Ɛpacac

¹ Gena ‘ya Buuluc mena bornɛ Jwaŋa Tolan te yom ɛkɛ ɔci naŋŋɛ a cuuda Ciɛggɔn Yaccuy. ‘Ya kiew worga Ma Kiṭɔti maka ciyi ban Ɛpacacy. Gena maka jyek Yaccu tiiyɛyɔ ne pwadany. ² Dala Wey ikin Jwaŋa Tolan ɔci Ciɛggɔn ikin Yaccu Kiṭɔ, ɛkkɛn yomgɛn pwada a pwani ɛkkɛti, ɔci ɛkkɛ ‘wontɛ coodi pwanno. ³ Dala ikin jieyin Jwaŋa Tolan Wey Ciɛggɔn ikin Yaccu Kiṭɔ acaan Kiṭɔ cuonnɛ ɛkɛ ikinti aŋka ɛkɛ noŋdi naŋka pwadin ikin yomgɔti, ɔci naŋka pwadin ñaalɔ ban Jwaŋa Tolanyɛ, oonɛ ɛkɛ ikinti waakɛnda. ⁴ Te baaṭi ne noon warda aŋŋɛ Jwaŋa Tolan men bɛɛyɛ, Juaŋ ikin muonin bora doki. Ɛkɛ ikin muonin bora a ɔɔn te ‘woñgin ɛkɛ ikin ‘wonninti Yaccu Kiṭɔ te baaṭi doki agi ikin akcin maka ciyi budan te naŋka yaayan, ɔci agi ikin pwatcin ɛkɛ ñamɛtiy. ⁵ Acaan ɛkɛ ani ikinyɛ, jiek naŋŋɛ ɛkɛ ñamu doki agi dala ikin akcin kɛɛgin ɛkɛ woodgɛn te naŋki Yaccu Kiṭɔ. Ɛkɛ jiek naŋŋɛ a ɔɔn te yom ɛkɛ parɛ, acaan ɛkɛ yomɛ bala ikinti. Jiek paŋŋɛ ɛkɛ te ñamu agi ikin akcin kɛɛgin ɛkɛ, ɔci acca ɛkɛ noŋjin a ɔɔn doki. ⁶ Ɔci acaan a ɔŋŋiyɛ, ikin cuonnin ɛkɛ Kaci ɛkɛ Kacca ani ɛkɛy. Dala ikin jieyin Jwaŋa Tolan acaan ɛkɛ yomɛ pwanna a pwani ikinti te Yaccu Kiṭɔ. ⁷ Ikin wannin ɛkɛ te yimg Yaccu Kiṭɔ, ɔci a ɔŋŋiyɛ, ikin bɔɔŋnin ɛkɛ acca doki te nɔji ikin. Yom pwani Juaŋ neeni tol tolo hay! ⁸ Jwaŋa Tolan yomɛ pwanna a pwani ikinti awarɛ te naŋki ɛkɛ neeni. ⁹ Ɔci acca ikin nɔɔnnin Juaŋ te ñing tɛɛn waakɛnda te jyeka naŋŋɛ ɛkɛ te Kiṭɔ te yom ɛkɛ te naŋka bɛya ne ŋoyɔ jyeka jitkɛn kuoliwi ma te baaṭiy. Yeti ɛkɛ jiek oonɛ bora ikinti acca doki. ¹⁰ Jyeka naŋŋɛ Juaŋ yomɛti neeni gɔki agi ne oŋ gɛɛlti ba oŋŋa guagdɛ ɛkɛyɛ, ɛkɛ jiek ywaŋdɛ waakɛnda. Gena jyek waka bala iñɔ ṭɛɛrji, ɔci jyek waka bala ñaalɔ pɔliji. Ɔci ne ɛkɛ waak ywaŋdɛyɔ a ɔɔnyɛ, ɔci Kiṭɔ aga Ciɛggɔn waak waakɛnda. ¹¹ Ɔci moki kan Juaŋ gɔki agi ɛkɛ noŋji gengayɛ, ɛkɛ jyeka neeni daldɛ budan bɛɛ. Ɛkɛ noŋdi ba jyeka guagdi ɛkɛy. Gɔṭṭɛ, ɛkɛ ikin kɛnnin bora ba jyeka naŋŋɛ ɛkɛ te baaṭi aŋka ikin aktin ma ɛkɛ woodgɛn te ñoowin ikin, ñoonin iki Kiṭɔ ba naŋka ɛkɛ buagɛ naŋka ḍaaŋŋɛ ɛkɛ te ñamu dokiy. ¹² Ikin maka jyeti Kiṭɔti ñamu neeniyɛ, dala ikin jieyin Juaŋ te pwani ɛkɛ. ¹³ Ɛkkɛ maka ciyi ban Ɛpacacyɛ, ɛkkɛ tieŋnɛ jyeka awarɛ neeni daŋkun. Jyeka wonkɛn jyeka pwadin neeniyɛ, gɔki agi Yaccu yaakinti yuoci ɛkkɛ. Ɛkkɛ jyettɛ Kiṭɔti, ɔci ɛkkɛ ‘wonnɛ Jwaŋa Tolan Boŋ ɛkɛ Boŋa guaŋŋɛ ɛkɛ agi ‘woñji may. Ɔci te Boŋ ɛkɛ neeniyɛ, ɛkkɛ lɛɛlnɛ Juaŋ bora a ɛkkɛ aŋŋɛ ma Jwaŋa Tolan doki. ¹⁴ Te Boŋ Jwaŋa Tolan ikinti neeniyɛ, ŋeecin ikin ne oŋ gɛɛlti ikin ‘wontin Juaŋ waka pwadin ba jyeka guaŋŋɛ Juaŋ ikinti neeni, ɔci te Boŋ Jwaŋa Tolanyɛ, ŋeettin ikin a Juaŋ ikin wannin ɔci naŋŋin a ma ɛkɛ. Ɔci a ɔŋŋiyɛ, dala ikin jiettin ɛkɛ te pwani ɛkɛ neeni. ¹⁵ ’Ya tieŋŋan jyek ɛkkɛ doki agi ɛkkɛ jyetcɛ Yaccu Kiṭɔti, ɔci ɛkkɛ anjɛ Ma Kiṭɔ waakcinda. ¹⁶ Ɔci a ɔŋŋiyɛ, ‘ya gɔk a pwatcin Juaŋti oŋkanda te ɛkkɛ. ‘Ya cɔk Juaŋti te ɛkkɛ oŋkanda. ¹⁷ ’Ya cɔk Jwaŋ Ciɛggɔn ikin Yaccu Kiṭɔti. Ɛkɛ a Wey ikin weya pwadan. Dala ɛkkɛ ‘wondɛ ɛkɛ Boŋ ɛkɛ Boŋa ɛkkɛ ‘wondɛ ñing tɛɛn ɔci ɛkkɛ laldɛ te Juaŋ aŋka ɛkkɛ Juaŋ ŋeeddɛ ne pwadan. ¹⁸ Ɛkkɛ muonɛ Juaŋ bora, ɔci ɛkkɛ jyettɛ balgɛ kɛɛyɛ naŋki ɛkɛ naŋka bɛya ne baaṭiy. Ɔci ‘ya baal cɔk Juaŋti aŋka ɛkkɛ ‘wondɛ ɛkɛ ñing tɛɛno, aŋka jyeka neeni ŋeeddɛ ɛkkɛ ne pwadan yomgɔti. Ɔci ‘ya cɔk Juaŋti moki aŋka jyeka naŋŋɛ Juaŋ neeni ŋeeddɛ ɛkkɛ ne pwadan ne Juaŋ gɔki agi ɛkɛ Ma Kiṭɔ ‘woñji waak ba naŋki ma baan ne kɛɛgin ɛkkɛn ‘wontiti ɛkkɛn moldiny. Jwaŋa Tolanyɛ, ɛkɛ Ma Kiṭɔ ‘wondɛ waak ne pwadan. ¹⁹ ’Ya cɔk Juaŋti te ɛkkɛ aŋka dala ŋeeddɛ ɛkkɛ war tɛɛn Jwaŋa Tolan war tɛɛn ‘wonninti ikin neeniyɛ, ɛkɛ tol tolo. Ikin maka jyeti ɛkɛti neeniyɛ, ikin ‘wonnin ɛkɛ war tɛɛn ɛkɛ. ²⁰ War tɛɛn neeniyɛ, gena war tɛɛn Juaŋ Kiṭɔ luolnɛ ñaalɔ te koolji tɛɛti mokiy. Ɔci te oŋŋa wanna Kiṭɔ coonnɛ Juaŋ taaŋɛti taaŋŋa byerɔn ñaalɔ pɔliji. ²¹ Ɔci waak waakɛnda waka bala acca ɔci waka bɛya ne baaṭiyɛ, ɛkkɛn bala Kiṭɔ bieŋɛti. Gena malɛɛkan, ɔci jɔkin ṭɔlgɛn, ɔci cyekin bala iñɔ ṭɛɛrji waakɛndayɛ, bala ɛkɛ bieŋɛti. ²² Te naŋki Juaŋyɛ, waak waakɛnda bala byeŋ Kiṭɔti. Jiek waakɛnda a jyek Kiṭɔ. Ɔci Kiṭɔ naŋŋɛ Juaŋ aŋi Ciɛggɔn ma kaniica waakɛnda. ²³ Ɛkɛ a wyeñ ma kaniica, ɔci ma kaniica a war ɛkɛ. Ɔci a ɔŋŋiyɛ, genga bɔɔnjin Kiṭɔti moki bɛɛ. Ɔci waka aŋŋɛ Juaŋ ɔci noon wardayɛ, kuumi te ɛkɛ.

¹ Te ñamu ɛkkɛ balgɛ ba maka tuutan acaan ɛkkɛ balgɛ noŋɛ ne yaayan, ɔci moki acaan ɛkkɛ balgɛ noŋɛ nɔjjo. Yeti acca ɛkkɛ tɛɛtɛ te naŋka naŋŋɛ Kiṭɔ ɛkkɛti neeni. ² Te ñamu ɛkkɛ balgɛ noŋɛ ba naŋka iñɔ baanji wɛnni budan. Ɔci naŋka neeni gena naŋki ḍuaŋa boŋka yeyin. Gena ɛkɛ bala noŋi naŋka neeni maka bɛɛyi jyek Juaŋ yomgɛnti neeniy. ³ Te ñamu ikin waakida balkin noŋin ba maka yeyin neeni. Ikin balkin noŋin ba yomg ikin. Ɔci ikin balkin noŋin ba naŋka waak ikin buagɔn, ɔci ba paŋi ikin paŋŋa yaayan neeni. Ɔci acaan a ɔŋŋiyɛ, kan ywobji Jwaŋa Tolan bɛya ikintiyɛ, ɔci kan ywobji ɛkɛ bɛya mati waakɛndayɛ, a ɔɔn yaayɛ bɛɛ. Yɔmjin a ɔɔn. ⁴ Yeti Jwaŋa Tolan noŋi a ɔɔn bɛɛ. Ɛkɛ yomɛ pɔŋnɛ ikinti. Ɛkɛ ani ikin ne tolan. ⁵ Ɔci ne ikin balkin ba maka tuutan te nɔji ikinyɛ, ikin ‘wonnin ɛkɛ tɛɛtin te tɛɛtin ‘wonnɛ ɛkɛ Kiṭɔ wanna. Gɔṭṭɛ, ikin yɔɔññin ɛkɛ te naŋka ɛkɛ ikin ‘wonninti tɛɛtin te yom pwani ɛkɛ neeni. ⁶ Oŋŋa Kiṭɔ luolnɛ Juaŋ ñaalɔ te koolji tɛɛti mokiyɛ, ikin luolnin Juaŋ ñaalɔ te koolji tɛɛtin moki daŋkun. Ɔci ne Yaccu coonni Juaŋ taaŋɛtiyɛ, ikin coonnin Juaŋ taaŋɛti ba ɛkɛ ɔɔn, acaan ikin akin war ɛkɛ. ⁷ Ɛkɛ noŋi a ɔɔn aŋka yom pwani ɛkɛ yom pwani tolan naŋŋɛ ɛkɛ ikinti te Yaccu Kiṭɔ neeni, warɛ lɛɛldɛ bora ne yuonga bɛya ne baaṭi neeni. ⁸ Oŋŋa ɛkkɛ jyettɛ Juaŋtiyɛ, ɛkkɛ yɔɔññɛ ɛkɛ te yom pwani ɛkɛ parɛ neeni. Ɛkkɛ yɔɔññɛ ɛkɛ te naŋka naŋŋɛ ɛkkɛ gɛɛl bɛɛ. ⁹ Acaan Juaŋ buagɔn naa menga jieyi warɛ te yɔɔta ɛkɛ yɔɔññɛ Juaŋ bɛɛ. ¹⁰ Ikin naŋŋin Juaŋ aŋŋin maka wonkɛn te naŋki Yaccu Kiṭɔ ikinti aŋka ikin noŋin naŋka pwadan naŋka ḍuaññɛ Juaŋ agi naŋcin ikiny. ¹¹ Naa ɛkkɛ yiedɛ bɛɛ, ɛkkɛ jietki ma agi Keedin Pookɛn. Ɔci ma yahuud maka balkin jyek ŋwotiyɛ, ɛkkɛn ḍori ɛkkɛ agi maka ciyi budan te jyek ŋwotto. Yeti gɔṭṭɛ, jyek ŋwoti mayɛ, a jyek ŋwoti ma yoŋgɛn budan. ¹² Ne ɛkkɛ balgɛ ɔntɔ te Kiṭɔtiyɛ, ɛkkɛ kɛɛptɛ jitin iki maka muonɛ Juaŋ bora neeni, gena ma yahuud. Ɔci jyeka ɛkkɛn ‘wonnɛ Juaŋ neeniyɛ, a jyek ɛkkɛ bɛɛ. Ɛkkɛ balgɛ kɛɛyɛ Juaŋ aŋka ɛkkɛ ‘wondɛ ɛkɛ waka pwadin. Ɔci Jwaŋa Tolan a Jwaŋ ɛkkɛ bɛɛ. ¹³ Te ñamu ɛkkɛ longɛ ɔntɔ te Jwaŋa Tolanti, yeti acca te naŋki Yaccu Kiṭɔ ɛkkɛtiyɛ, ɛkkɛ ornɛti Jwaŋa Tolanti te yimg Kiṭɔ. ¹⁴ Kiṭɔyɛ, gena ɛkɛ eccin coodda pwadan ikinti aŋka jyek ma yahuud ywaŋŋɛ ɛkɛ i jyek Keedin Pookɛn aŋka ɛkkɛn ŋeeki neeni. Yoyyin ɛkkɛn yooki ñin wannayɛ, bala moki bɛɛ. Bawwin doki. Ɔci acca ɛkkɛn kɛɛptan jitin moki bɛɛ. ¹⁵ Oŋŋa Kiṭɔ tuuniyɛ, ganuun a genga nɔñji moki bɛɛ, ɔci ma yahuud i Keedin Pookɛn neeni naŋŋɛ Yaccu aŋi maka ne cyɛɛlɔ te naŋki ɛkɛ. Ɔci a ɔŋŋiyɛ, Yaccu Kiṭɔ coodda pwadan oonɛ ikinti. ¹⁶ Gena te jyeka neeni aŋka Yaccu bɛɛni neeni. Ɛkɛ bɛɛn ɔci tuun kakanti aŋka maka neeni aga maka ne cyɛɛlɔ. Yoyyin ɛkkɛn yooki ñin neeni lɛɛŋŋɛ ɛkɛ jitin doki te oŋŋa ɛkɛ tuuni neeni. Ɔci ne ɛkɛ ɛkkɛn ñaaŋŋɛ ñin akki mena ne cyɛɛlɔyɛ, ɛkɛ ɛkkɛn yɔŋni jiek i Juaŋ daŋkun. ¹⁷ Ɔci a ɔŋŋiyɛ, Yaccu Kiṭɔ bɛɛn ɔci Keedin Pookɛn maka bala ɔntɔ lonin neeniyɛ, ñaaŋŋɛyɔ i ma yahuud maka cwalŋan neeni te jyeka wonkɛn jyeka pwadin neeni. Gena jyek coodda pwadan. ¹⁸ Te naŋki Yaccu Kiṭɔyɛ, ikin waakida Keedin Pookɛn ɔci ma yahuudyɛ, yaakinti ortinti Wey ikinti te Boŋa ne cyɛɛlɔ. Gena Boŋ Jwaŋa Tolan. ¹⁹ Acca ɛkkɛ Keedin Pookɛn balgɛ ba maka wɛlg moki bɛɛ. Ɛkkɛ aŋŋɛ maka ne cyɛɛlɔ i Ma Kiṭɔ. Ɛkkɛ aŋŋɛ kɛɛgin Jwaŋa Tolan doki. ²⁰ Ɛkkɛ waakida balgɛ ba ona pwadan ona cɔdi ma te gwoyiy. Ɔci cuudan Yaccu ɔci bɔwan Jwaŋa Tolanyɛ, ɛkkɛn a gwoyya yiecki ma on ŋwayɛ. Ɔci guonan tolan on warɛtiyɛ, gena Yaccu. ²¹ Ɔci gwoyya cɔttan ma on warɛtiyɛ, gena ɛkkɛ. Yaccu ɛkkɛ ywaŋŋɛyɔ ɔci ɛkkɛ aŋŋɛ wara ne cyɛɛlɔ iki ɛkɛ. A ɔŋŋiyɛ, ɛkkɛ waakida aŋŋɛ ba ona ne cyɛɛlɔ on Jwaŋa Tolan ona pwadan. ²² Ɛkkɛ Keedin Pookɛn ɔci ma yahuud acaan ɛkkɛ balgɛ Kiṭɔtiyɛ, ɛkkɛ agɛ ona ciyi Jwaŋa Tolan te Boŋ ɛkɛ.

¹ Gena ‘ya Buuluc mena olji ma ciginji te ɛkkɛ Keedin Pookɛn ne ‘ya baala mieta ɛkkɛ te jyek Yaccu Kiṭɔy. ² Ɛkkɛ tieŋnɛ ne ‘ya naŋŋata Juaŋ aŋŋa mena moki ɛkkɛ te yom pwani ɛkɛ parɛ boki? ³ Ɛkkɛ kieŋnin ‘ya jiek gɛɛg doki te naŋki Jwaŋa Tolan ne ɛkɛ ‘ya lɛɛrnati jyek Yaccu jyeka coggin te ñamuy. Ɛkkɛn oonɛ Juaŋ bora ‘yati. ⁴ Ɔci ne ɛkkɛ poktɛ jyeka kiewan ‘ya ɛkkɛti te ñamu neeniyɛ, ŋeeddɛ ɛkkɛ ne pwadan jyek Kiṭɔ jyeka coggin te ñamuyɛ, jitkɛn ŋeej ‘ya ne pwadan. ⁵ Yɔrg ikinyɛ, jyek Yaccu Kiṭɔ ŋeecin ɛkkɛn ne pwadan bɛɛ. Yeti acca jiek oonɛ Boŋ Jwaŋa Tolan bora ma ɛkɛti. Gena Cuudan Yaccu ɔci bɔwan Jwaŋa Tolan maka yomgɛn bala Juaŋti ne pwadany. ⁶ Jyeka coggin oonɛ Boŋ Juaŋ bora neeniyɛ, gena jyek ñoowin ma yahuud iki Keedin Pookɛn te jyeka wonkɛn jyeka pwadin neeni. Jyeka neeni gɔki agi waka ‘wondɛ Juaŋ ma yahuudyɛ, ɛkkɛn ‘wondɛ Juaŋ Keedin Pookɛn daŋkun, ɔci ɛkkɛn aŋi yoŋŋa ne cyɛɛlɔ. Ɔci jyeka guaŋŋɛ Juaŋ ma yahuudti te Yaccu Kiṭɔyɛ, aŋi jyek Keedin Pookɛn daŋkun. ⁷ ’Ya naŋŋa Jwaŋa Tolan aŋi mena mieti ma te jyeka wonkɛn jyeka pwadin neeni. ‘Ya ‘wonna Juaŋ kanŋa neeni te yom pwani ɛkɛ, ɔci ɛkɛ bala kanŋan ne tolan ‘yati te war tɛɛn ɛkɛ. ⁸ ’Ya a mena ḍiɛran te Ma Kiṭɔ waakɛnda, yeti ‘ya ‘wonna Jwaŋa Tolan kanŋa ɛkɛ te yom pwani ɛkɛ aŋka ‘ya miet Keedin Pookɛn te jyeka wonkɛn jyeka pwadin neeni te Yaccu Kiṭɔ. Ɔci jyeka neeni bala ba mala ma ‘wondɛ Juaŋ a mala tolany. ⁹ Juaŋ buagɔn ‘ya ma myetka jiek jitkɛn waakɛnda agi ɛkɛ jyeka neeni cɔmdɛ bora a ɔki. Te ñamu jyeka neeni a coggin yuonginda ɔɔn, ɔci jyeka neeni bala aŋa Juaŋti mena oki waak waakɛnda neeni parɛ. ¹⁰ Ɔci acca jyek yɔɔta ma yɔɔdɛ Juaŋ bɛɛn bora doki, ɔci ñing tɛɛn Juaŋ ñing tɛɛn tolan ŋeecin malɛɛkan ñaalɔ pɔliji, ɔci boŋko, ɔci jɔkin waakɛnda. Ñing tɛɛn Juaŋ neeni yuarɛ ɛkkɛn ne Juaŋ noŋi naŋki ɛkɛ ma kaniicatiy. ¹¹ Jwaŋa Tolan balki jyek naŋka neeni yomɛti te baaṭi doki ne ṭɛɛr men baawiy. Ɔci ne Yaccu Kiṭɔ Ciɛggɔn ikin neeni bɛɛni dokiyɛ, Juaŋ jyeka neeni naŋŋɛ ba jyeka ḍuaññɛ ɛkɛ dokiy. ¹² Ɔci ne ikin balkin Yaccuti te jyenna ikin jyettin ɛkɛti neeniyɛ, ikin yaakinti ortinti Jwaŋa Tolanti ne pwadan. Ikin buayin genga bɛɛ. ¹³ Ɔci a ɔŋŋiyɛ, ‘ya gɔkka ɛkkɛti ka naa ɛkkɛ yomgɔ tuwa te taab bala ‘yati neeni bɛɛ. Taab ‘ya neeniyɛ, etti naŋka pwadan ɛkkɛti. ¹⁴ Ne ‘ya baala poŋa jyek naŋka naŋŋɛ Jwaŋa Tolan pwadan neeniyɛ, gɔ ‘ya moki ḍwoñji iñɔ morci Wey ɔɔn ñamɛti ɔɔn. ¹⁵ Ɛkɛ a mena ‘woñi ma waakɛnda te yenti ɛkɛ ñaalɔ pɔliji ɔci iñɔ ṭɛɛrji wɛnni. ¹⁶ Ɔci ‘ya cɔk Juaŋti ka dala ɛkkɛ ‘wondɛ ɛkɛ war tɛɛn ɛkɛ ɛkkɛ yomgɔti te Boŋ ɛkɛ, te pwani ɛkɛ pwanna tolan neeniti acaan Jwaŋa Tolanyɛ, ɛkɛ tɛɛna tɛɛno. ¹⁷ ’Ya cɔk Juaŋti ka dala ɛkkɛ yomgɔ aga nona ciyi Kiṭɔ oŋkanda te jyenna ɛkkɛ jyettɛ ɛkɛti neeni. Dala ɛkkɛ waakɔ tiittɛti jyek oonnin ma oonki yɔtin ŋeeddɛ ɛkkɛ ne pwadan ¹⁸ aŋka ɛkkɛ yɔɔdɛ ne tɛyan. Ɔci a ɔŋŋiyɛ, ŋeeddɛ ɛkkɛ i Ma Kiṭɔ waakɛnda anna Kiṭɔ ani ɛkkɛ tol tol bala a ɔki. ¹⁹ Anna neeniyɛ, tol tolo. Mena anna neeni ŋeejɛ warda ne pwadanyɛ, gɔ bala bɛɛ. Yeti ‘ya aŋka baal cɔk Juaŋti aŋka ŋeeddɛ ɛkkɛ. Ɔci dala ɛkkɛ yomgɔ kuma ne tolan te Jwaŋa Tolan. ²⁰ ’Ya jiey Jwaŋa Tolan mena noŋi naŋka tɛyan ikin yomgɔti te war tɛɛn ɛkɛ neeni. ‘Ya jiey ɛkɛ a ɔɔn acaan ɛkɛ yaakinti noŋi naŋka tɛyan neeni ne tolan nɔñji, ɔci naŋki ɛkɛ neeni ‘uottiti ɛkɛ parɛ ba bolja ikin yaakinti paŋtin bɛɛy. ²¹ Dala ma jieddi Juaŋ ne tolan te naŋka naŋŋɛ ɛkɛ ma kaniicati te Yaccu Kiṭɔy. Dala ɛkkɛn jyeddi ɛkɛ yuonginda ɔɔn. Amɛɛn.

¹ Gena ‘ya a mena olji ma ciginji te jyek Ciɛggɔn ikin Yaccu Kiṭɔy. ‘Ya ṭey ɛkkɛ ka dala ɛkkɛ ciedɛ ne pwadan acaan ɛkkɛ muonɛ Juaŋ bora. ² Dala ɛkkɛ yomgɔ ḍyɛrdi. Dala ɛkkɛ yomgɔ pwaddi mati oŋkanda ɔɔn. Ɔci dala ɛkkɛ loomgɔ tɛya. Ɔci dala ɛkkɛ bɔyyɛ yɔtin pookɔ ne ɛkkɛ oonni yɔtin pookɔy. ³ Ɛkkɛ agɛ maka ne cyɛɛlɔ te Boŋ Juaŋ Boŋa ɛkkɛ noŋnɛ ŋɛyy. A ɔŋŋiyɛ, dala ɛkkɛ ŋeewin ɛkkɛ ŋeenɛ, ɔci ñoonɛ neeni tiidɛ ñin oŋkanda ɔɔn. ⁴ Ɛkkɛ agɛ yoŋŋa ne cyɛɛlɔ. Ɔci Boŋ Juaŋ a Boŋa ne cyɛɛlɔ moki. Ɛkkɛ muonɛ bora Jwaŋa Tolan ne cyɛɛlɔ parɛ, ɔci ɛkkɛ jyettɛ kɛɛyɛ naŋka ne cyɛɛlɔ daŋkun. ⁵ Ɛkkɛ balkɛ Ciɛggɔn ne cyɛɛlɔ, ɔci jyenna ne cyɛɛlɔ, ɔci bulta ne cyɛɛlɔ. ⁶ Jwaŋ ɛkkɛ a Jwaŋa ne cyɛɛlɔ, ɔci ɛkɛ a Wey ikin waakida. Waak waakɛnda buannɛ ɛkɛ, ɔci ɛkɛ kanŋan waakti waakɛnda, ɔci ɛkɛ ciyi waak jitin waakɛnda. ⁷ Juaŋ yomɛ pwad pwad ikinti waakida. Ikin ‘wonnin Kiṭɔ naŋka pwadin waakida te yom ɛkɛ parɛ. Ɔci naŋka ikin ‘wonninti Kiṭɔ pwadin neeniyɛ, a naŋka ne cyɛɛlɔ bɛɛ. Ikin ‘wonnin ɛkɛ naŋko, ɔci menga da te naŋki ɛkɛ, ɔci menga da te naŋki ɛkɛ. ⁸ Jyeka neeni bala ba jyeka kiigin ne gɔkki agi, “Ne ɛkɛ atti ñaalɔ pɔlijiyɛ, ɛkɛ ma gɛɛg yaallɛ eññɛ bieŋɛti, ɔci ɛkɛ ma baan ‘wonnɛ waak te yom ɛkɛ budan.” ⁹ Ne worga gɔki agi, “Kiṭɔ atti ñaalɔ pɔlijiyɛ,” a ɔɔnyɛ, bala ba worga gɔki te bɛɛna ɛkɛ bɛɛni te ñaalɔ, bɛɛni iñɔ wɛnni ṭɛɛrjiy. ¹⁰ Yaccu neeni bɛɛn iñɔ, ɔci ɛkɛ moki ati ñaalɔ nona loonan pɔlijiy. Ɛkɛ noŋi a ɔɔn aŋka noon warda kuma te ɛkɛ te iñɔ wɛnni ne nona loonan ñaalɔ ɔɔn. ¹¹ Ikin ‘wonnin ɛkɛ naŋki ɛkɛ budan. Ɔci naŋka neeni waakɛnda bala bolja ne cyɛɛlɔ bɛɛ. Ma gɛɛg ikinti a cuudan Juaŋ eci jyek ɛkɛ. Ɔci ma gɛɛg naŋŋɛ ɛkɛ a bɔwan. Ɔci ma gɛɛg naŋŋɛ ɛkɛ aŋi maka booti baan konɛ loṭi ma te jyek ɛkɛ. Ɔci ma gɛɛg naŋŋɛ ɛkɛ a gaciicin. Ɔci ma gɛɛg naŋŋɛ ɛkɛ aŋi maka loṭi may. ¹² Acaan ikin agen war Yaccuyɛ, Juaŋ men da ‘woñgi kanŋa ɛkɛ, ɔci men da ‘woñgi kanŋa ɛkɛ aŋka ɛkkɛn Ma Kiṭɔ maktan ne pwadan te jiek waakɛnda, ɔci ɛkɛ buagɔn aŋka Ma Kiṭɔ kooptan ñaalɔ. ¹³ A ɔŋŋiyɛ, ikin maktin Juaŋ te naŋki ikin neeni oŋkanda, acaan Jwaŋa Tolan buagɔn dala ikin aktin maka ne cyɛɛlɔ te jyenna ikin jyettin Yaccuti, ɔci te ŋeejjin ikin Kaci Jwaŋa Tolan ŋeennin ne pwadan neeniy. Acaan ɛkɛ buagɔn dala ikin baltin waak waakɛnda yomgɔti waakida, ɔci ‘uottin ñamu, ɔci ikin baltin ba Yaccu ɔɔn. ¹⁴ Ɔci kan ikin balkin a ɔɔnyɛ, ikin balkin ba kɛɛgin moki bɛɛ. Ɔci kan jyeka laltan ma a jomgin gɛɛg bɛya ikintiyɛ, ikin balkin ba waka peedɛ jwami budan bɛɛ. Pɔya ikin yɔɔttin ne tɛyan bala doki. Ɔci maka ñingɛn tɛyan te naŋki ma ñingɛnyɛ, kan ɛkkɛn buagɔn noŋdi a ɔɔn ikintiyɛ, ɛkkɛn yaakinti noŋdi genga ikinti bɛɛ. ¹⁵ Jwaŋa Tolan buagɔn dala ikin waakida gɔktin jyeka awarɛ te yoma pwadan. Dala ikin ‘uottin ñamu aŋka baltin ba Kiṭɔ te naŋki waakɛnda, ɛkɛ a wyeñ ikin. ¹⁶ Ma Kiṭɔ waakɛndayɛ, ɛkkɛn i Kiṭɔyɛ, ɛkkɛn a wara ne cyɛɛlɔ. Ɔci Kiṭɔyɛ, ɛkɛ a wyeñ ikin, ɔci ɛkɛ a mena ikin naŋtin ciyin ne pwadan ba maka ne cyɛɛlɔy, ɔci ɛkɛ ikin naŋtin kantin ne pwadan waakida aŋka ikin balkin ba wara baaki waja ɔci tɛyany. Ɔci a ɔŋŋiyɛ, kan menga da te kanŋa ɛkɛ, ɔci menga da te kanŋa ɛkɛyɛ, ikin ‘uottin ñamu te jyek oonnin yɔtin. ¹⁷ Tieŋdɛ jyeka guagdi ‘ya ɛkkɛti neeni. ‘Ya gɔk ɛkkɛti te yenti Ciɛggɔn ikin, ka dala ɛkkɛ mwondɛ te naŋki maka ciyi budan te jyek Juaŋo. Dala ɛkkɛ paŋŋa paŋtan ɛkkɛn a paŋŋa budan neeni daldɛ. ¹⁸ Acaan ɛkkɛn yaakinti poŋi jiek jitkɛn ne pwadan bɛɛ. Ɛkkɛn balki tɛɛtin Jwaŋa Tolan bɛɛ. Ɛkkɛn ciyi budan amaamo. Ɛkkɛn wyetkɛn tɛy tɛy aŋka tɛɛtin Juaŋ baawi ɛkkɛnti neeni. ¹⁹ Ɛkkɛn yaakinti poŋi te jyek naŋka naŋtan ɛkkɛn, walla balkɛ lɔɔn moki bɛɛ. Ɛkkɛn poŋi te gena jyek naŋki tomi budan. Ɛkkɛn naŋki tomi gɛɛl dalji bɛɛ. Ɛkkɛn noŋi naŋka yeyin jitkɛn waakɛnda. ²⁰ Ne ɛkkɛ tieŋnɛ jyek Kiṭɔyɛ, jyeka neeni bala ba jyeka neeni boki? Hayɛllɛ! ²¹ Çeej ‘ya ɛkkɛ tieŋnɛ te naŋki Yaccu doki, ɔci ɛkkɛ balgɛ Yaccuti doki, ɔci ɛkkɛ lalkɛ ma te jyek Yaccu jyeka awarɛ neeni. ²² Jyek ɛkɛ neeni gɔki agi dala ɛkkɛ mwonjɛ te yom ɛkkɛ yoma te baaṭi yoma ɛkkɛ oldɛ noŋɛ ba naŋki ɛkkɛ naŋka te baaṭiy. Yom ɛkkɛ yoma a daan neeni ɛkɛ buagɔn waka coŋin amaam budan, ɔci waka coŋin neeniyɛ, yomg ɛkkɛ maaltan ɔci yaatan ɛkkɛn. ²³ Dala ɛkkɛ daŋkun ooktɛ yomga wonkɛn, ɔci wyetka wonkɛn naŋŋɛ Juaŋ ba yom ɛkɛ ɔɔn. Kan ɛkkɛ noŋdɛ a ɔɔnyɛ, ɛkkɛ baldɛ ba Juaŋo, ɔci ɛkkɛ noŋdɛ ba jyek ɛkɛ jyeka awarɛ neeni te naŋka pwadin naŋka ɛkɛ buagɛy. ²⁵ A ɔŋŋiyɛ, dala ɛkkɛ mwondɛ te jomi jieko. Dala ɛkkɛ gɔgdɛ yɔtin te jyeka awarɛ oŋkanda, acaan ikin waakidayɛ, ikin akin yoŋŋa ne cyɛɛlɔ. ²⁶ Kan ɛkkɛ looñi te gengayɛ, naa loñka neeni etti nɔji ɛkkɛ yomgɔti bɛɛ. Ɔci naa loñka neeni ḍuadɛ yomgɔti oŋkanda ɔɔn bɛɛ. Dala baadi ne noon men bɔwi ɔɔn. ²⁷ Naa Jwaŋa Yaayan pɔktɛ pɔy aŋka ɛkkɛ pɔɔdɛ yomgɔti te loñk ɛkkɛ neeni bɛɛ. ²⁸ Mena bala koṭi waakyɛ, dala ɛkɛ mwondi te kali waako. Ɔci dala ɛkɛ noŋdi kanŋa pwadan te byeŋ ɛkɛ. Dala ɛkɛ balki waak te kanŋa naŋŋɛ ɛkɛ te byeŋ ɛkɛ aŋka dala ɛkɛ moki maka anin daŋkun. ²⁹ Naa ɛkkɛ gɔktɛ jyeka yeyin oŋgati bɛɛ. Dala ɛkkɛ gɔktɛ jyeka pwadan jyeka ma kooptan ñaalɔ aŋka maka neeni maktan jyek ɛkkɛ neeni. ³⁰ Naa ɛkkɛ noŋɛ naŋka yaayan aŋka Boŋ Juaŋ yomɛ wiak a ɔɔn bɛɛ. Acaan Boŋ Juaŋ ɛkkɛ yomgɔti neeni bala ba mañ Juaŋo. Ɔci maka balki mañ Juaŋ te Boŋ ɛkɛ te wanna ɛkkɛn wannɛ Juaŋ neeniyɛ, cwamdi ɛkɛ ne baaṭi. ³¹ Dala ɛkkɛ mwondɛ te yom yoño, ɔci te ywobjo, ɔci moki te loñka budan, ɔci moki te wɛyyin, ɔci moki te lomi jieko. Ɔci naa jwalla yaayan gɛɛl daldɛ niin ɛkkɛ yomgɔti bɛɛ. ³² Dala ɛkkɛ moowɛ yɔtin pookɔ. Dala ɛkkɛ yomgɔ bala mati moki, ɔci dala ɛkkɛ bɔyyɛ yɔtin pookɔ daŋkun bala ba bɔɔkin ɛkkɛ bɔɔŋnɛ Juaŋ te naŋki Yaccu Kiṭɔ neeni.

¹ Dala ɛkkɛ lɔktɛ ba naŋki Jwaŋa Tolan acaan ɛkkɛ agɛ kɛɛgin ɛkɛ, ɔci ɛkɛ ani ɛkkɛ ne tolan. ² Kiṭɔ ani ikin ne tolan aŋka ɛkɛ tuuni te nɔji ikin, ɔci baalli ba gena ‘yɛri ma pwadan Juaŋti neeni. Ɔci dala anna ɛkkɛ oondi yɔtin bala a ɔɔn daŋkun. ³ Acaan ɛkkɛ agɛ Ma Kiṭɔyɛ, naa jiek bɛya te bora ɛkkɛti agi ɛkkɛ baljɛ noŋjɛ tomi a ɔɔn bɛɛ, ɔci walla naa jiek bɛya ɛkkɛti agi ɛkkɛ anjɛ wak maka pookcɛn bɛɛ. Ɔci kan jyek naŋka neeni bɛya Ma Kiṭɔti bɛɛyɛ, a ɔɔn yɔmjin. ⁴ Naa ɛkkɛ jyeyɛ te jyek wɛlji ɔci te jyeka yeyin bɛɛ. Ɔci moki naa ɛkkɛ juolɛ jyeka yeyin bɛɛ. Jyeka neeniyɛ, yɔmjin Ma Kiṭɔti bɛɛ. Yeti dala ɛkkɛ gɔktɛ agi pwatcin Juaŋti oŋkanda. ⁵ Acaan ŋeejɛ ɛkkɛ maka noŋi tomi ɔci maka poŋi jyeka yeyin, ɔci maka ani wak maka pookɛnyɛ, non ɛkkɛn baaw ban Kiṭɔ i ban Juaŋo. Jyek ani wak maka pookɛnyɛ, ɛkkɛn bala ba jyek mali jɔkin yeyin ɔɔn daŋkun. ⁶ Naa ɛkkɛ naŋtɛ ma ñin te jyeka budan neeni bɛɛ. Te naŋka yeyin neeniyɛ, ywobji Juaŋ bɛya mati. Gena maka tuoci waakɛn te jyek ɛkɛy. ⁷ Naa ɛkkɛ ñoodɛ iki ɛkkɛn bɛɛ. ⁸ Te ñamu ɛkkɛ balgɛ ciyɛ te nona mielo, yeti acca ɛkkɛ aŋŋɛ yoŋŋa ne cyɛɛlɔ iki Yaccu, ɔci ɛkkɛ balgɛ nona bɔwanti acca. Dala ɛkkɛ ciyɛ ne pwadan ba maka ciyi te nona bɔwany. ⁹ Naŋka bɛya te nona bɔwantiyɛ, gena naŋka pwadan ɔci naŋka awarɛ. ¹⁰ Te ñamu dala ɛkkɛ poŋdɛ ne pwadan, ɔci kan naŋki ɛkkɛ pwad pwad Ciɛggɔn ikintiyɛ, dala ɛkkɛ oŋ noŋdɛ oŋo. Kan naŋka neeni pwatcin bɛɛyɛ, naa noŋdɛ bɛɛ. ¹¹ Naŋka naŋtan maka ciyi te nona ulanti menyɛ, etti jyeka pwadin bɛɛ. Ɔci naa ɛkkɛ ñoodɛ iki ɛkkɛn te naŋka neeni bɛɛ. Dala ɛkkɛ aŋka gɔktɛ ɛkkɛnti, ɛkkɛn ṭeedɛ te naŋki ɛkkɛn. ¹² Acaan naŋka naŋtan ɛkkɛn lieda neeniyɛ, yaayɛ ne tolan. A ɔɔnyɛ, bala ba ‘ya gɔkta jyek naŋki ɛkkɛn neeni ‘ya tukuti bɛɛ. ¹³ Naŋki waakɛndayɛ, kan eetan ma bora nona bɔwantiyɛ, ɔci ŋeettan ma ne kan naŋki pwadɔy. Kan noon bɔw bɔwyɛ, ma yaakinti naŋka yeyin neeni coktan iñɔ moki bɛɛ. Acaan ne nona bɔwan dɛkti nona ulantiyɛ, ɔci nona ulan neeni baadi doki. ¹⁴ Ɔci a ɔŋŋiyɛ, bala ba jwalla gɔki agi, “Mena wici, i ṭiewa, hay! Mena tuuta, i jɔlla ñaalɔ, ɔci Kiṭɔ i dyɛgdi.” ¹⁵ Dala ɛkkɛ woŋgɔ tiittɛ te coodi ɛkkɛ. Naa ɛkkɛ ciyɛ ba maka jiek kwoyɔn noŋi amaam budan ɔɔn bɛɛ. Dala ɛkkɛ ciyɛ ba maka ñingɛn tɛyan. ¹⁶ Dala ɛkkɛ tiecɛ oŋki ɛkkɛ waakɛn ne pwadan acaan nɔji tol tol mati. ¹⁷ Naa ɛkkɛ noŋɛ ba maka jiek kwoyɔn bɛɛ. Dala yom Juaŋ ŋeeddɛ ɛkkɛ ne pwadan. ¹⁸ Naa ɛkkɛ noktɛ mooy bɛɛ. Acaan nooŋi mooyyɛ, ɛkkɛn ɛkkɛ yaatɛ. Dala ɛkkɛ yomgɔ aŋka kuma te gena Boŋ Jwaŋa Tolan oŋkanda. ¹⁹ Ne ɛkkɛ coottɛ iñɔ a cyɛɛlɔyɛ, dala ɛkkɛ jyeyɛ te ɔɔlga ɛkkɛ laldɛ Boŋ Juaŋy, ɔci dala ɛkkɛ ‘ualɛ Juaŋti moki te yomg ɛkkɛ. ²⁰ Ɔci oŋkandayɛ, dala ɛkkɛ gɔktɛ a pwatcin Wey ikin Juaŋti te yenti Ciɛggɔn ikin Yaccu Kiṭɔ te waak waakɛnda. ²¹ Dala ɛkkɛ tieŋdɛ jyek modg ɛkkɛ acaan ɛkkɛ waakida noŋɛ ne pwadan Yaccu Kiṭɔti. ²² Moongo, dala ɛkkɛ tieŋdɛ jyek ‘uay ɛkkɛ bala ba bolja ɛkkɛ tieŋdɛ jyek Ciɛggɔn ikiny. ²³ Maka ‘uayyɛ, ɛkkɛn a wyetk maka moong bala ba Kiṭɔ ɛkɛ a wyeñ ma kaniica. Ma kaniicayɛ, ɛkkɛn a war Kiṭɔ, ɔci Kiṭɔyɛ, ɛkɛ a Mena Yuoci Ma kaniica. ²⁴ Ɔci ba bolja ma kaniica tyeŋki jyek Kiṭɔ oŋkanda neeniyɛ, dala moong tieŋdi jyek ‘uay ɛkkɛn oŋkanda daŋkun. ²⁵ Ɛkkɛ, maka ‘uayo, dala ɛkkɛ anɛ moong ɛkkɛ ne tolan bala ba bolja Kiṭɔ ani ma kaniica, ɔci ɛkɛ tuuni te ɛkkɛny. ²⁶ Yaccu tuun te ma kaniica aŋka ɛkkɛn yomgɛn pwaddi te nɔji ne ɛkkɛn bultɛti may. Ɔci jyek Jwaŋa Tolan neeni ɛkkɛn naŋtan pwaddi Jwaŋa Tolan ñamɛti. ²⁷ Ɛkɛ noŋi a ɔɔn acaan ɛkɛ buagɔn dala ma kaniica pwada ɛkɛ ñingɛti ne tolan. Dala ɛkkɛn bala ba mena ɛŋi bworŋin pwadin, bworŋin giikkɛn baawy. A ɔŋŋiyɛ, Kiṭɔ buagɔn naa gena yaayan gɛɛl bala kaniica ɛkɛti bɛɛ. ²⁸ A ɔŋŋiyɛ, dala maka ‘uayyɛ, ɛkkɛn ani moong ɛkkɛn ba ne ɛkkɛn anki waak ɛkkɛn ɔɔn. Kan menga ani ɛŋ ɛkɛyɛ, a ɔɔn bala ba ɛkɛ ani war ɛkɛ daŋkun. ²⁹ Men gɛɛl yookɔn te war ɛkɛ boki? Hayɛllɛ! Men gɛɛl yookɔn te war ɛkɛ bɛɛ. Ɛkɛ gɔṭi kon ɛkɛ oŋkanda ne pwadan te waka amdɛ ɛkɛ. Ɛkɛ gɔṭi war ɛkɛ ne pwadan oŋkanda bala ba ne Kiṭɔ gɔṭi kaniica ɛkɛ oŋkanda ɔɔn, ³⁰ acaan ikin akin war ɛkɛ. ³¹ Jyeka kiigin gɔki agi, “A ɔŋŋiyɛ, ne mena kaalgɔn ḍɛɛdi ɛɛŋyɛ, ɛkɛ on weegɛn ɔci mɛɛgɛn daldɛ, ɔci ɛkɛ ciyi iki ɛŋ ɛkɛ oŋkanda ɔɔn. Ɔci ɛkkɛn ñoowin yaakkɛn doki. A ɔŋŋiyɛ, ɛkkɛn aŋi ba mena ne cyɛɛlɔ doki, a yyɛɛwɔ moki bɛɛ.” ³² Jwalla neeniyɛ, gɔki te mena ‘uan i ɛŋ ɛkɛ. Ɔci jwalla neeniyɛ, kon ɛkɛ ɛka parɛ bala moki. ‘Ya gɔk ka gena jyek ñoowin Kiṭɔ i kaniica ɛkɛ. ³³ Ɛkkɛyɛ, dala maka ‘uay ani moong ɛkkɛn ba ne ɛkkɛn anki waak ɛkkɛn ɔɔn. Ɔci moongyɛ, dala ɛkkɛn tieŋdi jyek ‘uay ɛkkɛn te yoma pwadan.

¹ Kɛɛgin, dala ɛkkɛ noŋdɛ ba jyek weyi ɛkkɛ ɔci ba jyek mɛyi ɛkkɛ. Ɔci a ɔɔnyɛ, yɔmjin Jwaŋa Tolanti. ² Ne Juaŋ gɔŋni mati te ganuun jiña neeniyɛ, ɛkɛ jwali gɛɛl naŋɛ ɛkɛ iki ma doki te ganuun jiña neeni. Ganuun jiña neeni gɔki agi, “Kan ɛkkɛ tieŋdɛ jyek weyi ɛkkɛ ɔci jyek mɛyi ɛkkɛ te yoma pwadanyɛ, ³ ɔci coodi ɛkkɛ pwada ɔci beya iñɔ baanji ṭɛɛrji wɛnni.” ⁴ Hay, kɛɛgin weyyɛn, naa ɛkkɛ gɔkɛ kɛɛgin ɔɔrndɛ a ɔɔrŋin a ɔɔn aŋka ɛkkɛn loondi bɛɛ. Dala kɛɛgin ɛkkɛ laldɛ ɛkkɛ ne pwadan, ɔci dala ɛkkɛn ṭeedɛ ɛkkɛ ne pwadan aŋka ɛkkɛn bootti Ciɛggɔn ikinti. ⁵ Maka kɛɛnko, dala ɛkkɛ woŋgɔ tiittɛ te jyek kanŋa weyyɛn iñɔ ṭɛɛrji wɛnni ne pwadan. Dala ɛkkɛ kandɛ te yoma pwadan kanŋa weyyɛnti, ɔci dala ɛkkɛ buattɛ ɛkkɛn. Ne ɛkkɛ balgɛ noŋɛ kanŋa neeniyɛ, dala ɛkkɛ poŋdɛ kanŋa neeni a kanŋa Kiṭɔ. ⁶ Acaan ɛkkɛ agɛ kɛɛnk Kiṭɔyɛ, naa ɛkkɛ noŋɛ kanŋa ne pwadan te kanŋa weyyɛn ñingɛnti budan bɛɛ, ne ɛkkɛ noŋdɛ a ɔɔn te ma ñingɛnyɛ, ɛkkɛ buagɛ dala ma jieyi ɛkkɛ. Dala ɛkkɛ daŋkun kandɛ ne pwadan ne kanŋa weyyɛn baaki daŋkuny. Kan ɛkkɛ noŋdɛ a ɔɔn te yoma pwadanyɛ, ɛkkɛ yaaktɛti noŋdɛ ba naŋka Juaŋ buagɛy. ⁷ Dala kanŋa ɛkkɛ naŋdɛ waakɛnda te yoma pwadan. Dala ɛkkɛ kanŋa neeni naŋdɛ Juaŋti, naa naŋdɛ ɛkkɛ ma baanti budan bɛɛ. ⁸ Dala ŋeeddɛ ɛkkɛ kan men gɛɛl a kɛɛngɔn walla kan a kɛɛngɔn bɛɛyɛ, waka naŋŋɛ ɛkɛ ne pwadan wannayɛ, etti waka pwadin ne baaṭi te Ciɛggɔn ikinti. ⁹ Hay! Kanŋa weyyɛn, dala ɛkkɛ yomgɔ pwaddi kɛɛnk ɛkkɛti daŋkun. Naa ɛkkɛ ɔɔrŋɛ kɛɛnk ɛkkɛ waakɛn a ɔɔrŋin te jyeka yeyin neeni bɛɛ. Naa ɛkkɛ woŋgɔ yeya te jyeka neeni bɛɛ. Wey ɛkkɛ Weya ñaalɔ pɔlijiyɛ, ɛkɛ a Wey ɛkkɛ waakida i kɛɛnk ɛkkɛ. Ɛkɛ a mena kɛɛb ma jitkɛn bɛɛ. ¹⁰ Jwali ṭɔɔlɛ gɛɛl bala moki ne cyɛɛlɔ. Acaan ɛkkɛ balgɛ Jwaŋa Tolantiyɛ, dala war tɛɛn ɛkɛ bala ɛkkɛti oŋkanda, acaan war tɛɛn ɛkɛ neeniyɛ, tol tol ɔci tɛɛna tɛɛno. ¹¹ Ne lañ baaliyɛ, ma ɛŋi wak laño. Ɔci ɛkkɛ daŋkun, dala ɛkkɛ noŋdɛ naŋki Juaŋ aŋka ne ɛkkɛ noogdɛ iki Jwaŋa Yaayan daŋkunyɛ, ɔci ɛkkɛ yɔɔddɛ ne tɛyan. Ɔci a ɔɔnyɛ, ɛkkɛ ḍɛɛmdɛ iñɔ te naŋka naŋdɛ ɛkɛ te ñing tɛɛn ɛkɛ neeni bɛɛ. ¹² Ikin noowin iki ma baan bɛɛ. Ikin noowin iki jɔkin yeyin pɔɔldinji, ɔci ikin noowin i jɔkin yeyin i Jwaŋa Yaayan mena etti naŋka yeyin iñɔ ṭɛɛrji wɛnni neeni. ¹³ Acaan a ɔŋŋiyɛ, dala ɛkkɛ noŋdɛ ba naŋki Juaŋ waakɛnda aŋka ne oŋŋa jiek yiekti ɛkkɛtiyɛ, ɛkkɛ yɔɔddɛ ne tɛyan. Ɔci ne lañ baali toliyɛ, ɛkkɛ yooŋdɛ ɔntɔ bɛɛ. Ɛkkɛ yɔɔttɛ iñɔ ne tɛyan ɔɔn. ¹⁴ ’Ya gɔk ɛkkɛti dala ɛkkɛ yɔɔddɛ ne tɛyan te ŋeejin ɛkkɛ Juaŋ ŋeejɛ ba mena warɛ ywaŋŋɛ buagɔn noŋi ṭwaŋy. Dala ɛkkɛ baltɛ yoma pwadan. Yoma pwadan neeniyɛ, bala ba buarñan ḍyɛktan ma korkɛnti ne ma nookiy. ¹⁵ Dala ɛkkɛ baltɛ yoma buagɔn mieti ma te jyeka wonkɛn jyeka pwadin neeni. Gena jyek coodda pwadan. Ɔci ba jyek yoma buagɔn miti ma neeniyɛ, bala ba mena ɛŋi wɛyi ṭwaŋ ciegɛtiy. ¹⁶ Dala jyeni ɛkkɛ tiektɛ ne tɛyan oŋkanda bala ba kɔɔrña eetan ma ṭwaŋti aŋka dooŋɛ ɛkkɛ jyek Jwaŋa Yaayan jyeka bala ba cowwa tuggɛn bitin cowwa noki ɛkkɛy. ¹⁷ Dala ɛkkɛ baltɛ yɔɔt Juaŋ yɔɔta yuoci ɛkkɛy. Ɔci jyek yɔɔt neeniyɛ, bala ba jyek taaggan ‘yɛŋtan ma a taaggan ṭwaŋy. Dala ɛkkɛ jyek Juaŋ jyeka ikin ‘wonninti Boŋ Juaŋ neeni ŋeeddɛ. Ɔci jwali Juaŋ neeni bala ba byeŋgaaran ikinti. ¹⁸ Dala ɛkkɛ cɔkɛ oŋkanda ɔɔn. Naa ɛkkɛ woodɛ bɛɛ. Dala ɛkkɛ toottɛ aŋka dala Juaŋ ɛkkɛ magdɛ, cɔktɛ ɛkɛti te wɔɔkan waakɛnda ne ɛkkɛ wɛɛdɛ Boŋ Juaŋy. Acaan a ɔɔnyɛ, dala ɛkkɛ yɔɔddɛ ne tɛyan, naa togdɛ bɛɛ, dala cɔktɛ oŋkanda te Ma Kiṭɔ waakɛnda. ¹⁹ Dala ɛkkɛ cɔktɛ Juaŋti te ‘ya daŋkun. Ne ‘ya tuku pɔkta gɔkta mati loṭa mayɛ, dala Juaŋ ‘ya ‘wonda jyeka pwadin tukuti aŋka ‘ya yaaktati gɔkca mati ne pwadan te jyeka jitkɛn a coggin mati te baaṭi jyeka lɛɛlnɛ Juaŋ bora a jyeka wonkɛn jyeka pwadin neeni. ²⁰ ’Ya a cuuda Yaccu ec jyek ɛkɛ mati, ɔci acca ‘ya ḍɛɛkka ma te jiŋgin te jyek ɛkɛ. Dala ɛkkɛ cɔktɛ Juaŋti te ‘ya aŋka ne ‘ya gɔkta matiyɛ, naa ‘ya buay genga bɛɛ. Dala ‘ya gɔkca mati te yoma tɛyan, ɔci a ɔɔnyɛ, yɔmjin. ²¹ Ɛkkɛ buagɛ ‘ya ŋeeddata ne ‘ya baala ciya a ɔkiy, ɔci ne ‘ya baala noŋa a ɔkiy. Ticcikoc, ɛkɛ a mena anki may, ɔci ɛkɛ bala tieci kanŋa Juaŋ warɛ ne pwadan. Ɛkkɛ nɔɔttɛ ɛkɛ te coodi ‘ya waakɛnda. ²² ’Ya ɛkɛ cuoñña ɛkkɛti, ɔci dala ɛkkɛ myettɛ ɛkɛ te jyek ɔɔn, ɔci dala ɛkkɛ yomgɔ ñɔya ɔci yomgɔ tɛya. ²³ Modg ikin waakɛndayɛ, dala ɛkkɛn ‘wondɛ Juaŋ coodda pwadan. Ɔci anna Juaŋ ani mayɛ, dala oldɛ ɛkɛ ɛkkɛn yomgɛnti daŋkun. Ɔci dala Juaŋ ɛkkɛn ‘wondɛ jyek jyeni daŋkun. Dala waka neeni bɛya mati te Wey ikin Juaŋti, ɔci te Ciɛggɔn ikin Yaccu Kiṭɔti moki. ²⁴ Maka ani Ciɛggɔn ikin Yaccu Kiṭɔ ne pwadan oŋkandayɛ, dala Juaŋ yomɛ pwada a pwani ɛkkɛnti waakɛnda.