2Tacalunika

¹ Gena ‘ya Buuluc ɔci Cila ɔci Timutawuc, ñiepɔn ɛkkɛ ma kaniica ban Tacalunika neeni. Ɛkkɛ agɛ ma Wey ikin Jwaŋa Tolan ɔci ma Ciɛggɔn ikin Yaccu Kiṭɔ. ² Dala Ciɛggɔn ikin Yaccu Kiṭɔ ɔci Wey ikin Jwaŋa Tolan yomgɛn pwada a pwani ɛkkɛti, ɔci dala ɛkkɛn ɛkkɛ ‘wontɛ coodi pwani ɛkkɛn ɛkkɛ yomgɔti. ³ Hay! Modg ɔɔn, Jwaŋa Tolan buagɔn dala ɔɔn gɔktɔn a pwatcin ɛkɛti te ɛkkɛ oŋkanda. Ɔci a ɔɔnyɛ, yɔmjin. Te jyenna ɛkkɛ jyettɛ Juaŋti neeniyɛ, ɛkkɛ yomgɔ tɛya gɔ moki tɛyin ɔɔn. Ɔci moki anna ɛkkɛ oonnɛ yɔtin neeniyɛ, tola gɔ moki toli ɔɔn. ⁴ Ɔɔn balgɔn jieyɔn ɛkkɛ te yoma ñɔyan ma kaniican Juaŋti acaan ɛkkɛ balgɛ yɔdgɛ ne tɛyan ne ma balki noŋki ne yaayan ɛkkɛtiy. Ɔci moki ne taabn pookɛn balki ɛkkɛtiyɛ, ɛkkɛ balgɛ yɔdgɛ ne tɛyan. ⁵ Ne ɛkkɛ yomgɔ pwatki ne taab baali ɛkkɛti men ɔɔnyɛ, ŋeecɔn ma naŋki Juaŋ pwad pwad ne ɛkɛ ɛkkɛ muonɛ bora naŋŋɛ ɛkɛ a ma cyɛgji ɛkɛy. ⁶ Naŋki Jwaŋa Tolan pwad pwad awarɛ. Ne oŋ gɛɛltiyɛ, ɛkɛ jiek kɔɔktɛ maka noŋi ne yaayan ɛkkɛti neeni wyetkɛnti. ⁷ Ne oŋŋa Ciɛggɔn Yaccu bɛɛdiyɛ, taab ɛkkɛ baadi ɔci taab ɔɔn moki baadi. Oŋŋa Yaccu warɛ lɛɛldɛ borayɛ, ɛkɛ bɛya te pɔliji iki malɛɛkan ḍwaŋin ɔci maaño. ⁸ Ɔci te oŋŋa wannayɛ, maka yookɔn waakɛn te jyek Jwaŋa Tolanyɛ, ywobji bɛya ɛkkɛnti te yookɔn ɛkkɛn yookiti waakɛn te tieŋŋin jyeka wonkɛn jyeka pwadin jyek Ciɛggɔn ikin Yaccu Kiṭɔ neeni. ⁹ Ywobji Jwaŋa Tolan neeni bala ɛkkɛnti yuonginda, baadi bɛɛ. Ɔci pɔya ortiti ɛkkɛn Juaŋti bala moki bɛɛ. Ɔci ɛkkɛn naŋki Jwaŋa Tolan naŋka tɛyan naŋka ñyecki ma ɛkɛ neeni yuartan ɛkkɛn moki bɛɛ. Ɛkkɛn ḍakcin doki. ¹⁰ Ɔci oŋŋa tolan oŋŋa wannayɛ, pwanna pwani ma Juaŋti waakɛnda. Ɔci maka jyeti Juaŋtiyɛ, ne oŋŋa Yaccu bɛɛdiyɛ, ɛkkɛn jieddi ɛkɛ. Ɔci ɛkɛ daŋkunyɛ, jieddi ɛkkɛ te jyenna ɛkkɛ jyettɛ jyeka ɛkkɛ myetkɛ ɔɔn neenitiy. ¹¹ Ɔci a ɔŋŋiyɛ, ɔɔn balgɔn cɔkɔn Jwaŋa Tolanti te ɛkkɛ oŋkanda. Ɛkkɛ muonɛ Juaŋ bora ɔci ɔɔn balgɔn cɔkɔn Juaŋti ka dala Juaŋ gɔkti agi ɛkkɛ pwadjɛ. Ɔɔn cɔkɔn Juaŋti ka dala ɛkkɛ magdɛ ɛkɛ te war tɛɛn ɛkɛ te naŋka ɛkkɛ buagɛ naŋdɛ a naŋka pwadan neeni. Acaan ɛkkɛ jyettɛ Juaŋtiyɛ, ɛkkɛ balgɛ kanŋɛ kanŋa pwadan neeni, ɔci ɔɔn cɔkɔn Juaŋti ka dala ɛkkɛ magdɛ ɛkɛ aŋka ɛkkɛ kanŋa neeni cwamdɛ te war tɛɛn ɛkɛ. ¹² Ɔci naŋka neeniyɛ, ɔɔn cɔkɔn Juaŋti ka dala yenti Ciɛggɔn ikin Yaccu Kiṭɔ tola mati te naŋki ɛkkɛ, ɔci moki ka dala ɛkkɛ pwaddɛ te naŋki ɛkɛ. Naŋka neeni bɛya te ɛkɛti te yom pwani ɛkɛ ikinti, ɔci moki te yom pwani Ciɛggɔn ikin Yaccu Kiṭɔ.

¹ Modg ɔɔn, ɔɔn gɔkɔn ɛkkɛti te jyek bɛɛna Ciɛggɔn ikin Yaccu Kiṭɔ bɛɛdi dɔɔkti iñɔ baanji wɛnniy, ɔci te jyek oŋŋa ikin oottin kooktin iki ɛkɛy. ² Kan ma gɛɛg gɔkti ɛkkɛti agi Ciɛggɔn ikin bɛɛnɔ dɔɔŋnɔ iñɔ baanji wɛnni dokiyɛ, naa ɛkkɛ buayɛ jyeka neeni bɛɛ. Ɔci moki kan men gɛɛl gɔkti ɛkkɛti agi ɛkɛ myennɛti Boŋ Jwaŋa Tolan te jyeka neeniyɛ, ɔci walla kan men gɛɛl gɔki budan ɛkkɛtiyɛ, naa ɛkkɛ tieŋdɛ jyek ɛkɛ bɛɛ. Ɔci moki kan men gɛɛl worga kiedɛ ɛkkɛti gɔki agi Ciɛggɔn ikin bɛɛnɔyɛ, ɔci kan ɛkɛ worga neeni kiinɛ bala ba worga kienɔn ɔɔnyɛ, naa ɛkkɛ jyeddɛ jyek ɛkɛ bɛɛ. ³ Naa men gɛɛl ɛkkɛ naŋdɛ ñin te jyeka neeni budan bɛɛ. Ne Yaccu bwagdɛ bɛɛnyɛ, maka coŋin lakun yooktan waakɛn ne pɛñan te jyek Jwaŋa Tolan ñamu. Ɔci moki mena bartan ma a nɔɔdɔn kaci bana yaayanyɛ, ɛkɛ warɛ lɛɛldɛ bora mati ñamu. Yeti ɛkɛ ciya yuonginda ɔɔn bɛɛ. Ywobji Jwaŋa Tolan bɛya ɛkɛti dɔki. ⁴ Mena neeni ne ɛkɛ bɛɛdiyɛ, naŋki ɛkɛ a naŋki yyɛjjo. Ɛkɛ gɔki agi ɛkɛ toljɛ te jɔkin pookcɛn jɔkin maldi may, ɔci ɛkɛ daŋkun toljɛ te waka pookcɛn waka maldi ma waakcinday. Ɔci ɛkɛ cootti on Juaŋji, ɔci ɛkɛ noŋdi ba ɛkɛ agi Jwaŋa Tolan ɔɔn! ⁵ Ne ikin balkin iki ‘yayɛ, ɛkkɛ myennin ‘ya a ɔɔn doki, ɛkkɛ poŋdɛ te jyeka neeni bɛɛ? ⁶ Çeejɛ ɛkkɛ mena dɛyi ɛkɛ te bɛɛna ɛkɛ bɛɛdi wɛnni neeniyɛ, bala. Ɛkɛ warɛ lɛɛldɛ bora ba oŋŋa guagdɛ Jwaŋa Tolany. ⁷ Ɔci acca ɛkɛ bala kanŋan kanŋa ɛkɛ kanŋa yaayan neeni iñɔ lieda ɔɔn, ɛkɛ waanɛ bɛya men bɛɛ. Yeti ne mena dɛyi ɛkɛ oŋkanda neeni warɛ uuttɛ ooddiyɛ, mena yookɔn te jiek waakɛnda neeni ɛkɛ oŋ warɛ lɛɛldɛ bora oŋo. ⁸ Ɔci ne Yaccu Kiṭɔ bɛɛdiyɛ, Mena Yaayan neeniyɛ, ɛkɛ nogdɛ Yaccu Kiṭɔ te boŋ ɛkɛ tukɛ. Ɔci kanŋa ɛkɛ lɛgdɛ jitin baadi doki. ⁹ Mena Yaayan neeniyɛ, ne ɛkɛ bɛɛdiyɛ, ɛkɛ balki war tɛɛn Jwaŋa Yaayan, ɔci ɛkɛ ma naŋdɛ ñin te naŋki ɛkɛ naŋka tɛyan neeni. ¹⁰ Maka naŋdɛ ñin ɛkɛ neeniyɛ, ɛkkɛn a maka ooddi bana maaño. Ɛkkɛn a maka yookɔn te jyeka awarɛ jyeka pwadin neeni. Gena yookin ɛkkɛn aŋka ɛkkɛn ḍakti wanna. ¹¹ Ɔci te yookin ɛkkɛn yookiti te jyeka awarɛ neeniyɛ, ɛkkɛn daldɛ Jwaŋa Tolan, ɔci ɛkkɛn yaakinti poŋi jiek ne pwadan bɛɛ, ɔci ɛkkɛn jyeddi gena jyeka jomginti. ¹² Ɔci a ɔŋŋiyɛ, maka yookɔn te jyeka awarɛ ɔci buagɔn gena jyeka yeyin neeniyɛ, jyeka neeni bɛya ɛkkɛn wyetkɛnti waakɛnda ba naŋki ɛkkɛn wanna. ¹³ Ɔci ɛkkɛyɛ, ɔɔn gɔkɔn a pwatcin Jwaŋa Tolanti te ɛkkɛ, ɔci a ɔɔn pwatcin. Modg ɔɔn, Juaŋ ani ɛkkɛ ne tolan, ɔci ɛkkɛ muonɛ ɛkɛ bora ñamu acaan ɛkkɛ yɔɔdɛ ɛkɛ. Ɛkɛ buagɔn ɛkkɛ naŋdɛ ɛkɛ agdɛ maka pwadin te naŋki Boŋ Jwaŋa Tolan ɛkkɛ yomgɔti, ɔci te jyenna ɛkkɛ jyettɛ jyeka awarɛ neeniti. ¹⁴ Ne ɛkkɛ myetkɛ ɔɔn te jyeka wonkɛn jyeka pwadin neeniyɛ, ɛkkɛ muonɛ Juaŋ bora aŋka dala ɛkkɛ pwaddɛ ba Ciɛggɔn ikin Yaccu Kiṭɔ daŋkun. ¹⁵ Modg ɔɔn, a ɔŋŋiyɛ, dala ɛkkɛ yɔɔddɛ ne tɛyan. Dala ɛkkɛ woŋgɔ tiittɛ te jyeka ɛkkɛ lalkɛ ɔɔn te tugi ɔɔn neeni, ɔci te jyeka kienɔn ɔɔn ɛkkɛti waakɛnda neeni. ¹⁶ Dala Ciɛggɔn ikin Yaccu Kiṭɔ ɔci Jwaŋa Tolan Wey ikin mena ani ikin, ɔci ikin ‘wonnin yom tɛɛn ɔci kɛɛna ikin kɛɛyin te yom pwani ɛkɛ neeniyɛ, ¹⁷ ɛkkɛ ‘wondɛ yom tɛɛno, ɔci ɛkkɛ tɛldɛ oŋkanda aŋka ɛkkɛ noŋdɛ ɔci gɔktɛ a waka pwadin oŋkanda.

¹ Modg ɔɔn, dala ɛkkɛ cɔktɛ Jwaŋa Tolanti te ɔɔn aŋka dala jyek Ciɛggɔn ikin ooddi mati ne pɛñan te war tɛɛn ɔci ma jyeddi ɛkɛti bala ba jiek ne bɛɛki ban ɛkkɛ wanna ɔɔn. Ɔci dala ma jieddi Juaŋ te jyeka neeni. ² Dala ɛkkɛ cɔktɛ Juaŋti aŋka naa maka yeyin maka wyetkɛn baaw neeni noŋdi ne yaayan ɔɔnti bɛɛ. Ɛkkɛn waakɛnda jyeti Juaŋti men bɛɛ. ³ Yeti Ciɛggɔn ikinyɛ, ɛkɛ a mena tieci jyek ɛkɛ waakɛn. Ɔci ɛkɛyɛ, ɛkkɛ ‘wondɛ war tɛɛno. Ɔci ɛkɛ ɛkkɛ yɔɔdɛ te Jwaŋa Yaayan. ⁴ Ɔɔn poŋɔn aŋa Juaŋti parɛ gɔkɔn ka Jwaŋa Tolan bala moki ɛkkɛ. Ɔci moki ɔɔn balgɔn poŋɔn ka ɛkkɛ balgɛ noŋɛ ba jyeka ɛkkɛ lalkɛ ɔɔn, ɔci ɛkkɛ balgɛ noŋɛ ba jyeka neeni oŋkanda ɔɔn. ⁵ Dala ɛkkɛ wɛɛdɛ Jwaŋa Tolan aŋka ɛkkɛ ‘uottɛ ñamu te jyek ɛkɛ aŋka anna ɛkɛ ani ma neeniyɛ, ŋeeddɛ ɛkkɛ ne pwadan aŋka ɛkkɛ yomgɔ tɛya ba yom Kiṭɔ ɔɔn. ⁶ Gɔṭṭɛ, hay! Modg ɔɔn, ‘ya buaga ɛkkɛ myettin te jwali ṭɔɔlɛ gɛɛl ne cyɛɛlɔ moki te yenti Ciɛggɔn ikin Yaccu Kiṭɔ aŋka naŋdɛ ɛkkɛ. Tieŋdɛ, ‘ya gɔkka ɛkkɛti, maka waakɛn pɛñin te naŋki waak, ɔci maka yookɔn te jyeka loṭɔn ɔɔn ɛkkɛnyɛ, naa ɛkkɛ ñoodi iki ɛkkɛn te coodi bɛɛ. ⁷ Çeejɛ ɛkkɛ kan ɛkkɛ lɔktɛ ba naŋki ɔɔnyɛ, a ɔɔn pwatcin. Ne ɔɔn balgɔn iki ɛkkɛ ban ɛkkɛyɛ, ɔɔn waakɔ pɛñɔ te naŋki waak bɛɛ. ⁸ Ɔɔn balgɔn omɔn wak ɛkkɛ budan bɛɛ, yeti ɔɔn balgɔn wɛɛṭɔn oomdin ɔɔn a wyɛlto. Ɔɔn balgɔn kanŋɔn ne tolan te oŋ jiñɛ ɔci te ween jiñɛ aŋka naa coodi ɔɔn ban ɛkkɛ cyɛga ɛkkɛti te jyek waka amtin bɛɛ. ⁹ Kan ɔɔn gɔktɔn ɛkkɛti ka ɔɔn ‘wondɔntɔ ɛkkɛ oomdinyɛ, a ɔɔn yaayɛ bɛɛ. Yeti ɔɔn kanŋɔn te byeŋkɔ a ɔɔn acaan ɔɔn buagɔn dala ɛkkɛ lɔktɛ ba naŋki ɔɔn neeni. ¹⁰ Ne ɔɔn balgɔn iki ɛkkɛ ban ɛkkɛyɛ, ɔɔn gɔŋnɔn ɛkkɛti agi, “Kan men gɛɛl noŋi kanŋa bɛɛyɛ, naa ɛkɛ daŋkun omdi waak bɛɛ.” ¹¹ Ɛɛ, ɔɔn nɔɔtkɔn ma agi ma ɛkkɛ gɛɛg balgi tieci kanŋan ɛkki waakcin bɛɛ. Yeti ɛkkɛn bala cooŋi ñingɛn te gena luarŋ ma waakɛn. ¹² Maka noŋi naŋka neeniyɛ, ɔɔn ṭeyɔn ɛkkɛn te yenti Ciɛggɔn ikin Yaccu Kiṭɔ ka dala ɛkkɛn tieci kanŋan ɛkkɛn waakɛn ne pwadan aŋka oomdin ɔci waka pookɛn bala ɛkkɛn byeŋkɛnti daŋkun te kanŋa ɛkkɛn. ¹³ Ɔci gɔṭṭɛ, hay! Modg ɔɔn, naa ɛkkɛ taabdɛ ɔci mwondɛ te naŋka pwadin bɛɛ. ¹⁴ Kan men gɛɛl ɛkkɛti yookɔn te jyeka kiewan ‘ya ɛkkɛti neeniyɛ, dala ɛkkɛ woŋgɔ tiittɛ te ɛkɛ. Naa ɛkkɛ jyeyɛ iki ɛkɛ oŋkanda bɛɛ. A ɔɔnyɛ, ɛkɛ poŋdi te naŋki ɛkɛ naŋka yaayan neeni. ¹⁵ Yeti gɔṭṭɛ, naa ɛkkɛ yooktɛ te ɛkɛ bɛɛ. Dala ɛkkɛ ɛkɛ ṭeedɛ ba ṭeena ma ṭeeki modg ɛkkɛn waakɛnda ɔɔn. ¹⁶ Dala Ciɛggɔn ikin mena ma ‘wondɛ coodi pwani neeniyɛ, dala ɛkɛ ɛkkɛ ‘wondɛ coodi pwani ɛkɛ oŋkanda te jiek waakɛnda. Dala Ciɛggɔn ikin bala ɛkkɛti waakida. ¹⁷ Gena ‘ya Buuluc kiewan jwali ṭɔɔlɛ ne ŋoyɔ neeni te byeŋ ‘ya paru neeni. ‘Ya ñiep ɛkkɛ. Ɔci te jyek ñiebbin neeniyɛ, ɛkkɛn kiewan ‘ya te byeŋ ‘ya aŋka ŋeeddɛ ɛkkɛ worga neeni bɛɛn te ‘yati paru. Naŋki ‘ya bala a ɔɔn oŋkanda worganti. ¹⁸ Dala Ciɛggɔn ikin Yaccu Kiṭɔ yomɛ pwada a pwani ɛkkɛti waakida.