Yahuuja

Yahuuja

¹ Gena ‘ya Yahuuja mod Yaakubn kiewan worga ɛkkɛti neeni. ‘Ya a kɛɛngɔn Yaccu Kiṭɔ. Jwaŋa Tolan Wey Yaccu Kiṭɔnyɛ, ɛkɛ ɛkkɛ muonɛ bora. Ɛkɛ ani ɛkkɛ ne tolan. Yaccu Kiṭɔ bala ḍɔci ɛkkɛ. ² Dala Juaŋ yomɛ pɔktɛ ɛkkɛti ne pwadan. Dala ɛkkɛ yomgɔ pwadɔ oŋkanda. Ɔci dala ani Juaŋ bala ɛkkɛti ne tolan. ³ Modg ɔɔn, ‘ya noŋ ɛkkɛ kiegdin worga te jyek yɔɔt Juaŋ yɔɔta yuoci ɛkɛ ikiny. Yeti acaan maka yeyin gɛɛg aŋi ma kaniica lieda ɔɔnyɛ, ‘ya buaga ṭey ɛkkɛ te worga neeni. Dala ɛkkɛ woŋgɔ tiittɛ te jyek Juaŋ jyeka ikin ‘wontinti ɛkɛ neeni. ⁴ Maka yeyin maka aŋi ma kaniica lieda neeniyɛ, ɛkkɛn jyeti Juaŋti bɛɛ. Ɔci ɛkkɛn bala noŋi ba jyek Juaŋ bɛɛ. Ne baaṭi jiek oodɛ Juaŋ ɛkkɛn wyetkɛnti ba jyeka naŋŋɛ Juaŋ te ñamu te ɛkkɛny. Ɔci a ɔɔn yɔmjin, acaan ɛkkɛn gɔki agi Juaŋ yomdan pwadɔ mati, ɔci agi a ɔŋŋiyɛ, ma yaakinti noŋi ba yomg ɛkkɛn pookɛn budan, yomga buagɔn naŋki tomi neeni. Ɔci moki ɛkkɛn gɔki agi Yaccu Kiṭɔ agi Juaŋ bɛɛ, ɔci agi Yaccu Kiṭɔ agi Ciɛggɔn bɛɛ. ⁵ Ɔci acca ‘ya buaga dala ɛkkɛ poŋdɛ te jwali gɛɛl. Jwalla neeni ŋeejɛ ɛkkɛ doki. Ma Icrayiilyɛ, ɛkkɛn koonɛ Juaŋ bora te ban Macor waakɛnda. Ɔci ne baaṭi maka neeni gɛɛg maka jyeti ɛkɛti bɛɛyɛ, noŋŋɛ ɛkɛ. ⁶ Ɔci malɛɛkanyɛ, ɛkkɛn gɛɛg bala tieci kanŋa ɛkkɛn ñaalɔ pɔliji bɛɛ. Ɔci ɛkkɛn non ɛkkɛn dalji, ɔci ɛkkɛn olnɛ Jwaŋa Tolan nona ulanti. Ɔci ɛkkɛn ciyi waakɛn a ḍɛɛggin te jiŋgin yuonginda ɔɔn ne oŋŋa tolan oŋ godan bɛɛdi ɔɔn. ⁷ A ɔŋŋiyɛ, bala ba jyek maka ban Caduum ɔci maka ban Gamɔɔra ɔci maka ciyi ɛkkɛn toŋkɛntiy. Maka neeniyɛ, naŋki ɛkkɛn a tommo. Naŋki tomi gɛɛl dalji ɛkkɛn bɛɛ. Ɔci ywobji Juaŋ bɛɛn ɛkkɛnti doki. Ɔci ɛkkɛn bala wooci maccu oŋkanda yuonginda ɔɔn. Ɔci Juaŋ buagɔn dala ma poŋdi te ywobja neeni aŋka naa ywobji bɛya ɛkkɛnti daŋkun bɛɛ. ⁸ Ɔci maka aŋi ma kaniica amaam neeniyɛ, paŋi ɛkkɛn yaayɛ ne tolan, ɔci naŋki ɛkkɛn yeyɔ daŋkun ba paŋi ɛkkɛn ɔɔn. Ɛkkɛn yookɔn te jyek Jwaŋa Tolan, ɔci ɛkkɛn lɛɛṭi waka bala ñaalɔ pɔliji ba malɛɛkan ɔɔn. ⁹ Malɛɛka tolan gɛɛl bala yenti Maykal. Ɔci ne malɛɛka neeni balki gɔɔki tieki iki Jwaŋa Yaayan te war Muucayɛ, Maykal bala juoli Jwaŋa Yaayan bɛɛ. Ɛkɛ gɔkcin ɛkɛti agi, “Dala Jwaŋa Tolan gɔkti iti ne pɛñan.” ¹⁰ Yeti ‘uaya neeniyɛ, wooki waka bala ñaalɔ waka jitkɛn ŋeecɔn ɛkkɛn bɛɛy. Ɛkkɛn poŋi jiek ne pwadan bɛɛ. Ɛkkɛn noŋi amaam ba leyi ɔɔn. Kan a ɔɔnyɛ, ɛkkɛn ḍakti. ¹¹ Ywobja bɛya ɛkkɛntiyɛ, ɛkɛ ñyɛrcin bɛɛ. Acaan naŋki ɛkkɛn bala ba naŋki kɛɛn. Ɛkkɛn bala poŋi te jyek bilk pookɛn ba Balaam ɔɔn. Ɔci moki ba ywobji Juaŋ ywobja bɛɛn Kɔrati ne ɛkɛ yookiti te jyeka naŋŋɛ Juaŋ wɛɛyi mayɛ, bɛya ɛkkɛnti moki, acaan ɛkkɛn yookɔn te Jwaŋa Tolan ba Kɔra ɔɔn. ¹² Kan ɛkkɛ balgɛ jyeyɛ ne pwadan iidnti te jiɛn modinyɛ, ɔci kan ɛkkɛn balayɛ, naŋki ɛkkɛn a lɔɔno. Ɛkkɛn poŋi te mena parɛ gɛɛl bɛɛ. Ɛkkɛn poŋi te waak ɛkkɛn pookɛn budan. Ɛkkɛn bala ba pɔɔldin ne balkiti pieg bɛɛy. Ɛkkɛn eedɛ jwami amaamo. Ɔci moki, ɛkkɛn bala ba janga baaki ṭɔlgɛn, ɔci ɛkkɛn balki bɛɛkkɛn bɛɛ. Ɛkkɛn a waka budan, ɔci dɔɔttan ma ɔntɔ iki bɛɛkkɛn ɔɔn. ¹³ Naŋki ɛkkɛn yeyɔ. Ɛkkɛn bala ba pɔɔgi pieg galŋa tolanti, acaan pɔɔgi piegyɛ, ɛkkɛn waka yeyin waka ŋooyan ɛɛtan ñaalɔ. Naa ɛkkɛ boottɛ ɛkkɛnti bɛɛ, ɛkkɛn jyetcin ɔntɔ te pɔy Jwaŋa Tolanti ati amaam ba kɛltan nonk ɛkkɛn woodgɛn daljɛy. Maka neeni ati bana maañ doki. ¹⁴ Te kɛɛn Adamti ne kɛɛn Inakti ɔɔnyɛ, kɛɛn Adam a dɔɔyɔ wyetkɛn ne yyɛɛwɔ. Inak neeniyɛ, ɛkɛ bala gɔki te jyek maka neeni daŋkun. Ɛkɛ bala gɔki te naŋka bɛya ne ŋoyɔ agi, “Gɔṭṭɛ, Jwaŋa Tolan bala bɛya iki malɛɛkan ɛkɛ malɛɛkan a alpn coŋgin a coŋgin neeni. ¹⁵ Ɛkɛ buagɔn noŋdi godan maka bala ṭɛɛr konɛti baan warda. Ɔci maka yeyinyɛ, jiek oldɛ ɛkɛ ɛkkɛn wyetkɛnti. Jiek oldɛ ɛkɛ ɛkkɛn wyetkɛnti te naŋki ɛkkɛn naŋka yeyin neeni, ɔci te jyeka ḍorki ɛkkɛn Juaŋ neeni.” ¹⁶ Maka yeyin neeniyɛ, ɛkkɛn bala wooki waak waakɛnda. Ɛkkɛn yomgɛn pwadɔ te genga bɛɛ. Ɛkkɛn noŋi ba naŋka yomg ɛkkɛn buagiti ne pɛñan oŋkanday. Ɛkkɛn jieyi waak ɛkkɛn pookɛn. Ɛkkɛn gɔki jyeka milin mati aŋka dala ɛkkɛn ‘wontan ma waka pwadin. ¹⁷ Yeti ɛkkɛ maka ana ‘ya neeniyɛ, dala ɛkkɛ poŋdɛ te jyeka guagɛ Cuudan Ciɛggɔn ikin Yaccu Kiṭɔy. ¹⁸ Ɛkkɛn gɔki ɛkkɛti agi, “Ne oŋka bɛya ookti ne ŋoyɔyɛ, ma gɛɛg bɛya, ɔci ɛkkɛn wookti jyek Juaŋo, ɔci ɛkkɛn noŋdi naŋka yeyin ba yomg ɛkkɛn buagɔn.” ¹⁹ Maka yeyin neeniyɛ, gena ɛkkɛn kɛɛbi ma jitkɛn iñɔ ṭɛɛrji wɛnniy, acaan Boŋ Juaŋ bala ɛkkɛnti bɛɛ. ²⁰ Yeti ɛkkɛ maka ana ‘yay, dala ɛkkɛ waakɔ tɛya gɔ moki tɛyin ɔɔn te jyenna pwadan jyenna ɛkkɛ jyettɛ Juaŋti neeni. Dala ɛkkɛ cɔktɛ Juaŋti te war tɛɛn Boŋ Juaŋo. ²¹ Dala ɛkkɛ anɛ Juaŋ oŋkanda bala ba Juaŋ ne ani ɛkkɛ wanna. Naa anna neeni daldɛ bɛɛ. Dala ɛkkɛ kɛɛddɛ oŋŋa Yaccu Kiṭɔ yomɛ pɔktɛ ɛkkɛti, ɔci ɛkkɛ eedɛ ɛkɛ nona ciyɛ ɛkkɛ yuonginday. ²² Maka paŋi ɛkkɛn ḍuobbinyɛ, dala ɛkkɛn magdɛ ɛkkɛ. ²³ Ɔci maka pookɛn daŋkunyɛ, dala ɛkkɛn magdɛ ɛkkɛ aŋka naa ɛkkɛn ooddi bana maañti bɛɛ. Maka pookɛn maka magdɛ ɛkkɛ neeniyɛ, naa naŋki ɛkkɛn naŋka yaayan gɛɛl bala ɛkkɛti bɛɛ. ²⁴ Juaŋ yaakinti moki ɛkkɛ aŋka naa ɛkkɛ ḍɛɛmdɛ iñɔ bɛɛ. Ɔci te naŋki ɛkɛyɛ, ɛkkɛ eedɛ ɛkɛ non ɛkɛ nona galanti neeni. Nɔji ɛkkɛ bala moki bɛɛ, ɔci ɛkkɛ yomgɔ ñɔya ne pɛñan. ²⁵ Jwaŋa Tolanyɛ, ɛkɛ parɛ a Juaŋo. Ikin yɔɔññin ɛkɛ te naŋki Ciɛggɔn ikin Yaccu Kiṭɔ. Ciɛggɔn ikin neeniyɛ, dala ɛkɛ dɛki galla gali acca ɔci yuonginda ɔɔn! Dala war tɛɛn ɛkɛ bala oŋkanda ɔɔn! Ɔci dala jyek ɛkɛ bala ñamu yuonginda ɔɔn! Amɛɛn.