2Butruc

¹ Gena ‘ya Cimaan Butruc kiewan worga ɛkkɛti neeni. ‘Ya a kɛɛngɔn Yaccu Kiṭɔ, ɔci ‘ya a Cuuda ɛkɛ moki. Ɛkkɛ maka kiegan ‘ya worga nɛ, ɛkkɛ a maka balki jyek jyenna pwadan ba ɔɔny. Ikin balkin jyek jyenna neeni te naŋki Jwaŋ ikin ɔci Yaccu Kiṭɔ Mena Yuoci ikin neeni. Ɛkɛ pwad pwado. ² Ciɛggɔn ikin Yaccuyɛ, dala ɛkɛ ɛkkɛ magdɛ ne tolan yomgɔti. Ɔci dala yom pwani ɛkɛ bala ɛkkɛti ne tolan. Dala naŋka neeni bala ɛkkɛti te ŋeejin ɛkkɛ jyek Juaŋ ŋeejɛ ne pwadan i jyek Yaccu Kiṭɔ Ciɛggɔn ikin daŋkuny. ³ Te war tɛɛn Juaŋ ikintiyɛ, ikin yaakinti cietin ne pwadan, ɔci noŋtin ba naŋki ɛkɛ. War tɛɛn ɛkɛ bala ikinti acaan ɛkɛ ŋeecin ikin doki. Ɛkɛ ikin bornin acaan ɛkɛ buagɔn dala ikin pwattin ba ɛkɛ ɔɔn. Ɔci ɛkɛ buagɔn dala war tɛɛn ɛkɛ bala ikinti ne tolan. ⁴ Ikin myennin ɛkɛ te naŋka naŋdɛ ɛkɛ ikintiy. Jyek naŋki ɛkɛ neeniyɛ, pwanna pwani ne tolan hay! Ɔci te jyek ɛkɛ neeniyɛ, ikin yaakinti kootin bora te naŋka yeyinti, naŋka bala iñɔ ṭɛɛrji wɛnniy. Nɔji tol tol iñɔ ṭɛɛrji acaan ma bala noŋi ba naŋka yomg ɛkkɛn buagiti ne pɛñan neeni. Ikin yaakinti kootin bora te naŋka neeniti, acaan ikin ‘wonnin Juaŋ yom ɛkɛ waanɛ ikin yomgɔti. ⁵ Ɛkkɛ jyettɛ Jwaŋa Tolanti doki, ɔci dala ɛkkɛ lieṭɛ naŋka pookɛn naŋka pwadin ne pɛñan daŋkun. Naŋka pookɛn neeniyɛ, gena coodda pwadan ɔci ŋeejjin jiek ŋeettiti ma, ⁶ ɔci muŋŋa ma mwokki waakɛn, ɔci yɔɔdda ma yɔɔtti ne tɛyan, ⁷ ɔci yom pwanna ma yomgɛn pwatki Juaŋti, ɔci yom pwanna ma yomgɛn pwatki maka pookɛnti, ɔci anna ma anki maka pookɛny. ⁸ Naŋka guaŋi ‘ya neeniyɛ, kan ɛkkɛn bala ɛkkɛti ne tolan waakɛnda, ɔci ŋeejin ɛkkɛ Ciɛggɔn ikin Yaccu Kiṭɔ ŋeennɛ neeniyɛ, bala ɛkkɛti budan bɛɛ. Ɛkkɛ aarŋɛ kanŋa Jwaŋa Tolan bɛɛ. Ɔci naŋka pwadan baaw ɛkkɛti bɛɛ. ⁹ Maka naŋka neeni baaw ɛkkɛntiyɛ, ɛkkɛn bala ba maka ñingɛn ulan. Ɛkkɛn yaakinti jiek jitkɛn yuartan ne pwadan bɛɛ. Ɔci ɛkkɛn poŋi te oŋŋa nɔji ɛkkɛn eññɛ Juaŋ ɔntɔ neeni bɛɛ. ¹⁰ Modg ɔɔn, acaan naŋka neeni bala matiyɛ, dala ɛkkɛ aŋka poŋdɛ te naŋki Juaŋ ne pwadan, acaan dala naŋki Juaŋ ŋeeddɛ ɛkkɛ ne pwadan ne ɛkɛ ɛkkɛ bornɛ ɔci muonɛ boray. Ɔci kan a ɔɔnyɛ, ɛkkɛ ḍɛɛmdɛ iñɔ oŋgati moki bɛɛ. ¹¹ Ɔci a ɔŋŋiyɛ, ne oŋŋa ɛkkɛ kaattɛ cyɛgji Ciɛggɔn ikin Yaccu Kiṭɔti bɛɛdiyɛ, ɛkkɛ kaattɛ Juaŋ ne pwadan ban ɛkɛ. Ɔci cyɛgji ɛkɛ neeniyɛ, bala yuonginda ɔɔn. ¹² Jyeka neeni jitkɛn ŋeejɛ ɛkkɛ ne pwadan, ɔci ɛkkɛ balgɛ yɔdgɛ ne tɛyan te jyeka neeni. Yeti a oŋkiyɛ, ‘ya baal gɔk ɛkkɛti aŋka dala ɛkkɛ poŋdɛ jyeka neeni. ¹³ ’Ya poŋ gɔk ka ne ‘ya baala ciya men te wara neeni ɔci kan ‘ya gɔkka ɛkkɛti aŋka naa ɛkkɛ yiedɛ te jyeka neeni bɛɛyɛ, a ɔɔn pwatcin. ¹⁴ ’Ya poŋ a ɔɔn acaan ‘ya myenna Ciɛggɔn ikin Yaccu Kiṭɔ agi oŋŋa ‘ya tuudjɔ cɔɔlnɔ doki. ¹⁵ Ɛkkɛ myennin ‘ya ne pwadan te jyeka neeni aŋka ne ‘ya baada wɛnniyɛ, ɛkkɛ yaaktɛti poŋdɛ jyeka neeni oŋkanda. ¹⁶ Ɛkkɛ myennin ‘ya te jyek war tɛɛn Ciɛggɔn ikin Yaccu Kiṭɔ ɔci te jyek bɛɛna ɛkɛ bɛɛdi dɔɔkti iñɔ ṭɛɛrji wɛnniy. Jyeka ɛkkɛ myennin ‘ya neeniyɛ, ɛkkɛn a jyeka budan jyeka naŋŋɔn ɔɔn te ñing tɛɛn ɔɔn bɛɛ. Pwani Yaccu yuarnɔn ɔɔn te woŋgɔ ne ɛkɛ warɛ lɛɛlnɛ bora ba mena tolany. ¹⁷ Ɔɔn balgɔn i ɛkɛ a cyɛɛlɔ poom wyeñɛti te oŋŋa ɛkɛ naŋŋɛ Wey ɛkkɛn Jwaŋa Tolan ne pwadany. Te oŋŋa wannayɛ, pwan gɔkkin ɛkɛti te ñaalɔ Mena Tolanti agi, “I a Kaci ‘ya Kacca ana ‘yay. ‘Ya yomu pwanna pwani iti.” ¹⁸ Ɔɔn tieŋnɔn pwana neeni ne ɛkɛ gɔŋni te ñaalɔ pɔliji ne ɔɔn balgɔn poom wyeñɛti iki ɛkɛ a cyɛɛlɔy. ¹⁹ Çeejɔn ɔɔn jyek bɔwan Jwaŋa Tolan a jyeka awarɛ. Ɔci te naŋka yuarnɔn ɔɔn poom wyeñɛti neeniyɛ, jyek ɛkkɛn ŋeejɔn ɔɔn ne pwadan ‘wota ne ɛkkɛn akki jyeka awarɛy. Dala ɛkkɛ woŋgɔ tiittɛ te jyek bɔwan Jwaŋa Tolan neeni, acaan jyek ɛkkɛn bala ba dyɛka ne nona ulan dyɛgdɛy. Dala ɛkkɛ woŋgɔ tiittɛ te jyeka neeni oŋkanda ne noon bɔɔdi ɔɔn, ɔci moki ne jiek jitkɛn yuartɛji ɛkkɛ ne pwadan ɔɔn. ²⁰ Dala ŋeeddɛ ɛkkɛ ne pwadan jyek bɔwan jyeka guagɛ ɛkkɛn te naŋka bɛya ne ŋoyɔ neeniyɛ, jiek jitkɛn neeni ŋeejɛ menga te ñing tɛɛn ɛkɛ parɛ bɛɛ. ²¹ Jyeka guagɛ bɔwan Jwaŋa Tolan te naŋka bɛya ne ŋoyɔ neeniyɛ, guagɛ ɛkkɛn te paŋi ɛkkɛn pookɛn bɛɛ. Ɛkkɛn gɔki ba jyeka guaŋŋɛ Boŋ Jwaŋa Tolan ɛkkɛnti neeni.

¹ Ɔci maka pookɛn gɛɛg te baaṭi maka gɔki amaam agi ɛkkɛn aginti bɔwan Jwaŋa Tolanyɛ, ɛkkɛn gɛɛg bala mati daŋkun. Yeti ɛkkɛn a bɔwan Jwaŋa Tolan woodgɛn bɛɛ, ɛkkɛn a maka jomi jiek budan. Ɔci ma bɛya ɛkkɛti daŋkun, ɔci ɛkkɛn loṭi ma amaam te jyek ɛkkɛn jyeka pookɛn neeni. Jyeka lorki ɛkkɛn ma neeniyɛ, ɛkkɛn lɛɛwi jyek Jwaŋa Tolan jitkɛn. Maka neeniyɛ, ɛkkɛn yookɔn ne pɛñan te Ciɛggɔn ɛkkɛn mena ɛkkɛn wannɛ neeni. Ɔci a ɔɔnyɛ, ywobji bɛya ɛkkɛnti ne pɛñan, ɔci ɛkkɛn ḍakti. ² Maka coŋin bootti ɛkkɛnti, ɔci lɔkti ba naŋki ɛkkɛn naŋki tomi neeni. Ɔci te naŋki maka loṭi ma amaam neeniyɛ, jyeka awarɛ aga ba jyeka budan mati. ³ Ɔci acaan yomg ɛkkɛn buagi waak ne tolanyɛ, ɛkkɛn ɛkkɛ naŋtɛ ñin te jyeka jomgin. Te baaṭi jyek ywobja bɛya ɛkkɛnti naŋŋɛ Juaŋ doki agi ɛkki ḍaktɔ. ⁴ Malɛɛkanyɛ, ne ɛkkɛn noŋki nɔjiyɛ, ɛkkɛn dalnɛ Juaŋ te ywobji bɛɛ. Ɛkkɛn yiemnɛ ɛkɛ iñɔ bana maañti. Ɔci ɛkkɛn olnɛ ɛkɛ nona ulan, ɔci ɛkkɛn ciyi aŋan ne oŋŋa godan Jwaŋa Tolan bɛɛdi ɔɔn. ⁵ Ɔci moki maka bala te baaṭi dalnɛ Juaŋ bɛɛ. Gena Nɔwa mena loṭi ma te naŋka pwadiny. Ɛkɛ iki maka pookɛn gɛɛg ne dɔɔyɔ wyetkɛn ne yyɛɛwɔyɛ, ɛkkɛn aŋka yɔɔññɛ Juaŋ te oŋŋa wanna. Tol bɔrda oonɛ Juaŋ ɔci maka yeyin ṭɛɛrji eññɛ ɛkɛ. ⁶ Ban Caduum ɔci ban Gamɔɔra ḍakcin te ywobji Juaŋ moki. Ɛkkɛn ammɛ maaño. Juaŋ noŋi a ɔɔn aŋka dala maka ciyi budan te ɛkɛ poŋdi te naŋki ɛkkɛn. ⁷ Mena pwadan yenti Lutyɛ, aŋka yɔɔññɛ Jwaŋa Tolan. Lut bala wiak yomɛti ne pɛñan te naŋki maka yeyin noŋi tomi neeni. ⁸ Ne Lut baali ciyi ban maka neenitiyɛ, ɛkɛ yomɛ yaayɛ ne pɛñan te naŋka yuarŋɛ ɛkɛ mati ɔci te jyeka tieŋnɛ ɛkɛ te ɛkkɛntiy. Ɛkkɛn bala noŋi ba naŋka yomg ɛkkɛn buagitiy. ⁹ Kan Juaŋ yaakinti naŋka tɛyan neeniyɛ, ɔci ɛkɛ yaakinti ma ɛkɛ magdɛ te taab ɛkkɛn. Ɔci moki ɛkɛ yaakinti ywobji ɛkɛ oldɛ maka yeyinti, ɔci ywobji bala ɛkkɛnti oŋkanda ne oŋŋa godan bɛɛdi ɔɔn. ¹⁰ Maka ani naŋki tomi maka paŋi ɛkkɛn yiegin te naŋka neeni, ɔci maka yookɔn te jyek Juaŋyɛ, ywobji Juaŋ bɛya ɛkkɛnti ne tolan. Ɛkkɛn buayi menga bɛɛ. Ɛkkɛn noŋi ba yomg ɛkkɛn pookɛn budan. Ɛkkɛn buayi te waaŋi malɛɛkan bala ñaalɔ bɛɛ. ¹¹ Maka noŋi a ɔɔnyɛ, war tɛɛn ɛkkɛn tol tol ba war tɛɛn malɛɛkan bɛɛ. Yeti malɛɛkanyɛ, ɛkkɛn wooki jwali gɛɛl Jwaŋa Tolan ñamɛti bɛɛ. ¹² Maka noŋi ne yaayan neeniyɛ, ɛkkɛn baali ba kulin mwoktan ma ɔci noktan may. Maka neeni bala gɔki ne yaayan te jyeka kwoyɔn ɛkkɛn neeni, ɔci ba leyi ne ḍaktiyɛ, ɔci ɛkkɛn daŋkun ḍakti a ɔɔn. ¹³ Taab dɔɔkti ɛkkɛnti daŋkun ba naŋka naŋi ɛkkɛn yeyin maka pookɛnti wanna. Ɛkkɛn poŋi gɔki agi kan ɛkkɛn ciyinti te coodda milan coodda noŋki ɛkkɛn naŋka yeyin a lɔɔn ma ñomgɛnti oŋkanda neeniyɛ, agi a ɔɔn pwadɔ ɛkkɛnti. Ɔci ɛkkɛn yomgɛn ñɔy ñɔy poŋi agi ɛkkɛn ɛkkɛ naŋŋɛti ñin te naŋki ɛkkɛn neeni. Ɔci nonk iidn yaakɔn ɛkkɛn ne ɛkkɛn balki omi iki ɛkkɛy. Ɛkkɛn yomgɛn ñɔy ñɔy ne ɛkkɛn poŋki te naŋki ɛkkɛn naŋka yeyin, ɔci ne ɛkkɛn ɛkkɛ naŋkɛ ñin neeniy. ¹⁴ Kan ɛkkɛn jyɛyi iki moongyɛ, paŋi jyek tomi bala ɛkkɛnti doki. Ɔci oŋkanda ɔɔnyɛ, ɛkkɛn bala poŋi te jyek tommo. Ɔci ɛkkɛn maka moong maka ñingɛn tɛyan bɛɛyɛ, maaltan ɔci naŋtan ñino. Oŋkandayɛ, yomg ɛkkɛn buagɔn waka coŋin. Jwaŋa Tolan noŋdi ne yaayan ɛkkɛnti. ¹⁵ Pɔya pwadan dalji ɛkkɛn. Ɛkkɛn jyetcin ɔntɔ, ɔci ɛkkɛn bala noŋi ba naŋki Balaam kaci Biyɔr. Balaamyɛ, ɛkɛ ani ami bilka bɛya te kanŋa ɛkɛ kanŋa yaayan neeniy. ¹⁶ Juaŋ bala ṭeyi ɛkɛ te naŋki ɛkɛ naŋka yaayan neeni. Tɔɔrɔnyɛ, ɛkɛ a gena kookinti jieko. Yeti ɛkɛ gɔkcin Balaamti te pwan men baano. Ɔci acaan a ɔŋŋiyɛ, bɔwa neeni naŋka naŋdɛ ɛkɛ te wyeña yaayan neeniyɛ, dalnɛ ɛkɛ doki. ¹⁷ Maka noŋi ne yaayan neeniyɛ, ɛkkɛn bala ba jiidg ne ɛkkɛn iiki ɔci menga motti pyeg ɛkkɛn moki bɛɛy. Ɔci moki ɛkkɛn bala ba wiew ne eedɛ peedɛ jwami ɔntɔ amaam ɔci etti ñaal gɛɛl yelk jitin bɛɛy. Noon gɛɛl ywaŋŋɛ Juaŋ doki te ɛkkɛn. Gena nona iñɔ nona mielo. ¹⁸ Ɛkkɛn gɔki jyeka coŋin jyeka budan. Ɔci te naŋki ɛkkɛn naŋki tomiyɛ, maka pookɛn ḍɛɛmdi iñɔ. Gena maka kooyin bora te naŋka yeyintiy. Ɛkkɛn ḍɛɛmdi iñɔ ne pɛñan moki te naŋki maka neeni. ¹⁹ Maka loṭi ma amaam neeniyɛ, ɛkkɛn gɔki mati agi ɛkkɛn yaakinti noŋi ba yomg ɛkkɛn pookɛn oŋkanda. Yeti maka neeniyɛ, ɛkkɛn a kɛɛnk naŋka yeyin. Kan men gɛɛl buannɛ gengayɛ, ɛkɛ a kɛɛngɔn gena ɛkɛ buannɛ neeni. ²⁰ Ciɛggɔn ikin Yaccu Kiṭɔyɛ, ɛkɛ a Mena Yuoci mako. Ɔci kan ma kooyin bora te nɔji ɛkkɛnti te ŋeejin ɛkkɛn Yaccu ŋeeckiti ɔci kan ɛkkɛn dɔɔdi nɔjiti moki ɔci kan ɛkkɛn bwandɛ nɔjja neeniyɛ, coodda ne ŋoyɔ neeni yaayɛ ne tolan te coodi maka jyeti Yaccuti bɛɛy. ²¹ Kan te pɔya pwadan ŋeeckiti ɛkkɛn bɛɛyɛ, a ɔɔn aŋka pwatcin. Kan pɔya pwadan ŋeecɔn ma, ɔci kan ɛkkɛn oŋ ganuun pwadan ganuun ɛkkɛn ‘wonnɛ Juaŋ neeni daltanyɛ, a ɔɔn yaayɛ ne tolan. ²² A ɔɔnyɛ, bala ba jwali ṭɔɔlɛ awarɛ jwalla gɔki agi, “Gɔɔŋyɛ, kan ɛkɛ ŋɔktiyɛ, ɛkɛ dɔɔdi waka ŋɔŋnɛ ɛkɛ neeni amdɛ moki.” Ɔci jwalla parɛ gɔki agi, “Kuciyɛ, kan ɛkɛ lwaktan mayɛ, ɛkɛ dɔɔdi cotinti moki ne pɛñan.”

¹ Maka ana ‘yay, worga kiewan ‘ya ɛkkɛti neeniyɛ, gena worga akki ne yyɛɛwɔ. Ɔci te worgan yaakkɛn neeniyɛ, ‘ya gɔkkan ɛkkɛti ka dala ɛkkɛ poŋdɛ te jyeka guagɛ maka a bɔwan Jwaŋa Tolan te naŋka bɛya ne ŋoyɔy. ² Dala ɛkkɛ poŋdɛ te jyek bɔwan Jwaŋa Tolan jyeka te baaṭi, ɔci te jyek Ciɛggɔn ikin Mena Yuoci ikin neeni. Dala ɛkkɛ poŋdɛ te jyeka guaŋŋɛ ɛkɛ ikinti te tugi ɔɔn Cuudan ɛkɛy. ³ Jwalla bala ñamu te jyeka pookɛnyɛ, gɔki agi ne oŋŋa bɛya ne ŋoyɔyɛ, maka lɛɛṭi jyek Jwaŋa Tolan bɛya. Ɔci ɛkkɛn noŋdi ba naŋka yomg ɛkkɛn buagiti ne pɛñan neeni. ⁴ Ɔci ɛkkɛn gɔkti agi, “Ɛkkɛ gɔkɛ agi Yaccu bɛɛdɔ, oŋ ɛkɛ bala wɛnɛ?” Ɔci agi, “Yɔrg ikin ɛkkɛn tuun te baaṭi doki, ɔci naŋka parɛ gɛɛl bɛɛn mati men bɛɛ. Naŋki waakɛnda bala ba bolja oŋŋa Juaŋ okki noon warday.” ⁵ Maka neeni jyeka naŋŋɛ Juaŋ okki ɛkɛ waak neeni ñalɛ a genga bɛɛ. Acaan te baaṭi ma yaayanyɛ, Jwaŋa Tolan gɔkcin te jwali tukɛ agi dala pɔli ɔci ṭɛɛr bala, ɔci ɛkkɛn bala doki. Šɛɛr oonɛ ɛkɛ bora te pietin, ɔci pieg bala te nonk ɛkkɛn. ⁶ Ɔci oŋ gɛɛlti te jyek Juaŋyɛ, ṭɛra wanna jaadɛ piego, ɔci maka bala ciyi ṭɛɛrji i maal jitkɛn waakɛnda ḍakcin. ⁷ Ɔci te jyek Juaŋ mokiyɛ, pɔli ɔci ṭɛɛryɛ, ɛkkɛn bala oŋkanda ɔɔn ne oŋŋa ɛkkɛn amdɛ maañ ɔɔn. Gena oŋŋa Juaŋ noŋdi godan maka yeyinti, oŋŋa ɛkkɛn ḍakti neeni. ⁸ Jwali gɛɛl bala, ɔci naa ɛkkɛ ñingɔ yeya te jwalla neeni bɛɛ! Jwalla neeni gɔki agi Juaŋ poki nink bɛɛ. Oŋ jiñɛ ne cyɛɛlɔyɛ, bala ba bolja yuonga coŋin ɛkɛti ba yuong a alp ne cyɛɛlɔ (1,000) ɔɔn. Ɔci moki yuonga a alp (1,000) neeniyɛ, bala ba bolja oŋ jiñɛ ne cyɛɛlɔ ɛkɛti. ⁹ Ma ɛkkɛ gɛɛg poŋi gɔki agi Ciɛggɔn ikin kwaci te naŋka guaŋŋɛ ɛkɛ agi noŋjɛy. Yeti ɛkɛ kwaci bɛɛ. Ɛkɛ bala poŋi te ɛkkɛ, ɔci kɛɛy ɛkkɛ, acaan ɛkɛ buagɔn naa men gɛɛl ḍakti bɛɛ. Ɛkɛ buagɔn dala ma waakɛnda waakɛn yaltan te naŋki ɛkkɛn naŋka yeyin ɔci bɛya ɛkɛti. ¹⁰ Yeti ne Ciɛggɔn ikin bɛɛdiyɛ, ɛkɛ bɛya lieda ba mena ɛɛno. Ɔci te oŋŋa wannayɛ, pɔli baadi ɔci joon ɛkɛ tolla tollo. Ɔci waka bala ñaalɔ amdɛ maaño. Ɔci ṭɛɛr ɔci waka bala ṭɛɛr konɛtiyɛ, ɛkkɛn amdɛ maañ waakɛnda daŋkun. ¹¹ Acaan waka neeni ḍakti ne baaṭiyɛ, dala ɛkkɛ poŋdɛ te coodi ɛkkɛ! Dala ɛkkɛ ciedɛ ne pwadan. Dala ɛkkɛ ciedɛ te jyek Jwaŋa Tolan oŋkanda. ¹² Dala ɛkkɛ kɛɛddɛ oŋŋa oŋ Jwaŋa Tolan bɛɛdiy. Ɔci dala ɛkkɛ kandɛ ne pwadan aŋka dala oŋŋa neeni bɛya ne pɛñan. Oŋŋa oŋ Jwaŋa Tolan bɛɛdi neeniyɛ, pɔli kola maañ ɔci waka bala ñaalɔ waakɛnda amdɛ maaño. ¹³ Te Jyeka guaŋŋɛ Juaŋ ikintiyɛ, ikin kɛɛyin oŋŋa pɔlla woonɛ bɛɛdi ɔci ṭɛra woonɛ bɛɛdiy. Ɔci ṭɛra woonɛ neeniyɛ, naŋka pwadin bala pookɛn oŋkanda ɔɔn. ¹⁴ Maka ana ‘yay, acaan ɛkkɛ kɛɛyɛ naŋka neeniyɛ, dala ɛkkɛ woŋgɔ tiittɛ te yomg ɛkkɛ aŋka dala ɛkkɛ mɔktɛ Jwaŋa Tolan ne ɛkkɛ ciedɛ ne pwadany. Naa gena yaayan gɛɛl mɔktɛ ɛkɛ ɛkkɛti bɛɛ. Ɔci a ɔɔnyɛ, menga yaakinti gɔkti agi gena yaayan gɛɛl bala ɛkkɛti bɛɛ. ¹⁵ Dala Juaŋ ŋeeddɛ ɛkkɛ ne ɛkɛ loomgɛ tɛɛki ikintiy. Acaan a ɔŋŋiyɛ, pɔya ɛkɛ yuoci ikin bala. A ɔɔnyɛ, bala ba jyeka kiinɛ mod ikin Buuluc ikintiy. Ikin anin Buuluc. Ɛkɛ bala gɔki te jyeka neeni daŋkun te worga kienɛ ɛkɛ ɛkkɛti neeniy. Ɛkɛ bala gɔki jiek te ñing tɛɛn ɛkɛ ‘wonnɛ Juaŋ neeni. ¹⁶ Ɛkɛ bala gɔki te jyek oŋŋa Yaccu bɛɛdiy. Jyeka kiinɛ ɛkɛ neeniyɛ, jitkɛn gɛɛg tɛy tɛyo. Ɔci jyeka tɛyan neeniyɛ, aktanyɔ ma gɛɛg. Maka noŋi a ɔɔnyɛ, ɛkkɛn jiek ŋeecɔn ne pwadan bɛɛ. Ɛkkɛn ñingɛn tɛy tɛy bɛɛ. Ɔci ɛkkɛn ḍakti te naŋka neeni. Ɛkkɛnyɛ, jyeka kiigin jyeka pookɛn daŋkun aktanyɔ. ¹⁷ Ɛkkɛ maka ana ‘yay, jiek ŋeejɛ ɛkkɛ doki. Dala ɛkkɛ woŋgɔ tiittɛ aŋka naa ɛkkɛ jyɛttɛ maka yeyin ɔntɔ bɛɛ. Dala ɛkkɛ yɔɔddɛ ne tɛyan. ¹⁸ Dala ɛkkɛ aŋka ‘uottɛ ñamu te yom pwani Jwaŋa Tolan, ɔci te ŋeejin Ciɛggɔn ikin Yaccu Kiṭɔ ŋeejɛ ɛkkɛ neeni. Ɛkɛ a Mena Yuoci ikin neeni. Dala ma jieddi Yaccu acca ɔci yuonginda ɔɔn ne ṭɛɛr baadi ɔɔn! Amɛɛn.