɛ ɛkɛti bɛɛ. Maka noŋi naŋka tɛyan naŋka ñyecki ma te yenti ‘yayɛ, men gɛɛl ɛkkɛnti yaakinti warɛ yaldɛ ne pɛñan ɔɔn, ɔci gɔkti ne yaayan ‘yati boki? Hayɛllɛ. ⁴⁰ Maka yookɔn te ikin bɛɛyɛ, ɛkkɛn a ma ikin. ⁴¹ Tieŋdɛ ‘ya gɔkka ɛkkɛti awarɛ. Kan ɛkkɛ ‘wontɛ ma pyega maaddɛ ɛkkɛ acaan yenti ‘ya bala ɛkkɛtiyɛ, ɔci ne baaṭi maka neeni ‘wondɛ Juaŋ gena pwadan daŋkun.” ⁴² Yaccu bala loṭi ma men agi, “Kɛɛgin jyeti ‘yatiyɛ, kan menga noŋdi gena yaayan ɛkkɛn gɛɛlti aŋka ɛkɛ noŋdi nɔjiyɛ, a ɔɔn pwatcin bɛɛ Yaayɛ. Jyeka bɛya mena noŋi ne yaayan neeni wyeñɛtiyɛ, pɛñcin ne yaajan te bolji mena ḍɛktan ma poma tolan pom jien ḍwaŋɛti, ɔci yiɛptan ma galŋa tolanjiy. ⁴³ “Dala te i bieŋu ŋunni ɔntɔ ñamu wona i noŋdi nɔji men bɛɛy! Kan nɔji bala iti te naŋki byeŋ iyɛ, dala i ɛkɛ ŋutca ɔntɔ! Kan war i warda ooddi maccu te gena naŋŋɛ byeŋ i neeniyɛ, a ɔɔn pwatcin bɛɛ. Maña neeni baadi oŋgati bɛɛ. Kan byeŋ i ŋunni ɔntɔ, ɔci i ootta ban Jwaŋa Tolanyɛ, a ɔɔn aŋka pwatcin. [ ⁴⁴ ‘Bana maañyɛ, ywowwa omi ma ɛkkɛn tuwa ywongati bɛɛ. Ɔci maañ moki baadi ywongati bɛɛ. Ɛkkɛn ñoki jitkɛn yuonginda, ɔci taab ɛkkɛn yɔɔda bɛɛ.’] ⁴⁵ Ɔci kan nɔji bala iti te naŋki ciy iyɛ, dala i ɛkɛ ŋutca ɔntɔ! Kan war i warda ooddi maccu te gena naŋŋɛ ciy i neeniyɛ, a ɔɔn pwatcin bɛɛ. Kan i ciyu ŋunni ɔntɔ, ɔci i ootta ban Jwaŋa Tolanyɛ, a ɔɔn aŋka pwatcin. [ ⁴⁶ ‘Bana maañyɛ, ywowwa omi ma ɛkkɛn tuwa ywongati bɛɛ. Ɔci maañ moki baadi ywongati bɛɛ. Ma ñoki jitkɛn yuonginda, ɔci taab ɛkkɛn yɔɔda bɛɛ.’] ⁴⁷ Ɔci kan nɔji bala iti te naŋki waŋ iyɛ, dala i ɛkɛ dɔdda bora! Kan war i warda ooddi maccu te gena naŋŋɛ waŋ i neeniyɛ, a ɔɔn pwatcin bɛɛ. Kan waŋ i dɔnni bora, ɔci i ootta ban Jwaŋa Tolantiyɛ, a ɔɔn aŋka pwatcin. ⁴⁸ ‘Bana maañyɛ, ywowwa omi ma ɛkkɛn tuwa ywongati bɛɛ. Ɔci maañ moki baadi ywongati bɛɛ. Ɛkkɛn ñoki jitkɛn yuonginda, ɔci taab ɛkkɛn yɔɔda bɛɛ.’ ⁴⁹ Ɛkkɛn waakɛnda amdɛ maaño, yɔɔda bɛɛ. ⁵⁰ “Toli killan pwatcin. Yeti kan tolla bala wɛɛlji poli dokiyɛ, ɔci ɛkɛ moki coda a ɔki? Dala ɛkkɛ balgɛ ba toli killan tolla pwadan maka pookɛnti. “Dala ɛkkɛ ciedɛ te pwani pookɔ oŋkanda ɔɔn.”

¹ Ɔci Yaccu jɔŋŋin te nona neeniti, ɔci ɛkɛ ati booti bonk ṭɔlgɛn ban Yahuudiya jitin, ɔci ɛkɛ Tol Urdun jyɛnnɛji ati pɔya bɛɛdi ñal tyɛrñanti. Ɔci polla tolan wyetkɛn ḍɔɔlɛ nona ɛkɛti moki. Ɔci ba naŋki ɛkɛ oŋkandayɛ, ɛkɛ bala loṭi ɛkkɛn. ² Ɔci ma Pɛriciin gɛɛg bɛɛn Yaccuti, ɔci tooccin ɛkɛti te jwali ṭɔɔlɛ gɛɛl. Ne ɛkkɛn toocki ɛkɛti a ɔɔnyɛ, ɛkkɛn yieci ɛkɛ a yiiñño. Ɛkkɛn tooccin ɛkɛti agi, “Kan mena ‘uan ɛŋ ɛkɛ daldɛyɛ, a ɔɔn yɔmjin iti bɛɛ?” ³ Ɔci ɛkɛ ṭwokcin ɛkkɛnti agi, “Ɛkkɛ myennɛ Muuca a ɔki worgaji te jyeka nɛ?” ⁴ Ɔci ɛkkɛn gɔki agi, “Muuca gɔki agi kan mena ‘uan ɛɛŋ kieŋnɛ worga doortin dokiyɛ, ɛkɛ yaakinti ɛɛŋ daldɛ.” ⁵ Ɔci Yaccu gɔkcin ɛkkɛnti agi, “Muuca jyeka neeni kiinɛ a ɔɔn, acaan ma wyetkɛn tɛy tɛy ba ɛkkɛ acca ɔɔn. ⁶ Yeti te ñamu jyek doortin bala bɛɛ. Oŋŋa ma aŋŋɛ Juaŋyɛ, bala ba jyeka kiigin gɔki agi, ‘Mena ne cyɛɛlɔ aŋŋɛ Jwaŋa Tolan a ‘uano, ɔci mena parɛ aŋŋɛ ɛkɛ a ɛɛŋo.’ ⁷ ‘Ɔci ɛkkɛn menga da buagɔn menin parɛ aŋka coodi yɔmdi. A ɔŋŋiyɛ, ne mena kaalgɔn ḍɛɛdi ɛɛŋyɛ, ɛkɛ on weegɛn ɔci mɛɛgɛn daldɛ, ɔci ɛkɛ ciyi iki ɛŋ ɛkɛ oŋkanda ɔɔn. ⁸ Ɔci ɛkkɛn ñoowin yaakkɛn doki.’ A ɔŋŋiyɛ, ɛkkɛn aŋi ba mena ne cyɛɛlɔ doki, a yyɛɛwɔ moki bɛɛ. ⁹ Gɔṭṭɛ, maka ñaaŋŋɛyɔ Jwaŋa Tolan te ḍɛɛwin a maka ne cyɛɛlɔyɛ, agi naa ɛkki kɛɛptɔ jitin iki ɛɛŋ moki bɛɛ.” ¹⁰ Ɔci ne Yaccu baali orɔ i maka laldɛ ɛkɛyɛ, ɛkkɛn tooccin ɛkɛti moki te jyeka neeni. ¹¹ Ɔci ɛkɛ gɔkcin ɛkkɛnti agi, “Kan mena ‘uan ɛɛŋ daldɛ, ɔci kan ɛkɛ ḍɛɛdi ɛŋa parɛyɛ, a ɔɔnyɛ, naŋka neeni a tommo. ¹² Ɔci kan mena ɛɛŋ ‘war ɛkɛ daldɛ ɔci kan ɛkɛ ḍɛɛdɛ ‘wana parɛyɛ, bala ba ɛkkɛn noŋi tomi yaakkɛn ‘wana ñamuti.” ¹³ Ɔci ma bala etti kɛɛgin ḍyɛrin Yaccuti. Ɛkkɛn buagɔn dala ɛkɛ ɛkkɛn ordiyɔ. Yeti maka laldɛ Yaccu ɛkkɛn kɛkcin maka neeniti. ¹⁴ Ɔci ne Yaccu gɔrni ɛkkɛn kɛkki a ɔɔnyɛ, ɛkɛ looñi ɔci gɔkcin ɛkkɛnti agi, “Dala kɛɛgin bɛya ‘yati. Naa ɛkkɛ kɛkɛ ɛkkɛn a ɔɔn bɛɛ, acaan jyek cyɛgji Jwaŋa Tolan a jyek ɛkkɛn, ɔci gena jyek maka bala ba ɛkkɛn ɔɔn. Acaan kɛɛgin neeni yomgɛn bala Juaŋtiyɛ, ɛkɛ buagɔn dala ɛkkɛn bɛya ban ɛkɛ bala ba maka yomgɛn bala ɛkɛti ɔci jyeti ɛkɛti ba kɛɛgin neeniyɛ, ɛkɛ buagɔn ɛkkɛn bɛya ban ɛkɛ waakɛnda. ¹⁵ Tieŋdɛ! Jyeka guagdi ‘ya ɛkkɛti neeni a jyeka awarɛ. Kan men gɛɛl jyek cyɛgji Jwaŋa Tolan mugdɛ ɛkɛ te yoma pwadan ba kacca ḍiɛran bɛɛyɛ, ɛkɛ yaakinti dɛndi ban Jwaŋa Tolanti bɛɛ.” ¹⁶ Ɔci Yaccu kɛɛgin ñieŋnɛ warti, ɔci ne ɛkɛ baali oorɛ ɛkkɛn waakɛnyɛ, ɛkɛ bala gɔki ne pwadan ɛkkɛnti. ¹⁷ Ɔci ne Yaccu noŋi ooddi bana parɛyɛ, mena ‘uan gɛɛl yoŋŋin ɛkɛti, ɔci ḍwoñjin iñɔ ɛkɛ ñamɛti, ɔci tooccin ɛkɛti agi, “Mena Loṭi Ma mena pwadany, ‘ya noŋja a ɔki aŋka tɛɛtin baadi bɛɛ neeni bɛɛdi ‘yatiy?” ¹⁸ Ɔci Yaccu gɔkcin ɛkɛti agi, “I ‘ya barda a mena pwadan ogo? Mena pwadan gɛɛl bala bɛɛ, gena Jwaŋa Tolan parɛ aŋka pwatcin. ¹⁹ ’Ya poŋ jyek ganuun ŋeej i kaapun ne ɛkkɛn gɔkki agi, ‘Naa i menga noga bɛɛ, naa i noŋja tomi bɛɛ, naa i kor waak bɛɛ, naa i men gɛɛl jomgayɔ bɛɛ, naa menga naŋa ñin bɛɛ, dala i noŋja ne pwadan weegɔti ɔci mɛɛgɔti.’” ²⁰ Ɔci ‘wana ḍiɛran neeni gɔkcin Yaccuti agi, “Mena loṭi may, ‘ya baal tiec jyeka neeni ne ‘ya wona ḍiɛra men ɔɔn.” ²¹ Ɔci Yaccu gɔrcin ɛkɛti ɔci ani ɛkɛ, ɔci gɔkcin ɛkɛti agi, “Naŋki i neeni yɔmjin men bɛɛ, bɔɔnjin men ne cyɛɛlɔ. Dala i bootta ‘yati. Ne i bootti ‘yatiyɛ, dala i mal i wiɛlja ñino, ɔci bilk ‘woñga maka bɔwan.” ²² Ɔci te jwalla neeniyɛ, ‘wana neeni ñingɛ ookki. Ɔci ɛkɛ ati ɔntɔ te nona Yaccuti. Ɛkɛ bala yomɛ wiak poŋi jieko, acaan wak ɛkɛ coŋɔ. ²³ Ɔci Yaccu bala gɔṭi maka laldɛ ɛkɛ a gwallo, ɔci gɔkcin ɛkkɛnti agi, “Maka cyɛganyɛ, owwin ɛkkɛn waakɛn ootiti iñɔ bɛɛti Jwaŋa Tolan bieŋɛtiyɛ, tɛy tɛyo.” ²⁴ Ɔci maka laldɛ ɛkɛ korkɛn buañi te jwalla neeni, ɔci Yaccu gɔkcin ɛkkɛnti moki agi, “Kɛɛgin ‘ya, owwin ɛkkɛn waakɛn ootiti iñɔ bɛɛti Juaŋ bieŋɛtiyɛ, tɛy tɛyo, hay!” ²⁵ Ɔci Yaccu jwali dɔŋŋɛji moki agi, “Wɔtcin kolŋan wɔtti ibra waŋɛtiyɛ, koocin te owwin mena maalɛ tolan warɛ oodɛ ban cyɛgji Juaŋy.” ²⁶ Ɔci maka laldɛ Yaccu yomgɛn moottin ne pɛñan te jyeka neeni. Ɔci ɛkkɛn gɔgjin yɔtin pookɛn agi, “Kan owwin ma waakɛn ootiti iñɔ bɛɛti Jwaŋa Tolan bieŋɛti tɛy tɛy a ɔɔnyɛ, a menɛ uday?” ²⁷ Ɔci Yaccu gɔrcin ɛkkɛnti ɔci gɔkcin agi, “Ma baan yaakinti waakɛn ootan iñɔ bɛya ɛkɛ bieŋɛti pookɛn bɛɛ. Jwaŋa Tolan aŋka yaakinti ɛkkɛn magdɛ. Acaan Jwaŋa Tolanyɛ, ɛkɛ tɛɛkti genga bɛɛ.” ²⁸ Ɔci Butruc gɔkcin Yaccuti agi, “Gɔṭṭi ɔɔnyɛ, ɔɔn waak dalnɔn waakɛnda, ɔci ɔɔn boonnɔn iti doki.” ²⁹ Ɔci Yaccu gɔkcin ɛkkɛnti agi, “Tieŋdɛ, ‘ya gɔkka ɛkkɛti awarɛ. Mena ma on ɛkɛ daldɛ, ɔci modgɛn ɔci kowwɛn daldɛ, ɔci mɛɛgɛn ɔci weegɛn daldɛ, ɔci kɛɛgin ɛkɛ daldɛ, ɔci oorg ɔci yelk ɛkɛ daldɛ, mena waka neeni daldɛ te jyek ‘ya acaan wɔɔka bɛɛn aŋka ɛkɛ noŋdi a ɔɔn te jyeka wonkɛn jyeka pwadin neeniyɛ, ³⁰ ne ɛkɛ baali iñɔ ṭɛɛrji wɛnni menyɛ, ɛkɛ baltan waak ne coŋɔn ɔci oorg moki, ɔci modgɛn ɔci kowwɛn, ɔci weyyɛn ɔci mɛyyɛn, ɔci kɛɛgin, ɔci yelko, ɔci taab daŋkun acaan ma yooktan te ɛkkɛn. Ɔci wak ɛkɛ waka te ñamuyɛ, bwantan waka neeni. Ɔci coodi ɛkɛ coodda ɛkɛ ciedi ne baaṭi ban Jwaŋa Tolanyɛ, tɛɛtin baadi bɛɛyɛ, bala ɛkɛti yuonginda. ³¹ Ɛkkɛ maka cooŋi ñingɛn te wak ṭɛɛr wyeñɛ, ɔci boottin ‘yati acca te yoma awarɛ bɛɛ neeniyɛ, ‘ya ɛkkɛ ‘wondin genga ñaalɔ pɔliji bɛɛ. Yeti ɛkkɛ maka waka iñɔ wɛnni kuoŋnɛ ŋotkɔ waakɛnda, ɔci boonnɛ ‘yati acca neeniyɛ, ɛkkɛ aŋka ‘wondin ‘ya waak ne coŋɔn ba yomg ɛkkɛ ‘yati.” ³² Ɔci oŋ gɛɛlti Yaccu i maka laldɛ ɛkɛ bala pɔɔjɔ ooddi ban Urcaliim. Yaccu bala wɛɛyi ñamu ɛkkɛn ñomgɛnti. Ɔci maka laldɛ ɛkɛ yomgɛn moottin acaan ɛkɛ bala ooddi aŋan, ɔci maka coŋin maka boottin ɛkɛti neeniyɛ, ɛkkɛn buayi. Ɔci Yaccu Maka A Inyaakkɛn Wyetkɛn Ne Yyɛɛwɔ eññɛ bora te nona maka coŋinti, ɔci ɛkɛ bala ɛkkɛn myettɛ te jyek naŋka bɛya ɛkɛti agi, ³³ “Gɔṭṭɛ, ikin oottin ban Urcaliim, ɔci aŋanyɛ, ‘ya Kaci Ma Baan ‘wonta ma gaciicin ḍwaŋin Ma Yahuud byeŋkɛnti, ɔci maka loṭi worga Juaŋ byeŋkɛnti doki. Ɔci ɛkkɛn noŋdi godan ‘yati, ɔci te jyek godan neeniyɛ, ɛkkɛn gɔkti agi dala ‘ya tuudjɔ. Ɔci ‘ya ‘wonta ɛkkɛn ackan ma Ḍɔɔm byeŋkɛnti moki. Gena ma ikin Ma Yahuud bɛɛ, gena ackan ma Ḍɔɔm. ³⁴ Ɔci ɛkkɛn ñieddi te ‘ya. Ɔci ɛkkɛn ‘ya ŋuorta ñaango, ɔci ɛkkɛn ‘ya ḍuata, ɔci ɛkkɛn ‘ya nokta, yeti ne nink ne ḍoogɔ bɛɛti borayɛ, ‘ya jɔlla ñaalɔ te koolji moki. Gena jyek ‘ya neeni.” ³⁵ Ɔci te oŋŋa wannayɛ, Yaakub ɔci Yɔhanna kɛɛgin Jɛbadiyɛ, ɛkkɛn oŋ orcinti Yaccuti ɔci gɔkcin ɛkɛti agi, “Mena loṭi may, ɔɔn buagɔn dala i noŋja gena ɔɔn toottɔn iti accay.” ³⁶ Ɔci ɛkɛ gɔkcin ɛkkɛnti agi, “Ɛkkɛ buagɛ ‘ya noŋja gena ɛkkɛti?” ³⁷ Ɔci ɛkkɛn gɔki agi, “Oŋŋa i agdi Ciɛggɔn Tolan non cyɛgji iyɛ, dala i ɔɔn naŋdɔn a ma i waru, mena ne cyɛɛlɔ te byeŋa byerɔn, ɔci mena ne cyɛɛlɔ te byeŋa aamo.” ³⁸ Yeti Yaccu gɔkcin ɛkkɛnti agi, “Taata toocɛ ɛkkɛ neeni jiek jitkɛn ŋeejɛ ɛkkɛ ne pwadan bɛɛ. Ɛkkɛ yaakɛti mottɛ kubaaya taab maadi ‘ya neeni boki? Ɔci ɛkkɛ yaakɛti bultɛ ma te lien ba bulta ‘ya bultati ma neeni boki?” ³⁹ Ɔci ɛkkɛn jyettin agi, “Ɛɛ, ɔɔn yaakɔnti.” Ɔci Yaccu gɔkcin ɛkkɛnti agi, “Ne baaṭi ɛkkɛ mottɛ kubaaya taab ‘ya awarɛ, ɔci ɛkkɛ bultɛ ma ba bulti ‘ya. ⁴⁰ Yeti a ‘ya ɛkkɛ ‘wondin jyek coodda ɛkkɛ coottɛ ‘ya byeŋkuti agdɛ ma ‘ya waru bɛɛ. Maka Wey ɔɔn buagiyɛ, ɛkɛ ɛkkɛn ‘wondɛ nona neeni.” ⁴¹ Ɔci maka laldɛ ɛkɛ a inyaakkɛn ne ɛkkɛn tieŋki jyek Yaakub ɔci Yɔhanna neeniyɛ, ɛkkɛn looñi ne tolan ɛkkɛnti. ⁴² Ɔci Yaccu maka laldɛ ɛkɛ bornɛ agi dala ɛkki bɛɛdɔ nona ɛkɛti. Ɔci ɛkɛ gɔkcin ɛkkɛnti agi, “Gɔṭṭɛ, paŋi maka cyekin ŋeejɛ ɛkkɛ, ne ɛkkɛn poŋki agi ɛkkɛn aginti maka ḍwaŋin. Ɔci ɛkkɛn buagɔn dala ma waakɛnda noŋdi ba jyek ɛkkɛn, ɔci maka ḍwaŋinyɛ, ɛkkɛn gɔki mati ne pɛñan te jyeka ɛkkɛn buagiti naŋtan may. ⁴³ Yeti naa ɛkkɛ noŋdɛ ba naŋka neeni a ɔɔn bɛɛ. Kan men gɛɛl ɛkkɛti buagɔn ɛkɛ aga mena tolanyɛ, dala ɛkɛ noŋdi ba ne ɛkɛ agi mena kanŋan ɛkkɛti ɔɔn. ⁴⁴ Ɔci kan mena buagɔn ɛkɛ aga mena bala ñamu ɛkkɛtiyɛ, dala ɛkɛ noŋdi ba mena kɛɛngɔn ma waakɛnda. ⁴⁵ Bala ba ‘ya Kaci Ma Baan ne bɛɛna iñɔyɛ, naŋki ‘ya bala a ɔɔn daŋkun. ‘Ya bɛɛn aŋka ma moki ‘ya bɛɛ. Yeti ‘ya bɛɛn aŋka ‘ya mok mako. ‘Ya bɛɛn won maka coŋin te yomg ‘ya.” ⁴⁶ Ɔci ɛkkɛn bɛɛn ban Jɛrikɔ. Ɔci ne Yaccu ɔci maka laldɛ ɛkɛ, ɔci maka pookɛn maka coŋin, ne ɛkkɛn noŋki kaatti bora te ban Jɛrikɔyɛ, mena ñingɛ ulan, mena ñwoyi waak bala ciyi pɔɔjɔ pɔy taaŋɛti. Ɛkɛ yenti Bartimawuc, Ɛkɛ a kaci Timaawuc. ⁴⁷ Ne ɛkɛ tieŋni agi Yaccu men ma Najarɛt baali bɛɛdiyɛ, ɔci ɛkɛ borcin ɛkɛti, ɔci gɔkcin ɛkɛti agi, “I, Yaccu Kaci Daawud, i a Kiṭɔ mena pwadany. Dala i yomu pɔkka ‘yati ɔci ‘ya pɔkta ñinguti.” ⁴⁸ Ɔci maka coŋin dɛyi ɛkɛ agi dala ɛkta ciedɔ lieda. Yeti ɛkɛ cien lieda bɛɛ. Ɛkɛ bala yaadan a yook ɔɔn agi, “I, Yaccu Kaci Daawud, dala i yomu pɔkka ‘yati!” ⁴⁹ Ɔci Yaccu yɔɔni, ɔci ɛkɛ gɔkcin mati agi, “Ɛkɛ bortɛ.” Ɔci ɛkkɛn mena ñingɛ ulan borkɛ, ɔci gɔkcin ɛkɛti agi, “Yomu tieka! Jɔŋŋa ñaalɔ, Yaccu boor i.” ⁵⁰ Ɔci ɛkɛ jɔllin ñaalɔ ne pɛñan, ɔci ɛkɛ bworŋ jwami tooŋnɛ ɔntɔ, ɔci bɛɛn Yaccuti. ⁵¹ Ɔci Yaccu gɔkcin ɛkɛti agi, “I buagi ‘ya noŋja a ɔki iti?” Ɔci mena ñingɛ ulan gɔkcin ɛkɛti agi, “Ciɛggɔn, dala ‘ya pɔkta ñinguti aŋka ‘ya noon yuarca moki.” ⁵² Ɔci Yaccu gɔkcin ɛkɛti agi, “I ɔgdi ootta, i ñingu pɔkka moki. Ɔci dala i waru pwada te jyenna i jyetti ‘yati neeni.” Ɔci ne Yaccu gɔŋni a ɔɔnyɛ, ne pɛñan ‘uan ñingɛ pɔŋnɛ doki. Ɔci ɛkɛ bootcin Yaccuti te pɔɔjɔ ɔɔn.

¹ Ne Yaccu ɔci maka laldɛ ɛkɛ noŋi cɔɔlti ban Urcaliimyɛ, ɛkkɛn dɛññin ban Bɛtpɛɛj ɔci ban Bɛtani bonka bala pom Jɛtuun taaŋɛti neeni. Ɔci ɛkɛ cuoñi maka laldɛ ɛkɛ gɛɛg ne yyɛɛwɔ ñamu. ² Ɔci ɛkɛ gɔkcin ɛkkɛnti agi, “Ɔgdɛ ooddɛ pɔya eetan ma ban Bɛtpɛɛjti, ɔci ne ɛkkɛ dɛndɛ bana neenitiyɛ, tɔɔrɔn ṭɔɔlɛ mɔktɛ ɛkkɛ, ɛkɛ bala wiɛntan ma aŋan. Menga taami te tɔɔrɔn neeni men bɛɛ. Ɛkɛ gwottɛ ɔci oodɛ. ³ Ɔci kan men gɛɛl tootti ɛkkɛti agi ɛkkɛ noŋjɛ agi ɔɔn ogoyɛ, dala ɛkkɛ gɔktɛ ɛkɛti agi, ‘Ciɛggɔn buagɔn ɛkɛ, ɔci tɔɔrɔn dɔɔdɛ ɛkɛ ne pɛñan.’ ” ⁴ Ɔci ɛkkɛn atti. Ɔci ɛkkɛn tɔɔrɔn ṭɔɔlɛ mɔkci wiɛntan ma pɔɔjɔ on tukɛti. Ɔci tɔɔrɔn ṭɔɔlɛ gwoddɛ ɔci owwɛ. ⁵ Ɔci magga bala yɔɔd pɔɔjɔ, ɔci ɛkkɛn tooccin ɛkkɛnti agi, “Ɛkkɛ noŋɛ waaka ɔɔn? Ɛkkɛ tɔɔrɔn ṭɔɔlɛ guddɛ eedɛ aŋɛ?” ⁶ Ɔci maka laldɛ ɛkɛ ne yyɛɛwɔ neeni ṭwokcin ɛkkɛnti ba jyeka ɛkkɛn myennɛ Yaccu, ɔci ɛkkɛn dalji ma atti. ⁷ Ɔci ɛkkɛn tɔɔrɔn ṭɔɔlɛ owwɛ nona baali Yaccu, ɔci bworŋin ɛkkɛn ḍuacci tɔɔrɔn ŋoyɛti. Ɔci Yaccu taapcin ɛkɛti. ⁸ Ɔci maka coŋin maka pookɛn bworŋin ɛkkɛn cyɛtci pɔɔjɔ pɔy konɛti, aŋka noŋdi ɛkɛti ba mena tolan. Ɔci maka pookɛn lɛɛwin aamk jang te bora, ɔci owwɛ cyɛtci ma pɔɔjɔ daŋkun. ⁹ Ma gɛɛg wɛɛjjin ñamu, ɔci maka pookɛn bootcin ɛkɛ ŋoyɛti. Ɔci ɛkkɛn yaadan gɔki agi, “Dala ma jieyi Juaŋo! Mena bala ñaalɔyɛ, dala i yuoc ɔɔn acca! Mena bɛya te yenti Ciɛggɔn Tolan neeni, dala i cied ne pwadan!” ¹⁰ “Cyɛgji wey ikin Daawud bɛya acca! Dala i pwadi a pwanno! Dala Juaŋ jiɛtan ma!” ¹¹ Ɔci Yaccu dɛñjin ban Urcaliim. Ɔci ɛkɛ kaaccin orɔ on Juaŋ ona tolan. Ɔci ɛkɛ bala booti gɔṭi on jiñɛ. Ne oŋ waŋɛ luunni iñɔ dokiyɛ, ɛkɛ ati ban Bɛtani i Maka A Inyaakkɛn Wyetkɛn Ne Yyɛɛwɔy. ¹² Ɔci ne liidɔ parɛ ne ɛkkɛn balki bɛɛti te ban Bɛtaniyɛ, Yaccu amɛ koño. ¹³ Ɔci ne ɛkkɛn balki atki te pɔɔjɔyɛ, ɛkkɛn ŋuami yuarcɛ te nona loonan, ɛkɛ pwor pworo. Ɔci Yaccu ati orcinti ɛkɛti aŋka gɔrti ɛkɛ ne ɛkɛ ṭɔlgɛ balki boki no. Ɔci ne ɛkɛ orniti ɛkɛtiyɛ, ɛkɛ yɔṭi ŋuami ṭɔlgɛ gɛɛg bɛɛ. Ɛkɛ yɔṭi gena jyeyi budan, acaan wɔɔka jiedi ŋuami ṭɔlgɛyɛ, bɛɛn men bɛɛ. ¹⁴ Ɔci Yaccu gɔkcin jaanti agi, “Naa menga omdi ṭɔlg i ywongati moki bɛɛ.” Ɔci maka laldɛ ɛkɛ tieŋŋin ne ɛkɛ gɔki a ɔɔny. ¹⁵ Ɔci ɛkkɛn dɛñjin ban Urcaliim ɔci Yaccu ati kaaccin kaañji kañ on Juaŋ ona tolan neeniy. Ɔci ɛkɛ maka wɛɛṭi dok ɔci ḍɛɛk ɔci kulin kaañji neeniyɛ, ŋualnɛ bora. Ɔci ɛkɛ tarabɛɛcan ḍorki ma bilk neeniyɛ, jitkɛn baamnɛ iñɔ, ɔci waka ḍɔcki maka wɛɛṭi boobgyɛ, jitkɛn moki baamnɛ iñɔ. ¹⁶ Ɔci Yaccu dɛyi ma agi naa ma ati goṭi kaañji kañ on Juaŋ ona tolan neeni, eci waak byeŋkɛnti budan ɔɔn bɛɛ. ¹⁷ Ɔci ɛkɛ bala loṭi ma, ɔci ɛkɛ gɔkcin ɛkkɛnti agi, “Jwaŋa Tolan gɔki worgaji agi, ‘On ‘ya a ona cɔkki keedin waakɛnda.’ Yeti on ɛkɛ naŋŋɛ ɛkkɛ a ‘ona cieki maka ɛyyo.’” ¹⁸ Gaciicin ḍwaŋin Ma Yahuud ɔci maka loṭi worga Juaŋyɛ, ne ɛkkɛn tieŋki jyeka guaŋŋɛ Yaccu neeniyɛ, ɛkkɛn bala lieṭi pɔya Yaccu noktitiy, acaan ɛkkɛn buayi ɛkɛ ma wyetkɛn eedɛ ɔntɔ te jyek ɛkkɛnti, acaan polla tolan waakɛnda korkɛn buañi te lali ɛkɛ neeni. ¹⁹ Ɔci ne tɛɛnɔ ne oŋ unniyɛ, Yaccu ati i maka laldɛ ɛkɛ. Ɛkkɛn ati bora te bana tolan neeniti. ²⁰ Ɔci te liidɔyɛ, ne ɛkkɛn dɔɔkki gorki pɔɔjɔ mokiyɛ, ɛkkɛn ŋuami mɔkci iin ne bɛɛkkɛti ɔɔn. ²¹ Ɔci Butruc ñingɛ ñieŋnɛ, ɔci gɔkcin Yaccuti agi, “Mena loṭi may, gɔṭṭi! Jana ‘walli iyɛ, ɛkɛ iin doki.” ²² Ɔci Yaccu ṭwokcin ɛkkɛnti agi, “Dala ɛkkɛ jyeddɛ Juaŋti. ²³ Tieŋdɛ jyek ‘ya jyeka awarɛ neeni, kan menga gɔkti poma neeniti agi, ‘Dala i luoldi Juaŋ ñaalɔ, ɔci i yiɛpti ɛkɛ galŋji.’ Kan menga gɔki a ɔɔn, ɔci kan ɛkɛ tieki yomɛti bɛɛyɛ, kan ɛkɛ jyeddi ne pwadan, ɔci ŋeejɛ ɛkɛ yomɛti Jwaŋa Tolan noŋdi naŋka neeniyɛ, ɔci Juaŋ noŋdi awarɛ. ²⁴ A ɔŋŋiyɛ, aŋka ‘ya ɛkkɛ myettin neeni, kan ɛkkɛ cɔktɛ Juaŋti toottɛ ɛkɛti te gengayɛ, dala ɛkkɛ jyeddɛ yomgɔti Juaŋ jyettin doki, ɔci ɛkkɛ ‘wondɛ ɛkɛ gena neeni doki. ²⁵ Ɔci kan ɛkkɛ cɔktɛ Juaŋtiyɛ, ɔci kan ɛkkɛ yomgɔ yeyɔ maggatiyɛ, dala ɛkkɛ ɛkkɛn bɔɔktɛ. Ɔci a ɔŋŋiyɛ, ɛkkɛ da bɔɔktɛ Wey ɛkkɛ, Weya ñaalɔ pɔliji. Ɛkkɛ bɔɔktɛ ɛkɛ te naŋka naŋŋi ɛkkɛ ne yaayan neeni. [ ²⁶ Kan ɛkkɛ ma bɔɔktɛ bɛɛyɛ, ɔci ɛkkɛ da bɔɔktɛ Wey ikin Weya ñaalɔ neeni daŋkun bɛɛ.]” ²⁷ Ɔci ɛkkɛn dɛñjin ban Urcaliim moki. Ɔci ne Yaccu baali ati a woon kaañji kañ on Juaŋ ona tolan neeniyɛ, ma bɛɛn ɛkɛti. Gena gaciicin ḍwaŋin Ma Yahuud ɔci maka loṭi worga Juaŋ ɔci cyekin. ²⁸ Ɔci ɛkkɛn tooccin ɛkɛti agi, “Ɔɔn myettɔn i noŋ naŋka neeni te jyek menɛ? A menɛ i ‘wonni naŋka neeniy?” ²⁹ Ɔci Yaccu ṭwokcin ɛkkɛnti agi, “‘Ya da buaga toocca ɛkkɛti te jwali gɛɛl daŋkun. ‘Ya ṭwoktata ɛkkɛ ñamu parun, oŋ ɛkkɛ oŋ myettin ‘ya daŋkun oŋo. ³⁰ ’Ya myettata, ne Yɔhanna baali buoṭi mayɛ, bulti ɛkɛ neeni bɛɛn te Jwaŋa Tolanti walla bɛɛn te ma baanti budan? Gɔktɛ.” ³¹ Ɔci ɛkkɛn bala tyewɔ yɔtin pookɛn agi, “Kan ikin gɔktin agi bulti Yɔhanna neeni bɛɛnɔ te Jwaŋa Tolantiyɛ, ɔci Yaccu tootti ikinti dita agi, ‘Oŋ kan a ɔɔnyɛ, ba ɛkkɛ jyettɛ jyek ɛkɛti bɛ?’ ³² Oŋ ikin yaakinti gɔktin agi, ‘Bulti Yɔhanna bɛɛn te ma baanti boki?’ ” Maka gɔwwɔ i Yaccu neeniyɛ, buayi ne ɛkkɛn gɔkti agi naŋki Yɔhanna bɛɛnɔ te ma baanti budany, acaan ma waakɛnda bala gɔki agi Yɔhanna agɔ bɔwa Jwaŋa Tolan a wardan. ³³ Ɔci ɛkkɛn ṭwokcin Yaccuti agi, “Kucin, bulti Yɔhanna neeni ŋeejɔn ɔɔn ne bɛɛni te aŋɛ bɛɛ.” Ɔci Yaccu gɔkcin ɛkkɛnti agi, “Ɔci ‘ya ɛkkɛ myettin te naŋka naŋdi ‘ya neeni daŋkun bɛɛ.”

¹ Ɔci Yaccu bala loṭi ma te jyeka a caagin gɛɛg agi, “Mena ‘uan gɛɛl ati pieti luutkin, ɔci ɛkɛ noŋi kaañ bal luutkin warɛti, ɔci ɛkɛ noŋi gena ñocki ma luutkin, ɔci ɛkɛ noŋi ona beyan. Ɔci ɛkɛ bal ‘wonnɛ maka pookɛn byeŋkɛnti, ɔci ɛkɛ ati bana parɛ. ² Ɔci ne pana pwonki ma luutkin ṭɔlgɛn bɛɛniyɛ, bal weegɛn mena kanŋan ɛkɛti gɛɛl cuuññɛ nona maka gɔṭi luutkinti aŋka ɛkɛ wɛttan ma jang ṭɔlgɛn gɛɛg oodɛ baanji ɛkɛti. ³ Ɔci maka gɔṭi balyɛ, mena cuuññɛ bal weegɛn neeni mugɛ, ɔci ɛkɛ jiebɛ, ɔci ɛkɛ cuuñɛ duakciyɔ byeŋkɛ budan. ⁴ Ɔci bal weegɛn mena kanŋan ɛkɛti gɛɛl cuuññɛ moki, ɔci ɛkkɛn ɛkɛ jyɛbɛ wyeñɛti ɔci yacci, ɔci ɛkkɛn noŋjin ne yaayan ɛkɛti. ⁵ Ɔci ɛkɛ moki cuoñi mena parɛ gɛɛl ɛkkɛnti. Ɔci mena neeniyɛ, nogɛ ɛkkɛn. Ɔci bal weegɛn maka kanŋa ɛkɛti gɛɛk cuuññɛ ɛkkɛnti moki, ɔci maka neeni gɛɛg jiebɛ ɛkkɛn, ɔci gɛɛg nogɛ. ⁶ Ɔci men gɛɛl bala dalji i bal weegɛn ne cyɛɛlɔ, gena kaci ɛkɛ. Ɛkɛ ani kacca neeni ne tolan. Ɔci ɛkɛ cuuññɛ weegɛn ne ŋoyɔ. Ɛkɛ poŋi gɔki agi, ‘Ɛkkɛn yooktan te jyek kaci ‘ya bɛɛ.’ ⁷ Yeti maka gɔṭi bal neeniyɛ, ɛkkɛn bala gɔwwɔ yɔtin pookɛn agi, ‘Mena neeniyɛ, gena mena wak weegɛn eedɛ ɛkɛ waakɛnda ne baaṭiy. Bɛɛdɛ, dala ikin ɛkɛ noktin, ɔci waka neeni aga wak ikin!’ ⁸ Ɔci ɛkkɛn ɛkɛ mugɛ ɔci nogɛ ɛkkɛn, ɔci war ɛkɛ yiɛpcɛ ɛkkɛn ɔntɔ te balji.” ⁹ Ɔci Yaccu oŋ tooccin ɛkkɛnti agi, “Oŋ jiniina weegɛn noŋdi a ɔki acca ɛkkɛnti? Ɛkɛ bɛya maka neeniti ɔci maka gɔṭi jiniina nogdɛ ɛkɛ. Ɔci ɛkɛ jiniina ‘wondɛ maka pookɛn byeŋkɛnti. ¹⁰ Ɛkkɛ pokkɛ jyeka kiigin bɛɛ? Ne jiek gɔkki agi, ‘Poma guaktan maka cɔti oorg agi ɛkta yaayɔ neeniyɛ, ɛkɛ aŋi poma pwadan on warɛti doki. ¹¹ Ɔci agi naŋka neeni naŋŋɛ Juaŋo, ɔci ɛkɛ pwanna pwani ikin ñinguti.’” ¹² Gaciicin ḍwaŋin Ma Yahuud ɔci maka loṭi worga Jwaŋa Tolan, ɛkkɛn buagɔn Yaccu muktan acaan ŋeecɔn ɛkkɛn Yaccu gɔkcin jwalla a caagɔn neeni ɛkkɛnti te naŋki ɛkkɛn, yeti ɛkkɛn buayi maka coŋin. Ɔci ɛkkɛn Yaccu dalji, ɔci ɛkkɛn atti. ¹³ Ɔci maka ḍwaŋin neeni ma gɛɛg cuuñɛ Yaccuti. Gena ma Pɛriciin gɛɛg ɔci ma Hiruuduc gɛɛg daŋkun. Ɛkkɛn cuuñɛ ma Yaccuti acaan ɛkkɛn buagɔn dala ɛkkɛn gɔgdi i Yaccu aŋka kan Yaccu jwali gɛɛl damdɛyɛ, ɔci ɛkɛ muktan ɛkkɛn. ¹⁴ Ɔci ɛkkɛn botcin ɛkɛti agi, “Mena loṭi may, i ŋeecki ɔɔn i a mena gɔki awarɛ, ɔci i an menga ne cyɛɛlɔ bɛɛ. I an ma waakɛnda. Ɔci i lor ma te jyek Jwaŋa Tolan ne pwadan. Ɔɔn myettɔn, kan Kɛɛcar ‘wontin ikin tulbayɛ, a ɔɔn bala ba jyek ganuun ikin Ma Yahuud boki? Ɔɔn ɛkɛ ‘wondɔn, walla ‘wondɔn bɛɛ?” ¹⁵ Yeti yomg ɛkkɛn ŋeejɛ Yaccu ne ɛkkɛn balki gɔkki jyek labji neeniy. Ɔci ɛkɛ ṭwokcin ɛkkɛnti agi, “Ɛkkɛ poccɛ ‘ya a poccin a ɔɔn ogo? Giric gɛɛl oodɛ wɛnni, ikin gɔrtin a cyɛɛlɔ.” ¹⁶ Ɔci ɛkkɛn ḍeyyan gɛɛl owwɛ Yaccuti, ɔci ɛkɛ tooccin ɛkkɛnti agi, “Ḍeyyan neeni balkɔn pɔɔya ma menɛ? Ɔci a yenti menɛ bala ɛkɛtiy?” Ɔci ɛkkɛn ṭwokcin ɛkɛti agi, “Ɛkɛ balkɔn pɔɔya ma Kɛɛcar ɔci yenti Kɛɛcar.” ¹⁷ Ɔci Yaccu gɔkcin ɛkkɛnti agi, “Ɛɛ, yɔɔddɛ ɛkkɛ myettin, wak Kɛɛcaryɛ, ‘wondɛ ɛkɛ, ɔci wak Jwaŋa Tolanyɛ, dala ‘wondɛ Juaŋ daŋkun.” Ɔci ma korkɛn buañi noon te jyek Yaccu neeni. ¹⁸ Ɔci te oŋŋa wannayɛ, ma Cadyuciin bɛɛn Yaccuti. Maka neeni loṭi agi ne ma tuudiyɛ, ma jɔŋdɔ ñaalɔ moki bɛɛ. Ɔci ɛkkɛn gɔkcin Yaccuti agi, ¹⁹ “Mena loṭi may, Muuca ikin kieŋnin jiek agi, ‘Kan mena mod ɛkkɛn tuwayɛ, ɔci kan ɛkɛ balki ɛɛŋyɛ, ɔci kan ɛɛŋ kɛɛgin ɛkɛ men baawyɛ, dala ɛŋ ɛkɛ ḍɛɛdɛ mod ɛkkɛn aŋka ɛkɛ jieda kɛɛgin jyettɛ mena tuun neeni.’ ²⁰ Oŋ acca gɔṭṭi! Maka ‘uay gɛɛg bala a dɔɔyɔ wyetkɛn ne yyɛɛwɔ, ɛkkɛn a modin waakɛnda jiennɛ mɛya ne cyɛɛlɔ. Moda tolan ñamuyɛ, ḍɛñi ɛɛŋo. Ɔci ne ɛkɛ tuuniyɛ, kɛɛgin ɛkɛ baaw men. ²¹ Ɔci moda bootcin ɛkɛ ŋoyɛti neeniyɛ, ɛŋa neeni ḍɛɛnɛ ɛkɛ moki. Ɔci moda neeni tuun moki, kɛɛgin ɛkɛ baaw men. Ɔci moda akki ne ḍoogɔ moki ɛŋa neeni ḍɛɛnɛ ɛkɛ moki, ɔci ɛkɛ tuun moki, kɛɛgin ɛkɛ baaw men. ²² Ɔci ɛkkɛn waakɛnda ne dɔɔyɔ wyetkɛn ne yyɛɛwɔ neeniyɛ, ɛɛŋ ḍɛyɛ, yeti ɛkkɛn balki kɛɛgin gɛɛg bɛɛ. Kɛɛgin baaw ɛkkɛnti ne ɛkkɛn tuuki ɔɔn. Ɔci ne ɛkkɛn tuuki waakɛnda a ɔɔnyɛ, ɔci ɛŋa neeni tuun daŋkun. ²³ Ɛɛ, oŋ ne oŋŋa ma jɔŋti ñaalɔ te lientiy, oŋ ɛŋa neeni aga ɛŋ moda ɔkiy? Acaan ɛkɛ ḍɛyi ‘uay ne dɔɔyɔ wyetkɛn ne yyɛɛwɔ, ɔci ‘uay tuun kɛɛgin baaw waakɛnda.” ²⁴ Ɔci Yaccu gɔkcin ɛkkɛnti agi, “Tieŋdɛ! Jiek dammɛ ɛkkɛ acaan jyeka kiigin i war tɛɛn Jwaŋa Tolan tuoññɛji ɛkkɛ. ²⁵ Acaan ne ma jɔŋti te kolk jitinyɛ, ma ḍɛɛwɔ moki bɛɛ. Ɛkkɛn bala ba malɛɛkan ñaalɔ ban Jwaŋa Tolan. ²⁶ Ɔci moki, jyek jɔŋŋin ma jɔŋti ñaalɔ te kolk jitinyɛ, bala daŋkun. Jyek Muuca oŋŋa ɛkɛ gɔrni jana ammi maañ wanna, ɛkɛ kwoyɛ ɛkkɛ boki? Te oŋŋa wanna Juaŋ gɔkcin Muucati agi, ‘‘Ya a Jwaŋ Abrahim ɔci Icaak ɔci Yaakub. ‘Ya baal gɔr yɔrg ɛkkɛ.’ ²⁷ Ma ciya a tuutan yuonginda a ɔɔn awarɛ bɛɛ, hay!” ²⁸ Ɔci oŋ gɛɛlti mena loṭi worga Juaŋ gɛɛl bɛɛn ɛkkɛnti, ɔci ɛkɛ tieŋŋin ne ma balki tiekiy. Ne ɛkɛ gɔrni Yaccu ma buanniyɛ, ɛkɛ tooccin Yaccuti agi, “Ba jwalla bala ñamu te jyek ganuun a inyaakkɛn neeni bɛ?” ²⁹ Ɔci Yaccu ṭwokcin ɛkɛti agi, “Jwalla bala ñamuyɛ, gɔki agi, ‘Ma Icrayiil, tieŋdɛ, Ciɛggɔn ikin Jwaŋa Tolan ɛkɛ parɛ a Ciɛggɔn. ³⁰ Dala ɛkkɛ anɛ Ciɛggɔn ɛkkɛ Jwaŋa Tolan ne tolan. Dala ɛkkɛ anɛ ɛkɛ te yomg ɛkkɛ waakɛnda, ɔci te coodi ɛkkɛ moki waakɛnda, ɔci te paŋi ɛkkɛ moki waakɛnda, ɔci kandɛ ɛkɛti te war tɛɛn ɛkkɛ moki waakɛnda.’ ³¹ Ɔci ganuun bootti menin neeni ŋoyɛti gɔki agi, ‘Dala anna ɛkkɛ anɛ ma ɛkkɛyɛ, yoomdi i anna ɛkkɛ anɛ waak ɛkkɛy.’ Jyek ganuun ne yyɛɛwɔ neeniyɛ, bwandɛ jwalla parɛ gɛɛl bɛɛ.” ³² Ɔci mena loṭi worga Juaŋ gɔkcin ɛkɛti agi, “Mena loṭi may, i gɔŋni jwalla neeni awarɛ. Jwaŋa Tolanyɛ, ɛkɛ bala parɛ, jwaŋa parɛ gɛɛl bala bɛɛ. ³³ Ɔci kan ikin anin ɛkɛ ne tolan te yomg ikin, ɔci te paŋi ikin, ɔci kantin ɛkɛti te war tɛɛn ikin mokiyɛ, ɔci kan ikin anin maka pookɛn ne tolan ba anna ikin anin waak ikin pookɔyɛ, Jwaŋa Tolan yomɛ pwanna pwani ikinti te naŋka neeni. Ɛkɛ yomɛ pwanna pwani maka ani maka pookɛnti ne tolan. Yeti maka etti waak ḍuattan ɛkɛti oŋ ani maka pookɛn bɛɛyɛ, ɛkɛ yomɛ pwatcin ɛkkɛnti bɛɛ.” ³⁴ Ɔci ne Yaccu tieŋni mena neeni ṭwoŋni ne pwadanyɛ, ɔci ɛkɛ gɔkcin ɛkɛti agi, “I loon ɔntɔ te cyɛgji Juaŋti bɛɛ.” Ɔci maka ḍwaŋin neeni buañi lɔɔno, ɔci menga yaakinti tootti Yaccuti te genga moki bɛɛ. ³⁵ Ɔci Yaccu bala loṭi ma on Juaŋ ona tolan neeni, ɔci ɛkɛ gɔkcin mati agi, “Maka loṭi worga Juaŋyɛ, ɛkkɛn gɔki agi Kiṭɔ Mena Muonɛ Juaŋ Bora a Kaci Daawud ogo? ³⁶ Ɛkkɛ pokkɛ jyek Daawud bɛɛ? Daawud waanɛ gɔki te Boŋ Jwaŋa Tolan agi, ‘‘Ya tieŋŋan Jwaŋa Tolan gɔkcin Kiṭɔ Ciɛggɔn ‘yati agi, dala i coocca ‘ya taaŋuti taaŋŋa byerɔn ne maka yookɔn te i bwandaji ‘ya ɔɔn.’ ³⁷ Kan Kiṭɔ barŋi Daawud agi Ciɛggɔn ɛkɛ ba Jwaŋa Tolany, oŋ Kiṭɔ a kaci Daawud moki a ɔki?” Maka coŋin bala tyeŋi jyek Yaccu te yoma ñɔyan. ³⁸ Yaccu bala loṭi ɛkkɛn men, ɔci ɛkɛ gɔkcin ɛkkɛnti agi, “Dala ɛkkɛ woŋgɔ tiittɛ te naŋki maka loṭi worga Jwaŋa Tolan naa ɛkkɛ noŋdɛ ba ɛkkɛn ɔɔn bɛɛ. Ɛkkɛn ani woon ma ñomgɛnti ɛŋi jibban becin jibban wiɛlɛn pɛñan, ɔci ɛkkɛn buagɔn dala ma ɛkkɛn naŋtan ba maka ḍwaŋin ma ñomgɛnti dukkanji oŋkanda, ³⁹ ɔci ɛkkɛn buagɔn ciyi kokin pwadinti oorga morki ma Juaŋo. Ɔci kan juman bala, ɛkkɛn buagɔn ciyi nona pwadan oŋkanda ɔɔn. ⁴⁰ Ɔci ɛkkɛn mal moonga ciek ɔci oorg ɛkkɛnyɛ, amtan ɛkkɛn, ɔci ɛkkɛn cɔki cɔŋŋa beyan aŋka naŋki ɛkkɛn coktanyɔ ɛkkɛn te naŋki ɛkkɛn neeni. Te dienna ɛkkɛn dyetki ma ñingɛn neeniyɛ, Jwaŋa Tolan jiek oldɛ ɛkkɛn wyetkɛnti ne tolan.” ⁴¹ Ɔci Yaccu cooccin iñɔ on Juaŋ ona tolan tɛrin ñin i nona canduuk ḍɔcki ma bilka ‘wontan ma Juaŋo. Ɔci ɛkɛ bala gɔṭi ma ne ɛkkɛn balki ḍɔcki bilky. Ɔci maka coŋin maka cyɛgan neeniyɛ, ɛkkɛn bala ḍɔci bilk ne coŋɔn. ⁴² Ɔci ɛŋa cieñ gɛɛl bɛɛni, ɔci ɛkɛ balki bilk bɛɛ. Ɛkɛ bɔw bɔwo. Ɛkɛ ḍɔccin girin ne yyɛɛwɔ budan. ⁴³ Ɔci Yaccu borcin maka laldɛ ɛkɛti agi dala ɛkki bɛɛdɔ nona ɛkɛti, ɔci Yaccu gɔkcin ɛkkɛnti agi, “‘Ya gɔkka ɛkkɛti awarɛ, bilka ḍuannɛ ɛŋa bɔwan, ɛŋa cieñ neeni a ḍiɛkan, yeti Jwaŋa Tolan yomɛ pwanna pwani acaan ɛkɛ ḍɔccin te yoma awarɛ. ⁴⁴ Acaan maka neeni ɛkkɛn kɛñi te bilk ɛkkɛn wyetka kɛci bora te bilka coŋin neeniti, ɔci ḍuacci ɛkkɛn Juaŋti. Yeti ɛŋa neeniyɛ, ɛkɛ bɔw bɔwo, yeti ɛkɛ ḍɔccin bilka bala ɛkɛti waakɛnda.”

¹ Ɔci ne ɛkkɛn kooki bora te on Juaŋ ona tolanyɛ, mena laldɛ ɛkɛ gɛɛl gɔkcin ɛkɛti agi, “Mena loṭi may, gɔrca gwoyya nɛ. Hay! Hay! Ɛkkɛn ḍwaŋgin a ḍwaŋgin ɔci pwanna pwani bɛɛ? Ɔci oorga ḍwaŋin ɛkkɛn daŋkun pwanna pwanno!” ² Ɔci Yaccu gɔkcin ɛkɛti agi, “I poŋ a oorga neeni ḍwaŋɔ pari bɛɛ? Gɔṭṭi, ne oŋ gɛɛltiyɛ, ɛkkɛn laaktan ma ɔntɔ, ɔci guonan gɛɛl niindi menin parɛti bɛɛ. Ɛkkɛn yiɛptan ma iñɔ waakɛnda.” ³ Ɔci ne ɛkkɛn ḍoñi jyɛtkɛtiji ɔci dɛñki Pom Jɛtuuntiyɛ, Yaccu cooccin iñɔ poom wyeñɛti tɛrin ñin i on Juaŋ ona tolan ban Urcaliim. Ɔci Butruc ɔci Yaakub, ɔci Yɔhanna ɔci Andarawuc tooccin ɛkɛti lieda agi, ⁴ “Ɔɔn myettɔn jyeka guaŋŋi i te oorg neeni bɛya bora ne tua? Ne naŋka neeni noŋi bɛɛdi borayɛ, oŋ ñiitin ikin te gena?” ⁵ Ɔci Yaccu gɔkcin ɛkkɛnti agi, “Gɔṭṭɛ! Dala ɛkkɛ woŋgɔ tiittɛ aŋka naa ɛkkɛ jyɛttɛ menga ɔntɔ bɛɛ. ⁶ Acaan maka coŋin gɛɛg bɛya, ɔci ɛkkɛn gɔkti agi ɛkkɛn aginti ‘ya Kiṭɔ awarɛ. Ɔci a ɔŋŋiyɛ, ɛkkɛn maka coŋin jyɛttan ɔntɔ. ⁷ Ɔci ne ɛkkɛ tieŋdɛ ma gɔkki agi lañ baalɔ ɔci agi ywobji baalɔyɛ, naa ɛkkɛ buayɛ ne tolan bɛɛ. Naŋka bala a ɔɔn wanna bɛya waakɛnda, yeti jiek wyetkɛn bawwin men bɛɛ. ⁸ Keedin wɛɛn warda noogdi yɔtin oŋkanda. Ɔci bonka pookɛn gɛɛgtiyɛ, ṭɛɛr warɛ ḍieddi ne pɛñan, ɔci koñ moki bɛya mati. Taab neeniyɛ, gena taab ñamu, naŋka neeni bɛya ne cwakanti kwatti bɛɛ. ⁹ “Dala ɛkkɛ woŋgɔ tiittɛ te yomg ɛkkɛ, ɔci yomgɔ tiektɛ, acaan ɛkkɛ ‘wontɛ ma maka gɔṭi jiek byeŋkɛnti, ɔci ɛkkɛ ḍuatɛ ma orɔ oorga morki ma Juaŋy. Ɔci ɛkkɛ yɔɔttɛ ma cyekin ṭɔlgɛn ñomgɛnti, ɔci cyekin ḍwaŋin ñomgɛnti moki, acaan ɛkkɛn lwogdɛ ɛkkɛ te jyek ‘ya. ¹⁰ Yeti jyeka wonkɛn jyeka pwadin neeniyɛ, ɛkkɛn ooddi bonk jitkɛnti waakɛnda ñamu lakun. ¹¹ “Ɔci ne ɛkkɛ eetɛti ma noŋtɛti ma godanyɛ, naa ɛkkɛ poŋɛ jiek ñamu agi ɛkkɛ gɔktɛ a ɔki bɛɛ. Ne godan baali dokiyɛ, dala ɛkkɛ gɔktɛ jyeka ɛkkɛ ‘wondi Juaŋy, acaan gena ɛkkɛ gɔkɛ jyeka neeni bɛɛ, gena Boŋ Jwaŋa Tolan cuondɛ ɛkɛ, ɔci ɛkɛ aŋka gɔkti te tuk ɛkkɛy. ¹² “Ɔci ma waakɛnda yooktan te ɛkkɛ te jyek ‘ya. Ɔci ne oŋŋa wanna bɛɛdiyɛ, maka ‘uay gɛɛg yooktan te modg ɛkkɛn, ɔci tiaktanyɔ ɛkkɛn, ɔci noktan mako. Ɔci weyi gɛɛg moki yooktan te kɛɛgin ɛkkɛn. Ɔci kɛɛgin gɛɛg yooktan te weyyɛn ɔci te mɛyyɛn moki, ɔci ɛkkɛn noktan ma te jyek kɛɛgin ɛkkɛn. Yeti mena yɔɔda ne tɛyan ne oŋŋa bɛya ookti ne ŋoyɔyɛ, ɛkɛ aŋka yɔɔdɛ Juaŋo. ¹⁴ “(Ɛkkɛ, maka poki worga nɛ, dala ɛkkɛ tieŋdɛ jyeka guaŋŋɛ Yaccu neeni ne pwadan.) “Ne ɛkkɛ gɔrtɛ ‘Naŋka yaayan ne yaajan’ yɔɔtti nona pwadanti, nona ɛkɛ naan te yɔɔtti wɛnan bɛɛyɛ, ɔci kan ɛkkɛ balgɛ ciyɛ ban Yahuudiyayɛ, dala ɛkkɛ yooŋdɛ pomk jitin ne pɛñan, naa ɛkkɛ kwattɛ bɛɛ. Naŋka neeni bɛya a yuurgɔn. ¹⁵ Ɔci kan men gɛɛl bala bora ne naŋka neeni bɛɛdiyɛ, naa ɛkɛ kaatti orɔ, ɔci wak ɛkɛ gɛɛg eedɛ bɛɛ. Dala ɛkɛ aŋka ɔga yooŋdi ne pɛñan. ¹⁶ Kan men gɛɛl bala yieljiyɛ, naa ɛkɛ yooŋdi nona bworŋin ɛkɛ ḍuannɛ wanna bɛɛ. Dala ɛkɛ yooŋdi ne pɛñan. ¹⁷ Oŋka bɛya yeyin neeniyɛ, pɛñcin ne tolan moonga laciti ɔci moonga kɛɛggɛn ḍyɛrinti. ¹⁸ Dala ɛkkɛ cɔktɛ Juaŋti aŋka naa taab neeni bɛya i ponk kuuda a cyɛɛlɔ bɛɛ. ¹⁹ Te oŋŋa bɛya wannayɛ, taab pɛñña pɛñño. Oŋŋa Juaŋ okki noon ɔci ne acca ɔɔnyɛ, taab bala ba taab neeniyɛ, gɛɛl bɛɛn oŋgati men bɛɛ. Ɔci ne baaṭi taab neeni bɛya moki bɛɛ. ²⁰ Kan te Juaŋ oŋŋa neeni naŋŋi ne ḍuulan bɛɛyɛ, te menga yaakinti uda a ɔŋŋi bɛɛ. Acaan Jwaŋa Tolan poŋi te jyek ma ɛkɛ maka kɛnnɛ ɛkɛ boray, ɛkɛ gɔki agi dala nink taab neeni ḍuldɔ. ²¹ “Ɔci te oŋŋa bɛya wannayɛ, kan men gɛɛl gɔkti ɛkkɛti agi ɛkkɛ gɔrcɛ Kiṭɔ baali wɛnniyɛ, walla moki agi ɛkkɛ gɔrcɛ Kiṭɔ baali aŋanyɛ, naa ɛkkɛ jyeddɛ jyek ɛkɛ bɛɛ, ²² acaan maka gɔki agi ɛkkɛn aginti Kiṭɔ ba ‘ya mena cuonnɛ Jwaŋa Tolan neeniyɛ, ɔci maka gɔki agi ɛkkɛn aginti bɔwan Juaŋyɛ, ɛkkɛn bɛya, yeti ɛkkɛn men gɛɛl a Kiṭɔ waanɛ bɛɛ, ɔci ɛkkɛn a bɔwan Juaŋ woodgɛn bɛɛ. Ɔci ɛkkɛn noŋdi naŋka ñyecki ma ɛkkɛn, naŋka tɛyan, aŋka ma gɔrti ɔci bootti ɛkkɛnti amaam ɔɔn. Ɔci ɛkkɛn buagɔn ɛkkɛ ma ‘ya naŋtan ñin daŋkun kan ɛkkɛn ‘yektiy. ²³ Acaan a ɔŋŋiyɛ, dala ɛkkɛ woŋgɔ tiittɛ. ‘Ya ɛkkɛ myennin te jyeka neeni waakɛnda ne jyeka neeni men baakiy. ²⁴ “Tieŋdɛ te jyek war ‘ya daŋkun te oŋŋa bɛya wannayɛ, ne taab pɛñan neeni baadiyɛ, ‘Oŋ waŋɛ ula, ɔci paan moki dɛkti ne pwadan bɛɛ, ²⁵ ɔci kɛltan ḍɛɛmdi te ñaalɔ gɔ ɛkan moki ḍɛmmi ɔɔn. Ɔci waka bala ñaalɔ ɛkkɛn waakɛn ḍieddi waakɛnda.’ ²⁶ “Hayya, ‘ya Kaci Ma Baan oŋ yuarta ma baal bɛɛd te pɔllo. ‘Ya bɛɛd ba Ciɛggɔn Tolan, ɔci nona ñaalɔ dɛki pwanna pwanno. ²⁷ Ɔci ‘ya malɛɛkan ‘ya cuoñña baan warda, ñaalɔ ɔci iñɔ ne pɔli ŋwayɛti ɔɔn, ɔci ɛkkɛn maka kɛññan ‘ya borayɛ, limtanyɔ ‘yati nona ne cyɛɛlɔ. ²⁸ “Ɔci Yaccu gɔkcin moki agi, jyek ŋuami bala a ɔki? Jyek ŋuami ne ɛkɛ pwordiyɛ, ɛkɛ etti jyeyya wonkɛn, ɔci ŋeejɛ ɛkkɛ noon aŋi ḍuoŋ tukɛ doki. ²⁹ Ne ɛkkɛ gɔrtɛ naŋka neeni ne bɛɛti borayɛ, dala ŋeeddɛ ɛkkɛ acaan oŋŋa ‘ya Kaci Ma Baan bɛɛdayɛ, cɔɔllin doki, looncin moki bɛɛ. ³⁰ ’Ya gɔkka ɛkkɛti awarɛ, naŋka neeni bɛya bora waakɛnda ne maka bala acca men balki ɔɔn. ³¹ Pɔlla ñaalɔ ɔci ṭɛra iñɔ baadi. Yeti jyek ‘ya bɛya bora waakɛnda lakun. ³² “Oŋŋa ‘ya Kaci Ma Baan bɛɛdayɛ, ŋeejɛ menga bɛɛ, ɔci kwoyɔn malɛɛkan ñaalɔ daŋkun, ɔci moki kwoy ‘ya Kaci Jwaŋa Tolan daŋkun. Oŋŋa neeni ŋeejɛ gena Wey ɛkkɛn parɛ.” ³³ Yaccu ma ṭyɛllɛyɔ moki agi, “Dala ɛkkɛ woŋgɔ tiittɛ oŋkanda ne pwadan acaan oŋŋa bɛya neeniyɛ, kwoyɛ ɛkkɛ. ³⁴ Jyeka neeni bala ba jyek ‘wana ooddi bana parɛ bana loonan. Ɔci ne ɛkɛ bwagdi woonyɛ, ɛkɛ gɔkti maka kanŋan ɛkɛti te ñamu te jyek kanŋa, men da ‘wondɛ ɛkɛ kanŋa, men da ‘wondɛ ɛkɛ kanŋa. Ɔci on weegɛn gɔkti mena kanŋan ɛkɛti, mena gɔṭi on tukɛti agi dala ɛkta waŋdan tiitta te oŋŋa ɛkɛ on weegɛn dɔɔkciy. ³⁵ Ɔci ba jyeka neeniyɛ, dala ɛkkɛ woŋgɔ tiittɛ daŋkun ba men kanŋa mena gɔṭi on tukɛ neeni! Acaan oŋŋa ‘ya bɛɛdayɛ, ŋeeddɛ ɛkkɛ bɛɛ, kan ‘ya bɛɛd ne tɛɛnɔ, walla ne weenji, ɔci walla ne tinnɔ, ɔci walla ne liidɔyɛ, kwoyɛ ɛkkɛ. ³⁶ Dala ɛkkɛ woŋgɔ tiittɛ, kan ‘ya bɛɛd ne pɛñanyɛ, naa ɛkkɛ mɔktin ‘ya mielɛ coodi bɛɛ. ³⁷ Jwalla guaŋi ‘ya ɛkkɛti neeniyɛ, guaŋi ‘ya te ma waakɛnda, ka dala ɛkkɛ woŋgɔ tiittɛ waakida.”

¹ Iid gɔrki ma jyek Iid Malɛɛka Lien Bɛɛn Goṭi A Gorŋo, ɔci moki Iid Byedga Polan boottin menin neeni ŋoyɛti eci nink ne dɔɔyɔ wyetkɛn ne yyɛɛwɔ. Ɔci oŋŋa ma noŋti iidn neeni yaakkɛnyɛ, cɔɔllin doki, oŋki baaw nink ne yyɛɛwɔ men. Ɔci gaciicin ḍwaŋin Ma Yahuud ɔci maka loṭi worga Juaŋyɛ, ɛkkɛn bala lieṭi pɔya ɛkkɛn Yaccu muktiti, ɔci noktiti lieday. ² Ɛkkɛn gɔki agi, “Naa ɛkɛ muktin noktin te oŋ iid bɛɛ, acaan maka coŋin neeni nuula dita ikinti.” ³ Yaccu ‘uobɛ ma amti ban Bɛtani on Cimaan mena naŋŋɛ cyɛco. Ɔci ne ɛkɛ baali omi amyɛ, mena ɛɛŋ gɛɛl bɛɛn eccin eelan wiɛlɛ tɛyan te luañgɔn ṭɔɔlɛ bɔwan. Eelan neeni a ñɔɔn jaan gɛɛl yenti nardiin. Ñɔɔna neeni labi ma i ñɔɔna parɛ gɛɛl bɛɛ. Gena nardiin parɛ. Ɔci luañgɔn ṭɔɔlɛ mwaññɛ ɛɛŋ tukɛti. (Ɔci eelan juonnɛ ɛkɛ Yaccu wyeñɛti acaan ɛŋa neeni bala poŋi te ḍɔŋ Yaccu ba mena wɛɛyi may.) ⁴ Ma gɛɛg bala, ɔci ɛkkɛn looñi te naŋki ɛŋa neeni, ɔci ɛkkɛn gɔgjin yɔtin agi, “Eelan neeni ñiennɛ ɛkɛ ɔntɔ budan ogo yeti? ⁵ Dala te eelan neeni wiɛlninŋɔ ikin te bilk ne coŋɔn, ɔci te ‘wonnin maka bɔwan oŋo!” Ɔci ɛkkɛn bala wooki ɛɛŋ men ɔɔn. ⁶ Ɔci Yaccu gɔkcin ɛkkɛnti agi, “Ɛkkɛ ɛɛŋ daldɛ, hay! Ɛkkɛ wookɛ ɛkɛ a ɔɔn budan ogo? Ɛkɛ noŋi gena pwadan ‘yati. ⁷ Maka bɔwan balgi iki ɛkkɛ yuonginda ɔɔn, ɔci oŋŋa ɛkkɛ buagɛ ɛkkɛn magdɛyɛ, ɛkkɛn bala doki, ɔci ɛkkɛ yaakɛti ɛkkɛn magdɛ ɔɔn. Yeti ‘ya balkin iki ɛkkɛ yuonginda bɛɛ. ⁸ Ɛkɛ noŋi ba naŋka ŋeejɛ ɛkɛ waakɛnda. Ne ‘ya jokkata ma men bɛɛyɛ, war ‘ya naŋŋɛ ɛkɛ te eelan doki, bala ba naŋka naŋtan ma ne ma tuutiy. ⁹ Gɔṭṭɛ, noon wardayɛ, nona maka loṭi ma te jyek ‘yayɛ, ɔci jyek ɛŋa neeni ooddi daŋkun, ɔci ma ñingɛn ñiektan te naŋki ɛkɛ.” ¹⁰ Ɔci Yahuuja Ickɛɛryuti mena akki Ma A Inyaakkɛn Wyetkɛn Ne Yyɛɛwɔyɛ, ɛkɛ ati gaciicin ḍwaŋin Ma Yahuudti, ɔci gɔkcin ɛkkɛnti agi, “‘Ya bɛɛn acaan ‘ya buaga Yaccu ‘wondin ɛkkɛ byeŋkɔti.” ¹¹ Ɔci ne ɛkkɛn tieŋki jyek ɛkɛyɛ, ɛkkɛn yomgɛn ñɔɔna ñɔɔno, ɔci ɛkkɛn gɔkcin Yahuujati agi, “Kan i noŋja a ɔɔn i ‘wonti ɔɔn bilko.” Ɔci Yahuuja bala lieṭi pɔya ɛkɛ Yaccu ‘wondɛ ma byeŋkɛntiy. ¹² Ɔci oŋ iid bɛɛn doki. Gena ninna ma jɔɔtti omki byedga polan neeni. Te ninna neeni ma ŋooṭi kulin ṭɔlgɛn daŋkun te Iid Malɛɛka lien Bɛɛn Goṭi A Gorŋo. Ɔci te oŋŋa neeniyɛ, maka laldɛ Yaccu tooccin ɛkɛti agi, “I buagi ɔɔn ooddɔn wak iid ywaŋdɔnyɔ ɔɔn wɛnɛ te ikin?” ¹³ Ɔci maka laldɛ Yaccu cuuññɛ ɛkɛ ne yyɛɛwɔ, ɔci ɛkɛ gɔkcin ɛkkɛnti agi, “Dala ɛkkɛ ɔgdɛ ooddɛ ban Urcaliimji, ɔci ɛkkɛ koogdɛ i mena ‘uan gɛɛl kɛṭi pieg te kuñŋan. Ɛkkɛ boottɛ ɛkɛ ŋoyɛti. ¹⁴ Ɔci ona kaatti ɛkɛyɛ, dala ɛkkɛ gɔktɛ on weegɛnti agi mena loṭi ma bala tooci agi, ‘Ba ona cootta ‘ya a on wɛlg bɛ? Acaan ‘ya buaga noŋdɔn iid i maka laldi ‘yay.’ ¹⁵ Ɔci ɛkɛ ɛkkɛ myettɛ te ona tolan ñaalɔ. Ona neeni ywaŋŋɛji ɛkɛ doki, ɔci dala ɛkkɛ wak iid ywaŋdɛyɔ te ikin aŋan.” ¹⁶ Ɔci maka laldɛ Yaccu jɔŋŋin, ɔci ati ban Urcaliimji, ɔci ɛkkɛn yɔṭi on ba jwalla guaŋŋɛ Yaccuy. Ɔci ɛkkɛn wak iid ywaŋɛyɔ aŋan. ¹⁷ Ɔci ne oŋ waŋɛ luunni iñɔyɛ, Yaccu bɛɛn nona noŋki ma iid i Maka A Inyaakkɛn Wyetkɛn Ne yyɛɛwɔy. ¹⁸ Ɔci ne ɛkkɛn balki omkiyɛ, Yaccu gɔkcin ɛkkɛnti agi, “Gɔṭṭɛ, men gɛɛl bala ɛkkɛti wɛnni mena omin iki ‘ya a cyɛɛlɔy, ɔci ɛkɛ ‘ya ‘wonda maka yookɔn te ‘ya byeŋkɛnti.” ¹⁹ Ɔci maka laldɛ ɛkɛ yomgɛn yeyɔ te jyeka neeni, ɔci ɛkkɛn bala tooci Yaccuti agi, “A ‘ya?” Gɔ menan moki toocci ɔɔn. ²⁰ Ɔci ɛkɛ gɔkcin ɛkkɛnti agi, “Gena men gɛɛl te ɛkkɛti Maka A Inyaakkɛn Wyetkɛn Ne Yyɛɛwɔ neeni, mena ‘uottin iki ‘ya am golŋa ne cyɛɛlɔy. ²¹ ’Ya Kaci Ma Baan tuud ba jyeka kiiwɛ ma te ‘ya, yeti mena ‘ya ‘wonda ma byeŋkɛnti neeniyɛ, taab bɛya ɛkɛtiyɛ, tol tolo! Dala naa te ɛkɛ jiennɛ mɛɛgɛn bɛɛ!” ²² Ɔci ne ɛkkɛn balki omki menyɛ, Yaccu byentan gɛɛl luullɛ, ɔci ɛkɛ cɔkcin Juaŋti, ɔci byentan neeni wɛɛnnɛ jitin, ɔci ɛkɛ maka laldɛ ɛkɛ ‘wonnɛ byentan. Ɔci ɛkɛ gɔkcin ɛkkɛnti agi, “Antɛ omdɛ. Gena war ‘ya.” ²³ Ɔci ɛkɛ kubaaya pyeg luutkin luullɛ, ɔci ne ɛkɛ gɔŋni a pwatcin Juaŋtiyɛ, ɛkɛ ma ‘wonnɛ kubaaya, ɔci ɛkkɛn waakɛnda motcin waka bala kubaaya konɛti neeni. ²⁴ Ɔci Yaccu gɔkcin ɛkkɛnti agi, “Pyeg luutkin neeniyɛ, gena yimg ‘ya, yimga kɛɛdi iñɔ aŋka yuoci maka coŋin te nɔji ɛkkɛny. Ɔci te yimg ‘ya neeniyɛ, jyeka ḍuaññɛ Juaŋ te yɔɔt ma neeniyɛ, cɔmdi bora awarɛ. ²⁵ ’Ya gɔkka ɛkkɛti awarɛ, ‘ya motca pyeg jang ṭɔlgɛn acca wɛnni moki bɛɛ, ‘ya cied budan ɔɔn ne ‘ya motta ɛkkɛn wonkɛn ɛkkɛn pookɛn ɛkkɛn pwadin ban Juaŋ ɔɔn.” ²⁶ Ɔci ne ɛkkɛn ‘ualki ɔɔli gɛɛlyɛ, ɛkkɛn kaaccin bora ɔci ati Pom Jɛtuunti. ²⁷ Ɔci Yaccu gɔkcin ɛkkɛnti agi, “Ɛkkɛ buadɛ waakida ɔci yooŋdɛ ɔntɔ. ‘Ya daldata ɛkkɛ paru bala ba jyeka kiigin agi, ‘Mena cieti kulin noktan ma ɔci kulin cyɛndi jitin.’ ²⁸ Yeti ne ‘ya jɔlda ñaalɔyɛ, ‘ya ootta ban Jaliil botca ñamu. Dala ɛkkɛ bɛɛdɛ aŋan.” ²⁹ Ɔci Butruc gɔkcin ɛkɛti agi, “Kan ɛkkɛn waakɛnda buayayɛ, ‘ya i daldin bɛɛ!” ³⁰ Ɔci Yaccu gɔkcin ɛkɛti agi, “‘Ya gɔkka iti awarɛ, te ween jiña neeni ne tuan wiakti oŋki ne yyɛɛwɔ men bɛɛyɛ, i doki kɛkka te ‘ya oŋki ne ḍoogɔ.” ³¹ Ɔci Butruc gɔkcin ne pɛñan agi, “Hay, kan ma buagɔn noki ‘ya iki iyɛ, ‘ya kɛkka te i bɛɛ!” Ɔci maka laldɛ Yaccu waakɛndayɛ, ɛkkɛn bala gɔki a ɔɔn daŋkun. ³² Ɔci ɛkkɛn ati nona bartan ma a Gɛtcɛɛmani Pom Jɛtuunti, ɔci ɛkɛ gɔkcin maka laldɛ ɛkɛti agi, “Ɛkkɛ coottɛ wɛnni. ‘Ya ootta ñamu cɔkca Juaŋti.” ³³ Butruc ɔci Yaakub ɔci Yɔhanna, ɛkkɛn eññɛ Yaccu, ɔci Yaccu yomɛ moottan ne pɛñan, ɛkɛ yomɛ yaayɛ ne tolan. ³⁴ Ɔci ɛkɛ gɔkcin ɛkkɛnti agi, “‘Ya yomu yaayɛ ne tolan, bala ba ‘ya tuuda tuun doki no. Dala ɛkkɛ yaddɛ te wɛnni, ɔci dala ɛkkɛ woŋgɔ tiittɛ.” ³⁵ Ɔci ɛkɛ ati ñamu ne ḍiɛran ṭɔɔlɛ ɔci ɛkɛ warɛ yiɛmnɛ iñɔ ṭɛɛrji, ɔci ɛkɛ cɔkcin Juaŋti agi kan Juaŋ buagdayɛ, dala te taab neeni eedda ɔntɔ te ɛkɛti. ³⁶ Ɛkɛ gɔkcin Juaŋti agi, “Wey ɔɔn, i tɛɛkki genga bɛɛ. Naa taab lien neeni bɛya ‘yati bɛɛ. Yeti ‘ya cɔkka iti ba yom ‘ya bɛɛ, ‘ya cɔkka iti ba yom i.” ³⁷ Ɔci ɛkɛ bɛɛn dɔɔkkin nona maka ne ḍoogɔ neeniti, ɔci ɛkɛ ɛkkɛn mɔŋnɛ wici. Ɔci ɛkɛ gɔkcin Butructi agi, “Butruc, i baal wiccɛ? I yaakiti waŋu tiicca te oŋ waŋɛ gɛɛl ne cyɛɛlɔ bɛɛ?” ³⁸ Ɔci ɛkɛ gɔkcin ɛkkɛnti agi, “Woŋgɔ tiittɛ, dala ɛkkɛ cɔktɛ Juaŋti aŋka naa ɛkkɛ buadɛ bɛɛ. Ɛkkɛ yomgɔ buagɔn jyek ‘ya, yeti ɛkkɛ waakɔ tɛɛcin pookɔ bɛɛ.” ³⁹ Ɔci Yaccu ati, ɔci ɛkɛ cɔkcin moki. Ɔci ɛkɛ gɔkcin ba jwalla guaŋŋɛ ɛkɛ te ñamu ɔɔn. ⁴⁰ Ɔci ne ɛkɛ bɛɛni mokiyɛ, ɛkɛ ma mɔŋnɛ wicɔ moki. Ɔci ɛkkɛn yaakinti ṭwokcin jwali gɛɛl ɛkɛti ne pwadan te nink ɛkkɛn neeni bɛɛ. ⁴¹ Ɔci ɛkɛ bɛɛn oŋki aŋi ne ḍoogɔ, ɔci ɛkɛ gɔkcin ɛkkɛnti agi, “Ɛkkɛ ningɛ wiccɛ moki? Nink kapa ɔɔn. Gɔṭṭɛ! Naŋka guaŋi ‘ya bɛɛn doki. ‘Ya Kaci Ma Baan baal byeŋki maka yookɔn te ‘ya doki. ⁴² Gɔṭṭɛ! Mena ‘ya ‘wonda ma byeŋkɛnti bɛɛn doki. Jɔŋdɛ ñaalɔ, oottin kooktinti!” ⁴³ Ɔci ne Yaccu baali gɔki a ɔɔn menyɛ, Yahuuja Ickɛɛryuti bɛɛn doki. Ɔci ma bɛɛn i ɛkɛ kɔɔna kɔɔnno. Ɛkkɛn bala eci byeŋgaaran byeŋkɛnti, ɔci eci gɔlk byeŋkɛnti. Maka neeniyɛ, bɛɛn te jyek gaciicin ḍwaŋin Ma Yahuud ɔci te jyek maka loṭi worga Juaŋo, ɔci te jyek cyekin. ⁴⁴ Mena Yaccu ‘wondɛ ma byeŋkɛntiyɛ, ɛkɛ jiek naŋɛ iki ma te ñamu agi, “Mena ñiibdi ‘ya te tuku ba naŋki ma ikinyɛ, gena ɛkɛ. Ɛkɛ mugdɛ, ɔci eedɛ ne pwadan.” ⁴⁵ Ɔci ne Yahuuja bɛɛniyɛ, ɛkɛ ati Yaccuti ne pɛñan. Ɔci ɛkɛ ñiimmɛ te tukɛ, ɔci gɔkcin ɛkɛti agi, “Mena loṭi may!” ⁴⁶ Ɔci ɛkɛ mugɛ ma doki ɔci tieki ne pɛñan. ⁴⁷ Ɔci men gɛɛl bala yɔɔd nona mati, ɔci ɛkɛ byeŋgaaran dɔnnɛ bora te kuorjɛji, ɔci ɛkɛ kɛɛngɔn gaciic tolan Ma Yahuud jyɛmmɛ jyeñɛti, ɔci ɛkɛ jyeñɛ palnɛ bora. ⁴⁸ Ɔci Yaccu gɔkcin ɛkkɛnti agi, “Ɛkkɛ bɛɛnɛ ennɛ byeŋgaaran ɔci gɔlk byeŋkɔti, aŋka ‘ya mugdata ɛkkɛ ba muŋi mena ɛɛn ogo? ⁴⁹ Oŋkanda, ‘ya baal on Juaŋ ona tolan neeni lor ɛkkɛ bɛɛ? Ba ɛkkɛ ‘ya muŋŋata bɛ? Yeti acca dala naŋka neeni bɛya bora ba jyeka kiigin.” ⁵⁰ Ɔci maka laldɛ Yaccuyɛ, Yaccu dalji ɛkkɛn ɔntɔ waakɛnda. Ɛkkɛn yiŋi ɔntɔ. ⁵¹ Ɔci kaalgɔn ṭɔɔlɛ gɛɛl bala booti Yaccuti nona ecki ma Yaccuy. Ɛkɛ bala pooṭi bworŋa tɛyan warɛti. Ɔci ɛkɛ mugɛyɔ ma te bworŋo, ⁵² ɔci ɛkɛ bworŋa neeni pɔŋnɛ, ɔci ɛkɛ yiŋi ɔntɔ warɛ budan. ⁵³ Ɔci Yaccu lwadɛ eyɛ ma nona ciyi gaciic tolan Ma Yahuud. Ɔci gaciicin ḍwaŋin Ma Yahuud mɔkci wyetkɛn ḍɔɔlɛ doki i cyekin i maka loṭi worga Juaŋ ɔɔn. ⁵⁴ Ɔci Butruc bala ati booti Yaccuti te ŋoyɔ parɛ. Ɛkɛ ati booti ɛkɛti ɔɔn ne kaañji ɔɔn. Gena kañ gaciic tolan Ma Yahuud. Ɛkɛ bala ciyi iki maka kanŋan i gaciic tolan Ma Yahuud, ɛkɛ bala ooyi maccu acaan ɛkɛ ñiyɛ ma meni ne ɛkɛ agi men Yaccu bɛɛ. ⁵⁵ Gaciicin ḍwaŋin Ma Yahuudyɛ, ɛkkɛn iki maka gɔṭi jiek waakɛndayɛ, ɛkkɛn bala lieṭi pɔya nokki ɛkkɛn Yaccuy, ɔci pɔya ɛkkɛn Yaccu nokkiti baawo. ⁵⁶ Maka coŋinyɛ, ɛkkɛn Yaccu jomgiyɔ, yeti jyeka guaktan ɛkkɛn neeniyɛ, a jyeka ne cyɛɛlɔ bɛɛ. ⁵⁷ Ɔci ma gɛɛg jɔŋŋin ñaalɔ jyek Yaccu aagɛyɔ ɛkkɛn te jyek on Juaŋ ona Tolan agi, ⁵⁸ “Ɔɔn tieŋnɔn jiek te tuk Yaccuti ne ɛkɛ gɔki te on Juaŋ ona Tolan, ona cɔdɛ ma te byeŋkɛn neeni, agi on laakci ɛkɛ bora, ɔci agi ɛkɛ cɔtci ona pardan, ɔci agi on ḍagji nink ne ḍoogɔ, ɔci agi ona neeni ma cɔti te byeŋkɛn bɛɛ.” ⁵⁹ Ɔci ne ɛkkɛn balki gɔkki a ɔɔnyɛ, ɛkkɛn ñoowin te jiek bɛɛ. Ɛkkɛn kɛɛptin jitin te jieko, menga da te jyek ɛkɛ, ɔci menga da te jyek ɛkɛ. ⁶⁰ Ɔci gaciic tolan Ma Yahuud jɔŋŋin ñaalɔ, ɔci yɔɔtcin ma ñomgɛnti waakɛnda, ɔci ɛkɛ tooccin yieci Yaccuti agi, “I ṭwokka jwali gɛɛl bɛɛ? Jyeka i tiakkitiyɔ ma neeni a jyeka awarɛ?” ⁶¹ Ɔci Yaccu cien lieda, ɛkɛ gɔkcin genga bɛɛ. Ɔci gaciic tolan Ma Yahuud tooccin ɛkɛti moki agi, “I gɔk i a Kiṭɔ? I a Kaci Jwaŋa Tolanɛ?” ⁶² Ɔci Yaccu ṭwokcin ɛkɛti agi, “Ɛɛ, gena ‘ya.” Ɔci ɛkɛ gɔkcin agi, “Ne baaṭi ‘ya Kaci Ma Baan yuartata ɛkkɛ ciy Mena Tolan taaŋɛti taaŋŋa byerɔn, ɔci ‘ya yuardata ɛkkɛ oŋŋa ‘ya bɛɛda te pɔlla dɛki ne bɔwany.” ⁶³ Ɔci gaciic tolan Ma Yahuud bworŋin ɛkɛ Jiɛññɛ jitin te loñko, ɔci ɛkɛ gɔkcin mati agi, “Ikin buagin ma bɛya tɛkti jiek ikinti moki ogo? ⁶⁴ Ɛkkɛ tieŋnɛ ne ɛkɛ Juaŋ ḍaarŋiyɔ bɛɛ? Oŋ acca yomg ɛkkɛ bala a ɔki, pari jyeka liltin ikin neeni bɛɛ?” Ɔci ɛkkɛn waakɛnda gɔki agi dala ɛkta tuudɔ te jyeka yeyin neeni. ⁶⁵ Ɔci ma gɛɛg bala ŋuoṭi ñaang ɛkɛti. Ɔci ɛkkɛn Yaccu kwomgɛ bworŋ ñingɛti, ɔci ɛkkɛn bala jiebi ɛkɛ, ɔci ɛkkɛn gɔkcin ɛkɛti agi, “Mena i jyɛmmi neeni ŋeejɛ? Gɔkca.” Ɔci ackanyɛ, ne ɛkkɛn balki gɔrki Yaccuyɛ, ɛkkɛn bala jiebi ɛkɛ te byeŋkɛn. ⁶⁶ On kona gɔrki ma jiek bala ñaalɔ, ɔci Butruc ɛkɛ bala iñɔ kaañji. Ɔci mena kanŋan i gaciic tolan Ma Yahuud mena ṭɔɔl gɛɛl bɛɛni. ⁶⁷ Ɔci ne ɛkɛ Butruc yuarnɛ baali ooyi maccuyɛ, ɛkɛ bala gɔṭi ḍɛɛṭi ɛkɛ, ɔci gɔkci ɛkɛti agi, “I daŋkun balgi iki Yaccu men ma Najarɛt, hay!” ⁶⁸ Yeti Butruc kɛkcin agi, “Mena guaga i neeni ŋeej ‘ya bɛɛ.” Ɔci Butruc yɔɔtcin kaañ tukɛti, ɔci te wɛnni tuan wiakcin doki. ⁶⁹ Ɔci ɛkɛ yuarnɛ ṭɔɔl kaañ tukɛti, ɔci ṭɔɔl gɔkcin maka yɔdi nona neeniti moki agi, “‘Wana neeniyɛ, ɛkɛ a men ɛkkɛn daŋkun.” ⁷⁰ Yeti Butruc kɛkcin moki. Ɔci ne ḍiɛran ṭɔɔlɛ moki maka yɔdi nona neeniti gɔkcin Butructi agi, “I a men ɛkkɛn hay! Acaan i daŋkun a men maka ban Jaliil ban Yaccun.” ⁷¹ Ɔci Butruc bala gɔki ɔṭi warɛ te yenti Juaŋ agi, “‘Ya gɔk ɛkkɛti awarɛ. ‘Wana guagdɛ ɛkkɛ neeniyɛ, kwoy ‘ya. Kan ‘ya gɔk awarɛ bɛɛyɛ, dala Juaŋ Tolan noŋdi ne yaayan ‘yati.” ⁷² Ɔci ne pɛñan tuan wiakcin oŋki aŋi ne yyɛɛwɔ doki. Ɔci Butruc ñingɛ ñieŋnɛ te jwalla guaŋŋɛ Yaccu agi, “Ne tuan wiakti oŋki ne yyɛɛwɔ men bɛɛyɛ, i doki kɛkka te ‘ya oŋki aga ne ḍoogɔ.” Ɔci Butruc yomɛ yaayɛ, ɔci bala wiak ne yaayan.

¹ Ɔci te liidɔ gaciicin ḍwaŋin Ma Yahuud, ɔci cyekin, ɔci maka loṭi worga Juaŋ ɔci maka gɔṭi jiekyɛ, ɛkkɛn waakɛnda wyetkɛn ḍɔɔlɛ ne pɛñan moki bala gɔṭi jiek ɔci ɛkkɛn paŋi naŋi ɔci ɛkkɛn Yaccu ḍɛɛgɛ. Ɔci ɛkɛ eyɛ ɔntɔ ɔci ‘woñgi Bilaatuc men ma Ḍɔɔm ḍuaŋa ṭɔɔlɛ bieŋɛti aŋka nogda ɛkta. ² Ɔci ne ɛkɛ ookiti ma Bilaatuctiyɛ, Bilaatuc tooccin ɛkɛti agi, “I a Ciɛggɔn ma ɛkkɛ Ma Yahuud nɛ?” Ɔci Yaccu ṭwokcin ɛkɛti agi, “Ɛɛ, ‘ya baal a ɔɔn, ba jwalla guaga i wanna.” ³ Ɔci gaciicin ḍwaŋin Ma Yahuud ɛkkɛn Yaccu jomgiyɔ agi Yaccu noŋŋɔ waka coŋgɔ. ⁴ Ɔci ne Bilaatuc gɔrni Yaccu ṭwoŋni jwali gɛɛl aŋka yuoci warɛ te jyeka tɔɔmki Ma Yahuud ɛkɛ neeni bɛɛyɛ, ɛkɛ tooccin ɛkɛti moki agi, “I ṭwokka jwali gɛɛl ‘yati bɛɛ? I tieŋni jyeka guaktan ma te naŋki i naŋka coŋin neeni bɛɛ?” ⁵ Yeti Yaccu bala ciyi lieda men ɔɔn. Ɔci Bilaatuc yomɛ buañi acaan Yaccu balki genga ḍwaŋɛti aŋka etti lien ɛkɛti bɛɛ. ⁶ Yuonginda ne Iid Malɛɛka Lien Bɛɛn Goṭi A Gorŋ bɛɛdiyɛ, naŋki Bilaatuc bala a ɔɔn, maka bala ciginji men gɛɛl ne cyɛɛlɔ pɔktɛ ɛkɛ budan, wantan ma bɛɛ. Mena pɔktan ma neeniyɛ, gena mena Ma Yahuud buagitiy. ⁷ Oŋ gɛɛltiyɛ, ma gɛɛg yookɔn te jyek akuuma, ɛkkɛn buagɔn dala jyek akuuma aga jyek ɛkkɛn pookɛn. Ɔci a ɔŋŋiyɛ, ɛkkɛn bala noowɔ. Ɔci maka ma nogɛ te oŋŋa ma nooki neeniyɛ, ɛkkɛn bala ciginji. Men gɛɛl bala ɛkkɛnti yenti Baraabac, ɛkɛ a ḍuaŋa maka nokkin ma neeni. ⁸ Ɔci maka coŋin bɛɛn nona Bilaatucti. Ɔci ɛkkɛn bala tooci ɛkɛti te naŋki ɛkɛ, naŋka ɛkɛ mena ne cyɛɛlɔ pɔktɛ oŋkanda te oŋ iidy. ⁹ Ɔci ɛkɛ ṭwokcin ɛkkɛnti agi, “Ɛkkɛ buagɛ ‘ya Yaccu Ciɛggɔn ɛkkɛ Ma Yahuud pɔkka?” ¹⁰ Ɔci ɛkɛ tooccin gaciicin ḍwaŋin Ma Yahuudti a ɔɔn acaan ɛkɛ buagɔn jyek lyen Yaccu neeni cwamdɛ ɛkɛ pari bɛɛ. Acaan ŋeejɛ ɛkɛ Yaccu mugɛ Ma Yahuud, ɔci owwɛ ɛkɛti acaan ɛkkɛn korkɛn modɔ ɛkɛti. ¹¹ Yeti maka coŋin yookɔn te pɔkkin Yaccu, acaan gaciicin ḍwaŋin Ma Yahuud gɔkcin doki ɛkkɛnti agi dala ma toottɔ Bilaatucti te gena Baraabac. ¹² Ɔci Bilaatuc gɔkcin ɛkkɛnti moki, “‘Ya noŋja a ɔki te ‘wana bardɛ ɛkkɛ agi Ciɛggɔn Ma Yahuud neeni?” ¹³ Ɔci ɛkkɛn bala yaadan agi, “Dala ɛkɛ ŋaaptɛ ñaalɔ!” ¹⁴ Ɔci Bilaatuc gɔkcin ɛkkɛnti agi, “Gena naŋŋɛ ɛkɛ yaayan a gena?” Yeti ma ṭwokcin ɛkɛti ne pwadan bɛɛ. Yeti ɛkkɛn yaadan a yook ne tolan agi, “Dala ɛkɛ ŋaaptɛ ñaalɔ!” ¹⁵ Ɔci Bilaatuc Baraabac pɔŋnɛ ɛkkɛnti, acaan ɛkɛ buagɔn dala ma yomgɛn pwaddi. Bilaatuc ackan ‘wonnɛ Yaccu byeŋkɛnti aŋka ḍuatan ɛkkɛn ɔci eetan ŋaaptan. ¹⁶ Ɔci ne ackan Yaccu ḍuakitiyɛ, ɛkkɛn ɛkɛ eyɛ kaañji on ḍuaŋa ṭɔɔlɛ ona tolan, ɔci ɛkkɛn borcin ackan pookɛnti waakɛnda, ɔci ɛkkɛn bɛɛni. ¹⁷ Ackan bala juoli Yaccu, ɔci ackan bworŋ cyɛgji bworŋa wiɛlɛ pɛñan bworŋa a buol ‘yɛɛŋji ɛkkɛn Yaccuti, ɔci kuwi paari ba til bala ba gena ‘yɛŋdɛ ḍuaŋa tolan ɔci ‘yɛɛŋji Yaccu wyeñɛti ɔci tañji iñɔ. ¹⁸ Ɔci ɛkkɛn bala Yaccu yɔɔktan ciegɛn bala ba ackan ne noŋki ḍuaŋa ɛkkɛnti, ɔci ɛkkɛn bala juoli Yaccu ñiepi ɛkɛti agi, “Acc! I Ciɛggɔn Tolan Ma Yahuud, i baal ciyɛ!” ¹⁹ Ɔci ɛkkɛn bala ḍwayi Yaccu wyetkɛ te pok waaŋgɛn, ɔci ɛkkɛn bala ŋuoṭi ñaang ɛkɛti, ɔci ɛkkɛn bala ḍwondi iñɔ ɛkɛ ñamɛti ba ḍwoñjin ma ḍwonti iñɔ cyekin ñomgɛnti ɔɔn. ²⁰ Ɔci ne ɛkkɛn juolki ɛkɛ ne ḍookkiyɛ, bworŋa wiɛlɛ pɛñan bworŋa a buol oŋ gwoddɛ ɛkkɛn bora oŋo. Ɔci ɛkɛ ɛɛŋgi bworŋin ɛkɛ dɔki. Ɔci ɛkkɛn bala ɛkɛ lwattan eetan nona ŋoopki ma ɛkɛy. ²¹ Ɔci ɛkkɛn koogjin iki mena ‘uan gɛɛl yomɔ. Ɛkɛ bala bɛya te yielji bɛya baanji. (Mena neeni yenti Cimaan. Ɛkɛ a men maka ban Cayriin. Ɛkɛ a wey Alɛkcaandarn ɔci Ḍupacn.) Ɔci ackan neeni ɛkɛ iircɛ ɛkkɛn kɛṭi kakan Yaccu acaan Yaccu beelin ne tolan doki. ²² Ɔci Yaccu eyɛ ma nona bartan ma agi “Gɔlgata.” (Te jyek Mabaan ma boṭi agi, “Oon men Baan Wyeñɛ.”) ²³ Ḍɔk jana cyɛyan ñaagɛyɔ ma i mooyo, ɔci ‘woñgi ma Yaccu, ɔci ɛkɛ motcin bɛɛ. Ɛkɛ kɛkcin. ²⁴ Ɔci Yaccu ŋaapci ma ñaalɔ, ɔci ackan bala oomi kɔla te jyek bworŋin ɛkɛ. Ɔci bworŋin Yaccu cieñɛ ɛkkɛn jitin. ²⁵ Yaccu ŋaapci ma ñaalɔ ne oŋ waŋɛ kuani ñaalɔy. ²⁶ Ɔci jyeka kiigin olji ma kakanti ŋaapci ma Yaccu wyeñɛti gɔki agi, “CIƐGGƆN TOLAN MA YAHUUD.” Acaan oŋkanda kan mena ŋaaptan ma ñaalɔyɛ, naŋki ɛkɛ kiittan ḍuattan ma kakan wyeñɛti. ²⁷ Yaccu ŋaapci ma ñaalɔ iki maka ɛyi ne yyɛɛwɔ, mena ne cyɛɛlɔ te ɛkɛ byeŋa aamo, ɔci mena ne cyɛɛlɔ te ɛkɛ byeŋa byerɔn. [28 Ba jyeka neeni jyeka kiigin, jyeka gɔki agi, “Ɛkɛ ñoowin i maka yeyin” aŋi jyeka awarɛ.] ²⁹ Ɔci maka bala goṭi pɔɔjɔyɛ, ɛkkɛn bala bɛṭi wyetkɛn, ɔci gɔki ne yaayan ɛkɛti agi, “Acc! I gɔk agi i yaakiti on Juaŋ ona tolan neeni laagayɔ, ɔci i gɔk agi i ejja ɛka woonɛ, ɔci i gɔk agi ɛkɛ ḍaga i nink ne ḍoogɔ! ³⁰ Dala i waru yɔya paru acca oŋo! Kooya iñɔ te kakanti!” ³¹ Ɔci gaciicin ḍwaŋin Ma Yahuud ɔci maka loṭi worga Juaŋyɛ, ɛkkɛn bala juoli ɛkɛ daŋkun a ɔɔn. Ɛkkɛn bala gɔwwɔ yɔtin pookɛn agi, “Maka pookɛn yɔɔññɛ ɛkɛ, ɔci acca ɛkɛ kookinti te yɔɔd war ɛkɛ parɛ! ³² Pari ɛkɛ a Kiṭɔ, Ciɛggɔn Ma Icrayiil bɛɛ? Dala ɛkɛ koodi iñɔ te kakanti, aŋka ikin gɔrtin ɔci jyettin ɛkɛti oŋo!” Ɔci maka ŋaapci ma ñaalɔ ne yyɛɛwɔ iki Yaccuyɛ, ɛkkɛn bala gɔki ne yaayan ɛkɛti daŋkun. ³³ Ɔci ne oŋ waŋɛ yɔɔnni yeccuyɛ, noon uli baan warda ɔɔn ne oŋ waŋɛ warɛ yiɛnnɛ ɔɔn. ³⁴ Ɔci ne oŋ waŋɛ warɛ yiɛnnɛyɛ, Yaccu yaajjin te pwana tolan agi, “Ɛlɔy, Ɛlɔy, lama cabaktani?” (Te jyek Mabaan agi, “Jwaŋ ‘ya, Jwaŋ ‘ya, i ‘ya dalna ogo?”) ³⁵ Ɔci maka yɔdi wɛnan gɛɛg tieŋŋin, ɔci ɛkkɛn gɔki agi, “Tieŋdɛ! Ɛkɛ boor Iliiya.” ³⁶ Ɔci men gɛɛl yiŋi, ɔci ɛkɛ liipa olnɛ mooyti, ɔci liipa neeniyɛ, umnɛ jaan tukɛti, ɔci laŋnɛ ñaalɔ Yaccuti aŋka ɛkɛ motti. Ɔci ‘wana neeni gɔki te yaalg agi, “Yɔɔddɛ lakun! Ikin gɔrtin ne Iliiya bɛɛdi, ɛkɛ oodɛ iñɔ te kakantiy!” ³⁷ Ɔci Yaccu yaajjin te pwana tolan, ɔci ɛkɛ tuuni. ³⁸ Ɔci bworŋa ŋaaptan ma ñaalɔ on Juaŋ ona tolanyɛ, ɛkɛ ḍañi jitin te ñaalɔ wyeñɛti ne iñɔ ɔɔn. ³⁹ Ḍuaŋa ackan gɛɛl bala yɔɔd Yaccu ñamɛti, ɔci ne ɛkɛ gɔrni Yaccu tuuni a ɔɔnyɛ, ɛkɛ gɔki agi, “‘wana neeniyɛ, ɛkɛ a Kaci Jwaŋa Tolan awarɛ, hay!” ⁴⁰ Ɔci moong gɛɛg daŋkun bala yɔdi gɔṭi te nona loonan. Gena Moryam Magdalin, ɔci Moryam mɛy Yaakub Ḍiɛran ɔci Yuocipn, ɔci Calɔɔmɛ bala daŋkun. ⁴¹ Ɔci ne Yaccu baali ban Jaliilyɛ, moonga neeni bala booti ɛkɛti moki ɛkɛ. Ɔci moonga pookɛn moonga coŋin bala yɔdi gɔṭi daŋkun. Ɛkkɛn bɛɛn te ban Urcaliim iki Yaccu. ⁴² Ne oŋ waŋɛ noŋi utti te Oŋŋa Yɔŋki Ma Waak Acaan Oŋ Cabityɛ, ⁴³ Yuocip men ma Ɛrimatiiya, ɛkɛ ati Bilaatucti, ɔci tooccin ɛkɛti te war Yaccu acaan ɛkɛ buagɔn Yaccu jogdɛ ne pɛñan wona men Oŋ Cabit bɛɛni bɛɛy. Yuocip neeniyɛ, ɛkɛ a men Maka Gɔṭi jiek iki maka ḍwaŋin daŋkun. Ɔci ma waakɛnda yomgɛn pwanna pwani ɛkɛti. Ɔci ɛkɛ bala kɛɛy bɛɛn cyɛgji Jwaŋa Tolan daŋkun. ⁴⁴ Ɔci Bilaatuc konɛ buañi ɔci gɔkcin agi, “Yaccu tuun doki lakun a ɔki?” Ɔci ɛkɛ gɔki agi dala ḍuaŋa ackan bɛɛdɔ ɛkɛti. Ɔci ḍuaŋa ackan ati ɛkɛti. Ɔci Bilaatuc tooccin ḍuaŋa ackanti te Yaccu agi, “Ɛkɛ tuun men boki?” ⁴⁵ Ɔci ne Bilaatuc tieŋni jyek ḍuaŋa ackan agi Yaccu tuunɔ dokiyɛ, ɛkɛ Yuocip ‘wonnɛ war Yaccu. ⁴⁶ Ɔci Yuocip wɛɛṭi bworŋa woonɛ bworŋa tɛyan, ɔci war Yaccu owwɛ ma iñɔ te kakanti, ɔci ɛkɛ paarŋɛ te bworŋa tɛyan neeni. Ɔci ɛkɛ war Yaccu joŋnɛ koolji. Gena kola wɔrŋɛ Yuocip poom konɛtiy. Ɛkɛ bala ba on ṭɔɔlɛ ɔɔn. Ɔci ɛkɛ poom gɛɛl olnɛ kool tukɛti. ⁴⁷ Moryam Magdalin ɔci Moryam a mɛy Yuocipn, ɛkkɛn bala gɔṭi, ɔci ɛkkɛn war Yaccu yuarcɛ nona niiñkiti may.

¹ Ɔci ne Oŋ Cabit noŋi bɛɛdi borayɛ, ɔci ne Oŋ Juaŋ cɔɔlniyɛ, Moryam Magdalin ɔci Moryam mɛy Yaakubn ɔci Calɔɔmɛ, ɛkkɛn ati wɛɛṭi elin acaan juottan Yaccu warɛti. ² Ɔci te Oŋ Juaŋ te liidi ṭɔɔlɛ ḍiɛran, ne oŋ waŋɛ luonni bora men bɛɛyɛ, moonga neeni ati kool wyeñɛti. ³ Ɔci ɛkkɛn bala gɔwwi yɔtin pookɛn agi, “Poma niin kool tukɛti neeni, ɛkɛ ñiiddɛ menɛ ɔntɔ yeti?” ⁴ Ɔci ɛkkɛn ne gɔrki kooltiyɛ, ɛkkɛn kool yuarcɛ ne niini a pɔggɔny. Guonan ñiinnɛ menga ɔntɔ doki. Guonan neeniyɛ, ɛkɛ tolla a tollo. ⁵ Ɔci ne ɛkkɛn kaacki jiju kooljiyɛ, malɛɛka bala ba ‘wana ḍiɛran gɛɛl yuarɛ ɛkkɛn bala ciyi kool taaŋɛti te taaŋŋa byerɔn. Ɛkɛ bala ɛŋi bworŋa galdan dɛki ne bɔwan, ɔci moong buayi ɛkɛ. ⁶ Ɔci ɛkɛ gɔkcin ɛkkɛnti agi, “Naa ɛkkɛ yomgɔ buayi bɛɛ! Ɛkkɛ lieṭɛ Yaccu men ban Najarɛt, mena ŋaapci ma ñaalɔy. Ɛkɛ jɔŋŋin ñaalɔ doki. Ɛkɛ bala wɛnni moki bɛɛ! Gɔrtɛ nona ɛkɛ niinkiti may. ⁷ Gɔṭṭɛ, ɔgdɛ ooddɛ, maka laldɛ Yaccu myettɛ, ɔci Butruc myettɛ daŋkun, Yaccu botcin ñamu ban Jaliil. Ɔci ɛkɛ mɔktɛ ɛkkɛ aŋan bala ba jyeka ɛkkɛ myennɛ ɛkɛ te ñamuy.” ⁸ Ɔci moong kooyin bora te koolji, ɔci ɛkkɛn yiŋi ɔntɔ te kool wyeñɛti, acaan ɛkkɛn waakɛn ḍiedan. Ɛkkɛn yomgɛn buañi ne pɛñan. Ɔci ɛkkɛn men gɛɛl myetki yomu te naŋka neeni bɛɛ, acaan ɛkkɛn buayi. [ ⁹ Ɔci te Oŋ Juaŋ te liid ṭɔɔl ḍiɛran, ne Yaccu jɔŋni ñaalɔ te koolji tɛɛti mokiyɛ, ɛkɛ warɛ lɛɛlnɛ bora ñamu Moryam Magdalinti. Moryam neeniyɛ, gena mena pɔŋnɛ Yaccu te jɔkin yeyin a dɔɔyɔ wyetkɛn ne yyɛɛwɔy. ¹⁰ Ɔci maka bala i Yaccu te ñamuyɛ, ɛkkɛn yomgɛn yeyɔ, ɔci ɛkkɛn bala wiak men. Ɔci Moryam ati ɛkkɛn myennɛ. ¹¹ Yeti ne ɛkkɛn tieŋki jiek agi Yaccu baalɔ tɛɛtɔ, ɔci yuarnda ɛktayɛ, ɛkkɛn tieki jyeti jyek ɛkɛ bɛɛ. ¹² Ɔci ne baaṭi moki, ɛkɛ warɛ lɛɛlnɛ bora maka ne yyɛɛwɔti te wara parɛ ne ɛkkɛn balki atki bora pɔɔjɔy. ¹³ Ɔci maka neeni dɔɔkkin ma ɛkkɛnti, ɔci Ma Kiṭɔ myetkɛ ɛkkɛn, yeti ɛkkɛn jyeti jyek ɛkkɛn bɛɛ. ¹⁴ Ɔci ne baaṭi moki ɛkɛ warɛ lɛɛlnɛ bora Maka A Inyaakkɛn Wilin Ne Cyɛɛlɔti, ne ɛkkɛn balki omki, ɔci ɛkɛ gɔkcin ne pɛñan ɛkkɛnti te wyeñ tɛɛn ɛkkɛn, ɔci te jyeni booji ɛkkɛn te jɔŋŋin ɛkɛ jɔŋni ñaalɔ te koolji tɛɛti moki, ɔci te yuarŋa ɛkɛ yuarkiti may, acaan ɛkkɛn myetkɛ ma, yeti ɛkkɛn jyeti jyek ɛkkɛn bɛɛ. ¹⁵ Ɔci ɛkɛ gɔkcin ɛkkɛnti agi, “Dala ɛkkɛ ɔgdɛ ooddɛ baan konɛti warda, ɔci dala ɛkkɛ lortɛ ma waakɛnda te jyeka wonkɛn jyeka pwadin neeni. ¹⁶ Maka jyeddi jyeka neeni, ɔci ɛkkɛn bultan mayɛ, ɛkkɛn yɔɔdɛ Juaŋo. Maka jyeddi jyeka neeniti bɛɛyɛ, jiek bɛya ɛkkɛn wyetkɛnti, ɔci ɛkkɛn oltan ma maccu bana yaayan. ¹⁷ Ɔci maka jyeddi ‘yatiyɛ, ɛkkɛn noŋdi naŋka ñyecki ma te yenti ‘ya, ɛkkɛn jɔkin yeyin kootan bora te ma yomgɛnti, ɔci ɛkkɛn gɔkti te tuk maka pookɛn. ¹⁸ Ɔci ɛkkɛn kogi luoltan ñaalɔ te byeŋkɛn ɔci kan ɛkkɛn motti jan lien gɛɛlyɛ, jan lien noŋdi genga ɛkkɛnti bɛɛ. Ɔci ne ɛkkɛn byeŋkɛn topti maka waakɛn yeyintiyɛ, ɛkkɛn waakɛn pwaddi.” ¹⁹ Ɔci ne Ciɛggɔn Yaccu gɔŋni ma ɛkɛti a ɔɔnyɛ, ɛkɛ oŋ eññɛ Juaŋ ñaalɔ pɔliji oŋo. Ɔci ɛkɛ cooccin Weegɛn taaŋɛti taaŋŋa byerɔn. ²⁰ Ɔci maka laldɛ Yaccu ati loṭi ma baan konɛ warda. Ɔci Ciɛggɔn bala moki ɛkkɛn te kanŋa, ɔci jyek ɛkkɛn ŋeecɔn ma a jyeka awarɛ te naŋka naŋtan ɛkkɛn a naŋka tɛyan.]