2Timatawuc

¹ Gena ‘ya Buuluc cuuda Yaccu Kiṭɔ. Jwaŋa Tolan ‘ya muona bora aŋka ‘ya ma myetka te naŋki ɛkɛ. Ɔci naŋki ɛkɛ neeniyɛ, gena tɛɛtin Juaŋ ma ḍuaññɛ te jwali agi ɛkki ‘woñji ɛkɛ te Yaccu Kiṭɔy. ² Kaci ‘ya Timutawuc, dala Jwaŋa Tolan Wey ikin, ɔci Ciɛggɔn ikin Yaccu Kiṭɔ yomgɛn pwada a pwani iti, ɔci dala yom pɔkkin Juaŋ bala iti. ³ ’Ya gɔk a pwatcin Jwaŋa Tolanti oŋkanda te i, hay, Timutawuc. ‘Ya kanŋ ɛkɛti te yoma pwadan. Ɛkɛ a Jwaŋ yɔrg ɔɔn ɔci a Jwaŋ ‘ya. ‘Ya cɔk ɛkɛti oŋkanda, te oŋ jiñɛ ɔci te ween jiñɛ ka da ɛkɛ i ordiyɔ. ⁴ ’Ya ñingu boŋi ne pɛñan te i. Ne ‘ya poŋa te joon i te oŋŋa ikin kɛɛmninji iki iyɛ, ‘ya buaga dala ikin yɔɔrtin iki ‘ya, aŋka ‘ya yomu ñɔɔdɛ. ⁵ Ɛɛ, ‘ya baal poŋ te jyenna i jyetti Juaŋti ne pwadan neeni. Šyer ɛkkɛ Lɔwic jyeti ne pwadan daŋkun yaakkɛn i mɛy ɛkkɛ Yunic. Ɔci acca ‘ya gɔk ka i jyetti ba ɛkkɛn ɔɔn daŋkun. ⁶ Ɔci acaan a ɔŋŋiyɛ, ‘ya i myettin ‘wota, dala i waru tɛya ‘wota te naŋki i naŋka i ‘wonniti Juaŋ te oŋŋa ‘ya byeŋku tanna itiy. ⁷ Acaan Boŋ Juaŋ Boŋa ikin ‘wonninti Juaŋ neeniyɛ, ɛkɛ etti jyek bwaji bɛɛ. Ɛkɛ etti gena war tɛɛn iki anna ikin anin Juaŋ iki ma baany. Ɔci moki te Boŋ Juaŋ neeniyɛ, ikin yaakinti maŋi waakɔ ne pwadan. ⁸ A ɔŋŋiyɛ, naa i noŋ ba i lɔɔdi te jyek Ciɛggɔn ikin bɛɛ. ‘Ya baal jiju ciginji acca te jyek ɛkɛ, ɔci naa i poŋ gɔk naŋka neeni a lɔɔn bɛɛ. Ɔci kan taab bɛya iti te jyeka loṭi i ma a jyeka wonkɛn jyeka pwadin neeniyɛ, naa i yooki bɛɛ. Dala war tɛɛn Jwaŋa Tolan bala iti. ⁹ Jwaŋa Tolan neeniyɛ, gena ɛkɛ ikin yɔɔññin neeni, ɔci gena ɛkɛ ikin muonin bora aŋka ikin aktin ma ɛkɛ maka pwadin neeni. Ikin muonin ɛkɛ bora te naŋka naŋŋin ikin pwadin gɛɛl bɛɛ. Yeti ikin muonin ɛkɛ bora ba naŋka ɛkɛ buagiti ikin ne ṭɛɛr men baawiy. Ɛkɛ ikin ‘wonnin yom pwani ɛkɛ te naŋki Yaccu Kiṭɔ. ¹⁰ Ɔci acca jyek yom pwani Juaŋ neeni bɛɛn bora doki. Jyeka neeni bɛɛn bora oŋŋa Yaccu Kiṭɔ bɛɛni iñɔ baanji wɛnniy. Ɛkɛ a Mena Yuoci ikin. War tɛɛn lien lɛɛŋŋɛ ɛkɛ jitin, ɔci ɛkɛ ikin ‘wonnin tɛɛtin te jyenna ikin jyettin jyek ɛkɛy. Ɔci tɛɛtin neeniyɛ, baadi ywongati bɛɛ. ¹¹ Te jyeka wonkɛn jyeka pwadin neeniyɛ, ‘ya naŋŋa Yaccu aŋi cuuda ɛkɛ miet ma te jyek ɛkɛ, ɔci lor ma te jyek ɛkɛ. ¹² Ɔci te jyeka neeniyɛ, aŋka taab bɛɛni ‘yati neeni. Yeti ‘ya lɔɔd te jyeka neeni bɛɛ, acaan mena jyetta ‘ya neeniyɛ, ŋeej ‘ya ne pwadan. Ɔci ŋeej ‘ya kanŋa ‘ya ‘wonnata ɛkɛ neeniyɛ, bala ɛkɛ bieŋɛti, ɔci ɛkɛ gɔṭi kanŋa neeni oŋkanda ne oŋŋa ɛkɛ bɛɛdi ɔɔn. ¹³ Jyeka i laldin ‘ya a jyeka awarɛ neeniyɛ, dala i waŋu tiicca te ɛkkɛn. Dala yom i an ma ne pwadan, ɔci dala i yomu ḍuacca Juaŋti ne pwadan oŋkanda. Naŋka neeni bɛya te Yaccu Kiṭɔti waakɛnda. ¹⁴ Dala i waŋu tiicca ne pwadan te kanŋa i ‘wonniti Juaŋ pwadan neeni te Boŋ Juaŋ mena ciyi ikin yomgɔti neeni. ¹⁵ Çeej i doki ne ‘ya dalkata maka ciyi ban Ecya waakɛnday. ‘Ya dalka Pijiiloc ɛkkɛn yaakkɛn iki Ɛrmɔɔjɛnic. ¹⁶ Yeti Ɔnɛciipɔracyɛ, ɛkɛ ‘ya dalna bɛɛ. Dala Jwaŋa Tolan yomɛ pɔktɛ on tukɛ ɛkɛti, acaan ‘ya maŋŋa ɛkɛ oŋki ne coŋɔn te yoma pwadan. Ne ‘ya byeŋku akki ḍɛɛggin te jiŋginyɛ, ɛkɛ buayi warɛ a lɔɔn bɛɛ. Yeti ɛkɛ bɛɛn ḍieŋŋin ‘yati ɔci ‘ya maŋŋa yomuti. ¹⁷ Ɛɛ, awarɛ, ne ɛkɛ bɛɛni ban Ḍɔɔmyɛ, ɛkɛ bala lieṭi ‘ya a lilti ne tolan ne ‘ya yuarŋata ɛkɛ ɔɔn. ¹⁸ Ne oŋŋa Yaccu bɛɛdiyɛ, dala Yaccu yomɛ pɔktɛ ɛkɛti. Ɛkɛ ŋeej i ne pwadan, ne ɛkɛ ‘ya maŋŋata te naŋka coŋin ban ɛkkɛ ban Ɛpacacjiy.

¹ Kaci ‘ya Timutawuc, dala i waru tɛya gɔ moki tɛyi ɔɔn te yom pwani ikin ‘wonninti Juaŋ te Yaccu Kiṭɔ neeni i yomuti. ² Jyeka i myennin ‘ya maka pookɛn ñomgɛnti neeniyɛ, dala i ‘uaya pookɛn ‘uaya tieci jiek waakɛn oŋkanda neeniyɛ, dala i ɛkkɛn ‘woñga jyeka neeni daŋkun, aŋka ɛkkɛn lorti ma te jyeka neeni daŋkun. ³ Naa i buay taab bɛɛ. Kan taab bala itiyɛ, dala i yomu tɛya ɔɔn ba mena ackan. Ikin da balkin ba ackan Yaccu Kiṭɔ ackan pwadin neeni. ⁴ Mena ackanyɛ, ɛkɛ ñingɛ juadan te kanŋa parɛ gɛɛl bɛɛ, acaan ɛkɛ buagɔn dala naŋki ɛkɛ pwada mena ɛkɛ naŋŋi a ackan neeniti. ⁵ Gɔṭṭi ‘wota, maka boddɔ guoñjiyɛ, ɛkkɛn boddɔ ba yomg ɛkkɛn pookɛn budan guoñji bɛɛ. Ɛkkɛn boddɔ ba naŋki jyek boddin. Ɔci maka ma bwantanyɛ, ɛkkɛn ‘wontan ma waka pwadin. Ɔci kan men gɛɛl noŋdi ba yom ɛkɛ parɛ budanyɛ, ɔci kan ɛkɛ maka pookɛn bwandɛyɛ, ɛkɛ ‘wontan ma genga bɛɛ. ⁶ Ɔci gɔṭṭi ‘wota, mena kanŋan ne pwadan oŋkanda yieljiyɛ, waka ‘yɛgdi ñamu yieljiyɛ, aga wak ɛkɛ. Ɔci a ɔɔnyɛ, yɔmjin. ⁷ Dala i poŋja te waka neeni. Ɔci Ciɛggɔn ikin i magdi, ɔci i tieŋja jyeka neeni ne jiek jitkɛn balki a ɔkiy. ⁸ Dala i poŋja te Yaccu Kiṭɔ mena yɔr ɛkkɛn a Dawuud neeni, ɛkɛ jɔŋŋin ñaalɔ te lienti doki, bala ba jyeka wonkɛn jyeka pwadin loṭa ‘ya ma neeni mieti a ɔɔn te ɛkɛ. ⁹ ’Ya lor ma te jyeka wonkɛn jyeka pwadin neeni, ɔci acca ‘ya balka taab te jyeka neeni. Ɔci ‘ya olka ma jiju ciginji doki ba mena nɔɔdɔn ɔɔn. Yeti jyek Juaŋ neeniyɛ, menga yaakinti ɛkkɛn mugdɛyɔ bɛɛ. ¹⁰ ’Ya yɔɔd ne tɛyan taab bɛɛn ‘yati neeni jitin ɔɔn, aŋka dala maka muonɛ Juaŋ bora neeni daŋkun yɔɔrdi tɛɛtin bala Yaccuti neeni ɔci pwanna baadi bɛɛ neeni. ¹¹ Jwalla pwadan gɛɛl bala, ɔci ikin yaakinti jyettin jwalla neeniti. Jwalla neeni gɔki agi, Kan lyen Yaccu aŋi ba lyen ikinyɛ, ɔci tɛɛtin ɛkɛ aŋi ba tɛɛtin ikin daŋkun. ¹² Ɔci moki kan taab ɛkɛ aŋi ba taab ikinyɛ, ikin ‘wontin ɛkɛ jyek cyɛgji ne baaṭi, ɔci ikin aktin cyekin iki ɛkɛ a cyɛɛlɔ. Kan ikin kɛkin te ɛkɛyɛ, ɔci ɛkɛ da kɛkti te ikin daŋkun. ¹³ Yeti ne ikin bɛɛyin jiek jitkɛnyɛ, ɔci ɛkɛ men tieci jiek waakɛn ɔɔn. Acaan ɛkɛ yaakinti warɛ agdɛ moki bɛɛ. ¹⁴ Dala i gɔkca ma kaniicati moki aŋka ɛkkɛn ñingɛn ñiektan te jyeka neeni. Dala ɛkkɛn myetka i Jwaŋa Tolan ñamɛti, dala ɛkkɛn mwondi te tyewwin te jyeka jitkɛn baaw neeni. Acaan jyek tyewwin neeniyɛ, etti naŋka pwadan gɛɛl mati bɛɛ. Yeti ma ḍɛɛmdi iñɔ te naŋka neeni. ¹⁵ Dala i waŋu tiicca te naŋki i aŋka Juaŋ yomɛ pwada te naŋki i ko. Dala i kanja ɔci lorca ma ne pwadan te jyeka awarɛ oŋkanda ɔɔn aŋka ne baaṭiyɛ, i lɔɔdja bɛɛ. ¹⁶ Dala i jyeka pookɛn, jyeka coŋin neeniyɛ, dalja. Acaan maka ani jyeka coŋin neeniyɛ, ɛkkɛn ooddi ɔntɔ te jyek Jwaŋa Tolanti. ¹⁷ Ɔci jyek ɛkkɛn jyeka yeyin neeniyɛ, ooddi mati waakɛnda ba naŋki waja yaayan neeni ɔɔn. Aymaneeyac yaakkɛn i Payliitocyɛ, ɛkkɛn balki jyeka neeni. ¹⁸ Ɛkkɛn jiek pɔɔdɛ acaan ɛkkɛn jyeka awarɛ neeni ŋeecɔn bɛɛ. Ɛkkɛn gɔki agi oŋŋa ma jɔŋti ñaalɔ te kolk jitinyɛ, agi bɛɛnɔ doki. Ɔci Ma Kiṭɔ gɛɛg tieŋŋin jyeka guaktan ɛkkɛn neeni, ɔci ɛkkɛn jyetcin ɔntɔ doki. ¹⁹ Yeti kaniica Juaŋyɛ, yɔɔd ne tɛyan oŋkanda acaan ma Juaŋyɛ, ɛkkɛn balki jyeka ne yyɛɛwɔ. Jwalla ne cyɛɛlɔ gɔki agi, “Maka a ma Juaŋ awarɛyɛ, ɛkkɛn ŋeejɛ Juaŋo.” Ɔci jwalla parɛ neeni gɔki agi, “Maka yenti Juaŋ bala ɛkkɛntiyɛ, dala ɛkkɛn nɔji daltan waakɛnda.” ²⁰ Gɔṭṭi, maka ciyi te ona tolan ona pwadanyɛ, ɛkkɛn balki waak ne coŋɔn. Ɔci waka neeniyɛ, ɛkkɛn gɛɛg naŋɛ ma te dahab, ɔci gɛɛg naŋɛ ma te bil pɔdda, ɔci gɛɛg moki naŋɛ ma te jango, ɔci gɛɛg naŋɛ ma te lommo. Ɔci ɛkkɛn waakɛnda kɛɛptin jitin te kanŋa ɛkkɛn daŋkun. Waak gɛɛg balki kanŋan pwadin, ɔci ɛkkɛn pookɛn gɛɛgyɛ, balki kanŋan yeyin. ²¹ Ɔci ba jyek waka neeniyɛ, bala ba jyek ikin daŋkun. Kan mena warɛ uuttɛ ɔntɔ te maka gɔki jyeka budanti neeniyɛ, ɛkɛ aga ba gena pwadan weegɛnti, ɔci ɛkɛ ‘wondi ɛkɛ kanŋa pwadan. ²² Dala i waŋu tiicca te waka ma ḍyɛrkɔ yomgɛn buagiti ne pɛñany. Dala i pocca noŋja naŋka pwadin, ɔci dala i jyedda ne pwadan, ɔci dala i anja Juaŋ ɔci ma baan ne pwadan, ɔci dala i yomu niin pwanna pwanno. Gɔṭṭi, ‘ya gɔkka moki, ²³ dala i noŋja naŋka neeni maka cɔki Juaŋti te yoma pwadan neeni, kan ma tyewɔ te jyeka pookɛn jyeka budanyɛ, naa i ñoodi iki ɛkkɛn bɛɛ. Acaan ŋeej i tyewwin neeniyɛ, etti wɛyyin. ²⁴ Acaan mena noŋi kanŋa Jwaŋa Tolanyɛ, naa ɛkɛ ani wɛyyin iki ma bɛɛ. Dala ɛkɛ yomɛ niin pwanna pwani mati waakɛnda aŋka ɛkɛ loṭi maka domi naŋkiy. Dala ɛkɛ loṭi ma ne pwadan, ɔci dala ɛkɛ loomgɛ tɛya. ²⁵ Ɔci kan ma gɛɛg yookɔn waakɛn te jyeka loṭi i ma neeniyɛ, dala maka neeni ṭeyayɔ te yoma pwadan. Ɔci a ɔɔn Juaŋ dita noŋdi naŋki ɛkɛ ɛkkɛn yomgɛnti ɔci ɛkkɛn waakɛn yaltan kaapun, ɔci naŋka awarɛ ŋeettan. Ɔci ɛkkɛn poŋdi te naŋki ɛkkɛn, ɔci ɛkkɛn jyeka awarɛ ŋeettan, ɔci waakɛn yaltan dɔɔktiti jyeka awarɛ neeniti. ²⁶ Ɔci a ɔŋŋiyɛ, ɛkkɛn wyetkɛn bɛya moki, ɔci ɛkkɛn pɔktɛ Juaŋ te Jwaŋa Yaayan bieŋɛti, ɔci ɛkkɛn noŋdi kanŋa Juaŋ moki.

¹ Timutawuc, dala ŋeejja i ne pwadan acaan oŋka bɛya ookti ne ŋoyɔyɛ, jiek tɛya. ² Acaan maka coŋinyɛ, gɛɛg andi gena waak ɛkkɛn pookɛn, ɔci ɛkkɛn andi bilk daŋkun. Ɔci ɛkkɛn andi yyɛji daŋkun, ɔci moki ɛkkɛn andi jied waakɛn pookɛn, ɔci ɛkkɛn moki andi lomi jieko. Ɔci ɛkkɛn andi weyyɛn walla mɛyyɛn bɛɛ, ɔci ɛkkɛn gɔkti a pwatcin oŋgati te genga bɛɛ. Ɛkkɛn ciyi a nɔɔtk budan oŋkanda ɔɔn. ³ Ɛkkɛn yomgɛn baaw mati waakɛnda. Ɛkkɛn yaakinti yɔŋi jiek i ma bɛɛ. Ɛkkɛn jomi ma waakɛn budan. Ɛkkɛn noŋi ba yomg ɛkkɛn pookɛn budan amaam ɔɔn. Ɛkkɛn a ywobko. Ɛkkɛn yookɔn te jyeka pwadin waakɛnda. ⁴ Ɛkkɛn ma ‘wontan maka pookɛn byeŋkɛnti aŋka naŋtan ɛkkɛn ne yaayan. Ɛkkɛn poŋdi jiek ñamu oŋ ɛkkɛn oŋ noŋti bɛɛ. Ɛkkɛn noŋi amaam budan ɔɔn. Ɛkkɛn poŋi gɔki agi ɛkkɛn ḍwaŋgintɛ. Ɛkkɛn ñingɛn juadan te waka ɛkkɛn yomgɛn ñɔɔtiy, ɔci ɛkkɛn yomgɛn baaw Juaŋti. ⁵ Ɛkkɛn noŋi ba ɛkkɛn akki Ma Kiṭɔ ɔɔn, yeti ɛkkɛn war tɛɛn Juaŋ daltan aŋka noŋdi kanŋa ɛkkɛn yomgɛnti bɛɛ. Ɔci naa i ñoodi iki ɛkkɛn bɛɛ. ⁶ Maka neeni gɛɛgyɛ, ɛkkɛn kaatti orɔ oorg maka pookɛnti mooṭi moonga wyetkɛn baaw neeni aŋka moonga neeni aga maka booti ɛkkɛnti. Moonga neeniyɛ, ɛkkɛn bala poŋi oŋkanda te nɔjja naŋɛ ɛkkɛny, ɔci ɛkkɛn noŋi ba naŋka ɛkkɛn yomgɛn buagiti ne pɛñan oŋkanda neeni. ⁷ Ɛkkɛn buagɔn tieŋdi jiek ne coŋɔn, yeti ɛkkɛn jyeka awarɛ yuartanji bɛɛ. ⁸ Bala ba Janic ɔci Jambric ne ɛkkɛn yookiti te jyek Muuca te baaṭiyɛ, ɔci acca daŋkun ‘uaya neeni yookɔn waakɛn te jyeka awarɛ daŋkun. ‘Uaya neeniyɛ, yaakinti paŋi jiek ne pwadan bɛɛ. Jyenna ɛkkɛn jyetki neeniyɛ, a jyenna awarɛ bɛɛ. ⁹ Yeti ɛkkɛn ‘uotti ñamu ne loonan bɛɛ, acaan jyek naŋki ɛkkɛn naŋka yaayan neeniyɛ, bɛya bora ne cwakanti, ɔci ɛkkɛn ŋeettan ma te naŋki ɛkkɛn. Ɔci a ɔɔnyɛ, bala ba jyek Janic ɔci Jambric. ¹⁰ Gɔṭṭi hay! Timutawuc, jyeka loṭa ‘ya neeniyɛ, yuarniji i, ɔci coodda ciya ‘yayɛ, ŋeej i moki. Ɔci paŋi ‘ya ŋeej i, ɔci jyeni ‘ya mokiyɛ, ŋeej i, ɔci loomg tɛɛn ‘yayɛ, ŋeej i, ɔci anna ana ‘ya mayɛ, ŋeej i moki. Ɔci yɔɔdda yɔɔda ‘ya ne tɛyan ne ma balki noŋki ne yaayan ‘yatiyɛ, ŋeej i moki. ¹¹ Taab ‘ya tol tol ban Antyak ɔci ban Aykɔɔnyam, ɔci ban Lictara, ɔci ‘ya baal yɔɔd ne tɛyan men ɔɔn. ‘Ya maŋŋa Ciɛggɔn ikin ɔci wɛɛna bora ɛkɛ te taab neeniti waakɛnda. ¹² Ɛɛ, awarɛ, maka buagɔn ciyi ne pwadan te jyek Yaccu Kiṭɔyɛ, taab bɛya ɛkkɛnti te maka pookɛnti. ¹³ Ɔci maka yeyin maka a laabanyɛ, naŋki ɛkkɛn pɛɛddi te yoñ gɔ moki pɛɛddi ɔɔn. Ɛkkɛn noŋi ma ñingɛn gɔ ɛkkɛn da naŋin ñin ma ɔɔn. ¹⁴ Yeti iyɛ, dala i waŋu tiicca te jyeka i lalkiti ma jyeka jyetti iy. Ɔci ŋeej i te maka i lalki te jyeka awarɛ neeniy. ¹⁵ Ɔci ŋeej i moki jyek Juaŋ jyeka kiigin neeniyɛ, ŋeej i ne wona i ḍiɛri meny. Ñing tɛɛn bɛya te jyeka kiigin neeni. Ɔci te jyek ñing tɛɛn jyeka kiigin neeni mokiyɛ, i yaaktiti jyedda Yaccu Kiṭɔti ɔci i yɔɔdi ɛkɛ. ¹⁶ Jyek Juaŋ jyeka kiigin waakɛndayɛ, ɛkkɛn a jyeka ma myennɛ Juaŋ te Boŋ ɛkɛy. Ɔci te jyeka kiigin neeniyɛ, ma laltan ma te jyek Jwaŋa Tolan jitkɛn ne pwadan. Ɔci moki te jyeka kiigin neeniyɛ, naŋka naŋtan ma yaayan neeniyɛ, ŋeettan ma ne naŋka yaayan neeni baali a ɔkiy. Ɔci moki te jyek Jwaŋa Tolan jyeka kiigin neeniyɛ, ma yaakinti naŋka yeyin neeni daltan. Jyeka kiigin neeni loṭi ma te naŋka pwadin. ¹⁷ Kanŋa jyeka kiigin neeniyɛ, bala a ɔɔn acaan Juaŋ buagɔn dala ma ɛkɛ ‘uotti ñamu ne pwadan aŋka dala ɛkkɛn naŋki waka pwadin neeni ŋeettan ɛkkɛn waakɛnda.

¹ ’Ya gɔkka iti Juaŋ ñamɛti ɔci Yaccu Kiṭɔ mena noŋdi godan mati waakɛnda neeni ñamɛti. Gena ɛkɛ a mena godan maka tɛɛti ɔci maka tuuny. Acaan ɛkɛ warɛ lɛɛldɛ bora mati, ɔci ɛkɛ aga Ciɛggɔn Tolan mati waakɛnda ṭɛɛr wyeñɛ warda. ² Dala i lor ma te jyek Jwaŋa Tolan oŋkanda ɔɔn. Naa i poŋ gɔk agi pɔya loṭi ma baaw bɛɛ. Dala i gɔkca mati ne pwadan aŋka ma tieŋdi ɔci jyeddi. Kan ma bala noŋi ne yaayanyɛ, dala i ɛkkɛn ṭeya ñin ne pɛñan te yoma pwadan. Dala i lor ma te jyek Juaŋ oŋkanda ɔɔn. ³ Acaan oŋŋa bɛya waayiyɛ, ma bwagdɛ jyeka pwadin neeni moki bɛɛ. Ɛkkɛn buagdɛ gena jyeka budan. Ɔci ɛkkɛn ooddi lieṭi maka loṭi ɛkkɛn te jyeka ɛkkɛn buagiti jyeka milin ɛkkɛnti jyeka yeyin neeni. ⁴ Ɔci ɛkkɛn yooktan te jyek worga Jwaŋa Tolan jyeka awarɛ neeni. Ɔci ɛkkɛn tieŋdi gena jyek ṭɛɛr wyeñɛ jyeka budan neeni. ⁵ Yeti iyɛ, dala i waru muga oŋkanda. Kan taab balayɛ, dala i yɔɔdi ne tɛyan ɔɔn. Dala i noŋja kanŋa i kanŋa miti ma te jyeka wonkɛn jyeka pwadin neeni. Naa kanŋa gɛɛl dalja bɛɛ. ⁶ Yeti gɔṭṭi! ‘Yayɛ, ‘ya tuud ne cwakanti te kanŋa Juaŋo. Oŋŋa ‘ya ṭɛra neeni daldayɔyɛ, moki looncin bɛɛ. ⁷ ’Ya noonɔn i Jwaŋa Yaayan ne pwadan. Kanŋa ‘ya ‘wonnata Juaŋ neeni cwamjan ‘ya doki. Jyek jyeni Juaŋ daljan ‘ya oŋgati bɛɛ. ⁸ Ne oŋŋa bɛya ne ŋoyɔ a oŋŋa tolanyɛ, mena pwadan Mena Noŋi Godan matiyɛ, ɛkɛ ‘ya ‘wonda gena pwadan te coodi ‘ya coodda pwadan. Ɔci ɛkɛ ‘ya ‘wonda paru bɛɛ. Ɛkɛ ‘ya ‘wonda iki maka bala kɛɛy buagɔn oŋŋa ɛkɛ bɛɛdi daŋkuny. ⁹ Gɔṭṭi hay, Timutawuc! Dala i pocca bɛɛd ‘yati wɛnni ne pɛñan ne cwakanti. ¹⁰ Acaan ‘ya dalna Dimac. Ɛkɛ bala ani jyeka iñɔ baanji wɛnni ne tolan. Ɔci acca ɛkɛ ati ban Tacalunika. Ɔci Krɛcɛnicyɛ, ɛkɛ ati ban Galatiya, ɔci Tituc, ɛkɛ ati ban Dalmeecya. ¹¹ Gena Luuk aŋka bala ‘yati parɛ wɛnniy. Dala i ootta Mark owwa, ɔci ɛkkɛ bɛɛdɛ yaakkɔ wɛnni nona ‘yati, acaan Markyɛ, ɛkɛ aŋka yaakinti ‘ya magda ne pwadan te kanŋa ‘ya. ¹² Ticcikoc cuuñi ‘ya ban Ɛpacac. ¹³ Ne ɛkkɛ bɛɛdɛyɛ, dala ɛkkɛ bworŋ ‘ya bworŋ jwami oodɛ. Ɛkɛ dollanyɔ ‘ya Karpocti ban Trɔwac. Ɔci dala ɛkkɛ worgan ‘ya oodɛ daŋkun. Yeti kan ɛkkɛ worgan pookɛn dolnɛyɛ, dala ɛkkɛ worgan a geek aŋka oodɛ. ¹⁴ Alɛkcaandar mena a gɔɔñi gɔci waak te bilka tɛyan neeniyɛ, ɛkɛ noŋi ne yaayan ‘yati. “Ciɛggɔn ikinyɛ, ɛkɛ jiek duaktɛ mena neeni wyeñɛti te naŋka naŋŋɛ ɛkɛ yaayan ‘yati neeni.” ¹⁵ Ɔci i daŋkunyɛ, dala i waŋu tiicca te Alɛkcaandar acaan ɛkɛ yookɔn te jyeka loṭin ikin ma neeni ne pɛñan. ¹⁶ Ne ‘ya noŋkata ma godan te ñamuyɛ, men gɛɛl ‘ya maŋŋa yuonna taaŋuti te jyek godan ‘ya bɛɛ. ‘Ya dalka ma paru ɛkkɛn yiŋi ɔntɔ waakɛnda. Yeti ‘ya buaga Juaŋ jiek oldɛ ɛkkɛn wyetkɛnti te naŋka neeni bɛɛ. A’a. ¹⁷ Ciɛggɔn ikin aŋka bala ‘yati parɛ, ɔci ‘ya ‘wonna ɛkɛ war tɛɛno, ɔci a ɔɔnyɛ, ‘ya ma myetkan te jyeka wonkɛn jyeka pwadin neeni waakɛnda. Ɔci Keedin Pookɛnyɛ, ɛkkɛn tieŋŋin jyeka neeni waakɛnda. ‘Ya maŋŋa Juaŋ te jyek godan, bala ba mena wɛyɛ ma te jiɛl tukɛti. ¹⁸ Ɛɛ, ɔci oŋkanda ɔɔnyɛ, Juaŋ ‘ya yɔɔda te naŋka yeyin neeni waakɛnda ne ‘ya dɛnda ban cyɛgji ɛkɛti ñaalɔ ɔɔn. Dala Juaŋ jiɛtan ma oŋkanda oŋkanda ɔɔn. Amɛɛn. ¹⁹ Dala i ñiepca Pricillati te ‘ya, ɔci ñiepca Akwillati te ‘ya moki, ɔci ñiepca ma Ɔnɛciipɔracti te ‘ya moki. ²⁰ Iraactac yeddin te ban Kuruntuc. Ɔci Trɔpimoc dollanyɔ ‘ya te ban Mayliitac, acaan ɛkɛ warɛ yaayɛ. ²¹ Dala i pocca bɛɛd ‘yati wɛnni ne pɛñan ne ñaal jiñɛ baawi men ɔɔn. Yubyuulac ñiepi i, ɔci Pudɛnic moki ñiepi i, ɔci Laynac moki ñiepi i, ɔci Klɔdya moki ñiepi i, ɔci modg ikin waakɛndayɛ, ɛkkɛn ñiepi i daŋkun. ²² Dala Ciɛggɔn ikin bala iti. Dala ɛkɛ yomɛ pwada a pwani iti. Bawwin.