1Butruc

¹ Gena ‘ya Butruc Cuuda Yaccu Kiṭɔ kiewan worga ɛkkɛti neeni. Ɛkkɛ agɛ Ma Kiṭɔ Ma Yahuud maka bala ciyi a wɛlg bonka pookɛn neeni jitiny. Gena ban Buntɔc, ɔci ban Galatiya, ɔci ban Kapadociiya, ɔci ban Ecya, ɔci ban Bitinnya. ² Ne ɛkkɛ baagɛ menyɛ, ɛkkɛ ŋeejɛ Wey ɔɔn Jwaŋa Tolan doki, ɔci ɛkkɛ muonɛ ɛkɛ bora. Jwaŋa Tolan ɛkkɛ ywaŋŋɛyɔ yomgɔti doki te Boŋ ɛkɛ. Acaan ɛkɛ buagɔn dala ɛkkɛ noŋdɛ ba jyek Yaccu Kiṭɔ oŋkanda, ɔci dala yimg Yaccu ɛkkɛ ywaŋtɛ yomgɔti te nɔji ɛkkɛ. Dala Jwaŋa Tolan yomɛ pwada pwani ɛkkɛti oŋkanda, ɔci dala ɛkɛ ɛkkɛ ‘wondɛ coodi pwanno. ³ Jwaŋa Tolan Jwaŋ Ciɛggɔn ikin Yaccu Kiṭɔ, ɔci Wey Ciɛggɔn ikin Yaccu Kiṭɔyɛ, ɛkɛ pwad pwado. Ɛkɛ yomɛ pɔŋnɛ ikinti ne tolan. Ɔci ikin jiennin ɛkɛ te jiedda woonɛ. A ɔɔnyɛ, ikin jyettin kɛɛyin naŋki Juaŋ naŋka bɛya ikinti a naŋka pwadin neeni. Ikin yaakinti kɛɛyin a ɔɔn acaan Yaccu Kiṭɔ jɔŋŋin ñaalɔ te koolji tɛɛti moki, ɔci ɛkɛ lien buannɛ. ⁴ Ɔci ba naŋki ma baan ne maal baali weegɛntiyɛ, ɔci ɛkɛ kɛɛgin wɛɛddɛ maalo, ɔci bala ba naŋki Juaŋ daŋkun. Mala ma ‘wondɛ ɛkɛyɛ, ɛkkɛn bala ñaalɔ pɔliji daŋkun. Ɛkkɛn ḍuannɛ Juaŋ te ɛkkɛ. Mala aŋan neeni baadi ywongati bɛɛ. Ɛkkɛn yiegdi bɛɛ, ɔci ɛkkɛn aga donk bɛɛ. ⁵ Te jyenna ɛkkɛ jyettɛ Juaŋti neeniyɛ, Jwaŋa Tolan bala yuoci ɛkkɛ oŋkanda te war tɛɛn ɛkɛ. Ɔci ɛkkɛ yɔɔdɛ ɛkɛ oŋkanda ne oŋŋa Yaccu Kiṭɔ bɛɛdi ɔɔn. Ɔci ne oŋŋa ookti bɛya ne ŋoyɔyɛ, Yaccu Kiṭɔ bɛya, ɔci jyek yɔɔd baadi doki, ɔci ɛkkɛ dɛttɛ coodda pwadan doki. ⁶ Acaan a ɔŋŋiyɛ, ɛkkɛ yaakɛti ciyɛ te yoma ñɔyan acca ne taabn balki ɛkkɛti ɔɔn. Taabn neeniyɛ, jitkɛn a ḍiɛkan bɛɛ. Yeti taab neeni bala oŋkanda bɛɛ, ɛkkɛ yomgɔ yiegdi te taab neeni wɔɔka ne ḍuulan ṭɔɔlɛ budan. ⁷ Taab bala ɛkkɛti neeni poci jyeni ɛkkɛ a poccin, ne jyeni ɛkkɛ agi jyenna awarɛ boki no. Ɔci naŋka neeni bala ba ma ne pocki dahaby. Dahab piɛltan ma maccu aŋka ɛkkɛn gɔrti ne ɛkɛ pwadi awarɛ boki no. Dahab ɛkɛ a gena iñɔ ṭɛɛrji wɛnni budan, ɔci jyeni ɛkkɛyɛ, ɛkɛ aŋka pwatcin ne tolan nɔñji Juaŋti te dahab. Yeti bala a ɔɔn daŋkun, Juaŋ poci jyeni ɛkkɛ te taab neeni. Ɔci a ɔɔnyɛ, ne oŋŋa Yaccu Kiṭɔ bɛɛdiyɛ, jyeka pwadin bɛya ɛkkɛti, ɔci ɛkɛ jieddi ɛkkɛ ɔci ɛkɛ andi ɛkkɛ, ɔci ɛkkɛ naŋdɛ ɛkɛ pwaddɛ a pwadgin. ⁸ Yaccu yuarŋɛ ɛkkɛ ne ɛkɛ baali iñɔ ṭɛɛrji wɛnni bɛɛ, yeti ɛkkɛ anɛ ɛkɛ ne tolan. Yeti ɛkkɛ ɛkɛ yuartɛ te woŋgɔ acca bɛɛ, yeti ɛkkɛ jyettɛ ɛkɛti men ɔɔn. Ɔci acaan a ɔŋŋiyɛ, ɛkkɛ yomgɔ ñɔɔna ñɔɔn ne tolan te yom ñɔɔna menga yaakinti konɛ gɔɔdɛ bora ne pwadan bɛɛ neeni. ⁹ Ɛkkɛ yomgɔ ñɔyɔ a ɔɔn acaan ɛkkɛ jyettɛ te baaṭi doki agi ɛkkɛ yɔɔdɛ Yaccu, ɔci acca ɛkɛ yuarnɛ ɛkkɛ ne ɛkɛ baali yuoci ɛkkɛ dokiy. ¹⁰ Maka a bɔwan bala gɔki te baaṭi te jyek yɔɔta yuoci Juaŋ ɛkkɛy. Ɛkkɛn ma myetkɛ agi Juaŋ ɛkkɛ ‘wondɛti yom pwanno. Ɛkkɛn bala poŋi te jyeka neeni, ɔci bala tooci agi ma yɔɔdda Juaŋ te pɔya bɛ? ¹¹ Boŋ Yaccu Kiṭɔ bala gɔki ɛkkɛn yomgɛnti te Kiṭɔ agi ne ɛkɛ bɛɛdiyɛ, taab ɛkɛ bala. Ɔci ne taab baadiyɛ, naŋka pwadin oŋ bɛya oŋo. Ɔci bɔwan neeni bala tooci te jyek Kiṭɔ mena bɛya yuoci ma neeni agi ɛkta agi menɛ katan, ɔci ɛkkɛn bala tooci agi ɛkta bɛɛdɔ ne tua? ¹² Ɔci jiek lɛɛlnɛ Juaŋ bora maka bɔwan neeniti, agi naŋka neeni bɛya ne cwakanti ɛkkɛnti bɛɛ, yeti agi bɛɛdɔ ne baaṭi te yuonga ciyɛ ɛkkɛ neeni. Ɔci acca jyeka neeni bɛɛn bora ne pwadan. Ɛkkɛ lalkɛ ma te jyeka wonkɛn jyeka pwadin neeni. Ɛkkɛn ɛkkɛ lalkɛ te war tɛɛn Boŋ Juaŋo. War tɛɛn Boŋ Juaŋ cuonnɛ Juaŋ ɛkkɛnti te ñaalɔ pɔliji. Ɔci acca jyek yɔɔd Juaŋ ŋeejɛ ɛkkɛ ne pwadan. Malɛɛkanyɛ, ɛkkɛn buagɔn yɔɔta neeni jiñɛ yuartan daŋkun. ¹³ Acaan a ɔŋŋiyɛ, dala ɛkkɛ woŋgɔ tiittɛ te paŋŋa paŋdɛ ɛkkɛ oŋkanday. Dala ɛkkɛ waakɔ tiidɛ ne pwadan aŋka ɛkkɛ noŋɛ kanŋa Juaŋti. Dala ɛkkɛ poŋdɛ oŋkanda te jyek naŋka naŋdɛ Yaccu Kiṭɔ ɛkkɛti, ne oŋŋa ɛkɛ bɛɛdi ɔɔn. Naŋki ɛkɛ naŋka pwadan neeniyɛ, naŋdɛ ɛkɛ te yom ɛkɛ parɛ yoma bɔwan. ¹⁴ Dala ɛkkɛ noŋdɛ ba jyek Jwaŋa Tolan acaan ɛkkɛ agɛ kɛɛgin ɛkɛ woodgɛn. Naa ɛkkɛ moki noŋdɛ ba naŋka yeyin naŋka yomg ɛkkɛ buagɛ te baaṭi ne wona ɛkkɛ men Juaŋ kwoyɛ wanna bɛɛ. Te ñamu ne Juaŋ ŋeejɛ ɛkkɛ men bɛɛyɛ, ɛkkɛ balgɛ noŋɛ naŋka yeyin naŋka yomg ɛkkɛ buagɛ ne tolan te baaṭi neeni. ¹⁵ Jwaŋa Tolan mena ɛkkɛ bornɛ neeniyɛ, ɛkɛ da parɛ. Ɛkɛ pwad pwado. Ɔci acaan a ɔŋŋiyɛ, dala naŋki ɛkkɛ pwadɔ oŋkanda daŋkun. ¹⁶ A ɔɔn bala ba jyeka kiigin ne gɔkki agi, “Acaan ‘ya pwadyɛ, dala ɛkkɛ daŋkun pwaddɛ.” ¹⁷ Oŋkanda ne ɛkkɛ balgɛ cɔkɛ Juaŋtiyɛ, ɛkkɛ boṭɛ ɛkɛ agi Wey ɛkkɛ, ɔci acca a ɔŋŋiyɛ, ne ɛkkɛ balgɛ ciyɛ ṭɛɛr wyeñɛti a ɔɔnyɛ, dala ɛkkɛ woŋgɔ tiittɛ ne pwadan te naŋki ɛkkɛ. Mena bardɛ ɛkkɛ a Wey ɛkkɛ neeniyɛ, ɛkɛ noŋdi godan ɛkkɛti, menga da te naŋki ɛkɛ, ɔci menga da te naŋki ɛkɛ. Ɛkɛ jiek gwaldɛ jitin ne pwadan waakɛnda. ¹⁸ Dala ɛkkɛ woŋgɔ tiittɛ te naŋki ɛkkɛ a ɔɔn acaan te baaṭi ɛkkɛ balgɛ noŋɛ ba ganuun yɔrg ɛkkɛ, ɔci ba naŋki yɔrg ɛkkɛ moki. Yeti ɛkkɛ koonɛ Juaŋ bora te naŋka budan neeniti. Ɛkkɛ wonnɛ Juaŋ bora te coodi yɔɔrti te bil pɔdda walla te dahab bɛɛ. Waka neeni baadi budan. ¹⁹ Ɛkkɛ wannɛ Juaŋ te yimg Kiṭɔ yimga pwadin. Ɛkɛ nogɛ ma te ikin bala ba kalŋ ṭɔɔlɛ pwadan Kalŋ ṭɔɔlɛ ‘yɛri ma te nɔjiy. Ɛkɛ bala ba kalŋa balkɛ gena yaayan gɛɛl warɛti bɛɛy. ²⁰ Jyek lyen Kiṭɔ neeniyɛ, naŋŋɛ Juaŋ te baaṭi ne ṭɛɛr baawi meny. Ɔci acca jyek ɛkɛ bɛɛn bora doki ne pwadan. Ɛkɛ warɛ lɛɛlnɛ bora ɛkkɛti doki te ninka ṭɛɛr noŋi wyeñɛ baldi neeni. ²¹ Te naŋki Kiṭɔ neeniyɛ, ɛkkɛ jyettɛ Jwaŋa Tolan mena ɛkɛ luolnɛ ñaalɔ te lienti ɔci ‘wonnɛ pwani neeni. Ɔci te naŋki ɛkɛ neeniyɛ, ɛkkɛ jyettɛ Juaŋti ɔci balgɛ kɛɛyɛ pwanna bɛya ne baaṭiy. ²² Ɛkkɛ noŋɛ ba jyek Juaŋ awarɛ. Ɔci acaan a ɔŋŋiyɛ, aŋka yomg ɛkkɛ pwatki te naŋka neeni wanna. Ɔci a ɔŋŋiyɛ, dala yomg ɛkkɛ pwadɔ modg ɛkkɛti. Dala ɛkkɛ andɛ ɛkkɛn ne tolan. ²³ Acaan ɛkkɛ jiennɛ Jwaŋa Tolan te jiedda woonɛ doki. Jiedi ɛkkɛ jiedda woonɛ neeniyɛ, ɛkkɛ aŋŋɛ maka wonkɛn. Jiedda neeniyɛ, a jiedi ma baan bɛɛ. Jiedda ma jiettiti ma te jiedi ma baanyɛ, ma baadi. Yeti jiedda ma jieddɛ Jwaŋa Tolanyɛ, ma baadi bɛɛ. Jyek Jwaŋa Tolan neeniyɛ, ɛkkɛn a jyeka tɛɛtki may. Ɔci jyeka neeni baadi ywongati bɛɛ. ²⁴ A ɔɔnyɛ, bala ba jyeka kiigin ne gɔkki agi, “Ma baan waakɛndayɛ, ɛkkɛn bala ba luom budan, ɔci ɛkkɛn pwanna pwani ba pɛɛppin luom jitin budan. Luomyɛ, iwa, ɔci pɛɛppin ḍɛɛmdi iñɔ. ²⁵ Yeti Jyek Jwaŋa Tolanyɛ, ɛkkɛn aŋka bala yuonginda ɔɔn.” Jyeka neeniyɛ, gena jyeka wonkɛn jyeka pwadin jyeka ɛkkɛ lalkɛ may.

¹ Acaan a ɔŋŋiyɛ, dala ɛkkɛ mwondɛ te yom yoñ waakɛnda, ɔci te jomi jiek waakɛnda, ɔci te naŋka noŋi ɛkkɛ ma ñingɛn waakɛnda, ɔci te kon moni waakɛnda, ɔci te waaŋi jiek waakɛnda. ² Ba bolji kɛɛgin jiettan ma wonkɛn ne ɛkkɛn buagiti aak ne pɛñanyɛ, dala ɛkkɛ daŋkun bwagdɛ jyek Juaŋ a ɔɔn, acaan jyek ɛkɛ neeniyɛ, pwadɔ. Gena yaayan gɛɛl bala ɛkkɛnti bɛɛ. Ɔci te jyeka neeniyɛ, ɛkkɛ ‘uottɛ ñamu te jyek yɔɔt Juaŋ yɔɔta ɛkɛ yuoci ma neeniy. ³ Ɛkkɛ dɛnnɛ jyek ɛkɛ doki. Ɔci ŋeejɛ ɛkkɛ Juaŋ pwad pwado. ⁴ Dala ɛkkɛ ortɛti Yaccuti. Ɛkɛ tɛɛti. Ɛkɛ bala ba guonan tuotan maka cɔti oorgy. Yeti ɛkɛ a mena muonɛ Juaŋ boray. Ɛkɛ pwad pwad Juaŋti ne tolan. ⁵ Ɔci ɛkkɛyɛ, ɛkkɛ balgɛ ba gwoyya cɔti Boŋ Juaŋ on Jwaŋa Tolany. Ɛkɛ buagɔn ɛkkɛ agdɛ gaciicin Jwaŋa Tolan ɔci noŋdɛ kanŋa gaciicin. Ɔci jwalla neeni kon ɛkɛ agi ɛkkɛ Juaŋ ‘wondɛ waka ‘yɛrdɛ ɛkkɛ a wak naŋki Boŋ Juaŋo. Juaŋ ‘wondɛ ɛkkɛ waka neeni te yenti Yaccu Kiṭɔ. Ɔci gena naŋka Juaŋ buagɛ wanna. ⁶ A ɔŋŋiyɛ, jyeka kiigin gɔki te Yaccu Kiṭɔ agi, “‘Ya guonan ḍuacca ban Urcaliimji. Gena guonan mwowwan ‘ya bora a guonan cɔtki ma on pwadany. Maka jyeddi guonan neenitiyɛ, ɛkkɛn lɔɔddi bɛɛ.” ⁷ Ɛkkɛ maka jyettɛ Yaccutiyɛ, Yaccu pwanna pwani ɛkkɛti. Yeti maka jyeti bɛɛyɛ, jyek Yaccu pwad pwad ɛkkɛnti bɛɛ. A ɔɔnyɛ, bala ba jyeka kiigin ne gɔkki agi, “Guonan guaktan maka cɔti oorg agi ɛkta yaayɔ neeniyɛ, agi ɛkta aŋŋɔ guonan pwadɔ on wardanti.” ⁸ Ɔci jyeka kiigin gɔki moki agi, “Guonan neeniyɛ, ɛkkɛn twordɛ awarɛ. Ɔci ma gɔkti agi ɛkta yaayɔ.” Ma twordɛ guonan neeni acaan ɛkkɛn jyek Yaccu Kiṭɔ tiitanyɔ bɛɛ. Ɔci te tworŋa ɛkkɛn twordɛ guonan a ɔɔnyɛ, bala ba jyeka naŋŋɛ Juaŋ te ɛkkɛn te baaṭi dokiy. ⁹ Yeti ɛkkɛ Ma Kiṭɔyɛ, ɛkkɛ muonɛ Juaŋ bora naŋŋɛ a kɛɛna ne cyɛɛlɔ. Ɛkkɛ agɛ gaciicin Mena Ciɛggɔn Tolan ñaalɔ. Kɛɛn ɛkkɛ da parɛ. Ɛkkɛ agɛ ma Jwaŋa Tolan woodgɛn. Ɛkkɛ muonɛ ɛkɛ bora a ɔɔn acaan ɛkɛ buagɔn dala ɛkkɛ maka pookɛn myettɛ te naŋka pwadin naŋki mena ɛkkɛ bornɛ neeni. Ɛkkɛ oonɛ ɛkɛ bora te nona mielti. Ɔci acca ɛkkɛ ciyɛ non ɛkɛ nona bɔwan ne yaajan neeniti. ¹⁰ Te ñamuyɛ, ɛkkɛ agɛ maka budan, ɔci acca ɛkkɛ aŋŋɛ ma Jwaŋa Tolan. Te ñamu yom pɔkkin Juaŋ ŋeejɛ ɛkkɛ bɛɛ. Yeti acca yom pɔkkin ɛkɛ ŋeejɛ ɛkkɛ doki. ¹¹ Maka ana ‘yay, ɛkkɛ balgɛ ciyɛ acca iñɔ baanji wɛnni ba maka wɛlgo! Dala ɛkkɛ yooktɛ te naŋki maka pookɛn ne ɛkkɛn noŋki ba naŋka yomg ɛkkɛn buagiti noŋti ne pɛñany. Naŋka neeniyɛ, ma yomgɛn lɛɛktan te ɛkkɛn. ¹² Dala ɛkkɛ ciedɛ ne pwadan bonk maka ciyi budan jyek Juaŋ kuokɔn neeni jitin. Ɔci kan ɛkkɛn wooki ɛkkɛ ne pɛñan agi naŋki ɛkkɛ yiegɔyɛ, dala naŋki ɛkkɛ naŋka pwadan yuartan ɛkkɛn te woŋgɛn, ɔci a ɔɔnyɛ, ne oŋŋa godan Jwaŋa Tolan bɛɛdiyɛ, ɛkkɛn jieddi Juaŋo. ¹³ Acaan ne ɛkkɛ agɛ Ma Kiṭɔyɛ, dala ɛkkɛ tieŋdɛ jyek maka naŋɛ ma a maka ḍwaŋin akuumati neeni waakɛnda. Dala ɛkkɛ noŋdɛ ba jyek ḍuaŋa akuuma ḍuaŋa tolan, acaan ɛkɛ bala ñamu te ma akuuma waakɛnda. ¹⁴ Ɔci maka ḍuaŋan ṭɔlgɛnyɛ, dala ɛkkɛ noŋdɛ ba jyek ɛkkɛn daŋkun. Ḍuaŋan ṭɔlgɛnyɛ, ɛkkɛn cundɛ ḍuaŋa tolan bonk jitin aŋka goddan maka naŋki yeyiny. Ɔci maka naŋki ɛkkɛn pwadinyɛ, ḍuaŋan ṭɔlgɛn gɔkti ne pwadan ɛkkɛnti. ¹⁵ Jwaŋa Tolan buagɔn ɛkkɛ noŋdɛ ne pwadan oŋkanda. Ɔci a ɔŋŋiyɛ, maka wooki ɛkkɛ amaam maka jiek kwoyɔn neeniyɛ, ɛkkɛn yaakinti gɔkti genga ɛkkɛti moki bɛɛ. ¹⁶ Dala ɛkkɛ ciyɛ ba maka pɔŋnɛ Juaŋy, naa ɛkkɛ poŋɛ gɔkɛ agi ɛkkɛ pɔŋnɛ Juaŋ aŋka ɛkkɛ noŋdɛ ba yomg ɛkkɛ budan pookɔ bɛɛ. Ɛkkɛ agɛ kɛɛnk Juaŋo. Dala ɛkkɛ noŋdɛ ba jyek ɛkɛ. ¹⁷ Dala ɛkkɛ andɛ ma waakɛnda. Dala ɛkkɛ andɛ modg ɛkkɛ Ma Kiṭɔ. Dala ɛkkɛ buattɛ Jwaŋa Tolan. Ɔci dala moki ɛkkɛ buattɛ ḍuaŋa ɛkkɛ ḍuaŋa tolan ma Ḍɔɔm neeni. ¹⁸ Maka kɛɛnko, dala ɛkkɛ noŋdɛ ba jyek weyi ɛkkɛ. Kanŋa weyyɛn, kan ɛkkɛn yomgɛn pwadɔ ɛkkɛti, ɔci walla kan jyek ɛkkɛn tɛy tɛy ɛkkɛtiyɛ, dala ɛkkɛ buattɛ ɛkkɛn ɔɔn. ¹⁹ Kan taab bala mena kɛɛngɔn mena pwadanti amaam te naŋki weegɛn ne ɛkɛ noŋŋi gena yaayan gɛɛl bɛɛyɛ, ɔci kan kɛɛngɔn neeni bala poŋi te Juaŋ men ɔɔnyɛ, Juaŋ yomɛ pɔktɛ ɛkɛti. ²⁰ Kan i ḍuati ma te naŋka naŋŋi i yaayan neeniyɛ, ɔci kan i yomu tieŋni te ḍuana i ḍuakiti ma neeniyɛ, yom tiekin i neeni a genga boki? A’a. Yeti kan i baal noŋ ne pwadan, ɔci i eekti ma taab te naŋka naŋŋi i pwadin neeniyɛ, kan i yomu tieŋni men ɔɔnyɛ, a ɔɔn Jwaŋa Tolan yomɛ pɔktɛ iti. ²¹ Ɛkkɛ bornɛ Juaŋ ɔci ‘wonnɛ ɛkɛ coodda tɛyan neeni aŋka coodi ɛkkɛ bala ba coodi Yaccu daŋkun. Ɛkɛ warɛ eejjin te ɛkkɛ. Ɔci ɛkɛ buagɔn dala ɛkkɛ lɔktɛ ba coodi ɛkɛ daŋkun. Dala ɛkkɛ boottɛ ɛkɛti. ²² Yaccuyɛ, ne ɛkɛ baalɛ ciyi ṭɛɛrji wɛnni menyɛ, naŋka yaayan gɛɛl bala ɛkɛti bɛɛ. Jyeka jomgin bala ɛkɛ tukɛti oŋgati bɛɛ. ²³ Ne ma balki ḍorki ɛkɛyɛ, ɛkɛ men gɛɛl ḍaarŋiyɔ bɛɛ. Ɔci moki ne ma balki noŋki ne yaayan ɛkɛtiyɛ, ɛkɛ gɔkcin jwali gɛɛl ne yaayan bɛɛ. Ɛkɛ yomɛ ḍuannɛ aŋa Jwaŋa Tolanti mena noŋi godan ne pwadany. ²⁴ Nɔji ikin eññɛ Kiṭɔ kakanti, aŋka ikin yaakinti mwontin te nɔji ikin, ɔci ikin yaakinti cietin noŋtin naŋka pwadin. Te taab bɛɛn ɛkɛ warɛti neeniyɛ, ɛkkɛ ywaŋŋɛ ɛkɛ doki. ²⁵ Te ñamu ɛkkɛ balgɛ ba kulin ne jyecki ɔntɔy. Ɔci acca ɛkkɛ dɔɔnɛti Kiṭɔ mena gɔṭi ɛkkɛ ba Ḍɛɛnɔn ɛkkɛ neeni.

¹ Maka moongo, dala ɛkkɛ noŋdɛ ba jyek ‘uay ɛkkɛ. ‘Uay ɛkkɛyɛ, ɛkkɛn gɛɛg jyeti jyek Jwaŋa Tolan bɛɛ. ² Yeti kan ɛkkɛn gɔrti naŋka pwadan ɛkkɛti ne ɛkkɛ waakɔ dɔɔdɛ iñɔ buayɛ ɛkkɛn oŋkandayɛ, ɛkkɛn buagdɛ jyek Juaŋ daŋkun. Ɛkkɛn dita jyeddi te jyeka guagdɛ ɛkkɛ ɛkkɛnti a jyek Juaŋ te tuggɔ wanna bɛɛ. Yeti ɛkkɛn gɔrti gena naŋki ɛkkɛ naŋka pwadan, ɔci ɛkkɛn jyeddi. ³ Naa ɛkkɛ anɛ ywaŋi waaka bora budan aŋka ma gɔṭi ɛkkɛ pwannɛ a pwadgin a ɔɔn bɛɛ. Gena waka ba pani jyeyi, ɔci waka ‘yɛŋgan ma a waka naŋɛ ma te dahab, ɔci bworŋin pwadin. ⁴ Dala ɛkkɛ aŋka pwaddɛ a pwadgin aŋa yomgɔti. Ɔci dala ɛkkɛ agdɛ maka tuggɛn luyan. Waka yɔŋki ma waakɛn ba dahab ɔci pani jyeyi ɔci bworŋin neeniyɛ, ɛkkɛn baadi. Yeti yoma pwadan neeni, ɛkɛ baadi bɛɛ. Yoma pwadan neeni pwad pwad Juaŋti ne tolan. ⁵ Te baaṭi moonga pwadin maka jyeti Juaŋtiyɛ, ɛkkɛn pwanna pwani te tuk luun te yom pwani ɛkkɛn neeni. Ɔci ɛkkɛn bala tyeŋi jyek ‘uay ɛkkɛn ne pwadan. ⁶ A ɔɔnyɛ, bala ba naŋki Caara ɛŋ Abrahim. Ɛŋ Abrahimyɛ, ‘war ɛkɛ barŋɛ ɛkɛ agi, “Ciɛggɔn.” Ɔci ɛkkɛ hay moongo, kan ɛkkɛ noŋɛ ba naŋki Caara, ɔci kan ɛkkɛ buayɛ genga bɛɛyɛ, ɛkkɛ agdɛ moonga pwadin Juaŋ ñamɛti ba Caara awarɛ. ⁷ Ɔci ɛkkɛ maka ‘uay daŋkun, dala ɛkkɛ poŋdɛ ne pwadan te moong ɛkkɛ. Ɛkkɛn waakɛn tɛɛcin ba ɛkkɛ bɛɛ, yeti ɛkkɛ agɛ maka ne cyɛɛlɔ te tɛɛtin ɛkkɛ ‘wonnɛ Jwaŋa Tolan tɛɛtin baadi bɛɛ neeniy. Acaan a ɔŋŋiyɛ, dala ɛkkɛ andɛ moong ɛkkɛ, ɔci a ɔɔnyɛ, aŋka cɔŋi ɛkkɛ tieŋdɛ Juaŋo. ⁸ Ɛkkɛ waakidayɛ, dala ɛkkɛ ciyɛ te paŋŋa ne cyɛɛlɔ. Dala ɛkkɛ poŋdɛ te modg ɛkkɛ. Dala ɛkkɛ oondɛ yɔtin pookɔ. Dala ɛkkɛ yomgɔ pwada mati. Ɔci dala ɛkkɛ tuggɔ luya. ⁹ Kan men gɛɛl noŋdi ne yaayan ɛkkɛtiyɛ, naa ɛkkɛ noŋdɛ ɛkɛti ne yaayan bɛɛ. Kan men gɛɛl ɛkkɛ ḍardɛyɔyɛ, naa ɛkkɛ ɛkɛ yettɛ ḍardɛyɔ bɛɛ. Kan men gɛɛl ḍor ɛkkɛyɛ, dala ɛkkɛ gɔktɛ Juaŋti aŋka Juaŋ noŋdi ne pwadan ɛkɛti, acaan Jwaŋa Tolan buagɔn dala ɛkkɛ noŋdɛ a ɔɔn. Ɔci kan ɛkkɛ noŋdɛ a ɔɔnyɛ, Juaŋ noŋdi ne pwadan ɛkkɛti daŋkun. ¹⁰ Jyeka kiigin gɔki agi, “Kan men gɛɛl buagɔn ciyi tɛɛti te yoma ñɔyan ɔci kan buagɔn coodda pwadanyɛ, naa jyeka yeyin bala ɛkɛ tukɛti bɛɛ. Ɔci naa ɛkɛ jomi jiek bɛɛ. ¹¹ Dala ɛkɛ warɛ yaldɛ ɔntɔ te naŋka yeyinti neeni. Dala ɛkɛ noŋdi naŋka pwadin. Dala ɛkɛ lieṭi pɔya ɛkɛ ciedɛ ne pwadan. Ɔci ne ɛkɛ pɔy yuardɛyɛ, dala pɔya neeni mugdɛ ɛkɛ ne pwadan. ¹² Acaan Jwaŋa Tolan bala gɔṭi maka pwadin. Ɔci ɛkɛ jyetkɛ a pɔggin, ɔci ɛkɛ tieŋdi ne ɛkkɛn cɔkti ɛkɛti. Yeti Jwaŋa Tolan yooktan te maka yeyin.” ¹³ Kan ɛkkɛ yomgɔ buagɔn naŋka pwadin ne pɛñany, a menɛ noŋdi ne yaayan ɛkkɛtiy? ¹⁴ Yeti kan taab bɛya ɛkkɛti te naŋki ɛkkɛ naŋka pwadinyɛ, Juaŋ noŋdi ne pwadan ɛkkɛti. Naa ɛkkɛ buayɛ maka noŋi ne yaayan ɛkkɛti neeni bɛɛ. Naa ɛkkɛ poŋɛ jiek yomgɔti bɛɛ. ¹⁵ Dala ɛkkɛ poŋdɛ naŋki Kiṭɔ yomgɔti agi ɛkta agdɔ Ciɛggɔn Tolɔ. Dala ɛkkɛ waakɔ ywaŋdɛ oŋkanda aŋka ɛkkɛ yaakɛti ṭwoktɛ mena tootti ɛkkɛti te jyek kɛɛna kɛɛyɛ ɛkkɛ Juaŋ yomgɔti neeni. Yeti dala ɛkkɛ ṭwoktɛ maka neeniti te yoma pwadan ɔci ne maalan. ¹⁶ Naa jwalla yaayan gɛɛl niindi ɛkkɛ ḍɔɔggɔti bɛɛ. Ɔci a ɔɔnyɛ, kan ma wooki ɛkkɛyɛ, ɔci ne ɛkkɛn gɔrtɛ coodda ɛkkɛ ciyɛ te jyek Yaccu Kiṭɔ neeniyɛ, ne baaṭi waaŋi ɛkkɛn neeni aga lɔɔn ɛkkɛnti. ¹⁷ Kan men gɛɛl balki taab te naŋki ɛkɛ naŋka pwadin neeni ba yom Juaŋ a ɔɔnyɛ, a ɔɔn pwatcin ne tolan te taab bɛya ɛkɛti te naŋki ɛkɛ naŋka yaayan neeniy. ¹⁸ Taab Kiṭɔyɛ, bala a ɔɔn daŋkun, ɛkɛ balki taab te naŋki ɛkɛ naŋka pwadan. Ɛkɛ tuun oŋi ne cyɛɛlɔ te nɔji ma waakɛnda. Mena pwadan neeni tuun te maka yeyin, aŋka ikin ootin ɛkɛ Juaŋti. War ɛkɛ tuun yeti boŋ ɛkɛ aŋka bala tɛɛti men. ¹⁹ Ɔci te boŋ ɛkɛyɛ, ɛkɛ ati ɔci ‘yeeñga bala ciyi ciginji bana maañ neeni lallɛ te jyek Juaŋo. ²⁰ ’Yeeñga bala ciginji neeni, gena ‘yeeñg maka jyek Juaŋ bɛɛyɛji te baaṭi ne Nɔwa baali cɔti murka tolany. Jwaŋa Tolan bala kɛɛy ɛkkɛn. Ɛkɛ looñi ɛkkɛnti ne pɛñan bɛɛ. Nɔwa bala noŋi murka. Ɔci ma gɛɛg tieŋŋin jiek ne ḍiɛkan ṭɔlgɛn budan ba ne dɔɔyɔ wyetkɛn ne ḍoogɔ. Ɛkkɛn aŋka yɔɔññɛ Juaŋ te piego. ²¹ Bala ba Nɔwa ne unni te piegyɛ, bala a ɔɔn daŋkun te ɛkkɛ ne oŋŋa ɛkkɛ buulkɛ mayɛ, ɛkkɛ unnɛ doki te yɔɔta ɛkkɛ yɔɔññɛ Juaŋ te naŋki Yaccu Kiṭɔ ne ɛkɛ jɔŋni ñaalɔ te koolji tɛɛti mokiy. Jyek bulti neeniyɛ, gena jyek lɔŋ ma waakɛn te giikin bɛɛ. Ne ma bultiti mayɛ, a ɔɔn bala ba ɛkkɛn gɔkti Juaŋti agi dala ɛkkɛn yomgɛn pwaddɔ. ²² Ne Yaccu jɔŋni ñaalɔ te lientiyɛ, ɛkɛ ati ñaalɔ pɔliji. Ɔci acca ɛkɛ bala ciyi Jwaŋa Tolan taaŋɛti taaŋŋa byerɔn. Ɔci malɛɛkan waakɛnda bala noŋi ba jyek ɛkɛ. Ɔci war tɛɛn boŋki ɔci jɔkin waakɛnda bala ɛkɛ bieŋɛti.

¹ Kiṭɔ warɛ taabbin ne tolan te ɛkkɛ. Ɔci acaan a ɔŋŋiyɛ, naa ɛkkɛ yooktɛ te taab bɛɛ. Dala paŋi ɛkkɛ bala ba paŋi Kiṭɔ, ɔci a ɔɔnyɛ, ɛkkɛ waakɔ tɛya. Kan men gɛɛl taabbin ne tolanyɛ, ɛkɛ mwonnin te nɔji ɛkɛ awarɛ. ² Acca a ɔŋŋiyɛ, ɔci oŋkanda ne ñamu ɔɔnyɛ, dala coodda ciyɛ ɛkkɛ ṭɛɛrji wɛnni neeni ‘wondɛ Jwaŋa Tolan bieŋɛti, naa ɛkkɛ ciedɛ ba naŋka ma baan yomgɛn buagiti bɛɛ. ³ Te baaṭiyɛ, ɛkkɛ balgɛ noŋɛ ba naŋki maka ciyi budan Juaŋ kwoyɔn neeni. Naa ɛkkɛ noŋdɛ a ɔɔn moki bɛɛ. Naŋki ɛkkɛ te baaṭi neeniyɛ, gena jyek paŋi tomi ɛkkɛ yomgɔti, ɔci nooŋi mooyo, ɔci naŋki tomi waakɛnda. Ɔci moki ɛkkɛ balgɛ noŋɛ naŋka yeyin jitkɛn ne coŋɔn te mali jɔkin yeyin neeni. ⁴ Ɔci acca ma korkɛn buañi, acaan ɛkkɛ yookɛ te naŋka yaayan neeni iki ɛkkɛn. Ɔci acaan a ɔŋŋiyɛ, ɛkkɛn wooki ɛkkɛ. ⁵ Yeti ne oŋ gɛɛltiyɛ, ɛkkɛn jyek naŋki ɛkkɛn neeni ootan bora Jwaŋa Tolan mena noŋi godanti. Mena neeni noŋdi godan maka ciyi ñaalɔ acca, ɔci maka tuutan daŋkun. ⁶ Acaan a ɔŋŋiyɛ, aŋka maka tuun te baaṭi lalkɛti ma te jyek Juaŋ jyeka wonkɛn jyeka pwadin wanna. Waak ɛkkɛn ḍakcin ba lyen ma waakɛnda. Yeti boŋ ɛkkɛn bala tɛɛti men te tɛɛtin Juaŋo. Ɔci Juaŋ noŋdi godan ɛkkɛnti waakɛnda. ⁷ Oŋ coodda iñɔ baanji wɛnniyɛ, wyeñɛ noŋi cɔɔldi doki. Acaan a ɔŋŋiyɛ, dala ɛkkɛ paŋi ɛkkɛ ywaŋdɛyɔ ne pwadan. Dala ɛkkɛ woŋgɔ tiittɛ te coodi ɛkkɛ aŋka ɛkkɛ yaaktɛti cɔktɛ a cɔŋi oŋkanda ɔɔn. ⁸ Naŋka pwadan te naŋka pookɛnyɛ, dala ɛkkɛ oondɛ yɔtin pookɔ oŋkanda ne tolan. Mena ani mayɛ, ɛkɛ ma bɔɔktɛ te nɔji ɛkkɛn nɔjja naŋtan ɛkkɛn coŋin neeni. ⁹ Dala ɛkkɛ yomgɔ pwadɔ Ma Kiṭɔ maka wɛlgti, naa ɛkkɛ korkɔ ŋuurŋan te waka amtan ɛkkɛn bɛɛ. ¹⁰ Ɛkkɛ waakida ‘wonnɛ Jwaŋa Tolan kanŋan jitkɛn ne coŋɔn, menga da te kanŋa ɛkɛ, menga da te kanŋa ɛkɛ. Ɔci a ɔŋŋiyɛ, dala naŋka ɛkkɛ ‘wonnɛ Juaŋ neeni kandɛ ne pwadan aŋka dala ɛkkɛ moowɛ yɔtin pookɔ te yom pwani ɛkkɛ ‘wonnɛ Juaŋ neeni. ¹¹ Gɔṭṭɛ poca, kan men gɛɛl ɛkkɛti loṭi mayɛ, dala ɛkɛ gɔkti mati te jyeka Juaŋ buagiti ɛkɛ loṭi may. Ɔci kan men gɛɛl moki ma te kanŋa parɛ gɛɛlyɛ, dala ɛkɛ noŋdi ba war tɛɛn Juaŋ daŋkun. Dala ɛkkɛ noŋdɛ naŋki ɛkkɛ waakɛnda te war tɛɛn Juaŋo, ɔci a ɔɔnyɛ, ma jieddi Juaŋ te yenti Yaccu Kiṭɔ. Dala ɛkɛ jiɛtan ma yuonginda yuonginda ɔɔn. Ɔci dala ɛkɛ aga mena tolan yuonginda yuonginda ɔɔn. Amɛɛn. ¹² Maka ana ‘yay, naa ɛkkɛ korkɔ buaya noon ne taab pɛñan ba maañ neeni gɛɛl bɛɛdɛ ɛkkɛti bɛɛ. Naa ɛkkɛ toottɛ agi taab neeni bala a ɔki a ɔɔn bɛɛ. Taab neeni bala aŋka Jwaŋa Tolan gɔrti ɛkkɛ, ne ɛkkɛ yomgɔ balki a ɔkiy. ¹³ Dala ɛkkɛ aŋka yomgɔ ñɔya ne ɛkkɛ ñoowɛ iki Yaccu te taab ɛkɛy. Kan a ɔɔnyɛ, ɔci ne oŋŋa ɛkɛ bɛɛdiyɛ, ɛkɛ yuartan ma ne ɛkɛ pwanni a pwaniy, ɔci ɛkkɛ yomgɔ ñɔya a ñɔɔn ne tolan. ¹⁴ Kan ma wooki ɛkkɛ te yenti Kiṭɔyɛ, Juaŋ ɛkkɛ magdɛ, ɔci Boŋ ɛkɛ Boŋa pwadan neeniyɛ, bala ɛkkɛti. ¹⁵ Kan taab ɛkkɛ balayɛ, naa taab neeni bala ɛkkɛti te naŋki ɛkkɛ naŋka yeyin bɛɛ, ɔci walla te nooŋi ma bɛɛ, ɔci walla moki te kali waak bɛɛ, ɔci walla moki te luupcin menga tukɛ luuptɛ jyek maka pookɛnti bɛɛ. ¹⁶ Yeti kan men gɛɛl balki taab acaan ɛkɛ a men Kiṭɔyɛ, naa ɛkɛ yomɛ wiakti poŋi agi taab neeni a lɔɔn bɛɛ. Dala ɛkɛ gɔkti mati te yenti Yaccu Kiṭɔ neeni men ɔɔn. Ɔci a ɔɔnyɛ, ɛkɛ jieddi Juaŋo. ¹⁷ Oŋŋa Jwaŋa Tolan noŋdi godan mati bɛɛn doki. Ɛkɛ bala noŋi godan acca ma ɛkɛti ñamu. Ɔci kan godan ɛkɛ tɛɛcin ikin Ma Kiṭɔtiy, oŋ maka yookɔn te jyeka wonkɛn jyeka pwadin pɔya yooŋti ɛkkɛn ɔntɔ te ywobji ɛkɛti bala boki? A’a. ¹⁸ A ɔɔn bala ba jyeka kiigin ne gɔkki agi, “Maka pwadinyɛ, kan jyek yɔɔt ɛkkɛn tɛy tɛyyɛ, oŋ maka yookɔn te Juaŋ ɔci maka noŋi ne yaayan pɔya ɛkkɛn yɔɔdɛ Juaŋ bala wɛnɛ?” ¹⁹ Acaan a ɔŋŋiyɛ, kan ma balki taab ba yom Juaŋyɛ, dala ɛkkɛn noŋdi naŋka pwadin. Ɔci dala ɛkkɛn waak ɛkkɛn ‘wontan Juaŋ bieŋɛti, acaan Juaŋyɛ, ɛkɛ a Mena oki waako, ɔci ɛkɛ wak ɛkɛ daldɛ bɛɛ.

¹ Cyekin kaniica, ‘ya ṭey ɛkkɛ. ‘Ya a ciɛggɔn kaniica ba ɛkkɛ ɔɔn. Ɔci ‘ya a mena Kiṭɔ yuarŋɛ ne taab baali ɛkɛtiy. Ɔci moki ne ɛkɛ bɛɛdiyɛ, ɛkɛ naŋdɛ Juaŋ pwada pwanno, ɔci pwani ɛkɛ neeni bɛya ‘yati daŋkun. ² Maka bala kaniican ɛkkɛtiyɛ, dala ɛkkɛ gɔṭɛ ɛkkɛn ne pwadan. Ɛkkɛn bala ba kulin Juaŋo. Dala ɛkkɛ noŋdɛ kanŋa neeni te yoma pwadan, naa ɛkkɛ noŋɛ kanŋa te yoma baaw ba ɛkkɛ iirkɛ ma a iirŋ bɛɛ. Ɔci naa ɛkkɛ noŋɛ kanŋa neeni te waka bɛya ɛkkɛti a bilk a waka budan neeni bɛɛ. Naŋka neeni a lɔɔno. Dala ɛkkɛ kandɛ acaan ɛkkɛ buagɛ ma magdɛ a maŋŋo. ³ Naa ɛkkɛ menga iirdɛ a iirŋ kaniicaji te coodi ɛkkɛ byeŋkɔti bɛɛ. Dala ɛkkɛ noŋdɛ ne pwadan mati aŋka ɛkkɛn lɔkti ba naŋki ɛkkɛ ɔɔn. Ɛkkɛ balgɛ ba ḍɛɛnin kulin. ⁴ Kan ɛkkɛ noŋdɛ ne pwadan Ma Kiṭɔti a ɔɔnyɛ, ne mena tolan mena a Ḍɛɛnɔn Kulin bɛɛdiyɛ, ɛkɛ ɛkkɛ ‘wondɛ waka pwadin. Yeti waka ɛkkɛ ‘wondɛ ɛkɛ neeni bala ba waka ‘wontan ma maka ḍwaŋin iñɔ ṭɛɛrji wɛnni bɛɛ. Wak maka iñɔ wɛnni ɛkkɛn baadi lakun. Yeti Yaccu ɛkkɛ ‘wondɛ pwani ɛkɛ pwanna baadi bɛɛy. ⁵ Ɔci ɛkkɛ maka kaalko, dala ɛkkɛ tieŋdɛ jyek maka ḍwaŋin. Ɔci ɛkkɛ waakidayɛ, dala ɛkkɛ nooŋdɛ yɔtin ne pwadan te yoma ḍiɛran. A ɔɔn, jyeka kiigin gɔki agi, “Kan ma kooŋi waakɛn agi ɛkkɛn aginti maka ḍwaŋinyɛ, Juaŋ kɛkti te ɛkkɛn. Ɔci maka poŋi yomgɛnti agi ɛkkɛn aginti maka ḍyɛrinyɛ, Jwaŋa Tolan yomɛ pwad pwad ɛkkɛnti.” ⁶ Acaan a ɔŋŋiyɛ, dala ɛkkɛ yomgɔ ḍyɛrdi. Ɛkkɛ balgɛ Juaŋ bieŋɛti ɔci ɛkɛ tolla tollo. Ɔci ne oŋ gɛɛlti a oŋŋa pwadan ɛkɛtiyɛ, ɛkkɛ naŋdɛ ɛkɛ agdɛ maka ḍwaŋin. ⁷ Jyeka lildɛ ɛkkɛ yomgɔti te jyek coodiyɛ, dala ɛkkɛn oldɛ ɛkkɛ ɛkɛ bieŋɛti waakɛnda, acaan ɛkɛ tieci waŋɛ te ɛkkɛ. ⁸ Woŋgɔ pɔktɛ, hay! Dala ɛkkɛ woŋgɔ tiittɛ! Acaan Jwaŋa Yaayan mena yookɔn te ɛkkɛ neeniyɛ, ɛkɛ buagɔn muowi ɛkkɛ bala ba jyɛl ne ati wiagi lieṭi gena amdɛ ɛkiy. ⁹ Dala ɛkkɛ kɛktɛ te ɛkɛ. Dala ɛkkɛ yɔɔddɛ ne tɛyan te jyenna ɛkkɛ jyettɛ Jwaŋa Tolanti neeni. Çeejɛ ɛkkɛ modg ɛkkɛ baan konɛ wardayɛ, ɛkkɛn balki taab ba ɛkkɛ ɔɔn. ¹⁰ Jwaŋa Tolan yomɛ pwad pwad mati te jiek waakɛnda. Ɛkɛ ɛkkɛ muonɛ bora te naŋki Yaccu Kiṭɔ. Ɔci ne baaṭi ɛkkɛ ciedɛ iki ɛkɛ yuonginda yuonginda ɔɔn. Yeti accayɛ, taab bala ɛkkɛti ne ḍiɛran ṭɔɔlɛ men. Dala ɛkkɛ magdɛ Juaŋ aŋka dala ɛkkɛ waakɔ tɛya te jyek ɛkɛ, ɔci dala ɛkkɛ yɔɔdɛ ne tɛyan oŋkanda. ¹¹ Jwaŋa Tolanyɛ, ɛkɛ a mena tolan te waak waakɛnda. Ɔci ɛkɛ bala yuonginda yuonginda ɔɔn! Amɛɛn. ¹² Cilayɛ, ɛkɛ aŋi ba mod ɔɔn. Ɛkɛ a mena tieci jiek waakɛn. ‘Ya maŋŋa ɛkɛ te kiin worga ṭɔɔlɛ ḍuulan neeni. Ɔci te worga neeniyɛ, ‘ya baal ṭey ɛkkɛ. Jyeka ɛkkɛ myennin ‘ya te yom pwani Juaŋ neeniyɛ, ɛkkɛn a jyeka awarɛ. Dala ɛkkɛ yɔɔdɛ ne tɛyan te jyeka neeni. ¹³ Ma kaniica wɛnni ban Baabilyɛ, ɛkkɛn ñiepi ɛkkɛ. Ɛkkɛn muonɛ Juaŋ bora ba ɛkkɛ ɔɔn. Ɔci kaci ‘ya Markyɛ, ɛkɛ ñiepi ɛkkɛ daŋkun. ¹⁴ Dala ɛkkɛ ñiebdɛ yɔtin pookɔ ne pwadan te yoma pwadan. Ɛkkɛ waakida maka bala Kiṭɔtiyɛ, dala ɛkkɛ yomgɔ pwada a pwanno. Bawwin.