Naŋki Cuudan

¹ Tiyɔɔpiloc, worga parɛti ‘ya kiewan iti te jyeka loṭi Yaccu ma, ɔci te naŋka naŋŋɛ ɛkɛ waakɛnda te oŋŋa ɛkɛ jɔɔnni, ² ɔci ne oŋŋa ɛkɛ atti ñaalɔ ɔɔn. Yeti ne Yaccu atti ñaalɔ men bɛɛyɛ, ɛkɛ maka muonɛ ɛkɛ bora naŋŋɛ a Cuudan ɛkɛ te baaṭi neeni myennɛ te Boŋ Jwaŋa Tolan te naŋka naŋtan ɛkkɛny. ³ Ne Yaccu tuuni ɔci ne ɛkɛ jɔlni ñaalɔ dokiyɛ, ɛkɛ warɛ lɛɛlnɛ bora Cuudanti oŋki kɔɔna kɔɔni pɔyi jitkɛn ne coŋɔn aŋka ŋeettan ma ɛkɛ bala tɛɛti awarɛ moki. Ɔci ɛkɛ cien iñɔ ṭɛɛrji wɛnni nink a ma baan ne yyɛɛwɔ (40), ɔci ne ɛkɛ warɛ lɛɛrni ma a ɔɔnyɛ, ɔci ɛkɛ ɛkkɛn myennɛ te jyek cyɛgji Jwaŋa Tolan. ⁴ Ɔci oŋ gɛɛlti ne ɛkkɛn balki cieki i ɛkɛyɛ, ɛkkɛn myennɛ ɛkɛ agi, “Naa ɛkkɛ kaattɛ bora te ban Urcaliimji wɛnni bɛɛ. Dala ɛkkɛ kɛɛddɛ Boŋ Jwaŋa Tolan mena guaŋŋɛ Juaŋ agi bɛɛdɔy. Ne ɛkɛ bɛɛdiyɛ, ɛkɛ bala ba jwalla guaŋi ‘ya ɛkkɛti te ñamu agi, ⁵ bala ba Yɔhanna ne baali buoṭi ma te pieg te baaṭiyɛ, ɔci ne cwakanti daŋkun ɛkkɛ buldɛ Boŋ Juaŋo.” ⁶ Ɔci oŋ gɛɛlti ne Cuudan wyetkɛn ḍɔɔlkiti Yaccutiyɛ, ɛkkɛn tooccin ɛkɛti agi, “Ciɛggɔn, i noŋ cyɛgji ma Icrayiil dɔwwa ɛkkɛnti te oŋŋɔ?” ⁷ Ɔci Yaccu gɔkcin ɛkkɛnti agi, “Jyek oŋki naŋka bɛya ne ŋoyɔyɛ, a jyek ɛkkɛ bɛɛ, gena jyek Wey ɔɔn. Gena Jwaŋa Tolan parɛ aŋka jyek ninka neeni ŋeejɛy. ⁸ Ɔci ne Boŋ Jwaŋa Tolan bɛɛdi ɛkkɛtiyɛ, ɛkkɛ yaaktɛti eedɛ war tɛɛn te ɛkɛti oŋo. Ɔci ɛkkɛ agdɛ maka mieti ma te jyek ‘ya ban Urcaliim, ɔci ban Yahuudiya warda, ɔci ban Camɛɛrya warda, ɔci bonk jitkɛn waakɛnda baan warda.” ⁹ Ɔci ne ɛkɛ gɔŋni a ɔɔnyɛ, ɛkɛ eññɛ Jwaŋa Tolan ñaalɔ, ɔci pɔli bɛɛn kookkinti ɛkɛti ɔci ɛkɛ kuommɛ ñino. Ɔci ɛkɛ yuarcɛ ma moki bɛɛ. ¹⁰ Ɔci ne ɛkɛ baali atiyɛ, ma bala yɔdi ñoṭi ɛkɛ. Ɔci ne ɛkkɛn balki yɔtki ñorki menyɛ, ne pɛñan maka ‘uay gɛɛg bɛɛn ne yyɛɛwɔ yɔɔtcin ɛkkɛn toŋkɛnti bworŋin ɛkkɛn bɔɔna bɔɔno. ¹¹ Ɔci ɛkkɛn gɔkcin ɛkkɛnti agi, “‘Uay ma Jaliil, ɛkkɛ yɔdgɛ ñoṭɛ ñaalɔ pɔliji a ɔɔn ogo? Yaccu mena luoṭi te ɛkkɛti acca neeniyɛ, ɛkɛ dɔɔkti moki ba wona yuarŋɛ ɛkkɛ ne ɛkɛ atti ñaalɔ pɔliji neeni ɔɔn.” ¹² Ne Yaccu eññɛ Juaŋ pɔliji te Pom Jɛtuun wyeñɛti dokiyɛ, Cuudan ɛkɛ kooyin iñɔ te Pom Jɛtuun wyeñɛti, ɔci ɛkkɛn ati dɔɔki ban Urcaliimji. Ban Urcaliim looncin bɛɛ, cual cwalo. ¹³ Ɔci ne ɛkkɛn dɛñki baanjiyɛ, ɛkkɛn ati kaaccin on kona ñaalɔ ona cieki ɛkkɛny. Gena Butruc ɔci Yɔhanna, ɔci Yaakub ɔci Andarawuc, ɔci Pilibuc ɔci Tɔmac, ɔci Bartɔɔlamawuc ɔci Matta, ɔci Yaakub kaci Alpyac ɔci Cimaan men Maka yomgɛn myɛlin, ɔci Yahuuja kaci Yaakub. ¹⁴ Maka neeni bala cɔki a cɔŋi oŋkanda. Ɔci maka moong bala cɔki i ɛkkɛn. Moryam mɛy Yaccun bala nona cɔkki ma daŋkun, ɔci modg Yaccun bala daŋkun. ¹⁵ Oŋ gɛɛlti ma wyetkɛn ḍɔɔlɛ ne coŋɔn, bala ba miyya ɔci men baan ne cyɛɛlɔ (120). Ɔci te oŋŋa wannayɛ, Butruc jɔŋŋin ñaalɔ ma ñomgɛnti ɔci gɔkcin agi, ¹⁶ “Modg ɔɔn, jyeka bɛɛn Yahuuja Ickɛɛryutiti acca neeni bɛɛn a ɔɔn acaan ɛkkɛn guagɛ ma te baaṭi doki agi bɛɛdɔ ba jyeka guaŋŋɛ Boŋ Jwaŋa Tolan te tuk Daawud te baaṭi, ne ɛkɛ gɔki te jyek Yahuuja Ickɛɛryuti mena wɛɛñi maka ooddi mwoki Yaccuy. ¹⁷ Yahuuja Ickɛɛryuti ɛkɛ muonɛ Yaccu bora a men ikin te ñamu, ɔci ɛkɛ bala noŋin kanŋa iki ikin a cyɛɛlɔ.” ¹⁸ (Yahuuja Ickɛɛryuti neeni ɛkɛ noon wiɛllɛ te bilka ɛkɛ ‘woñkiti ma te labji ɛkɛ, ɔci ɛkɛ ḍɛmmin iñɔ nona wannati wyeñɛ ṭiɛŋnɛ iñɔ, ɔci ɛkɛ warɛ nuottin jitin, ɔci ‘yeeng ɛkɛ bɛɛn bora waakɛnda. ¹⁹ Ɔci jyek lyen Yahuuja neeni ati ban Urcaliim konɛti warda. Ɔci nona neeni ɛkkɛn boṭi agi Akɛɛldama. Akɛɛldama te tuk Mabaan ma boṭi agi, “Non Yimgo.”) ²⁰ “Acaan jyeka kiigin worga Ɔɔlg Daawudji gɔki agi, ‘Dala non ɛkɛ nina budan ɔɔn. Naa magga cootti aŋan bɛɛ.’ Ɔci moki agi, ‘Dala kanŋa ɛkɛ mugdɛ mena parɛ.’ ²¹ “Ɔci acca dala ikin mena parɛ gɛɛl muotin bora te maka balkin iki ikin te ñamu ne Yaccu balkin iki ikin meny. ²² Mena neeniyɛ, dala aga mena balkin iki ikin te ñamu te oŋŋa Yaccu buulli Yɔhanna ne oŋŋa ɛkɛ luoṭṭi ñaalɔ ɔɔn. Ɛkɛ muotin bora aŋka ikin ma nɔɔttin iki ɛkɛ agi Yaccu jɔŋŋin ñaalɔ te koolji tɛɛti moki.” ²³ Ɔci ɛkkɛn maka ‘uay kɛññɛ bora ne yyɛɛwɔ aŋka ɛkkɛn muodi men gɛɛl ne cyɛɛlɔ te maka neeniti, mena ne cyɛɛlɔ yenti Yuocip. Yeng ɛkɛ yenga pookɛnyɛ, ma boṭi agi Barcaaboc ɔci Jactac. Ɔci ‘wana parɛ yenti Mataayac. ²⁴ Ɔci ma cɔkcin Juaŋti ɔci gɔkcin agi, “I ciɛggɔn, yomg ma baan waakɛnda ŋeej i. Ɔɔn myettɔn mena i buagi cuoñña kandin iki ɔɔn a cyɛɛlɔ te maka ne yyɛɛwɔ neeniti. ²⁵ Dala ɛkɛ kanŋa Yahuuja Ickɛɛryuti kanŋa cuuda mugdɛ, acaan Yahuuja Ickɛɛryuti kanŋa ɛkɛ dalnɛ, ɔci ɛkɛ jyetcin ɔntɔ ati nona ɛkɛ buagɛtiy.” ²⁶ Ɔci ɛkkɛn oomjin kɔla aŋka kɔla ɛkkɛn myettɛ mena muktan ɛkkɛn oltan non Yahuuja Ickɛɛryutitiy, ɔci ɛkkɛn myennɛ Jwaŋa Tolan te kɔla, agi dala ɛkki Mataayac oldɛ non Yahuuja Ickɛɛryuti. Ɔci Mataayac warɛ ñaaŋnɛti Cuudan Yaccuti, ɔci ɛkɛ aŋi mena akki Ma Inyaakkɛn Wyetkɛn Ne Yyɛɛwɔy. Ɔci ɛkkɛn aŋi Cuudan Yaccu waakɛnda.

¹ Ɔci ne Iid Nink A Ma Baan Ne Yyɛɛwɔ Mena Parɛ Byeŋkɛ (50) bɛɛniyɛ, Ma Kiṭɔ waakɛnda bala nona ne cyɛɛlɔ. ² Ɔci joon bɛɛn te ñaalɔ pɔliji bala ba joon jwamma tolan ɔɔn. Ɔci ona cieki ɛkkɛn neeni jiñɛ kuumi te joona neeni. ³ Ɔci ma gɔrcin ɔci gen gɛɛl bɛɛn ba maañ ɔɔn, ɔci ɛkɛ warɛ kɛɛmmɛ jitin ɔci cooccin ma wyetkɛnti waakɛnda. ⁴ Ɔci ɛkkɛn kuomnɛ Jwaŋa Tolan yomgɛnti te Boŋ ɛkɛ. Ɔci ɛkkɛn yaakinti gɔki te tugi maka pookɛn ba bolja ɛkkɛn ‘wonnɛ Boŋ Juaŋ war tɛɛny. ⁵ Ɔci ma Icrayiil maka moṭi Juaŋti maka bɛɛn te bonka pookɛnti waakɛndayɛ, ɛkkɛn bala ciyi ban Urcaliim. ⁶ Ɔci ne polla tolan neeni tieŋki ma gɔkki te tugga pookɛn a ɔɔnyɛ, ɛkkɛn bɛɛn waakɛnda Ma Kiṭɔti, ɔci ɛkkɛn korkɛn buañi noon acaan ɛkkɛn waakɛnda tieŋŋin magga da te tuk ɛkkɛn ɔci magga da te tuk ɛkkɛn. ⁷ Ɔci ɛkkɛn korkɛn buañi ɔci bala poŋi gɔki agi, “Maka neeni ɛkkɛn bɛɛn te ban Jaliil waakɛnda boki? ⁸ Oŋ ɛkkɛn loṭi ikin te tugi ikin a ɔki? Tugi ikin ŋeecɔn ɛkkɛn te aŋɛ? Acaan ikin wɛnniyɛ, ikin ma gɛɛg da pookɛn! ⁹ Ikin ma gɛɛg bɛɛn te ban Partya, ɔci ma gɛɛg bɛɛn te ban Midya, ɔci ma gɛɛg bɛɛn te ban Ilam, ɔci ma gɛɛg bɛɛn te Bana Kaŋ Wyeñɛti, ɔci ma gɛɛg bɛɛn te ban Yahuudiya, ɔci ma gɛɛg bɛɛn te ban Kapadociiya, ɔci ma gɛɛg bɛɛn te ban Bunti, ɔci ma gɛɛg bɛɛn te ban Ecya, ¹⁰ ɔci ma gɛɛg bɛɛn te ban Prijya, ɔci ma gɛɛg bɛɛn te ban Pampiilya, ɔci ma gɛɛg bɛɛn te ban Macor, ɔci ma gɛɛg bɛɛn te ban Libya te ban Cayriin taaŋɛti, ɔci ma gɛɛg bɛɛn te ban Ḍɔɔm, ɔci ɛkkɛn ma gɛɛg a ma Icrayiil ɔci ma gɛɛg ɛkkɛn a Keedin Pookɛn maka moṭi Jwaŋ ma Icrayiilti. ¹¹ Ɔci ma gɛɛg bɛɛn te Kaŋ Kriit, ɔci ma gɛɛg bɛɛn te ban buñko. Jyeka guaktan ma ikinti neeniyɛ, ikin tyeŋin ɛkkɛn gɔki te tugi ikin, magga da te tuk ɛkkɛn, ɔci magga da te tuk ɛkkɛn. Ɛkkɛn mieti ikin te naŋki Jwaŋa Tolan naŋka tɛyan!” ¹² Ɔci maka coŋin maka tieŋŋin jyeka guaktan ma neeniyɛ, ɛkkɛn waakɛnda korkɛn buañi ɔci ɛkkɛn tieki ɔci ɛkkɛn bala gɔwwɔ yɔtin pookɛn agi, “Naŋka neeni bala a ɔki ɔɔn yeti?” ¹³ Ɔci maka pookɛn bala juoli gɔki agi, “Hay, ɛkkɛn nokkin mooy kaapun!” ¹⁴ Ɔci Butruc yɔɔtcin ma ñomgɛnti ɔci Cuudan pookɛn Maka Inyaakkɛn Wilin Ne Cyɛɛlɔ neeniyɛ, ɛkkɛn yɔɔtcin Butruc toŋkɛti. Ɔci Butruc gɔkcin polla tolanti ne pɛñan te pwana tolan agi, “Hay, ‘uay ma Icrayiil ɔci maka ciyi ban Urcaliimji waakɛnda, dala ɛkkɛ tieŋdɛ. Ɛkkɛ myettin te jyeka neeni ne pwadan. Dala ɛkkɛ tieŋdɛ jyek ‘ya neeni. ¹⁵ Maka neeni nokkin mooy ba jyeka guagdɛ ɛkkɛ neeni bɛɛ, acaan noon a liidɔ men. ¹⁶ Naŋka neeni a naŋka guaŋŋɛ Jɔwɛl mena a bɔwa Jwaŋa Tolany. Ɛkɛ gɔki agi, ¹⁷ ‘Jwaŋa Tolan gɔki agi, ne oŋŋa ookti bɛya ne ŋoyɔyɛ, ‘ya Boŋ ‘ya pwowwa mati waakɛnda. Ɔci kɛɛgin ɛkkɛ kɛɛgin a ‘uay ɔci kɛɛgin a moongyɛ, ɛkkɛn ma myettan te naŋka bɛya ne ŋoyɔ neeni. Ɔci ‘uay ɛkkɛ ‘uaya ḍyɛrin gɔrti waka lɛɛlla ‘ya bora ɛkkɛntiy. Ɔci ‘uay ɛkkɛ ‘uaya donkyɛ, ɛkkɛn lokti loggin. ¹⁸ Ɛɛ, ɔci kɛɛnk ‘ya kɛɛnka a ‘uay ɔci kɛɛnka a moongyɛ, boŋ ‘ya pwowwa ‘ya ɛkkɛnti oŋka wannati, ɔci ɛkkɛn ma myettan te jyeka bɛya ne ŋoyɔy. ¹⁹ Ɔci ‘ya ma lɛɛrka naŋka tɛyan ɔci naŋka ñyecki ma naŋki tɛɛn ‘ya te pɔliji ɔci iñɔ ṭɛɛrji wɛnni moki. Ma gɔrti yimgo, ɔci meeko, ɔci jien maaño, ²⁰ ɔci oŋ waŋɛ dɛkti bɛɛ, ɔci paan tida ba yimgo. Oŋŋa ‘ya bɛɛdayɛ, oŋŋa neeni tolla toli ɔci pwanna pwanno. Ɔci ne oŋŋa neeni baawi menyɛ, ma gɔrti naŋka tɛyan naŋka ñyecki ma neeni ñamu. ²¹ Ɔci maka cɔkti ‘yati te yenti ‘yayɛ, ɛkkɛn yɔɔd ‘ya waakɛnda.’ ²² “Ma Icrayiil, tieŋdɛ! Yaccu men ma Najarɛt neeniyɛ, ne ɛkɛ baali noŋi kanŋa ɛkɛyɛ, Jwaŋa Tolan bala noŋi naŋka tɛyan ɔci naŋka ñyecki ma aŋka ŋeettan ma Yaccu a mena awarɛ. Naŋka naŋŋɛ Juaŋ neeniyɛ, gena naŋka ñyecki ma Yaccuy. Juaŋ bala noŋi naŋka neeni ɛkkɛ ñomgɔti. Jyek Yaccu neeni ŋeejɛ ɛkkɛ doki. ²³ Yeti Juaŋ jwali ḍyɛŋŋɛ te baaṭi doki agi Yaccu neeni ‘wontɛ ma ɛkkɛ byeŋkɔti. Ɔci naŋka naŋdɛ ɛkkɛ Yaccutiyɛ, ŋeennɛ Juaŋ doki. A ɔŋŋiyɛ, ɛkkɛ maka bɛɛyi jyek Juaŋ olnɛ Yaccu nogɛ ŋaabɛ ñaalɔ kakanti. Ɔci a ɔɔn bala ba gena ɛkkɛ woodgɔ noŋnɛ ɛkɛ wanna. ²⁴ Yeti ɛkɛ pɔŋnɛ Jwaŋa Tolan te lyena ɛkɛ tuuni neeni, acaan lien yaakinti Yaccu tiektɛ oŋkanda ɔɔn bɛɛ. ²⁵ Daawud bala gɔki te naŋka bɛya Yaccuti ne ɛkɛ gɔki agi, ‘Ciɛggɔn ‘ya yuarcan ciyi ‘ya ñamuti oŋkanda, ɛkɛ ciyi taaŋŋa byeŋa byerɔn, ɔci acaan a ɔŋŋiyɛ, aŋka ‘ya yɔɔda ne tɛyan neeni. ²⁶ Ɔci ‘ya yomu ñɔɔna ñɔɔno, ɔci ‘ya lɛmmu gɔki jyeka ñɔyan. Ɔci war ‘ya bala kɛɛy oŋŋa Juaŋ noŋdi naŋki ɛkɛ ‘ya warutiy. ²⁷ Acaan i ‘ya dalda i non lienji budan bɛɛ, acaan ‘ya a men i Mena Pwadan, ɔci acaan a ɔŋŋiyɛ, ‘ya dalda i waru jada koolji budan bɛɛ. ²⁸ I ‘ya nɔɔnna pɔya ‘ya tɛɛta moki ne baaṭiy, i balkin iki ‘ya, ‘ya yomu ñɔɔna ñɔɔn ne tolan.’ ²⁹ “Modg ɔɔn, jyek wey ikin Daawud ḍuaŋa tolan neeni ‘ya waru mɛɛdan ne ‘ya gɔka te ɛkkɛn bɛɛ. Ɛkɛ tuun awarɛ, ɔci ɛkɛ jokci ma koolji, ɔci kol ɛkɛ bala wɛnni men acca ban ikin. ³⁰ Daawudyɛ, ɛkɛ a bɔwa Jwaŋa Tolan, ɔci ɛkɛ nɔɔnnɛ Juaŋ te ñamu agi ‘mena bɛɛdɔ te kɛɛgin Daawudtiyɛ, agi ɛkta agdɔ ḍuaŋa tolan, ɔci coottɔ kaakci Daawudti.’ ³¹ Ɔci acaan jyeka neeni ŋeejɛ Daawudyɛ, ɛkɛ gɔkcin mati te jɔŋŋin jɔŋdi Kiṭɔ te koolji tɛɛti moki agi, ‘Ɛkɛ dalnɛ Juaŋ non lienji budan bɛɛ, ɔci ɛkɛ warɛ jani bɛɛ.’ ³² Yaccu mena bala ikinti wɛnni neeniyɛ, gena ɛkɛ guagdɛ Daawud neeni. Ɛkɛ luolnɛ Juaŋ ñaalɔ te koolji, ɔci ɛkɛ tɛɛti moki. Ɔci ɛkɛ yuarŋɔn ɔɔn te woŋgɔ waakida. ³³ Ɔci Yaccu neeni naŋŋɛ Juaŋ aŋi mena tolan, ɔci ɛkɛ cooccin Juaŋ taaŋɛti taaŋŋa byerɔn. Ɔci ɛkɛ ‘wonnɛ Weegɛn Boŋ ɛkɛ ba jwalla guaŋŋɛ Juaŋ ɛkɛti te baaṭiy. Ɔci Yaccu ɔɔn ‘wonnɔn Boŋ ɛkɛ ne ŋoyɔ. Naŋka yuarŋɛ ɛkkɛ ɔɔnti acca neeniyɛ, ɔci jyeka tieŋnɛ ɛkkɛ neeniyɛ, bɛɛn te Boŋ Jwaŋa Tolanti Boŋa ɔɔn ‘wonnɔnti Yaccu acca neeni. ³⁴ Daawud waanɛ ati ñaalɔ pɔliji bɛɛ, yeti ɛkɛ gɔki te baaṭi agi, ‘Ciɛggɔn gɔkcin Ciɛggɔn ‘yati agi dala i coocca ‘ya taaŋuti taaŋŋa byerɔn, ³⁵ ne maka yookɔn te i bwanda ‘ya ɔci ḍuatta ‘ya iñɔ i cieguti ɔɔn.’ ³⁶ “Ɔci acaan a ɔŋŋiyɛ, dala ŋeeddɛ ɛkkɛ ma Icrayiil waakɛnda, Yaccu mena ŋaamnɛ ɛkkɛ ñaalɔ neeniyɛ, naŋŋɛ Jwaŋa Tolan aŋi Ciɛggɔn, ɔci naŋŋɛ a Mena Muonɛ Juaŋ Bora moki neeni.” ³⁷ Ɔci ne poli ma polla tolan neeni tieŋki jyeka neeniyɛ, ɛkkɛn bala yomgɛn wiak. Ɔci ɛkkɛn tooccin Butructi i maka atki iki ɛkɛ a Cuudan Yaccuti agi, “Modg ɔɔn, ɔɔn noŋdɔn a ɔki?” ³⁸ Ɔci Butruc gɔkcin ɛkkɛnti agi, “Dala ɛkkɛ waakɔ yaldɛ te nɔji ɛkkɛ, ɔci ne ɛkkɛ waakɔ yaldɛ dokiyɛ, dala ɛkkɛ bultɛ ma te yenti Yaccu Kiṭɔ aŋka ŋeettan ma ɛkkɛ bɔɔŋnɛ Juaŋ doki. Kan ɛkkɛ noŋdɛ a ɔɔnyɛ, ɛkkɛ ‘wondɛ Juaŋ Boŋ ɛkɛ. ³⁹ Acaan jyeka guaŋŋɛ Juaŋ te ñamu agi ɛkɛ ma ‘woñji Boŋ ɛkɛyɛ, jyeka neeni bala te ɛkkɛ, ɔci te kɛɛgin ɛkkɛ daŋkun. Ɔci moki te maka loonan daŋkun maka bortɛ Juaŋ ɛkɛti waakɛnday.” ⁴⁰ Ɔci Butruc bala loṭi ma men te jyeka coŋin. Ɛkɛ bala ṭeyi ɛkkɛn agi, “Dala ɛkkɛ mwondɛ te naŋka yeyin naŋka naŋtan maka coŋin oŋkanda neeni aŋka ɛkkɛ uddɛ te ywobja bɛya ɛkkɛn wyetkɛnti neeni.” ⁴¹ Ɔci maka jyeti jyeka guaŋŋɛ Butruc a jyek Juaŋ neeniyɛ, ɛkkɛn buuli ma. Ɔci te oŋŋa wannayɛ, maka coŋin ñoowin i Ma Kiṭɔ aŋi ba maka ne cyɛɛlɔ. Maka jyeti neeniyɛ, ɛkkɛn a alpn ne ḍoogɔ (3,000). ⁴² Ɔci ɛkkɛn bɛya oŋkanda aŋka tieŋdi jyeka lorki Cuudan Yaccuy, ɔci ɛkkɛn bala ñoowɔ te jwali tɛɛtin, ɔci moki bala ñoowɔ te Am Ciɛggɔn, ɔci te cɔŋi Juaŋ daŋkun. ⁴³ Ɔci ma waakɛnda korkɛn buañi, acaan Cuudan Yaccu bala noŋi naŋka tɛyan naŋka ñyecki ma Jwaŋa Tolan a ḍiɛkan bɛɛ. ⁴⁴ Ɔci maka jyeti Juaŋti neeniyɛ, ɛkkɛn bala ḍwoṭi wyetkɛn oŋkanda waakɛnda. Ɔci ɛkkɛn menga gɔki agi waka neeni a wak mena ne cyɛɛlɔ parɛ bɛɛ, a wak ɛkkɛn waakɛnda. ⁴⁵ Ɔci wak ɛkkɛn wiɛljiyɔ ɔci bilk ‘woñgi maka bilkɛn baawy. ⁴⁶ Ɔci ɛkkɛn bala wyetkɛn ḍɔɔltan oŋkanda on Juaŋ ona tolan neeni. Ɔci ɛkkɛn omi ñoowɔ nona ne cyɛɛlɔ baanji oorg ɛkkɛn jitin. Ɔci ɛkkɛn yomgɛn ñɔɔna ñɔɔno. ⁴⁷ Ɔci ɛkkɛn bala jieyi Juaŋ oŋkanda, ɔci maka pookɛn yomgɛn pwadɔ ɛkkɛnti. Ɔci oŋkanda Juaŋ bala maka pookɛn oodɛ jyeddi ɛkɛti gɔ Ma Kiṭɔ moki coŋkin ɔɔn.

¹ Ɔci oŋ gɛɛlti ne oŋ waŋɛ warɛ yiɛnnɛyɛ, Butruc ɔci Yɔhanna ɛkkɛn bala ati ooddi on Juaŋ ona tolan aŋka cɔkti Juaŋti. ² Ɔci ma gɛɛg bala ḍuoṭi mena puono. Ɔci ‘wana a puon neeniyɛ, ɛkɛ a puon wona jiennɛ mɛɛgɛn. Ɔci ɛkɛ eetan ma ḍurtan oŋkanda ḍuattan ma Kaañ Tuka Pwadanti aŋka ɛkɛ ñwoyi waak ne ma bɛɛti on Juaŋ ona tolany. ³ Ne ɛkɛ gɔrni Butruc yaakkɛn i Yɔhanna noŋki kaatti on Juaŋ ona tolanyɛ, ɛkɛ tooccin ɛkkɛnti te waako. ⁴ Ɔci Butruc bala gɔṭi ɛkɛ te waŋɛ, ɔci Yɔhanna daŋkun bala gɔṭi ɛkɛ te waŋɛ, ɔci Butruc gɔkcin mena puonti agi, “Gɔṭṭa ɔɔnti wɛnni.” ⁵ Ɔci mena ñwoyi waak neeni gɔrcin ɛkkɛnti, ɔci ɛkɛ bala poŋi gɔki agi ɛkɛ ‘wondɛti ma waagga kaapun. ⁶ Yeti Butruc gɔkcin ɛkɛti agi, “‘Ya balka ḍeyyan gɛɛg aŋka ‘wondin i bɛɛ. Yeti gena bala ‘yatiyɛ, i ‘wondin. ‘Ya gɔkka iti te yenti Yaccu men ma Najarɛt, jɔlla ñaalɔ pocca woono!” ⁷ Ɔci Butruc mena puon neeniyɛ, muŋŋɛ te bieŋɛ, ɔci ɛkɛ luolnɛ ñaalɔ. Ɔci ɛkɛ ciegɛ ɔci ṭuamkɛ tɛɛn doki. ⁸ Ɔci ɛkɛ kuawin ñaalɔ ne pɛñan, ɔci ɛkɛ yaakinti woon parɛ. Ɔci ɛkɛ ati kaaccin orɔ on Juaŋ ona tolan iki ɛkkɛn. Ɔci ɛkɛ bala ati a woon ne ḍyɛṭ ṭɔɔlɛ gɔ moki ɛkɛ kuawi ñaalɔ ɔɔn. Ɔci ɛkɛ gɔki agi Jwaŋa Tolan pwanni agi pwani katan. ⁹ Ɔci ne ma waakɛnda gɔrki ɛkɛ ati a woon parɛyɛ, ɔci ne ɛkkɛn tieŋki ɛkɛ gɔki agi Juaŋ pwadɔyɛ, ¹⁰ ɛkkɛn poni ne tolan, ɔci ɛkkɛn korkɛn buañi ne pɛñan te naŋka neeni, acaan ‘wana neeni ñiyɛ ɛkkɛn gena mena bala ciyi kaañ tukɛti ñwoyi waaky. Kaañ tuka kaatti ma on Juaŋ ona tolan neeniyɛ, ma boṭi agi Kaañ Tuka Pwadan. ¹¹ Ɔci ne mena ñwoyi waak neeni baali atki i Butruc ɔci Yɔhanna menyɛ, ɔci ma waakɛnda yiŋi ḍworcinti ɛkkɛnti bora daaŋji daŋa cɔnnɛ Cɔlaman on Juaŋ ona tolan warɛti acaan ɛkkɛn korkɛn buañi noono. ¹² Ɔci ne Butruc gɔrni a ɔɔnyɛ, ɛkɛ gɔkcin ɛkkɛnti agi, “‘Uay ma Icrayiil, ɛkkɛ korkɔ buayi noon te naŋka neeni a ɔɔn ogo? Ɛkkɛ gɔṭɛ ɔɔn ḍyɛrdintɔ a ɔɔn bala ba ɛkkɛ poŋɛ gɔkɛ agi ɔɔn ‘wana neeni ywaŋŋɔnyɔ ɔɔn pookɔ te naŋki ɔɔn naŋka tɛyan aŋka ɛkɛ yaakiti woon wanna ogo? ¹³ Jwaŋa Tolan noŋjin, ɔci yenti kɛɛngɔn ɛkɛ Yaccu toli doki. Jwaŋa neeniyɛ, gena Jwaŋ yɔrg ikin Abrahim ɔci Icaak ɔci Yaakub. Yeti Yaccu neeniyɛ, ɛkɛ ‘wonnɛ ɛkkɛ ma byeŋkɛnti, ɔci ne ɛkkɛ attɛ Bilaatuc ñamɛti, ɔci ne ɛkɛ buagi Yaccu pɔktɛyɛ, ɛkkɛ yookɛ te pɔkkin ɛkɛ. ¹⁴ Awarɛ, ɛkkɛ yookɛ te mena pwadan ɔci ɛkkɛ gɔŋnɛ Bilaatucti agi mena noki ma gɛɛl aŋka pɔkka. ¹⁵ Ɔci te jyek ɛkkɛyɛ, mena tɛɛtki ma aŋka nogɛ ma doki. Yeti ɛkɛ luolnɛ Juaŋ ñaalɔ te koolji, ɔci ɛkɛ yuarŋɔn ɔɔn tɛɛti moki, ɔci acca ɔɔn mietɔn ma te jyek jɔŋŋin ɛkɛ jɔŋni ñaalɔ neeni. ¹⁶ ’Wana gwaldɛ ɛkkɛ ɔci ŋeejɛ ɛkkɛ neeniyɛ, ɛkɛ warɛ pwani te yenti Yaccu mena noŋŋɛ ɛkkɛ neeni ne ɛkɛ jyetti yenti ɛkɛtiy. Ɛkɛ warɛ pwani warda. ¹⁷ “Modg ɔɔn, yeti ŋeej ‘ya ne ɛkkɛ balgɛ noŋɛ naŋka naŋŋɛ ɛkkɛ Yaccuti neeniyɛ, naŋka neeni ŋeejɛ ɛkkɛ ne pwadan bɛɛ, ba ma ɛkkɛ maka ḍwaŋin daŋkun, naŋka neeni kwoyɔn ɛkkɛn moki. ¹⁸ Yeti a ɔŋŋiyɛ, jyeka guaŋŋɛ Jwaŋa Tolan te tugi maka a bɔwan Juaŋ te baaṭi dɛññin bora, ne ɛkkɛn gɔkki te tuk Jwaŋa Tolan agi Kiṭɔ wardan eeddɔ. ¹⁹ Acaan a ɔŋŋiyɛ, dala ɛkkɛ yomgɔ wiakti te nɔji ɛkkɛ, ɔci waakɔ yaldɛ aŋka nɔji ɛkkɛ eedɛ Juaŋ ɔntɔ te ɛkkɛti. ²⁰ Ɔci Juaŋ noŋdi kanŋa tolan ɛkkɛti. Ɛkɛ oŋ Yaccu mena muonɛ ɛkɛ bora neeni cuondɛ dɔɔdɛ wɛnni moki ba jyeka naŋŋɛ ɛkɛ te ñamu dokiy. ²¹ Yeti acca ɛkɛ ciyi ñaalɔ kɛɛy oŋŋa Juaŋ waak ywaŋdɛ waakɛnda aktɛ waka wonkɛny. Ɛkɛ waak ywaŋdɛ ba jyeka guaŋŋɛ Jwaŋa Tolan te baaṭi ne ɛkɛ gɔki jyeka neeni te tugi maka a bɔwan ɛkɛ bɔwan pwadiny. ²² Muuca gɔkcin agi, ‘Juaŋ ɛkkɛ ‘wondɛ bɔwa gɛɛl te ma ɛkkɛti bala ba ne ɛkɛ ‘ya naŋŋata a bɔwa wanna ɔɔn. Dala ɛkkɛ tieŋdɛ jyeka guagdɛ ɛkɛ waakɛnda. ²³ Ɔci kan men gɛɛl tieŋdi jyek bɔwa neeni bɛɛyɛ, ɛkɛ kyɛptan ma ɔntɔ te Ma Kiṭɔti ɔci ɛkɛ ḍakti.’ ²⁴ “Camwil ɔci maka bɔwan maka boottin Camwil ŋoyɛti waakɛnda, ne ɛkkɛn gɔkki jyeka neeniyɛ, ɛkkɛn gɔki te oŋka acca neeni. ²⁵ Ɔci waka guagɛ bɔwan Jwaŋa Tolan te baaṭiyɛ, guagɛ ɛkkɛn te ɛkkɛ daŋkun, ɔci jyeka naŋɛ Jwaŋa Tolan i yɔrg ɛkkɛyɛ, dɛññin bora ɛkkɛti doki. Gena jyeka guaŋŋɛ Juaŋ Abrahimti ne Juaŋ gɔki agi, ‘Naŋka pwadan bɛya kɛɛn wardati te mena bɛya te war itiy.’ ²⁶ A ɔŋŋi Jwaŋa Tolan ne ɛkkɛ ‘wondɛ kɛɛngɔn ɛkɛyɛ, ɛkɛ cuonnɛ ɛkɛ ɛkkɛti te ñamu doki aŋka ɛkɛ yom ñɔɔn cuondɛ ɛkkɛti, ɔci ɛkkɛ yaldɛyɔ ɛkɛ te naŋki ɛkkɛ naŋka yeyin.”

¹ Ɔci ne Butruc ɔci Yɔhanna balki gɔkki mati a ɔɔnyɛ, gaciicin ma Icrayiil bɛɛn i ḍuaŋa bɔlin on Juaŋ ona tolan, ɔci ma Cadyuciin da bɛɛn iki ɛkkɛn. ² Acaan ɛkkɛn yomgɛn yeyɔ te jyeka lorki Cuudan ne yyɛɛwɔ neeniy. Acaan ɛkkɛn gɔkcin mati agi Yaccu jɔŋŋin ñaalɔ te koolji tɛɛti moki. Jyeka neeni mieti agi maka tuun yaakinti jɔŋdi ñaalɔ tɛɛti moki. ³ Ɔci Cuudan neeni muogɛ ma ɔci ḍuaccɛ ma ciginji, ɔci niini ne liidɔ acaan oŋ utcin doki. ⁴ Yeti maka tieŋŋin jyek ɛkkɛn neeniyɛ, jyeti a ḍiɛkan bɛɛ, a ɔŋŋi Ma Kiṭɔ bala ciɛñ a ciɛñi ne coŋki bala ba alpn ne dɔɔyɔ (5,000) ɔɔn. ⁵ Ɔci ne liidɔ maka cyekin ɔci maka ḍwaŋin ma Icrayiil ɔci maka loṭi ganuun Juaŋ ɛkkɛn wyetkɛn ḍɔɔlɛ ban Urcaliim. ⁶ Ɔci Anac gaciic tolan ma Icrayiil, ɔci Kayapac, ɔci Yɔhanna, ɔci Alɛkcaandar, ɔci ma gaciic tolan bala i ɛkkɛn daŋkun. ⁷ Ɔci Cuudan Yaccu owwɛ ma ɔci yɔɔtci ɛkkɛn ma ñomgɛnti, ɔci maka gɔṭi jiek tooccin ɛkkɛnti agi, “Ɛkkɛ yaakɛti naŋka neeni a ɔki? Naŋka neeni naŋŋɛ ɛkkɛ te yenti menɛ yeti?” ⁸ Ɔci Butruc acaan ɛkɛ yomɛ kuumi te Boŋ Jwaŋa Tolanyɛ, ɛkɛ gɔkcin mati agi, “Maka ḍwaŋin ɔci maka cyekin, tieŋdɛ! ⁹ Kan ɛkkɛ toocɛ ɔɔnti te naŋka mena a puon warɛ pwanni neeniyɛ, dala ŋeeddɛ ɛkkɛ naŋka neeni bɛɛn te aŋɛ. ¹⁰ Dala ŋeeddɛ ɛkkɛ, ɔci dala ŋeettan ma Icrayiil waakɛnda ‘wana neeni warɛ pwani te yenti Yaccu Kiṭɔ men ma Najarɛt. Yaccu neeniyɛ, ɛkɛ a mena ŋaamnɛ ɛkkɛ ñaalɔy, yeti ɛkɛ luolnɛ Jwaŋa Tolan ñaalɔ te koolji tɛɛti moki. Ɔci te naŋki ɛkɛ neeniyɛ, aŋka ‘wana neeni bala yɔɔd ɛkkɛ ñomgɛti warɛ pwanni. ¹¹ A ɔɔnyɛ, bala ba jyeka guaŋŋɛ Daawud te baaṭi agi, ‘Guonan guaktan maka cɔti oorg agi ɛkta yaayɔ neeniyɛ, ɛkɛ aŋi guonan pwadan on warɛti doki? Ɔci ɛkkɛ woodgɔ agɛ maka yookɔn te ɛkɛy.’ ¹² Ɔci yɔɔd bɛya te mena parɛ gɛɛlti bɛɛ, yeti ɛkɛ ikin ‘wonnin yɔɔd te Yaccu parɛ. Acaan Jwaŋa Tolan ikin ‘wonnin yenta parɛ gɛɛl bala baan wɛɛn warda aŋka ikin yɔɔtin ɛkɛ bɛɛ.” ¹³ Ɔci ne ma gɔrki Butruc ɔci Yɔhanna yomgɛn tɛɛki a tɛɛnyɛ, ma korkɛn buañi noono, acaan ŋeecɔn ɛkkɛn Butruc ɔci Yɔhanna neeni, ɛkkɛn lalɛ ma te worgan waakɛnda bɛɛ. Ne ma tieŋki jyek ɛkkɛnyɛ, ŋeecɔn ɛkkɛn ɛkkɛn ñingɛn tɛɛcin, acaan ɛkkɛn bala i Yaccu oŋkanda. ¹⁴ Ɔci ne ɛkkɛn gɔrki ‘wana warɛ pwani neeni ne baali yɔɔtki iki Butruc ɔci Yɔhannayɛ, ɛkkɛn yaakinti gɔki gena yaayan gɛɛl ɛkkɛnti moki bɛɛ. ¹⁵ Ɔci ne Butruc ɔci Yɔhanna cuoñkiti ma bora te nona ɛkkɛn noŋki jiekyɛ, ɔci ma bala gɔwwi yɔtin pookɛn agi, ¹⁶ “Ikin ‘uaya neeni naŋtin a ɔki yeti? Acaan naŋka tɛyan naŋka ñyecki ma naŋɛ ɛkkɛn yuarɛ maka ban Urcaliim waakɛnda. Ɔci ikin yaakinti tiekin te naŋka neeni bɛɛ. ¹⁷ Dala ikin gɔktin ‘yertin ɛkkɛnti ne pwadan aŋka ɛkkɛn gɔkti maggati te jyek Yaccu neeni moki bɛɛ. Ɔci kan a ɔŋŋiyɛ, jyeka neeni ooddi baan warda moki bɛɛ.” ¹⁸ Ɔci ɛkkɛn Butruc ɔci Yɔhanna borki orɔ, ɔci ɛkkɛn gɔkcin ɛkkɛnti agi, “Naa ɛkkɛ gɔktɛ mati te yenti Yaccu moki bɛɛ.” ¹⁹ Yeti Butruc ɔci Yɔhanna, ɛkkɛn ṭwokcin gɔkcin ɛkkɛnti agi, “Gɔṭṭɛ, a gena pwatcin Jwaŋa Tolantiy, ɔɔn noŋdɔn ba jyek ɛkkɛ, walla ɔɔn noŋdɔn ba jyek Jwaŋa Tolan? ²⁰ Ɔɔn yaakɔnti ciedɔn lieda te naŋka yuarŋɔn ɔɔn neeni bɛɛ, ɔci te jyeka tieŋnɔn ɔɔn neeni bɛɛ.” ²¹ Ɔci ne ɛkkɛn Butruc ɔci Yɔhanna iirkiti mokiyɛ, ɛkkɛn gɔkcin ɛkkɛnti agi, “Ɔgdɛ ooddɛ.” Ɛkkɛn gɔki a ɔɔn acaan pɔya noŋki ɛkkɛn ywobji mati bala bɛɛ. Ɛkkɛn buayi maka pookɛn acaan ma waakɛnda bala jieyi Juaŋ te naŋka naŋɛ Butruc yaakkɛn i Yɔhanna neeni. ²² ’Wana warɛ pwani te naŋka tɛyan naŋka ñyecki ma neeniyɛ, yuong ɛkɛ bala ñamu te yuonga a ma baan ne yyɛɛwɔ (40). ²³ Ɔci Butruc ɔci Yɔhanna ne ɛkkɛn pɔkkiti mayɛ, ɛkkɛn dɔɔki nona mung ɛkkɛnti, ɔci ɛkkɛn ma myetkɛ te jyeka guagɛ gaciicin ḍwaŋin ma Icrayiil ɛkkɛnti, ɔci te jyeka guagɛ cyekin ɛkkɛnti. ²⁴ Ɔci ne mung ɛkkɛn tieŋki jyek ɛkkɛnyɛ, ɛkkɛn cɔkcin Jwaŋa Tolanti te tuka ne cyɛɛlɔ waakɛnda agi, “Ciɛggɔn, i balki war tɛɛn waakɛnda, i a mena cɔti pɔllo, ɔci ṭɛɛro, ɔci galŋin, ɔci waka bala ɛkkɛn jitkɛnti neeni waakɛnday. ²⁵ Ɔci i a mena gɔki te Boŋ i te tuk yɔr ɔɔn Daawud kɛɛngɔn i, ne ɛkɛ gɔŋni mati agi, ‘Keedin Pookɛnyɛ, jyek ɛkkɛn a jyek ywobji ogo? Oŋ ma bala gɔwwɔ yɔtin te jyeka tobin jyeka budan neeni ogo? ²⁶ Ḍuaŋan ḍwaŋin baan wardayɛ, ɛkkɛn noŋi jyek tommo. Ɔci maka a wyetkyɛ, jyek ɛkkɛn ñaagɛyɔ te tomi agi noowinti iki Juaŋ ɔci Mena Muonɛ Juaŋ Bora daŋkun.’ ²⁷ Ɔci acca awarɛ Hiruuduc Antipac ɔci Bilaatuc Buntiyɛ, jiek ñaagɛyɔ bana neeniti wɛnni i Keedin Pookɛn ɔci i kɛɛn Icrayiil daŋkun agi noowinti i Yaccu kɛɛngɔn i mena yomɛ bɔwan Mena Muonɛ Juaŋ Boray. ²⁸ Ɛkkɛn wyetkɛn ḍɔɔlɛ aŋka noŋdi ba naŋka ḍaaŋŋi i te war tɛɛn i ɔci ba yom i agi bɛɛdɔy. ²⁹ Ɔci acca Ciɛggɔn, dala i tieŋja jyeka ‘yerki ma ɔɔn neeni, ɔci dala ɔɔn kɛɛnk i magdɔn acca aŋka ɔɔn mietɔn ma te jyek i te yoma tɛyan oŋkanda ɔɔn. ³⁰ Ɔci dala i maka waakɛn yeyin ywaŋa, ɔci dala ma i noŋdi naŋka tɛyan naŋka ñyecki ma iy. Dala ɛkkɛn noŋdi naŋka neeni te yenti Yaccu mena a kɛɛngɔn i kɛɛgɔn yomɛ bɔwany.” ³¹ Ɔci ne cɔŋŋa neeni baaniyɛ, ona cɔkki ɛkkɛn neeniyɛ, warɛ ḍiedan. Ɔci Boŋ Jwaŋa Tolan bɛɛn ɛkkɛnti waakɛnda. Ɔci ɛkkɛn yomgɛn kuumi te Boŋ Jwaŋa Tolan, ɔci ɛkkɛn bala mieti ma te jyek Jwaŋa Tolan te yoma tɛyan. ³² Ɔci maka jyeti Yaccuti neeniyɛ, ɛkkɛn waakɛnda yomg ɛkkɛn a yoma ne cyɛɛlɔ, ɔci paŋŋa paŋtan ɛkkɛnyɛ, a paŋŋa ne cyɛɛlɔ. Ɔci kan waak bala ɛkkɛntiyɛ, ɛkkɛn menga gɔki agi gena wak ɛkɛ parɛ bɛɛ. Waak waakɛnda a wak ɛkkɛn waakɛnda. ³³ Ɔci Cuudan Yaccu ɛkkɛn ma myetkɛ te jyek jɔllin Yaccu jɔlni ñaalɔy. Ɛkkɛn ma myetkɛ a ɔɔn te yoma tɛyan, ɔci Jwaŋa Tolan yomɛ pwanna pwani ɛkkɛnti waakɛnda. ³⁴ Ɔci ɛkkɛn men gɛɛl bɔw bɔw bɛɛ, acaan ɛkkɛn magga balki oorg ɔci yelko. Ɔci a oŋki ɛkkɛn yiel gɛɛl wiɛltanyɔ, ɔci oŋŋa parɛ moki ɛkkɛn on gɛɛl wiɛltanyɔ, ³⁵ ɔci ɛkkɛn bilka neeni eetan nona Cuudan Yaccuti, ɔci Cuudan Yaccu neeniyɛ, kan ma gɛɛg bɔw bɔw te bilkyɛ, ɔci ɛkkɛn ma kɛntan. ³⁶ Ɔci maka wak ɛkkɛn wiɛljiyɔ neeni gɛɛl bala yenti Yuocip. Ɛkɛ a kɛɛn Laawi. Ɛkɛ bɛɛn te Kaŋ Cayprac. Ɛkɛ okki Cuudan Yaccu yenta parɛ agi Barnabac. (Ɔci Barnabac te tuk Mabaan agi, “Mena Šeyi May.”) ³⁷ Ɔci Barnabac neeni, ɛkɛ yel ɛkɛ wiɛllɛ, ɔci bilk eññɛ ‘wonnɛ Cuudan Yaccu.

¹ Ɔci mena ‘uan gɛɛl bala yenti Ananaayac, ɛŋ ɛkɛ yenti Capiira, ɔci ɛkkɛn yel ɛkkɛn wiɛljiyɔ. ² Ɔci ɛkkɛn bilka neeni wɛɛdi jitin, ɔci ɛkkin pookɛn daliyɔ te on ɛkkɛn, ɔci ɛkkin pookɛn neeni eññɛ mena ‘uan nona Cuudan Yaccuti. Ɔci ɛkkɛn ne bilk wɛɛtkiti jitinyɛ, ŋeejɛ ɛɛŋ daŋkun. ³ Ɔci Butruc gɔkcin agi, “Ananaayac, te gena yeti i yomu kuummi te jyek Jwaŋa Yaayan aŋka i dyeti Boŋ Juaŋ ñingɛ a ɔɔn neeni? Bilka wiɛlli i te non ɛkkɛ neeniyɛ, ɛkkɛn ooni i waakɛnda wɛnni bɛɛ. Gɛɛg dolniyɔ i te baanji daŋkun. ⁴ Gɔṭṭi poca, ne ɛkkɛ noon men wiɛllɛ bɛɛyɛ, ɛkɛ a non ɛkkɛ bɛɛ? Ɔci ne ɛkɛ wiɛllɛ ɛkkɛ doki, jyek bilk a jyek ɛkkɛ bɛɛ? Ɔci acca i yomu bala a ɔki aŋka i noŋi a ɔɔn wan? Iyɛ, gena men baana naŋŋi ñin i neeni bɛɛ. Gena Jwaŋa Tolan naŋŋi ñin i wan!” ⁵ Ɔci Ananaayac ne ɛkɛ tieŋni jyeka neeniyɛ, ɛkɛ ḍɛmmin iñɔ ɔci tuun doki. Ɔci Ma Kiṭɔ ne tieŋki jyeka neeniyɛ, ɛkkɛn buayi waakɛnda. ⁶ Ɔci ‘uaya ḍyɛrin gɛɛg jɔllin ñaalɔ ɔci ati ɛkɛ paariyɔ te bworŋin ɔci ḍuurɛ bora ɔci jokci iñɔ. ⁷ Ɔci ne oŋ woŋgɛ ne ḍoogɔ baakiyɛ, ɛŋ ɛkɛ bɛɛn daŋkun. Yeti ɛkɛ jyek ‘uarɛ ŋeejɛ men bɛɛ. ⁸ Ɔci Butruc gɔkcin ɛkɛti agi, “Hay i! ‘Ya myetta, ɛkkɛ noon wiɛllɛ bilk bala ba bolja neeni ɔɔn pari bɛɛ?” Ɔci ɛɛŋ jyettin agi, “Ɛɛ, bilk wiɛllɔn ɔɔn bala ba bolja wanna ɔɔn.” ⁹ Ɔci Butruc gɔkcin ɛkɛti agi, “Hay i! Ɛkkɛ jiek ñaaŋŋɛyɔ yaakkɔ a ɔɔn nɔñji bala ba ɛkkɛ ponnɛ Boŋ Jwaŋa Tolan a poccin a ɔɔn ogo? Tieŋŋa, maka ‘war i eyɛ bora ɔci jokci iñɔ waayiyɛ, ɛkkɛn bala bɛya, ɔci i daŋkun eeti ɛkkɛn bora jokti iñɔ.” ¹⁰ Ɔci ne ɛkɛ gɔŋni a ɔɔnyɛ, ne pɛñan doki Capiira ḍɛmmin iñɔ Butruc ñamɛti ɔci tuuni. Ɔci ne maka ‘uaya ḍyɛrin ne kooki orɔyɛ, ɛkɛ mɔkci tuun doki. Ɔci ɛkɛ eyɛ ɛkkɛn bora, ɔci jokci ‘war ɛkɛ taaŋɛti. ¹¹ Ɔci te naŋka neeniyɛ, Ma Kiṭɔ buañi waakɛnda, ɔci maka bora ne ɛkkɛn tieŋkiyɛ, ɛkkɛn buañi daŋkun. ¹² Ɔci oŋkanda ɔɔnyɛ, Cuudan Yaccu bala noŋi naŋka tɛyan naŋka ñyecki ma Juaŋ ma ñomgɛnti. Ɔci Ma Kiṭɔ waakɛnda bala ḍwoṭi wyetkɛn oŋkanda on Juaŋ ona tolan daaŋji daŋa cɔnnɛ Cɔlamany. ¹³ Ɔci maka borayɛ, ɛkkɛn magga ñoodi i Ma Kiṭɔ amaam budan bɛɛ, acaan ɛkkɛn buayi. Yeti ɛkkɛn bala poŋi gɔki agi maka neeni ɛkki pwadgɔ. ¹⁴ Yeti maka coŋin gɛɛg jyeti Yaccuti, ɔci polla tolan ati Ma Kiṭɔti aŋi maka ne cyɛɛlɔ, maka ‘uayi ɔci maka moongo. ¹⁵ Ɔci oŋkanda maka waakɛn yiegdi ɛkkɛn ootan ma bora te oorgti, ɔci eetan ḍurtan ma pɔɔk toŋkɛnti te aŋgann ɔci te aarann moki, aŋka ne Butruc gordi pɔɔjɔyɛ, ɛkkɛn buagɔn ṭiebji ɛkɛ ɔga maka waakɛn yeyinti neeni aŋka ɛkkɛn waakɛn pwaddi. ¹⁶ Ɔci maka bala ban Urcaliim toŋkɛtiyɛ, ɛkkɛn bɛɛn ḍwoṭṭinti ban Urcaliimji. Ɛkkɛn bɛɛn eccin maka waakɛn yeyin ɔci maka muogɛ jɔkin yeyin, ɔci ɛkkɛn waakɛn pwadgin waakɛnda. ¹⁷ Yeti gaciic tolan ma Icrayiil i maka bala ɛkɛtiyɛ, ɛkkɛn korkɛn modɔ Cuudan Yaccuti, ¹⁸ ɛkkɛn ati ɛkkɛn muogɛ ɔci ɛkkɛn eyɛ ciginji. Maka bala i gaciic tolan neeniyɛ, gena ma Cadyuciin. ¹⁹ Yeti ne weenji malɛɛka gɛɛl cuonnɛ Jwaŋa Tolan, ɔci cigin tukɛ pɔŋnɛ, ɔci ma koonɛ malɛɛka bora, ɔci ɛkɛ gɔkcin mati agi, ²⁰ “Ɔgdɛ ooddɛ yɔɔttɛ on Juaŋ ona tolanji ma myettɛ te jyek Juaŋ jyeka tɛɛtki ma neeni waakɛnda.” ²¹ Ɔci ne ɛkkɛn tieŋki jyeka neeniyɛ, ɛkkɛn ati on Juaŋ ona tolanti te tinnɔ, ɔci ɛkkɛn bala loṭi ma moki. Ɔci gaciic tolan ma Icrayiil iki maka balki iki ɛkɛyɛ, ɛkkɛn wyetkɛn ḍɔɔlɛ nona ne cyɛɛlɔ, ɔci ɛkkɛn borcin maka gɔṭi jiekti. Ɔci ɛkkɛn borcin cyekin ma Icrayiilti waakɛnda daŋkun. Ɔci ɛkkɛn ma gɛɛg cuuñɛ ciginji aŋka ma ootan bora te ciginji aŋka ɛkkɛn eetan nona ma wyetkɛn ḍɔɔlkitiy. ²² Yeti ne bɔlin atki ɛkkɛntiyɛ, ɛkkɛn mɔkci jiju bɛɛ, ɔci ɛkkɛn dɔɔkkin dɔki nona maka ɛkkɛn cuuñkiy. Ɔci ɛkkɛn ma myetkɛ agi, ²³ “Ɔɔn cigin mɔŋnɔn tuggɛ a uulgin. Ɔci maka gɔṭi ciginyɛ, ɛkkɛn bala yɔdi kɛɛy gɔṭi cigin. Ɔci ne ɛkkɛn cigin tuggɛn pɔkkitiyɛ, ɔɔn gɔrnɔn jiju, ɔci menga bala bɛɛ.” ²⁴ Ɔci ne ḍuaŋa bɔlin on Juaŋ ona tolan ɔci gaciicin ḍwaŋin ma Icrayiil tieŋki jyeka neeniyɛ, ɛkkɛn tieki, ɔci ɛkkɛn bala gɔki agi, “Aa, cca cca cca, naŋka neeni baadi men boki?” ²⁵ Ɔci men gɛɛl bɛɛn ɔci ɛkkɛn myennɛ agi, “‘Uaya olnɛ ɛkkɛ ciginjiyɛ, ɛkkɛn bala yɔdi on Juaŋ ona tolanji loṭi mako.” ²⁶ Ɔci ḍuaŋa bɔlin ɛkɛ ati i bɔlin aŋka ɛkkɛn ma dɔɔtan moki. Ɔci ne ɛkkɛn ma ookitiyɛ, owwɛ te ywobji moki bɛɛ, acaan ɛkkɛn buayi dita ɛkkɛn yeptan ma te gwoyi noktan. ²⁷ Ɔci ne ɛkkɛn ookiti mayɛ, ɛkkɛn yɔɔtci ma maka gɔṭi jiek ñomgɛnti. Ɔci gaciic tolan ma Icrayiil tooccin ɛkkɛnti agi, ²⁸ “Kana ɛkkɛ myetkɛ ɔɔn doki ka naa ɛkkɛ loṭɛ ma te jyek mena neeni moki bɛɛ? Ɔci acca jyeka loṭɛ ɛkkɛ ma neeniyɛ, ati ban Urcaliim konɛti warda. Ɔci ɛkkɛ buagɛ dala jyek lyen Yaccu aga jyek ɔɔn aŋka jiek bɛya ɔɔn wyetkɔtɛ?” ²⁹ Ɔci Butruc ɔci maka pookɛn a Cuudan Yaccu neeniyɛ, ɛkkɛn gɔkcin ṭwokcin mati agi, “Hay ɛkkɛ, ɔɔn buagɔn noŋdɔn ba jyek ma baan budan bɛɛ. Ɔɔn buagɔn noŋdɔn ba jyek Jwaŋa Tolan. ³⁰ Gɔṭṭɛ, Yaccu neeniyɛ, ɛkɛ ŋaamnɛ ɛkkɛ ñaalɔ ɔci noŋŋɛ ɛkkɛ. Ɔci Jwaŋa Tolan Jwaŋ yɔrg ikinyɛ, Yaccu jɔɔlnɛ ñaalɔ te koolji tɛɛti moki. ³¹ Ɔci ɛkɛ naŋŋɛ Jwaŋa Tolan aŋi mena tolan, ɔci coonnɛ Juaŋ taaŋɛti taaŋŋa byerɔn. Ɛkɛ naŋŋɛ Juaŋ a Mena Wɛɛyi ikin, ɔci ɛkɛ moki a Mena Yuoci ikin. Ɔci a ɔŋŋiyɛ, ɛkɛ yaakinti noŋdi aŋka ma Icrayiil yomgɛn wiakti te nɔji ɛkkɛn, ɔci ɛkɛ yaakinti ma Icrayiil bɔɔktɛ te nɔji ɛkkɛn aŋka jyek nɔji ɛkkɛn baadi. ³² Maka noŋdi ba jyek Jwaŋa Tolanyɛ, Juaŋ ɛkkɛn ‘wondɛ Boŋ ɛkɛ. Ɔci Boŋ ɛkɛ neeniyɛ, ɛkkɛn nɔɔttɛ te naŋki Yaccu. Ɔci ɔɔn daŋkun ɔɔn balgɔn mietɔn ma te naŋki Yaccu daŋkun.” ³³ Ɔci ne Maka Gɔṭi Jiek tieŋki jyeka neeniyɛ, ɛkkɛn looñi Cuudan Yaccuti ne tolan, ɔci ɛkkɛn buagɔn ɛkkɛn noktan. ³⁴ Yeti men ma Pɛriciin gɛɛl bala i Maka Gɔṭi Jiek neeni ɛkɛ yenti Gameelyal. Ɛkɛ a mena loṭi ma te jyek ganuun. Ɔci ma waakɛnda gɔki agi ‘wana neeni pwadɔ katan. Ɔci Gameelyal gɔkcin agi, “Dala maka neeni kaatti bora lakun ne ḍiɛran ṭɔɔlɛ.” ³⁵ Ɔci ne ɛkkɛn kaacki borayɛ, Gameelyal gɔkcin mati agi, “Hay! Ɛkkɛ ma Icrayiil, woŋgɔ tiittɛ te naŋka naŋdɛ ɛkkɛ ‘uaya neeniti neeni. ³⁶ Te baaṭi ‘uan gɛɛl bala yenti Tudac. Ɛkɛ gɔki agi ɛkɛ agji mena tolɔ, ɔci ma gɛɛg bootcin ɛkɛti a ḍiɛkan bɛɛ, bala ba miyyan ne ŋaanɔ (400). Yeti ne baaṭi Tudac nogɛ mako, ɔci maka bootcin ɛkɛti neeniyɛ, ɛkkɛn cyɛnŋin jitin, ɔci jyek Tudac ḍakcin budan. ³⁷ Ɔci ne baaṭi moki ne ma Ḍɔɔm balki kieki ma yengɛnyɛ, mena parɛ gɛɛl bala yenti Yahuuja. Ɛkɛ bɛɛn te ban Jaliil, ɔci ma gɛɛg tieŋŋin jyek ɛkɛ ɔci bootcin ɛkɛti. Ɔci ne baaṭi ɛkɛ ḍakcin daŋkun, ɔci maka bootcin ɛkɛti neeni cyɛnŋin jitin moki. ³⁸ Ɔci acca ‘ya ɛkkɛ myettin, naa ɛkkɛ noŋdɛ genga ‘uaya neeniti bɛɛ. Ɛkkɛn daldɛ. Kan jyek ɛkkɛn neeni bɛɛn te yomg ma baanti budanyɛ, jyek ɛkkɛn ḍakti budan. ³⁹ Yeti kan jyeka neeni bɛɛn te Jwaŋa Tolantiyɛ, ɛkkɛ yaaktɛti ’uaya neeni yɔddɛ ñin bɛɛ, dala ɛkkɛ woŋgɔ tiittɛ! Ɛkkɛ aŋka waakɔ woottɛ noowɛ i Jwaŋa Tolan.” ⁴⁰ Ɔci ma tieŋŋin jyek Gameelyal ɔci ɛkkɛn Cuudan Yaccu borkɛ, ɔci ɛkkɛn ḍwayɛ, ɔci ɛkkɛn gɔkcin ɛkkɛnti agi, “Naa ɛkkɛ loṭɛ ma te jyek Yaccu moki bɛɛ!” Ɔci ne ɛkkɛn jiek ḍaakkitiyɛ, ɛkkɛn ma pɔkkɛ. ⁴¹ Ɔci ne ɛkkɛn kooki bora te non Maka Gɔṭi Jiekyɛ, ɛkkɛn yomgɛn ñɔɔna ñɔɔn acaan taab bɛɛn ɛkkɛnti te jyek Yaccu. ⁴² Ɔci ɛkkɛn jyek Yaccu daljɛ bɛɛ. Ɛkkɛn bala loṭi ma oŋkanda ɔɔn. Ɛkkɛn bala loṭi ma on Juaŋ ona tolan ɔci oorga pookɛnti daŋkun te jyek Yaccu Kiṭɔ.

¹ Ɔci te oŋka wannayɛ, ne Ma Kiṭɔ balki ciɛñki a ciɛñi gɔ moki coŋkinyɛ, jiek bɛɛn Ma Kiṭɔ ma Icrayiilti. Ma Icrayiil maka gɔki te tuk Giriik, ɛkkɛn bala wɛyyɔ te jyek waak i ma Icrayiil maka gɔki te tuk Ma Ibru, acaan ne ɛkkɛn ‘woñki ma te waak oŋkandayɛ, moonga ciek ɛkkɛn yɔmji te waak bɛɛ. ² Ɔci Maka Inyaakkɛn Wyetkɛn Ne Yyɛɛwɔ borcin Ma Kiṭɔti waakɛnda, ɔci ɛkkɛn bɛɛni. Ɔci Maka Inyaakkɛn Wyetkɛn Ne Yyɛɛwɔ gɔkcin ɛkkɛnti agi, “Ɔɔn yaakɔnti lali jyek Juaŋ daldɔn te jyek oomdin bɛɛ. ³ Modg ɔɔn, a ɔɔnyɛ, dala ɛkkɛ muodɛ maka ‘uay gɛɛg ne dɔɔyɔ wyetkɛn ne yyɛɛwɔ te ɛkkɛti wɛnan aŋka ɛkkɛn gɔrti kanŋa neeni. Dala maka neeni ɛkkɛn ŋeecɔn ma waakɛnda a ɛkkɛn a maka pwadin, ɔci dala ɛkkɛn a maka yomgɛn kuumi te Boŋ Jwaŋa Tolan, ɔci dala ɛkkɛn a maka ñingɛn tɛyan aŋka ɔɔn ɛkkɛn ‘wondɔn kanŋa neeni. ⁴ Yeti ɔɔnyɛ, ɔɔn woodɔn te cɔŋi ɔci te lali jyek Juaŋ bɛɛ.” ⁵ Ɔci ne ma tieŋki jyeka neeniyɛ, ɛkkɛn waakɛnda gɔki agi, “Ɛɛ, a ɔɔn pwatcin, hay.” Ɔci ɛkkɛn maka ‘uay kɛññɛ bora ne dɔɔyɔ wyetkɛn ne yyɛɛwɔ. Ɔci mena ‘uan gɛɛl ne cyɛɛlɔyɛ, ɛkɛ yenti Ictipanuc. Ɛkɛ jyeti Juaŋti ne pwadan, ɔci ɛkɛ yomɛ kuumi te Boŋ Jwaŋa Tolan. Ɔci maka pookɛn neeniyɛ, gena Pilibuc, ɔci Prɔkɔɔrac, ɔci Nikeenɔr, ɔci Timan, ɔci Parmenac, ɔci Nikɔleeyac. Ɔci Nikɔleeyac neeni ban ɛkkɛn yenti Antyak. Nikɔleeyac naŋki Keedin Pookɛn dalnɛ, ɔci ɛkɛ bala noŋi ba ma Icrayiil. ⁶ Ɔci maka ne dɔɔyɔ wyetkɛn ne yyɛɛwɔ neeniyɛ, owwɛ ma Cuudan Yaccuti, ɔci Cuudan Yaccu neeniyɛ, ne ɛkkɛn cɔkkiyɛ, ɛkkɛn byeŋkɛn tañji ɛkkɛn wyetkɛnti aŋka Juaŋ ɛkkɛn magdɛ te kanŋa ɛkkɛn ‘woñkiti ma neeni. ⁷ Ɔci jyek Jwaŋa Tolan ati ciɛñi baan konɛ warda, ɔci ma Icrayiil Ma Kiṭɔ bala ciɛñ a ciɛñi ne pɛñan gɔ moki coŋkin ban Urcaliim ɔɔn. Ɔci maka gaciicin ma Icrayiilyɛ, gɛɛg jyeti Kiṭɔti ne coŋɔn. ⁸ Ɔci Ictipanuc yomɛ bɔɔna bɔɔno, ɔci yomɛ tɛɛna tɛɛno. Ɛkɛ bala noŋi naŋka tɛyan ɔci naŋka ñyecki ma Juaŋ ma ñomgɛnti. ⁹ Yeti ma gɛɛg bɛɛn te ona morki ma Juaŋ (ona yenti On Maka Kɛɛnk Acca Moki Bɛɛy). Ɔci ma Cayriin, ɔci ma Alɛkcaandriya, ɔci maka ‘uay gɛɛg te ban Ciliicya ɔci ban Ecyayɛ, maka neeni bala tyewɔ. Ɔci maka neeni buannɛ Ictipanuc. ¹⁰ Ɛkkɛn yaakinti gɔwwɔ i ɛkɛ moki bɛɛ, acaan Ictipanuc bala gɔki te ñing tɛɛn te Boŋ Jwaŋa Tolan ɛkɛ yomɛti. ¹¹ Ɔci ɛkkɛn ati maka pookɛn myetkɛ lieda ɔɔn, ɔci ɛkkɛn ma ‘woñgi bilko, ɔci gɔkcin ɛkkɛnti agi, “Dala ɛkkɛ ma myettɛ agi Ictipanuc bala ḍori Muuca ɔci Jwaŋa Tolan.” ¹² Ɛkkɛn gɔki a ɔɔn acaan ɛkkɛn buagɔn ma loondi Ictipanucti. Ɔci ma waakɛnda i cyekin i maka loṭi ganuun Juaŋyɛ, ne ɛkkɛn tieŋki jyeka neeniyɛ, ɛkkɛn looñi, ɔci ɛkkɛn ati ɔci Ictipanuc mugɛ, ɔci owwɛ ma nona Maka Gɔṭi Jiek ñomgɛnti. ¹³ Ɔci ɛkkɛn maka pookɛn gɛɛg ḍuaccɛ iñɔ daŋkun aŋka ɛkkɛn Ictipanuc jomtanyɔ. Ɔci ne ma balki gɔrki jiek menyɛ, ɛkkɛn Ictipanuc jomgiyɔ. Ɛkkɛn gɔki agi, “Ictipanuc gɔki ne yaayan oŋkanda te on Juaŋ ona tolan, ɔci te ganuun Muuca. ¹⁴ Ɔɔn tieŋnɔn ɛkɛ gɔki agi Yaccu men Najarɛt neeni on Juaŋ ona tolan lɛɛkta iñɔ, ɔci jyek naŋki yɔɔr jyeka ikin ‘wonninti Muuca bɛɛn ikinti agdɛyɔ.” ¹⁵ Ɔci ne ma balki cieki gɔrki jiekyɛ, maka ciyi nona Maka Gɔṭi Jiek gɔrcin Ictipanuc ñingɛti waakɛnda, ɔci ɛkɛ ñingɛ waakɛn aagɛ bala ba bolji malɛɛka ɔɔn.

¹ Ɔci gaciic tolan ma Icrayiil tooccin Ictipanucti agi, “Jyeka guaktan ma iti neeni a jyeka awarɛ?” ² Ɔci Ictipanuc gɔkcin agi, “Modg ɔɔn ɔci weyi ɔɔn, tieŋdɛ. Jwaŋa Tolan warɛ lɛɛlnɛ bora yɔr ikin Abrahimti ne ɛkɛ baali ciyi te bana kaŋ wyeñɛti meny. Te wɔɔka wannayɛ, ɛkɛ meni bɛɛn ban Arɔnti bɛɛ. ³ Ɔci Jwaŋa Tolan gɔkcin ɛkɛti agi, ‘Abrahim, jɔŋŋa ñaalɔ te bana neeniti, ma ɛkkɛ dalja, ootta nona i myettin ‘yay.’ ⁴ “Ɔci ɛkɛ ma ɛkkɛn ma Kaldiiya dalnɛ, ɔci ɛkɛ bala ciyi ban Arɔn ne ḍyɛṭ ṭɔɔlɛ. Ɔci ne weegɛn tuuniyɛ, ɛkɛ oonɛ Juaŋ bora wɛnni bana ciyi ɛkkɛ neeni. ⁵ Juaŋ Abrahim ‘wonnɛ noon gɛɛl ne ḍyɛṭ ṭɔɔlɛ aŋka aga non ɛkɛ men bɛɛ. Yeti Abrahim myennɛ Juaŋ agi, ‘Bana neeniyɛ, aga ban i ɔci ban kɛɛgin i oŋkanda ɔɔn.’ Yeti ne Juaŋ gɔŋni Abrahimti agi ṭɛra neeni agdɔ ṭɛr ɛkta i kɛɛgin ɛkta neeniyɛ, Abrahim balkin kaci gɛɛl men bɛɛ. ⁶ Jyeka guaŋŋɛ Jwaŋa Tolan neeni gɔki Abrahimti agi, ‘Kɛɛgin i aga maka wɛlg bana parɛti, ɔci ɛkkɛn naŋtan ma a maka kɛɛnko, ɔci taab bɛya ɛkkɛnti yuong miyyan ne ŋaanɔ (400).’ ⁷ Ɔci agi, ‘Maka noŋdi taab ɛkkɛntiyɛ, ‘ya ywobji olja ɛkkɛnti daŋkun, ɔci a ɔŋŋiyɛ, kɛɛgin i pɔɔktan mako, ɔci ɛkkɛn koodi bora bɛya morti ‘yati nona neeniti wɛnni.’ ⁸ Ɔci Juaŋ Abrahim myennɛ te jyek ŋwoti mako. Jwaŋa Tolan buagɔn Abrahim ɔci kɛɛgin ɛkɛ ŋwottan ma waakɛnda bala ba naŋka ñyecki ma Jwaŋa Tolan te jyeka naŋɛ ɛkɛ i ɛkkɛn. Ɔci Icaak jiennɛ Abrahim. Ɔci ne nink Icaak ninka ɛkɛ jietkiti ma akki ne dɔɔyɔ wyetkɛn ne ḍoogɔyɛ, ɛkɛ ŋunnɛ weegɛn. Ɔci Yaakub jiennɛ Icaak, ɔci Yaakub ŋunnɛ weegɛn, ɔci yɔrg ikin ŋeecɔn ma a inyaakkɛn wyetkɛn ne yyɛɛwɔ, ɛkkɛn jiennɛ Yaakub, ɔci ɛkkɛn ŋuodɛ mako. ⁹ “Ɔci yɔrg ikin kɛɛgin Yaakub korkɛn modɔ mod ɛkkɛn Yuocipti, ɔci ɛkɛ wiɛljiyɔ ɛkkɛn, ɔci eyɛ ma ban Macor aŋi mena kɛɛngɔn. Yeti Jwaŋa Tolan bala iki ɛkɛ. ¹⁰ Ɔci Yuocip maŋŋɛ ɛkɛ te taab ɛkɛ waakɛnda. Ɔci Jwaŋa Tolan Pɛɛrɔ naŋŋɛ yomɛ pwanna pwani ɛkɛti, ɔci Yuocip ‘wonnɛ Juaŋ ñing tɛɛn Pɛɛrɔ ñamɛti. Pɛɛrɔ neeniyɛ, ɛkɛ a ḍuaŋa tolan ma Macor. Ɔci ɛkɛ Yuocip naŋŋɛ aŋi ḍuaŋa ṭɔɔlɛ ban Macor, ɔci Yuocip naŋŋɛ aŋi ḍuaŋa on ɛkɛ daŋkun. ¹¹ Ɔci koñ bɛɛn ban Macor jiñɛ warda, ɔci ban Kɛnan daŋkun. Ɔci taab bɛɛn yɔrg ikinti ne tolan acaan ɛkkɛn yɔṭi waka amtan gɛɛg bɛɛ. ¹² Yeti Yaakub tieŋŋin agi pok balgɔ ban Macor, ɔci ɛkɛ kɛɛgin ɛkɛ yɔrg ikin cuuññɛ ban Macor pokti. Oŋŋa neeniyɛ, gena oŋŋa atki ɛkkɛn te ñamu neeni, yeti ɛkkɛn Yuocip ñiyɛ ne agɛ ɛkɛ bɛɛ. ¹³ Ɔci te oŋŋa akki yyɛɛwɔyɛ, Yuocip warɛ lɛɛlnɛ bora modgɛnti. Ɔci oŋŋa ɛkɛ warɛ lɛɛlnɛ bora modgɛntiyɛ, Pɛɛrɔ kɛɛn Yuocip ŋeennɛ. ¹⁴ Ɔci Yuocip ma cuuññɛ wey ɛkkɛn Yaakubti, ɔci ɛkɛ bornɛ iki ma ɛkkɛn. Ma ɛkkɛnyɛ, a ma baan ne ḍoogɔ mena parɛ byeŋkɛ ɔci ne dɔɔyɔ (75). ¹⁵ Ɔci Yaakub ati ban Macor, ɔci ɛkɛ iki kɛɛgin ɛkɛ yɔrg ikin ɛkkɛn tuun aŋan. ¹⁶ Yeti ɛkkɛn waakɛn eyɛ ma ṭɛr bana ɛkkɛn ḍuaññɛ Juaŋ te jwali ɔci jokci ma iñɔ ban Cɛkam. Ɛkkɛn waakɛn jokcɛ ma kola wiɛllɛ Abrahim te bilko. Kola neeni wiɛllɛ ɛkɛ te kɛɛgin Emar ‘uay ban Cɛkamti. ¹⁷ “Ne yuonga coŋin atkɛ doki, ɔci ne jyeka gɔŋni Juaŋ Abrahimti agi ɛkɛ ma koojji bora te ban Macor ɔci ‘woñji baan noŋki dɛnti borayɛ, ma ikin bala ciɛñ a ciɛñi gɔ moki coŋkin ɔɔn. ¹⁸ Ɔci ma ooki ḍuaŋa tolan ḍuaŋa woonɛ ban Macor, ɔci ɛkɛ cooccin kaakci cyɛgjiti. Ɔci ḍuaŋa tolan neeniyɛ, Yuocip ŋeejɛ ɛkɛ moki bɛɛ. Ɛkɛ Yuocip kwoyɛ. ¹⁹ Ḍuaŋa neeni bala ñieyi te yɔrg ikin. Ɔci ɛkɛ gɔkcin yɔrg ikinti agi dala ɛkki kɛɛgin ɛkki kɛɛgin ḍyɛrin yiɛpti ɔntɔ baan ŋoodanti aŋka dala ɛkki tuudɔ waakcinda. ²⁰ Ɔci te oŋŋa wannayɛ, Muuca jiedɛ mako. Ɔci ɛkɛ pwanna pwani Jwaŋa Tolan woŋgɛti. Ɔci ɛkɛ cien on weegɛn ba ponk ne ḍoogɔ. ²¹ Ɔci oŋŋa ɛkɛ ookiti ma bora te on weegɛn aŋka yiɛptan ɔntɔ baan ŋoyɛti aŋka tuwayɛ, ɛkɛ eññɛ kaci Pɛɛrɔ, kacca ṭɔɔl on ɛkkɛn. Ɔci ṭɔla neeni bala gɔṭi Muuca ba kaci ɛkɛ ɔɔn. ²² Ɔci a ɔŋŋiyɛ, Muuca lalɛ ma ban Macor te jyek worgan ma Macor, ɔci te jyek naŋki ma Macor waakɛnda. Ɔci Muuca yaakinti jiek ne pwadan, ɔci balkɔn war tɛɛn moki. ²³ “Ɔci ne Muuca yuong ɛkɛ akki ma baan ne yyɛɛwɔyɛ, (40), ɛkɛ bala poŋi gɔki agi ɛkɛ ootci ḍieŋji ma ɛkkɛn ma Icrayiilti. ²⁴ Ɔci Muuca ne atti ḍieŋni ma ɛkkɛntiyɛ, men ma Macor gɛɛl mɔŋnɛ noŋi ne yaayan men ma Icrayiil gɛɛlti, ɔci Muuca ‘wan ma Icrayiil neeni yuonnɛ, ɔci men ma Macor neeniyɛ, noŋŋɛ Muuca. ²⁵ Acaan Muuca poŋi gɔki agi dala ɛkɛ ŋeeddɛti ma ɛkɛ ‘wonnɛti Juaŋ jiek aŋka ɛkɛ ma pɔkcɛ te taab ɛkkɛn. Yeti ma bala poŋi a ɔɔn bɛɛ. ²⁶ Ɔci ne liidɔ ma Icrayiil gɛɛg mɔŋnɛ ɛkɛ noowɔ ne yyɛɛwɔ moki. Ɔci Muuca gɔkcin ɛkkɛnti aŋka ɛkɛ ɛkkɛn yɔŋdɛ jieko. Ɔci ɛkɛ gɔkcin mati agi, ‘Hay! ‘Uayo, ɛkkɛ agɛ modin hay! Ɛkkɛ noowɛ yaakkɔ a ɔɔn ogo?’ ²⁷ “Ɔci mena noŋi ne yaayan moodɛnti neeniyɛ, ɛkɛ Muuca taannɛ ɔntɔ. Ɔci ɛkɛ gɔkcin Muucati agi, ‘Ɔgdi ootta ɔntɔ aŋan, i aŋŋi ḍuaŋa ɔɔn te jyek menɛ? Ɔci i aŋŋi mena yɔŋi jiek te jyek menɛ? ²⁸ I buagi noki ‘ya ba mena noŋŋi i tɛɛnɔyɛ?’ ²⁹ “Ɔci ne Muuca tieŋni jyeka neeniyɛ, ɛkɛ yiŋi ɔntɔ, ati bala ciyi ban Midyan, ɔci ne ɛkɛ baali ciyi ban Midyanyɛ, ɛŋ ɛkɛ jieni kɛɛgin a ‘uay ne yyɛɛwɔ. ³⁰ “Ne yuonga a ma baan ne yyɛɛwɔ bɛɛki borayɛ, Malɛɛka warɛ lɛɛlnɛ bora Muucati wɔɔŋji nona omi maañ jaano. Ɔci malɛɛka warɛ lɛɛlnɛ bora yeccu maañ jitin. Wɔŋa neeni bala poma yenti Cina tɛyɛti. ³¹ Ɔci ne Muuca gɔrni ɛkɛyɛ, ɛkɛ poni te naŋka neeni. Ɔci ne ɛkɛ orniti aŋka ɛkɛ gɔrti ne pwadanyɛ, ɛkɛ tieŋŋin pwan Jwaŋa Tolan ne Juaŋ gɔŋni ɛkɛti agi, ³² ‘‘Ya a Jwaŋ yɔrg ɛkkɛ Jwaŋ Abrahim, ɔci Jwaŋ Icaak, ɔci Jwaŋ Yaakub.’ Ɔci Muuca warɛ ḍiedan acaan ɛkɛ buayi, ɔci ɛkɛ gɔrcin jaanti moki bɛɛ. ³³ Ɔci Jwaŋa Tolan gɔkcin ɛkɛti agi, ‘Wɛɛyi i gwodda bora, acaan nona yɔɔdi i neeniyɛ, a non ‘ya nona pwadan ne tolan. ³⁴ ’Ya gɔrcan taab ma ‘ya ban Macor, ɔci ‘ya tieŋŋan joŋdin ɛkkɛn, ɔci ‘ya bɛɛn iñɔ wɛnni aŋka ɛkkɛn pɔkka. Bɛɛd i cundin ‘ya ban Macor.’ ³⁵ “Ɔci Ictipanuc gɔkcin ‘wota agi, ma yookɔn te Muuca ne ɛkkɛn gɔkki agi ɛkta aŋŋɔ ḍuaŋa ɛkkɛn te jyek menɛ, ɔci moki ne ɛkkɛn gɔkki agi ɛkta yɔŋɔ jiek te jyek menɛ. Ɔci yeti mena yookiti ma neeniyɛ, ɛkɛ cuonnɛ Juaŋ ɔci ɛkɛ aŋi ḍuaŋa ɛkkɛn, ɔci ma pɔŋnɛ ɛkɛ. Ɔci te naŋka ɛkɛ ma pɔŋnɛ neeniyɛ, Muuca maŋŋɛ malɛɛka ɛkɛ lɛɛrnɛ warɛ jaantiy. ³⁶ Ɔci Muuca neeniyɛ, ɛkɛ ma oonɛ bora te ban Macor te naŋki ɛkɛ naŋka tɛyan naŋka ñyecki ma ɛkɛ. Muuca noŋjin naŋka neeni ban Macor, ɔci noŋjin naŋka neeni Galŋa Tidan ḍwaŋɛti moki, ɔci noŋjin naŋka neeni moki ne ɛkkɛn balki wɔɔŋji te yuonga ma baan ne yyɛɛwɔ (40) neeni. ³⁷ Ɔci Muuca neeniyɛ, ɛkɛ ma Icrayiil myennɛ agi, ‘Jwaŋa Tolan ɛkkɛ ‘wondɛ mena bɔwa gɛɛl te ma ɛkkɛti ba ‘ya ɔɔn.’ ³⁸ Muuca neeniyɛ, gena ɛkɛ bala wɔɔŋji iki ma Icrayiil oŋŋa ɛkkɛn wyetkɛn ḍɔɔlkɛti nona ne cyɛɛlɔy, ɔci gena ɛkɛ noŋi jiek iki malɛɛka Pom Cina wyeñɛtiy. Gena Muuca ‘wonnɛ Juaŋ jyeka tɛɛtki ma neeni oonɛ ɛkɛ ikintiy. ³⁹ “Ɔci yɔrg ikinyɛ, buagɔn tieŋdi jyek ɛkɛ bɛɛ. Ɔci ɛkkɛn yookɔn te jyek ɛkɛ. Ɔci ɛkkɛnyɛ, bala poŋi gɔki agi ɛkkɛn dɔɔdinti ban Macor. ⁴⁰ Ɔci ɛkkɛn gɔkcin Haruunti agi, ‘Dala i ɔɔn noŋdɔn waka maldɔn ɔɔn gɛɛg ba jɔkin aŋka ɛkkɛn wɛɛddi ñamu ɔɔn ñomgɔti ɔɔn wɛɛtɔn dwaktɔn ban Macor. Acaan Muuca mena ikin oonin bora te ban Macor neeniyɛ, ɛkɛ bala wɛnɛ acca yeti?’ ⁴¹ Ɔci te oŋka wannayɛ, ɛkkɛn noŋjin naañ ṭɔɔlɛ doki aŋka aga jwaŋ ɛkkɛn. Ɔci ɛkkɛn gen ‘yɛri ɛkɛti doki. Ɔci ɛkkɛn yomgɛn ñɔɔna ñɔɔn te gena naŋɛ ɛkkɛn neeni. ⁴² Acaan a ɔŋŋiyɛ, Jwaŋa Tolan warɛ yalnɛ ɔntɔ te ɛkkɛnti. Ɛkkɛn dalnɛ pookɛn moṭi waka bala pɔliji, waka ba kɛltany. Ɔci a ɔɔnyɛ, jyeka kiigin worga bɔwan Jwaŋa Tolanti dɛññin bora agi, ‘Ma Icrayiil, yuonga ɛkkɛ balgɛ wɔɔŋji yuonga ma baan ne yyɛɛwɔyɛ, (40) mala ‘yɛrdɛ ɛkkɛ ‘yati neeniyɛ, ɛkkɛ ɛṭɛ ‘yati awarɛ boki? ⁴³ A’a, ɛkkɛ noŋŋɛ ona a bworŋ moṭɛ ɛkkɛ jwaŋa yenti Mɔlɛk, ɔci gena a muacin jwaŋa a kɛɛli yenti Ripan. Waka a muacin neeni pɔɔññɛ ɛkkɛ aŋka ɛkkɛ mortɛ ɛkkɛnti. Acaan a ɔŋŋiyɛ, ‘ya ɛkkɛ eedin ɔntɔ te wɛnni eedin ban Baabil ŋoyɛti.’ ⁴⁴ “Te baaṭi ne yɔrg ikin balki wɔɔŋjiyɛ, ɛkkɛn balki on Juaŋ ona bworŋo. Ɛkɛ cɔdɛ ma ba jyeka Muuca myennɛ Jwaŋa Tolany. ⁴⁵ Oŋŋa yɔrg ikin bɛɛki wɛnni iki ḍuaŋa ɛkkɛn Jɔcwa ɔci baan mukkɛtiyɛ, ona bworŋ neeni owwɛ ɛkkɛn wɛnni. Ɔci oŋŋa wannayɛ, Jwaŋa Tolan Keedin Pookɛn maka ciyi bana neenitiyɛ, ŋualnɛ ɛkɛ ɔntɔ. Ɔci ona neeniyɛ, bala yuonginda ne Daawud bɛɛni ɔɔn. ⁴⁶ “Jwaŋa Tolan yomɛ ñɔɔna ñɔɔn te Daawud. Ɔci Daawud tooccin Juaŋti acaan ɛkɛ buagɔn cɔtti ona pwadan te gwoyi aŋka ciyi Jwaŋ Yaakub. ⁴⁷ Yeti gena Daawud cɔti on Juaŋ ona tolan neeni bɛɛ. Gena Cɔlaman kaci Daawud aŋka cɔti ona ciyi Juaŋ neeniy. ⁴⁸ “Yeti Jwaŋa Tolan ñaalɔyɛ, ɛkɛ ciyi oorga cɔttan ma a cɔni neeni bɛɛ, bala ba jyeka kiinɛ bɔwa Jwaŋa Tolan gɛɛl ne Jwaŋa Tolan gɔki agi, ⁴⁹ ‘Pɔlla ñaalɔ a kaakci ‘ya, ɔci ṭɛra iñɔ a nona ḍɔcca ‘ya cieg ‘ya. Ɛkkɛ yaaktɛti noŋdɛ ona ciya ‘ya boki? Ɔci ɛkkɛ yaaktɛti noŋdɛ nona wooda ‘ya boki? ⁵⁰ Waak waakɛnda cɔni ‘ya te byeŋ ‘ya bɛɛ?’” ⁵¹ Ɔci Ictipanuc gɔkcin ‘wota agi, “Ɛkkɛ wyetkɔ tɛy tɛyo, hay! Ɛkkɛ yomgɔ yeyɔ Jwaŋa Tolanti parɛ bɛɛ. Ɛkkɛ yookɛ te jyek Boŋ Juaŋ oŋkanda bala ba yɔrg ɛkkɛ daŋkun. ⁵² Yɔrg ɛkkɛ bɔwan Jwaŋa Tolan gɛɛl daljɛ te naŋki ywobji boki? Bɔwan gɔki te baaṭi agi Mena Pwadan baalɔ bɛɛdɔyɛ, nogɛ yɔrg ɛkkɛ. Ɔci acca Mena Pwadan neeniyɛ, ɛkɛ tomnɛ ɛkkɛ ɔci noŋŋɛ ɛkkɛ doki. ⁵³ Ɛkkɛ ‘woñkɛ malɛɛkan ganuun, yeti ɛkkɛ jyek ganuun tiiññiyɔ bɛɛ.” ⁵⁴ Ɔci ne Maka Gɔṭi Jiek balki tyeŋki jyek Ictipanucyɛ, ɛkkɛn looñi ne tolan, ɔci ɛkkɛn lɛkɛn tiicciti te yom yoño. ⁵⁵ Yeti Ictipanuc neeniyɛ, ɛkɛ yomɛ kuumi te Boŋ Jwaŋa Tolan, ɔci ɛkɛ gɔrcin ñaalɔ, ɔci pwani Jwaŋa Tolan yuarnɛ ɛkɛ, ɔci Yaccu yuarnɛ ɛkɛ bala yɔɔd Jwaŋa Tolan taaŋɛti taaŋŋa byerɔn. ⁵⁶ Ɔci Ictipanuc gɔkcin ɛkkɛnti agi, “Gɔṭṭɛ, ‘ya gɔrcan pɔli warɛ pɔŋnɛ, ɔci ‘ya Kaci Ma Baan yuarcan bala yɔɔd Jwaŋa Tolan taaŋɛti taaŋŋa byerɔn!” ⁵⁷ Ɔci ne ɛkɛ baali gɔki a ɔɔnyɛ, ɔci Maka Gɔṭi Jiek yaajjin ne tolan, ɔci ɛkkɛn jyetkɛn midɛ, ɔci ɛkkɛn yiŋi waakɛnda nona ɛkɛti, ⁵⁸ ɔci ɛkɛ mugɛyɔ ɔci eyɛ wuayɛ ɔntɔ baan ŋoyɛti, ɔci ɛkɛ yepci te gwoyi aŋka noktan. Ɔci maka yebi Ictipanuc neeniyɛ, bworŋin ɛkkɛn ‘woñgi ‘uan ṭɔɔlɛ ḍiɛran gɛɛl aŋka tiektɛ. ‘Wana neeni yenti Caawul. ⁵⁹ Ɔci ɛkkɛn bala yebi Ictipanuc ne ɛkɛ bala cɔki Juaŋti ɔɔn. Ɛkɛ cɔkcin agi, “Ciɛggɔn ‘ya Yaccu, anti ṭiebji ‘ya!” ⁶⁰ Ɔci ɛkɛ ḍwoñjin iñɔ, ɔci yaajjin te pwana tolan agi, “Ciɛggɔn, naa i nɔjja neeni olja ɛkkɛnti bɛɛ!” Ɔci ne ɛkɛ gɔŋni a ɔɔnyɛ, ɛkɛ tuun doki.

¹ Ɔci Caawul yookɔn te jyek lyen Ictipanuc bɛɛ. Bala ba ɛkɛ poŋi gɔki agi dala ɛkta nogdi mako. Ɔci te oŋŋa wannayɛ, taab bɛɛn ne tolan ma kaniicati ban Urcaliim. Ɔci Ma Kiṭɔ waakɛnda cyɛnŋin jitin. Maka pookɛn ati bonk Yahuudiyaji, ɔci ma gɛɛg ati bonk Camɛɛryaji. Gena Cuudan Yaccu Cuudan A Inyaakkɛn Wyetkɛn Ne Yyɛɛwɔ neeni aŋka cien te ban Urcaliim konɛtiy. ² Ɔci maka ‘uay gɛɛg maka yomgɛn bala Juaŋti bɛɛn ɔci Ictipanuc warɛ eyɛ ɔci jokci ɛkkɛn iñɔ, ɔci ɛkkɛn bala wiak ne tolan te ɛkɛ. ³ Yeti Caawul bala noŋi ne yaayan Ma Kiṭɔti oŋkanda ɔɔn. Ɔci ɛkɛ bala ooddi oorg waakɛnda muowi maka ‘uay ɔci maka moong te oorg jitin, ɔci eedɛ ḍuattɛ ciginji. ⁴ Ɔci maka cyɛnŋin jitin ati noon warda neeniyɛ, ɛkkɛn bala mieti ma waakɛnda te jyeka wonkɛn jyeka pwadin. ⁵ Ɔci Pilibuc ati ban Camɛɛryaji, ɔci bala loṭi ma Camɛɛrya te jyek Yaccu Kiṭɔ. ⁶ Ɔci pooldin ḍwaŋin neeniyɛ, ne ɛkkɛn balki yɔtki tyeŋki jyeka laldɛ Pilibuc neeniyɛ, ɛkkɛn woŋgɛn tiiccɛ waakɛnda te jyek ɛkɛ ne ɛkkɛn gɔrki naŋka naŋŋɛ ɛkɛ naŋka tɛyan naŋka ñyecki may. ⁷ Maka coŋin gɛɛg muogɛ jɔkin yeyin, ɔci ne Pilibuc gɔŋni jɔkinti agi dala ɛkki koodɔ bora te matiyɛ, ɔci ɛkkɛn bala yaadan a yook ɔci kooyin bora te ma waakɛnti. Ɔci maka pwotk ɔci maka ŋɔr ɛkkɛn waakɛn yɔɔtci iñɔ daŋkun. ⁸ Ɔci ma yomgɛn ñɔɔna ñɔɔn bana tolan neeniti. ⁹ Yeti bana neenitiyɛ, mena ṭyeni gɛɛl bala yenti Cimaan. Ɛkɛ bala noŋi naŋka tɛyan te jɔkin yeyin ñamu. Ɔci ma Camɛɛrya waakɛndayɛ, ɛkkɛn yomgɛn buañi te naŋki ɛkɛ. Ɔci ɛkɛ gɔki agi ɛkɛ agji mena tolɔ. ¹⁰ Ɔci ma waakɛnda i maka ḍyɛrin ɔci maka ḍwaŋinyɛ, ɛkkɛn tieŋŋin jyek ɛkɛ, ɔci bootcin ɛkɛti. Ɔci ɛkkɛn bala gɔwwɔ te mena neeni agi, “War tɛɛn ɛktayɛ, agi war tɛɛn Jwaŋa Tolan, agi war tɛɛn neeniyɛ, yenti ‘Tol Tolo’.” ¹¹ Ɔci ɛkkɛn bala tyeŋi jyek ɛkɛ oŋkanda, acaan ɛkɛ bala noŋi naŋka tɛyan neeni te baaṭi doki. ¹² Yeti ne ma jyetki jyeka guagdɛ Pilibuc a jyek cyɛgji Jwaŋa Tolan neeni ɔci ne ɛkkɛn tieŋki jyek yenti Yaccu Kiṭɔtiyɛ, ɛkkɛn buulɛ ma. Gena maka ‘uay i maka moongo. ¹³ Ɔci Cimaan daŋkun jyetti. Ɔci ne ɛkɛ buulkiti mayɛ, ɛkɛ bala ati iki Pilibuc oŋkanda. Ɔci ne ɛkɛ baali gɔṭi naŋka naŋdi Pilibuc a naŋka tɛyan naŋka ñyecki ma oŋkandayɛ, gɔ ɛkɛ moki podi ɔɔn. ¹⁴ Ɔci ne Cuudan Yaccu maka bala ban Urcaliim neeni tieŋki maka ban Camɛɛrya jyetki jyek Jwaŋa Tolantiyɛ, ɛkkɛn Butruc ɔci Yɔhanna cuuñɛ ɛkkɛnti. ¹⁵ Ɔci ne ɛkkɛn bɛɛkiyɛ, ɛkkɛn cɔkcin Jwaŋa Tolanti te ma Camɛɛrya aŋka Boŋ Jwaŋa Tolan cootti ɛkkɛn yomgɛnti. ¹⁶ Acaan Boŋ Jwaŋa Tolan bɛɛn mengati men bɛɛ. Ma buuli ma te yenti Yaccu parɛ men. ¹⁷ Ɔci Yɔhanna ɛkkɛn i Butruc byeŋkɛn tañji ɛkkɛnti, ɔci Boŋ Jwaŋa Tolan bɛɛn ɛkkɛnti doki. ¹⁸ Ɔci ne Cimaan gɔrni a ɔɔnyɛ, ɛkɛ gɔkcin Butructi i Yɔhanna agi, ¹⁹ “Antɛ bilka neeni aŋka dala naŋka tɛyan bɛya ‘yati aŋka ne ‘ya byeŋku tanda mengatiyɛ, dala Boŋ Jwaŋa Tolan bɛya ɛkɛti daŋkun.” ²⁰ Ɔci Butruc gɔkcin ɛkɛti agi, “Dala i ooddi ḍakti iki bilk i a cyɛɛlɔ, acaan i poŋ gɔk agi naŋki Jwaŋa Tolan ma wɛɛṭi te bilko. ²¹ Jyek naŋka tɛyan bɛya te Juaŋti neeni a jyek i bɛɛ, acaan i yomu bala ɔntɔ te Jwaŋa Tolanti. ²² Dala i wiakca yomuti te naŋki i naŋka yaayan neeni. Ɔci dala i cɔkca Jwaŋa Tolanti ɔci i gɔrca ne Juaŋ boki paŋŋa neeni eedɛ ɛkɛ ɔntɔ te i yomuti boki no. ²³ Acaan ŋeej ‘ya i baal yomu yaayɛ ne tolan, ɔci i waru pɔŋni te nɔji i neeni bɛɛ. I baal te nɔji bieŋɛti men.” ²⁴ Ɔci Cimaan ṭwokcin agi, “Dala ɛkkɛ cɔktɛ Juaŋti te ‘ya aŋka naa naŋka guaŋŋɛ ɛkkɛ neeni gɛɛl bɛya ‘yati bɛɛ.” ²⁵ Ɔci ne Butruc ɔci Yɔhanna ma myetkɛti te naŋki Yaccu Kiṭɔ naŋka yuarɛ ɛkkɛn ɔci ne ɛkkɛn ma lalkɛti te jyeka cuonnɛ Ciɛggɔn matiyɛ, ɛkkɛn dɔɔki ban Urcaliimji dɔki. Ɔci ne ɛkkɛn balki yomu dɔɔti ban Urcaliimjiyɛ, ɛkkɛn ati ɔŋi bonka bala yomu ban Camɛɛrya konɛti, ɔci ɛkkɛn maka neeni myetkɛ daŋkun te jyeka wonkɛn jyeka pwadin neeni. ²⁶ Ɔci ne naŋka neeni baanɛyɛ, malɛɛka gɛɛl gɔkcin Pilibucti agi, “I jɔŋŋa te bana neeniti wɛnni, i ootta pɔya cuayati pɔya eetan ma te ban Urcaliim eetan ban Gacati. Gena pɔya eetan ma wɔɔŋjiy.” ²⁷ Ɔci ɛkɛ jɔŋŋin ɔci atti. Ɔci mena ‘uan gɛɛl bala ati pɔɔjɔ. Ɛkɛ a men ma Cudaan mena kanŋan i ḍuaŋa tolan mena gɔṭi bilko. Ḍuaŋa tolan neeniyɛ, ɛkɛ a ḍuaŋa tolan a ɛɛŋo, ɛkɛ bartan ma agi Kandaci. Ɔci ‘wana neeni ati ban Urcaliim aŋan aŋka morti Juaŋti. ²⁸ Ɔci ne ɛkɛ yorni te ban Urcaliim ooddi dɔɔdi ban ɛkkɛnyɛ, ɛkɛ bala taab te baabin ɛkɛ baabin wuatan muntany. Ɔci ne ɛkɛ baali eedɛ baabinyɛ, ɛkɛ bala poki worga Juaŋ te ñaalɔ ɔɔn. Worga neeniyɛ, gena jyek Icaaya mena a bɔwa Jwaŋa Tolan. ²⁹ Ɔci Boŋ Jwaŋa Tolan gɔkcin Pilibucti agi, “Ɔgdi ootta orcati baabinti aŋan.” ³⁰ Ɔci Pilibuc kuan yiŋi ɛkɛti, ɔci bala tyeŋi jyeka pagdɛ ɛkɛ. Ɔci Pilibuc gɔkcin ɛkɛti agi, “Jyeka paga i wanna jitkɛn yuarca?” ³¹ Ɔci ‘wana neeni gɔkcin agi, “Hay, jitkɛn yuarca ‘ya a ɔki? A menɛ ‘ya lalla aŋka ɛkkɛn jitkɛn yuarta ‘yay?” Ɔci ɛkɛ gɔkcin Pilibucti agi, “Kooya, taaptin iki ‘ya.” ³² Jyeka pagdɛ ɛkɛ neeniyɛ, gɔki agi, “Mena neeni ɛkɛ bala ba kalŋ ne eetiti ma ŋartiti may, walla ɛkɛ bala ba kalŋ ṭɔɔlɛ ne eetiti ñyɛtitiyɔ ma ɔci gɔkti genga bɛɛy. ³³ Ma gɔrcin jyek ɛkɛ ne pwadan bɛɛ. Ma noŋi ne yaayan ɛkɛti bala ba ɛkɛ a genga bɛɛ. Maka bala cieki iki ɛkɛ neeniyɛ, naŋki ɛkkɛn bala a ɔki a ɔɔn? Acaan ɛkkɛn ɛkɛ ŋudɛji te coodi iñɔ ṭɛɛrji wɛnni.” ³⁴ Ɔci mena tolan neeni gɔkcin Pilibucti agi, “‘Ya myetta, hay, bɔwa neeni gɔki te war ɛkɛ parɛ? Walla ɛkɛ gɔki te war mena parɛ gɛɛl?” ³⁵ Ɔci Pilibuc ɛkɛ myennɛ te jyeka wonkɛn jyeka pwadin, jyek Yaccu Kiṭɔ. Ɔci ɛkɛ ne men juannɛ lwoŋŋiyɛ, ɛkɛ men lwoŋŋɛ te jyeka guaŋŋɛ Icaaya te Yaccu Kiṭɔ. ³⁶ Ɔci ne ɛkkɛn balki atki pɔɔjɔyɛ, ɛkkɛn dɛñjin nona balki pieg gɛɛlti, ɔci mena tolan neeni tooccin Pilibucti agi, “Gɔṭṭi, piega yɔdi wan. Oŋ i ‘ya bulda bɛɛ?” [ ³⁷ Ɔci Pilibuc gɔkcin ɛkɛti agi, “Kan i jyetti te yom i ne pwadanyɛ, i buldin.” Ɔci mena tolan neeni gɔkcin ɛkɛti agi, “‘Ya jyeti doki. ‘Ya gɔk Yaccu Kiṭɔ ɛkɛ a Kaci Jwaŋa Tolan.”] ³⁸ Ɔci ɛkɛ gɔki agi da baabin yɔɔddɔ. Ɔci baabin yɔɔnni. Ɔci Pilibuc ɔci mena neeniyɛ, ɛkkɛn kooyin iñɔ, ɔci ɛkkɛn ati pietin, ɔci ɛkɛ buullɛ Pilibuc. ³⁹ Ɔci ne ɛkkɛn kooki bora te pietin bɛɛki borayɛ, ɔci Boŋ Jwaŋa Tolan Pilibuc eññɛ nona parɛti. Ɔci menga Pilibuc yuarŋɛ moki bɛɛ. Ɔci ɛkɛ ati baanji te yoma ñɔyan. ⁴⁰ Ɔci Pilibuc eññɛ Boŋ Juaŋ ɔci ɛkɛ warɛ mɔŋnɛ ban Ajɔɔtoc. Ɔci ɛkɛ ati te Ajɔɔtoc bala ooddi ban Cɛcariiyati. Ɔci bonka ḍyɛrin bala yomɔ. Ɔci ɛkɛ bala mieti ma te jyek Yaccu Kiṭɔ bonka ḍyɛrinti neeni ne ɛkɛ dɛnni ban Cɛcariiyati ɔɔn.

¹ Caawul ɛkɛ bala ‘yeṭi nooŋi Ma Kiṭɔ men. Ɔci ɛkɛ ati tooccin gaciic tolan ma Icrayiilti, ² acaan ɛkɛ buagɔn worgan eedɛ maka ḍwaŋinti oorga morki ma Juaŋti ban Ḍimaacka, acaan ɛkɛ buagɔn ooddi lieṭi maka a Ma Pɔy maka ‘uay ɔci maka moong mwogdɛ ɔci ḍɛgdɛ, ɔci eedɛ dwagdɛ ban Urcaliim byeŋkɛn a ḍɛɛggin ɔɔn. ³ Ɔci ɛkɛ atti. Ɔci ne ɛkɛ noŋi dɛndi ban Ḍimaackayɛ, noon dɛkkin ɛkɛti te ñaalɔ bɔɔna bɔɔno. ⁴ Ɔci ɛkɛ ḍɛmmin iñɔ ṭɛɛrji, ɔci ɛkɛ tieŋŋin pwan gɔkkin ɛkɛti agi, “Caawul, Caawul, i noŋ ne yaayan ‘yati a ɔɔn ogo yeti?” ⁵ Ɔci Caawul gɔkcin agi, “Ciɛggɔn, i a menɛ?” Ɔci pwan gɔkcin ɛkɛti agi, “Gena ‘ya Yaccu mena naŋa i oŋkanda ne yaayan neeni. ⁶ Acca dala i jɔŋŋa ñaalɔ ootta bana tolanti aŋan, ɔci aŋanyɛ, i myetti men gɛɛl te naŋka naŋa i.” ⁷ Ɔci maka atki i ɛkɛyɛ, ɛkkɛn bala yɔdi a yɔɔdi lieda ɔɔn, yaakinti gɔkti genga bɛɛ, acaan ɛkkɛn buayi. Ɛkkɛn tieŋŋin pwano, yeti ɛkkɛn men gɛɛl yuarcɛ bɛɛ. ⁸ Ɔci ne Caawul jɔŋni ñaalɔ te ṭɛɛrjiyɛ, ɛkɛ woŋgɛ a pɔggin, yeti ɛkɛ yaakinti gwali noon bɛɛ. Ɔci ɛkɛ eyɛ lwadɛ ma te bieŋɛ, eyɛ lwadɛ ma ne ban Ḍimaackati ɔɔn. ⁹ Ɔci ɛkɛ bala ciyi a ulli ba nink ne ḍoogɔ ɔɔn. Ɔci te ninka ne ḍoogɔ neeniyɛ, ɛkɛ omi genga bɛɛ, ɔci ɛkɛ moti waagga bɛɛ. ¹⁰ Ɔci men Kiṭɔ gɛɛl bala ban Ḍimaackati yenti Ananaayac. Ɔci Ciɛggɔn gɔkcin ɛkɛti te liɛlti agi, “Ananaayac!” Ɔci Ananaayac jyettin ɛkɛti agi, “Aah, Ciɛggɔn, ‘ya baal wɛnni.” ¹¹ Ɔci Ciɛggɔn gɔkcin ɛkɛti agi, “Jɔŋŋa ootta pɔya bartan ma a ‘Pɔya A Tyɛlga’, ootta on Yahuuja ɔci toocca mati aŋan te mena ‘uan mena yenti Caawul. Ɛkɛ a men ma Tarcoc, ɛkɛ bala aŋan cɔki ‘yati ne pɛñan. ¹² Ɔci men gɛɛl yenti Ananaayac yuarnɛ ɛkɛ te liɛlgin bɛɛn ɛkɛti, ɔci byeŋkɛ tannɛ ɛkɛti aŋka ɛkɛ woŋgɛ pɔktɛ.” ¹³ Ɔci Ananaayac kɛkcin Ciɛggɔnti agi, “Hay, Ciɛggɔn, ‘ya tieŋŋan jyeka guaktan ma oŋkanda te ‘wana neeni. ‘Ya tieŋŋan naŋka naŋdɛ ɛkɛ ma iti yaayan neeni ban Urcaliim. ¹⁴ Ɔci acca ɛkɛ bala wɛnni, ɔci jyek maka ḍwaŋin bala ɛkɛti doki aŋka ɛkɛ muowi maka moṭi iti waakɛnda ɔci ḍyɛgdɛ.” ¹⁵ Yeti Ciɛggɔn gɔkcin ɛkɛti agi, “A’a, dala i ɔgdi ootta ɛkɛti, acaan ɛkɛ kɛññan ‘ya bora aŋka noŋdi kanŋa ‘ya. Ɛkɛ kɛññan ‘ya bora aŋka ɛkɛ Keedin Pookɛn nɔɔttɛ te yenti ‘ya, ɔci maka ḍuaŋan ḍwaŋin moki nɔɔttɛ, ɔci ma Icrayiil moki nɔɔttɛ. ¹⁶ Ɔci ‘ya ɛkɛ myetka te taab bɛya ɛkɛti ne tolan te yenti ‘yay.” ¹⁷ Ɔci Ananaayac ati ɔci kaaccin ona gɔŋni Ciɛggɔn ɛkɛti, ɔci ɛkɛ byeŋkɛ tannɛ Caawulti, ɔci ɛkɛ gɔkcin ɛkɛti agi, “Mod ɔɔn Caawul, Ciɛggɔn ikin Yaccu mena warɛ lɛɛlnɛ bora iti pɔɔjɔ ne i baali bɛɛdi wɛnniyɛ, ɛkɛ ‘ya cuonna iti aŋka i yaaktiti gwali noon moki, ɔci i daŋkun yomu kuma te Boŋ Jwaŋa Tolan.” ¹⁸ Ɔci ne Ananaayac gɔŋni a ɔɔnyɛ, ɔci ne pɛñan waak gɛɛg ḍɛɛmdin iñɔ te Caawul woŋgɛti bala ba bɛyi ɔɔn. Ɔci ɛkɛ yaakinti gwali doki. Ɔci ɛkɛ jɔŋŋin ñaalɔ ɔci buuli ma. ¹⁹ Ɔci ne pɛñan ɛkɛ omjin waako, ɔci ɛkɛ warɛ tɛɛn moki. Ɔci ɛkɛ cooccin i Ma Kiṭɔ ban Ḍimaacka ne ḍiɛran ṭɔɔlɛ. ²⁰ Ɔci ne ɛkɛ balki cieki i ma aŋanyɛ, ɛkɛ kwaccin bɛɛ. Ɛkɛ kaaccin oorga morki ma Juaŋ, ɔci ma myennɛ te jyek Yaccu agi, “Yaccu neeniyɛ, ɛkɛ a Kaci Jwaŋa Tolan awarɛ.” ²¹ Ɔci maka tieŋŋin jyeka guagdɛ ɛkɛ neeniyɛ, ɛkkɛn yomgɛn buaññi. Ɛkkɛn gɔki agi, “Mena neeni a mena bala noŋi ne yaayan mati oŋkanda ban Urcaliim ne ma balki cɔkki te yenti Yaccu Kiṭɔ bɛɛ? Mena neeni a mena bɛɛn ban ikinti wɛnni acaan ɛkɛ buagɔn ḍɛɛwi Ma Kiṭɔ ɔci ma eedɛ ɛkɛ maka ḍwaŋinti ban Urcaliimji bɛɛ?” ²² Ɔci Caawul warɛ byerŋa byerŋ te kanŋa Yaccu. Ɔci ma Icrayiil maka ciyi ban Ḍimaackatiyɛ, ne ɛkkɛn balki tieki i Caawulyɛ, ɛkkɛn buannɛ Caawul te jiek ne pɛñan acaan Caawul ɛkkɛn lwoŋŋɛ te jyek Yaccu waakɛnda. Ɛkɛ ma nɔɔnnɛ agi Yaccu neeniyɛ, ɛkɛ a Kiṭɔ awarɛ, Mena Muonɛ Juaŋ Boray. ²³ Ɔci ne nink gɛɛg bɛɛki borayɛ, ma Icrayiil noŋi jiek acaan ɛkkɛn buagɔn noki Caawul. ²⁴ Yeti Caawul tieŋŋin jyeka naŋtan ɛkkɛn neeni. Ɔci maka noŋi jiek acaan buagɔn noki Caawul neeniyɛ, ɛkkɛn bala ciyi boopi Caawul kañ baan kaña tolan tuggɛti te oŋ jiñɛ ɔci te ween jiñɛ agi kan Caawul koodɔ borayɛ, ɛkta nogdinti ɛkkɛn doki. ²⁵ Yeti oŋ gɛɛlti te ween jiñɛ parɛ maka laldɛ Caawulyɛ, ɔji wɛngɛ wyengo, ɔci Caawul ḍuurci iñɔ te kaañ wyeñɛ, ɔci ɛkɛ ati unni nogɛ ma moki bɛɛ. ²⁶ Ɔci ne Caawul dɛnni ban Urcaliimjiyɛ, ɛkɛ buagɔn ñoodi i Ma Kiṭɔ yeti ɛkkɛn waakɛnda buayi ɛkɛ. Ɔci ɛkkɛn tieki, ɛkkɛn gɔki agi ɛkɛ a men Kiṭɔ bɛɛ. ²⁷ Yeti Barnabac ɛkɛ eññɛ nona Cuudan Yaccuti. Ɔci Barnabac ɛkkɛn myennɛ te jyek Caawul te naŋka Ciɛggɔn warɛ lɛɛlnɛ bora ɛkɛti te wɔɔka ɛkɛ baali pɔɔjɔ ooddi ban Ḍimaacka, ɔci Barnabac moki ɛkkɛn myennɛ te lalla Caawul baali loṭi ma ban Ḍimaacka te yenti Yaccuy. Ɛkɛ bala gɔki mati te yoma tɛyan. ²⁸ Ɔci ne ma tieŋki jyek Barnabacyɛ, Caawul oŋ aŋi men ɛkkɛn oŋo. Ne ɛkɛ baali ban Urcaliimjiyɛ, ɛkɛ bala ati booti baan konɛti loṭi ma oŋkanda te yenti Yaccu, ɔci ɛkɛ buayi men gɛɛl bɛɛ. ²⁹ Ɔci ɛkɛ bala gɔwwɔ tyewɔ iki ma Icrayiil maka gɔki te tuk Giriik. Yeti ɛkkɛn bala gɔki te jyek nooŋi ɛkɛ oŋkanda. ³⁰ Ɔci ne modgɛn tieŋki jyek nooŋi ɛkɛyɛ, ɛkkɛn Caawul eyɛ ban Cɛcariiya, ɔci ne ɛkkɛn dɛñki ban Cɛcariiyatiyɛ, ɛkkɛn Caawul cuuñɛ ñamu ne ban Tarcoc ɔɔn. ³¹ Ban Yahuudiya ɔci ban Jaliil ɔci ban Camɛɛrya cooccin ne pwadan, jyek taab bawwin ma kaniicati. Ɛkkɛn buayi gena Jwaŋa Tolan parɛ. Ɛkkɛn maŋŋɛ Boŋ Jwaŋa Tolan yomgɛnti, ɔci a ɔŋŋiyɛ, ɛkkɛn ciɛñ a ciɛñi gɔ moki coŋkin ɔɔn. ³² Ɔci Butruc ɛkɛ bala ati ḍɔki a ḍwaŋi te ñaalɔ nona bonk jitin cootti iñɔ bɛɛ. Ɔci oŋ gɛɛltiyɛ, ɛkɛ ati Ma Kiṭɔti maka ciyi ban Lida. ³³ Ɔci ne ɛkɛ baali ban Lidayɛ, mena ‘uan gɛɛl yuarŋɛ ɛkɛ yenti Aneeyac. Ɔci Aneeyac neeniyɛ, ɛkɛ a puono. Ɛkɛ bala niin aŋganti ba yuonga ne dɔɔyɔ wyetkɛn ne ḍoogɔ (8). ³⁴ Ɔci Butruc gɔkcin ɛkɛti agi, “Aneeyac, Yaccu Kiṭɔ i ywaŋdi. Jɔŋŋa ñaalɔ. Waka niini i ywaŋa.” Ɔci ne pɛñan ɛkɛ jɔŋŋin ñaalɔ doki, kwaccin bɛɛ. ³⁵ Ɔci maka ciyi ban Lida ɔci maka ciyi ban Caaran, ɛkkɛn gɔrcin mena warɛ pwani neeniti, ɔci ɛkkɛn waakɛn yali Ciɛggɔnti. ³⁶ Ɔci ban Yaapa men Yaccu mena ɛɛŋ gɛɛl bala yenti Tabiita. (Tabiita te tuk Mabaanyɛ, agi “Mwoyo.” Te tuk Giriik agi “Ḍɔrkac.”) Tabiita ɛkɛ yomɛ pwanna pwani mati. Ɛkɛ moki ma te waak oŋkanda. ³⁷ Ɔci oŋ gɛɛltiyɛ, ɛkɛ warɛ yaayɛ ɔci ɛkɛ tuuni. Ɔci ɛkɛ luagiyɔ mako. On jiñɛ gɛɛl bala ñaalɔ, ɔci ɛkɛ eyɛ ma, ɔci niinji ma aŋan. ³⁸ Acaan ban Yaapa cual cwal te ban Lidayɛ, Ma Kiṭɔ tieŋŋin agi Butruc baalɔ aŋan ban Lida. Ɔci ɛkkɛn ma gɛɛg cuuñɛ ne yyɛɛwɔ nona Butructi, ɔci ɛkkɛn gɔkcin ɛkɛti agi, “Dala ikin oottin ban Yaapa ne pɛñan.” ³⁹ Ɔci Butruc jɔŋŋin ɔci bɛɛn i ɛkkɛn. Ɛkɛ kwaccin bɛɛ. Ɔci ne ɛkkɛn bɛɛki dɔɔkki ban ɛkkɛnyɛ, ɛkkɛn Butruc eyɛ kaacci ona ñaalɔ Tabiitati. Ɔci moonga ciek neeniyɛ, ɛkkɛn bala yɔdi Butruc bwodiwi. Ɛkkɛn bala wiak ɔci ɛkkɛn Butruc lɛɛrki bworŋin ṭuorŋɛ Tabiita ṭwornɛ ɛkkɛn ne ɛkɛ baali tɛɛti meny. Gena jibban i bworŋin becin. ⁴⁰ Ɔci Butruc gɔkcin mati orɔ agi, “Dala ɛkkɛ kaattɛ bora.” Ɔci ne ɛkkɛn kaacki borayɛ, Butruc ḍwonjin iñɔ ɔci cɔkcin Juaŋti. Ɔci ne ɛkɛ cɔŋni Juaŋti ne ḍookkiyɛ, ɛkɛ warɛ yallɛ Tabiitati ɔci gɔkcin ɛkɛti agi, “Tabiita, jɔlla ñaalɔ.” Ɔci Tabiita ñingɛ pɔŋnɛ, ɔci ne ɛkɛ Butruc yuarnɛyɛ, ɛkɛ jɔllin ñaalɔ ɔci cooccin te ŋwayɛ. ⁴¹ Ɔci Butruc Tabiita muŋŋɛ te bieŋɛ ɔci luolnɛ ñaalɔ. Ɔci ɛkɛ ma Yaccu bornɛ, ɔci moonga ciek bornɛ daŋkun, ɔci ɛkɛ Tabiita ‘wonnɛ ma tɛɛti doki. ⁴² Ɔci jyek jɔllin ɛŋa neeni ñaalɔ te lienti ati ban Yaapa konɛti warda, ɔci ma jyeti Ciɛggɔnti ne coŋɔn. ⁴³ Ɔci Butruc cooccin ban Yaapa ne ḍyɛṭ ṭɔɔlɛ. Ɛkɛ bala ciyi on Cimaan. Cimaan neeniyɛ, kanŋa ɛkɛ a kanŋa wwakti geek ɔci kanŋa buurŋ geek moki.

¹ Mena ‘uan gɛɛl bala ban Cɛcariiya yenti Kɔrniilyac. Ɛkɛ a ḍuaŋa ackan. Ɔci ackan neeniyɛ, ɛkkɛn a miyya ne cyɛɛlɔ (100). Ɔci ackan neeniyɛ, ma boṭi agi ackan ma Itali. ² Ɔci Kɔrniilyac neeniyɛ, ɛkɛ yomɛ bala Jwaŋa Tolanti oŋkanda. Ɛkɛ ɔci ma ɛkkɛnyɛ, ɛkkɛn moki ma te waak oŋkanda. Ɔci ɛkkɛn cɔki Juaŋti oŋkanda. ³ Ɔci oŋ gɛɛlti ne oŋ waŋɛ warɛ yiɛnnɛyɛ, Kɔrniilyac malɛɛka gɛɛl yuarŋɛ ɛkɛ te liɛlti ne pwadan bɛɛn te Jwaŋa Tolanti bɛɛn nona ɛkɛti. Ɔci malɛɛka neeni gɔkcin ɛkɛti agi, “Kɔrniilyac!” ⁴ Ɔci ɛkɛ bala gɔṭi a jiñɛ bɛɛ, ɛkɛ buayi ne tolan, ɔci ɛkɛ tooccin malɛɛkati agi, “Ciɛggɔn, a gena ɔɔn?” Ɔci malɛɛka ṭwokcin ɛkɛti agi, “Jwaŋa Tolan tieŋŋin cɔŋi i. Ɔci ɛkɛ tieŋŋin naŋki i naŋka naŋa mati pwadin oŋkanday, ɔci ɛkɛ bala poŋi i. ⁵ Ɔci acca dala i maka ‘uay cuña ban Yaapa. Mena ‘uan gɛɛl bala aŋan. Dala ɛkɛ bɛya. Ɛkɛ yenti Cimaan, ɔci yenti ɛkɛ yenta parɛ moki a Butruc. ⁶ Ɛkɛ a wɛli bala ciyi on Cimaan mena noŋi kanŋa geeky. Ɔci on ɛkɛ bala Galŋa Tolan ḍwaŋɛti.” ⁷ Ɔci ne malɛɛka gɔɔki i Kɔrniilyacyɛ, ɛkɛ atti. Ɔci ne ɛkɛ atti dokiyɛ, Kɔrniilyac maka kanŋan on ɛkɛ gɛɛg bornɛ ne yyɛɛwɔ. Ɔci ɛkɛ mena ackan gɛɛl bornɛ ne cyɛɛlɔ daŋkun. Ɔci ackan neeniyɛ, ɛkɛ yomɛ bala Juaŋti daŋkun. Ɔci ɛkɛ bala moki Kɔrniilyac oŋkanda te kanŋa te yoma pwadan. ⁸ Ɔci ne Kɔrniilyac ɛkkɛn myennɛ te jyeka neeni waakɛndayɛ, ɛkɛ ɛkkɛn cuuññɛ ban Yaapa. ⁹ Ɔci maka neeni jɔŋŋin te ban Cɛcariiya ɔci ɛkkɛn ati ɔci niini yomɔ. Ɔci te liidɔ ɛkkɛn jɔŋŋin ɔci luoṭi moki. Ɔci ne ɛkkɛn noŋki dɛnti ban Yaapayɛ, te wɔɔka wanna Butruc kaaccin ñaalɔ on wyeñɛti nona badi ma cieki may. Ɛkɛ ati aŋan aŋka cɔki Jwaŋa Tolanti. Oŋ waŋɛ yɔɔtcin yeccu doki. ¹⁰ Ɔci ne ɛkɛ baali ñaalɔyɛ, ɛkɛ ammɛ koñ ne tolan. Ɛkɛ buagɔn omdi gena amtin. Ɔci ne ma balki nɔrki am menyɛ, ¹¹ liɛlgin bɛɛn Butruc ñingɛti ɔci ɛkɛ gɔrcin pɔli tukɛ pɔŋnɛ, ɔci gen gɛɛl yuarnɛ bala ba bworŋa tolan warɛ ponnɛji bɛɛn te ñaalɔ, ɔci ɛkɛ mugɛ ma te tuggɛ ŋankɛn ɔci bɛɛn iñɔ ṭɛɛrji. ¹² Ɔci waak bala jiju bworŋ konɛti. Gena waka ati te ciegɛn waakɛnda ba maal ɔci leyi ɔci waka ba kogi moki, ɔci ḍiirgo. Gena ɛkkɛn bala bworŋ konɛti. ¹³ Ɔci pwan bɛɛn ɛkɛti gɔkcin agi, “Butruc, jɔŋŋa ñaalɔ ŋoorca waka neeni ɔci omja!” ¹⁴ Ɔci Butruc kɛkcin agi, “Hay, ‘ya omi waka bala a ɔɔn gɛɛl oŋgati bɛɛ! Acaan ganuun Jwaŋa Tolan dɛyi ma te ami waka neeni.” ¹⁵ Ɔci pwan bɛɛn ɛkɛti moki gɔki agi, “Waka naŋŋɛ Jwaŋa Tolan pwadgin dokiyɛ, naa i gɔk agi ɛkkɛn yeyɔ bɛɛ.” ¹⁶ Naŋka neeni naŋŋɛ Jwaŋa Tolan oŋki aŋi ne ḍoogɔ. Ɔci ne pɛñan waka neeni baaw dɔɔki ñaalɔ doki. ¹⁷ Ɔci Butruc bala poŋi te liɛlta neeni, yeti ɛkɛ liɛlti jiñɛ yuarnɛ bɛɛ. Ɔci ne ɛkɛ baali poŋi te jyek liɛlta neeni menyɛ, maka cuonnɛ Kɔrniilyac dɛññin bora, ɔci ɛkkɛn tooccin mati yomu te pɔya eetan ma ban Cimaann. Ɔci ɛkkɛn bɛɛn ɔci oṭṭinti kaañ tukɛti ne cwakanti. ¹⁸ Ɔci borcin mati, ɔci ɛkkɛn tooccin te Butruc mena bala ciyi a wɛli ban Cimaann neeni. ¹⁹ Ɔci ne Butruc baali poŋi te liɛlti menyɛ, Boŋ Juaŋ gɔkcin ɛkɛti agi, “Maka ‘uay gɛɛg bala bɛɛn ne yyɛɛwɔ lieṭi i wɛnni. ²⁰ Jɔlla ñaalɔ, dala i kaacca iñɔ nona ɛkkɛnti. Dala i ooddi i ɛkkɛn ban ɛkkɛn. Naa i kwaci paŋi jiek bɛɛ, acaan ɛkkɛn cuoññan ‘ya wɛnni iti.” ²¹ Ɔci Butruc kaaccin iñɔ ɛkkɛnti ɔci gɔkcin ɛkkɛnti agi, “Gena ‘ya a mena lildɛ ɛkkɛ neeni. Ɛkkɛ bɛɛnɛ a ɔɔn ogo?” ²² Ɔci ɛkkɛn gɔkcin ɛkɛti agi, “Ɔɔn bɛɛnɔn cuonnɔn Kɔrniilyac te ban ɔɔn. Ɛkɛ a ḍuaŋa ackan a miyya ne cyɛɛlɔ (100). Naŋki ɛkɛ pwanna pwani oŋkanda. Ɔci ɛkɛ yomɛ bala Jwaŋa Tolanti, ɛkɛ a mena guaktan ma Icrayiil waakɛnda agi mena pwadan. Malɛɛka gɛɛl bɛɛn te Jwaŋa Tolanti gɔkcin Kɔrniilyacti agi dala ɛkta ma gɛɛg cuonda iti aŋka i bɛɛdji aŋka ɛkta tieŋdɔ jyeka guagji i neeni. Gena jyeka bɛɛnɔn ɔɔn neeni.” ²³ Ɔci Butruc gɔkcin ɛkkɛnti agi dala ɛkki koodɔ orɔ. Ɔci ɛkkɛn kaaccin orɔ aŋi wɛlg ɛkɛ. Ɔci ne liidɔ Butruc jɔllin, ɔci ɛkɛ ati i ɛkkɛn. Ɔci modg ɛkkɛn Ma Kiṭɔ gɛɛg te ban Yaapa ati iki ɛkkɛn. Ɔci ɛkkɛn niini yomɔ. ²⁴ Ɔci te liidɔyɛ, ɛkkɛn luoṭi moki, ɔci ɛkkɛn dɛñjin ban Cɛcariiya. Ɔci ne Kɔrniilyac baali kɛɛy Butrucyɛ, ɛkɛ ma ɛkkɛn ḍɔɔllɛyɔ, ɔci mung ɛkkɛn daŋkun ḍɔɔllɛyɔ nona ne cyɛɛlɔ on ɛkɛ. ²⁵ Ɔci ne Butruc kaanni kaañjiyɛ, Kɔrniilyac kookkinti ɛkɛti kaañ tukɛti, ɔci ḍwoñjin iñɔ Butruc ñamɛti, ɔci morcin ɛkɛti. ²⁶ Ɔci Butruc ɛkɛ luolnɛ ñaalɔ ɔci gɔkcin ɛkɛti agi, “Jɔŋŋa ñaalɔ, acaan ‘ya a men baan budan ba i ɔɔn.” ²⁷ Ɛkkɛn bala ati gɔwwɔ yaakkɛn ɔɔn ne dɛñki on Kɔrniilyacti ɔɔn, ɔci maka coŋin mɔkci orɔ aŋan. ²⁸ Ɔci Butruc gɔkcin ɛkkɛnti agi, “Naŋki ma Icrayiil ŋeejɛ ɛkkɛ doki, acaan ɛkkɛn gɔwwɔ i maka pookɛn bɛɛ, ɔci jyɛyi i maka pookɛn bɛɛ. Yeti ‘ya lalla Juaŋ ɔci ɛkɛ gɔki agi naa ‘ya gɔkci agi men gɛɛl yaayɔ bɛɛ. ²⁹ Ɔci acaan ‘ya lalla Juaŋ a ɔɔnyɛ, aŋka ‘ya bɛɛna neeni. Ne ma cuonnɛ ɛkkɛ ‘yatiyɛ, ‘ya kwaccan paŋi jiek bɛɛ. ‘Ya bɛɛn nona ɛkkɛti doki, oŋ ba jwalla boorɛ ɛkkɛ ‘ya neeni bɛɛ.” ³⁰ Ɔci Kɔrniilyac gɔkcin Butructi agi, “Ninka ati ne ŋaanɔ waayi ne oŋ waŋɛ warɛ yiɛnnɛ ba acca neeniti ɔɔnyɛ, ‘ya baal cɔk Jwaŋa Tolanti orɔ on ‘ya, ɔci ne ‘ya wyeñu oona ñaalɔyɛ, mena ‘uan gɛɛl mɔkcan ‘ya bala yɔɔd ‘ya ñamuti. Bworŋ ɛkɛ bɔɔna bɔɔn ɔci galla gallo. ³¹ Ɔci ɛkɛ gɔkcin ‘yati agi, ‘Kɔrniilyac, Jwaŋa Tolan tieŋŋin cɔŋi i. Ɔci naŋki i naŋka pwadin matiyɛ, tieŋni ɛkɛ moki, ɔci ɛkɛ bala poŋi i. ³² Ɔci acca dala i maka ‘uay cuña ban Yaapa. Mena ‘uan bala aŋan. Dala ɛkɛ bɛya. Ɛkɛ yenti Cimaan, ɔci yenti ɛkɛ yenta parɛ moki a Butruc. Ɛkɛ a wɛllo. Ɛkɛ bala ciyi on mena noŋi kanŋa geeko. Ɔci yenti mena noŋi geek neeniyɛ, ɛkɛ yenti Cimaan daŋkun. Ɔci on ɛkɛ bala galŋ ḍwaŋɛti.’ ³³ Ɔci ‘ya ma cuoññan iti ba jyeka gɔɔni malɛɛka ‘yati. I yomu pwad pwad mati aŋka i bɛɛni ban ɔɔn neeni. Ɔci acca Juaŋ balgin iki ɔɔn wɛnni, ɔɔn buagɔn tieŋdɔn jyeka i myenniti Juaŋ aŋka gɔwwa i ɔɔntiy.” ³⁴ Ɔci Butruc gɔkcin mati agi, “Awarɛ, acca ŋeej ‘ya ne pwadan Jwaŋa Tolan yookɔn te Keedin Pookɛn gɛɛg bɛɛ. Ɛkɛ ani ma waakɛnda. ³⁵ Ma wɛɛn warda kan ɛkkɛn morti Juaŋti ɔci noŋdi naŋka pwadinyɛ, Juaŋ ɛkkɛn magdɛ daŋkun. ³⁶ Jyeka cuonnɛ Jwaŋa Tolan ma Icrayiilti neeni ŋeejɛ ɛkkɛ. Ɛkɛ bala loṭi ma te jyeka wonkɛn jyeka pwadin jyek coodi pwani neeni te Yaccu Kiṭɔ agi Yaccu neeni ɛkɛ a Ciɛggɔn wɛɛn warda. ³⁷ Jyek Yaccu ati ban Yahuudiya warda. Ɔci jyeka neeni ŋeejɛ ɛkkɛ daŋkun. Te ñamu jyeka neeni jɔɔtcin ban Jaliil ne Yɔhanna ḍookki te lali ma te jyek bultiy. ³⁸ Yaccu men ma Najarɛtyɛ, ɛkɛ ‘wonnɛ Juaŋ Boŋ ɛkɛ, ɔci moki ɛkɛ ‘wonnɛ Juaŋ war tɛɛn hayya ɛkɛ oŋ atti noŋi naŋka pwadin mati oŋo. Ɔci maka muogɛ jɔkin yeyin daŋkun pɔŋnɛ ɛkɛ. Ɛkɛ yaakinti naŋka wanna acaan Jwaŋa Tolan bala iki ɛkɛ. ³⁹ Gena ɔɔn a maka yɔṭi naŋka naŋŋɛ Yaccu mati bonk ma Icrayiil jitin, ɔci ban Urcaliim daŋkuny. Yeti Yaccu ŋaapci ma ñaalɔ kakanti, ɔci ɛkɛ nogɛ mako. ⁴⁰ Yeti ne ninna akki ne ḍoogɔ bɛɛni borayɛ, ɛkɛ jɔɔŋnɛ Jwaŋa Tolan ñaalɔ tɛɛti moki. Ɔci Juaŋ ma lɛɛrnɛ Yaccu. ⁴¹ Yeti Juaŋ Yaccu lɛɛlnɛ bora mati waakɛnda bɛɛ. Gena maka kɛnnɛ ɛkɛ bora aŋka lɛɛrnɛ Yaccuy. Ɛkɛ maka neeni kɛnnɛ bora acaan ɛkɛ buagɔn ɛkkɛn ma nɔɔttan. Gena ɔɔn a maka omi waak iki ɛkɛ a cyɛɛlɔ, ɔci mottɔn i ɛkɛ ne ɛkɛ jɔŋni ñaalɔ te koolji tɛɛti mokiy. ⁴² Juaŋ ɔɔn myennɔn agi dala ɔɔn ma myetcɔn agi Yaccu neeniyɛ, ɛkɛ a mena guaŋŋɛ Juaŋ agi ɛkta noŋdɔ godan maka tɛɛti, ɔci maka tuunti daŋkuny. ⁴³ Mena neeni a mena guaktan bɔwan Jwaŋa Tolan te baaṭi waakɛnda agi kan mena jyeddi ɛktatiyɛ, Jwaŋa Tolan ɛkta bɔɔkta doki, acaan yenti ɛkɛ baalɔ ɛktati doki.” ⁴⁴ Ɔci ne Butruc baali gɔki jyeka neeni menyɛ, Boŋ Jwaŋa Tolan bɛɛn maka bala tyeŋi jyeka neeniti, ɔci cooccin ɛkkɛn yomgɛnti. ⁴⁵ Ɔci ne ma Icrayiil maka aŋi Ma Kiṭɔ maka ati i Butruc neeni gɔrki Boŋ Juaŋ bɛɛni Keedin Pookɛnti daŋkunyɛ, ɛkkɛn bala poŋi agi, “Aa, cca cca cca! Juaŋ Keedin Pookɛn ‘wonnɛ Boŋ ɛkɛ daŋkun? Ay ay ay ɛkkɛ!” ⁴⁶ Maka bɛɛn i Butruc neeni ɛkkɛn poni acaan maka neeni bala gɔki te tugga kuokɔn ma, ɛkkɛn gɔki agi Jwaŋa Tolan ɛkta tolɔ katan. Ɔci Butruc gɔkcin ma Icrayiilti agi, ⁴⁷ “Men gɛɛl yookɔn boki ne maka neeni bultiti ma te piegyɛ? Acaan Boŋ Juaŋ bɛɛn ɛkkɛnti doki bala ba bolja ɛkɛ bɛɛni ikinti te ñamuy.” ⁴⁸ Ɔci Butruc ma myennɛ agi dala maka neeni buldi ma te yenti Yaccu Kiṭɔ. Ɔci Keedin Pookɛn neeni gɔkcin Butructi agi, “Dala ikin pari cietin iki ɔɔn ne ḍyɛṭ ṭɔɔlɛ.”

¹ Ɔci Cuudan Yaccu tieŋŋin agi Keedin pookcɛn jyek Jwaŋa Tolan muŋŋɛ daŋkun. Ɔci jyeka tieŋŋi ɛkkɛn neeniyɛ, ati modgɛnti ban Yahuudiya konɛ warda. ² Ɔci ne Butruc dɔɔŋni ban Urcaliimjiyɛ, ma Icrayiil maka aŋi Ma Kiṭɔ maka gɔki te jyek ŋwoti ma agi dala Ma Kiṭɔ waakcinda ŋwoddɛ ma itkinti neeniyɛ, bala wooki ɛkɛ. ³ Ɛkkɛn bala wooki ɛkɛ a ɔɔn, acaan ɛkɛ bala jyɛyi i Keedin Pookɛn, ɔci ɛkɛ bala omi iki ɛkkɛn daŋkun. Acaan ɛkkɛn a maka ŋuodi ma bɛɛ. ⁴ Ɔci Butruc ɛkkɛn lwoŋŋɛ te jiek waakɛnda ne jiek wyetkɛnti ɔɔn agi, ⁵ “‘Ya baal cɔk Jwaŋa Tolanti ban Yaapa, ɔci ne ‘ya baala cɔka Juaŋti a ɔɔnyɛ, ‘ya gen gɛɛl yuarcan te liɛlto. Gena yuarcan ‘ya neeniyɛ, bala ba bworŋa tolan warɛ ponnɛji, ɔci ɛkɛ bala bɛya iñɔ te pɔliji. Ɔci ɛkɛ mugɛ ma te tuggɛ ŋankɛn ɔci ḍuorɛ iñɔ nona ‘yati. ⁶ Ɔci ‘ya baal gɔr waka neeni a jiñu bɛɛ. ‘Ya gɔrcan bworŋ konɛti waak jitkɛn waakɛnda yuarcan, gena maal ɔci leyi i kogi i ḍiirgo. ⁷ Ɔci ‘ya tieŋŋan pwan gɔkkin ‘yati agi ‘ya jɔljɔ ŋoorcɔ waka neeni ɔci omjɔ. ⁸ Ɔci ‘ya kɛkcan agi, ‘Hay, ‘ya dɛccan waka dɛyi ganuun Juaŋ ma neeni gɛɛg oŋgati tukuti bɛɛ.’ ⁹ “Ɔci pwan bɛɛn ‘yati moki te ñaalɔ gɔki agi, ‘Waka naŋŋɛ Jwaŋa Tolan pwadgin dokiyɛ, naa i gɔk agi, ɛkkɛn yeyɔ bɛɛ.’ ¹⁰ Ɔci naŋka neeniyɛ, naŋŋɛ Juaŋ ‘yati oŋki ne ḍoogɔ. Ɔci ne pɛñan waka neeni waakɛnda baaw duaŋŋɛ Juaŋ ñaalɔ doki. ¹¹ “Ɔci ne waka neeni dɔɔkki ñaalɔyɛ, ɔci maka ‘uay ne ḍoogɔ bɛɛn bala yɔdi bora ona ciya ‘ya neeni tukɛti. Ɔci ɛkkɛn gɔki agi ɛkkɛn cuonninti ma te ban Cɛcariiya cuonninti ma ‘yati. ¹² Ɔci Boŋ Juaŋ gɔkkin ‘yati agi dala ‘ya ootcɔn iki ɛkki, agi naa ‘ya kwacci paŋi jiek bɛɛ. Ɔci modga ne dɔɔyɔ wilin ne cyɛɛlɔ neeni ɛkkɛn attin iki ‘ya. Ɔci ne ɔɔn dɛnnɔn aŋanyɛ, ɔɔn kaannɔn on Kɔrniilyac. ¹³ Ɔci Kɔrniilyac ɔɔn myennɔn agi malɛɛka gɛɛl bɛɛnɔ, ɔci yɔɔnnɔ ɛkɛ ñamɛti. Ɔci malɛɛka neeni gɔŋnɔ ɛkɛti agi dala ɛkɛ ma gɛɛg cuñjɛ ban Yaapa aŋka men gɛɛl baalɔ aŋanyɛ, dala ɛkta bɛɛdɔ. Agi ɛkta yentan Cimaan Butruc. ¹⁴ Agi dala magga ooddɔ Butruc bɛɛdɔ aŋka ne ɛkta bɛɛddayɛ, ɛkta ma myetta te pɔya ma yɔɔdda Jwaŋa Tolan waakcinda i maka ciyi iki ma ɛkki oorg jitiny. ¹⁵ Ne ‘ya baala mieta ɛkkɛn te jiek menyɛ, ɔci Boŋ Juaŋ bɛɛn ɛkkɛnti, bala ba bolja ɛkɛ bɛɛni ikinti te ñamu wanna ɔɔn. ¹⁶ A ɔŋŋiyɛ, ‘ya baal poŋ te jwalla guaŋŋɛ Ciɛggɔn ikinti te baaṭi agi Yɔhanna baalɔ buoṭɔ ma te piegy. Agi ne cwakanti ikin daŋkun bultinti Jwaŋa Tolan te Boŋ ɛkta daŋkun. ¹⁷ Ne ikin jyettin Yaccu Kiṭɔtiyɛ, Juaŋ ikin ‘wonnin Boŋ ɛkɛ. Ɔci acca kan Kɔrniilyac i ma ɛkkɛn ‘wonnɛ Juaŋ Booŋ ba bolja ikin ‘wonninti ɛkɛy, oŋ ‘ya a menɛ aŋka ɛkɛ yɔddajiy?” ¹⁸ Ɔci ne ma kaniica tieŋki jyeka neeniyɛ, ɛkkɛn gɔkkin genga moki bɛɛ. Ɔci ɛkkɛn jieyi Jwaŋa Tolan gɔki agi, “Hay, naŋka neeni a naŋki Jwaŋa Tolan awarɛ! Acca Jwaŋa Tolan buagɔn keedin Pookɛn waakɛn yaltan aŋka tɛɛtin ɛkɛ bɛya ɛkkɛnti daŋkun.” ¹⁹ Te yuonga Ictipanuc nokkiti ma te baaṭiyɛ, taab bɛɛn Ma Kiṭɔti ne tolan. Ɔci ma cyɛnŋin jitin te ban Urcaliim te taab neeni, ma gɛɛg ati bonka loonan ban Pɔniicyaji, ɔci Kaŋ Cayprac, ɔci ban Antyak daŋkun. Ɛkkɛn bala mieti gena ma Icrayiil pookɛn te jyek Yaccu. Ɛkkɛn Keedin Pookɛn myetkɛ bɛɛ. ²⁰ Yeti Ma Kiṭɔ maka pookɛn ɛkkɛn ati ŋoyɔ daŋkun, ɔci maka ati neeniyɛ, ma gɛɛg a ma Cayprac, ɔci ma gɛɛg a ma Cayriin. Ɔci ne ɛkkɛn dɛñki ban Antyakyɛ, ɛkkɛn Keedin Pookɛn myetkɛ jyeka wonkɛn jyeka pwadin jyek Yaccu. ²¹ Ɔci war tɛɛn Jwaŋa Tolan bala iki ɛkkɛn. Ɔci maka coŋin gɛɛg jyeti Yaccuti ɔci ɛkkɛn waakɛn yali nɔji ɛkkɛn dalji. ²² Ɔci jyek maka jyeti neeniyɛ, ati Ma Kiṭɔti ban Urcaliim. Ɔci ne ɛkkɛn tieŋki jyek maka jyeti neeniyɛ, ɔci ɛkkɛn Barnabac cuuñɛ ban Antyak. ²³ Ɔci ne Barnabac dɛnni ban Antyakyɛ, ɛkɛ yomɛ ñɔɔna ñɔɔn te yom pwani Juaŋ mati ban Antyak. Ɔci Barnabac bala ṭeyi ɛkkɛn oŋkanda te jyek Ciɛggɔn agi dala ɛkki woŋgɛn tiittɛ te jyek Ciɛggɔn ne pwadan. ²⁴ Barnabac bala ṭeyi ma a ɔɔn acaan ɛkɛ a mena pwadan, ɔci Boŋ Juaŋ i jyeni bala ɛkɛti. Ɔci maka coŋin gɛɛg aŋi Ma Kiṭɔ. ²⁵ Ɔci Barnabac jɔŋŋin te ban Antyak ati lieṭi Caawul ban Tarcoc. ²⁶ Ɔci ne ɛkɛ Caawul yuarŋɛyɛ, ɛkɛ Caawul eññɛ ban Antyak. Ɔci ba ywoni jiñɛ ne cyɛɛlɔ ma kaniica wyetkɛn ḍɔɔltan nona ne cyɛɛlɔ, ɔci Barnabac ɔci Caawul ɛkkɛn bala loṭi ɛkkɛn. Ɔci maka laltan ɛkkɛn neeniyɛ, kɔɔna kɔɔnno. Maka ban Antyak ɛkkɛn ma Yaccu okki yenta woonɛ agi Ma Kiṭɔ. ²⁷ Ɔci te oŋŋa wannayɛ, maka a bɔwan Jwaŋa Tolan gɛɛg bɛɛn te ban Urcaliim bɛɛn ban Antyakti. ²⁸ Ɔci mena bɔwa gɛɛl ne cyɛɛlɔ yenti Agaboc ɛkɛ jɔllin ñaalɔ, ɔci ma myennɛ ɛkɛ te jyek Boŋ Juaŋ agi koñ baalɔ bɛɛdɔ baan wardanda. Ɔci ba jyek ɛkɛ neeniyɛ, koñ bɛɛn doki. Te yuonga Klɔdyac aŋŋi ḍuaŋa tolan ma Ḍɔɔm neeniyɛ, koñ bɛɛn doki. ²⁹ Ɔci Ma Kiṭɔ neeni gɔki agi modg ɛkkɛn modga amda koñ ban Yahuudiya neeniyɛ, agi cuondinti waako. Kan mena wak ɛkɛ coŋinyɛ, wak ɛkɛ cundɛ ɔɔn, ɔci kan mena wak ɛkɛ a ḍiɛkanyɛ, wak ɛkɛ cundɛ ne ḍiɛkan daŋkun ɔɔn. ³⁰ Ɔci ɛkkɛn waka neeni ‘woñgi eyɛ Barnabac yaakkɛn i Caawul oŋo. Waka neeni eyɛ ɛkkɛn ɔci ‘woñgi cyekin kaniica ban Urcaliim.

¹ Ɔci te oŋŋa wannayɛ, ḍuaŋa tolan yenti Hiruuduc Agriipa ma kaniica gɛɛg muoŋŋɛ ɔci ɛkɛ bala noŋi ne yaayan ɛkkɛnti. ² Yaakub mod Yɔhannanyɛ, nogɛ ma te jyek ɛkɛ. ³ Ɔci ne Hiruuduc Agriipa gɔrni naŋka neeni pwadi ma Icrayiiltiyɛ, ɛkɛ buagɔn Butruc mugdɛ daŋkun. Ɔci oŋŋa wannatiyɛ, Iid Ma Omki Byedga Polan bala. ⁴ Ɔci Butruc mugɛ ma ɔci eyɛ olji ma ciginji. Ɔci ackan ne inyaakkɛn ɔci ne dɔɔyɔ wilin ne cyɛɛlɔ (16) bala yɔdi kɛɛy ɛkɛ. Hiruuduc Agriipa poŋi gɔki agi ne Iid bɛɛdda borayɛ, ɛkɛ Butruc koojji bora nona mati ɔci noŋjɛ godan. ⁵ Ɔci ne Butruc baali ciginji a ɔɔn menyɛ, ma kaniica bala cɔki Jwaŋa Tolanti ne tolan te ɛkɛ. Ɛkkɛn woodi bɛɛ. ⁶ Ɔci Hiruuduc Agriipa buagɔn Butruc koodɛ bora ne liidɔ, ɔci te ween jiñɛ Butruc bala ciginji byeŋkɛ a ḍɛɛggin te jiŋgin ne yyɛɛwɔ. Ɔci ɛkɛ bala niin yeccu yuukci ackan ñaalɔ. Ɔci maka gɔṭi cigin bala yɔdi bora cigin tukɛti. ⁷ Ɔci ne pɛñan malɛɛka gɛɛl bɛɛn nona Butructi ɔci noon dyɛŋŋɛ bɔɔna bɔɔno. Ɔci ɛkɛ Butruc jyɛmmɛ omɛti ɔci gɔkcin ɛkɛti agi, “Jɔŋŋa ñaalɔ ne pɛñan!” Ɔci ne pɛñan jiŋgin buottin pookɛn budan ɔɔn te ɛkɛ byeŋkɛti. ⁸ Ɔci malɛɛka gɔkcin ɛkɛti agi, “Buarñan i ḍyɛkca tɛyuti, ɔci wɛyi ‘yɛɛŋja daŋkun.” Ɔci Butruc noŋjin a ɔɔn. Ɔci malɛɛka gɔkcin ɛkɛti agi, “Bworŋ jwami ‘yɛɛŋja ɔci bɛɛd bootta ‘yati.” ⁹ Ɔci ɛkɛ bootcin ɛkɛ ŋoyɛti, ɔci ati ne bora ɔɔn. Ɔci ŋeejɛ ɛkɛ naŋka naŋŋɛ malɛɛka neeni a naŋka awarɛ bɛɛ. Ɛkɛ poŋi gɔki agi gena liɛlti katan. ¹⁰ Ɔci ɛkkɛn ati ɔci goṭi ackan neeni warɛti, ɔci ati ɔci goṭi ackan parɛ warɛti moki ɔɔn. Ɔci ɛkkɛn dɛñjin kaañ tuka bilti. Ɔci pɔya neeniyɛ, gena pɔya eetan gortan ma baan konɛti. Ɔci ne ɛkkɛn dɛñki kaañ tukɛtiyɛ, kaañ tukɛ warɛ pɔŋnɛ parɛ, ɔci ɛkkɛn kaaccin bora. Ɔci ɛkkɛn ati ati ati ne pɔya parɛti, ɔci malɛɛka baaw wiin ne pɛñan atti. ¹¹ Ɔci acca ŋeennɛ Butruc ne pwadan ɔci ɛkɛ gɔki agi, “Hay! Acca ŋeejjan ‘ya ne pwadan oŋo. Hay! Jwaŋa Tolan malɛɛka cuonnɛ ‘yati, ɔci ɛkɛ ‘ya wɛɛna bora te byeŋ Hiruuduc Agriipati. Ɔci ɛkɛ ‘ya pɔŋna te naŋki ma Icrayiil, naŋka ɛkkɛn buagiti ‘ya naŋtatiy.” ¹² Ne Butruc naŋka neeni yuarnɛ ne pwadanyɛ, ɛkɛ oŋ ati on Moryam oŋo. Moryam neeniyɛ, gena mɛy Markn. (Ɔci Mark neeniyɛ, yenti ɛkɛ yenta parɛ ma boṭi agi Yɔhanna.) Ɔci ona neenitiyɛ, maka coŋin wyetkɛn ḍɔɔlɛ bala cɔki Jwaŋa Tolanti. ¹³ Ɔci Butruc bala ciepi kaañ tukɛ. Ɔci ṭɔla noŋi kanŋa neeni ati nona ciepi ɛkɛ ‘yeŋi tukɛti neeni. Šɔla neeniyɛ, yenti Rɔɔda. ¹⁴ Ɔci ne Rɔɔda pwan Butruc ñiññiyɛ, ɛkɛ yomɛ ñɔɔna ñɔɔno, ɔci ɛkɛ ‘yeŋi tukɛ pɔŋnɛ bɛɛ, ɛkɛ yiŋi nona cɔkki mati ɔci ma myennɛ agi Butruc baalɔ yɔɔdɔ kaañ tuktanti. ¹⁵ Ɛkkɛn gɔkcin ɛkɛti agi, “Hay, i a amgɔn?” Ɔci ɛkɛ bala mieti ma ɔɔn ne ma tieki ɛkɛ ɔɔn. Ɛkkɛn gɔki agi, “Gena malɛɛka gɔṭi ɛkɛ kaapun.” ¹⁶ Yeti Butruc bala ciepi kaañ tukɛ men. Ɔci ne ɛkkɛn kaañ tukɛ pɔkkitiyɛ, ɛkkɛn Butruc yuarcɛ, ɔci ɛkkɛn poni ne tolan. ¹⁷ Ɔci Butruc gɔkcin ɛkkɛnti te bieŋɛ agi, “Hay, liedɛ, liedɛ.” Ɔci ɛkɛ ma myennɛ agi Ciɛggɔn ɛkɛ pɔŋnɛti te ciginji a ɔki. Ɔci ɛkɛ ma myennɛ agi dala ɛkki Yaakub myettɛ te jyeka neeni daŋkun, ɔci modg ɛkkɛn Ma Kiṭɔ modga pookɛn myettɛ daŋkun. Ɔci Butruc ma dalnɛ, ɔci ɛkɛ ati nona parɛti. ¹⁸ Ɔci ne noon bɔɔniyɛ, maka ackan buayi ne tolan ne Butruc baawi te ciginjiy. Ɛkkɛn bala toyi yɔtin yaadan ne pɛñan te ɛkɛ. ¹⁹ Ɔci Hiruuduc Agriipa gɔkcin mati agi dala ma ooddɔ lieṭɔ Butruc. Ɔci ma bala lieṭi. Ɔci ne ma lierkɛ Butruc baawi men ɔɔnyɛ, ɔci Hiruuduc Agriipa ackan kɛɛyi cigin neeni bornɛ noŋnɛ godan taaññɛ tuggɛnti te naŋka neeni, ɔci Hiruuduc Agriipa gɔkcin mati agi ackan gɔṭi cigin neeniyɛ, dala ɛkki nogdi ma. Hiruuduc Agriipa ban Yahuudiya dalnɛ, ɔci ati bala ciyi ban Cɛcariiya ne ḍiɛran lakun. ²⁰ Ɔci Hiruuduc Agriipa looñi ma Tayirti ɔci ma Ciḍɔɔnti. Ɔci maka neeni waakɛn limɛ, ɔci ɛkkɛn bɛɛn Hiruuduc Agriipati. Ɔci ne ɛkkɛn dɛñkiyɛ, ɛkkɛn bala gɔwwɔ i Blactoc te ñamu. Blactoc neeniyɛ, ɛkɛ a mena ḍuaŋa ṭɔɔlɛ on Hiruuduc Agriipa. Ɔci ne ɛkkɛn gɔrki Blactoc yomɛ pwadi ɛkkɛntiyɛ, ɛkkɛn oŋ tooccin ɛkɛti oŋ te jyek Hiruuduc Agriipa oŋo. Ɛkkɛn buagɔn dala Hiruuduc Agriipa yomɛ pwada ɛkkɛnti acaan waka amtan ɛkkɛn bɛya te ban Hiruuducti. ²¹ Ɔci Hiruuduc Agriipa ma myennɛ ñamu te oŋŋa ɛkɛ buagi gɔkti mati. Ɔci ne oŋŋa neeni bɛɛniyɛ, ɛkɛ bworŋin ɛkɛ bworŋin cyɛgji ‘yɛɛŋnɛ ɔci ɛkɛ cooccin kaakci ɛkɛ kaakci cyɛgjiti ɔci ɛkɛ gɔkcin jiek mati. ²² Ɔci ma yaadan, ɔci ma gɔki agi, “Hɔɔy! Pwana neeniyɛ, a pwan men baan budan bɛɛ. Gena pwan juaŋ gɛɛl!” ²³ Ɔci ne pɛñan ɛkɛ eeŋnɛ malɛɛka Jwaŋa Tolan taab acaan ɛkɛ jieyi naŋki Juaŋ bɛɛ. Ɛkɛ poŋi gɔki agi ɛkɛ tolji parɛ. Ɔci ɛkɛ kooyɛ liwwo, ɔci ɛkɛ tuuni. ²⁴ Ɔci jyek Juaŋ toli baan konɛ warda. ²⁵ Barnabac ɔci Caawul bala ban Urcaliimji acaan ɛkkɛn eci waak mati aŋan. Ɔci ne ɛkkɛn jyeka neeni ḍaakkitiyɛ, ɛkkɛn dɔɔkkin ban Antyak, ɔci Mark owwɛ ɛkkɛn.

¹ Ɔci ma kaniica maka bala ban Antyakyɛ, ɛkkɛn ma gɛɛg a bɔwan Jwaŋa Tolan ɔci maka pookɛn a maka loṭi ma te jyek Juaŋo. Gena Barnabac, ɔci Cimaan, (mena bartan ma agi Mena Ulan), ɔci Luciiyoc (men ma Cayriin), ɔci Manaayɛn (mug Hiruuduc Antipacn), ɔci Caawul. ² Ɔci ne ma kaniica balki morki Juaŋti ɔci balki gworki koñ a ɔɔnyɛ, Boŋ Jwaŋa Tolan gɔkcin ɛkkɛnti agi, “Dala ɛkkɛ Barnabac ɛkkɛn i Caawul muodɛ bora aŋka ɛkkɛn noŋdi kanŋa boora ‘ya ɛkkɛn neeni.” ³ Ɔci ne gworŋ koñ ɔci cɔŋi baaniyɛ, ɛkkɛn oŋ byeŋkɛn tañji Barnabac wyeñɛti ɔci Caawul wyeñɛti oŋo. Hayya, ɛkkɛn oŋ cuuññɛ kaniica oŋo. ⁴ Ɔci ne Barnabac ɔci Caawul cuuññɛ Boŋ Jwaŋa Tolan a ɔɔnyɛ, ɛkkɛn ati ne ban Cɛluucya ɔɔn. Bana neeni bala galŋ ḍwaŋɛti. Ɔci ɛkkɛn jɔŋŋin te ban Cɛluucya, ati te murka tolan ne Kaŋ Cayprac wyeñɛti ɔɔn. ⁵ Ɔci ne ɛkkɛn dɛñki ban Calamic Kaŋ Cayprac wyeñɛtiyɛ, ɛkkɛn bala loṭi ma te jyek Juaŋ oorga morki ma Juaŋti. Ɔci Yɔhanna Mark bala i ɛkkɛn aŋka ɛkɛ moki ɛkkɛn te kanŋa. ⁶ Ɔci ɛkkɛn ati booti Kaŋ Cayprac wyeñɛti ɔɔn ne dɛñki ban Pepɔc ɔɔn, ɔci ɛkkɛn men ma Icrayiil mena ṭyeni gɛɛl mɔkci bana neeniti. Ɔci mena neeniyɛ, ɛkɛ noŋi ma ñingɛn agi ɛkɛ agji bɔwa. ‘Wana neeniyɛ, yenti Barjiicoc. ⁷ Ɛkɛ a mug ḍuaŋa ṭɔɔlɛ Kaŋ Cayprac. Gena Corjyec Pɔloc. Corjyec Pɔloc neeniyɛ, ɛkɛ ñingɛ tɛy tɛy ne pɛñan. Ɔci ɛkɛ men gɛɛl cuuññɛ Barnabac ɔci Caawulti. Ɛkɛ gɔki agi dala ɛkki bɛɛdɔ, acaan ɛkɛ buagiti tieŋjɛ jyek Jwaŋa Tolan. ⁸ Yeti Barjiicoc mena ṭyeni mena bartan ma te yenta parɛ agi Ɛlimac te tuk ma Giriik neeni yookɔn te jyek Barnabac ɔci Caawul, acaan ɛkɛ buagɔn naa ḍuaŋa ṭɔɔlɛ jyeddi Jyek Juaŋ bɛɛ. ⁹ Ɔci Caawul neeniyɛ, yenti ɛkɛ yenta parɛ ma boṭi agi Buuluc. Ɛkɛ yomɛ kuumi te Boŋ Jwaŋa Tolan. Ɔci acaan ɛkɛ yomɛ kuumi te Boŋ Juaŋ a ɔɔnyɛ, ɛkɛ gɔrcin mena ṭyeni ñingɛti ¹⁰ ɔci gɔkcin ɛkɛti agi, “I a kaci Jwaŋa Yaayan awarɛ, hay! I konu kuumi te jyek labji naŋki ma ñingɛn waakɛnda, ɔci i buagi gena naŋka yaayan waakɛnda. Pɔɔk Jwaŋa Tolan, pɔɔka a tyɛlgan neeni dalja i te naŋka a ḍwakkan neeni ne tua yeti? ¹¹ Acca neeniti ywobji Jwaŋa Tolan bɛya iti, ɔci i ñingu ula, ɔci acca i yaaktiti gwali noon moki bɛɛ.” Ɔci ne ɛkɛ gɔŋni a ɔɔnyɛ, ɔci mena neeni ñingɛ uli doki. Ɔci ɛkɛ bala ati lieṭi mwoṭi mena ɛkɛ eedi lwaddɛ te bieŋɛ. ¹² Ɔci ne ḍuaŋa ṭɔɔlɛ neeni gɔrni naŋka naŋŋɛ Juaŋ mena ṭyeniti neeniyɛ, ɛkɛ konɛ buañi te jyeka loṭi Buuluc ma te Yaccu neeni, ɔci ɛkɛ jyeti Juaŋti te oŋŋa wannati doki. ¹³ Buuluc ɔci maka atki i ɛkɛyɛ, ɛkkɛn jɔŋŋin te murka tolan te ban Pepɔc, ɔci ati ati ati ne dɛñki ban Porga ban Pampiilyaji. Ɔci bana neenitiyɛ, Yɔhanna Mark ma dolnɛyɔ, ɔci ɛkɛ dɔɔkkin ban Urcaliimji. ¹⁴ Ɔci Buuluc i maka atki i ɛkɛyɛ, ɛkkɛn jɔŋŋin te ban Porga, ɔci ati ne dɛñki ban Antyak ban Picidyaji. Ɔci te Oŋ Cabityɛ, ɛkkɛn ati kaaccin orɔ ona morki ma Juaŋ, ɔci ɛkkɛn cooccin iñɔ. ¹⁵ Ɔci ne ma jyek ganuun Juaŋ jyeka kiinɛ Muuca ɔci jyeka kiiwɛ maka a bɔwan Jwaŋa Tolan pakkiti ne ḍaakkitiyɛ, ḍuaŋan ona morki ma Juaŋ neeni men gɛɛl cuuñɛ Buuluc ɔci Barnabacti ɔci gɔkcin ɛkkɛnti agi, “Modg ɔɔn, kan ɛkkɛ balkɛ jiek gɛɛg yomgɔti aŋka ɛkkɛ ma magdɛyɛ, dala ɛkkɛ jɔldɛ ñaalɔ ma myettɛ.” ¹⁶ Ɔci Buuluc jɔllin ñaalɔ ɔci bieŋɛ laŋnɛ mati aŋka ma ciya lieda, ɔci gɔkcin ɛkkɛnti agi, “Ma Icrayiil ɔci Keedin Pookɛn maka moṭi Juaŋtiy, dala ɛkkɛ tieŋdɛ! ¹⁷ Jwaŋ ma Icrayiil neeniyɛ, ɛkɛ yɔrg ikin kɛnnɛ bora. Ɔci ne ɛkkɛn balki cieki ban Macor ba maka wɛlgyɛ, ɛkkɛn naŋŋɛ Juaŋ aŋi maka ḍwaŋin. Ɔci oŋ gɛɛltiyɛ, ɛkkɛn koonɛ Juaŋ bora te ban Macor te war tɛɛn ɛkɛ, ¹⁸ ɔci ne ɛkkɛn balki wɔɔŋjiyɛ, Juaŋ bala wɛɛyi ɛkkɛn yuong a ma baan ne yyɛɛwɔ (40). ¹⁹ Maka keedin pookɛn gɛɛg bala ciyi ban Kɛnan. Ɔci ne Juaŋ keedin neeni ŋualnɛ ɔntɔ ne dɔɔyɔ wyetkɛn ne yyɛɛwɔyɛ, ɛkɛ ma Icrayiil ‘wonnɛ bonk ɛkkɛn. Ɔci ɛkkɛn bala ciyi bana neeniti yuong kɔɔna kɔɔni ba miyyan ne ŋaanɔ ɔci ma baan ne yyɛɛwɔ mena parɛ byeŋkɛ (450). ²⁰ “Ɔci ne yuonga neeni bɛɛki borayɛ, Juaŋ ma ‘wonnɛ maka a cyekin aŋka wɛɛyi ɛkkɛn ne Camwil mena a bɔwa Jwaŋa Tolan neeni bɛɛni ɔɔn ²¹ Ɔci ne Camwil baali menyɛ, maka neeni gɔki ɛkɛti agi dala ɛkkɛn ‘wondinti ɛkta ḍuaŋa tolan. Ɔci Juaŋ ɛkkɛn ‘wonnɛ Caawul kaci Kiic. Ɛkɛ bɛɛn te kɛɛn Benjaminti. Ɔci Caawul neeniyɛ, ɛkɛ aŋi ḍuaŋa tolan ɔɔn ne yuong akki ma baan ne yyɛɛwɔ (40) ɔɔn. ²² Ɔci Juaŋ mwonnin te cyɛgji Caawul, ɔci ɛkɛ Daawud olnɛ aŋi ḍuaŋa tolan ma Icrayiil. Mena neeniyɛ, gena ɛkɛ a mena guaŋŋɛ Juaŋ agi ɛkɛ gɔrcɛ Daawud kaci Jɛci, agi ɛkta yomdan pwanni agi pwanno. Ɔci agi Daawudyɛ, ɛkta noŋdɔ ba naŋka yom Juaŋ buagda waakcinda. ²³ Ɔci Daawud neeniyɛ, Mena Yuoci Ma bɛɛn oonɛ Juaŋ te kɛɛn ɛkɛti ba jwalla guaŋŋɛ Jwaŋa Tolan te ñamu, agi ɛkɛ ma Icrayiil ‘woñji Mena Yuoci ɛkkiy. Acca ɛkɛ bɛɛn doki. Gena Yaccu. ²⁴ Ne Yaccu baawi menyɛ, Yɔhanna bala loṭi ma te jyek bulti agi dala ma Icrayiil waakcinda maka wiagɔ te nɔji ɛkkiyɛ, dala ɛkki buldi ma. ²⁵ Ɔci ne Yɔhanna noŋi kanŋa ɛkɛ baadi dokiy, ɛkɛ gɔkcin mati agi, ‘Ɛkkɛ poŋɛ gɔkɛ agi ‘ya agji menɛ? ‘Ya a Kiṭɔ Mena Muonɛ Juaŋ Bora bɛɛ. Kiṭɔyɛ, ɛkɛ bala bɛya ‘ya ŋoyuti. Ɔci ‘ya baal ba wɛyi ɛkɛ looda ‘ya bora bɛɛ.’ ²⁶ “Modg ɔɔn, maka bɛɛn te kɛɛn Abrahimti ɔci Keedin Pookɛn waakɛnda maka moṭi Jwaŋa Tolantiy, jyek Mena Yuoci ikin bɛɛn ikinti doki. ²⁷ Maka ban Urcaliim i ḍuaŋan ɛkkɛnyɛ, ɛkkɛn Yaccu ñiyɛ bɛɛ. Ɔci jyek bɔwan Jwaŋa Tolan jyeka paktan ma oŋkanda te Oŋ Cabityɛ, jiek jitkɛn neeni ŋeecɔn ɛkkɛn ne pwadan moki bɛɛ. Ɔci a ɔŋŋiyɛ, jyeka kiiwɛ bɔwan Jwaŋa Tolan te naŋka naŋtan ma Yaccuti neeniyɛ, dɛññin bora doki te jyeka oljɛ ɛkkɛn Yaccu wyeñɛti, ɔci ɛkkɛn Yaccu nokkitiy. ²⁸ Nɔjja Yaccu nokkiti ma neeniyɛ, gɔ bala bɛɛ. Yeti ɛkkɛn tooccin Bilaatucti agi, ‘Ɔɔn buagɔn i Yaccu noga.’ ²⁹ Ɔci ma noŋjin ba jyeka kiiwɛ ma worganji waakɛnda te lyen Yaccu, ɔci ne naŋka neeni ḍaakkiti mayɛ, ɛkkɛn war Yaccu gwoddɛ iñɔ te ñaalɔ jana kakanti, ɔci olji koolji. ³⁰ Yeti Jwaŋa Tolan ɛkɛ luolnɛ ñaalɔ te koolji tɛɛti moki. ³¹ Ɔci te ninka coŋin neeniyɛ, Yaccu warɛ lɛɛlnɛ bora mati. Gena maka bɛɛki i ɛkɛ te ban Jaliil atki ban Urcaliim. Ɔci acca maka neeni bala mieti ma Icrayiil oŋkanda te jyek Yaccu. ³² A ɔŋŋi jyeka nɔɔtki ma a jyeka wonkɛn jyeka pwadin neeniyɛ, ɛkkɛn bala a ɔŋŋi agi Juaŋ Yaccu jɔɔlnɛ ñaalɔ te koolji tɛɛti moki. Gena jwalla nɔɔnnɛ Juaŋ yɔrg ikin te baaṭi neeni, ɔci acca naŋka neeni naŋŋi ɛkɛ aŋa ikin kɛɛgin yɔrg ikinti doki. A ɔɔnyɛ, bala ba jyek ɔɔlla kiigin worga Ɔɔlg Daawudji ɔɔlla akki ne yyɛɛwɔ agi, ‘I a Kaci ‘ya, i jiennin ‘ya te oŋŋo.’ ³⁴ Çeejɔn ɔɔn ne pwadan Yaccu jɔɔlnɛ Juaŋ ñaalɔ te koolji tɛɛti moki, ɛkɛ warɛ jani bɛɛ, acaan Juaŋ gɔki ma Icrayiilti te baaṭi agi, ‘‘Ya i ‘wondin naŋka pwadin awarɛ, i daldin budan bɛɛ, ɔci ‘ya bieŋu toñña iti ba jyeka guaŋi ‘ya Daawudtiy.’ ³⁵ Ɔci te jyek Ɔɔlla parɛ mokiyɛ, Daawud gɔki Juaŋti agi, ‘Men i mena yomɛ bɔwan neeniyɛ, i ɛkɛ dalja warɛ jada bɛɛ.’ ³⁶ Daawud neeniyɛ, ɛkɛ bala noŋi ba naŋka buagiti Jwaŋa Tolan ne wɔɔka ɛkɛ wɔɔka cieni ɛkɛ ṭɛɛrji neeni baani ɔɔn. Ɔci Daawud tuuni, ɔci ɛkɛ jokci ma nona jokki ma yɔrg ɛkkɛn, ɔci ɛkɛ warɛ caami ɔci warɛ janni. ³⁷ Yeti mena jɔɔlnɛ Jwaŋa Tolan ñaalɔ tɛɛti mokiyɛ, ɛkɛ aŋka warɛ jani bɛɛ. ³⁸ Hay! Modg ɔɔn, dala te naŋka neeni ŋeeddɛ ɛkkɛ, gena bɛɛna Yaccu Kiṭɔ bɛɛni aŋka Jwaŋa Tolan ikin bɔɔŋninti te nɔji ikin neeni. Ɔɔn bɛɛnɔn gɔŋnɔn jyeka neeni ɛkkɛti. ³⁹ Kan ba jyek Muuca pookɛn ɔɔnyɛ, jyek nɔji baadi bɛɛ. Ɔci kan maka jyeddi Yaccutiyɛ, nɔji ɛkkɛn baadi doki, ɔci ywobji dɔɔkti ɛkkɛn wyetkɛnti moki bɛɛ. ⁴⁰ A ɔŋŋiyɛ, dala ɛkkɛ woŋgɔ tiittɛ te jyeka neeni, aŋka naa jyeka guaktan maka a bɔwan Jwaŋa Tolan neeni bɛya ɛkkɛti bɛɛ. ⁴¹ Juaŋ gɔki te tugi bɔwan Jwaŋa Tolan agi, ‘Hay, ɛkkɛ maka tieki jiek nɛ, ‘ya noŋja naŋki ‘ya naŋka tɛyan ɛkkɛ ñomgɔti, ɔci ne ɛkkɛ gɔrtɛyɛ, ɛkkɛ yomgɔ buaya, yeti ɛkkɛ jyeddɛ bɛɛ. Ɔci kan ɛkkɛ nɔɔttɛ ma te ñamu ne naŋka neeni baaki menyɛ, ɛkkɛ yooktɛ te jyeka neeni men ɔɔn. Ɔci acaan a ɔŋŋiyɛ, ɛkkɛ ḍaktɛ.’” ⁴² Ɔci ne Buuluc ɔci Barnabac balki atki ootti kaatti bora te ona morki ma Juaŋtiyɛ, ma bala gɔki Buulucti ɔci Barnabacti agi, “Ne Oŋ Cabit ookti ne ŋoyɔ mokiyɛ, dala ɛkkɛ ɔɔn myettɔntɔ te jyeka neeni waakɛnda moki.” ⁴³ Ɔci ne maka bɛɛn ona morki ma Juaŋti cyɛnki jitin atki baanji dokiyɛ, ma gɛɛg waakɛn ñaagɛ i Buuluc i Barnabac a ḍiɛkan bɛɛ. Gena ma Icrayiil ɔci Keedin Pookɛn gɛɛg daŋkun. Keedin Pookɛn neeniyɛ, ɛkkɛn noŋi te naŋki ma ɛkkɛn moki bɛɛ. Ɛkkɛn noŋi ba naŋki maka moṭi Jwaŋa Tolanti. Ɛkkɛn ani jyek Jwaŋa Tolan. Ɔci Buuluc ɛkkɛn i Barnabacyɛ, ɛkkɛn bala mieti maka neeni te jyek Juaŋ agi, “Dala ɛkkɛ woŋgɔ tiittɛ te jyek Juaŋo, acaan gena Jwaŋa Tolan moki ma te yom pwani ɛkɛy.” ⁴⁴ Ɔci ne Oŋ Cabit parɛ bɛɛni mokiyɛ, ɔci ma wɔɔwwin wyetkɛn ḍɔɔlɛ ne coŋɔn bana neeniti. Ɛkkɛn buagɔn tieŋdi jyek Jwaŋa Tolan. ⁴⁵ Yeti ne ma Icrayiil gɔrki ne polla tolan bɛɛni a ɔɔnyɛ, ɛkkɛn korkɛn modɔ, acaan ɛkkɛn buagɔn naa ma tieŋdi jyek Buuluc bɛɛ. Ɔci ɛkkɛn jyeka guagdɛ Buuluc neeniyɛ, kyɛkciti, ɔci ɛkkɛn bala wooki ɔci ḍori ɛkɛ. ⁴⁶ Ɔci ne ma Icrayiil balki noŋki ne yaayan a ɔɔnyɛ, Buuluc ɔci Barnabacyɛ, ɛkkɛn buayi bɛɛ. Ɛkkɛn bala mieti ɛkkɛn te yoma tɛyan. Ɛkkɛn gɔki agi, “Ɛkkɛ myetkɛ ɔɔn te jyek Jwaŋa Tolan te ñamu acaan ɛkkɛ agɛ ma Icrayiil. Yeti ɛkkɛ yookɛ waakɔ te jyeka neeni a ɔɔnyɛ, tɛɛtin baadi bɛɛ neeni bala ɛkkɛti bɛɛ. Acca ɛkkɛ daltɛ ɔɔn. Ɔɔn ooddɔn Keedin Pookɛnti. ⁴⁷ Ɔɔn myennɔn Jwaŋa Tolan a ɔɔn acaan ɛkɛ gɔki te baaṭi te Kiṭɔ agi, ‘I naŋdin ‘ya agdi mena dɛki Keedin Pookɛn daŋkun, aŋka i yɔɔt eya mati baan warda.’” ⁴⁸ Ɔci Keedin Pookɛn neeniyɛ, ne ɛkkɛn balki tyeŋki jyeka neeniyɛ, ɛkkɛn yomgɛn ñɔɔna ñɔɔno, ɔci ɛkkɛn bala gɔki jieyi agi jyek Jwaŋa Tolan pwannɔ agi pwanno. Ɔci maka kɛnnɛ Juaŋ bora aŋka balti tɛɛtin baadi bɛɛyɛ, ɛkkɛn jyeti ɛkɛti te oŋŋa wannati. ⁴⁹ Ɔci jyek Jwaŋa Tolan ati baan konɛti warda. ⁵⁰ Yeti maka moong gɛɛg bala, ɔci ɛkkɛn bala ñamu te moonga pookɛn neeni, ɔci ɛkkɛn yomgɛn bala Juaŋti, ɔci moonga neeni ciŋiji ma Icrayiil. Ɔci maka ḍuaŋan neeniyɛ, ɛkkɛn ciŋiji ma Icrayiil daŋkun. Ɔci ɛkkɛn bala noŋi ywobji Buuluc ɔci Barnabacti, ɔci ɛkkɛn Buuluc ɔci Barnabac ŋualji bora te bana neeniti. ⁵¹ Yeti Buuluc ɔci Barnabac ciegɛn ṭyɛŋɛ te ṭɛr bana neeniti, acaan ɛkkɛn gɔki agi ɛkkɛn mwonninti te bana neeni. Ɔci ɛkkɛn ati ban Aykɔɔnyam. ⁵² Ɔci Ma Kiṭɔ ban Antyak yomgɛn ñɔɔna ñɔɔno, ɔci ɛkkɛn yomgɛn kuumi te Boŋ Jwaŋa Tolan.

¹ Ɔci ban Aykɔɔnyam daŋkun aŋanyɛ, ma bala noŋi ne yaayan Buuluc ɔci Barnabacti ba naŋka naŋɛ ma ɛkkɛnti ban Antyaky. Ɔci Buuluc i Barnabac kaaccin orɔ ona morki ma Juaŋ, ɔci ɛkkɛn bala mieti ma te jyek Yaccu. Ɔci ma jyeti Yaccuti ne coŋɔn, gena ma Icrayiil ɔci Keedin Pookɛn. ² Ɔci ma Icrayiil gɛɛg, maka yookɔn te jyek Yaccu neeniyɛ, ɛkkɛn bala cyeŋi Keedin Pookɛn jitkɛn agi dala ɛkki yooktɛ te Buuluc ɔci Barnabac. ³ Yeti ɛkkɛn buañi jyek ma bɛɛ. Ɛkkɛn bala ciyi te wɛnan nink kɔɔna kɔɔnno, bala mieti ma te jyek Ciɛggɔn jyek yoma pwadan. Ɛkkɛn buayi ma bɛɛ. Ɔci Juaŋ ma lɛɛrnɛ te jyek yom pwani ɛkɛ agi jyeka neeni a jyeka awarɛ te naŋka ɛkɛ Buuluc ɔci Barnabac ‘wonnɛ noŋkɛ naŋka tɛyan naŋka ñyecki ma ɛkɛy. ⁴ Ɔci maka bana neenitiyɛ, ɛkkɛn kɛɛptin jitin te jieko. Ma gɛɛg gɔki agi jyek ma Icrayiil aŋka pwadgɔ, ɔci maka pookɛn gɛɛg gɔki agi jyek Cuudan Yaccu aŋka pwadgɔ. ⁵ Ɔci ma Icrayiil ɔci Keedin Pookɛn, ɛkkɛn i ḍuaŋan ɛkkɛnyɛ, ɛkkɛn jiek ñaagɛyɔ, ɔci ɛkkɛn buagɔn noŋdi ne yaayan ɔci Buuluc i Barnabac yeptan te gwoyyo. ⁶ Ɔci Buuluc i Barnabac ne ɛkkɛn tieŋki jyeka guaktan ma agi ma buagɔn yebi ɛkkɛnyɛ, ɛkkɛn ati yiŋi ban Lictara ɔci ban Dɛrbi bonk Likɔɔnyaji, ɔci ɛkkɛn ati bonka pookɛn daŋkun. ⁷ Ɔci ɛkkɛn bala mieti ma te jyeka wonkɛn jyeka pwadin neeni. ⁸ Ɔci ban Lictara aŋanyɛ, mena ‘uan gɛɛl bala ciyi pɔy taaŋɛti oŋkanda. Ɛkɛ yaakinti woon bɛɛ. Ɛkɛ a puon wona ɛkɛ jienni mɛɛgɛny. ⁹ Ɛkɛ bala ciyi tyeŋi jyeka guagdɛ Buulucy. Ɔci ne Buuluc gɔrni ‘wana neeni ñingɛtiyɛ, ŋeejɛ ɛkɛ ‘wana neeni yomɛ bala Juaŋti doki. Ɔci jyenna bala ‘wana neeniti neeniyɛ, ɛkɛ ywaŋdɛ. ¹⁰ Ɔci Buuluc borcin ɛkɛti te pwana tolan agi, “Hay, jɔlla ñaalɔ ciegu yɔɔtca iñɔ.” Ɔci mena neeni kuawwin ñaalɔ, ɔci poccin woon doki. ¹¹ Ɔci maka coŋin ne ɛkkɛn gɔrki naŋka naŋŋɛ Buuluc mena neeniti a ɔɔnyɛ, ɛkkɛn yaadan, ɔci ɛkkɛn gɔki te tuk Likɔɔnya agi jɔkin bɛɛnɔ koonɔ iñɔ aŋŋɔ ba ma baano! ¹² Ɔci ɛkkɛn Barnabac yaakkɛn i Buuluc ooggɛ yeng jɔkin ban ɛkkɛn wɛnan gɛɛg ne yyɛɛwɔ. Barnabacyɛ, bartan agi Juuc. Ɔci Buuluc bartan agi Ɛrmac. Buuluc bartan ma a ɔɔn acaan ɛkɛ bala gɔki jiek a ñaccu. ¹³ Ona morki ma jwaŋ ɛkkɛn jwaŋa yenti Juucyɛ, bala yɔɔd pɔy tukɛti, ɔci mena noŋi kanŋa ona neenitiyɛ, ɛkɛ bɛɛn i maka coŋin nona kañ baan tukɛti. Ɛkɛ eccin yotk ɔci pɛɛppin, ɔci ɛkɛ noŋi Buuluc ɔci Barnabac ‘yɛrdɛyɔ te yotko. ¹⁴ Ɔci cuudan Yaccu Barnabac i Buuluc neeniyɛ, ne ɛkkɛn tieŋki jyeka neeniyɛ, bworŋin ɛkkɛn bworŋin ‘yɛŋtan waakɛnti jieyɛ jitin aŋka ŋeettan ma naŋka ɛkkɛn buagɛ ‘yɛrtan ɛkkɛnti wanna yaayɛ, ɔci ɛkkɛn yiŋi maka coŋin jitin, ɔci ɛkkɛn yaajjin gɔkcin mati agi, ¹⁵ “Hay, ‘uayo, te gena yeti ɛkkɛ noŋɛ a ɔŋŋi nɛ? Ɔɔn agɔn ma baan budan balgɔn ba ɛkkɛ ɔɔn! Ɔɔn bɛɛnɔn aŋka ɛkkɛ myettɛ ma jyeka wonkɛn jyeka pwadin neeni aŋka ɛkkɛ waka budan neeni daldɛ te naŋkɛn, ɔci ɛkkɛ waakɔ yaldɛ Jwaŋa Tolanti. Gena ɛkɛ aŋka a Jwaŋa tɛɛtiy. Ɛkɛ a mena oki pɔli ɔci waka bala ñaalɔ pɔliji, ɔci ɛkɛ oki ṭɛɛr ɔci waka bala iñɔ ṭɛɛr konɛti, ɔci ɛkɛ oki tolk ɔci waka bala jiju tolk korkɛnti. ¹⁶ Te ñamuyɛ, maka kɛɛna pookɛn, ɛkkɛn dalnɛ Juaŋ noŋi ba naŋki ɛkkɛn pookɛn. Maka kɛɛna pookɛn neeniyɛ, gena ɛkkɛ. ¹⁷ Yeti ɛkkɛ dalnɛ Juaŋ budan bɛɛ. Juaŋ bala noŋi ne pwadan ɛkkɛti daŋkun aŋka ɛkɛ ŋeeddɛ ɛkkɛ. Ɛkkɛ ‘wonnɛ ɛkɛ ñaal te ñaalɔ pɔliji, ɔci te ñaal neeniyɛ, waka amdɛ ɛkkɛ ywollin te ɛkɛ. Ɛkkɛ ‘wonnɛ ɛkɛ oomdin ɔci yoma ñɔyan daŋkun.” ¹⁸ Ɔci Buuluc ɛkkɛn i Barnabac kɛkcin mati agi ɛkkɛn buaginti ‘yɛrŋ bɛɛ. Yeti maka neeni bala ‘yeṭi ɛkkɛnti men ɔɔn, agi dala ɛkkɛn waak ‘yɛrdinti ɛkkiti ɔɔn. Ɔci Buuluc ɔci Barnabac ɛkkɛn gɔkcin maka neeniti ne pɛñan, ɔci maka neeni waak dalji te ‘yɛrŋ doki. ¹⁹ Ɔci ne nink gɛɛg bɛɛki borayɛ, ma Icrayiil gɛɛg bɛɛn te ban Antyak, ɔci gɛɛg bɛɛn te ban Aykɔɔnyam, ɔci ɛkkɛn ati ban Lictara ɔci ɛkkɛn ma Lictara ciŋiji. Ɔci ɛkkɛn Buuluc yepci te gwoyyo, ɔci ɛkɛ wuayɛ ɛkkɛn ɔntɔ baan ŋoyɛti, ɔci ɛkkɛn poŋi gɔki agi ɛkta tuunɔ doki. ²⁰ Yeti ne Ma Kiṭɔ balki yɔtki ɛkɛ bwotkitiwiyɛ, ɛkɛ jɔŋŋin ñaalɔ, ɔci ɛkɛ bɛɛn dɔɔkkin baanji bana tolan neeniti dɔki. Ɔci ne liidɔ ɛkkɛn ati yaakkɛn i Barnabac ban Dɛrbi. ²¹ Ɔci ɛkkɛn bala mieti maka ban Dɛrbi te jyeka wonkɛn jyeka pwadin. Ɔci ne maka coŋin bana neeniti ɛkkɛn akki ma Yaccu dokiyɛ, Buuluc i Barnabac ati dɔɔki ban Lictara, ɔci ban Aykɔɔnyam, ɔci ban Antyak ban Picidyaji. ²² Ɔci ɛkkɛn bala ṭeyi Ma Kiṭɔ bonka neeniti aŋan aŋka ma yomgɛn tɛɛtɛ. Ɔci ɛkkɛn gɔki agi, “Naa ɛkkɛ jyek Yaccu daldɛ bɛɛ. Taab bɛya ikinti waakida ne tolan, ɔci a ɔɔnyɛ, ikin aktin ma cyɛgji Jwaŋa Tolan.” ²³ Ɔci Ma Kiṭɔ maka ciyi bonka neenitiyɛ, ɛkkɛn magɛ Buuluc ɔci Barnabac te jyek cyɛgji kaniica. Ɛkkɛn ma gɛɛg muowi bora naŋɛ a cyekin. Ɔci cyekin neeniyɛ, ɛkkɛn magga da te non ɛkkɛn, ɔci magga da te non ɛkkɛn. Ne ɛkkɛn makkiti ma te jyek cyɛgji kaniica a ɔɔnyɛ, ɛkkɛn bala gwoṭi koño, ɔci bala cɔki Juaŋti te ñamu. Ɔci ma kaniica neeniyɛ, ‘woñgi ɛkkɛn Jwaŋa Tolan mena jyetki ɛkkɛn neeni bieŋɛti. ²⁴ Ɔci Buuluc i Barnabac ati booti ban Picidya ne dɛñki ban Pampiilya ɔɔn. ²⁵ Ɔci ne ɛkkɛn maka ciyi ban Porga myetkɛti jyek Juaŋyɛ, ɛkkɛn ati ne dɛñki ban Ataliiya ɔɔn. ²⁶ Ɔci ɛkkɛn jɔŋŋin te ban Ataliiya, ɔci ɛkkɛn bala ooddi ban Antyak ban Cuuryaji te murka tolan. Antyak neeniyɛ, gena bana jɔŋki ɛkkɛn te ñamu te oŋŋa ɛkkɛn ‘woñkiti Ma Kiṭɔ bieŋɛtiy. Ɛkkɛn ‘woñgi Ma Kiṭɔ bieŋɛti a ɔɔn, aŋka ɛkkɛn magdɛ Juaŋ te kanŋa ɛkkɛn kanŋa bawwin cwamjɛ ɛkkɛn doki neeni. ²⁷ Ɔci ne ɛkkɛn dɛñki ban Antyak ban Cuuryajiyɛ, ɛkkɛn ma kaniica boorgɛti, ɔci ɛkkɛn ma myetkɛ te naŋka naŋŋɛ Juaŋ mati te tugi ɛkkɛn, ɔci Keedin Pookɛn pɔŋnɛ yomgɛnti te jyek jyeniy. ²⁸ Ɔci ɛkkɛn cien aŋan nink ne coŋɔn i Ma Kiṭɔ.

¹ Ɔci ma gɛɛg bɛɛn te ban Yahuudiya ati ban Antyak, ɔci ɛkkɛn bala loṭi modg ɛkkɛn ma kaniica. Ɛkkɛn gɔki mati agi, “Kan ɛkkɛ ŋwottɛ ma ba ganuun Muuca bɛɛyɛ, ɛkkɛ yɔɔdɛ Juaŋ bɛɛ.” ² Ɔci Buuluc ɛkkɛn i Barnabac ne ɛkkɛn tieŋki jyeka guaktan ma neeniyɛ, ɛkkɛn bala tyewɔ i maka neeni te jyeka neeni. Ɔci ne ma balki gɔɔki tieki ne pɛñan a ɔɔnyɛ, ɔci ma gɔkcin agi dala Buuluc ɔci Barnabac ɛkki i ma kaniica maka pookcɛn gɛɛg te ɛkkitiyɛ, dala ɛkki ooddɔ ban Urcaliim aŋka gɔrtɔ jyeka neeni aŋan i Cuudan Yaccu ɔci cyekin kaniica. ³ Ɔci ba jyeka guagɛ ɛkkɛn neeniyɛ, ma kaniica maka neeni cuuñɛ ati ban Urcaliim. Ɛkkɛn ati booti ban Pɔniicya konɛti, ɔci ban Camɛɛrya konɛti, ɔci ɛkkɛn maka bonka neeniti myetkɛ agi Keedin Pookɛn jyeti Yaccuti doki. Ɔci modgɛn ne tieŋki jyeka neeniyɛ, ɛkkɛn yomgɛn ñɔɔna ñɔɔn ne tolan. ⁴ Ɔci ne ɛkkɛn dɛñki Urcaliimyɛ, ɛkkɛn ñiebjin i ma kaniica, ɔci ñiebjin moki i Cuudan Yaccu, ɔci ñiebjin moki i cyekin kaniica. Ɔci ɛkkɛn maka neeni myetkɛ te naŋka naŋŋɛ Juaŋ Keedin Pookɛnti te tugi ɛkkɛny. ⁵ Ma Kiṭɔyɛ, ma gɛɛg a ma Pɛriciin, ɔci ɛkkɛn jɔŋŋin ñaalɔ gɔki agi, “Dala maka a Keedin Pookɛn maka jyeti wannayɛ, dala ɛkkɛn ŋwottan mako. Ɔci dala ma gɛɛg ooddi ɛkkɛn myettan te ganuun kiinɛ Muuca waakɛnda neeni aŋka dala ɛkkɛn tiitanyɔ.” ⁶ Ɔci Cuudan Yaccu wyetkɛn ḍɔɔlɛ i cyekin kaniica aŋka gɔrti jyeka neeni. ⁷ Ɔci ne ɛkkɛn balki gɔrki jyeka neeni ne jiek tɛɛki a tɛɛnyɛ, Butruc jɔŋŋin ñaalɔ ɔci gɔkcin ɛkkɛnti agi, “Modg ɔɔn, ŋeejɛ ɛkkɛ doki ‘ya kɛnna Juaŋ bora te ɛkkɛti te baaṭi, aŋka Keedin Pookɛn tieŋdi jyeka wonkɛn jyeka pwadin te tuk ‘yati aŋka ɛkkɛn jyeddi jyeka neeniti. ⁸ Jwaŋa Tolanyɛ, ɛkɛ a mena ma yomgɛn ŋeejɛ. Ɔci acca ɛkɛ doki Keedin Pookɛn ‘wonnɛ Boŋ ɛkɛ bala ba ikin ne ‘wonninti ɛkɛ te ñamu ɔɔn. Ɛkɛ Keedin Pookɛn neeni ‘wonnɛ Boŋ ɛkɛ aŋka ŋeettan ma ɛkkɛn a ma ɛkɛ daŋkun. ⁹ Juaŋ ma kɛɛmmɛ jitin bɛɛ. Ne Keedin Pookɛn neeni jyetki Juaŋtiyɛ, ɛkkɛn luaŋŋɛ Juaŋ yomgɛnti ba ikin ɔɔn. ¹⁰ Yɔrg ikinyɛ, ganuun Muuca tiiyɛyɔ waakɛnda bɛɛ. Ɛkkɛn kookinti. Ɔci ikin moki, ganuun neeni tiiññinyɔ bɛɛ. Oŋ acca ɛkkɛ buagɛ Keedin Pookɛn neeni ganuun tiitanyɔ ogo? A ɔɔnyɛ, bala ba ɛkkɛ poccɛ naŋki Jwaŋa Tolan. Ɔci ɛkkɛ taab oonɛ maka jyeti jyek Juaŋti neeni ḍɔɔggɛnti doki. ¹¹ Ikin jyettin ɔci yɔɔññin Jwaŋa Tolan te yom pwani Ciɛggɔn ikin Yaccu ba ɛkkɛn daŋkun ɔɔn.” ¹² Ɔci ne maka wyetkɛn ḍɔɔlɛ neeni tieŋki jyek Butruc neeniyɛ, ɛkkɛn cien lieda waakɛnda. Menga bala gɔki genga bɛɛ. Ɔci ɛkkɛn myetkɛ Barnabac yaakkɛn i Buuluc te jyek naŋka naŋŋɛ Juaŋ Keedin Pookɛnti. Jyeka myetki ɛkkɛn ma neeniyɛ, gena jyek naŋka naŋŋɛ Juaŋ mati ne ɛkkɛn balki lorki may, acaan Juaŋ bala noŋi naŋka tɛyan naŋka ñyecki ma ɛkɛy. ¹³ Ɔci ne ɛkkɛn jyeka neeni ḍaakkitiyɛ, Yaakub jɔŋŋin ñaalɔ ɔci gɔkcin mati agi, “Modg ɔɔn, tieŋdɛ jyek ‘ya. ¹⁴ Ikin myennin Butruc doki te naŋki Juaŋ te oŋŋa ɛkɛ jɔɔnni Keedin Pookɛn gɛɛg kɛnnɛ bora akki ma ɛkɛy. ¹⁵ Jyek Butruc neeniyɛ, bala ba jyeka guaŋŋɛ Jwaŋa Tolan te tuk maka a bɔwan Jwaŋa Tolan agi, ¹⁶ ‘‘Ya dɔɔkka moki ɔci ‘ya cɔtca on Daawud ona ḍɛmmin iñɔ ɔci yaañi neeni ywaŋdiyɔ ¹⁷ aŋka maka a Keedin Pookɛn lierti ‘ya waakɛnda, gena maka naŋi ‘ya aŋi ma ‘yay. ¹⁸ Mena gɔki jyeka neeniyɛ, gena Ciɛggɔn. Ɛkɛ bala mieti ma te jyek naŋka neeni te baaṭi doki.’ ¹⁹ “Paŋi ‘ya neeni, kan Keedin Pookɛn waakɛn yaltan Jwaŋa Tolantiyɛ, naa ikin gɔktin jyeka tɛyan a jyek ŋwoti ma itkɛn neeni ɛkkɛnti bɛɛ. ²⁰ Dala ikin kiettin worga ɛkkɛnti. Dala ikin gɔktin ɛkkɛnti, naa ɛkkɛn omdi waka ‘yɛrtan ma jɔkin yeyinti neeni bɛɛ. Naa ɛkkɛn noŋdi tomi bɛɛ. Ɔci naa ɛkkɛn omdi waka tuwa noktan wyeng neeni bɛɛ. Ɔci naa ɛkkɛn dɛtti yimg bɛɛ. ²¹ Ikin kiettin ɛkkɛnti a ɔɔn, acaan ganuun Muuca ati baan konɛti warda te baaṭi doki, ɔci oŋkanda te Oŋ Cabit ma bala poki ganuun Muuca oorga morki ma Juaŋy.” ²² Cuudan Yaccu ɔci cyekin kaniicayɛ, ɛkkɛn i ma kaniica waakɛndayɛ, ɛkkɛn jiek ñaagɛyɔ agi dala ɛkkɛn ma gɛɛg kɛndinti bora te ɛkkɛnti aŋka ɛkki ooddɔ iki Buuluc i Barnabac ban Antyak. Ɔci ɛkkɛn ma kɛññɛ bora ne yyɛɛwɔ. Gena Yahuuja mena bartan ma a Barcaaboc, ɛkkɛn i mena parɛ yenti Cila. Ɛkkɛn a maka bala wɛɛyi ma kaniicaji. ²³ Ɔci ɛkkɛn cuuñɛ mako, ɔci ɛkkɛn ati i Buuluc i Barnabac, ɔci worga eyɛ ɛkkɛn. Jyeka kiiwɛ ma worgaji neeniyɛ, gɔki agi, Modg ɔɔn Keedin Pookɛn ban Antyak ɔci ban Cuurya ɔci ban Ciliicya, ɔɔn ñiepɔn ɛkkɛ te worga neeni. Ɔɔn agɔn cuudan Yaccu ɔci cyekin kaniica ɔci modg ɛkkɛ. ²⁴ Ɔɔn tieŋnɔn jiek agi maka bɛɛnɔ te ban ɔɔn agi ɛkki jiek cɔŋŋiyɔ, ɔci agi acca ɛkkɛ jiek jitkɛn yuarcɛ moki ne pwadan bɛɛ. Maka jiek cɔgiyɔ neeniyɛ, ɛkkɛn cuonnɔn ɔɔn bɛɛ. ²⁵ Ɔci acaan a ɔŋŋiyɛ, ɔɔn jiek ñaaŋŋɔnyɔ waakida te tuka ne cyɛɛlɔ, aŋka ɔɔn ma gɛɛg muonɔn bora ne yyɛɛwɔ, gena Barcaaboc ɔci Cila, ɔci ɛkkɛn cuondɔn ɔɔn ɛkkɛti. Ɛkkɛn bɛya iki modg ikin modga anin ikin. Gena Buuluc i Barnabac. ²⁶ Ɔci Buuluc i Barnabac neeniyɛ, ɛkkɛn a maka ati loṭi ma te jyek Ciɛggɔn ikin Yaccu Kiṭɔ, ɔci ɛkkɛn poŋi te jyek lyen ɛkkɛn bɛɛ. ²⁷ Barcaaboc ɔci Cilayɛ, ɛkkɛn cuondɔn ɔɔn ɛkkɛti, aŋka ɛkkɛn ɛkkɛ myettɛ jyeka kienɔn ɔɔn ɛkkɛti te worga neeni te tugi ɛkkɛn. ²⁸ Ɔɔn jiek ñaaŋŋɔnyɔ i Boŋ Jwaŋa Tolan a ɔɔn gɔktɔn jyeka tɛyan ɛkkɛti bɛɛ. Yeti ɔɔn gɔktɔn ɛkkɛti te jiek gɛɛg ne ḍiɛkan. ²⁹ Naa ɛkkɛ omdɛ waka ‘yɛrtan ma jɔkin yeyinti bɛɛ. Ɔci naa ɛkkɛ menga dɛtti yimg bɛɛ. Ɔci naa ɛkkɛ omdɛ waka tuwa noktan wyeng neeni bɛɛ. Ɔci naa ɛkkɛ noŋdɛ tomi bɛɛ. Kan ɛkkɛ noŋdɛ naŋka neeni bɛɛyɛ, ɛkkɛ ciedɛ ne pwadan. Jwaŋa Tolan baldi i ɛkkɛ. ³⁰ Ɔci maka cuuñɛ ma neeniyɛ, ɛkkɛn ati ɔci dɛñjin ban Antyak. Ɔci ne ɛkkɛn dɛñkiyɛ, ɛkkɛn ma kaniica waakɛnda boorgɛti nona ne cyɛɛlɔ, ɔci ɛkkɛn ma ‘woñgi worga. ³¹ Ɔci ne ɛkkɛn gɔrki worga neeniyɛ, ɛkkɛn yomgɛn ñɔɔna ñɔɔn acaan ɛkkɛn magɛ ma te jyeka neeni. ³² Yahuuja (mena bartan ma a Barcaaboc) ɔci Cila, ɛkkɛn a bɔwan Jwaŋa Tolan. Ɔci ɛkkɛn bala loṭi ma ne tolan ṭeyi mako. ³³ Ɔci ne ɛkkɛn ɛɛni coodi aŋan ne ḍiɛran ṭɔɔlɛyɛ, ɛkkɛn cuoññɛ ma bɛɛn dɔɔkkin nona maka ɛkkɛn cuoñki te ñamuy. Ɔci ma ɛɛnjin Barcaaboc ɔci Cilati agi, “Ɛkkɛ ne ooddiyɛ, dala ɛkkɛ ma ñiibdɛ ɔci coodda pwadan bala ɛkkɛnti.” [ ³⁴ Yeti Cila buagɔn cootti aŋan.] ³⁵ Yeti Buuluc yaakkɛn i Barnabacyɛ, ɛkkɛn yeddin te ban Antyak. Ɛkkɛn i maka pookɛn maka coŋin, ɛkkɛn bala loṭi ma te jyek Ciɛggɔn jyeka wonkɛn jyeka pwadin. ³⁶ Ɔci ne nink gɛɛg bɛɛki borayɛ, Buuluc gɔkcin Barnabacti agi, “Dala ikin dɔɔtin dɔki oottin bonka ikin loṭṭin ma te jyek Ciɛggɔn te ñamu aŋka ikin ḍieŋtin modg ikinti ne ɛkkɛn balki cieki a ɔkiy.” ³⁷ Ɔci Barnabac buagɔn ɛkkɛn ooddi iki Mark. ³⁸ Yeti Buuluc yookɔn. Ɛkɛ gɔki agi, “Mena neeni attin iki ikin te ñamu, ɔci ɛkɛ ikin dolninyɔ te ban Pampiilya, ɔci ɛkɛ dɔɔkkin baanji. Ikin dolninyɔ kanŋa cwamnin pookɔ. Ɔci acca ɛkɛ eetin aŋɛ moki?” ³⁹ Ɔci ɛkkɛn jiek pɛɛddɛ, ɔci kɛɛptin jitin. Ɔci Barnabac ati yaakkɛn i Mark, ɔci ɛkkɛn taapcin te murka tolan, ɔci ati Kaŋ Cayprac. ⁴⁰ Yeti Buuluc Cila muonɛ bora ɛkɛ. Ɔci ne ma cɔkki Juaŋti ɔci ɛkkɛn ‘woñkiti Ma Kiṭɔ bieŋɛtiyɛ, ⁴¹ ɛkkɛn ati booti ban Cuurya konɛti, ɔci ban Ciliicya konɛti, ɔci ɛkkɛn bala ṭeyi ma kaniican aŋan.

¹ Ɔci Buuluc ati ban Dɛrbi ɔci ban Lictara daŋkun. Ban Lictarayɛ, men Ma Kiṭɔ gɛɛl bala yenti Timutawuc. Mɛy ɛkkɛn a men Kiṭɔ, ɛkɛ a men ma Icrayiil daŋkun. Ɔci wey ɛkkɛnyɛ, a men ma Giriik. ² Modga ban Lictara ɔci ban Aykɔɔnyam, ɛkkɛn gɔki agi Timutawuc pwadɔ. ³ Buuluc buagɔn Timutawuc neeni eedɛ ɛkɛ nona ɛkɛ ooddɛ loṭi ma bonka pookɛn gɛɛgtiy. Yeti ma Icrayiil maka ciyi bonka neenitiyɛ, ɛkkɛn Timutawuc ŋeeckɔn ne Timutawuc ŋutkiti ma iñɛti ba naŋki ma Icrayiil bɛɛy, acaan Timutawuc neeni wey ɛkkɛn a men ma Giriik. A ɔŋŋiyɛ, Buuluc Timutawuc ŋunnɛ iñɛti ñamu parun, aŋka ne ɛkkɛn ootti lorki mayɛ, naa ma Icrayiil yomgɛn yiegdi loondi bɛɛ. ⁴ Ɔci ne ɛkkɛn atki bootki bonk korkɛntiyɛ, ɛkkɛn ma kaniica nɔɔtkɛ agi dala jyeka naŋŋɛ ma ban Urcaliim neeniyɛ, dala ɛkki tiidiyɔ mako. Gena jyeka naŋɛ Cuudan Yaccu ɔci cyekin kaniica ban Urcaliimy. ⁵ Ɔci oŋkandayɛ, ma kaniica bala ciɛñ a ciɛñi gɔ moki coŋkin ɔɔn, acaan ɛkkɛn jyeti Yaccuti ne pwadan. Ɔci moki jyeni ɛkkɛn tɛɛna tɛɛno. ⁶ Buuluc ɔci Cila, ɛkkɛn kɛŋnɛ Boŋ Jwaŋa Tolan agi naa ɛkki ooddɔ loṭɔ ma ban Ecya bɛɛ. Ɔci acaan a ɔŋŋiyɛ, ɛkkɛn ati booti ban Prijya ɔci ban Galatiya korkɛnti. ⁷ Ɔci ɛkkɛn ati ne dɛñki ban Micya. Ɔci ɛkkɛn buagɔn ooddi ban Bitinnya, yeti ɛkkɛn kɛŋnɛ Boŋ Yaccu yomgɛnti. ⁸ Ɔci acaan a ɔŋŋiyɛ, ɛkkɛn booti ban Micya konɛti ne ɛkkɛn dɛñki ban Trɔwac kɔmḍɔ ɔɔn. ⁹ Ɔci ne ɛkkɛn balki te ban Trɔwacti menyɛ, oŋ gɛɛlti te ween jiñɛyɛ, Buuluc liɛlti yuarnɛ agi mena ‘uan gɛɛl ban Macɛdɔɔnya bala yɔɔd boor ɛkkɛn a borti agi, “Bɛɛd totta bora wɛnni ban Macɛdɔɔnya, ɔɔn magdɔn!” ¹⁰ Ɔci ne liɛlti bɛɛni Buulucti a ɔɔnyɛ, ɔɔn jɔŋnɔn ne pɛñan waakɔ ywaŋŋɔn aŋka ooddɔn ban Macɛdɔɔnya, acaan ɔɔn gɔrnɔn Juaŋ boor ɔɔn buagɔn ɔɔn ooddɔn loṭɔn ma te jyeka wonkɛn jyeka pwadin neeni aŋan. ¹¹ Ɔci ɔɔn taamnɔn baabin tool konɛ baabin tolanti te ban Trɔwac, ɔci ɔɔn attɔn ne dɛnnɔn ban Camotrec. Ɔci ɔɔn niinnɔn ban Camotrec, ɔci ne liidɔ ɔɔn jɔlnɔn te baabin tool konɛ moki attɔn ne ban Ñapolic ɔɔn. ¹² Ɔci ɔɔn jɔŋnɔn te ban Ñapolicti moki, ɔci attɔn ne ban Pilibbi ban Macɛdɔɔnyaji. Ban Pilibbi neeniyɛ, ɛkɛ a ban ma Ḍɔɔm. Pilibbi neeniyɛ, ɛkɛ tol tol te bonka pookɛn waakɛnda. Ɔci ɔɔn coonnɔn aŋan ne ḍiɛran ṭɔɔlɛ. ¹³ Ɔci te Oŋ Cabit ɔɔn attɔn, ɔci ɔɔn kaannɔn bora te kañ baan tukɛ, ɔci ɔɔn attɔn tool ḍwaŋɛti, acaan ɔɔn balgɔn poŋɔn gɔkɔn agi nona cɔkki ma Juaŋ bala aŋan kaapun. Ɔci ɔɔn moong mɔŋnɔn iñɔ wyetkɛn ḍɔɔlɛ doki aŋan. Ɔci ɔɔn coonnɔn iñɔ ɔci gɔŋnɔn i ɛkkɛn. ¹⁴ Ɔci mena ɛɛŋ gɛɛl bala nona cɔkki ma neeni, ɛkɛ yenti Lidya. Ɛkɛ bɛɛn te ban Tayataayra. Kanŋa ɛkɛyɛ, a wyɛlti bworŋin a buol bworŋin eci bilka coŋɔny. Ɛkɛ bala moṭi Jwaŋa Tolanti te baaṭi doki, ɔci ɛkɛ bala tyeŋi jyeka guagdɛ Buulucy. Ɔci Ciɛggɔn ɛkɛ pɔŋnɛ ñingɛti, ɔci jyeka guaŋŋɛ Buuluc neeniyɛ, muŋŋɛ ɛkɛ yomɛti. ¹⁵ Ɔci ne ɛkɛ buullɔn ɔɔn i ma ɛkkɛnyɛ, ɛkɛ gɔkkin ɔɔnti agi, “Kan ŋeejɛ ɛkkɛ ‘ya a men Yaccu awarɛyɛ, dala ɛkkɛ bɛɛdɛ coottɛ on ‘ya.” Ɔci ɛkɛ gɔ moki gɔkki ɔɔnti ɔɔn ne ɔɔn attɔn i ɛkɛ ban ɛkkɛn ɔɔn. ¹⁶ Oŋ gɛɛlti ne ɔɔn balgɔn ooddɔn nona cɔkki mayɛ, mena kɛɛngɔn a ṭɔɔl gɛɛl mɔŋnɔn ɔɔn yomɔ. Šɔla neeniyɛ, ɛkɛ muŋŋɛ jwaŋa yaayan, ɔci ɛkɛ bala mieti ma te waka bɛya ne baaṭiy, ɔci bilka gɔki ɛkɛ jiek neeniyɛ, bɛya kɛɛngɔn neeni weegɛnti oŋkanda a ḍiɛkan bɛɛ, kɔɔna kɔɔnno. ¹⁷ Ɔci ṭɔla neeni bala booti Buuluc ŋwayɛ, ɔci ɔɔn daŋkun. Ɛkɛ yaadan gɔki agi, “‘Uaya neeniyɛ, ɛkkɛn a kɛɛnk Jwaŋa Tolan ñaalɔy, ɔci ɛkkɛn bala mieti ɛkkɛ te jiek aŋka ɛkkɛ yɔɔdɛ Juaŋo.” ¹⁸ Ɔci ṭɔɔl bala noŋi a ɔɔn oŋkanda, ɔci ne nink gɛɛg bɛɛki borayɛ, Buuluc konɛ poli te naŋki ɛkɛ neeni. Ɔci Buuluc warɛ yallɛ, ɔci gɔkcin boŋa yaayan jwaŋa bala ṭɔɔl warɛti neeni agi, “‘Ya gɔkka iti te yenti Yaccu Kiṭɔ, dala i kooya bora men dalja!” Ɔci boŋa yaayan kooyin bora ne pɛñan te ṭɔɔlti. ¹⁹ Ɔci ne maka gɔṭi ṭɔla neeni gɔrki bilk bɛɛti ɛkkɛnti moki bɛɛyɛ, ɛkkɛn Buuluc ɔci Cila muogɛ, ɔci ɛkkɛn wuayɛ eyɛ nona dukkanji nona ḍuaŋan godan ḍuaŋan ma Ḍɔɔmti. ²⁰ Ɔci ma gɔkcin ḍuaŋanti agi, “‘Uaya neeniyɛ, ɛkkɛn a ma Icrayiil, ɔci ɛkkɛn bala noŋi ne yaayan ban ikinti. ²¹ Ɛkkɛn loṭi ma te jyek naŋka pookɛn. Ɔci jyeka neeniyɛ, yeyɔ ɔɔnti acaan ɔɔn agɔn ma Ḍɔɔm. Ma Ḍɔɔm yaakinti noŋdi ba jyeka guaktan ɛkkɛn neeni bɛɛ.” ²² Ɔci polla tolan neeniyɛ, ɛkkɛn da gɔki ne yaayan Buulucti ɔci Cilati daŋkun. Ɛkkɛn gɔki jyeka neeni a ɔɔn ḍuaŋanti. Ɔci te jyek ḍuaŋanyɛ, Buuluc ɔci Cila bworŋin ɛkkɛn guoddɛ ma bora, ɔci ɛkkɛn ḍwayɛ mako. ²³ Ɔci ne ɛkkɛn ḍuakiti ma ne pɛñanyɛ, ɛkkɛn yiɛpcɛ ma jiju ciginji, ɔci ma gɔkcin mena gɔṭi ciginti agi, “Dala i waŋu tiicca te ɛkkɛn ne pwadan.” ²⁴ Ɔci acaan ma gɔki ɛkɛti ne pɛñan ɔɔnyɛ, mena gɔṭi cigin neeni ɛkɛ Buuluc ɔci Cila eññɛ on kona jiju, ɔci ɛkkɛn tɛrkɛn wwannɛ jaanti, ɔci jana parɛ ḍuannɛ ñaalɔ ɛkkɛn tɛrkɛnti aŋka ɛkkɛn yaakinti jɔŋdi ñaalɔ bɛɛ. ²⁵ Ɔci ne ween jiñɛ tuodan Buuluc ɔci Cila bala cɔki Juaŋti, ɔci bala ‘ual ɔɔlg Jwaŋa Tolanti. Ɔci ne ɛkkɛn balki cɔkki ɔci ‘ualkiyɛ, maka pookɛn maka ciginji bala tyeŋi. ²⁶ Ɔci ne pɛñan ṭɛɛr ḍiejjin doki. Ɔci cigin warɛ ḍiedan, ɔci cigin tuggɛn waakɛnda waakɛn pɔɔggɛ, ɔci jiŋgin ḍɛɛki ma maka jijuyɛ, ɛkkɛn waakɛnda waakɛn lookkɛ te mati waakɛnda. ²⁷ Ɔci mena gɔṭi cigin ne ɛkɛ ṭieniyɛ, ɛkɛ cigin tuggɛn mɔŋnɛ yɔdi a lyɛpin, ɔci ɛkɛ byeŋgaaran oonɛ bora te kuorjɛji, ɔci ɛkɛ noŋi warɛ nogdɛ, acaan ɛkɛ poŋi gɔki agi maka balgɔ ciginji baagɔ attɔ ɔntɔ doki. ²⁸ Ɔci ne ɛkɛ yuarnɛ Buuluc noŋi nokki warɛyɛ, Buuluc yaajjin ne pɛñan agi, “Hay! Naa i waru naŋa amaam bɛɛ! Ɔɔn balgɔn wɛnni waakida men!” ²⁹ Ɔci mena gɔṭi cigin borcin mati, agi ɛkɛ eektiti ma maña dɛkci ma noono. Ɔci ɛkɛ yiŋi ɔci kuajin orɔ Buuluc i Cilati, ɔci ɛkɛ warɛ ḍiedan, ɔci ɛkɛ ḍwoñjin iñɔ ɛkkɛn ñomgɛnti. ³⁰ Ɔci ɛkkɛn lɔnnɛ ɛkɛ bora te ciginji, ɔci ne ɛkɛ Buuluc i Cila lɔnnɛ borayɛ, ɛkɛ tooccin ɛkkɛnti agi, “‘Ya noŋja a ɔki aŋka ‘ya yɔɔdati Jwaŋa Tolany?” ³¹ Ɔci ɛkkɛn gɔkcin ɛkɛti agi, “Dala i jyedda Ciɛggɔn ikin Yaccu Kiṭɔti, ɔci i yɔɔdi ɛkɛ i ma i.” ³² Ɔci ɛkkɛn ‘wana neeni myetkɛ jyek Juaŋo, ɔci ɛkkɛn ma mena neeni daŋkun myetkɛ ɛkkɛn moki. ³³ Ɔci te ween jiñɛ neeni, mena neeni Buuluc ɔci Cila luaŋŋɛ kɔɔgga ɛkkɛn ḍuakiti may. Ɔci mena gɔṭi cigin neeniyɛ, ɛkɛ i ma ɛkkɛnyɛ, ɛkkɛn buuli ma te weenji ɔɔn. ³⁴ Ɔci ɛkɛ Buuluc ɔci Cila eññɛ on ɛkɛ, ɔci ɛkkɛn ‘wonnɛ oomdin. Ɔci ɛkɛ yomɛ ñɔɔna ñɔɔno, ɔci maka ciyi on ɛkɛ ɛkkɛn yomgɛn ñɔɔna ñɔɔn daŋkun, acaan ɛkkɛn jyeti Jwaŋa Tolanti. ³⁵ Yeti ne noon bɔɔniyɛ, ḍuaŋan maka bɔlin gɛɛg cuuñɛ mena gɔṭi ciginti, ɔci ɛkkɛn ɛkɛ myetkɛ agi ḍuaŋan ma Ḍɔɔm gɔki agi, “Dala i maka ne yyɛɛwɔ neeni pɔkci ɔgdɔ ooddɔ.” ³⁶ Ɔci mena gɔṭi cigin neeniyɛ, Buuluc myennɛ agi, “Ḍuaŋan ma Ḍɔɔm gɔki agi dala ‘ya ɛkkɛ pɔkci katan. Acaan a ɔŋŋiyɛ, dala ɛkkɛ kaattɛ bora, ɔci ɔgdɛ ooddɛ, acaan jiek bawwin doki.” ³⁷ Yeti Buuluc kɛkcin gɔkcin bɔlinti agi, “Ɔɔn ḍuakɔn ɛkkɛn maka coŋin ñomgɛnti budan, ɛkkɛn ɔɔn noŋkɔn godan bɛɛ. Ɔɔn agɔn ma Ḍɔɔm daŋkun, yeti ɛkkɛn ɔɔn olkɔn jiju ciginji budan ɔɔn. Oŋ ɛkkɛn ɔɔn pɔktɔn lieda a ɔɔn? A’a, dala ḍuaŋan ma Ḍɔɔm neeni bɛya ɔɔn kootɔn bora ɛkkɛn woodgɛn.” ³⁸ Ɔci ḍuaŋan bɔlin ati, ɔci ḍuaŋan ma Ḍɔɔm myetkɛ jyek Buuluc. Ɔci ne ḍuaŋan neeni tieŋki jyek Buuluc agi ɛkkɛn aginti ma Ḍɔɔmyɛ, ɛkkɛn buayi. ³⁹ Ɔci ɛkkɛn bɛɛn Buuluc ɔci Cilati, ɔci bala gɔki ɛkkɛnti agi baatɔ te naŋka naŋi ɛkkɛn Buulucntiy, ɔci ɛkkɛn kooyi ḍuaŋan ma Ḍɔɔm bora te ciginji, ɔci ɛkkɛn gɔki agi dala ɛkki ɔgdɔ ooddɔ kaattɔ bora te bana neeniti. ⁴⁰ Ɔci ne Buuluc i Cila pɔkkiti ma te ciginjiyɛ, ɛkkɛn ati on Lidya. Ɔci ne ɛkkɛn modg ɛkkɛn Ma Kiṭɔ yuarkitiyɛ, ɛkkɛn bala ṭeyi ɛkkɛn. Oŋ ɛkkɛn oŋ atki bana parɛ oŋo.

¹ Ɔci Buuluc i Cila ati booti ban Ampiipolic konɛti, ɔci ban Apolɔɔnya konɛti, ɔci ɛkkɛn dɛñjin ban Tacalunika. Ɔci bana neenitiyɛ, ona morki ma Juaŋ bala. ² Ɔci te Oŋ Cabityɛ, Buuluc ati kaaccin orɔ ona morki ma Juaŋ ba naŋki ɛkɛ oŋkanda ɔɔn. Ɛkɛ kaaccin ona morki ma Juaŋ Oŋ Cabit jitkɛ ne ḍoogɔ. Ɔci ɛkɛ bala gɔṭi jiek i maka bana neeniti. Ɛkkɛn bala gɔwwɔ te jyek Juaŋ jyeka kiigin. ³ Ɛkɛ ma lwoŋŋɛ te jyeka kiigin ne pwadan aŋka ŋeettan ɛkkɛn jiek bala worgaji doki agi ne Kiṭɔ bɛɛddayɛ, ɛkta wardan eeddɔ, ɔci ɛkta moki jɔldɔ ñaalɔ te koolji tɛɛti moki. Ɔci Buuluc gɔki agi, “Yaccu mena ɛkkɛ nɔɔttin ‘ya te ɛkɛ neeniyɛ, ɛkɛ a Kiṭɔ mena cuonnɛ Juaŋ awarɛy.” ⁴ Ɔci maka neeni gɛɛgyɛ, jyeti jyeka neeni. Ɔci ɛkkɛn bala booti Buuluc ɔci Cila. Ɔci ma Giriik gɛɛg maka yomgɛn bala Jwaŋa Tolantiyɛ, ɛkkɛn jyeti Juaŋti daŋkun. Ɔci moong gɛɛg moonga a wyetk moonga wɛɛyi makɛnyɛ, ɛkkɛn jyeti a ḍiɛkan bɛɛ. ⁵ Ɔci ma Icrayiil korkɛn modɔ Buuluc ɔci Cilati. Ɔci ɛkkɛn maka yeyin maka booti dukkan jitin budan kanŋan bɛɛ neeni ḍɔɔlɛyɔ, ɔci ɛkkɛn ciŋiji. Ɔci maka baanji waakɛnda daŋkun bɛɛn nona maka neeniti. Ɔci maka yeyin ciŋiji ɛkkɛn waakɛnda daŋkun, ɔci ma bana neeniti ḍuobbin lyɛl a lyɛli waakɛnda. Ɔci ɛkkɛn ati ɔci yɔɔtcin on men gɛɛl bala yenti Jɛcan tukɛti, acaan ɛkkɛn buagɔn Buuluc ɔci Cila muktan aŋka eetan nona ma godanti. ⁶ Ɔci ne ɛkkɛn Buuluc ɔci Cila yuarkiti bɛɛyɛ, ɛkkɛn Jɛcan aŋka mugɛ, ɔci wuayɛ eyɛ i Ma Kiṭɔ gɛɛg nona ḍuaŋanti. Ɔci ne ɛkkɛn balki atki wɔɔcki ma a ɔɔnyɛ, ɛkkɛn yaadan ɔci gɔki agi, “Maka noŋi amaam baan wardayɛ, ɛkkɛn bɛɛn ban ikinti, ⁷ ɔci ɛkkɛn eññɛ Jɛcan on ɛkɛ doki. Ɛkkɛn waakɛnda neeniyɛ, noŋi ba jyek ḍuaŋa tolan ikin ma Ḍɔɔm bɛɛ, acaan ɛkkɛn gɔki agi ḍuaŋa tolan pardan gɛɛl baalɔ, agi gena Yaccu.” ⁸ Ɔci te jyek ɛkkɛn neeniyɛ, maka coŋin neeni looñi, ɔci ne ḍuaŋan tieŋkiyɛ, ɛkkɛn looñi daŋkun. ⁹ Ɔci ḍuaŋan eci bilk te Jɛcanti ɔci te Ma Kiṭɔti, ɔci ɛkkɛn oŋ pɔkkiti ma oŋo. ¹⁰ Buuluc ɔci Cila kwaccin ban Tacalunika bɛɛ. Ɔci te ween jiñɛ ɛkkɛn cuuñɛ modgɛn ne pɛñan bana parɛti bana yenti Bɛriiya. Ɔci ne ɛkkɛn dɛñki ban Bɛriiyayɛ, ɛkkɛn kaaccin ona morki ma Juaŋy. ¹¹ Ɔci ma Icrayiil maka bana neenitiyɛ, yomg ɛkkɛn bala ba ma Icrayiil maka ban Tacalunika bɛɛ. Ma Icrayiil ban Bɛriiya yookɔn te jyeka neeni bɛɛ. Ma Icrayiil ban Bɛriiya buagɔn jyeka neeni ne pɛñan, ɔci ɛkkɛn bala poki gɔṭi lieṭi worga Juaŋ jitkɛ oŋkanda, acaan ɛkkɛn buagɔn gɔrti kan jyeka guagdɛ Buuluc neeni a jyeka awarɛ kaapun. ¹² Ɔci ma Icrayiil maka bana neeniti jyeti a ḍiɛkan bɛɛ. Ɔci ma Giriik, maka ḍwaŋin maka moong ɔci maka ‘uayi ɛkkɛn jyeti a ḍiɛkan bɛɛ, kɔɔna kɔɔnno. ¹³ Yeti ne ma Icrayiil maka ban Tacalunika tieŋki agi ma Bɛriiya myenda Buuluc te jyek Juaŋyɛ, ɛkkɛn bɛɛn ban Bɛriiya ɔci maka bana neeniti ciŋɛji aŋka dala ɛkkɛn yomgɛn yiegdi Buulucti. ¹⁴ Ɔci ne pɛñan Ma Kiṭɔ Buuluc cuuñɛ galŋ ḍwaŋɛti. Yeti Cila ɔci Timutawucyɛ, ɛkkɛn yeddin te ban Bɛriiya. ¹⁵ Ɔci maka ati i Buulucyɛ, ɛkkɛn Buuluc eyɛ ne nona loonan ban Atɛnic. Ɔci maka eci Buuluc neeniyɛ, ne ɛkkɛn Buuluc dɛñkiti ban Atɛnicyɛ, Buuluc ɛɛnjin ɛkkɛnti agi, “Ne ɛkkɛ ooddiyɛ, dala Cila ɔci Timutawuc myettɛ dala ɛkkɛn bɛya nona ‘yati ne pɛñan.” Ɔci ɛkkɛn atti. ¹⁶ Ɔci ne Buuluc baali kɛɛy Cila i Timutawuc ban Atɛnicyɛ, ɛkɛ yomɛ wiak a jiñɛ bɛɛ. Ɛkɛ yomɛ wiak te naŋki maka ciyi ban Atɛnic, acaan ɛkkɛn waakɛnda baan wardayɛ, bala moṭi jɔkin yeyinti waka pɔɔtan ma a pɔɔto. ¹⁷ Ɔci ne Buuluc baali kɛɛy Cila ɔci Timutawucyɛ, ɛkɛ bala ooddi oŋkanda kaatti ona morki ma Juaŋy. Ɛkɛ bala gɔṭi jiek i ma Icrayiil neeni ɔci maka Keedin Pookɛn maka jyeti jyek Jwaŋa Tolan oŋkanda, ɔci ɛkɛ bala gɔki jyek Juaŋ mati bora nona wɔɔgan daŋkun, gena maka mɔŋdɛ ɛkɛ nonka wannatiy. ¹⁸ Ɔci maka loṭi ma gɛɛg bala bartan ma agi ma Ɛpikyuurac, ɔci gɛɛg bartan agi ma Ictɔɔykin ɛkkɛn bɛɛn ɔci bala tyewɔ i Buuluc. Ɔci maka neeni gɛɛg gɔki Buuluc agi, “Mena ani jiek neeni, jyek ɛkɛ a jyek waaka yeti?” Ɔci maka pookɛn gɛɛg gɔki agi, “Hay, ɛkɛ bala ba nɔɔti ma te jyek jɔkin pookɛn jɔkin kwoyɔn ikin gɛɛg no!” Ɛkkɛn gɔki a ɔɔn acaan Buuluc bala mieti ma te jyeka wonkɛn jyeka pwadin. Gena jyek Yaccu, ɔci jyek oŋŋa Yaccu jɔŋni te koolji tɛɛti mokiy. ¹⁹ Ɔci Buuluc eyɛ ma nona Maka Gɔṭi Jiek nona bartan ma a Ɛriyɔɔpagoc. Ɔci ɛkkɛn gɔkcin ɛkɛti agi, “Ɔɔn buagɔn i ɔɔn nɔɔttɔn jyek i jyeka wonkɛn neeni. ²⁰ Acaan jyeka guaga i neeniyɛ, da pookɛn. Dala i ɔɔn lwogdɔn te jyeka neeni.” ²¹ Ɛkkɛn gɔki a ɔɔn acaan maka ban Atɛnic ɔci maka bɛɛn te bonka pookɛnti bɛɛn bowwin ban Atɛnicyɛ, ɛkkɛn waakɛnda i maka neeniyɛ, kan ɛkkɛn tieŋdi gena woonɛ gɛɛlyɛ, ɛkkɛn buagɔn doki tieŋdi jyeka wonkɛn neeni ne pɛñan. Ɔci ɛkkɛn buagɔn jyey a jiɛn oŋkanda te jyeka wonkɛn woodi bɛɛ. ²² Ɔci Buuluc jɔllin ñaalɔ, ɔci yɔɔtcin Maka Gɔṭi Jiek ñomgɛnti nona bartan ma agi Ɛriyɔɔpagoc neeni, ɔci gɔkcin ɛkkɛnti agi, “‘Uay maka ban Atɛnic, ɛkkɛ agi maka moṭi jɔkinti hay! ²³ Ne ‘ya baala ata bootayɛ, gena moṭɛ ɛkkɛ gɛɛl yuarŋ ‘ya, ɔci jyeka kiiwɛ ma ɛkɛ warɛtiyɛ, gɔki agi, ‘Gena neeniyɛ, a gena moṭin ikin Jwaŋa kwoyin ikiny.’ Jwaŋa maldɛ ɛkkɛ Jwaŋa Kwoyɛ ɛkkɛ neeniyɛ, gena ɛkɛ jiekɛ nɔɔttin ‘ya ɛkkɛ neeni. ²⁴ “Jwaŋa cɔti noon warda, ɔci Jwaŋa cɔti waka bala noon warda neeniyɛ, ɛkɛ a Ciɛggɔn Tolan ñaalɔ pɔliji ɔci iñɔ ṭɛɛrji moki. Ɔci acaan a ɔŋŋiyɛ, ɛkɛ ciyi te oorga cɔttan ma te byeŋkɛn ba jɔkin ɛkkɛ neeni bɛɛ. ²⁵ Ɔci menga yaakinti ɛkɛ magdɛ te genga ba ma ne mokki maka bɔwan ɔɔn bɛɛ. Gena ɛkɛ aŋka ma ‘wondɛ tɛɛtin ɔci booŋ ɔci waak waakɛnday. ²⁶ Gena yɔra ne cyɛɛlɔ naŋŋɛ Juaŋ aŋka kɛɛn warda bɛɛni neeni. Juaŋ noŋi a ɔɔn acaan ɛkɛ buagɔn ṭɛɛr konɛ warda kuma te ma baano. Ɔci ɛkkɛn waakɛndayɛ, magga da te oŋŋa ɛkkɛn jietkiti may, ɔci magga da te oŋŋa ɛkkɛn jietkiti ma bala ba jyeka guaŋŋɛ Juaŋy. Ɔci ɛkɛ kɛɛn kɛɛmmɛ jitin magga da te noonɛn, ɔci magga da te noonɛn. ²⁷ Jwaŋa Tolan ma naŋŋɛ a ɔɔn acaan ɛkɛ poŋi gɔki agi, ‘A ɔŋŋiyɛ, ma lierti ‘ya, ɔci ‘ya yuarta ɛkkɛn kaapun.’ Yeti Jwaŋa Tolan loon lon te ikinti bɛɛ. ²⁸ Bala ba men gɛɛl gɔki agi, ‘Acaan ɛkɛ bala ikintiyɛ, ikin tɛɛtin te ɛkɛ ɔci ikin atin te ɛkɛ, ɔci acaan a ɔŋŋiyɛ, aŋka ikin balkin ciyin acca neeniy.’ Ɔci a ɔɔnyɛ, bala ba jyeka kiiwɛ ma ɛkkɛ agi, ‘Ikin ma baanyɛ, ikin akcin kɛɛgin Jwaŋa Tolan.’ ” ²⁹ Ɔci Buuluc gɔki agi, “Kan ikin akin kɛɛgin Jwaŋa Tolan a ɔɔnyɛ, naa ikin poŋin gɔkin agi Juaŋ a dahab, walla a pɔdda, walla a poom bɛɛ. Ɔci moki naa ikin poŋin gɔkin agi Juaŋ bala ba gena pɔɔtan ma a pɔɔt te paŋi ɛkkɛn budan bɛɛ. ³⁰ Te ñamu ne ma balki cieki noŋki amaam te kwoñña ɛkkɛn Juaŋ kuokitiyɛ, Juaŋ jiek olnɛ ɛkkɛn wyetkɛnti bɛɛ. Yeti accayɛ, ɛkɛ gɔki agi dala ma baan waakcinda waakcin yaldɛ te nɔjjo. ³¹ Acaan Jwaŋa Tolan oŋa ɛkɛ wɛɛn warda noŋdɛ godan a tyɛlga te yenti mena muonɛ ɛkɛ bora neeniyɛ, naŋŋɛ ɛkɛ doki. Juaŋ naŋka neeni lɛɛlnɛ bora mati waakɛnda te luollin ɛkɛ Yaccu Kiṭɔ Mena Muonɛ ɛkɛ bora neeni luolnɛ ñaalɔ te lientiy.” ³² Ɔci ne ɛkkɛn tieŋki jyek jɔŋŋin ñaalɔ te kooljiyɛ, ma gɛɛg wooki ɛkɛ, ɔci maka pookɛn gɛɛg gɔki Buulucti agi, “Ɔɔn buagɔn tieŋdɔn jyeka neeni moki.” ³³ Ɔci Buuluc kooyin bora te nona mati neeni, ɔci atti. ³⁴ Yeti maka ‘uay gɛɛg bootcin ɛkɛti, ɔci ɛkkɛn jyetti. Men gɛɛl ne cyɛɛlɔ yenti Dayoniicyac. Dayoniicyac neeniyɛ, ɛkɛ a ḍuaŋa nona bartan ma a Ɛriyɔɔpagoc. Ɔci mena ɛɛŋ gɛɛl jyeti daŋkun. Ɛkɛ yenti Damaric. Ɔci maka pookɛn gɛɛg jyeti daŋkun.

¹ Ɔci ne naŋka neeni baaniyɛ, Buuluc jɔŋŋin te ban Atɛnic, ɔci ɛkɛ ati ban Kuruntuc. ² Ɔci ne ɛkɛ atti bana neenitiyɛ, ɛkɛ men ma Icrayiil gɛɛl mɔŋnɛ bana neeniti. Ɛkɛ yenti Akwilla. Ɛkɛ a men maka ban Bunti. Ɛkkɛn wonkɛn bɛɛki i ɛŋ ɛkɛ Pricilla te ban Itali, acaan Klɔdyac ḍuaŋa tolan ma Ḍɔɔm ma Icrayiil ŋualnɛ ɔntɔ te ban Ḍɔɔm. Ɔci Buuluc ati ḍieŋjin ban ɛkkɛn. ³ Ɔci ɛkɛ bala ciyi iki ɛkkɛn ɔci bala kanŋan iki ɛkkɛn te byeŋkɛn, acaan kanŋa ɛkkɛn a kanŋa ne cyɛɛlɔ, gena ɛkkɛn a maka ṭwoṭi oorga a bworŋiny. ⁴ Ɔci oŋkanda te Oŋ Cabityɛ, Buuluc kaatti orɔ ona morki ma Juaŋ ɔci ɛkɛ bala gɔwwɔ iki ma te jyek Juaŋo. Ɛkɛ bala gɔki ɛkkɛnti ne pwadan agi dala ɛkki jyeka neeni mugdɛ. Maka neeniyɛ, gena ma Icrayiil ɔci ma Giriik. ⁵ Ɔci ne Cila ɔci Timutawuc bɛɛki te ban Macɛdɔɔnyayɛ, ɛkkɛn ati nona Buulucti, ɔci ɛkkɛn Buuluc mɔkci loṭi ma a jiñɛ bɛɛ. Ɛkɛ bala lwoki ma Icrayiil ne pwadan agi Yaccu neeniyɛ, ɛkɛ a Kiṭɔ Mena Muonɛ Juaŋ Boray. ⁶ Ɔci ne ma yookiti te jyek ɛkɛ ɔci ne ɛkkɛn ḍorki ɛkɛ ne yaayanyɛ, ɛkɛ bworŋin ɛkɛ ṭyɛŋŋɛ ñin ɛkkɛnti, ɔci ɛkɛ gɔkcin ɛkkɛnti agi, “Kan jiek bɛya ɛkkɛ wyetkɔtiyɛ, aŋi jyek ɛkkɛ pookɔ doki. A jyek ‘ya moki bɛɛ. Acca ‘ya ootta Keedin Pookɛnti.” ⁷ Ɔci Buuluc bakcin bora ona parɛti. Gena on mena yenti Tituc Jactac. Ɛkɛ a mena moṭi Jwaŋa Tolanti. Ɔci on Tituc bala ona morki ma Juaŋ taaŋɛti ne cwakanti. ⁸ Ɔci mena parɛ daŋkun bala yenti Kricpac, ɔci Kricpac neeni ɛkɛ a ḍuaŋa ona morki ma Juaŋ, ɔci ɛkɛ jyeti Ciɛggɔn Yaccu Kiṭɔti. Ɔci maka cieki iki ɛkɛ daŋkun jyeti waakɛnda. Ɔci maka ban Kuruntucyɛ, ɛkkɛn tieŋŋin ɔci jyeti daŋkun. Ɛkkɛn a ḍiɛkan bɛɛ, kɔɔna kɔɔnno. Ɔci ɛkkɛn buuli ma. ⁹ Ɔci oŋ gɛɛlti te ween jiñɛyɛ, Jwaŋa Tolan gɔkcin Buulucti te liɛlti agi, “Naa i buay bɛɛ. Dala i ma myetka oŋkanda ɔɔn. Naa i jiek dalja bɛɛ, ¹⁰ acaan ikin balkin iki ‘ya a cyɛɛlɔ. Ɔci i mugdi men gɛɛl noŋdi ne yaayan iti bɛɛ. Ma ‘ya bana neenitiyɛ, ɛkkɛn kɔɔna kɔɔnno.” ¹¹ Ɔci Buuluc cien bana neeniti bala ba ywoni ne cyɛɛlɔ ɔci ponk ne dɔɔyɔ wilin ne cyɛɛlɔ, ɔci ɛkɛ bala mieti maka neeni te jyek Jwaŋa Tolan. ¹² Ɔci te yuonga Galiyɔ agɛ ḍuaŋa ṭɔɔlɛ maka ban Akeeyayɛ, ma Icrayiil jiek naŋɛ te tuka ne cyɛɛlɔ, ɔci ɛkkɛn Buuluc mugɛ ɔci eyɛ nona noŋki ma godan. ¹³ Ɔci ɛkkɛn gɔkcin Galiyɔti agi, “Mena neeniyɛ, ɛkɛ bala loṭi ma agi dala ma moṭi Juaŋti ba pɔya parɛ pɔya yaayan ganuuntiy.” ¹⁴ Ɔci ne Buuluc noŋi tukɛ pɔktɛ gɔktiyɛ, Galiyɔ gɔkcin ma Icrayiilti agi, “Hay ɛkkɛ ma Icrayiil, kan jyeka neeni a jyek naŋka naŋŋɛ ‘wana neeni yeyin gɛɛgyɛ, ‘ya gɔrca. ¹⁵ Yeti kan jyeka neeni a jyek naŋki ɛkkɛ, ɔci jyek yeng, ɔci jyek ganuun ɛkkɛ pookɔyɛ, dala ɛkkɛ gɔrtɛ jiek pookɔ. ‘Ya buaga gɔrca jyeka neeni bɛɛ.” ¹⁶ Ɔci ɛkɛ ɛkkɛn ŋualnɛ ɔntɔ te nona noŋki ma godan. ¹⁷ Ɔci mena parɛ gɛɛl bala moki ɛkɛ yenti Cɔctanic, ɔci Cɔctanicyɛ, ɛkɛ a ḍuaŋa ona morki ma Juaŋy. Ɔci maka neeni waakɛnda Cɔctanic mugɛyɔ te nona godan wɛnan ɔci ɛkɛ jiebɛ. Yeti Galiyɔ gɔrcin nona jiebki ɛkkɛn mena neeni bɛɛ. ¹⁸ Ɔci ne Buuluc ɛɛni coodi ban Kuruntucyɛ, ɛkɛ ñiebjin i modgɛn, acaan ɛkɛ buagɔn woon ooddi ban Cuurya. Ɔci ɛkkɛn ati i Pricilla i Akwilla aŋka taabti murkati ooddi ban Cuurya. Ɔci wona men ɛkkɛn jɔŋti bɛɛyɛ, Buuluc jyeyi ɛkɛ tuomnɛ bora ba naŋki ma Icrayiil, acaan ɛkɛ ḍɛki jwali gɛɛl Juaŋ ñamɛti ɔci jyeyi ɛkɛ bala niin budan te twomto. ¹⁹ Ɔci ɛkkɛn taapcin murkati ɔci ati ban Ɛpacac. Ɔci ne ɛkkɛn balki ban Ɛpacacyɛ, Buuluc kaaccin ona morki ma Juaŋy, ɔci ɛkɛ bala gɔṭi jiek wɛnan i ma Icrayiil. ²⁰ Ɔci ma Icrayiil bala poṭi ɛkɛ warɛ, acaan ɛkkɛn buagɔn naa ɛkɛ ooddi men bɛɛ. Yeti Buuluc yookɔn. ²¹ Ɔci ɛkɛ ñiebjin iki ɛkkɛn, ɔci gɔkcin ɛkkɛnti agi, “Kan Jwaŋa Tolan buagɔn ‘ya dɔɔkka nona neeniti mokiyɛ, ‘ya dɔɔkka dɔki.” Ɔci ɛkɛ taapcin murka tolanti, ɔci ati te ban Ɛpacac. Ɔci ɛkɛ Pricilla i Akwilla dolnɛyɔ te aŋan. ²² Ɔci ne ɛkɛ dɛnni ban Cɛcariiyayɛ, ɛkɛ kooyin bora te murka tolanji, ɔci ati ban Urcaliim ɔci ñiebjin i ma kaniica aŋan. Ɔci ɛkɛ oŋ ati ban Antyak oŋo. ²³ Ɔci ne ɛkɛ ɛɛni coodi aŋanyɛ, ɛkɛ jɔŋŋin te aŋan, ɔci ɛkɛ ati booti ban Galatiya ɔci ban Prijya konɛti, bala ṭeyi Ma Kiṭɔ waakɛnda aŋan. ²⁴ Men ma Icrayiil gɛɛl bala yenti Apɔɔlɔc, ɔci ɛkɛ a men maka ban Alɛkcaandriya. Ɛkɛ bɛɛn ban Ɛpacac. Ɛkɛ yaakinti gɔki jiek mati ne pwadan, ɔci ɛkɛ worga Juaŋ ŋeejɛ ne pwadan. ²⁵ Ɛkɛ lalɛ ma te ñamu te pɔy Ciɛggɔn ɔci a ɔŋŋiyɛ, ɛkɛ warɛ byerŋa byerŋ te lali ma te jyek Yaccu. Ɛkɛ bala loṭi ma te jiek jitkɛn neeni ne pwadan. Yeti jyek bultiyɛ, ŋeejɛ ɛkɛ waakɛnda bɛɛ, yeti ɛkɛ jyek bulti Yɔhanna aŋka ŋeejɛ ɛkɛ parɛ. ²⁶ Ɔci ɛkɛ kaaccin orɔ ona morki ma Juaŋ, ɔci bala loṭi ma te yoma tɛyan. Ɛkɛ buayi menga bɛɛ. Yeti ne Pricilla ɔci Akwilla tieŋki jyeka loṭi ɛkɛ neeniyɛ, ɛkkɛn Apɔɔlɔc eyɛ ban ɛkkɛn, ɔci ɛkkɛn ɛkɛ lwogɛ ne pwadan te pɔy Juaŋ waanɛ waakɛnda. ²⁷ Ɔci ne ɛkɛ buaŋŋi woon ooddi galŋ kwoña parɛti ban Akeeyatiyɛ, ɛkɛ kiegi modg ɛkkɛn Ma Kiṭɔ worga aŋka eedɛ ɛkɛ eektɛ ma aŋan. Worga gɔki agi dala ɛkki Apɔɔlɔc ñiibdɛ ne pwadan. Ɔci ne ɛkɛ dɛnni aŋanyɛ, ɛkɛ Ma Kiṭɔ maŋŋɛ ne pwadan. Juaŋ yomɛ pwad pwad maka neeniti aŋka ɛkkɛn jyetki ɛkɛti wanna. ²⁸ Apɔɔlɔc ma maŋŋɛ ne pwadan te jyek Juaŋo. Ɛkɛ bala tyewɔ i ma Icrayiil ma ñomgɛnti, ɔci ɛkɛ ma lwoŋŋɛ nɔɔnnɛ te worga Juaŋ ne pwadan agi Yaccu neeniyɛ, ɛkɛ a Kiṭɔ Mena Muonɛ Juaŋ Boray. Ɛkɛ ma Icrayiil buannɛ a ɔɔn ne ɛkɛ baali lwoki ma te worga Juaŋy.

¹ Ɔci ne Apɔɔlɔc baali ciyi ban Kuruntuc menyɛ, Buuluc bala booti bonka pookɛnti daŋkun. Ɔci ɛkɛ ati ne dɛnni ban Ɛpacacti ɔɔn, ɔci ban Ɛpacacyɛ, Buuluc Ma Kiṭɔ gɛɛg mɔŋnɛ aŋan. ² Ɔci ɛkɛ tooccin ɛkkɛnti agi, “Ne ɛkkɛ jyettɛ Yaccuti Boŋ Jwaŋa Tolan bɛɛn ɛkkɛti boki?” Ɔci ɛkkɛn ṭwokcin ɛkɛti agi, “A’a. Ɔɔn tieŋnɔn a ɔɔn te jyek Boŋ Jwaŋa Tolan bɛɛ.” ³ Ɔci ɛkɛ tooccin ɛkkɛnti moki agi, “Oŋ kan ɛkkɛ jyek Boŋ Jwaŋa Tolan kwoyɛy, oŋ ɛkkɛ buulkɛ ma a ɔki?” Ɔci ɛkkɛn ṭwokcin ɛkɛti agi, “Ɔɔn buulkɔn ma te bulti Yɔhanna.” ⁴ Ɔci Buuluc gɔkcin ɛkkɛnti agi, “Yɔhanna baalɔ buoṭi ma a ɔɔn aŋka ŋeettan ma maka neeni waakɛn yali te nɔji ɛkkɛn doki. Ɔci ne Yɔhanna baali buoṭi mayɛ, ɛkɛ bala mieti ma agi dala ma jyeddɔ mena baalɔ bɛɛdɔ ɛkɛ ŋoyɛti. Mena guaŋŋɛ Yɔhanna neeniyɛ, gena Yaccu.” ⁵ Ɔci ne ma tieŋki jyek Buuluc neeniyɛ, ɛkkɛn buuli ma te yenti Yaccu mena Ciɛggɔn. ⁶ Ɔci ne Buuluc byeŋkɛ tannɛ ɛkkɛntiyɛ, Boŋ Juaŋ bɛɛn ɛkkɛnti ɔci ɛkkɛn bala gɔki te tugi maka pookɛn mieti te jyek Juaŋo. ⁷ Ɔci maka Boŋ Juaŋ bɛɛn ɛkkɛnti neeniyɛ, dita a inyaakkɛn wyetkɛn ne yyɛɛwɔ. ⁸ Ɔci Buuluc bala ooddi ona morki ma Juaŋ oŋkanda ba ponk ne ḍoogɔ. Ɔci ɛkɛ bala gɔki ne tɛyan ɛkkɛnti ɔci tyewɔ ɔci ‘yeṭi ɛkkɛn te jyek cyɛgji Jwaŋa Tolan. ⁹ Ɔci ma gɛɛgyɛ, wyetkɛn tɛɛna tɛɛno. Ɛkkɛn yookɔn te jyenno, ɔci ɛkkɛn wooki Pɔy Yaccu te ma ñomgɛnti ɔɔn. Ɔci ne Buuluc gɔrni naŋka neeniyɛ, ɛkɛ maka neeni dalnɛ. Ɔci Ma Kiṭɔ maka tieŋŋin jyek ɛkɛyɛ, aŋka eññɛ, ɔci oŋkanda ɛkkɛn ooddi ḍwoṭi wyetkɛn gɔṭi jiek ona parɛ on worga. Ona neeni ma boṭi agi, “On Tiraanoc”. ¹⁰ Ɔci ɛkkɛn bala gɔwwɔ a ɔɔn aŋan ban Ecya ba yuong ne yyɛɛwɔ. Ɔci te naŋka neeniyɛ, maka bala ciyi ban Ecya tieŋŋin jyek Ciɛggɔn. Ɛkkɛn tieŋŋin waakɛnda. Gena Keedin Pookɛn i ma Icrayiil. ¹¹ Ɔci Buuluc bala noŋi naŋka tɛyan naŋka ñyecki ma Jwaŋa Tolan oŋkanda. Gena Jwaŋa Tolan bala noŋi naŋka neeniy. ¹² Bworŋin ḍyɛrin ɔci bworŋin kanŋa bworŋin ‘yɛŋdɛ Buulucyɛ, ɛkkɛn eyɛ ma nona maka waakɛn yeyinti. Ɔci ne ma topki bworŋin neenitiyɛ, ɛkkɛn waakɛn pwadgin doki. Ɔci maka muogɛ jɔkin yeyin ne ɛkkɛn topki bworŋin neeniti daŋkunyɛ, ɛkkɛn pɔkki jɔkin yeyin daŋkun. ¹³ Ma Icrayiil gɛɛg bala a ṭyeṭo. Ɔci ɛkkɛn bala ati ḍɔki a ḍwaŋi baan konɛti kooci jɔkin yeyin bora te mati. Ɔci ɛkkɛn poccin gɔkcin maka muogɛ jɔkin yeyinti te yenti Yaccu agi, “‘Ya gɔkka ɛkkɛti te yenti Yaccu mena loṭi Buuluc may, dala ɛkkɛ koodɛ bora te ma waakɛnti.” ¹⁴ Maka noŋi kanŋa neeniyɛ, gena kɛɛgin gaciic tolan ma Icrayiil gɛɛl gaciic yenti Cibay. Kɛɛgin ɛkɛ bala ne dɔɔyɔ wyetkɛn ne yyɛɛwɔ. Ɔci kɛɛgin neeni ɛkkɛn bala noŋi kanŋa ṭyeji daŋkun a ɔɔn. ¹⁵ Ɔci oŋ gɛɛltiyɛ, ne ɛkkɛn balki noŋki a ɔɔnyɛ, jwaŋa yaayan ṭwokcin ɛkkɛnti gɔkcin agi, “Yaccuyɛ, ŋeej ‘ya, ɔci Buulucyɛ, ŋeej ‘ya moki. Yeti ɛkkɛ neeni agɛ makɛ daŋkun?” ¹⁶ Ɔci mena muŋŋɛ jwaŋa yaayan neeniyɛ, kuajin mati, ɔci bala jieb mako. Ɔci maka ne dɔɔyɔ wyetkɛn ne yyɛɛwɔ muoŋŋɛyɔ, ɔci ɛkkɛn buannɛ ɛkɛ ne pɛñan. Ɔci ma kuan yiŋi bora waakɛn budan bworŋin baawo. Ɔci ɛkkɛn yannɛ meno. ¹⁷ Ɔci jyeka neeni ati ban Ɛpacac konɛ warda ne pɛñan. Ɔci Keedin Pookɛn ɔci ma Icrayiil ɛkkɛn tieŋŋin waakɛnda, ɔci ɛkkɛn korkɛn buañi waakɛnda te naŋka neeni. Ɔci ma bala gɔki agi yenti Ciɛggɔn Yaccu neeniyɛ, tolɔ. ¹⁸ Ɔci maka jyeti dokiyɛ, ɛkkɛn bɛɛn kɔɔna kɔɔnno, ɔci bala lɛɛṭi naŋki ɛkkɛn naŋka yeyin bora. ¹⁹ Ɔci maka bala noŋi kanŋa ṭyer ne wona ɛkkɛn jyetkɛ Yaccuti bɛɛyɛ, ɛkkɛn eccin worgan ɛkkɛn worgan noŋki ɛkkɛn kanŋan ṭyeṭo, ɔci ɛkkɛn worgan neeni yiɛpcɛ maccu ɔci ammɛ maaño. Ɔci ɛkkɛn bala noŋi naŋka neeni maka coŋin ñomgɛnti. Ɔci worgan yiɛpcɛ ma maccu neeniyɛ, bilkɛn a ḍiɛkan bɛɛ, bilkɛn kɔɔna kɔɔni bala ba ḍeyyan a pɔdda a alpn a ma baan ne yyɛɛwɔ mena parɛ byeŋkɛ (50,000). ²⁰ Ɔci jyek Ciɛggɔn ati ciɛñi baan konɛ warda. Ɔci jyeka pookɛn jyeka naŋtan ma baanjiyɛ, buanɛ jyek Ciɛggɔn neeni. ²¹ Ɔci ne naŋka neeni baaniyɛ, Buuluc buagɔn ooddi boddi ban Macɛdɔɔnya, ɔci ban Akeeya ne ban Urcaliimji ɔɔn. Ɔci Buuluc gɔki agi, “Ne ‘ya bonka neeni boddajiyɛ, ‘ya ootta ban Ḍɔɔm daŋkun.” ²² Ɔci Buuluc maka moki ɛkɛ oŋkanda gɛɛg cuuññɛ ñamu ne yyɛɛwɔ ban Macɛdɔɔnya. Gena Timutawuc ɔci Iraactac. Ɔci Buuluc, ɛkɛ yeddin te ban Ecya men. ²³ Ɔci te oŋŋa wannayɛ, ywobji bala acaan ma gɛɛg yookɔn te Pɔy Yaccu. ²⁴ Ɔci mena gɔɔñgɔn gɛɛl bala ɛkɛ yenti Dɛmiitriyac. Ɛkɛ gɔci bil pɔddan naŋdɛ bala ba on jwaŋ ɛkkɛn jwaŋa yenti Artɛmic neeni. Ɔci maka noŋi kanŋa Ḍɛmiitriyucyɛ, bilk bala ɛkkɛnti kɔɔna kɔɔn te kanŋa ɛkkɛn neeni. ²⁵ Ɔci Dɛmiitriyac borcin maka noŋi kanŋa ɛkɛti, ɔci borcin maka gɔɔñk maka pookɛnti maka noŋi kanŋa ba naŋki kanŋa ɛkkɛn neeniy. Ɔci ɛkɛ gɔkcin ɛkkɛnti agi, “Hay ‘uayo, ŋeejɛ ɛkkɛ bilka ciyin ikin ne pwadan neeniyɛ, bɛɛn te kanŋa ikin neeni. ²⁶ Ɛkkɛ tieŋnɛ jiek doki, ɔci naŋki Buuluc yuarŋɛ ɛkkɛ doki, ne ɛkɛ ma yalliyɔ te mali jɔkin ikintiy. Gena wɛnni ban Ɛpacac parɛ bɛɛ. Ban Ecya konɛ warda daŋkunyɛ, ɛkɛ ma yalliyɔ a ḍiɛkan bɛɛ. Acaan ɛkɛ gɔki agi jɔkin pɔɔdi ma te byeŋkɛn neeniyɛ, ɛkki agi jɔkin woodgɛn bɛɛ. Ɛkki agi waka budan. ²⁷ Jyeka tɛyan noŋi bɛya ikinti doki hay! Kan maka coŋin bootti Buulucti a ɔɔnyɛ, ɛkkɛn dita mwondi te kanŋa ikin, ɔci ɛkkɛn dita gɔɔdi agi kanŋa ikin yaayɔ. Ɔci dita ma moki gɔɔdi agi on Artɛmic jwaŋa tɛyan neeni yaayɔ. Ɔci dita Artɛmic mena maltan maka ban Ecya ɔci maltan maka baan warda neeniyɛ, ɛkɛ aga gena budan ne cwakanti dita!” ²⁸ Ɔci maka bala tyeŋi jyeka guagdi Dɛmiitriyac neeniyɛ, ɛkkɛn looñi ne pɛñan. Ɔci ɛkkɛn bala yaadan agi, “Artɛmic a mena tolan ban Ɛpacac! Artɛmic a mena tolan ban Ɛpacac!” ²⁹ Ɔci maka ban Ɛpacacyɛ, ɛkkɛn jiek ḍuobgɛ. Ɔci ɛkkɛn waakɛnda bala yooŋdi nona ḍworki ma wyetkɛn. Ɔci ma gɛɛg mɔkci pɔɔjɔ ɔci muogɛyɔ, ɔci ɛkkɛn eyɛ nona ḍworki ma wyetkɛn. Gena Gayac ɔci Ɛrictaarkoc. Ɛkkɛn a maka ban Macɛdɔɔnya. Ɛkkɛn a maka ati i Buuluc. ³⁰ Ɔci Buuluc buagɔn ooddi nona ḍworki ma wyetkɛn neeni, acaan ɛkɛ buagɔn gɔkti jwali gɛɛl polla tolan neeniti. Yeti maka a Ma Kiṭɔyɛ, ɛkkɛn dɛyi ɛkɛ. ³¹ Ɔci ḍuaŋan ma Ḍɔɔm gɛɛg ban Ecya neeniyɛ, ɛkkɛn ma gɛɛg yomgɛn pwanna pwani Buulucti. Ɔci ɛkkɛn men gɛɛl cuuñɛ nona Buulucti, ɔci gɔki ɛkɛti agi naa ɛkta ooddɔ kaattɔ bora nona ḍworci ma wyetkɛn neeni bɛɛ. ³² Ɔci maka bala nona ḍworki ma wyetkɛn neeniyɛ, ɛkkɛn bala yaadan a yook budan ɔɔn, woodi bɛɛ. Ɛkkɛn yaadan magga da te yookɛn, ɔci magga da te yookɛn. Yeti yooka yaatki ɛkkɛn a ɔɔn wannayɛ, ŋeecɔn ɛkkɛn waakɛnda bɛɛ. Çeecɔn magga ne ḍiɛkan. ³³ Ɔci ma Icrayiil mena ‘uan gɛɛl yenti Alɛkcaandar mwowwɛ ɛkkɛn bora, ɔci ɛkɛ yɔɔtci ɛkkɛn ma ñomgɛnti, ɔci ma gɛɛg poŋi gɔki agi gena jyeka bɛɛnji ma neeni. Ɔci Alɛkcaandar bieŋɛ laŋnɛ mati aŋka ma ciya lieda acaan ɛkɛ noŋi gɔkti maka neeniti. ³⁴ Ɔci ne ɛkkɛn Alɛkcaandar ñiikiti agi gena men ma Icrayiil neeniyɛ, ɛkkɛn yaadan ne pɛñan waakɛnda te lɛmma ne cyɛɛlɔ agi, “Artɛmic a mena tolan ban Ɛpacac! Artɛmic a mena tolan ban Ɛpacac!” Ɔci ɛkkɛn bala yaadan a ɔɔn ba oŋ woŋgɛ ne yyɛɛwɔ, woodi bɛɛ. ³⁵ Ɔci mena kiewi jyek akuuma gɛɛl gɔkcin polla tolan neeniti agi, “Dala ɛkkɛ ciedɛ lieda!” Ɔci ɛkkɛn cien lieda. Ɔci ɛkɛ gɔkcin ɛkkɛnti agi, “‘Uay ma Ɛpacac, hay! Çeecɔn ma waakɛnda maka ban Ɛpacac neeniyɛ, gena ikin a maka gɔṭi on Artɛmic jwaŋa tɛyan neeni. Ikin a maka gɔṭi poma maltan ma poma ḍɛmmin ikinti te pɔliji. ³⁶ Ɔci acaan men gɛɛl yaakinti noŋdi genga jwaŋ ikinti bɛɛyɛ, dala ɛkkɛ ciedɛ lieda. Naa ɛkkɛ noŋɛ amaam budan ɔɔn bɛɛ. ³⁷ Ɛkkɛ ‘uaya neeni oonɛ wɛnni budan. Ɛkkɛn noŋi gena yaayan gɛɛl jwaŋ ikinti bɛɛ. Ɔci ɛkkɛn ḍori jwaŋ ikin bɛɛ. ³⁸ Dɛmiitriyac, ɛkɛ iki maka noŋki iki ɛkɛ kanŋayɛ, kan ɛkkɛn balki jiek iki mengayɛ, dala ɛkkɛn ooddi jiek eetan ma akuumati. Cyekin godan bala, ɔci ɛkkɛn gɔrti jyeka neeni. ³⁹ Ɔci kan jyeka pookɛn gɛɛg bala ɛkkɛtiyɛ, jyeka neeni ywaŋtan ma oŋŋa cyekin wyetkɛn ḍɔɔltiti gɔrti jieky. ⁴⁰ Acaan kan ikin noŋtin amaam te yomg ikin pookɔ a ɔɔnyɛ, akuuma jiek dɔɔdɛ ikin wyetkɔti acaan ɛkɛ poŋdi gɔɔdi agi ikin wyetkɔ ḍɔɔlcin amaam, kaapun. Ɔci kan akuuma tootti ikinti te jyeka ikin wyetkɔ ḍɔɔllin neeniyɛ, ikin yaakinti gɔktin genga ɛkɛti boki?” ⁴¹ Ɔci ne ɛkɛ gɔkki jyeka neeni mati ne jiek baakiyɛ, ɛkɛ gɔkcin mati agi dala ma kaattɔ bora, ɔci ma cyɛnŋin jitin.

¹ Ɔci ne naŋka neeni baaniyɛ, Buuluc men gɛɛl cuuññɛ Ma Kiṭɔti, ɔci ɛkɛ gɔkcin ɛkkɛnti agi, “Dala ɛkkɛ ooddɛ nona Buulucti.” Ɔci ɛkkɛn bɛɛni. Ɔci Buuluc bala ṭeyi ɛkkɛn. Ɔci ne Buuluc ɛkkɛn ṭeenɛ ne ṭeen baaniyɛ, ɛkkɛn ñiebjin i Buuluc, ɔci Buuluc ati ban Macɛdɔɔnya. ² Ɔci ɛkɛ ati booti ban Macɛdɔɔnya konɛti, ɔci ɛkɛ bala ṭeyi ma aŋan te jiek jitkɛn ne coŋɔn. Ɔci ɛkɛ ati ne ban Griic ɔɔn. ³ Ɔci ɛkɛ bala ciyi ban Griic ba ponk ne ḍoogɔ. Ɔci ne ɛkɛ noŋi taapti murka tolanti ooddi ban Cuuryayɛ, ɛkɛ jiek aaŋŋɛyɔ dɔki, ɔci ɛkɛ dɔki dɔɔkkin ban Macɛdɔɔnya acaan ma Icrayiil jiek ḍaagɛ doki. Ɛkkɛn buagɔn Buuluc baptan muktan pɔɔjɔ nona ooddɛ ɛkɛ ban Cuurya waayi. ⁴ Maka ati i Buulucyɛ, gena Cɔpatɛr kaci Piroc men maka ban Bɛriiya, ɔci Ɛrictaarkoc ɔci Cekoondoc, ɛkkɛn a maka ban Tacalunika, ɔci Gayac men maka ban Dɛrbi, ɔci Ticcikoc ɔci Trɔpimoc, ɛkkɛn a maka ban Ecya. Ɔci Timutawuc bala i ɛkkɛn. ⁵ Maka neeni ati ñamu, ati ban Trɔwac, ɔci ɛkkɛn bala kɛɛy ɔɔn aŋan. ⁶ Ɔci ne Iid Ma Omki Byedga Polan neeni baaniyɛ, ɔɔn taamnɔn murka tolanti te ban Pilibbi. Ɔci ne nink ne dɔɔyɔ bɛɛki borayɛ, ɔɔn yɔɔrnɔn i ɛkkɛn ban Trɔwac. Ɔci ɔɔn balgɔn aŋan nink ne dɔɔyɔ wyetkɛn ne yyɛɛwɔ. ⁷ Ɔci te Oŋ Juaŋyɛ, ɔɔn wyetkɔ ḍɔɔllɔn balgɔn omɔn Am Ciɛggɔn, ɔci Buuluc jɔŋŋin ñaalɔ ɔci bala loṭi ma acaan ɛkɛ buagɔn woon ne liidɔ. Ɔci jyeka loṭi ɛkɛ ma neeniyɛ, becɔ. Ɛkɛ loṭi ma ɔɔn ne ween jiñɛ tuodan ɔɔn. ⁸ Ɔci ona ɔɔn wyetkɔ ḍɔɔllɔn neeniyɛ, dyɛkan bala coŋɔ. Ona neeniyɛ, gena on jiña ñaalɔ. ⁹ Ɔci kaalgɔn ṭɔɔlɛ gɛɛl bala yenti Yutikoc, ɛkɛ bala ciyi on waŋɛti. Ɔci Yutikoc amɛ ninko. Ɛkɛ bala nɛɛdan, ɔci Buuluc bala loṭi ma men, ɛkɛ kwaccin te lali mako. Ɔci acaan jiek becɔyɛ, kaalgɔn ṭɔɔlɛ wiccin, ɔci ɛkɛ bieŋɛ wyɛŋi ɔci ḍɛmmin te on waŋɛti ḍɛmmin iñɔ ṭɛɛrji te on waŋa ñaalɔ loonan. Ɔci ne ma kooki iñɔ nona ɛkɛtiyɛ, ɛkɛ luollɛ ma ñaalɔ a tuuta doki. ¹⁰ Yeti Buuluc kooyin iñɔ nona ɛkɛti daŋkun, ɔci ɛkɛ niinjin kaalgɔnti, ɔci kaalgɔn muŋŋɛyɔ. Ɔci Buuluc gɔkcin mati agi, “Naa yomgɔ yeyɔ bɛɛ. Ɛkɛ bala men hay!” ¹¹ Ɔci Buuluc ati dɔɔki ñaalɔ iki maka neeni moki. Ɔci ɛkɛ bala omi iki ɛkkɛn Am Ciɛggɔn. Ɔci ɛkɛ bala gɔwwi jyɛyi iki ɛkkɛn moki ne tini wyeñɛ yoŋni ɔɔn. Ɔci ɛkɛ atti. ¹² Ɔci kaalgɔn ṭɔɔlɛ eyɛ ma baanji tɛɛti moki, ɔci ɛkkɛn yomgɛn pwanna pwanno. ¹³ Ɔɔn taamnɔn murka tolanti doki pookɔ. Buuluc taamnɔn iki ɔɔn bɛɛ, acaan ɛkɛ jiek naŋŋɛ doki agi ɔɔn taapcɔn murka tolanti ootcɔn ban Acoc pookɔ, ɔci agi ɛkɛ bɛɛdjɛ te ciegɛ. ¹⁴ Ɔci ne ɔɔn yɔɔrnɔn i ɛkɛ ban Acocyɛ, ɛkɛ taamnɔn ɔɔn murka tolanti ɔci ɔɔn attɔn ne ban Mitiliinɛ ɔɔn. ¹⁵ Ɔci ne liidɔ ɔɔn jɔŋnɔn te bana neeniti ɔci ɔɔn dɛnnɔn ban Kiyoc ŋoyɛti. Ɔci ne liidɔ moki ɔɔn attɔn ne ban Cemoc ɔɔn. Ɔci ne liidɔ moki ɔɔn dɛnnɔn ban Mayliitac. ¹⁶ Ɔɔn attɔn ban Ɛpacac bɛɛ, acaan Buuluc gɔki te ñamu agi naa ma ɛɛrdɔ ban Ecya bɛɛ, agi ɛkɛ buagiti ootci iidti ban Urcaliim. Iid neeni gena Iid Ninka A Ma Baan Ne Yyɛɛwɔ Mena Parɛ Byeŋkɛ (50). ¹⁷ Ɔci ne ɔɔn balgɔn ban Mayliitac menyɛ, Buuluc men gɛɛl cuuññɛ ban Ɛpacac, ɔci mena neeni gɔkcin maka a cyekin kaniicati agi Buuluc gɔki agi ɛkkɛ bɛɛdjɛ ɛkɛti. ¹⁸ Ɔci ne maka neeni dɛñki nona Buuluctiyɛ, Buuluc gɔkcin ɛkkɛnti agi, “‘Ya ŋeejati ɛkkɛ te coodda ‘ya ciyin iki ɛkkɛ oŋkanda wɛnni ban Ecyay. ¹⁹ ’Ya baal noŋ kanŋa Jwaŋa Tolan oŋkanda. ‘Ya baal noŋ ba ‘ya a mena tolan bɛɛ. Ɔci ‘ya baal wiak te ma oŋki a ḍiɛkan bɛɛ, ɔci taab owwɛ ma ‘yati ñyɛran bɛɛ, acaan ma Icrayiil jiek naŋtan oŋkanda te lɛmma ne cyɛɛlɔ buagɔn noŋdi ne yaayan ‘yati. ²⁰ Ɛkkɛ myennin te jyeka pwadin waakɛnda. ‘Ya jwali gɛɛl daljan bɛɛ. ‘Ya baal lor ɛkkɛ oorga ḍworki ma wyetkɛn, ɔci ‘ya baal lor ɛkkɛ oorg ɛkkɛti daŋkun. ²¹ ’Ya baal lwok ma Icrayiil ɔci Keedin Pookɛn oŋkanda. ‘Ya baal gɔk ɛkkɛnti agi, ‘Dala ɛkkɛn nɔji ɛkkɛn daltan, ɔci waakɛn yaltan Jwaŋa Tolanti.’ ²² Ɔci acca ‘ya baal pɔɔjɔ ootta ban Urcaliim. Gena Boŋ Juaŋ gɔki ‘yati ne pɛñan aŋka ‘ya oodda ban Urcaliim neeni. Ɔci naŋka bɛya ‘yati aŋanyɛ, ŋeej ‘ya ne pwadan men bɛɛ. ²³ Jwali gɛɛl aŋka ŋeej ‘ya, acaan Boŋ Juaŋ bala gɔki ‘yati agi ne baaṭi ‘ya oldata ma jiju ciginji. Ɔci taab bɛɛdɔ ‘yati ne tolan. Ne ‘ya baala te bonka neenitiyɛ, ‘ya myenna ɛkɛ te jyeka neeni. ²⁴ Yeti kan ne ‘ya tuudayɛ, baatɔ. Ciɛggɔn ikin Yaccu Kiṭɔyɛ, ɛkɛ ‘ya ‘wonna kanŋa doki. Gena kanŋa loṭa ‘ya ma oŋkanda te jyek Jwaŋa Tolan jyeka wonkɛn jyeka pwadin neeni. ‘Ya baal miet ma te jyek yom Jwaŋa Tolan ka ɛkɛ yomɛ pwad pwad ma baanti. Kan kanŋa neeni ḍaaŋi ‘ya doki oŋ ‘ya oŋ tuuda neeniyɛ, yaay bɛɛ. Pwad pwado. ²⁵ “Gɔṭṭɛ, ɛkkɛ agɛ maka lali ‘ya te jyek cyɛgji Jwaŋa Tolan ne ‘ya baala boota bonk ɛkkɛ jitin. Ɔci acca ŋeej ‘ya, ‘ya yuardata ɛkkɛ oŋgati moki bɛɛ. ²⁶ Ɛkkɛ myennin ‘ya te naŋka ṭagdɛ Juaŋ waakɛnda doki. ‘Ya jwali gɛɛl daljan bɛɛ. Oŋŋa neeni ‘ya ɛkkɛ myettin awarɛ kan menga ɛkkɛti dɔɔki ŋoyɔyɛ, gena jyek ‘ya moki bɛɛ. ²⁸ Dala ɛkkɛ woŋgɔ tiittɛ te naŋki ɛkkɛ, ɔci moki dala ɛkkɛ woŋgɔ tiittɛ Ma Kiṭɔti waakɛnda, acaan ɛkkɛn bala ba pooldin kulin, ɔci ɛkkɛ balgɛ ba ḍɛɛnin ɛkkɛn. Ɛkkɛn wiɛllɛ Ciɛggɔn te yimg ɛkɛ, ɔci ɛkkɛ naŋŋɛ Boŋ Juaŋ aŋŋɛ maka gɔṭi ɛkkɛn ɔci wɛɛyi ɛkkɛn. ²⁹ Dala ɛkkɛ woŋgɔ tiittɛ acaan ŋeej ‘ya ne ‘ya ooddayɛ, ɛyi bɛya ɛkkɛti, ɔci ɛkkɛn noŋdi ne yaayan pooldin kulinti. ³⁰ Ɔci maka balgi iki ɛkkɛ oŋkanda wɛnni a ma kaniica neeniyɛ, ɛkkɛn ma gɛɛg gɔkti jyeka pookɛn maka wɛɛdɛ ɛkkɛ neeniti, acaan ɛkkɛn buagɔn maka a Ma Kiṭɔ yaltanyɔ ɔci bootti ɛkkɛnti amaam budan ɔɔn. ³¹ Dala ɛkkɛ woŋgɔ tiittɛ! Naa ɛkkɛ ñingɔ yeya te naŋki ‘ya naŋka ‘ya baala ṭeya ɛkkɛ te yuonga ne ḍoogɔ neeni bɛɛ. ‘Ya baal ṭey ɛkkɛ te oŋji ɔci te weenji moki. Ne ‘ya baala ṭeya ɛkkɛyɛ, ‘ya ṭey ɛkkɛ menan da ne cyɛɛlɔ, ɔci menan da ne cyɛɛlɔ. ‘Ya baal wiak te ɛkkɛ. ³² “Acca ɛkkɛ ḍuattin ‘ya byeŋ Jwaŋa Tolanti. Dala ɛkkɛ ciedɛ te jyek Juaŋ jyeka ikin ‘wonninti ɛkɛ te yoma pwadan neeniy. Jyeka neeni ɛkkɛ yɔɔttɛ iñɔ ne tɛyan, ɔci ɛkkɛ ‘wondɛ Jwaŋa Tolan waka ‘wondɛ ɛkɛ ma ɛkɛ waakɛnda. ³³ Ne ‘ya baala ciyin iki ɛkkɛyɛ, ‘ya buaŋŋa bil pɔdda walla dahab menga bɛɛ, walla bworŋin menga bɛɛ. ³⁴ Çeejɛ ɛkkɛ wak ‘ya, ɔci wak maka atin iki ‘yayɛ, ɛkkɛn bɛɛn te kanŋa byeŋ ‘ya. ³⁵ Te kanŋa ‘ya neeniyɛ, ɛkkɛ lɛɛrnin ‘ya te naŋka pwadan. Kan ikin maka bɔwan maktin te bilk kanŋa ikinyɛ, a ɔɔn pwatcin. Dala ɛkkɛ poŋdɛ jyeka guaŋŋɛ Yaccu Ciɛggɔn ikin agi, ‘Mena ‘wontan ma waakyɛ, ɛkɛ yomɛ ñɔɔna ñɔɔn ne ḍiɛran ṭɔɔlɛ. Yeti mena ma ‘wondɛ waakyɛ, ɛkɛ aŋka yomɛ ñɔɔna ñɔɔn ne tolan.’ ” ³⁶ Ɔci ne Buuluc gɔkki jyeka neeni ne ḍookkiyɛ, ɛkɛ ḍwoñjin iñɔ i maka neeni waakɛnda, ɔci ɛkkɛn cɔkcin Juaŋti. ³⁷ Ɔci ma bala wiak ne tolan waakɛnda. Ɔci ɛkkɛn ɛkɛ mugɛ ḍɔɔggɛn kaakcɛti, ɔci ñiebjin iki ɛkɛ. ³⁸ Ɛkkɛn yomgɛn yeyɔ te jyeka guaŋŋɛ Buuluc, agi ɛkɛ yuarditi ma moki oŋgati bɛɛy. Ɔci ɛkkɛn ati murka tolanti iki ɛkɛ a cyɛɛlɔ.

¹ Ɔci ne ɔɔn ñiemnɔn i maka neeni ɔci ne ɔɔn ɛkkɛn dolnɔnyɔyɛ, ɔɔn attɔn te murka tolan a tyɛlga ɔɔn ne dɛnnɔn kaŋ wyeñɛ yenti Koc ɔɔn. Ɔci ne liidɔ ɔɔn attɔn ne kaŋ wyeñɛ yenti Rɔɔdic, ɔci te kaŋa neenitiyɛ, ɔɔn attɔn ne ban Patara. ² Ne ɔɔn balgɔn ban Patarayɛ, ɔɔn yɔṭṭɔn murka tolan gɛɛl bala buagɔn woon ooddi ban Pɔniicya. Ɔci ɔɔn taamnɔn ɛkɛti ɔci ɔɔn attɔn. ³ Ɔci ne ɔɔn attɔnyɛ, ɔɔn attɔn goṭṭɔn Kaŋ Cayprac, kɛŋnɔn te byeŋa aamo. Ɔci ɔɔn attɔn ne ban Cuurya ɔɔn. Ɔci murka tolan yɔɔni ban Tayir, acaan murka tolan weegɛn buagɔn waka eedɛ murka tolan neeni ootan ma bora bana neeniti. ⁴ Ɔci ne murka tolan yɔɔnniyɛ, ɔɔn kaannɔn iñɔ, ɔci ɔɔn attɔn bana wanna konɛti, ɔci ɔɔn yɔɔrnɔn iki Ma Kiṭɔ gɛɛg. Ɔci ɔɔn cienɔn i ɛkkɛn aŋan nink ne dɔɔyɔ wyetkɛn ne yyɛɛwɔ. Boŋ Jwaŋa Tolan bala gɔki maka neeni yomgɛnti, ɔci ɛkkɛn gɔkcin Buulucti agi naa ɛkta ooddɔ ban Urcaliim bɛɛ. ⁵ Yeti ne oŋka neeni bɛɛki borayɛ, ɔɔn bana neeni dalnɔn, ɔci ɔɔn attɔn. Ɔci maka neeni waakɛnda i moong ɛkkɛn i kɛɛgin ɛkkɛnyɛ, ɛkkɛn attin iki ɔɔn ne baan ŋoyɛti, ɔci ɔɔn ḍwonnɔn iñɔ aŋan galŋ ḍwaŋɛti, ɔci ɔɔn cɔŋnɔn Juaŋti. ⁶ Ɔci ɔɔn ñiemnɔn i ɛkkɛn aŋan, ɔci ɔɔn taamnɔn murka tolanti, ɔci ɛkkɛn ati dɔɔki baanji. ⁷ Ɔɔn jɔŋnɔn te ban Tayir, ɔci ɔɔn attɔn ne ban Tɔlameeyac ɔɔn. Ɔci ne ɔɔn dɛnnɔn ban Tɔlameeyac dokiyɛ, murka tolan yɔɔni moki. Ɔci ɔɔn kaannɔn iñɔ moki te murka tolanji. Ɔci ɔɔn ñiemnɔn i modg ɔɔn Ma Kiṭɔ. Ɔci ɔɔn balgɔn ciyɔn i ɛkkɛn oŋ jiñɛ ne cyɛɛlɔ. ⁸ Ɔci ne liidɔ ɔɔn jɔŋnɔn te bana neeniti, ɔci ɔɔn attɔn ne ban Cɛcariiya ɔɔn. Ɔci ban Cɛcariiyayɛ, ɔɔn attɔn ban Pilibucn. Ɛkɛ a mena mieti ma te jyek Yaccu. Pilibuc neeniyɛ, ɛkɛ a mena akki ma ne dɔɔyɔ wyetkɛn ne yyɛɛwɔ te maka muowi ma bora te kanŋa kaniica ban Urcaliim. Ɔci ɔɔn balgɔn ciyɔn on ɛkɛ. ⁹ Ɛkɛ balki kɛɛgin a ṭɔlg ne ŋaanɔ. Ɛkkɛn a bɔwan Jwaŋa Tolan. ¹⁰ Ne ɔɔn balgɔn te ban Pilibucn nink ṭɔlgɛn gɛɛg ne coŋɔn menyɛ, mena a bɔwa gɛɛl bɛɛni. Ɛkɛ yenti Agaboc. Ɛkɛ bɛɛn te ban Yahuudiya. ¹¹ Ɛkɛ bɛɛn ḍieŋŋin ɔɔnti. Ɔci bworŋa ‘yɛŋdɛ Buuluc tɛyɛti luullɛ Agaboc bieŋɛti. Ɔci byeŋki ɛkɛ ɔci ciegi ɛkɛ ḍɛɛŋŋɛ te bworŋa neeni. Ɔci ɛkɛ gɔki agi, “Boŋ Juaŋ gɔki agi, ‘Bworŋa neeniyɛ, weegɛn ḍɛktan ma Icrayiil ban Urcaliim a ɔɔn. Ɔci ma Icrayiil neeni ɛkɛ ‘wontan Keedin Pookɛn byeŋkɛnti.’ ” ¹² Ne ɔɔn tieŋnɔn jyeka neeniyɛ, ɔɔn i maka neeni waakɛndayɛ, ɔɔn balgɔn dɛyɔn Buuluc ka naa ɛkɛ ooddi ban Urcaliimji bɛɛ. ¹³ Ɔci Buuluc ṭwokkin gɔkkin ɔɔnti agi, “Ɛkkɛ wiagɛ a ɔɔn ogo? Acca ‘ya yomu yaañi doki te joon ɛkkɛ. Hay, kan ‘ya ḍɛkta maka ban Urcaliimyɛ, baatɔ. Ɔci kan ‘ya nokta ma aŋan te jyek Ciɛggɔn Yaccuyɛ, yaayɛ ‘yati bɛɛ.” ¹⁴ Ne Buuluc tieŋni jyek ɔɔn bɛɛyɛ, ɔɔn balgɔn dɛyɔn ɛkɛ moki bɛɛ. Ɔci ɔɔn gɔŋnɔn ɛkɛti agi, “Dala naŋka ṭagdɛ Jwaŋa Tolan bɛya iti.” ¹⁵ Ɔci ne naŋka neeni baaniyɛ, ɔɔn waakɔ ywaŋŋɔn jɔŋnɔn buaŋŋɔn woon ban Urcaliim. ¹⁶ Ɔci Ma Kiṭɔ gɛɛg te ban Cɛcariiyayɛ, ɛkkɛn attɔn iki ɔɔn. Ɔci ɔɔn wɛɛkɔn ɛkkɛn ban Necann. Necan neeniyɛ, ɛkɛ a men ma Cayprac. Ɛkɛ jyeti Yaccuti te ñamu doki. Ɔci ɔɔn niinnɔn on ɛkɛ. ¹⁷ Ɔci ne ɔɔn dɛnnɔn ban Urcaliimjiyɛ, ɔɔn ñiipkɔn modg ɔɔn Ma Kiṭɔ ne pwadan. ¹⁸ Ɔci ne liidɔ ɔɔn attɔn i Buuluc ḍieŋnɔn Yaakubti. Ɔci cyekin kaniica ɛkkɛn bɛɛn waakɛnda daŋkun ban Yaakubn. ¹⁹ Ɔci Buuluc ma ñiimmɛ waakɛnda ñamu oŋ ɛkɛ oŋ ma myennɛ te naŋka naŋŋɛ Juaŋ Keedin Pookɛnti te kanŋa ɛkɛ oŋo. ²⁰ Ɔci ne ɛkkɛn tieŋki jyeka neeniyɛ, ɛkkɛn bala jieyi Juaŋ agi Jwaŋa Tolan pwanni agi pwanno. Ɔci ɛkkɛn gɔkcin Buulucti agi, “Mod ɔɔn, ŋeej i ma Icrayiil jyeti Yaccuti a ḍiɛkan bɛɛ, a alpn coŋgin a coŋgin. Ɛkkɛn waakɛnda waakɛn byerɔ te ganuun kiinɛ Muuca. ²¹ Ɔci maka neeni tieŋŋin jiek agi i baalji lorci ma Icrayiil maka balgi ciyi bonk Keedin Pookɛnti agi dala ɛkki ganuun Muuca daldɛ ɔci agi naa ɛkki kɛɛgin ɛkki ŋwoddɛ bɛɛ, ɔci agi naa ɛkki noŋdɔ ba naŋka naŋdi ma Icrayiil oŋkanda wanna bɛɛ. ²² “Acca ma tieŋdi doki agi i bɛɛnji Urcaliimji wɛnni oŋ i noŋŋa a ɔki acca? ²³ Acca dala i noŋja ba jyeka i myettiti ɔɔn neeni. Maka ‘uay gɛɛg bala ikinti wɛnni ne ŋaanɔ, ‘uaya jiek naŋi iki Juaŋ te naŋka ɛkkɛn buagɛ naŋtan neeni. ²⁴ Dala i ooddi iki ɛkkɛn ɔci waru ywaŋa Juaŋti iki ɛkkɛn ba naŋki yɔrg ma Icrayiil. Dala ecca genga aŋka ‘yɛra i te ɛkkɛn daŋkun aŋka ɛkkɛn jyeyyɛn twomtan ɔci ŋeettan ma ɛkkɛn ma waakɛnda jyeka tieŋŋi ɛkkɛn te ñamu te i neeniyɛ, ɛkkɛn a jyeka awarɛ bɛɛ. Ɔci ŋeettan ɛkkɛn i noŋ ba ganuun Muuca oŋkanda. ²⁵ Yeti Keedin Pookɛn maka jyeti Yaccuti neeniyɛ, ɛkkɛn balki worga te ikinti doki. Gena jyeka ñaaŋŋinyɔ ikin te ñamu agi naa ɛkki omdɔ waka ‘yɛrdi ma jɔkin yeyin bɛɛy. Ɔci agi naa ɛkki menga dɛtti yimg bɛɛ. Ɔci agi naa ɛkki omdɔ waka tuudɔ nogdi wyeng neeni bɛɛ. Ɔci agi naa ɛkki noŋdɔ tomi bɛɛ.” ²⁶ Ne Buuluc tieŋnɛ jyeka neeniyɛ, ɛkɛ yomɛ mwoki jyeka neeniti. A ɔŋŋiyɛ, ne liidɔ ɛkɛ ati ɔci warɛ ywaŋŋɛ Juaŋti ba naŋki yɔrg ɛkkɛn ma Icrayiil. Ɛkkɛn waakɛn ywaŋɛ a cyɛɛlɔ Juaŋti i maka ne ŋaanɔ neeni. Hayya! Ɛkɛ oŋ kaaccin on Juaŋ ona tolan ɔci gɔkcin gaciicin ma Icrayiilti agi, “Ɔɔn i maka ne ŋaanɔ neeni balgɔn jɔɔnnɔn noŋɔn kanŋa ywaŋi waakɔ Juaŋti neeni doki. Ne nink kanŋa neeni baatiyɛ, ‘ya oŋ bɛɛd ecca waak gɛɛg bieŋuti aŋka ‘yɛrdɛ ɛkkɛ te ɔɔn waakida.” ²⁷ Ɔci ne ninka a dɔɔyɔ wyetkɛn ne yyɛɛwɔ ninka yɔŋki ma waakɛn ba naŋki ma Icrayiil neeni noŋki bɛɛti borayɛ, ma Icrayiil maka bɛɛn te ban Ecyayɛ, ɛkkɛn Buuluc mɔkci orɔ on Juaŋ ona tolan. Ɔci ɛkkɛn maka bala on Juaŋ ona tolan warɛti aŋan myetkɛ ɔci ciŋɛji, ɔci ma Buuluc mugɛ. ²⁸ Ɔci ɛkkɛn bala yaadan a yook agi, “‘Uay ma Icrayiil, hay! Bɛɛdɛ, ‘wana neeniyɛ, gena mena loṭi ma waakɛnda baan warda amaamy. Gena mena wooki ikin, ɔci ɛkɛ wooki ganuun Muuca daŋkun, ɔci wooki on Juaŋ ona tolan neeni daŋkun. Ɔci ɛkɛ noŋi naŋka parɛ moki naŋka yaayan, ɛkɛ Keedin Pookɛn oonɛ orɔ on Juaŋ ona tolanti, ɔci ona pwadan neeniyɛ, yaaññɛ ɛkɛ te naŋka neeni.” ²⁹ Ɛkkɛn gɔki a ɔɔn acaan oŋ gɛɛlti ɛkkɛn Buuluc yuarɛ yaakkɛn iki Trɔpimoc bala ati booti bana neeniti. Trɔpimoc neeniyɛ, ɛkɛ a men maka ban Ɛpacac. Ɔci ɛkɛ a men Keedin Pookɛn. Ɔci ma bala poŋi gɔki agi Trɔpimoc neeni enda Buuluc orɔ on Juaŋ ona tolan neeni. ³⁰ Ɔci jiek ati baan konɛ warda, ɔci ma waakɛn ḍiedan, ɔci ɛkkɛn yiŋi ne pɛñan nona Buulucti, ɔci ɛkɛ mugɛ ɔci wuayɛ ɛkkɛn bora te on Juaŋ on tolan. Ɔci ɛkkɛn on tukɛ ‘uorkɛ ne pɛñan. ³¹ Ɔci ne ɛkkɛn pocki noŋki Buuluc noktitiyɛ, jiek peen ati ḍuaŋa ackan ma Ḍɔɔmti ḍuaŋa tolan agi maka ban Urcaliim kondan wardandayɛ, agi ma balgɔ noŋɔ ywobjo. ³² Ɔci ḍuaŋa tolan ackan ḍɔɔllɛyɔ ne pɛñan i ḍuaŋan ɛkkɛn. Ɔci ɛkkɛn ati ne pɛñan nona polla tolanti. Ɔci maka coŋin neeni ne ɛkkɛn gɔrki ḍuaŋa tolan baali bɛɛdi i ackan ɛkɛyɛ, ɛkkɛn Buuluc dalji te jyebto. ³³ Ɔci ḍuaŋa tolan ati Buulucti ɔci Buuluc mugɛ ackan, ɔci ḍuaŋa tolan gɔkcin ackanti agi, “Dala ɛkɛ ḍɛgdɛ te jiŋgin ne yyɛɛwɔ.” Ɔci ḍuaŋa tolan tooccin mati agi, “Mena neeni a menɛ yeti? Ɔci ɛkɛ noŋi gena?” ³⁴ Yeti ma yaadan, magga da te jwali ɛkkɛn, ɔci magga da te jwali ɛkkɛn. Jiek kɛɛptin jitin. Ɔci ne ḍuaŋa tolan jiek jitkɛn yuarnɛ ne pwadan bɛɛyɛ, ɛkɛ gɔkcin ackanti agi, “Dala ɛkɛ eetin baanji nona ikinti.” ³⁵ Ɔci Buuluc lwadɛ eyɛ ackan, ɔci polla tolan bootcin ɛkkɛnti, ɔci acaan maka neeni buagɔn noki Buuluc menyɛ, ackan Buuluc kɛrɛ ñaalɔ nona kaaciti eyɛ ɔɔn ne nona cieki ackan waakɛnda ɔɔn. ³⁶ Maka bootcin ɛkkɛnti neeniyɛ, a ḍiɛkan bɛɛ, kɔɔna kɔɔnno. Ɔci polla tolan neeni bala yaadan agi, “Dala ɛkɛ noktin dala baadi!” ³⁷ Ɔci ne ackan noŋki kaatti orɔyɛ, Buuluc gɔkcin ḍuaŋa tolanti agi, “‘Ya tuku a jwallo.” Ɔci ḍuaŋa tolan tooccin ɛkɛti agi, “I urkiti tuk Giriik daŋkun? ³⁸ Pari i a men ma Macor mena maka coŋin ḍɔɔllɛyɔ a alpn ne ŋaanɔ (4,000) ɔci eññɛ ɛkɛ wɔɔŋji aŋka noŋi ṭwaŋ akuumati neeni bɛɛ?” ³⁹ Ɔci Buuluc kɛkcin ɛkɛti agi, “A’a, ‘ya a men ma Icrayiil. ‘Ya bɛɛn te ban Tarcoc ban Ciliicyaji. Ban ɔɔn neeniyɛ, ñyɛrcin bɛɛ. Tol tolo. ‘Ya gɔkka iti ‘ya buaga gɔkca jiek mati.” ⁴⁰ Ɔci ḍuaŋa tolan gɔkcin agi, “Pwatcin gɔkca.” Ɔci Buuluc bala yɔɔd ñaalɔ kaaci wyeñɛti. Ɔci ɛkɛ bieŋɛ laŋnɛ mati, acaan ɛkɛ buagɔn dala ma ciya lieda. Ɔci ne ma cieki liedayɛ, ɛkɛ gɔkcin mati te tuk Ma Icrayiil agi,

¹ “Modg ɔɔn ɔci weyi ɔɔn, tieŋdɛ acca. ‘Ya buaga gɔkka ɛkkɛti te jyek ‘ya.” ² Ɔci ne ma tieŋki Buuluc baali gɔki ɛkkɛnti te tuk ɛkkɛnyɛ, ɛkkɛn cien lieda moki. Ɔci Buuluc gɔkcin ɛkkɛnti moki agi, ³ “‘Ya a men ma Icrayiil. ‘Ya jietka ma ban Tarcoc ban Ciliicyaji. Ɔci ‘ya toli wɛnni bana neeniti, ɔci ‘ya lalla Gameelyal ne pwadan te jyek ganuun yɔrg ikin aŋka ‘ya waru byeri te jyek Juaŋ ba ɛkkɛ neeni. ⁴ Te baaṭi ‘ya baal noŋ ne yaayan maka booti Pɔy Yaccuti. Ɔci ɛkkɛn ma gɛɛg nogɛ ma te naŋki ‘ya. Ɔci ‘ya baal ḍɛɛw maka ‘uay ɔci maka moongo, ɔci ɛkkɛn owwa ‘ya ɔci olja ‘ya ciginji. ⁵ Jyeka neeni ŋeejɛ gaciic tolan ikin ma Icrayiil, ɔci ŋeecɔn maka ḍwaŋin Maka Gɔṭi Jiek daŋkun. Acaan gena ɛkkɛn ‘ya ‘wonta worgan, ɔci ‘ya worgan eed ‘ya modg ikinti ban Ḍimaacka. Ɔci ‘ya baal at ootta ban Ḍimaacka acaan buaga ka Ma Kiṭɔ ḍɛgdi aŋan, ɔci ɛkkɛn owwa ban Urcaliim aŋka ma noŋdi ne yaayan ɛkkɛnti. ⁶ “Ɔci ‘ya baal pɔɔjɔ men, ɔci ‘ya noŋ dɛñja ban Ḍimaacka, ɔci oŋ waŋɛ yɔɔtcin yeccu doki, ɔci ne pɛñan noon dɛkkin ‘yati te ñaalɔ ne bɔwan. ⁷ Ɔci ‘ya ḍɛmman iñɔ ṭɛɛrji, ɔci ‘ya tieŋŋan pwan gɔkkin ‘yati agi, ‘Caawul, Caawul, i noŋ ne yaayan ‘yati a ɔɔn ogo?’ ⁸ “Ɔci ‘ya ṭwokcan ɛkɛti agi, ‘Ciɛggɔn, i a menɛ?’ “Ɔci ɛkɛ gɔkkin ‘yati agi, ‘Gena ‘ya Yaccu men ma Najarɛt mena naŋa i oŋkanda ne yaayany.’ ⁹ Ɔci maka atin iki ‘ya neeniyɛ, ɛkkɛn noon yuarcɛ ɛkkɛn ne dɛki, yeti ɛkkɛn tieŋŋin jyeka guagdɛ men ‘yati neeni bɛɛ. ¹⁰ “Ɔci ‘ya ṭwokcan ɛkɛti agi, ‘Ciɛggɔn, i buagi ‘ya noŋja gena?’ “Ɔci Ciɛggɔn ṭwokkin ‘yati agi ‘ya jɔŋjɔ ñaalɔ ɔgjɔ ootcɔ ban Ḍimaacka, ɔci agi aŋanyɛ, ‘ya myettata men gɛɛl te waka ɛkɛ buagiti naŋji ‘yay. ¹¹ Ɔci ‘ya yaakati gwali noon bɛɛ, acaan noon dɛkkin ne bɔwan, ɔci ‘ya woŋgu uli doki. Ɔci ‘ya eeka lwatka maka atin iki ‘ya a lwani ne ban Ḍimaacka ɔɔn. ¹² “Ɔci aŋanyɛ, mena ‘uan gɛɛl bala yenti Ananaayac. Ananaayac neeniyɛ, ɛkɛ yomɛ bala Juaŋti ne pwadan, ɔci ɛkɛ noŋi ba ganuun Muuca waakɛnda. Ɔci ma Icrayiil maka bala ciyi ban ɛkkɛnyɛ, ɛkkɛn waakɛnda gɔki agi ɛkta pwadɔ katan. ¹³ Ɔci ɛkɛ bɛɛn ‘yati ɔci yɔɔtcin ‘ya taaŋuti ɔci gɔkkin ‘yati agi, ‘Mod ɔɔn Caawul, dala i yaaktiti gwali noon moki.’ Ɔci ne pɛñan ‘ya yaaŋnati gwali doki, ɔci ‘ya gɔrcan ɛkɛti. ¹⁴ “Ɔci ɛkɛ gɔkkin ‘yati agi ‘ya kɛnnata Jwaŋ yɔrg ikin bora a kɛññin, agi Juaŋ buagda ‘ya nɔɔttata te naŋka ɛkta buagday. Agi ‘ya kɛnnata Juaŋ bora, aŋka ‘ya gɔrcɔ Yaccu Mena Pwadɔ neeni, ɔci ‘ya tieŋjɔ ɛkta gɔktɔ ‘yati ¹⁵ agi ‘ya kɛnnata Juaŋ bora a ɔɔn aŋka ‘ya naŋdata ɛkta agjɔ mena nɔɔtɔ ma waakcinda te jyek ɛkta te naŋka yuarnjɛji ‘yay, ɔci te jyeka tieŋji ‘ya daŋkuny, ¹⁶ ɔci agi acca ‘ya kwaccɔ ogo? Dala ‘ya jɔŋjɔ ñaalɔ dala ‘ya buldata ma, agi dala ‘ya cɔkcɔ Yaccuti te yenti ɛkta aŋka nɔji ‘ya luakta ɛkta ɔntɔy. ¹⁷ “Ɔci ‘ya dɔɔkkan ban Urcaliim. Ɔci oŋ gɛɛlti ne ‘ya baala cɔka Juaŋti orɔ on Juaŋ ona tolanyɛ, ¹⁸ ’ya Ciɛggɔn yuarŋo, ɔci ɛkɛ gɔki ‘yati agi dala ‘ya jɔŋjɔ ne pɛñan te ban Urcaliimti wɛnni, dala ‘ya ɔgjɔ ootcɔ bana pardanti, acaan ma yookɛ waakcin te jyeka lorci ‘ya ma a jyek ɛkɛy. ¹⁹ “Ɔci ‘ya gɔkcan ɛkɛti agi, ‘Ciɛggɔn, ɛkkɛn jyeka neeni ŋeecɔn ɛkkɛn waakɛnda doki ne ‘ya baala muowa maka jyeti jyek iti, ɔci ne ɛkkɛn eeda ‘ya ḍuatta ciginji ɔci ḍuatiti may. ²⁰ Ɔci ne ma balki nokki Ictipanuc mena mieti ma te jyek iyɛ, ‘ya baal yɔɔd nona nokki ma ɛkɛ gɔr bworŋin maka nokkin ɛkɛ neeni. Ɔci ‘ya baal poŋ gɔk ka naŋka naŋtan ɛkkɛn neeni pwad pwado.’ ²¹ “Ɔci Ciɛggɔn gɔkkin ‘yati moki agi, ‘Jɔŋŋa, ɔgdi ootta, ‘ya i cundin bana loonan Keedin Pookɛnti.’ ” ²² Ɔci ma bala tyeŋi jyeka guagdi Buuluc neeni, yeti ne ɛkɛ gɔŋni agi Ciɛggɔn Yaccu gɔki agi ɛkɛ ootcɛ bana loonɔ Keedin Pookcɛntiyɛ, ɛkkɛn looñi ne pɛñan, ɔci yaajjin ne tolan agi, “Dala mena gɔki a ɔŋŋi neeniyɛ, baadi. Kan ɛkɛ kwaci coodi ɔɔn pwatcin bɛɛ, yaayɛ. Dala ɛkɛ baadi!” ²³ Ɔci ma yomgɛn yeyɔ, ɔci ɛkkɛn bala yaadan, ɔci bworŋin ɛkkɛn yiɛpcɛ ɔntɔ, ɔci ṭɛɛr moki nwamtan gɔ pwokcin ñaalɔ ɔɔn. ²⁴ Ɔci ne ɛkkɛn balki noŋki a ɔɔnyɛ, ɔci ḍuaŋa tolan gɔkcin ackanti agi, “Dala ɛkkɛ mena neeni eedɛ orɔ ɔci ḍuadɛ.” Ne ḍuaŋa tolan gɔŋni a ɔɔnyɛ, ɛkɛ buagɔn aŋka Buuluc gɔkti ne pwadan aŋka ɛkɛ gɔrti jyeka yaatki ma te Buuluc neeni bala a ɔki. ²⁵ Ɔci ackan Buuluc ḍɛɛgɛ acaan ɛkkɛn buagɔn ḍwayi ɛkɛ. Ɔci ḍuaŋa bala yɔɔd nona ḍɛɛki ma Buuluc. Ɔci Buuluc gɔkcin ḍuaŋati agi, “Ma Ḍɔɔm ma ḍwayi ɛkkɛn boki? Kan mena godan ɛkɛ baaw men, ma yaakinti ɛkɛ ḍuatan boki?” ²⁶ Ɔci ne ḍuaŋa tieŋni jyeka neeniyɛ, ɛkɛ ati ḍuaŋa ma Ḍɔɔm ḍuaŋa tolanti, ɔci ḍuaŋa tolan myennɛ te jyek Buuluc neeni. Ɔci ḍuaŋa tooccin ḍuaŋa tolanti agi, “Hay! Hay! I gɔk ɔɔn noŋdɔn a ɔki ɛkɛti? ‘Wana neeniyɛ, ɛkɛ a men ma Ḍɔɔm!” ²⁷ Ɔci ḍuaŋa tolan bɛɛn Buulucti ɔci gɔkcin ɛkɛti agi, “‘Ya myetta i a men ma Ḍɔɔm?” Ɔci Buuluc jyettin agi, “Ɛɛ.” ²⁸ Ɔci ḍuaŋa tolan gɔkcin Buulucti agi, “Te ñamu ‘ya a men ma Ḍɔɔm bɛɛ. Yeti acca ‘ya aŋi men ma Ḍɔɔm acaan bilk ‘ya ‘woñgan ma ne coŋɔn.” Ɔci Buuluc gɔkcin ɛkɛti agi, “A ɔɔn pari bɛɛ? Yeti gɔṭṭi, ne ‘ya jietkati mayɛ, ‘ya doki a men ma Ḍɔɔm.” ²⁹ Ɔci maka noŋi ḍwayi Buulucyɛ, ɛkkɛn Buuluc daljɛ ne pɛñan. Ɔci ḍuaŋa tolan moki buayi ne pɛñan ne ɛkɛ tieŋni agi Buuluc agi men ma Ḍɔɔm. Ḍuaŋa tolan buayi acaan Buuluc ḍɛɛgɛ ma te jyek ɛkɛ. ³⁰ Ɔci ne liidɔ ḍuaŋa tolan Buuluc looŋnɛ te waka ɛkɛ ḍɛɛkkiti may. Ɔci ɛkɛ borcin gaciicin ḍwaŋin ma Icrayiil ɔci Maka Goṭi Jiek i ɛkɛy. Ɔci ḍuaŋa tolan Buuluc oonɛ iñɔ nona mati, ɔci Buuluc yɔɔnnɛ ɛkɛ ma ñomgɛnti. Ḍuaŋa tolan noŋi a ɔɔn acaan ɛkɛ buagɔn tieŋdi jyeka wookki ma Buuluc neeni ne pwadan.

¹ Ɔci Buuluc bala gɔṭi ḍɛɛṭi Maka Gɔṭi Jiek neeniti, ɔci gɔkcin ɛkkɛnti agi, “Modg ɔɔn! Gen gɛɛl bala ‘ya yomuti bɛɛ. ‘Ya yomu niin pwanna pwanno. ‘Ya noŋ ba jyeka ṭagdɛ Juaŋ oŋkanda, ɔci acca moki ɔɔn.” ² Ɔci ne gaciic tolan ma Icrayiil mena yenti Ananaayac neeni tieŋni jyeka guagdɛ Buuluc neeniyɛ, ɛkɛ gɔkcin maka yɔdi iki Buuluc wannati agi, “Dala ɛkkɛ mena wanna moddɛ tukɛti.” ³ Ɔci Buuluc gɔkcin ɛkɛti agi, “Hɔɔy, i mena noŋi ma ñingɛn neeni i jyɛbdi Jwaŋa Tolan! I waanu ciy noŋ godan ‘ya ba ganuun, ɔci i buagi dɔki i ganuun bɛɛyaji ‘ya motta makɔ?” ⁴ Ɔci maka yɔdi iki Buulucyɛ, gɔkcin ɛkɛti agi, “I wook mena naŋŋɛ Juaŋ a gaciic tolan ma Icrayiilyɛ?” ⁵ Ɔci Buuluc ṭwokcin mati agi, “Modg ɔɔn, ŋeej ‘ya ka ɛkɛ a gaciic tolan ma Icrayiil bɛɛ. Jyeka kiigin gɔki agi, ‘Naa menga gɔkti ne yaayan ḍuaŋa ɛktati bɛɛ.’” ⁶ Yeti ne Buuluc gɔrni maka yɔdi wɛnan gɛɛg akki ma Cadyuciin ɔci ma gɛɛg akki ma Pɛriciinyɛ, ɛkɛ yaajjin te nona Maka Gɔṭi Jiekti neeni agi, “Modg ɔɔn. ‘Ya a men ma Pɛriciin, ɔci ‘ya a kaci ma Pɛriciin. Ɔci acca ma noŋi godan ‘ya, acaan ‘ya gɔk ka ne ma tuutiyɛ, ma jɔŋdi ñaalɔ tɛɛti moki.” ⁷ Ɔci ne ɛkɛ gɔŋni a ɔɔnyɛ, ma Pɛriciin ɔci ma Cadyuciin bala tyewɔ ne pɛñan, ɔci maka coŋin neeniyɛ, kɛɛptin jitin te jieko. ⁸ Ɛkkɛn kɛɛptin jitin te jiek a ɔɔn acaan ma Cadyuciin oŋkanda gɔki agi ne ma tuudiyɛ, ma jɔŋdɔ ñaalɔ moki bɛɛ. Ɔci ɛkkɛn gɔki moki agi malɛɛkan balgɔ bɛɛ, ɔci agi boŋki ma baan moki baagɔ. Ma Pɛriciin aŋka gɔki agi ne ma tuudiyɛ, ma jɔŋdɔ ñaalɔ tɛɛti moki, ɔci agi malɛɛkan balgɔ moki, ɔci boŋki ma baan balgɔ moki. ⁹ Ɔci yook pɛɛdin ne tolan, ɔci maka loṭi worga Juaŋ ma Pɛriciin gɛɛg jɔŋŋin ñaalɔ, ɔci gɔkcin ne pɛñan agi, “Ikin yɔɔrtin gena yaayan gɛɛl ‘wana neeniti bɛɛ. Bala a booŋ walla malɛɛka gɛɛl gɔkcin ɛkɛti dita!” ¹⁰ Ɔci ne ma jiek pɛñki a pɛñiyɛ, ḍuaŋa tolan buayi agi dita Buuluc tintan ma ñaalɔ ɔci noktan te ṭɔrin. Ɔci ɛkɛ ackan myennɛ agi dala ɛkki ooddɔ iñɔ nona mati aŋka ɛkki Buuluc pɔktɛ te ma byeŋkɛnti ɔci eedi ma orɔ on ackanti. ¹¹ Ɔci te ween jiñɛ neeniyɛ, Ciɛggɔn yɔɔtcin Buuluc taaŋɛti, ɔci gɔkcin ɛkɛti agi, “Dala i yomu tɛya! Acaan i ma myenni te jyek ‘ya wɛnni ban Urcaliimyɛ, ɔci ne baaṭi i ma myetka te jyek ‘ya a ɔɔn ban Ḍɔɔm daŋkun.” ¹² Ɔci ne liidɔ ne noon bɔɔniyɛ, ma Icrayiil gɛɛg jiek ñaagɛyɔ te lɛmma ne cyɛɛlɔ. Ɛkkɛn gɔkcin a warɛ te yenti Jwaŋa Tolan agi ɛkkɛn omdinti waagga bɛɛ, ɔci mottinti waagga bɛɛ, agi ɛkkɛn Buuluc parun nogdinti ñamu. ¹³ Ɔci maka jiek ñaagɛyɔ neeniyɛ, ɛkkɛn a ma baan ne yyɛɛwɔ (40), ɔci maka pookɛn gɛɛg bala moki. ¹⁴ Ɔci ɛkkɛn ati nona gaciicin ḍwaŋin ma Icrayiilti ɔci cyekinti, ɔci ɛkkɛn gɔkcin ɛkkɛnti agi, “Ɔɔn gɔŋnɔn a warɛ te yenti Jwaŋa Tolan ka ɔɔn omdɔn waagga bɛɛ, yeti ɔɔn Buuluc nogdɔn ñamu parun. ¹⁵ A ɔŋŋiyɛ, dala ɛkkɛ iki Maka Gɔṭi Jiekyɛ, ooddɛ gɔktɛ ḍuaŋa tolan ḍuaŋa ma Ḍɔɔmti dala Buuluc koodɛ iñɔ nona Maka Gɔṭi Jiekti neeni, ɔci dala ɛkkɛ noŋdɛ ba ɛkkɛ buagɛ gɔrtɛ jyek Buuluc moki ne pwadan ɔɔn. Yeti ne ɛkɛ koodi iñɔ ne ɛkɛ dɛndi nona ɛkkɛti men bɛɛyɛ, ɔɔn mɔktɔn kɛɛyɔn ɛkɛ, ɔci ɛkɛ nogdɔn ɔɔn doki.” ¹⁶ Yeti ñaakan Buuluc tieŋŋin jyeka naŋɛ ma te jyek nooŋi Buuluc neeni. Ɔci ɛkɛ bɛɛn ɔci ati kaaccin orɔ on ackan, ɔci ɛkɛ Buuluc myennɛ te jyeka tieŋnɛ ɛkɛ neeni. ¹⁷ Ɔci Buuluc ḍuaŋa gɛɛl bornɛ ɔci ɛkɛ bɛɛn ɔci Buuluc gɔkcin ɛkɛti agi, “Kaalgɔn ṭɔɔlɛ neeni eya nona ḍuaŋa tolanti acaan ɛkɛ balki jiek gɛɛg buagɔn gɔkti ɛkɛti.” ¹⁸ Ḍuaŋa kaalgɔn ṭɔɔlɛ eññɛ ḍuaŋa tolanti, ɔci ḍuaŋa gɔkcin ḍuaŋa tolanti agi, “Buuluc mena muŋŋin ikin neeniyɛ, ɛkɛ boṭṭin ‘yati ɔci ɛkɛ gɔki ‘yati agi ‘ya kaalgɔn neeni oojjɔ nona iti agi ɛkta balki jiek gɛɛg ɛkta buagda gɔktɔ iti.” ¹⁹ Ɔci ḍuaŋa tolan kaalgɔn ṭɔɔlɛ muŋŋɛ te bieŋɛ, ɔci ɛkkɛn ati nona parɛti yaakkɛn, ɔci ɛkɛ tooccin kaalgɔnti agi, “Jwalla i buagiti ‘ya myetta neeni bala a ɔki?” ²⁰ Ɔci ɛkɛ ṭwokcin ɛkɛti agi, “Ma Icrayiil jiek ñaagɛyɔ. Ɛkkɛn gɔki agi ɛkkɛn toottinti iti agi i Buuluc oojji iñɔ ne liidɔ nona Maka Gɔṭi Jiekti. Ɛkkɛn gɔki agi ɛkkɛn noŋdinti ba ɛkkɛn gɔrtinti jyek ɛkta ne pwadan ɔɔn. ²¹ Yeti naa i jyedda jyek ɛkkɛn bɛɛ, acaan ma Icrayiil neeniyɛ, gɛɛg bala kɛɛy Buuluc. Ɛkkɛn a ma baan ne yyɛɛwɔ (40), ɔci maka pookɛn gɛɛg bala moki. Ɛkkɛn gɔkcin a warɛ te yenti Jwaŋa Tolan agi ɛkkɛn omdinti waagga bɛɛ, ɔci mottinti waagga bɛɛ, agi ɛkkɛn Buuluc parun nogdinti ñamu, ɔci acca ɛkkɛn jiek ḍaagɛ doki, yeti ɛkkɛn bala kɛɛy gena jyek i.” ²² Ɔci ḍuaŋa tolan gɔkcin kaalgɔn ṭɔɔlɛti agi, “I ɔgdi ootta, naa i men gɛɛl myetka a ‘ya nɔɔnna i te jyeka neeni bɛɛ.” ²³ Ɔci ḍuaŋa tolan borcin ḍuaŋan gɛɛgti ne yyɛɛwɔ, ɔci gɔkcin ɛkkɛnti agi, “Dala ɛkkɛ ackan limdiyɔ a miyyan ne yyɛɛwɔ (200), ɔci ackan taab te muntanyɛ, ɛkkɛn limdiyɔ a ma baan ne ḍoogɔ mena parɛ byeŋkɛ (70), ɔci ackan eci ṭwaŋgi limdiyɔ a miyyan ne yyɛɛwɔ (200). Dala ɛkkɛn wak ɛkkɛn ywaŋtanyɔ aŋka ɛkkɛn jɔŋdi ne weenji ooddi ban Cɛcariiya.” ²⁴ Ɔci ḍuaŋa tolan gɔkcin mati agi, “Dala muntan gɛɛg eedi ma acaan taabda Buuluc.” Ɔci ɛkɛ gɔkcin moki agi, “Dala ɛkkɛ noŋdɛ ba jyek ‘ya neeni aŋka Buuluc dɛndi ne pwadan Pilikcti.” (Ɔci Pilikc neeniyɛ, ɛkɛ a ḍuaŋa ṭɔɔlɛ bana ecki ma Buuluc waayi.) ²⁵ Ɔci ḍuaŋa tolan ɛkɛ kieŋnɛ worga agi, ²⁶ I Pilikc, ḍuaŋa ṭɔɔlɛ pwadan, ‘ya ñiep i. Gena ‘ya Klɔdyac Licyac. ²⁷ Gɔṭṭi, ‘wana neeni mugɛ ma Icrayiil, ɔci ɛkkɛn noŋi ɛkɛ noktan, ɔci ‘ya attin iki ackan ‘ya ɔci ɛkɛ wɛɛn ‘ya te ɛkkɛn byeŋkɛnti, acaan ‘ya tieŋŋan ɛkɛ a men ma Ḍɔɔm. ²⁸ Ɔci acaan ‘ya buaga tieŋja jyeka wookki ma ɛkɛ neeni ne pwadanyɛ, ‘ya ɛkɛ eñi nona ma ɛkkɛnti Maka Gɔṭi Jieko. ²⁹ Ɔci ‘ya gɔrcan jyeka tɔɔmki ma ɛkɛ neeni. Ɔci jyeka tɔɔmki ma ɛkɛ neeniyɛ, gena ganuun ma Icrayiil pookɛn. Jyeka ɛkɛ noktiti ma neeniyɛ, baawo, ɔci jyeka ɛkɛ ḍuattiti ma ciginjiyɛ, baaw moki. ³⁰ ’Ya myenna men gɛɛl agi ma Icrayiil jiek ñaaŋiyɔ agi ɛkta nogdinti. Ɔci a ɔŋŋiyɛ, ‘ya ɛkɛ cuoññan iti. Ɔci maka tɔɔmi ɛkɛ neeniyɛ, ɛkkɛn myetkan ‘ya ka dala ɛkkɛn ooddi jyeka tɔɔmki ɛkkɛn ɛkɛ neeniyɛ, ootan ɛkkɛn iti aŋan. ³¹ Ɔci ackan Buuluc eyɛ ba jyeka gɔŋni ḍuaŋa tolan ɛkkɛnti, ɔci Buuluc eyɛ te ween jiñɛ ne ban Antipatric ɔɔn. ³² Ɔci ne liidɔ ackan ati te ciegɛnyɛ, ɛkkɛn dɔɔkkin baanji ban ɛkkɛn, ɔci ackan taab te muntanyɛ, ɛkkɛn aŋka ati Buuluc eyɛ ne ban Cɛcariiyati. ³³ Ɔci ne ɛkkɛn dɛñki ban Cɛcariiyatiyɛ, ɛkkɛn ḍuaŋa ṭɔɔlɛ ‘woñgi worga, ɔci moki ‘woñgi Buuluc bieŋɛti. ³⁴ Ɔci ḍuaŋa ṭɔɔlɛ pokcin worga ɔci tooccin Buulucti agi, “Ban ɛkkɛ bana tolan yenti ɔki?” Ɔci ne ɛkɛ tieŋni agi Buuluc bɛɛnɔ te Ciliicyayɛ, ³⁵ ɛkɛ gɔkcin ɛkɛti agi, “Maka tɔɔmi i ne ɛkkɛn bɛɛtiyɛ, ‘ya oŋ gɔrca jyek i ne pwadan oŋo.” Ɔci ɛkɛ gɔkcin mati agi dala Buuluc eedi ma on Hiruuduc Agriipati uuldɛ ma jiju, ɔci kɛɛdɛyɔ ackan ne pwadan aŋan ona cɔnda ɛktay.

¹ Ɔci ne ninka ne dɔɔyɔ bɛɛki borayɛ, Ananaayac gaciic tolan ma Icrayiil bɛɛn i cyekin gɛɛg ɔci mena parɛ moki, ɛkɛ yenti Tɛrtooloc. Tɛrtooloc neeniyɛ, ɛkɛ a mena urkinti jiek ma ñomgɛnti ne pwadan ɔci ɛkɛ eyɛ ma acaan ma buagɔn dala ɛkɛ ḍuaŋa ṭɔɔlɛ myettɛ te jyek Buuluc non godanti. ² Ɔci ma wyetkɛn ḍɔɔlɛ buagɔn gɔrti jyek Buuluc. Ɔci ne Buuluc borkiti mayɛ, Tɛrtooloc jɔɔtcin ñamu ɔci gɔkcin agi, “I Pilikc, i a mena pwadan, coodi pwani bala ban ɔɔn acaan te i. Ɔci te jyek i mokiyɛ, naŋka pwadin bɛɛn ban ɔɔn acaan i ñingu tɛy tɛyo. ³ Ɔci ma ɔɔn baan warda yomgɛn pwad pwad iti oŋkanda. ⁴ “Ɔɔn buagɔn i taabba te jyek ɔɔn bɛɛ. A ɔŋŋi ‘ya buaga gɔkka iti jwali ne ḍuulan budan acaan i yomu pwad pwado. ⁵ Ɔɔn gɔrnɔn ‘wana neeni ɛkɛ bala yooci naŋki ma Icrayiilti baan warda, ɔci ɛkkɛn bala tyewɔ te jiek te naŋki ɛkɛ neeni. Ɛkɛ a ḍuaŋa maka bartan ma agi Ma Najarɛt, jyek mali ɛkkɛn da pookɛn. ⁶ Ɔci oŋ gɛɛltiyɛ, ɛkɛ noŋi on Juaŋ ona tolan yaadɛ, yeti ɛkɛ muŋŋɔn ɔɔn. [Ɔci ɔɔn buagɔn ɛkɛ noŋdɔn godan bala ba jyek ganuun ɔɔn. ⁷ Oŋ yeti ḍuaŋa tolan yenti Licyac bɛɛn ɔci ɛkɛ eññɛ ne pɛñan te ɔɔnti. ⁸ Ɔci Licyac gɔkcin agi maka tɛki Buuluc warɛ neeniyɛ, dala ɛkkɛn bɛya i ñamuti wɛnni.] Ɔci acca kan i gɔrca jyek ɛkɛyɛ, jyek ɛkɛ ŋeejja i, ɔci tɔmta tɔɔmmɔn ɔɔn ɛkɛyɛ, ŋeejja i moki.” ⁹ Ɔci ma Icrayiil gɔkcin agi, “Ɛɛ, jiek bala a ɔɔn.” ¹⁰ Ɔci ḍuaŋa ṭɔɔlɛ Buuluc gɔmnɛ bieŋɛ agi dala ɛkta gɔktɔ daŋkun, ɔci Buuluc gɔkcin agi, “Çeej ‘ya i a ḍuaŋa godan kɛɛn ɔɔn ma Icrayiil neeni te baaṭi doki. Yuong i a ḍiɛkan bɛɛ. Ɔci acaan a ɔŋŋiyɛ, ‘ya da gɔkka jyek ‘ya iti te yoma ñɔyan. ¹¹ Kan i jiek gwala jitin ne pwadanyɛ, ŋeejja i ‘ya ati ban Urcaliim te baaṭi bɛɛ. Nink ‘ya ninka atta ban Urcaliimyɛ, a inyaakkɛn wyetkɛn ne yyɛɛwɔ budan. ‘Ya ati morcan Jwaŋa Tolanti aŋan. ¹² ’Ya yuarka ma oŋ gɛɛlti tyewwin i menga on Juaŋ ona tolanti neeni bɛɛ. Ɔci ne ‘ya baala oorga morki ma Juaŋtiyɛ, ‘ya noŋ jyeka yeyin gɛɛg mati bɛɛ, ɔci ma lyɛli te jyek ‘ya gɛɛg bɛɛ. Ɔci baan konɛti moki jyeka yeyin gɛɛg bɛɛn te ‘ya bɛɛ. ¹³ Maka gɔki agi ‘ya yaajjɔ neeniyɛ, ɛkkɛn men gɛɛl gen kona tɔɔmki ɛkkɛn ‘ya acca neeni oodɛ bora iti bɛɛ. ¹⁴ ’Ya gɔkka ɛkkɛti awarɛ, ‘ya mor Jwaŋ yɔrg ikinti neeni te Pɔy Yaccu neeni, ɔci ma Icrayiil ɛkkɛn gɔki agi pɔya moṭa ‘ya neeni yaayɔ agi damgɔn. Yeti ‘ya tiek jyek Muuca gɛɛg bɛɛ, ɔci ‘ya tiek jyeka kiiwɛ maka bɔwan Jwaŋa Tolan gɛɛg bɛɛ. ¹⁵ Maka tɔɔmi ‘ya neeniyɛ, ɛkkɛn gɔki agi Juaŋ maka pwadgɔ luolda ñaalɔ, ɔci maka yiegɔ moki luolda ñaalɔ. Ɔci ‘ya jyeti gɔk a ɔɔn daŋkun. ¹⁶ ’Ya baal poŋ ka dala ‘ya noŋja ne pwadan Juaŋti ɔci mati oŋkanda, acaan ‘ya buaga naa yom ‘ya wiakti te naŋka yeyin neeni gɛɛg bɛɛ. ¹⁷ “Yuong gɛɛgti ‘ya baaw ban Urcaliim, ɔci acca ‘ya bɛɛn ɔci ‘ya eccan bilk gɛɛg, ɔci bilka neeniyɛ, ‘woñgan ‘ya kɛɛn ɔɔn neeni budan. Ɔci waka ‘yɛrtan ma Juaŋti moki owwan ‘ya daŋkun. ¹⁸ Ɔci ‘ya baal noŋ naŋka neeni on Juaŋ ona tolan, ɔci ‘ya noŋjan ba naŋki ma Icrayiil te jyek ywaŋi ma waakɛn Juaŋ ñamɛti, ɔci ne ‘ya naŋka neeni cwammayɛ, ‘ya yuarka maka tɔɔmi ‘ya neeni. ‘Ya balgin i ma gɛɛg bɛɛ. ‘Ya baal paru. Ɔci jyeka yeyin baawo. ¹⁹ Maka ‘ya yuarka on Juaŋ ona tolanyɛ, gena ma Icrayiil maka bɛɛn te ban Ecya. Kan ɛkkɛn balki jiekyɛ, dala ɛkkɛn bɛya nona iti neeni, aŋka ɛkkɛn gɔkti jyeka tɔɔmki ɛkkɛn ‘ya neeni. ²⁰ Ɔci maka bala wɛnni acca kan gena yaayan gɛɛl yuarɛ ɛkkɛn ‘yati te oŋŋa Maka Gɔṭi Jiek gɔrki jyek ‘ya neeniyɛ, dala ɛkkɛn gɔkti. ²¹ Gena jwalla yaanna ‘ya ɛkkɛnti kaapun, ne ‘ya gɔŋna agi, ‘Acca ‘ya yɔɔd ɛkkɛ ñomgɔti wɛnni te oŋŋa neeni aŋka ɛkkɛ goddɛ ‘ya te jyenna ‘ya jyetta ka maka tuun jɔŋdi ñaalɔ te kolkti tɛɛti mokiy.’ ” ²² Pilikcyɛ, jyek Pɔy Yaccu ŋeejɛ ɛkɛ ne pwadan, ɔci ne ɛkɛ tieŋni jyek maka bɛɛn ɛkɛti neeniyɛ, ɛkɛ gɔkcin ɛkkɛnti agi, “Jiek bawwin acca. Ne Licyac mena ḍuaŋa ackan neeni bɛɛdiyɛ, ‘ya jyek ɛkkɛ gwaldi jitin ne pwadan waakɛnda.” ²³ Ɔci Pilikc gɔkcin ḍuaŋati agi, “Dala i gɔrca Buuluc, ɔci kan mung Buulucn buagɔn bɛya ɛkɛtiyɛ, dala ɛkkɛn bɛya ɔɔn aŋka ɛkɛ maktan te waka bala ɛkɛ buagiy.” ²⁴ Ɔci ne nink gɛɛg bɛɛki borayɛ, Pilikc bɛɛn i ɛŋ ɛkɛ Drucilla. Drucilla neeni a men ma Icrayiil. Ɔci Pilikc Buuluc bornɛ, ɔci ne Buuluc bɛɛni nona ɛkkɛntiyɛ, ɛkkɛn bala tyeŋi jyek ɛkɛ. Buuluc bala gɔki ɛkkɛnti te jyek jyeni ɛkɛ Yaccu Kiṭɔti. ²⁵ Ɔci ne Buuluc baali gɔki ɛkkɛnti te jyek naŋka pwadin, ɔci te tiita ma tiecki waakɛn, ɔci te jyek oŋŋa bɛya a oŋ godan Juaŋyɛ, Pilikc buayi ɔci gɔkcin ɛkɛti agi, “I ɔgdi ootta acca. Ne wɔɔka ikin gɔrtin jiek iki i baldiyɛ, i oŋ bortin ‘ya oŋo.” ²⁶ Pilikc bala poŋi agi Buuluc ɛkɛ ‘wondɛti bilk kaapun, ɔci acaan a ɔŋŋiyɛ, ɛkɛ Buuluc bornɛ oŋki ne coŋɔn aŋka ɛkkɛn gɔwwɔ yaakkɛn. ²⁷ Ɔci ne yuonga ne yyɛɛwɔ bɛɛki borayɛ, mena parɛ aŋi ḍuaŋa ṭɔɔlɛ non Pilikc. Ɛkɛ yenti Pɔrcyac Pɛctac. Ne kanŋa Pilikc baaniyɛ, ɛkɛ Buuluc dalnɛ te ciginji ɔɔn. Ɛkɛ Buuluc dalnɛ te ciginji a ɔɔn, acaan ɛkɛ buagɔn dala ma Icrayiil yomgɛn pwaddi.

¹ Ɔci Pɛctacyɛ, ne ninka ɛkɛ aŋŋɛ ḍuaŋa ṭɔɔlɛ akki ḍoogɔ ban Cɛcariiyayɛ, ɛkɛ jɔŋŋin te bana neeniti ɔci ati ban Urcaliim. ² Ɔci gaciicin ḍwaŋin ma Icrayiil ɔci maka ḍwaŋinyɛ, jyeka tɔɔmki ɛkkɛn Buuluc neeniyɛ, eyɛ ɛkkɛn Pɛctacti. Ɛkkɛn ‘yeṭi tooccin Pɛctacti te Buuluc agi, ³ “Dala Buuluc oodda ban Urcaliim.” Ɛkkɛn tooccin ɛkɛti a ɔɔn acaan ɛkkɛn jiek ñaagɛyɔ ɛkkɛn buagɔn Buuluc noktan yomɔ. ⁴ Ɔci Pɛctac kɛkcin ɛkkɛnti agi, “A’a, Buuluc bala jiju ciginji ban Cɛcariiya, ɔci ne cwakanti ‘ya ootta ban Cɛcariiya aŋan daŋkun. ⁵ Dala ma ɛkkɛ maka ñingɛn tɛyan ɛkkɛn gɛɛg ooddin iki ‘ya. Ɔci kan gena naŋŋɛ Buuluc yaayan gɛɛl bala dala ɛkkɛn gɔkti.” ⁶ Pɛctac ɛkɛ yeddin te ban Urcaliim bala ba nink ne dɔɔyɔ wyetkɛn ne ḍoogɔ walla ba nink a inyaakkɛn moki ɔɔn hayya ɛkɛ oŋ atti ban Cɛcariiya oŋo. Ɔci ne liidɔ ɛkɛ cooccin kaakci godanti ɔci ɛkɛ ma myennɛ agi dala Buuluc oodi ma nona ɛkɛti. ⁷ Ɔci ne Buuluc bɛɛniyɛ, ma Icrayiil maka bɛɛn te ban Urcaliimyɛ, ɛkkɛn Buuluc bwodiwi, ɔci ɛkkɛn bala tɔɔmi ɛkɛ ne pɛñan, yeti te jyek ɛkkɛn neeniyɛ, ɛkkɛn menga gena naŋŋɛ Buuluc yaayan gɛɛl oonɛ bora ḍuaŋati bɛɛ. ⁸ Ɔci Buuluc gɔkcin jyek ɛkɛ daŋkun agi, “‘Ya ganuun ma Icrayiil gɛɛg bɛɛnji bɛɛ, ɔci ‘ya noŋi gena yaayan gɛɛl on Juaŋ ona tolanti neeni bɛɛ. Ɔci ‘ya jyek ḍuaŋa ma Ḍɔɔm ḍuaŋa tolan neeni gɛɛg bɛɛnji oŋgati bɛɛ.” ⁹ Yeti acaan Pɛctac buagɔn ma Icrayiil yomgɛn pwaddiyɛ, ɛkɛ gɔkcin tooccin Buulucti agi, “I buagi ikin oottin iki ‘ya ban Urcaliim aŋka ikin gɔrtin jyeka tɔɔmki ma i neenɛ?” ¹⁰ Ɔci Buuluc kɛkcin gɔki agi, “A’a, nona yɔɔda ‘ya neeniyɛ, gena non ḍuaŋa tolan ma Ḍɔɔm nona noŋki ma godany. ‘Ya noŋi gena yaayan gɛɛl ma Icrayiilti oŋgati bɛɛ. Jyeka neeniyɛ, ŋeej i doki. ¹¹ Kan ‘ya jyek ganuun akuuma lɛɛŋi jitin, ɔci kan naŋki ‘ya yaayɛ ne tolan aŋka akuuma buagɔn noki ‘yayɛ, ‘ya gɔkca genga bɛɛ. Yeti kan jyeka tɔɔmki ma ‘ya neeni a jyeka budanyɛ, men gɛɛl yaakinti ‘ya ‘wonda maka neeni bɛɛ. ‘Ya buaga ḍuaŋa tolan ma Ḍɔɔm gɔrti jyek ‘ya.” ¹² Pɛctac ɔci ma ɛkɛ warɛyɛ, ɛkkɛn bala gɔṭi jiek ñamu pookɛn, ɔci ne ɛkkɛn jyeka neeni ḍaakkitiyɛ, Pɛctac gɔkcin Buulucti agi, “I gɔk i ootta ḍuaŋa tolanti ban Ḍɔɔm aŋka ɛkɛ gɔrti jyek iyɛ, pwatcin. ‘Ya buaga dala i ootta aŋan.” ¹³ Ɔci ne nink gɛɛg bɛɛki borayɛ, mena ḍuaŋa tolan gɛɛl bɛɛn ban Cɛcariiyati. Ɛkɛ yenti Agriipa. Ɛkɛ bɛɛn iki ɛŋa yenti Bɛrniicɛ, ɛkkɛn bɛɛn ñiepi Pɛctac. ¹⁴ Ɔci ne ɛkkɛn ɛɛni coodi nink bɛɛki borayɛ, Pɛctac ḍuaŋa tolan neeni myennɛ te jyek Buuluc. Ɛkɛ gɔki agi, “Mena ‘uan gɛɛl bala wɛnni. Ɛkɛ dalnɛ Pilikc ciginji. ¹⁵ Ɔci ne ‘ya baala ban Urcaliimyɛ, gaciicin ḍwaŋin ma Icrayiil bɛɛni, ɔci cyekin moki bɛɛn ‘yati, ɔci ɛkkɛn bala tɔɔmi Buuluc. Ɛkkɛn buagɔn agi dala ‘ya jiek oljɔ Buuluc wyendanti. ¹⁶ Ɔci ‘ya ṭwokcan ɛkkɛnti ka naŋki ɔɔn ma Ḍɔɔm bala a ɔɔn bɛɛ. Ɔɔn noŋdɔn godan ñamu. Mena tɔmtan ma neeni gɔkti jyek ɛkɛ, ɔci ma gɔrti jyeka tɔɔmki ma ɛkɛ neeni bala a ɔki. Ɔci kan jiek yeyɔyɛ, ma oŋ noŋdi ywobji ɛkɛti oŋo. ¹⁷ Ɔci maka neeni bɛɛnɔn dɔɔŋnɔn iki ‘ya wɛnni, ɔci ne liidɔ ‘ya cooccan kaakca noŋki ma godan, ‘ya kwaccan bɛɛ. Ɔci ‘ya gɔkcan mati ka dala Buuluc kootan ɛkkɛn orɔ nona ‘yati. ¹⁸ ’Ya baal poŋ ka Buuluc a nɔɔdɔn kaapun. ‘Ya gɔk ka naŋki ɛkɛ yaayɛ kaapun. Yeti ne maka tɔɔmi ɛkɛ bɛɛkiyɛ, ɛkkɛn bala tɔɔmi ɛkɛ te jyeka yeyin gɛɛg bɛɛ. ¹⁹ Ɛkkɛn bala tɔɔmi ɛkɛ te jyek mali ma Icrayiil pookɛn budan. Ɛkkɛn bala tɔɔmi ɛkɛ te jyek men gɛɛl yenti Yaccu. Ɛkɛ tuuni, yeti Buuluc bala gɔki te jyek ɛkɛ agi ɛkta baalɔ tɛɛtɔ. ²⁰ Acaan ‘ya yaakati jyeka neeni gwaldi jitin ne pwadan bɛɛyɛ, ɔci ‘ya tooccan Buulucti, ka dala ɛkɛ ooddi ban Urcaliim aŋka ma gɔrti jyek godan aŋan. ²¹ Ɔci Buuluc kɛkkin te woon ɛkɛ gɔki agi dala ɛkɛ kɛɛdɛti ñin ma ɔɔn ne ḍuaŋa tolan ma Ḍɔɔm aŋka gɔrta jyek ɛkɛ ɔɔn. Ɔci acaan a ɔŋŋiyɛ, ‘ya gɔkcan mati ka dala ɛkɛ gwaltan ma ne pwadan ne oŋŋa ‘ya ɛkɛ cunda ḍuaŋa tolan ma Ḍɔɔmti bɛɛdi ɔɔn.” ²² Ɔci Agriipa gɔkcin Pɛctacti agi, “‘Ya buaga tieŋŋa jyek ɛkɛ paru.” Ɔci Pɛctac ṭwokcin ɛkɛti agi, “Ne liidɔ i tieŋja jyek ɛkɛ.” ²³ Ɔci ne liidɔ Agriipa bɛɛn i Bɛrniicɛ. Ɛkkɛn bɛɛn i maka pookɛn maka a ḍuaŋan ḍwaŋin, ɛkkɛn bɛɛn ɛŋi bworŋin akuuma waakɛnti i maka ñingɛn tɛyan bana neeniti. Ɔci waak waakɛnda pwanna pwanno. Ɔci ɛkkɛn kaaccin orɔ ona ḍworki ma wyetkɛn, ɔci ɛkkɛn cooccin iñɔ, ɔci Pɛctac gɔkcin mati agi, “Dala Buuluc oodi ma orɔ!” Ɔci ne Buuluc koonɛ orɔyɛ, ²⁴ ɔci Pɛctac gɔkcin agi, “I ḍuaŋa Agriipa, ɔci maka bala wɛnni waakɛnda, acca dala ɛkkɛ gɔrtɛ gena ‘wana tɔmtan ma Icrayiil waakɛnda neeni. Ne ‘ya baala ban Urcaliimyɛ, ɛkkɛn bɛɛn ‘yati tɔɔmi ɛkɛ. Ɔci wɛnni moki ɛkkɛn bɛɛn ‘yati moki, ɔci bala tɔɔmi ɛkɛ moki. Ɛkkɛn gɔki ‘yati a ñaccu agi naa ‘ya ‘wana neeni daljɔ ciyɔ tɛɛtɔ moki bɛɛ. Agi dala ‘ya ɛkta nogjɔ. ²⁵ Yeti ne ‘ya gɔrna jyek ɛkɛyɛ, ‘ya gena yaayan gɛɛl yuarŋ ɛkɛti aŋka ‘ya ɛkɛ nogda bɛɛ. Ɔci acaan ɛkɛ gɔki agi dala ḍuaŋa tolan ma Ḍɔɔm aŋka gɔrtɔ jyek ɛkɛyɛ, ‘ya gɔkcan ka ‘ya ɛkɛ cundi ḍuaŋa tolanti ban Ḍɔɔm. ²⁶ Yeti acaan ‘ya jiek jitkɛn yuarcan men bɛɛyɛ, ɔci ‘ya yaakati kiejja genga men ḍuaŋa tolanti bɛɛ. Ɔci a ɔŋŋiyɛ, ‘ya ɛkɛ owwan i ñamuti Agriipa ḍuaŋa tolan, ɔci maka pookɛn neeni ñomgɛnti. Ɔci ne i gɔrti jyek ɛkɛyɛ, ‘ya oŋ kiejja jiek oŋo. ²⁷ Kan men gɛɛl bala ciginji, ɔci ‘ya ɛkɛ cundi ḍuaŋa tolan ma Ḍɔɔmti budan, ɔci ḍuaŋa tolan neeni myetka te jyek naŋki ɛkɛ bɛɛyɛ, a ɔɔn yɔmjin bɛɛ, yaayɛ.”

¹ Ɔci Agriipa gɔkcin Buulucti agi, “Kan i buagi gɔkca jyek iyɛ, dala i gɔkca.” Ɔci Buuluc bieŋɛ laŋnɛ ñaalɔ ɔci gɔkcin agi, ² “I Agriipa ḍuaŋa tolan, ‘ya yomu ñɔy ñɔy acaan ‘ya buaga gɔkka jyek ‘ya jyeka tɔɔmki ma Icrayiil ‘ya neeni iti, ³ acaan i jyek naŋki yɔrg ikin ma Icrayiil waakɛnda ŋeej, ɔci jyeka gɔwwin tyewwin ikin ma Icrayiil moki ŋeej i. Naa i taabba te jyek ‘ya bɛɛ, dala i tieŋŋa ne pwadan. ⁴ “‘Ya ŋeecka ma Icrayiil acca bɛɛ. ‘Ya ŋeecka ɛkkɛn te baaṭi doki ne ‘ya wona ḍiɛra men. Ne ‘ya baala ciyin iki kɛɛn ɔɔn, ɔci moki ne ‘ya baala ban Urcaliim naŋki ‘ya ŋeecɔn ma Icrayiil waakɛnda. ⁵ Çeecɔn ɛkkɛn te ñamu doki ‘ya a men ma Pɛriciin, ɔci ‘ya baal ciy te jyek ma Pɛriciin. Ɔci ŋeecɔn ɛkkɛn moki Ma Pɛriciin neeniyɛ, ɛkkɛn a ma ikin ma Icrayiil maka tieci jyek ganuun mali ikin ma Icrayiil warɛ ne tɛyany. Yeti ma Icrayiil maka tɛki ‘ya waru neeni jyeka ‘ya aga men ma Pɛriciin neeniyɛ, owwɛ ɛkkɛn bora bɛɛ. ⁶ Ma bala noŋi godan ‘yati, acaan ‘ya jyeti jyeka guaŋŋɛ Juaŋ yɔrg ikinti te baaṭiy. ⁷ Jyeka neeniyɛ, gena jyek jɔŋŋin ma jɔŋti ñaalɔ te kolk jitin tɛɛtki mokiy, jyeka kɛɛtan kɛɛn Ma Icrayiil kɛɛna a inyaakkɛn wyetkɛn ne yyɛɛwɔ neeniy. Ɔci ɛkkɛn bala moṭi Juaŋti oŋkanda acaan ɛkkɛn buagɔn jyeka neeni dala dɛndi bora. Ḍuaŋa tolan gena jyeka tɔɔmki ma Icrayiil ‘ya neeni. ⁸ Te gena yeti ɛkkɛ gɔkɛ agi Juaŋ yaakinti ma luoldɛ ñaalɔ te koolji tɛɛti moki bɛɛy? ⁹ “Ɔci te ñamu daŋkun ‘ya baal poŋ ka dala ‘ya noŋja kanŋa ne tolan, aŋka jyek Yaccu Kiṭɔ men ma Najarɛt neeniyɛ, baadi. ¹⁰ Gena jyeka bala naŋdi ‘ya ban Urcaliim neeni. Gaciicin ḍwaŋin ma Icrayiilyɛ, ɛkkɛn ‘ya ‘woñka worga, ɔci te jyek ɛkkɛnyɛ, ‘ya ati Ma Kiṭɔ owwan ɔci oljan jiju ciginji a ḍiɛkan bɛɛ. Ne ma balki nokki maka neeniyɛ, jyek ‘ya daŋkun bala ba jyek maka noki ma neeni ɔɔn. ¹¹ Ɔci oŋkanda ‘ya baal noŋ ne yaayan Ma Kiṭɔti oorga morki ma Icrayiil Juaŋti. Ɔci ‘ya baal ‘yer ɛkkɛn ka dala ɛkkɛn jyenna jyetki ɛkkɛn Yaccuti wanna daltan. Ɔci acaan ‘ya yomu yaayɛ Ma Kiṭɔti ne pɛñanyɛ, ‘ya ati lier ɛkkɛn ne bonka loonanti ɔɔn. ¹² “Ne ‘ya baala noŋa naŋka neeni menyɛ, oŋ gɛɛlti ‘ya baal ootta ban Ḍimaackati, ɔci worga gaciicin ḍwaŋin ma Icrayiilyɛ, bala ‘yati doki, ɔci ‘ya ‘woñka ɛkkɛn kanŋa neeni. ¹³ I ḍuaŋa tolan, ne ‘ya baala yom menyɛ, oŋ waŋɛ bala yɔɔd yeccu, ɔci gen gɛɛl dɛkkin ‘yati iki maka atin iki ‘yay. Ɛkɛ dɛkkin ne pɛñan te ñaalɔ. Oŋ waŋɛ buannɛ ɛkɛ te dyɛŋŋo. ¹⁴ Ɔci ɔɔn ḍɛɛmnɔn iñɔ ṭɛɛrji waakida. Ɔci ‘ya tieŋŋan pwan gɔkkin ‘yati te tuk ikin ma Icrayiil agi, ‘Caawul, Caawul, i noŋ ne yaayan ‘yati a ñaccu ɔɔn ogo? I yaci waru paru te naŋka naŋa i yaayan ‘yati oŋkanda neeni. I baal ba yana yaci warɛ parɛ yana yɔɔwi kɔmñi weegɛn ne weegɛn baali jiebbi cieti ɛkɛy.’ ¹⁵ “Ɔci ‘ya gɔkcan ɛkɛti agi, ‘Ciɛggɔn, i a menɛ?’ “Ɔci Ciɛggɔn gɔkkin ‘yati agi, ‘Gena ‘ya Yaccu, mena naŋa i ne yaayan oŋkanday. ¹⁶ Jɔlla ñaalɔ yɔɔtca te ciegu acaan ‘ya waru lɛɛllan bora iti buaga i naŋdin a mena noŋi kanŋa ‘ya. ‘Ya buaga i ma myetka te waka yuarŋi i acca, ɔci moki te waka i nɔɔttin te ɛkkɛn ne baaṭiy. ¹⁷ Ɔci i yɔɔdin ‘ya oŋkanda te ma Icrayiil, ɔci i moki yɔɔdin ‘ya te Keedin Pookɛn maka i cundin ‘ya ɛkkɛnti daŋkun neeni. ¹⁸ ’Ya i cundin aŋka i ɛkkɛn ñingɛn pɔkka ɔci ɛkkɛn waakɛn yaltan te nona mielti ɔci ooddi te nona bɔwan, ɔci ɛkkɛn mwondi te jyek Jwaŋa Yaayan ɔci dɔɔkti Jwaŋa Tolanti. Ɔci a ɔŋŋiyɛ, ɛkkɛn bɔɔktɛ Juaŋ te nɔji ɛkkɛn, ɔci ɛkkɛn ñoodi a cyɛɛlɔ i maka jyeti ‘yati maka kɛññan ‘ya boray.’ ¹⁹ “Acaan a ɔŋŋiyɛ, Agriipa ḍuaŋa tolan, ‘ya yaakati jyeka bɛɛn ‘yati te ñaalɔ neeniyɛ, bɛɛdji bɛɛ. ²⁰ Ɔci te ñamu ‘ya baal lor maka ban Ḍimaacka ɔci ban Urcaliim. Ɔci ne baaṭi ‘ya ati lor maka ban Yahuudiya warda, ɔci ne baaṭi moki ‘ya ati lor Keedin Pookɛn daŋkun. ‘Ya ɛkkɛn myetkan ka dala ɛkkɛn waakɛn yaltan, dala ɛkkɛn yordi Jwaŋa Tolanti, ɔci dala ɛkkɛn ciya ba maka waakɛn yali te nɔji ɛkkɛn awarɛ. ²¹ Acaan ‘ya baal lor ma a ɔɔnyɛ, ‘ya mukka ma Icrayiil on Juaŋ ona tolan neeni. Ɔci ɛkkɛn buagɔn noki ‘ya. ²² Yeti ‘ya magda Juaŋ oŋkanda, ɔci acca neeniti moki ɔɔn. Ɔci acaan a ɔŋŋiyɛ, ‘ya yɔɔd wɛnni miet maka ḍwaŋin ɔci maka ḍyɛrin te jyeka awarɛ neeni. Jyek Muuca ɔci jyek maka bɔwanyɛ, ‘ya ɛkkɛn aaŋiyɔ bɛɛ. ²³ Ɛkkɛn bala gɔki te jyek naŋka bɛya ne ŋoyɔ agi ne Kiṭɔ bɛɛddayɛ, ɛkta wardan eeddɔ ɔci ɛkta jɔldɔ ñaalɔ moki te koolji tɛɛti moki. Ɛkta agdɔ mena jɔɔttɔ te jɔŋŋin ñaalɔ te koolji tɛɛti moki. Ɔci agi a ɔŋŋiyɛ, ɛkta agdɔ mena dɛki ma Icrayiil, ɔci Keedin Pookcɛn daŋkun.” ²⁴ Ɔci ne Buuluc baali gɔki jyek ɛkɛyɛ, Pɛctac yaadjin gɔkcin ɛkɛti agi, “Hay, Buuluc, i noŋ agdi amgɔn te jyeka i lalkiti ma ne coŋɔn neeni!” ²⁵ Ɔci Buuluc ṭwokcin gɔkcin ɛkɛti agi, “I Pɛctac Mena Tolan, ‘ya noŋ agdi aamma bɛɛ. Jyeka guagdi ‘ya neeniyɛ, gena jyeka awarɛ, a jyek amji bɛɛ. ²⁶ Jyeka neeni ŋeej i Agriipa ḍuaŋa tolan, ɔci ‘ya yaakati gɔkca iti ne pwadan te jyeka neeni. Naŋka neeniyɛ, gɛɛl kwoy i bɛɛ. Naŋka bɛɛn Yaccuti waakɛnda neeniyɛ, ɛkkɛn cogiyɔ ma bɛɛ, ɛkkɛn naŋɛ ma a lyɛlta waakɛnda. ²⁷ I Agriipa ḍuaŋa tolan, i jyetti jyek maka bɔwanɛ? Çeej ‘ya doki i jyetti jyek ɛkkɛn.” ²⁸ Ɔci Agriipa ṭwokcin Buulucti agi, “I poŋ gɔk ‘ya naŋda i agdi men Ma Kiṭɔ doki ne pɛñan ɔɔn?” ²⁹ Ɔci Buuluc ṭwokcin gɔkcin ɛkɛti agi, “Dala te i ɔci maka tyeŋi jyek ‘ya neeniyɛ, dala te ɛkkɛ waakida agdɛ Ma Kiṭɔ ba ‘ya ɔɔn, kan acca lakun doki, walla ne baaṭi, yeti ‘ya buaga ɛkkɛ agdɛ maka ḍɛktɛ ma te jiŋgin ba ‘ya ɔŋŋi bɛɛ.” ³⁰ Ɔci Agriipa ḍuaŋa tolan jɔŋŋin ñaalɔ, ɔci ḍuaŋa ṭɔɔlɛ moki jɔŋŋin ñaalɔ, ɔci Bɛrniicɛ moki jɔŋŋin ñaalɔ, ɔci maka bala ciyi i ɛkkɛn moki jɔllin ñaalɔ. ³¹ Ɔci ne ɛkkɛn kaacki bora te ona neenitiyɛ, ɛkkɛn bala gɔwwɔ yɔtin pookɛn te jyek Buuluc agi, “‘Wana neeni noŋi gena yaayan gɛɛl aŋka ɛkɛ noktin ikin bɛɛ, ɔci moki ɛkɛ noŋi gena yaayan gɛɛl aŋka ikin ɛkɛ oltin jiju ciginji bɛɛ.” ³² Ɔci Agriipa gɔkcin Pɛctacti agi, “Te ɛkɛ toonni iti agi ɛkɛ ootci ḍuaŋa tolan ma Ḍɔɔmti bɛɛyɛ, te ɛkɛ pɔkka i doki.”

¹ Ɔci ne ɛkkɛn jiek ḍaakkiti agi ɔɔn ootcɔn ban Ḍɔɔm te murka tolanyɛ, ɛkkɛn Buuluc ‘woñgi ḍuaŋa, ɔci maka pookɛn maka bala jiju ciginji daŋkun, ɛkkɛn ‘woñgi ḍuaŋa daŋkun aŋka gwaldɛ ɛkɛ yomu te wona ɛkkɛn ootti ban Ḍɔɔm. Ḍuaŋa neeni ɛkɛ yenti Julyac. Ackan ɛkɛ ma boṭi agi ackan ḍuaŋa tolan ban Ḍɔɔm. ² Ɔci ɔɔn taamnɔn te murka tolan gɛɛlti te ban Adramittyam. Murka neeni buagɔn woon ati ooddi boddi te waan taaŋɛ ooddi ban Ecya aŋan. Ɔci ɔɔn attɔn. Ɔci men gɛɛl balgɔn iki ɔɔn murka tolanji. Ɛkɛ yenti Ɛrictaarkoc. Ɛkɛ bɛɛn te ban Tacalunika ban Macɛdɔɔnyaji. ³ Ɔci ne liidɔ ɔɔn dɛnnɔn ban Ciḍɔɔn, ɔci murka tolan yɔɔtcin iñɔ bana neeniti. Ɔci Julyac yomɛ pwatcin Buulucti, ɔci ɛkɛ gɔkcin Buulucti agi dala ɛkta ooddɔ jyɛyi iki mung ɛkki aŋka ɛkta magdi ɛkki. ⁴ Ɔci ɔɔn jɔŋnɔn te bana neeniti, ɔci acaan jwami tol tol ɔci ɔɔn gallinjiyɛ, ɔɔn murka ṭwoŋŋɔn pɔya parɛ ati booti Kaŋ Cayprac taaŋɛti nona jwami baawiy. ⁵ Ɔci murka tolan yɔɔtcin iñɔ bɛɛ, ɛkɛ ati ati ati ne ñamu, ɔci bala booti ban Ciliicya taaŋɛti, ɔci ban Pampiilya taaŋɛti moki. Yeti murka orcinti bonka neeniti bɛɛ, bala Galŋa Tolan yiɛŋɛji, ɔci ati ne ban Mayra ban Licyaji ɔɔn. ⁶ Ɔci bana neenitiyɛ, ḍuaŋa murka tolan maka ban Alɛkcaandriya yuarŋɛ. Murka tolan neeniyɛ, buagɔn woon ooddi ban Ḍɔɔm. Ɔci te jyek ḍuaŋayɛ, ɔɔn taamnɔn murka tolan neeniti. ⁷ Ɔci ɔɔn attɔn. Ɔci murka tolan ati ne pɛñan bɛɛ, ati ne maalan ṭɔɔlɛ, acaan jwami tol tol ɔci woon pwatcin bɛɛ. Ɔci ɔɔn attɔn goṭṭɔn ban Nidoc. Acaan jwami tol tol ɔci ɔɔn gallinji a ɔɔnyɛ, murka yaakinti woon a tyɛlga bɛɛ, ɛkɛ ooddi gɔ jyetci bora ɔɔn. Ɔci ɔɔn attɔn te pɔya parɛ, ɔci ɔɔn dɛnnɔn Kaŋ Kriit. Kaŋ Kriit neeniyɛ, a nona tolan. Ɔci ɔɔn attɔn boottɔn kaŋa neeni taaŋɛti nona jwami baawiy, ɔci ɔɔn goṭṭɔn noon gɛɛl bala yenti Calmɔɔnɛ. ⁸ Ɔci ɔɔn attɔn attɔn attɔn boottɔn Kaŋ Kriit taaŋɛti moki, ɔci ɔɔn dɛnnɔn baan gɛɛl bala bartan ma a Nona Yɔɔdki Murkan Nona Pwadan. Bana neeni cualcinti ban Laciiya. ⁹ Ɔci murka tolan yɔɔni bana bartan ma a Nona Yɔɔdki Murkan Nona Pwadan nink kɔɔna kɔɔnno. Ɔci ne ninka Gworki Ma Koñ bɛɛki bora dokiyɛ, ɔci noon ŋeejji ma aŋi ñaal jiñɛ doki, ɔci murkan yaakinti woon ne pwadan bɛɛ acaan te ñaaljiyɛ, jwami tol tolo. Ɔci Buuluc gɔkcin mati agi, ¹⁰ “Hay, ɛkkɛ ‘uayo! Dala ɛkkɛ woŋgɔ tiittɛ! Gɔṭṭɛ, yuarca ‘ya woon tɛy tɛy yomɔ galŋji, kan ikin oottin ɔɔnyɛ, murka lɛɛkti dita, ɔci waka bala jiju murkaji neeni ḍakti. Ɔci ikin ma gɛɛg daŋkun ḍakti moki.” ¹¹ Yeti Julyac ḍuaŋa ackan bala gɔṭi jiek i mena nɛɛyi murka i murka weegɛn, ɔci Julyac tieŋŋin jyeka guagdɛ Buuluc neeni bɛɛ, yeti ɛkɛ tieŋŋin gena jyek murka weegɛn i mena nɛɛyi murkay. ¹² Ɔci acaan nona yɔɔdi murka tolan neeni pwad pwad te coodi ñaal jiñɛ bɛɛyɛ, maka coŋin gɔki agi dala murka ooddɔ ɔɔn, ma pottɔ woon ɔɔn, ɛkkɛn buagɔn dala murka ooddi ne bana yenti Pinikc aŋka ɛkkɛn yuoddi iñɔ bana wannati. Ɔci ban Pinikc neeniyɛ, ɛkɛ a nona yɔdki murkan Kaŋ Kriit taaŋɛti te kaŋ taaŋŋa yordi pɔya nona luutti iñɔ oŋy. ¹³ Ɔci ne jwami yoŋni ne ḍiɛran ṭɔɔlɛ te pɔya cuayatiyɛ, maka neeni ɛkkɛn gɔki agi, “Ahaa, acca woon pwanna pwanno. Ikin dɛntin ne pɛñan.” Ɔci gena cyɛgan luuttan ma iñɔ aŋka yɔɔddi murkayɛ, bala iñɔ pietin, ɔci ɛkɛ nɔɔbbɛ ma ñaalɔ te pietin, ɔci ḍuacci murka tolan konɛti. Ɔci murka oŋ luoṭi oŋo. Ɔci murka bala booti te Kaŋ Kriit taaŋɛti ne cwakanti. ¹⁴ Yeti ne ɛkkɛn atki ñamu ne ḍyɛṭ ṭɔɔlɛyɛ, jwamma tolan yoŋŋin te pɔya ‘wollanti te kaŋ wyeñɛtiy. ¹⁵ Ɔci murka tolan eññɛ jwami ne pɛñan. Murka tolan yaakinti jwami bɛɛdɛ jitin moki bɛɛ. Ɛkɛ buannɛ jwammo. Ɔci ɔɔn murka tolan dalnɔn ati parɛ amaam doki ɔɔn. ¹⁶ Murka tolan neeniyɛ, menin ḍiɛran bala eedɛ ɛkɛ jiñɛti oŋkanda. Ɔci oŋŋa ɛkkɛn jɔŋki te Kaŋ Kriityɛ, murka ḍiɛran neeni bala pieg wyetkɛnti. Ɔci ne jwamma tolan bɛɛni ne pɛñanyɛ, ma yaakinti murka ḍiɛran neeni oltan jiju murka tolan konɛti bɛɛ. Ɔci ne ɔɔn dɛnnɔn kaŋa ḍiɛran yenti Kɔdayɛ, ɔɔn murka ḍiɛran olnɔn jiju doki, yeti murka neeni naŋki ɛkɛ tɛy tɛyo, ɔɔn yaakɔnti ɛkɛ oldɔn jiju a cwakan bɛɛ. ¹⁷ Ɔci ne ɔɔn murka ḍiɛran neeni olnɔn jiju murka tolan konɛti dokiyɛ, ɔɔn murka tolan neeni ḍɛɛŋŋɔn te wyengo. Ɔci bworŋ murka tolan bworŋa ati ɛkɛ neeniyɛ, oljɛ ma ñaalɔ aŋka jwami murka eedɛ te pɔya parɛ acaan ma buayi murka dita eedɛ jwami nona ŋɔmiti. Çɔmma neeniyɛ, yaayɛ a niɛno. ¹⁸ Ɔci ne liidɔ jwamma tolan bɛɛn men. Ɔci pɔɔgi pieg bala ooddi ne ñaalɔ, ɔci murka tolan yaakinti woon moki bɛɛ. Ɔci acaan a ɔŋŋiyɛ, waka bala murka tolan konɛti neeni gɛɛg yiɛpcɛ ma ɔntɔ aŋka murka tolan pwardɛ. ¹⁹ Ɔci ne liidɔ moki maka kanŋan murka tolanyɛ, wyeng murka neeni yiɛpcɛ ɛkkɛn ɔntɔ. ²⁰ Ɔci oŋki gɛɛgtiyɛ, ɔɔn oŋ waŋɛ yuarŋɔn bɛɛ, ɔci moki te ween jiñɛyɛ, ɔɔn kɛltan yuarŋɔn bɛɛ. Jwami bala ne tolan. Te ñamu ɔɔn poŋɔn ka ɔɔn dɛndɔn. Ɔci acca paŋŋa neeni bala moki bɛɛ. Ɔɔn buayɔn ka ɔɔn ḍaktɔn, kaapun. ²¹ Ɔci ne ma balki atki oŋkɛn kɔɔnki kɔɔni te koñ a ɔɔnyɛ, Buuluc jɔŋŋin ñaalɔ te nona ɛkkɛn ñomgɛnti ɔci gɔkcin ɛkkɛnti agi, “Dala te ɛkkɛ tieŋnɛ jyek ‘ya. Ɔci te ikin yennin te Kaŋ Kriit aŋan. Ɔci kan a ɔɔnyɛ, te taab neeni bɛɛn ikinti bɛɛ, ɔci te waka bala murkati neeniyɛ, te ḍakcin bɛɛ. ²² Yeti acca moki ‘ya gɔkka ɛkkɛti, dala ɛkkɛ yomgɔ tɛya, acaan ikin men gɛɛl ḍakti bɛɛ. Gena murka tolan parɛ aŋka ḍakti. ²³ Acaan Wey ɔɔn Jwaŋa Tolan mena maldi ‘yayɛ, ɛkɛ malɛɛka gɛɛl cuonnɛ ‘yati weenji, ɔci ɛkɛ yɔɔtcin ‘ya taaŋuti, ²⁴ ɔci gɔki ‘yati agi, ‘Buuluc, naa i buay bɛɛ. I ḍakca bɛɛ. Ne baaṭi i yɔɔtca ḍuaŋa tolan ban Ḍɔɔm ñamɛti. Gɔṭṭi, acaan i magdi Juaŋ a ɔɔnyɛ, ɔci maka balgi iki i murka tolanji neeniyɛ, ɛkkɛn da magdɛ Juaŋ daŋkun ba i ɔɔn.’ ²⁵ Hay ɛkkɛ, dala ɛkkɛ yomgɔ tɛya! Acaan ŋeej ‘ya ikin maktin Jwaŋa Tolan ba naŋki ɛkɛ naŋka ‘ya myennati neeni. ²⁶ Yeti ne baaṭi ikin mɔrtin kaŋ wyeñɛ gɛɛlti ɔci murka lɛɛkti jitin.” ²⁷ Ɔci murka tolan bala ati amaam parɛ budan ɔɔn. Nink ɔɔn ninka balgɔn Galŋ Edriyajiyɛ, aŋi inyaakkɛn wyetkɛn ne ŋaanɔ. Ɔci te ninka neeniyɛ, te ween jiñɛ ba ne ween jiñɛ tuodan ɔɔn, maka kanŋan murka tolanti poŋi gɔki agi ṭɛɛr moki loonɔ bɛɛ. ²⁸ Ɔci ɛkkɛn wyenti ḍɛkkɛ guonan ɔci luutci iñɔ galŋji luopi galŋo, ɔci galŋ tuod twod men bala ba yardan a ma baan ne yyɛɛwɔ (40) ɔɔn. Ɔci murka tolan ati ñamu moki ne ḍiɛran ṭɔɔlɛ, ɔci gen luutci ma iñɔ moki, ɔci galŋ ṭaali baali ba yardan a men baan ne cyɛɛlɔ ɔci mena parɛ byeŋkɛ (30) ɔɔn. ²⁹ Ɔci ɛkkɛn buayi agi murka tolan dita ooddɔ pomk jitin, ɔci a ɔŋŋiyɛ, ɛkkɛn waka yɔɔddi murka tolan luutci iñɔ ne ŋaanɔ murka ŋwayɛti. Ɔci ɛkkɛn bala gɔki agi, “Dala noon bɔwa, hay!” ³⁰ Maka kanŋan murka tolanti neeniyɛ, ɛkkɛn noŋi yooŋdi ɔntɔ te murka ḍiɛran neeni lieda ɔɔn. Ɔci ɛkkɛn murka ḍiɛran neeni luutci iñɔ pietin doki. Ɛkkɛn noŋi ma ñingɛn, ɛkkɛn bala gɔki agi ɛkkɛn buagɔnti waka yɔɔddi murka neeni, oldɛnti luuttɛnti iñɔ pietin murka tolan ñamɛti. ³¹ Ɔci Buuluc gɔkcin ḍuaŋati ɔci ackanti agi, “Hay, kan maka kanŋan murka tolan neeni ciya murka tolanji bɛɛyɛ, ɛkkɛ ḍaktɛ waakida acca.” ³² Ɔci ackan ati, ɔci wyenga luotki ma murka ḍiɛran iñɔ neeniyɛ, ɛɛrɛ jitin, ɔci murka ḍiɛran neeni ati pieg wyetkɛnti parɛ budan ɔɔn. ³³ Ɔci te ween jiñɛ neeni ne noon noŋi bɔɔdi ɔɔnyɛ, Buuluc bala gɔki mati te jyek oomdin. Ɛkɛ gɔki agi, “Acca ninka ɛkkɛ ciyɛ budan te oomdin aŋi inyaakkɛn wyetkɛn ne ŋaanɔ doki. Te jyek murka tolan neeniyɛ, ɛkkɛ ommɛ gen gɛɛl bɛɛ. ³⁴ Dala ɛkkɛ omdɛ oomdin aŋka ɛkkɛ waakɔ tɛya, ɛkkɛ men gɛɛl ḍakti bɛɛ. Ɛkkɛ dɛndɛ baanji ne pwadan.” ³⁵ Ɔci ne ɛkɛ gɔŋni a ɔɔnyɛ, ɛkɛ byedg luullɛ bieŋɛti, ɔci ɛkɛ gɔkcin agi pwatcin Juaŋti te byedga neeni. Ɛkɛ gɔkcin a ɔɔn ma ñomgɛnti waakɛnda. Ɔci byedga neeni wɛɛnnɛ jitin, ɔci ɛkɛ omjin. ³⁶ Ɔci ɛkkɛn waakɛnda yomgɛn pwadgin, ɔci ɛkkɛn omjin oomdin daŋkun. ³⁷ Ɔɔn maka bala murka tolanjiyɛ, ɔɔn agɔn a miyyan ne yyɛɛwɔ ɔci ma baan ne ḍoogɔ mena parɛ byeŋkɛ, ɔci ne dɔɔyɔ wilin ne cyɛɛlɔ (276). ³⁸ Ɔci ne ɛkkɛn omki ne korkɛn yoŋkiyɛ, ɛkkɛn poka bala murka tolan konɛti neeniyɛ, yiɛpcɛ bora Galŋa Tolanji aŋka murka tolan pwardɛ. ³⁹ Ne noon bɔɔniyɛ, ṭɛra iwan yuarcɛ maka neeni, yeti ṭɛra neeni ñiyi ɛkkɛn bɛɛ. Ɔci nona ḍooñan yuarcɛ ɛkkɛn. Nona neeniyɛ, pwad pwad a ŋɔmi budan. Ɔci maka neeniyɛ, poŋi gɔki agi dala murka tolan ooddɔ dɛndɔ nona ḍooñan neeniti aŋka yɔɔddɔ waan tuktanti nona ŋɔmiti neeni. ⁴⁰ Ɔci waka cyɛgan yɔɔddi murkayɛ, wyeng ɛkkɛn ɛɛrɛ ma jitin, ɔci waka neeni dalji ɛkkɛn te pietin ɔɔn, ɔci waka nɛɛki ɛkkɛn murka neeniyɛ, cɔɔtcɛ noonɛnti, ɔci bworŋ murka wiɛnji ñaalɔ murka ñamɛti, ɔci murka tolan oŋ luoṭi noŋi dɛndi bora nona iwan. ⁴¹ Yeti murka tolan dɛñjin bora bɛɛ. Kaŋ wyeñɛ gɛɛl bala ḍiɛṭ ḍyɛr muulɛwi piego, ɔci yuarcɛ ɛkkɛn bɛɛ. Ɔci ŋɔmma kaŋ wyeñɛti neeniyɛ, murka tolan muŋŋɛ. Ɔci murka tuka ñamu dɔŋnɛ niɛnti yaakinti woon moki bɛɛ. Ɔci ŋwayɛ bala yɔɔd ñaalɔ, ɔci pɔɔgi bala jiebi ɛkɛ, ɔci ɛkɛ noŋi lɛɛkti jitin. ⁴² Ɔci ackanyɛ, ɛkkɛn gɔki agi, “Dala maka a kɛɛnk neeniyɛ, noktin.” Ɛkkɛn gɔki a ɔɔn acaan ɛkkɛn buayi te maka a kɛɛnk neeni. Ɛkkɛn gɔki agi ne maka neeni mualdi borayɛ, agi ɛkki dita kordɔ ɔntɔ. ⁴³ Yeti ɛkkɛn ma nogɛ bɛɛ. Ɛkkɛn dɛɛnɛ ḍuaŋa. Ḍuaŋa ma dɛɛnɛ a ɔɔn acaan ɛkɛ buagɔn naa Buuluc noktan ma bɛɛ. Ɔci ḍuaŋa gɔkcin mati agi maka yaakinti mɔɔlyɛ, dala ɛkkɛn kuaddi pietin ñamu mualdi ooddi nona iwan, ⁴⁴ ɔci maka pookɛn, maka kookinti muali neeniyɛ, dala ɛkkɛn ooddi te jang murka janga lɛɛktin neeni. Ɔci a ɔŋŋiyɛ, ma ati bora nona iwanti waakɛnda. Menga ḍakcin bɛɛ.

¹ Ɔci ne ɔɔn tonnɔn bora te galŋjiyɛ, ɔɔn myetkɔn ma agi kaŋ wyeñɛ neeniyɛ, gena kaŋ wyeñɛ bartan ma a Malta. ² Maka ciyi nona neenitiyɛ, ɛkkɛn yomgɛn pɔkki ɔɔnti, ɔci ɛkkɛn ɔɔn makkɔn. Ɛkkɛn maañ oljiti, ɔci ɛkkɛn gɔki ɔɔnti agi ma bɛɛdɔ oottɔ maccu. Ɛkkɛn ɔɔn orkinti maañ a ɔɔn acaan ñaal bala liɛbi ɔci jwami luy luyo. ³ Ɔci Buuluc bala lyemi jang daŋkun. Ɔci ɛkɛ jang oonɛ, ɔci ne ɛkɛ jang olnɛ maccuyɛ, kaaŋ bala jangti, ɔci ne jang waakɛn myɛlki te maañyɛ, ɔci kaŋa neeni kooyin bora te jangti ɔci Buuluc kaññɛ bieŋɛti, ɔci kaaŋ bala cual te ɛkɛ bieŋɛti. ⁴ Ɔci maka ciyi nona neeniti, ne gɔrki kaŋa neeni baali cuali te men bieŋɛti a ɔɔnyɛ, ɛkkɛn bala gɔwwɔ yɔtin pookɛn agi, “Hay, ‘wana neeni ɛkɛ nokkin menga. Ne ɛkkɛn bɛɛki te galŋjiyɛ, ɛkɛ ḍakcin galŋji bɛɛ, yeti acca ɛkɛ tuwa, kaapun.” ⁵ Yeti Buuluc kaaŋ byɛrnɛ maccu, ɔci kaaŋ ɛkɛ yannɛ bɛɛ. ⁶ Ɔci maka ciyi nona neenitiyɛ, ɛkkɛn bala gɔṭi Buuluc, ɔci ɛkkɛn bala poŋi gɔki agi ɛkta wardan wiɛndɔ wardanda ɔci ḍɛmdɔ tuudɔ ne pɛñan kaapun. Ɔci ne ɛkkɛn ɛɛni gwali Buuluc a ɔɔnyɛ, ɔci ne gena yaayan gɛɛl bɛɛni ɛkɛti bɛɛyɛ, ɛkkɛn jiek aagɛyɔ agi ɛkta agi juaŋo! ⁷ Ɔci ḍuaŋa tolan ḍuaŋa maka ciyi kaŋ wyeñɛti neeniyɛ, ɛkɛ yenti Poblyac. Ɔci kaŋ wyeñɛ neeniyɛ, noon gɛɛl a non Poblyac. Non ɛkɛ neeniyɛ, cualcinti nona ɔɔn tonnɔn bora te galŋji. Ɔci ɛkɛ gɔkkin ɔɔnti agi ɔɔn bɛɛdjɔn ban ɛkɛ. Ɔci ɔɔn attɔn ban ɛkɛ. Ɔci ɔɔn niinnɔn ban ɛkkɛn nink ne ḍoogɔ, ɔci ɛkɛ yomɛ pwana pwani ɔɔnti. ⁸ Ɔci wey Poblyacn bala niin iñɔ warɛ yaayɛ. Ɛkɛ warɛ myɛl myɛlo, ɔci ɛkɛ ‘yɛɛd a yimg moki. Ɔci Buuluc ati ḍieŋjin ɛkɛti, ɔci ne ɛkɛ cɔŋni Jwaŋa Tolantiyɛ, ɔci ɛkɛ byeŋkɛ tannɛ men warɛti, ɔci mena neeniyɛ, ywaŋŋɛ ɛkɛ doki. ⁹ Ɔci acaan mena neeni ywaŋŋɛ Buuluc a ɔɔnyɛ, maka pookɛn bɛɛn ɛkɛti daŋkun. Ɛkkɛn a maka waakɛn yeyin. Gena maka ciyi kaŋ wyeñɛti. Ɔci Buuluc bala yɔŋi ɛkkɛn waakɛnda daŋkun. ¹⁰ Ɔci maka neeniyɛ, ɛkkɛn yomgɛn pwanna pwani ɔɔnti, ɔci ɛkkɛn ɔɔn ‘woñkɔn waka coŋin neeni budan. Ɔci ne ɔɔn jɔŋnɔn te aŋanyɛ, ɛkkɛn ɔɔn ‘woñkɔn waka coŋin moki aŋka mokɔn ɔɔn waakɔ yomɔ pɔɔjɔ. ¹¹ Ɔɔn balgɔn ciyɔn kaŋa neeni wyeñɛti ponk ne ḍoogɔ, ɔci ne ponka neeni bɛɛki borayɛ, ɔɔn taamnɔn murkati moki. Murka tolan neeniyɛ, ɛkɛ a murka maka ban Alɛkcaandriya. Ɔci yenti ɛkɛ a Jɔkin A Yuonko. Ɔci murka tolan neeniyɛ, ɛkɛ bala yɔɔd kaŋ wyeñɛti te wɛɛñi wyeñɛ ¹² Ɔci baabin tool konɛ baabin tolan ati ne ban Cirakyuc, ɔci ɛkɛ yɔɔni wɛnan noŋi nink ne ḍoogɔ. ¹³ Ɔci ne ninka neeni bɛɛki borayɛ, ɔɔn jɔŋnɔn te bana neeniti ɔci attɔn ne ban Ḍejyom. Ɔci ṭienin ñaalɔ ne liidɔ jwami yoŋŋin te pɔya cuayati. Ɔci te ninna akki ne yyɛɛwɔ ɔɔn dɛnnɔn ban Putiiyoli. ¹⁴ Ɔci aŋanyɛ, ɔɔn yɔṭṭɔn modg ɔɔn Ma Kiṭɔ gɛɛg. Ɔci ɛkkɛn bala dɛyi ɔɔn. Ɛkkɛn gɔki agi dala ɔɔn cooccɔn aŋan lakun nink ne dɔɔyɔ wyetkɛn ne yyɛɛwɔ. Ɔci ɔɔn coonnɔn ne ḍiɛran ṭɔɔlɛ ba jyek ɛkkɛn hayya ɔɔn oŋ jɔŋnɔn attɔn ban Ḍɔɔm oŋo. ¹⁵ Ɔci ne ɔɔn balgɔn te yom menyɛ, modg ɔɔn ban Ḍɔɔm tieŋŋin agi ɔɔn baljɔn bɛɛdjɔn, ɔci ɛkkɛn jɔŋŋin te ban Ḍɔɔm, ɔci ɛkkɛn ma gɛɛg bɛɛn kookkin ban Apyac. Ɔci maka pookɛn gɛɛg bɛɛn kooŋnin iki ɔɔn bana balki oorg wɛlg oorga ne ḍoogɔy. Ɔci ne Buuluc maka neeni yuarti ne bɛɛtiyɛ, ɛkɛ gɔkcin Juaŋti agi pwatcin Jwaŋa Tolan. Ɔci ɛkɛ yomɛ pwanni. ¹⁶ Ne ɔɔn dɛnnɔn ban Ḍɔɔmyɛ, ḍuaŋa Buuluc olnɛ ciginji bɛɛ, yeti ɛkɛ gɔki agi dala Buuluc coottɔ pardan baan kondanti on gɛɛlti, ɔci ackan gɛɛl ne cyɛɛlɔ olji ma gɔṭi ɛkɛ. ¹⁷ Ɔci ne ninka ne ḍoogɔ neeni baakiyɛ, Buuluc borcin ḍuaŋan ma Icrayiil ban Ḍɔɔm agi dala ɛkki bɛɛdɔ ḍieŋdɔ ɛkɛti. Ɔci ne ɛkkɛn bɛɛki nona ɛkɛtiyɛ, ɛkɛ gɔkcin ɛkkɛnti agi, “Modg ɔɔn, ‘ya noŋi gena yaayan gɛɛl kɛɛn ikinti bɛɛ. Ɔci jyek yɔrg ikinyɛ, ‘ya jwali gɛɛl bɛɛnji bɛɛ. Yeti ne ‘ya baala ban Urcaliimji menyɛ, ‘ya ‘woñka ma ma Ḍɔɔm byeŋkɛnti, ɔci ‘ya olka ma ciginji. ¹⁸ Ma Ḍɔɔm neeniyɛ, ne ɛkkɛn gɔrki jyek ‘yayɛ, ɛkkɛn buagɔn ‘ya pɔkta, acaan ɛkkɛn yɔṭi ‘ya noŋi gena yaayan gɛɛl aŋka akuuma buagɛ nokki ‘ya bɛɛ. ¹⁹ Yeti ma Icrayiil yookɔn te pɔkkin ‘ya. Ɔci acaan a ɔŋŋiyɛ, ‘ya gɔkcan ḍuaŋa ṭɔɔlɛti ka dala jyek ‘ya eetan gwaldɛ ḍuaŋa tolan ban Ḍɔɔm neeni. Ne ‘ya gɔŋna a ɔɔnyɛ, ‘ya buaga gɔkca jyeka yeyin ma ikinti bɛɛ. ²⁰ Ɔci acca ɛkkɛ bornin ‘ya acaan ‘ya buaga ɛkkɛ yuardin, ɔci ikin gɔktin iki ‘ya. ‘Ya buaga ikin gɔktin iki ‘ya a ɔɔn, acaan jyeka ‘ya ḍɛɛkkati ma te jiŋgin neeniyɛ, gena jyeka kɛɛtan kɛɛn ikin ma Icrayiil neeni daŋkun.” ²¹ Ɔci ɛkkɛn ṭwokcin Buulucti agi, “Worga gɛɛl bɛɛn ɔɔnti te ban Yahuudiya te jyek i bɛɛ. Ɔci modg ikin ma Icrayiilyɛ, ɛkkɛn men gɛɛl bɛɛn gɔki ɔɔnti te i agi i yaajji bɛɛ. ²² Yeti dala i ɔɔn myettɔn te paŋŋa paŋa i neeni, acaan ŋeejɔn ɔɔn ma tɔɔmi te malla neeni baan warda.” ²³ Ɔci ɛkkɛn jiek naŋɛ, gena jyek oŋŋa ɛkkɛn bɛɛti gɔrti jiek iki Buulucy. Ɔci ne oŋŋa neeni bɛɛniyɛ, ma bɛɛn nona ona ciyi Buuluc. Ɛkkɛn bɛɛn a ḍiɛkan bɛɛ, kɔɔna kɔɔnno. Ɔci Buuluc bala lwoki ma te jyeka neeni te liidɔ ne oŋ unni ɔɔn. Jyeka lwogdɛ Buuluc neeniyɛ, gena jyek cyɛgji Jwaŋa Tolan. Ɔci Buuluc bala lwoki ɛkkɛn te ganuun Muuca, ɔci te worgan maka bɔwan Jwaŋa Tolan. Ɛkɛ bala ‘yeṭi ɛkkɛnti ne pɛñan aŋka ɛkkɛn jyeddi Yaccuti. ²⁴ Ma gɛɛg jyeti jyeka guagdɛ ɛkɛ neeniti, ɔci maka pookɛn gɛɛg jyeti bɛɛ. ²⁵ Ɔci ma Icrayiil ɛkkɛn jiek kɛɛbɛ jitin, maga da te jiekɛn, ɔci ɛkkɛn noŋi jyɛndi jitin ooddi baanji. Ɔci Buuluc gɔkcin jwali ṭɔɔlɛ gɛɛl ɛkkɛnti moki agi, “Oŋŋa Boŋ Jwaŋa Tolan gɔŋni yɔrg ɛkkɛti te lɛmi Icaayayɛ, ɛkɛ gɔkkin jyeka neeni awarɛ. Ɛkɛ gɔki Icaayati agi, ²⁶ ‘Dala i ootta maka neeniti, ɔci gɔkca ɛkkɛnti agi, ɛkkɛ tieŋdɛ jiek a tieŋŋin oŋkanda ɔɔn, yeti ɛkkɛ yaakɛti jiek jitkɛn yuartɛ ne pwadan moki bɛɛ. Ɔci moki, ɛkkɛ gɔrtɛ a gwali oŋkanda ɔɔn, yeti ɛkkɛ yaakɛti waak yuartɛ ne pwadan moki bɛɛ. ²⁷ Dala ɛkkɛ gɔktɛ mati a ɔɔn, acaan maka neeniyɛ, ɛkkɛn yomgɛn poli doki. Ɔci ɛkkɛn jyetkɛn poli doki te tyeŋi jyek ‘ya. Ɔci ɛkkɛn woŋgɛn mitcɛti doki. Ɔci a ɔŋŋiyɛ, ɛkkɛn gɔrti te woŋgɛn moki bɛɛ. Ɔci ɛkkɛn jyetkɛn pɔktan moki bɛɛ, ɔci ɛkkɛn yaakinti jiek yuartanji yomgɛnti moki bɛɛ, ɔci ɛkkɛn waakɛn yaltan bɛya ‘yati moki bɛɛ, ɔci ɛkkɛn ywaŋdi ‘ya moki bɛɛ.’ ²⁸ “Ɔci acaan jwali Juaŋ neeni a jwalla awarɛyɛ, dala ŋeeddɛ ɛkkɛ jyeka yuoci Juaŋ ma neeniyɛ, ati Keedin Pookɛnti daŋkun cuuññɛ Juaŋ ɛkkɛnti. Ɔci ɛkkɛn yookɔn bɛɛ. Ɛkkɛn aŋka tieŋdi.” [ ²⁹ Ɔci ne ɛkɛ baali gɔki jyeka neeniyɛ, ma Icrayiil kaaccin bora, ɔci ɛkkɛn bala gɔwwɔ tyewɔ yɔtin pookɛn ne pɛñan.] ³⁰ Ɔci Buuluc bala ciyi on gɛɛlti, ɔci ɛkɛ bala ḍɔci bilk oŋkanda te ona neeni. Ɔci yuong ɛkɛ yuonga ɛkɛ cieni ona neenitiyɛ, a yyɛɛwɔ. Ɔci ne ma bɛɛki ḍieŋki ɛkɛti oŋkandayɛ, ɛkɛ yomɛ pwanna pwani ɛkkɛnti. ³¹ Ɔci ɛkɛ bala mieti ɛkkɛn te cyɛgji Jwaŋa Tolan. Ɔci ɛkɛ bala loṭi ma te jyek Ciɛggɔn ikin Yaccu Kiṭɔ. Ɔci ɛkɛ bala loṭi ma lyɛli a lyɛllo. Men gɛɛl bala dɛyi ɛkɛ te lali bɛɛ.