Ibrun

¹ Jwaŋa Tolan ne maka yɔrg ikin ɔci weyi ikin nɔɔnnɛ te baaṭi te maka a bɔwan Jwaŋa Tolan te jiek jitkɛn ne coŋɔn ɔci oŋki ne coŋɔnyɛ, ² ɛkɛ oŋ ikin nɔɔnnin te ninka bawwin doki neeni te Kaci ɛkɛ Yaccu Kiṭɔ. Ɛkɛ naŋŋɛ Juaŋ a mena mwoki waak waakɛnday, ɔci te ɛkɛ mokiyɛ, Juaŋ cɔti ṭɛɛr ɔci pɔllo. ³ Ɔci Kaci ɛkɛyɛ, ɛkɛ a mena yɔṭṭin ikin pwani Jwaŋa Tolany, ɔci ɛkɛ bala ba bolji Jwaŋa Tolan awarɛ, ɔci ɛkɛ eci waak waakɛnda ati te ɛkɛ yɔɔda bɛɛ. Ɔci ne ɛkɛ ma pɔŋnɛ te nɔjiyɛ, ɛkɛ oŋ cooccin Jwaŋa Tolan taaŋɛti taaŋŋa a byerɔn ñaalɔ pɔliji. ⁴ Ɔci Kaci Jwaŋa Tolanyɛ, ɛkɛ tolcin te malɛɛkan waakɛnda bala ba ne ɛkɛ ‘wonnɛ Weegɛn yenta pwadan te malɛɛkan waakɛnday. ⁵ Acaan Juaŋ gɔkcin malɛɛka gɛɛlti oŋgati a ɔŋŋi bɛɛ. Ɛkɛ gɔki agi, “I a Kaci ‘ya, i jiennin ‘ya te oŋŋo.” Ɔci moki agi, “‘Ya agdi Wey ɛkkɛn ɔci ɛkɛ aga Kaci ‘ya.” ⁶ Yeti ne Juaŋ buaŋŋi aŋka cuondi Kacca a kɛɛgɔn iñɔ ṭɛɛrji wɛnniyɛ, ɛkɛ gɔkcin agi, “Dala malɛɛkan Jwaŋa Tolan morti ɛkɛti waakɛnda.” ⁷ Ɔci ɛkɛ gɔki agi, “Ɛkɛ malɛɛkan ɛkɛ naŋdɛ aga jwammo, ɔci maka kanŋan ɛkɛti aga maañ lɛmmɛ.” ⁸ Oŋ yeti te Kaci ɛkɛyɛ, ɛkɛ gɔki agi, “Hay Juaŋo, kaakci iyɛ, ɛkɛ bala oŋki waakɛnda baadi bɛɛ. Ɔci naŋka pwadanyɛ, aga war tɛɛn cyɛgji i. ⁹ I an naŋka pwadan, ɔci i yooki te naŋka yeyin. Ɔci a ɔŋŋiyɛ, Jwaŋa Tolan Jwaŋ iyɛ, i muoni bora ɔci ‘wonnɛ yoma ñɔyan ne tolan te mung ɛkkɛ.” ¹⁰ Ɔci Jwaŋa Tolan gɔkcin moki agi, “Ciɛggɔn, te ñamuyɛ, i okki ṭɛɛr ɔci pɔllo. Ɛkkɛn a kanŋa byeŋ i. ¹¹ Yeti ɛkkɛnyɛ, baadi, oŋ iyɛ, aŋka baldi oŋki waakɛnda. Ɔci ɛkkɛn aga donk ba bworŋ ne agdi daany. ¹² Ɔci ɛkkɛn wiñayɔ i ba bworŋa tolan ɔɔn, ɔci ɛkkɛn waakɛn aktan ba bworŋ ɔɔn. Oŋ yeti iyɛ, waru aga oŋgati bɛɛ. I ciy yuong waakɛnda ɔɔn.” ¹³ Juaŋ gɔkcin malɛɛkan ɛkɛ gɛɛlti oŋgati boki agi, “I coocca ‘ya taaŋuti taaŋŋa a byerɔny, ɔci ‘ya maka noŋi ne yaayan iti neeni bwandi, ɔci ḍuacca ‘ya iñɔ i cieguti.” ¹⁴ Malɛɛkan ɛkkɛn waakɛnda a boŋka cundɛ Juaŋ noŋi kanŋan maka ḍuaññɛ Juaŋ aŋka non yɔɔt ɛkɛ muktan neeniti.

¹ Yaccu tol tol te malɛɛkan, a ɔŋŋiyɛ, dala ikin woŋgɔ tiittin te waka tieŋnin ikin aŋka naa ikin jyettin ɔntɔ bɛɛ. ² Jyeka guagɛ malɛɛkan a jyeka awarɛ, ɔci jyeka neeni bɛɛyɛji ma. Ɔci maka noŋi nɔji neeniyɛ, ywobji Jwaŋa Tolan bɛɛn ɛkkɛnti waakɛnda awarɛ. ³ Kan ikin woŋgɔ tiittin te yɔɔta Juaŋ yuoci ikin neeni bɛɛyɛ, ikin uttin bɛɛ. Ciɛggɔn ikin Yaccu Kiṭɔ ɛkɛ jɔɔtcin te jyek yɔɔta neeni ñamu, ɔci maka tieŋŋin ɔci jyek ɛkɛ mugɛyɛ, ɛkkɛn mieti ikin a jyeka neeni awarɛ ɔci tiekɛ ne ikin bɛɛnin ɔɔn. ⁴ Ɔci Juaŋ daŋkun ikin myennin a jyeka neeni ɛkkɛn awarɛ. Ɛkɛ ikin myennin te naŋka tɛyan naŋka ñyecki ma war tɛɛn ɛkɛ ɔci te naŋka ma woŋgɛn ñiektiti te ɛkɛ, ɔci te ‘woñgin ɛkɛ ikin ‘wonninti Boŋ ɛkɛy. Ɛkɛ ikin ‘wonnin waka neeni aŋka ŋeettin ikin jyeka neeni awarɛ. ⁵ Šɛɛr warda ṭɛra bala ne baaṭi ṭɛra guaktin ikin neeniyɛ, ɛkɛ ḍuannɛ Juaŋ malɛɛkan byeŋkɛnti bɛɛ. ⁶ Oŋ yeti menga gɔki worga Juaŋji agi, “Men baan ɛkɛ a menɛ aŋka i poŋi te ɛkɛy? Ɔci ɛkɛ a menɛ aŋka i gɔṭi ɛkɛy? ⁷ I ɛkɛ naŋŋi ḍiɛrŋ te malɛɛkan wɔɔka ne ḍuulan, ɔci i ɛkɛ ‘wonnɛ pwanno, ⁸ ɔci i waak waakɛnda ḍuanni ɛkɛ bieŋɛti.” Jwalla neeni kon ɛkɛ bala a ɔŋŋi, kan waak tieŋdi jyek ɛkɛ waakɛndayɛ, Juaŋ genga dalnɛ bora ne cyɛɛlɔ bɛɛ, waak waakɛnda ‘wonni ɛkɛ men baan bieŋɛti. Yeti acca waak yuartin ikin tyeŋi jyek men baan waakɛnda moki bɛɛ. ⁹ Yeti Yaccu Mena ḍuannɛ Jwaŋa Tolan ḍiɛrŋ te malɛɛkan wɔɔka ne ḍuulan neeniyɛ, ɛkɛ yuartin ikin ne ɛkɛ ‘wonnɛ Juaŋ yom pwani aŋka ɛkɛ dɛccin pɛñi lieno. Ɛkɛ naŋŋɛ Juaŋ ḍiɛrŋ te malɛɛkan te naŋki pwani Juaŋo. A ɔŋŋiyɛ, ɛkɛ tuun te ma waakɛnda. ¹⁰ Acaan waak waakɛnda cɔnnɛ Jwaŋa Tolan, ɔci ɛkɛ waak waakɛnda naŋŋɛ bala ati yɔɔda bɛɛ. A ɔŋŋiyɛ, yɔmjin doki ne Juaŋ Yaccu naŋŋɛ kanŋa ɛkɛ cwamdɛ te taaby. A ɔŋŋiyɛ, ɛkɛ eccin kɛɛgin ne coŋɔn aŋka ñoowɔ iki ɛkɛ te pwani ɛkɛ. Acaan Yaccu a mena ɛkkɛn wɛɛdɛ nona ɛkkɛn yɔɔdɛ Juaŋy. ¹¹ Yaccu ma pɔŋnɛ te nɔjjo. Ɔci ɛkɛ i maka pɔŋnɛ ɛkɛ te nɔji neeni Wey ɛkkɛn a cyɛɛlɔ. A ɔŋŋiyɛ, Yaccu lɔɔddi te barŋa ɛkkɛn bardɛ a modin bɛɛ. ¹² Ɔci ɛkɛ gɔkcin Juaŋti agi, “Modg ɔɔn nɔɔtka ‘ya te yenti i, ɔci ‘ya ‘ualja te yenti i kaniicaji.” ¹³ Ɛkɛ gɔki moki agi, “Paŋi ‘ya ḍuacca aŋa Juaŋti.” Ɔci ɛkɛ gɔki moki agi, “‘Ya wɛnni iki kɛɛgin ‘ya ‘wonnata Juaŋ nɛ.” ¹⁴ Acaan kɛɛgin neeniyɛ, ɛkkɛn a ma baano, ɔci Yaccu daŋkun aŋi men baan ba ɛkkɛn ɔɔn. Ɔci te lyen ɛkɛ neeni ɛkɛ mena balki jyek lien neeniyɛ, nuudɛ jitin. Gena Jwaŋa Yaayan. ¹⁵ A ɔŋŋiyɛ, maka ciyi kɛñji jitin neeni pɔŋnɛyɔ ɛkɛ te kɛñji acaan ɛkkɛn buayi lien ne tolan. ¹⁶ Oŋ yeti awarɛyɛ, ɛkɛ moki malɛɛkan bɛɛ. “Ɛkɛ moki gena kɛɛn Abrahim.” ¹⁷ Acaan a ɔŋŋiyɛ, dala ɛkɛ bala ba modgɛn te waak waakɛnda aŋka ɛkɛ yomɛ pwada ɛkkɛnti ɔci noŋdi ba jyek gaciic tolan Ma Yahuud awarɛ te wak Jwaŋa Tolan aŋka ɛkɛ ma wandɛ te nɔji ɛkkɛn. ¹⁸ Acaan ɛkɛ taabbin, ɔci ɛkɛ pɔɔññɛ Jwaŋa Yaayanyɛ, ɛkɛ daŋkun yaakinti moki maka pɔɔdɛ Jwaŋa Yaayany.

¹ A ɔŋŋiyɛ, hay modg ɔɔn maka pwadgin Juaŋ ñamɛti maka bornɛ Juaŋy, dala ɛkkɛ gɔrtɛ Yaccu Kiṭɔ mena cuonnɛ ɛkɛ a gaciic tolan ɔci a Ciɛggɔn jyeni ikin neeniy. ² Ɔci ɛkɛ a mena noŋi ba jwali Juaŋ mena ɛkɛ naŋŋɛ a gaciic tolan bala ba Muuca ne baali noŋi ba jwali Juaŋ on Juaŋy. ³ Oŋ a ɔŋŋiyɛ, ɛkɛ pwatcin ne tolan te Muuca bala ba mena eñi ony. Acaan kan men gɛɛl eñi onyɛ, ma noŋi ne pwadan ɛkɛti ne tolan te ono. ⁴ Oorg waakɛndayɛ, eetan ma a een balki maka cɔti ɛkkɛny, oŋ yeti Jwaŋa Tolanyɛ, ɛkɛ a mena cɔti waak waakɛnday. ⁵ Oŋ yeti awarɛyɛ, Muuca bala gɔṭi on Juaŋ ne pwadan ba mena kanŋan a kanŋin ɔɔn. Ɔci ɛkɛ bala nɔɔti ma te waka guaŋŋɛ Juaŋ agi balgɔ bɛɛdɔ te oŋka bɛɛdɔ ne ŋoyɔy. ⁶ Oŋ yeti Kiṭɔ bala gɔṭi on Juaŋ ne pwadan acaan ɛkɛ a Kaci Jwaŋa Tolan, ɔci ikin agin on ɛkɛ kan ikin ɛkɛ tieŋnin ne pwadan te yomg ikin, ɔci kan ikin yomgɔ ŋoodan te waka pwadin waka ɛkɛ buagɔn acaan ‘wontin ikin neeni bɛɛy. ⁷ Acaan a ɔŋŋiyɛ, bala ba jyeka guagdi Boŋ Juaŋ agi, “Kan ɛkkɛ tieŋnɛ pwan Juaŋ te oŋiyɛ, ⁸ naa ɛkkɛ wyetkɔ tɛy tɛy ba naŋka naŋɛ yɔrg ɛkkɛ te baaṭi wanna bɛɛ. Ɛkkɛn jyetcin ɔntɔ yookɔn te jyek ‘ya ne ɛkkɛn balki wɔɔŋjiy. ⁹ Ɔci ɛkkɛn ‘ya pɔɔka, ɔci ɛkkɛn gɔrcin naŋki ‘ya yuong ma baan ne yyɛɛwɔ (40). ¹⁰ Acaan a ɔŋŋiyɛ, ‘ya baal looñ ɛkkɛnti, ɔci ‘ya gɔkcan ka ɛkkɛn oŋkanda noŋi nɔji yomgɛnti, yeti ɛkkɛn pɔɔk ‘ya ŋeecɔn bɛɛ. ¹¹ Acaan a ɔŋŋiyɛ, ‘ya gɔkcan te loñk awarɛ ɛkkɛnti ka naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛ.” ¹² Hay modg ɔɔn, dala ɛkkɛ woŋgɔ tiittɛ, naa menga baltan yoma yaayan yoma baaw Juaŋti te dwakta ɛkɛ dɔɔdi ŋoyɔ te Jwaŋa tɛɛti neeniti bɛɛ. ¹³ Dala ɛkkɛ ṭeewɛ yɔtin pookɔ oŋkanda ba jyek jwalla gɔki agi “Te Oŋŋo,” aŋka naa menga ɛkkɛti wyeñɛ tɛya te maalla ɛkɛ maaldɛ nɔji bɛɛ. ¹⁴ Kan ikin yɔɔnnin ne tɛyan Jwaŋa Tolanti ne baaṭi ɔɔn ba bolja ikin jɔɔnnin jyettin ɛkɛti ñamu neeniyɛ, ikin ñootin a cyɛɛlɔ waakida Yaccu Kiṭɔti. ¹⁵ Bala ba Boŋ Juaŋ ne gɔki agi, “Kan ɛkkɛ tieŋnɛ pwan Juaŋ te oŋiyɛ, naa ɛkkɛ wyetkɔ tɛy tɛy bɛɛ, naa ɛkkɛ noŋdɛ ba naŋka naŋɛ yɔrg ɛkkɛ ne ɛkkɛn jyecki bora wɔɔŋji yookiti te jyek Juaŋ wanna bɛɛ.” ¹⁶ Oŋ a makɛ tieŋjin pwan Juaŋ ɔci looñjiny? Gena maka koonɛ Muuca bora te ban Macory. ¹⁷ Oŋ a makɛ Juaŋ looñjin ɛkkɛnti yuong a ma baan ne yyɛɛwɔy (40)? Gena maka noŋi nɔji, ɔci ɛkkɛn a maka tuun wɔɔŋjiy. ¹⁸ Juaŋ gɔkcin makɛti te loñk awarɛ agi, “Naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛy?” Gena maka yookɔn waakɛn te tieŋŋin jyek ɛkɛy. ¹⁹ Acaan a ɔŋŋiyɛ, yuartin ikin ɛkkɛn yaaŋnɛti kaaccin nona wooti ma neeni bɛɛ, acaan ɛkkɛn jyeti Juaŋti bɛɛ.

¹ Oŋ kan ne Juaŋ bala ikin ḍuaññin te jwali aŋka ikin kaattin nona wooti may, dala ikin buattin aŋka naa menga ikinti dita dɛndi nona wooti ma aŋan baaw bɛɛ. ² Acaan ikin lalkin ma te jyeka wonkɛn jyeka pwadin bala ba ɛkkɛn ne lalkiti ma daŋkuny. Oŋ yeti jyeka tieŋjɛ ɛkkɛn neeniyɛ, yɔmjin te genga ɛkkɛnti bɛɛ. Acaan maka tieŋŋin neeniyɛ, ɛkkɛn jyeti jyeka neeni te yoma awarɛ bɛɛ. ³ Oŋ yeti ikin a maka jyeti Jwaŋa Tolanti neeni aŋka kaattin nona wooti may. Gena guagdɛ Juaŋ agi, “‘Ya gɔkcan te loñk awarɛ ɛkkɛnti ka, ‘Naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛ.’ ” ⁴ Juaŋ gɔki a ɔɔn ne ɛkɛ ḍookki te kanŋa wona ɛkɛ okki waaky. Ɔci ɛkɛ gɔki worgaji te ninna akki ne dɔɔyɔ wyetkɛn ne yyɛɛwɔ agi, “Jwaŋa Tolan wooki te ninna akki ne dɔɔyɔ wyetkɛn ne yyɛɛwɔ neeni ne ɛkɛ ḍookki te kanŋa ɛkɛy.” ⁵ Ɔci ɛkɛ gɔki moki agi, “Naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛ.” ⁶ Acaan maka lali ma ñamu te jyeka wonkɛn jyeka pwadin neeniyɛ, ɛkkɛn kaaccin nona wooti ma bɛɛ, acaan ɛkkɛn tieŋŋin jyek Juaŋ bɛɛ. Maka pookɛn gɛɛg kaatti nona wooti ma acaan ɛkkɛn tieŋŋin jyek Juaŋo. ⁷ A ɔŋŋiyɛ, Juaŋ oŋŋa parɛ gɛɛl kɛnnɛ bora barŋɛ agi, “Te Oŋŋo.” Ɛkɛ gɔki ɔɔn te tuk Daawud te baaṭi agi, “Kan ɛkkɛ tieŋnɛ pwan Juaŋ te oŋiyɛ, naa ɛkkɛ wyetkɔ tɛya bɛɛ.” ⁸ Kan te Jɔcwa ma Icrayiil kaannɛ nona wooti ɛkkɛnyɛ, te Juaŋ moki gɔki te oŋŋa parɛ gɛɛl bɛɛ. Yeti Jɔcwa ɛkkɛn kaannɛ aŋan bɛɛ. ⁹ Ma Juaŋ aŋka balki wooka ba wooka woonɛ Juaŋ te ninna akki dɔɔyɔ wyetkɛn ne yyɛɛwɔy. ¹⁰ Kan mena kaatti nona wooti ma nona ma ‘wondɛ Juaŋyɛ, ɛkɛ woodi te kanŋa ɛkɛ bala ba Juaŋ ne wookki te kanŋa ɛkɛy. ¹¹ Acaan a ɔŋŋiyɛ, dala ikin kantin ne pɛñan aŋka ikin kaattin nona wooti ma neenitiy. Dala ikin buattin aŋka naa menga ḍaga yomu budan te kaaccin ɛkɛ kaatti nona wooti ma neeni te naŋki waka bala ba waka naŋi maka jyek Juaŋ lɛɛgɛ jitin waayi bɛɛ. ¹² Jwali Juaŋyɛ, ɛkɛ tɛɛti, ɔci ɛkɛ kanŋan mati. Ɛkɛ byeŋgaaran balki lɛkɛ ne yyɛɛwɔ buannɛ te ñɔjjo. Ɛkɛ i waru ŋwoddɛ jitin i booŋo, ɔci wɔtti owi jitin ɔci ṭuŋiti. Ɛkɛ paŋi ma baan ɔci waka yomg ma baan buagɛ byɛŋdɛji waakɛnda. ¹³ Genga bala warɛ a coggɔn Juaŋti bɛɛ. Waak waakɛnda waakɛn a liɛlgin Juaŋ woŋgɛti. Ɛkɛ a mena myettin ikin naŋki ikin waakɛnday. ¹⁴ Ikin balkin gaciic tolan. Gena Yaccu Kiṭɔ Kaci Jwaŋa Tolan, ɛkɛ ati ñaalɔ Juaŋti, ɔci a ɔŋŋiyɛ, dala jyeni ikin muktin ikin yomgɔti ne tɛyan. ¹⁵ Ikin balkin Yaccu a gaciic tolan, ɔci ɛkɛ yaakinti ikin maktin te war koñi ikin, acaan ɛkɛ pɔɔññɛ Jwaŋa Yaayan te waak waakɛnda ba ikin ɔɔn, oŋ yeti ɛkɛ noŋi nɔji bɛɛ. ¹⁶ A ɔŋŋiyɛ, dala ikin ortinti Jwaŋ naŋki pwaniti te yoma tɛyan aŋka Jwaŋa Tolan yomɛ pɔktɛ ikinti, ɔci ikin yɔɔrtin yom pwani Juaŋo. Ɔci ne naŋka yeyin bɛɛti ikintiyɛ, ɛkɛ ikin maktin.

¹ Ɔci gaciicin ḍwaŋin waakɛndayɛ, ɛkkɛn lɔɔttan ma bora te ma jitin, aŋka kanŋan kanŋa Juaŋ te ma waakɛnda. Mena gaciic tolanyɛ, ɛkɛ waak ‘wondɛ Juaŋ te mako. Ɔci ɛkɛ ɛṭi waak Juaŋti te mako. A ɔŋŋiyɛ, Juaŋ ɛkkɛn bɔɔktɛ te nɔji ɛkkɛn. ² Ɔci ɛkɛ yaakinti moki maka noŋi nɔji, ɔci maka pɔy Juaŋ ŋeecɔn bɛɛy, acaan ɛkɛ da warɛ koy koy ba ɛkkɛn ɔɔn. ³ Ɔci a ɔŋŋiyɛ, ɛkɛ da warɛ ‘yɛrdɛ te nɔji ɛkɛ bala ba bolja ɛkɛ ɛṭi ma ɛkɛ te nɔji ɛkkɛn wanna ɔɔn. ⁴ Yeti menga warɛ naŋdɛ aga gaciic tolan parɛ bɛɛ. Gena mena borti Juaŋ a borkin bala ba Juaŋ ne Haruun borniy. ⁵ Oŋ Kiṭɔ daŋkunyɛ, warɛ olnɛ ñamu parɛ nona ɛkɛ agɛ gaciic tolan neeniti bɛɛ. Gena Juaŋ aŋka gɔkcin ɛkɛti agi, “I a Kaci ‘ya. I jiennin ‘ya te oŋŋo.” ⁶ Ɔci Juaŋ gɔki worga kona parɛ gɛɛlti moki agi, “I ag gaciic younginda ba Mɛlki Caadik.” ⁷ Ne Yaccu men baali ciyi te coodi ma baanyɛ, ɛkɛ bala cɔki Juaŋti, ɔci bala wiak te pyeg woŋgɛ Juaŋti, ɔci bala yaadan Juaŋti acaan Juaŋ yaakinti ɛkɛ yɔɔdɛ te lieno. Ɔci Juaŋ tieŋŋin cɔŋi ɛkɛ, acaan ɛkɛ bala noŋi ba jyek Juaŋo. ⁸ Ɛkɛ a Kaci Jwaŋa Tolan, oŋ yeti ɛkɛ yaaŋnɛti tiit jyek Juaŋ te taab ɛkɛ neeni. ⁹ Ɔci ne ɛkɛ cwamnɛ Weegɛnyɛ, ɛkɛ aŋi mena yuoci maka tyeŋi jyek ɛkɛ waakɛnda, ɔci ɛkkɛn ‘wondɛ ɛkɛ tɛɛtin baadi bɛɛy. ¹⁰ A ɔŋŋiyɛ, Juaŋ ɛkɛ barŋɛ a gaciic tolan ba Mɛlki Caadik. ¹¹ ’Ya buaga ɛkkɛ myettin jiek ne coŋɔn te jwalla neeni, oŋ yeti ɛkkɛn lwoŋŋɛn tɛɛcin ɛkkɛti, acaan ɛkkɛ balgɛ ba maka miŋko. ¹² Awarɛ, ɛkkɛ balkɛ wɔɔka aŋka te ɛkkɛ agdɛ maka loṭi mako, oŋ yeti ɛkkɛ buagɛ dɔkɔ mena ɛkkɛ laldɛ te jɔɔtcin ɛkkɛ jɔɔttɛ te lali jwali Juaŋy. Ɛkkɛ buagɛ jyek Juaŋ jyeka koyan ba aak neeni, ɛkkɛ buagɛ oomdin tɛyan bɛɛ. ¹³ Mena moti aakyɛ, ɛkɛ a kacco, ɔci ɛkɛ a mena jyeka pwadin ŋeejɛ bɛɛy. ¹⁴ Oŋ yeti oomdin tɛyanyɛ, gena oomdin maka ḍwaŋin maka tɛyan, acaan ɛkkɛn ñingɛn tɛɛn ɔci yaaŋnɛti naŋka pwadan ŋeejjɛ, ɔci naŋka yeyin ŋeejjɛ moki.

¹ A ɔŋŋiyɛ, dala bolja ikin loṭin ñɔkin a ñwaŋi a jiek ŋwayya ne cyɛɛlɔ a ñaccu te jyek jyenna ma jyetti Kiṭɔti neeniyɛ, daltin lakun. Dala ikin ‘uottin ñamu lalla korkɛn twotinti. Naa ikin moki dɔɔtin ŋoyɔ aŋka gɔwwin te jyek bolja ma waakɛn yaltiti te naŋka yeyin naŋka etti lienti bɛɛ, ɔci moki te jyek jyenna ma jyetti Juaŋti bɛɛ, ² ɔci te jyek lali bulti ma ɔci tañña ma byeŋkɛn tantiti ma wyetkɛnti bɛɛ, ɔci jɔŋŋin maka a tuutan jɔŋti ñaalɔ te lienti bɛɛ, ɔci ywobji Juaŋ ywobja baadi bɛya neeniti bɛɛ. ³ Kan Juaŋ ikin daltinyɛ, dala ikin ‘uottin ñamu te naŋki waka neeniti! ⁴ Oŋ kan magga jyeni ɛkkɛn dalji dokiyɛ, dɔɔkkin ɛkkɛn dɔɔktiti aŋka waakɛn yaltitiyɛ, koocin ɛkkɛnti moki bɛɛ. Ɛkkɛn bala te ñamu non Juaŋ nona dɛki, ɔci ɛkkɛn dɛccin gena ma ‘wonnɛ Juaŋ te ñaalɔ, ɔci ɛkkɛn balki ñoowin Boŋ Juaŋ daŋkun. ⁵ Ɔci ɛkkɛn jwalla pwadan ŋeejjɛ te Juaŋti, ɔci naŋka tɛyan naŋka bɛya ñomgɔti neeni ŋeejjɛ daŋkun. ⁶ Oŋ yeti ɛkkɛn jyetcin ɔntɔ, ɔci dɔɔkkin ɛkkɛn dɔɔkti aŋka waakɛn yaltitiyɛ, kooccin ɛkkɛnti moki bɛɛ. A ɔɔnyɛ, bala ba ɛkkɛn Kaci Jwaŋa Tolan ŋaaptan ñaalɔ kakanti moki te naŋki yoñ ɛkkɛn aŋka ɛkɛ ‘wontan lɔɔn ma ñomgɛnti. ⁷ Acaan ṭɛɛr ne ñaal liɛbi ɛkɛti oŋkandayɛ, ɛkɛ moti piego. Kan ɛkɛ poka piidi ma yuoldɛ ñaalɔ ne pwadan maka dwokiti neeniyɛ, Juaŋ yomɛ pwad pwad ṭɛra neeniti. ⁸ Oŋ yeti kan ṭɛɛr etti kuwi ɔci janga yeyinyɛ, ɛkɛ ‘waldɛ Juaŋo, ɔci ne baaṭi ɛkɛ amdɛ maaño. ⁹ Mung ɔɔn, ‘ya gɔkkan doki te waka yeyin, yeti ŋeej ‘ya ne pwadan ɛkkɛ yɔɔrdɛ waka pwadin te Juaŋti acaan ɛkkɛ yɔɔññɛ ɛkɛ. ¹⁰ Acaan Juaŋ menga amdɛji te genga bɛɛ, ɔci ɛkɛ ñingɛ yeya te naŋki ɛkkɛ bɛɛ, ɔci te anna lɛɛlni ɛkkɛ bora ɛkɛti te yenti ɛkɛ ne ɛkkɛ balgɛ kanŋɛ mokɛ Ma Kiṭɔy, ɔci ɛkkɛ balgɛ kanŋɛ te maka neeni men ɔɔn. ¹¹ Ɔci ɔɔn buagɔn men da war tɛɛn ɛkɛ lɛɛldi bora warda ne naŋka neeni baadi ɔɔn, a ɔŋŋi ɛkkɛ yɔɔrdɛ waka pwadin waka kɛɛdɛ ɛkkɛ neeni te Juaŋti. ¹² A ɔŋŋiyɛ, ɔɔn buagɔn naa ɛkkɛ waakɔ morndi bɛɛ, oŋ yeti dala ɛkkɛ noŋdɛ ba maka jyeti jwali Juaŋ, ɔci yomgɛn tiektany. A ɔɔnyɛ, ɛkkɛn mwoki waka pwadin te Juaŋti waka jwallɛn ḍuaññɛ ɛkɛy. ¹³ Ne Juaŋ Abrahim ḍuaññɛ te jwaliyɛ, ɛkɛ gɔkcin awarɛ te yenti ɛkɛ, acaan menga bala tolcin te Juaŋ aŋka ɛkɛ gɔŋni te yenti mena parɛ gɛɛl bɛɛ. ¹⁴ Ɛkɛ gɔkcin agi, “‘Ya noŋja ne pwadan iti awarɛ, ɔci kɛɛn i naŋdi ne coŋɔn.” ¹⁵ A ɔŋŋiyɛ, Abrahim yomɛ tieŋnɛ ɔci yɔṭi waka ɛkɛ ḍuaññɛ Juaŋy. ¹⁶ Acaan a ɔŋŋiyɛ, ma gɔki awarɛ te mena tolan te ɛkkɛny, ɔci jyeka guaktan ɛkkɛn awarɛyɛ, jyek pɛɛdin yɔɔdɛyɔ waakɛnda. ¹⁷ Acaan Juaŋ buagɔn maka jyeti jyeka naŋŋɛ ɛkɛ neeni nɔɔttɛ ne pwadan agi paŋi ɛkɛ agjiyɔ moki bɛɛyɛ, ɛkɛ gɔkcin agi, “‘Ya gɔkka awarɛ.” ¹⁸ Ikin balkin jyeka ikin ḍuaññinti ɛkɛ, ɔci jyeka guaŋŋɛ ɛkɛ te yenti ɛkɛ awarɛy. Waka yaakkɛn neeniyɛ, yɔɔd ne tɛyan, Juaŋ yaakinti jomi jiek te ɛkkɛn bɛɛ. Ɔci ikin yiŋŋin Juaŋti, a ɔŋŋiyɛ, ɛkɛ ikin yɔɔññin, ɔci ɛkɛ ikin myennin awarɛ aŋka ikin yomgɔ tiektin ne ikin jyettin kɛɛyin waka pwadin, waka ikin ḍuaññinti ɛkɛ te jwali aŋka ikin ‘wontin ɛkkɛny. ¹⁹ Jwalla ḍuaññɛ Juaŋ te waka pwadin neeniyɛ, bala ba lɔña tɛyan coodi ikinti, ɛkɛ tɛɛna tɛɛno. Jwalla ikin ḍuaññinti Juaŋ neeni moki, ikin wɛɛtin ne jiju bworŋa on Juaŋ ona a bworŋji neeni aŋka ikin dɛntin nona baali Jwaŋa Tolany. ²⁰ Gena nona kaanni Yaccu ñamu te ikiny, ɔci ɛkɛ aŋi gaciic tolan yuonginda ba Mɛlki Caadik.

¹ Mɛlki Caadik neeniyɛ, ɛkɛ a ciɛggɔn tolan ban Celam. Ɛkɛ a gaciic Jwaŋa Tolan. Gena ɛkɛ ati kookcin Abrahimti ne Abrahim dɔɔŋni te nona ɛkɛ cyekin pookɛn cyekin ḍwaŋin buannɛy. Ɔci Mɛlki Caadik cɔkcin ne pwadan Juaŋti aŋka Juaŋ noŋdi ne pwadan Abrahimti. ² Ɔci ɛkɛ kɛnnɛ Abrahim gena ne cyɛɛlɔ te waka a inyaakkɛnti te waka yoolnɛ ɛkɛ waakɛnda neeni. Kon yenti ɛkɛ a Mɛlki Caadik neeni agi, “Ciɛggɔn Tolan Ciɛggɔn Naŋka Pwadan.” Ɔci ɛkɛ bartan ma a ciɛggɔn ban Celam ciɛggɔn tolan. Yenta a ciɛggɔn tolan ban Celam neeni kon ɛkɛ agi, “Ciɛggɔn Tolan Ciɛggɔn Coodda Pwadan.” ³ Ɛkɛ balkɔn weegɛn ɔci mɛɛgɛn ɔci yɔrgɛn bɛɛ. Ɛkɛ balkɔn oŋŋa ɛkɛ jɔɔnnɛ te coodi ɔci oŋŋa coodi ɛkɛ wyeñɛ baadi bɛɛ. Yeti ɛkɛ bala ba Kaci Jwaŋa Tolan, acaan ɛkɛ a gaciic Jwaŋa Tolan oŋki waakɛnda. ⁴ Gɔṭṭɛ moki, ‘wana neeniyɛ, tolcin hay! Aŋka Abrahim yɔr weyi ikinyɛ, ɛkɛ ‘wonnɛ gena ne cyɛɛlɔ te waka ne inyaakkɛnti te waka oonɛ ɛkɛ waakɛndati neeniy. ⁵ Ɔci gaciicin kɛɛn Laawiyɛ, ganuun gɔki ɛkkɛnti aŋka ɛkkɛn eedi gena ne cyɛɛlɔ te waka ne inyaakkɛnti te mati. Ɛkkɛn eedi waak te modg ɛkkɛn modga bɛɛn te Abrahimtiy. ⁶ Oŋ yeti Mɛlki Caadikyɛ, ɛkɛ bɛɛn te kɛɛn Laawiti bɛɛ, yeti ɛkɛ eci gena ne cyɛɛlɔ te waka ne inyaakkɛnti te Abrahimti, ɔci ɛkɛ cɔkcin Juaŋti aŋka Juaŋ noŋdi ne pwadan Abrahimti. Gena Abrahim ḍuaññɛ Juaŋ te jyeka naŋŋɛ ɛkɛy. ⁷ Awarɛ, gena mena tolan aŋka gɔkti jyeka pwadin mena ḍiɛrantiy. ⁸ Gaciicin kɛɛn Laawi maka eci gena ne cyɛɛlɔ te waka ne inyaakkɛnti waakɛnda neeniyɛ, ɛkkɛn a maka tuwa lakun. Yeti Mɛlki Caadik mena eci gena ne cyɛɛlɔ te waka ne inyaakkɛnti neeni, worga Juaŋ gɔki agi ɛkta tuudɔ bɛɛ, agi waka ‘wontan ma Juaŋ te waka ne inyaakkɛnti neeni limmɛ Mɛlki Caadik mena tɛɛti neeni. ⁹ Ɔci ‘ya gɔkca te ma Laawi maka eci waak te mati neeni, ka ɛkkɛn daŋkun ḍɔccin waka neeni ne ɛkkɛn men balki te Abrahim konɛtiy. ¹⁰ Acaan te wɔɔka Mɛlki Caadik kookki i Abrahim waayiyɛ, Laawi men biɛṭi te yɔr ɛkkɛn Abrahim konɛti. ¹¹ Juaŋ ma ‘wonnɛ ganuun te gaciicin ma Laawi, ɔci te kanŋa yɔmni te gaciicin ma Laawiyɛ, te Juaŋ moki noŋdi gaciic parɛ mena bala ba Mɛlki Caadik neeni boki? A’a. Yeti Juaŋ noŋi gaciic parɛ bala ba Mɛlki Caadik neeni ɔɔn acaan kanŋa ma Laawi bɔɔnjin, ɔci gaciic neeniyɛ, ɛkɛ bala ba Haruun bɛɛ. ¹² Kan kanŋa gaciicin warɛ aaŋŋɛyɛ, ganuun warɛ agdɛ daŋkun. ¹³ Kiṭɔ mena guagdɛ Juaŋ mena bala ba Mɛlki Caadik neeniyɛ, ɛkɛ bɛɛn te kɛɛna parɛti. Ɔci maka te kɛɛna neenitiyɛ, menga noŋi kanŋa ‘yɛrŋ waak neeni bɛɛ. ¹⁴ Oŋ yeti awarɛyɛ, Ciɛggɔn ikin Yaccu Kiṭɔ bɛɛn te kɛɛn Yahuujati, ɔci Muuca gɔki jwali gɛɛl te kɛɛna neeni te jyek gaciicin bɛɛ. ¹⁵ Naŋka neeni warɛ liɛllɛ ne pwadan moki, acaan gaciic parɛ gɛɛl warɛ liɛllɛ bala ba Mɛlki Caadik ɔɔn. ¹⁶ Ɛkɛ naŋɛ ma a gaciic ba jyek ganuun ma baan bɛɛ, yeti ɛkɛ naŋŋɛ Juaŋ a gaciic te war tɛɛn tɛɛtin baadi bɛɛy. ¹⁷ Ɔci worga Jwaŋa Tolan gɔki agi, “I agdi gaciic oŋki waakɛnda ba Mɛlki Caadik.” ¹⁸ Waka ñamuyɛ, ɛkkɛn baaw yɔɔni acaan ɛkkɛn bɔɔnjin, ɛkkɛn yɔmjin te genga bɛɛ. ¹⁹ Acaan ganuun Muuca genga naŋŋɛ ḍaaŋŋɛ warda bɛɛ, oŋ yeti acca Juaŋ gɔkkin te jyek waka pwadin ɛkɛ buagɔn ‘wontin ikiny, ɔci te jwalla neeniyɛ, ikin ortinti Jwaŋa Tolanti. ²⁰ Ɔci jyeka neeniyɛ, Juaŋ gɔkcin ɛkkɛn budan bɛɛ, ɛkɛ gɔkcin ɛkkɛn te yenti ɛkɛ awarɛ! ²¹ Ɔci maka pookɛn neeniyɛ, ɛkkɛn aŋi gaciicin budan. Juaŋ gɔkcin ɛkkɛnti te yenti ɛkɛ awarɛ bɛɛ. Oŋ yeti Yaccuyɛ, aŋi gaciic te jwalla awarɛ ne Juaŋ gɔŋni ɛkɛti agi, “Ciɛggɔn paŋi ɛkɛ agdɛyɔ bɛɛ. Ɔci ɛkɛ gɔkcin awarɛ agi, ‘I a gaciic oŋki waakɛnda.’ ” ²² Acaan a ɔŋŋiyɛ, Yaccu aŋi mena ikin woŋgɔ ñiektin a Juaŋ noŋdi waka ikin ḍuaññinti ɛkɛ te jwali a waka pwadin neeni ikinti. ²³ Awarɛ, gaciicin ma Laawiyɛ, ɛkkɛn coŋɔ, acaan ɛkkɛn tuw ɔci yaakinti noŋi kanŋa moki bɛɛ. ²⁴ Oŋ Yaccuyɛ, ɛkɛ aŋka bala oŋki waakɛnda, ɔci a ɔŋŋiyɛ, kanŋa ɛkɛ agi gaciic neeniyɛ, luldɛ menga bɛɛ. ²⁵ A ɔŋŋiyɛ, ɛkɛ yaakinti maka ortiti Juaŋti te ɛkɛyɛ, yɔɔdɛ oŋki waakɛnda, acaan ɛkɛ bala cɔki Juaŋti te ɛkkɛn oŋkanda, ɔci ɛkɛ tuwa oŋgati bɛɛ. ²⁶ Acaan Yaccu a gaciic tolan, a ɔŋŋiyɛ, ɛkɛ yɔmjin te ikin ɔci ɛkɛ a mena pwadan, ɛkɛ balkɔn nɔji bɛɛ, ɔci ɛkɛ balkɔn naŋka yaayan gɛɛl bɛɛ. Ɛkɛ kooyin bora te maka a nɔɔtkti doki. Ɔci ɛkɛ bala ciyi ñaalɔ ban Jwaŋa Tolan. ²⁷ Ɛkɛ bala ba maka a gaciicin ḍwaŋin Ma Yahuud neeni bɛɛ. Ɛkkɛn eci waka ‘yɛrtan ɛkkɛn oŋkanda te nɔji ɛkkɛn ñamu, ɔci te nɔji mako. Yaccu buagɔn noŋdi a ɔɔn bɛɛ, te nɔji mayɛ, ɛkɛ noŋi naŋka neeni oŋi ne cyɛɛlɔ ne ɛkɛ ŋaapkiti ma kakantiy. ²⁸ Acaan ganuun Muuca maka waakɛn koyanyɛ, muodɛ bora aga gaciicin ḍwaŋin Ma Yahuud, oŋ yeti jyek Juaŋ jyeka awarɛ bɛɛn ganuun ŋoyɛti, ɛkɛ mwoki Kaci Juaŋ aŋka aga gaciic tolan awarɛ oŋki waakɛnda.

¹ Jyeka a jiek wyetkɛnyɛ, ikin balkin gaciic tolan a ɔɔn, ɔci ɛkɛ cooccin ñaalɔ pɔliji kaakci Jwaŋa Tolan taaŋɛti byeŋa byerɔn non Ḍɔŋ Jwaŋa Tolan. ² Ɔci ɛkɛ bala kanŋan Nona Pwadan Ne Tolanti. Gena on Juaŋ ona awarɛ, ona cɔnnɛ Ciɛggɔny. Gena ona cɔdɛ ma baan bɛɛy. ³ Kanŋa gaciic tolanyɛ, ɛkɛ noŋi kanŋa waka ‘yɛrtan ma Juaŋti i waka ‘wontan ma Juaŋy. Acaan a ɔŋŋiyɛ, Kiṭɔ mena gaciic tolan neeniyɛ, dala ɛkɛ daŋkun etti genga Juaŋti. ⁴ Kan te ɛkɛ baali ṭɛɛrji wɛnniyɛ, ɛkɛ te aŋi gaciic bɛɛ. Acaan gaciicin ‘woñi waak te jyek ganuun Ma Yahuudyɛ, bala doki. ⁵ Ɔci ɛkkɛn kanŋan a muacin budan te ṭiebji waka bala ñaalɔ pɔlijiy. Bala ba Muuca ne buagi eyi on Juaŋyɛ, Juaŋ gɔkcin ɛkɛti agi, “Dala i waŋu tiicca, ɔci noŋja waak waakɛnda ba naŋka i nɔɔnnin poomtiy.” ⁶ Oŋ yeti accayɛ, Yaccu ‘wonnɛ Juaŋ kanŋa pwadan te kanŋa gaciicin ḍwaŋin Ma Yahuud waayi, acaan jwalla naŋŋɛ Juaŋ a ɛkɛ a cuuda Juaŋ ma ɛkɛti neeniyɛ, ɛkɛ aŋka pwatcin ne tolan, acaan jwalla neeni yɔɔnnɛ iñɔ Juaŋ te jyeka ḍuaññɛ ɛkɛ a jyek waka pwadin ne tolany. ⁷ Kan jyeka naŋŋɛ Juaŋ ñamu yɔmjin dokiyɛ, oŋ te Jwaŋa Tolan buagɔn noŋdi jyeka pookɛn moki boki? A’a. ⁸ Ɔci Juaŋ bala wooki maka te ñamu ne ɛkɛ gɔki agi, “Ciɛggɔn gɔki agi, ‘Hay, oŋka bɛya neeniyɛ, ‘ya noŋdin ikin kɛɛn Icrayiil ɔci kɛɛn Yahuuja jyeka wonkɛn. ⁹ Oŋ yeti bala ba jyeka naŋi ‘ya i yɔrg ɛkkɛn oŋŋa ‘ya ɛkkɛn muoŋŋa te byeŋkɛn acaan kooya bora te ban Macor wanna bɛɛ. Ɔci ne ɛkkɛn jyek ‘ya tiikitiyɔ bɛɛyɛ, ‘ya ɛkkɛn daljan noŋi ba yomg ɛkkɛn pookɛn. ‘Ya waŋu tiiccan ɛkkɛnti bɛɛ.’ ¹⁰ Ɔci Ciɛggɔn gɔki moki agi, ‘Ne oŋ gɛɛltiyɛ, ‘ya noŋdin jiek iki ma Icrayiil, ɔci ganuun ‘ya ḍuacca ‘ya ɛkkɛn wyetkɛnti, ɔci ḍuacca ‘ya ɛkkɛn yomgɛnti, ɔci ‘ya agdi Juaŋ ɛkkɛn, ɔci ɛkkɛn aga ma ‘ya. ¹¹ Ɔci ɛkkɛn modgɛn laltan moki bɛɛ. Walla gɔkti modgɛnti agi, “Dala ɛkkɛn Ciɛggɔn ŋeettan bɛɛ,” acaan ɛkkɛn ‘ya ŋeecka waakɛnda doki. Gena maka ḍyɛrin ɔci maka ḍwaŋin. ¹² Ɔci ‘ya ɛkkɛn bɔɔka te nɔji ɛkkɛn, ɔci ‘ya poŋja te nɔji ɛkkɛn moki bɛɛ.’ ” ¹³ Ɔci te jwali Juaŋ jwalla guaŋŋɛ ɛkɛ te jyeka wonkɛn neeniyɛ, ɛka ñamu naŋŋɛ aŋi daan doki. Ɔci waak waakɛnda waka aŋi donk neeniyɛ, noŋi baadi doki.

¹ Jyeka naŋɛ Juaŋ i ma ñamuyɛ, ɛkkɛn ma myetkɛ te malla ɛkkɛn mortɛ Juaŋti a ɔkiy, ɔci aŋka ma ona morki ɛkkɛn iñɔ ṭɛɛrji wɛnni neeni cɔttan a ɔki. ² A ɔŋŋiyɛ, ona a bworŋ cɔdɛ ma yenti Nona Pwadanyɛ, ɛkɛ balkɔn dyɛkan dɛki, ɔci tarabɛɛca ɔci byedga ‘wontan ma Juaŋy. ³ Ɔci on kona neenitiyɛ, bworŋa kɛkci ma bala. Ɔci on kona bworŋa neeni ŋoyɛtiyɛ, bartan ma agi, “Nona Pwadan Ne Tolany.” ⁴ Gena on ṭɔla balkɔn gena ṭuorki ma jien gena naŋi ma te dahab, ɔci canduuk jyeka ḍyɛŋŋɛ Juaŋ canduuk naŋɛ ma te dahab warɛ warday. Ɔci kulla naŋi ma te dahab kulla ḍuacki ma ama bartan ma a “Manna” ama ma ‘wonnɛ Juaŋ te ñaalɔ pɔliji, ɔci gɔl Haruun gɔla pworŋ, ɔci gwoyi ṭɔlgɛn kieññi Juaŋ jyeka ḍyɛŋŋɛ ɛkɛyɛ, bala jiju canduuk neeniji wɛnan. ⁵ Ɔci canduuk neeni wyeñɛtiyɛ, malɛɛkan bartan ma agi caryubim bala yɔɔd ne yyɛɛwɔ. Ɛkkɛn mieti ma agi Juaŋ baalɔ nona yɔtki ɛkkɛn wanna, ɔci ɛkkɛn kɔggɛn nona Juaŋ bɔɔci ma te nɔji kwomiyɔ. Oŋ yeti accayɛ, wɔɔka gɛɛl bala aŋka lookin jiek korkɛn bɛɛ. ⁶ Waak waakɛnda a ywaŋgɔn a ɔŋŋi, gaciicin kaatti on kona ñamu oŋkanda aŋka noŋi kanŋa. ⁷ Oŋ yeti on kona parɛtiyɛ, gaciic tolan Ma Yahuud aŋka kaatti parɛ oŋi ne cyɛɛlɔ te ywonna ne cyɛɛlɔ. Oŋ yeti ɛkɛ kaatti budan bɛɛ, ɛkɛ eedi yimg gena ŋardɛ ɛkɛ ‘wondɛ ɛkɛ Juaŋ te nɔji ɛkɛ, ɔci te nɔjja naŋɛ ma ɛkɛy. ⁸ Boŋ Juaŋ nɔɔti te Nona Pwadan Ne Tolan agi pɔy tuktan agi uulgɔn, acaan ona yɔɔd bora bala yɔɔd men. ⁹ Ɔci kanŋa a ywaŋgɔn neeniyɛ, nɔɔti te oŋka accay. Waka ‘wontan ma Juaŋ ɔci waka ŋartan mayɛ, ɛkkɛn yaakinti nɔji ma eetan ɔntɔ te ma yomgɛnti bɛɛ. ¹⁰ Oŋ yeti ɛkkɛn a waka amtin, ɔci waka maattin, ɔci lɔɔŋa luaktan ma jitkɛn ne coŋɔny. Ɛkkɛn kandi te waka neeni ɔɔn ne kanŋa woonɛ neeni bɛɛdi ɔɔn. ¹¹ Oŋ yeti Yaccuyɛ, ne ɛkɛ bɛɛni aŋŋi gaciic tolan te jyek waka pwadin waka bala acca neeniyɛ, ɛkɛ doki kaaccin on Juaŋ ñaalɔ ona naŋɛ ma te byeŋkɛn bɛɛ neeni. Ona kaannɛ ɛkɛ neeni tol tolo, ɔci pwatcin ne tolan te oorga naŋtan ma te byeŋkɛn. Ɔci ona neeni te ṭɛɛrji wɛnni bɛɛ. ¹² Ɔci ne ɛkɛ kaanni Nona Pwadan Ne Tolanti oŋi ne cyɛɛlɔyɛ, ɛkɛ kaaccin te yimg ḍɛɛk ɔci yimg yotk ṭɔlgɛn bɛɛ, yeti ɛkɛ kaaccin te yimg ɛkɛ parɛ, ɔci ɛkɛ ikin eeŋnin yɔɔta baadi bɛɛy. ¹³ Oŋ kan gañi yimg ḍɛɛk ɔci yotk, ɔci twon neek ṭɔlgɛn a moong, maka a nɔɔtk ywaŋtan pwaddi Juaŋ ñamɛtiy, ¹⁴ oŋ poca, gɔrca! Yaccu Kiṭɔ, yimg ɛkɛ noŋi ne pwadan ne tolan ikinti. Ɛkɛ warɛ ‘wonnɛ Juaŋ ba gena ‘yɛrŋɛ ɛkɛ Juaŋti pwadan te Boŋa baadi bɛɛy. Ɔci yimg ɛkɛ nɔji ikin eetan ɔntɔ te ikin yomgɔti i waka budan neeni aŋka ikin mortin Jwaŋa tɛɛtiy! ¹⁵ A ɔŋŋiyɛ, Yaccu Kiṭɔ ɛkɛ a cuuda jyeka naŋŋɛ Juaŋ wonkɛn aŋka maka bornɛ Juaŋ neeni yɔɔrdi waka pwadin waka guaŋŋɛ Juaŋ agi ‘woñji ɛkkɛn waka baadi bɛɛy. Acaan a ɔŋŋiyɛ, ɛkɛ tuun aŋka ma wandɛ te nɔjja naŋɛ ɛkkɛn ne ɛkkɛn balki cieki te jyeka naŋŋi Juaŋ ñamuy. ¹⁶ Ɔci kan men ne noŋi tuudiyɛ, jyeka ɛkɛ buagɛ aŋka naŋtan mayɛ, kiiddɛ ɛkɛ worgaji, yeti kan ɛkɛ tuun men bɛɛyɛ, jyek ɛkɛ yɔmdi te genga men bɛɛ. ¹⁷ Jyeka kiinɛ mena tuun worgaji neeniyɛ, balkɔn war tɛɛn ne mena kieñi ɛkkɛn neeni tuuni dokiy. Oŋ kan men tɛɛti menyɛ, jyeka neeni balkɔn war tɛɛn bɛɛ. ¹⁸ Acaan a ɔŋŋiyɛ, jyeka naŋŋɛ Juaŋ ñamuyɛ, yɔɔtcin iñɔ ne tɛyan budan bɛɛ. Ɛkkɛn yɔɔtcin iñɔ te yimgo. ¹⁹ Te ñamuyɛ, Muuca ne ma nɔɔnnɛ te jyek ganuun jitkɛn waakɛndayɛ, ɛkɛ oŋ yimg yotk ɔci yimg ḍɛɛk ñaaŋŋɛyɔ i pieg ɔci gannɛ worga ganuunti, ɔci gannɛ ma waakɛnti moki. Ɛkɛ bala goci te aamk min ɔci jyeyya tidan. ²⁰ Ɔci ɛkɛ gɔki agi, “Yimga neeniyɛ, gena yimga guaŋŋɛ Juaŋ agi, ‘Dala naŋjɛ ɛkkɛy.’ ” ²¹ Muuca yimg gannɛ ona a bworŋti, ɔci yimg gannɛ waka morki mati moki. ²² Waak waakɛnda pwaddi te yimg te jyek ganuun. Kan yimg pwokci ma bɛɛyɛ, buat nɔji gɛɛl bala bɛɛ. ²³ Ona a bworŋ ona morki ma ɔci waka bala jiju ɛkɛ konɛti neeniyɛ, ɛkkɛn a muacin budan, a waka awarɛ ba waka ñaalɔ pɔliji bɛɛ. Ɛkkɛn waakɛn pwaddi te oljin yimg oltiti ma ɛkkɛntiy. Oŋ yeti waka ñaalɔ pɔlijiyɛ, ɛkkɛn waakɛn pwaddi te waka ‘yɛrtan ma pwadin ne tolany. ²⁴ Acaan Kiṭɔ kaaccin Nona Pwadan Ne Tolan naŋi ma baan nona a muacin neeni bɛɛy. Oŋ yeti ɛkɛ ati ñaalɔ pɔliji aŋka warɛ liɛldɛ bora Juaŋ ñamɛti te ikin. ²⁵ Gaciic tolan Ma Yahuudyɛ, ɛkɛ kaatti Nona Pwadan oŋi ne cyɛɛlɔ te ywoni te yimg maalo. Yeti Kiṭɔ warɛ ‘wondɛ ma noktan te ikin, gɔ moki nokin a ñaccu ɔɔn bɛɛ. ²⁶ Te baali a ɔɔnyɛ, Kiṭɔ te tuun oŋki ne coŋɔn te ma waakɛnda wona noon aŋŋɛ Juaŋy. Oŋ yeti te oŋka ookkin ne ŋoyɔ neeniyɛ, ɛkɛ warɛ lɛɛlnɛ bora oŋi ne cyɛɛlɔ, ɔci nɔji eññɛ ɔntɔ te naŋka ɛkɛ warɛ naŋŋɛ a gena ‘yɛrŋɛ ɛkɛ Juaŋti neeni. ²⁷ Men baanyɛ, tuwa oŋi ne cyɛɛlɔ lakun, Juaŋ oŋ hayya gɔrti jyek godan ɛkɛ oŋo. ²⁸ A ɔɔn daŋkun Kiṭɔ tuun oŋi ne cyɛɛlɔ aŋka nɔji ma waakɛnda eedɛ ɔntɔ. Ɔci ɛkɛ dɔɔkti te nɔji moki bɛɛ. Ɛkɛ dɔɔkti aŋka maka kɛɛy ɛkɛ neeni yɔɔdɛ.

¹ Ganuun Ma Yahuud, ɛkɛ a ṭiebji waka pwadin waka bɛya ne ŋoyɔ neeni budan. Ɛkɛ awarɛ ba waka bɛya ne ŋoyɔ neeni bɛɛ. A ɔŋŋiyɛ, waka ‘yɛrtan ma Juaŋti yuonginda neeni yaakinti maka moṭi Juaŋti neeni naŋtan pwaddi bɛɛ. ² Oŋ kan te waka ‘yɛrtan ma neeni yaakinti nɔji eetan ɔntɔyɛ, te ma yɔɔni te ‘yɛrŋ ɛkkɛn doki. Acaan maka moṭi Juaŋti neeni te nɔji ɛkkɛn te eyɛ waka neeni doki, ɔci te ɛkkɛn yaakinti poŋi te nɔji ɛkkɛn moki bɛɛ. A ɔŋŋiyɛ, te waka ‘yɛrtan ma neeni te yɔɔni waakɛnda doki. ³ Yeti ma ɛṭi waka neeni yuonginda aŋka ma poŋdi te nɔji ɛkkɛn. ⁴ Acaan yimg yotk ɔci yimg ḍɛɛk yaakinti nɔji eetan ɔntɔ bɛɛ. ⁵ A ɔŋŋiyɛ, ne Yaccu buaŋŋɛ woon bɛɛdi iñɔ ṭɛɛrjiyɛ, ɛkɛ gɔkcin Juaŋti agi, “Waka ‘yɛrtan ma ɔci waka ‘wontiti ma iyɛ, i buagi ɛkkɛn bɛɛ, yeti i ‘ya noŋna waro. ⁶ I buagi waka ṭultan ma ɔci waka ‘yɛrtan ma te nɔji neeni bɛɛ. ⁷ Ɔci ‘ya gɔkcan ka, ‘‘Ya wɛnni nɛ, hay Juaŋo, aŋka ‘ya noŋ ba gena ṭaga i bala ba jyeka a kiigin worgaji te ‘yay.’ ” ⁸ Ɛkɛ gɔki ñamu agi, “Waka ‘yɛrtan ma ɔci waka ‘wontiti ma i, ɔci waka ṭultan ɛkkɛn gena ɛrki ma waak wyeñɛti neeni, ɔci waka ‘yɛrtan ma te nɔjiyɛ, i buagi ɛkkɛn bɛɛ.” Ɛkɛ gɔki a ɔɔn ne ŋeejɛ ɛkɛ waka neeni ‘yɛri ma ba jyek ganuun ɔɔn. ⁹ Ɛkɛ gɔkcin moki agi, “‘Ya wɛnni neeni, ‘ya bɛɛn aŋka noŋ naŋka ṭaga iy.” Ɔci a ɔŋŋiyɛ, Yaccu jyek naŋka ɛrki ma waak ñamu olnɛ ɔntɔ, ɔci jyek naŋka Juaŋ buagɛ naŋka woonɛ neeni aŋka ḍuannɛ ɛkɛ non waka te ñamu. ¹⁰ Ɔci te naŋka wannayɛ, ikin pwannin oŋi ne cyɛɛlɔ doki te war Yaccu Kiṭɔ ne ɛkɛ warɛ ‘yɛrŋi te ikiny. ¹¹ Gaciicin Ma Yahuud ñamuyɛ, ɛkkɛn noŋi kanŋa ɛkkɛn oŋki waakɛnda. Ɛkkɛn ɛṭi a waka ne cyɛɛlɔ oŋkanda ɔɔn. Waka neeni yaakinti nɔji eetan ɔntɔ bɛɛ. ¹² Yeti Kiṭɔ warɛ ‘yɛrŋɛ oŋi ne cyɛɛlɔ te nɔji ma waakɛnda. Te naŋka neeniyɛ, ɛkɛ nɔji eññɛ ɔntɔ ne baaṭi ɔɔn, ɔci ɛkɛ cooccin iñɔ Juaŋ taaŋɛti taaŋŋa a byerɔn. ¹³ Yaccu bala kɛɛy oŋŋa maka yoyi ñin iki ɛkɛ neeni bwandɛ Juaŋ ɔci ḍuattɛ Juaŋ iñɔ ɛkɛ ciegɛtiy. ¹⁴ Te gena ‘yɛrŋɛ ɛkɛ ne cyɛɛlɔ neeniyɛ, maka ɛkɛ buagɔn naŋdi pwaddi neeniyɛ, naŋŋɛ ɛkɛ pwadgin doki. ¹⁵ Boŋ Juaŋ moki nɔɔti ikin te naŋka neeni. Te ñamu ɛkɛ gɔki agi, ¹⁶ “Gena jyeka naŋdɔn ɔɔn iki ɛkkɛn ne ninka neeni baatiy. Ciɛggɔn gɔki agi ganuun ‘ya olja ɛkkɛn yomgɛnti, ɔci ‘ya ganuun ḍuacca jiju ɛkkɛn wyetkɛnti.” ¹⁷ Ɔci ɛkɛ gɔkcin moki agi, “Nɔji ɛkkɛn ɔci naŋki ɛkkɛn naŋka yeyinyɛ, ‘ya poŋja te ɛkkɛn moki bɛɛ.” ¹⁸ Acaan Juaŋ ma bɔɔŋnɛ te nɔji dokiyɛ, jyek ‘yɛrŋ waak bala moki bɛɛ, bawwin doki. ¹⁹ Acca modg ɔɔn, Yaccu Kiṭɔ tuun te ikin. A ɔŋŋiyɛ, ikin balkin bwaji moki ne ikin kaattin Nona Pwadan Ne Tolanti neeni bɛɛ. ²⁰ Ɛkɛ ikin pɔŋnin pɔya woonɛ pɔy tɛɛtin te ‘yɛrŋa ɛkɛ warɛ ‘yɛrŋɛy. A ɔŋŋiyɛ, ikin kaattin jiju bworŋa kɛkci ma on Juaŋ neeni konɛti. ²¹ Ikin balkin gaciic tolan, ɔci ɛkɛ mwoki on Jwaŋa Tolan. ²² A ɔŋŋiyɛ, dala ikin ortinti Juaŋti te yoma pwadan, ɔci te jyenna awarɛ, ɔci te yomga nɔjjɛn baaw, ɔci te waaka a luaggin te pyega pwadiny. ²³ Dala ikin yomgɔ tiektin ne ikin kɛɛyin waka pwadin waka ikin ḍuaññinti Juaŋ te jwaliy. Acaan ikin jyettin ka Juaŋ jwalla guaŋŋɛ ɛkɛ ikinti neeni daldɛ budan bɛɛ. ²⁴ Dala ikin gɔɔrin yɔtin aŋka ikin moowin yɔtin pookɔ aŋka ikin ani lɛɛltin bora ɔci noŋtin ne pwadan. ²⁵ Naa ikin mwontin te ḍɔɔlla ikin ḍwoṭin wyetkɔ oŋkanda neeni bɛɛ. Ma gɛɛg te baaṭiyɛ, ɛkkɛn mwonnin te ḍɔɔli wyetkɛn. Yeti dala ikin moowin yɔtin pookɔ waakida ne tolan, acaan yuartɛ ɛkkɛ oŋŋa Ciɛggɔn ikin bɛɛdi cɔɔllin doki. ²⁶ Kan ikin naŋka awarɛ ŋeennin oŋ ikin buagin noŋin nɔji men a labji ɔɔnyɛ, gena ‘yɛrtan ma gɛɛl bala moki nɔji ikin eedɛ ɔntɔ bɛɛ. ²⁷ Ɔci a ɔŋŋi aŋka ikin buayin ywobji Juaŋ ywobja bɛya ne ŋoyɔ neeni, ɔci maña koldan maña maka yoyi ñin iki Jwaŋa Tolan neeni amdiy! ²⁸ Mena ganuun Muuca lɛgdɛjiyɛ, ɔci kan ma ne yyɛɛwɔ walla ne ḍoogɔ gɔkcin te naŋki ɛkɛyɛ, ɛkɛ noktan ma. Menga yomɛ pwada ɛkɛti bɛɛ. ²⁹ A ɔŋŋiyɛ, ɛkkɛ poŋɛ naŋka bɛya mena noŋdi ne yaayan Kaci Juaŋti neeni bala a ɔki? Ɔci mena yimg Yaccu yimga ɛkɛ naŋŋɛ Juaŋ pwanni neeni ñaldɛ a genga bɛɛ neeniy, a gena bɛya ɛkɛtiy? Ɔci a gena bɛya mena wooki Boŋ Juaŋ Boŋa etti yom pwani Juaŋ mati neeniy? Maka noŋi naŋka neeniyɛ, Juaŋ jiek oldɛ ɛkkɛn wyetkɛnti. ³⁰ Çeecin ikin mena gɔki agi, “‘Ya noŋja ne yaayan maka noŋi ne yaayan ‘yati neeni.” Ɛkɛ gɔki moki agi, “Juaŋ noŋdi godan ma ɛkɛti.” ³¹ Ḍɛmmin ma ḍɛmti Jwaŋ tɛɛtin bieŋɛtiyɛ, ɛkɛ a gena buayin ikiny! ³² Dala ɛkkɛ poŋdɛ te ninka ati waayi ne ɛkkɛ koonɛ bora Juaŋ te miel jitinyɛ, ɛkkɛ beelkɛ waak jitkɛn ne coŋɔn, yeti ɛkkɛ buankɛ ɛkkɛn bɛɛ. ³³ A oŋki ɛkkɛ balgɛ lɔɔn jitin, ɔci ma noŋi ne yaayan ɛkkɛti. Ɔci a oŋki ɛkkɛ ñoowɛ iki maka naŋtan ma ne yaayan neeni. ³⁴ Ɛkkɛ ñoonɛ iki ma te taab ne ɛkkɛn balki ciginji, ɔci ne mal ɛkkɛ kuakiti mayɛ, ɛkkɛ yomgɔ ñɔɔna ñɔɔn men ɔɔn, acaan ŋeejɛ ɛkkɛ doki ɛkkɛ balkɛ mala pwadan mala baadi bɛɛy. ³⁵ A ɔŋŋiyɛ, naa ɛkkɛ yomgɔ toga bɛɛ, acaan ne ɛkkɛ yomgɔ tiektiyɛ, ɛkkɛ ‘wondɛ Juaŋ waka pwadin ñaalɔ pɔliji ne baaṭi. ³⁶ Dala ɛkkɛ yomgɔ tiektɛ aŋka ɛkkɛ noŋdɛ ba naŋka ṭagdɛ Jwaŋa Tolan aŋka ɛkkɛ yɔɔrdɛ gena guaŋŋɛ ɛkɛy. ³⁷ Acaan bala ba jwalla guagdɛ worga agi, “Ne ḍiɛran ṭɔɔlɛ lakun, ɔci mena bɛya neeniyɛ, ɛkɛ bɛya, ɛkɛ kwatti bɛɛ. ³⁸ Men ‘ya mena pwadanyɛ, ɛkɛ ciya te jyeni ɛkɛ, yeti kan ɛkɛ dɔɔki ŋoyɔyɛ, ‘ya yomu pwada ɛkɛti bɛɛ.” ³⁹ Ikin agin maka dɔɔdi ŋoyɔ ɔci ḍakti bɛɛ. Yeti ikin balkin jyenno. Ɔci ikin unnin doki.

¹ Jyeniyɛ, ɛkɛ a gena ñyecin ikin waka kɛɛtin ikiny. Ɔci te jyeniyɛ, ikin jyettin yomgɔti awarɛ te waka yuarŋin ikin men bɛɛy. ² Te jyeniyɛ, maka te baaṭi Juaŋ yomɛ pwanna pwani ɛkkɛnti. ³ Te jyeniyɛ, ikin waak ŋeecin waakɛnda ka cɔnnɛ Jwaŋa Tolan te jwali ɛkɛ, ɔci waka ñaltin ikin acca neeniyɛ, ɛkkɛn cɔnnɛ Juaŋ te waka yuartin ikin te woŋgɔ bɛɛ neeniti. ⁴ Te jyeniyɛ, gena oonɛ Habiil Juaŋti ɛkɛ pwatcin te gena oonɛ mod ɛkkɛn kɛɛn Juaŋtiy. Te jyeniyɛ, ɛkɛ maaŋŋɛ Juaŋ agi ɛkta agɔ mena pwadɔ acaan Juaŋ bala gɔki ne pwadan te gena ‘wonnɛ Habiil ɛkɛy. Ɔci te jyeniyɛ, ne Habiil tuuniyɛ, jyek ɛkɛ bala gɔki ikinti acca men ɔɔn. ⁵ Te jyeniyɛ, Inak eññɛ Juaŋ ñaalɔ ne ɛkɛ a tɛɛta ɔɔn, tuun bɛɛ. Ɔci ɛkɛ yuarŋɛ menga bɛɛ. Ɛkɛ eññɛ Juaŋ ñaalɔ doki. Worga Juaŋ gɔki agi ne Inak eññɛ Juaŋ men bɛɛyɛ, Juaŋ yomɛ pwatcin ɛkɛti. ⁶ Jwaŋa Tolan yomɛ pwada mengati budan kan jyeni baaw ɛkɛti bɛɛ. Kan menga buagɔn bɛya Juaŋtiyɛ, dala ɛkɛ jyeddi a Juaŋ bala, ɔci moki dala ɛkɛ jyeddi a maka lieṭi Juaŋ neeni ‘wondɛ ɛkɛ waka pwadin. ⁷ Te jyeniyɛ, Nɔwa noŋi ba jyeka ɛkɛ myennɛ Juaŋ te naŋka bɛya ne ŋoyɔ naŋka yuarŋɛ ɛkɛ men bɛɛ neeni. Ɛkɛ cɔti murka tolan aŋka ɛkkɛn uddɛ iki kɛɛgin ɛkɛ i moongɛn. A ɔŋŋiyɛ, ywobji Juaŋ bɛɛn ṭɛɛr wyeñɛ warda, ɔci Juaŋ gɔki agi Nɔwa agɔ mena pwadɔ te jyeni ɛkta. ⁸ Te jyeniyɛ, Abrahim jyeti jwalla guaŋnɛ Juaŋ ɛkɛti agi ɛkta gortɔ bora ooddɔ bana ɛkɛ ḍuaññɛ Juaŋ te jwaliy. Ɛkɛ ban ɛkɛ dalnɛ, ɔci ɛkɛ bala ati ooddi bana kwoyi ɛkɛ. ⁹ Te jyeniyɛ, ɛkɛ bala ciyi ba mena wɛli bana ɛkɛ ḍuaññɛ Juaŋ neeniji. Ɛkɛ bala ciyi te ona a bworŋo, ɔci Icaak i Yaakub ɛkkɛn bala ciyi te oorga a bworŋin daŋkun. Ɔci Juaŋ daŋkun ɛkkɛn ḍuaññɛ te jwali ba jwalla guaŋŋɛ ɛkɛ Abrahimti neeni daŋkun. ¹⁰ Abrahim bala kɛɛy bana yɔɔd ne tɛyan neeni, ɔci gena Jwaŋa Tolan, ɛkɛ a mena cɔti bana neeniy. ¹¹ Te jyeniyɛ, Caara waanɛ yɔṭi war tɛɛn aŋka ɛkɛ laatti ne ɛkɛ aŋi ṭien doki ɔɔn. Ɛkɛ jyeti agi Juaŋ mena ɛkɛ ḍuaññɛ te jwali neeniyɛ, gɔki awarɛ. ¹² A ɔŋŋiyɛ, Abrahim bala ba mena tuuta acaan ɛkɛ aŋi daan doki, yeti ɛkɛ jieni kɛɛgin ne coŋɔn ba kɛltan, ɔci ɛkkɛn kɔɔna kɔɔni bala ba ŋɔmma niin kɔmi ḍwaŋɛti. ¹³ Maka neeni bala ciyi te jyenna ɛkkɛn jyetki Juaŋti neeni ne oŋŋa ɛkkɛn tuuki ɔɔn. Ɛkkɛn waka jwallɛn ḍuaññɛ Juaŋ neeni yuarɛ bɛɛ, yeti ɛkkɛn waka neeni yuarcɛji te nona loonan ɔci mugɛ ɛkkɛn yomgɛnti. Ɔci ɛkkɛn jyeti yomgɛnti a ɛkkɛn ciyi a wɛlg iñɔ ṭɛɛrji wɛnni. ¹⁴ Maka gɔki te waka neeniyɛ, ɛkkɛn mieti agi ɛkkɛn lieṭi ban ɛkkɛn waanɛ. ¹⁵ Ɛkkɛn poŋi te bana dolliyɔ ɛkkɛn waayi moki bɛɛ. Te ɛkkɛn poŋki te bana dollɛ ɛkkɛn waayiyɛ, te ɛkkɛn dɔɔki doki. ¹⁶ Yeti ɛkkɛn dɔɔki bɛɛ, acaan ɛkkɛn buagɔn bana ñaalɔ pɔliji bana pwadan. Ɔci a ɔŋŋiyɛ, Juaŋ lɔɔdan ne ɛkkɛn borki ɛkɛ a Juaŋ ɛkkɛn bɛɛ, acaan ɛkɛ ɛkkɛn noŋnɛ baano. ¹⁷ Oŋŋa Juaŋ Abrahim pɔɔññɛ aŋka gɔrti ne yom ɛkɛ baali a ɔkiyɛ, Abrahim jyeti Juaŋti men ɔɔn, ɔci kaci ɛkɛ Icaak ‘wonnɛ Juaŋo, ɛkɛ yookɔn bɛɛ. ¹⁸ Te ñamu Jwaŋa Tolan Abrahim ḍuaññɛ te jyek kacca neeni agi, “Kɛɛgin Abrahim bɛya te Icaakti.” Yeti Abrahim noŋi kaci ɛkɛ kacca nɔɔti ne cyɛɛlɔ neeni ‘yɛrdɛ Juaŋti. ¹⁹ Abrahim poŋi gɔki agi Juaŋ Icaak jɔɔŋda ñaalɔ te lienti moki, ɔci a ɔŋŋiyɛ, bala ba ne ikin gɔkin agi Abrahim Icaak duaŋŋɛ dɔkɔ te lienti. ²⁰ Te jyeniyɛ, Icaak gɔkcin Yaakubti ɔci Icɔti te naŋka bɛya pwadan ɛkkɛnti ne baaṭiy. ²¹ Te jyeniyɛ, Yaakub ne buaŋŋɛ lienyɛ, ɛkɛ gɔkcin ne pwadan kɛɛgin Yuocipti waakɛnda, ɔci ɛkɛ ḍaŋnɛ tɛɛlnɛ kɔmñi ɛkɛ wyeñɛti, ɔci morcin Juaŋti. ²² Te jyeniyɛ, Yuocip ne buaŋŋɛ lienyɛ, ɛkɛ gɔkcin te jyek kooyin ma Icrayiil bora te ban Macor, ɔci ɛkɛ ma nɔɔnnɛ te nona jokki ma owi ɛkɛy. ²³ Te baaṭi ḍuaŋa tolan ma Macor bala noki kɛɛgin ma Icrayiil. Yeti te jyeniyɛ, Muuca ne jietkiti mayɛ, ɛkɛ cogɛyɔ weegɛn i mɛɛgɛn ponk ne ḍoogɔ, acaan ɛkɛ yuarcɛ ɛkkɛn pwanna pwanno. Ɔci ɛkkɛn buañi jwali ḍuaŋa tolan ma Macor moki bɛɛ. ²⁴ Te jyeniyɛ, Muuca ne tolliyɛ, ɛkɛ yookɔn warɛ te barŋa ɛkɛ bartiti ma a kaci ṭɔl ḍuaŋa tolan ma Macory. ²⁵ Ɛkɛ buagɔn taabdi ba taab taabki ma Juaŋ wanna, ɔci buagɔn yomɛ ñɔya te wak nɔji neeni wɔɔka ne ḍuulan bɛɛ. ²⁶ Acaan yuarnɛ ɛkɛ te jwolta ma juolki Ma Kiṭɔyɛ, ɛkɛ aŋka pwatcin ne tolan te mal ma Macor mala coŋin mala pwadin neeni, acaan ɛkɛ bala poŋi gɔki agi gena ɛkɛ ‘wondɛ Juaŋ neeni aŋka pwatcin ɛkɛti. ²⁷ Te jyeniyɛ, Muuca kooyin bora te ban Macor, ɔci ɛkɛ buañi te loñk ḍuaŋa tolan ma Macor bɛɛ. Ɛkɛ yookɔn warɛ te dɔɔkkin bala ba Juaŋ mena yuartan ma te woŋgɛn bɛɛ neeni yuartɛ ɛkɛ no. ²⁸ Te jyeniyɛ, Muuca ma myennɛ aŋka ɛkkɛn ŋordi kulin ṭɔlgɛn ɔci noŋdi iid. Ɔci ɛkɛ ɛkkɛn myennɛ aŋka ɛkkɛn yimg kulin ṭɔlgɛn gattan ‘yegin tuggɛnti aŋka Malɛɛka Lien kɛɛgin ɛkkɛn kɛɛgin a kɛɛgin nogdɛ bɛɛ. Ɔci iid neeni ma boṭi agi, Iid Malɛɛka Lien Bɛɛn Goṭi A Gorŋo. ²⁹ Te jyeniyɛ, ma Icrayiil galŋa bartan ma a Galŋa Tidan jyɛdɛji. Ɛkkɛn bala ati ba ne atki nona iwanti ɔɔn. Ɔci ne ma Macor buaŋŋɛ acaan kaatti daŋkunyɛ, galŋ ɛkkɛn muulnɛ ñaalɔ ɔci eññɛ. ³⁰ Te jyeniyɛ, ne ma Icrayiil kaatan ban Jɛrikɔ wiilkitiyɔ nink ne dɔɔyɔ wyetkɛn ne yyɛɛwɔyɛ, kaatan ḍɛɛmdin. ³¹ Te jyeniyɛ, Rahab ɛŋa toban neeni tuun iki maka a nɔɔtk bɛɛ, acaan ɛkɛ ma Icrayiil maka ati lɛɛl noon neeni coŋŋɛyɔ. ³² ’Ya ‘uocca gɔkca a ɔki moki? ‘Ya balka wɔɔka aŋka gɔkta te Gidyan, ɔci te Baraak, ɔci te Camcuun, ɔci te Jɛpta, ɔci te Daawud, ɔci te Camwil, ɔci te maka a bɔwan moki bɛɛ. ³³ Te jyeniyɛ, ɛkkɛn keedin buanɛ, ɔci ɛkkɛn noŋi ne pwadan, ɔci ɛkkɛn waka ɛkkɛn ḍuaññɛ Juaŋ te jwali mugɛ, ɔci ɛkkɛn jyer ‘uorkɛ tuggɛnti, ɔci ɛkkɛn amɛ jyer bɛɛ. ³⁴ Ɔci ɛkkɛn war tɛɛn maañ buannɛ, ɔci ɛkkɛn uni te lyen byeŋgaaran. Ɛkkɛn a maka waakɛn koyan yeti ɛkkɛn waakɛn tɛɛn, ɔci ɛkkɛn tɛɛna tɛɛn lañti. Ɔci ɛkkɛn ackan bonka pookɛn buanɛ. ³⁵ Te jyeniyɛ, moong gɛɛg ma ɛkkɛn maka jɔŋŋin te lientiyɛ, yuarɛ. Ɔci ma gɛɛg korkɛn ñakcin te jwolto. Yeti ɛkkɛn yookɔn waakɛn te pɔkkin ɛkkɛn pɔktiti ma aŋka ɛkkɛn ḍɔɔggɛn wɔkti te lyena ɛkkɛn noktiti ma, acaan ɛkkɛn buagɔn jɔŋdi te lienti te tɛɛtin pwadan. ³⁶ Ɔci ma gɛɛg juoli ma, ɔci ḍwayɛ, ɔci gɛɛg ḍɛɛgɛ, ɔci oljɛ jiju ciginji. ³⁷ Ɔci gɛɛg yepci ma te gwoyi ɔci nogɛ. Ɔci gɛɛg ŋuodɛ ma jitin, ɔci gɛɛg nogɛ te byeŋgaaran. Ɔci ɛkkɛn bala ɛŋi geek kulin i geek ḍɛɛko, ɔci ɛkkɛn bala ati amaam budan, gena bartan ɛkkɛn a gen ɛkkɛn gɛɛl bala bɛɛ. Ɛkkɛn naŋɛ ma ne yaayan. ³⁸ Ɔci ɛkkɛn yɔmji i baan konɛ moki bɛɛ! Ɛkkɛn ati amaam wɔɔŋji ɔci pomk jitin, ɔci ɛkkɛn wɔti kɔki pomkti. ³⁹ Maka neeniyɛ, ɛkkɛn maaŋi ma te jyeni ɛkkɛn. Oŋ yeti ɛkkɛn waka jiekɛn a ḍuagin neeni yuarɛ men bɛɛ. ⁴⁰ Juaŋ ikin ḍɔɔŋnin gena pwadan aŋka ɛkkɛn pwattin iki ikin a cyɛɛlɔ.

¹ Maka boorŋ ‘ya te yengɛn coŋin neeniyɛ, ɛkkɛn gɔṭi ikin, ikin yudkinyɔ. A ɔŋŋiyɛ, dala ikin waka cyɛgan ɔci nɔjja kɔrcinti ikinti ne tɛyan neeniyɛ, yiɛptin ɔntɔ, ɔci dala ikin yomgɔ tiektin ne ikin yiŋin boddin oŋkanda te boddin ḍuaññɛ Juaŋ ikin ñomgɔti neeniy. ² Ɔci dala ikin woŋgɔ tiittin gena Yaccu Kiṭɔt mena a bɛɛkin jyeni ikiny. Ɔci ɛkɛ a mena ikin naŋtin pwattin te jyeni ikiny. Ɛkɛ yookɔn warɛ te kakan bɛɛ, ɔci ɛkɛ poŋjin te ŋɛɛgga ḍorki ma ɛkɛ bɛɛ, ŋeejɛ ɛkɛ yom ñɔɔn bala kɛɛy ɛkɛ. Ɛkɛ poŋjin te lɔna tuudɛ ɛkɛ kakanti neeni bɛɛ. Oŋ accayɛ, ɛkɛ bala ciyi Juaŋ taaŋɛti byeŋa byerɔn. ³ Dala ɛkkɛ poŋdɛ te loomg tɛɛn ɛkɛ. Ɛkɛ naŋka naŋɛ maka yeyin ɛkɛti buannɛ jitin waakɛnda aŋka naa ɛkkɛ yomgɔ poda, ɔci yomgɔ buaya bɛɛ. ⁴ Te lañ ɛkkɛ neeniyɛ, ɛkkɛ noowɛ i nɔjjo, oŋ yeti ɛkkɛ noonɛ ne tuunɛ men bɛɛ. ⁵ Ɛkkɛ ñingɔ yien te jyeka guaŋŋɛ Juaŋ ɛkkɛti ba ɛkkɛ agɛ kɛɛgin ɛkɛyɛ? Juaŋ gɔki agi, “Hay, kaci ‘ya, dala i waŋu tiicca ne Ciɛggɔn i ṭeeditiy, ɔci naa i yomu koya ne ɛkɛ i ṭeeditiyɔ bɛɛ. ⁶ Acaan Ciɛggɔn ṭeyi maka ɛkɛ aniy, ɔci mena mugdɛ ɛkɛyɛ, ḍuadɛ ɛkɛ ba kaci ɛkɛ.” ⁷ Dala ɛkkɛ yomgɔ tiektɛ ne Juaŋ ṭeyi ɛkkɛy. Ɛkkɛ naŋdɛ ɛkɛ ba kɛɛgin ɛkɛ. Kɛɛgin waakɛnda ṭeetan weyyɛn. ⁸ Kan ɛkkɛ ṭeedɛ Juaŋ ba kɛɛgin ɛkɛ waakɛnda bɛɛyɛ, a ɔɔn ɛkkɛ agɛ kɛɛgin ɛkɛ awarɛ bɛɛ. Kan a ɔɔnyɛ, bala ba ɛkkɛ agɛ kɛɛgin jiedi ma te tommo. ⁹ Weyya ikin jietkinyɛ, ɛkkɛn ṭeyi ikin ɔci ikin buayin ɛkkɛn, oŋ dala ikin tieŋtin Wey ikin Jwaŋa Tolanti aŋka ikin tɛɛttin. ¹⁰ Weyya ikin jietkinyɛ, ikin ṭeekin wɔɔka ne ḍuulan ba naŋka yomg ɛkkɛn buagɔn, oŋ yeti Juaŋyɛ, ikin ṭeenin ɛkɛ yɔŋi ikin a ywaŋi aŋka ikin ñootin te pwani ɛkɛ. ¹¹ Ikin ne ṭeekinti mayɛ, te oŋŋa wanna ikin poŋŋin ka ṭeena neeni yaayɛ, pwatcin bɛɛ. Oŋ yeti ne ŋoyɔyɛ, ṭeena neeni etti naŋka pwadan te maka ṭeyi ma te naŋka neeniy. A ɔŋŋi, ɛkkɛn ciya ne pwadan. ¹² Dala byeŋki ɛkkɛ byeŋka morŋan neeni koobdɛ ñaalɔ, ɔci dala ɛkkɛ ‘woŋga ḍiedan neeni tiittɛ iñɔ. ¹³ Dala ɛkkɛ ooddɛ te pɔɔka a tyɛlgan aŋka naa ciega morŋan beeldi bɛɛ, yeti dala ɛkkɛn waakɛn tiittan iñɔ ne tɛyan. ¹⁴ Dala ɛkkɛ ciedɛ i ma waakɛnda ne pwadan te coodda pwadan. Kan pwani baaw mentiyɛ, mena neeni Ciɛggɔn yuardɛ bɛɛ. ¹⁵ Dala ɛkkɛ woŋgɔ tiittɛ, acaan naa menga warɛ ñiedɛ jitin te yom pwani Jwaŋa Tolan te gena Juaŋ buagɛ aŋka ‘wondɛ ɛkɛ neeni bɛɛ. Ɔci naa mena yaayan gɛɛl bala ɛkkɛti, ɔci ma yaadɛ ne coŋɔn te naŋki ɛkɛ bɛɛ. “Ɛkɛ bala ba jana yaayan ywollin baljiy.” ¹⁶ Naa ɛkkɛ menga noŋdi ne yaayan aga tomma ba Icɔ mena jyek Juaŋ baaw yomɛti ɔci ḍɔŋa ɛkɛ jiennɛ mɛɛgɛn agi kacca ñamu neeni wiɛlnɛyɔ te ama ne cyɛɛlɔ neeni bɛɛ. ¹⁷ Çeejɛ ɛkkɛ ne ɛkɛ buaŋŋi ne ŋoyɔ aŋka dala weegɛn gɔkti ne pwadan ɛkɛtiyɛ, Icɔ ṭiiŋŋɛ wey ɛkkɛn acaan ɛkɛ yaakinti naŋka naŋŋɛ ɛkɛ neeni agdiyɔ moki bɛɛ, yeti Icɔ bala wiak te pyeg woŋgɛ, ɔci yɔṭi jyeka pwadin te weegɛnti moki bɛɛ. ¹⁸ Ɛkkɛ bɛɛnɛ non waka ɛkkɛ yaakɛti yuartɛ, bala ba yɔrg ɛkkɛ ne bɛɛki Pom Cinati bɛɛ. Ɛkkɛn bɛɛn maña koldanti, ɔci nona miel ɔci ṭuuli wiew ɔci nona yiŋɛ tuol neeni. ¹⁹ Ɔci ɛkkɛn bɛɛn nona wiagi ṭuoŋ, ɔci non pwana gɔkiy. Ɔci maka tieŋŋin pwana neeniyɛ, kɛkkin agi naa ɛkkɛn tieŋdinti jwali gɛɛl moki bɛɛ. ²⁰ Acaan ɛkkɛn buañi jyeka neeni. Jyeka neeni bala gɔki agi, “Kan mala ati te ciegɛn gɛɛl jokcin poomtiyɛ, ɛkɛ yeptan ma te gwoyi ne tuudi ɔɔn.” ²¹ Muuca buañi ne tolan ne ɛkɛ gɔrni poomtiy, ɔci ɛkɛ waanɛ gɔki agi, “‘Ya buay ne pɛñan, ɔci waru ḍiedan.” ²² Yeti ɛkkɛ bɛɛnɛ Pom Ciyɔnti ɔci ban Jwaŋa tɛɛtiti Urcaliimti ñaalɔ pɔliji i malɛɛkan coŋiny. ²³ Ɔci ɛkkɛ bɛɛnɛ non yom ñɔɔn ñoowin kɛɛgin Juaŋ kɛɛgin a kɛɛgin, maka yengɛn a kiigin ñaalɔ pɔlijiy. Ɔci ɛkkɛ bɛɛnɛ Juaŋti mena noŋi godan ma waakɛnda, ɔci ɛkkɛ bɛɛnɛ moki non boŋki maka pwadgin naŋŋɛ Juaŋ aŋi maka awarɛy. ²⁴ Ɛkkɛ bɛɛnɛ Yaccuti mena a cuuda jyeka naŋŋɛ Juaŋ wonkɛn neeniti. Ɛkkɛ bɛɛnɛ yimg Yaccuti yimga mieti ikin te bɔɔkin ikin bɔɔŋninti Juaŋ te nɔjiy. Yimg Yaccu neeni bala ba yimg Habiil yimga balkɛ jyek yoni waakɛn wanna bɛɛ. Ɔci ɛkkɛ moki bɛɛnɛ yimga a gaagin jiekɛn a naŋgin ne pwadan te yimg Habiily. ²⁵ Dala ɛkkɛ woŋgɔ tiittɛ, naa jyek mena gɔki neeni tuodɛ bɛɛ. Kan maka jyek mena gɔki ṭeyi ma waakɛn iñɔ ṭɛɛrji wɛnni neeni tuoyɛ ɔci ɛkkɛn uni te ywobji Juaŋ bɛɛy, oŋ ikin uttin a ɔki, kan ikin jyek mena gɔki te ñaalɔ pɔliji neeni tuoññiny! ²⁶ Pwan ɛkɛ te oŋŋa waayiyɛ, ṭɛɛr jiɛññɛyɔ. Yeti acca ɛkɛ gɔkkin moki agi, “‘Ya ‘uocca oŋi ne cyɛɛlɔ moki ṭɛɛr jiɛdyɔ ɔci ‘ya ṭɛɛr jiɛdyɔ parɛ bɛɛ, yeti ‘ya pɔli daŋkun jiɛdyɔ.” ²⁷ Jyeka gɔki agi “Oŋi ne cyɛɛlɔ moki,” jyeka neeni nɔɔti te waka jieci waakɛn neeni ɛkkɛn uuttɛ Juaŋ ɔntɔ. Ɛkkɛn a waka a cɔdgin. Ɔci waka waakɛn jiɛtan bɛɛ neeni aŋka ciya. ²⁸ Dala ikin gɔktin a pwatcin Juaŋti acaan ikin mwokkin cyɛgja jieci warɛ bɛɛy. Dala ikin buayin Juaŋ ne ikin moṭin Juaŋti te malla buagi ɛkɛy. ²⁹ Acaan Jwaŋ ikinyɛ, ɛkɛ a maña omiy.

¹ Dala ɛkkɛ oondɛ yɔtin pookɔ ba maka a modin. ² Naa ɛkkɛ ñingɔ yeya te ḍuat maka wɛlg bɛɛ. Te naŋka wannayɛ, ma gɛɛg malɛɛkan ḍuayɛ ne ɛkkɛn kwoyɔn ɛkkɛn ɔɔn. ³ Dala ɛkkɛ poŋdɛ te maka ciyi ciginji bala ba ne ɛkkɛ balgɛ iki ɛkkɛn jiju ciginji ɔɔn, ɔci dala ɛkkɛ poŋdɛ te taab maka naŋtan ma ne yaayan neeni. Dala taab ɛkkɛn bala ba taab ɛkkɛ ɔɔn. ⁴ Dala ma waakɛnda poŋdi a ḍɛɛn neeni ɛkɛ a gena pwadan. Ɔci maka ‘uay i moongyɛ, naa ɛkkɛn noŋdi tomi maka pookɛnti bɛɛ. Juaŋ jiek oldɛ maka noŋi tomi wyetkɛnti. ⁵ Naa ɛkkɛ anɛ bilk bɛɛ. Dala ɛkkɛ yɔmdɛ te waka bala ɛkkɛti wanna doki. Acaan Juaŋ gɔki agi, “‘Ya i daldin bɛɛ, ɔci ‘ya i yiɛptin ɔntɔ bɛɛ.” ⁶ Dala ikin yomgɔ tɛya, ɔci gɔktin agi, “Ciɛggɔn a mena moki ‘yay. A ɔŋŋiyɛ, ‘ya buay genga moki bɛɛ. Menga yaakinti ‘ya naŋda ɔŋka bɛɛ.” ⁷ Dala ɛkkɛ poŋdɛ te maka ɛkkɛ lalkɛ te jyek Juaŋy. Dala ɛkkɛ poŋdɛ te coodda cieki ɛkkɛn, ɔci te lyena tuuki ɛkkɛny. Dala jyeni ɛkkɛ bala ba jyeni ɛkkɛn. ⁸ Yaccu Kiṭɔ warɛ agdɛ oŋgati bɛɛ. Tɛɛnɔ, ɔci te oŋŋo, ɔci yuonginda ɔɔn ɛkɛ warɛ agdɛ bɛɛ. ⁹ Naa ɛkkɛ maaltɛ jyeka pookɛn gɛɛg ɔntɔ te jyeka awarɛti neeni bɛɛ. Pwatcin doki ne i yɔɔrdi war tɛɛn i yomuti te yom pwani Jwaŋa Tolany. Yeti yom tɛɛna neeni yuara i te tiit jyek ganuun te jyek oomdin bɛɛ. Maka bala tieci jyeka neeniyɛ, ɛkkɛn magɛ jyeka neeni bɛɛ. ¹⁰ Maka moṭi Juaŋti nona morki ma Juaŋti te baaṭiyɛ, ɛkkɛn omi waka ‘yɛrtan ɛkkɛn Juaŋti neeni, yeti ɛkkɛn yaakinti omdi genga te nona ɛṭin ikin waak a nona woonɛ neeniti bɛɛ. ¹¹ Gaciic tolan Ma Yahuud etti yimg maal Nona Pwadan Ne Tolanti neeni aŋka ‘wondɛ ɛkɛ Juaŋ te nɔjjo. Yeti yoŋgi waka ‘yɛri ma neeni tontan ma maañ baan ŋoyɛti bora aŋan. ¹² Yaccu daŋkun tuun bora baan ŋoyɛti a ɔɔn aŋka ma pwaddi te yimg ɛkɛ. ¹³ Dala ikin gortin bora ɛkɛti baan ŋoyɛti aŋan aŋka ɛkɛ yoortin ikin te lɔɔno. ¹⁴ Acaan ikin balkin bana yɔɔd ne tɛyan gɛɛl iñɔ ṭɛɛrji wɛnni moki bɛɛ. Ikin kɛɛyin bana ikin ‘wontinti Juaŋ ne baaṭi neeni. ¹⁵ Acaan Yaccu tuun te ikinyɛ, dala jiɛta jieyin ikin Juaŋ oŋkanda neeni, bala ba waka ‘yɛrtin ikin Jwaŋa Tolanti, ɔci te jiɛta neeniyɛ, ikin mietin a ɛkɛ a Ciɛggɔn. ¹⁶ Naa ɛkkɛ yiedɛ te naŋka pwadin ɔci te moowin yɔtin pookɔ bɛɛ, acaan Juaŋ yomɛ pwatcin te naŋka pwadan neeni bala ba ne ɛkkɛn akki waka ‘yɛrŋin ikin ɛkɛti no. ¹⁷ Dala ɛkkɛ tieŋdɛ jyek maka wɛɛyi ɛkkɛ, ɔci noŋdɛ ba jyeka guaktan ɛkkɛn ɛkkɛtiy. Ɛkkɛn gɔṭi ɛkkɛ woodi bɛɛ, acaan ɛkkɛn taadɛ Juaŋ te kanŋa ɛkkɛn neeni. Kan ɛkkɛ tieŋdɛ jyek ɛkkɛnyɛ, ɛkkɛn noŋdi kanŋa ɛkkɛn te yoma ñɔyan. Kan ɛkkɛ tieŋdɛ jyek ɛkkɛn bɛɛyɛ, ɛkkɛn noŋdi kanŋa te yoma pwadan bɛɛ, ɔci yɔɔrdi gena pwadan gɛɛl te naŋka neeni bɛɛ. ¹⁸ Dala ɛkkɛ cɔktɛ te ɔɔn oŋkanda Juaŋti. Çeejɔn ɔɔn ne pwadan paŋŋa bɛya te yomg ɔɔnti pwanna pwani, acaan ɔɔn buagɔn noŋdɔn a naŋka pwadan oŋkanda ɔɔn. ¹⁹ Ɔci ‘ya toocca ɛkkɛti moki ne tolan ka dala ɛkkɛ cɔktɛ Juaŋti aŋka ɛkɛ ‘ya cuonda dɔɔda ɛkkɛti moki ne pɛñan. ²⁰ Ciɛggɔn ikin Yaccu Kiṭɔ luolnɛ Jwaŋ coodda pwadan ñaalɔ te lienti, Yaccu aŋi ḍɛɛnɔn kulin Ḍɛɛnɔn Tolan te lyen ɛkɛ. Ɔci te yimg ɛkɛyɛ, Juaŋ jiek naŋɛ iki mako. Jyeka naŋi ɛkkɛn neeni baadi bɛɛ. ²¹ Dala Jwaŋ naŋka pwadan ɛkkɛ ‘wondɛ waka pwadin waka ɛkkɛ buagɛ waakɛnda aŋka ɛkkɛ noŋdɛ ba naŋka ṭagdɛ ɛkɛy. Ɔci dala ɛkɛ noŋdi ikinti te Yaccu ba naŋka ṭagdɛ ɛkɛy. Ɔci dala Yaccu Kiṭɔ jiɛtan ma yuonginda ɔɔn! Amɛɛn. ²² Modg ɔɔn, ‘ya gɔkka ɛkkɛti, dala ɛkkɛ tieŋdɛ jwalla ɛkkɛ ‘wondɛ yoma pwadan, ɔci dala ɛkkɛ yomgɔ tɛya. Acaan worga kiewan ‘ya ɛkkɛti neeni beecin bɛɛ. ²³ ’Ya buaga dala ŋeeddɛ ɛkkɛ mod ikin Timutawuc pɔkkɛ ma te ciginji doki. Kan ɛkɛ bɛɛn ne pɛñan dokiyɛ, ‘ya baldin iki ɛkɛ oŋŋa ‘ya ɛkkɛ yuardiny. ²⁴ Dala ɛkkɛ maka wɛɛyi ɛkkɛ ñiiptɛ iñɔ te ɔɔn, ɔci Ma Kiṭɔ waakɛnda. Modg ikin maka ban Itali ñiepi ɛkkɛ waakida. ²⁵ Dala Jwaŋa Tolan yomɛ pwada a pwani ɛkkɛti oŋkanda.