2Kuruntuc

¹ Gena ‘ya Buuluc cuuda Yaccu Kiṭɔ ba yom Jwaŋa Tolan, ɔci mod ikin Timutawuc kiewɔn worga neen neeni. Worga neeni ooddi kaniica Jwaŋa Tolanti ban Kuruntuc i Ma Kiṭɔ maka pwadin ban Akeeyaji warda. ² Dala yom pwani ɔci coodi pwani bala ɛkkɛti te Wey ikin Jwaŋa Tolan ɔci Ciɛggɔn ikin Yaccu Kiṭɔy. ³ Dala Jwaŋa Tolan Wey ikin ɔci Ciɛggɔn ikin Yaccu Kiṭɔ yomgɛn pwada a pwani ɛkkɛti, ɔci dala ɛkkɛn ɛkkɛ ‘wontɛ coodi pwanno. ⁴ Ɛkɛ a mena ikin muntinji te yom yoñ ikin waakiday. A ɔŋŋi aŋka ikin da yaakinti maka yomgɛn yeyin muntinji te munna ikin munnintiji Jwaŋa Tolany. ⁵ Acaan bala ba ne ikin ñoowin iki Kiṭɔ te taab ɛkɛyɛ, ikin da yomgɔ pwada te Kiṭɔ te munna neeni daŋkun. ⁶ Kan ɔɔn taamnɔnyɛ, aŋka ɛkkɛ yomgɔ pwaddi, ɔci yɔɔdɛ Juaŋo. Ɔci kan ɔɔn yomgɔ pwaniyɛ, aŋka ɛkkɛ da yomgɔ pwaddi. Naŋka neeni bɛya te tiekin ɛkkɛ yomgɔ tieŋni te taab bɛɛn ikinti waakida neeniy. ⁷ Ɔci paŋŋa poŋɔn ɔɔn te ɛkkɛyɛ, tɛɛna tɛɛno, acaan ŋeejɔn ɔɔn ba ñoowin ɛkkɛ ñoowin iki ɔɔn te taab neeniyɛ, ɛkkɛ daŋkun ñootin iki ɔɔn te yom pwanno. ⁸ Hay modg ɔɔn, ɔɔn buagɔn dala naŋka bɛɛn ɔɔnti yaayan ban Ecya neeni ŋeeddɛ ɛkkɛ. Naŋka neeni cyɛŋŋa cyɛŋi ɔɔnti ne tolan, ɔci ɔɔn beelnɔn te kɛɛn coodi tɛɛtin moki. ⁹ Ɔɔn waakɔ poccin iñɔ bala ba ne ɔɔn wankɔnti ma te lien no. Yeti naŋka neeni bɛɛn a ɔɔn aŋka naa ɔɔn poŋdɔn te waak ɔɔn pookɔ bɛɛ, yeti dala ɔɔn poŋdɔn te gena Jwaŋa Tolan mena maka tuun jɔɔŋdɛ ñaalɔy. ¹⁰ Ɛkɛ ɔɔn wɛɛnɔn bora te nona yaayanti, ɔci ɛkɛ ɔɔn wɛɛdɔn bora moki. Ɔci paŋi ɔɔn ḍuannɔn aŋa ɛkɛti ka ɛkɛ ɔɔn wɛɛdɔn bora moki. ¹¹ A ɔŋŋi ɛkkɛ daŋkun ɔɔn magdintɔ te cɔŋŋo, aŋka maka coŋin gɔkti a pwatcin te gena yuarŋɔn ɔɔn te cɔŋi maka coŋin neeni. Ɔci Juaŋ bieŋɛ tandɛ ɔɔnti, ɔci maka coŋin gɔkti a pwatcin ɛkɛti te ɔɔn. ¹² Naŋka noŋɔn ɔɔn waakɔ bala a ɔŋŋi, jwali yomg ɔɔn te naŋka naŋŋɔn ɔɔn ṭɛɛrji wɛnniyɛ, ɔɔn noŋŋɔn te yoma ḍiɛran ɔci te pwani Jwaŋa Tolan, yeti te ñing tɛɛn war ma baan budan bɛɛ, yeti ɔɔn noŋŋɔn te yom pwani Jwaŋa Tolan, ɔci noŋŋɔn ne tolan aŋa ɛkkɛti nɔñji. ¹³ Ɔɔn kiedɔn gena parɛ gɛɛl ɛkkɛti bɛɛ, gena waka ɛkkɛ yaaktɛti paŋŋɛn ɔci jitkɛn yuartɛy. ‘Ya baal poŋ ka ɛkkɛ waka neeni jitkɛn yuartɛ ne pwadan. ¹⁴ Bala ba ɛkkɛ waak jitkɛn yuarnɛ ne ḍiɛran dokiyɛ, ɛkkɛ yaaktɛti noŋdɛ waakɔ te ɔɔn bala ba ne ɔɔn noŋɔn waakɔ te ɛkkɛ, ne oŋŋa Ciɛggɔn Yaccu Kiṭɔ bɛɛdɛy. ¹⁵ Acaan naŋka neeni ŋeej ‘ya ne pwadanyɛ, ‘ya buaga ka bɛɛd ḍieŋŋa ɛkkɛti te ñamu aŋka ɛkkɛ yomgɔ ñɔya ñɔɔn ne tolan. ¹⁶ ’Ya buaga ka ḍieŋŋa ɛkkɛti ne ‘ya gorda oodda ban Macɛdɔɔnya ɔci dɔɔkta ɛkkɛti moki te ban Macɛdɔɔnya, ɔci ɛkkɛ ‘ya ‘yeettatɛ pɔɔjɔ ne ‘ya oodda ban Yahuudiyay. ¹⁷ ’Ya yomu ŋoodan ne ‘ya buagati noŋa naŋka neeniyɛ? Gena ‘ya buaga ka ɛkɛ naŋdi neeniyɛ, naŋdi ‘ya ba naŋka ṭɛɛrji wɛnni aŋka ‘ya gɔkca ka “Ɛɛ” ɔci “A’a” te oŋŋa ne cyɛɛlɔ? A’a, ɔɔn noŋɔn a ɔɔn bɛɛ. ¹⁸ Awarɛ, te yenti Jwaŋa Tolan mena ooki jyek ɛkɛ waakɛn bɛɛ neeniyɛ, jwali ɔɔn ɛkkɛtiyɛ, a “Ɛɛ” ɔci “A’a” bɛɛ. ¹⁹ Acaan Yaccu Kiṭɔ Kaci Jwaŋa Tolan ɛkɛ a mena ɛkkɛ lalkɛ ɔɔny. Ɛkkɛ lalkɛ ɔɔn i Cila ɔci Timutawuc, ɔci jwali ‘ya a “Ɛɛ” ɔci “A’a” bɛɛ. Yeti jwalla a “Ɛɛ” aŋka bala Juaŋti oŋkanda. ²⁰ Acaan jwalla ḍuaññɛ Jwaŋa Tolan balkɛ jwalla a “Ɛɛ” te Kiṭɔ, a ɔŋŋi aŋka ɔɔn gɔkɔn ka dala bala a ɔɔn te ɛkɛ te pwani Jwaŋa Tolan neeni. ²¹ Yeti Jwaŋa Tolan ɛkɛ a mena ɔɔn yɔɔnnɔn iñɔ iki ɛkkɛ Kiṭɔtiy, ɔci ɛkɛ ikin ‘wonnin kanŋa byeŋkɔti. ²² Ɛkɛ ikin naŋŋin te mañ ɛkɛ, ɔci ikin ‘wonnin Boŋ ɛkɛ yomgɔti ba gena mwoki ikin lakun. ²³ Yeti ‘ya gɔkca te yenti Juaŋ aŋka ɛkkɛ waakɔ aga lɔɔn bɛɛ. Gena te jyeka neeni aŋka ‘ya bɛɛna ban Kuruntuc men bɛɛ neeni. ²⁴ ’Ya gɔkka ɔŋŋi aŋka ɛkkɛ myettin te waka ɛkkɛ jyeddɛ bɛɛ, yeti ɔɔn kanŋɔn iki ɛkkɛ te yom ñɔɔn ɛkkɛ, acaan ɛkkɛ yɔdgɛ ne tɛyan te jyeni ɛkkɛ.

¹ A ɔŋŋiyɛ, ‘ya yomu muŋi ka naa ‘ya bɛɛd ḍieŋŋa ɛkkɛti moki aŋka ɛkkɛ yomgɔ yiegdi bɛɛ. ² Kan ‘ya ɛkkɛ yaadin yomgɔti oŋ a menɛ ‘ya ywaŋda yomutiy, pari ɛkkɛ maka yaañi ‘ya yomgɛnti neeni bɛɛ? ³ A ɔŋŋi aŋka ‘ya kiena worga neeni ɛkkɛti te ñamu wanna. A ɔŋŋiyɛ, ne ‘ya bɛɛdayɛ, ‘ya yomu yaaya te ɛkkɛ maka ‘ya ywaŋka yomuti neeni bɛɛ, acaan ɛkkɛ waakida ŋeejin ‘ya ne pwadan. A ɔŋŋiyɛ, yom ñɔɔn ‘ya aga yom ñɔɔn ɛkkɛ waakida. ⁴ Acaan ne ‘ya ɛkkɛ kieŋnin worgayɛ, ‘ya yomu wiak ne tolan, ɔci ‘ya yomu ñɔni warɛ, ɔci pieg bala wɔyi ‘ya ñinguti. Yeti ‘ya noŋi a ɔɔn aŋka ɛkkɛ yaadin ‘ya yomgɔti bɛɛ, yeti aŋka ŋeeddɛ ɛkkɛ te anna ana ‘ya ɛkkɛ ne tolan neeni. ⁵ Kan menga eccin yom yoñ mengatiyɛ, ‘ya yomu yaaya bɛɛ. Ɛkɛ ɛkkɛ yaaññɛ yomgɔti pookɔ. ‘Ya gɔk a ɔɔn acaan ‘ya buaga naa ‘ya naŋka neeni, ‘uotkati ɛkɛ wyeñɛti bɛɛ. ⁶ Mena noŋi a ɔɔn wanna kan maka coŋin jiek duakcɛ ɛkɛ wyeñɛtiyɛ, yɔmjin doki. ⁷ A ɔŋŋiyɛ, dala ɛkkɛ ɛkɛ bɔɔktɛ ɔci ywaŋdɛ yomɛti aŋka naa ɛkɛ bwandɛji yom yoñ bɛɛ. ⁸ A ɔŋŋiyɛ, ‘ya gɔkka ɛkkɛti ne pɛñan, dala ɛkkɛ ɛkɛ lɛɛrtɛ ani ɛkkɛ aŋka ŋeeddɛ ɛkɛ ɛkkɛ anɛ ɛkɛ. ⁹ Worga kiewan ‘ya ne ŋoyɔ neeniyɛ, ‘ya poci ɛkkɛ a poccin buaga gɔrca ne ɛkkɛ agɛ maka tieci jiek te waak waakɛnda boki no. ¹⁰ Mena bɔɔktɛ ɛkkɛyɛ, ɛkɛ bɔɔka ‘ya daŋkun. Kan genga bala aŋka ɛkɛ bɔɔka ‘ya, oŋ ɛkɛ bɔɔkan ‘ya Kiṭɔ ñamɛtiyɛ, ɛkɛ bɔɔkan ‘ya te ɛkkɛ ¹¹ aŋka naa Jwaŋa Yaayan ikin naŋtin ñin acaan ikin paŋi ɛkɛ kuolin ñin bɛɛ. ¹² Ne ‘ya bɛɛna ban Trɔwacti aŋka lor ma te jyek Kiṭɔ jyeka wonkɛn jyeka pwadinyɛ, Ciɛggɔn pɔy tukɛ pɔŋnɛ te kanŋa aŋan. ¹³ Yeti paŋi ‘ya warɛ ḍiemnɛ iñɔ bɛɛ, acaan mod ɔɔn Tituc mɔkcan ‘ya aŋan bɛɛ. A ɔŋŋiyɛ, ‘ya bana neeni daljan ɔntɔ, ɔci ‘ya ati ban Macɛdɔɔnya. ¹⁴ Ɔɔn gɔktɔn a pwatcin Juaŋti, acaan ɛkɛ a mena ɔɔn ‘wonnɔn bɔnnin te Yaccu Kiṭɔ te war tɛɛn aŋka ŋeejin ɛkɛ ŋeettiti ma eedɔn ɔɔn noon warda bala ba piinŋan pyeni milany. ¹⁵ Acaan ɔɔn agɔn pyen Kiṭɔ pyena milan maka uniti ɔci maka tuwati. ¹⁶ Pyena neeni etti lien maka yienti, yeti ɛkɛ a pyena etti tɛɛtin maka unitiy. Oŋ a menɛ yɔmjin te kanŋa neeniy? ¹⁷ Acaan ɔɔn balgɔn ba maka coŋin yieyɔn jwali Juaŋ a yied bɛɛ. Yeti ɔɔn balgɔn ba maka yɔɔññɛ Juaŋo. Ɔɔn gɔkɔn te Juaŋ te yoma awarɛ Juaŋ ñamɛti te Yaccu Kiṭɔ ba maka kanŋan Kiṭɔtiy.

¹ Ɔɔn jɔɔttɔn te jiɛt waakɔ pookɔ moki? Walla ɔɔn buagɔn kiedɔn worgan ɛkkɛti aŋka mieti ɛkkɛ te waak ɔɔnɔ? Walla moki ɔɔn buagɔn ɛkkɛ kieddɛ worgan mieti te ɔɔnɔ? A’a. ² Ɛkkɛ woodgɔ agɛ kiikan ɔɔn, ɔci balgɛ ɔɔn yomgɔti aŋka ŋeettan ma waakɛnda ɔci paktan ma waakɛnda. ³ Gena Kiṭɔ kieñi kiikan neeni, ɔci cuuññɛ ɛkɛ te ɔɔny, oŋ yeti te ñɔɔn galam bɛɛ, yeti te Boŋ Jwaŋa Tɛɛti, ɔci moki te kiikan guonanti bɛɛ, yeti te kiikan men baan yomɛti. ⁴ Ɔɔn balkɔn jwalla awarɛ te Kiṭɔ Juaŋ ñamɛti. ⁵ Ɔɔn yaakɔnti poŋɔn te genga te waak ɔɔn pookɔ aŋka noŋɔn kanŋa neeni bɛɛ. Oŋ yeti war tɛɛn ɔɔn bɛya te Juaŋti. ⁶ Gena ɛkɛ ɔɔn naŋŋɔn aŋka ɔɔn yaakɔnti kanŋa jyeka naŋŋɛ Juaŋ wonkɛn neeniy. Oŋ yeti te jyek ganuun a kiigin bɛɛ, yeti te Boŋ Jwaŋa Tolan. Jyek ganuun jyeka a kiigin etti lieno, yeti Boŋ Juaŋ aŋka etti tɛɛtin. ⁷ Pɔy ganuun kiinɛ Juaŋ a kiin gwoyi ṭɔlgɛn ŋotkɛnti pɔya ñamu neeniyɛ, ɛkɛ eccin lieno. Yeti ɛkɛ balki pwani Juaŋ ne tolan. Ɔci pwanna neeni bala galdan Muuca ñingɛti ne tolan, ɔci ma Icrayiil yaakɛnti gɔrti Muuca woŋgɛti te wɔɔka wanna bɛɛ. Acaan pwanna neeni bala galdan ne yaajan ɛkkɛn ciɛrɛ ñingɛnti. Yeti te wɔɔka wannayɛ, pwanna neeni ati ooddi baadi doki, ⁸ pwani kanŋa Boŋ Juaŋ aŋka tol tol nɔñji. ⁹ Kan kanŋa jiek oldɛ ma wyetkɛnti ɛkɛ pwatcinyɛ, kanŋa etti yɔɔt neeni aŋka pwatcin ne tolan nɔñji. ¹⁰ Pwanna ñamu tolan neeniyɛ, kan ɛkɛ poortinti i pwani jyeka naŋŋa Juaŋ ŋoyɔ neeniyɛ, ɛkɛ a genga moki bɛɛ. Ɛka ñamu neeni pwani ɛkɛ bala moki bɛɛ, bawwin doki. ¹¹ Oŋ kan naŋka ñamu naŋka bawwin neeni balki pwani ne tolany, oŋ pwani jyeka naŋŋɛ Juaŋ wonkɛn jyeka baadi bɛɛ neeni bala a ɔki? Pwanna neeni aŋka bala ñamu ne yaajan nɔñji. ¹² Ne jyenna kɛɛyin ɔɔn baali ɔɔntiyɛ, ɔɔn waakɔ tɛɛcin ne tolan. ¹³ Ɔɔn balgɔn ba Muuca mena kwomi woŋgɛ te bworŋ aŋka naa ma Icrayiil pwanna ati ɔci bawwin neeni yuartan bɛɛ. ¹⁴ Oŋ yeti paŋi ɛkkɛnyɛ, aŋi wyeñ boojo, ɔci ne acca neeniti ɔɔnyɛ, kan jyek ganuun jyeka te baaṭi paktan mayɛ, ɛkkɛn men wyetkɛn niin a uulgin ba wyeña te baaṭi wanna ɔɔn, ɛkkɛn jyeka awarɛ neeni jitkɛn yuartan bɛɛ. A ɔɔnyɛ, bala ba ɛkkɛn meni bala kwomi ñingɛn te bworŋa kwomki ɛkkɛn wyetkɛn te baaṭi bworŋa kɛki ɛkkɛn wanna meni ɔɔn. Yeti kan men jyeddi Yaccutiyɛ, ɛkɛ oŋ jyeka awarɛ neeni jitkɛn yuartɛji oŋo. Ɔci a ɔɔn bala ba bworŋa neeni warɛ uunnɛ ɔntɔ oŋo. ¹⁵ Ɔci acca men ɔɔnyɛ, ne ɛkkɛn pokki ganuun Muucayɛ, ɛkkɛn jiek jitkɛn yuartanji bɛɛ. Ɛkkɛn men bala yomgɛn niin a uulgin bala ba ne bworŋa kwomki ɛkkɛn wyetkɛn wanna baali kɛki ɛkkɛn men ɔɔn. ¹⁶ Bala ba jyeka kiigin worga Juaŋji gɔki agi, “Muuca bworŋ uunnɛ ɔntɔ te woŋgɛti ne ɛkɛ warɛ yallɛ Ciɛggɔntiy.” ¹⁷ Accayɛ, “Ciɛggɔn” a Boŋ Juaŋo, ɔci ne Boŋ Ciɛggɔn baaliyɛ, ikin ḍɔɔggɔ wɔkɔ. ¹⁸ Ɔci ikin maka woŋgɛn a kwomgin te bworŋa neeni bɛɛyɛ, ikin balkin pwani Ciɛggɔn. Ɔci ikin waakɔ aaŋŋin balkin ba ɛkɛ te pwani ɛkɛ pwanna tolan pwanna bɛya te Ciɛggɔnti, mena a Boŋ Juaŋy.

¹ A ɔŋŋi ne kanŋa neeni baali ɔɔnti te yom pwani Jwaŋa Tolanyɛ, ɔɔn yaakɔnti poddɔn bɛɛ. ² Ɔɔn kɛŋnɔn te lɔna niin lieda neeni bɛɛ, ɔci ɔɔn menga dieddɔn ñin bɛɛ, ɔci ɔɔn jomɔn jwali Juaŋ a jomi bɛɛ. Yeti ɔɔn buagɔn ciyɔn ne pwadan aŋka ŋeettan ma waakɛnda ɔɔn ciyɔn ba coodda naŋki Juaŋ naŋka awarɛ lɛɛldɛ bora ɔɔnti Juaŋ ñamɛtiy. ³ Yeti kan jwalla oonɔn ɔɔn neeni konɛ ḍiilcinyɛ, ɛkɛ konɛ ḍiilcin aŋa maka ati ooddi ḍakti neeniti pookɛn. ⁴ Jwaŋa Yaayan iñɔ ṭɛɛrji wɛnni maka jyeti Juaŋti bɛɛ neeni uullɛ ñingɛnti aŋka naa ɛkkɛn nona dɛki te jyeka wonkɛn jyeka pwadin te pwani Kiṭɔ neeni yuartan bɛɛ. Kiṭɔ ɛkɛ bala ba bolji Jwaŋa Tolan. ⁵ Acaan ne ɔɔn loṭɔnyɛ, ɔɔn loṭɔn te gena Ciɛggɔn Yaccu, ga ɔɔn loṭɔn ma te waak ɔɔn woodgɔ bɛɛ, yeti ɔɔn loṭɔn ka ɛkɛ a Ciɛggɔn, ɔci waak ɔɔn bala ba maka kanŋan ɛkkɛti te Yaccu Kiṭɔ. ⁶ Acaan gena Jwaŋa Tolan waanɛ gɔki agi, “Dala nona dɛki dɛkti te miel jitin.” Gena ɛkɛ a Jwaŋa mañ ɛkɛ bala dɛki ɔɔn yomgɔti aŋka ɔɔn pwani Jwaŋa Tolan yuartɔn Yaccu Kiṭɔ ñingɛtiy. ⁷ Yeti ɔɔn balkɔn waka ḍuaññɔn ɔɔn a wak booŋ te kullan a lop neeni. Ɛkkɛn nɔɔti a naŋka naŋŋɔn ɔɔn pwadan neeni, naŋŋɔn te waak ɔɔn pookɔ bɛɛ. Yeti naŋka neeni bɛɛn te Juaŋti. ⁸ Ɔɔn yomgɔ wiak te naŋki waakɛnda, yeti genga bɛɛn ɔɔn ḍɔɔggɔti bɛɛ. Ɔɔn waakɔ yiŋnɔn ñaalɔ, gena naŋdɔn ɔɔn gɛɛl yuartɔn bɛɛ, yeti ɔɔn ponnɔn bɛɛ. ⁹ Ɔɔn naŋkɔn ma ne yaayan, yeti ɔɔn dalkɔn ma ɔntɔ bɛɛ. Ɔɔn yiɛpkɔn ma iñɔ, yeti ɔɔn nuonnɔn jitin bɛɛ. ¹⁰ Ma buagɔn noki ɔɔn budan bala ba lyena ɛkkɛn Yaccu nokkitiy. A ɔŋŋiyɛ, tɛɛtin Yaccu daŋkun warɛ lɛɛldɛ bora waak ɔɔnti. ¹¹ Acaan ɔɔn maka a tɛɛtan neeniyɛ, waakɔ ‘wondɔn lien oŋkanda te Yaccu Kiṭɔ aŋka tɛɛtin ɛkɛ warɛ lɛɛldɛ bora ɔɔn waakɔti daŋkun. ¹² A ɔŋŋiyɛ, lien bala ɔɔnti, yeti tɛɛtin aŋka bala ɛkkɛti. ¹³ Bala ba kiiwɛ ma agi, “‘Ya jyetto, a ɔŋŋiyɛ, ‘ya gɔkcan.” Ɔɔn daŋkun jyettɔn te boŋ jyenna neeni, a ɔŋŋiyɛ, ɔɔn daŋkun gɔkɔn. ¹⁴ Çeejɔn ɔɔn Jwaŋa Tolan Mena Yaccu jɔɔŋnɛ ñaalɔ te lienti neeni, ɔɔn daŋkun luoldɔn ɛkɛ ñaalɔ iki Yaccu a cyɛɛlɔ, ɔci ɔɔn oodɔn iki ɛkkɛ a cyɛɛlɔ ɛkɛ ñamɛti. ¹⁵ Naŋka neeni waakɛnda bala te ɛkkɛ aŋka yom pwani Jwaŋa Tolan bala maka coŋinti, ɔci maka coŋin gɔkti a pwatcin, ɔci jieddi Juaŋo. ¹⁶ A ɔŋŋiyɛ, ɔɔn poddɔn bɛɛ. Kan war ɔɔn wara bora neeni noŋi baadi dokiyɛ, ɛka jiju neeni aga ɛka woonɛ oŋkanda oŋkanda. ¹⁷ Acaan naŋka bala ikinti puaran ɔci baadi lakun neeniyɛ, ɛkɛ pwani ɔɔn ‘uottiti ne tolan. Naŋka bɛɛn ɔɔnti pɛñan neeni bwandɛ pwanna baadi bɛɛ neeni. ¹⁸ Ɔɔn gɔṭɔn waka yuartin te waakɛn neeni bɛɛ, yeti ɔɔn gɔṭɔn waka yuartin te waakɛn bɛɛ neeniy. Acaan waka yuartɔn te waakɛn neeniyɛ, ɛkkɛn a waka baadi lakun, yeti waka yuartin te waakɛn bɛɛ neeniyɛ, ɛkkɛn a waka bala yuonginday.

¹ Acaan ŋeejɔn ɔɔn ne daran ciyɔn ɔɔn iñɔ ṭɛɛrji wɛnni neeni baadiyɛ, ɔɔn balkɔn ona parɛ ñaalɔ pɔliji. Ona neeni cɔnnɛ menga te bieŋɛ bɛɛ, yeti ɛkɛ naŋŋɛ Jwaŋa Tolan, ɔci ɛkɛ baadi bɛɛ. ² Ɔɔn ne ciyɔn te ona iñɔ neeniyɛ, ɔɔn joŋdɔn buagɔn ɛka ñaalɔ pɔliji neeni. ³ Ne ɔɔn kwomɔn ona neeni waakɔtiyɛ, ɔɔn coottɔn waakɔ budan moki bɛɛ. ⁴ Acaan ne ɔɔn men balgɔn te daran neenitiyɛ, ɔɔn balgɔn joŋdɔn, ɔci ñokɔn jitkɔ acaan ɔɔn buagɔn coottɔn waakɔ budan bɛɛ, yeti ɔɔn buagɔn ɛɛŋdɔn ɛka ñaalɔ pɔliji neeni. A ɔŋŋiyɛ, wara a tuuta neeni laddɛ tɛɛtin. ⁵ Gena Juaŋ waanɛ ɔɔn ḍuaññɔn te gena neeniy. Ɛkɛ a mena ɔɔn ‘wonnɔn Boŋ Juaŋ bala ba juati waka ḍuaññɛ ɛkɛ ɔɔntiy. ⁶ A ɔŋŋiyɛ, ŋeejɔn ɔɔn ɔci ɔɔn yomgɔ tɛɛcin oŋkanda. Ne ɔɔn balgɔn ciyɔn te war ɔɔn war ma baan menyɛ, ɔɔn balgɔn ɔntɔ ne loonan te Ciɛggɔnti. ⁷ Ɔɔn ciyɔn te jyenno, ga ɔɔn ciyɔn te ñali budan bɛɛ. ⁸ Ɔɔn yomgɔ tɛɛcin ɔci buagɔn ban ɔɔn daldɔn ɔci baldɔn ɔntɔ te waak ɔɔnti, yeti baldɔn iki Ciɛggɔn baanji. ⁹ A ɔŋŋi kan ɔɔn balgɔn baanji walla balgɔn ɔntɔyɛ, ɔɔn poŋɔn te yom pwani ɛkɛ. ¹⁰ Acaan ikin waakida waakɔ lɛɛltin bora non kaakci godan Yaccu ñamɛti, ɔci ikin waakida menga da yɔɔrdi gena yuardɛ ɛkɛ ba naŋka naŋŋɛ ɛkɛ wona ɛkɛ baali ciyɛ te war ma baan meny, kan a pwani walla yoñ kaapun no. ¹¹ Acaan bwajja ɔɔn buayɔn Ciɛggɔn ŋeejɔn ɔɔn ne pwadanyɛ, ɔɔn yaakɔnti ma myettɔn ne pwadan. Juaŋ ɔɔn ŋeejɔn ne pwadan, ɔci ‘ya poŋ ɛkkɛ ‘ya ŋeejati yomgɔti daŋkun. ¹² Ɔɔn jieyɔn waakɔ ɛkkɛti moki bɛɛ, yeti ɔɔn noŋŋɔn a ɔɔn aŋka ɛkkɛ noŋdɛ waakɔ te ɔɔn aŋka ɛkkɛ yaaktɛti ṭwokti maka noŋi waakɛn te ma ñingɛn budan neeniti. Ɛkkɛn noŋi te yomgɛn bɛɛ. ¹³ Kan ɔɔn wilnɔnyɛ, ɔɔn wilnɔn te Jwaŋa Tolan. Kan ɔɔn aŋŋɔn wiilin bɛɛyɛ, ɔɔn aŋŋɔn wiilin bɛɛ te ɛkkɛ. ¹⁴ Acaan ani Kiṭɔ ɔɔn kɛɛyɔnyɔyɛ, naŋka neeni pagdɔn ɔɔn a kan mena ne cyɛɛlɔ tuun te maka coŋin waakɛndayɛ, a ɔŋŋi bala ba ma tuun waakɛnda daŋkun. ¹⁵ Ɔci ɛkɛ tuun te ma waakɛnda, a ɔŋŋi aŋka maka ciyi tɛɛtiyɛ, ɛkkɛn ciyi tɛɛti te waak ɛkkɛn pookɛn moki bɛɛ, yeti ɛkkɛn ciyi te mena tuun te ɛkkɛn ɔci jɔŋŋin ñaalɔ neeni. ¹⁶ A ɔŋŋi acca ɔci ne ñamu ɔɔnyɛ, ɔɔn menga ŋeejɔn ba paŋi ma baan bɛɛ. Kan ɔɔn Yaccu ŋeennɔn doki ba paŋi ma baanyɛ, ɛkɛ ŋeejɔn ɔɔn acca ba paŋi ma baan moki bɛɛ. ¹⁷ A ɔŋŋiyɛ, kan menga bala Kiṭɔtiyɛ, ɛkɛ aŋi gena cɔnnɛ Juaŋ woonɛ. Bolja a daan ati bora doki, ɛka woonɛ aŋka bɛɛni. ¹⁸ Naŋka neeni waakɛnda bɛɛn te Juaŋti mena noŋŋin iki ikin ŋɛy te Yaccu Kiṭɔy. Ɛkɛ ɔɔn ‘wonnɔn kanŋa ŋeewin. ¹⁹ Juaŋ noŋi ŋɛy iki maka ṭɛɛrji wɛnni waakɛnda te Yaccu Kiṭɔ, ɛkɛ poŋi te nɔji ɛkkɛn moki bɛɛ, ɔci ɛkɛ jwali ŋeewin ḍuannɛ ɔɔnti. ²⁰ A ɔŋŋi ɔɔn agɔn cuudan Yaccu. Ɔɔn gɔktɔn ɛkkɛti bala ba gena Kiṭɔ waanɛ gɔkti ɛkkɛti wanna ɔɔn. Ɔɔn gɔktɔn ɛkkɛti te yenti Yaccu ka dala ɛkkɛ ŋeedɛ i Juaŋo. ²¹ Yaccu mena baaki nɔji neeni naŋŋɛ Juaŋ aŋi nɔji te ikin. Oŋ te ñoowin ikin ñoowin iki ɛkɛ neeniyɛ, ikin ñootin iki ɛkɛ te pwani Juaŋo.

¹ Te kanŋa ɔɔn i Jwaŋa Tolanyɛ, ɔɔn toottɔn ɛkkɛti acaan dala yom pwani Jwaŋa Tolan neeni naa mugdɛ ɛkkɛ te kona baaw budan bɛɛ. ² Acaan Jwaŋa Tolan gɔki agi, “‘Ya ɛkkɛ tieŋnin te oŋŋa ‘ya yomu pɔŋna ɛkkɛtiy, ɔci ‘ya ɛkkɛ maŋŋin te oŋ yɔɔto.” ‘Ya ɛkkɛ nɔɔttin, acca Juaŋ yomɛ pɔŋnɛ! Ɔci acca gena oŋŋa Juaŋ yuoci ikin neeni! ³ Ɔɔn buagɔn kandɔn ne pwadan aŋka naa menga kanŋa ɔɔn yuartɛ a damgɔn bɛɛ, acaan ɔɔn buagɔn naa menga yɔddɔnyɔ ɔɔn te yuarŋa ɛkɛ Ciɛggɔn yuardɛ bɛɛ. ⁴ Dala ɔɔn waakɔ lɛɛldɔn bora te pɔyi waakɛnda ba kɛɛnk Juaŋ te tiit yomgɔ, ɔci te taabn, ɔci te naŋka pɛñan, ɔci te naŋka bɛya ɔɔnti ne yaayan, ⁵ ɔci te jyepto, ɔci te cigin, ɔci te ywobjo, ɔci te kanŋa pɛñan, ɔci te yuon ween konɛ, ɔci te koño, ⁶ ɔci te yoma giikkɛ baaw mati, ɔci te ŋeejin, ɔci te loomga tɛyan, ɔci te yoma pwadan, ɔci te Boŋ Juaŋo, ɔci te anna awarɛ, ⁷ ɔci te jyeka awarɛ, ɔci te war tɛɛn Juaŋo. Ɔɔn balkɔn naŋka pwadan bala ba byeŋgaaran ɔci kɔɔrñi ɔɔn kɛɛyɔn ɔɔn waakɔ ɔci noŋɔn ɔɔn ṭwaŋo. ⁸ Ma noŋi ɔɔnti ne pwadan, ɔci moki ɔɔn ñaltɔn a genga bɛɛ, ɔci ɔɔn ḍorkɔnyɔ ma, ɔci jiekɔn ma. Ɛkkɛn gɔki agi ɔɔn jomjɔn jieko, oŋ yeti ɔɔn gɔkɔn te jyeka awarɛ. ⁹ Ɔɔn balgɔn ba ne kuokɔnti ma ɔɔn, oŋ yeti ɔɔn ŋeeckɔn mako. Ɔɔn a tuutan, oŋ yeti ɔɔn tɛɛtɔn men. ¹⁰ Ɔɔn yomgɔ wiak ne tolan, oŋ yeti ɔɔn yomgɔ ñɔyɔ oŋkanda. Ɔɔn aŋŋɔn ba maka bɔwan, oŋ yeti ɔɔn ma naŋŋɔn aŋi maka cyɛgan ne coŋɔn. Ɔci ɔɔn balgɔn ba balkɔnti waak bɛɛ, oŋ yeti ɔɔn balkɔn waak waakɛnda men ɔɔn. ¹¹ Hay, ma Kuruntuc! Ɔɔn gɔŋnɔn ɛkkɛti ne pwadan doki, ɔci ɔɔn yomgɔ pɔŋnɔn ɛkkɛti. ¹² Ɔɔn yomgɔ uullɔn ɛkkɛti bɛɛ. Ɛkkɛ aŋka yomgɔ uullɛ ɔɔnti. ¹³ ’Ya gɔkka ɛkkɛti ba kɛɛgin ‘ya, dala ɛkkɛ yomgɔ pɔktɛ ne tolan daŋkun! ¹⁴ Naa ɛkkɛ ñoodi i maka jyeti Juaŋti bɛɛ neeni te naŋki ɛkkɛn bɛɛ. Naŋka pwadan ñoodi i naŋka yaayan a ɔki? Ɔci nona bɔwan ñoodi i nona a miel a ɔki? ¹⁵ Kiṭɔ ñoodi i Jwaŋa Yaayanɛ? Ɔci mena jyeti Juaŋti ñoodi i mena ciyi budan te Jyek Juaŋɔ? ¹⁶ On Juaŋ ona tolan balkɔn jiek gɛɛg i jɔkin yeyin waka maltan ma budan nɛ? Ikin agin on Jwaŋa tɛɛti. Juaŋ gɔki agi, “‘Ya coocca ɛkkɛn jitin ɔci atca bootca ɛkkɛn jitin, ɔci ‘ya agdi Jwaŋ ɛkkɛn ɔci ɛkkɛn aga ma ‘ya. ¹⁷ A ɔŋŋiyɛ, dala ɛkkɛ koodɛ bora te ɛkkɛnti ɔci ɛkkɛn daldɛ. Naa toptɛ gena yaayan gɛɛlti bɛɛ, ɔci ‘ya ɛkkɛ mugdin. ¹⁸ ’Ya agdi Wey ɛkkɛ ɔci ɛkkɛ agdɛ kɛɛgin ‘ya kɛɛgin a ‘uay ɔci kɛɛgin a moongo. Gena Jwaŋa Yaakinti Naŋki Waakɛnda gɔki a ɔŋŋi neeniy.”

¹ Maka ana ‘yay, ne jyeka ikin ḍuaññinti Juaŋ neeni balki ikintiyɛ, dala ikin waakɔ ywaŋtin te bora ne jiju. Ɔci dala ikin pwattin awarɛ te coodda ciyin ikin te bwajja ikin buayin Juaŋy. ² Dala ɛkkɛ yomgɔ pɔktɛ ɔɔnti, ɔɔn dommɔn naŋki mengati bɛɛ, ɔci ɔɔn menga yaaññɔn bɛɛ. Ɔɔn menga naŋŋɔn ñin bɛɛ. ³ ’Ya gɔk a ɔŋŋi aŋka jiek dɔwwa ɛkkɛ wyetkɔti bɛɛ, acaan ‘ya gɔkkan te ñamu doki, ka ɛkkɛ balgɛ ɔɔn yomgɔti ne ikin tuutin a cyɛɛlɔ ɔɔn, ɔci ne ikin tɛɛttin a cyɛɛlɔ ɔɔn. ⁴ Ɛkkɛ ŋeejin ‘ya yomuti awarɛ. ‘Ya noŋ waru te ɛkkɛ ne tolan. ‘Ya waru wookkan te beelin ɔɔn warda. ‘Ya yomu ñɔɔna ñɔɔn ne tolan. ⁵ Acaan ne oŋŋa ɔɔn bɛɛnɔn ban Macɛdɔɔnya ɔɔnyɛ, ɔɔn waakɔ wooŋnɔn bɛɛ, yeti naŋka yeyin bɛɛn ɔɔnti nonk waakɛnda. Ma bala wɛyyɔn iki ɔɔn, ɔci ɔɔn buayɔn yomgɔti jiju. ⁶ Yeti Jwaŋa Tolan mena mwoni maka waakɛn dɔɔtan iñɔ yomgɛnyɛ, ɔɔn munnɔnji te bɛɛna bɛɛni Titucy. ⁷ Yeti te bɛɛn ɛkɛ parɛ budan bɛɛ, yeti te yom pwani te ɛkkɛti. Ɛkɛ ɔɔn myennɔn te yom yoñ ɛkkɛ, ɔci kuut ɛkkɛ moki, ɔci te bwakta ɛkkɛ buagɛ ‘ya ne tolany. A ɔŋŋiyɛ, yom ñɔɔn ‘ya nɔñji ciɛñjin ñamu ne tolan. ⁸ Kan ‘ya ɛkkɛ yaaññin yomgɔti te worgan cuoññan ‘yayɛ, ‘ya yomu wiakcin bɛɛ. Ɛɛ, ‘ya yomu wiakcin te naŋka neeni ne ḍiɛran, acaan yuarcan ‘ya worgan wanna ɛkkɛ yaakɛ yomgɔti ba wɔɔka ne ḍuulan budan. ⁹ ’Ya yomu ñɔɔcin acca men ɔɔn, yeti ‘ya yomu ñɔɔcin acaan ɛkkɛ yomgɔ wiakcin bɛɛ, yeti acaan yom joon ɛkkɛ neeni ɛkkɛ wɛɛññɛ ɔci ɛkkɛ waakɔ yallɛ. Acaan ɛkkɛ yomgɔ wiakcin ne pɛñan ba bolja Jwaŋa Tolan buagɛy, ɔci ga ɛkkɛ yaakɛ ɔɔn te genga bɛɛ. ¹⁰ Yom joona ba naŋki Juaŋyɛ, ɛkɛ etti yali waakɔ, yalla ikin wɛɛtin yɔɔta ikin yɔɔtinti Juaŋ ɔci ɛkɛ etti yom joon bɛɛ. Yeti yom joona iñɔ baanji wɛnni ɛkɛ etti lieno. ¹¹ Gɔrtɛ Juaŋ noŋi gena te yom yoñ ɛkkɛ neeni. Ɛkɛ eccin war byerŋ ɛkkɛti, ɔci eccin bwakti aŋka pwani ɛkkɛ cwamdɛ, ɔci eccin loñko, ɔci bwajjo, ɔci war mwordin, ɔci ani kanŋa. Ɔci eccin jyek wani te naŋka a damgin neeni. Ɔci ɛkkɛ waakɔ lɛɛlnɛ bora aŋka ŋeettan ma ɛkkɛ ḍɔɔggɔ wɔkɔ te naŋka neeniti warda. ¹² Ne ‘ya kiena worga ɛkkɛtiyɛ, ‘ya kiewan te mena noŋi nɔji wanna bɛɛ, ɔci walla te mena naŋŋɛ ɛkɛ ne yaayan wanna bɛɛ. Yeti ‘ya kieñi te gwalla gɔṭɔn ɔɔn ɛkkɛ ne tolan neeni Ciɛggɔn ñamɛti. ¹³ ’Wota te naŋka neeniyɛ, ɔɔn yomgɔ tɛɛn te yom pwani ɛkkɛ, yeti ɔɔn yomgɔ ñɔɔn nɔñji te yom ñɔɔn Tituc, acaan ɛkɛ yomɛ luun ɛkkɛti waakida. ¹⁴ Ne wona ɛkɛ luoṭṭi te ‘yati wɛnni men bɛɛyɛ, ɛkɛ nɔɔtkɛn ‘ya te naŋka noŋa ‘ya waru te ɛkkɛy, ɔci ɛkkɛ ‘ya poollati yomuti. ‘Ya ɛkkɛ myennin te naŋka awarɛ oŋkanda, ɔci acca naŋka noŋa ‘ya waru te Titucyɛ, aŋi naŋka awarɛ. ¹⁵ Ɛkɛ ani ɛkkɛ ne tolan ne ɛkɛ poŋdi te naŋka ɛkkɛ noŋɛ ba jyek ɛkɛ ɔci te muŋŋa ɛkkɛ jyek ɛkɛ muŋŋɛ te yoma pwadan yom bwaji ɔci war ḍiediny. ¹⁶ Acca ‘ya yomu ñɔɔna ñɔɔno. ‘Ya ɛkkɛ ŋeennin ne pwadan.

¹ Acca modg ɔɔn, ɔɔn buagɔn dala yom pwani Jwaŋa Tolan yom pwani ‘wonnɛ ɛkɛ ma kaniican ban Macɛdɔɔnya pwadan neeniyɛ, ŋeeddɛ ɛkkɛ. ² Ɛkkɛn bala pɔɔt jitin, oŋ yeti ɛkkɛn yomgɛn ñɔɔni. Ɛkkɛn yomgɛn ñɔɔcin ne tolan ɔci bala ‘woñi waak te yoma pwadan ne ɛkkɛn akki maka bɔwan ɔɔn. ³ Gena ŋeej ‘yayɛ, ɛkkɛn yaaŋnɛti ḍɔccin ba waka bala ɛkkɛnti. Ɛkkɛn yaaŋnɛti naŋka neeni ɔci ‘uotkiti te yomg ɛkkɛn. ⁴ Ɔci ɛkkɛn tooccin ɔɔnti oŋkɛn ne coŋɔn te maŋŋa mokɔn Ma Kiṭɔ ban Yahuudiyay. ⁵ Ɔci ɛkkɛn noŋi ne tolan nɔñji naŋka paŋdɔn ɔɔn ‘yeeyɛyɔ, oŋ yeti ɛkkɛn waakɛn ‘woñgi Ciɛggɔn ñamu lakun, ɔci ɛkkɛn waakɛn ‘woñkɔn ɔɔn moki te yom pwani Juaŋo. ⁶ A ɔŋŋi ɔɔn toonnɔn Titucti ka dala ɛkɛ kanŋa neeni cwamdɛ bala ba ne ɛkɛ jɔɔnni te kanŋa yom pwani neeni. ⁷ Ɛkkɛ agɛ maka cyɛgan te waak waakɛnda. Gena jyeni, ɔci jiek, ɔci ŋeejin, ɔci war byerŋ, ɔci anna anɛ ɛkkɛ ɔɔny. Ɔci a ɔŋŋi ɔɔn buagɔn dala ɛkkɛ bwagdɛ kanŋa yom pwani Juaŋ neeni ne tolan. ⁸ ’Ya ‘yer ɛkkɛ bɛɛ, yeti ‘ya buaga ani ɛkkɛ poorcati i war byerŋ maka pookɛn aŋka gɔrca ne ani ɛkkɛ agi warɛ boki no. ⁹ Acaan naŋki yom pwani Ciɛggɔn ikin Yaccu Kiṭɔ ŋeejɛ ɛkkɛ, ɛkɛ a mena cyɛgan, yeti ɛkɛ warɛ naŋŋɛ bɔɔn te ɛkkɛ aŋka ɛkkɛ agdɛ maka cyɛgan te bɔɔn ɛkɛ neeni. ¹⁰ Paŋi ‘yayɛ, bala a ɔŋŋi, dala kanŋa jɔɔnni ɛkkɛ ywoniti neeni cwamdɛ. Gena ɛkkɛ a maka jɔɔtcin te kanŋa neeniy. Dala ɛkkɛ noŋdɛ kanŋa neeni te yom ñɔɔn ɛkkɛ buagɛ noŋɛ kanŋa neeni ba bolja ɛkkɛ jɔɔnnɛ wanna ɔɔn. ¹¹ Accayɛ, dala ɛkkɛ kanŋa cwamdɛ aŋka bwakta yomg ɛkkɛ buagi noŋi kanŋa neeni ḍɔtti ne pwadan ne ɛkkɛ kanŋa naŋdiy. Dala ɛkkɛ menga da ‘woñi ba gena bala ɛkɛtiy. ¹² Kan ɛkkɛ buagɛ ‘woññɛyɛ, Juaŋ waka ‘woññɛ ɛkkɛ neeniyɛ, mugdɛ te waka ‘woññɛ ɛkkɛ neeniti, ga te waka baaw ɛkkɛti neeniti bɛɛ. ¹³ ’Ya buaga maka pookɛn woodi ɔci ɛkkɛ aŋka taabdɛ bɛɛ, yeti ne ɛkkɛ balkɛ waak ne coŋɔn te waka neeniyɛ, dala te ɛkkɛ maka baaki waak neeni maŋŋɛ. ¹⁴ Ne ɛkkɛ baakɛti waak, ɔci ɛkkɛn balkiti waak ne coŋɔnyɛ, ɛkkɛn ɛkkɛ maktɛ. Te naŋka neeniyɛ, ɛkkɛ poṭṭɛ a poṭṭin. ¹⁵ Bala ba jyeka a kiigin worga Jwaŋa Tolanji ne gɔkki agi, “Mena lyemi ne coŋɔnyɛ, ɛkɛ balki ne coŋɔn nɔñji bɛɛ. Ɔci mena lyemi ne ḍiɛkanyɛ, ɛkɛ balki ne ḍiɛkan nɔñji moki bɛɛ.” ¹⁶ ’Ya gɔk a pwatcin Juaŋti acaan ɛkɛ Tituc ‘wonnɛ bwakti bala ba ne ɔɔn buagɔnti mokɔn ɛkkɛy. ¹⁷ Acaan ɛkɛ jyeti jyeka ɔɔn toonnɔn ɛkkɛti pookɛn bɛɛ, yeti ɛkɛ buagɔn moki ɛkkɛ te yom ɛkɛ parɛ, ɔci ɛkɛ yomɛ ḍyɛŋŋɛ aŋka bɛya ɛkkɛti aŋan. ¹⁸ Ɔci ɔɔn menga cuonnɔn i ɛkɛ. Mena neeni kaniican kanŋi ɛkɛyɛ, yomgɛn ñɔɔna a ñɔɔn ɛkɛti te lali ɛkɛ te jyeka wonkɛn. ¹⁹ Awarɛ, ‘wana neeni mwowwɛ kaniican bora aŋka atɔn i ɔɔn noŋɔn kanŋa ani neeni, ɔci naŋka neeni a pwani Ciɛggɔn, ɔci nɔɔti te bwakta ɔɔn buagɔnti mokɔn ɛkkɛy. ²⁰ Ɔci ɔɔn balgɔn tiecɔn woŋgɔ aŋka naa jwalla yaayan gɛɛl bɛya te kanŋa ‘woññin ne coŋɔn kanŋa bala ɔɔn byeŋkɔti neeni bɛɛ. ²¹ Acaan gena ɔɔn buagɔn naŋdɔnyɛ, ɔɔn buagɔn noŋdɔn naŋka pwadin Juaŋ ñamɛti parɛ bɛɛ, yeti ma baan ñomgɛnti daŋkun. ²² Mod ɔɔn cuonnɔn ɔɔn i ɛkkɛn. Ɔɔn ɛkɛ pɔɔññɔn oŋki ne coŋɔn, ɔci yuarŋɔn ɔɔn ɛkɛ yomɛ buagɔn moki ma. ²³ Ɔci Titucyɛ, ɛkɛ a mena ñoowin i ‘ya te kanŋa te ɛkkɛ ɔci maka a modg ikin neeniyɛ, ɛkkɛn a maka cuntan kaniican, ɔci noŋi ba jyek Kiṭɔ. ²⁴ A ɔŋŋiyɛ, dala ani ɛkkɛ lɛɛldɛ bora ‘uaya neeniti a ɛkkɛ anɛ ɛkkɛn, ɔci dala kaniican gɔrti ani ɛkkɛ, ɔci ɛkkɛn nɔɔttɛ ɔɔn jieyɔn waakɔ te ɛkkɛ awarɛ.

¹ Te waka cuuññɛ ɛkkɛ wanna ‘ya balka gen gɛɛl aŋka ‘ya ɛkkɛ kiegdin worga te ɛkkɛn bɛɛ. ² Acaan bwakta ɛkkɛ buagɛ moki mayɛ, ŋeej ‘ya, ɔci ‘ya noŋ waru te ɛkkɛ ma Macɛdɔɔnyati, ɔci ‘ya gɔkcan agi ɛkkɛ ma Akeeyayɛ, waakɔ ywaŋŋɛ te ywonna ati waayi doki, ɔci bwakta ɛkkɛ buagɛ neeniyɛ, magga ṭyɛllɛyɔ te ɛkkɛnti. ³ Acca ‘ya modg ɔɔn cuoñña aŋka naa jiɛta jieyin ɔɔn waakɔ te ɛkkɛ neeni koodi bora aga jyeka budan bɛɛ. Oŋ yeti bala ba guaŋi ‘ya doki, dala waak ɛkkɛ nina a ywaŋgɔn te jyek moowin. ⁴ ’Ya buay kan ma Macɛdɔɔnya gɛɛg bɛɛdin i ‘ya, ɔci ɛkkɛ woottɛ ɛkkɛn waakɔ a ywaŋgɔn bɛɛyɛ, ɔɔn nogdɔn lɔɔno, ɔci gɔktɔn te lɔn ɛkkɛ moki bɛɛ, acaan yomg ɔɔn ḍuannɔnti ɛkkɛti doki. ⁵ A ɔŋŋiyɛ, modg ɔɔn gɛɛg cuoññan ‘ya ñamu ɛkkɛti aŋka gɔrti waka limmɛ ɛkkɛ ne baali ḍaaŋŋɛ te limi ba jwalla ḍuaññɛ ɛkkɛy, acaan ‘ya buaga ‘woññin ɛkkɛ neeni aga ‘woññin awarɛ, naa aga ‘woññin mwaji bɛɛ. ⁶ Dala ŋeeddɛ ɛkkɛ, mena duodi pok ne ḍiɛkanyɛ, ɛkɛ yɔɔrdi ne ḍiɛkan daŋkun, ɔci mena duodi ne coŋɔnyɛ, ɛkɛ yɔɔrdi ne coŋɔn daŋkun. ⁷ Dala men da ‘woñi ba yom ɛkɛ. Naa ɛkɛ ‘woñi te yoma baaw bɛɛ, acaan Jwaŋa Tolan yomɛ ñɔɔcin te mena ‘woñi te yoma pwadany. ⁸ Ɔci Jwaŋa Tolan yaakinti ɛkkɛ ‘uottɛti pwani ɛkɛ aŋka ɛkkɛ baltɛ waka ɛkkɛ yɔɔmti oŋkanda ɔci ɛkkɛ ‘uottɛti waak ne coŋɔn nɔñji waakɛnda te naŋka pwadan. ⁹ Bala ba jyeka kiigin worga Juaŋji gɔki agi, “Mena pwadanyɛ, ɛkɛ maka bɔwan ‘wonnɛ waako, ɔci naŋki pwani ɛkɛ bala yuonginda ɔɔn.” ¹⁰ Ɔci Jwaŋa Tolan mena ‘woñi kookin dɔktan ma, ɔci ‘woñi ma te oomdin, aŋka amtan ɛkkɛn neeniyɛ, ɛkɛ ɛkkɛ daŋkun ‘wondɛ kookin ɛkkɛ buagɛ waakɛnda, ɔci ɛkɛ ɛkkɛn yuoldɛ ñaalɔ ɔci ‘wondɛ ḍɔŋo, ɔci jieda ne pwadan te wak ɛkkɛ waka ‘wonnɛ ɛkkɛ ne coŋɔn neeni. ¹¹ Ɔci ɛkɛ ɛkkɛ naŋdɛ agdɛ maka cyɛgan te waak waakɛnda, ɔci maka coŋin gɔkti Juaŋti a pwatcin te waka ‘wonnɛ ɛkkɛ ɛkkɛn, ɔci luulɛ ɛkkɛn te ɔɔnti neeni. ¹² Acaan naŋki moowin neeniyɛ, maka pwadgin Juaŋ ñamɛti yɔɔmtan pookɛn bɛɛ, yeti ciɛndi ñamu te jwali pwani Juaŋti, gɔ moki ciɛñji ɔɔn. ¹³ Acaan ɛkkɛ waakɔ lɛɛlnɛ bora te kanŋa neeniyɛ, ma waakɛnda gɔkti a pwatcin Juaŋti te jyeni ɛkkɛ, ɔci te naŋka ɛkkɛ noŋɛ ba jyeka wonkɛn jyeka pwadiny, ɔci moki te waka ‘wonnɛ ɛkkɛ ɛkkɛn, ɔci ma waakɛnda mokiy. ¹⁴ Ne ɛkkɛn balki cɔkki te ɛkkɛyɛ, ɛkkɛn ani ɛkkɛ ne tolan te yom pwani ɛkkɛ ‘wonnɛ Jwaŋa Tolan neeniy. ¹⁵ Pwatcin ne tolan Juaŋti te ‘woññin ɛkɛ ‘woññin tolan ne yaajan neeni.

¹ Gena ‘ya Buuluc toocca ɛkkɛti te war ‘ya. ‘Ya a mena gɔk ɛkkɛti ka ‘ya waru dɔwwa iñɔ ne ‘ya balgin iki ɛkkɛy, ɔci ‘ya waru koobba ñaalɔ ne ‘ya baawa ɛkkɛtiy. ² ’Ya toocca ɛkkɛti te yom pwani Kiṭɔ, aŋka ɛkkɛ ‘ya tindati wyeñu yaaya ne ‘ya bɛɛda aŋan bɛɛy. Çeej ‘ya ne pwadan ma gɛɛg gɔki agi ɔɔn noŋjɔn ba naŋka iñɔ baanji wɛnni neeni. ‘Ya noŋdin iki ɛkkɛn ne yaayan. ³ Ikin ciyin iñɔ baanji wɛnni awarɛ, yeti ikin noŋin ṭwaŋ te wara ṭɛɛrji baanji wɛnni bɛɛ. ⁴ Waka noŋin ikin ṭwaŋ neeni a waka iñɔ baanji wɛnni bɛɛ, yeti ɛkkɛn a wak war tɛɛn Jwaŋa Tolan. Ikin noŋin ṭwaŋ te ɛkkɛn. Ikin nonka tɛyan yaatin iki tyewwin jyeka a jomgin nuutin jitin. ⁵ Naŋki waakɔ naŋka kooki ŋeejin ma Juaŋ ŋeettiti neeni oortin iñɔ. Paŋi waakɛnda muktinyɔ ɔci naŋtin tieŋdi jyek Kiṭɔ. ⁶ Ɔci ne naŋka ɛkkɛ noŋɛ ba jyek Kiṭɔ neeni cwamnɛ ɛkkɛ dokiyɛ, ɔɔn waakɔ ywaŋŋɔn doki aŋka jiek oldɔn maka bɛɛyi jiek neeni wyetkɛnti. ⁷ Ɛkkɛ gɔṭɛ waka niin te waaka bora neeni. Menga bala poŋi te war ɛkɛ, a ɛkɛ a men Kiṭɔ? Pwatcin, dala ɛkɛ poŋdi moki te war ɛkɛ, acaan ɔɔn daŋkun agɔn Ma Kiṭɔ ba ɛkɛ ɔɔn. ⁸ Kan ‘ya noŋ waru ne tolan te jyeka ɔɔn ‘wonnɔnti Ciɛggɔn aŋka ɛkkɛ kooptɛ ɔɔn ñaalɔ neeniyɛ, ‘ya waru a lɔɔn te naŋka wanna bɛɛ. Ɔɔn ‘wonnɔn ɛkɛ jyeka neeni aŋka ɛkkɛ jietɛ ma jitin bɛɛ. ⁹ ’Ya buaga naa bala ba ne ‘ya kiewa worgan neeni aŋka ɛkkɛ poddɛ bɛɛ. ¹⁰ Menga kɔŋji gɔkti agi, “Worgan Buuluc jiekɛn pɛñɔ ɔci tɛɛcin, yeti ne ɛkɛ balgin iki ikinyɛ, ɛkɛ warɛ tɛɛcin bɛɛ, ɔci jyek ɛkɛ a genga bɛɛ.” ¹¹ Mena gɔki a ɔɔn wannayɛ, dala ɛkɛ ñingɛ ñiektɛ te waka kiidɔn ɔɔn te worgan ne ɔɔn longɔn ɔntɔ, ɔci te waka naŋdɔn ɔɔn ne ɔɔn balgɔn ɛkkɛtiyɛ, ɛkkɛn bala bolja ne cyɛɛlɔ, a kɛɛptin bɛɛ. ¹² Ɔɔn poṭṭɔn waak ɔɔn ɔci walla balgɔn ba maka noŋi waakɛn oltan ñamu wanna bɛɛ. Poca gɔrtɛ! Wyeñ booj ɛkkɛn bala a ɔki. Ɛkkɛn waakɛn kooptan ñaalɔ pookɛn, waakɛn poortanti pookɛn te bolja bala ɛkkɛntiy. ¹³ Oŋ yeti ɔɔnyɛ, ɔɔn noŋɔn waakɔ te gena loonan te kanŋa ɔɔnti bɛɛ, yeti ɔɔn ningɔn te kanŋa Juaŋ ɔɔn ‘wonnɔnti naŋdɔn ɔɔn ɛkkɛti, ɔci nona yɔɔnnɔn ɔɔn te kanŋa ɔɔn ‘wonnɔnti Juaŋy. ¹⁴ Ne ɔɔn bɛɛnɔn ɛkkɛtiyɛ, naŋki wari ɔɔn ati ne loonan ‘yeeccin bɛɛ, yeti ɔɔn bɛɛnɔn dɛnnɔn ɛkkɛti te jyek Kiṭɔ jyeka wonkɛn jyeka pwadin neeni. ¹⁵ A ɔŋŋiyɛ, ɔɔn noŋdɔn waakɔ te kanŋa naŋɛ maka pookɛn ‘yeettɔn bora te nona yɔɔnnɛ Juaŋ aŋka naŋdɔn ɔɔn neeni bɛɛ. Yeti ɔɔn poŋɔn ka jyeni ɛkkɛ ‘uotti ñamu, ɔci ɔɔn yaaktɔnti noŋdɔn kanŋa tolan ɛkkɛti oŋkanda te nona ɔɔn yɔɔnnɔnti Juaŋtiy. ¹⁶ Ɔci ɔɔn jyeka wonkɛn jyeka pwadin eedɔn bonka lonin ban ɛkkɛ ŋoyɛti aŋan aŋka naa ɔɔn noŋdɔn waakɔ te kanŋa naŋɛ maka pookɛn te jyeka lali ɛkkɛn bɛɛ. ¹⁷ Bala ba jyeka a kiigin worga Juaŋji ne gɔkki agi, “Kan mena buagɔn noŋi warɛyɛ, dala ɛkɛ noŋdi warɛ te naŋka naŋŋi Juaŋy.” ¹⁸ Ciɛggɔn poŋi te mena maŋdɛ ɛkɛy, oŋ yeti ɛkɛ poŋi te mena mooŋi war ɛkɛ parɛ bɛɛ.

¹ ’Ya poŋ ka dala te ɛkkɛ ‘ya bɔɔŋnata te jwali ṭɔɔlɛ owwan ‘ya bora te wyeñ booj neeni, dala ɛkkɛ ‘ya bɔɔktatɛ. ² ’Ya yomu tolcin ne tolan te ɛkkɛ bala ba Juaŋ yomɛ toli te ɛkkɛy. Ɛkkɛ ḍuaññin ‘ya te jwali te ‘uan ne cyɛɛlɔ, gena Kiṭɔ aŋka ɛkkɛ ‘wondin ɛkɛ ba ṭɔla pwadan. ³ ’Ya buay dita ɛkkɛ ñomgɔ yaldɛ ɔntɔ te naŋka awarɛti, ɔci te ani Kiṭɔti ba Awwa ne dienni ñin kaaŋ te ñing tɛɛn ɛkɛy. ⁴ Kan magga bɛɛn ɛkkɛti ɔci ɛkkɛ lalkɛ te pɔya parɛ gɛɛl te Yaccu bala ba pɔya ɛkkɛ lalkɛ ɔɔn wanna bɛɛyɛ, ɔci moki kan ɛkkɛ mwokkɛ boŋa parɛ gɛɛl te ɛka muŋŋɛ ɛkkɛ te ɔɔnti ɔci kan ɛkkɛ mwokkɛ jwalla parɛ gɛɛl te jwalla muŋŋɛ ɛkkɛ te ɔɔntiyɛ, ɔci ɛkkɛ doki jyeka neeni mugdɛ ne byeran ɔɔn. ⁵ Oŋ yeti ‘ya poŋ ka ‘ya a mena ḍiɛran te kanŋa te maka boṭi waakɛn agi ɛkkɛn aginti “cuudan Yaccu” neeni bɛɛ. ⁶ ’Ya urkati jiek ne tolan bɛɛ, yeti awarɛ ‘ya waak ŋeejo. Waka neeni jitkɛn lɛɛlnɔn ɔɔn bora korkɛn ne wɔkɔn oŋki waakɛnda. ⁷ ’Ya waru dɔwwan iñɔ aŋka ɛkkɛ koobdin ñaalɔ te jyek Juaŋ jyeka wonkɛn jyeka pwadin budan. ‘Ya buaga genga te ɛkkɛti bɛɛ. Oŋ naŋka neeni dami ‘ya? ⁸ Ne ‘ya baala kanŋa ɛkkɛtiyɛ, kaniican pookɛn bala moki ‘ya. ‘Ya baal ec wak ɛkkɛn ne coŋɔn aŋka ‘ya gɔk jiek mok ɛkkɛ. ⁹ Ne ‘ya baala ciyin iki ɛkkɛyɛ, ‘ya tooccan ɛkkɛti te genga ne ‘ya buagati bɛɛ. Ma ban Macɛdɔɔnya waka ‘ya buagatiyɛ, ḍuaccɛ ɛkkɛn. Acaan a ɔŋŋiyɛ, ‘ya waru tiekan te oljin waka cyɛgan olda ɛkkɛ ḍɔɔggɔti, ɔci naŋka neeni tieka ‘ya oŋkanda ɔɔn. ¹⁰ Naŋki Kiṭɔ naŋka awarɛ, naŋka bala ‘yati neeniyɛ, ‘ya ɛkkɛ ḍuadin te jwali ka naŋka noŋa ‘ya waru neeni ḍieptɛ iñɔ menga ban Akeeya aŋan bɛɛ. ¹¹ ’Ya gɔk a ɔŋŋi acaan ‘ya yooka te ɛkkɛ? A’a, ŋeejɛ Juaŋ ‘ya an ɛkkɛ. ¹² ’Ya kanja budan te bilk ba kanŋa kanŋa ‘ya acca neeni ɔɔn aŋka maka noŋi waakɛn agi ɛkkɛn balginti ba ɔɔn neeni yɔddiyɔ te naŋki waakɛn. ¹³ ’Uaya neeniyɛ, ɛkkɛn a cuudan Yaccu awarɛ bɛɛ, ɛkkɛn a cuudan jomi jieko, ɔci a maka jomi jiek te kanŋan ɛkkɛn, ɔci noŋi waakɛn ba ɛkkɛn akki cuudan Kiṭɔ ɔɔn. ¹⁴ Ikin waakɔ potti iñɔ te naŋka neeni bɛɛ! Acaan Jwaŋa Yaayan daŋkun warɛ lɛɛldɛ bora bala ba malɛɛka nona dɛkiy. ¹⁵ A ɔŋŋi ikin korkɔ buaya noon bɛɛ, acaan kɛɛnk jwaŋa yaayan neeni daŋkun waakɛn lɛɛltan bora noŋi bala ba ɛkkɛn akki kɛɛnk Jwaŋa Tolan ɔɔn. Yeti ne ŋoyɔyɛ, jiek dɔɔkti ɛkkɛn wyetkɛnti ba naŋki ɛkkɛn naŋka yeyin neeni waakɛnda. ¹⁶ ’Ya gɔk moki, naa menga poŋdi ‘ya a aamma bɛɛ. Dala ‘ya mugdata kan ‘ya a aamma ɔɔn, aŋka ‘ya jiejja waru ne ḍiɛran. ¹⁷ Te naŋki ‘ya waru paru neeniyɛ, ‘ya gɔk ba jyeka buagi Juaŋ bɛɛ, oŋ yeti ‘ya gɔk ba jyek wyeñ booj awarɛ. ¹⁸ Acaan maka coŋin maka noŋi ba naŋka baan konɛti, noŋi waakɛn agi ɛkkɛn pwadgintiyɛ, ‘ya daŋkun noŋja waru ba ɛkkɛn ɔɔn. ¹⁹ Ɛkkɛ woodgɔyɛ, wyetkɔ pwadɔ, ɔci ɛkkɛ maka wyetkɛn baaw muŋŋɛ te yoma pwadan. ²⁰ Ne ma balki noŋki ɛkkɛ a kɛɛnkyɛ, ɛkkɛ balgɛ gɔktɛ genga bɛɛ, ɔci ne ma noŋki ne yaayan ɛkkɛtiyɛ, ɛkkɛ balgɛ gɔktɛ genga bɛɛ, ɔci ne ɛkkɛ kantɛ ɔci ɛkkɛn noŋki waakɛn ɛkkɛti ɔci jiepki ɛkkɛyɛ, ɛkkɛ gɔŋnɛ genga ɛkkɛnti bɛɛ. ²¹ Ɔɔn waakɔ aŋi lɔɔn acaan ɔɔn noŋŋɔn ba naŋka naŋɛ maka pookɛn wanna bɛɛ. Oŋ yeti kan mena balkɔn war tɛɛn acaan gɔkti te pwani war ɛkɛyɛ, ‘ya da balka yoma tɛyan aŋka gɔkca te pwani war ‘ya, ɔci jyeka guagdi ‘ya neeniyɛ, ŋeej ‘ya a jyek wyeñ boojo. ²² Kan ɛkkɛn a ma Ibrunyɛ, ‘ya da baal a ɔɔn. Ɔci kan a ma Icrayiilyɛ, ‘ya da baal a ɔɔn moki. Ɔci kan a kɛɛn Abrahimyɛ, ‘ya da baal a ɔɔn moki. ²³ Kan ɛkkɛn a maka kanŋan Yaccutiyɛ, ‘ya gɔk ba mena wyeñɛ baawo, oŋ yeti ‘ya kanŋ ne pwadan te ɛkkɛn, ‘ya baal kanŋ ne pɛñan, ɔci kanŋa ɛkkɛn buannɛ kanŋa ‘ya. Ɔci ‘ya cien ciginji oŋki ne coŋɔn te ɛkkɛn ‘wota. Ɔci ‘ya ḍuaka ma oŋki ne coŋɔn ɛkkɛn buanno, ɔci ‘ya baal lien tukɛti oŋki ne coŋɔn ɛkkɛn buanno. ²⁴ Ɔci ‘ya ḍuaka ma Yahuud oŋki ne dɔɔyɔ woong tuggɛn a men baan mena parɛ byeŋkɛ ɔci ne dɔɔyɔ wyetkɛn ne ŋaanɔ (39). ²⁵ Ɔci ‘ya jiepka ma Ḍɔɔm oŋki ne ḍoogɔ te gɔlko. Ɔci yepka te gwoyi oŋi ne cyɛɛlɔ. Ɔci ‘ya lɛŋna murka tolan Galŋa Tolanji oŋki ne ḍoogɔ, ɔci ‘ya oŋ konɛ ɔci ween konɛ noŋi te tɔɔn pieg wyetkɛnti ne murka lɛɛŋniy. ²⁶ Wodin ata ‘ya korkɛn ne coŋɔnyɛ, ‘ya koogjin i naŋka yeyin pwatcin bɛɛ, noŋ eeda toolo, ɔci noŋ kalta ɛɛjan, ɔci ma Yahuud noŋi ne yaayan ɔci Keedin Pookɛn noŋi ne yaayan ‘yati moki. Ma bonka ḍwaŋin noŋi ne yaayan ‘yati, ɔci ne ‘ya baala luom jitin naŋka yaayan bɛɛn moki, ɔci ne baala toolji, ‘ya yɔṭi naŋka yaayan, ɔci munga jomi jiek bala noŋi ne yaayan ‘yati moki. ²⁷ Ɔci oŋki ne coŋɔn ‘ya woŋgu dɛtkan nink baaw acaan te kanŋan coŋin, ɔci amma koñ ɔci yiɛno. Ɔci waka amdi ‘ya baaw oŋki ne coŋɔn, ɔci moki noŋŋa jwami, ɔci baaka bworŋin. ²⁸ Te naŋka bala bɛɛn ‘ya waruti coŋin neeni toŋkɛntiyɛ, ñalla ñoṭa ‘ya kaniican waakɛnda neeniyɛ, cyɛŋi ‘yati. ²⁹ Kan men gɛɛl warɛ koocinyɛ, ‘ya da waru koya ba ɛkɛ ɔɔn bɛɛ? Ɔci kan men gɛɛl ḍɛmdi nɔji jitiny, ‘ya yoma yaayɛ te ɛkɛ bɛɛ? ³⁰ Kan ‘ya buaga gɔkca te war ‘yayɛ, ‘ya gɔkca te waka waakɛn lɛɛllɛ bora te war koñi ‘yay. ³¹ Jwaŋa Tolan Wey Ciɛggɔn ikin Yaccu mena maltin ikin yuonginda neeniyɛ, ‘ya ŋeeja ‘ya jom jiek bɛɛ. ³² Ḍuaŋ ṭɔɔlɛ ḍuannɛ Ariitac ḍuaŋa tolan ban Ḍimaacka neeniyɛ, gɔkcin bɔlin kɛɛyi ‘yegin tuggɛn ban Ḍimaackati aŋka ‘ya muktayɔ. ³³ Oŋ yeti ‘ya ḍuacka ma guppaji, ɔci guppa wiɛnɛ ma te wyenti, ɔci ‘ya luotka ma bora te kaañ waŋɛ, ɔci boottan kaañ warɛti ne iñɔ aŋka ‘ya unna te byeŋ ɛkɛti neeni.

¹ Dala ‘ya noŋja waru. Yeti ‘ya yɔɔra genga te naŋka neeniti bɛɛ. Yeti ‘ya ɛkkɛ myettin te loggin ɔci te waka ‘ya lɛɛrnati Ciɛggɔny. ² Çeej ‘ya te yuonga ati a inyaakkɛn wyetkɛn ne ŋaanɔ waayiyɛ, ‘ya eñña Juaŋ ñaalɔ pɔli jiña loonan, yeti kan ‘ya baal ciy te war ma baan walla wara baawyɛ, ŋeej ‘ya bɛɛ, ŋeejɛ gena Juaŋ parɛ. ³ Çeej ‘ya ‘ya eñña Juaŋ ñaalɔ ban Jwaŋa Tolan te waro, walla kan te war bɛɛyɛ, ŋeej ‘ya bɛɛ, ŋeejɛ gena Juaŋ parɛ. ⁴ Ɔci aŋanyɛ, ‘ya tieŋjan waka ma yaakinti guaktan bɛɛy, waka neeni Juaŋ dɛyi ma aŋka guaktan ma bɛɛ. ⁵ ’Ya jiejja waru te war ‘ya, yeti ‘ya jiejja waru paru bɛɛ, yeti ‘ya noŋja waru te gena war koñi ‘ya. ⁶ Kan te ‘ya noŋja waruyɛ, ‘ya baldi ba mena wyeñɛ baaw bɛɛ, acaan ‘ya gɔk te jyeka awarɛ. Yeti ‘ya noŋja waru bɛɛ, acaan ‘ya buaga naa menga poŋdi ne tolan te ‘ya nɔñji te waka yuartɛ ɛkɛ ɔci tieŋdi ɛkɛ te ‘yati neeni bɛɛ. ⁷ Aŋka naa ‘ya noŋja waru te waka waakɛn lɛɛllɛ bora coŋin neeni bɛɛyɛ, Juaŋ ‘ya ‘wonna kuun waruti bala ba mena cundɛ Jwaŋa Yaayan, aŋka ñoki ‘ya kono, ɔci ‘ya dɛɛda te naŋki waru. ⁸ ’Ya wiakcan Juaŋti oŋki ne ḍoogɔ ka dala ɛkɛ naŋka neeni eedɛ ɔntɔ te ‘yati. ⁹ Yeti ɛkɛ ṭwokkin ‘yati agi, “A’a, yom pwani ‘ya i yɔɔmdi, acaan war tɛɛn ‘ya warɛ cwamdɛ te war koñño.” Ya yomu ñɔɔcin acaan ‘ya noŋ waru te war koñi ‘ya aŋka war tɛɛn Kiṭɔ bɛya ‘yati. ¹⁰ ’Ya yomu ñɔɔna ñɔɔn te war koñi, ɔci te ŋɛɛgga ḍorki ma ‘ya, ɔci te yaata yoocki ma ‘ya, ɔci te naŋka noŋki ma ‘ya ne yaayan, ɔci te tiñña ‘ya tiñkati ma ñaalɔ te Kiṭɔy. Acaan ne ‘ya waru koyiyɛ, ‘ya waru tɛɛcin dɔki. ¹¹ Gena ɛkkɛ ‘ya olnatɛ noŋjan ba mena wyeñɛ baawy. Acaan gena te ɛkkɛ aŋka jieddɛ jiek te ‘yay, ga te ‘ya jiejja jiek te war ‘ya paru bɛɛ. Acaan ‘ya buanka cuudan pookɛn neeni te genga bɛɛ, kan ne ‘ya aga genga baaw ɔɔny. ¹² Ne ‘ya baala aŋanyɛ, ‘ya ɛkkɛ lɛɛrnin naŋki mena a cuuda waakɛnda. ‘Ya cuonna Juaŋ waanɛ ɛkkɛti. ‘Ya yomu tiekan, ɔci noŋi naŋka tɛyan naŋka ñyecki ma war tɛɛn Juaŋ ne coŋɔn, ɔci liɛlgin ɔci war tɛɛn kanŋa ɛkkɛti. ¹³ Ɛkkɛ buankɛ kaniican pookɛn te genga? A’a, yeti gena ŋeej ‘yayɛ, ‘ya tooccan ɛkkɛti te jyek maŋi te genga te kanŋa ‘ya neeni bɛɛ. Dala ɛkkɛ ‘ya bɔɔktatɛ te naŋka neeni. ¹⁴ Gena oŋŋa akti ḍoogɔ neeni, ‘ya waru ywaŋi doki aŋka ‘ya bɛɛd ɛkkɛti, ɔci ‘ya agdi gena cyɛgan ɛkkɛ ḍɔɔggɔti bɛɛ, ‘ya lier ɛkkɛ woodgɔ. ‘Ya lier waka bala ɛkkɛti bɛɛ. Gena kɛɛgin weyyɛn ɔci mɛyyɛn aŋka kɛɛgin ‘wontan waaky. Kɛɛgin yaakinti weyyɛn ɔci mɛyyɛn ‘wontan waak bɛɛ. ¹⁵ Yeti ‘yayɛ, wak ‘ya ‘uaccanyɔ te ɛkkɛ aŋka ɛkkɛ magdin. Kan ‘ya an ɛkkɛ ne tolany, ɛkkɛ andɛ ‘ya ne ḍiɛran? ¹⁶ Yeti ŋeej ‘ya magga te ɛkkɛti poŋi agi, ɛɛ, ɛkɛ aŋi gena cyɛgan ikinti te genga bɛɛ, yeti ɛkɛ noŋi ikinti te ñing tɛɛno. ¹⁷ ’Ya yomu toli te genga te maka cuoññan ‘ya ɛkkɛti wanna? ¹⁸ ’Ya ‘yercan Titucti ka dala ɛkɛ ooddi, ɔci mena a mod ikin neeni cuoññan iki ɛkɛ. Tituc yomɛ toli te genga ɛkkɛtɛ? Ɔɔn kanŋɔn te boŋa ne cyɛɛlɔ bɛɛ? Ɔɔn atɔn te ciya ne cyɛɛlɔ bɛɛ? ¹⁹ Ɛkkɛ balgɛ poŋɛ a ɔɔn yuocɔn waakɔ ɛkkɛ ñomgɔtɛ? A’a, ɔɔn gɔkɔn Juaŋ ñamɛti te Kiṭɔ. Yeti naŋka neeni waakɛnda naŋŋɔn ɔɔn aŋka ɛkkɛ ‘uottɛ ñamu hay, maka ana ‘yay. ²⁰ Acaan ‘ya buay ne ‘ya bɛɛda ḍieŋda ɛkkɛtiyɛ, dita ɛkkɛ mɔktin ciyɛ ba coodda buagati ‘ya neeni bɛɛ, ɔci ɛkkɛ, dita, ‘ya yuartata ba bolja ɛkkɛ buagɛ bɛɛ. Dita naŋka neeni aŋka bala, gena wɛɛdin, ɔci kon moni, ɔci loñko, ɔci ani waakɔ, ɔci jomtan jieko, ɔci lɔɔrin yɔtin, ɔci jiɛt waakɔ, ɔci naŋka amaamo. ²¹ Ɛɛ, ‘ya buay acaan ne ‘ya bɛɛda moki ɛkkɛtiyɛ, Juaŋ ‘ya dɔɔda iñɔ ɛkkɛ ñomgɔti kaapun, ɔci ‘ya yomu wiakti te maka noŋi nɔji te ñamu, ɔci waakɛn yali te naŋka naŋɛ ɛkkɛn yaayan, ɔci tomi, ɔci wɛlja naŋɛ ɛkkɛn wanna bɛɛ neeni kaapun.

¹ Oŋŋa bɛɛda ‘ya ɛkkɛti acca neeni gena oŋŋa akki ne ḍoogɔ. Jyeka a kiigin worga Juaŋti gɔki agi, “Jiek waakɛnda aga jyeka awarɛ te tuk maka ne yyɛɛwɔ, walla te tuk maka ne ḍoogɔ.” ² ’Ya gɔkka maka noŋi nɔji te ñamu dokiti, ɔci maka pookɛnti waakɛnda. ‘Ya gɔkka ɛkkɛnti, yeti ‘ya baal wɛnan bɛɛ, bala ba naŋka naŋi ‘ya te ciya ‘ya bɛɛna ḍieŋna te oŋŋa akki ne yyɛɛwɔy. Kan ‘ya bɛɛd mokiyɛ, ‘ya ɛkkɛn bɔɔka moki bɛɛ. ³ Ɛkkɛ buagɛ gɔrtɛ Kiṭɔ gɔki a lyɛlta ‘yatiɛ? Ɛkɛ a war tɛɛn ɛkkɛti, ɛkɛ warɛ koy koy ɛkkɛti bɛɛ. ⁴ Acaan ɛkɛ ŋaabɛ ma te war koñño, yeti ɛkɛ tɛɛti te war tɛɛn Jwaŋa Tolan. Ɔɔn da waakɔ koocin te ñoowin ɔɔn ñoowin iki ɛkɛy, yeti te jyeka ɔɔn ñoowin iki ɛkkɛyɛ, war tɛɛn Juaŋ bala ɔɔnti daŋkun te tɛɛtin ɛkɛ. ⁵ Dala ɛkkɛ waakɔ pɔɔdɛ, ɔci gɔrtɛ kan ɛkkɛ balgɛ tiecɛ jyeni ɛkkɛ boki no. Dala ɛkkɛ waakɔ pɔɔdɛ. Çeejɛ ɛkkɛ Yaccu Kiṭɔ bala ɛkkɛti bɛɛ? Yeti ɛkkɛ buannɛji pɔɔta neeni. ⁶ ’Ya baal kɛɛy ɛkkɛ ka ɔɔn ñiidɔntɔ, acaan ɔɔn buannɔn genga bɛɛ. ⁷ Yeti ɔɔn cɔkɔn Juaŋti aŋka naa ɛkkɛ noŋdɛ gena yaayan gɛɛl bɛɛ. Ɔɔn dita buagɔn dala ɔɔn aŋka gwaltɔn ma ba maka kanŋa ɛkkɛn yɔmjin ne tolan bɛɛ, a’a, ɔci ba bolja wookki ma kanŋa ɔɔn wanna ɔɔnyɛ, ɔɔn buagɔn dala ɛkkɛ noŋdɛ naŋa pwadin. ⁸ Ɔɔn noŋdɔn naŋka awarɛ oŋkanda. Ɔɔn yaakɔnti noŋdɔn ne yaayan naŋka awarɛti neeni bɛɛ. ⁹ Acaan ɔɔn yomgɔ ñɔɔna ñɔɔn ne ɔɔn waakɔ kooki ɔci ɛkkɛ aŋka waakɔ tɛɛkiy. Ɔɔn cɔkɔn Juaŋti aŋka ɛkkɛ ‘uottɛ ñamu. ¹⁰ ’Ya kiew jyeka neeni ɛkkɛti ne ‘ya baawa ɛkkɛtiy. A ɔŋŋi ‘ya noŋja ɛkkɛti ne pɛñan ne ‘ya bɛɛda ɛkkɛti bɛɛ. ‘Ya buaga noŋja war tɛɛn ‘ya ‘wonnata Juaŋ aŋka ɛkkɛ koobdin ñaalɔ, ɛkkɛ mɔɔrtin iñɔ bɛɛ. ¹¹ Ne ŋoyɔyɛ, hay, modg ɔɔn, dala ɛkkɛ ‘uottɛ ñamu! Dala ɛkkɛ tieŋdɛ jyeka guagdi ‘yay. Dala jwali ɛkkɛ aga cyɛɛlɔ waakida. Dala ɛkkɛ coodɛ te pwanno, ɔci Jwaŋa ani ma ɔci noŋi ne pwadan mati baldi iki ɛkkɛ. ¹² Dala ɛkkɛ ñiebdɛ yɔtin te ñiebbin yoma pwadan, ¹³ Ma Kiṭɔ wɛnni ñiepi ɛkkɛ waakida. ¹⁴ Dala yom pwani Ciɛggɔn ikin Yaccu Kiṭɔ, ɔci ani Jwaŋa Tolan, ɔci ñoowin Boŋ Jwaŋa Tolan bala ɛkkɛti waakida.