Matta

Matta

¹ Yeng yɔrg Yaccu Kiṭɔ mena muonɛ bora Jwaŋa Tolany. Ɛkɛ a kɛɛn Daawud mena bɛɛn te kɛɛn Icrayiiltiy. ² Abrahimyɛ, ɛkɛ a wey Icaakn. Ɔci Icaakyɛ, ɛkɛ a wey Yaakubn. Ɔci Yaakubyɛ, ɛkɛ a wey Yahuujan ɔci modg ɛkkɛn. Ɔci Yahuujayɛ, ɛkɛ a wey Pirɛcn ɔci Jiran. (Mɛy ɛkkɛnyɛ, ɛkɛ yenti Tamaar.) Ɔci Pirɛcyɛ, ɛkɛ a wey Acrunn. Ɔci Acrunyɛ, ɛkɛ a wey Aramn. Ɔci Aramyɛ, ɛkɛ a wey Aminadaabn. Ɔci Aminadaabyɛ, ɛkɛ a wey Nacɔɔnn. Ɔci Nacɔɔnyɛ, ɛkɛ a wey Calmɔɔnn. Ɔci Calmɔɔnyɛ, ɛkɛ a wey Bɔwacn. (Mɛy Bɔwacnyɛ, ɛkɛ yenti Rahab.) Ɔci Bɔwacyɛ, ɛkɛ a wey Ɔbɛdn. (Mɛy Ɔbɛdnyɛ, ɛkɛ yenti Ruut.) Ɔci Ɔbɛdyɛ, ɛkɛ a wey Jɛcin. Ɔci Jɛciyɛ, ɛkɛ a wey Daawudn, mena a ḍuaŋa tolan. Ɔci Daawudyɛ, ɛkɛ a wey Cɔlamann. (Mɛy Cɔlamannyɛ, ɛkɛ a ɛŋ Yuraaya ñamu.) ⁷ Ɔci Cɔlamanyɛ, ɛkɛ a wey Rihobɔɔwamn. Ɔci Rihobɔɔwamyɛ, ɛkɛ a wey Abiyan. Ɔci Abiyayɛ, ɛkɛ a wey Acan. Ɔci Acayɛ, ɛkɛ a wey Yahɔɔcapatn. Ɔci Yahɔɔcapatyɛ, ɛkɛ a wey Yuramn. Ɔci Yuramyɛ, ɛkɛ a wey Ojaayan. Ɔci Ojaayayɛ, ɛkɛ a wey Yutamn. Ɔci Yutamyɛ, ɛkɛ a wey Ahacn. Ɔci Ahacyɛ, ɛkɛ a wey Ɛjakaayan. Ɔci Ɛjakaayayɛ, ɛkɛ a wey Manaacan. Ɔci Manaacayɛ, ɛkɛ a wey Amɔɔnn. Ɔci Amɔɔnyɛ, ɛkɛ a wey Yucaayan. Ɔci Yucaayayɛ, ɛkɛ a wey Yukonaayan ɔci modg ɛkkɛn. Yukonaayayɛ, bala ciyi te baaṭi oŋŋa ban Urcaliim lɛɛkkiti ma ɔci ma Icrayiil muokkiti ma eekiti ban Baabily. ¹² Ɔci maka bootti ɛkkɛn ŋotkɛnti bala daŋkun. Yukonaayayɛ, ɛkɛ a wey Caltayiiln. Ɔci Caltayiilyɛ, ɛkɛ a wey Jɛroobabiln. Ɔci Jɛroobabilyɛ, ɛkɛ a wey Abiyahudn. Ɔci Abiyahudyɛ, ɛkɛ a wey Ilaayakimn. Ɔci Ilaayakimyɛ, ɛkɛ a wey Ajurn. Ɔci Ajuryɛ, ɛkɛ a wey Cɛdɔkn. Ɔci Cɛdɔkyɛ, ɛkɛ a wey Ekimn. Ɔci Ekimyɛ, ɛkɛ a wey Ilaayodn. Ɔci Ilaayodyɛ, ɛkɛ a wey Ɛliyeejɛrn. Ɔci Ɛliyeejɛryɛ, ɛkɛ a wey Mattann. Ɔci Mattanyɛ, ɛkɛ a wey Yaakubn. Ɔci Yaakubyɛ, ɛkɛ a wey Yuocipn ‘war Moryam. Ɔci Yaccu mena bartan ma a Kiṭɔyɛ, ɛkɛ jiennɛ Moryam. ¹⁷ Te Abrahimti ne Daawudti ɔɔnyɛ, keedin jitkɛn a inyaakkɛn wyetkɛn ne ŋaanɔ. Ɔci te Daawudti ne oŋŋa ma eekiti ma ban Baabilti ɔɔnyɛ, keedin jitkɛn a inyaakkɛn wyetkɛn ne ŋaanɔ moki. Ɔci te oŋŋa ma eekiti ma ban Baabilti ne oŋŋa Kiṭɔti jietkiti ma ɔɔnyɛ, keedin jitkɛn bala moki a inyaakkɛn wyetkɛn ne ŋaanɔ moki. ¹⁸ Jyek oŋŋa Yaccu Kiṭɔ jietkiti ma bala wɛnni. Mɛy ɛkkɛn Moryam ne ɛkɛ agi ñan Yuocip men, ɔci ne ɛkɛ niinki iki ɛkɛ men bɛɛyɛ, ɛkɛ laaccin te Boŋ Jwaŋa Tolan. ¹⁹ Ɔci ‘war ɛkɛ Yuocipyɛ, naŋki ɛkɛ pwad pwad oŋkanda. Ɔci ɛkɛ poŋi gɔki agi ɛkɛ Moryam daljɛ. Ɛkɛ buagɔn noŋdi godan bɛɛ, acaan ɛkɛ poŋi gɔki agi naa jyeka yeyin bɛɛdɔ Moryamti bɛɛ. ²⁰ Ɔci ne ɛkɛ baali poŋi a ɔɔnyɛ, malɛɛka gɛɛl bɛɛn te Jwaŋa Tolanti ɔci warɛ lɛɛlnɛ bora ɛkɛti te loggin, ɔci gɔkcin ɛkɛti agi, “Yuocip Kaci Daawud ‘ya bɛɛn i eeŋnin jwali te Jwaŋa Tolanti. Naa i lɔɔd te ḍɛɛn Moryam bɛɛ. Dala i ɛkɛ ḍɛya. Kacca bala ɛkɛ konɛti neeniyɛ, bɛɛn amaam bɛɛ. Ɛkɛ bɛɛn te Boŋ Jwaŋa Tolan. ²¹ Ɔci ɛkɛ jieda kacca ‘uano, ɔci ɛkɛ okka i yenti a Yaccu. Ɔci ɛkɛ parɛ ma ɛkkɛn yɔɔdɛ te nɔji ɛkkɛn.” ²² Jyeka neeni waakɛndayɛ, ɛkkɛn bala ba jyeka guaŋŋɛ Juaŋ bɔwa ɛkɛtiy. ²³ Juaŋ gɔki agi, “Gɔṭṭi, ṭɔla niini iki ‘uan gɛɛl bɛɛ neeniyɛ, ɛkɛ laatti ɔci jieda kacca ‘uano. Ɔci kacca neeniyɛ, bartan ma agi Imaanwil.” Imaanwil neeniyɛ, kon ɛkɛ agi, “Jwaŋa Tolan balgin iki ikin.” ²⁴ Ne Yuocip ṭieni te ninktiyɛ, ɛkɛ noŋjin ba jyeka guaŋŋɛ malɛɛka Jwaŋa Tolan ɛkɛti. Ɔci Moryam ḍɛɛnɛ Yuocip aŋi ɛŋ ɛkɛ, ²⁵ yeti ɛkɛ niini iki Moryam bɛɛ. Ɛkɛ cien ɔɔn ne oŋŋa Moryam jienni kaci ɔɔn. Ɔci ne ɛkɛ jienni kacca a ‘uan neeniyɛ, Yuocip ɛkɛ oŋnɛ yenti agi Yaccu.

¹ Yaccu jiedi ma ban Bɛtlaham ban Yahuudiyaji te wɔɔka Hiruuduc mena a ḍuaŋa tolany. Ɔci te wɔɔka wannayɛ, maka ñingɛn tɛyan gɛɛg bɛɛn te nona loonan pɔya tyɛrñanti aŋan. Ɛkkɛn bɛɛn ban Urcaliim. Ɔci ɛkkɛn bala tooci agi, ² “Ba mena jiedi ma aga ḍuaŋa tolan Ma Yahuud neeni bɛ? Acaan ɔɔn kɛɛli ɛkɛ yuarnɔn te ban ɔɔn pɔya tyɛrñanti aŋan. Ɔci ɔɔn bɛɛnɔn aŋka mortɔn ɛkɛti.” ³ Ne Hiruuduc tieŋni jyeka neeniyɛ, ɛkɛ yomɛ yaañi ne tolan acaan ɛkɛ poŋi agi kacca neeni non ɛkɛ mugda agdɔ mena tolan dita. Ɔci ma Urcaliim daŋkun waakɛndayɛ, ɛkkɛn yomgɛn yiegin iki ɛkɛ a cyɛɛlɔ. ⁴ Ɔci ne ɛkɛ maka gaciicin ḍwaŋin Ma Yahuud ɔci maka loṭi worga Juaŋ ḍɔɔlliyɔyɛ, ɛkɛ oŋ tooccin ɛkkɛnti agi, “Worga Jwaŋa Tolan gɔki agi Kiṭɔ jieddɛ ma aŋɛ?” ⁵ Ɔci ɛkkɛn ɛkɛ myetki agi, “Ɛkɛ jiettan ma ban Bɛtlaham ban Yahuudiyaji, acaan jyeka kiinɛ bɔwa Jwaŋa Tolan te baaṭi gɔki agi, ⁶ ‘Hay, i ban Bɛtlaham ban Yahuudiyajiy! I buanki bonka pookɛn bonka ḍwaŋin neeni bɛɛ. Ḍuaŋa tolan gɛɛl bɛya te ma iti. Ɔci ɛkɛ aga mena wɛɛyi ma ‘ya ma Icrayiil neeni.’” ⁷ Ɔci Hiruuduc maka ñingɛn tɛyan neeni bornɛ lieda. Ɔci ɛkkɛn bɛɛn ɛkɛti ɔci ɛkɛ tooccin ɛkkɛnti te jyek oŋŋa ɛkkɛn kɛɛli yuarkiti, aŋka ŋeeddɛ ɛkɛ ne pwadan kacca neeni jiedi ma te tuwa. ⁸ Ɔci ɛkɛ ɛkkɛn cuuññɛ ban Bɛtlaham, ɔci gɔkcin ɛkkɛnti te labji agi, “Ɔgdɛ ooddɛ. Dala ɛkkɛ liertɛ kacca neeni ne pwadan. Ɔci ne ɛkkɛ ɛkɛ yuardiyɛ, dala ɛkkɛ ‘ya eektata jiek aŋka ‘ya daŋkun ootta ɔci morca ɛkɛti.” ⁹ Ɔci ne ɛkkɛn tieŋki jyek ḍuaŋa tolanyɛ, ɛkkɛn atti. Ɔci ɛkkɛn bala gɔṭi kɛɛlla yuarcɛ ɛkkɛn te ban ɛkkɛn pɔya tyɛrñanti aŋany. Ɛkɛ bala ati ɛkkɛn ñomgɛnti, ɔci ɛkɛ ati ne yɔɔnni nona baali kaci ɔɔn. ¹⁰ Ɔci ne ɛkkɛn kɛɛli yuarkiti doki nona yɔɔnni ɛkɛyɛ, ɛkkɛn yomgɛn ñɔɔna ñɔɔn ne tolan. ¹¹ Ɔci ɛkkɛn ati kaaccin orɔ. Ɔci ɛkkɛn kaci yuarɛ iki mɛy ɛkkɛn Moryam. Ɔci ɛkkɛn ḍwoñjin iñɔ ɔci morcin kaciti. Ɔci ɛkkɛn kucin ecki ɛkkɛn waka pwadin pɔɔggɛ tuggɛnti. Ɔci waka pwadin waka wiɛlɛn pɛñan neeni ‘woñgi ɛkkɛn Yaccu a ‘woñgin budan. Gena dahab ɔci ḍɔŋi poom ɔci eelan cyɛyan. ¹² Ɔci ne weenji ɛkkɛn ṭeenɛ Juaŋ te loggin agi naa ɛkki dɔɔdɔ Hiruuducti moki bɛɛ. Ɔci ɛkkɛn ati ban ɛkkɛn te pɔya parɛ. Ati te pɔy ban Hiruuducn bɛɛ. ¹³ Ɔci ne ɛkkɛn atki dokiyɛ, malɛɛka gɛɛl cuonnɛ Jwaŋa Tolan Yuocipti te loggin moki. Ɔci ɛkɛ gɔkcin Yuocipti agi, “Jɔŋŋa ñaalɔ ne pɛñan kaci eya i mɛɛgɛn ɛkkɛ yooŋdɛ ban Macor. Ɔci dala ɛkkɛ ciedɛ aŋan ne oŋŋa i myettin te woon ɔɔn. Acaan Hiruuduc bala lieṭi kaci aŋka kaci nogdɛ.” ¹⁴ Ɔci Yuocip jɔŋŋin ñaalɔ, ɔci ɛkɛ kaci eññɛ i mɛɛgɛn te weenji ɔɔn. Ɛkkɛn ati ban Macor. ¹⁵ Ɔci ɛkkɛn cien aŋan ɔɔn ne Hiruuduc tuuni ɔɔn. Naŋka neeni bala a ɔɔn aŋka jyeka guaŋŋɛ bɔwa Jwaŋa Tolan te bɛɛn Yaccu neeni bɛya bora. Bɔwa Jwaŋa Tolan gɔki agi, “Kaci ‘ya owwan ‘ya bora te ban Macor.” ¹⁶ Ɔci ne wɔɔka beññiyɛ, Hiruuduc bala poŋi jiek gɔki agi, “Ma boki bɛya pɔya ‘yati wɛnnɛ? Hay! ‘Ya naŋka ma ñin, hay!” Ɔci ɛkɛ bala looñi ne tolan. Ɔci ɛkɛ ma cuuññɛ agi ma ɔgdɔ ooddɔ ban Bɛtlaham agi kɛɛgin ḍyɛrin nogdɛ ma waakcinda. Kan kɛɛgin yuongɛn a yyɛɛwɔyɛ, ɛkkɛn nogdɛ, ɔci kan kɛɛgin yuongɛn a yyɛɛwɔ men bɛɛyɛ, ɛkkɛn nogdɛ waakɛnda ɔɔn ban Bɛtlaham, ɔci bonka ban Bɛtlaham toŋkɛti daŋkun. Hiruuduc gɔki a ɔɔn acaan yuong bɛɛn bora ne yyɛɛwɔ doki te oŋŋa maka ñingɛn tɛyan neeni kɛɛli yuarkitiy. ¹⁷ Ɔci naŋka neeni bala a ɔɔn aŋka jyeka guaŋŋɛ bɔwa Jwaŋa Tolan bɔwa yenti Jɛramaaya te ma Icrayiil neeni bɛya bora. Jɛramaaya gɔki agi, ¹⁸ “Ɔci pwan tieŋji ma te ban Raama ne yaadi ne tolany. Rahiil bala wiak te kɛɛgin ɛkɛ, ɔci ɛkɛ bala wiak a joon ɔɔn, mwondi bɛɛ, acaan kɛɛgin baaw tuuni.” ¹⁹ Ɔci ne Hiruuduc tuuniyɛ, malɛɛka Jwaŋa Tolan warɛ lɛɛlnɛ bora Yuocipti te loggin ban Macor ɔci gɔkcin ɛkɛti agi, ²⁰ “Jɔlla ñaalɔ waru ywaŋa ɔci kaci eya i mɛɛgɛn ɔci ooddɛ dɔɔdɛ ban ma Icrayiil. Maka bala lieṭi kaci aŋka buagɔn ɛkɛ noktanyɛ, ɛkkɛn tuun doki, yoñ gɛɛl bala moki bɛɛ.” ²¹ Ɔci ɛkɛ jɔllin ñaalɔ ɔci ɛkɛ kaci eññɛ iki mɛɛgɛn ɔci ɛkkɛn ati ban ma Icrayiil. ²² Ɔci ne Yuocip tieŋni agi Arkilawuc aŋŋɔ ḍuaŋa tolan ban Yahuudiya, ɔci coonnɔ non weegdan Hiruuducyɛ, ɛkɛ buayi woon ban Yahuudiya. Ɔci ɛkɛ myennɛ Juaŋ te loggin ɔci ɛkɛ ati bana parɛ, nona tolan nona yenti Jaliil. ²³ Ɔci ɛkɛ ati bala ciyi ban Najarɛt. Te naŋka neeniyɛ, jyeka guaŋŋɛ bɔwa Jwaŋa Tolan te Yaccu bɛɛn bora agi, “Ɛkɛ bartan ma a men maka ban Najarɛt.”

¹ Te oŋŋa wannayɛ, Yɔhanna Mena Buoṭi Ma neeniyɛ, ɛkɛ bala loṭi ma wɔɔŋji ban Yahuudiya. ² Ɔci ɛkɛ gɔki agi, “Dala ɛkkɛ wiaktɛ te nɔji ɛkkɛ ɔci waakɔ yaldɛ acaan cyɛgji Jwaŋa Tolan cɔɔllin doki.” ³ Yɔhanna neeniyɛ, ɛkɛ a mena guaŋŋɛ Juaŋ te tuk Icaaya, mena a bɔwa Jwaŋa Tolan agi, “Pwan men gɛɛl yaaddi wɔɔŋji gɔki agi, ‘Dala ɛkkɛ waakɔ ywaŋdɛ te bɛɛna bɛɛdɛ ḍuaŋa neeni. Dala pɔɔk ywaŋdɛ te bɛɛn ɛkɛ nina ne pwadan.’ ” ⁴ Bworŋin Yɔhanna naŋɛ ma te jyeyi kolŋan. Ɔci buarñan ɛkɛ bala ḍyɛgdɛ tɛyɛti. Ɔci ɛkɛ bala omi ṭooŋgi ɔci cyeñ daŋkun. ⁵ Ma Urcaliim, ɔci Ma Yahuudiya, ɔci maka bala non Tol Urdunyɛ, ɛkkɛn ɔɔccin ɛkɛti waakɛnda. ⁶ Ɛkkɛn bala lɛɛṭi nɔji ɛkkɛn bora. Ɔci ɛkkɛn buullɛ Yɔhanna Tol Urdun. ⁷ Ɔci ne ɛkɛ baali buoṭi mayɛ, ma Pɛriciin ɔci ma Cadyuciin bɛɛn ne coŋɔn buagɔn buldɛ ɛkɛ daŋkun. Yeti ŋeejɛ ɛkɛ ɛkkɛn waakɛn yali awarɛ te nɔji ɛkkɛn bɛɛ. Te wɛnni ɛkɛ gɔkcin ɛkkɛnti agi, “Ɛkkɛ agɛ laaban ba koggo hay! A menɛ ɛkkɛ myennɛ agi ɛkkɛ yooŋjɛ ɔntɔ te ywobja bɛya neenitiy? ⁸ Kan ɛkkɛ waakɔ yallɛ awarɛyɛ, dala naŋka naŋdɛ ɛkkɛ bala ba naŋki maka waakɛn yali awarɛ. ⁹ Ɔci naa ɛkkɛ poŋdɛ yomgɔti gɔktɛ agi ɛkkɛ uddɛ acaan Abrahim a yɔr ɛkkɛ bɛɛ. Juaŋ yaakinti noŋdi gwoyi ṭɔlgɛn aga kɛɛgin Abrahim! ¹⁰ Acca ma bala tɔɔyi janga ṭɔlgɛn baaw te bɛɛkkɛnti doki, ɔci ɛkkɛ maka bala ba janga jied ṭɔlgɛn ne pwadan bɛɛ neeniyɛ, ɛkkɛ tɔɔttɛ Jwaŋa Tolan ɔntɔ, ɔci yiɛptɛ ɛkɛ maccu. ¹¹ “Maka waakɛn yali dokiyɛ, ‘ya buor ɛkkɛn te pieg budan. Yeti men gɛɛl bala bɛya ‘ya ŋoyutiyɛ, ɛkɛ tolcin te ‘ya. ‘Ya baal ba wɛyi ɛkɛ lulda eeda ‘ya byeŋkuti bɛɛ. Maka bootti ɛkɛtiyɛ, ɛkkɛn buldɛ ɛkɛ te Boŋ Jwaŋa Tolan. Yeti maka yookɔn ɔci bootti ɛkɛti bɛɛyɛ, ɛkkɛn tondɛ ɛkɛ maaño. ¹² Ɔci ne ɛkɛ bɛɛdiyɛ, ɛkɛ etti lɔɔlla bieŋɛti. Ɔci ɛkɛ tiitk kiɛptɛ ɔntɔ, ɔci ɛkɛ pok woodgɛn oldɛ jiju twoñji, ɔci tiitk tondɛ maaño. Ɔci maña neeni baadi ywongati bɛɛ.” ¹³ Ɔci ne naŋka neeni baaniyɛ, Yaccu jɔŋŋin te ban Jaliil, ɔci ɛkɛ ati non Tol Urdun nona baali Yɔhanna aŋka ɛkɛ buldɛ Yɔhanna. ¹⁴ Ɔci Yɔhanna kɛkcin ɛkɛti agi, “I bɛɛni buagi buldin ‘ya ogo? Dala ‘ya aŋka bulda i!” ¹⁵ Ɔci Yaccu ṭwokcin ɛkɛti agi, “Dala ‘ya bulda i acca aŋka ikin noŋtin ba naŋka ṭagdɛ Jwaŋa Tolan.” Ɔci Yaccu oŋ buullɛ ɛkɛ oŋo. ¹⁶ Ne Yaccu buullɛ Yɔhanna dokiyɛ, ɛkɛ kooyin bora te pietin kwaccin bɛɛ, ɔci ɛkɛ gɔrcin pɔli warɛ pɔŋnɛ, ɔci Boŋ Jwaŋa Tolan bɛɛn peewin iñɔ ba boom ɔɔn ɔci cooccin ɛkɛti. ¹⁷ Ɔci pwan Jwaŋa Tolan bɛɛn te ñaalɔ pɔliji gɔki agi, “Mena neeniyɛ, ɛkɛ a Kaci ‘ya Kacca ana ‘yay. ‘Ya yomu pwanna pwani te ɛkɛ.”

¹ Ɔci Yaccu wɛɛññɛ Boŋ Jwaŋa Tolan bora wɔɔŋji aŋka ɛkɛ pɔɔdɛ Jwaŋa Yaayan. ² Ɔci ne Yaccu baali bora aŋan nink a ma baan ne yyɛɛwɔyɛ, (40) ɛkɛ ammɛ koñ acaan ɛkɛ ati budan te oomdin. ³ Ɔci mena mooṭi ma bɛɛn ɛkɛti ɔci gɔkcin ɛkɛti agi, “Kan i a Kaci Jwaŋa Tolan awarɛyɛ, dala i gwoyi ṭɔlgɛn neeni agayɔ aga oomdin poca.” ⁴ Ɔci Yaccu ṭwokcin ɛkɛti agi, “A’a, ‘ya noŋja a ɔɔn bɛɛ, acaan jyeka kiigin gɔki agi, ‘Ma ciyi tɛɛti te oomdin pookɛn budan bɛɛ. Ma ciyi tɛɛti te jyeka bɛya te Jwaŋa Tolanti waakɛnda.’” ⁵ Ɔci Jwaŋa Yaayan neeniyɛ, ɛkɛ Yaccu eññɛ bana bartan ma a Urcaliim bana pwadan. Ɔci ɛkɛ Yaccu yɔɔnnɛ ñaalɔ nona buoran on Juaŋ ona tolan neeni wyeñɛti. ⁶ Ɔci ɛkɛ gɔkcin agi, “Gɔṭṭi, ‘ya buaga gɔrca! Kan i a Kaci Jwaŋa Tolan awarɛyɛ, dala i waru yiebba iñɔ. Acaan jyeka kiigin gɔki agi, ‘Malɛɛkan ‘wondɛ Juaŋ kanŋa aŋka dala ɛkkɛn gɔṭi i. I makti malɛɛkan, ɔci i tworti pomk bɛɛ.’” ⁷ Ɔci Yaccu gɔkcin ɛkɛti agi, “‘Ya gɔkka iti moki jyeka kiigin gɔki agi, ‘Naa i poci Ciɛggɔn i Jwaŋa Tolan bɛɛ.’” ⁸ Ɔci Jwaŋa Yaayan moki Yaccu eññɛ ɔci yɔɔnnɛ ñaalɔ poma beyanti. Ɔci ɛkɛ Yaccu lɛɛrnɛ bonk waakɛnda baan konɛ warda ne ɛkkɛn pwatki a pwaniy. ⁹ Ɔci ɛkɛ gɔkcin Yaccuti agi, “Kan i ḍwoñja iñɔ ɔci morca ‘yatiyɛ, i ‘wondin ‘ya waka neeni waakɛnda, ɔci i agdi ḍuaŋa ɛkkɛn waakɛnda.” ¹⁰ Ɔci Yaccu gɔkcin ɛkɛti agi, “Hay Jwaŋa Yaayan, dala i ɔgdi ootta ɔntɔ te ‘yati wɛnni. Acaan jyeka kiigin gɔki agi, ‘Dala i morca gena Ciɛggɔn i Jwaŋa Tolanti parɛ. Dala i noŋja kanŋa ɛkɛ parɛ.’” ¹¹ Ɔci Jwaŋa Yaayan Yaccu dalnɛ, ɔci ɛkɛ ati, ɔci malɛɛkan gɛɛg bɛɛn ɔci Yaccu magɛ. ¹² Ɔci ne Yaccu tieŋni agi Yɔhanna muŋŋɛ mayɛ, ɛkɛ dɔɔki ban Jaliilji. ¹³ Ɛkɛ ban Najarɛt dalnɛ, ɔci ɛkɛ ati cooccin Kapɛrnyamji Galŋ Jaliil ḍwaŋɛti. (Kapɛrnyam neeniyɛ, ɛkɛ cualcin ban Jɛbuluun ɔci ban Naptaliti.) ¹⁴ Te coodi Yaccu aŋanyɛ, jyeka kiinɛ Icaaya mena a bɔwa Jwaŋa Tolan te bonka neeni bɛɛn bora. Ɛkɛ gɔki agi, ¹⁵ “Bonk kɛɛn Jɛbuluun ɔci bonk kɛɛn Naptali bonka pɔya eetan ma Galŋ Jaliil ḍɔɔggɛti. Ɛkkɛn looncin ɔntɔ te Tol Urdunti. Ɛkkɛn bala nona tolan, nona yenti Jaliil. Bonk ɛkkɛnyɛ, a bonka cieki Keedin Pookɛn. ¹⁶ Maka bala ciyi te nona mielti neeniyɛ, maña dɛki ne tolan yuarɛ ɛkkɛn dɛki ɛkkɛnti doki. Ɔci maka bala ciyi non lien nona ulanti neeniyɛ, noon bɔɔn ɛkkɛnti doki.” ¹⁷ Ɔci te oŋŋa wannayɛ, Yaccu poccin lorcin ma agi, “Dala ɛkkɛ waakɔ yaldɛ acaan cyɛgji Jwaŋa Tolan cɔɔllin doki.” ¹⁸ Ɔci oŋ gɛɛlti Yaccu bala ati goṭi Galŋ Jaliil ḍwaŋɛti. Ɔci ɛkɛ magga yuarŋɛ ɛkɛ ne yyɛɛwɔ a modin. Gena Cimaan mena bartan ma a Butruc, ɔci mod ɛkkɛn Andarawuc, ɛkkɛn mɔŋnɛ ɛkɛ bala wiewi morin galŋji, acaan ɛkkɛn a ma yako. ¹⁹ Ɔci Yaccu gɔkcin ɛkkɛnti agi, “Bɛɛdɛ boottɛ ‘yati. Ɔci ‘ya ɛkkɛ naŋdin agdɛ maka etti ma ‘yati te jyek ‘ya.” ²⁰ Ɔci te oŋŋa wannayɛ, ɛkkɛn kanŋa ɛkkɛn dalji, ɔci ɛkkɛn ati bootcin Yaccuti. ²¹ Ɔci ne Yaccu atti ñamu ne ḍyɛṭ ṭɔɔlɛyɛ, ɔci ɛkɛ ma gɛɛg mɔŋnɛ. Gena Jɛbadi i kɛɛgin ɛkɛ Yaakub ɔci Yɔhanna. Ɛkkɛn mɔŋnɛ ɛkɛ bala yɔŋi morin murka konɛti. Ɔci ɛkɛ ɛkkɛn bornɛ. Gena Yaakub kaci Jɛbadi, ɔci mod ɛkkɛn Yɔhanna. Ɛkkɛn bala murkaji i wey ɛkkɛn Jɛbadi. ²² Ɔci te oŋŋa wannayɛ, ɛkkɛn murka ɛkkɛn dalji, ɔci wey ɛkkɛn moki dalji. Ɔci ɛkkɛn bootcin Yaccuti. ²³ Ɔci Yaccu ati bonka bala non Jaliil neeni boonnɛji waakɛnda. Ɔci ɛkɛ bala loṭi ma te jyeka wonkɛn jyeka pwadin oorga morki ma Juaŋo, ɔci loṭi ma te jyek cyɛgji Juaŋo. Ɔci ɛkɛ moki maka balki wajan ywaŋŋɛyɔ waakɛnda. ²⁴ Ɔci jyek ɛkɛ ati ban Cuurya konɛ warda. Ɔci maka waakɛn yeyin eyɛ ma nona Yaccuti. Maka eyɛ ma nona Yaccuti neeniyɛ, wajan jitkɛn a ḍiɛkan bɛɛ. Ma gɛɛg muogɛ jɔkin yeyin, ɔci gɛɛg naŋi amji leyi, ɔci gɛɛg bɔggɛn iin ɔci gɛɛg omgɛn iini. Ɔci maka neeni ywaŋŋɛ Yaccu waakɛnda. ²⁵ Ɔci aŋan ban Jaliilyɛ, ma bɛɛn boottin ɛkɛti a ḍiɛkan bɛɛ, kɔɔna kɔɔnno. Ma gɛɛg bɛɛn te ban Jaliil, ɔci gɛɛg bɛɛn te nona bartan ma a Bonka Ne Inyaakkɛn neeni, ɔci gɛɛg bɛɛn te ban Urcaliim, ɔci gɛɛg bɛɛn te bonka bala kuocɔ Tol Urdun pɔya bɛɛdi oŋ te liidɔy.

¹ Ne ɛkɛ gɔrni maka coŋin yuartɛ bɛɛti ɛkɛtiyɛ, ɛkɛ ati ñaalɔ poom wyeñɛti. Ɔci ne ɛkɛ coonni iñɔ aŋanyɛ, maka laldɛ ɛkɛ bɛɛn nona ɛkɛti. ² Ɔci Yaccu bala loṭi ɛkkɛn agi, ³ “Maka poŋi gɔki agi ɛkkɛn a maka ḍyɛrin, acaan jyek Juaŋ ɛkkɛntiyɛ, ɛkkɛn yomgɛn pwanna pwanno, acaan ɛkkɛn aga ma cyɛgji Jwaŋa Tolan awarɛ. ⁴ Maka wiak te nɔjiyɛ, ɛkkɛn yomgɛn pwaddi te muni Juaŋ ɛkkɛnti. ⁵ Maka loomgɛn tɛyanyɛ, ɛkkɛn yomgɛn pwanna pwanno, acaan ne baaṭi bonka iñɔ ṭɛɛrji wɛnniyɛ, muktan ɛkkɛn byeŋkɛnti. ⁶ Maka buagɔn naŋka pwadin ne pɛñanyɛ, ɛkkɛn yomgɛn pwanna pwanno, acaan naŋka pwadin neeni yuartan ɛkkɛn te Jwaŋa Tolanti. ⁷ Maka yomg ɛkkɛn pɔktan maka pookɛntiyɛ, ɛkkɛn yomgɛn pwanna pwanno, acaan ne baaṭi Jwaŋa Tolan yomɛ pɔktɛ ɛkkɛnti daŋkun. ⁸ Maka balki paŋŋa yaayan gɛɛl yomgɛnti bɛɛyɛ, ɛkkɛn yomgɛn pwanna pwanno, acaan ne baaṭi ɛkkɛn Juaŋ yuartan te woŋgɛn. ⁹ Maka yɔŋi jyek maka yoyi ñin aŋka jiek baatiyɛ, maka neeni yomgɛn pwanna pwanno. Ɛkkɛn bardɛ Jwaŋa Tolan a kɛɛgin ɛkɛ. ¹⁰ Maka balki taab te naŋka naŋtan ɛkkɛn pwadin neeniyɛ, ɛkkɛn yomgɛn pwanna pwanno. Ɛkkɛn aga ma cyɛgji Jwaŋa Tolan awarɛ. ¹¹ Kan ma ḍor ɛkkɛ ɔci noŋdi ne yaayan ɛkkɛti, ɔci ɛkkɛ jomtɛyɔ te jyeka coŋin acaan ɛkkɛ aŋŋɛ ma ‘yayɛ, ɛkkɛ yomgɔ pwanna pwanno. ¹² Dala ɛkkɛ gɔktɛ jiek te yoma pwadan. Dala ɛkkɛ yomgɔ ñɔya. Acaan ne ɛkkɛ ooddɛ bana ñaalɔ pɔlijiyɛ, waka pwadin yuardɛ ɛkkɛ te taab ɛkkɛ neeni. Maka a bɔwan Jwaŋa Tolan te baaṭiyɛ, ɛkkɛn naŋɛ ma ne yaayan a ɔɔn daŋkun. A ɔŋŋiyɛ, dala ɛkkɛ yomgɔ tɛya ɔci lɔktɛ ba naŋki ɛkkɛn. ¹³ “Ɛkkɛ agɛ toli killan iñɔ baanji wɛnni. Yeti kan toli poli dokiyɛ, ɛkɛ moki coda a ɔki? Ɛkɛ yɔmdi te genga moki bɛɛ. Ɛkɛ paktan ma ɔntɔ te wɛɛlji, ɔci moortan ma iñɔ ciegɛnti. ¹⁴ “Ɛkkɛ agɛ maña dɛki iñɔ baanji wɛnni. Kan bana tolan bala poom wyeñɛtiyɛ, ma yaakinti oorg coktanyɔ boki? ¹⁵ Kan men gɛɛl dyɛka tondɛ maañyɛ, dyɛka kwomdɛwi ɛkɛ te piil boki? Hayɛllɛ! Dyɛka ḍuattɛ ɛkɛ ñaalɔ nona ḍɔcki ma ɛkɛ aŋka ɛkɛ on jiñɛ dyɛgdɛ warda. ¹⁶ Ɔci ɛkkɛyɛ, ɛkkɛ balgɛ ba dyɛka. Dala mañ ɛkkɛ dɛkti ma ñomgɛnti ne pwadan. Ɔci a ɔɔnyɛ, ɛkkɛn gɔrti naŋki ɛkkɛ naŋka pwadin. Ɔci ŋeettan ɛkkɛn ɛkkɛ noŋɛ naŋka neeni aŋka Jwaŋa Tolan yomɛ pwada. Ɔci ɛkkɛn jieddi Wey ɛkkɛ, mena bala ñaalɔ pɔliji neeniy. ¹⁷ “Ɛkkɛ ma gɛɛg kaapun poŋi gɔki agi ‘ya bɛɛn aŋka dala jyek ganuun ɔci jyek maka a bɔwan Jwaŋa Tolan baadi kaapun no. A’a. ‘Ya bɛɛn aŋka ma jyek ganuun daltan te tiid waakɛn bɛɛ. Yeti ‘ya bɛɛn aŋka jyeka lorki Muuca i maka a bɔwan Jwaŋa Tolan te bɛɛn ‘ya neeni lɛɛlla bora. ¹⁸ Tieŋdɛ ɛkkɛ myettin ne pwadan. Jyeka bala worga ganuun Jwaŋa Tolanji waakɛndayɛ, ɛkkɛn yɔɔda bɛɛ, ɛkkɛn ‘uotti ñamu ne jyeka guaktan ɛkkɛn neeni bɛɛtɛ bora awarɛ ɔɔn. ¹⁹ Kan men gɛɛl jwali Jwaŋa Tolan jwalla ḍiɛran gɛɛl lɛgdɛji ɔci kan ɛkɛ maka pookɛn laldɛ te naŋka neeni daŋkunyɛ, mena neeni ɛkɛ bartan ma a mena ḍiɛran ñaalɔ pɔliji ban cyɛgji Jwaŋa Tolan. Yeti mena noŋi ba jyek Jwaŋa Tolan ɔci ɛkɛ maka pookɛn laldɛ aŋka noŋdi ba jyeka neeni daŋkunyɛ, ɛkɛ aga mena tolan non cyɛgji Jwaŋa Tolan. ²⁰ “Tieŋdɛ, dala ɛkkɛ bwagdɛ naŋka Juaŋ yomɛ pwaddɛ ne pɛñan aŋka ɛkkɛ kaattɛ non cyɛgji Juaŋo. Dala bwakta maka loṭi worga Juaŋ ɔci ma Pɛriciin buakkɛti noŋtɛ ne pwadan Juaŋtiyɛ, bwandɛ bwakta ɛkkɛ buakkɛ noŋdɛ ne pwadan Juaŋtiy. ²¹ “Ɛkkɛ tieŋnɛ ne Jiek gɔkki agi, ‘Naa i menga noga bɛɛ.’ Agi kan i menga nogjiyɛ, ne godan baldi jiek oltan ma i wyeñuti. ²² Yeti ‘ya gɔkka ɛkkɛti waakida, kan men gɛɛl ɛkkɛti looñi moodɛntiyɛ, maka gɔṭi jiek yaakinti jiek oltan ɛkɛ wyeñɛti. Ɔci kan men gɛɛl wooki mod ɛkkɛnyɛ, maka gɔṭi jiek yaakinti jiek oltan ɛkɛ wyeñɛti. Ɔci kan men gɛɛl mod ɛkkɛn bardɛ agi amgɔnyɛ, dala ɛkɛ waŋɛ tiittɛ te jyek bana maaño. ²³ “Kan i orniti gena ɛrki ma waak Juaŋti, ɔci kan i noŋ ḍɔcca gen Juaŋti budanyɛ, ɔci kan i poŋni yomuti agi mod ɛkkɛ gɛɛl looñi iti te gengayɛ, ²⁴ dala gena ooni i Juaŋti neeni naa ḍuacca men bɛɛ. Ɔci dala i ootta jiek ywaŋdɛ iki mod ɛkkɛ neeni. Ɔci i oŋ ootta Juaŋ ‘woñga gena i ɛkɛ eeŋni neeni oŋo. ²⁵ “Kan men gɛɛl buagɔn godan iki iyɛ, ɔci ne ɛkkɛ balgɛ atɛ yomu menyɛ, dala i pocca gɔkca ɛkɛti, dala ɛkkɛ jiek ywaŋdɛ, aŋka naa i eedi ɛkɛ nona noŋki ma godan bɛɛ. Kan i eedi ɛkɛ aŋanyɛ, ḍuaŋa godan gɔkti bɔlinti, ɔci i eedi oldi ɛkɛ ciginji. ²⁶ ’Ya gɔkka iti awarɛ ka i kooya bora ne pɛñan te ciginji bɛɛ. Yeti ne i bilk ‘wondi mena neeni waakɛnda ba dɛn iyɛ, ɔci i yaakiti kooya bora oŋo. ²⁷ “Ɛkkɛ tieŋnɛ ne Jiek gɔkki agi, ‘Naa ɛkkɛ noŋdɛ tomi bɛɛ.’ ²⁸ Yeti ‘ya gɔkka ɛkkɛti ka kan mena ‘uan gɔrti ɛŋ mena parɛti ɔci yom ɛkɛ buagɔn ɛkɛyɛ, a ɔŋŋiyɛ, ɛkɛ noŋi tomi ɛɛŋti doki yomɛti. ²⁹ Dala te i waŋu lɔlni bora ñamu wona i noŋdi nɔji men bɛɛy. Kan nɔji bala iti te naŋki waŋ i waŋa byerɔnyɛ, dala i ɛkɛ dɔdda bora, ɔci ɛkɛ yiɛpca ɔntɔ. Kan war i warda ooddi maccu te gena naŋŋɛ waŋ i neeniyɛ, a ɔɔn yaayɛ ne tolan. ³⁰ Dala te i bieŋu ŋunni ɔntɔ ñamu wona i noŋdi nɔji men bɛɛy. Ɔci kan nɔji bala iti te naŋki byeŋ i byeŋa byerɔnyɛ, dala i ɛkɛ ŋutca ɔntɔ ɔci yiɛpca ɔntɔ. Kan war i warda ooddi maccu te gena naŋŋɛ byeŋ i neeniyɛ, a ɔɔn pwatcin bɛɛ. ³¹ “Jiek gɔki moki agi, ‘Kan men gɛɛl ɛŋ ɛkɛ daldɛyɛ, dala ɛkkɛn byeŋkɛn tantan ɔci dala ɛkɛ ɛɛŋ ‘wondɛ worga doortin bieŋɛti.’ ³² Yeti ‘ya gɔkka ɛkkɛti, kan ɛɛŋ noŋi tomi bɛɛ, ɔci kan ɛkɛ daldɛ ‘war ɛkɛ te jwalla parɛ gɛɛlyɛ, a ɔɔnyɛ, ɛkɛ ɛɛŋ naŋŋɛ a ɛŋa toban doki kan ɛkɛ ḍɛɛtan ma mokiy. Ɔci kan ɛɛŋ dalnɛ ‘war ɛkɛ a ɔɔnyɛ, ɔci kan ‘wana parɛ ɛŋa neeni ḍɛɛdɛyɛ, ‘wana parɛ neeni noŋi tomi daŋkun. ³³ “Ɔci moki ɛkkɛ tieŋnɛ ne jiek gɔkki agi, ‘Naa ɛkkɛ jwali gɛɛl ḍuadɛ te yenti Juaŋ oŋ daldɛ te naŋki bɛɛ, yeti dala ɛkkɛ waka aalti ɛkkɛ Juaŋti naŋdɛ awarɛ.’ ³⁴ Yeti ‘ya gɔkka ɛkkɛti ka naa naŋka neeni bala ɛkkɛti bɛɛ. Naa ɛkkɛ aaltɛ te yenti pɔlla ñaalɔ bɛɛ, acaan pɔlla ñaalɔ neeniyɛ, gena nona ciyi Jwaŋa Tolan. ³⁵ Ɔci moki naa ɛkkɛ aaltɛ te yenti ṭɛra iñɔ wɛnni bɛɛ, acaan ṭɛra iñɔ neeniyɛ, gena nona ḍɔcci Juaŋ cieg ɛkɛ. Ɔci moki naa ɛkkɛ aaltɛ te yenti ban Urcaliim bɛɛ. Acaan Urcaliim neeniyɛ, ɛkɛ a ban ḍuaŋa tolan. ³⁶ Ɔci moki naa ɛkkɛ gɔktɛ genga awarɛ te wyetk ɛkkɛ bɛɛ. Acaan ɛkkɛ yaakɛti jieñan gɛɛl naŋdɛ aŋka bɔwa walla ula bɛɛ. ³⁷ Ne ɛkkɛ gɔktɛ jiekyɛ, dala ɛkkɛ gɔktɛ ne pwadan. Kan ‘Ɛɛ’, walla ‘A’a’. Jyeka pookɛnyɛ, ɛkkɛn bɛya te Jwaŋa Yaayanti. ³⁸ “Ɛkkɛ tieŋnɛ Jiek ne Jiek gɔkki agi, ‘Kan men gɛɛl waŋɛ yaañi te naŋki mena parɛyɛ, dala mena parɛ neeni yaatan ma waŋɛti daŋkun. Ɔci walla kan gena men lɛŋñɛ yaañi te naŋki mena parɛyɛ, dala mena parɛ neeni yaatan ma lɛŋñɛti daŋkun.’ ³⁹ Yeti ‘ya gɔkka ɛkkɛti kan men gɛɛl noŋi ne yaayan itiyɛ, naa i agdi mena yoyi ñin iki ɛkɛ bɛɛ. Kan men gɛɛl i jyɛbdi taaŋŋa byerɔntiyɛ, dala i taaŋŋa parɛ yalja daŋkun aŋka jyɛbdi ɛkɛ moki. ⁴⁰ Ɔci kan men gɛɛl i ‘yertiti te bworŋ iyɛ, dala ɛkɛ bworŋa parɛ bworŋ jwami eedɛ ɛkɛ daŋkun. ⁴¹ Ɔci kan men gɛɛl ‘yeṭi i agi i ɛkɛ ‘yeetka pɔɔjɔ ba wɔɔka ne cyɛɛlɔyɛ, dala i ɛkɛ ‘yeetka wɔɔkan ne yyɛɛwɔ. ⁴² Kan men gɛɛl buagɔn i ɛkɛ ‘woñga genga budanyɛ, dala i ɛkɛ ‘woñga ɔɔn. Ɔci kan men gɛɛl buagɔn i ɛkɛ ɔɔtka gengayɛ, naa i kɛkca ɛkɛti bɛɛ. ⁴³ “Ɛkkɛ tieŋnɛ ne jiek gɔkki agi, ‘Dala i anji maka ciejji iki i’ ɔci agi ‘i yojji ñin iki gena mena yojji ñin iki iy.’ ⁴⁴ Yeti ‘ya gɔkka ɛkkɛti, dala ɛkkɛ andɛ maka yoyyi ñin iki ɛkkɛy, ɔci dala ɛkkɛ cɔktɛ Juaŋti te maka noŋi ne yaayan ɛkkɛti neeni. ⁴⁵ Ɔci te naŋka pwadan neeniyɛ, pwani ɛkkɛ gorti bora ba Wey ɛkkɛ ñaalɔ pɔliji. Te naŋki ɛkɛyɛ, oŋ waŋɛ bala dɛki maka yeyinti ɔci maka pwadinti daŋkun. Ɔci ɛkɛ ñaal cuondɛ mati waakɛnda daŋkun, maka pwadinti ɔci maka yeyinti. ⁴⁶ Kan i an mena ani iyɛ, a ɔɔn a genga boki? I gena pwadan yuara te anna neeni boki? Maka a ɛyi lyemi tulba, (maka yooktan ñin ma neeni) ɛkkɛn yaakinti naŋka neeni daŋkun. ⁴⁷ Ɔci kan i ñiep a modg ɛkkɛ pookɛnyɛ, naŋki i neeni pwatcin te naŋki maka pookɛn boki? Maka kɛɛna pookɛn noŋi a ɔɔn bɛɛ? ⁴⁸ Gɔṭṭɛ, ɛkkɛyɛ, dala yomg ɛkkɛ kuma te ani ba yom Wey ɛkkɛ ñaalɔ pɔliji ɔɔn.

¹ “Tieŋdɛ ‘wota, naa ɛkkɛ noŋɛ naŋki ɛkkɛ naŋka pwadin neeni ma ñingɛnti budan bɛɛ. Kan ɛkkɛ noŋɛ a ɔɔnyɛ, ne baaṭi Wey ɛkkɛ ñaalɔ pɔlijiyɛ, ɛkɛ ɛkkɛ ‘wondɛ genga te naŋki ɛkkɛ moki bɛɛ. ² “Kan ma ‘wondɛ ɛkkɛ waak a ‘woñgin budanyɛ, naa ɛkkɛn ‘wondɛ ba ‘woñgin maka noŋi ma ñingɛn neeni bɛɛ. Ma gɛɛgyɛ, ɛkkɛn ma ‘wontan waak a ‘woñgin oorga morki ma Juaŋti ɔci bora moki. Yeti ɛkkɛn ma ‘wontan waka neeni te yoma awarɛ bɛɛ. Ɛkkɛn noŋi a ɔɔn acaan ɛkkɛn buagɔn dala ma jieddi ɛkkɛn. Maka neeni ‘wondɛ Juaŋ genga te naŋki ɛkkɛn neeni bɛɛ. Jiɛta ɛkkɛn buagiti aŋka jiɛtiti ma wanna aŋi ba gen ɛkkɛn doki. ³ Kan ɛkkɛ ma ‘wondɛ waak a ‘woñgin budanyɛ, dala ɛkkɛ ɛkkɛn ‘wondɛ lieda ɔɔn. ⁴ Ɔci kan a ɔɔnyɛ, Wey ɛkkɛ mena naŋka bala iñɔ ŋeejɛyɛ, ɛkɛ ɛkkɛ ‘wondɛ waka pwadin te naŋki ɛkkɛ neeni. ⁵ “Tieŋdɛ ‘wota, ne ɛkkɛ cɔkɛyɛ, naa ɛkkɛ cɔkɛ ba maka noŋi ma ñingɛn neeni bɛɛ. Ɛkkɛn ani naŋki ɛkkɛn. Ɛkkɛn yɔɔtti ñaalɔ oorga morki ma Juaŋti ɔci bora daŋkun, ɔci ɛkkɛn cɔkti ma ñomgɛnti ɔɔn. Ɛkkɛn buagɔn dala ɛkkɛn yuartan ma ne ɛkkɛn cɔkki ɔɔn. Awarɛ, maka neeni ‘wondɛ Juaŋ genga te naŋki ɛkkɛn neeni bɛɛ. Jiɛta ɛkkɛn buagiti aŋka jiɛtiti ma wanna aŋi ba gen ɛkkɛn doki. ⁶ Yeti ne i cɔktiyɛ, dala i ootta orɔ on i ɔci i on tukɛ ciekca, ɔci i oŋ cɔkca Wey ɛkkɛ mena yuartan ma te woŋgɛn bɛɛ neeniti. Ɔci Wey ɛkkɛ mena waka korkɛn a coggin neeni yuartɛjiyɛ, ɛkɛ i ‘wondi waka pwadin. ⁷ “Ɔci ne i cɔktiyɛ, naa i gɔkca jyeka coŋin jyeka budan neeni bɛɛ. Ma gɛɛg noŋi a ɔɔn acaan ɛkkɛn poŋi gɔki agi kan ɛkkɛn gɔktinti jyeka coŋinyɛ, Jwaŋa Tolan tieŋdɔ. ⁸ Naa i noŋja ba naŋki ɛkkɛn neeni bɛɛ. Dala i cɔkca te jiek korka wɔkin budan. Waka baaw itiyɛ, ne i toonni Wey ɛkkɛti te ɛkkɛn men bɛɛyɛ, ŋeejɛ ɛkɛ doki ne waka neeni baaki iti ɔɔn. ⁹ Dala i cɔkca a ɔɔn agi, ‘Wey ɔɔn, Weya ñaalɔ pɔliji, dala yenti i tola. ¹⁰ Dala ma gɔrti i a Ciɛggɔn Tolan noon warda. Dala naŋka ṭaga i naŋayɛ, dala naŋa iñɔ baanji wɛnni bala ba naŋka naŋŋi i ñaalɔ pɔliji. ¹¹ Ɔɔn ‘wondɔn oomdin te oŋŋa neeni. ¹² Ɔci ɔɔn bɔɔktɔn te nɔji ɔɔn, bala ba maka pookɛn bɔɔktɔn ɔɔn te nɔjja naŋtan ɛkkɛn ɔɔnti. ¹³ Naa ɔɔn daldɔn ooddɔn non jyeka yeyinti bɛɛ. Dala i ɔɔn magdɔn te Mena Yaayan neeni. (Acaan i a Ciɛggɔn Tolan noon warda, ɔci naŋka tɛyan bala iti. Ɔci pwani i moki bala. Ɔci waka neeni bala oŋkanda, baadi bɛɛ. Amɛɛn.)’ ¹⁴ “Ba jyek cɔŋŋa neeniyɛ, kan ɛkkɛ ma bɔɔktɛ te jyeka damtan ɛkkɛn ɛkkɛtiyɛ, ɔci ɛkkɛ daŋkun bɔɔktɛ Wey ɛkkɛ Weya ñaalɔ pɔliji. ¹⁵ Kan ɛkkɛ ma bɔɔktɛ bɛɛyɛ, ɔci ɛkkɛ da bɔɔktɛ Wey ikin Weya ñaalɔ neeni daŋkun bɛɛ. ¹⁶ “Tieŋdɛ ‘wota, ma gɛɛgyɛ, ɛkkɛn noŋi ma ñingɛn. Ne ɛkkɛn gworki koñyɛ, ɛkkɛn ñingɛn a cungin acaan ɛkkɛn buagɔn dala taab ɛkkɛn ŋeettan ma waakɛnda ne ɛkkɛn gworki koñy. Ɛkkɛn ‘wondɛ Juaŋ genga te naŋki ɛkkɛn neeni bɛɛ. Jiɛta ɛkkɛn buagiti aŋka jiɛtiti ma wanna aŋi ba gen ɛkkɛn doki. ¹⁷ Yeti kan ɛkkɛ gwoṭɛ koñyɛ, naa ɛkkɛ ñingɔ a cungin bɛɛ, dala ɛkkɛ jyeyi biidɛ, ɔci ñingɔ kuodɛ. ¹⁸ Acaan naa gworŋ koñ neeni ŋeettan ma agi ɛkkɛ gworcɛ koñ bɛɛ. Dala ŋeeddɛ gena Wey ɛkkɛ mena yuartan ma te woŋgɛn bɛɛ neeni parɛ. Ɔci a ɔɔnyɛ, Wey ɛkkɛ mena waka korkɛn a coggin yuartɛji waakɛnda neeniyɛ, ɛkɛ ɛkkɛ ‘wondɛ waka pwadin te naŋki ɛkkɛ neeni. ¹⁹ “Gɔṭṭɛ moki, naa yomg ɛkkɛ buagɔn ḍɔci waka coŋin waka pwadin wak ṭɛɛr wyeñɛ bɛɛ. Iñɔ ṭɛɛrji wɛnniyɛ, waak amdɛ bɔŋni ɔci dalŋaañan, ɔci moki kaltan maka ɛyi maka kaatti oorgti amaam neeni. ²⁰ Dala ɛkkɛ aŋka ḍɔccɛ waak ñaalɔ ban Jwaŋa Tolan. Waak amdɛ bɔŋni aŋan bɛɛ, walla amtan dalŋaañan bɛɛ, ɔci maka ɛyi kaatti aŋan koṭi waak bɛɛ. ²¹ Nona ḍɔccɛ ɛkkɛ waakyɛ, ɛkkɛ yomgɔ bala aŋan daŋkun ne tolan. ²² “Woŋgi i ñoṭi noon ñortan war i warda. ²³ Kan woŋgi i gɔṭi ne pwadanyɛ, war i yaakinti nona oddɛ ŋeeddɛ. Kan woŋgi i pwadɔ bɛɛyɛ, war i nona oddɛ ŋeeddɛ bɛɛ. ²⁴ “Mena noŋi kanŋa yaakinti tieŋdi jyek weyyɛn ne yyɛɛwɔ bɛɛ. Ɛkɛ dita yooktan te jyek weya parɛ neeni dita, ɔci andi gena jyek weya parɛ neeni dita. A ɔŋŋiyɛ, ɛkkɛ yaakɛti noŋdɛ ba jyek Jwaŋa Tolan yaakkɛn iki jyek yoma buagɔn waka budan neeni bɛɛ. ²⁵ “Yeti ‘ya ɛkkɛ myettin, dala ɛkkɛ paŋi jiek daldɛ te jyek coodi ɛkkɛ wɛnni, ɔci te jyek waka amdɛ ɛkkɛ, ɔci te jyek waka maaddɛ ɛkkɛ, ɔci te jyek bworŋin waak ɛkkɛ. Yeti dala ɛkkɛ yomgɔ ḍuattɛ gena Juaŋti acaan waka neeni ɛkkɛn a waka bala ñamu aŋka ɛkkɛ woŋgɔ caŋdɛ te ɛkkɛn bɛɛ. Jwaŋa Tolan yaakinti ɛkkɛ ‘wondɛ ɛkkɛn. Yeti tɛɛtin aŋka yɔmjin ne tolan te oomdin. Ɔci war aŋka yɔmjin ne tolan te bworŋin. ²⁶ Gɔṭṭɛ, ḍiirga peyi ñaalɔ neeniyɛ, ɛkkɛn dwoki pok bɛɛ. Ɔci ɛkkɛn ɛṭi pok bɛɛ. Ɔci ɛkkɛn pok ḍuattan tuotk jitin bɛɛ. Yeti Wey ɛkkɛ ñaalɔ pɔlijiyɛ, ɛkɛ ɛkkɛn ‘wondɛ waka amtan ɛkkɛn oŋkanda. Oŋ ɛkkɛ, ɛkkɛ pwadgɛ Juaŋti ne tolan te ḍiirg bɛɛ? ²⁷ Ɔci moki men gɛɛl ɛkkɛti yaakinti tɛɛtin ɛkɛ ‘uottɛti parɛ te paŋi jiek boki? ²⁸ “Ɛkkɛ poŋɛ jiek te waka ‘yɛŋdɛ ɛkkɛ ogo? Dala ɛkkɛ poŋdɛ te jyek pɛɛppin. Ɛkkɛn noŋi kanŋa bɛɛ. Ɛkkɛn wieyi twalg bɛɛ, yeti ɛkkɛn pwanna pwanno. ²⁹ Cɔlamanyɛ, ɛkɛ bala ɛŋi bworŋin pwadin ne tolan, yeti ɛkɛ buanɛ pɛɛppin te pwanno. ³⁰ Hay, ɛkkɛ, maka jyettɛ jyek Juaŋ ne ḍiɛran ṭɔɔlɛ budan nɛ, tieŋdɛ poca! Pɛɛppinyɛ, ɛkkɛn bala luom jitin, ɔci kan luom iin dokiyɛ, ɛkɛ tontan ma maañ ɔci pɛɛppin ḍakti ne pɛñan doki. Ɔci kan Juaŋ waka ḍyɛrin neeni naŋdɛ ɛkɛ pwanna pwani a ɔɔnyɛ, oŋ ɛkkɛ daŋkun, ɛkkɛ ‘wondɛ ɛkɛ waka ‘yɛŋdɛ ɛkkɛ bɛɛ? ³¹ “Jyek waka amdɛ ɛkkɛ, ɔci jyek waka maaddɛ ɛkkɛ, ɔci jyek waka ‘yɛŋdɛ ɛkkɛyɛ, naa paŋi ɛkkɛn bala ñamu ɛkkɛ yomgɔti bɛɛ. Naa ɛkkɛ yomgɔ wiak te jyek waka neeni bɛɛ. ³² (Maka a ma Juaŋ bɛɛyɛ, ɛkkɛn lieṭi waka neeni ne tolan.) Yeti ɛkkɛyɛ, kan waka neeni baaw ɛkkɛtiyɛ, ŋeejɛ Wey ɛkkɛ ñaalɔ pɔliji, ne waka neeni baaki ɔɔn. Ɔci ŋeejɛ ɛkɛ ɛkkɛ yaakɛti ciyɛ budan te waka neeni bɛɛ. ³³ Dala ɛkkɛ liertɛ jyek cyɛgji Jwaŋa Tolan ñamu, ɔci jyek naŋki ɛkɛ, naŋka pwadin neeni. Ɔci ɛkɛ ɛkkɛ ‘wondɛ waka ciedɛ ɛkkɛ neeni waakɛnda daŋkun. ³⁴ “A ɔŋŋiyɛ, naa ɛkkɛ poŋɛ cooŋɛ ñingɔ te jyeka ne liidɔ bɛɛ. Acaan ne liidɔ Jwaŋa Tolan ɛkkɛ ‘wondɛ waka ɛkkɛ buagɛ daŋkun. Oŋki waakɛndayɛ, yɔmjin menga da te paŋi ɛkɛ. Juaŋ ɛkkɛ magdɛ te naŋka bɛya ɛkkɛtiy.

¹ “Naa ɛkkɛ wookɛ ma te yomgɔti bɛɛ. Kan ɛkkɛ wookɛ ma te yomgɔti bɛɛyɛ, ɔci ɛkkɛ da waagdɛ Jwaŋa Tolan bɛɛ. ² Kan ɛkkɛ wookɛ ma te yomg ɛkkɛyɛ, ɔci ɛkkɛ da waagdɛ Juaŋ a ɔɔn daŋkun. Ba naŋka naŋdɛ ɛkkɛ matiyɛ, ɔci ɛkkɛ da naŋdɛ Juaŋ a ɔɔn daŋkun. ³ “Te gena yeti i gɔr gena ḍiɛran neeni mod ɛkkɛ waŋɛti, ɔci gena tolan niin i waŋuti dalja a ɔɔn wannay? ⁴ Te gena yeti i gɔk mod ɛkkɛti agi, ‘Mod ɔɔn, i bɛɛd wɛnni, ‘ya gena bala i waŋuti ḍiɛran neeni owwa bora,’ ne gena tolan bala niin i waŋuti men ɔɔny? ⁵ Naa i agdi laaban a ɔɔn bɛɛ, hay! Gena tolan i waŋuti neeni owwa i bora ñamu bɛɛ? Ɔci i yaaktiti gwali, ɔci i oŋ gena bala mod ɛkkɛ waŋɛti neeni oodi bora oŋo. ⁶ “Naa ɛkkɛ loṭɛ maka yeyin ba gɔki neeni bɛɛ, ɛkkɛn dita dɔɔkti ɛkkɛ ḍɔɔggɔti, ɔci ɛkkɛ kootɛ ɛkkɛn ba gɔkko. Naa ɛkkɛ loṭɛ maka wyetkɛn baaw ba kwotin neeni bɛɛ. Ɛkkɛn dita jiek kuoltanji ɔci waaktan te wyeñ boojo. ⁷ “Gɔṭṭɛ moki, ‘ya ɛkkɛ myettin moki, dala ɛkkɛ cɔktɛ Jwaŋa Tolanti te gena ɛkkɛ buagɛy. Ɛkɛ a mena yomɛ pwadany, ɛkɛ ɛkkɛ ‘wondɛ gena ɛkkɛ buagɛy. Dala ɛkkɛ toottɛ ɔɔn. Naa ɛkkɛ waakɔ pola te taat bɛɛ. Ɔci moki kan gena yaayan gɛɛl bɛɛn ɛkkɛ ḍɔɔggɔtiyɛ, dala ɛkkɛ toottɛ ɛkɛti aŋka ɛkɛ ɛkkɛ ‘wondɛ ñing tɛɛno. Ɔci kan gen gɛɛl ɛkkɛ kɛgdɛ pɔy ɛkɛjiyɛ, ɛkɛ ɛkkɛ magdɛ, ɔci ɛkɛ gena wanna uuttɛ ɔntɔ te pɔɔjɔ. ⁹ Men gɛɛl boki ɛkkɛti wɛnni, ne kaci ɛkɛ tootti ɛkɛti te amy, ɛkɛ kaci ‘wondɛ gena guonan boki? ¹⁰ Ɔci walla kan kaci tooci te yeñña ‘yɛɛgɔn ɔci ɛkɛ kaci ‘wondɛ gena kaaŋɔ? ¹¹ Oŋ ɛkkɛ, ɛkkɛ agɛ maka yeyin, yeti ɛkkɛ yaakɛti kɛɛgin ɛkkɛ ‘wondɛ waka pwadin. Oŋ Wey ɛkkɛ ñaalɔ pɔliji kan ma tooci ɛkɛti te waka pwadiny, ɛkɛ yaakinti ɛkkɛn ‘wondɛ waka pwadin bɛɛ? Waka ‘wontan ma baan kɛɛgin bwantan waka ma ‘wondɛ Juaŋ neeni. ¹² “Tieŋdɛ ‘wota, kan naŋka naŋtan ma gɛɛl yaayɛ itiyɛ, naa i noŋja a ɔɔn maka pookɛnti bɛɛ. Dala i noŋja ne pwadan ɛkkɛnti daŋkun ɔɔn. A ɔɔnyɛ, gena jyek ganuun Muuca ɔci jyeka lorki maka a bɔwan Jwaŋa Tolan kon ɛkkɛn neeni. ¹³ “Gɔṭṭɛ moki, dala ɛkkɛ kaattɛ pɔy Juaŋ te pɔy tuka ḍiɛran. Pɔy tuka tolanyɛ, ɛkɛ da parɛ. Ɛkɛ goob gob ne tolan, ɔci woon milla mili ɛkɛti. Pɔya neeniyɛ, gena pɔya eetan ma ɔci ḍakti may. Ɔci maka bala pɔya neenitiyɛ, ɛkkɛn kɔɔna kɔɔnno. ¹⁴ Pɔya eetan ma ɔci utti ma neeniyɛ, tuk ɛkɛ ḍiɛrŋa ḍyɛrŋo. Ɔci won ɛkɛ tɛy tɛyo. Ɔci maka pɔya neeni yuarɛ dokiyɛ, ɛkkɛn a ḍiɛkan ṭɔlgɛn budan. ¹⁵ “Dala ɛkkɛ woŋgɔ tiittɛ te maka jomi jiek agi ɛkkɛn aginti bɔwan Jwaŋa Tolany. Ɛkkɛn bɛya ɛkkɛti ɔci gɔkti ɛkkɛti te lɛmma pwadan, yeti yomg ɛkkɛntiyɛ, ɛkkɛn a ywobko. Ɛkkɛn noŋi ba ɛkkɛn pwatki ba kulin ɔɔn. Yeti ɛkkɛn pwadɔ bɛɛ. Ɛkkɛn a ywobk ba bowin. ¹⁶ Ɔci ba jang ne ŋeeckiti ma te ṭɔlg ɛkkɛnyɛ, ɔci maka neeni ŋeeddɛ ɛkkɛ daŋkun te naŋki ɛkkɛn. Luutkin ṭɔlgɛn pwontan ma te toonti boki? Maka neeni noŋi naŋka pwadan gɛɛl bɛɛ. Ɔci ŋuap ṭɔlgɛn pwontan ma te janga balki kuwiti boki? ¹⁷ Janga pwadin waakɛndayɛ, ɛkkɛn etti ṭɔlga pwadin. Ɔci janga yeyinyɛ, ɛkkɛn etti ṭɔlga yeyin daŋkun. ¹⁸ Jana pwadanyɛ, ɛkɛ etti ṭɔlga yeyin bɛɛ. Jana yaayanyɛ, ɛkɛ etti ṭɔlga pwadin bɛɛ. ¹⁹ Jang waakɛndayɛ, ɛkkin pwadin ŋeecɔn ma ɔci ɛkkin yeyin ŋeecɔn ma te ṭɔlga jiettan ɛkkɛny. Ɔci a ɔɔnyɛ, ma ŋeecɔn ma daŋkun te naŋki ɛkkɛn. Kan jang gɛɛg jied ṭɔlgɛn ne pwadan bɛɛyɛ, ɛkkɛn tɔɔttan ma iñɔ ɔci oltan ma maccu. ²¹ “Maka boṭi ‘ya te tuggɛn budan agi, ‘Ciɛggɔnyɛ’, ɛkkɛn waakɛnda aga ma cyɛgji Jwaŋa Tolan awarɛ bɛɛ. Gena maka noŋi ba yom Wey ɔɔn ñaalɔ pɔliji ɛkkɛn aŋka a ma cyɛgji Jwaŋa Tolany. ²² Ɔci te oŋŋa bɛya wanna ma gɛɛg gɔkti ‘yati agi, ‘I Ciɛggɔn, pari ɔɔn balgɔn loṭɔn ma te yenti i bɛɛ? Ɔci moki balgɔn koocɔn jɔkin yeyin bora ɔci noŋɔn naŋka tɛyan naŋka pookɛn te yenti i bɛɛ?’ ²³ Ɔci ‘ya gɔkca ɛkkɛnti ka ‘Ɛkkɛ ŋeejin ‘ya oŋgati a ma ‘ya bɛɛ. Ɛkkɛ maka ani naŋka yeyin nɛ, dala ɛkkɛ ɔgdɛ ooddɛ ɔntɔ te ‘yati wɛnni!’ ²⁴ “Tieŋdɛ jwalla ne ŋoyɔy, kan mena bala tyeŋi jyek ‘yayɛ, ɔci kan ɛkɛ noŋi ba jyeka loṭa ‘ya ma neeniyɛ, ɛkɛ bala ba ‘wana ñingɛ tɛyan. ‘Wana neeni on tuaŋŋɛ eññɛ ne iñɔ byɛliti. ²⁵ Ɔci ñaal bɛɛn ɔci jali yoŋŋin. Ɔci jwami bala wuopi ne tolan. Yeti on ḍɛmmin bɛɛ, acaan on tuaŋŋɛ weegɛn eññɛ ne iñɔ byɛliti. ²⁶ “Kan mena bala tyeŋi jyek ‘yayɛ, ɔci kan ɛkɛ noŋi ba jyeka loṭa ‘ya ma neeni bɛɛyɛ, ɛkɛ bala ba mena cɔti on ɛkɛ nona ŋɔmiti acaan ɛkɛ ñingɛ tɛy tɛy bɛɛ. ²⁷ Ɔci ñaal bɛɛn ɔci jali yoŋŋin. Ɔci jwami bala wuopi ɔci bala jiebi ono. Ɔci on ḍɛmmin iñɔ ne pɛñan, ɔci ḍakcin warda doki.” ²⁸ Ɔci ne Yaccu ḍookki te jyeka neeniyɛ, ɔci polla tolan neeniyɛ, ɛkkɛn buañi te jyeka loṭi ɛkɛ ma neeni. ²⁹ Ɔci ma korkɛn buañi acaan ɛkɛ bala loṭi ma ba mena war tɛɛn bala ɛkɛ bieŋɛti. Lali ɛkɛ bala ba lali ma ɛkkɛn maka loṭi worga Juaŋ neeni bɛɛ.

¹ Ɔci ne Yaccu kooni iñɔ te poom wyeñɛtiyɛ, maka coŋin ati bootcin ɛkɛti. ² Ɔci mena naŋŋɛ cyɛc gɛɛl bɛɛn nona Yaccuti ɔci ḍwoñjin iñɔ ɛkɛ ñamɛti, ɔci gɔkcin agi, “I Ciɛggɔn, kan i buagi ‘ya pɔkta te waja neeniyɛ, i yaakiti.” ³ Ɔci Yaccu bieŋɛ laŋnɛ ɛkɛti, ɔci topcin ɛkɛti, ɔci gɔkcin agi, “‘Ya buaga, i ywaŋdin.” Ɔci ne pɛñan mena naŋŋɛ cyɛc neeni warɛ pwani doki. ⁴ Ɔci Yaccu gɔkcin ɛkɛti agi, “Gɔṭṭi, naa i menga myetka bɛɛ. Yeti i ɔgdi ootta, ɔci dala i waru lɛɛrka gaciic. Ɔci dala i ɛkɛ ‘woñga gena guaŋŋɛ Muuca mati agi ‘wondi ma gaciic. Ɔci a ɔŋŋiyɛ, ŋeettan ma i waru pwani te cyɛc awarɛ.” ⁵ Ɔci ne Yaccu dɛnni ban Kapɛrnyamtiyɛ, mena ḍuaŋa ackan gɛɛl bɛɛn ɛkɛti. ⁶ Ɔci gɔkcin ɛkɛti agi, “Ciɛggɔn, mena kanŋan ‘yati bala baanji warɛ yaayɛ. Ɛkɛ warɛ puottin, ɔci ɛkɛ wooci a waañi ne tolan. A ɔŋŋi ‘ya ḍɔn iti, ka da i ɛkɛ ywaŋa.” ⁷ Ɔci Yaccu gɔkcin ɛkɛti agi, “‘Ya bɛɛd ɔci ɛkɛ ywaŋdo.” ⁸ Yeti ḍuaŋa ackan ṭwokcin ɛkɛti agi, “‘Ya a mena ḍiɛran, ɔci i a mena tolan. Acaan a ɔŋŋiyɛ, naa i kaacca on ‘ya on mena ḍiɛran neeni bɛɛ. Acaan ‘ya a genga bɛɛ. Dala i gɔkca jwali te tuk i, ɔci mena kanŋan ‘yati neeni warɛ pwada. ⁹ ’Yayɛ, ma gɛɛg bala ñamu te ‘ya. Ɛkkɛn gɔkti ‘yati, ɔci ‘ya noŋ ba jyek ɛkkɛn. Ɔci ‘ya da balka ackan. ‘Ya a ḍuaŋa ɛkkɛn. Kan ‘ya gɔkca ackan gɛɛlti agi ɛkɛ ooddi noongatiyɛ, ɛkɛ ooddi. Ɔci kan ‘ya gɔkca ackan parɛti agi, ‘I bɛɛd wɛnniyɛ,’ ɛkɛ bɛya. Ɔci mena kanŋan ‘yatiyɛ, kan ‘ya gɔkca ɛkɛti agi, ‘I noŋja a ɔɔnyɛ,’ ɛkɛ noŋdi. A ɔŋŋiyɛ, jwali i tukuyɛ, yɔmjin doki, ɔci mena neeni warɛ pwada doki.” ¹⁰ Ne Yaccu tieŋni jyeka neeniyɛ, ɛkɛ yomɛ buañi, ɔci ɛkɛ gɔkcin maka coŋinti neeni agi, “Hay! Mena jyeti ‘yati ne pwadan ba ‘wana neeniyɛ, gɛɛl yuarŋ ‘ya bɛɛ. Ɔci ma ɔɔn ma Icrayiilyɛ, men gɛɛl jyeti ‘yati ba ‘wana neeni ɔɔn bɛɛ. ¹¹ Tieŋdɛ, ‘ya ɛkkɛ myettin, keedin pookɛn maka coŋinyɛ, gɛɛg bɛya te pɔli ŋwayyɛti waakɛnda, ɔci ɛkkɛn cootti i Abrahim, ɔci Icaak, ɔci Yaakub. Ɛkkɛn cootti iñɔ omdi juma non cyɛgji Jwaŋa Tolan. ¹² Yeti Ma Icrayiil maka te kaatti non cyɛgji Juaŋyɛ, ɛkkɛn aŋka yiɛptɛ Juaŋ ɔntɔ nona ulanti bora. Ɔci ɛkkɛn wiakti, ɔci lɛkɛn tiittanti te yom yoño.” ¹³ Ɔci Yaccu oŋ gɔkcin ḍuaŋa ackanti oŋ agi, “Dala i ɔgdi ootta, ‘ya noŋja naŋka neeni iti, acaan i jyetti doki.” Ɔci mena kanŋa ɛkɛti neeni warɛ pwani doki. ¹⁴ Ɔci ne Yaccu dɛnni on Butructiyɛ, mari Butruc mɔŋnɛ niin iñɔ warɛ yaayɛ. Ɛkɛ warɛ myɛlla myɛllo. ¹⁵ Ɔci Yaccu topcin ɛkɛ bieŋɛti, ɔci ɛkɛ warɛ pwani doki. Ɔci ɛkɛ jɔŋŋin ñaalɔ, ɔci ɛkɛ Yaccu ‘wonnɛ am i maka bɛɛn on ɛkɛti neeniy. ¹⁶ Ɔci ne oŋ waŋɛ unniyɛ, ma eccin maka naŋɛ jɔkin yeyin ne coŋɔn, ɔci te jyek ɛkɛyɛ, ɛkɛ jɔkin yeyin koonɛ bora a ḍiɛkan bɛɛ. Ɔci maka waakɛn yeyinyɛ, ɛkkɛn ywaŋŋɛyɔ ɛkɛ waakɛnda moki. ¹⁷ Naŋka neeni bala te oŋŋa wanna aŋka dala jyeka guaŋŋɛ Icaaya mena a bɔwa Jwaŋa Tolan bɛya bora waakɛnda. Icaaya gɔki agi, “Wajan ikin eññɛ ɛkɛ ɔntɔ ɔci pɛñi ikin eññɛ ɛkɛ ɔntɔ moki.” ¹⁸ Ɔci te oŋa parɛ ne Yaccu gɔrni ma balki bɛɛti ɛkɛti kɔɔnki a kɔɔniyɛ, ɛkɛ gɔkcin maka laldɛ ɛkɛti agi, “Bɛɛdɛ oottin kuocɔ galŋ taaŋŋa parɛti.” ¹⁹ Ɔci mena loṭi worga Juaŋ gɛɛl bɛɛni. Ɔci ɛkɛ gɔkcin Yaccuti agi, “Mena loṭi may, nona i ooddiyɛ, ‘ya bootta iti.” ²⁰ Ɔci Yaccu gɔkcin ɛkɛti agi, “Wɛɛk balki kolka cieki, ɔci ḍiirga peyi ñaalɔ neeniyɛ, ɛkkɛn balki kworkɛn moki. Yeti kan ne ɛkkɛ boottɛ ‘yatiyɛ, ɛkkɛ baltɛ nona ciyɛ ɛkkɛ daŋkun bɛɛ, acaan ‘ya Kaci Ma Baan balka nona niina ‘ya bɛɛ.” ²¹ Ɔci ‘wana parɛ, ‘wana laldɛ Yaccu gɛɛl gɔkcin Yaccuti agi, “‘Ya ootta lakun aŋka ne wey ɔɔn tuudiyɛ, ɛkɛ jokca koolji ñamu, hayya ‘ya oŋ bɛɛd bootta iti oŋo.” ²² Ɔci Yaccu gɔkcin ɛkɛti agi, “Dala i bɛɛd bootta ‘yati acca. Dala ma ɛkkɛn maka baaw jyek Juaŋtiyɛ, dala ɛkkɛn ma gwaltan ne ɛkkɛn tuuti ɔɔn.” ²³ Ɔci Yaccu taapcin murkaji iki maka laldɛ ɛkɛ. ²⁴ Ɔci jwamma tolan bɛɛn mɔṭṭinti ne pɛñan, ɔci pɔɔgi ati murka konɛti. Ɔci te wɔɔka wanna Yaccu bala wicɔ. ²⁵ Ɔci ma bɛɛn ɛkɛti ɔci bala jieci ɛkɛ warɛ agi, “Ciɛggɔn, ɔɔn magdɔn. Ikin ḍaŋnin doki, hay!” ²⁶ Ɔci Yaccu gɔkcin ɛkkɛnti agi, “Ɛkkɛ buayɛ ogo? Ba ɛkkɛ jyettɛ ‘yati ne pwadan bɛ?” Ɔci Yaccu jɔŋŋin ñaalɔ, ɔci ɛkɛ gɔkcin jwamiti ɔci pɔɔgiti, ɔci ɛkkɛn yɔɔnni. Genga bala moki bɛɛ. ²⁷ Ɔci ‘uaya neeni buañi ɔci ɛkkɛn bala gɔwwɔ yɔtin pookɛn agi, “‘Wana neeni tolcin awarɛ hay! Jwami ɔci pɔɔgi tieŋŋin jyek ɛkɛ.” ²⁸ Ɔci ɛkkɛn dɛñjin galŋ kwoña parɛti. Gena ban Gadara. (Bana neeni ma boṭi ‘wota agi Garaca.) Ɔci ne ɛkkɛn tocki borayɛ, ɛkkɛn koogjin iki maka ‘uay gɛɛg ne yyɛɛwɔ. ‘Uaya neeniyɛ, ɛkkɛn muogɛ jɔkin yeyin. Ɛkkɛn bɛɛn te non kolka jokki ma may. Acaan ɛkkɛn a luudginyɛ, ma yaakinti goṭi te pɔya ɛkkɛnti bɛɛ. ²⁹ Ɔci ɛkkɛn yaajjin te pwana tolan agi, “I Kaci Jwaŋa Tolan, i buagi gena ɔɔnti yeti? I bɛɛni noŋ ywobji ɔɔnti ne oŋ ywobji baaw men ɔɔn?” ³⁰ Ɔci poli kwotin polla tolan bala kɛñi luom nona wannati looncin ne ḍiɛran ṭɔɔlɛ. ³¹ Ɔci jɔkin yeyin neeniyɛ, tooccin Yaccuti agi, “Kan i ɔɔn koodɔn borayɛ, dala ɔɔn cundɔn i kwotinti aŋka ɔɔn kaattɔn ɛkkɛnti.” ³² Ɔci Yaccu gɔkcin ɛkkɛnti agi, “Ɔgdɛ ooddɛ.” Ɔci ɛkkɛn kooyin bora te mati, ɔci ɛkkɛn ati kaaccin kwotinti doki. Ɔci poli kwotin neeni ɛkkɛn yoŋŋin te ñaalɔ poom wyeñɛti, ɔci ɛkkɛn ḍɛɛmdin iñɔ galŋji ɔci ḍakcin waakɛnda galŋji. ³³ Ɔci ne maka cieti kwotin neeni gɔrki naŋka neeniyɛ, ɛkkɛn yiŋi baanji bana tolan, ɔci ma myetkɛ te naŋka neeni waakɛnda. Ɔci ɛkkɛn ma myetkɛ te jyek ‘uaya muogɛ jɔkin yeyin neeni daŋkun. ³⁴ Ɔci maka bana tolan neeniyɛ, ɛkkɛn ɔɔccin waakɛnda nona Yaccuti aŋka gɔrti ɛkɛ. Ɔci ne Yaccu yuarkiti ɛkkɛnyɛ, ɛkkɛn gɔkcin ɛkɛti agi, “Dala i ɔgdi ootta te ban ɔɔn wɛnni.”

¹ Ɔci a ɔŋŋiyɛ, Yaccu ati taapcin murkati ɔci totcin bora galŋ kwoña parɛti. Ɔci ɛkɛ ati ban ɛkkɛn ban Kapɛrnyam. ² Ɔci ma gɛɛg bɛɛn kɛṭṭin mena ‘uan gɛɛl te aŋgan. Ɛkɛ a puono. Ɔci ne Yaccu gɔrni jyenna jyetki ɛkkɛn neeniyɛ, ɛkɛ gɔkcin ‘wana warɛ yaayan neeniti agi, “Kaci ‘ya, yomu tieka, i bɔɔŋnin ‘ya te nɔji i doki.” ³ Ɔci maka loṭi worga Juaŋ gɛɛg bala wɛnan daŋkun, ɛkkɛn poŋi jiek yomgɛnti agi, “Mena gɔki ne yaayan neeni a menɛ yeti?” ⁴ Yeti Yaccuyɛ, paŋi ɛkkɛn ŋeejɛ ɛkɛ doki. Ɔci ɛkɛ tooccin ɛkkɛnti agi, “Ɛkkɛ poŋɛ paŋŋa yaayan yomgɔti ogo? ⁵ Kan ‘ya gɔkca agi ɛkɛ bɔɔka ‘ya te nɔji ɛkɛy, ɔci moki kan ‘ya gɔkca ɛkɛti agi dala ɛkɛ jɔŋdi ñaalɔ potti woony, jwali gɛɛl koy koy te jyeka neeniti yaakkɛn boki? ⁶ Dala ŋeeddɛ ɛkkɛ ‘ya Kaci Ma Baan yaakati maka ciyi ṭɛɛrji bɔɔka te nɔji ɛkkɛn.” Ɔci ne Yaccu gɔŋni a ɔɔnyɛ, ɛkɛ warɛ yallɛ ‘wana warɛ yaayanti neeni ɔci gɔkcin ɛkɛti agi, “Jɔŋŋa ñaalɔ, aŋgan lula ɔgdi ootta baanji.” ⁷ Ɔci ɛkɛ jɔŋŋin ñaalɔ aŋgan luullɛ, ɔci ɛkɛ ati baanji. ⁸ Ɔci ne maka coŋin gɔrki naŋka neeniyɛ, ɛkkɛn korkɛn buañi ɔci bala jieyi Jwaŋa Tolan te naŋka tɛyan naŋka ‘wonnɛ ɛkɛ Yaccu neeni. ⁹ Ɔci ne Yaccu jɔŋni te aŋan baali ati goṭi pɔɔjɔyɛ, ɛkɛ mena ‘uan gɛɛl mɔŋnɛ bala ciyi ona ḍɔcki ma tulba. Ɛkɛ yenti Matta. (Ɛkɛ yenti Laawi te tuk Ma Icrayiil.) Ɔci Yaccu gɔkcin ɛkɛti agi, “Bɛɛd, bootta ‘yati.” Ɔci ɛkɛ jɔŋŋin ñaalɔ bootcin Yaccuti. ¹⁰ Ɔci oŋ gɛɛlti ne Yaccu baali ciyi orɔ omiyɛ, maka lyemi tulba bala ciyi omi i ɛkɛ a ḍiɛkan bɛɛ. Ɔci maka pookɛn maka waaktan ma bala daŋkun. Ɛkkɛn bala ciyi iñɔ iki Yaccu iki maka laldɛ ɛkɛ. ¹¹ Ɔci ma Pɛriciin ne ɛkkɛn gɔrki naŋka neeniyɛ, ɛkkɛn gɔkcin maka laldɛ Yaccuti agi, “Mena loṭi ɛkkɛ omi iki maka lyemi tulba ɔci maka yeyin ogo?” ¹² Ɔci ne Yaccu tieŋni jyeka toocki ma neeniyɛ, ɛkɛ gɔkcin mati agi, “Maka waakɛn pwadinyɛ, ɛkkɛn magdɛ kiimi bɛɛ. Gena maka waakɛn yeyin aŋka magdɛ kiimiy. ¹³ Dala ɛkkɛ poŋdɛ te jyeka a kiigin neeni. Jyeka neeni gɔki agi, ‘‘Ya buaga a waka ‘yɛrdɛ ɛkkɛ budan bɛɛ. ‘Ya buaga dala ɛkkɛ yomgɔ pɔktɛ gena mati.’ ‘Ya bɛɛn boor maka pwadin bɛɛ. ‘Ya bɛɛn aŋka ‘ya boor maka nɔɔtko.” ¹⁴ Ɔci maka laldɛ Yɔhannayɛ, ɛkkɛn bɛɛn Yaccuti ɔci tooccin Yaccuti agi, “Ɔɔn ɔci ma Pɛriciinyɛ, ɔɔn gwoṭɔn koñ oŋkanda. Yeti maka lala iyɛ, ɛkkɛn gwoṭi koñ bɛɛ ogo?” ¹⁵ Ɔci Yaccu gɔkcin ɛkkɛnti agi, “‘War ñooniyɛ, kan ɛkɛ bala nona mung ɛkkɛntiyɛ, mung ɛkkɛn neeni kuuyi boki? Hayɛllɛ! ‘Ya baal ba ‘war ñoonno. Yeti ne oŋ gɛɛltiyɛ, ‘war ñooni eetan ma nona parɛ, ɔci ma oŋ gworti koñ oŋo. ¹⁶ “Men gɛɛl yaakinti bworŋ ɛkɛ bworŋa woonɛ ŋwoddɛ jitin ɔci oldɛ ṭuortɛ jibba a daanti boki? Kan ɛkɛ noŋdi a ɔɔnyɛ, ɛkɛ bworŋa daan neeni yaadɛ ne yaajan nɔñji dita. ¹⁷ Ɔci moki, men gɛɛl mooya wonkɛn neeni luaddɛ kucin a donk jitin bɛɛ. Kan men gɛɛl noŋdi a ɔɔnyɛ, ɔci mooya wonkɛn neeniyɛ, kotti ñaalɔ, ɔci kucin ṭontan jitin, ɔci ɛkkɛn ḍakti budan iki kucin ɔɔn. Mooya wonkɛn neeniyɛ, ɛkkɛn oltan ma kucin wonkɛnti oŋkanda ɔɔn. Ɔci mooy nina ne pwadan iki kucin a cyɛɛlɔ.” ¹⁸ Ɔci ne Yaccu baali gɔki te jyeka neeniyɛ, ḍuaŋa gɛɛl yenti Jayroc bɛɛn ɔci morcin ɛkɛti. Ɛkɛ gɔki agi, “Kaci ‘ya, kacca a ɛɛŋ ṭɔɔlɛ, ɛkɛ tuun acca. Yeti dala i bɛɛd topca ɛkɛti te byeŋ i aŋka ɛkɛ ‘uodi.” ¹⁹ Ɔci Yaccu jɔŋŋin ñaalɔ ɔci ati iki ɛkɛ. Ɔci maka laldɛ Yaccu ati daŋkun. ²⁰ Ɔci mena ɛɛŋ gɛɛl bala wooci yimg wɔyi a wɔɔn ba yuong ne inyaakkɛn wyetkɛn ne yyɛɛwɔ. Ɛŋa neeni bɛɛn pɔya Yaccu ŋoyɛti ɔci topcin bworŋ Yaccu lɛkɛti. ²¹ Acaan ɛkɛ bala poŋi yomɛti agi, “Kan ‘ya topca bworŋ Yaccutiyɛ, ‘ya waru pwada lakun.” ²² Ɔci Yaccu warɛ yallɛ ɔci ɛɛŋ yuarnɛ ɛkɛ. Ɔci Yaccu gɔkcin ɛkɛti agi, “Kaci ‘ya, dala i yomu pwada. Te jyenna jyetti i neeniyɛ, i waru pwani doki.” Ɔci ɛɛŋ warɛ pwani doki. ²³ Ɔci ne Yaccu dɛnni on mena a ḍuaŋa neeniyɛ, ɛkɛ ma mɔŋnɛ orɔ a ḍiɛkan bɛɛ. Ma gɛɛg bala kuoti killin, ɔci ma bala wiak a joono. ²⁴ Ɔci Yaccu gɔkcin mati agi, “Dala ɛkkɛ kaattɛ bora te orɔ wɛnni, acaan ṭɔɔl ṭɔɔlɛ neeniyɛ, ɛkɛ tuun awarɛ bɛɛ. Ɛkɛ wiccin a wiccin budan.” Ɔci ɛkkɛn bala lɛɛṭi Yaccu warɛ. ²⁵ Ɔci ne maka coŋin cuuñkiti ma borayɛ, Yaccu kaaccin orɔ ona niini ṭɔɔl ṭɔɔlɛy. Ɔci ɛkɛ muŋŋɛ te bieŋɛ, ɔci ṭɔɔl ṭɔɔlɛ jɔŋŋin ñaalɔ warɛ pwani doki. ²⁶ Ɔci jyek naŋki Yaccu neeni ati baan konɛ warda. ²⁷ Ɔci ne Yaccu baali ati goṭi pɔɔjɔyɛ, maka ‘uay maka ullin ne yyɛɛwɔyɛ, ɛkkɛn bala booti ɛkɛ. Ɔci ɛkkɛn bala boorɔ ɛkɛ agi, “I Yaccu Kaci Daawud, dala i yomu pɔkka ɔɔnti.” ²⁸ Ɔci ne Yaccu atti ɔci kaanni orɔyɛ, maka ullin neeni bɛɛn nona ɛkɛti. Ɔci Yaccu gɔkcin ɛkkɛnti agi, “Ɛkkɛ jyettɛ agi ‘ya yaakati ɛkkɛ pɔktin ñingɔtɛ?” Ɔci ɛkkɛn gɔkcin ɛkɛti agi, “Ɛɛ, Ciɛggɔn, ɔɔn gɔkɔn a ɔɔn.” ²⁹ Ɔci ɛkɛ topcin ɛkkɛn woŋgɛnti, ɔci gɔkcin ɛkkɛnti agi, “Acca dala ɛkkɛ woŋgɔ pɔktɛ te jyenna ɛkkɛ jyettɛ ‘yati neeni.” ³⁰ Ɔci ɛkkɛn ñingɛn pɔkki. Ɔci Yaccu gɔkcin ɛkkɛnti ne pɛñan agi, “Woŋgɔ tiittɛ, acaan naa naŋka neeni ŋeeddɛ menga bɛɛ.” ³¹ Ɔci maka ñingɛn pɔkkɛ neeni ɛkkɛn ati, ɔci jyeka neeni miidɛ amaam ɔci jyek ɛkɛ ati noon warda doki. ³² Ɔci ne maka ywaŋŋɛ Yaccu neeni luorki bora dokiyɛ, ma gɛɛg bɛɛn eccin mena miiŋ nona Yaccuti. Mena neeni a miiŋ acaan ɛkɛ muŋŋɛ jwaŋa yaayan. ³³ Ɔci ne jwaŋa yaayan koonɛ Yaccu borayɛ, ɔci mena ‘uan mena a miiŋ neeniyɛ, ɛkɛ oŋ yaakinti gɔki jiek oŋo. Ɔci maka coŋinyɛ, ɛkkɛn yomgɛn moottin ne pɛñan. Ɛkkɛn gɔki agi, “Bonk ikin bonk ma Icrayiil wɛnniyɛ, men gɛɛl naŋka neeni yuarŋɛ oŋgati boki?” ³⁴ Yeti ma Pɛriciin gɔki agi, “Ɛkɛ jɔkin yeyin koodɛ bora te yenti ciɛggɔn jɔkin yeyin neeni.” ³⁵ Ɔci Yaccu ati bonka ḍwaŋin boonnɛji waakɛnda, ɔci bonka ḍyɛrinti moki. Ɔci bala loṭi ɛkkɛn oorga morki ma Juaŋti, loṭi ma te jyeka wonkɛn jyeka pwadin, jyek cyɛgji Juaŋo. Ɔci bala yɔŋi ma te wajan jitkɛn waakɛnda. ³⁶ Ne ɛkɛ maka coŋin neeni yuarnɛyɛ, ɛkɛ yomɛ wiak te ɛkkɛn, acaan ɛkkɛn taabbin ne tolan. Ɔci ɛkkɛn bala ḍɔki a ḍwaŋi budan. Ɛkkɛn bala ba kulin ne weegɛn baawiy. ³⁷ Yaccu gɔkcin maka laldɛ ɛkɛti agi, “Maka buagɔn laltan ma te jyek ‘ya, ɛkkɛn bala kɔɔna kɔɔnno. Yeti maka noŋi kanŋa lali a ḍiɛkan ṭɔlgɛn budan. Kanŋa ‘yɛrŋ pok tol tolo, yeti maka noŋi kanŋa neeni a ḍiɛkan ṭɔlgɛn budan. ³⁸ Acaan a ɔŋŋiyɛ, dala ɛkkɛ gɔktɛ kanŋa weegɛnti agi, dala ɛkɛ ma kanŋa cundɛ kanŋa ‘yɛrŋ pokti.”

¹ Ɔci Yaccu borcin maka laldɛ ɛkɛ a inyaakkɛn wyetkɛn ne yyɛɛwɔ neeniti, ɔci ɛkkɛn bɛɛn nona ɛkɛti. Ɔci ɛkkɛn ‘wonnɛ ɛkɛ jiek aŋka ɛkkɛn jɔkin yeyin kootan bora te mati te jyek ɛkkɛn. Ɔci moki, ɛkkɛn ‘wonnɛ ɛkɛ jiek aŋka ɛkkɛn yɔŋi ma te wajan jitkɛn waakɛnda. ² Cuudan Yaccu Maka A Inyaakkɛn Wyetkɛn Ne Yyɛɛwɔ neeniyɛ, gena Cimaan mena bartan ma a Butruc, ɔci mod ɛkkɛn Andarawuc, ɔci kɛɛgin Jɛbadi Yaakub ɔci Yɔhanna, ³ ɔci Pilibuc, ɔci Bartɔɔlamawuc, ɔci Tɔmac, ɔci Matta mena lyemi tulbay, ɔci Yaakub kaci Alpay, ɔci Tadawuc (mena bartan ma moki agi Yahuuja kaci Yaakub), ⁴ ɔci Cimaan (mena bɛɛn te ban Kɛnantiy, bartan ma agi men maka Byeran), ɔci Yahuuja Kaci Ickɛɛryuti, (mena Yaccu ‘wonnɛ ma byeŋkɛntiy). ⁵ Maka A Inyaakkɛn Wyetkɛn Ne Yyɛɛwɔ neeniyɛ, cuuññɛ Yaccu bonk jitin, ɔci ɛkɛ gɔkcin ɛkkɛnti agi, “Naa ɛkkɛ ooddɛ te pɔya eetan ma bonk Keedin Pookɛnti bɛɛ. Ɔci naa ɛkkɛ kaattɛ bonk ma Camɛɛryati bɛɛ. ⁶ Dala ɛkkɛ ooddɛ gena bonk ma Icrayiilti pookɛn, acaan ɛkkɛn bala ba kulin yieny. ⁷ Ɔci ne ɛkkɛ ooddiyɛ, ɛkkɛ lortɛ ma agi, ‘Jyek cyɛgji Jwaŋa Tolan cɔɔllin doki.’ ⁸ Te war tɛɛn ‘wonnin ‘ya ɛkkɛ neeniyɛ, dala ɛkkɛ maka waakɛn yeyin ywaŋdɛ. Ɔci maka tuunyɛ, dala ɛkkɛn luoldɛ ñaalɔ te lienti. Dala ɛkkɛ maka naŋŋɛ cyɛc ywaŋdɛ. Dala ɛkkɛ jɔkin yeyin koodɛ bora te mati. Ɛkkɛ ‘wonnin ‘ya war tɛɛn te bilk bɛɛ. Ɔci dala ɛkkɛ da yɔŋdɛ ma budan. ⁹ Ne ɛkkɛ jɔŋdɛ ooddɛyɛ, naa ɛkkɛ eedɛ dahab, walla pɔdda, walla bilka tidan kuñŋan ṭɔɔlɛ bilkji bɛɛ. ¹⁰ Ɔci naa ɛkkɛ eedɛ kucin bɛɛ, walla bworŋin ne yyɛɛwɔ bɛɛ, ɔci walla wɛɛyi ne yyɛɛwɔ bɛɛ, ɔci walla gɔlk ne yyɛɛwɔ bɛɛ. Acaan mena noŋi kanŋayɛ, ɛkɛ yɔmjin aŋka omdi te kanŋa ɛkɛti. ¹¹ “Ɔci ne ɛkkɛ kaattɛ baan gɛɛlti a bana tolan walla a bana ḍiɛranyɛ, dala ɛkkɛ liertɛ mena pwadan gɛɛl ɔci dala ɛkkɛ coottɛ on ɛkɛ. Ɔci dala ɛkkɛ ciedɛ te wɛnan ɔɔn ne ɛkkɛ jɔŋdɛ bagdɛ bana parɛti ɔɔn. ¹² Ne ɛkkɛ kaattɛ orɔ ona neeniti aŋka ɛkkɛ coottɛ wɛnanyɛ, dala ɛkkɛ ma ñiibdɛ te jyeka pwadin. ¹³ Ɔci kan ma pwadɔ awarɛyɛ, dala coodi pwani bɛya mati ba jyeka ñiemnɛ ɛkkɛ ɛkkɛnti neeni. Yeti kan maka neeni pwadɔ bɛɛyɛ, naa coodi pwani bɛya ɛkkɛnti daŋkun bɛɛ. ¹⁴ Kan ma ñiepi ɛkkɛ ne pwadan bɛɛyɛ, ɔci kan ɛkkɛn tieŋdi jyek ɛkkɛ bɛɛyɛ, dala ɛkkɛ koodɛ bora te ona wannati, ɔci ne ɛkkɛ koodɛ borayɛ, dala ɛkkɛ ciegɔ ṭyɛŋdɛ te ṭɛr ban ɛkkɛn neeni. ¹⁵ Tieŋdɛ, ɛkkɛ myettin ne pwadan, oŋŋa godan Juaŋ bɛɛdiyɛ, taab ma Caduum ɔci taab ma Gamɔɔra bwandɛ taab maka bana yooktan te ɛkkɛ neeni. ¹⁶ “Gɔṭṭɛ, ɛkkɛ cundin ‘ya mati. Ɛkkɛ balgɛ ba kulin bowin jitin. Acaan a ɔŋŋiyɛ, dala ɛkkɛ ñingɔ tɛya ba koggo. Ɔci dala ɛkkɛ ywobji baadi ba boobgo. ¹⁷ Ɔci gɔṭṭɛ moki, dala ɛkkɛ woŋgɔ tiittɛ te jyek maka neeni. Ɛkkɛ ‘wontɛ ɛkkɛn maka gɔṭi jiek byeŋkɛnti, ɔci ɛkkɛ ḍuatɛ ma orɔ oorga morki ma Juaŋy. ¹⁸ “Ɔci ɛkkɛ yɔɔttɛ ḍuaŋan ḍyɛrin ɔci ḍuaŋan ḍwaŋin ñomgɛnti te jyek ‘ya. Ɔci ɛkkɛ ɛkkɛn lwogdɛ te jyeka wonkɛn jyeka pwadin. Ɔci Keedin Pookɛn lwogdɛ te jyek ‘ya daŋkun. ¹⁹ Ɔci ne ɛkkɛ eetɛti ma noŋtɛti ma godanyɛ, naa ɛkkɛ buayɛ jyeka guagdɛ ɛkkɛ ɛkkɛnti bɛɛ. Te oŋŋa wannayɛ, ɛkkɛ ‘wondɛ Juaŋ jyeka guagdɛ ɛkkɛ neeni. ²⁰ Acaan gena ɛkkɛ gɔkɛ jyeka neeni bɛɛ. Gena Boŋ Wey ɛkkɛ Jwaŋa Tolan cuondɛ ɛkɛ, ɔci ɛkɛ aŋka gɔkti te tuk ɛkkɛy. ²¹ “Ɔci ma waakɛnda yooktan te ɛkkɛ te jyek ‘ya. Ɔci ne oŋŋa wanna bɛɛdiyɛ, maka ‘uay gɛɛg yooktan te modg ɛkkɛn. Ɔci ɛkkɛn tiaktanyɔ ɛkkɛn pookɛn, ɔci noktan mako. Ɔci moki kɛɛgin weyyɛn gɛɛg yooktan te kɛɛgin ɛkkɛn. Ɔci kɛɛgin gɛɛg daŋkunyɛ, ɛkkɛn yooktan te weyyɛn ɔci te mɛyyɛn moki, ɔci ɛkkɛn noktan ma te jyek kɛɛgin ɛkkɛn. Ɔci kan mena yɔɔda ne tɛyan ne naŋka yeyin neeni baati ɔɔnyɛ, ɛkɛ aŋka yɔɔdɛ Juaŋo. ²³ Kan ma noŋdi ne yaayan ɛkkɛti baan gɛɛltiyɛ, dala ɛkkɛ yooŋdɛ bana parɛti. Tieŋdɛ, ɛkkɛ myettin ne pwadan, ne ɛkkɛ bonk ma Icrayiil ḍagdɛ te boti men bɛɛyɛ, ‘ya Kaci Ma Baan bɛɛd doki. ²⁴ “Kan men gɛɛl laltan mayɛ, ɛkɛ tolcin te mena loṭi ɛkɛ neeni bɛɛ. Ɔci mena noŋi kanŋayɛ, ɛkɛ tolcin te kanŋa weegɛn bɛɛ. ²⁵ Kan naŋki gɛɛl bɛɛn mena loṭi matiyɛ, ɔci naŋka neeni bɛya maka laldɛ ɛkɛti daŋkun. Ɔci kan naŋki gɛɛl bɛɛn kanŋa weegɛntiyɛ, naŋka neeni bɛya maka kanŋan ɛkɛti daŋkun. Oŋ kan ‘ya on weegɛn barka ma te yenti mena yaayan a Byɛljabuly, oŋ ɛkkɛ poŋɛ naŋka neeni bɛya ɛkkɛ maka bala yati neeni bɛɛ? Bɛya hay! ²⁶ “Yeti naa ɛkkɛ buayɛ ma baan bɛɛ. Gen gɛɛl coktanyɔ ma bɛɛ. Yeti gena coktanyɔ mayɛ, ne baaṭi ɛkɛ dɔki bɛya bora. Ɔci moki, ma yaakinti jiek coktanyɔ korkɛnti bɛɛ. Ne baaṭi jyeka neeni bɛya bora moki. ²⁷ Jyeka loṭa ‘ya ɛkkɛ pookɔ a jyeka pwadin neeniyɛ, ne baaṭiyɛ, dala ɛkkɛ jyeka neeni oodɛ bora mati waakɛnda. Ɔci jyeka tieŋnɛ ɛkkɛ jyeka a meegin neeniyɛ, dala ɛkkɛ ma nɔɔttɛ te jyeka neeni te pwana tolan te oorg wyetkɛnti. ²⁸ “Naa ɛkkɛ buayɛ maka noki ɛkkɛ waakɔ neeni bɛɛ. Ɛkkɛn yaakinti ṭyebin ɛkkɛ noktan bɛɛ. Dala ɛkkɛ buattɛ gena Jwaŋa Tolan mena yaakinti noki ma ɔci yaakinti ma yiɛptɛ maccu moki kan ma jyek ɛkɛ daltan te lyena ɛkkɛn buakɛ ma baany. ²⁹ Dala ɛkkɛ yomgɔ tiektɛ ɔci gɔrtɛ. Ḍiirga ḍyɛrin ne yyɛɛwɔ ma wɛɛṭi te giri ne cyɛɛlɔ bɛɛ? Ḍiirga ḍyɛrin neeniyɛ, ŋeejɛ Wey ɛkkɛ waakɛnda. Kan ḍina ḍiɛran gɛɛl ḍɛmdi iñɔyɛ, kwoyɛ ɛkɛ bɛɛ, ŋeejɛ ɛkɛ doki. ³⁰ Oŋ ɛkkɛ, Juaŋ gɔṭi ɛkkɛ ne tolan. ³¹ Naa ɛkkɛ buayɛ bɛɛ. Juaŋ gɔṭi ɛkkɛ ne tolan te ḍiirga coŋin ḍiirga ḍyɛrin neeni. ³² “Gɔṭṭɛ! Kan ma gɔkti maka pookɛnti agi ɛkkɛn aginti ma ‘yayɛ, ɔci ‘ya da gɔkca Wey ɔɔnti ñaalɔ pɔliji ka ɛkkɛn a ma ‘ya. ³³ Ɔci kan menga kɛkti te ‘ya ma ñomgɛnti agi ɛkɛ ‘ya ŋeejati bɛɛyɛ, ‘ya da kɛkca te ɛkɛ Wey ɔɔn ñamɛti ñaalɔ pɔliji, ka ɛkɛ da ŋeej ‘ya bɛɛ. ³⁴ “Naa ɛkkɛ poŋɛ gɔkɛ agi ‘ya bɛɛnjɔ iñɔ wɛnni ṭɛɛrji enjɔ coodda pwadan bɛɛ. Te bɛɛna bɛɛna ‘ya neeniyɛ, ma ciya ne pwadan bɛɛ, ma noogdi. ³⁵ Te bɛɛna bɛɛna ‘ya neeniyɛ, ma kɛɛpti jitin. Kacca ‘uanyɛ, ɛkɛ yooktan te wey ɛkkɛn acaan ɛkɛ a men ‘ya. Ɔci kacca ṭɔɔlyɛ, ɛkɛ yooktan te mɛy ɛkkɛn acaan ɛkɛ a men ‘ya. Ɔci mena ɛɛŋyɛ, ɛkɛ yooktan te ‘war ɛkɛ mɛɛgɛn acaan ɛkɛ a men ‘ya. ³⁶ ‘Mena ‘uanyɛ, maka bala on ɛkɛyɛ, ɛkkɛn yooktan te ɛkɛ acaan ɛkɛ a men ‘ya.’ ³⁷ “Kan men gɛɛl ani wey ɛkkɛn walla mɛy ɛkkɛn ne tolan te anna ɛkɛ ani ‘yayɛ, ɛkɛ yɔmjin aŋka bartan ma a men ‘ya bɛɛ. Kan men gɛɛl ani kaci ɛkɛ kacca a ‘uan walla kacca a ɛɛŋ ne tolan te anna ɛkɛ ani ‘yayɛ, ɛkɛ yɔmjin aŋka bartan ma a men ‘ya bɛɛ. ³⁸ Ɔci kan men gɛɛl kakan ɛkɛ luldɛ ɔci bootti ‘yati bɛɛyɛ, ɛkɛ yɔmjin aŋka bartan ma a men ‘ya bɛɛ. ³⁹ Mena ani war ɛkɛ parɛyɛ, ɛkɛ ḍakti. Yeti mena tuwa te jyek ‘yayɛ, ɛkɛ aŋka yɔɔrdi tɛɛtin baadi bɛɛ neeni. ⁴⁰ “Mena ɛkkɛ mugdɛyɛ, ɛkɛ da ‘ya mugda. Ɔci mena ‘ya mugdayɛ, ɛkɛ da mena ‘ya cuonna mugdɛ. ⁴¹ Kan menga mena cundɛ Juaŋ gɛɛl mugdɛ acaan mena neeni a mena cundɛ Juaŋyɛ, mena parɛ neeni ‘wondɛ Juaŋ waka pwadin ba waka ‘wondɛ Juaŋ mena cundɛ ɛkɛ neeni ɔɔn. Ɔci kan men gɛɛl mena pwadan gɛɛl muŋŋɛ acaan ɛkɛ a mena pwadanyɛ, mena neeni ‘wondɛ Juaŋ waak ba wak ɛkɛ ɔɔn daŋkun. ⁴² ’Ya gɔkka ɛkkɛti awarɛ. Men gɛɛl ne cyɛɛlɔ te maka ḍyɛrinti neeniyɛ, kan men gɛɛl ɛkɛ ‘wondɛ pyega luyan aŋka maaddɛ ɛkɛyɛ, ɔci kan mena neeni noŋdi a ɔɔn acaan ɛkɛ a men ‘yayɛ, Jwaŋa Tolan ñingɛ yeya te naŋka ḍiɛran neeni bɛɛ. Ɛkɛ da ‘wondɛ Juaŋ waka pwadin ne baaṭi te naŋka naŋŋɛ ɛkɛ neeni.”

¹ Ɔci ne Yaccu ḍookki te lali Maka A Inyaakkɛn Wyetkɛn Ne Yyɛɛwɔ te jyeka neeniyɛ, ɛkɛ ookcin bora te wɛnan bala ati booti loṭi ma bonk jitin ban Jaliil konɛ warda. ² Ɔci Yɔhanna Mena Buoṭi Mayɛ, ɛkɛ bala ciginji. Ɔci ne ɛkɛ tieŋni jyek naŋka naŋdɛ Kiṭɔyɛ, ɛkɛ maka laldɛ ɛkɛ gɛɛg cuuññɛ nona Yaccuti. ³ Ɔci ɛkkɛn tooccin ɛkɛti, “I a Kiṭɔ mena guagdɛ Yɔhanna bala bɛyayɛ? Walla i a ɛkɛ bɛɛ? Mena kɛɛdɔn ɔɔn da parɛ?” ⁴ Ɔci Yaccu ṭwokcin ɛkkɛnti agi, “Ɔgdɛ ooddɛ ɔci Yɔhanna myettɛ te waka naŋdi ‘ya neeni. Dala ɛkkɛ Yɔhanna myettɛ te waka yuartɛ ɛkkɛy, ɔci te jyeka tieŋdɛ ɛkkɛy. ⁵ Maka ullin noon yuarcɛ doki. Ɔci maka ŋɔr yaakinti woon moki. Ɔci maka naŋŋɛ cyɛc waakɛn pwadgin doki. Ɔci maka miŋki yaakinti tyeŋi jiek moki. Ɔci maka tuun jɔŋŋin ñaalɔ te kolk jitin moki. Ɔci maka a bɔwan Jwaŋa Tolanyɛ, ɛkkɛn bala laltan ma te jyeka wonkɛn jyeka pwadin neeni. ⁶ Maka yomgɛn ŋoodan te ‘ya bɛɛyɛ, yomg ɛkkɛn pwanna pwanno.” ⁷ Ɔci ne maka cuonnɛ Yɔhanna neeni atki dokiyɛ, Yaccu bala mieti ma te jyek Yɔhanna. Ɛkɛ tooccin ɛkkɛnti agi, “Ɛkkɛ poŋɛ Yɔhanna neeni ɛkɛ a menɛ yeti? Oŋ ɛkkɛ attɛ bora wɔɔŋji gɔrtɛ gena? Ɛkkɛ attɛ wɔɔŋji gɔrtɛ ɛkɛ ne ɛkɛ baali ba luom ne jiɛyi jwamiyɛ? ⁸ Ɛkkɛ attɛ bora gɔrtɛ gena? Ɛkkɛ attɛ bora gɔrtɛ ne ɛkɛ agɛ mena ḍuaŋa mena ɛŋi bworŋa koyan bworŋa pwadan nɛ? Hayɛllɛ! Maka ɛŋi bworŋin koyan bworŋin pwadinyɛ, ɛkkɛn ciyi oorg cyekinti. ⁹ Ɛkkɛ attɛ bora gɔrtɛ gena? Ɛkkɛ attɛ bora gɔrtɛ mena bɔwa Jwaŋa Tolan nɛ? Awarɛ, ‘ya gɔkka ɛkkɛti, Yɔhanna neeniyɛ, ɛkɛ a bɔwa Jwaŋa Tolan budan bɛɛ. Kanŋa ɛkɛ bala ñamu te kanŋa mena a bɔwa Jwaŋa Tolan. ¹⁰ Yɔhanna neeniyɛ, ɛkɛ a mena jiekɛ guagɛ bɔwan Jwaŋa Tolan worgan a kiigin jitin agi, ‘Jwaŋa Tolan gɔkcin Kaci ɛkɛti agi ɛkɛ men gɛɛl cuoñjɛ ñamu aŋka ɛkta yɔŋda pɔyo.’ ¹¹ Tieŋdɛ, ɛkkɛ myettin ne pwadan. Ɛkkɛ men gɛɛl bala tolcin te Yɔhanna Mena Buoṭi Ma neeni bɛɛ. Yeti mena ḍiɛran non cyɛgji Jwaŋa Tolanyɛ, ɛkɛ bala ñamu te Yɔhanna. ¹² Te oŋŋa Yɔhanna Mena Buoṭi Ma neeni bɛɛni ne acca ɔɔnyɛ, ma buagɔn jyek cyɛgji Jwaŋa Tolan neeni ne pɛñan. Ɛkkɛn jiek mugɛ ne tɛyan acaan ɛkkɛn pwadɔ ɛkkɛnti ne tolan. ¹³ Jyeka kiiwɛ bɔwan Jwaŋa Tolan ɔci jyek ganuun Muuca waakɛnda ne wɔɔka Yɔhanna bɛɛni ɔɔnyɛ, ɛkkɛn waakɛnda mieti ma te jyek cyɛgji Jwaŋa Tolan neeni. Ɔci Yɔhannayɛ, ɛkɛ a mena ma myennɛ ne ŋoyɔ te jyeka neeniy. ¹⁴ Tieŋdɛ ɛkkɛ myettin, Yɔhanna neeniyɛ, gena ɛkɛ a mena guagɛ ma agi Iliiya baalɔ bɛɛdɔy. ¹⁵ Dala ɛkkɛ jyetkɔ pɔktɛ aŋka ɛkkɛ tieŋdɛ jyeka guaŋi ‘ya neeni ne pwadan. ¹⁶ “Ɛkkɛ maka ciyi acca nɛ, ‘ya gɔkca a ɔki te naŋki ɛkkɛ neeniy? Naŋki ɛkkɛ neeni bala ba naŋki kɛɛgin ḍyɛrin ne balki cieki ñieki nona dukkan tuggɛnti, ɔci balki boorki yɔtin pookɛn agi, ¹⁷ ‘Ɔɔn kuonnɔn ɔɔlga wɛɛki ma ñooni doki, ɔci ɛkkɛ ñiɛlnɛ bɛɛ. Ɔɔn ‘ualnɔn ɔɔlg joon doki, ɔci ɛkkɛ wiaŋnɛ bɛɛ.’ ¹⁸ Gɔṭṭɛ, Yɔhannayɛ, ɛkɛ bala omi waka pwadin bɛɛ, ɔci moti mooy bɛɛ, yeti ma gɔki agi ɛkta balki jwaŋa yaayɔ yomdanti. ¹⁹ Ne ‘ya Kaci Ma Baan bɛɛnayɛ, ‘ya baal omin iki mako, ɔci moki baal motin iki mako. Ɔci ma wooki ‘ya daŋkun agi, ‘Gɔrtɛ mena neeniti! Ɛkɛ ani oomdin ne tolan, ɔci ɛkɛ moki nokkin mooy oŋkanda, ɔci ɛkɛ a mug maka lyemi tulba a ɛyi ɔci maka a nɔɔtko.’ Yeti ba jyeka neeni waakɛndayɛ, naŋki jitkɛn yuartanji ma ne pwadan dɔki, kan ɛkkɛn a naŋka pwadin walla naŋka yeyin ne ɛkkɛn bɛɛti boray.” ²⁰ Ɔci Yaccu bala wooki maka ciyi bonka ḍwaŋin bonka noŋŋi ɛkɛ naŋka tɛyan jitkɛn ne coŋɔn te ñamu neeni. Ɛkɛ bala wooki ɛkkɛn acaan ne ɛkkɛn yookiti waakɛn te yali waakɛn te nɔji ɛkkɛny. ²¹ Ɛkɛ gɔki agi, “Hay, ɛkkɛ maka ciyi ban Kɔrajin ɔci maka ciyi ban Bɛtceeyida, ɛkkɛ wyetkɔ tɛɛna tɛɛn ba ooŋkan a ɔɔn ogo? Maka ban Tayir ɔci maka ban Ciḍɔɔnyɛ, kan te ɛkkɛn gɔrki naŋka tɛyan naŋka naŋi ‘ya neeniyɛ, te ɛkkɛn ɛɛŋjin bworŋin cyeji, ɔci wyetkɛn tuoggi tooldin te yom yoñ te nɔji ɛkkɛn, ɔci te ɛkkɛn waakɛn yali ‘yati te baaṭi doki. ²² ’Ya gɔkka ɛkkɛti, te oŋ godanyɛ, taab maka ban Tayir ɔci taab maka ban Ciḍɔɔnyɛ, ɛkɛ bala ñamu te taab ɛkkɛ bɛɛ. Taab ɛkkɛ aŋka tolcin. ²³ “Ɔci ɛkkɛ maka ban Kapɛrnyam, ɛkkɛ poŋɛ gɔkɛ agi ɛkkɛ waakɔ koobdɛ ñaalɔ ooddɛ ne ñaalɔ pɔliji ɔci ḍwaŋdɛ ne baaṭi? A’a. Ɛkkɛ ḍwaŋdɛ bɛɛ. Ɛkkɛ ḍɛɛmdɛ iñɔ Jwaŋa Tolan ne pɛñan. Ɛkkɛ eetɛ ma bana yaayanti. Maka ban Caduumyɛ, kan te ɛkkɛn gɔrki naŋka tɛyan naŋka naŋi ‘ya ban ɛkkɛ neeniyɛ, ɛkkɛn te ḍakcin bɛɛ. Ɛkkɛn te balgin iki ikin men. ²⁴ ’Ya gɔkka ɛkkɛti, te oŋ godanyɛ, taab ma Caduumyɛ, ɛkɛ bala ñamu te taab ɛkkɛ bɛɛ. Taab ɛkkɛ aŋka tolcin.” ²⁵ Ɔci te oŋŋa wannayɛ, Yaccu cɔkcin Juaŋti agi, “Hay! Wey ɔɔn, i a Ciɛggɔn ñaalɔ, ɔci i a Ciɛggɔn nona iñɔ wɛnni moki. Pwatcin doki acaan jyeka neeni coŋŋiyɔ i maka gɔki agi ɛkkɛn ñingɛn tɛyɔti, ɔci i jiek lɛɛlni bora aŋa maka waakɛn dɔwwɛ iñɔ buagɔn jiek jitkɛn yuartanti. ²⁶ Hay! Wey ɔɔn, ‘ya gɔkka iti a pwatcin moki acaan naŋka neeni pwatcin iti, hay!” ²⁷ Ɔci Yaccu gɔkcin mati agi, “‘Ya ‘wonna Wey ɔɔn waak bieŋuti waakɛnda. Menga yaakinti ‘ya Kaci Juaŋ neeni ŋeejɛ ɛkɛ a mena bɛɛ. Gena Weegɛn parɛ aŋka ɛkɛ ŋeejɛ ne pwadany. Ɔci menga Kaci Weegɛn ŋeejɛ bɛɛ. Gena Kaci parɛ aŋka ɛkɛ ŋeejɛy. Ɔci moki kan ‘ya Wey ɔɔn myetka mayɛ, maka neeni yaakinti Juaŋ ŋeettan ne pwadan.” ²⁸ “Bɛɛdɛ ‘yati waakida ɛkkɛ maka bala kanŋany, ɔci ɛkkɛ maka kɛṭi waka cyɛgany, ɔci ɛkkɛ woodɛ te taab neeni. ²⁹ Dala yomg ɛkkɛ bala ba yom ‘ya. Dala ɛkkɛ lordɛ te ‘yati, acaan yom ‘ya pwad pwad mati, ɔci ‘ya tol yomuti bɛɛ. Ɔci kan ɛkkɛ loṭɛ te ‘yayɛ, ɛkkɛ yomgɔ mwondi te joono. ³⁰ Acaan koŋña kaakca ‘ya ɛkkɛ ḍɔɔggɔti neeni, ɛkɛ eññɛ yaayɛ bɛɛ, ɔci waka ‘wondin ‘ya ɛkkɛ aŋka cyɛrdɛ neeniyɛ, ɛkkɛn cyɛkcin bɛɛ.”

¹ Oŋ gɛɛlti te Oŋ Cabityɛ, Yaccu ati goṭi yelk jitin i maka laldɛ ɛkɛ. Ɔci ne ɛkkɛn balki atki a woon a ɔɔnyɛ, maka laldɛ Yaccu bala wɔɔpi pok wyetkɛn. Ɔci ɛkkɛn bala ŋɛyi pok ne tanki ɔɔn acaan ɛkkɛn amɛ koño. ² Ɔci ma Pɛriciin gɛɛg bala ati iki ɛkkɛn, ɔci ne ɛkkɛn gɔrki naŋka neeniyɛ, ɛkkɛn gɔkcin Yaccuti agi, “Hay! Gɔrca, maka lala iyɛ, ɛkkɛn jyek ganuun, jyeka guagɛ ma te Oŋ Cabit neeni bɛɛyɛji ɛkkɛn ogo?” ³ Ɔci Yaccu ṭwokcin ɛkkɛnti agi, “Ɛkkɛ pokkɛ jyeka kiiwɛ ma te naŋki Daawud te oŋŋa ɛkkɛn ammɛ koñ iki maka atki iki ɛkɛ boki? ⁴ Daawud kaaccin on Jwaŋa Tolan i maka atki iki ɛkɛ ɔci ‘woñgi ma omi byedga ḍuatan ma on Juaŋy. Byedga neeniyɛ, gena byedga amtan gena maka a gaciicin pookɛn ba jyek ganuun, ɔci Jwaŋa Tolan gɔkcin genga te naŋka neeni bɛɛ. ⁵ Ɔci moki ŋeejɛ ɛkkɛ ne jyek ganuun dɛɛki ma te kanŋa Oŋ Cabit bɛɛ? Yeti jiek gɔki agi gaciicin Ma Yahuud maka noŋi kanŋa ɛkkɛn orɔ on Jwaŋa Tolanyɛ, ɛkkɛn noŋi kanŋa te Oŋ Cabit, ɔci ɛkkɛn ḍɔɔggɛn wɔkɔ te jyek ganuun Oŋ Cabit neeni. ⁶ Tieŋdɛ, mena jyek ɛkɛ bala ñamu te on Juaŋ ona tolanyɛ, ɛkɛ bala wɛnni. ⁷ Te ɛkkɛ jyek Juaŋ jitkɛn ŋeejɛyɛ, te ɛkkɛ wookɛ maka tuggɛn luyan neeni bɛɛ. Jwaŋa Tolan gɔki worga ɛkɛji agi, ‘‘Ya buaga dala ɛkkɛ yomgɔ pɔktɛ gena mati. ‘Ya buaga waka ‘yɛrdɛ ɛkkɛ bɛɛ.’ ⁸ Gɔṭṭɛ, ba jyeka neeniyɛ, ‘ya Kaci Ma Baanyɛ, ‘ya a Ciɛggɔn Oŋ Cabit acaan ɛkɛ bala ‘ya bieŋuti.” ⁹ Ɔci Yaccu nona neeni dalnɛ, ɔci ɛkɛ ati kaaccin orɔ ona morki ma Juaŋy. ¹⁰ Ɔci mena ‘uan gɛɛl mɔŋnɛ ɛkɛ aŋan moki. Ɛkɛ bieŋɛ puottin. Ɔci ma Pɛriciin maka orɔ wɛnan buagɔn gɔrti ne Yaccu domdi naŋki gɛɛl kɔŋji no. Ɛkkɛn tooccin Yaccuti agi, “Kan men gɛɛl ywaŋtanyɔ ma te Oŋ Cabity, a ɔɔn jyek ganuun bɛɛyɛji ma te naŋka neeni doki?” ¹¹ Ɔci Yaccu ṭwokcin ɛkkɛnti agi, “Kan men gɛɛl ɛkkɛti balki kalŋ ne cyɛɛlɔ budany, ɔci kan kalŋ ɛkɛ ḍɛmmin koolji te Oŋ Cabityɛ, oŋ ɛkɛ kalŋ ɛkɛ neeni oodɛ bora bɛɛ? ¹² Men baanyɛ, ɛkɛ pwatcin te kalŋ bɛɛ? Acaan a ɔŋŋiyɛ, kan ma noŋdi ne pwadan mati te Oŋ Cabityɛ, a ɔɔn bala ba jyek ganuun.” ¹³ Ɔci ɛkɛ oŋ gɔkcin ‘wana bieŋɛ puottinti neeni oŋ agi, “Bieŋu miɛtca bora.” Ɔci ɛkɛ bieŋɛ miɛnnɛ bora, ɔci bieŋɛ pwani doki bala ba byeŋa parɛ moki. ¹⁴ Yeti ma Pɛriciin kaaccin bora, ɔci ɛkkɛn bala gɔṭi jiek lieṭi pɔya ɛkkɛn Yaccu noktitiy. ¹⁵ Ɔci naŋki ɛkkɛn ŋeejɛ Yaccu ne ɛkkɛn noŋki nokki ɛkɛy, ɔci ɛkɛ bana neeni dalnɛ, ɔci maka coŋin bootcin ɛkɛti. Ɔci maka waakɛn yeyinyɛ, ywaŋŋɛ ɛkɛ waakɛnda. ¹⁶ Ɔci ɛkɛ gɔkcin ɛkkɛnti ne pɛñan agi, “Naa ɛkkɛ mietɛ ma te ‘ya aŋka ‘ya ŋeetta ma a ɔɔn bɛɛ.” ¹⁷ Ɛkɛ gɔki a ɔɔn ɛkkɛnti aŋka dala jyeka guaŋŋɛ Icaaya mena a bɔwa Jwaŋa Tolan neeniyɛ, bɛya bora. Icaaya gɔki agi, ¹⁸ “Gɔṭṭɛ, mena neeni ɛkɛ a kɛɛngɔn ‘ya, mena mwowwan ‘ya bora mena ana ‘yay. Ɔci ɛkɛ a mena ‘ya yomu pwanna pwaniy. ‘Ya ɛkɛ ‘woñga Boŋ ‘ya ɔci ɛkɛ Keedin Pookɛn nɔɔttɛ te jyek naŋka pwadin. ¹⁹ Ɛkɛ loomgɛ koocin bɛɛ. Ɛkɛ tyewɔ iki maka pookɛn bɛɛ. Ɔci ɛkɛ yaadan te pwana tolan bɛɛ. Ɔci pwan ɛkɛ tieŋdɛ menga pɔɔk jitin bɛɛ. ²⁰ Kan bɛɛrɔn lɛŋi ne ḍiɛranyɛ, ɛkɛ lɛgdɛ ɛkɛ jitin warda bɛɛ. Kan dyɛka koldan ne ḍiɛran ṭɔɔlɛ budanyɛ, ɛkɛ dyɛka nogdɛ bɛɛ. Naŋki ɛkɛ pwanna pwani oŋkanda ne ɛkɛ naŋka yeyin bwandɛ waakɛnda ɔɔn. ²¹ Ɔci te yenti ɛkɛyɛ, maka kɛɛna pookɛn waakɛnda bala kɛɛy te jyek ɛkɛ aŋka yɔɔdɛ ɛkɛ.” ²² Ɔci ma bɛɛn eccin mena ‘uan Yaccuti. ‘Wana neeni muŋŋɛ jwaŋa yaayan, ɔci ɛkɛ a ulli ɔci yaakinti gɔki jiek bɛɛ. Ɔci jwaŋa yaayan koonɛ Yaccu bora te ‘wana neeniti, ɔci ‘uan oŋ gɔkcin jiek ɔci yaaŋnɛti gwali noon daŋkun oŋo. ²³ Ɔci maka coŋin neeniyɛ, ɛkkɛn korkɛn buañi ne pɛñan, ɔci ɛkkɛn gɔki agi, “Mena neeniyɛ, ɛkɛ a Kiṭɔ Kaci Daawud bɛɛ?” ²⁴ Ɔci ma Pɛriciinyɛ, ne ɛkkɛn tieŋki jyeka neeniyɛ, ɛkkɛn gɔki agi, “Mena neeniyɛ, jɔkin yeyin koodɛ ɛkɛ bora parɛ budan bɛɛ. Ɛkɛ jɔkin yeyin koodɛ bora te yenti Byɛljabul ciɛggɔn jɔkin yeyin.” ²⁵ Ɔci Yaccu paŋi ɛkkɛn ŋeejɛ, ɔci ɛkɛ gɔkcin ɛkkɛnti agi, “Gɔṭṭɛ! Bana tolanyɛ, kan ma kɛɛpti jitin te jiekyɛ, ɔci coodi pwada bɛɛ, ɔci moki kan ma ñoowɔ te jiek bɛɛyɛ, ɛkkɛn yaakinti ciyi bana ne cyɛɛlɔ walla ona ne cyɛɛlɔ bɛɛ. ²⁶ Ɔci kan Jwaŋa Yaayan jɔkin yeyin koodɛ bora yiɛptɛ ɔntɔyɛ, a ɔɔnyɛ, bala ba ɛkɛ yookɔn te war ɛkɛ parɛ. Ɔci kan a ɔɔnyɛ, ɛkɛ yɔɔda ne tɛyan boki? A’a. ²⁷ Kan jɔkin yeyin kooya ‘ya bora te yenti Byɛljabul ba jwalla guaŋŋɛ ɛkkɛ neeniyɛ, oŋ ma ɛkkɛ ɛkkɛn jɔkin yeyin kootan bora te yenti menɛ? Kan jyek ɛkkɛ bala a ɔɔnyɛ, ma ɛkkɛ loondi ɛkkɛti daŋkun bɛɛ? ²⁸ Yeti kan ‘ya jɔkin yeyin kooya bora te Boŋ Jwaŋa Tolanyɛ, dala ŋeeddɛ ɛkkɛ cyɛgji Jwaŋa Tolan bɛɛn awarɛ ɛkkɛti doki. ²⁹ “Gɔṭṭɛ ‘wota, kan mena warɛ tɛyan bala orɔ on ɛkɛyɛ, menga yaakinti kaatti orɔ kordi genga on ɛkɛ boki? Kan mena warɛ tɛyan neeni ḍɛktan ma ñamuyɛ, ma oŋ kaatti orɔ kordi wak on ɛkɛ oŋo. ³⁰ “Tieŋdɛ, naŋki ‘ya ŋeejɛ ɛkkɛ ɛkkɛn pwadɔ. Mena buagɔn ‘ya bɛɛyɛ, ɛkɛ yookɔn te ‘ya awarɛ. Ɔci mena lyemin iki ‘ya waak bɛɛyɛ, ɛkɛ waak cyɛddɛ jitin. ³¹ Acaan a ɔŋŋiyɛ, ‘ya gɔkka ɛkkɛti ka Jwaŋa Tolan yaakinti ma bɔɔktɛ te naŋki waakɛnda, kan a jyeka yeyin ɔci moki kan a jyeka pookɛn gɛɛg mokiyɛ, ɛkɛ yaakinti ma bɔɔktɛ men ɔɔn. Yeti kan men gɛɛl wooki naŋki Boŋ Jwaŋa Tolanyɛ, ɛkɛ bɔɔktɛ Juaŋ bɛɛ. ³² Ɔci moki kan ma wooki naŋki ‘ya Kaci Ma Baanyɛ, Juaŋ yaakinti ɛkkɛn bɔɔktɛ te nɔjja neeni. Yeti kan men gɛɛl wooki naŋki Boŋ Juaŋyɛ, ɛkɛ bɔɔktɛ Juaŋ iñɔ wɛnni ṭɛɛrji bɛɛ. Ɔci ne coodda ne baaṭi ɔɔnyɛ, ɛkɛ bɔɔktɛ Juaŋ moki bɛɛ. ³³ “Kan jaan a jana pwadanyɛ, ɛkɛ etti ṭɔlga pwadin, ɔci kan jaan a jana yaayanyɛ, ɛkɛ da etti ṭɔlga yeyin. Jang ŋeecɔn ma te ṭɔlg ɛkkɛn. ³⁴ Ɛkkɛ agɛ laaban ba koggo, hay! Ɛkkɛ maka yeyin nɛ, jwalla pwadan gɛɛl bɛya te ɛkkɛ yomgɔti oŋgati boki? Jyeka bala ma tuggɛntiyɛ, gena jyeka coŋin jyeka bala ɛkkɛn yomgɛnti te ñamuy. ³⁵ Jyek ma daŋkun bala ba jyek janga neeni. Mena pwadanyɛ, ɛkɛ balki paŋŋa pwadan yomɛti, ɔci naŋki ɛkɛ naŋka pwadan bɛya bora te ɛkɛ yomɛti. Ɔci mena yaayanyɛ, ɛkɛ balki paŋŋa yaayan yomɛti, ɔci naŋki ɛkɛ naŋka yeyin bɛya bora te ɛkɛ yomɛti daŋkun. ³⁶ “Ne oŋ godan Juaŋ bɛɛdiyɛ, Juaŋ jiek duaktɛ ma wyetkɛnti ba jyeka guagɛ ɛkkɛn budan a jyeka yeyin neeni waakɛnda. ³⁷ Te jyeka guagɛ ma iñɔ baanji wɛnniyɛ, ma gɛɛg pwaddi Juaŋti. Ɔci maka pookɛn gɛɛgyɛ, ḍɛɛmdi maccu.” ³⁸ Ɔci maka loṭi worga Juaŋ ɔci ma Pɛriciinyɛ, ɛkkɛn ma gɛɛg bɛɛn Yaccuti ɔci gɔkcin agi, “Mena loṭi may, i baal ba ne gɔki agi ɛkɛ bɛɛnjɛ te Juaŋti no, dala i ɔɔn lɛɛrtɔn naŋka ñyecki ma i naŋka tɛyan.” ³⁹ “Hay ɛkkɛ maka yeyin maka jyeni ɛkkɛn baaw Juaŋti nɛ! Ɛkkɛ buagɛ lɛɛrtin ‘ya naŋka tɛyan naŋka ñyecki ma ‘ya? A’a, ɛkkɛ yɔɔrdɛ bɛɛ. Yeti ɛkkɛ gɔrtɛ gena naŋka bala ba naŋka naŋŋɛ Juaŋ Yunaan mena a bɔwa Jwaŋa Tolan te baaṭi neeniti. ⁴⁰ Ɔci bala ba jyek Yunaan, ne ɛkɛ baali yeñi konɛti nink ne ḍoogɔyɛ, ɔci ‘ya Kaci Ma Baanyɛ, ‘ya da nindi koolji ṭɛɛr konɛti nink ne ḍoogɔ daŋkun. ⁴¹ Gɔṭṭɛ, ne oŋ godan bɛɛdiyɛ, maka ban Ninawa jɔŋdi ñaalɔ i ɛkkɛ a cyɛɛlɔ te oŋŋa wanna, ɔci jiek dɔɔtan ɛkkɛn ɛkkɛ wyetkɔti. Acaan maka ciyi ban Ninawaji ne ɛkkɛn tieŋki jyek Yunaanyɛ, ɛkkɛn waakɛn yaljɛ ɔntɔ te naŋki ɛkkɛn. Ɔci accayɛ, ‘ya mena bala ñamu te Yunaan baal wɛnni ɔci ɛkkɛ yookɛ te ‘ya. ⁴² Te oŋ godanyɛ, mena a ḍuaŋa tolan ḍuaŋa ma Ciba ḍuaŋa a ɛɛŋyɛ, ɛkɛ da jɔŋdi ñaalɔ. Ɔci te oŋŋa wannayɛ, ɛkɛ jiek dɔɔdɛ ɛkkɛ wyetkɔti. Acaan ḍuaŋa tolan neeni jɔŋŋin te ban ɛkkɛn bana loonan, ɔci ɛkɛ ati aŋka tieŋdi jyek Cɔlaman. Acaan Cɔlaman neeniyɛ, ɛkɛ ñingɛ tɛy tɛyo. Ɔci accayɛ, ‘ya mena ñing tɛɛn ɛkɛ bala ñamu te ñing tɛɛn Cɔlamanyɛ, ‘ya baal wɛnni, ɔci ɛkkɛ yookɛ te ‘ya!” ⁴³ “Ɔci ‘ya gɔkka ɛkkɛti te jwalla neeni moki. Kan men gɛɛl mugdɛ jwaŋa yaayan ɔci kan jwaŋa yaayan koodi bora te menti ooddi ḍɔki a ḍwaŋi nona wɔɔgan nona iwan lieṭi nona woodi ɛkɛ, ɔci yɔɔrdi nona pwadan nona ciyi ɛkɛ bɛɛyɛ, ⁴⁴ ɛkɛ gɔkti war ɛkɛti agi, ‘‘Ya ootta dɔwwa ona daljan ‘ya neeni.’ Ɔci ɛkɛ ooddi dɔɔdi menti, ɔci men mɔktɛ ɛkɛ pwanna pwanno, gena yaayan gɛɛl bala moki bɛɛ. ⁴⁵ Ɔci ɛkɛ oŋ ooddi etti jɔkin yeyin jɔkin pookɛn ne dɔɔyɔ wyetkɛn ne yyɛɛwɔ. Ɔci jɔkin neeniyɛ, jɔkin ñamu buankɔn te yoño. Ɔci ɛkkɛn kaatti jiju menti waakɛnda. Ɔci ‘wana neeniyɛ, coodi ɛkɛ coodda ne ŋoyɔyɛ, yaaya ne tolan nɔñji te coodda ñamu. Hay! Ɛkkɛ maka yookɔn te jyeni neeniyɛ, naŋki ɛkkɛ bala ba naŋki ‘wana neeni.” ⁴⁶ Ɔci ne Yaccu baali gɔki jyeka neeni mati menyɛ, mɛy ɛkkɛn ɔci modg ɛkkɛnyɛ, ɛkkɛn bala yɔdi bora tooci ɛkɛ. ⁴⁷ Ɔci men gɛɛl gɔkcin Yaccuti agi, “Mɛy ɛkkɛ ɔci modg ɛkkɛ, ɛkkɛn bala yɔdi bora buagɔn i.” ⁴⁸ Ɔci Yaccu ṭwokcin mena ɛkɛ myennɛ neeniti agi, “A menɛ, a mɛyi ɔɔn ɔci a makɛ a modg ɔɔny?” ⁴⁹ Te wɛnan ɛkɛ byeŋkɛ laŋnɛ bora ɔci ñuoccin maka laldɛ ɛkɛti, ɔci gɔkcin agi, “Gɔṭṭɛ! Maka neeniyɛ, a mɛyi ɔɔn ɔci a modg ɔɔn! ⁵⁰ Maka noŋi ba naŋka ṭagdɛ Wey ɔɔn ñaalɔ pɔlijiyɛ, ɛkkɛn a modg ɔɔn, ɔci a kowi ɔɔn ɔci a mɛyi ɔɔnɔ.”

¹ Ɔci ne ḍiɛran ṭɔɔlɛ te oŋŋa wanna ɔɔnyɛ, Yaccu kaaccin bora te ona wannati, ɔci ɛkɛ ati cooccin iñɔ Galŋ Jaliil ḍwaŋɛti. ² Ɔci polla tolan bɛɛn wyetkɛn ḍɔɔlɛ nona ɛkɛti. Ɔci acaan a ɔŋŋiyɛ, ɛkɛ taapcin murkaji ɔci cooccin murkaji galŋji. Ɔci maka coŋin neeni bala ciyi galŋ ḍwaŋɛti. ³ Ɔci ɛkɛ bala loṭi ɛkkɛn te jyeka a caagin gɛɛg ne coŋɔn. Ɛkɛ gɔkcin mati agi, “Mena dwoki kookinyɛ, ɛkɛ ati bora ɔci bala dwoki kookin. ⁴ Ɔci ne ɛkɛ baali dwoki a ɔɔnyɛ, kookin ñingɛn gɛɛg ḍɛɛmdin pɔɔjɔ pɔy konɛti, ɔci ḍiirg bɛɛn ɔci ɛkkɛn amɛ doki. ⁵ Ɔci kookin pookɛn gɛɛg ḍɛɛmdin nona gwoyiti, ɔci ɛkkɛn ywollin ne pɛñan acaan ṭɛɛr a ḍiɛran. ⁶ Ɔci ne oŋ waŋɛ myɛlliyɛ, ɛkkɛn ammɛ oŋ te wɔɔka ḍuulan budan acaan ɛkkɛn bɛɛkkɛn ati iñɔ bɛɛ. Ɔci acaan a ɔŋŋiyɛ, aŋka ɛkkɛn tuuki ɔci iiki wanna. ⁷ Ɔci kookin pookɛn gɛɛg ḍɛɛmdin nona guobgin. Ɔci guobgin ḍwaŋgin ne pɛñan, ɔci kookin gworɛyɔ. ⁸ Ɔci kookin pookɛn gɛɛg ḍɛɛmdin nona balki ṭɛra pwadan, ɔci ɛkkɛn aŋka eccin ñingɛn ne pwadan. Ɔci kookin neeni gɛɛgyɛ, eccin ñingɛn ne coŋɔn te makɛn pookɛn waakɛnda. Ɔci kookin pookɛn gɛɛg bala daŋkun moki, ɔci ɛkkɛn eccin kookin pookɛn bala ñamu moki. Ɔci kookin pookɛn gɛɛg bala daŋkun moki. Ɔci ɛkkɛn eccin ñingɛn bala ñamu te kookin pookɛn ne ḍyɛṭ ṭɔɔlɛ. ⁹ “Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan!” ¹⁰ Ɔci maka laldɛ Yaccu bɛɛn nona ɛkɛti ɔci ɛkkɛn gɔkcin ɛkɛti agi, “I gɔk ɛkkɛnti te jyeka a caagin neeni ogo?” ¹¹ Ɔci ɛkɛ gɔkcin ɛkkɛnti agi, “Ɛkkɛ ‘wonnɛ Jwaŋa Tolan ñing tɛɛn aŋka ɛkkɛ jyek cyɛgji Jwaŋa Tolan jitkɛn yuartɛ ɛkkɛ ne pwadan. Yeti maka coŋin neeniyɛ, balki ñing tɛɛn neeni bɛɛ. ¹² Maka poŋi te ñing tɛɛn Juaŋyɛ, ɛkkɛn aŋka ‘uottɛti Juaŋ ñing tɛɛno. Yeti maka poŋi te ñing tɛɛn ɛkɛ bɛɛyɛ, ñing tɛɛna bala ɛkkɛnti accayɛ, baadi moki. ¹³ Ɔci acaan a ɔŋŋiyɛ, aŋka ‘ya gɔŋna ɛkkɛnti te jyeka a caagin neeni wanna. Ɛkkɛn bala gɔṭi a gwali te woŋgɛn budan, yeti ɛkkɛn jiek jitkɛn yuartan bɛɛ. Ɔci ɛkkɛn bala tyeŋi a tyeŋi te jyetkɛn budan, yeti ɛkkɛn jiek jitkɛn tieŋtan walla yuartaji bɛɛ. ¹⁴ A ɔɔnyɛ, bala ba jyeka guaŋŋɛ Icaaya ne ɛkɛ gɔki ma Icrayiilti te jyek Juaŋ agi, ‘Ɛkkɛ tieŋdɛ jiek a tieŋŋin oŋkanda ɔɔn, yeti ɛkkɛ yaakɛti tieŋdi ne pwadan bɛɛ. Ɔci moki, ɛkkɛ gɔrtɛ a gwali oŋkanda ɔɔn, yeti ɛkkɛ yaaktɛti jiek jitkɛn yuartɛ ne pwadan bɛɛ. ¹⁵ Maka neeni ɛkkɛn yookɔn te jyeka ɛkkɛn lalla ‘ya ne ḍiɛran neeni. Ɔci acca ɛkkɛn jyetkɛn aŋi miŋko, ɛkkɛn yaakinti tieŋdi jiek moki bɛɛ. Ɔci ɛkkɛn woŋgɛn mitcɛti aŋka naa ɛkkɛn gɔrti waka ‘ya buaga ka lɛɛrka ɛkkɛn neeni bɛɛ. Hay! ‘Ya baal kɛɛy maka neeni ka da ɛkkɛn waakɛn yaltan bɛya ‘yati aŋka ɛkkɛn ywaŋdɛyɔ ‘ya.’ ¹⁶ “Yeti pwatcin te woŋgi ɛkkɛ acaan ɛkkɛ waak yuartɛ, ɔci pwatcin te jyetk ɛkkɛ acaan ɛkkɛ jiek jitkɛn tieŋdɛ. ¹⁷ ’Ya ɛkkɛ myettin ne pwadan! Awarɛ, bɔwan Jwaŋa Tolan gɛɛg ne coŋɔn i maka pwadin maka coŋinyɛ, ɛkkɛn bala kɛɛy jyeka bɛɛn ɛkkɛti acca neeni. Ɛkkɛn buagɔn gɔrti naŋka gwaldɛ ɛkkɛ acca neeni, yeti naŋka neeni yuarɛ ɛkkɛn bɛɛ. Ɔci moki ɛkkɛn buagɔn tieŋdi jyeka tieŋdɛ ɛkkɛ acca daŋkun, yeti ɛkkɛn tieŋŋin jyeka neeni bɛɛ, acaan ɛkkɛn tuun te baaṭi doki ne ‘ya bɛɛna men bɛɛy. ¹⁸ “Dala ɛkkɛ tieŋdɛ jyek mena ‘wayi kookin ne jiek jitkɛn balki a ɔkiy. ¹⁹ Kan men gɛɛl tieŋdi jyek cyɛgji Jwaŋa Tolan oŋ jiek jitkɛn yuartɛji bɛɛyɛ, Mena Yaayan bɛya, ɔci jiek kaldɛ ɔntɔ te ɛkɛ yomɛti. A ɔɔnyɛ, bala ba jyek kookin ḍɛɛmdin pɔy taaŋɛti neeni. ²⁰ Ɔci ba jyek kookin ḍɛɛmdin nona gwoyiti neeniyɛ, bala ba jyek maka tieŋŋin jieko, ɔci te ñamu ɛkkɛn yomgɛn ñɔɔn ɔci jiek mugɛ te yom ñɔɔno. ²¹ Yeti ɛkkɛn bala yɔdi ne ḍiɛran ṭɔɔlɛ, yeti oŋŋa pɔɔd bɛɛdi ɛkkɛnti te jyenna ɛkkɛn jyetki jyek Juaŋyɛ, ɛkkɛn ḍɛɛmdi iñɔ ne pɛñan doki waakɛnda. ²² Ɔci ba jyek kookin ḍɛɛmdin nona guobginyɛ, bala ba maka tieŋŋin jieko. Yeti jyeka pookɛn bɛya ɛkkɛn yomgɛnti, ɔci jyek Juaŋ gwortanyɔ jyeka pookɛn neeni. Jyeka pookɛn neeniyɛ, gena paŋi jieko, ɔci jyek bwakti maal waakɛnda. Jyeka neeniyɛ, ɛkkɛn jyek ‘ya gwortanyɔ ma yomgɛnti, ɔci ba kookin balki ñingɛn ne pwadan bɛɛ neeniyɛ, maka neeni balki naŋka pwadan daŋkun bɛɛ. ²³ Ɔci ba jyek kookin ḍɛɛmdin ṭɛra pwadanti neeniyɛ, bala ba maka tieŋŋin jyek ‘ya, ɔci jiek mugɛ ne pwadan, ɔci jyek Juaŋ neeniyɛ, noŋdi naŋka pwadin ɛkkɛn yomgɛnti. Ma gɛɛgyɛ, naŋki ɛkkɛn naŋka pwadin bala ne ḍyɛṭ ṭɔɔlɛ, ɔci maka pookɛn gɛɛg naŋki ɛkkɛn naŋka pwadin bala ñamu moki ne ḍiɛran ṭɔɔlɛ, ɔci maka pookɛn gɛɛg moki naŋki ɛkkɛn naŋka pwadin bala ñamu te ma waakɛnda.” ²⁴ Ɔci Yaccu ɛkkɛn myennɛ jwalla parɛ jwalla a caagɔn gɛɛl moki agi, “Cyɛgji Jwaŋa Tolanyɛ, ɛkɛ bala ba mena ‘uan mena ati dwoki pok yel ɛkɛji. ²⁵ Ɔci ne ma balki wicki menyɛ, mena yooki ñin iki ɛkɛyɛ, ati biirk dɔŋnɛ yielji poka pwadin jitin. Ɔci ɛkɛ oŋ ati ɔntɔ te wɛnan oŋo. ²⁶ Ɔci ne pok woodgɛn ḍwaŋki ɔci leecki ɔci ñingɛn bɛɛkiyɛ, biirka ywollin pok jitin neeniyɛ, leejin daŋkun ɔci ñingɛn bɛɛni. ²⁷ Ɔci yiel weegɛnyɛ, maka kanŋan ɛkɛti bɛɛn nona ɛkɛti ɔci gɔkcin ɛkɛti agi, ‘Ciɛggɔn, i boki dwokki poka pwadin yielji boki? Oŋ biirka neeni bɛɛn te aŋɛ?’ ²⁸ Ɔci ɛkɛ gɔkcin ɛkkɛnti agi, ‘Daldɛ! Gena mena yoyyin ñin iki ‘ya noŋi naŋka neeniy.’ Ɔci ɛkkɛn gɔkcin ɛkɛti moki agi, ‘I buagi ɔɔn ooddɔn ɛkkɛn lɔɔddɔn bora?’ ²⁹ Yeti ɛkɛ kɛkcin ɛkkɛnti agi, ‘A’a, naa ɛkkɛn dɔɔddɛ ñaalɔ bɛɛ. Kan ɛkkɛ ɛkkɛn dɔɔddɛ ñaalɔyɛ, pok woodgɛn dita dɔɔddɛ ñaalɔ dita. ³⁰ Dala ɛkkɛn yɔɔda a cyɛɛlɔ acca ɔɔn. Ne oŋŋa ma ɛrki pok bɛɛdiyɛ, ‘ya ɛkkɛn myetka dala ɛkkɛn biirk limtanyɔ ñamu, ɔci tontan maaño. Ɔci pok oŋ limtanyɔ ma, ɔci oltan ma twoñji oŋo..’” ³¹ Ɔci Yaccu ma myennɛ te jwalla a caagɔn gɛɛl moki agi, “Jyek cyɛgji Jwaŋa Tolanyɛ, bala ba kardala waŋɛ piinnɛ men gɛɛl bal ɛkɛy. ³² Ñing kardala ḍyɛrgin a ḍyɛrgin ne pɛñan ba ñing kɔba. Ɛkɛ buanɛ ñing janga pookɛn waakɛnda. Yeti ne kardala neeni yuldi ɔci toldiyɛ, ɛkɛ janga pookɛn bwandɛ. Ɛkɛ aga jaan waanɛ, ɔci ḍiirg bɛya eyi kwork ɛkɛ kɛrkɛti ne coŋɔn. A ɔɔnyɛ, bala ba jyek cyɛgji Juaŋ daŋkun. Jyek cyɛgji Juaŋ ɛkɛ jɔɔtcin ne ḍiɛran te maka ne ḍiɛkan, ɔci ɛkɛ poni jitin ne ma coŋki a coŋgin ɔɔn.” ³³ Ɔci ɛkɛ ɛkkɛn myennɛ te jyeka a caagin gɛɛg moki agi, “Cyɛgji Jwaŋa Tolanyɛ, ɛkɛ bala ba jyek ɛŋa ñɔki ḍuobjiy. Ɛkɛ ñamg olnɛ ḍuojiti ne ḍiɛkan ɔci ñamg bala niin lieda ne ɛkkɛn atki ḍuobji ḍakkitiyɔ wari warda ɔɔn.” ³⁴ Yaccu bala gɔki mati oŋkanda te jyeka a caagin neeni. ³⁵ Jyeka neeniyɛ, gena jyeka guaŋŋɛ mena a bɔwa Jwaŋa Tolan agi, “‘Ya tuku pɔkka gɔkca mati te jyeka a caagin, ɔci jyeka bala iñɔ wɛnni jitkɛn a coggin te baaṭi wona ṭɛɛr baawiyɛ, ‘ya ɛkkɛn korkɛn owwa bora mati aŋka ɛkkɛn ŋeettan ma.” ³⁶ Ɔci Yaccu maka coŋin neeni cuuññɛ baanji, ɔci ɛkɛ kaaccin orɔ. Ɔci maka laldɛ ɛkɛ neeniyɛ, bɛɛn ɛkɛti ɔci gɔkcin ɛkɛti agi, “Dala i ɔɔn lwoktɔn jiek jitkɛn guaŋŋi i, te jyeka a caagin jyek biirk wanna.” ³⁷ Ɔci ɛkɛ ṭwokcin ɛkkɛnti agi, “Mena dwoki poka pwadinyɛ, gena ‘ya Kaci Ma Baano. ³⁸ Yielyɛ, ɛkɛ a ṭɛɛr konɛ warda baan konɛ warda. Ɔci poka pwadinyɛ, gena ɛkkɛ ma cyɛgji Jwaŋa Tolan. Ɔci biirkyɛ, ɛkkɛn bala ba maka yeyin maka ciyi budan te jyek Juaŋy. ³⁹ Mena dwoki biirk neeniyɛ, gena mena yoyyin ñin iki ‘yay, gena Jwaŋa Yaayan. Jyek waka ‘yɛrtan mayɛ, gena oŋa ‘ya jiek olda maka yeyin wyetkɛntiy. Ɔci maka ɛṭi waakyɛ, gena malɛɛkan. ⁴⁰ Ɔci ba biirka limtanyɔ ma ɔci tontan ma maañyɛ, bala ba jyek naŋka bɛya mati te oŋŋa ne ŋoyɔy. ⁴¹ ’Ya Kaci Ma Baanyɛ, malɛɛkan ‘ya cundi, ɔci ɛkkɛn ooddi cyɛgji ‘yati ɔci waka yeyin waakɛnda waka etti nɔji mati neeni limtanyɔ ɛkkɛn, ɔci maka yeyin moki limtanyɔ ɛkkɛn, ⁴² ɔci ɛkkɛn yiɛptan malɛɛkan maccu bana maaño. Ɔci aŋanyɛ, ɛkkɛn wiak ɔci ɛkkɛn lɛkɛn tiittanti te yom yoño. ⁴³ Ɔci maka pwadinyɛ, ɛkkɛn dɛkti ba oŋ waŋɛ non cyɛgji Wey ɛkkɛn. Mena balki jyetkiyɛ, dala ɛkɛ tieŋdi jyeka guaŋi ‘ya neeni ne pwadan!” ⁴⁴ “Jyek cyɛgji Jwaŋa Tolanyɛ, bala ba bilka joŋnɛ men gɛɛl iñɔ yieljiy. Ɔci ne mena parɛ bɛɛniyɛ, ɔci ɛkɛ bilk yuarŋɛ, ɔci ɛkɛ ɛkkɛn coŋnɛ ñin dɔki. Ɔci ɛkɛ yomɛ ñɔɔna ñɔɔno. Ɔci ɛkɛ ati ɔci wak ɛkɛ wiɛlnɛyɔ waakɛnda aŋka ɛkɛ ooddi ɔci yela neeni wyɛldɛ i bilka yuarŋɛ ɛkɛ yielji wanna ɔɔn. Ɔci ɛkɛ ati ɔci yiel wiɛllɛ warda. ⁴⁵ “Ɔci moki, jyek cyɛgji Jwaŋa Tolanyɛ, ɛkɛ bala ba jyek mena wɛɛṭi waak mena bala lieṭi luulan pwadin aŋka wyɛldɛ ɛkɛy. ⁴⁶ Ɔci oŋ gɛɛltiyɛ, ɛkɛ yɔṭi luula wiɛlɛ tɛyan. Ɔci ɛkɛ ati ɔci wak ɛkɛ wiɛlnɛyɔ waakɛnda. Ɔci ɛkɛ oŋ ati luula neeni wiɛllɛ ɛkɛ oŋo. ⁴⁷ “Ɔci moki, ne oŋa cyɛgji Jwaŋa Tolan bɛɛdiyɛ, ɛkɛ bala ba malla tolan ne yiɛpkiti ma iñɔ pietin galŋji ɔci muoni yak jitkɛn ne coŋɔny. ⁴⁸ Ɔci ne mali kuummiyɛ, maka wyeci yak neeni yak wuayɛ ne waan taaŋɛti. Ɔci ɛkkɛn yaka pwadin lɔɔddɛ bora te maliji ḍuacci jiju ḍwañji. Ɔci yaka yeyin neeniyɛ, yiɛpcɛ ɔntɔ. ⁴⁹ Ɔci a ɔŋŋiyɛ, bala ba naŋka bɛya ne oŋŋa bɛya ookti ne ŋoyɔy. Ne oŋŋa bɛya ookti ne ŋoyɔ neeniyɛ, malɛɛkan bɛya, ɔci maka yeyin luattan bora te maka pwadinti, ⁵⁰ ɔci ɛkkɛn oltan malɛɛkan maccu bana maaño, ɔci aŋanyɛ, ma wiak a joono, ɔci ɛkkɛn lɛkɛn tiittanti te yom yoño.” ⁵¹ Ɔci Yaccu tooccin maka laldɛ ɛkɛti agi, “Ɛkkɛ jyeka a caagin neeni jitkɛn yuarnɛ waakɛnda?” Ɔci ɛkkɛn ṭwokcin ɛkɛti agi, “Ɛɛ, ɔɔn ɛkkɛn yuarnɔn.” ⁵² Ɔci ɛkɛ gɔkcin ɛkkɛnti agi, “Ɛkkɛ lallin ‘ya te jyek cyɛgji Jwaŋa Tolan ɔci ɛkkɛ jiek jitkɛn ŋeejɛ ne coŋɔn. A ɔŋŋiyɛ, ɛkkɛ yaakɛti loṭɛ ma te jyeka wonkɛn ɔci jyeka te baaṭi bala ba men ne etti bora waka wonkɛn ɔci waka te baaṭi te twoñi ɛkɛjiy.” ⁵³ Ɔci ne Yaccu ḍookki te jyeka a caagin neeniyɛ, ɔci ɛkɛ nona neeni dalnɛ. Ɛkɛ ati nona parɛ. ⁵⁴ Ɔci ɛkɛ ati ban ɛkkɛn ban Najarɛt, ɔci ɛkɛ bala loṭi ma te jyek Juaŋ ona morki ma Juaŋji. Ɔci ma korkɛn buañi, ɔci ɛkkɛn gɔki agi, “Mena neeni jyeka neeni oonɛ te aŋɛ yeti? Ñing tɛɛn ɛkɛ neeni bala a ɔki a ɔɔn? Ɛkɛ yaakinti naŋka tɛyan a ɔki? ⁵⁵ Mena neeni a kaci mena gɔɔñgɔn bɛɛ? Ɔci mɛy ɛkkɛn yenti Moryam bɛɛ? Ɔci Yaakub ɔci Yuocip ɔci Cimaan ɔci Yahuuja, maka neeni ɛkkɛn a modg ɛkkɛn bɛɛ? ⁵⁶ Ɔci kowi ɛkkɛn moki bala ciyi ban ikin wɛnni bɛɛ? Oŋ ‘wana neeni yaakinti naŋka coŋin neeni a ɔki?” ⁵⁷ Ɔci ma ɛkɛ ñyɛlɛ te jiek yookɔn te ḍɔŋ ɛkɛ ɛkkɛnti. Ɔci Yaccu gɔkcin ɛkkɛnti agi, “Bonka pookɛnyɛ, ma ani bɔwa Jwaŋa Tolan. Yeti ban ɛkkɛn waanɛtiyɛ, maka ban ɛkkɛn ɔci maka on ɛkkɛn ani ɛkɛ bɛɛ.” ⁵⁸ Ɔci Yaccu noŋi naŋka tɛyan ne coŋɔn ban ɛkkɛn bɛɛ acaan ma jyeti ɛkɛti bɛɛ.

¹ Ɔci te oŋŋa wannayɛ, Hiruuduc Antipac mena a ḍuaŋa tolanyɛ, ɛkɛ tieŋŋin jyeka guaktan ma te naŋki Yaccu. ² Ɔci ɛkɛ gɔkcin maka kanŋan ɛkɛti agi, “Mena noŋi naŋka neeniyɛ, gena Yɔhanna Mena Buoṭi Ma te ñamuy. Ɛkɛ jɔŋŋin ñaalɔ te lienti aŋka ɛkɛ balkiti naŋka tɛyan wanna.” ³ Hiruuduc Antipac poŋi a ɔɔn acaan wɔɔka gɛɛlti ɛkɛ Yɔhanna muŋŋɛ ḍɛɛŋŋɛ ɔci olnɛ ciginji te jyek Ɛrɔɔdyac ɛŋ mod ɛkkɛn Pilibuc aŋka ɛɛŋ yomɛ pwada. ⁴ Hiruuduc noŋi a ɔɔn acaan Yɔhanna bala gɔki ɛkɛti te ḍɛɛna ḍɛññi ɛkɛ ɛŋ mod ɛkkɛn Pilibuc neeni agi, “Hay, ḍɛɛna ḍɛññi i ɛŋ mod ɛkkɛ wannayɛ, bala ba jyek ganuun bɛɛ. Naŋki i neeni a pɔɔtta.” ⁵ Ɔci te jyeka neeniyɛ, Hiruuduc buagɔn Yɔhanna nogdɛ, yeti ɛkɛ buayi jyek maka coŋin. Maka coŋin neeni bala gɔki agi Yɔhannayɛ, ɛkɛ a bɔwa Jwaŋa Tolan. ⁶ Ɔci oŋŋa Hiruuduc Antipac jietkiti mayɛ, bɛɛni ɔci ɛkɛ noŋi juma. Ɔci kaci Ɛrɔɔdyac kacca ṭɔɔl bala ñiɛli ma ñomgɛnti ne pwadan. Ɔci wɛɛli ɛkɛ pwad pwad Hiruuducti. ⁷ Ɔci Hiruuduc gɔkcin kaciti awarɛ agi, “Kan i buagi genga ‘yatiyɛ, ‘ya i ‘wondin!” ⁸ Ɔci ṭɔɔl tooccin Hiruuducti te jyeka guaŋŋɛ mɛy ɛkkɛn ɛkɛti agi, “‘Ya buaga wyeñ Yɔhanna Mena Buoṭi May! Dala ‘ya eekta wyeñ ɛkɛ te ḍwan acca ɔŋ.” Ɛrɔɔdyac tooccin te wyeñ Yɔhanna a ɔɔn acaan ɛkɛ buagɔn aŋka ŋeeddɛ ɛkɛ ne pwadan a Yɔhanna tuun doki. ⁹ Ɔci Hiruuduc yomɛ yaaññi. Yeti acaan ɛkɛ jiek naŋɛ i ṭɔɔl dokiyɛ, ɔci moki acaan maka wɛlg maka bala omi iki ɛkɛ tieŋŋin jyek ɛkɛyɛ, ɛkɛ gɔkcin mati agi, “Dala Yɔhanna nogdɛ ma.” ¹⁰ Ɛkɛ men gɛɛl cuuññɛ ciginji Yɔhannati, ɔci Yɔhanna wyeñɛ ŋwonnɛ bora, ¹¹ ɔci oonɛ te ḍwan ɔci ‘wonnɛ ṭɔɔlo. Ɔci ṭɔɔl wyeñ Yɔhanna eññɛ mɛɛgɛnti, ɔci ‘wonnɛ ɛkɛ. ¹² Ɔci maka laldɛ Yɔhannayɛ, ɛkkɛn ati ciginji ɔci war Yɔhanna eyɛ, ɔci jokci iñɔ koolji. Ɔci ɛkkɛn ati Yaccu myetkɛ te jyeka neeni. ¹³ Ɔci ne Yaccu tieŋni jyeka neeniyɛ, ɛkɛ bana neeni dalnɛ ɔci ɛkɛ taapcin murkaji ati kuocɔ nona wɔɔganti parɛ. Ne maka a polla tolan neeni tieŋki agi Yaccu attɔyɛ, ɛkkɛn yiŋi booti te ciegɛn, yiŋi nona atti Yaccu neeni. Ɔci maka ciyi yomɔ bonka ḍyɛrintiyɛ, ɛkkɛn ati daŋkun. ¹⁴ Ɔci ne Yaccu tonni bora kwoña parɛtiyɛ, ɛkɛ ma mɔŋnɛ a ḍiɛkan bɛɛ. Ɔci ɛkɛ yomɛ wiak te ɛkkɛn. Ɔci maka coŋɔn neeniyɛ, gɛɛg waakɛn yeyɔ, ɔci ywaŋŋɛ ɛkɛ. ¹⁵ Ɔci ne oŋ unniyɛ, maka laldɛ Yaccu bɛɛn ɛkɛti ɔci gɔkcin ɛkɛti agi, “Nona neeni a wɔɔŋ jiñɛ budan. Ɔci ma ɛɛnɛ coodi doki. Dala i ɛkkɛn cuña ooddi bonka ḍyɛrinti aŋka ɛkkɛn wɛrdi oomdin aŋka amtan ɛkkɛn.” ¹⁶ Ɔci Yaccu gɔkcin ɛkkɛnti agi, “Ma ooddi ɔntɔ ogo? Dala ɛkkɛ ɛkkɛn ‘wondɛ waka amtan.” ¹⁷ Ɔci ɛkkɛn gɔkcin Yaccuti agi, “Ikin balkin byedg ne dɔɔyɔ budan, ɔci yak ṭɔlgɛn a ‘yɛggin ne yyɛɛwɔ.” ¹⁸ Ɔci Yaccu gɔkcin ɛkkɛnti agi, “Waka wanna oodɛ ‘yati wɛnni.” ¹⁹ Ɔci Yaccu gɔkcin mati, ɔci ma cooccin iñɔ lwoma ṭeyan neeni wyeñɛti, ɔci Yaccu byedga ne dɔɔyɔ, ɔci yak ṭɔlgɛnn a ‘yɛggin ne yyɛɛwɔ neeniyɛ, luullɛ bieŋɛti. Ɔci ɛkɛ ñorcin ñaalɔ pɔliji ɔci cɔkcin Juaŋti. Ɔci ɛkɛ oŋ byedg wɛɛnnɛ jitin, ɔci ‘wonnɛ maka laldɛ ɛkɛ, ɔci ‘woñgi ɛkkɛn maka ciyi iñɔ coŋin neeni. ²⁰ Ɔci ma omjin waakɛnda ne ɛkkɛn yɔmki ɔɔn. Ɔci ɛkkɛn tiɛdɛ oomdin, ɔci oomdin ɛkkɛn tiɛtki neeniyɛ, limɛyɔ ma ɔdin kumgin a inyaakkɛn wyetkɛn ne yyɛɛwɔ te byedga ne dɔɔyɔ ɔci te yaka ne yyɛɛwɔ neeni. ²¹ Maka omi oomdin neeniyɛ, ɛkkɛn a ḍiɛkan bɛɛ. Ɛkkɛn kɔɔna kɔɔnno. Maka ‘uay bala a alpn ne dɔɔyɔ (5,000), ɔci moong bala daŋkun, i kɛɛgin moki. ²² Ɔci ne pɛñan Yaccu gɔkcin maka laldɛ ɛkɛti agi, “Ɛkkɛ ɔgdɛ ooddɛ ñamu taaptɛ murkati. Dala ɛkkɛ ooddɛ kuocɔ, ɔci ‘ya polla tolan neeni cuoñña baanji.” ²³ Ɔci ne Yaccu ma cuuññi baanji dokiyɛ, ɛkɛ ati ñaalɔ poom wyeñɛti parɛ aŋka cɔki Juaŋti. Ɔci ne oŋ waŋɛ unniyɛ, ɛkɛ bala nona neeniti parɛ. ²⁴ Ɔci murkayɛ, ɛkɛ bala yeccu galŋ yiɛŋɛji. Ɔci pɔɔgi pieg bala toñi murka ne pɛñan, acaan jwami tol tolo. ²⁵ Ɔci ne tinnɔyɛ, Yaccu bala ati ñaalɔ pieg wyetkɛnti ooddi nona ɛkkɛnti. ²⁶ Ɔci ne ɛkkɛn ɛkɛ yuarkiti baali ati ñaalɔ pieg wyetkɛntiyɛ, ɛkkɛn buayi ne tolan. Ɔci ɛkkɛn yaadan gɔki agi, “Gena ‘yeeññan!” ²⁷ Ɔci ne pɛñan Yaccu gɔkcin ɛkkɛnti agi, “Dala ɛkkɛ yomgɔ tɛya! Naa ɛkkɛ buayɛ bɛɛ. Gena ‘ya!” ²⁸ Ɔci Butruc ṭwokcin ɛkɛti agi, “Ciɛggɔn, kan gena i awarɛyɛ, dala i gɔkka ‘yati aŋka ‘ya bɛɛd iti ñaalɔ pieg wyetkɛnti.” ²⁹ Ɔci Yaccu gɔkcin ɛkɛti agi, “Bɛɛdi.” Ɔci Butruc kooyin bora te murkaji ɔci bala ati ñaalɔ pieg wyetkɛnti noŋi ooddi Yaccuti. ³⁰ Yeti ne ɛkɛ gɔrni jwami tolla toliyɛ, ɛkɛ buañi, ɔci ɛkɛ noŋi luutti iñɔ pietin. Ɔci ɛkɛ yaajjin agi, “Ciɛggɔn, ‘ya magda, hay!” ³¹ Ɔci ne pɛñan Butruc muŋŋɛ Yaccu te bieŋɛ doki. Ɔci Yaccu gɔkcin ɛkɛti agi, “I jyetti ‘yati ne ḍiɛran budan, hay! I buay a ɔɔn ogo?” ³² Ɔci ne ɛkkɛn taapki murkajiyɛ, jwami yɔɔni doki. ³³ Ɔci ɛkkɛn morcin Yaccuti, ɔci gɔki agi, “I a Kaci Jwaŋa Tolan awarɛ hay!” ³⁴ Ɔci ɛkkɛn ati ne dɛñki kwoña parɛti ɔɔn. Ɔci ɛkkɛn totcin bora ban Gɛnɛɛcarɛt. ³⁵ Ɔci maka bana neenitiyɛ, ne ɛkkɛn ma ñiikitiyɛ, ɛkkɛn ma gɛɛg cuuñɛ bonka bala ban ɛkkɛn toŋkɛtiy. Ɔci ɛkkɛn eccin maka waakɛn yeyin. ³⁶ Ɔci ɛkkɛn tooccin Yaccuti agi dala ma bɛya topti bworŋ iti. Ɔci ma bɛɛn ɔci ma topcin bworŋ ɛkɛti ɔci ɛkkɛn waakɛn pwadgin waakɛnda.

¹ Ɔci oŋ gɛɛlti ma Pɛriciin ɔci maka loṭi worga Juaŋyɛ, ɛkkɛn ma gɛɛg bɛɛn te ban Urcaliimji, bɛɛn nona Yaccuti. Ɔci ɛkkɛn tooccin ɛkɛti agi, ² “Maka lala iyɛ, ɛkkɛn noŋi ba jyek yɔrg ikin bɛɛ ogo? Kan ɛkkɛn bala omiyɛ, ɛkkɛn byeŋkɛn luaktan ñamu bɛɛ.” ³ Ɔci Yaccu ṭwokcin ɛkkɛnti agi, “Oŋ ɛkkɛ, ɛkkɛ jyek Juaŋ bɛɛññɛji ɔci ɛkkɛ tiecɛ gena jyek yɔrg ikin waakɛn budan ogo? ⁴ Jwaŋa Tolan gɔki agi, ‘Dala ɛkkɛ tieŋdɛ jyek weyi ɛkkɛ ɔci jyek mɛyi ɛkkɛ ne pwadan.’ Ɔci agi, ‘Kan men gɛɛl gɔki ɔṭi weegɛn ɔci mɛɛgɛnyɛ, agi dala ɛkta tuudɔ.’ ⁵ Yeti ɛkkɛ loṭɛ ma agi kan men gɛɛl ɛkkɛti balki genga aŋka ɛkɛ weegɛn ɔci mɛɛgɛn magdɛ, oŋ yeti kan ɛkɛ gɔkti agi, ‘Gena neeni a gen Jwaŋa Tolan dokiyɛ,’ ⁶ ɛkɛ yaakinti weegɛn ɔci mɛɛgɛn magdɛ te gena neeni moki bɛɛ. Ɛkɛ ɛkkɛn daldɛ amaam budan ɔɔn. Ɔci acaan a ɔŋŋiyɛ, jyek Juaŋ aŋi ba jyeka budan ɛkkɛti doki te naŋki jyek yɔrg ɛkkɛ neeni. ⁷ Ɛkkɛ agɛ laaban! Jyeka guaŋŋɛ Icaaya te baaṭi te naŋka bɛya ne ŋoyɔyɛ, yɔmjin te ɛkkɛ awarɛ! ⁸ Icaaya gɔki agi, ‘Maka neeni gɔki jieyi ‘ya te tuggɛn budan, yeti ɛkkɛn yomgɛn lonɔ ɔntɔ te ‘yati. ⁹ Ɛkkɛn moṭi ‘yati te labjo, ɔci ɛkkɛn loṭi ma te jyeka naŋi ma baan budan, ɔci ɛkkɛn gɔki agi jyeka neeni agi jyek Jwaŋa Tolan!’” ¹⁰ Ɔci Yaccu maka coŋin bornɛ ɔci ɛkkɛn bɛɛn nona ɛkɛti. Ɔci ɛkɛ gɔkcin ɛkkɛnti agi, “Dala ɛkkɛ tieŋdɛ ne pwadan! ¹¹ Waka amtan ma a waka ooddi ma korkɛntiyɛ, ɛkkɛn ma cuultanyɔ bɛɛ. Gena jiek ɔci naŋka bɛya bora te ma yomgɛntiyɛ, gena ɛkkɛn aŋka ma cuultanyɔy.” ¹² Ɔci maka laldɛ Yaccu bɛɛn ɛkɛti ɔci gɔkcin ɛkɛti agi, “Çeej i boki ne ma Pɛriciin looñki te jwalla guaŋŋi i ɛkkɛnti wannayɛ?” ¹³ Ɔci Yaccu ṭwokcin ɛkkɛnti agi, “Janga piinnɛ Wey ɔɔn bɛɛyɛ, ɛkkɛn dɔɔddɛ ɛkɛ bora aŋka baadi. ¹⁴ Ma Pɛriciin neeni ɛkkɛn daltin ikin! Acaan ɛkkɛn bala ba maka ñingɛn ulan ne ɛkkɛn lɔtki yɔtin pookɛn atki amaam ɔci ḍɛɛmki koolji nona ne cyɛɛlɔy.” ¹⁵ Ɔci Butruc gɔkcin Yaccuti agi, “Ɔɔn lwogdɔn te jwalla a caagɔn guaŋŋi i neeni.” ¹⁶ Ɔci Yaccu gɔkcin ɛkɛti agi, “Ɛkkɛ tieŋnɛ jiek ne pwadan men bɛɛ? ¹⁷ Kwoyɛ ɛkkɛ ne waka amtan ma ootti ma korkɛnti ɔci ootti te pɔy ɛkkɛnyɛ? ¹⁸ Jyeka yeyin bɛya te yoma yaayanti. Ɔci jyeka yeyin neeniyɛ, mena gɔki ɛkkɛn neeni cuultanyɔ Jwaŋa Tolan ñamuti. ¹⁹ Waka bɛya bora te ma yomgɛntiyɛ, gena paŋŋa yaayan, ɔci jyek nooŋi mako, ɔci jyek tomi moongo, ɔci jyek wɛljo, ɔci jyek kali waako, ɔci jyek jomi maka pookɛn waakɛn. ²⁰ Naŋka neeniyɛ, ma yiegdi te naŋki ɛkkɛn. Yeti kan men gɛɛl omdi genga ne ɛkɛ byeŋkɛ luaŋŋɛ men bɛɛyɛ, men yaaya te naŋka neeni bɛɛ.” ²¹ Ɔci Yaccu jɔŋŋin te aŋan i maka laldɛ ɛkɛ ɔci ati nona balki bonka ne yyɛɛwɔy. Gena Tayir ɔci Ciḍɔɔn. Ɔci ɛkɛ bala ciyi bonka neeni toŋkɛnti yaakkɛn wɛnan. ²² Ɔci ɛŋ maka ban Kɛnan gɛɛl bɛɛn ɔci bala yaadan boor Yaccu agi, “Ciɛggɔn, Kaci Daawud, dala i yomu pɔkka ‘yati! Kaci ‘ya, kacca ɛɛŋ muŋŋɛ jwaŋa yaayan. Ɔci jwaŋa yaayan neeni bala noŋi ne yaayan ɛkɛti.” ²³ Ɔci Yaccu ṭwokcin ɛkɛti bɛɛ. Ɔci maka laldɛ Yaccu gɔkcin ɛkɛti agi, “Dala i ɛŋa neeni cuuñjayɔ ɔga ooddi ɔntɔ te wɛnni. Ɛkɛ wiak poṭi ikin waakɔ.” ²⁴ Ɔci ɛkɛ ṭwokcin ɛɛŋti agi, “‘Ya, cuonna Juaŋ aŋka mok gena ma Icrayiil maka yien ba kulin neeni pookɛn.” ²⁵ Ɔci ɛŋa neeni orcinti ɛkɛti ɔci morcin ɛkɛti gɔki agi, “Ciɛggɔn, dala ‘ya magda i!” ²⁶ Ɔci Yaccu ṭwokcin ɛkɛti agi, “Kan oomdin kɛɛgin yɛɛptin gɔkiyɛ, a ɔɔn yɔmjin bɛɛ.” ²⁷ Ɔci ɛɛŋ ṭwokcin ɛkɛti agi, “A warɛ Ciɛggɔn, yeti gɔkiyɛ, ɛkkɛn omi oomdin ṭɔlgɛn ḍɛɛmdi iñɔ te weyyɛn byeŋkɛnti bɛɛ?” ²⁸ Ɔci Yaccu ṭwokcin ɛkɛti agi, “Ɛɛŋo, jyenna jyetti i ‘yati neeniyɛ, tolla tollo hay! Naŋka i buagi neeniyɛ, dala bala iti.” Ɔci kaci ɛkɛ warɛ pwani ne pɛñan doki. ²⁹ Ɔci Yaccu jɔŋŋin te aŋan ɔci ɛkɛ ati dɔɔki Galŋ Jaliil ati poom jitin, ɔci cooccin iñɔ ñaalɔ poom ṭɔɔlɛ gɛɛl wyeñɛti aŋan. ³⁰ Ɔci maka coŋin bɛɛn ɛkɛti eccin maka ŋɔr, ɔci maka miŋki maka lɛpɛn yaakinti jiek bɛɛy, ɔci maka pwotko. Maka neeni ḍuacci ma iñɔ Yaccu ñamɛti, ɔci ɛkkɛn ywaŋŋɛ ɛkɛ. ³¹ Ɔci maka coŋin neeniyɛ, ne ɛkkɛn gɔrki maka miŋki maka lɛpɛn yaakinti jiek bɛɛ, ɔci maka byeŋkɛn puottin ɔci maka ciegɛn puottin waakɛn pwatki, ɔci maka ŋɔr atki, ɔci maka ullin balki gɔrki noon dokiyɛ, ɛkkɛn korkɛn buañi noon pwatcin bɛɛ. Ɔci ɛkkɛn bala jieyi Jwaŋa Tolan Jwaŋ ma Icrayiil. ³² Ɔci Yaccu borcin maka laldɛ ɛkɛti agi bɛɛdɔ nona ɛkɛti, ɔci ɛkɛ gɔkcin ɛkkɛnti agi, “‘Ya yomu wiak te maka coŋin neeni acaan ɛkkɛn balgin iki ‘ya wɛnni nink aŋi ne ḍoogɔ doki, ɔci waka amtan ɛkkɛn baaw ɛkkɛnti. ‘Ya ɛkkɛn cundi bonk ɛkkɛn ne ɛkkɛn amɛ koñ a ɔɔn bɛɛ, ɛkkɛn ḍɛɛmdi yomu te koñ dita.” ³³ Ɔci maka laldɛ ɛkɛ ṭwokcin ɛkɛti agi, “Ikin maka coŋin neeni ‘wontin oomdin te aŋɛ ne nona neeni niin a wɔɔŋ budan ɔɔn?” ³⁴ Ɔci Yaccu tooccin ɛkkɛnti agi, “Byedg bala ɛkkɛti a ñiṭin?” Ɔci ɛkkɛn gɔkcin ɛkɛti agi, “Bala ne dɔɔyɔ wyetkɛn ne yyɛɛwɔ, ɔci yak ṭɔlgɛnn a ‘yɛggin gɛɛg bala ne ḍiɛkan daŋkun.” ³⁵ Ɔci ɛkɛ gɔkcin mati agi dala ma coottɔ iñɔ. ³⁶ Ɔci Yaccu byedga ne dɔɔyɔ wyetkɛn ne yyɛɛwɔ neeni luullɛ byeŋkɛti iki yak ṭɔlgɛn daŋkun. Ɔci ne ɛkɛ gɔŋni a pwatcin Juaŋtiyɛ, ɛkɛ oŋ byedg iki yak ṭɔlgɛnn a ‘yɛggin wɛɛnnɛ jitin oŋo. Ɔci ‘wonnɛ maka laldɛ ɛkɛ. Ɔci oomdin eekɛ ma maka ciyi iñɔ neeni. ³⁷ Ɔci ma omi waakɛnda ne ɛkkɛn korkɛn yoŋki ɔɔn. Ɔci oomdin tɛɛti neeniyɛ, limiyɔ ma ɔdin kumgin ne dɔɔyɔ wyetkɛn ne yyɛɛwɔ. ³⁸ Maka omi te oŋŋa wannatiyɛ, ɛkkɛn kɔɔna kɔɔnno. Maka ‘uay bala alpn ne ŋaanɔ (4,000). Ɔci moong bala daŋkun i kɛɛgin. ³⁹ Ɔci maka coŋin neeni cuuññɛ Yaccu baanji, ɔci ɛkɛ taapcin murkaji, ɔci ɛkɛ ati ban Magadɔn taaŋɛti.

¹ Ɔci ma Pɛriciin ɔci ma Cadyuciinyɛ, ɛkkɛn bɛɛn ɛkɛti, ɔci ɛkkɛn bala tooci yieci ɛkɛ a yiiñño. Ɛkkɛn buagɔn dala ɛkɛ ɛkkɛn lɛɛrtɛ naŋka ñyecki ma ɛkɛ naŋka tɛyan te ñaalɔ pɔliji. ² Ɔci Yaccu ṭwokcin ɛkkɛnti agi, “Te oŋ unniyɛ, kan pɔli tid tidyɛ, ɛkkɛ gɔkɛ agi, ‘Ne liidɔyɛ, jwami bala bɛɛ.’ ³ Ɔci te liidɔyɛ, kan pɔli tid tid ɔci kan pɔli wyeñɛ balayɛ, ɛkkɛ gɔkɛ agi jwami bɛya te oŋi i ñaalo. Jyek waka bala pɔlitiyɛ, ŋeejɛ ɛkkɛ, yeti jyek naŋka bɛɛn mati acca neeni aŋka kwoyɛ ɛkkɛ! ⁴ Hay ɛkkɛ maka yeyin maka jyeni ɛkkɛn baaw Juaŋti nɛ! Ɛkkɛ buagɛ lɛɛrtin ‘ya naŋka tɛyan naŋka ñyecki ma ‘ya? A’a, ɛkkɛ yɔɔrdɛ bɛɛ. Acaan jyek Yunaan mena a bɔwa Jwaŋa Tolan bala doki, ɔci yɔmjin doki.” Ɔci ne Yaccu gɔŋni a ɔɔnyɛ, ɛkɛ maka neeni dalnɛ, ɔci ɛkɛ ati nona parɛ. ⁵ Ɔci ɛkkɛn ati kuocɔ iki maka laldɛ ɛkɛ. Ɔci maka laldɛ ɛkɛ wierɛ byedgo. ⁶ Ɔci ne ɛkkɛn balki te galŋji murkaji menyɛ, Yaccu gɔkcin ɛkkɛnti agi, “Dala ɛkkɛ woŋgɔ tiittɛ te ñamg ma Pɛriciin, ɔci moki te ñamg ma Cadyuciin daŋkun.” ⁷ Ɔci maka laldɛ Yaccu bala gɔwwɔ yɔtin pookɛn agi, “Ikin byedg oonin wɛnni bɛɛ.” ⁸ Ɔci ne Yaccu gɔrni ɛkkɛn gɔɔki yɔtin pookɛn te byedg a ɔɔnyɛ, ɔci ɛkɛ gɔkcin ɛkkɛnti agi, “Hay! Ɛkkɛ maka jyeni ɛkkɛn a ḍiɛran nɛ! Te gena yeti ɛkkɛ gɔwwɛ agi byedg baagɔy? ⁹ Ɛkkɛ naŋki ‘ya kwoyɛ men? Ɛkkɛ poŋdɛ te byedga ne dɔɔyɔ wɛɛni ‘ya jitin ɔci ‘woñgan ‘ya maka coŋin, maka a alpn ne dɔɔyɔ (5,000) wanna bɛɛ? Ɛkkɛ woŋgɔ yien te ɔdin coŋin ɔdin kumgin te waka ɛkkɛ tiɛtki wanna? ¹⁰ Ɔci moki ɛkkɛ poŋdɛ te byedga ne dɔɔyɔ wyetkɛn ne yyɛɛwɔ wɛɛni ‘ya jitin, ɔci ‘woñgan ‘ya maka a alpn ne ŋaanɔ wanna bɛɛ? Ɛkkɛ woŋgɔ yien te ɔdin coŋin ɔdin kumgin te waka ɛkkɛ tiɛtki wannayɛ? ¹¹ Ne ‘ya gɔŋna ɛkkɛti te jyek ñamg ɛkkɛ poŋɛ gɔkɛ agi ‘ya gɔkcɔ te jyek byedg woodgɛn ogo? Gɔṭṭɛ, ‘ya ṭɛr ɛkkɛ waakɔ a ṭyɛli te ñamg ma Pɛriciin ɔci te ñamg ma Cadyuciin!” ¹² Ɔci ɛkkɛn oŋ jwali jiñɛ yuarcɛ oŋo. Çeecɔn ɛkkɛn ɛkɛ gɔki ɛkkɛnti te ñamg byedg woodgɛn bɛɛ. Ɛkɛ buagɔn dala ɛkkɛn woŋgɛn tiittan te lali ma Pɛriciin ɔci ma Cadyuciin lalla a damgɔn neeni. ¹³ Ɔci Yaccu jɔŋŋin te aŋan, ɔci ne ɛkɛ dɛnni ban Cɛcariiya Pilibbi taaŋɛtiyɛ, ɛkɛ tooccin maka laldɛ ɛkɛti agi, “Ma gɔki agi ‘ya Kaci Ma Baan agji menɛ?” ¹⁴ Ɔci ɛkkɛn gɔkcin ɛkɛti agi, “Ma gɛɛg gɔki agi i agji Yɔhanna mena buoṭi ma, ɔci maka pookɛn gɛɛg gɔki agi i agji Iliiya, ɔci maka pookɛn gɛɛg gɔki agi i agji Jɛramaaya, ɔci ma gɛɛg gɔki agi i agji bɔwa Jwaŋa Tolan bɔwa pardan gɛɛl moki.” ¹⁵ Ɔci Yaccu tooccin ɛkkɛnti daŋkun agi, “Oŋ ɛkkɛ gɔkɛ ‘ya ag menɛ daŋkun?” ¹⁶ Ɔci Cimaan Butruc ṭwokcin ɛkɛti agi, “I a Kiṭɔ Kaci Jwaŋa Tolan, Jwaŋa tɛɛti neeni.” ¹⁷ Ɔci Yaccu gɔkcin ɛkɛti agi, “Cimaan kaci Yɔhanna, pwatcin ne tolan. I lɛɛrni men baan gɛɛl jwalla neeni bɛɛ. Gena Wey ɔɔn ñaalɔ pɔliji i lɛɛrni jwalla neeniy. ¹⁸ ’Ya gɔkka iti Butruc, ka i ag poomo. Ɔci poma neeni wyeñɛtiyɛ, ‘ya cɔtca kaniica ‘ya. Ɔci kaniica ‘ya neeni war tɛɛn lien bwandɛ. ¹⁹ ’Ya i ‘wondin mɔpta ban cyɛgji Jwaŋa Tolan. Jyeka ḍyɛga i iñɔ ṭɛɛrji wɛnni agi naa ma noŋdɔ bɛɛyɛ, Jwaŋa Tolan daŋkun ɛkkɛn ḍyɛgdɛ ñaalɔ pɔliji. Ɔci jyeka pɔkka i iñɔ ṭɛɛrji wɛnni agi dala ma noŋdɔyɛ, Jwaŋa Tolan daŋkun ɛkkɛn pɔktɛ ñaalɔ pɔliji.” ²⁰ Ɔci ɛkɛ maka laldɛ ɛkɛ myennɛ agi, “Naa ɛkkɛ ma nɔɔttɛ a ‘ya a Kiṭɔ bɛɛ.” ²¹ Ɔci te oŋŋa wannayɛ, Yaccu jɔɔtcin te miti maka laldɛ ɛkɛ te naŋka bɛya ɛkɛti agi, “‘Ya ootta ban Urcaliim, ɔci maka ḍwaŋin aŋan ɔci gaciicin ḍwaŋin Ma Yahuud ɔci maka loṭi worga Juaŋyɛ, ɛkkɛn noŋdi ne yaayan ‘yati. Ɔci ‘ya nokta ɛkkɛn. Yeti gɔṭṭɛ! Ne nink akti ḍoogɔyɛ, ‘ya jɔŋŋa ñaalɔ te lienti moki.” ²² Ɔci Butruc Yaccu eññɛ nona parɛ ɔci gɔkcin ɛkɛti ne pɛñan agi, “Ciɛggɔn, a’a! Naa naŋka neeni bɛya iti oŋgati bɛɛ.” ²³ Yeti Yaccu warɛ yallɛ ɔci gɔkcin Butructi agi, “Hay! Dala i ootta ɔntɔ te ‘yati wɛnni, i gɔk ba Jwaŋa Yaayan! I dɛy ‘ya a ɔɔn ogo? I buagi naŋki Juaŋ bɛɛ. I buagi naŋki ma baan budan!” ²⁴ Ɔci Yaccu gɔkcin maka laldɛ ɛkɛti agi, “Kan men gɛɛl buagɔn bootti ‘yatiyɛ, dala ɛkɛ mwondi te caŋti ñingɛ te war ɛkɛ parɛ, ɔci dala ɛkɛ kakan ɛkɛ luldɛ, ɔci ɛkɛ bɛya bootti ‘yati ne lien bɛɛdi ɛkɛti ɔɔn. ²⁵ Kan mena boottin ‘yati gɛɛl jyek ‘ya daldɛ aŋka naa ɛkɛ nogditi ma bɛɛyɛ, mena neeni yɔɔrdi tɛɛtin baadi bɛɛ neeni bɛɛ. Yeti kan men gɛɛl boottin ‘yati, ɔci noŋdi ba jyek ‘ya, ɔci jyek ‘ya tiidiyɔ, oŋ kan te ɛkɛ noktan ma ɔɔnyɛ, mena neeni aŋka yɔɔrdi tɛɛtin baadi bɛɛ neeni. ²⁶ Kan men gɛɛl balki waka coŋin iñɔ baanji wɛnni ɔci ɛkɛ ḍakti ooddi bana a maañy, oŋ waka bala ɛkɛti neeni yɔmdi te gena? Tɛɛtin baadi bɛɛ neeni ma wɛɛṭi boki? ²⁷ ’Ya Kaci Ma Baan bɛɛd balka war tɛɛn ba war tɛɛn bala Wey ɔɔntiy. Ɔci ‘ya bɛɛdin iki malɛɛkan ‘ya. Ɔci ‘ya ma ‘woñga waak ba naŋki ɛkkɛn, menga da ba naŋki ɛkɛ, ɔci menga da ba naŋki ɛkɛ. ²⁸ Gɔṭṭɛ, ‘ya gɔkka ɛkkɛti awarɛ ka ma gɛɛg bala yɔdgi iki ɛkkɛ wɛnniyɛ, ɛkkɛn tuwa bɛɛ. Yeti te ñamu ɛkkɛn gɔrti oŋŋa ‘ya Kaci Ma Baan bɛɛda agda Ciɛggɔn Tolan.”

¹ Ɔci ne nink ne dɔɔyɔ wilin ne cyɛɛlɔ bɛɛki borayɛ, Butruc ɔci Yaakub ɔci Yɔhanna mod Yaakubnyɛ, ɛkkɛn eññɛ Yaccu poom wyeñɛti pookɛn. Poma neeniyɛ, beñña beñño. ² Ɔci ɛkɛ aaŋŋɛyɔ Jwaŋa Tolan warɛti. Ɔci ɛkɛ ñingɛ galla gali ba oŋ waŋɛ ɔɔn. Ɔci bworŋin ɛkɛ bɔɔna bɔɔn ne pɛñan cier ma ñingɛn ba maaño. ³ Ɔci Iliiya yaakkɛn i Muucayɛ, ɛkkɛn waakɛn lɛɛllɛ bora ɛkkɛnti. Ɔci ɛkkɛn bala gɔwwɔ iki Yaccu. ⁴ Ɔci Butruc gɔkcin Yaccuti agi, “Ciɛggɔn, kan ikin cietin wɛnni oŋkanda a ɔɔn pwatcin hay! Kan pwatcin itiyɛ, dala ‘ya noŋja doŋki ne ḍoogɔ, ɛka ne cyɛɛlɔ te i, ɔci ɛka ne cyɛɛlɔ te Muuca, ɔci ɛka ne cyɛɛlɔ te Iliiya.” ⁵ Ɔci ne ɛkɛ men baali gɔki jiekyɛ, pɔlla bɔwan gɛɛl bɛɛn ɔci ɛkkɛn kwommɛyɔ. Ɔci pwan gɔkkin te pɔliti agi, “Mena neeniyɛ, gena Kaci ‘ya Kacca ana ‘yay. ‘Ya yomu pwanna pwani te ɛkɛ. Dala ɛkkɛ tieŋdɛ jyek ɛkɛ!” ⁶ Ɔci ne maka laldɛ Yaccu tieŋki jyeka neeniyɛ, ɛkkɛn ḍɛɛmdin korkɛn baamjɛ iñɔ ṭɛɛrji acaan ɛkkɛn buayi ne pɛñan. ⁷ Ɔci Yaccu bɛɛn ɔci topcin ɛkkɛnti ɔci gɔkcin ɛkkɛnti agi, “Jɔŋdɛ ñaalɔ, naa ɛkkɛ buayɛ bɛɛ!” ⁸ Ɔci ne ɛkkɛn ñorki ñaalɔyɛ, ɛkkɛn menga yuarcɛ bɛɛ. Yaccu aŋka bala yɔɔd parɛ. ⁹ Ɔci ne ɛkkɛn balki kooti iñɔ te ñaalɔ poom wyeñɛti menyɛ, Yaccu gɔkcin ɛkkɛnti ne pɛñan agi, “Naa ɛkkɛ men gɛɛl myettɛ te naŋka yuarŋɛ ɛkkɛ neeni bɛɛ. Yeti ne ‘ya Kaci Ma Baan jɔlda ñaalɔ te lientiyɛ, ɛkkɛ oŋ ma myettɛ oŋo.” ¹⁰ Ɔci maka laldɛ Yaccu tooccin ɛkɛti agi, “Ne maka loṭi worga Jwaŋa Tolan gɔkki agi Iliiya aŋka bɛɛdɔ ñamu wannay, jyek ɛkkɛn neeni bala a ɔki a ɔɔn?” ¹¹ Ɔci ɛkɛ ṭwokcin ɛkkɛnti agi, “Iliiya bɛya ñamu awarɛ. Ɛkɛ bɛya yɔŋi jiek waakɛnda. ¹² Ɔci ‘ya gɔkka ɛkkɛti ka Iliiya bɛɛn doki. Yeti ɛkɛ ñiyɛ ma bɛɛ. Ɔci ɛkkɛn noŋi ɛkɛti ba yomg ɛkkɛn buagɔn. Ɔci ‘ya Kaci Ma Baanyɛ, ‘ya da naŋta ma ne yaayan ba naŋka naŋɛ ma Iliiyati neeni.” ¹³ Ɔci maka laldɛ Yaccu jyek ɛkɛ jitkɛn yuarcɛ. Ɔci ŋeecɔn ɛkkɛn Yaccu bala gɔki te jyek Yɔhanna mena buoṭi may. ¹⁴ Ɔci ne ɛkkɛn dɛñki non polla tolantiyɛ, mena ‘uan gɛɛl bɛɛn Yaccuti ɔci ḍwoñjin iñɔ ɛkɛ ñamɛti ɔci gɔkcin Yaccuti agi, ¹⁵ “Ciɛggɔn, dala i yomu pɔkka kaci ‘yati. Acaan ɛkɛ naŋi amji leyyo, ɔci ɛkɛ taabbin ne pɛñan. Acaan oŋkanda ɛkɛ warɛ yiɛptɛ maccu ɔci pietin moki. ¹⁶ Ɔci ɛkɛ owwan ‘ya maka lala iti, ɔci ɛkkɛn yaakinti ɛkɛ ywaŋtan bɛɛ.” ¹⁷ Ɔci Yaccu gɔkcin mati agi, “Hay, ɛkkɛ maka ati a damgin maka jyennɛn baaw nɛ, ɛkkɛ baltin iki ‘ya wɛnni yuong aga ne ñiṭin moki? ‘Ya kɛɛjja naŋki ɛkkɛ naŋka pwadin yuong aga ne ñiṭin moki? Kaci owwa ‘yati wɛnni poca!” ¹⁸ Ɔci Yaccu gɔkcin jwaŋa yaayanti ne pɛñan agi, “Kooya bora te kaci yomɛti!” Ɔci jwaŋa yaayan kooyin bora te kaciti doki. Ɔci kaci warɛ pwani ne pɛñan doki. ¹⁹ Ɔci ne jiek baakiyɛ, maka laldɛ Yaccu bɛɛn nona ɛkɛti lieda ɔci tooccin ɛkɛti agi, “Ɔɔn kookɔnti te kooyin jwaŋa yaayan bora ogo?” ²⁰ Ɔci Yaccu gɔkcin ɛkkɛnti agi, “Ɛkkɛ kookɛti acaan jyenna ɛkkɛ jyettɛ ‘yati neeni a ḍyɛṭ ṭɔɔlɛ budan. ‘Ya gɔkka ɛkkɛti awarɛ, kan jyenna ɛkkɛ jyettɛ ‘yati ḍiɛrcin bala ba kɔba waŋɛ ḍiɛran neeniyɛ, ɔci kan ɛkkɛ gɔktɛ poma neeniti agi dala ɛkɛ dɔtti ñaalɔ te wɛnni ooddi warɛ cɔɔttɛ iñɔ aŋanyɛ, ɛkɛ ooddi, genga ɛkkɛ bwandɛ bɛɛ! [ ²¹ Jɔkin yeyin ba jɔkin neeniyɛ, kootan ma bora budan bɛɛ, ɛkkɛn kootan ma bora te cɔŋi ɔci gworŋ koño.]” ²² Ɔci ne ɛkkɛn balki atki a cyɛɛlɔ ban Jaliilyɛ, Yaccu gɔkcin ɛkkɛnti agi, “‘Ya Kaci Ma Baanyɛ, ‘wonta ma ma byeŋkɛnti, ²³ ɔci ‘ya nokta ɛkkɛn, yeti ne nink ne ḍoogɔ baatiyɛ, ‘ya jɔŋŋa ñaalɔ te lienti moki.” Ɔci maka laldɛ Yaccu bala yomgɛn wiak ne pɛñan te jwalla neeni. ²⁴ Ɔci ne ɛkkɛn atki dɛñki ban Kapɛrnyamtiyɛ, maka lyemi bilka ḍuatan ma on Juaŋ ona tolan bɛɛn Butructi, ɔci tooccin ɛkɛti agi, “Mena loṭi ɛkkɛ neeni ɛkɛ ḍɔci tulba ḍuatan ma on Juaŋ ona tolan neeni boki?” ²⁵ Ɔci Butruc ṭwokcin ɛkkɛnti agi, “Ɛɛ.” Ɔci ne Butruc bɛɛni baanjiyɛ, Yaccu tooccin ɛkɛti ñamu agi, “Cimaan Butruc, i poŋ gɔk jiek bala a ɔki? Maka ḍwaŋin iñɔ baanji ṭɛɛrji wɛnniy, ɛkkɛn lyemi tulba te maka bɛti? Ɛkkɛn lyemi tulba te kɛɛgin ɛkkɛn woodgɛnti boki? Walla te maka pookɛnti?” ²⁶ Ɔci Butruc ṭwokcin ɛkɛti agi, “Ɛkkɛn lyemi tulba te maka pookɛnti.” Ɔci Yaccu gɔkcin ɛkɛti agi, “Kan a ɔɔnyɛ, ḍuaŋan ḍwaŋin woodgɛn ciyi budan te wanna neeni daŋkun. ²⁷ Yeti acaan ikin noŋtin aŋka naa ɛkkɛn wookti ikin bɛɛyɛ, dala i ootta galŋji ɔci jibaada yiɛpca pietin. Ɔci yeñña muga i ñamuyɛ, dala i ɛkɛ pɔkka tukɛti ɔci bilk yuara i ɛkɛ tukɛti. Ɛkkɛn eya ḍuacca te tulba ikin yaakkɔ.”

¹ Te oŋŋa wannayɛ, maka laldɛ Yaccu bɛɛn ɛkɛti ɔci tooccin ɛkɛti agi, “A menɛ a mena tolan te ɔɔn ñaalɔ cyɛgji Jwaŋa Tolantiy?” ² Ɔci Yaccu kaci gɛɛl bornɛ ɔci yɔɔnnɛ ɛkɛ yeccu ma ñomgɛnti. Ɔci Yaccu gɔkcin mati agi, ³ “‘Ya gɔkka ɛkkɛti awarɛ, kan ɛkkɛ waakɔ yaldɛ agdɛ ba kɛɛgin ḍyɛrin yomgɔti bɛɛyɛ, ɛkkɛ yaakɛti kaattɛ ñaalɔ non cyɛgji Jwaŋa Tolan bɛɛ! ⁴ Kan men gɛɛl ḍiɛṭ ḍyɛr yomɛti ba kacca neeniyɛ, ɛkɛ a mena tolan ban cyɛgja ñaalɔ pɔliji. ⁵ Kan men gɛɛl kaci gɛɛl mugdɛ ba kacca neeni te yenti ‘yayɛ, ɛkɛ da ‘ya mugda. ⁶ “Kɛɛgin neeni jyeti ‘yati, ɔci kan men gɛɛl noŋdi gena yaayan gɛɛl ɛkkɛnti aŋka ɛkkɛn noŋdi nɔjiyɛ, a ɔɔn pwatcin bɛɛ yaayɛ. Jyeka bɛya mena neeni wyeñɛtiyɛ, pɛñcin ne yaajan te bolji mena ḍɛktan ma poma tolan pom jien ḍwaŋɛti ɔci yiɛptan ma galŋa tolanjiy. ⁷ Hay ɛkkɛ maka bala ṭɛra neeni ŋoyɛti nɛ, ɛkkɛ waakɔ gootti te maali nɔjja neeni ne pɛñan. Ɛɛ! Maali nɔjja neeni bɛya awarɛ. Yeti mena etti jyek maalla neeniyɛ, ɛkɛ daŋkun konɛ ñakti ne tolan. ⁸ “Kan nɔji bala iti te naŋki byeŋ i, walla te naŋki ciy iyɛ, dala i ɛkɛ ŋutca ɔntɔ. Kan war i warda ooddi maccu te gena naŋŋɛ byeŋ i walla ciy iyɛ, a ɔɔn pwatcin bɛɛ. Maña neeni baadi oŋgati bɛɛ. Kan byeŋ i ŋunni ɔntɔ, ɔci i ootta ban Jwaŋa Tolanyɛ, a ɔɔn aŋka pwatcin. ⁹ Kan nɔji bala iti te naŋki waŋ iyɛ, dala i ɛkɛ dɔdda bora yiɛpca ɔntɔ. Kan war i warda ooddi maccu te gena naŋŋɛ waŋ i neeniyɛ, a ɔɔn pwatcin bɛɛ. Kan waŋ i dɔnni bora ɔci i ootta ban Jwaŋa Tolanyɛ, a ɔɔn aŋka pwatcin oŋkanda. ¹⁰ “Dala ɛkkɛ woŋgɔ tiittɛ. Naa ɛkkɛ poŋɛ gɔkɛ agi kɛɛgin ḍyɛrin ɛkkɛn a waka budan bɛɛ. ‘Ya gɔkka ɛkkɛti ka malɛɛkan ɛkkɛn bala ñaalɔ pɔliji ciyi Jwaŋa Tolan ñamɛti. [ ¹¹ Kaci Ma Baan bɛɛn aŋka ɛkɛ yuoci maka yieny.] ¹² “Ɛkkɛ poŋɛ a ɔki? Kan mena ‘uan gɛɛl balki kulin a miyya ne cyɛɛlɔ (100) ɔci kalŋ gɛɛl te makɛn neeniti jyetcin ɔntɔ yieny, ɛkɛ kulin a ma baan ne ŋaanɔ mena parɛ byeŋkɛ ɔci ne dɔɔyɔ wyetkɛn ne ŋaanɔ (99) neeni daldɛ ɛkɛ te poom jitin, ɔci ɛkɛ ooddi lieṭi ɛka yien neeni bɛɛ? ¹³ ’Ya gɔkka ɛkkɛti awarɛ, ne ɛkɛ kalŋ yuardɛyɛ, ɛkɛ yomɛ ñɔya ñɔɔn ne tolan, yom ñɔɔna ɛkɛ yomɛ ñɔyi te kulin a ma baan ne ŋaanɔ mena parɛ byeŋkɛ ɔci ne dɔɔyɔ wyetkɛn ne ŋaanɔ (99) neeniyɛ, bwandɛ yom ñɔɔna ɛkɛ kalŋa neeni yuardɛy. ¹⁴ Mena neeni ani kulin ɛkɛ ne tolan hay! Ɔci ba jyeka neeniyɛ, bala ba jyek Wey ɔɔn ñaalɔ pɔliji. Ɛkɛ ani kɛɛgin ne tolan ɔci buagɔn naa kacca ḍiɛran gɛɛl ḍakti bɛɛ. ¹⁵ “ ‘Ɔci moki kan mod ɛkkɛ men Juaŋ gɛɛl noŋi ne yaayan itiyɛ, dala i ootta ɛkɛti, ɔci ɛkkɛ coottɛ iki ɛkɛ ne ḍiɛran ṭɔɔlɛ. Ɔci i ɛkɛ nɔɔtka te naŋka naŋŋɛ ɛkɛ yaayan neeni.’ Kan ɛkɛ tieŋŋin jyek iyɛ, ɔci mena neeni aŋi ba mod ɛkkɛ doki. ¹⁶ Yeti kan ɛkɛ tieŋdi jyek i bɛɛyɛ, ‘dala i men gɛɛl eya ne cyɛɛlɔ, walla ne yyɛɛwɔ. Ɔci a ɔɔnyɛ, ɛkkɛn tieŋdi jyeka guagdɛ ɛkkɛ waakɛnda. Ɔci jyek ɛkkɛ ŋeettan ma ne pwadan te naŋka wanna.’ ¹⁷ Kan ɛkɛ tieŋdi jyek ɛkkɛn bɛɛyɛ, dala ɛkkɛ ma kaniica myettɛ. Ɔci kan ɛkɛ tieŋdi jyek ma kaniica bɛɛyɛ, dala ɛkɛ daldɛ ɛkkɛ aga ba mena ciyi budan mena jyek Juaŋ kwoyɛ walla maka yeyin a ɛyi maka lyemi tulbay. ¹⁸ “‘Ya gɔkka ɛkkɛti awarɛ, jyeka ḍyɛgdɛ ɛkkɛ iñɔ wɛnni agi naa ma noŋdɔ bɛɛyɛ, Jwaŋa Tolan daŋkun ɛkkɛn ḍyɛgdɛ ñaalɔ pɔliji. Ɔci jyeka pɔktɛ ɛkkɛ iñɔ wɛnni agi dala ma noŋdɔyɛ, Juaŋ daŋkun ɛkkɛn pɔktɛ ñaalɔ pɔliji. ¹⁹ “Gɔṭṭɛ, ‘ya gɔkka ɛkkɛti moki, kan magga te ɛkkɛti wɛnni ne yyɛɛwɔ buagi genga Juaŋti, ɔci kan ɛkkɛn tootti Juaŋti te yoma ne cyɛɛlɔyɛ, ɛkkɛn ‘wondɛ Juaŋo. ²⁰ Kan ma ne yyɛɛwɔ walla ne ḍoogɔ wyetkɛn ḍɔɔlɛ te yenti ‘yayɛ, ɔci ‘ya baal yeccu nona ɛkkɛnti doki.” ²¹ Butruc bɛɛn ɔci gɔkcin ɛkɛti agi, “Ciɛggɔn, kan mod ɔɔn men Juaŋ gɛɛl noŋi ne yaayan ‘yatiy, ‘ya ɛkɛ bɔɔka oŋki ne ñiṭin? ‘Ya ɛkɛ bɔɔka oŋki ne coŋɔn ba oŋki ne dɔɔyɔ wyetkɛn ne yyɛɛwɔ?” ²² Ɔci Yaccu gɔkcin ɛkɛti agi, “‘Ya gɔkka iti, naa i ɛkɛ bɔɔka oŋki ne dɔɔyɔ wyetkɛn ne yyɛɛwɔ budan bɛɛ. Dala i ɛkɛ bɔɔka oŋki a ma baan ne ḍoogɔ mena parɛ byeŋkɛ ɔci ne dɔɔyɔ wyetkɛn ne yyɛɛwɔ (77). ²³ “Jyek cyɛgji Jwaŋa Tolanyɛ, ɛkkɛn bala ba jyek mena a ḍuaŋa tolan gɛɛl ne ɛkɛ balki yɔŋki jyek dɛn bilk iki maka kanŋan ɛkɛtiy. ²⁴ Ne ma coocki iñɔ aŋka gɔrti jiekyɛ, mena balki dɛn bilk ne coŋɔn neeni owwi ma ḍuaŋa ñamɛti. ²⁵ Ɔci mena neeni yaakinti ḍuaŋa tolan ‘wondɛ bilka neeni bɛɛ. Ɔci a ɔŋŋiyɛ, ḍuaŋa tolan gɔkcin mati agi dala ‘wana neeni eetan wiɛltanyɔ ma iki ɛŋ ɛkɛ ɔci kɛɛgin ɛkɛ ɔci mal ɛkɛ waakɛnda aŋka dala ḍuaŋa tolan neeni bilk ɛkɛ dɔɔdɛ bora. ²⁶ “Ɔci ne mena kanŋan ɛkɛti neeni tieŋni jyeka neeniyɛ, ɛkɛ ḍwoñjin iñɔ ḍuaŋa tolan ñamɛti, ɔci ḍɔnjin ɛkɛti agi, ‘Ḍuaŋa tolan, dala i ‘ya ‘wonda wɔɔka ṭɔɔlɛ ne ḍiɛran lakun, acaan ‘ya lierca ɔci i ‘wondin wak i waakɛnda.’ ²⁷ Ɔci ḍuaŋa tolan yomɛ pɔŋnɛ ɛkɛti, ɔci ‘uan bɔɔŋnɛ ɛkɛ te dɛɛn waakɛnda. ²⁸ “Ɔci ‘wana neeniyɛ, ne ɛkɛ kaanni bora te on ḍuaŋa tolantiyɛ, ɛkɛ koogjin iki ‘wana noŋi i ɛkkɛn kanŋa ɛka parɛ. Ɔci ‘wana parɛ neeni balki dɛn bilk ne ḍiɛran ṭɔɔlɛ ɛkɛti budan. Ɔci ɛkɛ ‘wana neeni muŋŋɛ te pwanɛ ɔci gɔkcin ɛkɛti agi, ‘‘Ya ‘wonda bilk ‘ya!’ ²⁹ “Ɔci ‘wana parɛ neeni ḍwoñjin iñɔ ɛkɛ ñamɛti, ɔci ḍɔnjin ɛkɛti agi, ‘‘Ya ‘wonda wɔɔka ṭɔɔlɛ ne ḍiɛran lakun, ɔci i ‘wondin bilk i waakɛnda!’ ³⁰ “Ɔci ɛkɛ yookɔn. Ɔci ‘wana parɛ neeni olnɛ ɛkɛ ciginji ɔci buagɔn ɛkɛ ciya ciginji ne dɛɛn baadi ɔɔn. ³¹ “Ɔci ‘uaya noŋi kanŋa ḍuaŋa tolan ɛkkin pookɛnyɛ, ne ɛkkɛn gɔrki naŋka neeniyɛ, ɛkkɛn yomgɛn yeyɔ ne tolan. Ɔci ɛkkɛn ati ḍuaŋa tolanti, ɔci mena neeni tiagiyɔ ɛkkɛn te jyeka neeni waakɛnda. ³² “Ɔci ḍuaŋa tolan ‘wana neeni bornɛ nona ɛkɛti, ɔci gɔkcin ɛkɛti agi, ‘I ag ‘wana yaayan hay! I bɔɔŋnin ‘ya te dɛn i waakɛnda acaan i baal wiak ‘yati. ³³ Oŋ ba i yomu pɔŋni ɛkɛti daŋkun ba bɔɔkin i bɔɔŋnin ‘ya neeni bɛ?’ ³⁴ Ɔci ḍuaŋa tolan neeni looñi ne pɛñan te naŋki ‘wana neeni. Ɔci ɛkɛ olnɛ ḍuaŋa tolan jiju ciginji, ɔci gɔkcin maka gɔṭi ciginti agi, ‘Dala ɛkɛ ciya jiju ne ‘ya ‘wondata ɛkɛ bilk ‘ya waakɛnda ɔɔn.’ ³⁵ “Gɔṭṭɛ jwali konɛ waanɛti, kan ɛkkɛ modg ɛkkɛ bɔɔktɛ te yoma pwadan bɛɛyɛ, ɔci Wey ɔɔn noŋdi ɛkkɛti ba naŋki ḍuaŋa tolan neeni daŋkun.”

¹ Ɔci ne Yaccu ḍookki te lali jyeka neeniyɛ, ɛkɛ ban Jaliil dalnɛ, ɔci ɛkɛ ati Tol Urdun jyɛnnɛji ati ṭɛr Ma Yahuudiya nona bala tool taaŋŋa waayitiy. ² Ɔci ma bootcin ɛkɛti kɔɔna kɔɔnno. Ɔci maka waakɛn yeyin ɛkkɛn ywaŋŋɛ ɛkɛ bana waayiti. ³ Ɔci ma Pɛriciin bɛɛn ɛkɛti, ɔci bala tooci yieci ɛkɛ. Ɛkkɛn tooccin ɛkɛti agi, “Kan mena ‘uan ɛŋ ɛkɛ daldɛ te jwali gɛɛly, a ɔɔn bala ba jyek ganuun Muuca bɛɛ?” ⁴ Ɔci Yaccu ṭwokcin ɛkkɛnti agi, “Ɛkkɛ pokkɛ jyeka kiigin boki? Jyeka neeni gɔki agi, ‘Oŋŋa ma aŋŋɛ Jwaŋa Tolanyɛ, mena ne cyɛɛlɔ aŋŋɛ ɛkɛ a ‘uan ɔci mena parɛ aŋŋɛ ɛkɛ a ɛɛŋo.’ ⁵ Ɔci jyeka kiigin moki gɔki agi, ‘A ɔŋŋiyɛ, ne mena kaalgɔn ḍɛɛdi ɛɛŋyɛ, ɛkɛ on weegɛn ɔci mɛɛgɛn daldɛ, ɔci ɛkɛ ciyi iki ɛŋ ɛkɛ a cyɛɛlɔ. ⁶ Acaan, ɛkkɛn yaakkɛn aŋi ba mena ne cyɛɛlɔ doki, a yyɛɛwɔ moki bɛɛ. A ɔŋŋiyɛ, maka ñaaŋŋɛyɔ Jwaŋa Tolanyɛ, naa menga ɛkkɛn kɛbdɛ jitin moki bɛɛ.” ⁷ Ɔci maka neeni tooccin Yaccuti agi, “Oŋ Muuca gɔki agi kan mena ‘uan ɛŋ ɛkɛ dalnɛyɛ, dala ɛkkɛn byeŋkɛn tantan ɔci ɛkɛ ɛɛŋ ‘wondɛ worga doortin ogo?” ⁸ Ɔci Yaccu ṭwokcin ɛkkɛnti agi, “Muuca jyek doortin i moong neeni kiinɛ ɛkɛ acaan ɛkkɛ wyetkɔ tɛy tɛyo. Yeti te ñamu jyeka naŋŋɛ Juaŋ bala a ɔɔn bɛɛ. ⁹ Ɔci ‘ya gɔkka ɛkkɛti, kan ɛɛŋ noŋi tomi bɛɛ, ɔci kan ɛkɛ daldɛ ‘war ɛkɛ te jwalla parɛ gɛɛl, ɔci ‘wana neeni ḍɛɛdi ɛŋa parɛyɛ, a ɔɔn ɛkɛ noŋi tommo. Ɔci kan ɛŋa dalnɛ ‘war ɛkɛ neeni ḍɛɛnɛ ‘wana parɛyɛ, ‘wana parɛ neeni noŋi tomi ɛŋa neeniti.” ¹⁰ Ɔci ne Yaccu ḍookkiyɛ, maka laldɛ ɛkɛ gɔkcin ɛkɛti agi, “Oŋ kan jiek bala a ɔɔn te mena ‘uan ɔci ɛŋ ɛkɛy, coodda ma cieti budan te ḍɛɛn aŋka yɔmjin bɛɛ?” ¹¹ Yaccu ṭwokcin ɛkkɛnti agi, “Ma waakɛnda yaakinti jyeka neeni muktan bɛɛ. Gena maka ‘wonnɛ Jwaŋa Tolan jyeka neeni aŋka noŋdi ba jyeka neeniy. ¹² Maka ‘uayi gɛɛg ḍɛñi bɛɛ acaan naŋki jitkɛn bala coŋɔ. Ɛkkɛn gɛɛg ḍɛñi bɛɛ acaan ɛkkɛn jiedɛ ma a luoko, ɔci ɛkkɛn gɛɛg ḍɛñi bɛɛ acaan ɛkkɛn yuyɛ mako, ɔci ɛkkɛn gɛɛg ḍɛñi bɛɛ te jyek cyɛgji Jwaŋa Tolan acaan ɛkkɛn buagɔn noŋdi kanŋa ne pwadan. Mena lalla neeni mugdɛ yomɛtiyɛ, dala ɛkɛ noŋdi a ɔɔn.” ¹³ Ɔci ma bala etti kɛɛgin ḍyɛrin Yaccuti. Ɛkkɛn buagɔn dala ɛkɛ ɛkkɛn ordɛyɔ. Yeti maka laldɛ Yaccu kɛkcin maka neeniti. ¹⁴ Ɔci ne ɛkkɛn kɛkki a ɔɔnyɛ, ɛkɛ gɔkcin ɛkkɛnti ne pɛñan agi, “Dala kɛɛgin daldɛ bɛya ‘yati. Naa ɛkkɛ kɛkɛ ɛkkɛn a ɔɔn bɛɛ, acaan jyek cyɛgji Jwaŋa Tolanyɛ, gena jyek maka bala ba ɛkkɛn ɔɔn.” ¹⁵ Ne Yaccu byeŋkɛ tannɛ kɛɛginti dokiyɛ, ɛkɛ oŋ ati bana parɛti oŋo. ¹⁶ Ɔci ‘wana ḍiɛran gɛɛl bɛɛn Yaccuti ɔci tooccin ɛkɛti agi, “Mena loṭi may, ‘ya noŋja naŋka pwadan naŋka ɔki aŋka tɛɛtin baadi bɛɛ neeni bɛɛdi ‘yatiy?” ¹⁷ Ɔci Yaccu ṭwokcin ɛkɛti agi, “I tooc ‘yati te jyek naŋka pwadan neeni ogo? Mena pwadan gɛɛl bala boki? Gena Jwaŋa Tolan parɛ aŋka pwadany. Kan i buagi tɛɛtin wannayɛ, dala i jyek ganuun jitkɛn tiyayɔ.” ¹⁸ Ɔci ‘uan tooccin Yaccuti agi, “Ganuun jitka bɛ?” Ɔci Yaccu gɔkcin ɛkɛti agi, “ ‘Naa i menga noga bɛɛ, naa i noŋja tomi bɛɛ, naa i kor waak bɛɛ, naa i men gɛɛl jomgayɔ bɛɛ. ¹⁹ Dala i noŋja ne pwadan weegɔti ɔci mɛɛgɔti.’ Ɔci ‘Dala anna i ani mena parɛyɛ, yoomdi i anna i ani war iy.’” ²⁰ Ɔci ‘wana ḍiɛran neeni gɔkcin Yaccuti agi, “‘Ya baal tiec jyeka neeni waakɛn ne ‘ya wona ḍiɛra men ɔɔn. Jiek tiiñiyɔ ‘ya waakɛnda, jwali gɛɛl daljan ‘ya ɔntɔ te tiit bɛɛ. Ɔci acca jwalla parɛ gɛɛl bala boki?” ²¹ Ɔci Yaccu gɔkcin ɛkɛti agi, “Kan i buagi pwadi ne tolan Juaŋ ñamɛtiyɛ, dala i ootta wak i wiɛlja ñin waakɛnda ɔci bilk ḍierga maka bɔwan aŋka i balti maal ñaalɔ pɔliji, hayya i oŋ bɛɛd bootta ‘yati oŋo.” ²² Yeti ne ɛkɛ tieŋni a ɔɔnyɛ, ɛkɛ yomɛ yaañi ɔci ɛkɛ Yaccu dalnɛ ɔci ɛkɛ atti. Ɛkɛ yomɛ yaayɛ acaan ɛkɛ balki waak ne coŋɔn, ɔci buagɔn ɛkkɛn wiɛldɛ ñin bɛɛ. ²³ Ɔci Yaccu gɔkcin maka laldɛ ɛkɛti agi, “Maka cyɛganyɛ, bolja ɛkkɛn Jwaŋa Tolan naŋtiti agdi Ciɛggɔn ɛkkɛnyɛ, tɛy tɛyo. ²⁴ ’Ya gɔkka ɛkkɛti moki, ka wɔtcin kolŋan wɔtti ibra waŋɛtiyɛ, koocin te bolja mena maalɛ tolan Jwaŋa Tolan naŋdi agdi Ciɛggɔn ɛkɛy.” ²⁵ Ɔci maka laldɛ Yaccu ne ɛkkɛn tieŋki jyeka neeniyɛ, ɛkkɛn korkɛn buañi ne pɛñan, ɔci tooccin Yaccuti agi, “Oŋ kan a ɔɔny, a menɛ uday?” ²⁶ Ɔci Yaccu gɔrcin ɛkkɛnti ɔci gɔkcin agi, “Ma baan yaakinti waakɛn ootan iñɔ bɛya ɛkɛ bieŋɛti pookɛn bɛɛ. Jwaŋa Tolan aŋka yaakinti ɛkkɛn magdɛ. Acaan Jwaŋa Tolanyɛ, ɛkɛ tɛɛkti genga bɛɛ.” ²⁷ Ɔci Butruc gɔkcin Yaccuti agi, “Gɔṭṭi, ɔɔnyɛ, ɔɔn waak dalnɔn waakɛnda, ɔci ɔɔn boonnɔn iti doki. A gena a gena pwadan bɛya ɔɔnti te naŋka neeniy?” ²⁸ Ɔci Yaccu gɔkcin ɛkkɛnti agi, “Tieŋdɛ ‘ya gɔkka ɛkkɛti awarɛ, ne ṭɛɛr agdiyɔ Juaŋ agdi ṭɛra woonɛ, ɔci ne ‘ya Kaci Ma Baan cootta kaakci ‘ya kaakci cyɛgjiti ñaalɔyɛ, ɛkkɛ da coottɛ kokin ḍuaŋan ḍwaŋinti kokin a inyaakkɛn wyetkɛn ne yyɛɛwɔ neeniti. Ɔci ɛkkɛ gɔrtɛ jyek ma ikin ma Icrayiil maka kɛɛna a inyaakkɛn wyetkɛn ne yyɛɛwɔ neeniy. ²⁹ Ɔci maka oorg ɛkkɛn dalji ɔci modg ɛkkɛn dalji, ɔci kowi ɛkkɛn dalji, ɔci weyi ɛkkɛn dalji, ɔci mɛyi ɛkkɛn dalji, ɔci yelk ɛkkɛn daljɛ te jyek ‘yayɛ, ɛkkɛn ‘wondɛ Juaŋ waak ne coŋɔn. Ɔci tɛɛtin baadi bɛɛyɛ, bala ɛkkɛnti. ³⁰ Maka coŋin maka bala ñamu accayɛ, ne baaṭi ɛkkɛn gɛɛg bala ŋoyɔ. Ɔci maka bala ŋoyɔ accayɛ, ɛkkɛn aŋka gɛɛg bala ñamu.

¹ “Jyek cyɛgji Jwaŋa Tolanyɛ, ɛkkɛn bala ba jyek mena jɔŋŋin ati te liid ṭɔɔl ḍiɛran ati lieṭi maka noŋi kanŋa bal ɛkɛ bal luutkiny. ² Ɔci ma gɛɛg yuarŋɛ ɛkɛ. Ɔci ɛkɛ jiek naŋɛ iki ɛkkɛn agi te oŋ jiña ne cyɛɛlɔ agi ɛkɛ ɛkki ‘woñji ḍeyyan mɛɛgdan ne cyɛɛlɔ. Ɔci ne ɛkkɛn jiek ḍaakkitiyɛ, ɛkɛ oŋ ɛkkɛn cuuññɛ balji oŋo. ³ Ɔci ne oŋ waŋɛ kuani ñaalɔyɛ, ɛkɛ ati lieṭi ma kanŋa moki. Ɔci ma gɛɛg mɔŋnɛ ɛkɛ bala yɔdi a yɔɔdi budan dukkan jitin. ⁴ Ɔci ɛkɛ gɔkcin ɛkkɛnti agi, ‘Dala ɛkkɛ ooddɛ ‘ya noŋdata kanŋa bal ‘ya daŋkun. Ɔci ‘ya ɛkkɛ ‘wondin bilk ne pwadan.’ Ɔci ɛkkɛn atti. ⁵ Ɔci ne oŋ waŋɛ yɔɔnni yeccu moki, ɛkɛ ati bora ɔci gɔkcin mati a ɔɔn, ɔci ɛkkɛn jyeti moki. Ɔci moki ne oŋ warɛ yiɛnnɛyɛ, ɛkɛ ati bora ɔci gɔkcin maka pookɛnti a ɔɔn moki ɔci ɛkkɛn jyeti daŋkun. ⁶ Ɔci moki ne oŋ waŋɛ unniyɛ, ɛkɛ ati bora moki, ɔci maka pookɛn gɛɛg mɔŋnɛ ɛkɛ yɔdi a yɔɔdi budan moki. Ɔci ɛkɛ tooccin ɛkkɛnti agi, ‘Ɛkkɛ yɔdgɛ a yɔɔdi budan a ɔɔn ogo?’ ⁷ Ɛkkɛn ṭwokcin ɛkɛti agi, ‘Men gɛɛl ɔɔn ‘wonnɔn kanŋa bɛɛ.’ Ɔci ɛkɛ gɔkcin ɛkkɛnti agi, ‘Dala ɛkki ɔgdɔ ooddɔ kandɔ bal ɛkɛti daŋkun.’ ⁸ “Ɔci ne oŋ waŋɛ unniyɛ, bal weegɛn gɔkcin mena gɔṭi ma kanŋa neeniti agi, ‘Dala ma kanŋa ‘woñga bilk waakɛnda. Dala i jɔɔtca ‘woñja te maka bɛɛn ne ŋoyɔ, ne maka bɛɛn ñamuti ɔɔn.’ ⁹ Maka bɛɛn kanŋati ne oŋ utcinyɛ, ɛkkɛn ‘wonnɛ ɛkɛ ḍeyyan mɛɛgɛn ne cyɛɛlɔ waakɛnda. ¹⁰ Ɔci ne maka ñamu bɛɛkiyɛ, ɛkkɛn bala poŋi gɔki agi ɛkkɛn dita eedinti bilk ne coŋɔn, yeti ɛkkɛn waakɛndayɛ, menga da eci ḍeyyan mɛɛgɛn ne cyɛɛlɔ budan. ¹¹ Ɔci ɛkkɛn bilk eyɛ, ɔci ɛkkɛn bala wooki on weegɛn agi, ¹² ‘Maka bɛɛn ŋoyɔ neeniyɛ, ɛkkɛn noŋi kanŋa ba oŋ waŋɛ ne cyɛɛlɔ budan. Ɔci ɔɔnyɛ, ɔɔn balgɔn kanŋɔn kanŋa tɛyan, ɔci oŋ waŋɛ moki myɛlla myɛli ɔɔnti. Oŋ i ɔɔn ‘wondɔn pordɔn a porti i ɛkkɛn ogo?’ ¹³ Ɔci on weegɛn gɔkcin men gɛɛlti te maka neeniti agi, ‘Mug ɔɔn, ‘ya noŋi gena yaayan gɛɛl iti bɛɛ. Ikin jyek bilk naŋŋin a cyɛɛlɔ te ñamu te ḍeyyan mɛɛgɛn bɛɛ? ¹⁴ Dala wak i lula ɔci i ɔgdi ootta, ‘ya buaga mena bɛɛn ŋoyɔ neeni ‘woñga ba ‘woñgin i ‘wonnin ‘ya neeni ɔɔn. ¹⁵ ’Ya yaakati noŋja ba yom ‘ya paru te wak ‘ya bɛɛ? Kan ‘ya yomu pɔkkan mena parɛ neenitiy, a jyek i?’” ¹⁶ Ɔci Yaccu gɔkcin agi, “Ba naŋka neeniyɛ, dala ŋeeddɛ ɛkkɛ, ma gɛɛg a maka te bala ñamuyɛ, ɛkkɛn aŋka bala ŋoyɔ, ɔci ma gɛɛg a maka te bala ŋoyɔyɛ, ɛkkɛn aŋka bala ñamu.” ¹⁷ Yaccu bala pɔɔjɔ ooddi ban Urcaliim. Ɔci ne ɛkɛ baali yomɔ menyɛ, ɛkɛ maka laldɛ ɛkɛ a inyaakkɛn wyetkɛn ne yyɛɛwɔ eññɛ nona parɛti pookɛn. Ɔci ɛkɛ gɔkcin ɛkkɛnti agi, ¹⁸ “Gɔṭṭɛ, ikin oottin ne dɛntin ban Urcaliimyɛ, ‘ya Kaci Ma Baan ‘wonta ma gaciicin ḍwaŋin Ma Yahuud, ɔci maka loṭi worga Juaŋ byeŋkɛnti doki. Ɔci ɛkkɛn noŋdi godan ‘yati, ɔci te jyek godan neeniyɛ, ɛkkɛn gɔkti agi dala ‘ya tuudjɔ. ¹⁹ Ɔci ‘ya ‘wonta ɛkkɛn ackan ma Ḍɔɔm byeŋkɛnti moki. Ɔci ɛkkɛn ñieddi te ‘ya ɔci ‘ya ḍuata ɛkkɛn. Ɔci ‘ya ŋaapta ɛkkɛn. Yeti ne nink ne ḍoogɔ bɛɛti borayɛ, ‘ya jɔlla ñaalɔ te koolji moki. Gena jyek ‘ya neeni.” ²⁰ Ɔci te oŋŋa wannayɛ, ɛŋ Jɛbadi bɛɛn Yaccuti iki kɛɛgin ɛkɛ kɛɛgin a ‘uayo. Ɔci ɛkɛ ḍwoñjin iñɔ Yaccu ñamɛti ɔci tooccin Yaccuti te jwali gɛɛl. ²¹ Ɔci Yaccu gɔkcin ɛɛŋti agi, “I buagi gena?” Ɔci ɛkɛ gɔkcin ɛkɛti agi, “Oŋŋa i agdi Ciɛggɔn Tolanyɛ, dala i kɛɛgin ‘ya neeni naŋa a ma i waru, mena ne cyɛɛlɔ te byeŋa byerɔn, ɔci mena ne cyɛɛlɔ te byeŋa aamo.” ²² Ɔci Yaccu gɔkcin ɛkkɛnti agi, “Hay, taata toocɛ ɛkkɛ neeni jiek jitkɛn ŋeejɛ ɛkkɛ ne pwadan bɛɛ. Ɛkkɛ yaakɛti mottɛ kubaaya taab kubaaya maadi ‘ya neeni boki?” Ɔci ɛkkɛn ṭwokcin ɛkɛti agi, “Ɛɛ, ɔɔn yaakɔnti.” ²³ Ɔci Yaccu gɔkcin ɛkkɛnti agi, “Ne baaṭi ɛkkɛ mottɛ kubaaya taab ‘ya awarɛ, yeti a ‘ya ɛkkɛ ‘wondin jyek coodda ɛkkɛ coottɛ ‘ya byeŋkuti bɛɛ. Maka buagɛ Wey ɔɔnyɛ, ɛkkɛn aŋka ‘wondɛ ɛkɛ nona neeni.” ²⁴ Ɔci ne maka laldɛ ɛkɛ maka a inyaakkɛn neeni tieŋki jyeka neeniyɛ, ɛkkɛn looñi modga neeniti. ²⁵ Ɔci Yaccu ma bornɛ agi dala ɛkki bɛɛdɔ nona ɛkɛti. Ɔci ɛkkɛn ati nona ɛkɛti. Ɔci ɛkɛ gɔkcin ɛkkɛnti agi, “Gɔṭṭɛ, paŋi ḍuaŋan ḍwaŋin ḍuaŋan keedin iñɔ ṭɛɛrji wɛnni ŋeejɛ ɛkkɛ boki? Ɛkkɛn poŋi gɔki agi ɛkkɛn aginti maka ḍwaŋin. Ɔci ɛkkɛn buagɔn dala ma waakɛnda noŋdi ba jyek ɛkkɛn. Ɔci maka ḍwaŋinyɛ, ɛkkɛn gɔki mati ne pɛñan te jyeka ɛkkɛn buagiti naŋtan may. ²⁶ Yeti naa ɛkkɛ noŋdɛ ba naŋka neeni a ɔɔn bɛɛ. Kan men gɛɛl ɛkkɛti buagɔn aga mena tolanyɛ, dala ɛkɛ noŋdi ba ne ɛkɛ agi mena kanŋan ɛkkɛti ɔɔn. ²⁷ Ɔci kan mena buagɔn aga mena bala ñamu ɛkkɛtiyɛ, dala ɛkɛ noŋdi ba mena kɛɛngɔn ma waakɛnda. ²⁸ Bala ba ‘ya Kaci Ma Baan ne bɛɛna iñɔyɛ, naŋki ‘ya bala a ɔɔn daŋkun. ‘Ya bɛɛn aŋka ma moki ‘ya bɛɛ. Yeti ‘ya bɛɛn aŋka ‘ya mok mako. ‘Ya bɛɛn won maka coŋin te yimg ‘ya.” ²⁹ Ɔci ne Yaccu kaanni bora te ban Jɛrikɔyɛ, ma bootcin ɛkɛti kɔɔna kɔɔnno. ³⁰ Ɔci maka ullin bala ciyi pɔy taaŋɛti ne yyɛɛwɔ. Ɔci ne ɛkkɛn tieŋki agi Yaccu bɛɛdɔ gordɔ te pɔya neeniyɛ, ɛkkɛn yaajjin ne tolan agi, “I, Ciɛggɔn, Kaci Daawud, dala i yomu pɔkka ɔɔnti ɔci ɔɔn pɔktɔn ñingɔti!” ³¹ Ɔci polla tolan neeni bala dɛyi ɛkkɛn agi dala ɛkki ciedɔ lieda. Yeti ɛkkɛn cien lieda bɛɛ. Ɛkkɛn bala yaadan a yook ɔɔn agi, “I Ciɛggɔn, Kaci Daawud, dala i yomu pɔkka ɔɔnti!” ³² Ɔci Yaccu yɔɔni, ɔci ɛkɛ maka ullin neeni bornɛ, ɔci ɛkkɛn bɛɛn ɛkɛti. Ɔci Yaccu tooccin ɛkkɛnti agi, “Ɛkkɛ buagɛ ‘ya noŋja a ɔki ɛkkɛti?” ³³ Ɔci ɛkkɛn ṭwokcin ɛkɛti agi, “Ciɛggɔn, dala i ɔɔn pɔktɔn woŋgɔti!” ³⁴ Ɔci Yaccu yomɛ wiak te ɛkkɛn, ɔci ɛkɛ topcin ɛkkɛn woŋgɛnti, ɔci ne pɛñan ɛkkɛn yaakinti gwali noon doki. Ɔci ɛkkɛn bootcin Yaccuti doki te pɔɔjɔ ɔɔn.

¹ Ɔci ne Yaccu i maka laldi ɛkɛ cɔɔlki ban Urcaliimyɛ, ɛkkɛn bɛɛn baan gɛɛl bala yomɔ pom Jɛtuun taaŋɛti yenti Bɛtpɛɛj. Ɔci maka laldɛ Yaccu gɛɛg cuuññɛ ɛkɛ ne yyɛɛwɔ. ² Ɔci ɛkɛ gɔkcin ɛkkɛnti agi, “Ɔgdɛ ooddɛ pɔya eetan ma bana neeniti, ɔci ne ɛkkɛ dɛndɛ bana neenitiyɛ, tɔɔrɔn mɔktɛ ɛkkɛ i ṭɔl ɛkɛ bala wiɛntan ma aŋan. Dala ɛkkɛ tɔɔrɔn neeni gwottɛ ɔci oodɛ ‘yati. ³ Ɔci kan men gɛɛl tootti ɛkkɛti agi ɛkkɛ noŋjɛ agi ɔɔn ogoyɛ, dala ɛkkɛ gɔktɛ ɛkɛti agi, ‘Ciɛggɔn buagɔn ɛkkɛn,’ ɔci tɔɔrɔn dɔɔdɛ ɛkɛ ne pɛñan.” ⁴ Jyek naŋka neeni bɛɛn bora ba jyeka guaŋŋɛ bɔwa Jwaŋa Tolany. Bɔwa Jwaŋa Tolan gɔki agi, ⁵ “Dala ɛkkɛ ma Urcaliim myettɛ agi, ‘Gɔṭṭɛ, Ciɛggɔn Tolan ɛkkɛ bala bɛya ɛkkɛti. Ɛkɛ noŋi warɛ bɛɛ, ɛkɛ bala taap te tɔɔrɔn ṭɔɔlɛ.’” ⁶ Ɔci maka laldɛ Yaccu atti. Ɔci ɛkkɛn bala noŋi ba jyeka guaŋŋɛ Yaccu ɛkkɛntiy. ⁷ Ɛkkɛn tɔɔrɔn owwɛ i ṭɔl ɛkɛ ɔɔn. Ɔci bworŋin ɛkkɛn ḍuacci tɔɔrɔn ṭɔɔlɛ ŋoyɛti. Ɔci Yaccu taapcin ñaalɔ. ⁸ Ɔci maka coŋin maka pookɛn bworŋin ɛkkɛn cyɛtci pɔy konɛti aŋka noŋdi ɛkɛti ba mena tolan. Ɔci maka pookɛn lɛɛwin aamk jang te bora, ɔci owwɛ cyɛtci ma pɔɔjɔ pɔy konɛti aŋka noŋdi ɛkɛti ba mena tolan. ⁹ Ɔci ma gɛɛg bala wɛɛyi ñamu. Ɔci maka pookɛn bootcin ɛkɛ ŋoyɛti. Ɔci ɛkkɛn yaadan gɔki agi, “Mena bala ñaalɔy, dala i yuoc ɔɔn acca! Dala ma jieyi i! I a Kiṭɔ Kaci Daawud! Mena bɛya te yenti Jwaŋa Tolan neeniyɛ, dala i cied ne pwadan! Dala i yuoc ɔɔn acca! Dala Juaŋ jiɛtan ma!” ¹⁰ Ɔci ne Yaccu dɛnni ban Urcaliimyɛ, maka ciyi aŋan bala gɔki te jyek Yaccu waakɛnda agi, “Mena neeni a menɛ?” ¹¹ Ɔci ma bala gɔki agi, “Mena neeniyɛ, ɛkɛ a bɔwa Jwaŋa Tolan. Gena Yaccu mena bɛɛn te ban Najarɛt ban Jaliiljiy.” ¹² Ɔci Yaccu kaaccin orɔ on Juaŋ ona tolan. Ɔci ɛkɛ maka wɛɛṭi waak neeniyɛ, ŋualnɛ bora. Ɔci ɛkɛ tarabɛɛcan ḍorki ma girin neeniyɛ, jitkɛn baamnɛ iñɔ. Ɔci wak maka wɛɛṭi boobgyɛ, jitkɛn moki baamnɛ iñɔ. ¹³ Ɔci ɛkɛ gɔkcin ɛkkɛnti agi, “Jwaŋa Tolan gɔki worgaji agi, ‘On ‘ya a ona cɔkki may,’ yeti ‘On ɛkɛ naŋŋɛ ɛkkɛ a ona cieki maka ɛyyo!’” ¹⁴ Maka ullin ɔci maka ŋɔr ɛkkɛn bɛɛn Yaccuti on Juaŋ ona tolan ɔci ɛkɛ ɛkkɛn ywaŋŋɛyɔ. ¹⁵ Yeti ne gaciicin ḍwaŋin ɔci maka loṭi worga Jwaŋa Tolan gɔrki naŋka naŋŋɛ Yaccu pwadan, ɔci moki ne ɛkkɛn tieŋki kɛɛgin balki yaadki agi, “Hay i kaci Daawud! Dala ma jieddi i,” Ɛkkɛn looñi ne pɛñan te naŋka neeni. ¹⁶ Ɔci ɛkkɛn gɔkcin Yaccuti agi, “I tieŋni jyeka guaktan kɛɛgin te i neeni bɛɛ?” Ɔci Yaccu ṭwokcin ɛkkɛnti agi, “Ɛɛ, ‘ya tieŋŋan. Ɛkkɛ pokkɛ jyeka kiigin jyeka gɔki te naŋka neeni bɛɛ? Jyeka kiigin gɔki agi, ‘Te naŋki Juaŋyɛ, kɛɛgin ḍyɛrin kɛɛgin niɛd mɛyyɛnti menyɛ, ɛkkɛn jieddi Juaŋ ne pwadan te tugi ɛkkɛn.’” ¹⁷ Ɔci Yaccu maka neeni dalnɛ ɔci ɛkɛ ati kaaccin bora te bana tolan neeniti, ɔci ɛkɛ ati ban Bɛtani ɔci ɛkɛ niini wɛnan. ¹⁸ Ɔci oŋŋa parɛ te liidɔyɛ, Yaccu bala pɔɔjɔ noŋi dɔɔkti bana tolanti moki, ɔci ɛkɛ amɛ koño. ¹⁹ Ɔci ɛkɛ ŋuami gɛɛl yuarnɛ pɔy taaŋɛti, ɔci ɛkɛ ati orcinti ŋuamiti, ɔci bala gɔṭi ɛkɛ, ɔci ɛkɛ yɔṭi ŋuami ṭɔlgɛ gɛɛg bɛɛ. Ɛkɛ yɔṭi gena jyeyi budan. Ɔci Yaccu gɔkcin jaanti agi, “Naa i jiedi ṭɔlgi ywongati moki bɛɛ.” Ɔci ne pɛñan jaan iini. ²⁰ Ɔci maka laldɛ Yaccu ne ɛkkɛn gɔrki naŋka neeniyɛ, ɛkkɛn korkɛn buañi ɔci ɛkkɛn gɔki agi, “Jana neeni iin ne pɛñan a ɔɔn ogo?” ²¹ Ɔci Yaccu ṭwokcin ɛkkɛnti agi, “‘Ya gɔkka ɛkkɛti awarɛ, kan ɛkkɛ jyeddɛ ne pwadan ɔci tiekɛ jiek yomgɔti bɛɛyɛ, ɛkkɛ yaaktɛti noŋdɛ ba naŋka naŋi ‘ya ŋuamiti neeni. Ɔci ɛkkɛ yaaktɛti naŋka neeni parɛ bɛɛ. Kan ɛkkɛ jyeddɛ ne pwadan ɔci gɔktɛ poma neeniti agi ɛkɛ dɔddɛ Jwaŋa Tolan ñaalɔ ɔci yiɛptɛ galŋjiyɛ, Jwaŋa Tolan noŋdi awarɛ. ²² Ɔci kan ɛkkɛ cɔktɛ Juaŋti, ɔci toottɛ ɛkɛti te genga, ɔci kan ɛkkɛ jyeddɛ yomgɔti agi ɛkkɛ ‘wondɛ Juaŋ gena neeniyɛ, ɔci ɛkkɛ ‘wondɛ ɛkɛ gena neeni doki.” ²³ Ɔci ne Yaccu kaanni kaañji kañ on Juaŋ ona tolanyɛ, gaciicin ḍwaŋin Ma Yahuud ɔci cyekin bɛɛn ɛkɛti, ɔci ɛkkɛn tooccin ɛkɛti agi. “Ɔɔn myettɔn, i noŋ naŋka neeni te jyek menɛ? A menɛ i ‘wonni naŋka neeniy?” ²⁴ Ɔci Yaccu ṭwokcin ɛkkɛnti agi, “‘Ya da buaga toocca ɛkkɛti te jwali gɛɛl daŋkun. ‘Ya ṭwoktata ɛkkɛ ñamu parun oŋ ɛkkɛ oŋ myettin ‘ya daŋkun oŋo. ²⁵ Bulti Yɔhanna bɛɛn te aŋɛ? Ɛkɛ bɛɛn te Jwaŋa Tolantɛ? Walla bɛɛn te ma baanti budan?” Ɔci ɛkkɛn bala gɔwwɔ yɔtin pookɛn agi, “Kan ikin gɔktin agi bulti Yɔhanna neeni bɛɛn te Jwaŋa Tolantiyɛ, ɔci Yaccu tootti ikinti dita agi, ‘Oŋ kan a ɔɔny, ba ɛkkɛ jyettɛ jyek ɛkɛti bɛ?’ ²⁶ Yeti kan ikin gɔktin agi bulti Yɔhanna bɛɛn te ma baanti budanyɛ, ikin buayin maka coŋin acaan ɛkkɛn waakɛnda gɔki agi Yɔhanna agi bɔwa Jwaŋa Tolan.” ²⁷ Ɔci ɛkkɛn ṭwokcin Yaccuti agi ɛkkɛn bulti Yɔhanna neeni ŋeejinti ne bɛɛnda te aŋɛ bɛɛ. Ɔci Yaccu gɔkcin ɛkkɛnti agi, “‘Ya ɛkkɛ myettin te naŋka naŋdi ‘ya neeni daŋkun bɛɛ.” ²⁸ Yaccu gɔkcin maka yoyi ñin iki ɛkɛti moki agi, “Ɛkkɛ poŋɛ a ɔki? Gɔṭṭɛ jwalla a caagɔn neeni poca. Mena ‘uan gɛɛl balki kɛɛgin a ‘uay ne yyɛɛwɔ. Ɔci weegɛn ati kacca ñamuti ɔci gɔkcin ɛkɛti agi, ‘Kaci ‘ya, ‘ya buaga i ootta kanŋati te oŋi balji bal luutkin.’ ²⁹ Ɔci ɛkɛ ṭwokcin weegɛnti agi ɛkɛ ootci bɛɛ. Ɔci ne baaṭi ɛkɛ poŋjin yomɛti, ɔci ɛkɛ dɔki atti. ³⁰ Ɔci weegɛn ati kacca parɛti kacca akki yyɛɛwɔ, ɔci gɔkcin ɛkɛti ba jwalla guaŋnɛ ɛkɛ kacca ñamu neeniti ɔɔn. Ɔci kaci ṭwokcin ɛkɛti agi, ‘Ɛɛ.’ Yeti ɛkɛ ati bɛɛ. ³¹ Te kɛɛgin ne yyɛɛwɔ neeniy, ba kacca noŋi ba jyek weegɛn neeni bɛ?” Ɔci ma ṭwokcin Yaccuti agi, “Gena kacca ñamu.” Ɔci Yaccu gɔkcin ɛkkɛnti agi, “A warɛ, ‘ya gɔkka ɛkkɛti, maka lyemi tulba ɔci moonga tobinyɛ, ɛkkɛn ooddi cyɛgji Jwaŋa Tolanti ñamu te ɛkkɛ. ³² Acaan Yɔhanna Mena Buoṭi Ma bɛɛn ɛkkɛti doki, ɔci ɛkɛ bala mieti ɛkkɛ te jyek pɔya a tyɛlga neeni, ɔci ɛkkɛ jyettɛ jyek ɛkɛ bɛɛ. Yeti maka lyemi tulba ɔci moonga tobinyɛ, ɛkkɛn jyeti jyek ɛkɛ. Ɔci ne ɛkkɛ gɔrnɛ maka pookɛn neeni jyetki jyek Yɔhannayɛ, ɛkkɛ yookɛ men ɔɔn. Ɛkkɛ jyettɛ jyek ɛkɛ men bɛɛ.” ³³ Ɔci Yaccu gɔkcin agi, “Dala ɛkkɛ tieŋdɛ jwalla a caagɔn ɛka parɛ neeni. On weegɛn gɛɛl bala, ɔci ɛkɛ ati pieti luutkin, ɔci ɛkɛ noŋi kaañ bal warɛti. Ɔci ɛkɛ noŋi gena tooñki ma luutkin. Ɔci ɛkɛ noŋi ona beyan ona lɛɛlki ma noono. Ɔci ɛkɛ bala neeni ‘wonnɛ maka pookɛn byeŋkɛnti ɔci ɛkɛ ati bana parɛ. ³⁴ Ɔci ne pana pwonki ma luutkin ṭɔlgɛn bɛɛniyɛ, bal weegɛn maka kanŋan ɛkɛti gɛɛg cuuññɛ nona maka gɔṭi bal neeniti aŋka ɛkkɛn ɛkɛ wɛttan jang ṭɔlgɛn gɛɛg ootan baanji ɛkɛti. ³⁵ Ɔci maka gɔṭi bal neeniyɛ, ɛkkɛn maka cuuññɛ bal weegɛn neeni muogɛyɔ. Ɔci maka neeni gɛɛl jiebɛ ɛkkɛn, ɔci ɛka parɛ gɛɛl nogɛ ɛkkɛn, ɔci ɛka parɛ gɛɛl moki yepci ɛkkɛn te gwoyyo. ³⁶ Ɔci bal weegɛn maka kanŋan ɛkɛti gɛɛg cuuññɛ moki. Maka kanŋan ɛkɛti maka cuuññɛ ɛkɛ ŋoyɔ neeni a ḍiɛkan bɛɛ. Ɛkkɛn coŋɔ te maka ñamuy. Yeti ɛkkɛn naŋɛ ma ne yaayan ba maka ñamu wanna ɔɔn. ³⁷ Ɔci ne ŋoyɔ bal weegɛn kaci ɛkɛ cuuññɛ nona mati. Weegɛn poŋi gɔki agi ne kaci ɛkɛ oottayɛ, agi maka neeni tieŋdɔ jyek ɛkta. ³⁸ “Ɔci ne maka gɔṭi bal ɛkɛ yuarkitiyɛ, ɛkkɛn bala gɔwwɔ yɔtin pookɛn agi, ‘Mena neeniyɛ, gena mena bal weegɛn luldɛ ɛkɛ ne baaṭiy. Bɛɛdɛ ikin oottin ɛkɛ noktin, ɔci wak weegɛn waka te ooddi ɛkɛti neeniyɛ, aga wak ikin.’ ³⁹ Ɔci ɛkkɛn ɛkɛ mugɛ eyɛ bora te balji, ɔci ɛkɛ oŋ nogɛ ɛkkɛn bora oŋo. ⁴⁰ “Oŋ ne bal weegɛn dɔɔdi ban ɛkkɛny, ɛkkɛ poŋɛ ɛkɛ noŋdi a ɔki ɛkkɛnti?” ⁴¹ Ɔci maka neeni ṭwokcin ɛkɛti agi, “Bal weegɛn ooddi ban ɛkkɛn dita, ɔci maka yeyin neeni nogdɛ ɛkɛ te yom yoñ ɛkɛ neeni, ɔci ɛkɛ bal ‘wondɛ maka pookɛn byeŋkɛnti. Ɔci ɛkkɛn bal weegɛn ‘wontan jang ṭɔlgɛn ɛkɛ daŋkun.” ⁴² Ɔci Yaccu tooccin ɛkkɛnti agi, “Oŋ ɛkkɛ, ɛkkɛ pokkɛ jyeka kiigin neeni bɛɛ? Jiek gɔki agi, ‘Poma guaktan maka cɔti oorg agi ɛkta yaayɔ neeniyɛ, ɛkɛ aŋi poma pwadan on warɛti doki. Naŋka neeni naŋŋɛ Juaŋo, ɔci ɛkɛ pwanna pwani ikin ñinguti!’ ⁴³ “A ɔŋŋiyɛ, ‘ya gɔkka ɛkkɛti, Jwaŋa Tolan jyek cyɛgji ɛkɛ eedɛ ɔntɔ te ɛkkɛti ɔci ‘wondɛ maka pookɛn gɛɛg maka noŋi ba jyek ɛkɛ ba naŋki maka gɔṭi bal maka pwadin ne ɛkkɛn bal weegɛn ‘wontɛti jang ṭɔlgɛny. [ ⁴⁴ Kan men gɛɛl twordɛ poomyɛ, ɛkɛ nuudɛji poomo. Ɔci kan poom ḍɛmdi men gɛɛltiyɛ, ɛkɛ mena neeni ñoottɛ iñɔ.]” ⁴⁵ Gaciicin ḍwaŋin Ma Yahuud ɔci ma Pɛriciinyɛ, ne ɛkkɛn tieŋki jyeka a caagin guaŋŋɛ Yaccu ɛkkɛnti neeniyɛ, ŋeecɔn ɛkkɛn ne Yaccu baali gɔki jyeka neeni te ɛkkɛn acaan jyeka neeni a caagin te ɛkkɛn. ⁴⁶ Ɔci gaciicin ḍwaŋin Ma Yahuud ɔci maka loṭi worga Jwaŋa Tolanyɛ, ɛkkɛn buagɔn Yaccu muktan acaan ŋeecɔn ɛkkɛn Yaccu gɔkcin jwalla a caagɔn neeni ɛkkɛnti te naŋki ɛkkɛn, yeti ɛkkɛn buayi maka coŋin neeni, acaan maka coŋin neeni gɔki agi Yaccu agi bɔwa Jwaŋa Tolan.

¹ Ɔci Yaccu moki gɔkcin ɛkkɛnti te jyeka a caagin gɛɛg. ² Ɛkɛ gɔki agi, “Jyek cyɛgji Jwaŋa Tolanyɛ, bala ba jyek mena a ḍuaŋa tolan gɛɛl ne kaci ɛkɛ ḍɛññi ɛɛŋ ɔci noŋni ɛkɛ jumay. ³ Ɔci ɛkɛ maka kanŋan ɛkɛti cuuññɛ aŋka ɛkkɛn ma myettan agi, ‘Juma cɔɔlin doki, dala ɛkkɛ bɛɛdɛ jumati.’ Yeti ma bɛɛn jumati bɛɛ, ɛkkɛn yookɔn. ⁴ Ɔci ḍuaŋa tolanyɛ, maka kanŋan ɛkɛti ɛkkin pookɛn cuuññɛ moki gɔki agi, ‘Dala ɛkkɛ ooddɛ ma myettɛ ‘ya oomdin ḍaaŋi te naŋki doki. Yotk ɔci neek ṭɔlgɛn cagin ɛkkɛn ŋaarŋ ‘ya doki! ‘Ya waak ḍaaŋi waakɛnda doki. Dala ɛkkɛn bɛya jumati.’ ⁵ Ɛkkɛn yookɔn ṭwokcin genga ɛkkɛnti bɛɛ. Ɔci ɛkkɛn ati nona ɛkkɛn yomgɛn buagitiy. Mena ne cyɛɛlɔ ati yel ɛkɛ, ɔci mena parɛ ɛkɛ ati non kanŋa ɛkɛ. ⁶ Ɔci maka bornɛ ḍuaŋa jumati neeni ɛkkɛn maka kanŋan ḍuaŋa tolanti muogɛ ɛkkɛn, ɔci ɛkkɛn noŋjin ne yaayan maka neeniti acaan ɛkkɛn yookɔn te borti ḍuaŋa. Ɔci ɛkkɛn ɛkkɛn nogɛ. ⁷ Ɔci ne ḍuaŋa tolan tieŋni jyek naŋka naŋɛ maka neeniyɛ, ɛkɛ looñi ne pɛñan. Ɔci ɛkɛ ackan ɛkɛ cuuññɛ ban maka nokkin maka neeniti ɔci ackan ma nogɛ ɔci ban ɛkkɛn toñgɛ maaño. ⁸ “Ɔci ḍuaŋa tolan gɔkcin maka kanŋan ɛkɛti neeni agi, ‘‘Ya wak juma ḍaaŋi doki, yeti maka borkan ‘ya te ñamu neeniyɛ, ‘ya buaga ɛkkɛn bɛya ‘yati moki bɛɛ. Ɛkkɛn pwadɔ bɛɛ. ⁹ Dala ɛkkɛ ɔgdɛ ooddɛ pɔɔk jitin, ɔci maka mɔktɛ ɛkkɛ pɔɔk jitinyɛ, dala ɛkkɛn oodɛ ɛkkɛ ona noŋki ma jumati waakɛnda.’ ¹⁰ Ɔci maka kanŋan ɛkɛti neeni ati bora pɔɔk jitin, ɔci ɛkkɛn bala boori ma waakɛnda, maka pwadin iki maka yeyin ɔɔn. Ɔci maka neeni eyɛ ɛkkɛn jumati. Ɔci ona noŋki ma juma neeniyɛ, kuumi te maka wɛlgo. ¹¹ “Ɔci ne ḍuaŋa tolan bɛɛni orɔ aŋka gɔrti wɛlgyɛ, ɛkɛ mena ‘uan gɛɛl yuarnɛ bala ciyi ma jitin, ɛkɛ bala ɛŋi bworŋ juma warɛti bɛɛ. ¹² Ɔci ḍuaŋa gɔkcin ɛkɛti agi, ‘Muka maam, i kooni orɔ wɛnni ne bworŋa ‘yɛŋa i a bworŋ juma baaw ogo?’ Ɔci ɛkɛ ṭwokcin genga moki bɛɛ. ¹³ Ɔci ḍuaŋa tolan gɔkcin ma kanŋati agi, ‘Ɛkɛ ḍɛgdɛ byeŋkɛti ɔci ciegɛti, ɔci ɛkɛ yiɛptɛ bora nona mielti.’ Ɔci ‘ya gɔkka ɛkkɛti, ka aŋanyɛ, ma wiak ɔci ŋɛyi lɛkɛn te yom yoño. ¹⁴ “Acaan ma ne coŋɔn bornɛ Jwaŋa Tolan aŋka bɛya ɛkɛti, yeti ma gɛɛg ne ḍiakan aŋka aga ma ɛkɛ woodgɛn.” ¹⁵ Ɔci ma Pɛriciinyɛ, ɛkkɛn Yaccu dalji ɔci ɛkkɛn atti. Ɔci ɛkkɛn bala gɔwwɔ yɔtin te jyek Yaccu. Ɛkkɛn bala lieṭi pɔya ɛkkɛn Yaccu muktitiy. Ɛkkɛn buagɔn jwalla guagdɛ Yaccu gɛɛl aktanyɔ ɛkkɛn te jwalla yaayan. ¹⁶ Ɔci acaan a ɔŋŋiyɛ, ɛkkɛn maka laltan ɛkkɛn gɛɛg cuuñɛ nona Yaccuti, ɔci ma Hiruuduc gɛɛg cuuññɛ daŋkun. Ɔci maka neeni tooccin botcin Yaccuti agi, “Mena loṭi may, i ŋeecki ɔɔn i a mena gɔki awarɛ, ɔci i lor ma te jyek Juaŋ te yoma pwadan. Ɔci i buay ma ñingɛn bɛɛ. Ɔci i an menga ne cyɛɛlɔ bɛɛ. I an ma waakɛnda. ¹⁷ Dala i ɔɔn myettɔn te jwali gɛɛl. Yaayɛ ne ikin Kɛɛcar ḍuaŋa tolan ma Ḍɔɔm ‘wontin bilk tulbayɛ?” ¹⁸ Yeti yomg ɛkkɛn ŋeejɛ Yaccu ne ɛkkɛn balki gɔkki jyek labjiy, ɔci ɛkɛ gɔkcin ɛkkɛnti agi, “Hay ɛkkɛ maka noŋi ma ñingɛny, ɛkkɛ poccɛ ‘ya a poccin a ɔɔn ogo? ¹⁹ Ḍeyyan tulba gɛɛl oodɛ wɛnni ‘ya gɔrca!” Ɔci ɛkkɛn ḍeyyan gɛɛl owwɛ Yaccuti. ²⁰ Ɔci Yaccu tooccin ɛkkɛnti agi, “Ḍeyyan neeni, ɛkɛ balki pɔɔyama menɛ? Ɔci a yenti menɛ bala ɛkɛti nɛ?” ²¹ Ɔci ma ṭwokcin ɛkɛti agi, “Gena Kɛɛcar.” Ɔci Yaccu gɔkcin ɛkkɛnti agi, “Wak Kɛɛcaryɛ, ‘wondɛ ɛkɛ, ɔci wak Jwaŋa Tolanyɛ, ‘wondɛ ɛkɛ daŋkun.” ²² Ɔci ne ɛkkɛn tieŋki jyeka neeniyɛ, ɛkkɛn korkɛn buañi ɔci ɛkkɛn Yaccu dalji ɔci ɛkkɛn atti. ²³ Ɔci te oŋŋa wannayɛ, ma Cadyuciin bɛɛn ɛkɛti. Maka neeni loṭi agi ne ma tuudiyɛ, ma jɔŋdɔ ñaalɔ moki bɛɛ. Ɛkkɛn bɛɛn ɔci tooccin Yaccuti te jwali ṭɔɔlɛ gɛɛl. Ɛkkɛn gɔkcin ɛkɛti agi, ²⁴ “Mena Loṭi Ma, Muuca gɔki agi, ‘Kan men gɛɛl ḍɛñi ɛɛŋ ɔci tuun ne ɛŋ ɛkɛ jieni kɛɛgin men bɛɛyɛ, agi dala ɛŋa neeni ḍɛɛdɛ mod ɛkkɛn aŋka ɛkɛ jieda kɛɛgin jyettɛ mena tuun neeni.’ ²⁵ Oŋ gɔṭṭi, maka ‘uay gɛɛg bala ban ɔɔn a dɔɔyɔ wyetkɛn ne yyɛɛwɔ. Ɛkkɛn a modin waakɛnda jiennɛ mɛya ne cyɛɛlɔ. Moda tolan ñamuyɛ, ḍɛñi ɛɛŋo. Ɔci ne ɛkɛ tuuniyɛ, kɛɛgin ɛkɛ baaw men. Ɔci moda bootcin moda tolan ŋoyɛti neeniyɛ, ɛkɛ ɛɛŋ ḍɛɛnɛ ɛkɛ moki. ²⁶ Ɔci ɛkɛ tuun moki. Ɔci moda akki ne ḍoogɔ ɛɛŋ ḍɛɛnɛ ɛkɛ moki. Ɔci ɛkɛ tuun moki. Ɔci moda akki ne ŋaanɔ ɛɛŋ ḍɛɛnɛ ɛkɛ moki. Ɔci moda akki ne dɔɔyɔ ɛɛŋ ḍɛɛnɛ moki. Ɔci ɛka akki ne dɔɔyɔ wilin ne cyɛɛlɔ ɛɛŋ ḍɛɛnɛ moki. Ɔci ne ŋoyɔ moda akki ne dɔɔyɔ wyetkɛn ne yyɛɛwɔ ɛɛŋ ḍɛɛnɛ moki. Yeti ɛkkɛn waakɛnda tuun ɔci jieni kɛɛgin gɛɛg men bɛɛ. ²⁷ Ɔci ne ɛkkɛn tuuki waakɛnda a ɔɔnyɛ, ɔci ɛɛŋ daŋkun tuuni. ²⁸ Oŋ ne oŋŋa ma jɔŋti ñaalɔ te lientiy, ɛŋa neeni aga ɛŋ moda ɔki ne ɛkɛ ḍɛyɛ ɛkkɛn waakɛnda ɔɔny?” ²⁹ Yaccu gɔkcin ɛkkɛnti agi, “Jiek dammɛ ɛkkɛ hay! Acaan jyeka kiigin kwoyɛ ɛkkɛ, ɔci moki war tɛɛn Juaŋ ŋeejɛ ɛkkɛ bɛɛ. ³⁰ Acaan ne ma jɔŋti ñaalɔ te lientiyɛ, ma ḍɛɛwɔ moki bɛɛ. Ɛkkɛn bala ba malɛɛkan ñaalɔ pɔliji. ³¹ Jyeka kiigin jyeka guaŋŋɛ Juaŋ ɛkkɛti te jyek jɔŋŋin ma jɔŋti ñaalɔ te lienti neeni paŋŋɛ ɛkkɛ oŋgati boki? ³² Juaŋ gɔki agi, ‘‘Ya a Jwaŋ Abrahim ɔci Icaak ɔci Yaakub.’ Jwaŋa Tolanyɛ, ɛkɛ a Jwaŋ maka tuutan boki? A’a. Ɛkɛ a Jwaŋ maka tɛɛtan.” ³³ Maka coŋinyɛ, ne ɛkkɛn tieŋki jyeka neeniyɛ, ɛkkɛn korkɛn buañi te lali ɛkɛ. ³⁴ Ma Pɛriciinyɛ, ne ɛkkɛn tieŋki agi ma Cadyuciin buanda Yaccu te jiekyɛ, ɛkkɛn wyetkɛn ḍɔɔlɛ bala gɔṭi jyeka yiecki Yaccuy. ³⁵ Ɔci men ma Pɛriciin gɛɛlyɛ, ɛkɛ ati tooccin Yaccuti te jwali gɛɛl. Mena neeni jyek ganuun ŋeejɛ ne tolan. Ɛkɛ bala poci Yaccu a poccin agi, ³⁶ “Mena loṭi may, ba jwalla bala ñamu te jyek ganuun Muuca jitka pookɛn neeni bɛ?” ³⁷ Ɔci Yaccu ṭwokcin ɛkɛti agi, “Jwalla bala ñamu te jyek ganuun jitka pookɛn neeniyɛ, gɔki agi, ‘Dala ɛkkɛ anɛ Jwaŋa Tolan Ciɛggɔn ɛkkɛ neeni ne tolan. Dala ɛkkɛ anɛ ɛkɛ te yomg ɛkkɛ waakɛnda, ɔci te coodi ɛkkɛ moki waakɛnda, ɔci te paŋi ɛkkɛ moki waakɛnda.’ ³⁸ Jwalla neeni tol tolo. Ɛkɛ bala ñamu te jyek ganuun jyeka pookɛn waakɛnda. ³⁹ Ɔci jwalla bootti jwalla neeni ŋoyɛtiyɛ, gɔki agi, ‘Dala anna i ani mena parɛyɛ, yoomdi i anna i ani war iy.’ ⁴⁰ Jyek ganuun ɔci jyek bɔwan Jwaŋa Tolanyɛ, gena kon ɛkkɛn jyeka ne yyɛɛwɔ neeniti.” ⁴¹ Ne ma Pɛriciin wyetkɛn ḍɔɔlkiti nona ne cyɛɛlɔyɛ, Yaccu tooccin ɛkkɛnti agi, ⁴² “Ɛkkɛ gɔkɛ Kiṭɔ a menɛ? Ɛkɛ a kaci menɛ?” Ɔci ɛkkɛn ṭwokcin ɛkɛti agi, “Ɛkɛ a kaci Daawud.” ⁴³ Ɔci Yaccu tooccin ɛkkɛnti agi, “Oŋ kan Kiṭɔ a kaci Daawud, oŋ ɛkɛ barŋɛ Daawud te baaṭi agi Kiṭɔ agi Ciɛggɔn ɛkɛ ogo? Acaan Daawud gɔki a ɔɔn te Boŋ Jwaŋa Tolan agi, ⁴⁴ ‘‘Ya tieŋŋan Jwaŋa Tolan gɔkcin Kiṭɔ Ciɛggɔn ‘yati agi, “Dala i coocca ‘ya taaŋuti taaŋŋa byerɔn ne maka yookɔn te i bwanda ‘ya ɔɔn.”’ ⁴⁵ “Kan Kiṭɔ barŋi Daawud agi Ciɛggɔn ɛkɛy, oŋ ɛkɛ a kaci ɛkɛ moki a ɔki?” ⁴⁶ Ɔci maka yookɔn te Yaccu neeni menga yaakinti ṭwokti jwali gɛɛl moki bɛɛ. Ɔci te oŋŋa wanna ɔci oŋkanda ɔɔnyɛ, ma buayi. Ɔci ɛkkɛn tooccin ɛkɛti te jwali gɛɛl moki bɛɛ.

¹ Ɔci Yaccu gɔkcin maka coŋinti ɔci maka laldɛ ɛkɛti agi, ² “Maka loṭi worga Juaŋ ɔci ma Pɛriciinyɛ, ɛkkɛn jyek ganuun Muuca jitkɛn ootan bora mati. ³ Ɔci a ɔŋŋiyɛ, dala ɛkkɛ tieŋdɛ ɔci noŋdɛ ba jyek ɛkkɛn oŋkanda. Yeti naa ɛkkɛ noŋdɛ ba naŋka naŋtan ɛkkɛn neeni bɛɛ. Ɛkkɛn loṭi ma te tuggɛn budan. Ɛkkɛn tieci jiek waakɛn bɛɛ. ⁴ Ɛkkɛn ganuun jitka tɛyan umtan ma ḍɔɔggɛnti aŋka naŋtan ma, yeti ɛkkɛn woodgɛn daŋkun noŋi ba jyeka ‘womki ɛkkɛn ma wanna bɛɛ. ⁵ “Gɔṭṭɛ, ‘ya gɔkka ɛkkɛti ‘wota te maka neeni. Naŋka naŋtan ɛkkɛn oŋkandayɛ, ɛkkɛn noŋi ma ñingɛnti budan. Worgan ‘yɛŋtan ɛkkɛnyɛ, ḍwaŋgin a ḍwaŋgin, ɔci jibban ‘yɛŋtan ɛkkɛn becinyɛ, cɔɔrtan waka becin lɛkɛnti. ⁶ Kan juman bala ɛkkɛn buagɔn ciyi nonka pwadinti oŋkanda ɔɔn. Ɔci moki ɛkkɛn ani coodi nonka pwadin oorga morki ma Juaŋti. ⁷ Ɔci ɛkkɛn ani ñiebbin nonk dukkan. Ɔci moki ɛkkɛn buagɔn dala ɛkkɛn bartan ma agi, ‘Mena loṭi may.’ ⁸ “Naa ɛkkɛ bartɛ ma a ‘Maka loṭi ma’ bɛɛ. Acaan ɛkkɛ balkɛ mena loṭi ma ne cyɛɛlɔ budan. Ɔci ɛkkɛ waakidayɛ, ɛkkɛ agi modin. ⁹ Naa men baan gɛɛl bardɛ ɛkkɛ iñɔ baanji wɛnni agi wey ɛkkɛ bɛɛ, acaan ɛkkɛ balkɛ Wey ɛkkɛ ne cyɛɛlɔ budan. Gena Weya ñaalɔ pɔliji. ¹⁰ Naa ɛkkɛ bartɛ ma a ḍuaŋan bɛɛ. Ɛkkɛ balki Ciɛggɔn ne cyɛɛlɔ budan. Gena Kiṭɔ. ¹¹ Mena tolan te ɛkkɛyɛ, dala ɛkɛ aga ba mena kanŋan ɛkkɛti. ¹² Kan mena kooŋi war ɛkɛ parɛyɛ, ɛkɛ aga mena ḍiɛran budan. Kan men gɛɛl tolcin yom ɛkɛti bɛɛyɛ, ɛkɛ aŋka aga ba mena tolan. ¹³ “Hay, ɛkkɛ maka loṭi worga Juaŋ ɔci ma Pɛriciin maka noŋi ma ñingɛn nɛ! Maka pookɛn buagɔn ka bɛya cyɛgji Jwaŋa Tolanti, yeti pɔy uullɛ ɛkkɛ. Ɛkkɛ woodgɔyɛ, ɛkkɛ bɛɛdɛ pɔya neeniti bɛɛ. Ɔci maka buagɔn bɛya pɔya neenitiyɛ, ɛkkɛn kaagɛ ɛkkɛ! [ ¹⁴ “Hay ɛkkɛ maka loṭi worga Juaŋ, ɔci ma Pɛriciin maka noŋi ma ñingɛn nɛ, mal moonga ‘uayɛn tuun ɔci oorg ɛkkɛnyɛ, amɛ ɛkkɛ, ɔci ɛkkɛ cɔkɛ cɔŋŋa beyan aŋka naŋki ɛkkɛ cogdɛyɔ ɛkkɛ te naŋka neeni. Jyeka bɛya ɛkkɛ wyetkɔti te naŋki ɛkkɛyɛ, bwantan jyeka pookɛn gɛɛg bɛɛ.] ¹⁵ “Hay, ɛkkɛ maka loṭi worga Juaŋ ɔci ma Pɛriciin maka noŋi ma ñingɛn nɛ! Ɛkkɛ atɛ bootɛ baan konɛ warda, ɔci jieddɛ galŋin jitkɛn oŋkanda buagɛ loṭi ma, ɔci kan men gɛɛl tieŋdi jyek ɛkkɛ ɔci mali ɛkɛ daldɛ ɔci jyek ɛkkɛ aŋka mugdɛyɛ, a ɔɔn pwatcin ɛkkɛti. Ɔci kan ɛkɛ aŋi men ɛkkɛ dokiyɛ, ɛkkɛ bwandɛ ɛkɛ ne tolan te naŋka yeyin, ɔci ɛkkɛ waakida ooddɛ bana maañti neeni i ɛkɛ, acaan ɛkkɛ agɛ maka noŋi ma ñingɛn. ¹⁶ “Hay! Ɛkkɛ maka bala ba maka wɛɛyi maka a ullin nɛ! Ɛkkɛ gɔkɛ agi kan men gɛɛl gɔkti awarɛ te yenti on Juaŋ ona tolan te genga, ɔci kan ɛkɛ dɔki jyeka neeni tiiññɛyɔ bɛɛyɛ, ɛkkɛ gɔkɛ agi genga baalɔ bɛɛ, baatɔ. Yeti agi kan men gɛɛl gɔkti genga awarɛ te yenti dahab bala orɔ on Juaŋ ona tolanyɛ, ɛkkɛ gɔkɛ agi naa mena neeni jwali gɛɛl agdɛyɔ bɛɛ. Dala ɛkɛ noŋdi ba jyeka wanna. ¹⁷ Ɛkkɛ maka amgin maka ñingɛn ulan nɛ! Pari dahab aŋi gena pwadan ne ɛkɛ olkiti ma orɔ on Juaŋ ona tolan bɛ? Oŋ ba gena pwadan ne tolan bɛ? Dahab, walla on Juaŋ ona tolan? ¹⁸ Ɔci ɛkkɛ moki gɔkɛ agi, kan men gɛɛl gɔkti genga awarɛ te yenti gena ɛrki ma waak ɔci ɛkɛ dɔki jyeka wanna tiiññɛyɔy bɛɛyɛ, ɛkkɛ gɔkɛ agi genga baalɔ bɛɛ, baatɔ. Yeti agi kan men gɛɛl gɔkti genga awarɛ te yenti gena ‘yɛri ma wannayɛ, ɛkkɛ gɔkɛ agi naa mena neeni jwali gɛɛl agdɛyɔ bɛɛ. Dala ɛkɛ noŋdi ba jyeka wanna. ¹⁹ Ɛkkɛ ‘uaya ñingɛn ulan nɛ! Pari gena ‘yɛri ma neeni pwani ne ɛkɛ olkiti ma gena ɛrki ma waak neeni wyeñɛti bɛɛ? Oŋ ba gena pwadan ne tolan bɛ? Gena ‘yɛri ma? Walla gena ɛrki ma waaky? ²⁰ Kan men gɛɛl gɔkti genga awarɛ te yenti gena ɛrki ma waak neeniyɛ, ɛkɛ gɔkti te yenti gena neeni iki waka bala ɛkɛ wyeñɛti waakɛnda. ²¹ Ɔci kan men gɛɛl gɔkti genga awarɛ te yenti on Juaŋ ona tolanyɛ, a ɔɔn bala ba ɛkɛ gɔki awarɛ te yenti on Juaŋ ona tolan ɔci te yenti Jwaŋa Tolan mena ciyi orɔ on Juaŋ ona tolanti neeni. ²² Ɔci kan men gɛɛl gɔkti genga awarɛ te pɔlla ñaalɔyɛ, a ɔɔn bala ba ɛkɛ gɔki awarɛ te yenti kaakci Juaŋ, ɔci te yenti Jwaŋa Tolan mena ciyi kaakci ɛkɛti neeni. ²³ “Hay, ɛkkɛ maka loṭi worga Juaŋ ɔci Ma Pɛriciin maka noŋi ma ñingɛn nɛ! Ɛkkɛ ‘woññɛ Juaŋ te wak ɛkkɛ waka ḍyɛrin oŋkanda. Gena naanna ɔci lɛlŋ ɔci kamuun. Kan janga neeni bala a inyaakkɛnyɛ, ɔci ɛkkɛ daŋkun gɔ Juaŋ ‘woñgi oŋkanda ne cyɛɛlɔ ɔɔn. Yeti naŋka ḍwaŋin naŋki ganuunyɛ, aŋka dalnɛ ɛkkɛ. Gena naŋka awarɛ naŋka a tyɛlga, ɔci yom pɔkkin maka aninti, ɔci tiit jyek Juaŋ waakɛn ne pwadan. Ɔci moki ɛkkɛ tiecɛ jyek Juaŋ awarɛ ne pwadan bɛɛ. Dala te ɛkkɛ noŋdɛ waka neeni waakɛnda. Naa te gɛɛl daldɛ bora bɛɛ. ²⁴ Ɛkkɛ maka ñingɛn ulan nɛ! Ɛkkɛ balgɛ ba mena wyeñɛ baaw moti waak oŋ miyyan ḍɛɛmdinti waka maaddɛ ɛkɛti, ɔci ɛkɛ ɛkkɛn toomdɛ bora, ɔci gena tolan ba kolŋan ɔɔnyɛ, aŋka lannɛ ɛkɛ a cyɛɛlɔ i waka maaddɛ ɛkɛ neeni! ²⁵ “Hay, ɛkkɛ maka loṭi worga Juaŋ ɔci ma Pɛriciin maka noŋi ma ñingɛn nɛ! Ɛkkɛ yɔŋɛ ḍwayi waakɛn te bora budan. Yeti ḍwayi ɛkkɛ korkɛntiyɛ, ɛkkɛn kuumi te waka yeyin ba ɛkkɛ yomgɔ ne kuumki te naŋka yeyin ɔɔn. Ɛkkɛ anɛ eñi wak maka pookɛn ɔci yomgɔ ḍwaŋɔ waakti. ²⁶ Ɛkkɛ ma Pɛriciin maka ñingɛn ulan nɛ! Te ñamu dala ɛkkɛ yomgɔ luagdɛ te waka yeyin parun. A ɔɔnyɛ, coodi ɛkkɛ oŋ pwada Jwaŋa Tolanti oŋo! ²⁷ “Hay ɛkkɛ maka loṭi worga Juaŋ, ɔci ma Pɛriciin maka noŋi ma ñingɛn nɛ! Ɛkkɛ balgɛ ba oorga jokki ma maka a tuutan ne naŋkiti ma te tolla bɔwan waakɛntiy. Oorg waakɛnti borayɛ, ɛkkɛn pwanna pwanno. Yeti jiju korkɛntiyɛ, ɛkkɛn kuumi te owi ma baan ɔci te waka yeyin waakɛnda. ²⁸ Ɔci ɛkkɛ daŋkun balgɛ a ɔɔn. Ma gɔrti ɛkkɛ, ɔci ɛkkɛn gɔkti agi ɛkkɛ pwadjɛ. Yeti ɛkkɛ yomgɔti jijuyɛ, ɛkkɛn kuumi te naŋka noŋɛ ɛkkɛ ma ñingɛn neeni, ɔci ɛkkɛn kuumi te naŋka yeyin naŋka pookɛn daŋkun. ²⁹ “Hay ɛkkɛ maka loṭi worga Juaŋ, ɔci ma Pɛriciin maka noŋi ma ñingɛn nɛ! Ɛkkɛ cɔti oorga jokki ma maka a bɔwan Jwaŋa Tolan, ɔci ɛkkɛ yɔŋɛ waka cɔttan ma waka ma ñingɛn ñiektiti te maka pwadiny. Waka neeni ywaŋdɛ ɛkkɛ ne pwadan oŋkanda. ³⁰ Ɛkkɛ gɔkɛ agi kan te gena ɛkkɛ aŋka balgɛ te baaṭi ba yɔrg ɛkkɛ wannayɛ, te ɛkkɛ bɔwan Jwaŋa Tolan noŋŋɛ bɛɛ. ³¹ Ɔci a ɔŋŋiyɛ, ɛkkɛ waakɔ yiɛptɛ maccu pookɔ agi ɛkkɛ agji kɛɛgin maka nokkin maka a bɔwan Jwaŋa Tolany. ³² Kanŋa naŋɛ yɔrg ɛkkɛ neeniyɛ, dala cwamdɛ ɛkkɛ acca ‘yati! ³³ “Hay ɛkkɛ! Ɛkkɛ korkɔ kuumi te jyek nooŋi ma ba koggo. Pɔya yooŋdɛ ɛkkɛ ɔntɔ te bana maañti bala boki? ³⁴ Acaan a ɔŋŋiyɛ, gɔṭṭɛ, ‘ya ɛkkɛ cuondin maka a bɔwan ‘ya ɔci maka ñingɛn tɛyan, ɔci maka loṭi worga Jwaŋa Tolan. Ɔci maka neeniyɛ, ɛkkɛn gɛɛg nogdɛ ɛkkɛ. Ɔci moki gɛɛg ŋaaptɛ ɛkkɛ ñaalɔ. Ɔci maka a bɔwan Jwaŋa Tolan gɛɛg ḍuadɛ ɛkkɛ te woong orɔ oorga morki ma Juaŋtiy. Ɔci ɛkkɛ atɛ boottɛ bonk korkɛnti lieṭɛ ma aŋka noŋdɛ ne yaayan ɛkkɛnti. ³⁵ Ɔci a ɔŋŋiyɛ, jyek lyen maka pwadin waakɛnda, maka nogɛ ma te ñamu ne acca ɔɔnyɛ, bɛya ɛkkɛ wyetkɔti. Maka nogɛ ma neeniyɛ, gena Habiil ɔci maka pookɛn, ɔci ne Jakariyati ɔɔn. (Jakariya neeniyɛ, ɛkɛ a kaci Bɛrakaaya.) Jakariya bala yɔɔd yiika on Juaŋ ona tolan i gena ɛrki ma waaky. Ɔci ne ɛkɛ baali wɛnanyɛ, ɛkɛ nogɛ ma. ³⁶ ’Ya gɔkka ɛkkɛti awarɛ, jyeka neeni waakɛndayɛ, ɛkkɛn bɛya maka yookɔn te ‘ya maka ciyi acca neeni wyetkɛnti. ³⁷ “Hay! Ma Urcaliim, ma Urcaliim! Maka noki bɔwan Jwaŋa Tolan maka yebi maka cuonnɛ Jwaŋ ɛkkɛnti nɛ! Bala ba aakṭi mɛɛgɛn ne boori ṭɔlg ɛkɛ ɔci ṭɔlg ɛkɛ wɔtti ɛkɛ bɔggɛtiyɛ, yom ‘ya buagɔn ɛkkɛ bɛɛdɛ ‘yati a ɔɔn daŋkun. Yeti ɛkkɛ yookɛ te ‘ya! ³⁸ Gɔṭṭɛ, on ɛkkɛ on Juaŋ ona tolan dalnɛ Jwaŋa Tolan doki. ³⁹ Tieŋdɛ ‘ya gɔkka ɛkkɛ, ‘ya yuardata ɛkkɛ oŋgati moki bɛɛ. Yeti ne oŋ gɛɛlti ne ‘ya bɛɛdayɛ, ɛkkɛ oŋ gɔktɛ agi, ‘Mena neeni bɛɛn te yenti Jwaŋa Tolan. Ɛkɛ pwad pwado. Dala ɛkɛ magdɛ Juaŋo!’”

¹ Yaccu kooyin bora te on Juaŋ ona tolanti, ɔci ɛkɛ bala ati a woono. Ɔci maka laldɛ ɛkɛ bɛɛn ɛkɛti buagɔn ɛkɛ gɔrti oorga bala on Juaŋ ona tolan toŋkɛtiy. ² Ɔci Yaccu gɔkcin ɛkkɛnti agi, “Ɛkkɛ poŋɛ a oorga neeni ḍwaŋɔ pari bɛɛ? ‘Ya ɛkkɛ myettin gena neeni ne pwadan! Guonan ṭɔɔlɛ gɛɛl niindi ɛka parɛ gɛɛl wyeñɛti ne baaṭi bɛɛ. Ɛkkɛn yieptan ma iñɔ waakɛnda.” ³ Ɔci ne Yaccu atti coonni iñɔ Pom Jɛtuun wyeñɛtiyɛ, maka laldɛ ɛkɛ bɛɛn nona ɛkɛti pookɛn. Ɔci ɛkkɛn tooccin Yaccuti agi, “Ɔɔn myettɔn ne pwadan, naŋka guaŋŋi i te on Juaŋ ona tolan neeni bɛya ne tua? Ɔci oŋŋa i bɛɛdi ŋiitan ma te gena? Ɔci oŋŋa wɔɔka ciyin acca neeni baadi bala ne tua?” ⁴ Ɔci Yaccu gɔkcin ɛkkɛnti agi, “Dala ɛkkɛ woŋgɔ tiittɛ. Naa ɛkkɛ jyɛttɛ menga ɔntɔ bɛɛ. ⁵ Maka coŋin gɛɛg bɛya ɔci ɛkkɛn gɔkti agi ɛkkɛn aginti ‘ya Kiṭɔ awarɛ. Ɔci a ɔŋŋiyɛ, ɛkkɛn maka coŋin jyɛttan ɔntɔ. ⁶ Ne ɛkkɛ tieŋdɛ agi lañ baalɔyɛ, naa ɛkkɛ buayɛ bɛɛ. Ɔci ne ɛkkɛ tieŋdɛ jiek agi ma baalɔ ooddɔ lañtiyɛ, naa ɛkkɛ buayɛ bɛɛ. Jyeka neeni bɛya awarɛ, yeti jiek wyetkɛn bawwin men bɛɛ. ⁷ Keedin wɛɛn warda noogdi yɔtin pookɛn. Bonka ḍyɛrin noogdi yɔtin pookɛn ɔci bonka ḍwaŋin da noogdi yɔtin pookɛn. Ɔci bonka coŋin gɛɛgtiyɛ, koñ bɛya mati, ɔci ṭɛɛr warɛ ḍieddi ne pɛñan. ⁸ Yeti taab neeniyɛ, gena taab ñamu. ⁹ “Ɛkkɛ mwoktɛ ma ɔci ‘wontɛ ma maka pookɛn byeŋkɛnti, ɔci ɛkkɛn noŋdi ne yaayan ɛkkɛti. Ɔci ɛkkɛ ma gɛɛg noktan mako. Keedin waakɛnda yooktan te ɛkkɛ acaan yenti ‘ya bala ɛkkɛti. ¹⁰ Te wɔɔka wannayɛ, ma ne coŋin ḍɛɛmdi iñɔ ɔci ɛkkɛn yoddi ñin pookɛn, ɔci ɛkkɛn ma ɛkkɛn ‘wontan maka pookɛn byeŋkɛnti. ¹¹ Maka gɔki agi ɛkkɛn aginti bɔwan Jwaŋa Tolanyɛ, ɛkkɛn bɛya ne coŋɔn, yeti ɛkkɛn a bɔwan Juaŋ awarɛ bɛɛ. Ɔci ɛkkɛn ma jyɛttan ɔntɔ a ḍiɛkan bɛɛ. ¹² Nɔji tola gɔ moki toli ɔɔn, ɔci ma gɛɛg buayi nɔji moki bɛɛ, ɔci gɛɛg nɔñji yiegdi ne tolan. Ɔci acaan a ɔŋŋiyɛ, maka coŋin mwondi te anna ɛkkɛn anki Juaŋy. ¹³ Yeti mena yɔɔda ne tɛyan ne oŋŋa bɛya ne ŋoyɔyɛ, ɛkɛ aŋka yɔɔdɛ Juaŋo. ¹⁴ Jyek cyɛgji Jwaŋa Tolan eetan ma baan konɛ warda. Gena jyeka wonkɛn jyeka pwadin neeni. Ɔci kan ma tieŋŋin waakɛndayɛ, ɔci oŋŋa bɛya ne ŋoyɔ oŋ bɛya oŋo. ¹⁵ “ ‘Ɛkkɛ maka poki worga nɛ, dala ɛkkɛ tieŋdɛ ne pwadan. Ne naŋka yaayan ne yaajan,’ naŋka guaŋŋɛ Danyal mena a bɔwa Jwaŋa Tolan agi bɛɛdɔ neeni yuartɛ ɛkkɛ bɛɛti on Juaŋti dokiyɛ, ¹⁶ dala ɛkkɛ maka ciyi ban Yahuudiya yooŋdɛ poom jitin ne pɛñan. ¹⁷ Kan men gɛɛl bala ñaalɔ on wyeñɛti te wɔɔka wannayɛ, naa ɛkɛ koodi iñɔ aŋka kaatti orɔ wak ɛkɛ gɛɛgti moki bɛɛ. Dala ɛkɛ aŋka yooŋdi ne pɛñan. ¹⁸ Kan men gɛɛl bala yieljiyɛ, naa ɛkɛ yooŋdi nona bworŋ ɛkɛ ḍuannɛ ɛkɛ wanna moki bɛɛ. Dala ɛkɛ aŋka ɔga yooŋdi ne pɛñan doki. ¹⁹ Maka laci ɔci maka balki kɛɛgin ḍyɛrinyɛ, oŋŋa wanna tɛy tɛy ɛkkɛnti ne pɛñan! ²⁰ Dala ɛkkɛ cɔktɛ Juaŋti, ɔci tootti ɛkɛti te jyeka neeni aŋka naa naŋka tɛyan neeni bɛya ɛkkɛti te ponk jwamma luyan bɛɛ, walla te Oŋ Cabit gɛɛl bɛɛ! Kan a ɔɔnyɛ, woon tɛy tɛy ne pɛñan. ²¹ Te oŋŋa bɛya wannayɛ, taab pɛñ pɛño. Oŋŋa Juaŋ okki noon, ɔci ne acca ɔɔnyɛ, taab ba taab neeniyɛ, gɛɛl bɛɛn oŋgati men bɛɛ. Ɔci ne baaṭi taab bala ba taab neeniyɛ, gɛɛl bɛya moki bɛɛ. ²² Kan te Juaŋ oŋŋa neeni naŋŋi ne ḍuulan bɛɛyɛ, te menga yaakinti uda bɛɛ. Juaŋ poŋi te jyek maka kɛnnɛ ɛkɛ bora, ɔci ɛkɛ gɔki agi dala nink taab neeni ḍuldɔ. ²³ “Ɔci te oŋŋa bɛya wannayɛ, kan men gɛɛl gɔkti ɛkkɛti agi, ‘Gɔṭṭɛ, Kiṭɔ bala wɛnni!’ Wwalla moki agi, ‘Gṭṭɛ, Kiṭɔ bala aŋanyɛ,’ naa ɛkkɛ jyeddɛ bɛɛ! ²⁴ Maka gɔki agi ɛkkɛn aginti Kiṭɔ ɔci maka gɔki moki agi ɛkkɛn aginti bɔwan Jwaŋa Tolanyɛ, ɛkkɛn bɛya, yeti ɛkkɛn men gɛɛl a Kiṭɔ waanɛ bɛɛ, ɔci ɛkkɛn a bɔwan Juaŋ awarɛ bɛɛ. Ɔci ɛkkɛn noŋdi naŋki ɛkkɛn, naŋka tɛyan naŋka ñyecki ma ɛkkɛn aŋka ma gɔrti ɛkkɛn ɔci bootti ɛkkɛnti amaam ɔɔn. Ɛkkɛn buagɔn dala maka kɛnnɛ Juaŋ bora neeniyɛ, waakɛn yaltan bootti ɛkkɛnti. ²⁵ ’Ya ṭɛr ɛkkɛ waakɔ te jyeka neeni waakɛnda ne jyeka neeni men baakiy! ²⁶ “Kan ma gɔkti ɛkkɛti agi Kiṭɔ baalɔ wɔɔŋjiyɛ, naa ɛkkɛ ooddɛ liertɛ ɛkɛ bɛɛ! Ɔci kan ma gɔkti agi Kiṭɔ baalɔ orɔ on ṭɔla jijuyɛ, naa ɛkkɛ jyeddɛ bɛɛ! ²⁷ Bala ba ñaal ne wildiyɛ, ɛkɛ wildan noon dyɛgdɛ pɔli ŋwayɛ warda te pɔya tyɛrñanti ne pɔya koriiyati ɔɔn, ɔci a ɔɔnyɛ, bala ba bɛɛna bɛɛda ‘ya Kaci Ma Baano. ‘Ya yuarta ma noon warda. ²⁸ “Kan gena tuun bala niin noongatiyɛ, ɔci wɛjjin omi ɛkɛ bɛya nona ɛkɛti kɔɔna kɔɔnno. (Naa ɛkkɛ liertɛ nona baala ‘ya bɛɛ! Acaan ne ‘ya bɛɛdayɛ, ‘ya ɛkkɛ yuardin lakun bala ba wɛjjin ne yɔrki waka tuutan te nonka ninki ɛkkɛn noongatiy.) ²⁹ “Ɔci te oŋŋa wannayɛ, ne taab pɛñan neeni baadiyɛ, ‘Oŋ waŋɛ ula, ɔci paan moki dɛkti bɛɛ. Ɔci kɛltan ḍɛɛmdi te ñaalɔ gɔ ɛkan moki ḍɛmmi ɔɔn. Ɔci waka bala ñaalɔ waakɛn ḍieddi waakɛnda.’ ³⁰ “Ɔci te wɔɔka wannayɛ, ‘ya Kaci Ma Baan oŋ waru lɛɛlla bora mati oŋ te pɔliji oŋo. Ɔci keedin waakɛnda baan wardayɛ, ɛkkɛn wiakti. Ɛkkɛn ‘ya Kaci Ma Baan yuarta ne bɛɛda pɔɔldin wyetkɛnti ñaalɔ pɔliji te war tɛɛn ɔci pwanna pwaniy. ³¹ Ɔci ṭuoŋ wiakti ɔci malɛɛkan ‘ya cuoñña baan warda ñaalɔ ɔci iñɔ pɔli ŋwayyɛti ne pɛñan. Ɔci maka kɛññan ‘ya borayɛ, ɛkkɛn limtanyɔ malɛɛkan ‘yati nona ne cyɛɛlɔ. ³² “Jyek ŋuami bala a ɔki? Jyek ŋuami ne pwordiyɛ, ɛkɛ etti jyeyya wonkɛn, ɔci ŋeejɛ ɛkkɛ noon aŋi ḍuoŋ tukɛ doki. ³³ Ne ɛkkɛ gɔrtɛ naŋka neeni bɛɛti borayɛ, dala ŋeeddɛ ɛkkɛ oŋŋa ‘ya Kaci Ma Baan bɛɛdayɛ, cɔɔllin doki, looncin moki bɛɛ. ³⁴ ’Ya gɔkka ɛkkɛ myettin ne pwadan! Maka accayɛ, ɛkkɛn tuwa bɛɛ, ɛkkɛn ciya ne jyeka neeni bɛɛti bora waakɛnda ɔɔn. ³⁵ Pɔli ɔci ṭɛɛryɛ, ɛkkɛn baadi. Yeti Jyek ‘yayɛ, ɛkkɛn baadi bɛɛ. ³⁶ “Oŋŋa ‘ya Kaci Ma Baan bɛɛdayɛ, ŋeejɛ menga bɛɛ. Ɔci kwoyɔn malɛɛkan ñaalɔ daŋkun. Ɔci moki kwoy ‘ya Kaci Jwaŋa Tolan daŋkun. Oŋŋa neeni ŋeejɛ gena Wey ɔɔn parɛ. ³⁷ Ɔci ba naŋka bɛɛn mati te oŋŋa Nɔwa baali menyɛ, ɔci ne oŋŋa ‘ya bɛɛdayɛ, ɛkɛ bala a ɔɔn daŋkun. ³⁸ Ne Nɔwa baaliyɛ, ma bala ñingɛn juadan te kanŋa waka amtan ɛkkɛn ɔci waka maattan ɛkkɛny. Ɔci ɛkkɛn bala ñingɛn juadan te jyek ḍɛɛwin moki. Ɛkkɛn bala poŋi te tol bɔrda bɛya ɛkkɛnti neeni bɛɛ. ³⁹ Ɔci ne Nɔwa kaanni murkaji dokiyɛ, tol bɔrda bɛɛn ɔci maka bala bora neeniyɛ, ɛkkɛn ḍakcin waakɛnda. Bɛɛna bɛɛda ‘yayɛ, bala a ɔɔn daŋkun. ⁴⁰ Kan maka ‘uay bala yielji te oŋŋa wanna ne yyɛɛwɔyɛ, men gɛɛl eetan malɛɛkan ne cyɛɛlɔ, ɔci ɛka parɛ ḍakti. ⁴¹ Ɔci kan maka moong bala ooṭi pok ne yyɛɛwɔyɛ, ɛɛŋ gɛɛl ne cyɛɛlɔ eetan malɛɛkan, ɔci ɛŋa parɛ ḍakti. ⁴² “Dala ɛkkɛ ciyɛ kɛɛyɛ a kɛɛn ɔɔn, acaan oŋŋa Ciɛggɔn ɛkkɛ bɛɛdiyɛ, gɔ ŋeeddɛ ɛkkɛ bɛɛ. ⁴³ Dala ɛkkɛ poŋdɛ te mena waakɛ kali may! Kan te oŋ waŋɛ bɛɛdi mena ɛɛn neeni ŋeejɛ ɛkɛyɛ, te ɛkɛ on kɛɛññɛyɔ ne pwadan ɔci mena ɛɛn neeni te yaaktanti kaatti orɔ bɛɛ. ⁴⁴ Ɔci acaan a ɔɔnyɛ, dala ɛkkɛ daŋkun kɛɛddɛ ɔci yomgɔ tiektɛ. Acaan ‘ya Kaci Ma Baan ŋeeddata ɛkkɛ oŋŋa ‘ya bɛɛda bɛɛ. ⁴⁵ “Gɔṭṭɛ ‘wota, mena gɔṭi on ne pwadan mena ñingɛ tɛyan a menɛ? Ɛkɛ a mena ‘wondɛ on weegɛn kanŋa ɔci naŋdɛ a ḍuaŋa makɛny. On weegɛn gɔkti ɛkɛti agi dala ɛkta ma kanŋa ‘wonda ɛkta oomdin oŋkanda ne pwadan. ⁴⁶ Men kanŋa mena nɔttɛ weegɛn jyek kanŋa neeni kan bala noŋi kanŋa ɛkɛ neeni ne pwadanyɛ, ɛkɛ yomɛ pwada pwanno. ⁴⁷ Awarɛ, ne baaṭi ɛkɛ naŋdɛ weegɛn aga mena tolan te ma kanŋa maka pookɛn, ɔci ɛkɛ gɔrti wak weegɛn waakɛnda. ⁴⁸ Yeti kan ɛkɛ a mena yaayanyɛ, ɛkɛ gɔkti yomɛti parɛ agi, ‘Wey ɔɔn kwaci a ɔɔn ogo? Ɛkɛ dita bɛya acca men bɛɛ?’ ⁴⁹ Ɔci ɛkɛ doki ḍwaddi ma kanŋa maka pookɛn neeni, ɔci ɛkɛ omdi ɔci motti iki maka yeyin maka nokkin mooy oŋkanday. ⁵⁰ Ɔci ne oŋ gɛɛlti ne ɛkɛ baali poŋi te weegɛn bɛɛyɛ, weegɛn bɛya ywortiti, ⁵¹ ɔci mena yaayan neeni ḍuadɛ weegɛn ne pɛñan, ɔci yiɛptɛ ciginji nona maka noŋi ma ñingɛnti, ɔci ɛkɛ ñoodi i ɛkkɛn te naŋka bɛya ɛkkɛn wyetkɛntiy. Ɔci maka neeni wiakti a joono, ɔci ɛkkɛn lɛkɛn tiittanti te yom yoño.

¹ “Cyɛgji Jwaŋa Tolan ɛkɛ bala ba jyek maka ṭɔlg gɛɛg ne inyaakkɛn maka eci dyɛkan ati kookcin ‘war ñoonitiy. ² Ɛkkɛn gɛɛg ne dɔɔyɔ ñingɛn morŋ. Ɔci ɛkkin pookɛn ne dɔɔyɔ mokiyɛ, ɛkkɛn aŋka ñingɛn tɛy tɛyo. Šɔlga ne dɔɔyɔ ñingɛn morŋan neeniyɛ, eci ñɔdg dyɛkan ɛkkɛn jitkɛnti, ɔci yeti ɛkkɛn eci gɛɛg bora bɛɛ. ⁴ Yeti ṭɔlga pookɛn ne dɔɔyɔ ṭɔlga ñingɛn tɛyan neeniyɛ, ɛkkɛn aŋka eci ñɔdg dyɛkan ɛkkɛn jitkɛnti ɔci eci gɛɛg bora moki. ⁵ Ɔci ‘wana ḍɛyiyɛ, ɛkɛ kwaccin. Ɔci ṭɔlga kɛɛy ɛkɛ neeniyɛ, ɛkkɛn buanɛ nink ɔci ɛkkɛn wiccin. ⁶ “Ɔci ne ween jiña tuodanyɛ, ma bala boorɔ agi, ‘‘War ñooni bɛɛni! Koodɛ bora ooddɛ kooktɛ ɛkɛti!’ ⁷ “Ɔci maka ṭɔlg jɔŋŋin ñaalɔ, ɔci bala yɔŋi twalg dyɛkan ɛkkɛn waakɛn. ⁸ Ɔci maka ñingɛn morŋan neeniyɛ, gɔkcin maka ñingɛn tɛyanti neeni agi, ‘Ɔɔn noŋdɔntɔ ñɔdg ɛkkɛ hay! Acaan dyɛkan ɔɔn ñɔdgɛn bawwin doki.’ ⁹ “Ɔci maka ñingɛn tɛyan neeniyɛ, ɛkkɛn kɛkcin ɛkkɛnti agi, ‘A’a. Ɛkkɛn yɔmdi te ɔɔn ɔci ɛkkɛ bɛɛ. Dala ɛkkɛ ɔgdɛ ooddɛ dukkanji pookɔ ɔci wɛrdɛ ñɔdg ɛkkɛ pookɔ.’ ¹⁰ “Ɔci ne ɛkkɛn balki atki ootti wɛɛrki ñɔdgyɛ, ‘war ñooni dɛññin bora ɔci maka bala kɛɛy ɛkɛ neeniyɛ, ɛkkɛn ati a cyɛɛlɔ iki ɛkɛ. Ɔci ɛkkɛn kaaccin orɔ ona noŋki ma juma, ɔci on weegɛn ‘yeŋi tukɛ cieŋnɛti. ¹¹ “Ɔci ne baaṭi ṭɔlga pookɛn bɛɛn daŋkun. Ɔci ɛkkɛn bala boor agi, ‘Ciɛggɔn, i Ciɛggɔn, ɔɔn pɔktɔn on tukɛ!’ ¹² “Ɔci ɛkɛ ṭwokcin ɛkkɛnti agi, ‘‘Ya gɔkka ɛkkɛti awarɛ, ‘ya ɛkkɛ ŋeejin bɛɛ.’ ” ¹³ Ɔci Yaccu gɔkcin maka laldɛ ɛkɛti agi, “Dala ɛkkɛ daŋkun woŋgɔ tiittɛ, acaan oŋŋa ‘ya Kaci Ma Baan bɛɛdayɛ, ŋeeddɛ ɛkkɛ bɛɛ. ¹⁴ “Ɛkkɛ maka laldin ‘yayɛ, dala ɛkkɛ kandɛ ne pwadan ne ‘ya oodda ɔntɔ te ɛkkɛti wɛnniy. Gɔṭṭɛ, jyeka neeniyɛ, bala ba jyek mena ‘uan gɛɛl! ‘Wana neeniyɛ, ɛkɛ buagɔn woon ooddi bana parɛ gɛɛlti, ɔci ɛkɛ borcin maka kanŋan ɛkɛti. Ɔci bilk ‘wonnɛ ɛkkɛn byeŋkɛnti aŋka dala ɛkkɛn noŋdi kanŋa ɔci bilk cɔttanyɔ ne pwadan. ¹⁵ Ɛkɛ maka kanŋan ɛkɛti gɛɛl ‘wonnɛ ɛkɛ kiicin bilk ne dɔɔyɔ. Ɔci ɛka parɛ gɛɛl ‘wonnɛ ɛkɛ kiicin bilk ne yyɛɛwɔ. Ɔci ɛka parɛ ‘wonnɛ ɛkɛ kiic bilk ne cyɛɛlɔ. Ɛkɛ ma ‘wonnɛ bilka neeni ba ñing tɛɛn ɛkkɛn, menga da ba ñing tɛɛn ɛkɛ, ɔci menga da ba ñing tɛɛn ɛkɛ, ɔci ɛkɛ atti. ¹⁶ Ɔci mena ‘wonnɛ kanŋa weegɛn kiicin bilk ne dɔɔyɔ neeniyɛ, ɛkɛ jɔŋŋin ne pɛñan, kwaccin bɛɛ. Ɔci ɛkɛ bilka neeni cɔnnɛyɔ ne bilka pookɛn bɛɛki kiicin ne dɔɔyɔ moki ɔɔn. ¹⁷ Ɔci mena ‘wonnɛ weegɛn kiicin ne yyɛɛwɔyɛ, ɛkɛ daŋkun bala cɔti bilk ne bilka pookɛn bɛɛki kiicin ne yyɛɛwɔ ɔɔn. ¹⁸ Yeti mena ‘wonnɛ men kiic bilk ne cyɛɛlɔ neeniyɛ, bilk ɛkɛ eññɛ, ɔci joŋnɛ iñɔ ṭɛɛrji. ¹⁹ “Ɔci ne maka neeni weegɛn ɛɛni coodi bana atti ɛkɛ waayitiyɛ, ɛkɛ bɛɛn dɔɔkkin baanji, ɔci ɛkɛ bala yɔŋi jiek iki ɛkkɛn te jyek bilko. ²⁰ ’Wana ‘wonnɛ weegɛn kiicin bilk ne dɔɔyɔ neeniyɛ, ɛkɛ bɛɛn nona weegɛnti eccin kiicin bilk ne dɔɔyɔ ba bilka ɛkɛ ‘wonnɛ weegɛn te ñamu wanna neeni. Ɔci ɛkɛ eccin kiicin bilk kiicin pookɛn ne dɔɔyɔ moki. Ɔci ɛkɛ gɔkcin weegɛnti agi, ‘‘Ya ‘wonna i kiicin bilk ne dɔɔyɔ, ɔci ɛkkɛn cɔniyɔ ‘ya, ɔci eccin bilka pookɛn kiicin ne dɔɔyɔ moki.’ ²¹ “Ɔci weegɛn gɔkcin ɛkɛti agi, ‘Pwatcin. I noŋŋi ne pwadan. I ag kɛɛngɔn pwadan. Acaan i waŋu tiinni te gena ḍiɛran neeniyɛ, ɔci acca i ‘wondin ‘ya kanŋa tolan neeni. Dala i yomu ñɔya ba ‘ya ɔɔn!’ ²² “Ɔci mena ‘wonnɛ weegɛn kiicin bilk ne yyɛɛwɔ neeniyɛ, ɛkɛ orcinti weegɛnti, ɔci gɔkcin ɛkɛti agi, ‘‘Ya ‘wonna i kiicin bilk ne yyɛɛwɔ, ɔci ɛkkɛn cɔniyɔ ‘ya! Ɔci bɛɛn kiicin pookɛn ne yyɛɛwɔ moki.’ ²³ Ɔci weegɛn gɔkcin ɛkɛti agi, ‘Pwatcin, i noŋŋi ne pwadan. I ag kɛɛngɔn pwadan! Acaan i waŋu tiinni te gena ḍiɛran neeniyɛ, ɔci acca i ‘wondin ‘ya kanŋa tolan neeni daŋkun. Dala i yomu ñɔya ba ‘ya ɔɔn!’ ²⁴ “Mena ‘wonnɛ weegɛn kiic bilk ne cyɛɛlɔyɛ, ɛkɛ bɛɛn ɔci ɛkɛ buagɔn warɛ bɛrtɛ te jwali gɛɛl weegɛnti. Ɔci gɔkcin weegɛnti agi, ‘Çeej ‘ya i a mena jiekɛ tɛyan oŋkanda. I dwok pok bɛɛ. Yeti ne pok ñingɛn bɛɛtiyɛ, ɛkkɛn aga pok i. Ɔci moki i kuay pok bɛɛ. Yeti ne ma pok kuatitiyɔyɛ, ɔci ɛkkɛn limayɔ i aga pok i. ²⁵ Ɔci ‘ya buañi ka ‘ya dita bilk i gɛɛg yiedo, ɔci ‘ya ati bora bilk i neeniyɛ, jokcan iñɔ. Anti bilk i!’ ²⁶ “Ɔci weegɛn ṭwokcin ɛkɛti agi, ‘I yaayi hay! I a kɛɛngɔn warɛ pɛñan hay! Kan ‘ya ŋeeja i ne ‘ya aga mena dwoki bɛɛy, yeti ne pok ñingɛn bɛɛti ɛkkɛn aga pok ‘ya, ɔci kan ŋeej i moki ne ‘ya kuaya pok bɛɛy, yeti ne ma pok kuatitiyɔyɛ, ɛkkɛn limdiyɔ ‘ya aga pok ‘ya. ²⁷ Oŋ ba i bilk ‘ya eññi twoñi bilkji aŋka ɛkkɛn mɔkcan ‘ya aŋan iki bilk wyetka jiettanti ma twoñi bilkji bɛ?’ ²⁸ “Ɔci mena neeni gɔkcin maka kanŋan ɛkɛti agi, ‘Kiic bilk luldɛ te ɛkɛti, ɔci ‘wondɛ mena balki kiicin bilk ne inyaakkɛny. ²⁹ Naŋka neeni pwatcin maka woŋgɛn a tiicin ne ɛkkɛn ‘wontɛti ma waka coŋin a ɔɔn bɛɛ? Gɔṭṭɛ, maka balki waakyɛ, ɛkkɛn ‘uottanti ma waak moki. Yeti maka balki waak oŋ woŋgɛn a tiicin bɛɛyɛ, ɛkkin bala ɛkkɛnti ne ḍiɛkan wanna lultan ma te ɛkkɛnti. ³⁰ Kɛɛngɔn yaayan neeniyɛ, yiɛptɛ weegɛn ciginji nona ulanti aŋan. Nona ulanti neeniyɛ, ma lɛkɛn tiittanti te yom yoño.’ ³¹ “Ne ‘ya Kaci Ma Baan bɛɛdayɛ, bɛɛna bɛɛda ‘ya neeni pwanna a pwanno. ‘Ya bɛɛdɔn iki malɛɛkan waakɛnda ɔci ‘ya coocca kaakci ‘yati. Kaakci ‘ya neeni pwanna pwanno. ³² Ɔci ma waakɛnda baan konɛ wardayɛ, ɛkkɛn waakɛn limtan ‘ya ñamuti. Ɔci ‘ya Kaci Ma Baanyɛ, ‘ya maka coŋin neeni kɛbdi jitin ba naŋki mena balki kulin ɔci ḍɛɛko. ³³ Ɔci gɔṭṭɛ daŋkun, maka pwadinyɛ, ɛkkɛn yɔɔtca ‘ya byeŋa byerɔn, yeti maka yeyinyɛ, ɛkkɛn yɔɔtca ‘ya byeŋa aamti. ³⁴ “Ɔci ‘ya gɔkca maka ciyi ‘ya byeŋa byerɔn neeniti agi, ‘Hay, ɛkkɛ maka maŋŋɛ Wey ɔɔn Jwaŋa Tolan nɛ, dala ɛkkɛ bɛɛdɛ cyɛgji Jwaŋa Tolan mugdɛ ɛkkɛ! Jyeka neeni naŋŋɛ Juaŋ noŋnɛ ɛkkɛ te baaṭi te oŋŋa ɛkɛ okki ṭɛɛry. ³⁵ Oŋkanda ne ‘ya amata koñyɛ, ɛkkɛ ‘woññɛ ‘ya te oomdin. Ɔci ne ‘ya amata yiɛn mokiyɛ, ɛkkɛ ‘woññɛ ‘ya te pyega maadi ‘ya. Ɔci ne ‘ya aga wɛliyɛ, ɛkkɛ ‘ya eññata oorg ɛkkɛ. ³⁶ Ɔci ne ‘ya balkata bworŋin bɛɛyɛ, ɔci ɛkkɛ ‘ya kɛnnata bworŋin. Ɔci ne ‘ya waru yaayɛyɛ, ɛkkɛ balgɛ bɛɛdɛ ḍieŋdɛ ‘yati. Ɔci ne ‘ya baala ciginjiyɛ, ɔci ɛkkɛ balgɛ bɛɛdɛ gɔrtɛ ‘yati.’ ³⁷ “Ɔci maka pwadin ṭwokti ‘yati agi, ‘Ciɛggɔn, i yuarki ɔɔn oŋgati ami koñ ɔci ‘woñki ɔɔn waka amtin gɛɛg te tua? Ɔci i ami yiɛn ɔci i ‘woñki ɔɔn pieg gɛɛg te tua? ³⁸ I yuarki ɔɔn oŋgati i a wɛli ɔci i ooki ɔɔn ban ɔɔn te tua? I yuarki ɔɔn ne bworŋin baaki iti ɔci i ‘woñki ɔɔn bworŋin te tua? ³⁹ I yuarki ɔɔn waru yaayɛ oŋgati ɔci ɔɔn bɛɛnɔn ḍieŋnɔn iti te tua? Ɔci walla ne i baali ciginji ɔci ɔɔn bɛɛnɔn ḍieŋnɔn iti te tua?’ ⁴⁰ “Ɔci ‘ya ṭwokca ɛkkɛnti agi, ‘Tieŋdɛ ɛkkɛ myettin ne pwadan. Kan ɛkkɛ menga te maka neeniti naŋŋɛ ne pwadan, kan ɛkɛ a mena ḍiɛran te modg ɔɔn neenitiyɛ, a ɔɔn bala ba gena ‘ya naŋŋata ɛkkɛ ne pwadan wanna!’ ⁴¹ “Ɔci Ciɛggɔn Tolan gɔkti maka yɔɔd ɛkɛ byeŋa aamti neeni agi, ‘Ɛkkɛ maka yeyin nɛ, dala ɛkkɛ ɔgdɛ ooddɛ ɔntɔ te ‘yati wɛnni! Dala ɛkkɛ ooddɛ maccu, maña baadi bɛɛy! Maña neeni naŋŋɛ Juaŋ te Jwaŋa Yaayan ɔci te jɔkin ṭɔlgɛn moki, ɔci yɔmjin te ɛkkɛ daŋkun. ⁴² Ne ‘ya amata koñyɛ, ɛkkɛ menga ‘ya ‘wonna genga aŋka amdi ‘ya bɛɛ. Ɔci ne ‘ya amata yiɛnyɛ, ɛkkɛ menga ‘ya ‘wonna pieg gɛɛg aŋka maani ‘ya bɛɛ. ⁴³ Ne ‘ya aga wɛliyɛ, ɛkkɛ ‘ya eññata orɔ oorg ɛkkɛ bɛɛ. Ne ‘ya balkata bworŋin bɛɛyɛ, ɛkkɛ ‘ya ‘wonnata bworŋ gɛɛl bɛɛ. Ne ‘ya waru yaayɛ, ɔci moki ne ‘ya baala jiju ciginjiyɛ, ɛkkɛ bɛɛnɛ ḍieŋnɛ ‘yati bɛɛ.’ ⁴⁴ “Ɔci maka neeni daŋkun ṭwokti ɛkɛti agi, ‘I Ciɛggɔn, i yuarki ɔɔn oŋgati ami koñ boki, ɔci walla i ami yiɛn boki, ɔci walla i ag wɛli boki, ɔci walla i at waru budan oŋgati boki, ɔci walla i waru yaayɛ oŋgati boki, ɔci walla i baal ciginji oŋgati boki ɔci i dalki ɔɔn budan te jyeka tɛyan neeni oŋgati boki?’ ⁴⁵ “Ɔci Ciɛggɔn Tolan ṭwokti ɛkkɛnti agi, ‘Tieŋdɛ ɛkkɛ myettin ne pwadan, oŋkanda ne ɛkkɛ maka neeni dalnɛ budan, kan a mena ḍiɛran te modg ɔɔnti gɛɛl dalnɛ ɛkkɛyɛ, a ɔɔn bala ba gena ‘ya waanu dalnata ɛkkɛ wanna.’ ⁴⁶ “Ɔci maka noŋi ne yaayan neeniyɛ, ɛkkɛn ooddi nona yaayanti te ywobji Juaŋ ɛkkɛnti. Ɔci ywobji Juaŋ baadi ɛkkɛnti bɛɛ. Ɔci maka pwadinyɛ, ɛkkɛn aŋka balki tɛɛtin baadi bɛɛ neeniy.”

¹ Ɔci ne Yaccu ḍookki te jyeka neeniyɛ, ɛkɛ gɔkcin maka laldɛ ɛkɛti agi, ² “Gɔṭṭɛ, ŋeejɛ ɛkkɛ ne nink ne yyɛɛwɔ bɛɛti borayɛ, ɔci Iid Malɛɛka Lien Bɛɛn Goṭi a Gorŋ bɛya. Ɔci ‘ya Kaci Ma Baan ‘wonta ma maka yookɔn te ‘ya byeŋkɛnti ɔci ‘ya ŋaapta ɛkkɛn ñaalɔ jana kakanti.” ³ Te oŋŋa wannati ɔɔnyɛ, gaciicin ḍwaŋin Ma Yahuud ɔci maka ḍwaŋinyɛ, ɛkkɛn wyetkɛn ḍɔɔlɛ nona ne cyɛɛlɔ nona gaciic tolan Ma Yahuudti. Gena on mena bartan ma agi Kayapac. ⁴ Ɛkkɛn bala lieṭi pɔya ɛkkɛn Yaccu muktiti lieda ɔci noktitiy. ⁵ Ɔci ɛkkɛn gɔki agi, “Naa ɛkɛ muktin noktin te oŋ iid bɛɛ, acaan maka coŋin neeni nuula dita ikinti.” ⁶ Yaccu bala ban Bɛtani ban Cimaann mena naŋŋɛ cyɛc te ñamuy. ⁷ Ɔci ne ɛkkɛn balki cieki omki menyɛ, mena ɛɛŋ gɛɛl bɛɛn Yaccuti. Ɛŋa neeni eccin piinŋan wiɛlɛ tɛyan te luañgɔn ṭɔɔlɛ. Ɔci ɛkɛ piinŋan neeni pwoŋnɛ Yaccu wyeñɛti ne Yaccu baali omi men ɔɔn. ⁸ Ɔci maka laldɛ Yaccu ne ɛkkɛn gɔrki naŋka neeniyɛ, ɛkkɛn looñjin. Ɔci ɛkkɛn gɔki agi, “Ɛkɛ piinŋan neeni ñiennɛ ɔntɔ budan ogo yeti? ⁹ Dala te piinŋan neeni wiɛlji ma bora te bilk ne coŋɔn aŋka mokki ma maka bɔwan.” ¹⁰ Paŋi ɛkkɛn neeni ŋeejɛ Yaccu. Ɔci ɛkɛ gɔkcin ɛkkɛnti agi, “Ɛkkɛ ɛɛŋ daldɛ hay! Ɛkkɛ wookɛ ɛkɛ budan a ɔɔn ogo? Ɛkɛ noŋi gena pwadan ‘yati. ¹¹ Maka bɔwan balgi iki ɛkkɛ yuonginda ɔɔn. Yeti ‘yayɛ, balkin iki ɛkkɛ yuonginda bɛɛ. ¹² Naŋka naŋŋɛ ɛkɛ ‘ya juonatayɔ te piinŋan neeniyɛ, bala ba naŋka naŋtan ma maka tuwatiy. ¹³ Tieŋdɛ ɛkkɛ myettin ne pwadan! Noon warda nona maka loṭi ma te jyek ‘ya oottiyɛ, ɔci jyek ɛŋa neeni ooddi daŋkun. Ɔci ma ñingɛn ñiektan te naŋki ɛkɛ.” ¹⁴ Ɔci Yahuuja Ickɛɛryuti mena akki Ma Ne Inyaakkɛn Wyetkɛn Ne Yyɛɛwɔyɛ, ɛkɛ ati gaciicin ḍwaŋin Ma Yahuudti. ¹⁵ Ɔci ɛkɛ tooccin ɛkkɛnti agi, “Kan ɛkkɛ ‘wondin ‘ya Yaccu byeŋkɔtiy, oŋ ɛkkɛ ‘ya ‘wondata gena?” Ɔci ɛkkɛn gɔkcin ɛkɛti agi, “I ‘wonti ɔɔn bil pɔddan a men baan mena parɛ byeŋkɛ (30).” ¹⁶ Ɔci te oŋŋa wanna ɔci oŋkanda ɔɔnyɛ, Yahuuja bala lieṭi pɔya ɛkɛ ma ‘wondɛ Yaccuy. ¹⁷ Ɔci oŋ Iid Malɛɛka Lien Bɛɛn Goṭi a Gorŋ bɛɛni. Ɔci iid neeni gena Iid Ma Omki Byedga Polany. Ɔci maka laldɛ Yaccu gɔkcin ɛkɛti agi, “I buagi ɔɔn ooddɔn wak iid ywaŋdɔnyɔ wɛnɛ te ikin?” ¹⁸ Ɔci Yaccu gɔkcin ɛkkɛnti agi, “Dala ɛkkɛ ooddɛ bana tolan Urcaliimji, ɔci ooddɛ on ‘uan gɛɛl bala wɛnan. Dala ɛkkɛ gɔktɛ ɛkɛti agi, ‘Mena Loṭi Ma gɔki agi oŋ ɛkɛ cɔɔlnɔ doki. Ɔci agi ɛkɛ buagiti noŋji iid ban ɛkkɛ iki ɔɔn maka lalji ɛkɛy.’ ” ¹⁹ Ɔci maka laldɛ Yaccu jɔŋŋin, ɔci ati ba jyeka guaŋŋɛ Yaccu ɛkkɛnti. Ɔci ɛkkɛn wak iid ywaŋɛyɔ. ²⁰ Ɔci ne oŋ waŋɛ luunni iñɔyɛ, Yaccu cooccin iñɔ omi iki maka laldɛ ɛkɛ, maka ne inyaakkɛn wyetkɛn ne yyɛɛwɔ neeni. ²¹ Ɔci ne ɛkkɛn balki omki menyɛ, Yaccu gɔkcin ɛkkɛnti agi, “‘Ya gɔkka ɛkkɛti awarɛ, men gɛɛl bala ɛkkɛti wɛnni ɛkɛ ‘ya ‘wonda maka yookɔn te ‘ya byeŋkɛnti.” ²² Ɔci ɛkkɛn yomgɛn yiegin te jwalla guaŋŋɛ Yaccu neeni. Ɔci ɛkkɛn bala tooci Yaccuti waakɛnda agi, “I Ciɛggɔn, a ‘ya?” Gɔ menan moki toocci ɔɔn. ²³ Ɔci Yaccu gɔki agi, “Mena omin iki ‘ya ḍwana ne cyɛɛlɔyɛ, gena ɛkɛ ‘ya ‘wonda ma byeŋkɛntiy. ²⁴ ’Ya Kaci Ma Baan tuud ba jyeka kiiwɛ ma te ‘ya. Yeti mena ‘ya ‘wonda ma byeŋkɛnti neeniyɛ, taab bɛya ɛkɛtiyɛ, tol tolo! Naa te ɛkɛ jiennɛ mɛɛgɛn bɛɛ!” ²⁵ Ɔci Yahuuja Ickɛɛryuti mena Yaccu ‘wonnɛ ma byeŋkɛnti neeniyɛ, tooccin Yaccuti agi, “Mena loṭi may, a ‘ya?” Ɔci Yaccu ṭwokcin ɛkɛti agi, “Ɛɛ, gena i.” ²⁶ Ɔci ne ɛkkɛn balki omki menyɛ, Yaccu byentan luullɛ, ɔci ɛkɛ cɔkcin Juaŋti. Ɔci ɛkɛ am wɛɛnnɛ jitin. Ɔci ɛkɛ maka laldɛ ɛkɛ ‘wonnɛ amo. Ɔci ɛkɛ gɔkcin ɛkkɛnti agi, “Antɛ omdɛ. Gena war ‘ya.” ²⁷ Ɔci ɛkɛ kubaaya pyeg luutkin luullɛ daŋkun. Ɔci ɛkɛ gɔkcin a pwatcin Juaŋti. Ɔci ɛkɛ ma ‘wonnɛ kubaaya, ɔci gɔkcin ɛkkɛnti agi, “Dala ɛkkɛ waakida mottɛ waka bala kubaaya konɛti neeni. ²⁸ Waka neeni bala ba yimg ‘ya ne kɛɛti iñɔ te ma waakɛnda aŋka dɛn nɔji ɛkkɛn baadi. Acaan Juaŋ gɔki agi te yimg ‘ya neeni ɛkɛ ma bɔɔkcɛ te nɔji ɛkki. ²⁹ ’Ya gɔkka ɛkkɛti, ‘ya motca pyeg jang ṭɔlgɛn acca wɛnni moki bɛɛ. ‘Ya cied budan ɔɔn ne ‘ya motta ɛkkɛn wonkɛn iki ɛkkɛ a cyɛɛlɔ non cyɛgji Wey ɔɔnti.” ³⁰ Ɔci ne ɛkkɛn ‘ualki ɔɔli gɛɛlyɛ, ɛkkɛn kaaccin bora ɔci ati Pom Jɛtuunti. ³¹ Ɔci Yaccu gɔkcin maka laldɛ ɛkɛti agi, “Acca te ween jiña neeniyɛ, ɛkkɛ buadɛ ma ɔci ḍɛɛmdɛ iñɔ waakida. ‘Ya daldata ɛkkɛ paru. A ɔɔnyɛ, bala ba jyeka kiigin ne gɔkki agi, ‘Mena cieti kulin ḍuadɛ Juaŋo, ɔci kulin cyɛndi jitin.’ ³² Ɔci ne ‘ya jɔŋda ñaalɔ te lientiyɛ, ‘ya ootta ban Jaliil, ɔci ikin yɔɔrtin aŋan moki.” ³³ Ɔci Butruc gɔkcin Yaccuti agi, “Gɔṭṭi, kan ɛkkɛn ḍɛɛmdi iñɔ waakɛndayɛ, ‘ya i daldin bɛɛ!” ³⁴ Ɔci Yaccu gɔkcin ɛkɛti agi, “Tieŋŋa i myettin ‘ya ne pwadan! Te ween jiña neeni ne tuan wiakti men bɛɛyɛ, i kɛkka te ‘ya oŋki aga ne ḍoogɔ doki.” ³⁵ Ɔci Butruc gɔkcin ɛkɛti agi, “Kan ma buagɔn noki ‘ya iki iyɛ, ‘ya kɛkka te i bɛɛ!” Maka laldɛ Yaccu maka pookɛn neeniyɛ, ɛkkɛn bala gɔki a ɔɔn daŋkun. ³⁶ Ɔci Yaccu dɛnjin nona bartan ma a Gɛtcɛɛmani i maka laldɛ ɛkɛy. Ɔci Yaccu gɔkcin maka laldɛ ɛkɛti agi, “Ɛkkɛ coottɛ wɛnni ‘ya ootta ñamu cɔkca Jwaŋa Tolanti.” ³⁷ Butruc ɔci Yaakub ɔci Yɔhanna eññɛ ɛkɛ. Ɔci Yaccu yomɛ yaayɛ ne tolan. ³⁸ Ɔci Yaccu gɔkcin maka ne ḍoogɔ neeniti agi, “‘Ya yomu yaayɛ ne tolan bala ba ‘ya tuuda tuun doki no. Dala ɛkkɛ yaddɛ te wɛnni. Ɔci dala ikin woŋgɔ tiittin ne pwadan iki ‘ya a cyɛɛlɔ.” ³⁹ Ɔci Yaccu ati ñamu parɛ ne ḍiɛran ṭɔɔlɛ, ɔci ɛkɛ niinjin konɛ baaŋnɛ iñɔ ṭɛɛrji. Ɔci ɛkɛ cɔkcin Juaŋti agi, “Wey ɔɔn, kan pwatcin itiyɛ, naa taab neeni bɛya ‘yati bɛɛ! Yeti ‘ya cɔkka iti ba yom ‘ya bɛɛ. ‘Ya cɔkka iti ba yom i.” ⁴⁰ Ɔci Yaccu bɛɛn dɔɔkkin nona maka laldɛ ɛkɛti, ɔci ɛkkɛn mɔŋnɛ ɛkɛ wicɔ. Ɔci ɛkɛ gɔkcin Butructi agi, “Butruc, i yaakiti waŋu tiicca te wɔɔka gɛɛl ne cyɛɛlɔ iki ‘ya bɛɛ? ⁴¹ Dala ɛkkɛ woŋgɔ tiittɛ aŋka naa ɛkkɛ ḍɛɛmdɛ iñɔ te maali Jwaŋa Yaayan bɛɛ. Ɛkkɛ yomgɔ buagɔn jyek ‘ya, yeti ɛkkɛ waakɔ koy koyo.” ⁴² Ɔci Yaccu ɛkkɛn dalnɛ. Ɔci ɛkɛ ati ñamu moki, ɔci ɛkɛ cɔkcin Juaŋti moki agi, “Wey ɔɔn, kan i buagiyɛ, dala i noŋja naŋki i aŋka naa taab neeni bɛya ‘yati bɛɛ. Yeti ‘ya cɔkka iti ba yom ‘ya bɛɛ. ‘Ya cɔkka iti ba yom i.” ⁴³ Ɔci ne ɛkɛ bɛɛni mokiyɛ, ɛkɛ ma mɔŋnɛ wiccin moki. Ɛkkɛn yaakinti ṭiedi bɛɛ. ⁴⁴ Ɔci Yaccu ɛkkɛn dalnɛ, ɔci ɛkɛ ati cɔkcin Juaŋti moki oŋki aŋi ne ḍoogɔ doki. Ɔci ɛkɛ cɔkcin ba cɔŋŋa cɔŋni ɛkɛ te oŋŋa akki ne yyɛɛwɔ wanna moki ɔɔn. ⁴⁵ Ɔci ɛkɛ bɛɛn maka laldɛ ɛkɛti moki, ɔci gɔkcin ɛkkɛnti agi, “Ɛkkɛ balgɛ wiccɛ men? Ɛkkɛ wookkɛ doki bɛɛ? Gɔṭṭɛ, wɔɔka bɛɛn doki! ‘Ya Kaci Ma Baan baldi byeŋ maka nɔɔtkti doki. ⁴⁶ Jɔŋdɛ ñaalɔ oottin. Gɔṭṭɛ, mena ‘ya ‘wonda ma byeŋkɛnti bɛɛn doki!” ⁴⁷ Ɔci ne Yaccu baali gɔki a ɔɔn menyɛ, Yahuuja Ickɛɛryuti bɛɛn ɛkɛti doki. Ɔci ma bɛɛn i ɛkɛ kɔɔna kɔɔnno. Ɛkkɛn bala eci byeŋgaaran byeŋkɛnti ɔci eci gɔlk byeŋkɛnti. Maka neeni bɛɛn te jyek gaciicin ḍwaŋin ɔci maka ḍwaŋin Ma Yahuud. ⁴⁸ Mena Yaccu ‘wonnɛ ma byeŋkɛnti neeniyɛ, ɛkɛ jiek naŋɛ iki ma te ñamu agi, “Mena ñiibdi ‘ya te tuku ba naŋki ma ikinyɛ, gena ɛkɛ neeni. Ɔci dala ɛkɛ mugdɛ doki!” ⁴⁹ Ɔci ne Yahuuja bɛɛniyɛ, ɛkɛ ati Yaccuti ne pɛñan, ɔci gɔkcin ɛkɛti agi, “I Ciɛggɔn, i baal ciyɛ?” Ɔci ɛkɛ Yaccu ñiimmɛ te tukɛ. ⁵⁰ Ɔci Yaccu gɔkcin ɛkɛti agi, “Mug ɔɔn, gena i bɛɛni buagi aŋka naŋa iyɛ, dala naŋa!” Ɔci ma ati Yaccuti ɔci ɛkɛ mugɛ. ⁵¹ Ɔci men gɛɛl mena bala Yaccutiyɛ, ɛkɛ byeŋgaaran dɔnnɛ bora te kuorjɛti, ɔci ɛkɛ mena kanŋan i gaciic tolan jyɛmmɛ jyeñɛ palnɛ bora. ⁵² Ɔci Yaccu gɔkcin ɛkɛti agi, “Byeŋgaaran duakca non ɛkɛti. Maka noowɔ te byeŋgaaranyɛ, ɛkkɛn da tuwa te lañ byeŋgaaran. ⁵³ Çeej i boki, kan ‘ya buagayɛ, ‘ya yaakati toocca Wey ɔɔnti te malɛɛkan, ɔci ‘ya cuonda ɛkɛ malɛɛkan a alpn coŋgin a coŋgin aŋka ɛkkɛn ‘ya kɛɛtayɔ! ⁵⁴ Yeti kan ‘ya noŋja a ɔɔnyɛ, oŋ jyeka kiigin jyeka gɔki te naŋka neeni waakɛnda bɛya bora a ɔki?” ⁵⁵ Ɔci ne ɛkɛ baali eetiti ma a ɔɔnyɛ, ɛkɛ gɔkcin maka coŋinti agi, “Ɛkkɛ bɛɛnɛ ennɛ byeŋgaaran, ɔci gɔlk byeŋkɔti aŋka ‘ya mugdata ɛkkɛ ba muŋi mena ɛɛn ogo? Oŋkanda ‘ya baal ciy iñɔ on Juaŋ ona tolanti lor ma bɛɛ? Oŋ ba ɛkkɛ ‘ya muŋŋata aŋan bɛ? ⁵⁶ Yeti naŋka neeni bɛya bora waakɛnda ba jyeka kiiwɛ maka a bɔwan Jwaŋa Tolan te ñamu dokiy.” Ɔci maka laldɛ Yaccuyɛ, Yaccu dalji, ɔci ɛkkɛn yiŋi ɔntɔ waakɛnda. ⁵⁷ Maka loṭi worga Juaŋ ɔci maka ḍwaŋin Ma Yahuudyɛ, ɛkkɛn wyetkɛn ḍɔɔlɛ on Kayapac. Ɔci maka Yaccu mugɛ neeniyɛ, ɛkkɛn Yaccu lwadɛ eyɛ nona ciyi Kayapac mena gaciic tolan Ma Yahuud neeni. ⁵⁸ Ɔci Butruc ɛkɛ bala bɛya booti te ŋoyɔ nona loonan ne ɛkɛ dɛnni kaañji kañ gaciic tolan Ma Yahuudti neeni ɔɔn. Ɔci ɛkɛ kaaccin jiju kaañji ɔci cooccin iñɔ i maka kanŋan iki gaciicin Ma Yahuud. Ɛkɛ buagɔn gɔrti ne jiek naŋtiti ma a ɔkiy. ⁵⁹ Gaciicin ḍwaŋin Ma Yahuud ɛkkɛn iki Maka Gɔṭi Jiekyɛ, ɛkkɛn bala lieṭi jwalla pwadan, jwalla eetan ɛkkɛn ḍuaŋa ṭɔɔlɛti aŋka Yaccu noktiti ɛkkɛny. ⁶⁰ Maka coŋin Yaccu jomgiyɔ, yeti ɛkkɛn jwalla Yaccu jomkitiyɔ neeniyɛ, yɔmjin bɛɛ, bɔɔnjin. Ɔci ne baaṭi maka jomi jiek gɛɛg bɛɛn ne yyɛɛwɔ, ɔci ɛkkɛn gɔki agi, ⁶¹ “‘Wana neeniyɛ, ɛkɛ gɔki agi ɛkɛ yaakinti on Juaŋ ona tolan laagjiyɔ, ɔci agi ɛkɛ cɔtci ona woondan. Ɔci agi ɛkɛ on Juaŋ ona tolan ona woondan neeni ḍagjɛ te cɔni te nink ne ḍoogɔ.” ⁶² Ɔci gaciic tolan Ma Yahuud jɔŋŋin ñaalɔ ɔci gɔkcin Yaccuti agi, “I ṭwokka jwali gɛɛl bɛɛ? Jyeka i tiakkitiyɔ ma neeni a jyeka awarɛ?” ⁶³ Ɔci Yaccu cien lieda. Ɔci gaciic tolan Ma Yahuud gɔkcin ɛkɛti agi, “‘Ya gɔkka iti te yenti Jwaŋa Tolan, ɔɔn myettɔn ne pwadan. I a Kiṭɔ? I a Kaci Juaŋɔ?” ⁶⁴ Ɔci Yaccu ṭwokcin ɛkɛti agi, “Bala a ɔɔn ba jwalla guaŋŋi i wanna. Ɔci ‘ya gɔkka ɛkkɛti, ne baaṭiyɛ, ‘ya Kaci Ma Baan yuartata ɛkkɛ ciy Jwaŋa balki War Tɛɛn Waakɛnda neeni taaŋɛti taaŋŋa byerɔn. Ɔci ne oŋ gɛɛlti ‘ya yuartata ɛkkɛ ne bɛɛda te pɔliy!” ⁶⁵ Ɔci gaciic tolan Ma Yahuud bworŋ ɛkɛ jiɛññɛ jitin te yom yoñ te jwali Yaccu neeni. Ɔci ɛkɛ gɔkcin mati agi, “‘Wana neeni yaayɛ hay! Ɛkɛ gɔki agi ɛkɛ agji Kaci Jwaŋa Tolan ne ɛkɛ a Kaci Jwaŋa Tolan bɛɛ ogo? Ikin buagin ma bɛya tɛkti jiek moki ogo? ⁶⁶ Oŋ acca yomg ɛkkɛ bala a ɔki?” Ɔci ma ṭwokcin ɛkɛti agi, “Ɛkɛ yaayɛ. Dala ɛkɛ tuwa.” ⁶⁷ Ɔci ma gɛɛg bala ŋuoṭi ñaang ɛkɛ ñingɛti. Ɔci ɛkkɛn bala jiebi ɛkɛ te bunya, ɔci ma gɛɛg bala jiebi ɛkɛ te byeŋkɛn korkɛn, ɔci ɛkkɛn bala gɔki agi, ⁶⁸ “I Kiṭɔ, dala i noŋja ba naŋki maka a bɔwan Jwaŋa Tolan. Mena i jyɛmmi neeni ŋeejɛ? Gɔkka!” ⁶⁹ Butruc bala ciyi kaañji on taaŋɛti. Ɔci kɛɛngɔn a ṭɔɔl gɛɛl bɛɛn ɛkɛti, ɔci gɔkcin ɛkɛti agi, “I daŋkun balgi iki Yaccu men ma Jaliil.” ⁷⁰ Ɔci Butruc kɛkcin ma ñomgɛnti waakɛnda agi, “Mena guaga i neeni ŋeej ‘ya bɛɛ.” ⁷¹ Ɔci Butruc ati yɔɔtcin kaañ tukɛti. Ɔci ɛkɛ yuarnɛ ṭɔla parɛ gɛɛl moki. Ɔci ṭɔla neeni gɔkcin mati agi, “‘Wana neeniyɛ, ɛkɛ bala iki Yaccu men ma Najarɛt.” ⁷² Ɔci Butruc kɛkcin moki ne pɛñan. Ɛkɛ aaltin te yenti Juaŋ agi, “Dala Jwaŋa Tolan jiek oodɛ ‘ya wyeñuti kan ‘ya jom jieky. ‘Wana guagdɛ ɛkkɛ neeniyɛ, ŋeej ‘ya bɛɛ!” ⁷³ Ɔci ne ḍiɛran ṭɔɔlɛ moki, maka pookɛn maka yɔdi nona neenitiyɛ, ɛkkɛn gɔkcin ɛkɛti agi, “I a men ɛkkɛn hay! I ŋiiki ma te lɛmi i!” ⁷⁴ Ɔci Butruc bala kɛki ne pɛñan awarɛ te yenti Juaŋ agi, “‘Wana wanna ŋeej ‘ya bɛɛ!” Ɔci ne pɛñan tuan wiakcin doki. ⁷⁵ Ɔci Butruc ñingɛ ñieŋnɛ te jwalla guaŋŋɛ Yaccu agi, “Ne tuan wiakti men bɛɛyɛ, i kɛkka te ‘ya oŋki aga ne ḍoogɔ dokiy.” Ɔci ɛkɛ kaaccin bora ɔci ɛkɛ bala wiak a joon te naŋki ɛkɛ neeni.

¹ Ɔci te liidɔ gaciicin ḍwaŋin ɔci maka ḍwaŋin Ma Yahuud bala gɔṭi jyek Yaccu. Ɛkkɛn buagɔn ɛkɛ noktan. ² Ɔci ɛkkɛn Yaccu ḍɛɛgɛ, ɔci eyɛ nona Bilaatuc mena a ḍuaŋa ṭɔɔlɛti aŋka ɛkɛ gɔkti jwali ɛkɛ te lyen Yaccu neeni. ³ Ɔci Yahuuja mena Yaccu ‘wonnɛ ma byeŋkɛnti neeniyɛ, ne ɛkɛ gɔrni jiek bɛɛki Yaccu wyeñɛtiyɛ, ɛkɛ paŋi aaŋŋɛyɔ, ɔci bil pɔddan men baan mena parɛ byeŋkɛ (30) neeniyɛ, dɔɔŋnɛ ɛkɛ gaciicin ḍwaŋin ɔci maka ḍwaŋin Ma Yahuud. ⁴ Ɔci ɛkɛ gɔkcin ɛkkɛnti agi, “‘Ya noŋi amaamo hay! Mena noŋi ne yaayan bɛɛyɛ, ‘wonnin ɛkkɛ byeŋkɛti budan!” Ɔci ɛkkɛn ṭwokcin ɛkɛti agi, “Jyeka neeni a jyek ɔɔn moki bɛɛ, aŋa iti paru.” ⁵ Ɔci ɛkɛ bil pɔddan yiɛmnɛ iñɔ orɔ on Juaŋ ona tolanti. Ɔci ɛkɛ ɛkkɛn dolnɛyɔ te aŋan, ɔci ɛkɛ ati bora, ɔci ɛkɛ warɛ ŋaammɛ te yom yoño. ⁶ Ɔci gaciicin ḍwaŋin Ma Yahuud bil pɔddan luollɛ ñaalɔ, ɔci ɛkkɛn gɔki agi, “Acaan jyek ganuun jyeka bala ikintiyɛ, ikin yaakinti bilka neeni ñaaktinyɔ iki bilk on Juaŋ ona tolan bɛɛ, acaan bilka neeni a bilk yimgo.” ⁷ Ɔci ɛkkɛn bala gɔṭi jieko. Ɔci ɛkkɛn noon gɛɛl wiɛlɛ te bilka neeni. Gena nona wɛtki ma lommo. Ɔci nona neeni aŋi nona jokki ma maka bɛya te ɔntɔ te bonka pookɛntiy. ⁸ Acaan a ɔŋŋiyɛ, nona neeni agɛ ma agi, “Non Bilk Yimgo.” Ɔci ma boṭi ɛkɛ acca men ɔɔn. ⁹ Te naŋka neeniyɛ, jyeka guaŋŋɛ bɔwa Jwaŋa Tolan bɔwa yenti Jɛramaaya neeniyɛ, bɛɛn bora. Jɛramaaya gɔki agi, “Bil Pɔddan a men baan mena parɛ byeŋkɛ (30) neeniyɛ, lultan mako. Bil Pɔddan neeniyɛ, gena bil pɔddan guagɛ ma Icrayiil agi ɛkki agi toomk men baany. ¹⁰ Ɔci ɛkkɛn nona wɛtki ma lomi wiɛlɛ te bil pɔddan neeni. Naŋka neeniyɛ, naŋɛ ma ba jyeka ‘ya nɔɔnnata Juaŋy.” ¹¹ Ɔci Yaccu bala yɔɔd ḍuaŋa ṭɔɔlɛ ñamɛti. Ɔci ḍuaŋa ṭɔɔlɛ tooccin ɛkɛti agi, “I a Ciɛggɔn Tolan Ma Yahuud?” Ɔci Yaccu ṭwokcin ɛkɛti agi, “Ɛɛ, ‘ya baal a ɔɔn ba jwalla guaga i wanna.” ¹² Gaciicin ḍwaŋin ɔci maka ḍwaŋin Ma Yahuudyɛ, ɛkkɛn bala jomi Yaccu warɛ agi ɛkta yaayɔ. Yeti Yaccu bala gɔki genga bɛɛ. Ɛkɛ bala ciyi lieda. ¹³ Ɔci Bilaatuc gɔkcin ɛkɛti agi, “I tieŋŋa jyeka tiaktan ma te naŋki i naŋka coŋin neeni bɛɛ?” ¹⁴ Yeti Yaccu bala ciyi lieda men ɔɔn. Ɛkɛ ṭwokcin jwali gɛɛl ne cyɛɛlɔ bɛɛ. Ɔci ḍuaŋa ṭɔɔlɛ yomɛ buaññi. ¹⁵ Yuonginda ne iid bɛɛdiyɛ, naŋki ḍuaŋa ṭɔɔlɛ bala. Men gɛɛl mena bala ciginjiyɛ, ɛkɛ pɔktɛ ḍuaŋa ṭɔɔlɛ budan, wantan ma bɛɛ. Mena pɔktɛ ɛkɛ neeniyɛ, gena mena Ma Yahuud buagitiy. ¹⁶ Te wɔɔka wannayɛ, mena ‘uan gɛɛl bala jiju yenti Baraabac. Ɛkɛ ŋeecɔn ma waakɛnda te naŋka naŋŋɛ ɛkɛ yaayan neeni. ¹⁷ Ɔci te oŋŋa wannayɛ, ne ma wyetkɛn ḍɔɔlkiti nona ne cyɛɛlɔyɛ, Bilaatuc tooccin ɛkkɛnti agi, “Ɛkkɛ buagɛ ‘ya Baraabac pɔkka? Walla Yaccu mena bartan ma a Kiṭɔ aŋka pɔkka?” ¹⁸ Bilaatuc tooccin ɛkkɛnti a ɔɔn acaan ŋeejɛ ɛkɛ Yaccu mugɛ gaciicin ḍwaŋin Ma Yahuud, ɔci owwɛ ɛkkɛn ɛkɛti, acaan ɛkkɛn korkɛn modɔ ɛkɛti. ¹⁹ Ɔci ne Bilaatuc baali ciyi nona gɔṭi ɛkɛ jyek Yaccu menyɛ, ɛŋ ɛkɛ jwali gɛɛl cuonnɛ nona ɛkɛti agi, “Naa i noŋja genga ‘wana pwadanti neeni bɛɛ. Acaan ‘ya lokkan te ɛkɛ ne pɛñan ɔci ‘ya taabban ne tolan te loggin neeni.” ²⁰ Gaciicin ḍwaŋin ɔci maka ḍwaŋin Ma Yahuudyɛ, ɛkkɛn gɔkcin maka coŋinti agi dala ɛkki toottɔ Bilaatucti te gena Baraabac, ɔci agi dala ɛkki gɔktɔ agi Kiṭɔ aŋka nogdi mako. ²¹ Ɔci ḍuaŋa ṭɔɔlɛ tooccin mati agi, “A menɛ te maka ne yyɛɛwɔ neeniti pɔkka ‘yay?” Ɔci ɛkkɛn ṭwokcin ɛkɛti agi, “Baraabac aŋka pɔkka!” ²² Ɔci Bilaatuc tooccin ɛkkɛnti moki agi, “Oŋ kan a ɔɔn ‘ya noŋja a ɔki te Yaccu mena bartan ma a Kiṭɔ neeniy?” Ɔci ma ṭwokcin waakɛnda agi, “Dala ɛkɛ ŋaaptan ma ñaalɔ!” ²³ Ɔci Bilaatuc ṭwokcin ɛkkɛnti agi, “Ogo? Ɛkɛ noŋi gena yaayan gɛɛl boki?” Ɔci ma bala yaadan a yook gɔki agi, “Dala ɛkɛ ŋaaptɛ ñaalɔ!” ²⁴ Ɔci ne Bilaatuc gɔrni ma yookiti ne pɛñan, ɔci ne ɛkɛ gɔrni ma nuulki ne tolanyɛ, ɛkɛ mwonnin te jyek godan Yaccu. Ɔci ɛkɛ pieg luullɛ, ɔci ɛkɛ byeŋkɛ luaŋŋɛ ma ñomgɛnti. Ɔci ɛkɛ gɔkcin mati agi, “Gɔṭṭɛ, jyek lyen ‘wana neeni bala ‘yati moki bɛɛ, aŋa ɛkkɛti doki!” ²⁵ Ɔci ma waakɛnda ṭwokcin ɛkɛti agi, “Dala yimg ɛkɛ bala ɔɔn ḍɔɔggɔti, ɔci kɛɛgin ɔɔn ḍɔɔggɛnti daŋkun!” ²⁶ Ɔci Bilaatuc Baraabac pɔŋnɛ te ciginji. Yeti Yaccu ḍwayɛ ma te jyek Bilaatuc, ɔci ɛkɛ ma ‘wonnɛ Yaccu byeŋkɛnti aŋka eetan ŋaaptan ma. ²⁷ Ɔci Yaccu lwadɛ eyɛ ackan ḍuaŋa ṭɔɔlɛ eyɛ ɛkkɛn on ḍuaŋa ṭɔɔlɛti. Ɔci ackan pookɛn wyetkɛn ḍɔɔlɛ aŋan waakɛnda. ²⁸ Ɔci ɛkkɛn bworŋin Yaccu gwoddɛ bora, ɔci bworŋ cyɛgji bworŋa wiɛlɛ pɛñan bworŋa a buol ‘yɛɛŋji ɛkkɛn ɛkɛti. ²⁹ Ɔci kuwi paari ɛkkɛn naŋɛ a til ṭɔɔlɛ, ɔci ‘yɛɛŋjɛ Yaccu wyeñɛti. Ɔci gɔɔl olji ɛkkɛn ɛkɛ bieŋɛti byeŋa byerɔn. Ma bala ooddi ɛkɛti ɔci ḍwondi iñɔ ɛkɛ ñamɛti, ɔci bala juoli ɛkɛ. Ɛkkɛn gɔki agi, “I Ciɛggɔn Tolan Ma Yahuud! Dala i cied yuonginda!” Gɔ ɛkkɛn maka pookɛn moki atin ḍwoncin iñɔ ɛkɛ ñamɛti moki ɔɔn! ³⁰ Ɔci ɛkkɛn bala ŋuoṭi ñaang ɛkɛ ñingɛti. Ɔci ɛkkɛn gɔɔl luulɛ te Yaccu bieŋɛti, ɔci bala jiebi ɛkɛ wyeñɛ. ³¹ Ɔci ne ɛkkɛn juolki ɛkɛ ne ḍookkiyɛ, bworŋ cyɛgji oŋ gwoddɛ ɛkkɛn bora oŋo. Ɔci ɛkɛ ɛɛŋgi bworŋin ɛkɛ dɔki. Ɛkkɛn bala ɛkɛ lwattan eetan nona ɛkɛ ŋaaptiti may. ³² Ɔci ne ɛkkɛn balki atki borayɛ, ɛkkɛn koogjin iki mena ‘uan gɛɛl yomɔ. Ɛkɛ yenti Cimaan. Ɛkɛ a men maka ban Cayriin. Ɔci ackan neeni ɛkɛ iirci kɛṭi kakan Yaccu. ³³ Ɔci Yaccu eyɛ ma nona bartan ma agi Gɔlgata. (Te jyek Mabaan ma boṭi agi “Oon Men Baan Wyeñɛ.”) ³⁴ Ak jana cyɛyan ñaagɛyɔ ma i pyeg luutkin, ɔci ‘woñgi ma Yaccu. Ɛkɛ dɛccin, yeti motcin bɛɛ. ³⁵ Ɔci Yaccu ŋaapci ackan neeni ñaalɔ. “Ɔci ɛkkɛn bala oomi kɔla ba naŋki ɛkkɛn te bworŋin Yaccu. Ɔci ɛkkɛn bworŋin luulɛ ɛkkɛn.” ³⁶ Ɔci ɛkkɛn cooccin iñɔ bala gɔṭi Yaccu. ³⁷ Kan men ŋaaptan ma ñaalɔyɛ, jyek naŋka naŋŋɛ ɛkɛ yaayan aŋka ɛkɛ noktiti ma neeni kiittan ma ñaalɔ. Ɔci kiikan gɛɛg ḍuaccɛ ma ñaalɔ Yaccu wyeñɛti. Kiikan neeni gɔki agi, “YACCU A CIƐGGƆN TOLAN MA YAHUUD.” ³⁸ Ɔci Yaccu ŋaapci ma ñaalɔ iki maka ɛyi ne yyɛɛwɔy. Mena ne cyɛɛlɔ te ɛkɛ byeŋa aamo, ɔci mena ne cyɛɛlɔ te ɛkɛ byeŋa byerɔn. ³⁹ Ɔci maka bala goṭi pɔɔjɔyɛ, ɛkkɛn bala bɛṭi wyetkɛn, ɔci gɔki ne yaayan ɛkɛti agi, ⁴⁰ “I gɔk agi i yaakiti on Juaŋ ona tolan laagayɔ, ɔci i gɔk agi i ejja ɛka woonɛ, ɔci i gɔk agi ɛkɛ ḍaga i nink ne ḍoogɔ! Kan i ag Kaci Jwaŋa Tolan awarɛyɛ, dala i waru yɔya ɔci kooya iñɔ te kakanti!” ⁴¹ Gaciicin ḍwaŋin Ma Yahuud ɔci maka loṭi worga Juaŋ ɔci maka ḍwaŋinyɛ, ɛkkɛn bala juoli Yaccu daŋkun. Ɛkkɛn gɔki agi, ⁴² “Maka pookɛn yɔɔññɛ ɛkɛ, ɔci acca ɛkɛ kookinti te yɔɔd war ɛkɛ parɛ ogo? Pari ɛkɛ a Ciɛggɔn Ma Yahuud bɛɛ? Dala ɛkɛ koodi iñɔ te kakanti, ɔci ikin oŋ jyettin ɛkɛti oŋo! ⁴³ Ɛkɛ jyeti Juaŋti. Oŋ acca kan Juaŋ ani ɛkɛ awarɛyɛ, dala ɛkɛ magdɛ acca! Acaan ɛkɛ gɔki agi ɛkɛ agji Kaci Jwaŋa Tolan.” ⁴⁴ Ɔci maka ɛyi maka ŋaapci ma ñaalɔ iki Yaccuyɛ, ɛkkɛn bala gɔki ne yaayan Yaccuti daŋkun. ⁴⁵ Ɔci ne oŋ yɔɔnni yeccuyɛ, noon uli baan warda ne oŋ waŋɛ warɛ yiɛnnɛ ɔɔn. ⁴⁶ Ɔci ne oŋ waŋɛ warɛ yiɛnnɛ iñɔyɛ, Yaccu yaajjin te pwana tolan agi, “Ɛlɔy! Ɛlɔy! Lama cabaktani?” (Te jyek Mabaan agi, “Jwaŋ ‘ya, Jwaŋ ‘ya, i ‘ya dalna ogo?)” ⁴⁷ Ɔci maka yɔdi wɛnan gɛɛg tieŋŋin, ɔci ɛkkɛn gɔki agi, “Tieŋdɛ, ɛkɛ boor Iliiya!” ⁴⁸ Ɔci men gɛɛl yiŋi ɔci ɛkɛ liipa olnɛ mooya cyɛyanti. Ɔci liipa neeni umnɛ jaan tukɛti, ɔci ɛkɛ liipa neeni laŋnɛ ñaalɔ Yaccuti ‘wonnɛ Yaccu aŋka ɛkɛ motti. ⁴⁹ Ɔci maka pookɛn gɛɛg gɔki agi, “Yaccu daltin lakun hay! Ikin gɔrtin lakun kan Iliiya bɛya moki ɛkɛ kaapun no!” ⁵⁰ Ɔci Yaccu yaajjin te pwana tolan, ɔci ɛkɛ tuun doki. ⁵¹ Ɔci te wɛnni bworŋa orɔ on Juaŋ ona tolan ḍañi jitin te ñaalɔ wyeñɛti ne iñɔ ɔɔn. Ɛkɛ toŋkɛ aŋi ne yyɛɛwɔ. Ɔci ṭɛɛr ḍiedan ɔci pomk booktin jitin. ⁵² Ɔci kolk daŋkun waakɛn pɔɔggɛ. Ma Juaŋ maka bala kolk jitinyɛ, ɛkkɛn jɔŋŋin ñaalɔ te kolk jitin a ḍiɛkan bɛɛ. ⁵³ Ɔci ne baaṭi ne Yaccu jɔŋni ñaalɔ te kooljiyɛ, ɛkkɛn ati ban Urcaliim bana bartan ma a bana pwadan, ɔci ɛkkɛn yuarcɛ maka coŋin. ⁵⁴ Ḍuaŋa ackan, ɔci maka ackan daŋkunyɛ, ɛkkɛn bala gɔṭi Yaccu ne Yaccu baali kakanti meny. Ɔci ne ɛkkɛn gɔrki ṭɛɛr warɛ ḍiedi ɔci noon aŋŋi mielyɛ, ɛkkɛn korkɛn buañi ne tolan, ɔci ɛkkɛn gɔki agi, “Mena neeniyɛ, ɛkɛ a Kaci Jwaŋa Tolan awarɛ hay!” ⁵⁵ Ɔci moong gɛɛg bala ne coŋɔn. Ɛkkɛn bala yɔdi gɔṭi te nona loonan. Moonga neeniyɛ, gena moonga boottin Yaccu te ban Jaliily. Ɛkkɛn bala moki Yaccu oŋkanda. ⁵⁶ Moryam Magdalin bala. Ɔci Moryam mɛy Yaakubn ɔci Yuocip, ɛkɛ bala daŋkun. Ɔci ɛŋ Jɛbadi bala. ⁵⁷ Ɔci ne oŋ waŋɛ luunni iñɔyɛ, mena cyɛgan men maka ban Ɛrimatiiyayɛ, bɛɛni. Ɛkɛ yenti Yuocip. Ɛkɛ a mena laldɛ Yaccu daŋkun. ⁵⁸ Ɔci ‘wana neeni ati yɔɔtcin Bilaatuc ñamɛti, ɔci tooccin ɛkɛti te war Yaccu. Ɔci Bilaatuc gɔkcin mati agi, “Dala war Yaccu eedda Yuocip.” ⁵⁹ Ɔci war Yaccu oonɛ Yuocip iñɔ te kakanti. Ɔci ɛkɛ paarŋɛyɔ te bworŋa pwadan tɛyan. ⁶⁰ Ɔci ɛkɛ war Yaccu joŋnɛ koolji. Gena kola wɔrŋɛ Yuocip poom konɛti te war ɛkɛ parɛ ne ɛkɛ tuudiy. Ɔci ɛkɛ guonan tolan gɛɛl ñienɛ olnɛ kool tukɛti ɔɔn, ɔci ɛkɛ atti. ⁶¹ Moryam Magdalin ɛkkɛn iki Moryam parɛyɛ, ɛkkɛn bala ciyi iñɔ aŋan kool taaŋɛti. ⁶² Ɔci ne liidɔ te Oŋ Cabityɛ, gaciicin ḍwaŋin Ma Yahuud i ma Pɛriciin ɛkkɛn wyetkɛn ḍɔɔlɛ, ɔci ati Bilaatucti waakɛnda. ⁶³ Ɔci ɛkkɛn gɔkcin ɛkɛti agi, “Ḍuaŋa, ɔɔn balgɔn poŋɔn te jyeka guaŋŋɛ Yaccu mena a laaban wanna ne ɛkɛ baali meny. Ɛkɛ gɔki agi ne nink ne ḍoogɔ bɛɛti borayɛ, ɛkɛ jɔŋji ñaalɔ te lienti. ⁶⁴ Acaan a ɔŋŋiyɛ, dala i ackan yɔɔtca kool wyeñɛti aŋka ɛkɛ gwaltan ne pwadan ne nink ne ḍoogɔ bɛɛti bora ɔɔn. Kan ackan baawyɛ, maka laldɛ Yaccu bɛya dita, ɔci war ɛkɛ kaltan ɛkkɛn. Ɔci ɛkkɛn gɔkti mati agi Yaccu jɔŋnɔ ñaalɔ te lienti. Kan ɛkkɛn noŋdi a ɔɔnyɛ, jiek pɛɛddi ne tolan. Naŋka ɛkkɛn ma naŋkɛti ñingɛn te jyek Yaccu te ñamuyɛ, bwandɛ naŋka ɛkkɛn ma naŋtɛti ñingɛn ŋoyɔ neeni.” ⁶⁵ Ɔci Bilaatuc gɔkcin ɛkkɛnti agi, “Hay! Dala ɛkkɛ ooddɛ iki ackan, ɔci dala ɛkkɛ jyek kool naŋdɛ ɛkkɛ ne pwadan.” ⁶⁶ Ɔci ɛkkɛn ati, ɔci guonan bala kool wyeñɛti neeniyɛ, naŋɛ ɛkkɛn lɛkɛti te kɛtim aŋka naa ɛkɛ oltan ma ɔntɔ bɛɛ. Ɔci ackan yɔɔtci ɛkkɛn kool wyeñɛti.

¹ Ɔci te liidi parɛ te tinnɔ ne Oŋ Cabit noŋi bɛɛdi bora, ɔci ne Oŋ Juaŋ cɔɔlniyɛ, ma ati kool wyeñɛti. Gena Moryam Magdalin ɔci Moryam parɛ moki. Ɛkkɛn buagɔn gɔrti kol Yaccu. ² Te oŋŋa wannayɛ, ṭɛɛr warɛ ḍiedan ne tolan. Šɛɛr warɛ ḍiedan a ɔɔn acaan malɛɛka Jwaŋa Tolan gɛɛl bɛɛn kooyin iñɔ te pɔliji, ɔci ɛkɛ guonan olnɛ ɔntɔ te kool tukɛti. Ɔci ɛkɛ cooccin iñɔ guonan wyeñɛti. ³ Ɛkɛ yuarɛ ma ɛkɛ galla gali ba ñaal ne wildi a wildin ɔɔn. Bworŋin ɛkɛ bɔɔna bɔɔn ba tomŋin. ⁴ Ɔci maka ackan maka kɛɛy kool tukɛ ne ɛkkɛn malɛɛka neeni yuarkitiyɛ, ɛkkɛn buañi ne tolan. Ɛkkɛn waakɛn ḍiedan ne pɛñan. Ɔci ɛkkɛn ḍɛɛmdin iñɔ bala ba maka tuutan doki. ⁵ Ɔci malɛɛka mɔkci moong kool tukɛti. Ɔci ɛkɛ gɔkcin ɛkkɛnti agi, “Naa ɛkkɛ buayɛ bɛɛ. Çeej ‘ya ɛkkɛ lieṭɛ Yaccu mena nogɛ ma kakantiy. ⁶ Ɛkɛ bala wɛnni moki bɛɛ. Ɛkɛ jɔŋŋin ñaalɔ doki ba jyeka guaŋŋɛ ɛkɛ te ñamuy. Bɛɛdɛ gɔrtɛ nona niini ɛkɛy. ⁷ Ɔci dala ɛkkɛ ooddɛ ne pɛñan maka laldɛ Yaccu myettɛ agi ɛkɛ jɔŋŋin ñaalɔ te koolji doki. Gɔṭṭɛ, Yaccu ati ban Jaliil ñamu, ɔci ɛkɛ mɔktɛ ɛkkɛ aŋan! Tieŋdɛ, acca ɛkkɛ myennin ‘ya doki.” ⁸ Ɔci ɛkkɛn kool dalji, ɔci ɛkkɛn ati ne pɛñan acaan ɛkkɛn buayi ne tolan, ɔci ɛkkɛn yomgɛn ñɔɔna ñɔɔn ne tolan daŋkun. Ɛkkɛn yiŋi maka laldɛ Yaccuti acaan ɛkkɛn buagɔn ɛkkɛn myettan te jyeka neeni. ⁹ Ɔci ne ɛkkɛn balki yom menyɛ, Yaccu koogjin iki ɛkkɛn, ɔci ñiepcin ɛkkɛnti agi, “Hay, ɛkkɛ!” Ɔci ɛkkɛn bɛɛn ɛkɛti. Ɔci ɛkɛ mugɛ ɛkkɛn ciegɛti. Ɔci ɛkkɛn bala moṭi ɛkɛti. ¹⁰ Ɔci Yaccu gɔkcin ɛkkɛnti agi, “Naa ɛkkɛ buayɛ bɛɛ. Dala ɛkkɛ ooddɛ modg ɔɔn myettɛ dala ɛkkɛn ooddi ban Jaliil, ɔci ɔɔn yɔɔrdɔn iki ɛkkɛn aŋan.” ¹¹ Ɔci ne moonga neeni atki baanjiyɛ, ɔci maka gɔṭi kool neeni gɛɛg ati bana tolanti neeni daŋkun. Ɔci ɛkkɛn gaciicin ḍwaŋin Ma Yahuud myetkɛ te naŋka neeni waakɛnda. ¹² Ɔci ne ɛkkɛn wyetkɛn ḍɔɔlkiti iki maka ḍwaŋinyɛ, ɛkkɛn ackan ‘woñgi bilk gɛɛg ne coŋɔn. ¹³ Ɔci ɛkkɛn gɔkcin ɛkkɛnti agi, “Dala ɛkkɛ ma myettɛ agi, ‘Ma ɛkɛ bɛɛn weenji ne ɔɔn balgɔn wiccɔn meny, ɔci war ɛkɛ kali ɛkkɛn ɔntɔ.’ ¹⁴ Ɔci kan ḍuaŋa ṭɔɔlɛ tieŋdi jyeka naŋŋin ikin acca ka ɛkkɛ kalkɛ nink neeniyɛ, ɔɔn gɔktɔn ɛkɛti ne pwadan, ɔci jiek bɛya ɛkkɛ wyetkɔti bɛɛ.” ¹⁵ Ɔci ɛkkɛn bilk luulɛ. Ɔci ɛkkɛn ati ɔci bala gɔki ba jyeka guagɛ gaciicin ḍwaŋin Ma Yahuud ɛkkɛnti neeni. Ɔci jwali ati bonk Ma Yahuud korkɛnti, agi war Yaccu kalɛ ma te ween jiñɛ. Ɔci jyeka neeni bala ɛkkɛn tuggɛnti men ɔɔn. ¹⁶ Ɔci ne pɛñan maka laldɛ Yaccu Maka Inyaakkɛn Wilin Ne Cyɛɛlɔyɛ, ɛkkɛn ati ban Jaliil nona poma guaŋŋɛ Yaccu ɛkkɛntiy. ¹⁷ Ɔci ne ɛkkɛn ɛkɛ yuarkitiyɛ, ɛkkɛn morcin ɛkɛti. Yeti ɛkkɛn maka pookɛn gɛɛg tieki. ¹⁸ Ɔci Yaccu bɛɛn ɔci ɛkɛ gɔkcin ɛkkɛnti agi, “Naŋka tɛyan naŋka ñaalɔ, ɔci naŋka iñɔ wɛnni ṭɛɛrjiyɛ, ɛkkɛn waakɛnda ‘wonna Juaŋ ‘ya bieŋuti. ¹⁹ Gɔṭṭɛ! Dala ɛkkɛ ɔgdɛ ooddɛ bonk jitin waakɛnda, ɔci kɛɛn waakɛnda laldɛ. Ɔci ne ma gɛɛg jyettiyɛ, dala ɛkkɛ ɛkkɛn buldɛ te yenti Weegɛn, ɔci te yenti Kaci ɛkɛ, ɔci te yenti Boŋ Juaŋo. ²⁰ Maka jyeddi ɔci buldɛ ɛkkɛyɛ, dala ɛkkɛn noŋdi ba jyeka muŋŋɛ ɛkkɛ te ‘yati waakɛnda, ɔci tiitanyɔ. Ɔci gɔṭṭɛ, ikin balkin iki ‘ya oŋkanda ɔɔn aŋka ɛkkɛ magdin ne oŋŋa ciyɛ ɛkkɛ iñɔ ṭɛɛrji wɛnni baadi ɔɔn.”