1Tacalunika

¹ Gena ‘ya Buuluc ɔci Cila ɔci Timutawuc ñiepɔn ɛkkɛ ma kaniica ban Tacalunika neeni. Ɛkkɛ agɛ ma Wey ikin Jwaŋa Tolan, ɔci ma Ciɛggɔn ikin Yaccu Kiṭɔ. Dala ɛkɛ yomɛ pwada a pwani ɛkkɛti, ɔci dala ɛkɛ ɛkkɛ ‘wondɛ coodi pwani ɛkɛ ɛkkɛ yomgɔti. ² Ɔɔn gɔkɔn a pwatcin Jwaŋa Tolanti oŋkanda te ɛkkɛ. Ɔɔn cɔkɔn Juaŋti te ɛkkɛ oŋkanda ɔɔn ³ acaan ɛkkɛ balgɛ noŋɛ naŋka pwadan jyenna ɛkkɛ jyettɛ Juaŋti, ɔci ɛkkɛ balgɛ kanŋɛ kanŋa Juaŋ acaan ɛkkɛ anɛ ɛkɛ. Ɔci ɛkkɛ balgɛ yɔdgɛ ne tɛyan ne ɛkkɛ jyettɛ balgi kɛɛyɛ oŋŋa Ciɛggɔn ikin Yaccu Kiṭɔ bɛɛdiy. Ɔci ɔɔn balgɔn gɔkɔn te naŋki ɛkkɛ neeni oŋkanda Juaŋ ñamɛti. ⁴ Modg ɔɔn, ŋeejɔn ɔɔn Juaŋ ani ɛkkɛ, ɔci ɛkkɛ muonɛ ɛkɛ bora aŋka agdɛ ma ɛkɛ. ⁵ Acaan ne ɔɔn bɛɛnɔn ennɔn jyeka wonkɛn jyeka pwadin neeni ɛkkɛtiyɛ, ɔɔn balgɔn gɔkɔn te jyek tuggɔ budan bɛɛ. Ɔɔn noŋɔn te naŋki Juaŋ naŋka tɛyan neeni, ɔci te Boŋ Juaŋ daŋkun. Ɔci ŋeejɔn ɔɔn ne pwadan jyeka loṭṭɔn ɔɔn ɛkkɛ wanna a jyeka awarɛ. Ɔci coodda cienɔn ɔɔn ban ɛkkɛ waayiti ŋeejɛ ɛkkɛ coodi ɔɔn ban ɛkkɛ aŋan wanna ɛkkɛ magdɛ. ⁶ Ɔci ɛkkɛ balgɛ lɔkɛ naŋki ɔɔn, ɔci naŋki Ciɛggɔn ikin daŋkun. Acaan ne taab bɛɛni ɛkkɛti ne tolan te jyek Juaŋyɛ, ɛkkɛ yɔɔnnɛ te jyek Juaŋ bɛɛ, yeti ɛkkɛ yomgɔ ñɔɔna ñɔɔn te Boŋ Juaŋo. ⁷ Ma Kiṭɔ maka ban Macɛdɔɔnya ɔci maka ban Akeeyayɛ, kan ɛkkɛn lɔkti ba naŋki ɛkkɛ ɔɔnyɛ, a ɔɔn pwatcin daŋkun. ⁸ Te naŋki ɛkkɛ jyek Juaŋ ati ban Macɛdɔɔnya konɛti ɔci ban Akeeya konɛti. Jyek Juaŋ bala ban Macɛdɔɔnyati ɔci ban Akeeyati pookɛn bɛɛ. Bala bonka pookɛnti waakɛnda daŋkun, ɔci ma tieŋŋin agi ɛkkɛ jyetcɛ Jwaŋa Tolanti. Ɔci a ɔɔnyɛ, ɔɔn mietɔn ma te jyek ɛkkɛ moki bɛɛ. Acaan jyek ɛkkɛ ŋeecɔn ma doki. ⁹ Maka tieŋŋin jyek ɛkkɛ neeniyɛ, ɛkkɛn bala mieti ɔɔn agi ne ikin balkin iki ɔɔnyɛ, ɛkkɛ yomgɔ ñɔɔna ñɔɔno. Ɔci ɛkkɛn gɔki agi ɛkkɛ mwonjɛ te mali jɔkin yeyin neeni. Ɔci agi ɛkkɛ morcɛ gena Jwaŋa Tolanti pardan. Gena Jwaŋa ciyi tɛɛti Jwaŋa awarɛy. ¹⁰ Ɔci ɔɔn myetkɔn ɛkkɛn agi ɛkkɛ baljɛ kɛɛjjɛ oŋŋa Kaci ɛkta bɛɛdda te ñaalɔ pɔlijiy. Gena Yaccu mena luolnɛ Juaŋ ñaalɔ te lientiy. Ɔci ɛkɛ a mena yuoci ikin te ywobji Juaŋ ywobja bɛya ne baaṭi ma wyetkɛntiy.

¹ Modg ɔɔn, ŋeejɛ ɛkkɛ te coodda cienɔn ɔɔn ban ɛkkɛ neeniyɛ, eccin naŋka pwadan ɛkkɛti. ² Çeejɛ ɛkkɛ te ñamu ne ɔɔn balgɔn ban Pilibbiyɛ, taab bala ɔɔnti. Ma bala noŋi ne yaayan ɔɔnti. Yeti ɔɔn buayɔn bɛɛ. Ɔɔn yomgɔ tɛy tɛy te naŋki Jwaŋa Tolan, ɔci ɔɔn bɛɛnɔn ban ɛkkɛ, ɔci ɔɔn balgɔn mietɔn ɛkkɛ te jyeka wonkɛn jyeka pwadin te Jwaŋa Tolan ne ma yookɔn te ɔɔn ɔɔn. ³ Ɔɔn loṭɔn ma oŋkanda te jyeka awarɛ neeni ɔci te yoma pwadan. Ɔɔn noŋɔn ma ñingɛn bɛɛ. ⁴ Ɔɔn ‘wonnɔn Jwaŋa Tolan kanŋa miti ma te jyeka wonkɛn jyeka pwadin neeni. Ɔci acaan a ɔŋŋiyɛ, aŋka ɔɔn loṭɔn ma neeni. Ɔɔn buagɔn dala jyeka loṭɔn ɔɔn ma neeniyɛ, pwaddi aŋa Juaŋti parɛ. Ɔɔn buagɔn jyek ɔɔn pwaddi ma baanti bɛɛ. A’a, aŋa Juaŋti parɛ. Acaan ɛkɛ poci ikin a poccin aŋka gɔrti ne ikin yomgɔ balki a ɔkiy. ⁵ Çeejɛ ɛkkɛ, ɔci ŋeejɛ Juaŋ moki, ɔɔn gɔkɔn dyetɔn ɛkkɛ ñingɔ te lɛmma milan bɛɛ. Ɔɔn buagɔn wak ɛkkɛ eedɔn ɔɔn bɛɛ. A’a. ⁶ Kan maka cundɛ Yaccu jiɛtan mayɛ, a ɔɔn pwatcin doki. Ɔɔn agɔn cuudan Yaccu, yeti ɔɔn buagɔn naa ma jieyi ɔɔn bɛɛ. Kan a ɛkkɛ ɔci kan walla a mena parɛyɛ, ɔɔn buagɔn menga jieddi ɔɔn bɛɛ. ⁷ Ne ikin balkin iki ɔɔnyɛ, ɔɔn balgɔn gɔṭɔn ɛkkɛ ne pwadan ba ɛŋa gɔṭi kɛɛgin ɛkɛ ne pwadany. ⁸ Acaan yomg ɔɔn bala ɛkkɛti ne tolan ɔɔnyɛ, ɔci ɛkkɛ eekkɛ ɔɔn jyek Juaŋ jyeka wonkɛn jyeka pwadin neeni. Ɔci ɔɔn balgɔn poŋɔn gɔkɔn agi kan ɔɔn tuudɔn te kanŋa neeniyɛ, baatɔ. A ɔɔn aŋka ŋeeddɛ ɛkkɛ ɔɔn anɔn ɛkkɛ ne tolan awarɛ. ⁹ Modg ɔɔn, dala ɛkkɛ ñingɔ ñiektɛ te kanŋa kanŋɔn ɔɔn ban ɛkkiy. Ɔci te kanŋa neeniyɛ, taab dɔɔkkin ɔɔn waakɔti acaan ɔɔn balgɔn kanŋɔn te ween jiñɛ ɔci te oŋ jiñɛ aŋka ɔɔn yɔɔrdɔn waka amdɔn ɔɔn. Ɔɔn balgɔn loṭɔn ɛkkɛ te jyeka wonkɛn jyeka pwadin, ɔci ɔɔn buagɔn naa coodi ɔɔn ban ɛkkɛ wanna bɛya ɛkkɛti a taab bɛɛ. ¹⁰ Ɛkkɛ ɔɔn yuarŋɔntɔ ne ɔɔn balgɔn ciyɔn a ɔkiy. Ɔci coodda ciyin ɔɔn neeniyɛ, ŋeejɛ Juaŋ daŋkun. Naŋki ɔɔn pwad pwad ɛkkɛti maka jyeti Juaŋti neeni. Gena yaayan gɛɛl bala ɔɔn ḍɔɔggɔti bɛɛ. ¹¹ Ɛkkɛ ɔɔn ŋeejɔntɔ ne ɔɔn balgɔn ṭeyɔn ɛkkɛ waakɔ waakiday, bala ba kɛɛgin weegɛn ne ṭeyi kɛɛgin waakɛny. ¹² Ɛkkɛ muonɛ Juaŋ bora, ɔci aŋŋɛ ma ɛkɛ, ɔci acaan a ɔŋŋiyɛ, ɔɔn cyeŋɔn ɛkkɛ aŋka dala ɛkkɛ ciedɛ ba coodda ɛkɛ yomɛ ñɔyɛy. ¹³ Ɔɔn gɔkɔn a pwatcin Juaŋti oŋkanda te ɛkkɛ, acaan ne ɛkkɛ tieŋnɛ jyek Juaŋ te tuk ɔɔntiyɛ, ɛkkɛ jyeka neeni muŋŋɛ, ɔci ɛkkɛ gɔŋnɛ agi jyeka neeniyɛ, a jyek ma baan budan bɛɛ. Gena jyek Jwaŋa Tolan. Awarɛ, jyeka neeniyɛ, ɛkkɛn a jyek Jwaŋa Tolan, ɔci jyeka neeni bala kanŋan ɛkkɛ yomgɔti acaan ɛkkɛ jyettɛ Juaŋti doki. ¹⁴ Hay! Ɛkkɛ modg ɔɔn, taab bɛɛn ɛkkɛti te ma ɛkkɛti neeni bala ba taab bɛɛn ma kaniicanti ban Yahuudiya ne Ma Yahuud ma ɛkkɛn woodgɛn balki noŋki ne yaayan ɛkkɛntiy. ¹⁵ Ma Yahuudyɛ, ne ɛkkɛn maka a bɔwan Jwaŋa Tolan ban ɛkkɛn nokkitiyɛ, ɛkkɛn oŋ Yaccu Kiṭɔ nogɛ moki. Ɔci ɛkkɛnyɛ, ɔɔn ŋualkɔn ɔntɔ te bonk ɛkkɛnti. Maka neeniyɛ, ɛkkɛn yookɔn te Jwaŋa Tolan, ɔci yookɔn te ma baan waakɛnda moki. ¹⁶ Ma Yahuud, ɛkkɛn dɛyi ɔɔn agi naa ɔɔn lorcɔn Keedin Pookɛn te jyek Yaccu bɛɛ. Ɛkkɛn buagɔn naa Keedin Pookɛn neeni yɔɔdɛ Juaŋ bɛɛ. Nɔji ɛkkɛn tola gɔ moki toli ɔɔn, ɔci acca toli doki, ɔci a ɔɔnyɛ, bala ba ywobji Jwaŋa Tolan bɛɛn ɛkkɛn ḍɔɔggɛnti doki. ¹⁷ Modg ɔɔn, te ninka ne ḍiɛkan neeniyɛ, ikin balkin iki ɔɔn bɛɛ. Yeti te paŋi ɔɔnyɛ, bala ba ne ikin balkin iki ɔɔn doki no. Ɔɔn ñingɔ boŋi te ɛkkɛ, ɔɔn buagɔn ikin yɔɔrtin iki ɔɔn. Ɔɔn noŋɔn bɛɛdɔn ḍieŋdɔn ɛkkɛti, ¹⁸ yeti pɔya ɔɔn bɛɛdɔn ḍieŋdɔn ɛkkɛti neeni ga bala bɛɛ. Pɔya neeniyɛ, uullɛ Jwaŋa Yaayan. Ɔci ‘ya Buuluc neeniyɛ, ‘ya baal poc te jyek woon oŋkanda paru, yeti pɔy baawo. ¹⁹ Hay! Oŋŋa Ciɛggɔn ikin Yaccu bɛɛdiyɛ, ɔɔn yomgɔ ñɔɔgdi ɛkɛ ñamɛti te gena yeti? Ɛɛ, ɔɔn yomgɔ ñɔɔgdi ɛkɛ ñamɛti te ɛkkɛ. ²⁰ Acaan ɛkkɛ agɛ maka ɔɔn yomgɔ ñɔɔki oŋkanday.

¹ Ɔci ne ɔɔn ñingɔ bokki ne pɛñanyɛ, ɔɔn jiek naŋŋɔn ka dala mod ikin Timutawuc, ɛkɛ aŋka bɛya ban ɛkkɛ, ɔci ɔɔn aŋka yaddɔn pookɔ te ban Atɛnicji. Ɛkɛ bɛɛn ɛkkɛti ɔci dɔɔkkin wɛnni acca doki. Timutawuc neeniyɛ, ɛkɛ bala kanŋin iki ɔɔn te jyek Kiṭɔ. Ɛkɛ cuondɔn ɔɔn ɛkkɛti aŋka dala ɛkɛ ɛkkɛ ṭeediyɔ aŋka ɛkkɛ yɔɔddɛ ne tɛyan te jyenna ɛkkɛ jyettɛ Kiṭɔti neeni. ³ Yeti taab ɛkkɛ bala acca tolcin te naŋka noŋki ma ne yaayan ɛkkɛti wanna, ɔci ɔɔn buagɔn naa men gɛɛl ɛkkɛti dɔɔdi ŋoyɔ jyeni ɛkɛ daldɛ bɛɛ. Dala ŋeeddɛ ɛkkɛ Ma Kiṭɔ waakɛnda ɛkkɛn balki taab a ɔɔn daŋkun. ⁴ Ne ikin balkin iki ɔɔnyɛ, ɛkkɛ myetkɛ ɔɔn doki ka taab bala bɛya, ɔci ŋeejɛ ɛkkɛ taab bɛɛn doki ba jyeka guaŋŋɔn ɔɔn ɛkkɛti te ñamu neeni. ⁵ Ɔci bala ba ‘ya gɔkkan doki ka ne ɔɔn ñingɔ bokki te ɛkkɛ ne pɛñanyɛ, ‘ya Timutawuc cuoññan ɛkkɛti, acaan ‘ya buaga tieŋŋa te coodi ɛkkɛ te jyek Jwaŋa Tolan ne coodi ɛkkɛ baali a ɔkiy. ‘Ya buay ‘ya baal poŋ ka ɛkkɛ maaldɛ Jwaŋa Yaayan mena mooṭi ma neeni dita. Ɔci ‘ya poŋ gɔk ka dita kanŋa ɔɔn aga kanŋa budan dita. ⁶ Ɔci Timutawuc, bɛɛn wɛnni dɔɔkkin nona ɔɔnti doki. Ɔci ɛkɛ ɔɔn eeŋnɔn jyeka pwadin te jyek jyenna ɛkkɛ jyettɛ Juaŋti, ɔci te jyek anna ɛkkɛ anɛ may. Ɛkɛ gɔki agi ɛkkɛ baljɛ poŋjɛ te ɔɔn daŋkun. Ɔci ɛkɛ gɔki moki agi ɛkkɛ ñingɔ boŋŋɔ te ɔɔn daŋkun ba ɔɔn ne ñingɔ bokki te ɛkkɛ ɔɔn daŋkuny. ⁷ Hay! Modg ɔɔn, taab ɔɔn tol tolo. Yeti te jyeka oonɛ Timutawuc te jyenna ɛkkɛ jyettɛ ne pwadan neeniyɛ, ɔɔn yomgɔ pwani doki. ⁸ Ɛɛ, kan ɛkkɛ yɔɔddɛ ne tɛyan te jyek Ciɛggɔn ikin a ɔɔnyɛ, a ɔɔn pwad pwad ɔɔnti ne tolan, ɔɔn yomgɔ noki waakɛn te genga moki bɛɛ. ⁹ ’Ya gɔkca Juaŋti a pwatcin te ɛkkɛ a ɔki yeti? Acaan ɔɔn yomgɔ ñɔɔna ñɔɔn te ɛkkɛ Juaŋ ñamɛti. ¹⁰ Oŋkandayɛ, ɔɔn balgɔn cɔkɔn Juaŋti te ɛkkɛ ne tolan. Ɔɔn cɔkɔn Juaŋti te oŋ jiñɛ a ñaccu, ɔci te ween jiñɛ a ñaccu. Acaan ɔɔn buagɔn dala ikin yɔɔrtin iki ɔɔn, kan jyeka tɛyan gɛɛg balayɛ, ɔci ɛkkɛ makti ɔɔn aŋka jyeni ɛkkɛ ‘uotti ñamu. ¹¹ Wey ikin waanɛ Jwaŋa Tolan, ɔci Ciɛggɔn ikin Yaccuyɛ, dala ɛkkɛn ɔɔn pɔktɔn pɔy aŋka ɔɔn bɛɛdɔn ɛkkɛti. ¹² Dala ɛkkɛ magdɛ Juaŋ aŋka ɛkkɛ oondɛ yɔtin pookɔ ne tolan, ɔci moki dala ɛkkɛ andɛ ma waakɛnda daŋkun bala ba anna ɔɔn anɔn ɛkkɛ neeni daŋkun ɔɔn. ¹³ Ɔci te naŋka neeniyɛ, dala nɔji baaw ɛkkɛti, ɔci ɛkkɛ pwaddɛ te naŋki Jwaŋa Tolan. Dala ɛkkɛ yomgɔ tɛya te naŋki Juaŋ ɛkkɛti aŋka ne oŋŋa Yaccu bɛɛti iki ma ɛkɛyɛ, ɛkkɛ yaaktɛti yɔɔddɛ ne pwadan Wey ikin Jwaŋa Tolan ñamɛti.

¹ Yɔɔddɛ, ‘ya gɔkka ‘wota hay! Modg ɔɔn, ɔɔn ṭeyɔn ɛkkɛ ne tolan te jwali gɛɛl te yenti Yaccu Kiṭɔ. Ɛkkɛ lalkɛ ɔɔn te coodda pwadan coodi Jwaŋa Tolan. Ɔci ɛkkɛ balgɛ ciyɛ a ɔɔn, ɔci ɔɔn gɔkɔn ɛkkɛti ka dala ɛkkɛ ‘uottɛ ñamu gɔ moki ‘uoccɛ ñamu ɔɔn te coodi Juaŋo. ² Jyeka ɛkkɛ myetkɛ ɔɔn te yenti Ciɛggɔn ikin Yaccuyɛ, ŋeejɛ ɛkkɛ. ³ Jwaŋa Tolan buagɔn agi dala ɛkkɛ ciejjɛ budan te nɔjjo. Ɔci moki agi dala ma mwondɔ te naŋki tomi waakcinda. ⁴ Maka ‘uayo, Jwaŋa Tolan buagɔn dala ɛkkɛ woŋgɔ tiittɛ te naŋki ɛkkɛ, menga da ciya ɛŋ ɛkɛ aŋka tiidɛyɔ ne pwadan. ⁵ Ɛkkɛ ‘wonnɛ Juaŋ waak ɛkkɛ aŋka ɛkkɛ noŋɛ tomi bɛɛ. Maka jyek Juaŋ kwoyɔn, maka kɛɛna pookɛnyɛ, ɛkkɛn aŋka noŋi tommo, yeti ɛkkɛyɛ, naa ɛkkɛ noŋdɛ ba naŋki ɛkkɛn neeni bɛɛ. ⁶ Naa men gɛɛl noŋdi ne yaayan ɛŋ moodɛnti bɛɛ. Kan men gɛɛl noŋdi ne yaayan ɛŋ moodɛntiyɛ, bala ba ɛkɛ noŋi ne yaayan mod ɛkkɛnti doki. Ɛkkɛ myetkɛ ɔɔn doki, ɔci moki ɛkkɛ ṭeekɛ ɔɔn te ñamu ka maka noŋi ba naŋka neeniyɛ, ywobji Juaŋ bɛya ɛkkɛn wyetkɛnti ne tolan. ⁷ Ɛɛ, gɔṭṭɛ, ikin muonin Juaŋ bora aŋka noŋin tomi bɛɛ. Yeti ikin muonin ɛkɛ bora aŋka ikin cietin ne pwadan ɛkɛti. ⁸ Kan men gɛɛl yookɔn warɛ te tiid jyeka neeniyɛ, gena jyek men baan ɛkɛ yookiti warɛ wanna bɛɛ. Gena Jwaŋa Tolan ɛkɛ yookiti warɛ wanna. Jwaŋa Tolan neeniyɛ, gena ɛkɛ ‘woñi ɛkkɛ te Boŋ ɛkɛ, Boŋa Pwadan neeni. ⁹ Yeti te jyek oonnin Ma Kiṭɔ oonnin labjɛ baaw neeniyɛ, men gɛɛl ɛkkɛ kiegdɛ worga te jyek oonnin yɔtin neeni moki bɛɛ, acaan ɛkkɛ lallɛ Juaŋ te jyek oonnin yɔtin neeni doki. ¹⁰ Ɔci moki ɛkkɛ anɛ Ma Kiṭɔ modga ban ɛkkɛ ban Macɛdɔɔnya waakɛnda baan konɛ warda. Ɔɔn ṭeyɔn ɛkkɛ ka dala ɛkkɛ ‘uottɛ ñamu ne tolan te ani ɛkkɛ a ‘uoccin gɔ moki ‘uoccɛ ñamu ɔɔn. ¹¹ Dala ɛkkɛ ciedɛ ne pwadan. Ɔci dala ɛkkɛ woŋgɔ tiittɛ te naŋki waak ɛkkɛ. Ɔci dala ɛkkɛ kandɛ te byeŋkɔ menga da te ḍwaŋ ɛkɛ ba jyeka ɛkkɛ ṭeeki ɔɔn te ñamu neeni. ¹² Ɔci a ɔɔnyɛ, naŋki ɛkkɛ pwada maka ciyi budan te jyek Jwaŋa Tolan ñomgɛnti. Ɔci moki te kanŋa ɛkkɛ neeniyɛ, ɛkkɛ buagɛ ñwoyɛ maka pookɛn waakɛn te waak gɛɛg moki bɛɛ. ¹³ Acca hay! Modg ɔɔn, ɔɔn buagɔn dala jyek Ma Kiṭɔ maka tuwa ŋeeddɛ ɛkkɛ ne pwadan. Acaan ɔɔn buagɔn naa ɛkkɛ yomgɔ yiegdi kuuyɛ ba maka pookɛn bɛɛ. Ɛkkɛn yaakinti jyeti kɛɛy naŋka pwadin naŋka bɛya ɛkkɛnti ne ŋoyɔ neeni bɛɛ. ¹⁴ Ɛɛ, ikin jyettin jiek agi Yaccu tuunɔ ɔci jɔŋnɔ ñaalɔ te koolji tɛɛti moki. Ɔci ba naŋki ɛkɛ neeniyɛ, ikin yaakinti jyettin moki agi Ma Kiṭɔ ɛkkɛn luoldɛ Juaŋ ñaalɔ te kolk jitin te naŋki Yaccu neeni ne oŋŋa ɛkɛ bɛɛdɛy. ¹⁵ Ɛkkɛ myetkɛ ɔɔn te jyek Ciɛggɔn ikin ka ikin maka ciyi tɛɛti men neeniyɛ, ne oŋŋa Ciɛggɔn bɛɛdiyɛ, ikin bottin ñamu kooktin i ɛkɛ ñamu te maka tuun neeni bɛɛ. A’a, ikin oottin iki ɛkkɛn a cyɛɛlɔ. ¹⁶ Ne malɛɛka tolan gɛɛl yaaddi te pwana tolanyɛ, ɔci Jwaŋa Tolan kuotti ṭuoŋ oŋi ne cyɛɛlɔ, acaan Ciɛggɔn ikin koodi iñɔ te pɔliji. Ɔci Ma Kiṭɔ maka tuunyɛ, ɛkkɛn jɔldi ñaalɔ te kolk jitin tɛɛti moki. ¹⁷ Ɔci ikin maka tɛɛtin baanji ṭɛɛrji wɛnniyɛ, ikin oŋ oottin ñaalɔ oŋ iki maka jɔŋdi ñaalɔ te lienti neeniy, ɔci ikin waakida oottin pɔliji, ɔci kooktin iki Ciɛggɔn pɔliji. Ɔci ikin cietin iki ɛkɛ yuonginda ɔɔn. ¹⁸ Acaan a ɔŋŋiyɛ, ne ma ɛkkɛ tuutiyɛ, dala ɛkkɛ poŋdɛ te jyeka neeni, ɔci dala ɛkkɛ muondɛ jitin pookɔ te joono.

¹ Gɔṭṭɛ modg ɔɔn, jiek ŋeejɛ ɛkkɛ doki, a ɔŋŋiyɛ, men gɛɛl yaakinti kiedi worga ɛkkɛti aŋka ɛkkɛ myettɛ te oŋŋa Ciɛggɔn ikin bɛɛdi moki bɛɛ. ² Çeejɛ ɛkkɛ ne Oŋŋa ɛkɛ bɛɛdiyɛ, ɛkɛ bɛya lieda ba mena ɛɛn ɔɔn. ³ Maka pookɛnyɛ, ɛkkɛn tieki gɔki agi haldu, gena yaayɔ gɛɛl bɛɛdɔ ɛkkɛnti bɛɛ. Ɔci ne ɛkkɛn balki poŋki ba paŋŋa wanna men ɔɔnyɛ, Yaccu bɛya dɛndi bora ne pɛñan lieda ɔɔn. Ɔci ywobji Jwaŋa Tolan bɛya ɛkkɛnti ɛkkɛn yuurdɛ ñin, ɔci pɔya yooŋti ɛkkɛn ɔntɔ gɛɛl bala moki bɛɛ. Bala ba ɛɛŋ ne amɛ jiediyɛ, kaci bɛya ne pɛñan te wɔɔka kwoyi ɛkɛ, ɔci pɔya ɛkɛ tuoci warɛ te jiedi gɔ bala bɛɛ. ⁴ Modg ɔɔn, ɛkkɛ balgɛ nona mielti ba maka pookɛn neeni bɛɛ. Ɔci ne oŋŋa Yaccu bɛɛdiyɛ, ɛkkɛ poddɛ ba ma ne potki te naŋki mena ɛɛn neeni bɛɛ. ⁵ Ɛkkɛ waakida agɛ maka ciyi te nona bɔwan. Ɛkkɛ jiek kwoyɛ bɛɛ. Ɛkkɛ jiek ŋeejɛ. Ikinyɛ, akin maka ciyi te nona ulan bɛɛ. ⁶ Ɔci acaan a ɔŋŋiyɛ, naa ikin cietin amaam ba coodi maka pookɛn bɛɛ. Dala ikin woŋgɔ tiittin oŋkanda te coodi ikin. ⁷ Maka wiciyɛ, ɛkkɛn wici te ween jiñɛ. Ɔci moki, maka noktan mooyyɛ, ɛkkɛn noktan mooy te ween jiñɛ. Ɔci ba jyek naŋka naŋtan ma te ween jiñɛ neeniyɛ, ɔci bala ba jyek coodda cieki maka jiek ŋeecɔn bɛɛy. Ɛkkɛn ciyi te nona ulan. ⁸ Ikinyɛ, aŋka akin maka ciyi te nona bɔwan. Ɔci acaan a ɔŋŋiyɛ, dala ikin jyettin Juaŋti ne pwadan oŋkanda. Ɔci dala ikin anin Juaŋ i ma baano. Ɔci kan ikin noŋtin a ɔɔnyɛ, jyeni ikin ikin kɛɛtin ñin ba maka ooddi lañti ne ecki kɔɔrjin ɛkkɛn byeŋkɛntiy. Ɔci moki dala ikin kɛɛttin naŋki mena yuoci ikiny. Ɔci ba jyek jyenna kɛɛyin ikin yɔɔt Juaŋ te Kiṭɔ neeniyɛ, bala ba taaggan a bilk ne balki maka noowɔ wyetkɛntiy. ⁹ Jyeka naŋŋɛ Jwaŋa Tolan te baaṭi gɔki agi ywobji bɛɛdɔ ikintɛ? A’a, a ɔɔn bɛɛ. Jyeka naŋŋɛ ɛkɛ te ikinyɛ, gɔki agi ikin yɔɔtinti ɛkɛ te naŋki Yaccu Kiṭɔ. ¹⁰ Yaccu Kiṭɔ neeni tuun te ikin, ɔci kan ikin ciyin tɛɛtin walla kan ikin tuuninyɛ, ikin balkin tɛɛtin iki ɛkɛ men ɔɔn. ¹¹ Ɔci ba ṭeena ɛkkɛ ṭeyɛ yɔtin pookɔ neeniyɛ, dala ɛkkɛ ṭeeddɛ yɔtin a ɔɔn oŋkanda aŋka ɛkkɛ yɔɔddɛ ne tɛyan ba naŋka naŋdɛ ɛkkɛ wanna ɔɔn. ¹² Modg ɔɔn, dala ɛkkɛ tieŋdɛ jyek maka wɛɛyi ɛkkɛ kaniicaji maka kanŋan ne tolan te ɛkkɛ neeni. Ɛkkɛn a cyekin ɛkkɛ te kanŋa Jwaŋa Tolan, ɔci ɛkkɛn ṭeyi ɛkkɛ. ¹³ Dala ɛkkɛ anɛ ɛkkɛn ne tolan te kanŋa ɛkkɛn neeni. Dala ɛkkɛ ciedɛ ne pwadan. Naa ɛkkɛ yoyyɛ ñin bɛɛ. ¹⁴ Gɔṭṭɛ hay! Modg ɔɔn, ɔɔn ṭeyɔn ɛkkɛ kan men gɛɛl ɛkkɛti warɛ pɛñcin te kanŋa waakyɛ, dala ɛkkɛ ɛkɛ ṭeedɛ wyeñɛti. Dala ɛkkɛ maka buayi ciŋdɛji aŋka ɛkkɛn yomgɛn tɛya, ɔci dala ɛkkɛ maka waakɛn koyan magdɛ yomgɛnti te jieko, ɔci dala ɛkkɛ yomgɔ tiektɛ mati waakɛnda. ¹⁵ Kan men gɛɛl noŋdi ne yaayan ɛkkɛtiyɛ, naa ɛkkɛ noŋdɛ ne yaayan ɛkɛti bɛɛ. Dala ɛkkɛ aŋka noŋdɛ ne pwadan gena ɛkɛti. Dala ɛkkɛ moowɛ yɔtin ne pwadan oŋkanda, ɔci dala ɛkkɛ noŋdɛ ne pwadan mati waakɛnda. ¹⁶ Dala ɛkkɛ yomgɔ ñɔɔna ñɔɔn oŋkanda ɔɔn. ¹⁷ Dala ɛkkɛ cɔktɛ Jwaŋa Tolanti a ñaccu. ¹⁸ Dala ɛkkɛ gɔktɛ a pwatcin Juaŋti oŋkanda te jiek waakɛnda, acaan maka bala Yaccutiyɛ, Juaŋ buagɔn dala ɛkkɛn noŋdi a ɔɔn. ¹⁹ Naa ɛkkɛ kɛkɛ Boŋ Jwaŋa Tolan bɛɛ. ²⁰ Naa ɛkkɛ gɔkɛ agi jyek maka lwoki ma te jyeka bɛya te Juaŋti neeni a jyeka budan bɛɛ. ²¹ Dala ɛkkɛ pottɛ gɔrtɛ jyeka neeni ne pwadan ne jyeka neeni balki ba jyek Juaŋ awarɛ boki no. Ɔci dala ɛkkɛ jyeka pwadin neeni mugdɛ ɛkkɛ yomgɔti. ²² Ɔci dala ɛkkɛ yooktɛ te jyeka yeyin waakɛnda. ²³ Jwaŋa Tolan waanɛ, mena ‘woñi ma te coodi pwaniyɛ, dala ɛkɛ noŋdi naŋki ɛkɛ ɛkkɛti aŋka ɛkkɛ pwaddɛ. Dala Juaŋ waak ɛkkɛ ɔci paŋi ɛkkɛ ɔci yomg ɛkkɛ moki gwaldɛ ɛkɛ ne pwadan ne oŋŋa Ciɛggɔn ikin Yaccu Kiṭɔ bɛɛdi ɔɔn. Ɔci ne oŋŋa ɛkɛ bɛɛdiyɛ, dala ɛkkɛ mɔktɛ ɛkɛ ciyɛ ne pwadan. ²⁴ Jwaŋa Tolan mena ɛkkɛ bornɛ aŋka agdɛ kɛɛgin ɛkɛ neeniyɛ, ɛkɛ a mena tieci jyek ɛkɛ jitkɛn ne pwadan. Ɔci ɛkkɛ gwaldɛ ɛkɛ ne pwadan awarɛ ba jyeka ḍuaññɛ ɛkɛy. ²⁵ Modg ɔɔn, dala ɛkkɛ cɔktɛ Juaŋti te ɔɔn. ²⁶ Dala ɛkkɛ modg ikin ñiibdɛ waakɛnda. ²⁷ ’Ya gɔk ɛkkɛti te yenti Ciɛggɔn ikin ka dala ɛkkɛ worga neeni pagdɛ modg ikinti waakɛnda. ²⁸ Dala Ciɛggɔn ikin Yaccu Kiṭɔ yomɛ pwada a pwani ɛkkɛti oŋkanda.