1Yɔhanna

¹ Ɔɔn kieyɔn worga ɛkkɛti acca te jyek Mena bala te ñamu. Ɛkɛ a Mena jiekɛ tieŋnɔn ɔɔn te tuk ɛkɛti. Ɔci ɛkɛ a Mena yuarŋɔn ɔɔn te woŋgɔ, ɛɛ, ɔɔn balgɔn gɔṭɔn ɛkɛ. Ɔci ɔɔn moki tomnɔn ɛkɛ warɛti te byeŋki ɔɔn. Mena guagdɔn ɔɔn neeniyɛ, gena Kiṭɔ mena tɛɛtki may. ² Jwaŋa Tolanyɛ, ɛkɛ ɔɔn lɛɛrnɔn Mena tɛɛtki ma neeni, ɔci ɔɔn balgɔn lwokɔn ma te jyek ɛkɛ. Ɔci acca ɛkkɛ myettɛ ɔɔn daŋkun te jyek ɛkɛ. Jyeka neeniyɛ, gena jyek Mena tɛɛtki may. Ɛkɛ bala i Weegɛn te ñamu ɔci oŋkanda ɔɔn. Ɔci tɛɛtin ɛkɛ baadi ywongati bɛɛ. Ɔci acca ɛkɛ lɛɛlnɛ Jwaŋa Tolan bora ɔɔnti. ³ Ɔɔn gɔktɔn ɛkkɛti moki ka Mena ɛkkɛ myetkɛ ɔɔn neeniyɛ, gena Mena yuarŋɔn ɔɔn ɔci tieŋnɔn ɔɔn. Ɛkkɛ myetkɛ ɔɔn te jyeka neeni aŋka jyek ikin aga jyeka ne cyɛɛlɔ iki ɔɔn, acaan ɔɔn jyeyɔn i Jwaŋa Tolan i Kaci ɛkɛ Yaccu Kiṭɔ. ⁴ Ɔci ɔɔn kienɔn jyeka neeni ɛkkɛti aŋka ɔɔn yomgɔ ñɔya ne pɛñan. ⁵ Gena jyeka tieŋnɔn ɔɔn te Kaci ɛkɛti aŋka ɛkkɛ myetkɛ ma neeni. Jyeka neeni gɔki agi Jwaŋa Tolanyɛ, ɛkɛ dɛki bɔɔna bɔɔno. Nona miel gɛɛl bala ɛkɛti bɛɛ. ⁶ Kan ikin gɔkin agi ikin jyeyin iki Jwaŋa Tolan, ɔci yeti kan ikin ciyin te nona mielti menyɛ, a ɔɔn ikin jomin jieko, ɔci naŋka naŋtin ikin neeni a naŋka awarɛ bɛɛ. ⁷ Jwaŋa Tolan ciyi te nona bɔwan. Ɔci kan ikin da ciyin te nona bɔwan ba ɛkɛ ɔɔnyɛ, ikin yaakinti jyeyin waakida, ɔci yimg Kaci ɛkɛ Yaccu Kiṭɔ nɔji ikin eedɛ ɔntɔ te ikin yomgɔti waakida oŋkanda ɔɔn. ⁸ Kan ikin poŋin gɔkin agi nɔji ikin baawiyɛ, ikin poŋin amaam budan, ɔci jyeka awarɛ bala ikin yomgɔti bɛɛ. ⁹ Kan ikin nɔji lɛɛltin borayɛ, ɛkɛ ikin bɔɔktin te nɔji ikin waakɛnda. Jyek bɔɔkin ɔci jyek eñña ɛkɛ nɔji eedɛ ɔntɔ neeni daldɛ ɛkɛ budan bɛɛ, tiidiyɔ ɛkɛ. Naŋki ɛkɛ neeniyɛ, pwatcin. ¹⁰ Kan ikin gɔkin agi ikin noŋŋin nɔji bɛɛyɛ, a ɔɔnyɛ, bala ba ikin gɔkin agi Jwaŋa Tolan a mena jomi jieko. Kan ikin gɔkin a ɔɔnyɛ, jyek ɛkɛ bala ikin yomgɔti bɛɛ.

¹ Kɛɛgin ‘ya, ‘ya kiey jyeka neeni ɛkkɛti aŋka naa ɛkkɛ noŋdɛ nɔji bɛɛ. Yeti kan men gɛɛl ikinti noŋdi nɔjiyɛ, ɔci Men gɛɛl bala ikinti, ɔci ɛkɛ yaakinti gɔkti Wey ikinti te ikin. Gena Yaccu Kiṭɔ Mena domi jiek bɛɛy. ² Ɛkɛ warɛ ‘yɛrŋɛ te nɔji ikin aŋka Jwaŋa Tolan yomɛ pwanni ikinti neeni. Ɛkɛ warɛ ‘yɛrŋɛ te ikin pookɔ bɛɛ, ɛkɛ warɛ ‘yɛrŋɛ te ma waakɛnda baan warda. ³ Kan ikin noŋin ba jyek ɛkɛ oŋkandayɛ, ikin aktin ma ɛkɛ woodgɛn ne pwadan. ⁴ Kan men gɛɛl gɔki agi ɛkɛ Juaŋ ŋeejjɛ, ɔci kan ɛkɛ noŋi ba jyeka guagdɛ Juaŋ bɛɛyɛ, ɛkɛ a laaban, ɔci jyeka awarɛ bala ɛkɛti bɛɛ. ⁵ Kan mena noŋi ba jyek Juaŋyɛ, anna ani ɛkɛ Juaŋ neeni yɔmjin doki. Ɔci a ɔŋŋiyɛ, ŋeettin ikin ikin balkin ɛkɛti. ⁶ Kan mena gɔki agi ɛkɛ balginti i Juaŋ oŋkandayɛ, dala ɛkɛ ciyi ba Yaccu Kiṭɔ ɔɔn. ⁷ Modg ɔɔn, ‘ya kiey jyeka wonkɛn gɛɛg ɛkkɛti bɛɛ. Gena jyeka te baaṭi jyeka tieŋnɛ ɛkkɛ te ñamuy. ⁸ Yeti jyeka neeni bala ba jyeka wonkɛn ɛkkɛti oŋkanda. Yaccu bala noŋi ba jyeka neeni, ɔci acca ɛkkɛ daŋkun noŋɛ ba jyeka neeni. Acaan nona miel noŋi baadi, ɔci Mena dɛki awarɛ bala doki. ⁹ Kan men gɛɛl gɔki agi ɛkɛ baaljɛ ciejjɛ nona bɔwanti, ɔci kan ɛkɛ yomɛ yaayɛ mod ɛkkɛnti oŋkandayɛ, ɛkɛ bala te nona mielti men. ¹⁰ Kan mena ani mod ɛkkɛn oŋkandayɛ, ɛkɛ aŋka bala ciyi te nona bɔwanti oŋkanda, ɔci ma ḍɛɛmdi iñɔ te jyek ɛkɛ bɛɛ. ¹¹ Mena yomɛ yaayan mod ɛkkɛnti oŋkandayɛ, ɛkɛ bala te nona mielti, ɔci ɛkɛ ati te nona mielti men. Ɔci nona ooddi ɛkɛyɛ, ŋeejɛ ɛkɛ bɛɛ acaan ɛkɛ noon yuartɛ te woŋgɛ bɛɛ. Ɛkɛ uullɛ nona miel ñingɛti doki. ¹² Kɛɛgin ‘ya, ‘ya kiey worga ɛkkɛti acaan ɛkkɛ bɔɔŋnɛ Jwaŋa Tolan te nɔji ɛkkɛ doki. Jwaŋa Tolan ɛkkɛ bɔɔŋnɛ acaan yenti Yaccu Kiṭɔ bala ɛkkɛti. ¹³ Weyi ɔɔn, ‘ya kiey worga ɛkkɛti, acaan mena bala te ñamu ŋeejɛ ɛkkɛ doki. Kaalko, ‘ya kiey worga ɛkkɛti moki, acaan ɛkkɛ Jwaŋa Yaayan buannɛ ɛkkɛ doki. ¹⁴ Kɛɛgin ‘ya, ‘ya kiey worga ɛkkɛti acaan Wey ikin ŋeejɛ ɛkkɛ. Weyi ɔɔn, ‘ya kiey worga ɛkkɛti, acaan Kiṭɔ Mena bala te ñamu ŋeejɛ ɛkkɛ doki. Kaalko, ‘ya kiey worga ɛkkɛti acaan ɛkkɛ agɛ maka yɔdi ne tɛyan ɔci jyek Jwaŋa Tolan bala ɛkkɛ yomgɔti oŋkanda, ɔci Jwaŋa Yaayan buannɛ ɛkkɛ doki. ¹⁵ Naa ɛkkɛ anɛ wak ṭɛɛr wyeñɛ bɛɛ. Ɔci naa ɛkkɛ anɛ waka bala baan jiñɛti iñɔ wɛnni bɛɛ. Kan mena ani baan jiñɛ iñɔ wɛnniyɛ, ɛkɛ yaakinti ani Wey ikin bɛɛ. ¹⁶ Acaan waka neeniyɛ, ɛkkɛn a wak Wey ikin bɛɛ. Ɛkkɛn a waka baan jiñɛti iñɔ wɛnni budan. Waka baan jiñɛti iñɔ wɛnni neeniyɛ, gena waka yomg ma baan buagiti ne pɛñan, ɔci waka gwaltan ma baan te ñingɛn ɔci pwanna pwani ɛkkɛnti, ɔci ma buagiti ne pɛñan, ɔci jyeka yomg ma baan buagiti akti maka ḍwaŋin. ¹⁷ Ɔci ne oŋ gɛɛltiyɛ, baan jiñɛ baadi, ɔci waka yomg ma baan buagiti ne pɛñan neeniyɛ, baadi daŋkun. Yeti mena noŋi ba jyek Jwaŋa Tolanyɛ, ɛkɛ aŋka ciyi oŋkanda a ñaccu ɔɔn, baadi oŋgati bɛɛ. ¹⁸ Kɛɛgin ‘ya, wɔɔka neeni noŋi baadi doki! Ɛkkɛ tieŋnɛ agi “Mena Yookɔn Te Yaccu Kiṭɔ” baali bɛɛdɔ. Ɔci acca maka yookɔn te Yaccu gɛɛg bala kɔɔna kɔɔnno. Gena maka jyek ɛkkɛn bala ba Mena Yookɔn Te Yaccu Kiṭɔ neeniy. Ɔci a ɔŋŋiyɛ, ŋeecin ikin wɔɔka neeni noŋi baadi doki. ¹⁹ Maka neeniyɛ, ɛkkɛn ikin dalkin, ɛkkɛn a ma ikin awarɛ bɛɛ. Kan ɛkkɛn te akki ma ikin awarɛyɛ, te ɛkkɛn balkin iki ikin a cyɛɛlɔ men. Ɛkkɛn kaaccin bora te ma ikinti aŋka ŋeettan ma ɛkkɛn a ma ikin bɛɛ. ²⁰ Ɛkkɛ waakidayɛ, jyeka neeni ŋeejɛ ɛkkɛ, acaan Jwaŋa Tolan ɛkɛ ɛkkɛ ‘wonnɛ ñing tɛɛn ɛkɛ. ²¹ ’Ya kiey worga ɛkkɛti acaan ɛkkɛ jyeka neeni kwoyɛ bɛɛ. ‘Ya kiey worga ɛkkɛti acaan jyeka neeni ŋeejɛ ɛkkɛ doki. Jyeka neeni etti jyeka jomgin bɛɛ. ²² Kan menga gɔki agi Yaccu neeni agɔ Kiṭɔ mena cuonda Juaŋ bɛɛyɛ, ɛkɛ a mena jomi jieko. Kan mena gɔki agi Kaci Weegɛn baawiyɛ, ɔci Kaci moki baawiyɛ, ɛkɛ a Mena Yookin Te Yaccu Kiṭɔ. ²³ Kan mena yookɔn te Kaciyɛ, ɔci Kaci Weegɛn da bala ɛkɛti bɛɛ. Kan mena jyeti Kacitiyɛ, ɔci Kaci Weegɛn da bala ɛkɛti. ²⁴ Ba jyeka tieŋnɛ ɛkkɛ te ñamu neeniyɛ, dala jyeka neeni bala ɛkkɛti oŋkanda, ɔci kan a ɔɔnyɛ, Kaci Weegɛn bala ɛkkɛti oŋkanda yaakkɛn i Kaci ɛkɛ. ²⁵ Ɔci gena guagdɛ ɛkɛ agi ikin ‘wontintiyɛ, gena tɛɛtin, ɔci tɛɛtin neeni baadi ywongati bɛɛ. ²⁶ ’Ya kiey worga ɛkkɛti te jyek maka noŋi ɛkkɛ jyɛttɛ ɔntɔ wanna. ²⁷ Jwaŋa Tolanyɛ, ɛkɛ ɛkkɛ ‘wonnɛ ñing tɛɛn ɛkɛ te ñamu te Boŋ ɛkɛ. Ɔci ɛkɛ bala ɛkkɛ yomgɔti men acca. Ɔci kan mena loṭi ɛkkɛ baawyɛ, noŋdi genga bɛɛ, ɛkkɛ laldɛ Boŋ Jwaŋa Tolan te jiek waakɛnda. Jyeka loṭi Boŋ Jwaŋa Tolan ɛkkɛ neeniyɛ, a jyeka awarɛ. Jyeka neeniyɛ, a jomi jiek bɛɛ. Dala ɛkkɛ ciyɛ iki Yaccu oŋkanda ba jyeka ɛkkɛ lallɛ Boŋ Jwaŋa Tolan neeni. ²⁸ Kɛɛgin ‘ya, dala ɛkkɛ baldɛ ɛkɛti oŋkanda, ɔci kan a ɔɔnyɛ, kan ɛkɛ warɛ lɛɛldɛ bora ikintiyɛ, ɔci ikin yaakinti gɔwwin iki ɛkɛ ne pwadan. Ne oŋŋa ɛkɛ bɛɛdiyɛ, ikin buatin ɛkɛ yooŋtin ɔntɔ te ɛkɛti bɛɛ. ²⁹ Çeejɛ ɛkkɛ Yaccu Kiṭɔ pwad pwado, ɔci kan ma noŋi ne pwadan ba ɛkɛ ɔɔnyɛ, ɛkkɛn ŋeejɛ ɛkɛ ɛkkɛn a kɛɛgin ɛkɛ awarɛ.

¹ Anna Wey ikin Jwaŋa Tolan ani ikinyɛ, da parɛ, acaan ɛkɛ boṭi ikin agi kɛɛgin ɛkɛ. Awarɛ, ikin balkin a ɔɔn. Ɔci a ɔŋŋiyɛ, maka iñɔ ṭɛɛrji wɛnniyɛ, ɛkkɛn ikin ŋeeckin bɛɛ, acaan ɛkkɛn Jwaŋa Tolan kwoyɔn daŋkun. ² Gɔṭṭɛ mung ɔɔn, ikin akin kɛɛgin Jwaŋa Tolan acca, yeti ne baaṭi kan ikin baltin a ɔki ŋeecin ikin ne pwadan men bɛɛ. Yeti oŋŋa Yaccu bɛɛdiyɛ, ikin waakɔ aktin baltin ba ɛkɛ ɔɔn, acaan ikin ɛkɛ yuartin ne pwadan te woŋgi ikin. ³ Maka bala jyeti kɛɛy jyeka neeniyɛ, ɛkkɛn jyeka yeyin daltan niin ɛkkɛn yomgɛnti bɛɛ, acaan ɛkkɛn buagɔn ɛkkɛn yomgɛn pwaddi ba Yaccu Kiṭɔ ɔɔn. ⁴ Kan men gɛɛl noŋdi nɔjiyɛ, ɛkɛ jyek Juaŋ lɛɛŋŋɛ jitin doki, acaan nɔjiyɛ, ɛkɛ a gena lɛɛwi jyek Juaŋ jitkɛn. ⁵ Çeejɛ ɛkkɛ Yaccu aŋi men baan aŋka nɔji ikin eedɛ ɛkɛ ɔntɔ. Ɔci ŋeejɛ ɛkkɛ moki nɔji ɛkɛ bala bɛɛ. ⁶ Kan men bala ciyi iki Yaccu oŋkandayɛ, ɛkɛ noŋi nɔji a ñaccu bɛɛ. Mena noŋi nɔji a ñaccuyɛ, ɛkɛ Yaccu yuarŋɛ oŋgati bɛɛ. Yaccu kwoyi ɛkɛ. ⁷ Kɛɛgin ‘ya, naa men gɛɛl ɛkkɛ jyɛttɛ ɔntɔ te jyek Yaccuti bɛɛ. Kan mena noŋi ne pwadan oŋkandayɛ, naŋki ɛkɛ pwad pwad bala ba naŋki Yaccu daŋkun. ⁸ Kan mena noŋi nɔji oŋkandayɛ, ɛkɛ a men Jwaŋa Yaayan, acaan Jwaŋa Yaayan bala noŋi nɔji te baaṭi doki. Kaci Jwaŋa Tolan bɛɛn aŋka ɛkɛ kanŋa Jwaŋa Yaayan neeni lɛgdɛ jitin. ⁹ Kɛɛgin Jwaŋa Tolanyɛ, ɛkkɛn noŋi nɔji a ñaccu bɛɛ, acaan tɛɛtin Jwaŋa Tolan bala ɛkkɛn yomgɛnti oŋkanda, baadi bɛɛ. Ɔci a ɔɔnyɛ, ɛkkɛn yaakinti noŋi nɔji a ñaccu bɛɛ, acaan ɛkkɛn a kɛɛgin Jwaŋa Tolan. ¹⁰ Ma Jwaŋa Tolanyɛ, ɛkkɛn ŋeecin ikin te naŋki ɛkkɛn, ɔci ma Jwaŋa Yaayan moki ŋeecin ikin te naŋki ɛkkɛn. Kan mena noŋi ne pwadan bɛɛyɛ, ɛkɛ a men Jwaŋa Tolan bɛɛ. Ɔci kan mena ani mod ɛkkɛn bɛɛyɛ, ɛkɛ daŋkun a men Jwaŋa Tolan bɛɛ. ¹¹ Jyeka neeni bala ba jyeka tieŋnɛ ɛkkɛ te ñamu doki agi dala ikin ooncinyɔ pookɔ. ¹² Naa ikin baltin ba ‘wana yenti kɛɛn ɔɔn bɛɛ. Ɛkɛ a men Jwaŋa Yaayan, ɔci ɛkɛ mod ɛkkɛn noŋŋɛ. Ɛkɛ moodɛn noŋŋɛ ogo? Ɛkɛ moodɛn noŋŋɛ acaan moodɛn bala noŋi ne pwadan, ɔci kɛɛn bala noŋi ne yaayan. ¹³ Modg ɔɔn, kan maka baan jiñɛti iñɔ wɛnni yomgɛn yeyɔ ɛkkɛti oŋkandayɛ, naa ɛkkɛ jitkɔ buaya noon te jyeka neeni bɛɛ. ¹⁴ Te ñamu ikin balkin ba maka tuutan, ɔci acca ikin baallin ba maka tɛɛtan. Çeecin ikin a ɔɔn acaan ikin anin modg ikin. Kan mena ani modg ɛkkɛn bɛɛyɛ, ɛkɛ bala ba mena tuuta men. ¹⁵ Kan mena yomɛ yaayɛ mod ɛkkɛnti oŋkandayɛ, ɛkɛ bala ba mena noki mako, ɔci ŋeejɛ ɛkkɛ maka noki mayɛ, tɛɛtin Juaŋ bala ɛkkɛn yomgɛnti bɛɛ. ¹⁶ Jyek anna ani Juaŋ ikin neeniyɛ, ŋeecin ikin doki te naŋki Yaccu oŋŋa ɛkɛ warɛ ‘wonninti ikiny. Ɔci ikinyɛ, dala yomg ikin bala ba ɛkɛ ɔɔn. Dala ikin anin modg ikin ba anna ani ɛkɛ ikin neeni. ¹⁷ Mena balki waak iñɔ baanji wɛnniyɛ, kan ɛkɛ gɔrti mod ɛkkɛn ancinyɛ, ɔci kan ɛkɛ yomɛ baaw mod ɛkkɛntiyɛ, ɔci kan ɛkɛ yookɔn te maŋi ɛkɛyɛ, oŋ anna ani ɛkɛ Juaŋ neeni ciyi ɛkɛ yomɛti a ɔki? ¹⁸ Kɛɛgin ‘ya, naa ikin anin ma te jyek tuggɔ budan bɛɛ. Dala ikin anin ma te yoma awarɛ, ɔci dala ikin noŋtin ne pwadan ɛkkɛnti. ¹⁹ Ɔci kan ikin anin ma te yoma awarɛ ɔci noŋtin ne pwadan ɛkkɛnti a ɔɔnyɛ, ŋeettin ikin jyeka bala ikinti neeniyɛ, a jyeka awarɛ. Ɔci ŋeettin ikin yomgɔti ne pwadan Jwaŋa Tolan ñamɛti. ²⁰ Ɔci kan ikin poŋin gɔkin agi ikin yiekin Jwaŋa Tolan ñamɛtiyɛ, jyeka neeni yaakinti ciyi ikin yomgɔti bɛɛ. Acaan Jwaŋa Tolan ɛkɛ tol tol te yomg ikin, ɔci waak waakɛnda ŋeejɛ ɛkɛ. ²¹ Ɔci kan jiek ŋeecin ikin yomgɔti a ikin noŋŋin gena yaayan gɛɛl bɛɛyɛ, ikin yaakinti ortinti Jwaŋa Tolanti ne pwadan, ɔci ikin buayin ɛkɛ bɛɛ. ²² Ɔci kan ikin toottin ɛkɛti te gengayɛ, ɛkɛ ikin ‘wontin, acaan ikin noŋin ba jyek ɛkɛ oŋkanda, ɔci naŋki ikin neeni pwanna pwani ɛkɛti. ²³ Gena jyeka ɛkɛ buagiti ikin noŋtin neeni. Ɛkɛ gɔki agi dala ikin jyetcin yenti Kaci ɛkɛ Yaccu Kiṭɔti, ɔci agi dala ikin ooncin yɔtin pookɔ oŋkanda. Jyeka neeniyɛ, gena jyeka ikin myenninti ɛkɛy. ²⁴ Kan mena noŋi ba jyek ɛkɛ oŋkandayɛ, ɛkɛ ciyi i Jwaŋa Tolan a cyɛɛlɔ, ɔci Jwaŋa Tolan bala ɛkɛ yomɛti daŋkun. Çeecin ikin Juaŋ bala ikin yomgɔti, ɔci ikin da balkin ɛkɛti acaan Jwaŋa Tolan ikin ‘wonnin Boŋ ɛkɛ.

¹ Modg ɔɔn, kan jyeka pookɛn bala, ɔci kan ma gɔki agi jyeka neeni agi jyek Boŋ Jwaŋa Tolanyɛ, naa ɛkkɛ men jyeddɛ jyeka guaktan ma coŋin neeni men budan bɛɛ. Ɛkkɛ gɔrtɛ te ñamu parun aŋka ŋeeddɛ ɛkkɛ kan jyeka neeni a jyek Juaŋ awarɛ boki no. Acaan maka loṭi ma gɛɛg dɛndi bora ɔci jomdi jiek mati. ² Kan men gɛɛl gɔki agi Yaccu Kiṭɔ bɛɛnɔ te Jwaŋa Tolanti, ɔci aŋŋi men baanyɛ, paŋŋa neeni bɛɛn te Jwaŋa Tolanti. Ɔci a ɔŋŋiyɛ, jiek ŋeeddɛ ɛkkɛ jyeka neeni a jyek Boŋ Jwaŋa Tolan awarɛ. ³ Kan men gɛɛl kɛki agi Yaccu bɛɛnɔ te Jwaŋa Tolanti bɛɛyɛ, paŋi ɛkɛ bɛɛn te Jwaŋa Tolanti bɛɛ. Paŋi ɛkɛ neeniyɛ, gena paŋi Mena Yookɔn Te Yaccu Kiṭɔ mena tieŋnɛ ɛkkɛ te ñamu agi bɛɛdɔy, ɔci acca ɛkɛ bɛɛn doki. ⁴ Kɛɛgin ‘ya, ɛkkɛ agɛ kɛɛgin Jwaŋa Tolan. Maka gɔki ba jyeka pookɛn neeniyɛ, ɛkkɛn buannɛ ɛkkɛ doki, acaan Mena bala ɛkkɛ yomgɔti neeniyɛ, ɛkɛ tolcin te mena bala iñɔ baanji wɛnni. ⁵ Maka gɔki jyeka pookɛn neeniyɛ, ɛkkɛn a ma Jwaŋa Tolan bɛɛ. Ɔci acaan a ɔŋŋiyɛ, ɛkkɛn gɔki te jyeka bala iñɔ baanji wɛnni, ɔci maka a ma Juaŋ bɛɛyɛ, tieŋdi jyek ɛkkɛn. ⁶ Ikin akin kɛɛgin Jwaŋa Tolan. Maka Jwaŋa Tolan ŋeecɔnyɛ, ɛkkɛn tieŋdi jyek ikin. Ɔci maka a kɛɛgin Juaŋ bɛɛyɛ, ɛkkɛn tieŋdi jyek ikin bɛɛ. Ɔci a ɔŋŋiyɛ, ŋeettin ikin jyeka bala mati neeniyɛ, kan a jyeka awarɛ, walla kan a jyeka jomgin. ⁷ Modg ɔɔn, dala ikin oontin yɔtin pookɔ oŋkanda, acaan jyek anna neeniyɛ, bɛɛn te Jwaŋa Tolanti. Maka ani ma a ɔɔnyɛ, ɛkkɛn a kɛɛgin Jwaŋa Tolan, ɔci ɛkkɛn Jwaŋa Tolan ŋeecɔn. ⁸ Mena ani ma bɛɛyɛ, ɛkɛ Jwaŋa Tolan ŋeejɛ bɛɛ, acaan Jwaŋa Tolanyɛ, ɛkɛ a mena ani may. ⁹ Kaci Jwaŋa Tolan bala ne cyɛɛlɔ, ɔci Jwaŋa Tolan Kacca neeni cuonnɛ iñɔ wɛnni ṭɛɛrji aŋka ikin tɛɛttin te ɛkɛ. Ɔci a ɔŋŋiyɛ, ɛkɛ ikin myennin te anna ɛkɛ ani ikiny. ¹⁰ A ikin aŋka anin Juaŋ ñamu bɛɛ. A’a, gena Juaŋ aŋka ani ikin ñamuy. Ɔci ŋeecin ikin anna Juaŋ ani ikin neeniyɛ, a anna awarɛ, acaan Kaci ɛkɛ cuonnɛ iñɔ baanji wɛnni aŋka ɛkɛ warɛ ‘yɛrŋɛ te nɔji ikin aŋka Jwaŋa Tolan yomɛ pwanni ikinti neeni. ¹¹ Modg ɔɔn, kan Jwaŋa Tolan ani ikin a ɔɔnyɛ, dala ikin da oontin yɔtin pookɔ. ¹² Men gɛɛl Jwaŋa Tolan yuarŋɛ bɛɛ. Yeti kan ikin oonnin yɔtin pookɔ oŋkandayɛ, Jwaŋa Tolan ciyi ikin yomgɔti. Ɔci a ɔŋŋiyɛ, ikin anin Juaŋ awarɛ. ¹³ Çeecin ikin ikin balkin Jwaŋa Tolanti ɔci ɛkɛ da bala ikinti. Jyeka neeni ŋeecin ikin te Boŋ ɛkɛ Boŋa ikin ‘wonninti ɛkɛy. ¹⁴ Yaccu yuarŋɔn ɔɔn te woŋgɔ aŋka ɔɔn lwokɔn ma te jyek Jwaŋa Tolan Wey Yaccun neeni. Ɛkɛ Kaci ɛkɛ cuonnɛ iñɔ wɛnni aŋka ɛkɛ warɛ ‘yɛrŋɛ te nɔji ma baan baan warda. ¹⁵ Kan mena jyeti ɔci gɔki agi Yaccu a Kaci Jwaŋa Tolanyɛ, Jwaŋa Tolan bala ciyi ɛkɛ yomɛti oŋkanda, ɔci ɛkɛ da bala Jwaŋa Tolanti oŋkanda daŋkun. ¹⁶ A ɔŋŋiyɛ, anna Juaŋ ani ikin neeniyɛ, ŋeecin ikin ne pwadan, ɔci ikin jyettin yomgɔti Juaŋ ani ikin. Jwaŋa Tolanyɛ, ɛkɛ a mena ani may. Kan mena ciyi ani Juaŋ bala ɛkɛ yomuti oŋkandayɛ, ɛkɛ ciyi iki Jwaŋa Tolan oŋkanda, ɔci Jwaŋa Tolan da ciyi ɛkɛti oŋkanda. ¹⁷ Oŋkanda ikin anin Jwaŋa Tolan, ɔci a ɔŋŋiyɛ, ŋeettin ikin ne pwadan yomgɔti ikin buayin oŋ godan Juaŋ moki bɛɛ, acaan ne ikin balkin ciyin iñɔ wɛnniyɛ, ikin balkin ciyin ba Yaccu ɔɔn, ɔci acaan ikin anin Juaŋ awarɛ. ¹⁸ Kan anna i ani Jwaŋa Tolan bala itiyɛ, ɔci bwajja i buayi genga bala moki bɛɛ. Acaan jyek bwaji ɔci jyek ani yaakinti ñoodi nona ne cyɛɛlɔ bɛɛ. Bwaji bawwin doki. Jyek bwaji bala mati acaan ma buayi jyeka bɛya ɛkkɛn wyetkɛnti te naŋki ɛkkɛn naŋka yeyin. Ma Kiṭɔyɛ, kan men gɛɛl buayiyɛ, bala ba anna ɛkɛ ani Juaŋ neeni bɔɔnjin men. ¹⁹ Ikin anin ɛkɛ acaan ɛkɛ ani ikin te ñamu doki. ²⁰ Kan men gɛɛl gɔki agi ɛkɛ anji Juaŋyɛ, ɔci kan ɛkɛ yomɛ yaayɛ moodɛnti mena cieki iki ɛkɛ a cyɛɛlɔ neeniyɛ, ɛkɛ a mena jomi jiek budan. Ɔci kan ɛkɛ ani mod ɛkkɛn mena yuartɛ ɛkɛ te woŋgɛ neeni bɛɛy, oŋ ɛkɛ yaakinti ani Juaŋ mena yuartɛ ɛkɛ te woŋgɛ bɛɛ neeni a ɔki? ²¹ Gena jyeka ikin myenninti Juaŋ neeni, agi kan mena ani Juaŋyɛ, dala ɛkta ani mod ɛkki daŋkun.

¹ Maka jyeti agi Yaccu a Kiṭɔ Mena Muonɛ Juaŋ Borayɛ, ɛkkɛn a kɛɛgin Jwaŋa Tolan waakɛnda. Kan maka ani kɛɛgin weegɛnyɛ, ɛkkɛn ani kɛɛgin ɛkɛ daŋkun. ² Kan ikin anin Juaŋ, ɔci kan ikin noŋtin ba jyeka ikin myettinti ɛkɛyɛ, ŋeettin ikin ikin anin kɛɛgin Jwaŋa Tolan awarɛ. ³ Kan ikin anin Juaŋyɛ, ikin noŋin ba jyek ɛkɛ oŋkanda, ɔci jyeka ikin myettinti ɛkɛ neeniyɛ, yeyɔ ikinti bɛɛ. ⁴ Kɛɛgin Jwaŋa Tolanyɛ, ɛkkɛn waka iñɔ wɛnni baanji bwantan ɛkkɛn. Te jyenna ikin jyettin Juaŋti neeniyɛ, ikin yaakinti naŋka iñɔ wɛnni ṭɛɛrji bwantin. ⁵ Kan menga jyeti Yaccuti agi ɛkta agi Kaci Jwaŋa Tolanyɛ, mena neeni yaakinti waka bala iñɔ baan konɛti wɛnni bwandɛ. ⁶ Yaccu Kiṭɔ neeni ɛkɛ a mena cuonnɛ Jwaŋa Tolany, ɛkɛ a Kaci Jwaŋa Tolan. Ɛkɛ ŋeecin ikin ne ɛkɛ agi Kaci Jwaŋa Tolan acaan Jwaŋa Tolan gɔkkin a ɔɔn te ñaalɔ agi ɛkta agɔ Kaci ɛkɛ. Jwaŋa Tolan gɔkcin a ɔɔn te wɔɔka Yaccu buulkiti may, ɔci moki ne Yaccu tuuni men bɛɛ te oŋŋa ɛkɛ ŋaapkiti may. Ɔci Boŋ Juaŋ daŋkun gɔki mieti ikin te Yaccu a ɔɔn moki. Ɔci jyeka guaktan ɛkkɛn neeni bala bolja ne cyɛɛlɔ ɔci awarɛ. ⁹ Kan men baan lwoki ikin te jyek men gɛɛlyɛ, jyeka neeni pwadɔ ikinti ne ḍiɛran ṭɔɔlɛ. Ɔci kan Jwaŋa Tolan lwoki ikin te Kaci ɛkɛyɛ, jyek ɛkɛ neeni aŋka pwad pwad ne tolan. ¹⁰ Kan mena jyeti jyek Kaci Jwaŋa Tolanyɛ, jyeka guagdɛ Juaŋ te Kaci ɛkɛ neeni ŋeejɛ ɛkɛ yomɛti doki. Kan mena jyeti Kaci Juaŋti bɛɛyɛ, bala ba ɛkɛ poŋi gɔki agi Jwaŋa Tolan a mena jomi jieko. Jyek ɛkɛ bala a ɔɔn acaan ɛkɛ jyeti jyeka guaŋŋɛ Juaŋ te Kaci ɛkɛ neeni bɛɛ. ¹¹ Jyeka guaŋŋɛ Jwaŋa Tolan ikinti neeni bala a ɔki? Ɛkɛ gɔki ikinti agi ɛkɛ ikin ‘wonninti tɛɛtin, ɔci agi tɛɛtin neeniyɛ, baadi ywongati bɛɛ, ɔci agi tɛɛtin neeniyɛ, bala Kaci ɛkɛti. ¹² Ɔci kan mena Kaci Jwaŋa Tolan bala yomɛtiyɛ, tɛɛtin bala ɛkɛti. Kan mena Kaci Juaŋ baaw ɛkɛ yomɛtiyɛ, tɛɛtin bala ɛkɛti bɛɛ. ¹³ Ɛkkɛ maka jyeti yenti Kaci Jwaŋa Tolantiy, ‘ya kiey worga ɛkkɛti aŋka ŋeeddɛ ɛkkɛ tɛɛtin bala ɛkkɛti acca doki, ɔci tɛɛtin neeniyɛ, baadi oŋgati bɛɛ. ¹⁴ Çeecin ikin ne pwadan Juaŋ ñamɛti kan ikin toottin ɛkɛti te gengayɛ, ɔci kan gena ikin toottin ɛkɛti neeni bala ba jyeka ɛkɛ buagitiyɛ, ɔci ɛkɛ tieŋdi. ¹⁵ Ɔci kan Juaŋ tieŋdi a ɔɔnyɛ, ŋeecin ikin daŋkun ɛkɛ noŋi ba jyek cɔŋi ikin. ¹⁶ Kan men gɛɛl mod ɛkkɛn men Juaŋ gɛɛl yuartɛ bala noŋi naŋka yaayan gɛɛl a naŋka ɛkɛ eedɛ non lienti bɛɛyɛ, dala ɛkɛ cɔkti Juaŋti te mena neeni, ɔci Jwaŋa Tolan ɛkɛ mena neeni bɔɔktɛ ɔci ‘wondɛ tɛɛtin. Jyeka neeniyɛ, gena jyek maka mwondi te jyek Jwaŋa Tolan bɛɛy. Yeti nɔji gɛɛl bala a nɔjja men eedɛ non lienti. Ɔci ‘ya dɛyi ma te cɔŋŋa ma cɔkti te mena nɔŋdi nɔjja neeni bɛɛ. ¹⁷ Waka naŋŋin ikin yeyin ɛkkɛn waakɛnda a wak nɔjjo. Yeti naŋki gɛɛg etti lien bɛɛ. ¹⁸ Çeecin ikin maka a kɛɛgin Jwaŋa Tolanyɛ, ɛkkɛn noŋi nɔji a ñaccu bɛɛ, acaan Kacca jiennɛ Jwaŋa Tolan bala gɔṭi ɛkkɛn, ɔci Jwaŋa Yaayan yaakinti noŋdi genga ɛkkɛnti bɛɛ. ¹⁹ Çeecin ikin ikin akin kɛɛgin Jwaŋa Tolan, ɔci ŋeecin ikin moki maka yeyin baan wardayɛ, bala byeŋ mena yaayan neeniti. ²⁰ Çeecin ikin Kaci Jwaŋa Tolan bɛɛn doki, ɔci ɛkɛ ikin ‘wonnin ñing tɛɛn aŋka ikin mena awarɛ ŋeettin. Ɔci mena awarɛ neeniyɛ, ɛkɛ bala ciyin iki ikin a cyɛɛlɔ, ɔci Kaci ɛkɛyɛ, gena Yaccu Kiṭɔ. Jwaŋa neeniyɛ, ɛkɛ a Jwaŋa awarɛ, ɔci tɛɛtin ɛkɛ a tɛɛtin awarɛ, baadi bɛɛ. ²¹ Kɛɛgin ‘ya, dala ɛkkɛ waakɔ uuttɛ ɔntɔ te jɔkin yeyin jɔkin maltan ma amaam neeniti. Amɛɛn.