Kuluci

¹ Gena ‘ya Buuluc, cuuda Yaccu Kiṭɔ te yom Jwaŋa Tolan, ɔci mod ikin Timutawuc, kienɔn worga ɛkkɛti neeni. ² Ɛkkɛ agɛ modg ɔɔn Ma Kiṭɔ maka ban Kuluci, maka pwadin maka jyettɛ Kiṭɔtiy. Dala Jwaŋa Tolan Wey ikin yomɛ pwada a pwani ɛkkɛti, ɔci dala ɛkɛ ɛkkɛ ‘wondɛ coodda pwadan. ³ Oŋkandayɛ, ɔɔn gɔkin a pwatcin ne ɔɔn cɔkɔn Jwaŋa Tolan Wey Ciɛggɔn ikin Yaccu Kiṭɔti te ɛkkɛy. ⁴ Acaan ɔɔn tieŋnɔn jiek te jyenna ɛkkɛ jyettɛ Yaccu Kiṭɔti, ɔci te jyek anna ɛkkɛ anɛ Ma Kiṭɔ waakɛnday. ⁵ Jyek jyeni ɔci jyek ani neeniyɛ, bala ɛkkɛti acaan ɛkkɛ jyettɛ balgɛ kɛɛyɛ te coodda ne baaṭi coodda ciedɛ ɛkkɛ ñaalɔy. Paŋŋa neeni bɛɛn ɛkkɛti te oŋŋa ɛkkɛ tieŋnɛ jyeka wonkɛn jyeka pwadin jyeka awarɛy. ⁶ Jyeka wonkɛn jyeka pwadin neeni bɛɛn mati ṭɛɛr konɛ warda, ɔci bala eci naŋka pwadin ma yomgɛnti Ɔci jyeka neeni bala ciɛñ a ciɛñi gɔ moki ciɛñcin ñamu ɔɔn. Te oŋŋa ɛkkɛ tieŋnɛ, ɔci ne acca ɔɔnyɛ, jyeka neeni bala etti naŋka pwadin oŋkanda ɛkkɛti. Acaan ɛkkɛ mwokɛ yom pwani Jwaŋa Tolan ɛkkɛti. ⁷ Ɛkkɛ tieŋnɛ jyeka neeni te Epapracti. Ɛkɛ a kɛɛngɔn Kiṭɔ ba ikin ɔɔn. Ikin anin ɛkɛ. Ɛkɛ bala noŋi ba jyek Kiṭɔ ɔci loṭi ɛkkɛ ne pwadan aŋka ɛkɛ moki ‘ya. ⁸ Ɔci ɔɔn nɔɔnnɔn ɛkɛ te naŋki Boŋ Jwaŋa Tolan ɛkkɛ yomgɔti agi ɛkkɛ anjɛ ma ne tolan. ⁹ Ɔci acaan a ɔŋŋiyɛ, ɔɔn balgɔn cɔkɔn Jwaŋa Tolanti te ɛkkɛ oŋkanda te oŋŋa ɔɔn tieŋnɔn jyek ɛkkɛ neeni, ɔci ne acca ɔɔn. Ɔɔn balgɔn cɔkɔn Juaŋti ka dala ɛkkɛ ‘wondɛ ɛkɛ ñing tɛɛn ɛkɛ aŋka ɛkkɛ jyeka loṭi Boŋ Jwaŋa Tolan ŋeeddɛ, ɔci aŋka dala ɛkkɛ yom Juaŋ ŋeeddɛ ne pwadan. ¹⁰ Ɔɔn balgɔn cɔkɔn Juaŋti a ɔɔn aŋka dala ɛkkɛ ciedɛ ba coodi ɛkɛ. Ɔci a ɔɔnyɛ, coodi ɛkkɛ pwada Juaŋti. Ɔɔn cɔkɔn Juaŋti ka dala kanŋa kandɛ ɛkkɛ waakɛnda neeniyɛ, etti naŋka pwadan. Ɔci ɔɔn cɔkɔn Juaŋti moki ka dala Juaŋ ŋeeddɛ ɛkkɛ ne pwadan gɔ moki ŋeejjɛ ɔɔn te naŋki ɛkɛ, ɔci te yom pwani ɛkɛ. ¹¹ Dala ɛkkɛ ‘wondɛ Juaŋ war tɛɛn ɛkɛ war tɛɛn tolan neeni aŋka dala ɛkkɛ yomgɔ tiektɛ ne pwadan aŋka ne jwali gɛɛl bɛɛdi ɛkkɛtiyɛ, ɔci ɛkkɛ yaakɛti yɔɔdɛ ne tɛyan te yom pwani Jwaŋa Tolan, ɔci ma jieddi Juaŋ te naŋki ɛkkɛ neeni. ¹² Ɔci te naŋki ɛkɛ neeniyɛ, dala ɛkkɛ gɔktɛ a pwatcin Wey ikinti oŋkanda, acaan ɛkkɛ muonɛ ɛkɛ bora naŋŋɛ ɛkɛ a maka ciyi te nona bɔwan. ¹³ Te ñamu ikin agin ma ciɛggɔn nona mielo, yeti ikin wɛɛnin Jwaŋa Tolan bora, ɔci eññin ḍuannin non Kaci ɛkɛ, Kacca ondɛ ɛkɛ aŋka tieŋtin gena jyek ɛkɛ parɛ. ¹⁴ Ikin wannin Kaci ɛkɛ, ɔci ikin bɔɔŋnin ɛkɛ te nɔji ikin. ¹⁵ Jwaŋa Tolanyɛ, ɛkɛ yuarɛ ma te woŋgɛn bɛɛ. Yeti Kiṭɔyɛ, ɛkɛ a Jwaŋa Tolan waanɛ, ɔci ɛkɛ warɛ aaŋŋɛ aŋi men baan aŋka ɛkɛ yuarkiti ma ne pwadan neeni. Kiṭɔ ɛkɛ a Ciɛggɔn waka cɔnnɛ Juaŋ neeni waakɛnda. ¹⁶ Waak cɔnnɛ Juaŋ te Kiṭɔ waakɛnda waka ṭɛɛrji yuartin ikin te woŋgɔ, ɔci waka ñaalɔ pɔliji waka yuartin ikin te woŋgɔ bɛɛ, ɔci jɔkin waakɛnda ɛkkin ḍwaŋin i ɛkkin ḍyɛrin. Ɛkkɛn bɛɛn te Kiṭɔ aŋka ɛkɛ jiɛtan ma te waak waakɛnda. ¹⁷ Ne waak waakɛnda baaki menyɛ, ɛkɛ doki bala. Waak waakɛnda bala te nonk ɛkkɛnti te war tɛɛn ɛkɛ. ¹⁸ Kiṭɔyɛ, ɛkɛ a ḍuaŋa acaan ɛkɛ a wyeñ ma kaniican. Ma kaniican ɛkkɛn ciyi tɛɛti te Yaccu Kiṭɔ, ɔci ɛkkɛn a war ɛkɛ. Gena ɛkɛ a mena bɔɔni lien te ñamu aŋka jyek ɛkɛ balki ñamu te jyek waka pookɛn waakɛnda neeni. ¹⁹ Te yom Jwaŋa Tolanyɛ, Kiṭɔ bolji Jwaŋa Tolan lɛɛlnɛ bora warda. ²⁰ Ɔci moki te yom Jwaŋa Tolan te naŋki Kiṭɔ te oŋŋa yimg ɛkɛ kɛɛki iñɔyɛ, Juaŋ ŋeewin i ma baan doki, ɔci ŋeewin i waka bala iñɔ ṭɛɛrji wɛnni, ɔci ŋeewin i waka bala ñaalɔ pɔliji moki. ²¹ Ɔci ɛkkɛ, te ñamuyɛ, ɛkkɛ balgɛ ɔntɔ te Jwaŋa Tolanti, ɔci paŋi ɛkkɛ da bala ɔntɔ pookɔ moki. Ɛkkɛ yookɛ te Jwaŋa Tolan, ɔci naŋki ɛkkɛ moki yeyɔ. ²² Yeti acca ɛkkɛ ŋeenɛ i Jwaŋa Tolan doki te lyena tuuni Kiṭɔ kakanti neeni. Yaccu tuun te ɛkkɛ aŋka ɛkkɛ agdɛ maka pwadin ne tolan Jwaŋa Tolan ñamɛti. ²³ Ɔci acaan a ɔŋŋiyɛ, ɛkɛ buagɔn dala ɛkkɛ yɔɔddɛ ne tɛyan oŋkanda te jyenna ɛkkɛ jyettɛ Jwaŋa Tolanti neeni. Ɔci ɛkɛ buagɔn naa yɔɔta ɛkkɛ yɔɔññɛ Juaŋ neeni daldɛ bɛɛ. Ɛkkɛ tieŋnɛ jyeka wonkɛn jyeka pwadin neeni doki. Ɔci jyeka wonkɛn jyeka pwadin neeni ati ṭɛɛr konɛ warda. Ɔci ‘ya Buuluc neeniyɛ, ‘ya a mena noŋi kanŋa jyeka neeni. ²⁴ Ne ‘ya balkati taab te ɛkkɛ ɔɔnyɛ, ‘ya yomu ñɔy ñɔy men ɔɔn acaan taab ‘ya neeni etti pwani ɛkkɛti. Taab ‘ya neeniyɛ, bala ba taab Yaccu. Taab bala ɛkɛti te ma kaniica ɛkɛ. Ɔci ‘ya daŋkun taabba aŋka ma kaniica magdi ne coŋɔn. ²⁵ Juaŋ ‘ya naŋŋa a mena noŋi kanŋa ma kaniicati, ɔci ‘ya naŋŋa Juaŋ a cuuda noŋ kanŋa ɛkkɛti. Ɛkɛ buagɔn dala ‘ya ɛkkɛ myettin te jyek ɛkɛ waakɛnda. ²⁶ ’Ya cuonna ɛkɛ aŋka ‘ya ɛkkɛ myettin te jyeka naŋŋɛ Juaŋ te baaṭi jitkɛn a coggin matiy. Jyeka neeni lɛɛlnɛ ɛkɛ bora acca. Ɛkɛ buagɔn ‘ya ɛkkɛ myettin te ɛkkɛn ne pwadan. Ɛkɛ Keedin Pookɛn yɔɔññɛ te baaṭi te yuonga ati coŋin waayi bɛɛ. Yeti acca ɛkɛ buagɔn dala ma ɛkɛ waakɛnda jwalla neeni ŋeettan. ²⁷ Ɛkkɛ Keedin Pookɛnyɛ, jyeka coggin neeni oonɛ Juaŋ bora ɛkkɛti aŋka ŋeeddɛ ɛkkɛ jyeka neeni pwadɔ ne tolan. Jyeka bɛɛn bora neeniyɛ, gena Kiṭɔ mena bala ɛkkɛ yomgɛti neeni. A ɔŋŋi ɛkkɛ yaakɛti ciyɛ kɛɛyɛ oŋkanda ɔɔn, aŋka ɛkkɛ kaattɛ ban Jwaŋa Tolan. ²⁸ Ɔɔn moki balgɔn mietɔn ma oŋkanda te jyek ɛkɛ. Ɔɔn balgɔn ṭeyɔn ma waakɛnda, ɔci ɔɔn balgɔn loṭɔn ma waakɛnda te jiek acaan ɔɔn buagɔn dala ɛkkɛn oodɔn Jwaŋa Tolan ñamɛti pwadgin a pwadgin. ²⁹ ’Ya kanŋ ne pɛñan waru byerŋa byerŋ te kanŋa te war tɛɛn ɛkɛ ‘ya yomuti.

¹ Dala ŋeeddɛ ɛkkɛ ‘ya baal kanŋ te ɛkkɛ ne tolan, ɔci te Ma Kiṭɔ maka ban Lɛyoduciiya daŋkun. Ɔci ‘ya baal kanŋ moki te Ma Kiṭɔ maka yuarŋ ‘ya te woŋgu ‘ya men bɛɛy. ² ’Ya buaga dala ɛkkɛ ciedɛ te yoma ñɔyan oŋkanda, ɔci dala ɛkkɛ oondi yɔtin pookɔ. Ɔci dala ɛkkɛ jyek Juaŋ ŋeeddɛ ne pwadan, ɔci jyeka naŋŋɛ Jwaŋa Tolan te baaṭi jitkɛn a coggin neeni ŋeeddɛ ne pwadan, jyeka neeniyɛ, gena Kiṭɔ waanɛ. ³ Jyek ñing tɛɛn bɛɛn te ɛkɛti, ɔci ɛkɛ a mena jiek ŋeejɛ waakɛnda. ⁴ ’Ya ɛkkɛ myennin a ɔɔn aŋka naa ma gɛɛg ɛkkɛ maaltɛ ɛkkɛn ɔntɔ te lɛmma milan bɛɛ. ⁵ Ne ‘ya baawa ɛkkɛti te war ‘ya waanɛ jiñɛyɛ, ‘ya baal ba ne ikin balkin iki ‘ya a cyɛɛlɔ te booŋ no. Ɔci ‘ya yomu ñɔɔna ñɔɔn te yɔɔdda ɛkkɛ yɔɔnnɛ ne tɛyan te jyenna ɛkkɛ jyettɛ Kiṭɔti neeni. ⁶ Ɛkkɛ jyettɛ Yaccu muŋŋɛ yomgɔti doki aŋi Ciɛggɔn ɛkkɛ, a ɔɔnyɛ, dala ɛkkɛ ciedɛ ne pwadan ɛkɛti oŋkanda ɔɔn. ⁷ Dala ɛkkɛ yɔɔddɛ ne tɛyan te jyek Yaccu Kiṭɔ ba jana bɛɛkkɛ ati iñɔ ne pwadan. Ɔci dala ɛkkɛ ‘uottɛ ñamu te jyek ɛkɛ. Dala jyeni ɛkkɛ tɛya gɔ moki tɛyi ɔɔn te jyek ɛkɛ, ba naŋka ɛkkɛ lallɛ Ɛpaprac te ñamu wanna ɔɔn. Ɔci dala ɛkkɛ gɔkɛ a pwatcin Juaŋti oŋkanda te jyeka neeni. ⁸ Dala ɛkkɛ woŋgɔ tiittɛ, naa ɛkkɛ jyɛttɛ ɔntɔ maka loṭi ma te Jwaŋa Tolan amaam te jyeka pookɛn neeni bɛɛ. Jyeka lorki ɛkkɛn ma neeni a jyek naŋki ma baan ṭɛɛr wyeñɛti wɛnni budan. Dala ɛkkɛ woŋgɔ tiittɛ acaan jyeka neeni bɛɛn te Kiṭɔti bɛɛ, ɛkkɛn pɛɛdan i jyek Kiṭɔ. ⁹ Juaŋ warɛ lɛɛlnɛ bora warda ikinti te lali Kiṭɔ oŋŋa ɛkɛ aŋŋi men baan, ɔci baali ciyin iki ikin ba men baany. ¹⁰ Ɔci acaan ɛkkɛ agɛ Ma Kiṭɔ dokiyɛ, ɛkkɛ balkɛ coodda pwadin waakɛnda. Gɔṭṭɛ, Kiṭɔyɛ, ɛkɛ a Ciɛggɔn jɔkin waakɛnda, ɔci moki ɛkɛ a Ciɛggɔn ḍuaŋan waakɛnda. ¹¹ Ɛkkɛ maka bala Yaccutiyɛ, ɛkkɛ balkɛ jyek ŋwoti daŋkun. Yeti jyek ŋwotta neeniyɛ, gena naŋka naŋtan ma te byeŋkɛn bɛɛ. Gena naŋka naŋdɛ Kiṭɔ ma yomgɛnti, ɔci naŋka neeni aŋka yɔmjin acaan yomg ɛkkɛ yomga te baaṭi neeniyɛ, eññɛ ɛkɛ ɔntɔ doki. ¹² Ɔci ba jyek bulti ɛkkɛyɛ, bala ba jyek lyen ɛkkɛ daŋkun. Lyen Yaccu aŋi ba lyen ɛkkɛ, ɔci jɔŋŋin ɛkɛ jɔŋni ñaalɔyɛ, aŋi ba jɔŋŋin ɛkkɛ daŋkun. Naŋka neeni bala ɛkkɛti acaan ɛkkɛ jyettɛ Jwaŋa Tolanti. Te jyenna ɛkkɛ jyettɛ Juaŋti neeniyɛ, ŋeejɛ ɛkkɛ war tɛɛn ɛkɛ tolla tollo. Yaccu luolnɛ ɛkɛ ñaalɔ te war tɛɛn ɛkɛ. ¹³ Te ñamu ɛkkɛ balgɛ ba maka tuutan te nɔji ɛkkɛ. Ɔci yomga yeyin eññɛ Kiṭɔ men bɛɛ. Yeti acca ɛkkɛ unnɛ iki Kiṭɔ a cyɛɛlɔ te naŋki Jwaŋa Tolan ɛkkɛti. Ikin bɔɔŋnin ɛkɛ te nɔji ikin waakɛnda. ¹⁴ Ikin noŋŋin nɔji waakida, ɔci jiek dɔɔkkin ikin wyetkɔti te nɔjja neeni, ɔci yeti jyeka neeni nuunnɛ ɔntɔ Juaŋ te ikinti te oŋŋa Yaccu tuuni ñaalɔ kakantiy. ¹⁵ Ɔci te oŋŋa wannati ɔɔn daŋkunyɛ, Jwaŋa Tolan Jwaŋa Yaayan buannɛ i ma ɛkɛ. Gɔṭṭɛ, Jwaŋa Tolan oŋ warɛ jaaññɛ bala lɔti ɛkkɛn te wyeng ba kɛɛnka kwayɛ ma te nona loonan. Ɛkɛ bala lɔti ɛkkɛn malɛɛkan ñomgɛnti. ¹⁶ A ɔŋŋiyɛ, ‘ya gɔkka ɛkkɛti, ne ɛkkɛ tiecɛ waka neeni waakɛn bɛɛyɛ, naa menga wooki ɛkkɛ te naŋki ɛkkɛ wanna bɛɛ. Waka neeni gena waka tiitanyɔ Ma Yahuudy, ɔci waka neeniyɛ, gena ami oomdin gɛɛg ɔci waka maattan ma gɛɛg, ɔci iidn Ma Yahuud, ɔci iid paan waŋɛ oŋkanda, ɔci Oŋ Cabit. Naa menga wooki ɛkkɛ te waka neeni bɛɛ. ¹⁷ Naŋki tiit ninka neeniyɛ, bala ba ṭiebji naŋka bɛyay. Ɔci naŋka bɛya neeniyɛ, gena Kiṭɔ. Jyek ɛkɛ aŋka awarɛ, dala tiitinyɔ. ¹⁸ Naa ɛkkɛ jyɛttɛ ma ɔntɔ te malla awarɛti neeni bɛɛ, acaan ma gɛɛg poŋi gɔki agi waka yuarɛ ɛkkɛn te loggin neeniyɛ, a jyeka awarɛ. A ɔŋŋiyɛ, maka neeni buagɔn ɛkkɛ waakɔ dɔɔdɛ iñɔ, ɔci ɛkkɛ mortɛ malɛɛkanti. Ɔci ɛkkɛn bala poŋi amaam budan, ɔci ɛkkɛn yomgɛn ḍwaŋgin. ¹⁹ Ɔci ɛkkɛn kɛpcin ɔntɔ yookɔn te jyek Kiṭɔ wyeñ kaniica. Ma kaniica aga maka ne cyɛɛlɔ te wyeñ ɛkkɛn neeni. Ɔci ɛkkɛn ‘uotti ñamu, ɔci kaniica naŋdɛ Jwaŋa Tolan tɛya te Kiṭɔ. ²⁰ Ɔci gɔṭṭɛ, naa ɛkkɛ ciyɛ ba ne ɛkkɛ agɛ kɛɛgin iñɔ baanji ṭɛɛrji wɛnni moki bɛɛ. Ɔci naa ɛkkɛ tyeŋɛ jyeka naŋtan ma iñɔ ṭɛɛrji baanji moki bɛɛ. Acaan te oŋŋa ɛkkɛ tuunɛ iki Kiṭɔyɛ, paŋŋa bala iñɔ ṭɛɛrji, ɛkɛ a paŋi ɛkkɛ moki bɛɛ. Maka iñɔ wɛnni ɛkkɛn gɔki agi, ²¹ “Naa i gena neeni luolla ñaalɔ bɛɛ.” Ɔci moki agi, “Naa i topci gena neeniti bɛɛ.” Ɔci moki agi, “Naa i dɛcca gena neeni bɛɛ.” Naa ɛkkɛ tieŋdɛ jyek ɛkkɛn neeni bɛɛ. ²² Naa ɛkkɛ tieŋdɛ jyeka dɛɛki Ma Yahuud te naŋki waka coŋin wanna bɛɛ. Acaan waka neeni ɛkkɛn a waka baadi lakun budan ne ikin noŋin ɛkkɛny. Ɔci naa ɛkkɛ tieŋdɛ jiek ṭɔlgɛn naŋɛ ɛkkɛn te waka neen neeni bɛɛ, acaan ɛkkɛn ‘wonnɛ Juaŋ jyeka neeni bɛɛ. Yeti jyeka neeni naŋɛ ɛkkɛn pookɛn a jyek ma baan budan. ²³ Ɔci naa ɛkkɛ tieŋdɛ jyek ɛkkɛn wanna bɛɛ, acaan jyeka wanna ma naŋtan noŋdi nɔji ba naŋka yomg ɛkkɛn yomga yeyin wanna buagɛ men ɔɔn, ɔci moki ba bolja ɛkkɛn balki poŋki agi ma ñingɛn tɛyɔ te naŋki jyeka neeni ɔɔn. Ɛkkɛn poŋi ‘wota gɔkɛ agi kan ɛkkɛn waakɛn dɔɔdinti iñɔ Jwaŋa Tolan ñamdanti, ɔci moki agi kan ɛkkɛn waakɛn jyebdinti jitin te nɔji ɛkkɛn, ɔci agi kan ɛkkɛn mortɛnti Juaŋti ba naŋki ma ɛkkɛnyɛ, agi a ɔɔn ɛkkɛn ñingɛn tɛyɔ katan.

¹ Gɔṭṭɛ, dala yomg ɛkkɛ buagdɛ jyek waka bala ñaalɔ nona ciyi Kiṭɔy. Acaan ɛkkɛ jɔŋnɛ ñaalɔ iki Yaccu Kiṭɔ a cyɛɛlɔ. Ɛkɛ bala ciyi Jwaŋa Tolan taaŋɛti taaŋŋa byerɔn acaan ɛkɛ naŋŋɛ Juaŋ a Ciɛggɔn Tolan. ² Ɔci oŋkanda ɔɔnyɛ, dala ɛkkɛ poŋdɛ jyek waka bala ñaalɔ neeni. Naa ɛkkɛ poŋdɛ jyek naŋka naŋtan ma yeyin iñɔ wɛnni ṭɛɛrji bɛɛ. ³ Acaan ɛkkɛ tuunɛ doki, ɔci tɛɛtin ɛkkɛ tɛɛtin Kiṭɔ neeniyɛ, bala Juaŋti. ⁴ Kiṭɔ mena tɛɛtin ikin neeniyɛ, ne oŋŋa ɛkɛ bɛɛdi warɛ lɛɛldɛ borayɛ, ɔci ɛkkɛ daŋkun baldɛ ba ɛkɛ te pwani ɛkɛ ñaalɔ pɔliji. ⁵ Yomg ɛkkɛ yomga te baaṭi neeniyɛ, dala nogdɛ tuwa baadi. Naŋki yoma te baaṭi neeniyɛ, gena tomi, ɔci wɛlji, ɔci yoma ulan, ɔci tomi maka ‘uayiti, ɔci bwakti naŋka yeyin neeni, ɔci war ḍiŋŋo, ɔci yom ḍɔŋ te waako. Mena buagɔn wak mena parɛ naŋki ɛkɛ bala ba mali jɔkin yeyin, waka pɔɔtan ma a pɔɔto. ⁶ Naŋka yeyin neeniyɛ, etti ywobji Jwaŋa Tolan maka noŋi naŋka neeniti. ⁷ Ne ɛkkɛ aŋŋɛ Ma Kiṭɔ men bɛɛyɛ, ɛkkɛ balgɛ ciyɛ ba coodda yaayan neeni ɔɔn. ⁸ Yeti accayɛ, dala ɛkkɛ mwondɛ te loñko, ɔci kon cyɛñño, ɔci yom yoño, ɔci waaŋi maka pookɛn. Naa jyeka yeyin bala ɛkkɛ tuggɔti bɛɛ. ⁹ Naa ɛkkɛ joommɛ yɔtin pookɔ bɛɛ. Naa ɛkkɛ noŋɛ waka neeni moki bɛɛ, acaan ɛkkɛ yoma te baaṭi neeni olnɛ ɔntɔ iki naŋki ɛkɛ ɔɔn. ¹⁰ Ɔci acaan ɛkkɛ ‘wonnɛ Jwaŋa Tolan yoma woonɛ, ɔci yoma woonɛ neeni ciɛñ a ciɛñi gɔ moki ciɛñji ñamu ɔɔn ne ɛkɛ Juaŋ ŋeeddɛ ne pwadan ɔɔn. Yoma neeni warɛ agdɛ aga ba mena oki ɛkiy. ¹¹ Kan yoma woonɛ neeni bala ɛkkɛtiyɛ, ɛkkɛ menga yaakinti gɔkti moki agi Keedin Pookɛn aŋka pwadgɔ, walla Ma Yahuud pwadgɔ bɛɛ. Ɔci walla menga gɔkti agi maka balki jyek ŋwoti ɔci bɔɔrk aŋka pwadgɔ bɛɛ. Ɔci walla menga gɔkti agi maka ani ṭwaŋ oŋ aŋi Ma Kiṭɔ neeni, ɔci walla agi maka kɛɛnk aŋka pwadgɔ bɛɛ. Acaan Kiṭɔ bala ikinti waakida. Ɔci Ma Kiṭɔ ɛkkɛn bala bolja ne cyɛɛlɔ waakɛnda. Yeti Kiṭɔ aŋka bala ñamu ne tolan te waak waakɛnda. ¹² Ɛkkɛ muonɛ Juaŋ bora aŋŋɛ ma ɛkɛ maka anɛ ɛkiy. Ɔci acaan a ɔŋŋiyɛ, dala ɛkkɛ yomgɔ bala mati. Ɔci dala ɛkkɛ noŋdɛ ne pwadan mati. Ɔci naa ɛkkɛ noŋɛ waakɔ bɛɛ. Dala ɛkkɛ tuggɔ luucin. Dala ɛkkɛ loomgɔ tɛɛcin. Dala ɛkkɛ bɔyyɛ yɔtin pookɔ. Kan men gɛɛl ɛkkɛti balki jwali gɛɛl te naŋki mena parɛyɛ, dala ɛkɛ mena parɛ neeni bɔɔktɛ. Bala ba ne ɛkkɛ bɔɔŋnɛ Ciɛggɔn ɛkkɛyɛ, dala ɛkkɛ maka pookɛn neeni bɔɔktɛ daŋkun. ¹⁴ Jwali gɛɛl bala ñamu agi dala ɛkkɛ oonji yɔtin pookɔ. Ɔci te jyek oonnin ɛkkɛ oonni yɔtin neeniyɛ, ɛkkɛ yaakɛti coodɛ a cyɛɛlɔ ne pwadan oŋkanda ɔɔn. ¹⁵ Dala coodi pwani bɛya te Kiṭɔti neeni aga ba ciɛggɔn ɛkkɛ yomgɔti. Ɛkkɛ muonɛ Juaŋ bora aŋka ɛkkɛ agdɛ maka ne cyɛɛlɔ, ɔci Jwaŋa Tolan buagɔn dala ɛkkɛ ciedɛ te coodi pwani waakida. Ɔci dala ɛkkɛ gɔkɛ Juaŋti a pwatcin oŋkanda. ¹⁶ Dala jyek Kiṭɔ bala ɛkkɛ yomgɔti ne pwadan oŋkanda ɔɔn. Dala ɛkkɛ loordɛ yɔtin pookɔ te jyek ɛkɛ. Ɔci moki dala ɛkkɛ ṭeewɛ yɔtin pookɔ te ñing tɛɛno. Dala ɛkkɛ ‘ualdɛ Jwaŋa Tolanti, ɔci dala ɛkkɛ jieddɛ ɛkɛ te jyek ɔɔlgo, ɔci dala ɛkkɛ ‘ualdɛ ɔɔlga loṭi Boŋ Jwaŋa Tolan may. Ɔci gɔktɛ a pwatcin Juaŋti te yoma awarɛ. ¹⁷ Kan ɛkkɛ noŋdɛ gengayɛ, dala ɛkkɛ noŋdɛ te yenti Ciɛggɔn ikin Yaccu. Ɔci moki kan ɛkkɛ gɔktɛ gengayɛ, dala ɛkkɛ gɔktɛ te yenti Ciɛggɔn ikin Yaccu. Ɔci dala ɛkkɛ gɔkɛ a pwatcin te yenti Yaccu Wey ikin Jwaŋa Tolanti. ¹⁸ Moongo, dala ɛkkɛ tieŋdɛ jyek ‘uay ɛkkɛ. A ɔɔn pwatcin Ciɛggɔnti. ¹⁹ ’Uayo, dala ɛkkɛ andɛ moong ɛkkɛ. Naa ɛkkɛ gɔkɛ ɛkkɛn ɔɔrndɛ a ɔɔrŋin bɛɛ. ²⁰ Kɛɛgin, dala ɛkkɛ noŋdɛ ba jyek mɛyyɔ ɔci ba jyek weyyɔ. A ɔɔn pwatcin Ciɛggɔnti. ²¹ Kɛɛgin weyyɛn ɔci mɛyyɛn, naa ɛkkɛ gɔkɛ ‘yeṭɛ kɛɛginti a ñaccu ɔɔn nɔñji bɛɛ. Kɛɛgin yomgɛn tuwa dita. ²² Hay, maka kɛɛnko! Dala ɛkkɛ noŋdɛ ba jyek kanŋa weyyɛn iñɔ wɛnni ṭɛɛrji oŋkanda. Naa ɛkkɛ noŋɛ kanŋa ne pwadan te kanŋa weyyɛn ñingɛnti budan aŋka ɛkkɛn gɔkti agi ɛkkɛ pwadjɛ bɛɛ. Dala ɛkkɛ kandɛ te yoma awarɛ, ɔci buattɛ Jwaŋa Tolan. ²³ Ne ɛkkɛ balgɛ noŋɛ kanŋa neeniyɛ, dala ɛkkɛ noŋɛ te yoma awarɛ, ɔci poŋdɛ kanŋa neeni a kanŋa Kiṭɔ. Gena kanŋa ma baan budan bɛɛ. ²⁴ Dala ŋeeddɛ ɛkkɛ gena Ciɛggɔn ikin ɛkkɛ ‘wondɛ gena ma ḍuaññɛ ɛkɛ neeni ne baaṭi te kanŋa ɛkkɛ neeni, acaan kanŋa weegɛn waanɛyɛ, gena Ciɛggɔn ikin Yaccu Kiṭɔ. ²⁵ Kan men gɛɛl noŋi ne yaayan, kan ɛkɛ a mena ḍiɛran walla kan ɛkɛ a mena daanyɛ, Jwaŋa Tolan jiek oldɛ ɛkɛ wyeñɛti ɔɔn.

¹ Kanŋa weyyɛn, dala ɛkkɛ noŋdɛ ne pwadan kɛɛnk ɛkkɛti. Naa ɛkkɛ ɛkkɛn amdɛji bɛɛ. Acaan ɛkkɛ daŋkun balkɛ Weya gɔṭi ɛkkɛ ñaalɔ daŋkun. ² Dala ɛkkɛ cɔktɛ Jwaŋa Tolanti oŋkanda ɔɔn. Ɔci ne ɛkkɛ cɔktɛyɛ, dala ɛkkɛ woŋgɔ tiittɛ te cɔŋi ɛkkɛ oŋkanda. Ɔci dala ɛkkɛ gɔktɛ a pwatcin ɛkɛti. ³ Ɔci ne ɛkkɛ cɔktɛyɛ, dala ɛkkɛ cɔktɛ te ɔɔn daŋkun. Dala ɔɔn noŋdɔn Juaŋ pɔy aŋka ɔɔn mietɔn ma te jyeka pwadin. Gena jyek Kiṭɔ mena cuonnɛ Jwaŋa Tolan yuoci ma, jyeka bɛɛn bora acca neeni. A ɔŋŋiyɛ, dala ɛkkɛ cɔktɛ te ‘ya Buuluc acaan ‘ya baal ciginji te jyeka neeni. ⁴ Dala ɛkkɛ cɔktɛ Jwaŋa Tolanti aŋka ‘ya jiek owwa bora ne pwadan mati ba bolja Jwaŋa Tolan buagɛy. ⁵ Dala ɛkkɛ woŋgɔ tiittɛ te naŋki ɛkkɛ ɔci te jyek ɛkkɛ, ne ɛkkɛ balgɛ gɔwwɛ iki maka pookɛn maka ciyi budan te jyek Jwaŋa Tolany. Dala wɔɔkan ṭɔlgɛn yuardɛ ɛkkɛyɛ, oldɛ loṭi ɛkkɛ ma waakɛnda. ⁶ Dala ɛkkɛ gɔktɛ maka neeniti te lɛmma pwadan oŋkanda. Naa ɛkkɛ gɔkɛ amaam budan bɛɛ. Dala ɛkkɛ poŋdɛ jiek ñamu oŋ ɛkkɛ oŋ ṭwoktɛ mati te jyeka tootti ɛkkɛn ɛkkɛti te Kiṭɔ neeni. ⁷ Ɛkkɛ nɔɔttɛ Ticcikoc te jyek ‘ya waakɛnda. Ticcikoc neeniyɛ, ɛkɛ a mod ikin moda ana ‘yay. Ɛkɛ a mena tieci kanŋan waakɛn. Ɛkɛ bala kanŋin iki ‘ya a cyɛɛlɔ te kanŋa Jwaŋa Tolan. ⁸ ’Ya ɛkɛ cuoñña ɛkkɛti acaan ‘ya buaga dala ɛkkɛ myettɛ ɛkɛ te jyek ɔɔn aŋka dala ɛkkɛ yomgɔ tɛya te jyek ɛkɛ ɛkkɛti. ⁹ Ɛkkɛn bɛya iki Ɔnɛɛcimac. Ɔnɛɛcimacyɛ, bala tieci kanŋan ɛkɛ waakɛn ‘yati daŋkun. Ɛkɛ a mod ikin acca, ‘ya an ɛkɛ. Ɛkɛ a maka ban ɛkkɛ. Maka neeni yaakkɛnyɛ, ɛkkɛn ɛkkɛ myettɛ te jyek ɔɔn waakɛnda. ¹⁰ Mod ikin Erictaarkoc mena balgin iki ‘ya ciginji wɛnniyɛ, ɛkɛ ñiepi ɛkkɛ. Ɔci Mark ñaakan Barnabac ñiepi ɛkkɛ daŋkun. Ne ɛkɛ bɛɛdi ban ɛkkɛyɛ, dala ɛkkɛ ɛkɛ ñiibdɛ ne pwadan ba bolja ‘ya ɛkkɛ myennin te jyek ɛkɛ dokiy. ¹¹ Jicac mena bartan ma agi Jactac neeniyɛ, ɛkɛ ñiepi ɛkkɛ daŋkun. Maka ḍokkɛn neeniyɛ, ɛkkɛn a Ma Kiṭɔ maka a Ma Yahuud. Ɔci ɛkkɛn bala kanŋin iki ‘ya te jyek Jwaŋa Tolan. Ɛkkɛn ‘ya makka ne pwadan, ma ɔɔn Ma Yahuud maka pookɛn gɛɛg bala moki wɛnni bɛɛ. ¹² Ɛpaprac men ɛkkɛyɛ, ɛkɛ ñiepi ɛkkɛ ne tolan. Ɛkɛ a mena noŋi kanŋa Yaccu Kiṭɔ. Ɛkɛ bala cɔki Juaŋti te ɛkkɛ oŋkanda ne tolan agi dala ɛkkɛ yɔɔdjɛ ne tɛyan, ɔci agi dala ɛkkɛ jyek Juaŋ ŋeejjɛ ne pwadan, ɔci agi dala yomg ɛkkɛ bwagda naŋki yom Juaŋo. ¹³ Naŋki ɛkɛ ŋeej ‘ya ne ɛkɛ baali kanŋi kanŋa Juaŋ ne tolan ɛkkɛti, ɔci ne ɛkɛ baali kanŋi maka pookɛnti daŋkuny. Gena Ma Kiṭɔ maka ban Lɛyoduciiya ɔci ban Yarɔɔpolic. ¹⁴ Luuk mena a kiimi mena anin ikin, ɛkkɛn yaakkɛn i Dimacyɛ, ɛkkɛn ñiepi ɛkkɛ. ¹⁵ Dala ɛkkɛ maka ban Lɛyoduciiya ñiibdɛ te ‘ya. Ɔci Nimpac ñiibdɛ te ‘ya daŋkun iki maka ḍwoṭi wyetkɛn on ɛkɛ te jyek Juaŋy. ¹⁶ Ne ɛkkɛ ḍoodɛ te paŋi worga ‘yayɛ, dala ɛkɛ paktan ma kaniicati ban Lɛyoduciiya. Ɔci worga bɛɛn te ban Lɛyoduciiyayɛ, dala ɛkkɛ poktɛ ɛkɛ daŋkun. ¹⁷ Ɔci gɔṭṭɛ, dala ɛkkɛ gɔktɛ Arkippocti agi dala ɛkɛ waŋɛ tiittɛ te kanŋa ɛkɛ kanŋa ɛkɛ ‘wonnɛ Kiṭɔy. ¹⁸ Gena ‘ya Buuluc kiewan jwali ṭɔɔlɛ neeni ɛkkɛti te byeŋ ‘ya paru neeni, aŋka ‘ya ñiep ɛkkɛ. Naa ɛkkɛ ñingɔ yeya te ‘ya ciginji wɛnni bɛɛ, dala ɛkkɛ cɔktɛ te ‘ya! Dala Jwaŋa Tolan ɛkɛ yomɛ pwada a pwani ɛkkɛti.