1Timatawuc

¹ Gena ‘ya Buuluc, cuuda Yaccu Kiṭɔ te yom Jwaŋa Tolan Mena Yuoci ikin, ɔci te yom Yaccu Kiṭɔ moki. Yaccu Kiṭɔyɛ, ɛkɛ a mena etti naŋka pwadin naŋka jyettin kɛɛtin ikiny. ² Timutawuc, ‘ya kiewan worga iti. I aŋŋi kaci ‘ya te jyenna i jyetti Kiṭɔti neeni. Dala Jwaŋa Tolan Wey ikin ɔci Ciɛggɔn ikin Yaccu Kiṭɔ yomgɛn pwada a pwani iti, ɔci dala ɛkkɛn yomgɛn pɔktan iti, ɔci dala ɛkkɛn i ‘wonti coodi pwanno. ³ Ne ‘ya noŋa jɔŋda te ban Ɛpacacti oodda ban Macɛdɔɔnyatiyɛ, ‘ya gɔkkan iti ka dala i yedda te ban Ɛpacacti acaan ma gɛɛg bala loṭi ma amaam aŋan. Ɔci ‘ya buaga dala i gɔkca ɛkkɛnti te naŋki ɛkkɛn neeni. Dala ɛkkɛn naŋki ɛkkɛn neeniyɛ, daltan. ⁴ Ɔci moki dala ɛkkɛn mwondi te jyeka jomgin ɔci te jyeka lwoktan ma te jyek yɔrg ɛkkɛny. Te jyeka neeniyɛ, jiek ḍuobbin ma wyetkɛnti, ɔci pɔy Jwaŋa Tolan pɔya yuartan ma ne ma jyetti neeni pɔya neeni yuartan ma moki bɛɛ. ⁵ Dala i maka neeni myetka jyeka lorki ɛkkɛn ma amaam wanna yɔttan ñin, acaan ikin buagin dala Ma Kiṭɔ oondi yɔtin. Ma Kiṭɔ ooniyɔ awarɛ ne yomg ɛkkɛn pwatkiy, ɔci moki ne jwalla yaayan gɛɛl baali ɛkkɛn yomgɛnti aŋka ma wookki ɛkkɛn bɛɛy, ɔci ne ɛkkɛn jyetki Yaccuti ne pwadany. ⁶ Yeti maka loṭi ma amaam neeni ɛkkɛn jyetcin ɔntɔ te waka pwadin neeniti. Ɛkkɛn jyek naŋka pwadan neeni ŋeecɔn ne pwadan bɛɛ. Ɛkkɛn bala tyewɔ te wyeñ booji te jyeka budan. ⁷ Maka neeniyɛ, buagɔn agi dala ɛkkɛn ŋeeddɛnti maka pookɛn agi ɛkkɛn ñingɛn tɛyɔ te lali jyek ganuun Muuca neeni. Yeti ɛkkɛn jyek ganuun jitkɛn ŋeecɔn ne pwadan bɛɛ. Jyeka guaktan ɛkkɛn mati neeni jitkɛn kwoyɔn ɛkkɛn. ⁸ Ɛɛ, ŋeecin ikin jyek ganuun pwadɔ, kan ɛkkɛn tiiyɛyɔ ma ba bolja Juaŋ buagɛy. ⁹ Yeti ŋeecin ikin jyek ganuun bɛɛn acaan maka noŋi ba jyek Juaŋ bɛɛ. Yeti ganuun bɛɛn acaan te maka nɔɔtk maka noŋi ba yomg ɛkkɛn pookɛn yookɔn te Jwaŋa Tolany, ɔci moki bala te maka bɛɛyi jyek Juaŋ jitkɛny. Ɔci moki te maka jyek Juaŋ baaw ɛkkɛntiy. Ɔci moki te maka paŋi ɛkkɛn yeyiny. Ɔci moki te maka gɔki jyeka yeyiny. Ɔci moki ganuun bala te maka noki weyyɛn iki mɛyyɛn iki maka pookɛny. ¹⁰ Ɔci moki jyek ganuun bala te maka noŋi tommo, ɔci te maka ‘uay maka tobi yɔtin pookɛny, ɔci te maka koṭi may, ɔci te maka jomi jieky, ɔci te maka aaltan te yenti Jwaŋa Tolan te jyeka awarɛ bɛɛy. Kan gen gɛɛl bala ɔntɔ te jyek Juaŋtiyɛ, jyek ganuun bala te ɛkɛ daŋkun. ¹¹ Jwaŋ ikin Jwaŋa pwadan neeniyɛ, ɛkɛ ‘ya ‘wonna kanŋa miet ma te jyek ɛkɛ jyeka pwadin neeni. ¹² Ɛɛ, ‘ya gɔk a pwatcin Ciɛggɔn ikin Yaccu Kiṭɔti, hay! Acaan ɛkɛ ‘ya muona bora noŋ kanŋa ɛkɛ neeni, ɔci ‘ya ‘wonna ɛkɛ war tɛɛn ɛkɛ noŋa kanŋa ɛkɛ neeni. ¹³ Te ñamuyɛ, ‘ya baal gɔk ka yenti Yaccu Kiṭɔ neeni yaayɛ, ɔci ‘ya baal noŋ ne yaayan Ma Kiṭɔti, ɔci ‘ya baal wook ɛkɛ te jyeka yeyin. Yeti Juaŋ yomɛ pɔŋnɛ ‘yati acaan ne ‘ya baala noŋa naŋka yaayan neeniyɛ, ‘ya jyeti Yaccuti men bɛɛ, a ɔŋŋiyɛ, naŋka naŋi ‘ya wanna konɛ ŋeej ‘ya bɛɛ. ¹⁴ Acc, hay! Juaŋ yomɛ pɔŋnɛ ‘yati, ‘ya maŋŋa ɛkɛ aŋka ‘ya yomu ḍuacca ɛkɛti ne pwadan. Ɔci ɛkɛ ‘ya maŋŋa aŋka ‘ya jyeti Yaccuti ɔci ‘ya an maka pookɛn ne tolan te ani Yaccu. ¹⁵ Jwali ṭɔɔlɛ gɛɛl bala ne cyɛɛlɔ. Jwalla neeniyɛ, gena jwalla awarɛ, ma yaakinti jyeddi jwalla neeniti waakɛnda. Jwalla neeni gɔki agi Yaccu Kiṭɔ bɛɛnɔ iñɔ baanji wɛnni, aŋka maka nɔɔtk yɔɔnda ɛkta. Ɔci ‘yayɛ, maka pookɛn buani ‘ya te nɔjjo, yeti ɛkɛ ‘ya yɔɔñña doki. ¹⁶ Ɔci Juaŋ yomɛ pɔŋnɛ ‘yati. Ɛkɛ buagɔn dala maka pookɛn gɔrti naŋki Yaccu Kiṭɔ aŋka Yaccu ŋeettiti ma ne ɛkɛ loomgɛ tɛɛki mati oŋkanda aŋka ŋeettan ma Yaccu Kiṭɔ noŋi a ɔɔn maka jyeddi ɛkɛti waakɛnda, ɔci ɛkkɛn ‘wondɛ ɛkɛ tɛɛtin, ɔci tɛɛtin neeni baadi ywongati bɛɛ. ¹⁷ A ɔŋŋiyɛ, ‘ya gɔk a pwatcin Juaŋti mena a Ciɛggɔn Tolan mena ciyi yuonginda neeniti. Ɛkɛ baadi bɛɛ. Yeti ɛkɛ yuartin ikin te woŋgɔ bɛɛ. Ɛkɛ a Juaŋ waanɛ. Ɛkɛ pwanna pwanno, ɔci ma noŋi ne pwadan ɛkɛti. Dala ma jieddi ɛkɛ yuonginda ɔɔn! Amɛɛn. ¹⁸ Gɔṭṭi acca hay! Kaci ‘ya, Timutawuc, ‘ya buaga i myettin te jyek kanŋa i bala ba te ñamu ne ma myennɛ Juaŋ gɔkki te jyek naŋki i naŋka bɛya ne baaṭiy. Dala i poŋja jyeka guagɛ ma te i neeni aŋka i noŋja kanŋa Juaŋ ne pwadan. ¹⁹ Dala jyeni i Kiṭɔti tieka te yoma wɔɔgan. Ma gɛɛg yomg ɛkkɛn tiiyɛ ñin bɛɛ, ɔci a ɔŋŋiyɛ, ɛkkɛn jyeni ɛkkɛn jyenna jyetki Yaccuti neeni daljɛ doki. ²⁰ Aymaneeyac ɔci Alɛkcaandaryɛ, ɛkkɛn bala noŋi a ɔɔn. Ɔci ‘ya ɛkkɛn oljan Jwaŋa Yaayan bieŋɛti aŋka dala ɛkkɛn taabdi aŋka ɛkkɛn mwondi te ŋɛɛgga ḍorki ɛkkɛn jyek Jwaŋ ɛkkɛn neeni.

¹ Gɔṭṭi, ‘ya gɔkka iti, jwalla bala ñamu te jyeka pookɛn waakɛndayɛ, gena jyek cɔŋŋo. Dala ɛkkɛ cɔktɛ Juaŋti te maka pookɛn waakɛnda. Dala ɛkkɛ toottɛ Juaŋti aŋka ɛkɛ yomɛ pɔktɛ ɛkkɛnti. Ɔci ne ɛkkɛ cɔktiyɛ, dala ɛkkɛ gɔktɛ a pwatcin Jwaŋa Tolanti te naŋki ɛkɛ neeni. ² Dala ɛkkɛ cɔktɛ Juaŋti te ḍuaŋan ḍwaŋin waakɛnda, ɔci maka bala ḍuaŋan ḍwaŋin neeni ŋotkɛnti daŋkun aŋka ɛkkɛn magdɛ Juaŋ te muŋi baan aŋka ikin cietin ne pwadan, ɔci aŋka ikin noŋtin ba naŋki Juaŋ oŋkanda. ³ Cɔŋŋa neeniyɛ, pwad pwado, ɔci yɔmjin Juaŋti Mena Yuoci ikiny. ⁴ Acaan ɛkɛ buagɔn yuoci ma waakɛnda, ɔci ɛkɛ buagɔn dala jyeka awarɛ neeni ŋeettan ɛkkɛn. ⁵ Juaŋ bala ne cyɛɛlɔ budan. Ɔci cuuda ikin daŋkun bala ne cyɛɛlɔ budan. Gena mena etti jyeka naŋŋɛ Juaŋ ikintiy. Gena Yaccu Kiṭɔ, mena aŋi men baany. ⁶ Ɛkɛ tuun aŋka ɛkɛ woni ma waakɛnda. Te lyen ɛkɛ te oŋŋa ḍuaññɛ Juaŋ wannayɛ, jiek lɛɛlnɛ ɛkɛ bora ne pwadan a Juaŋ buagɔn ma waakɛnda uda. ⁷ A ɔɔnyɛ, ‘ya naŋŋa Juaŋ aŋi mena loṭi ma ɔci cuuda Yaccu. ‘Ya cuonna Juaŋ aŋka lor Keedin Pookɛn te jyeka awarɛ te jyek jyenna jyetki ma Juaŋti neeni. Ɛɛ, ne ‘ya gɔka ka ‘ya cuonna Juaŋ neeniyɛ, ‘ya jom jiek bɛɛ. ‘Ya gɔk awarɛ. ⁸ ’Ya buaga dala maka ‘uay cɔkti Juaŋti kaniicanji waakɛnda. Dala ɛkkɛn cɔkti te yoma pwadan. Ne ɛkkɛn cɔkkiyɛ, naa ɛkkɛn looñi mengati bɛɛ, ɔci naa ɛkkɛn wɛyyɔ bɛɛ. ⁹ Ɔci gɔṭṭi moki, dala i maka moong myetka, ne ɛkkɛn bɛɛtɛ on Juaŋ ona tolanyɛ, dala ɛkkɛn ɛɛŋdi bworŋin ne pwadan, ɔci dala ɛkkɛn waakɛn tiitan ne pwadan aŋka naa maka ‘uay gɔṭi booti ɛkkɛn waakɛn bɛɛ. Yeti naa ɛkkɛn buagɔn ma jieddi ɛkkɛn te pani jyeyi a ɔɔn bɛɛ, ɔci walla te waka ‘yɛŋtan ɛkkɛn ba dahab bɛɛ, ɔci lirga ‘yɛŋtan ma a luulan ɔci bworŋin wiɛlɛn tɛyan a ɔɔn bɛɛ. ¹⁰ Moonga gɔki agi ɛkkɛn aginti maka moṭi Juaŋtiyɛ, dala ɛkkɛn aŋka jiɛtan ma te naŋka naŋtan ɛkkɛn pwadin neeni. ¹¹ Gɔṭṭi ‘wota, moongyɛ, dala ɛkkɛn ciya lieda kaniicaji, ɔci dala ɛkkɛn tieŋdi jyeka laltan ma te yoma pwadan. Naa ɛkkɛn noŋi waakɛn bɛɛ. ¹² ’Ya buaga naa maka moong loṭi maka ‘uay bɛɛ, ɔci naa ɛkkɛn ḍwaŋdi yomgɛnti aŋka ‘yeṭi maka ‘uay jitkɛn bɛɛ. Dala ɛkkɛn ciya lieda. ¹³ Jiek bala a ɔɔn moongti ogo? Jiek bala a ɔɔn acaan Adamyɛ, ɛkɛ cɔnnɛ Juaŋ ñamu, ɔci Awwayɛ, ɛkɛ cɔnnɛ Juaŋ ne ŋoyɔ. ¹⁴ Ɔci moki a Adam ɛkɛ naŋŋɛ ñin Jwaŋa Yaayan bɛɛ. Gena Awwa aŋka naŋŋɛ ñin Jwaŋa Yaayany. Ɔci ɛkɛ jyek Juaŋ bɛɛññɛji. ¹⁵ A ɔŋŋiyɛ, Juaŋ moong cuonnɛ pɛñi ɔci taab ne ɛkkɛn jiedki kɛɛginy. Yeti kan maka moong ciyi ne pwadan te jyenna ɛkkɛn jyetki Juaŋti neeni, ɔci kan anna ɛkkɛn anki ma bala ɛkkɛn yomgɛntiyɛ, ɔci kan naŋki ɛkkɛn pwadɔyɛ, ɔci kan ɛkkɛn yaakinti poŋi jiek ne pwadanyɛ, ɛkkɛn magdɛ Juaŋ te jiedi kɛɛgin.

¹ Jwali ṭɔɔlɛ gɛɛl bala, ɔci ɛkɛ gɔki agi, “Kan mena buagɔn naŋtan ma a gaciicyɛ, ɛkɛ buagɔn gena pwadan.” Jwalla neeniyɛ, a jwalla awarɛ. ² Mena naŋtan ma a gaciicyɛ, naa ɛkɛ naŋtan ma a mena waaktan ma bɛɛ. Ɔci dala ɛkɛ a mena balkin ɛɛŋ ne cyɛɛlɔ budan. Dala ɛkɛ aga mena tukɛ luyan. Dala ɛkɛ poŋi jiek te ñamu. Ɔci dala ɛkɛ a mena cooddɛ pwadan. Ɔci dala ɛkɛ a mena yomɛ pwadan Ma Kiṭɔ maka wɛlgtiy. Ɔci dala ɛkɛ a mena yaakinti lali ma te worga Juaŋ ne pwadan. ³ Naa ɛkɛ a mena nokkin mooy bɛɛy. Ɔci naa ɛkɛ a mena noowi i ma bɛɛy. Dala ɛkɛ a mena yomɛ pwadan maka pookɛnti. Naa ɛkɛ a mena ani wɛɛdin iki maka pookɛn bɛɛy. Naa ɛkɛ a mena ani bilk bɛɛy. ⁴ Dala ɛkɛ a mena gɔṭi ma on ɛkɛ ne pwadan. Dala kɛɛgin ɛkɛ noŋi ba jyek ɛkɛ oŋkanda te yoma pwadan. ⁵ Acaan kan men yaakinti gɔṭi kɛɛgin ɛkɛ ne pwadan bɛɛyɛ, oŋ ɛkɛ yaakinti gɔrti ma kaniica a ɔki? ⁶ Naa ɛkɛ a mena jyeti Yaccuti woonɛ bɛɛ. Kan ɛkɛ a mena jyeti woonɛyɛ, ɔci kan ɛkɛ naŋtan ma a gaciic ne pɛñan a ɔɔnyɛ, ɛkɛ yomɛ tola dita, ɔci ɛkɛ noŋdi amaam dita. Ɔci jiek bɛya ɛkɛ wyeñɛti daŋkun ba jyeka bɛɛn Jwaŋa Yaayan wyeñɛti neeniy. ⁷ Dala mena neeni a mena jiɛtan maka bora agi ɛkta pwadɔ. Kan a ɔɔn bɛɛyɛ, ɛkɛ dita waaktan ma, ɔci ɛkɛ ḍɛmdi iñɔ te naŋki Jwaŋa Yaayan neeni dita. ⁸ Maka dikannyɛ, dala ɛkkɛn a maka yaakinti paŋi jieko. Naa ɛkkɛn balki yomgɛn ne yyɛɛwɔ bɛɛ. Ɔci naa ɛkkɛn ani mooy bɛɛ. Ɔci moki naa ɛkkɛn yomgɛn buagɔn waka coŋin bɛɛ. ⁹ Jyek yɔɔt Jwaŋa Tolan jyeka wonkɛn jyeka pwadin, jyeka bɛɛn bora neeniyɛ, dala bala ɛkkɛnti te yoma wɔɔgan ne pwadan. ¹⁰ Dala ma gɔrti naŋki ɛkkɛn te ñamu ne ɛkkɛn cieki ne pwadan boki no, hayya! Ɛkkɛn oŋ naŋtan ma aga dikann oŋo. ¹¹ Dikann a moongyɛ, dala ɛkkɛn daŋkun a maka yaakinti paŋi jieko. Naa ɛkkɛn a moonga ani luarŋ ma waakɛn bɛɛ. Dala ɛkkɛn a moonga tuggɛn luyan. Ɔci dala ɛkkɛn a moonga woŋgɛn a tiicin te jiek waakɛnda ne pwadan. ¹² Maka dikannyɛ, dala ɛkkɛn balki moong ne ciṭin. Dala ɛkkɛn a maka gɔṭi kɛɛgin ɛkkɛn ne pwadan iki maka cieki iki ɛkkɛn oorg ɛkkɛn jitin waakɛnda. ¹³ Kan dikann noŋi kanŋa Juaŋ neeni ne pwadanyɛ, ɛkkɛn a maka anki may. Ɔci ɛkkɛn yaakinti gɔkti ne pwadan mati te jyek Yaccu Kiṭɔ. Ɛkkɛn buayi menga bɛɛ. ¹⁴ Ɛɛ, ŋeej ‘ya ne ‘ya buagati bɛɛda ban ɛkkɛ ne cwakanti ɔɔn. Yeti ‘ya kiewan jyeka neeni iti men ɔɔn ¹⁵ aŋka kan ne ‘ya kwattayɛ, jyek naŋka naŋdɛ ɛkkɛ Ma Kiṭɔyɛ, ŋeejja i te worga kiewan ‘ya iti neeni doki. Ɛkkɛ Ma Kiṭɔyɛ, ɛkkɛ agɛ kaniica Jwaŋa Tolan. Jwaŋa Tolanyɛ, ɛkɛ a tuuta bɛɛ. Ɛkɛ a tɛɛta. Juaŋ buagɔn dala ma kaniica yɔɔda ne tɛyan aŋka ma gɔrti a jwali Juaŋ neeni a jwalla awarɛ. ¹⁶ Ɛɛ, awarɛ, jyek Juaŋ ikin tɛy tɛyo, ɛkkɛn jitkɛn wɔkɔ mati te ñamu bɛɛ. Juaŋyɛ, ɛkɛ warɛ lɛɛlnɛ bora mati te oŋŋa ɛkɛ aŋŋi men baany. Naŋki pwani ɛkɛ lɛɛlnɛ Boŋ Juaŋ bora te jɔɔŋŋin ɛkɛ jɔŋni ñaalɔ te kooljiy. Ɛkɛ yuarɛ malɛɛkan te woŋgɛn. Ma bala loṭi keedin waakɛnda te jyek ɛkɛ. Ɔci ma gɛɛg jyeti ɛkɛti baan warda. Ɔci ɛkɛ eññɛ Juaŋ ñaalɔ pɔliji.

¹ Ɔɔn myennɔn Boŋ Jwaŋa Tolan ne pwadan agi ne ninka bɛya ne ṭɛɛr noŋɛ wyeñɛ baldiyɛ, ma kaniica gɛɛg jyeka awarɛ neeni daltan. Ɔci ɛkkɛn jyeddi ɔci bootti amaam jyeka ɛkkɛn laltɛti jɔkin yeyin a jyeka a jomgin neeniti. ² Maka loṭi ɛkkɛn te jyeka pookɛn neeniyɛ, ɛkkɛn noŋi ba ɛkkɛn akki maka pwadin ɔɔn, yeti ɛkkɛn a maka pwadin bɛɛ. Ɛkkɛn jomi jieko, ɔci ɛkkɛn yaakinti paŋi jyeka pwadin bɛɛ. ³ Maka neeniyɛ, ɛkkɛn dɛyi ma te jyek ḍɛɛwin, ɔci ɛkkɛn moki dɛyi ma te waka amtan ma gɛɛg. Yeti waka neeni aŋŋɛ Juaŋ ɔci ‘wonnin ɛkɛ ikin. A ɔŋŋiyɛ, ikin maka jyeti Juaŋti, maka jyeka awarɛ neeni ŋeecɔn ɛkkɛnyɛ, ikin gɔktin a pwatcin Juaŋti te waka neeni. Ɔci ma Juaŋ yaakinti omi waka neeni te yoma pwadan. ⁴ Waka aŋŋɛ Juaŋyɛ, ɛkkɛn pwadɔ waakɛnda. Kan men gɛɛl gɔkti a pwatcin Juaŋti te waka neeniyɛ, ɛkɛ yaakinti omdi waka neeni waakɛnda, ⁵ acaan waka neeni pwadgin te jyek Juaŋ ɔci te cɔŋŋa neeni. ⁶ Kan i Ma Kiṭɔ nɔɔtka jyeka neeni jitkɛnyɛ, a ɔɔnyɛ, i noŋ kanŋa ne pwadan Yaccu Kiṭɔti, bala ba ne i pyeṭi waru te jyek jyeni, ɔci te jyeka boonni i a jyek lalla awarɛ neeni. ⁷ Dala i waru uutca ɔntɔ ne loonan te jyeka jiɛtan ma a jyeka jitkɛn baaw budan wanna, naa i tieŋja ɛkkɛn bɛɛ. Dala i waŋu tiicca oŋkanda te yom i aŋka i noŋja naŋki Jwaŋa Tolan. ⁸ Kan i waŋu tiicca te war i aŋka ɛkɛ tɛy tɛyyɛ, a ɔɔn pwatcin. Yeti jyek tiit yomgɔ te coodi Juaŋ aŋka bala ñamu. Acaan jyek tiit yomgɔyɛ, ɛkkɛn etti waka pwadin iñɔ baanji ṭɛɛrji wɛnni acca, ɔci moki ne baaṭi daŋkun. ⁹ Jwali ṭɔɔlɛ gɛɛl bala ne cyɛɛlɔ. Jwalla neeni gena jwalla awarɛ. Ma yaakinti jyeddi jwalla neeniti waakɛnda. ¹⁰ (Ikin kanŋin ne tolan ne taab baali ikinti ɔɔn.) Ɔci jwalla neeni gɔki agi, “Ikin kɛɛyin naŋki Jwaŋa Tolan mena ciyi tɛɛti yuonginday. Ɛkɛ a Mena Yuoci ma waakɛnday. Ɛkɛ a Mena Yuoci maka jyeddi ɛkɛti nɔñji ne tolan.” ¹¹ Gɔṭṭi Timutawuc kaci ‘ya, naa i mwonna te myetkin ma te jyeka i myennin ‘ya worgaji neeni bɛɛ, ɔci walla te lalla neeni bɛɛ. ¹² Naa ma lɛɛrti i waru agi i agji gaciic ne i a mena ḍiɛran bɛɛ. Dala i gɔk te lɛmma pwadan, ɔci noŋja naŋka pwadin aŋka maka jyeti Jwaŋa Tolanti neeni lɔkti ba naŋki i neeni, ɔci moki ba anna ani i ma neeniyɛ, ɔci ɛkkɛn moki lɔkti. Ɔci moki ba jyenna i jyetti Juaŋti neeniyɛ, ɔci ɛkkɛn moki lɔkti. Ɔci ba coodi i coodda pwadan neeniyɛ, ɔci ɛkkɛn moki lɔkti. ¹³ Dala i pokca worga Juaŋ mati, ɔci dala i ṭey ma, ɔci lorca ma oŋkanda ne ‘ya bɛɛda iti ɔɔn. ¹⁴ Dala i waŋu tiicca te naŋka i ‘wonniti Juaŋ te oŋŋa cyekin kaniica byeŋkɛn tañkiti itiy. Ɔci te oŋŋa wannayɛ, ɛkkɛn bala gɔki te Boŋ Juaŋ te jyek naŋka bɛya ne ŋoyɔ itiy. ¹⁵ Dala i waŋu tiicca te kanŋa i neeni. Dala i ñingu juaddi te ɛkɛ, aŋka dala i ŋeetti ma waakɛnda i baal ‘uocca ñamu gɔ moki ‘uoci ɔɔn. ¹⁶ Dala i waŋu tiicca te coodi i, ɔci te lali i daŋkun. Ɔci a ɔɔnyɛ, i waru maga paru, ɔci i yaaktiti maka pookɛn, maka tyeŋi jyek i maga daŋkun.

¹ I Timutawuc, gɔṭṭi i myettin te kanŋa i kaniicaji ‘wota. Tieŋŋa, kan men a mena tolanyɛ, naa i gɔk ṭey ɛkɛ ne pɛñan bɛɛ. Dala i gɔkca ɛkɛti ne maalan ṭɔɔlɛ bala ba ne ɛkɛ agi wey ɛkkɛ ɔɔn. Ɔci ‘uaya ḍyɛrinyɛ, dala i gɔkca ɛkkɛnti bala ba ne ɛkkɛn akki modg ɛkkɛ ɔɔn. ² Moonga ḍwaŋinyɛ, dala i gɔkca ɛkkɛnti ne maalan ṭɔɔlɛ bala ba ne ɛkkɛn akki mɛyi ɛkkɛ ɔɔn. Ɔci moonga ḍyɛrinyɛ, dala i gɔkca ɛkkɛnti ne maalan ṭɔɔlɛ bala ba ne ɛkkɛn akki kowi ɛkkɛ ɔɔn. Naa paŋŋa yaayan gɛɛl bala iti bɛɛ. ³ Moonga ciekyɛ, kan mena gɔṭi ɛkkɛn baawiyɛ, dala i ɛkkɛn maga. ⁴ Moonga ciekyɛ, kan ɛkkɛn balki kɛɛgin ɛkkɛn kɛɛgin a kɛɛginyɛ, dala ŋeettan ɛkkɛn ne pwadan a dala ɛkkɛn moki mɛyi ɛkkɛn, ɔci walla moki ṭyerg ɛkkɛn, ɔci a ɔɔn pwatcin. Dala kɛɛgin moki ma ɛkkɛn a ɔɔn acaan ɛkkɛn magɛ mɛyyɛn a ɔɔn te ñamu daŋkun, ɔci a ɔɔn pwatcin Jwaŋa Tolanti daŋkun. ⁵ Ɛŋa cieñyɛ, ɔci kan ɛkɛ bala ciyi parɛ acaan menga bala gɔṭi ɛkɛ bɛɛyɛ, ɛkɛ yomɛ bala Juaŋti ne pwadan, ɔci ɛkɛ bala cɔki Juaŋti oŋkanda te oŋ jiñɛ, ɔci te ween jiñɛ. Ɛkɛ tooci Juaŋti te waka ɛkɛ buagitiy. ⁶ Yeti ɛŋa cieñyɛ, kan ɛkɛ bala lieṭi waak ne coŋɔn te ḍwaŋ ɛkɛ parɛyɛ, ɛŋa cieñ neeni ɛkɛ bala ba mena tuuta doki. ⁷ Dala i ɛkkɛn myetka ‘wota te jiek jitkɛn daŋkun te gwali moonga ciek neeni aŋka naa ma wookti Ma Kiṭɔ te naŋki ɛkkɛn bɛɛ. ⁸ Acaan kan men gɛɛl moki ma ɛkkɛn, mɛyyɛn ɔci ṭyerkɛn bɛɛyɛ, a ɔɔn bala ba ɛkɛ yookɔn te jyek Juaŋ doki. Ɔci a ɔɔnyɛ, naŋki ɛkɛ yaayɛ ne pɛñan te naŋki maka ciyi budan te jyek Juaŋy. ⁹ Moonga ciekyɛ, kan ɛkkɛn yuongɛn a ma baan ne ḍoogɔ (60) men bɛɛyɛ, ɔci kan ɛkkɛn ‘uaya ɛkkɛn ḍɛɛkɛ te baaṭi tiiyɛyɔ ne ciṭin bɛɛyɛ, naa yeng ɛkkɛn olja worga kiewi i yeng moonga ciekji, aŋka i ɛkkɛn maga te bilk Juaŋ bɛɛ. ¹⁰ Ɔci moonga yeng ɛkkɛn olja worgajiyɛ, gena moonga guaktan ma agi naŋki ɛkki pwadgɔy. Kan ɛkkɛn kɛɛgin ɛkkɛn gwalɛ ne pwadanyɛ, ɔci kan ɛkkɛn yomgɛn pwadɔ maka wɛlgtiyɛ, ɔci kan ɛkkɛn moki noŋi Ma Kiṭɔti ne pwadan te yoma pwadanyɛ, ɔci kan ɛkkɛn moki maka balki taab magɛyɛ, ɔci kan ɛkkɛn buagɔn noŋdi ne pwadan mati oŋkandayɛ, dala i moonga neeni aŋka yengɛn olja worgaji. ¹¹ Moonga ḍyɛrin, moonga ciekyɛ, naa yeng ɛkkɛn olja worga kiewi i yeng moonga ciekji bɛɛ. Kan ɛkkɛn poŋi jyek ḍɛɛn oŋkanda ne tolanyɛ, ɔci paŋŋa neeni bala ñamu ɛkkɛn yomgɛnti oŋkanda ɔɔn. Ɔci a ɔɔnyɛ, ɛkkɛn jyek Kiṭɔ daltan ɔci ḍɛɛtan ma moki. ¹² Ɔci a ɔɔn jyeka naŋɛ ɛkkɛn i Kiṭɔ te ñamuyɛ, bɛɛtan ɛkkɛn jitin, ɔci acaan a ɔŋŋiyɛ, jiek bɛya ɛkkɛn wyetkɛnti. ¹³ Ɔci moki, moonga ḍyɛrin moonga ciekyɛ, ɛkkɛn ma gɛɛg ciyi budan waakɛn pɛñɔ te kanŋa, ɔci ɛkkɛn ati ḍɔki a ḍwaŋi lɔṭi ma waakɛn oorg maka pookɛn jitin. Ɔci ɛkkɛn bala nɔɔti jiek amaam budan. Ɛkkɛn ani nwati jiek pwatcin bɛɛ. ¹⁴ A ɔŋŋiyɛ, ‘ya gɔk yomuti ka dala moonga ḍyɛrin moonga ciekyɛ, dala ɛkkɛn ḍɛɛtan mako, ɔci dala ɛkkɛn jietti kɛɛgin, ɔci dala ɛkkɛn woŋgɛn tiittan ma ɛkkɛnti oorg ɛkkɛn jitin. Ɔci a ɔɔnyɛ, maka yookɔn te jyek Juaŋ neeni yaakinti wooki ikin te genga moki bɛɛ. ¹⁵ Acaan moonga ciek gɛɛg jyetcin ɔntɔ te kaniicaji doki, ɔci ɛkkɛn bala booti Jwaŋa Yaayanti doki. ¹⁶ Yɔɔddi i myettin lakun ‘wota! Ma Kiṭɔ maka ‘uay ɔci maka moong kan ma ɛkkɛn gɛɛg a moonga ciekyɛ, dala ɛkkɛn ɛkkɛn magtan. Naa moonga ciek balki ma ɛkkɛn neeni bɛya a taab kaniicati bɛɛ. Dala kaniicayɛ, moonga ciek anin baaki maka gɔṭi ɛkkɛn neeni aŋka magdɛ ɛkɛ, acaan ɛkkɛn ma ɛkkɛn baawo. ¹⁷ Cyekin kaniica maka noŋi kanŋa ɛkkɛn ne tolanyɛ, ɔci maka loṭi ma ne pwadan mokiyɛ, dala i noŋja ne pwadan ɛkkɛnti ba kanŋa ɛkkɛn. ¹⁸ Acaan worga Juaŋ gɔki agi, “Kan yaan bala olni i wɔɔci jana deeki ma pok aŋka deyi pok iyɛ, naa ɛkɛ ḍyɛga tukɛti bɛɛ.” Ɔci worga moki gɔki agi, “Mena noŋi kanŋayɛ, dala ɛkɛ omdi bilk ba kanŋa ɛkɛ.” ¹⁹ Kan men gɛɛl gɔki agi ciɛggɔn kaniica neeni baalɔ noŋi ne yaayanyɛ, naa i jyedda budan men bɛɛ. Kan ma gɛɛg ɛkɛ yuarki ne yyɛɛwɔ walla ne ḍoogɔyɛ, dala i oŋ jyedda gɔrca jyek ɛkɛ oŋo. ²⁰ Kan men noŋi nɔji awarɛyɛ, kan i buagi gɔkca ṭey ɛkɛyɛ, dala i gɔkca ɛkɛti maka pookɛn ñomgɛnti waakɛnda aŋka ɛkkɛn buatti nɔjja neeni yaayɛ awarɛ. ²¹ Timutawuc, ‘ya gɔkka iti Juaŋ ñamɛti ɔci Yaccu Kiṭɔti ɔci malɛɛkan pwadin ñomgɛnti daŋkun, ka dala i noŋja ba jyeka i myennin ‘ya neeni. Ɔci ne i noŋdi a ɔɔnyɛ, dala i noŋja ma waakɛndati ba bolja ne cyɛɛlɔ. Dala i yomu bala ɛkkɛnti waakɛnda. ²² Kan i buagi noŋja mena wɛɛyi ma gɛɛlyɛ, naa i ɛkɛ naŋa ne pɛñan ñamu doki budan bɛɛ. Kan i men gɛɛl naŋa ɔci kan ɛkɛ noŋi ne pwadan bɛɛyɛ, jyeka neeniyɛ, bɛya aŋa i wyeñuti dɔki. Naa nɔji bala i ḍwaŋuti bɛɛ. ²³ Naa i mot pieg pookɛn bɛɛ. Dala i motca mooy ne ḍiɛran ṭɔɔlɛ acaan kon i balki taab, ɔci aŋka dala i waru pwada acaan i waru yaayɛ a ñaccu gɔ moki waru yaayɛ acaan taab bala i konuti neeni. ²⁴ Ma gɛɛgyɛ, naŋki ɛkkɛn naŋka yeyin niin te waakɛn a lyɛlta, ɔci nɔji ɛkkɛn neeni ɛkkɛn eedɛ non godan. Ɔci maka pookɛn gɛɛgyɛ, ɛkkɛn coki naŋki ɛkkɛn waakɛn. Jyek ɛkkɛn ootan bora bɛɛ. Yeti jyek ɛkkɛn bɛya bora ne baaṭi dɔki te oŋ godan Jwaŋa Tolan. ²⁵ Ɔci jyek naŋka pwadin bala a ɔɔn daŋkun. Jyek naŋka pwadin gɛɛgyɛ, ŋeettan ma waakɛnda, ɔci jyek naŋka pwadin gɛɛgyɛ, bɛya bora ne pɛñan bɛɛ, bɛya bora ne baaṭi dɔki.

¹ I Timutawuc, gɔṭṭi ‘wota, i myettin baa! Maka kɛɛnkyɛ, dala ɛkkɛn waakɛnda ani weyi ɛkkɛn aŋka naa maka pookɛn wookti yenti Juaŋ bɛɛ, ɔci walla jyeka loṭin ikin ma neeni bɛɛ. ² Maka kɛɛnkyɛ, kan maka ḍɔci ɛkkɛn maka waka pwadin bɛya ɛkkɛnti te kanŋa kɛɛnk neeni a Ma Kiṭɔyɛ, naa ɛkkɛn yooktan te jyek weyyɛn bɛɛ. Ɔci naa ɛkkɛn gɔkti agi ɛkkɛn aŋŋinti modin aŋka ɛkkɛn yookinti te jyek ɛkki wanna bɛɛ. Dala ɛkkɛn kandi ne tolan te yoma pwadan acaan weyi ɛkkɛn neeniyɛ, ɛkkɛn a Ma Kiṭɔ ba ɛkkɛn ɔɔn daŋkun. Ɔci Juaŋ ani ɛkkɛn. Dala i ma lala te jyeka awarɛ neeni, ɔci dala i ɛkkɛn ciŋaji te jiek aŋka ɛkkɛn tieŋdi ɔci noŋdi ba jyek weyya ḍɔci ɛkkɛny. ³ Kan men gɛɛl loṭi ma te jyeka pookɛn gɛɛg jyeka a jyek Yaccu Kiṭɔ bɛɛyɛ, ɔci kan ɛkɛ yookɔn te jyek coodda cieki Ma Kiṭɔyɛ, ⁴ mena neeni ɛkɛ noŋi warɛ amaam budan. Ɛkɛ poŋi gɔki agi ɛkɛ jiek ŋeejjɛ waakcinda. Yeti ɛkɛ genga ŋeejɛ bɛɛ. Mena neeniyɛ, ɛkɛ ani tyewwin iki ma te jieko. Ɔci te naŋki ɛkɛyɛ, ma korkɛn modɔ, ɔci ma wɛyyɔ, ɔci ma woowɔ yɔtin, ɔci ma pooŋɔ yɔtin te jyeka budan. ⁵ Maka ani tyewwin neeni ɛkkɛn yaakinti poŋi jyeka pwadin gɛɛg moki bɛɛ. Ɛkkɛn wyetkɛn yiegin jiju poŋi gɔki agi mali Jwaŋa Tolan neeni agi pɔya ma yɔɔrdi waka coŋin neeni budan. Naa i ñoodi iki ɛkkɛn te jiek bɛɛ. ⁶ Awarɛ, mali Juaŋ ikin naŋtin balkin ba maka cyɛgan kan ikin yɔmnin doki te waka ikin ‘wonninti Juaŋy. ⁷ Gɔṭṭi, oŋŋa ikin jiedkinti mayɛ, ikin ennin waagga byeŋkɔti iñɔ baanji wɛnni bɛɛ. Ɔci ne ikin tuutinyɛ, ikin daŋkun eetin waagga byeŋkɔti bɛɛ. ⁸ Ɔci acaan ikin akin Ma Kiṭɔyɛ, kan waka amtin bala ikintiyɛ, ɔci kan moki ikin balkin bworŋinyɛ, a ɔɔn yɔmjin doki ikinti. ⁹ Maka buagɔn aga maka cyɛgan te waakyɛ, paŋŋa coŋin bala ɛkkɛn wyetkɛnti, ɔci ɛkkɛn ḍɛɛmdi iñɔ. Jyek bwakti waka coŋin neeniyɛ, ɛkkɛn maaldɛ ne ɛkkɛn noŋtɛ nɔji ɔɔn. Kan ma buagɔn waka coŋin amaam ɔɔnyɛ, bwakti waka coŋin neeniyɛ, etti naŋka yeyin ɛkkɛnti, ɔci ma gɛɛg ḍakti te naŋka neeni. ¹⁰ Ani bilk neeni, ɛkɛ a ŋway naŋka yeyin jitkɛn waakɛnda. Ɔci te jyek ani bilk neeniyɛ, ma gɛɛg jyetcin ɔntɔ doki te jyenna ɛkkɛn jyetki Juaŋtiy. Ɔci ɛkkɛn taabbin ne tolan doki te yom yoño. ¹¹ Yeti hay! I Timutawuc, i ag men Juaŋo, dala i waŋu tiicca te bwakti waka coŋin neeni waakɛnda amaamo. Dala i noŋja naŋka pwadin, dala naŋka naŋa i bala ba naŋka Juaŋ buagɛy. Dala i jyedda Juaŋti ne pwadan ɔci dala i balki ani yomuti. Dala i yɔɔd ne tɛyan, ɔci dala i yomu pwad pwad mati. ¹² Coodda i ciyi te jyek Juaŋyɛ, ɛkɛ bala ba maka yiŋ boddi guoñjiy, mena ma boddiyɛ, ɛkɛ ‘wontan ma genga ba ŋañ ɛkɛ neeni. Ɔci bala a ɔɔn daŋkun, kan i noŋja kanŋa ne tolan ba mena ma bonnɛ guoñji neeniyɛ, Juaŋ daŋkun i ‘wondi tɛɛtin baadi bɛɛy. Acaan a ɔŋŋiyɛ, aŋka Juaŋ i borniti te oŋŋa i Jiek ooni bora te jyeni i maka coŋin ñomgɛnti neeni. ¹³ ’Ya gɔkka iti Jwaŋa Tolan mena waak waakɛnda ‘wondɛ tɛɛtin neeni ñamɛti, ɔci moki ‘ya gɔkka iti Yaccu Kiṭɔ ñamɛti, ɛkɛ a mena jyeni ɛkɛ lɛɛlnɛ bora ne tɛyan Bilaatuc Bunti ñamɛtiy. ‘Ya gɔkka iti ɛkkɛn ñomgɛnti ¹⁴ aŋka dala i jyeka i myennin ‘ya te kanŋa i neeni tiyayɔ ne pwadan oŋkanda naa i jyeka neeni gɛɛl dalja bɛɛ, ne oŋŋa Yaccu warɛ lɛɛldɛ bora mati ɔɔn. ¹⁵ Yaccu lɛɛldɛ Jwaŋa Tolan bora oŋgati ba oŋŋa ḍuaññɛ Juaŋ te ɛkɛ, acaan Jwaŋa Tolan neeniyɛ, ɛkɛ pwad pwado, ɔci ɛkɛ bala ñamu te cyekin ḍwaŋin pookɛn waakɛnda ɔci cyekin bala makɛn ḍwaŋin neeni ŋotkɛntiy. ¹⁶ Jwaŋa Tolanyɛ, ɛkɛ bala te baaṭi doki, ɔci ɛkɛ bala parɛ yuonginda ɔɔn. Ɔci nona ciyi ɛkɛyɛ, galla gallo, ɔci a ɔŋŋiyɛ, menga yaakinti ortiti nona ciyi ɛkɛ neeni bɛɛ. Ɛkɛ yuarŋɛ menga te waŋɛ oŋgati bɛɛ, ɔci menga yaakinti ɛkɛ yuartɛ acca bɛɛ. Dala yenti ɛkɛ tola, ɔci dala war tɛɛn ɛkɛ bala yuonginda ɔɔn. Amɛɛn. ¹⁷ Maka cyɛgan te waka iñɔ baanji wɛnniyɛ, dala i ɛkkɛn myetka naa ɛkkɛn yomgɛn ḍwaŋdi bɛɛ. Ɔci naa ɛkkɛn yomgɛn ḍuattan waka coŋinti, waka baadi neeni bɛɛ. Dala ɛkkɛn yomgɛn ḍuattan gena Juaŋti parɛ, mena ‘woñi ma te waka ma yomgɛn ñɔɔti waakɛnday. ¹⁸ Dala i ɛkkɛn myetka, dala ɛkkɛn noŋdi naŋka pwadan mati te bilk ɛkkɛn. Dala naŋka naŋtan ɛkkɛn neeni coŋdi. Dala ɛkkɛn yomgɛn pɔktan, ɔci ma ‘wontan waak te yoma pwadan. ¹⁹ Ɔci naŋka pwadan neeni warɛ bwogdɛ ñaalɔ pɔliji ban Juaŋ bala ba mal ɛkkɛn ne baaṭi. Ɔci a ɔɔnyɛ, Jwaŋa Tolan ɛkkɛn ‘wondɛ tɛɛtin baadi bɛɛ neeni ne baaṭi. ²⁰ I Timutawuc, dala i waŋu tiicca ne pwadan te kanŋa i, kanŋa i ‘wonniti Juaŋ neeniy. Dala i yooki te jyeka guaktan ma budan a jyeka cɔggin neeni. Ɛkkɛn gɔki agi ma ñingɛn tɛɛdɔ te jyeka neeni katan. Yeti ma ñingɛn tɛya te jyeka neeni awarɛ bɛɛ. ²¹ Ma gɛɛg gɔki agi ɛkkɛn ñingɛn tɛɛnɔ te jyeka cɔggin neeni doki, yeti ɛkkɛn jyetcin ɔntɔ te jyek Juaŋti. Dala Jwaŋa Tolan yomɛ pwada a pwani ɛkkɛti waakida. Bawwin.