Galatiya

¹ Gena ‘ya Buuluc ñiep ɛkkɛ neeni. Çeejɛ ɛkkɛ ‘ya cuonna men baan gɛɛl bɛɛ. Gena Yaccu Kiṭɔ ‘ya cuonna ɔci Weegɛn Jwaŋa Tolan mena ɛkɛ jɔɔlnɛ ñaalɔ te lientiy. ² Ɔci modg ikin modga balgin iki ‘ya wɛnniyɛ, ɛkkɛn ñiepi ɛkkɛ daŋkun. Ɔɔn ñiepɔn ɛkkɛ ma kaniican ban Galatiya. ³ Dala Jwaŋa Tolan Wey ikin ɔci Ciɛggɔn ikin Yaccu Kiṭɔ ɛkkɛ ‘wontɛ coodi pwanno, ɔci dala ɛkkɛn yomgɛn pwada a pwani ɛkkɛti moki. ⁴ Yaccu a mena war ɛkɛ ‘wonnin ikin te nɔji ikin aŋka ɛkɛ yuoci ikin te ṭɛra ciyin ikin acca ṭɛra yaayan neeni. Ɛkɛ noŋi a ɔɔn ba yom Wey ikin Jwaŋa Tolan. ⁵ Dala ma jieyi ɛkɛ yuonginda ɔɔn. Amɛɛn. ⁶ ’Ya yomu wiak ne ɛkkɛ waakɔ yalnɛ ɔntɔ ne pɛñan te Juaŋti mena ɛkkɛ muonɛ bora neeniy. Jwaŋa Tolan yomɛ pwad pwad ɛkkɛti ɔci ɛkkɛ muonɛ Juaŋ bora te yom pwani Kiṭɔ. Ɔci ɛkkɛ waakɔ yalnɛ ɔntɔ jyeka wonkɛn jyeka pookɛnti neeni. ⁷ Jyeka pookɛn neeniyɛ, a jyeka wonkɛn jyeka pwadin awarɛ bɛɛ. Ma gɛɛg bala, ɔci ɛkkɛn buagɔn ɛkkɛ nuutɛ wyetkɔti ɔci ɛkkɛn jyek Kiṭɔ jyeka wonkɛn jyeka pwadin aktanyɔ aga jyeka jomgin budan ɛkkɛti. ⁸ Kan men gɛɛl te ɔɔnti, walla kan a malɛɛka gɛɛl bɛɛn te ñaalɔ pɔliji ɔci lorti ɛkkɛ te jyeka pookɛn gɛɛg bala ba jyeka ɛkkɛ lalkɛ ɔɔn ñamu neeni bɛɛyɛ, dala ɛkɛ ḍardɛ Jwaŋa Tolan. ⁹ ’Ya gɔkka ɛkkɛti moki, kan men gɛɛl bɛɛn ɔci lorti ɛkkɛ te jyeka pookɛn gɛɛg bala ba jyeka muŋŋɛ ɛkkɛ ñamu neeni bɛɛyɛ, dala ɛkɛ ḍardɛ Jwaŋa Tolan. ¹⁰ Ɛkkɛ poŋɛ gɔkɛ agi ‘ya buagata ma baan gɔktɔ agi ‘ya pwadjɔ? A’a, ‘ya buaga Juaŋ aŋka gɔkti agi ‘ya pwadjɔ. ‘Ya buaga ŋeetta ma baan ne coŋɔn? A’a. Te ‘ya baala potta noŋa aŋka ŋeetta ma ne coŋɔnyɛ, te ‘ya noŋ kanŋa Kiṭɔ ne pwadan bɛɛ. ¹¹ Modg ɔɔn, tieŋdɛ ne pwadan. Jyeka wonkɛn jyeka pwadin ɛkkɛ nɔɔnnin ‘ya neeni a jyek men baan gɛɛl budan bɛɛ. ¹² ’Ya myenna men baan gɛɛl te jyeka wonkɛn jyeka pwadin neeni bɛɛ. Ɔci moki ‘ya lalka ma te jyeka wonkɛn neeni bɛɛ. Gena Yaccu Kiṭɔ aŋka ‘ya lɛɛrna jyeka wonkɛn neeni te naŋki ɛkɛy. ¹³ Ɛkkɛ tieŋnɛ jyek naŋki ‘ya doki. Wona ‘ya aŋŋa cuuda Yaccu men bɛɛyɛ, ‘ya baal noŋ ba naŋki ma Icrayiil. ‘Ya baal noŋ ne yaayan ma kaniicati oŋkanda ne tolan, acaan ‘ya buaga dala jyek Yaccu baadi, ɔci maka booti ɛkɛti nogdi waakɛnda. ¹⁴ Maka ‘uayi maka a ma ɔɔn ba ‘ya ɔɔnyɛ, ɛkkɛn buani ‘ya te mali ma Icrayiil a ḍiɛkan bɛɛ, acaan ‘ya waru byerŋa byerŋ te jyek naŋki yɔrg ikin yɔrga te baaṭi. ¹⁵ Yeti ne ‘ya jiennata mɛy ɔɔn men bɛɛyɛ, ‘ya doki muona Jwaŋa Tolan bora te kanŋa ɛkɛ doki. Ɔci oŋ gɛɛltiyɛ, ɛkɛ ‘ya borna te yom pwani ɛkɛ ‘yati. ¹⁶ Ɔci ‘ya lɛɛrna ɛkɛ Kaci ɛkɛ, ɔci ‘ya oŋ cuuñña ɛkɛ ati lor Keedin Pookɛn te Jyek Kiṭɔ oŋo. Ne ‘ya cuuññati Juaŋ a ɔɔnyɛ, ‘ya tooccan men gɛɛlti te jiek gɛɛg bɛɛ. ¹⁷ Maka muonɛ Jwaŋa Tolan bora ñamu te ‘ya ŋeej ‘ya ne balki ban Urcaliimji ɔɔn. Yeti ‘ya ati aŋan aŋka myetta ɛkkɛn te jwali gɛɛl bɛɛ. Yeti ‘ya ati gena ban Arabya, ɔci ne baaṭi ‘ya dɔɔkkan dɔki ban Ḍimaackati. ¹⁸ Ɔci ne yuonga ne ḍoogɔ bɛɛki borayɛ, ‘ya oŋ ati ban Urcaliimji, ḍieŋjan Butructi oŋo. Ɔɔn balgɔn iki ɛkɛ nink a inyaakkɛn om ne cyɛɛlɔ (15). ¹⁹ Yeti Cuudan Yaccu makɛn pookɛnyɛ, ɛkkɛn yuarŋ ‘ya bɛɛ, gena Yaakub mod Yaccun aŋka yuarŋ ‘ya parɛy. ²⁰ Jyeka kiewan ‘ya ɛkkɛti neeniyɛ, a jyeka jomgin bɛɛ. Çeejɛ Juaŋ jyeka neeni a jyeka awarɛ. ²¹ Ɔci ne baaṭi ‘ya oŋ ati ban Cuurya ɔci ban Ciliicya oŋo. ²² Ɔci ma kaniican ban Yahuudiya, ɛkkɛn ‘ya yuarka te woŋgɛn bɛɛ. ²³ Ɛkkɛn tieŋŋin te jyetkɛn budan agi mena noŋɔ ne yaayan ɛkkɛnti te ñamuyɛ, agi ɛkta baalɔ loṭɔ ma te jyeka wonkɛn jyek Kiṭɔ jyeka ɛkta baalda nokta ma agi dala baadɔ te ñamuy. ²⁴ Ɔci ma bala jieyi Juaŋ te naŋka naŋŋɛ ɛkɛ ‘yati te akta ɛkɛ ‘ya aaŋŋati ñin pwanna neeni.

¹ Ne yuonga a inyaakkɛn wyetkɛn ne ŋaanɔ neeni bɛɛki borayɛ, ‘ya ati ban Urcaliim moki. Ɔɔn attɔn i Barnabac, ɔci Tituc eñi ‘ya. ² ’Ya myenna Kiṭɔ te won ‘ya ban Urcaliim. Ɔci maka ḍwaŋin myetkan ‘ya pookɛn ñamu te jyeka loṭa ‘ya Keedin Pookɛn neeni, acaan ‘ya buaga naa jyeka loṭa ‘ya ma neeni aga ba jyeka budan ɛkkɛnti bɛɛ. Ɔci moki, ‘ya buaga naa jyeka loṭa ‘ya ɛkkɛn ne baaṭi aga ba jyeka budan ɛkkɛnti bɛɛ. ³ Ma gɛɛg bala aŋan ɛkkɛn noŋi ba ne ɛkkɛn akki modg ikin ɔɔn no, oŋ yeti ɛkkɛn a modg ikin awarɛ bɛɛ. A menɛ ɛkkɛn barŋɛ a modg ikin lieda neeni yeti? Ɛkkɛn buagɔn naa ikin ḍɔɔggɔ wɔkti te jyek ganuun bɛɛ, acaan acca ikin jyettin Kiṭɔti doki. Maka neeni ɛkkɛn ṭoki dala ikin naŋtin a kɛɛnk ganuun moki. Mena mod ɔɔn Titucyɛ, ɛkɛ a men ma Giriik, yeti maka wɛɛyi ma neeni ‘yercin ɛkɛti te jyek ŋuni moki aŋka ɛkɛ naŋtan aga men Ma Icrayiil ba ikin ɔŋŋi bɛɛ. ⁶ Yeti maka bala ñaltan ma ba ne akki maka wɛɛyi ma ḍwaŋin neeniyɛ, ‘ya gɔk ka naŋki ɛkkɛn neeni eccin paŋŋa woonɛ gɛɛl ‘yati bɛɛ. Jwaŋa Tolan gɔṭi waak maka wɛɛyi ma neeni waaka bora budan bɛɛ. ⁷ Maka ḍwaŋin neeni ɛkkɛn ‘ya myetka te jyek kanŋa lali ma parɛ budan bɛɛ, yeti ɛkkɛn ‘ya ciŋkaji te naŋki kanŋa maka Kɛɛna Pookɛnti. Yaakub i Butruc i Yɔhannayɛ, ɛkkɛn a maka ḍwaŋin. Ɔci ne ɛkkɛn gɔrki naŋka naŋŋɛ Juaŋ mati te jyek ‘ya neeniyɛ, ɛkkɛn yookɔn te ɔɔn yaakkɔ Barnabac bɛɛ. Butruc ‘wonnɛ Jwaŋa Tolan kanŋa te lali ma Icrayiil maka balki jyek ŋwoti oŋkanday. ¹⁰ Ɛkkɛn balki jwali gɛɛl ne cyɛɛlɔ budan agi dala ɔɔn ma Juaŋ maka bɔwan magjɔn ban Urcaliimji. Jyek ɛkkɛn neeniyɛ, bala ba jyeka buagata ‘ya neeni daŋkun. ¹¹ Ne Butruc bɛɛni ban Antyakyɛ, ‘ya gɔkcan ɛkɛti ne pɛñan acaan ɛkɛ bala noŋi ne pwadan bɛɛ. ¹² Te ñamu ɛkɛ bala omi iki Keedin Pookɛn. Yeti ne ma gɛɛg bɛɛki te Yaakubtiyɛ, ɛkɛ warɛ yɔɔnnɛ te amma ɛkɛ omki iki Keedin Pookɛny. Ɛkɛ noŋi a ɔɔn acaan ɛkɛ buayi ma Icrayiil maka buagɔn jyek ŋwoti Keedin Pookɛn neeni. ¹³ Ɔci ma Icrayiil a Ma Kiṭɔ maka pookɛnyɛ, ñokcinti ɔci bala noŋi ba naŋki ɛkɛ ɔɔn. Ɔci te naŋki ɛkkɛnyɛ, Barnabac daŋkun jyɛtci ɛkkɛn ɔntɔ ɔci noŋi ba ɛkkɛn moki ɔɔn. ¹⁴ Ɔci ne ‘ya gɔrna ɛkkɛn atki te pɔy waŋɛ a tyɛlga ba bolji jyeka wonkɛn jyeka pwadin neeni bɛɛyɛ, ‘ya gɔkcan Butructi te ma ñomgɛnti waakɛnda ka, “Hay Butruc, i a men ma Icrayiil ɔci i baal ciy ba ma Keedin Pookɛn neeni. Oŋ te gena aŋka i buagi dala Keedin Pookɛn neeni naŋki ɛkkɛn daltan ɔci dala ɛkkɛn noŋdi ba naŋki ma Icrayiily?” ¹⁵ Ɛkkɛn oŋ myetkan ‘ya jwalla awarɛ neeni agi ikin jietkin ma akin ma Icrayiil maka noŋi ba jyek ganuun jitkɛn. ¹⁶ Yeti ŋeecin ikin men gɛɛl ikinti pwada Jwaŋa Tolan ñamɛti te tiid jyek ganuun waakɛn bɛɛ. Ikin ma Icrayiil pwattin Juaŋ ñamɛti te jyenna ikin jyettin Yaccu Kiṭɔti. Ɔci Keedin Pookɛn neeni, ɛkkɛn pwaddi Juaŋ ñamɛti te jyenna ɛkkɛn jyetti Yaccu Kiṭɔti daŋkun. Ikin waakida balkin bolja ne cyɛɛlɔ. Men gɛɛl pwada Juaŋ ñamɛti te tiid jyek ganuun waakɛn bɛɛ. ¹⁷ Ikin ma Icrayiil yɔɔnnin te naŋki mali ikin ma Icrayiil acaan ŋeecin ikin ikin pwatkin Juaŋ ñamɛti acca acaan te jyenna jyettin ikin Kiṭɔti neeni. Ɔci ma ikin ma Icrayiil ɛkkɛn ikin ñaltin ba nɔɔtka ḍwaŋin te naŋka neeni. Hay! Yaccu ikin eeŋnin nɔji ḍɔɔggɔtɛ? Hayɛllɛ! Nɔji bɛya te Yaccuti bɛɛ. ¹⁸ ’Ya baal lor ma te jyenna ikin pwattin Juaŋ ñamɛti neeni, ɔci acca kan ‘ya jiek agdiyɔ, ɔci kan ‘ya dɔwwa lorca ma ka da ɛkkɛn tieci jyek ganuun mokiyɛ, a ɔɔnyɛ, ‘ya jiek dami doki. ¹⁹ Ne ‘ya baala noŋa ba jyeka ganuun buagɛ aŋka naŋdi ‘yayɛ, naŋki ‘ya neeni yuarcan ‘ya a jomgɔn budan, acaan yuarcan ‘ya pwad awarɛ te naŋki ganuun wanna bɛɛ. ²⁰ ’Ya tuunin iki Kiṭɔ a cyɛɛlɔ, ɔci acca gena ‘ya ciy neeni moki bɛɛ. Gena Kiṭɔ aŋka ciyi ‘ya yomuti neeni. Ɔci coodda ciya ‘ya acca neeniyɛ, ‘ya ciy te jyenna ‘ya jyetta Kaci Jwaŋa Tolanti mena ani ‘ya ɔci ‘ya ‘wonna war ɛkɛy. ²¹ Gena naŋŋɛ Juaŋ pwadan neeniyɛ, a jyeka budan ‘yati bɛɛ. Kan men gɛɛl gɔki agi ma yaakinti pwaddi Juaŋ ñamɛti te tiid jyek ganuun pookɛnyɛ, a ɔɔn bala ba ne ɛkɛ gɔki agi lyen Yaccu neeniyɛ, bala ba ne ɛkɛ tuuni budan no.

¹ Hay, ɛkkɛ maka ban Galatiya, ɛkkɛ naŋŋɛ ñin menɛ yeti? Ɛkkɛ nɔɔnnin ‘ya ne pwadan te kon lyen Yaccu Kiṭɔ te ñamu te oŋŋa tuuni ɛkɛ kakanti neeni. ² Acca ‘ya buaga toocca ɛkkɛti te jwali gɛɛl ne cyɛɛlɔ. Ɛkkɛ ‘wonnɛ Juaŋ Boŋ ɛkɛ te tiid jyek ganuun waakɛn boki, walla te jyenna ɛkkɛ jyettɛ Kiṭɔti te oŋŋa ɛkkɛ tieŋnɛ jyek ɛkɛy? ³ Oŋ acca ɛkkɛ poŋɛ amaam ɔɔn ogo? Ɛkkɛ aŋŋɛ Ma Kiṭɔ te Boŋ Jwaŋa Tolan, ɔci acca ɛkkɛ poŋɛ gɔkɛ agi ɛkkɛ yaakɛti ‘uottɛ ñamu te naŋki ɛkkɛ naŋka tɛyan te waak ɛkkɛ pookɔ? ⁴ Te ñamu taab ɛkkɛ tol tol te naŋki maka ‘yeṭi ɛkkɛ te jyek ganuun. Ɔci acca kan ɛkkɛ dɔɔdɛ naŋki ɛkkɛntiyɛ, a ɔɔn bala ba yom tiekin te taab neeni bɛɛn ɛkkɛti budan. Yeti ‘ya poŋ gɔk ka taab ɛkkɛ neeniyɛ, ɛkkɛ eektɛ jyeka pwadin. ⁵ Yaccu mena ‘woñi ɛkkɛ te Boŋ Jwaŋa Tolan, ɔci mena noŋi naŋka tɛyan naŋka ñyecki ma ɛkɛ neeniyɛ, ɛkɛ noŋi a ɔɔn acaan ɛkkɛ tiecɛ jyek ganuun Muuca jitkɛn boki? Walla acaan ɛkkɛ jyettɛ ɛkɛti, ɔci tieŋnɛ jyek ɛkɛ? ⁶ Ɔci ba jyek jyenna neeniyɛ, bala ba jyeka kiigin ne gɔkki te jyeni Abrahim agi, “Abrahim jyeti Juaŋti, ɔci a ɔŋŋiyɛ, ɛkɛ pwani Juaŋ ñamɛti.” ⁷ Ɔci dala ŋeeddɛ ɛkkɛ maka a kɛɛgin Abrahim awarɛyɛ, ɛkkɛn a maka jyeti Juaŋti ba ɛkɛ ɔɔn. ⁸ Te baaṭi ne jiek bɛɛki bora men bɛɛyɛ, jyek worga gɔki agi Juaŋ gɔkcin Abrahimti agi, “Juaŋ noŋdi ne pwadan mati baan konɛ warda te i.” Juaŋ gɔki a ɔɔn acaan ŋeejɛ ɛkɛ Keedin Pookɛn jyeddi ɛkɛti, ɔci pwaddi ɛkɛ ñamɛti te jyeni ɛkkɛn. ⁹ Oŋŋa Abrahim jyetti Juaŋtiyɛ, Juaŋ noŋi ɛkɛti ne pwadan. Ɔci acca maka jyeddi Juaŋtiyɛ, Juaŋ da noŋdi ne pwadan ɛkkɛnti waakɛnda ba Abrahim ɔɔn. ¹⁰ Maka buagɔn pwaddi Juaŋ ñamɛti te tiid jyek ganuun waakɛn pookɛnyɛ, jiek bɛya ɛkkɛn wyetkɛnti. Acaan jyeka kiigin gɔki agi, “Kan men gɛɛl jyek ganuun tiidiyɔ waakɛnda bɛɛyɛ, jiek bɛya ɛkɛ wyeñɛti dita.” Men gɛɛl jyek ganuun tiiññiyɔ oŋgati waakɛnda boki? Hayɛllɛ! Men gɛɛl jiek tiiññiyɔ waakɛnda bɛɛ. ¹¹ Çeecin ikin ne pwadan menga yaakinti pwada Jwaŋa Tolan ñamɛti te tiit jyek ganuun waakɛn bɛɛ acaan jyeka kiigin gɔki agi, “Gena mena pwani Juaŋ ñamɛti te jyenna ɛkɛ jyetti Juaŋti neeniyɛ, ɛkɛ aŋka uda.” ¹² Yeti jyek ganuun ñoowin i jyek jyeni bɛɛ. Jyek ganuun gɔki agi, “Kan mena jyek ganuun tiidiyɔ waakɛndayɛ, ɛkɛ aŋka uda.” ¹³ Yeti jiek bɛya ɔɔn wyetkɔti te jyek ganuun bɛɛ, acaan ɔɔn wannɔn Kiṭɔ doki te oŋŋa jiek bɛɛki ɛkɛ wyeñɛti te ɔɔny. Acaan jyeka kiigin gɔki agi, “Kan menga ŋaaptan ma ñaalɔ jaantiyɛ, a ɔɔn bala ba jiek bɛɛn ɛkɛ wyeñɛti doki.” ¹⁴ Kiṭɔ noŋi a ɔɔn aŋka dala jyeka guaŋŋɛ Jwaŋa Tolan Abrahimti a jyeka pwadin neeni, dala ooddi Keedin Pookɛnti daŋkun te ɛkɛ. Ɔci a ɔɔnyɛ, Boŋ Juaŋ bala ɔɔnti te jyenna ɔɔn jyettɔn Juaŋti neeni. ¹⁵ Modg ɔɔn, tieŋdɛ jwali ṭɔɔlɛ neeni, gena jwali naŋki ikin. Kan jiek naŋɛ ma doki ne yyɛɛwɔyɛ, ɔci kan maka neeni jwali ḍyɛgɛ a warɛ dokiyɛ, jiek bawwin doki. Mena parɛ gɛɛl yaakinti gɔkti agi jyeka neeni agi jyeka budan moki bɛɛ. Ɔci menga yaakinti jyeka neeni agdiyɔ moki bɛɛ. ¹⁶ Jyeka naŋŋɛ Jwaŋa Tolan neeni a jyek kɛɛgin Abrahim waakɛnda bɛɛ. Jyeka kiigin gɔki agi, “Gena Kaci i parɛ.” Gena Kiṭɔ mena bɛɛn te Abrahimtiy. ¹⁷ Ba jyeka neeniyɛ, bala ba jyek Abrahim. Jwaŋa Tolan jiek naŋɛ iki Abrahim te ñamu te jyek mena bɛya te Abrahimti. Oŋŋa Juaŋ noŋki jiek iki Abrahimyɛ, jyek ganuun men bala bɛɛ. Ne yuonga coŋin ba miyyan ne ŋaanɔ ɔci men baan mena parɛ byeŋkɛ (430) bɛɛki borayɛ, jyek ganuun bɛɛn oŋo. Yeti jyeka naŋɛ Juaŋ iki Abrahim aŋi jyeka budan bɛɛ. Jiek aaŋŋɛyɔ Juaŋ bɛɛ. ¹⁸ Kan te jyek ganuun ma yɔɔkitiyɛ, te jyeka guaŋŋɛ Juaŋ Abrahimti neeniyɛ, te aŋi jyeka budan. Yeti jiek bala a ɔɔn bɛɛ. Ma yɔɔtan jyek ganuun bɛɛ. Ma yɔɔdɛ Juaŋ ba jyeka guaŋŋɛ ɛkɛ Abrahimti. Pɔya parɛ gɛɛl bala bɛɛ. ¹⁹ Ɔci kan a ɔŋŋiyɛ, oŋ Muuca ‘wonnɛ Juaŋ jyek ganuun te gena? Ɛkɛ ‘wonnɛ Juaŋ jyek ganuun acaan ma a nɔɔtko, ɔci te jyek ganuun neeniyɛ, ŋeettan ɛkkɛn naŋki ɛkkɛn a nɔjjo. Ɔci jyek ganuun bala ɛkkɛnti oŋkanda ɔɔn ne oŋŋa Kacca Abrahim myennɛ Juaŋ neeni bɛɛni ɔɔn. Ma ‘wonni Juaŋ ganuun waakɛnda bɛɛ, yeti ɛkɛ ganuun ‘wonnɛ malɛɛkan byeŋkɛnti ɔci ‘woñgi ɛkkɛn Muuca bieŋɛti. Ɔci ɛkɛ oŋ ma ‘wonnɛ oŋo, acaan Muuca a cuuda. Yeti jyeka naŋɛ Juaŋ iki Abrahim bala a ɔɔn bɛɛ. Cuuda bala bɛɛ. Juaŋ gɔkcin Abrahim waanɛti. Ɛkɛ gɔkcin mena parɛ gɛɛlti bɛɛ. ²⁰ Ɔci kan men buagɔn noŋi gen parɛyɛ, ɛkɛ buagɔn cuuda gɛɛl moki bɛɛ, acaan ɛkɛ noŋi parɛ, ɔci mena neeniyɛ, gena Jwaŋa Tolan. ²¹ Gɔṭṭɛ, jyek ganuun kooki jyeka naŋɛ Juaŋ iki Abrahim nɛ? A’a. Jyeka neeni kooki makɛn neeni bɛɛ, hay! Kan te tɛɛtin baali mati te tiid jyek ganuun waakɛndayɛ, ma te pwadgin Juaŋ ñamɛti, ɔci te jyeka naŋɛ Juaŋ iki Abrahim neeniyɛ, te aŋi jyeka budan doki. ²² Yeti jyek Juaŋ bala a ɔɔn bɛɛ. Ganuun bala aŋka ŋeettan ma, ma waakɛnda a nɔɔtko. Ɔci a ɔŋŋiyɛ, jyeka pwadin jyeka guaŋŋɛ Jwaŋa Tolan Abrahimti neeniyɛ, bɛya mati te jyenna ɛkkɛn jyetki Yaccu Kiṭɔtiy. ²³ Te ñamu ne Kiṭɔ bɛɛni men bɛɛyɛ, jyek ganuun bala ṭeyi ikin ma Icrayiil waakida te nɔji ikin aŋka ikin poŋtin jyek nɔji ikin. Ɔci jyek ganuun neeni bala ikinti oŋkanda ɔɔn, ɔci ŋeecin ikin mena ikin pɔktinyɛ, bɛya ne baaṭi, ɔci ikin balgin kɛɛyin ɛkɛ. ²⁴ Ikin ma Icrayiilyɛ, ikin balkin ba kɛɛgin. Ɔci ganuunyɛ, ɛkɛ bala ba ṭuoñ ikinti, ɔci ɛkɛ bala gɔṭi ikin oŋkanda ne Kiṭɔ bɛɛni ɔɔn. Ɔci ikin pwannin Juaŋ ñamɛti te jyenna ikin jyettin ɛkɛti neeni. ²⁵ Ɔci acca acaan jyek jyeni bala dokiyɛ, ganuun neeni a ṭwoñ ikin moki bɛɛ. ²⁶ Oŋŋa ɛkkɛ jyettɛ Yaccu Kiṭɔtiyɛ, ɛkkɛ aŋŋɛ kɛɛgin Jwaŋa Tolan waakida. ²⁷ Acaan ɛkkɛ waakida buulkɛ ma te yenti Kiṭɔyɛ, Kiṭɔ bala ɛkkɛti doki. Ɔci acca ɛkkɛ waakɔ ‘yɛɛŋŋɛ te tɛɛtin Kiṭɔ waanɛ. ²⁸ Ikin ne aŋŋin Ma Kiṭɔyɛ, ikin moki gɔkin agi menga a ma Icrayiil walla menga a ma Keedin Pookɛn, walla menga a mena kɛɛngɔn walla menga a mena ḍwaŋɛ wɔɔgan te kɛñji, walla menga a mena ɛɛŋ walla menga a mena ‘uan bɛɛ, ikin waakida balkin ba bolja ne cyɛɛlɔ Yaccu Kiṭɔti. ²⁹ Ɔci kan ɛkkɛ a Ma Kiṭɔyɛ, ɛkkɛ agɛ kɛɛgin Abrahim woodgɛn, ɔci jyeka guaŋŋɛ Juaŋ Abrahimtiyɛ, bɛya ɛkkɛti daŋkun.

¹ Ɔci acca ‘ya gɔk daŋkun te mena guagdɛ weegɛn agi dala maal wiɛnda ɛktayɛ, ne ɛkɛ wona ḍiɛri menyɛ, ɛkɛ bala ba bolji mena kɛɛngɔn. Acaan mena kɛɛngɔn ɛkɛ noŋi ba yom ɛkɛ parɛ bɛɛ ne waak waakɛnda bala ɛkɛ bieŋɛti ɔɔn. ² Mena guagdɛ weegɛn neeniyɛ, ne baaṭi ɛkɛ aga mena mwoki mal weegɛn. Yeti ne ɛkɛ wona ḍiɛri menyɛ, ma bala gɔṭi ɛkɛ ne pwadan ɔci ma bala gɔṭi mal ɛkɛ daŋkun ne pwadan ne oŋŋa guaŋŋɛ weegɛn te baaṭi neeni bɛɛni ɔɔn. ³ Ɔci ba jyeka neeniyɛ, bala ba jyek ikin daŋkun. Te ñamu ne ikin jyek Juaŋ jitkɛn ŋeecin ne pwadan men bɛɛyɛ, ikin balkin ba maka kɛɛnk men. Ikin balkin loṭin te jyeka jyetki yɔrg ikin te baaṭiy. ⁴ Ɔci ne oŋŋa guaŋŋɛ Juaŋ wanna waanɛ jiñɛ bɛɛniyɛ, ɔci Juaŋ Kaci ɛkɛ cuonnɛ iñɔ. Ɔci ɛkɛ jiennɛ mena ɛɛŋo, ɔci ɛkɛ aŋi men baano. Ne ɛkɛ bɛɛniyɛ, ɛkɛ daŋkun cien te jyek ganuun ma Icrayiil. ⁵ Kaci Juaŋ bɛɛn aŋka maka ciyi te jyek ganuun neeniyɛ, wandɛ ɛkɛ, ɔci aŋka ikin pirtin Juaŋ aktin kɛɛgin ɛkɛ. ⁶ Ɔci acaan ikin akin kɛɛgin Juaŋ awarɛyɛ, ikin ‘wonnin Juaŋ Boŋ Kaci ɛkɛ ikin yomgɔti. Ɔci Boŋa bala ikin yomgɔti neeniyɛ, gɔki Juaŋti agi, “Wey ɔɔn, Wey ɔɔn!” ⁷ Ɔci acca i baal ba kɛɛngɔn moki bɛɛ. I aŋŋi kacca tolan doki, ɔci acaan i a kaci Juaŋ a ɔɔnyɛ, i baal ba mena guaŋŋɛ Weegɛn agi dala maal wiɛnda ɛktay. ⁸ Te ñamu ne Jwaŋa Tolan ŋeejɛ ɛkkɛ men bɛɛyɛ, ɛkkɛ agɛ kɛɛnk waka bartan ma agi jɔkin. Ɔci ɛkkɛn a waka budan. Ɛkkɛn a jɔkin woodgɛn bɛɛ. ⁹ Yeti acca Juaŋ ŋeennɛ ɛkkɛ doki. Ɔci ɛkkɛ ŋeejɛ ɛkɛ daŋkun. Oŋ te gena yeti ɛkkɛ jyennɛ ɔntɔ aŋka ɛkkɛ dɔɔkkɛ jyeka yeyinti neeni moki? Ɛkkɛ buagɛ agdɛ kɛɛnk moki? ¹⁰ Ɛkkɛ dɔɔkkɛ ŋoyɔ cooŋɛ ñingɔ te waka bala naŋdɛ ɛkkɛ te baaṭiy, gena jyek oŋko, ɔci jyek ponko, ɔci jyek yuongo. ¹¹ Ɔci ‘ya buay kanŋa ‘ya aga kanŋa budan dita. ¹² Modg ɔɔn, ‘ya buaga dala ɛkkɛ baldɛ ba ‘ya ɔɔn. Acaan ganuun yaakinti gɔkti genga ‘yati bɛɛ. ‘Ya aŋi ba men ma ɛkkɛ doki. Ɛkkɛ dommɛ naŋki gɛɛl ‘yati bɛɛ. ¹³ Oŋŋa ‘ya bɛɛna loṭa ɛkkɛ te ñamuyɛ, ŋeejɛ ɛkkɛ ‘ya waru yaayɛ. ¹⁴ Waja ‘ya neeni a pɔɔt ɛkkɛti, yeti ɛkkɛ yookɛ te ‘ya bɛɛ. Ɔci ɛkkɛ ‘ya liɛllatiyɔ bɛɛ. Yeti ɛkkɛ balgɛ noŋɛ ne pwadan ‘yati ba ne ɛkkɛ noŋdɛ malɛɛka gɛɛlti walla Kiṭɔtiy. ¹⁵ Ɛkkɛ yomgɔ ñɔɔna ñɔɔn te ñamu! Oŋ a gena bɛɛn ɔŋ? Te wɔɔka wannati kan te ‘ya gɔkkan ɛkkɛtiyɛ, te ɛkkɛ woŋgɔ dɔɔnnɛ bora ɔci ‘wonnata ‘ya te yoma ñɔyan. ¹⁶ Ɔci acca ba yom ñɔɔn ɛkkɛ bala aŋɛ? Ɛkkɛ yookɛ te ‘ya ne ‘ya mieta ɛkkɛ te jyeka ɛkkɛ myennin ‘ya a jyeka awarɛ nɛ? ¹⁷ Maka pookɛn maka bɛɛn ɛkkɛti neeniyɛ, ɛkkɛn bala gɔki ne pwadan ɛkkɛti, yeti ɛkkɛn balkɔn yoma awarɛ bɛɛ. Ɛkkɛn buagɔn ɛkkɛ kɛptɛji i ‘ya acaan ɛkkɛn buagɔn dala ɛkkɛ yomgɔ myɛldi ba ɛkkɛn ɔɔn. ¹⁸ Gɔṭṭɛ, kan ma yomgɛn myɛlɔ te naŋka pwadanyɛ, yaayɛ bɛɛ, pwatcin. Yeti naa naŋka neeni bala te oŋka ‘ya balgin iki ɛkkɛ budan bɛɛ, dala naŋka neeni bala ne ‘ya baawa ɛkkɛti daŋkun ɔɔn. ¹⁹ Kɛɛgin ‘ya kɛɛgin onga ‘yay, kan ɛɛŋ amɛ jiediyɛ, kaci pɛñ pɛñ ɛkɛti, ɔci ba jiedi kaciyɛ, bala ba ‘ya daŋkun, ‘ya yomu yaayɛ ne tolan acaan ‘ya buaga dala Yaccu bala ɛkkɛti ne pwadan. ²⁰ Hay, a ɔɔnyɛ, bala ba dala te ikin balkin iki ‘ya a cyɛɛlɔ aŋan aŋka ‘ya gɔkka ɛkkɛti te tuk ‘ya, acaan ‘ya baal poŋ te ɛkkɛ a jiñu bɛɛ. ‘Ya gɔk ka ɛkkɛ balgɛ ɔntɔ kaapun. ²¹ Hay ɛkkɛ maka buagɔn ciyi te jyek ganuun nɛ, jyek ganuun jitkɛn ŋeejɛ ɛkkɛ ne pwadan boki? ²² Jyeka kiigin gɔki agi kɛɛgin Abrahim kɛɛgin a ‘uay bala ne yyɛɛwɔ. Kacca ne cyɛɛlɔ gɛɛl jiennɛ mena kɛɛngɔn, ɔci ɛka parɛ jiennɛ ɛŋ ɛkɛ waanɛ. ²³ Kaci mena kɛɛngɔn neeniyɛ, ɛkɛ jiedɛ ma ba naŋki ma baan oŋkanda. Yeti kaci ɛŋ Abrahim waanɛyɛ, ɛkɛ jiedɛ ma ba jyeka naŋɛ Juaŋ iki Abrahim te ñamuy. ²⁴ Ba jyek moonga ne yyɛɛwɔ neeniyɛ, ɔci bala ba jyeka naŋɛ Juaŋ iki ma Icrayiil te baaṭiy. Haajaryɛ, ɛkɛ a kɛɛngɔn, ɔci kɛɛgin ɛkɛ a kɛɛnk ba ɛkɛ daŋkun. ²⁵ Ɔci ba jyek Haajar neeniyɛ, bala ba jyek ganuun jyeka ma ‘wonnɛ Jwaŋa Tolan poomti, poma yenti Pom Cina ban Arayaji. Ɔci maka ciyi te jyek ganuunyɛ, ɛkkɛn a kɛɛnko. Ɔci maka ciyi ban Urcaliim accayɛ, ɛkkɛn a kɛɛnk ba Haajar ɔɔn, acaan ɛkkɛn bala ciyi te jyek ganuun men. ²⁶ Yeti jyek Caarayɛ, da pookɛn. Ɛkɛ a ɛŋ Abrahim waanɛ. Ɛkɛ a kɛɛngɔn bɛɛ. Ɔci ba jyek ɛkɛyɛ, bala ba jyek maka jyeti Juaŋti, maka a ma Urcaliim ñaalɔ pɔliji neeni. Ɛkɛ a mɛy ikin. Ɛkɛ a kɛɛngɔn bɛɛ. Ɔci ikin balkin ba ɛkɛ daŋkun. Ikin akin kɛɛnk bɛɛ. ²⁷ Acaan worga gɔki agi, “Dala i yomu ñɔya, hay, i ɛŋa kɛɛggɛ baawy! Dala i yaajja dɛɛrja te pwana tolan te yom ñɔɔno. I a mena dɛnni pɛñi jiedi kaci oŋgati bɛɛy! Acaan ɛŋa ‘uarɛ ati ɔntɔ te ɛkɛti neeniyɛ, ɛkɛ baltan kɛɛgin ne coŋɔn, ɔci ɛkɛ ɛŋa niin iki ‘uarɛ oŋkanda neeni bwandɛ ɛkɛ te kɛɛgin.” ²⁸ Modg ɔɔn, ikin aŋŋin kɛɛgin Jwaŋa Tolan ba jyeka naŋɛ Juaŋ yaakkɛn iki Abrahim te baaṭiy. Ɔci te naŋka neeniyɛ, ikin balkin ba Icaak. ²⁹ Ɔci te oŋŋa wannayɛ, mena jiedɛ ma ba naŋki ma baan budanyɛ, ɛkɛ bala noŋi ne yaayan kacca neeniti, gena kacca jiedɛ ma te Boŋ Juaŋy. Ɔci acca moki taab ikin bala a ɔɔn daŋkun. ³⁰ Jyek worga gɔki a ɔki te naŋka neeni? Worga gɔki agi, “Ɛŋa a kɛɛngɔn neeniyɛ, dala ɛkɛ oldɛ ɛkkɛ ɔntɔ iki kaci ɛkɛ a cyɛɛlɔ aŋka kaci ɛkɛ neeniyɛ, naa jyek ɛkɛ ñoodi i jyek kacca guaŋŋɛ weegɛn agi dala maal wiɛnda ɛkta neeni bɛɛ.” ³¹ Ɔci a ɔŋŋiyɛ, ikin akin kɛɛgin mena kɛɛngɔn bɛɛ. Ikin akin kɛɛgin mena ciyi budan te kɛnjo.

¹ Ikin pɔŋnin Kiṭɔ te jyek kɛnjo. A ɔŋŋiyɛ, dala ɛkkɛ yɔɔddɛ ne tɛyan. Ɔci naa ɛkkɛ dɔɔdɛ kɛnjiti moki bɛɛ. ² Tieŋdɛ jyek ‘ya neeni. Gena ‘ya Buuluc gɔk ɛkkɛti neeni. Naa ɛkkɛ ŋwottɛ ma bɛɛ. Kan ɛkkɛ ŋwottɛ mayɛ, a ɔɔn bala ba jyek Kiṭɔ aŋi jyeka budan ɛkkɛti doki. ³ Ɛkkɛ maka buagɔn jyek ŋwotiyɛ, ‘ya gɔkka ɛkkɛti moki, kan ɛkkɛ buagɛ jyek ŋwotiyɛ, dala ɛkkɛ jyek ganuun tiidɛyɔ waakɛnda. ⁴ Kan ɛkkɛ buagɛ pwaddɛ Jwaŋa Tolan ñamɛti te tiid jyek ganuun waakɛnyɛ, a ɔɔn bala ba jyek Kiṭɔ baaw ɛkkɛti, ɔci a ɔɔn moki bala ba ɛkkɛ yookɛ te naŋka naŋdɛ Juaŋ mati te yom ɛkɛ yoma pwadan neeni. ⁵ Te Boŋ Jwaŋa Tolan ikin yomgɔtiyɛ, ŋeecin ikin oŋŋa ikin yɔɔttin Juaŋ ñamɛtiyɛ, jiek bala moki bɛɛ. Ikin pwannin ɛkɛ ñamɛti doki. ⁶ Maka bala Yaccu Kiṭɔti, kan jyek ŋwoti bala ɛkkɛnti ɔci kan walla baaw ɛkkɛntiyɛ, jyeka neeni bala bolja ne cyɛɛlɔ. Kan jyek jyeni ɔci jyek ani aŋka bala ma yomgɛntiyɛ, a ɔɔn yɔmjin. ⁷ Te ñamu ɛkkɛ balgɛ yɔɔdɛ ne pwadan. Oŋ ɛkkɛ jyɛnnɛ menɛ ɔntɔ yeti te jyeka awarɛ neeniti? ⁸ Jyeka pookɛn neeni bɛɛn te mena ɛkkɛ muonɛ bora neeniti bɛɛ. ⁹ Jyeka pookɛn neeni bala ba jyek ñamgo. Ma gɔki agi, “Kan ñamg bala ḍuobjiti ne ḍiɛkanyɛ, ɛkkɛn ooddi ḍuobji warɛti warda.” ¹⁰ Çeej ‘ya yomuti ɛkkɛ magdɛ Ciɛggɔn, ɔci ɛkkɛ moki dɔɔktɛ jyek ‘yati. Ɔci mena eccin jyeka pookɛn ɛkkɛti neeniyɛ, ɛkɛ ŋeej ‘ya bɛɛ, yeti ne baaṭi ywobji Juaŋ bɛya ɛkɛ wyeñɛti. ¹¹ Modg ɔɔn, te ‘ya baala loṭa ɛkkɛ te jyek ŋwoti menyɛ, te ma Icrayiil bala etti jyek taab neeni ‘yati boki? A’a. Kan ‘ya te loṭa ma agi dala ma ŋwottan mayɛ, te ma Icrayiil te yookɔn te jyek lyen Yaccu bɛɛ. ¹² ’Ya poŋ ka dala te maka poṭi ɛkkɛ waakɔ te jyek ŋwoti wanna dala ɛkkɛn ‘uotti ñamu te naŋka wanna ɔci ‘wolgɛn yuutan aga luoko. Ɔci te naŋki ɛkkɛn neeniyɛ, ɛkkɛn waakɛn uuttan ɔntɔ te kaniicaji. ¹³ Modg ɔɔn, ɛkkɛ muonɛ Jwaŋa Tolan bora, ɔci ɛkkɛ pɔŋnɛ ɛkɛ doki. Ɛkkɛ pɔŋnɛ Juaŋ acaan ɛkkɛ noŋɛ te yomg ɛkkɛ pookɔ bɛɛ. Ɛkkɛ pɔŋnɛ Juaŋ aŋka dala ɛkkɛ oondi yɔtin pookɔ. ¹⁴ Jyek ganuun jitkɛn waakɛndayɛ, jitk ɛkkɛn bala te jwalla ne cyɛɛlɔ kiiwɛ ma agi, “Dala ɛkkɛ anɛ maka ciyɛ iki ɛkkɛ a cyɛɛlɔ ba anna ɛkkɛ anɛ waak ɛkkɛ pookɔ neeni ɔɔn.” ¹⁵ Yeti kan ɛkkɛ yoyyɛ ñin, ɔci yaccɛ waakɔ pookɔ bala ba leyya ywobkyɛ, dala ɛkkɛ woŋgɔ tiittɛ te jyeka bɛya bora te coodi ɛkkɛy. Acaan coodda pwadan baadi te yoyyin ñino. ¹⁶ Dala ɛkkɛ aŋka ciedɛ te Boŋ Jwaŋa Tolan oŋkanda, ɔci a ɔŋŋiyɛ, ɛkkɛ noŋdɛ ba yoma te baaṭi moki bɛɛ. ¹⁷ Yoma te baaṭi neeniyɛ, yookɔn te Boŋ Juaŋo, ɔci moki Boŋ Juaŋ yookɔn te jyek yoma te baaṭi. Ɛkkɛn noowi yaakkɛn a ɔɔn. Ɔci a ɔŋŋiyɛ, ɛkkɛ yaakɛti noŋdɛ ba naŋka ɛkkɛ buagɛ bɛɛ. ¹⁸ Kan ɛkkɛ wɛɛdɛ Boŋ Juaŋ oŋkandayɛ, jyek ganuun bala ɛkkɛti moki bɛɛ. ¹⁹ Naŋki yoma te baaṭiyɛ, gena tommo, ɔci naŋka amaamo, ɔci wɛljo, ²⁰ ɔci mali jɔkin yeyin waka pɔɔtan ma a pɔɔto, ɔci ṭyejjo, ɔci pɔñko, ɔci yom yoño, ɔci jyek wɛɛdin, ɔci yom monno, ɔci loñko, ɔci anna anki ma waak ɛkkɛn pookɛny. Ɔci jyek kɛɛptin ɔci jyek tyewwin daŋkun, ²¹ ɔci nooŋi mooyo, ɔci naŋki bajjo, ɔci naŋka pookɛn waakɛnda ba naŋka neeni ɔɔnyɛ, ɛkkɛn bɛya te yoma te baaṭiti. Ɔci ‘ya ṭey ɛkkɛ moki bala ba ṭeena ɛkkɛ ṭeenin ‘ya te ñamu ɔɔny, maka noŋi naŋka neeniyɛ, ɛkkɛn balki noon ban cyɛgji Jwaŋa Tolanti bɛɛ. ²² Te naŋki Boŋ Jwaŋa Tolan ma yomgɛntiyɛ, Juaŋ etti naŋka pwadin. Ɔci te Boŋ Juaŋ neeniyɛ, ma ani Juaŋo, ɔci ma ooni yɔtin pookɛn. Ɔci naŋka pookɛnyɛ, gena yom ñɔɔno, ɔci coodi pwanno. Ɔci te naŋki Boŋ Jwaŋa Tolan neeniyɛ, ma loomgɛn tɛy tɛyo. Ɛkkɛn yomgɛn pwadɔ mati. Ɔci ɛkkɛn yomgɛn bɔw bɔwo, ɔci ɛkkɛn jiekɛn a yyɛɛwɔ bɛɛ, ²³ ɔci ɛkkɛn a ywobk bɛɛ, ɔci ɛkkɛn yaakinti paŋi jiek ñamu, ɔci ɛkkɛn noŋi amaam budan bɛɛ. Jyek ganuun yaakinti gɔkti genga te naŋka pwadan neeni bɛɛ. ²⁴ Yoma buagɔn naŋka yaayan ne pɛñan neeniyɛ, ma Yaccu Kiṭɔ mwonnin te ɛkɛ doki. Bala ba yoma te baaṭi neeni olji ɛkkɛn kakanti ɔci tuun doki bawwin. ²⁵ Kan tɛɛtin Juaŋ bala ikinti te Boŋ ɛkɛyɛ, dala ikin noŋtin ba jyeka guagdɛ Boŋ ɛkɛ ikinti oŋkanda neeni. ²⁶ Naa ikin jieyin waakɔ pookɔ te naŋka naŋtin ikin bɛɛ. Naa ikin noŋtin naŋki aŋka maka pookɛn loondi ikinti bɛɛ. Ɔci naa ikin korkɔ modɔ yɔtin bɛɛ.

¹ Modg ɔɔn, kan men gɛɛl yuardɛ ɛkkɛ, kan ɛkɛ bala noŋi ne yaayan, dala ɛkkɛ maka yɔɔd ne tɛyan neeniyɛ, dala ɛkkɛ ɛkɛ magdɛ te jyek Jwaŋa Tolan te yoma pwadan aŋka ɛkɛ jiek ywaŋdɛ. Ɔci ne ɛkkɛ ɛkɛ magdɛyɛ, dala ɛkkɛ woŋgɔ tiittɛ te yomg ɛkkɛ daŋkun aŋka naa ɛkkɛ ḍɛɛmdɛ iñɔ ba ɛkɛ ɔɔn bɛɛ. ² Dala ɛkkɛ moowɛ yɔtin pookɔ te jyeka tɛyan, ɔci a ɔɔnyɛ, ɛkkɛ yaakɛti tiecɛ Jyek Kiṭɔ waakɛn. ³ Kan men gɛɛl poŋi gɔki agi ɛkɛ toljiyɛ, ɛkɛ dyeti war ɛkɛ parɛ. ⁴ Dala ɛkkɛ waakida gɔrti naŋki ɛkkɛ ne naŋki ɛkkɛ pwatki boki no. Ɔci ne men gɛɛl gɔrti naŋki ɛkɛ pwadiyɛ, ɛkɛ yomɛ ñɔɔna ñɔɔn te naŋki ɛkɛ neeni. Ɔci ɛkɛ poŋi te kanŋa mena parɛ bɛɛ. ⁵ Menga da kɛṭi naŋki ɛkɛ te ḍwaŋ ɛkɛ, ɔci menga da kɛṭi naŋki ɛkɛ te ḍwaŋ ɛkɛ. ⁶ Mena laltan ma te jyek Juaŋyɛ, dala ɛkɛ mena loṭi ɛkɛ kɛndɛ waka pwadin waka bala ɛkɛti waakɛnda. ⁷ Naa ɛkkɛ waakɔ dieddɛ ñin pookɔ bɛɛ. Naa ɛkkɛ poŋɛ gɔkɛ agi men gɛɛl yaakinti Juaŋ naŋdɛ ñin bɛɛ. Acaan kan menga dwoki waak gɛɛgyɛ, waka wanna ‘yɛrdɛ ɛkɛ parɛ daŋkun. ⁸ Acaan jyek ikin waakɛnda ŋeejɛ Juaŋo, ɔci ba naŋka naŋtin ikin acca neeniyɛ, naŋka neeni etti naŋka pookɛn ne baaṭi. Kan men gɛɛl bala noŋi ne yaayan ba yom ɛkɛ yoma te baaṭi neeniyɛ, ne baaṭi naŋka neeni etti lieno. Ɔci kan men gɛɛl noŋi ne pwadan te war tɛɛn Boŋ Jwaŋa Tolan ɛkɛ yomɛtiyɛ, ne baaṭi naŋka neeni etti tɛɛtin, ɔci tɛɛtin neeni bɛya te Boŋ Jwaŋa Tolanti. Ɔci tɛɛtin neeni baadi ywongati bɛɛ. ⁹ Acaan a ɔɔnyɛ, naa ikin taaptin te naŋka pwadin neeni bɛɛ. Acaan ne oŋŋa guaŋŋɛ Juaŋ neeni bɛɛdiyɛ, kan yomg ikin ḍɛɛmdin iñɔ bɛɛyɛ, jyeka neeni ikin ‘wontin waka pwadin te kanŋa ikin. ¹⁰ A ɔŋŋiyɛ, ne pɔya ikin noŋtin ne pwadan mati baaliyɛ, dala ikin noŋtin ne pwadan mati waakɛnda. Ɔci maka jyeti Juaŋti dokiyɛ, dala ɛkkɛn maktin ikin ne pwadan nɔñji. ¹¹ Gɔṭṭɛ, ne ‘ya kieda worga ɛkkɛtiyɛ, ‘ya kiewa ɛkkɛti te kiikan ḍwaŋin. ¹² Maka ‘yeṭi ɛkkɛ te jyek ŋwoti neeniyɛ, ɛkkɛn buagɔn dala ɛkkɛn pwaddi ma ñomgɛnti aŋka naa taab bɛya ɛkkɛnti te jyek lyen Ciɛggɔn ikin Yaccu Kiṭɔ, lyena tuuni ɛkɛ kakanti neeni bɛɛ. ¹³ ’Uaya ŋuodɛ ma neeniyɛ, ɛkkɛn tieci jyek ganuun jitkɛn ne pwadan boki? Hayɛllɛ! Ɛkkɛn gɔki ɛkkɛti te jyek ŋwoti acaan ɛkkɛn buagɔn dala ɛkkɛ agdɛ ba maka ne cyɛɛlɔ iki ɛkkɛn aŋka ɛkkɛn jiɛtan ma te naŋka neeni. ¹⁴ ’Ya buaga jiɛt waru te naŋki gɛɛl bɛɛ, gena lyena tuuni Ciɛggɔn ikin Yaccu Kiṭɔ kakanti neeni aŋka ‘ya jieya ɛkɛ neeni. Te lyen ɛkɛ neeniyɛ, ‘ya tuun daŋkun. Ɔci a ɔŋŋiyɛ, jyeka bala iñɔ wɛnni ṭɛɛrjiyɛ, aŋi ba jyeka budan ‘yati doki. Ɔci jyeka bala iñɔ wɛnni baan konɛtiyɛ, ɛkkɛn yaakinti gɔkti genga ‘yati moki bɛɛ. Acaan ‘ya aŋi ba gena tuuta ɛkkɛnti doki. ¹⁵ Kan jyek ŋwoti balayɛ, jyek ŋwoti neeni a genga bɛɛ. Ɔci kan jyek ŋwoti moki baawiyɛ, ɛkkɛn noŋdi genga bɛɛ. Gena jyek aŋŋa ikin aktin maka wonkɛn te jyek Juaŋyɛ, aŋka tolcin. ¹⁶ Maka ciyi te jyeka neeniyɛ, dala ɛkkɛn ciya te coodda pwadan, ɔci dala Juaŋ yomɛ pɔktɛ ɛkkɛnti. Gena ma Icrayiil woodgɛn ɛkkɛn guagdi ‘ya neeni. ¹⁷ Acca menga yaakinti etti taab ‘yati te genga moki bɛɛ. Bilgin bala ‘ya waruti te naŋka naŋɛ ma yaayan ‘yati te jyek Yaccu. Ɔci te bilgin neeniyɛ, ŋeecin ma ‘ya a men Kiṭɔ. ¹⁸ Modg ɔɔn, dala ɛkkɛ magdɛ Yaccu Kiṭɔ Ciɛggɔn ikin yomgɔti waakida. Amɛɛn.