1Kuruntuc

1Kuruntuc

¹ Gena ‘ya, Buuluc mena bornɛ Yaccu Kiṭɔ aŋka aga Cuuda ɛkɛ ba yom Jwaŋa Tolan, ɔci mod ikin Cɔctanic kiewɔn worga neen neeni. ² Worga neeni ooddi kaniica Jwaŋa Tolanti ban Kuruntuc, ooddi maka bornɛ Jwaŋa Tolan, aŋka aga ma ɛkɛ maka pwadin te ñoowin ɛkkɛn ñooki iki Yaccu Kiṭɔ i maka moṭi ɛkɛti noon warday. Ɛkɛ a Ciɛggɔn ɛkkɛn ɔci Ciɛggɔn ikin. ³ Dala Jwaŋa Tolan Wey ikin, ɔci Ciɛggɔn ikin Yaccu Kiṭɔ yomgɛn pwada a pwani ɛkkɛti, ɔci ɛkkɛn ɛkkɛ ‘wontɛ coodi pwanno. ⁴ ’Ya gɔk a pwatcin Jwaŋa Tolanti oŋkanda te ɛkkɛ, acaan Juaŋ yomɛ pwad pwad ɛkkɛti te Yaccu Kiṭɔ. ⁵ Acaan ɛkkɛ korkɔ kuumi te ɛkɛ te pɔyi waakɛnda te jyeka guagdɛ ɛkkɛ waakɛnda, ɔci te ŋeejin ɛkkɛ waak ŋeejɛ waakɛnday. ⁶ Acaan jyeka gɔɔnɔn ɔɔn bora te Yaccu Kiṭɔyɛ, niinjin ɛkkɛ yomgɔti ne tɛyan. Ɛkkɛ balkɛ waka ma ‘wondɛ Juaŋ te Boŋ ɛkɛ waakɛnda doki. ⁷ A ɔŋŋiyɛ, ɛkkɛ kɛɛyɛ Ciɛggɔn ikin Yaccu Kiṭɔ ne oŋŋa ɛkɛ warɛ lɛɛldɛ bora ɔɔn. ⁸ Ɛkkɛ tiidɛyɔ ɛkɛ ne tɛyan ne baaṭi ɔɔn. A ɔŋŋiyɛ, lɔɔn gɛɛl bɛya ɛkkɛ ḍɔɔggɔti te oŋŋa Ciɛggɔn ikin Yaccu Kiṭɔ bɛɛdɛ neeni bɛɛ. ⁹ Jwaŋa Tolan mena ɛkkɛ oonɛ nona ñoowɛ ɛkkɛ iki Ciɛggɔn ikin Yaccu Kiṭɔ Kaci ɛkɛ neeniyɛ, ɛkɛ a mena tieci jyek ɛkɛ waakɛn. ¹⁰ Modg ɔɔn, ‘ya toocca ɛkkɛti te yenti Ciɛggɔn ikin Yaccu Kiṭɔ, dala ɛkkɛ waakida yɔɔddɛ te jwalla ne cyɛɛlɔ. Naa jyeka a kɛɛbgin bala ɛkkɛti bɛɛ, yeti dala ɛkkɛ coodɛ te yoma ne cyɛɛlɔ ɔci te paŋŋa ne cyɛɛlɔ. ¹¹ Modg ɔɔn, ‘ya nɔɔtka ma on tukɛ Klawi agi jyek kɛɛptin baalɔ ɛkkɛti. ¹² Jyeka guagdi ‘ya neeni jitkɛn bala a ɔŋŋi, ɛkkɛ men da gɔki agi, “‘Ya bootca Buulucti,” ɔci mena parɛ moki agi, “‘Ya bootca Apɔɔlɔcti,” ɔci mena parɛ agi, “‘Ya bootca Cipacti,” ɔci mena parɛ moki agi, “‘Ya bootca Yaccu Kiṭɔti.” ¹³ Kiṭɔ warɛ ŋuonnɛ jitin? Buuluc ŋaapci ma kakanti te ɛkkɛ? Ɛkkɛ buulki ma te yenti Buuluc? ¹⁴ ’Ya gɔkca Juaŋti a pwatcin acaan ‘ya buoṭi menga te ɛkkɛti bɛɛ, yeti Kricpac buuli ‘ya yaakkɛn i Gayac, ¹⁵ acaan naa menga gɔkti agi ɛkɛ buulliti ma te yenti ‘ya bɛɛ. ¹⁶ Ɛɛ, on tukɛ Ictɛɛpanucyɛ, buuli ‘ya moki. Menga buuli ‘ya moki maka neeni ŋotkɛnti moki boki? Çeej ‘ya bɛɛ. ¹⁷ Kiṭɔ ‘ya cuonna buor ma bɛɛ. Yeti ‘ya cuonna lor ma te jyek ɛkɛ, oŋ yeti te jyek ñing tɛɛn ma baan budan aŋka war tɛɛn kakan Kiṭɔ aga jyeka budan bɛɛ. ¹⁸ Maka yienyɛ, jyek Kiṭɔ ñaltan a jyeka budan ɛkkɛnti, oŋ yeti ikin a maka yɔɔññɛ ɛkɛyɛ, ɛkɛ ñaltin ikin a war tɛɛn Jwaŋa Tolan. ¹⁹ Acaan kiiwɛ ma worga Juaŋji agi, “‘Ya ñing tɛɛn maka ñingɛn tɛyan nuud jitin, ɔci wyeñ wɔŋi maka wyetkɛn wɔkin uutca ‘ya ɔntɔ.” ²⁰ Ba ‘wana ñingɛ tɛyan bɛ? Ba mena urkinti worga ne tolan bɛ? Ba mena lieṭi jiek jitkɛn yuonga neeniti bɛ? Jwaŋa Tolan ñing tɛɛn iñɔ baanji wɛnni naŋŋɛ a wyeñ booji bɛɛ? ²¹ Acaan Juaŋ te ñing tɛɛn ɛkɛyɛ, maka iñɔ baanji wɛnni dalnɛ, ɛkɛ ñiyɛ te ñing tɛɛn ɛkkɛn pookɛn bɛɛ, Juaŋ yomɛ pwatcin te jyeka loṭin ikin ma ñaltan maka iñɔ a wyeñ booji neeni, aŋka maka jyeddi jyeka neeni yɔɔdɛ ɛkɛ. ²² Ma Icrayiil buagɔn gɔrti naŋka tɛyan, ɔci ma Giriik lieṭi ñing tɛɛno. ²³ Yeti ne ikin loṭin ma ka Yaccu ŋaabɛ mayɛ, lalla neeni ma Icrayiilti bala ba jyeka kooki ɛkkɛn te jyek Juaŋo, ɔci lalla neeni a wyeñ booji Keedin Pookɛnti. ²⁴ Yeti maka bornɛ Juaŋ waakɛnda, kan ɛkkɛn a ma Icrayiil, walla a maka Kɛɛna Pookɛnyɛ, Kiṭɔ a war tɛɛn Jwaŋa Tolan, ɔci a ñing tɛɛn Jwaŋa Tolan ɛkkɛnti. ²⁵ Wyeñ wɔŋi Jwaŋa Tolanyɛ, bala ñamu te wyeñ wɔŋi ma baano, ɔci war tɛɛn ɛkɛyɛ, bala ñamu te war tɛɛn ma baano. ²⁶ Modg ɔɔn, dala ɛkkɛ poŋdɛ ne ɛkkɛ bornɛ Juaŋ ɛkkɛ balgɛ a ɔki. Magga ɛkkɛti ñingɛn tɛɛcin ba bolji ma baan bɛɛ, ɔci waakɛn tɛɛcin bɛɛ, ɔci menga jiedi ma ba mena tolan bɛɛ. ²⁷ Oŋ yeti Juaŋ muowin maka ñingɛn morŋan aŋka maka ñingɛn tɛyan lɔɔddi, ɔci Juaŋ muowin maka waakɛn koyan baan konɛti, aŋka maka waakɛn tɛyan lɔɔddi. ²⁸ Juaŋ muowin maka ḍyɛrin, ɔci maka waaktan ma ɔci maka baaw aŋka maka bala neeni uuttan ɔntɔ. ²⁹ A ɔŋŋiyɛ, naa menga noŋi warɛ Juaŋ ñamɛti bɛɛ. ³⁰ Yeti Juaŋ ɛkkɛ oonɛ ɔci ñaaŋŋɛyɔ i Yaccu Kiṭɔ, mena aŋi ñing tɛɛn ikin te Jwaŋa Tolan mena a pwani ikin, ɔci ikin wanniny. ³¹ A ɔŋŋiyɛ, bala ba jyeka kiigin worga Juaŋji ne gɔkki agi, “Dala mena noŋi warɛyɛ, dala ɛkɛ noŋdi warɛ te Ciɛggɔn.”

¹ Modg ɔɔn, ne ‘ya bɛɛna ɛkkɛtiyɛ, ‘ya ɛkkɛ myennin jyek Juaŋ te jyeka ḍwaŋin ɔci te ñing tɛɛn bɛɛ. ² Acaan ne ‘ya baala ɛkkɛtiyɛ, ‘ya buaga gena parɛ gɛɛl ŋeejja ɛkkɛti aŋan bɛɛ, yeti ‘ya buaga Yaccu aŋka ŋeejja i ŋaamma ɛkɛ ŋaapkiti may. ³ Ɔci ‘ya da waru koy koyo, ɔci buayo, ɔci waru ḍiedan. ⁴ Jyeka guaŋi ‘ya, ɔci jwalla owwan ‘yayɛ, ɛkkɛn guaŋi ‘ya te ñing tɛɛn ma baan budan bɛɛ, yeti ɛkkɛn guaŋi ‘ya te liɛlti Boŋ Juaŋ ɔci war tɛɛn ɛkɛ. ⁵ Aŋka naa jyeni ɛkkɛ bala te ñing tɛɛn ma baan budan bɛɛ, yeti dala jyeni ɛkkɛ bala te war tɛɛn Jwaŋa Tolan. ⁶ Ɔɔn gɔkɔn te ñing tɛɛn maka ñingɛn tɛɛnti, yeti ɔɔn gɔkɔn te ñing tɛɛn yuonga neeniti walla te ñing tɛɛn maka ḍwaŋin yuonga neeni bɛɛ, ɛkkɛn a maka eedɛ Juaŋ ɔntɔ baadi budany. ⁷ Yeti ɔɔn gɔkɔn te jyek Juaŋ jyeka jitkɛn a coggin maka ñingɛn tɛyantiy, ɔci te ñing tɛɛn ɛkɛ ñing tɛɛn guaŋŋɛ ɛkɛ te baaṭi te yuonga baaw te pwani ikiny. ⁸ Maka ḍwaŋin yuonga neeniti jyeka neeni jitkɛn yuarcɛ bɛɛ. Te ɛkkɛn jyeka neeni jitkɛn yuarkitiyɛ, te ɛkkɛn Ciɛggɔn pwadan neeni ŋaabɛ kakanti bɛɛ. ⁹ Bala ba jyeka kiigin worga Juaŋji gɔki agi, “Gena ḍuaññɛ Juaŋ te maka ani ɛkɛyɛ, yuarŋɛ menga te waŋɛ bɛɛ, walla tieŋnɛ menga te jyeñɛ bɛɛ, walla konɛ yuarnɛji menga bɛɛ.” ¹⁰ Gena neeni lɛɛlnɛ Juaŋ bora te Boŋ Juaŋo. Acaan Boŋ ɛkɛ lieṭi waak jitkɛn waakɛnda i wak Juaŋ waka jitkɛn loonan. ¹¹ Acaan a menɛ paŋi men baan ŋeejɛy? Pari ɛkɛ parɛ bɛɛ? Bala a ɔɔn daŋkun, menga bala paŋi Jwaŋa Tolan ŋeejɛ bɛɛ, gena Boŋ Jwaŋa Tolan parɛ aŋka paŋi ɛkɛ ŋeejɛy. ¹² Acca ikin mwokkin Boŋ Juaŋ bɛɛn te Jwaŋa Tolantiy. A ɔŋŋiyɛ, ikin yaakinti waka ikin ‘wonninti Juaŋ neeni jitkɛn yuartin. Ikin mwokkin boŋa iñɔ baanji wɛnni bɛɛ. ¹³ Ɔci ɔɔn gɔkɔn a ɔŋŋi te jyeka laltan ma te ñing tɛɛn ma baan budan bɛɛ, yeti ne ɔɔn loṭɔn te jyek wak Booŋ maka balki Booŋtiyɛ, ɔɔn gɔkɔn te ñing tɛɛn jyeka loṭɛ Boŋ Juaŋy. ¹⁴ Mena baaki Boŋ Jwaŋa Tolan yomɛtiyɛ, waka ma ‘wondɛ Booŋ mugdɛ ɛkɛ yomɛti bɛɛ, acaan waka neeni jitkɛn yuartɛji ɛkɛ bɛɛ, acaan waka neeni jitkɛn yuartan ma te Boŋ Juaŋo. ¹⁵ Mena balki Boŋ Jwaŋa Tolanyɛ, ɛkɛ wak Jwaŋa Tolan jitkɛn ŋeejɛ waakɛnda. Yeti waka bala ɛkɛ yomɛti ŋeejɛ menga bɛɛ. ¹⁶ “A menɛ paŋi Jwaŋa Tolan ŋeejɛy? A menɛ yaakinti ɛkɛ myettɛy?” Yeti ɔɔn balkɔn paŋi Yaccu Kiṭɔ.

¹ Modg ɔɔn, ‘ya yaakati gɔkkan ɛkkɛti ba maka balkin Boŋ Jwaŋa Tolan bɛɛ, oŋ yeti ‘ya gɔkkan ɛkkɛti ba maka baan konɛti, ɔci ‘ya gɔkkan ɛkkɛti bala ba ne ɛkkɛ agɛ kɛɛgin ḍyɛrin Yaccu Kiṭɔti ɔɔn. ² ’Ya ɛkkɛ lallin te jyeka koyan, ga ‘ya ɛkkɛ lallin te jyeka jitkɛn tɛyan bɛɛ. Acca ɛkkɛ yaakɛti muŋi ɛkkɛn men bɛɛ. Ɔci acca men ɔɔnyɛ, ɛkkɛ waakɔ ywaŋŋɛ bɛɛ, ³ acaan ɛkkɛ ciyɛ ba coodda baan konɛti men. Acaan ne kon moni ɔci wɛyyin balki ɛkkɛti menyɛ, ɛkkɛ agɛ ma baan konɛ budan, ɔci noŋɛ ba naŋki ma baan konɛ budan bɛɛ? ⁴ Ne ɛkkɛ men da gɔki agi, “‘Ya bootca Buulucti,” ɔci mena parɛ moki agi, “‘Ya bootca Apɔɔlɔcti,” te naŋki ɛkkɛ neeni ɛkkɛ agɛ ma baan konɛ budan bɛɛ? ⁵ Apɔɔlɔc a menɛ? Ɔci ‘ya Buuluc a menɛ? Pari te lali ɔɔn aŋka ɛkkɛ jyettɛ neeni bɛɛ? Ɔɔn yaakkɔ menga da kanŋan ba kanŋa ɔɔn ‘wonnɔnti Juaŋy. ⁶ ’Ya kookin piinno, ɔci Apɔɔlɔc ɛkkɛn moonnɛ piego, oŋ yeti Juaŋ ɛkkɛn yuolnɛ ñaalɔ. ⁷ Mena pieti kookin ɔci mena mooti kookinyɛ, ɛkkɛn a genga bɛɛ, oŋ yeti Juaŋ aŋka a mena waak ‘wondɛ ḍɔŋo. ⁸ Mena pieti ɔci mena mootiyɛ, ɛkkɛn bala bolja ne cyɛɛlɔ, oŋ yeti men da yɔɔrdi gena ɛkɛ ‘wondi Juaŋ ba taab kanŋa ɛkɛ. ⁹ Ɔɔn agɔn maka kanŋan Juaŋti, ɔci ɛkkɛ agɛ bal Jwaŋa Tolan. Ɛkkɛ agɛ on Juaŋ moki. ¹⁰ Te yom pwani Juaŋ yom pwani ‘wonnata ‘ya neeniyɛ, ‘ya jɔɔtcan te cɔni on ŋwayɛ ba mena gɔɔñgɔn. Ɔci mena parɛ eñi ɛkɛ wyeñɛti, yeti dala menga da waŋɛ tiittɛ te eeno, ne ɛkkɛn balki cɔtki on ŋwaya neeni wyeñɛtiy. ¹¹ Menga gorndi cwoddi ona parɛ gɛɛl te ɛka cɔnnɛ Jwaŋa Tolan neeni moki bɛɛ. On ŋwaya neeniyɛ, gena Yaccu Kiṭɔ. ¹² Kan menga cɔti on ŋwaya neeni wyeñɛti te dahab, ɔci te bil pɔdda, ɔci te gwoyya pwadin, ɔci te jang, ɔci te luom, ɔci te waaŋgiyɛ, ¹³ kanŋa ɛkɛ warɛ lyɛldɛ. Acaan te oŋŋa wannayɛ, maañ menga da nɔɔtki kanŋa ɛkɛ. ¹⁴ Kan maka cɔti on ŋwaya neeni wyeñɛti neeni gɛɛl kanŋa ɛkɛ maañ kɔɔrniyɛ, ɛkɛ ‘wondɛ Jwaŋa Tolan genga. ¹⁵ Kan men gɛɛl kanŋa ɛkɛ ammɛ maañyɛ, kanŋa ɛkɛ nuottin budan, oŋ yeti ɛkɛ aŋka uda te maaño. ¹⁶ Çeejɛ ɛkkɛ ne ɛkkɛ agɛ on Jwaŋa Tolan bɛɛ? Ɔci Boŋ Juaŋ ciyi ɛkkɛti bɛɛ? ¹⁷ Mena on Juaŋ nuudɛ jitinyɛ, ɛkɛ da nuudɛji Juaŋo, acaan on Juaŋyɛ, balkɔn giikin bɛɛ, ɔci ona neeniyɛ, gena ɛkkɛ. ¹⁸ Naa menga warɛ dieddiyɔ parɛ bɛɛ. Kan menga ɛkkɛti gɔki agi ɛkɛ agji ‘wana ñingɛ tɛyan ṭɛɛrji wɛnniyɛ, dala ɛkɛ aga aamma, aŋka ɛkɛ aga mena ñingɛ tɛyan awarɛ. ¹⁹ Acaan waka guaktan ma ṭɛɛrji agi ñing tɛɛnyɛ, ñaldɛ Juaŋ a wyeñ booj bala ba Jyek Juaŋ jyeka A kiigin ne gɔkki agi, “‘Ya labji ɛkkɛn yuarcaji te ñing tɛɛn ɛkkɛn jitin ɔɔn.” ²⁰ Ɔci moki agi, “Ciɛggɔn paŋi maka ñingɛn tɛyan ŋeejɛ a paŋŋa budan.” ²¹ Naa menga warɛ naŋdɛ te kanŋa men baan budan bɛɛ, acaan waak waakɛnda a wak ɛkkɛ. ²² Kan a ‘ya, walla a Apɔɔlɔc, walla a Butruc, ɔci walla baan warda, ɔci walla a tɛɛtin walla lieno, ɔci walla acca ɔci ne ñamu, waka neeni waakɛndayɛ, a wak ɛkkɛ. ²³ Ɔci ɛkkɛ agɛ Ma Kiṭɔ, ɔci Kiṭɔyɛ, a Men Jwaŋa Tolan.

¹ A ɔŋŋiyɛ, dala ma ɔɔn ñaltɔn ba maka kanŋan Kiṭɔti maka ‘wonnɛ ɛkɛ wak Juaŋ waka jitkɛn a cogginy. ² Ɔci kanŋa weegɛn buagɔn dala maka ‘wonnɛ ɛkɛ kanŋa neeni kandi ba jyeka ṭagdɛ ɛkɛy. ³ Kan ɛkkɛ jiek dɔɔdɛ ‘ya wyeñuti, walla kan a godan ma baan budanyɛ, naŋka neeni tolcin ‘yati bɛɛ. ‘Ya waru noŋga godan paru bɛɛ. ⁴ ’Ya yomu wɔɔkcin, yeti naŋka neeni ‘ya naŋda agdi mena pwadan bɛɛ. ⁵ Naa ɛkkɛ jiek naŋdɛ te genga men ne wɔɔka awarɛ men baawi bɛɛ. Da ɛkkɛ kɛɛddɛ lakun ne Ciɛggɔn bɛɛdɛ ɔɔn. Ɛkɛ waka bala miel jitin ɔci waka bala ma yomgɛnti, lɛɛldɛ ɛkɛ bora. Te wɔɔka wannayɛ, Juaŋ menga da ‘wondɛ jiɛd ɛkɛ oŋo. ⁶ Acca modg ɔɔn, waka guaŋi ‘ya neeni, guaŋi ‘ya te war Apɔɔlɔc ɔci te war ‘ya te ɛkkɛ modg ɔɔn aŋka ɛkkɛ urtɛti te ɔɔn, aŋka naa ɛkkɛ poŋdɛ ‘yeettɛ bora jyeka kiigin ŋotkɛnti ɔci menga ɛkkɛti noŋdi warɛ mengati bɛɛ. ⁷ Acaan a menɛ i naŋŋi tol te maka pookɛny? A gena baaw iti oŋ ɛkɛ yuarŋi i bɛɛy? Oŋ ne kan i gena neeni yuarŋi dokiyɛ, oŋ i noŋ waru bala ba ne gena neeni i ‘wonniti Juaŋ a ‘woñgin bɛɛ ɔɔn ogo? ⁸ Ɛkkɛ balkɛ waka ɛkkɛ buagɛ waakɛnda doki. Ɛkkɛ korkɔ kuumi doki. Ɛkkɛ aŋŋɛ cyekin ḍwaŋin te yomg ɛkkɛ pookɔ doki, yeti bolja wanna yɔmjin bɛɛ. ‘Ya baal kɛɛy awarɛ, ka dala te ɛkkɛ aŋŋɛ cyekin ḍwaŋin, aŋka te ɔɔn da aŋŋɔn cyekin ḍwaŋin iki ɛkkɛ. ⁹ Acaan yuarca ‘ya Juaŋ ɔɔn cuudan ɛkɛ neeni lɛɛlnɔn bora te maka coŋin jitin ba maka wanɛ ma te lien aŋka noktan ma. Ɔɔn aŋŋɔn liɛlti waka cɔnnɛ Juaŋti waakɛnda, malɛɛkan ɔci ma baanti daŋkun. ¹⁰ Ɔɔn wyetkɔ baaw te Yaccu, yeti ɛkkɛ balkɛ wyetkɔ ne tolan Kiṭɔti. Ɔɔn waakɔ koocin, yeti ɛkkɛ aŋka waakɔ tɛɛcin, ma noŋi ne pwadan ɛkkɛti, yeti menga bala noŋi ne pwadan ɔɔnti bɛɛ! ¹¹ Ne acca men ɔɔnyɛ, ɔɔn amdɔn koñ ɔci yiɛno, ɔci atɔn waakɔ budan. Ɔɔn jiepkɔn ma. Ɔɔn balkɔn baan bɛɛ. ¹² Ɔɔn kanŋɔn ne pɛñan te byeŋki ɔɔn. Ne ɔɔn ‘walkɔnti mayɛ, ɔɔn gɔkɔn ɛkkɛnti ne pwadan men ɔɔn, ne ɔɔn naŋkɔnti ma ne yaayanyɛ, ɔɔn yomgɔ tieŋnɔn, ¹³ ne ɔɔn jomkɔntiyɔ mayɛ, ɔɔn ṭwoktɔn ɛkkɛnti te yoma pwadan. Ɔɔn baallɔn ba tuok baanji ṭɛɛrji wɛnni, ɔci baallɔn ba giikin baan konɛ wɛnni. ¹⁴ ’Ya kiew jyeka neeni aŋka ɛkkɛ waakɔ aga lɔɔn bɛɛ, yeti ‘ya kiew jyeka neeni aŋka ɛkkɛ ṭyɛldinyɔ ba kɛɛgin ‘ya kɛɛgin onga ‘yay. ¹⁵ Kan ɛkkɛ balkɛ maka wɛɛyi ɛkkɛ a alpn a inyaakkɛn (10,000) Kiṭɔtiyɛ, ɛkkɛ balkɛ weyyɔ ne coŋɔn bɛɛ. Ɛkkɛ oonin ‘ya Yaccu Kiṭɔti te jyeka wonkɛn jyeka pwadin. ¹⁶ A ɔŋŋiyɛ, ‘ya gɔk ɛkkɛti ne pɛñan aŋka ɛkkɛ lɔktɛ ba naŋki ‘ya. ¹⁷ Te naŋka neeniyɛ, ‘ya Timutawuc cuoñña ɛkkɛti, ɛkɛ a kacca ana ‘yay. Ɛkɛ a mena pwadan Ciɛggɔn ñamɛti. Ɛkɛ ɛkkɛ nɔɔttɛ te coodi ‘ya Yaccu Kiṭɔti. Coodi ‘ya bala ba jyeka loṭa ‘ya ma noon warda kaniican jitin neeni. ¹⁸ Ma gɛɛg ɛkkɛti noŋi waakɛn poŋi gɔki agi ‘ya baaljɔ bɛɛdjɔ ḍieŋjɔ ɛkkɛti bɛɛ. ¹⁹ Yeti ‘ya baal bɛɛd ɛkkɛti ne pɛñan kan Juaŋ buagɔny, ‘ya buaga gɔrca war tɛɛn ɛkkɛn. ‘Ya buaga gɔrca jyek maka noŋi waakɛn neeni budan bɛɛ. ²⁰ Acaan cyɛgji Juaŋ ɛkɛ a war tɛɛno. A jyeka budan bɛɛ. ²¹ Ɛkkɛ buagɛ gena? Ɛkkɛ buagɛ ‘ya bɛɛd ecca wiici bieŋuti, walla ‘ya bɛɛd te ani ɔci boŋa pwadan?

¹ Jiek ati noon warda te tomma bala ɛkkɛtiy. Tomma neeni yaayɛ ne tolan moki maka moṭi waka budantiy. Acaan menga bala ɛkkɛti wɛnni niin i ɛŋ weegɛn. ² Ɛkkɛ yaaktiti noŋi waakɔ a ɔki? Ba ɛkkɛ kuuyɛ bɛ? Mena noŋi a ɔɔn wannayɛ, dala ɛkɛ ŋualdɛ bora te ɛkkɛ jitkiti wɛnan. ³ A ɔŋŋiyɛ, ne ‘ya waru baawa ɛkkɛti aŋanyɛ, boŋ ‘ya balgi iki ɛkkɛ aŋan, ɔci ‘ya jiek olja mena noŋi ne yaayan neeni wyeñɛti doki, bala ba ne ‘ya baala aŋan ɔɔn. ⁴ Ne ɛkkɛ wyetkɔ ḍɔɔldɛ te yenti Ciɛggɔn ikin Yaccu Kiṭɔyɛ, ‘ya balgin iki ɛkkɛ te booŋo, ɔci te war tɛɛn Ciɛggɔn ikin Yaccu Kiṭɔyɛ, ⁵ dala ɛkkɛ ‘wana neeni ‘wondɛ Jwaŋa Yaayan bieŋɛti, dala war ɛkɛ baadi, ɔci boŋ ɛkɛ aŋka yɔɔdɛ Ciɛggɔn te oŋŋa ɛkɛ bɛɛdɛy. ⁶ Naŋka noŋɛ ɛkkɛ waakɔ wanna pwatcin bɛɛ. Çeejɛ ɛkkɛ, ñamga ne ḍiɛkan ḍuobja wayi ma ne tolan caaba warda te ɛkkɛn bɛɛ? ⁷ Dala ɛkkɛ nɔji ɔci naŋka yeyin uuttɛ ɔntɔ te ɛkkɛti aŋka ɛkkɛ pwaddɛ, acaan Kiṭɔ ŋaabɛ ma kakanti te ikin. ⁸ Dala ikin codin nɔji ɔci naŋka yeyin waakɛnda neeni daltin, dala ikin cietin te coodi pwani ɔci te coodda awarɛ moki. ⁹ Ɛkkɛ kieŋnin ‘ya worga acaan naa ɛkkɛ ñoodɛ i maka noŋi tomi bɛɛy. ¹⁰ ’Ya gɔk maka moṭi jɔkin yeyinti maka tobin neeni, ɔci maka yomgɛn ḍwaŋin te waak, ɔci maka a ɛɛjan, ɔci maka moṭi jɔkin yeyinti bɛɛ. Kan ɛkkɛ noŋŋɛ a ɔɔnyɛ, ɛkkɛ kaannɛ bora te baan konɛti doki. ¹¹ ’Ya kiewan worga ɛkkɛti acaan naa ɛkkɛ ñoodɛ i mena bardɛ ɛkkɛ a mod ɛkkɛ te Kiṭɔ, oŋ yeti ɛkɛ a tomma, ɔci yomɛ tolcin te waak ɔci moṭi jɔkin yeyinti, ɔci ḍori ma, ɔci nokkin mooy, ɔci a ɛɛja wanna bɛɛ. Mena bala a ɔɔnyɛ, naa ɛkkɛ omdi i ɛkɛ a cyɛɛlɔ bɛɛ. ¹² Te gena aŋka ‘ya jiek olja maka bora wyetkɛnti budany, pari ɛkkɛ jiek oldɛ maka kaniicaji wyetkɛnti bɛɛ? ¹³ Acaan maka bala bora te kaniicajiyɛ, Juaŋ jiek oldɛ ɛkkɛn wyetkɛnti bala ba jyeka a kiigin ne gɔkki agi, “Dala ɛkkɛ mena yaayan neeniyɛ, ŋualdɛ ɔntɔ te kaniicaji wɛnan.”

¹ Ne men gɛɛl ɛkkɛti yomɛ yaayɛ moodɛn gɛɛltiyɛ, ɛkɛ moodɛn tiagdɛyɔ non godan maka a ma Juaŋti bɛɛ ogo? Ba ɛkɛ moodɛn eedɛ ma Juaŋti bɛ? ² Çeejɛ ɛkkɛ Ma Kiṭɔ maka pwadin noŋdi godan maka baan konɛti wɛnni bɛɛ? Ɔci kan maka baan konɛti wɛnni noŋdɛ ɛkkɛ godany, oŋ ɛkkɛ yaakɛti jyeka bala ɛkkɛti ḍyɛrin neeni ñaldɛ pookɔ bɛɛ? ³ Çeejɛ ɛkkɛ a ikin noŋtin godan malɛɛkanti bɛɛ? A ɔŋŋiyɛ, ɛkkɛ jyeka bala ɛkkɛti ñaldɛ ɛkkɛ pookɔ ne koyan budan. ⁴ Oŋ te gena ɛkkɛ godan ɛkkɛ eedɛ bora maka a ma kaniicati bɛɛy? ⁵ ’Ya gɔkka a ɔŋŋi aŋka ɛkkɛ waakɔ aga lɔɔno! Menga bala ɛkkɛti aŋan a mena ñingɛ tɛyan ne tolan aŋka jyeka neeni ñaldɛ ɛkɛ bɛɛ? ⁶ Yeti mod gɛɛl ooddi moodɛn tiagdɛyɔ non ganuun maka a Ma Kiṭɔti bɛɛ ogo? ⁷ Naŋki godan neeni ne baali ɛkkɛtiyɛ, ɛkkɛ buannɛji ɛkɛ doki. Ba ɛkkɛ naŋka damɛ ma ɛkkɛti ḍuattɛ ḍɔɔggɔti bɛ? Ba dienna dyetki ma ɛkkɛ ñingɔ neeni ḍuattɛ ɛkkɛ ḍɔɔggɔti bɛ? ⁸ Yeti ɛkkɛ woodgɔ noŋi ma ñingɛn, ɔci noŋɛ modg ɛkkɛ ñingɛn daŋkun! ⁹ Çeejɛ ɛkkɛ a maka yeyin neeni non cyɛgji Juaŋ yuartan ɛkkɛn baaw bɛɛ? Naa ɛkkɛ dieddɛ ñin menga bɛɛ. Kan a maka tobin, walla kan a maka moṭi jɔkin yeyinti, ɔci kan a maka niin i maka a ‘uayi, ¹⁰ ɔci kan a maka a ɛyi, ɔci maka yomgɛn ḍwaŋin, ɔci maka nokkin mook, ɔci maka ḍor ma, ɔci maka kwayi wak mayɛ, ɛkkɛn waakɛnda dɛndi non cyɛgji Jwaŋa Tolanti bɛɛ. ¹¹ Ma gɛɛg ɛkkɛti bala a ɔɔn te ñamu. Yeti ɛkkɛ pɔŋnɛ Juaŋ te nɔjjo, ɔci ɛkkɛ pwannɛ ɔci aŋŋɛ maka awarɛ te yenti Ciɛggɔn ikin Yaccu Kiṭɔ, ɔci te Boŋ Jwaŋ ikin. ¹² ’Ya dita gɔkca ka “Waak waakɛnda pwadɔ ‘yati,” oŋ yeti waak waakɛnda yɔmjin bɛɛ. “Waak waakɛnda pwadɔ ‘yati,” oŋ yeti genga bala ‘ya naŋda a kɛɛngɔn ɛkɛ bɛɛ. ¹³ “Amyɛ, te kono, ɔci konyɛ, te amo.” Oŋ yeti Juaŋ ɛkkɛn nuudɛji yaakkɛn. Naa wara bala ikinti neeni oltin noŋin ikin tomi bɛɛ, yeti oltin kanŋin ikin gena Ciɛggɔnti. Ɔci Ciɛggɔn noŋi kanŋa te waak ikin. ¹⁴ Juaŋ Yaccu Kiṭɔ jɔɔŋnɛ ñaalɔ te lienti te war tɛɛn ɛkɛ, ɔci ɛkɛ ikin jɔɔŋtin ñaalɔ daŋkun. ¹⁵ Çeejɛ ɛkkɛ ne waak ɛkkɛ ñooki i Kiṭɔ bɛɛ? ‘Ya wara ñoowin i Kiṭɔ owwa bora ɔci ñaagdiyɔ i ɛŋa a tomma? Hayɛllɛ! ¹⁶ Çeejɛ ɛkkɛ, a mena ñoodi i ɛŋa a tomma ɛkkɛn aŋi wara ne cyɛɛlɔ i ɛkɛ bɛɛ? Jyeka a kiigin gɔki agi, “Ɔci ɛkkɛn ñoowin yaakkɛn.” ¹⁷ Oŋ yeti mena warɛ ñaaktiti Ciɛggɔntiyɛ, ɛkkɛn aŋi ba mena ne cyɛɛlɔ i ɛkɛ te booŋo. ¹⁸ Dala ɛkkɛ tomi daldɛ. Nɔjja naŋdi men baan waakɛndayɛ, ɛkɛ noŋi te bora budan, oŋ yeti mena noŋdi nɔji tomiyɛ, ɛkɛ noŋi nɔji war ɛkɛti. ¹⁹ Waak ɛkkɛ ŋeejɛ ne akki on Boŋ Juaŋ mena bɛɛn te Jwaŋa Tolanti mena bala ɛkkɛti neeni bɛɛ? Ɛkkɛ agɛ wak waak ɛkkɛ pookɔ bɛɛ, yeti ɛkkɛ agɛ wak Juaŋo. ²⁰ Ɛkkɛ agɛ wiɛlgɔn, a ɔŋŋi dala ɛkkɛ noŋdɛ ne pwadan Juaŋti te waak ɛkkɛ.

¹ Te taata taaññɛ ɛkkɛ te worga oonɛ ɛkkɛ ne ŋoyɔyɛ, ṭwoggin ‘ya bala a ɔŋŋi, kan i ḍɛññi bɛɛyɛ, pwatcin doki. ² Oŋ yeti te bwaji naŋki tomiyɛ, dala maka a ‘uay men da baltan ɛŋ ɛkɛ, ɔci moong men da baltan ‘war ɛkɛ. ³ ’Uanyɛ, ɛɛŋ ‘wondɛ waka ɛkɛ buagiy, ɔci ɛɛŋ daŋkun noŋdi ba ‘war ɛkɛ ɔɔn. ⁴ Ɛɛŋyɛ, war ɛkɛ te ɛkɛ parɛ bɛɛ, yeti te ‘war ɛkɛ daŋkun, ɔci ‘uan daŋkunyɛ, war ɛkɛ bala te ɛkɛ parɛ bɛɛ, yeti te ɛŋ ɛkɛ daŋkun. ⁵ Naa ɛkkɛ ṭiewɛ yɔtin pookɔ i ɛŋ i bɛɛ, dala ɛkkɛ jiek ñaagdiyɔ ne wɔɔka baali te cɔŋiy, ɔci ɛkkɛ waakɔ ñaagdɛ moki oŋ aŋka naa Jwaŋa Yaayan ɛkkɛ pɔɔdɛ te bolja ɛkkɛ yaakɛti waakɔ mugdɛ bɛɛy. ⁶ ’Ya gɔk jyeka neeni acaan ‘ya ‘yer ɛkkɛ te ḍɛɛn bɛɛ, yeti ‘ya gɔk aŋka dala ɛkkɛ waakɔ ŋeeddɛ, kan ɛkkɛ buagɛ awarɛy. ⁷ ’Ya buaga dala ma waakɛnda ciya budan te moong bala ba ‘ya ɔɔn. Oŋ yeti men da balki gena ɛkɛ ‘wonnɛ Juaŋy, magga buagɔn ḍɛɛdi, ɔci magga buagɔn ḍɛɛdi bɛɛ. ⁸ Acca ‘ya gɔkka te maka baakin moong ɔci moonga a cieky, pwatcin te ɛkkɛn. Dala ɛkkɛn ciya budan te ḍɛɛn ba ‘ya ɔɔn. ⁹ Oŋ yeti kan ɛkkɛn yaaŋnɛti waakɛn tiekɛ bɛɛyɛ, dala ɛkkɛn ḍɛɛdi. Ḍɛɛn aŋka pwatcin te coodda i ciyi budan te ɛɛŋ oŋ buagiti noŋi gena tomiy. ¹⁰ Maka balkɔn moongyɛ, ‘ya ɛkkɛn ‘woñga jyeka neeni, yeti a ‘ya bɛɛ, gena Ciɛggɔn. Ɛɛŋyɛ, naa ‘war ɛkɛ daldɛ bɛɛ. ¹¹ Kan ɛkɛ ‘uarɛ dalniyɛ, dala ɛkɛ ciya budan te ‘uano, ɔci moki dala ɛkkɛn jiek ywaŋtan i ‘uarɛ. Ɔci mena ‘uan daŋkunyɛ, naa ɛŋ ɛkɛ daldɛ bɛɛ. ¹² ’Ya gɔkka maka pookɛnti moki (gena ‘ya, a Ciɛggɔn bɛɛ), kan mod ikin gɛɛl a men Kiṭɔ oŋ ɛkɛ balkɔn ɛŋa jyeti Juaŋti bɛɛ, ɔci ɛkɛ buagɔn ciyi i ɛkɛyɛ, naa ɛkɛ ɛɛŋ daldɛ bɛɛ. ¹³ Ɔci moki kan mena a ɛɛŋ a men Kiṭɔ oŋ ɛkɛ balkɔn ‘wana jyeti Juaŋti bɛɛ, yeti kan ‘uan buagɔn ciyi i ɛkɛyɛ, naa ɛkɛ ‘uan daldɛ bɛɛ. ¹⁴ Acaan ‘wana jyeti Jwaŋa Tolanti bɛɛ neeniyɛ, pwani te ɛŋ ɛkɛ, ɔci ɛŋa jyeti Juaŋti bɛɛ neeniyɛ, pwani te jyeni ‘war ɛkɛ. Kan te bala a ɔɔn bɛɛyɛ, te kɛɛgin ɛkkɛn yɔmjin Juaŋti bɛɛ. Oŋ yeti ba bolja men gɛɛl ɛkkɛnti agi men Juaŋ neeniyɛ, kɛɛgin ɛkkɛn yɔmjin Juaŋti doki. ¹⁵ Oŋ yeti kan mena a men Kiṭɔ bɛɛ neeni buagɔn jyek doortinyɛ, dala ɛkɛ noŋdi ba naŋka ɛkɛ buagiy, acaan mod ɔci kow genga bala ɛkkɛn mugdɛyɔ te coodda wanna bɛɛ. Acaan Juaŋ ikin bornin coodda pwadanti. ¹⁶ Çeej i a ɔki, a ɛŋa jyeti Kiṭɔtiy, ‘war i yɔya i? Ɔci ŋeej i a ɔki, a ‘wana jyeti Kiṭɔtiy, ɛŋ i yɔya i? ¹⁷ Dala men da coodi ɛkɛ bala ba bolja ɛkɛ ‘wonni Juaŋy, ɔci ba borkin Ciɛggɔn men da bornɛy. Jyeka neeniyɛ, ‘ya gɔkca kaniicanti waakɛnda a ɔɔn. ¹⁸ Mena bornɛ Juaŋ oŋ ɛkɛ a ŋudgɔnyɛ, naa ɛkɛ warɛ naŋdɛ a ɛkɛ a ŋudgɔn bɛɛ, ɔci mena bornɛ Juaŋ oŋ ɛkɛ a ŋudgɔn bɛɛyɛ, naa ɛkɛ ŋuttan ma bɛɛ. ¹⁹ Kan men gɛɛl a ŋudgɔnyɛ, a genga bɛɛ, ɔci kan mena ciyi budan te ŋuniyɛ, a genga bɛɛ. Oŋ yeti tiid ganuun Jwaŋa Tolan warɛyɛ, aŋka pwatcin. ²⁰ A ɔŋŋiyɛ, dala men da ciya ba bolja ɛkɛ bornɛ Juaŋy. ²¹ Ɛkkɛ agɛ kɛɛnk ne ɛkkɛ bornɛti Juaŋyɛ? Baatɔ, yeti kan ɛkkɛ balkɛ wɔɔka aŋka ɛkkɛ agdɛ kɛɛnk bɛɛyɛ, dala ɛkkɛ noŋdɛ doki. ²² Acaan mena bornɛ Juaŋ ne ɛkɛ a kɛɛngɔnyɛ, ɛkɛ pɔŋnɛ Ciɛggɔn doki. Bala a ɔɔn daŋkun, kan mena bornɛ Juaŋ ne ɛkɛ a kɛɛngɔn bɛɛyɛ, acca ɛkɛ a kɛɛngɔn Kiṭɔ. ²³ Ɛkkɛ agɛ wiɛlgɔn, A ɔŋŋiyɛ, naa ɛkkɛ agdɛ kɛɛnk ma baan bɛɛ. ²⁴ Modg ɔɔn, dala ma waakɛnda ciya i Juaŋ a cyɛɛlɔ ba borkin ɛkkɛn bornɛ ɛkɛy. ²⁵ Acca te maka a kaalk ɔci maka ṭɔlgyɛ, ‘ya balka jwali gɛɛl te Ciɛggɔnti aŋka guagdi ‘ya te ɛkkɛn bɛɛ, yeti ‘ya ɛkkɛ ‘wondin paŋi ‘ya ba mena pwani Ciɛggɔn ñamɛti te yom pwani ɛkɛy. ²⁶ Yuarca ‘ya acca tɛɛcin te coodi ikin Ma Kiṭɔ. A ɔŋŋiyɛ, ‘ya poŋ ka mena buagɔn ciyi budan te ɛɛŋyɛ, dala ɛkɛ ciya budan ɔɔn. ²⁷ I ḍɛññi ɛɛŋɔ? Yeti naa i pocca ɛkɛ pɔkka bɛɛ. I ḍɛññi boki? Kan baawiyɛ, naa lierca gɛɛl bɛɛ. ²⁸ Yeti kan i ḍɛññiyɛ, naŋka wanna a nɔji bɛɛ. Ɔci kan ṭɔɔl gɛɛl ḍɛyɛ mayɛ, ḍɛɛn ɛkɛ wanna a nɔji bɛɛ, yeti coodda yaayan daŋkun bɛya maka neeniti, ɔci ‘ya buaga ɛkkɛ ‘uottinti coodda yaayan neeni moki bɛɛ. ²⁹ Modg ɔɔn, gena gen kona guagdi ‘ya neeni, wɔɔka bɛɛdɛ Kiṭɔ cualcin acca, ɔci ne ñamu ɔɔnyɛ, dala maka balki moong neeni cootti ba ɛkkɛn balkiti moong bɛɛ ɔɔn. ³⁰ Ɔci maka yomgɛn yeyinyɛ, dala ɛkkɛn ciya ba ɛkkɛn yomgɛn yieki bɛɛ ɔɔn. Ɔci maka yomgɛn ñɔyinyɛ, dala ɛkkɛn ciya ba ɛkkɛn yomgɛn ñɔɔki bɛɛ ɔɔn. Ɔci maka wɛɛṭi waakyɛ, dala ɛkkɛn ciya ba ɛkkɛn baakiti waak ɔɔn. ³¹ Ɔci maka kanŋan te waka iñɔ ṭɛɛrji wɛnniyɛ, naa ɛkkɛn yomgɛn ḍuattanti waka neeniti bɛɛ. Acaan ṭɛra ciyin ikin acca neeni ati noŋi baadi doki. ³² ’Ya buaga naa ɛkkɛ poŋɛ jiek yomgɔti ne coŋɔn bɛɛ. Mena ḍɛñi bɛɛyɛ, ɛkɛ poŋi te wak Ciɛggɔn aŋka Ciɛggɔn yomɛ pwada. ³³ Mena ḍɛñiyɛ, ɛkɛ poŋi te waka baanji ṭɛɛrji wɛnni aŋka ɛkɛ ɛɛŋɛ ywaŋdɛ yomɛti. ³⁴ Ɔci kanŋan ɛkɛ ŋuottin jitin, ɛŋa ḍɛyɛ ma bɛɛ walla a ṭɔɔl menyɛ, ɛkɛ poŋi te wak Ciɛggɔn aŋka ɛkɛ ciyi te wara pwadan, ɔci te boŋa pwadan Ciɛggɔn ñamɛti. Yeti ɛŋa ḍɛyɛ ma dokiyɛ, ɛkɛ poŋi te waka baanji wɛnni aŋka ‘war ɛkɛ yomɛ pwada. ³⁵ ’Ya gɔk a ɔɔn acaan ‘ya yɔŋ ɛkkɛ a ywaŋŋo, ga ‘ya waka cyɛgan kɔɔnja ɛkkɛ ḍɔɔggɔti bɛɛ, yeti ‘ya buaga dala ɛkkɛ noŋdɛ gena pwadan ɔci awarɛ. Ɔci dala ɛkkɛ waakɔ ‘wondɛ Ciɛggɔn waakɛnda aŋka paŋi ɛkkɛ cyɛndi jitin bɛɛ. ³⁶ Kan men gɛɛl poŋi gɔki agi ɛkɛ noŋjɛ ne pwadan ñan ɛkɛti bɛɛ, acaan ɛkɛ aŋi ṭɔla tolan dokiyɛ, dala ɛkɛ noŋdi ba naŋka ɛkɛ buagɛ, ɔci dala ɛkkɛn ḍɛɛdi. Ɛkɛ noŋi nɔji te naŋka wanna bɛɛ. ³⁷ Yeti mena yomɛ tiektɛ, ɔci ñan ɛkɛ tiidiyɔ ciya a ṭɔɔl ɔɔnyɛ, ɛkɛ noŋi ne pwadan. ³⁸ A ɔŋŋiyɛ, mena ñan ɛkɛ ḍɛɛdɛyɛ, ɛkɛ noŋi ne pwadan, yeti mena ñan ɛkɛ daldɛ te ḍɛɛnyɛ, ɛkɛ aŋka noŋi ne pwadan nɔñji. ³⁹ Mena ɛɛŋ ne ‘war ɛkɛ ciyi a tɛɛta menyɛ, ɛkɛ ḍwaŋɛ wɔɔkcin bɛɛ, yeti kan ‘war ɛkɛ tuun dokiyɛ, ɛkɛ ḍwaŋɛ wɔɔŋi oŋ aŋka ḍɛɛdɛ ‘wana bala ɛkɛ buagɛy, yeti ɛkɛ ḍɛɛdɛ ‘wana a men Kiṭɔ. ⁴⁰ Yeti ‘ya poŋ ka ɛkɛ yomɛ ñɔya ñɔɔn ne tolan ne ɛkɛ coodi budan te ḍɛɛny. Gena paŋi ‘ya neeni, ɔci ‘ya poŋ ‘ya daŋkun balka Boŋ Juaŋo.

¹ Acca te jyek yoŋga ‘yɛrtan ma jɔkin yeyinti neeniyɛ, ŋeecin ikin, ikin waakida balkin ŋeejin ikin waak ŋeeciny. Çeejinyɛ, ɛkɛ a yɛcan kotti ne ñaalɔ. Yeti aniyɛ, ɛkɛ aŋka cɔti warɛ. ² Kan men gɛɛl poŋi gɔki agi ɛkɛ waak ŋeejjɛ waakcindayɛ, haldu, ɛkɛ genga ŋeejɛ awarɛ men bɛɛ. ³ Yeti kan men gɛɛl ani Juaŋyɛ, ɛkɛ ŋeejɛ Jwaŋa Tolan. ⁴ Oŋ a ɔŋŋi te jyek yoŋga ‘yɛrtan ma jɔkin yeyinti neeniyɛ, ŋeecin ikin jɔkin waakɛnda iñɔ baanji wɛnniyɛ, ɛkkɛn a waagga bɛɛ, ɔci Juaŋ gɛɛl bala parɛ moki bɛɛ, gena Jwaŋa Tolan parɛ. ⁵ Ne kan waak gɛɛg bala bartan ma a “jɔkin yeyin” iñɔ ṭɛɛrji ɔci pɔlijiyɛ, bala ba “jɔkin yeyin” bala kɔɔna kɔɔni ɔci “cyekin” kɔɔna kɔɔnno. ⁶ Ikin balkin Juaŋ ne cyɛɛlɔ budan. Gena Jwaŋa Tolan Wey ikin, mena waak waakɛnda bɛɛn te ɛkɛtiy, ɔci ikin moki tɛɛtin te ɛkɛ. Ɔci ikin balkin Ciɛggɔn ne cyɛɛlɔ, Yaccu Kiṭɔ mena waak waakɛnda bɛɛn te ɛkɛtiy, ɔci ikin moki bɛɛnin te ɛkɛti. ⁷ Jyeka neeni ŋeecɔn ma waakɛnda bɛɛ. Yeti ma gɛɛgyɛ, ɛkkɛn waakɛn aanɛ te ami waka ‘yɛrtan ma jɔkin yeyinti, ɔci ɛkkɛn poŋi gɔki agi waka ‘yɛrtan ma jɔkin yeyinti neeniyɛ, ‘yɛrŋi ma aŋŋi wak jɔkin agi wardan. Ɔci acaan ɛkkɛn yomgɛn koocinyɛ, ɛkkɛn yomgɛn aŋi giikin. ⁸ Oomdinyɛ, ɛkkɛn ikin eetin Jwaŋa Tolanti bɛɛ, ɔci kan ikin omminyɛ, ikin yɔɔrtin genga te ami ɛkkɛn bɛɛ. ⁹ Yeti dala i waŋu tiicca aŋka naa naŋki i neeni aga guonan tuor mod ɛkkɛ mena yomɛ koyan neeni bɛɛ. ¹⁰ Kan mena warɛ koyan gɛɛl, i a mena balki ŋeejin neeni yuardi baal om waka ŋartan ma jɔkin yeyinti neeni on jɔkin yeyin neeniyɛ, ɛkɛ yomɛ oldɛti ɔci omdi wak jɔkin yeyin neeni acaan ɛkɛ i yuarŋi baal om wak jɔkin bɛɛ? ¹¹ Te ñing tɛɛn iyɛ, mod ɛkkɛ ‘wana yomɛ koyan mena Kiṭɔ tuun te ɛkɛ daŋkun neeniyɛ, nuottin jitin doki. ¹² Nɔjja naŋa i modgɔti te amma omi i wak jɔkin yeyin ɔci yooci i yomg ɛkkɛn yomga koyan wannayɛ, i noŋ nɔji Kiṭɔti. ¹³ A ɔŋŋiyɛ, kan ami wak jɔkin ɛkɛ a gena mod ɔɔn yiɛptɛ iñɔyɛ, ‘ya omja yoŋi waka ‘yɛrtan ma jɔkin yeyinti gɛɛl moki aŋka mod ɔɔn ḍɛmdi te naŋki ‘ya bɛɛ.

¹ ’Ya ḍwaŋu wɔɔkcin bɛɛ? Pari ‘ya a cuuda bɛɛ? ‘Ya Ciɛggɔn ikin Kiṭɔ yuarŋ bɛɛ? Pari ɛkkɛ a ma kanŋa ‘ya Ciɛggɔnti bɛɛ? ² Kan ‘ya a cuuda maka pookɛnti bɛɛyɛ, ‘ya a cuuda ɛkkɛti, acaan ɛkkɛ agɛ wyeñ kanŋa ‘ya Ciɛggɔnti. ³ Gena ṭwoggin ‘ya maka poci ‘ya neeniti neeni. ⁴ Hay! Yɔmjin ɔɔnti ne ɔɔn omɔn ɔci motɔn te wak kanŋa ɔɔn bɛɛ? ⁵ Hay! Yɔmjin ɔɔnti ne moong ɔɔn wɛɛdɔn ba cuudan pookɛn, kan ɔɔn balkɔn moong bɛɛ? Ɔci ba modg Ciɛggɔn ɔci Cipac bɛɛ? ⁶ Walla ɔɔn yaakkɔ i Barnabac aŋka a maka kanŋan waak pookɛn aŋka ciyɔn tɛɛtɔn ɔɔn? ⁷ A menɛ kanŋan a ackan oŋ warɛ ḍɔɔktɛ bilk parɛy? A menɛ cuoti jang jiniinaji oŋ omi jang ṭɔlgɛn bɛɛy? A ḍɛɛnɔn ɔki moti ak mala ciddɛ ɛkɛ bɛɛy? ⁸ Jyek ‘ya neeni a jyek ma baan budan boki? Pari ganuun gɔki jwalla neeni moki bɛɛ? ⁹ Acaan jyeka a kiigin jyek ganuun Muuca gɔki agi, “Naa yaan ḍyɛga tukɛti ne ɛkɛ baali deyi pok bɛɛ.” I poŋ Juaŋ poŋi te yotk pookɛn ne ɛkɛ gɔkki jwalla neeni nɛ? ¹⁰ A’a, a ɔɔn bɛɛ. Ɛkɛ bala poŋi te ikin. Jyeka neeni kiiwɛ ma te ikin. Mena ooṭi ṭɛɛr konɛ ɔci mena ɛṭi pokyɛ, ɛkɛ noŋi kanŋa ɛkɛ ɔci jyeti kɛɛy acaan ɛkɛ yɔɔrdi waak te kanŋa ɛkɛti. ¹¹ Kan ɔɔn kookin pwadin piinnɔn ɛkkɛ yomgɔtiyɛ, oŋ yɔmjin doki kan ne ɔɔn yɔɔrdɔn waak te ɛkkɛti bɛɛ? ¹² Kan maka pookɛn gɛɛg ñoonɛ i ɛkkɛ te eñi waakyɛ, pari ɔɔn a maka eci ne tolan nɔñji bɛɛ? Oŋ yeti ɔɔn naŋka awarɛ neeni naŋŋɔn bɛɛ? Yeti ɔɔn naŋka neeni waakɛnda ḍuannɔn ḍɔɔggɔti, acaan naa pɔy jyeka wonkɛn jyeka pwadin te Kiṭɔ neeni uuldɔnti bɛɛ. ¹³ Çeej i maka kanŋan on Juaŋ ona tolanti oomdin ɛkkɛn bɛya te on Juaŋ ona tolanti, ɔci maka kanŋan nona ɛrki ma waakyɛ, ɛkkɛn omi waka ‘yɛrtan ma neeni daŋkun bɛɛ? ¹⁴ Bala a ɔɔn daŋkun, Ciɛggɔn gɔkkin agi maka kanŋan loṭi ma te worga Jwaŋa Tolanyɛ, waka amtan ɛkkɛn bɛya te kanŋa lorki ɛkkɛn ma te worga Juaŋti daŋkun. ¹⁵ Yeti ‘ya noŋi waka neeni gɛɛl bɛɛ, walla ‘ya kiew worga aŋka ‘ya ‘wonta ma waka neeni gɛɛl bɛɛ, acaan lyena tuuda ‘ya aŋka yɔmjin, aŋka naa menga pwani ‘ya naŋdɛ aga gena budan te naŋki warɛ bɛɛ! ¹⁶ Ne ‘ya loṭa jyeka wonkɛn jyeka pwadin matiyɛ, ‘ya balka genga aŋka ‘ya jiɛtati ma bɛɛ, acaan lalla loṭa ‘ya neeni ɛkɛ a gena bala ‘ya ḍwaŋuti aŋka naŋdi ‘yay. Kan ‘ya lor ma te jyeka neeni bɛɛyɛ, naŋka yaayan bɛya ‘ya wyeñuti! ¹⁷ Kan ‘ya lor ma te yom ‘ya waanɛyɛ, ‘ya yɔɔra genga te Juaŋti. Yeti kan ‘ya lor te yom ‘ya waanɛ bɛɛyɛ, kanŋa ‘ya ‘wonnata Juaŋ neeni naŋi ‘ya awarɛ bɛɛ. ¹⁸ ’Ya ‘wonta ma gena? A’a, ne ‘ya loṭa jyeka wonkɛn jyeka pwadin matiyɛ, ‘ya lor acaan ‘ya ‘wonta ma genga bɛɛ. Yeti ‘ya noŋja gena kanŋa ɔci wierta te paŋi waka ‘ya ‘wontati ma te kanŋa ‘yay. ¹⁹ ’Ya a kɛɛngɔn men baan gɛɛl acaan ɛkɛ ‘ya ḍɔɔkta bilk kanŋa ‘ya bɛɛ, yeti ‘ya waru naŋi a mena kanŋan mati waakɛnda aŋka ɛkkɛn owwa Kiṭɔti ne coŋɔn. ²⁰ Ne ‘ya baala kanŋa ma Icrayiiltiyɛ, ‘ya baal ciy ba coodi ɛkkɛn ɔɔn, aŋka ‘ya yaakati ɛkkɛn owwa Kiṭɔti. Ɔci ‘ya baal noŋ ba ne ‘ya baala byeŋ ganuun Muuca ɔɔn, ne ‘ya baala kanŋin iki maka balki jyek ganuun aŋka ‘ya ɛkkɛn owwa Kiṭɔti. ²¹ Maka baakɛ ganuunyɛ, ‘ya baali ba ne baakati ganuun ba ɛkkɛn ɔɔn. Yeti ‘ya baaka ganuun Juaŋ bɛɛ, yeti ‘ya balka ganuun Kiṭɔ. Oŋ ‘ya waru naŋi ba baakati ganuun ɔɔn, aŋka ‘ya maka baaki ganuun neeni owwa Kiṭɔti. ²² Maka waakɛn koyantiyɛ, ‘ya waru naŋi ba ‘ya waru koyi ba ɛkkɛn ɔɔn, aŋka ‘ya ɛkkɛn owwa Kiṭɔti. ‘Ya aŋi waak waakɛnda mati waakɛnda aŋka ‘ya ma gɛɛg uddo. ²³ ’Ya noŋ a ɔɔn te jyeka loṭa ‘ya ma a jyeka wonkɛn jyeka pwadin aŋka naŋka pwadan bɛya ‘yati daŋkun te jyeka neeniti. ²⁴ Çeejɛ ɛkkɛ non boddin maka ñwobbɔ ɛkkɛn ywoddɔ waakɛnda, oŋ mena ma boddɛ aŋka ‘wontan ma genga bɛɛ? A ɔŋŋiyɛ, dala ɛkkɛ kuadɛ aŋka gena neeni buuŋdɛ ɛkkɛ. ²⁵ Maka ñieyi waakɛnda ɛkkɛn tieci waakɛn te waak waakɛnda. Ɛkkɛn noŋi a ɔɔn aŋka ɛkkɛn yɔɔrdi taagga bɔnnin taagga baadi budan neeni. Yeti ikinyɛ, yɔɔrtin taagga baadi bɛɛy. ²⁶ ’Ya yiŋ mɔr amaam budan bɛɛ, ɔci ‘ya jieb noon te buam budan amaam ba mena jieb jwami budan ɔɔn bɛɛ. ²⁷ Yeti ‘ya waru tiido, ɔci ‘ya agdi ḍuaŋa ɛkɛ, dita ‘ya yɔmja te genga te lalla loṭa ‘ya neeni bɛɛ.

¹ ’Ya buaga dala ŋeeddɛ ɛkkɛ, hay modg ɔɔn! Weyi ikin waakɛnda bala ati pɔli pwanɛti, ɔci ɛkkɛn Tola Tidan jyɛdɛji. ² Ɔci ɛkkɛn waakɛnda buullɛ Jwaŋa Tolan te pɔllo, ɔci toolji moki aŋka ɛkkɛn aga maka bootcin Muucatiy. ³ Ɔci ɛkkɛn waakɛnda omi ama pooktan, ⁴ ɔci ɛkkɛn waakɛnda moti pyega pooktany. Acaan ɛkkɛn moti te pyega bɛɛn te guonan pooktanti, guonan bala ati i ɛkkɛn a cyɛɛlɔy. Ɔci guonan neeni Gena Kiṭɔ. ⁵ Yeti ɛkkɛn muŋŋɛ Juaŋ waakɛnda bɛɛ, acaan ɛkkɛn ḍɛɛmdin wɔɔŋji aŋan. ⁶ Waka neeni mieti ikin aŋka naa ikin antin naŋki nɔji ba ɛkkɛn moki ɔɔn bɛɛ. ⁷ Naa ɛkkɛ agdɛ maka moṭi jɔkin yeyinti bɛɛ, acaan ɛkkɛn te baaṭi ma gɛɛg bala moṭi jɔkin yeyin neeniti bala ba kiiwɛ ma agi, “Ma cooccin iñɔ aŋka omi ɔci moti, ɔci ɛkkɛn jɔŋŋin ñaalɔ aŋka ñiɛldi.” ⁸ Naa ikin noŋtin tomi ba ɛkkɛn ɔɔn bɛɛ. Ɛkkɛn gɛɛg noŋi tomi ɔci ḍɛɛmdin tuun a alpn a men baan wyetkɛn ne ḍoogɔ (23,000) te oŋŋa ne cyɛɛlɔ. ⁹ Naa ikin Ciɛggɔn pɔɔtin bɛɛ. Acaan ma gɛɛg ɛkkɛntiyɛ, Ciɛggɔn pɔɔyɛ, ɔci ɛkkɛn kooyɛ kogi ɔci tuuni. ¹⁰ Ɔci walla naa ikin ywontin waakɔ ba ma gɛɛg ɛkkɛnti ne ywoñki waakɛn te baaṭi ɔci ɛkkɛn yaaññɛ Malɛɛka Yooci Noon wanna bɛɛ. ¹¹ Naŋka neeni bɛɛn ɛkkɛnti aŋka ɛkkɛn myettan, yeti ɛkkɛn kiiwɛ ma, aŋka loṭi ikin maka acca yuonga ookkin ne ŋoyɔ neeni. ¹² A ɔŋŋiyɛ, dala mena poŋi gɔki agi ɛkɛ yɔɔdjɛ ne tɛyan neeni waŋɛ tiittɛ aŋka naa ɛkɛ ḍɛmdi bɛɛ. ¹³ Pɔɔta parɛ gɛɛl bɛɛn ɛkkɛti bɛɛ, gena pɔɔta ŋeecɔn ma waakɛnday. Yeti Juaŋ ɛkɛ pwad pwado. Ɔci ɛkɛ ɛkkɛ daldɛ pɔɔt jitin ne tolan ne ɛkkɛ bwanditiji ɔɔn bɛɛ. Ɛkɛ ɛkkɛ ‘wondɛ war tɛɛn aŋka ɛkkɛ yomgɔ tiektɛ, ɔci ɛkkɛ ‘wondɛ pɔya ɛkkɛ koodɛ boray. ¹⁴ A ɔŋŋiyɛ, hay modg ɔɔn maka ana ‘yay, dala ɛkkɛ waakɔ uuttɛ te mali jɔkin yeyinti. ¹⁵ ’Ya gɔk maka ñingɛn tɛyantiy, dala ɛkkɛ gɔrtɛ gena guagdi ‘ya acca neeni ne baali a ɔkiy. ¹⁶ Kubaaya motin pyeg luutkin Ciɛggɔn, ɔci ikin gɔkin a pwatcin te ɛkɛ neeni, ne ikin motin ɛkɛyɛ, ikin ñoowin te yimg Kiṭɔ. Ɔci byentan wɛttin ikin jitin neeniyɛ, ikin ñoowin te war Kiṭɔ. ¹⁷ Acaan byentan a cyɛɛlɔ budan ɔci ikin coŋkin, yeti ikin agin wara ne cyɛɛlɔ budan acaan ikin ñoowin te byentan ne cyɛɛlɔ. ¹⁸ Gɔrtɛ ma Icrayiil maka omi waka ‘yɛrtan may, pari ɛkkɛn ñoowin te nona ɛrki ma waak bɛɛ? ¹⁹ ’Ya gɔkca a ɔki, waka maltan ma a jɔkin yeyin neeni a genga? Walla waka ‘yɛrtan ma jɔkin yeyin neeniti a genga? ²⁰ A’a, waka ‘yɛrtan ma baan konɛyɛ, ŋoortan ɛkkɛn jɔkin yeyin, ŋoortan Jwaŋa Tolan bɛɛ. ‘Ya buaga naa ɛkkɛ ñoodɛ i jɔkin yeyin bɛɛ. ²¹ Ɛkkɛ yaaktɛti mottɛ pyeg luutkin Ciɛggɔn i pyeg luutkin jɔkin yeyin bɛɛ. Ɔci moki ɛkkɛ yaaktɛti ñoodɛ te am Ciɛggɔn ɔci am jɔkin yeyin bɛɛ. ²² Ikin poccin Ciɛggɔn aŋka ɛkɛ loondi ikinti ogo? Ɔci ikin waakɔ tɛɛcin te war tɛɛn ɛkɛ boki? ²³ Waak waakɛnda pwadɔ, oŋ yeti waak waakɛnda yɔmjin bɛɛ. Waak waakɛnda pwadɔ ‘yati, oŋ yeti waak waakɛnda i uutti ñamu bɛɛ. ²⁴ Naa ikin menga poŋdi te war ɛkɛ parɛ bɛɛ. Dala ɛkɛ poŋdi te war moodɛn, ɔci te gena pwadan te ɛkɛy. ²⁵ Yoŋga wyɛltan ma te dukkan yoŋgitiyɛ, ɛkkɛ omdɛ ɛkkɛn. Yeti naa ɛkkɛ yomgɔ tooci jiek bɛɛ. ²⁶ Bala ba jyeka kiigin gɔki agi, “Šɛɛr konɛ ɔci waka bala ɛkɛ konɛti waakɛndayɛ, a wak Ciɛggɔn.” ²⁷ Kan ɛkkɛ ‘uommɛ mena jyeti Juaŋti bɛɛ, amti oŋ kan ɛkkɛ attiyɛ, dala ɛkkɛ omdɛ waka oodɛ ɛkɛ ɛkkɛ ñomgɔti waakɛnda, naa ɛkkɛ tooci jiek yomgɔti bɛɛ, ²⁸ oŋ yeti kan ɛkkɛ nɔɔnnɛ menga agi, “Waka neeni ŋaarŋi ma nona ɛrki ma waak jɔkin yeyintiyɛ,” naa ɛkkɛ omdi bɛɛ, acaan te mena ɛkkɛ nɔɔnnɛ wanna, ɔci te yom ɛkɛ moki. ²⁹ ’Ya gɔk te yomg ɛkkɛ bɛɛ. ‘Ya gɔk te yomg maka pookɛn. Menga tooci agi, “Yom mena parɛ yom ‘ya mugdɛyɔ ogo? ³⁰ Kan ‘ya gɔkcan Juaŋti a pwatcin ɔci omjan amy, oŋ mena parɛ jiek oldɛ ‘ya wyeñuti te gena gɔŋna ‘ya Juaŋti a pwatcin ogo?” ³¹ Kan ɛkkɛ omɛ walla motɛ walla noŋɛ naŋki gɛɛlyɛ, dala ɛkkɛ naŋka neeni naŋdɛ waakɛnda te jied Jwaŋa Tolan. ³² Naa ɛkkɛ agdɛ guonan tuor ma Icrayiil, ɔci Keedin Pookɛn, ɔci kaniica Jwaŋa Tolan bɛɛ. ³³ Ɔci moki ‘ya buaga ma waakɛnda yomgɛn pwada te naŋka naŋdi ‘ya waakɛnday, ‘ya lier waka pwadin te war ‘ya paru bɛɛ. Yeti ‘ya lier te pwani ma waakɛnda aŋka ɛkkɛn uda.

¹ Dala ɛkkɛ lɔktɛ ba naŋki ‘ya bala ba ne ‘ya lɔka naŋki Kiṭɔ ɔɔn. ² Modg ɔɔn, ‘ya baal jiey ɛkkɛ acaan ɛkkɛ balgɛ poŋi te ‘ya, ɔci balgɛ noŋɛ ba jyeka ɛkkɛ lallin ‘ya waakɛnday. ³ ’Ya buaga dala ɛkkɛ tieŋdɛ ne pwadan. Kiṭɔyɛ, ɛkɛ a wyeñ maka a ‘uay waakɛnda, ɔci wyeñ mena a ɛɛŋyɛ, a ‘uano. Ɔci Kiṭɔyɛ, wyeñ ɛkɛ a Jwaŋa Tolan. ⁴ Kan mena ‘uan gɛɛl cɔki Juaŋti ɔci mieti ma te jyek Juaŋ ne ɛkɛ wyeñɛ a kwomgɔn te taagga ɔɔnyɛ, ɛkɛ noŋi ne yaayan Kiṭɔti. ⁵ Ɛŋa cɔki Juaŋti ɔci mieti ma te jyek Juaŋ ɔci wyeñɛ a kwomgɔn te bworŋ bɛɛyɛ, ɛkɛ noŋi ne yaayan wyeñ ɛkɛti. Kan ɛkɛ wyeñɛ kwommɛ bɛɛyɛ, bala ba ɛkɛ wyeñɛ ‘yɛnnɛ doki no. ⁶ Kan mena ɛɛŋ kwomi wyeñɛ bɛɛyɛ, dala jyeyi ɛkɛ tuomdɛ bora. Kan a lɔɔn mena ɛɛŋti te twomti ɔci yiɛli jyeyi borayɛ, dala ɛkɛ wyeñɛ kwomdɛ. ⁷ Naa mena ‘uan ɛɛŋdi genga wyeñɛti ne ɛkɛ cɔki bɛɛ. Acaan ɛkɛ aŋŋɛ Juaŋ ba bolji ɛkɛ, ɔci ɛkɛ a pwani Jwaŋa Tolan. Yeti mena a ɛɛŋyɛ, ɛkɛ a pwani mena ‘uano. ⁸ Acaan mena ‘uan bɛɛn te mena ɛɛŋti bɛɛ. Mena ɛɛŋ aŋka bɛɛn te mena ‘uanti. ⁹ Mena ‘uan aŋŋɛ Juaŋ oŋnɛ mena ɛɛŋ bɛɛ. Mena ɛɛŋ aŋka aŋŋɛ Juaŋ oŋnɛ mena ‘uano. ¹⁰ A ɔŋŋiyɛ, dala mena a ɛɛŋ wyeñɛ kwomdɛ te ‘war ɛkɛ, ɔci te malɛɛkan moki. ¹¹ Te coodda ikin ciyin te jyek Juaŋyɛ, mena ɛɛŋ ciyi parɛ ḍwaŋɛ wɔɔkcin te mena ‘uan bɛɛ, ɔci mena ‘uan daŋkun ciyi parɛ ḍwaŋɛ wɔɔkcin te mena ɛɛŋ bɛɛ. ¹² Acaan mena ɛɛŋ bɛɛn te mena ‘uanyɛ, mena ‘uan daŋkun jiedi ma te mena ɛɛŋo. Oŋ yeti waak waakɛnda bɛɛn te Jwaŋa Tolanti. ¹³ Dala ɛkkɛ gɔrtɛ jwalla mugdɛ ɛkkɛ te jyeka neeniti te waak ɛkkɛ pookɔ. Pwatcin a ɔɔn mena ɛɛŋti ne ɛkɛ cɔki Juaŋti wyeñɛ daldɛ te kwomiyɛ? ¹⁴ Ɛkkɛ jyek bolja te baaṭi ŋeejɛ ne loṭi ɛkkɛ agi kan mena a ‘uan jyeyi ɛkɛ daldɛ ne becinyɛ, etti lɔɔn ɛkɛti bɛɛ? ¹⁵ Oŋ yeti kan mena ɛɛŋ jyeyyɛ beciy, pari pwani ɛkɛ bɛɛ? Ɛkɛ ‘wonnɛ Juaŋ jyeyya becin aŋka kwomi ɛkɛ wyeñɛ. ¹⁶ Kan mena buagɔn tyewwinyɛ, ɔɔn balkɔn naŋka wanna bɛɛ, ɔci kaniica Jwaŋa Tolan balkɔn naŋka wanna daŋkun bɛɛ. ¹⁷ ’Ya buaga ɛkkɛ myettin te jyeka a caagin gɛɛg. Ɔci ‘ya baal jiey ɛkkɛ bɛɛ, acaan ne ɛkkɛ ḍwoṭɛ wyetkɔ a cyɛɛlɔ kaniicajiyɛ, ɛkkɛ ḍwoṭɛ wyetkɔ te pwani bɛɛ, ɛkkɛ ḍwoṭɛ wyetkɔ te naŋki yoño. ¹⁸ Gena jwali ‘ya jwalla te ñamu neeni, ne ɛkkɛ ḍwoṭɛ wyetkɔ ba ma kaniicayɛ, ‘ya tieŋŋan agi jyek kɛɛptin baalɔ ɛkkɛti, ɔci jyeka neeni gɛɛg mugdi ‘ya. ¹⁹ ’Ya yomu moda te jyeka wanna bɛɛ. Acaan jyek kɛɛptin ne balki ɛkkɛtiyɛ, maka a Ma Kiṭɔ woodgɛn waakɛn lɛɛltan bora te mati. ²⁰ Ne ɛkkɛ wyetkɔ ḍɔɔldɛ aŋka omiyɛ, ama amdɛ ɛkkɛ wanna ɛkkɛ omɛ Ciɛggɔnti bɛɛ. ²¹ Acaan ne ɛkkɛ omɛyɛ, ɛkkɛ kɛɛwwɛ yɔtin bɛɛ. A ɔŋŋi ɛkkɛ men gɛɛl aŋka daldɛ amɛ koño, ɔci ɛkkin pookɛn aŋka nokkin mooyo. ²² A gena ɔɔn? Ɛkkɛ balkɛ oorg aŋka ɛkkɛ omɛ ɔci motɛ bɛɛ? Walla ɛkkɛ ñieyɛ te kaniica Juaŋ a ñieko, ɔci maka baaki waak neeni ‘wondɛ lɔɔn ḍɔɔggɛnti? ‘Ya gɔkka a ɔki ɛkkɛti moki? ‘Ya jiejja ɛkkɛ? A’a, ‘ya jiejja ɛkkɛ bɛɛ. ²³ Acaan gena muŋi ‘ya te Juaŋtiyɛ, ɛkkɛ myettin ‘ya daŋkun neeni, ka Ciɛggɔn Yaccu Kiṭɔ te ween kona ɛkɛ mukkiti mayɛ, ɛkɛ byentan luullɛ. ²⁴ Ɔci ne ɛkɛ gɔŋnɛ a pwatcin Juaŋtiyɛ, ɛkɛ byentan wɛnnɛ jitin, ɔci gɔkcin agi, “Gena war ‘ya wara wɛɛttin jitin te ɛkkɛ neeni. Dala ɛkkɛ noŋdɛ a ɔɔn daŋkun oŋkanda, aŋka ɛkkɛ poŋɛ te ‘ya.” ²⁵ Ɔci moki ɛkɛ noŋi a ɔɔn te pyeg luutkin ne ɛkkɛn ḍookki te amy. Ɛkɛ gɔki agi, “Pyeg luutkin neeni gena jyeka ñaagɛ ma i Juaŋ wonkɛn te yimg ‘yay. Dala ɛkkɛ noŋdɛ a ɔɔn oŋkanda ne ɛkkɛ mottɛ ɛkkɛn aŋka ɛkkɛ poŋdɛ te ‘ya.” ²⁶ Ne ɛkkɛ omɛ byentan neeni, ɔci motɛ pyeg luutkin neeni oŋkandayɛ, ɛkkɛ mietɛ ma te lyen Ciɛggɔn ne ɛkɛ bɛɛdi ɔɔn. ²⁷ A ɔŋŋiyɛ, kan men gɛɛl omdi byentan neeni, ɔci motti pyeg luutkin neeni ne ɛkɛ yɔmjin acaan motti bɛɛyɛ, ɛkɛ noŋi nɔjjo, acaan ɛkɛ war Ciɛggɔn ɔci yimg Ciɛggɔn cuullɛyɔ. ²⁸ Dala men da gɔrti war ɛkɛti ñamu lakun, ɔci ɛkɛ oŋ omdi byentan ɔci motti pyeg luutkin neeni oŋo. ²⁹ Kan mena omdi ɔci motti pyeg luutkin ne ɛkɛ naŋka neeni jiña yuartɛji bɛɛyɛ, ɛkɛ omi ɔci moti ywobji Jwaŋa Tolan war ɛkɛti. ³⁰ A ɔŋŋiyɛ, ma gɛɛg ɛkkɛti bomcin, ɔci waakɛn yeyɔ, ɔci gɛɛg tuun doki. ³¹ Kan te ikin waakɔ noŋnin godan pookɔ dokiyɛ, te ikin noŋtin Juaŋ godan moki bɛɛ. ³² Yeti ikin noŋnin Juaŋ godan, ɔci ikin ṭeenin ɛkɛ aŋka naa jiek bɛya ikin wyetkɔti i maka baan konɛ warda neeni bɛɛ. ³³ A ɔŋŋiyɛ, hay, modg ɔɔn, ne ɛkkɛ coottɛ a cyɛɛlɔ non Juaŋ acaan omɛyɛ, dala ɛkkɛ kɛɛddɛ yɔtin. ³⁴ Kan menga amɛ koñyɛ, dala ɛkɛ omdi te baanji aŋka naa jiek dɔɔkti ɛkkɛ wyetkɔti a cyɛɛlɔ waakida bɛɛ. Ɛkkɛ myettin ‘ya te waka pookɛn ne ‘ya bɛɛda aŋany.

¹ Acca te jyek waka ma ‘wondɛ Boŋ Juaŋyɛ, hay, modg ɔɔn, ‘ya buaga dala ɛkkɛ jyeka awarɛ neeni jitkɛn ŋeeddɛ. ² Çeejɛ ɛkkɛ, ne wona ɛkkɛ agɛ maka moṭi Juaŋti bɛɛyɛ, ɛkkɛ attɛ bora jɔkin yeyinti jɔkin gɔki jiek bɛɛ neeni byeŋkɛnti, ba eñña ɛkkɛ eekiti ɛkkɛn doki wanna. ³ Acca ‘ya miet ɛkkɛ ka mena gɔki te Boŋ Jwaŋa Tolanyɛ, ɛkɛ yaakinti gɔkti agi, “Yaccu a ‘walgɔn” bɛɛ, ɔci menga yaakinti gɔkti agi, “Yaccu a Ciɛggɔn” budan bɛɛ. Gena mena balkɛ Boŋ Juaŋ aŋka yaakinti gɔkti a ɔɔny. ⁴ Waka ma ‘wondɛ Juaŋ jitkɛn coŋɔ, yeti ɛkkɛn bɛya te Boŋa ne cyɛɛlɔ neeniti. ⁵ Ɔci kanŋan jitkɛn bala coŋɔ, yeti Ciɛggɔn a cyɛɛlɔ budan. ⁶ Ɔci naŋki bala jitkɛn ne coŋɔn, yeti gena Jwaŋa ne cyɛɛlɔ ma kiennɛ ɛkkɛn waakɛnda wanna. ⁷ Ɔci Juaŋ ma ‘wonnɛ Booŋ waakɛnda a lyɛlta te gena pwadan te ma waakɛnda. ⁸ Men gɛɛl ‘wonnɛ Boŋ Juaŋ boŋ ñing tɛɛno, ɔci ɛka parɛ balkɛ boŋ ŋeejin, yeti ɛkkɛn bɛya te Boŋa ne cyɛɛlɔ neeniti. ⁹ Ɔci mena parɛ balkɛ jyenno, yeti te Boŋa ne cyɛɛlɔ neeniti, ɔci ɛka parɛ yɔŋi ma waakɛn te wajan, yeti naŋka neeni bɛya te Boŋa ne cyɛɛlɔ neeniti. ¹⁰ Men gɛɛl a mena noŋi naŋka tɛyan naŋka ñyecki may, ɔci ɛka parɛ a mena mieti ma te jieko, ɔci mena parɛ balkɛ war tɛɛn aŋka waka bɛya te Boŋ Juaŋti ɔci waka bɛya te boŋka pookɛnti byɛŋdɛ jitin. Ɔci men gɛɛl a mena gɔki te tugga pookɛn, men gɛɛl a mena ma myettɛ jiek te tugga pookɛnti. ¹¹ Waka neeni waakɛnda naŋdɛ Boŋ Juaŋ ne cyɛɛlɔ neeni, ɔci ɛkɛ waak ‘wondɛ ma waakɛnda ba yom ɛkɛ parɛ. ¹² Bala ba waryɛ, ɛkɛ a cyɛɛlɔ budan, yeti ɛkɛ balkɛ waak ne coŋɔn. Ɔci wak wara ne cyɛɛlɔ neeni waakɛndayɛ, ɛkkɛn coŋɔ, yeti ɛkkɛn a cyɛɛlɔ budan. Ɔci war Yaccu daŋkun bala a ɔɔn. Gena kaniica. ¹³ Acaan ikin buulkin ma te Boŋa ne cyɛɛlɔ neeni, ɔci aŋŋin wara ne cyɛɛlɔ. Ma Icrayiil ɔci Keedin Pookɛn, ɔci maka bɔwan ɔci maka cyɛganyɛ, ɛkkɛn waakɛnda moti Boŋa ne cyɛɛlɔ neeni. ¹⁴ War men baan balki waak ne coŋɔn. ¹⁵ Kan ciyu gɔkti agi, “‘Ya a bieŋ bɛɛ, war balkin genga ‘yati bɛɛ,” jwalla neeni ɛkɛ naŋdɛ aga gena ḍiɛran te warti bɛɛ. ¹⁶ Ɔci kan jyeñ gɔkcin agi, “‘Ya a waŋ bɛɛ, war balkin genga ‘yati bɛɛ,” jwalla neeni ɛkɛ naŋdɛ aga gena ḍiɛran te warti bɛɛ. ¹⁷ Kan war warda niin a waŋy, oŋ ba tyeŋi bɛ? Oŋ kan war warda a jyeñy, oŋ ba ŋood bɛ? ¹⁸ Yeti bala a ɔɔn, Jwaŋa Tolan war cuonnɛ waako, ɛkkɛn waakɛnda naŋŋɛ ɛkɛ ba naŋka yom ɛkɛ buagitiy. ¹⁹ Oŋ kan waka neeni waakɛnda niin a cyɛɛlɔ budany, oŋ war bala wɛnɛ? ²⁰ Waak bala kɔɔna kɔɔnno, yeti war a cyɛɛlɔ budan. ²¹ Waŋu yaakinti gɔkti bieŋuti boki agi, “‘Ya buaga i ba.” A’a. Ɔci wyeñu yaaktanti gɔkti cieguti boki agi, “‘Ya buaga genga ɛkkɛti ba.” A’a. ²² Te cyɛŋŋa wannayɛ, waka men warɛti ɛkkin ñaltin ikin ba waakɛn kookɛ neeniyɛ, ɛkkɛn yɔmjin ne tolan. ²³ Ɔci waka men warɛti ɛkkin ñaltin ka ɛkkɛn a genga bɛɛyɛ, ikin noŋin ne pwadan ɛkkɛnti ne tolan. Ɔci waka bala ikin waakɔti ñaltin ka yeyin neeniyɛ, ikin noŋtin ne pwadan ɛkkɛnti ne tolan, ²⁴ gena naŋka yookɛti makɛn pwadin neeniy. Yeti Juaŋ ɛkkɛn waakɛnda ñaaŋŋɛyɔ ba gena ne cyɛɛlɔ, aŋka ɛkkɛn nooŋdi yɔtin ne pwadan. ²⁵ Ɔci waryɛ, ɛkɛ a kɛɛptɔn bɛɛ, waka men warɛti ɛkkɛn gɔɔr yɔtin pookɛn waakɛnda. ²⁶ Kan gen gɛɛl te waka neeniti konɛ ñakcin te gengayɛ, ɛkkin pookɛn wanna da korkɛn ñakti ba ɛkɛ ɔɔn. Ɔci waka neeni kan gɛɛl naŋɛ ma ne pwadanyɛ, ɛkkin pookɛn waakɛnda yomgɛn ñɔya ñɔɔn i ɛkɛ. ²⁷ Yeti ɛkkɛyɛ, ɛkkɛ agɛ war Kiṭɔ, ɔci ɛkkɛ agɛ maka balgɛ i ɛkɛ a cyɛɛlɔ. ²⁸ Ɔci Juaŋ ma kɛɛmnɛ kanŋa jitkɛ kaniicaji. Ma gɛɛg a cuudan, ɔci ma gɛɛg a maka mieti jieko, ɔci gɛɛg a maka loṭi may, ɔci gɛɛg a maka noŋi naŋka tɛyan, ɔci gɛɛg a maka yɔŋi ma waakɛn te wajan, ɔci gɛɛg a maka moki may, ɔci gɛɛg a maka ma ḍɔɔltanyɔ kanŋati nona ne cyɛɛlɔy, ɔci gɛɛg gɔki te tugga pookɛn ne coŋɔn. ²⁹ Ma waakɛnda a cuudanɛ? Ma waakɛnda a maka lwoki ma te jiekɔ? Ma waakɛnda a maka loṭi makɔ? Hay, ma waakɛnda noŋi naŋka tɛyanɛ? ³⁰ Hay, ma waakɛnda balkɛ kanŋa ywaŋi ma te wajanɛ? Hay, ma waakɛnda gɔki te tugga pookɛn? Ma waakɛnda a maka jiek jitkɛn ootan bora? ³¹ A’a, a ɔɔn bɛɛ, yeti dala i bwagdi ne pɛñan aŋka naŋka pwadan neeni gɛɛl bala iti. Yeti ‘ya buaga ɛkkɛ myettin pɔya pwadan ‘wota men.

¹ Kan ‘ya yaakati gɔk te tugga iñɔ ṭɛɛrji ɔci tugga ñaalɔ pɔliji waakɛnda, oŋ ‘ya an ma bɛɛyɛ, ‘ya a genga bɛɛ, ɔci jyek ‘ya bala ba joon lɔlŋa ɔci ba joon bila garan. ² Ɔci kan ‘ya ‘wonna Juaŋ miti jiek ɔci kan ‘ya jyeka a coggin ŋeej ɔci kan waak ŋeej ‘ya waakɛnda, ɔci moki kan ‘ya balka jyeni ne pwadan aŋka pomk uutca ɔntɔ te nonkɛnti, oŋ kan ‘ya an ma bɛɛyɛ, ‘ya a genga bɛɛ. ³ Kan ‘ya mal ‘ya ‘woñgan maka bɔwan waakɛnda, ɔci war ‘ya oljan nokka ma te jyeni ‘ya, oŋ kan ‘ya an ma bɛɛyɛ, genga yɔmdi te ‘ya bɛɛ. ⁴ Mena ani mayɛ, ɛkɛ kɛɛy ɔci noŋi ne pwadan. Mena ani mayɛ, yomɛ motcin bɛɛ, ɔci moki noŋi warɛ bɛɛ, ɔci ɛkɛ a yɛcan bɛɛ, ⁵ ɔci ɛkɛ noŋi ne yaayan bɛɛ, ɔci buagɔn genga te war ɛkɛ bɛɛ, ɔci ɛkɛ poŋi ne yaayan bɛɛ, ɔci loomgɛ koocin bɛɛ. ⁶ Mena ani mayɛ, ɛkɛ yomɛ ñɔɔcin te jyeka awarɛ, ɛkɛ yomɛ ñɔɔcin te nɔji bɛɛ. ⁷ Mena ani mayɛ, ɛkɛ jiñɛ tɛɛcin te waak waakɛnda, ɔci jyeti waak waakɛnda, ɔci kɛɛy waak waakɛnda, ɔci balkɛ kɛɛn te waak waakɛnda. ⁸ Aniyɛ, baadi bɛɛ, oŋ yeti miti jiek mati baadi, ɔci jyeka te tugga pookɛn baadi, ɔci ŋeejin baadi moki. ⁹ Acaan ŋeejin ikinyɛ, bɔɔnjin, ɔci jyeka mittin ikinyɛ, bɔɔnjin. ¹⁰ Oŋ yeti mena yɔmjin neeni ne bɛɛdiyɛ, waka bɔɔnjin neeniyɛ, eedɛ bora. ¹¹ Ne wona ‘ya aga kaciyɛ, ‘ya baal gɔk ba kacca ḍiɛran, ɔci baal poŋ ba kacca ḍiɛran, ɔci ‘ya waka jitkɛn yuartanji kɛɛgin, yuarcanji ‘ya daŋkun. Ne ‘ya aŋŋa ‘uanyɛ, ‘ya pɔy kɛɛgin ḍyɛrin daljan doki. ¹² Acaan waka ñaltin ikin acca neeniyɛ, ɛkkɛn bala ba pɔɔyama yuar waŋɛti budan, oŋ yeti te oŋŋa wannayɛ, ikin ñoortin woŋgɔti a ñoorin. Ɔci ‘ya waak gɛɛg ŋeejo, yeti te oŋŋa wannayɛ, ‘ya waak ŋeejja ne pwadan bala ba ŋeejin ‘ya ŋeejati Juaŋy. ¹³ Oŋ accayɛ, jyeni, ɔci jyenna jyettin ikin kɛɛyin, ɔci aniyɛ, ɛkkɛn bala oŋkanda. Oŋ yeti ɛka pwadan ne tolanyɛ, gena anno.

¹ Dala ani aga paŋi ɛkkɛ paŋŋa tolan. Ɔci moki dala ɛkkɛ andɛ waka ma ‘wondɛ Boŋ Juaŋ aŋka ɛkkɛ lwokɛ ma te jyek Juaŋo. ² Acaan mena gɔki te tugga pookɛnyɛ, ɛkɛ gɔki ma baanti bɛɛ, ɛkɛ gɔki Jwaŋa Tolanti. Awarɛ, menga jyek ɛkɛ tieŋdɛ bɛɛ, yeti ɛkɛ gɔki te Booŋ yomɛti te waka a cogginy. ³ Oŋ yeti mena lwoki ma te jyek Juaŋyɛ, ɛkɛ nɔɔti ma, ɔci moki ɛkkɛn, ɔci cyeŋi ɛkkɛn te war tɛɛno, ɔci mwoni ɛkkɛn jitkɛn. ⁴ Mena gɔki te tugga pookɛnyɛ, ɛkɛ moki war ɛkɛ parɛ, oŋ yeti mena lwoŋi jyek Juaŋ jitkɛn ŋeejɛyɛ, ɛkɛ ma kaniica magdɛ. ⁵ Kan ɛkkɛ gɔktɛ te tugga pookɛn waakidayɛ, a ɔɔn pwatcin, yeti kan ɛkkɛ yaaktɛti lwoŋi jyek Juaŋ jitkɛnyɛ, a ɔɔn aŋka pwatcin ne tolan ‘yati. Mena yaakinti lwoŋi jyek Juaŋ jitkɛnyɛ, pwatcin ne tolan te mena urkinti tugi maka pookɛny, yeti kan men gɛɛl balayɛ, dala jyeka lwogdɛ ɛkɛ neeni oodɛ bora. A ɔŋŋiyɛ, kaniica yaakinti ‘uotti ñamu. ⁶ Acca hay! Modg ɔɔn, kan ‘ya bɛɛn ɛkkɛti oŋ gɔkcan te tugga pookɛn oŋ ɛkkɛ tieŋnɛ bɛɛy, oŋ jyeka neeni ɛkkɛ maktɛ a ɔki? Yeti kan ‘ya bɛɛn ɔci gɔkcan te jyeka lɛɛlnɛ Juaŋ bora ‘yati neeni, ɔci walla ɛkkɛ nɔɔttin te waka ŋeej ‘ya neeni, ɔci walla te waka bala bɛya neeni, ɔci walla te jyek Juaŋ jyeka pwadin jyeka buagiti ɛkkɛ neeniyɛ, ɛkkɛn ɛkkɛ maktɛ. ⁷ Kan waka kuuttan ma bala ba luañ ɔci waka cyɛptan ma bala ba coŋkɔn, kan pɔɔdgɛn pwadɔ bɛɛy, oŋ pwana wiak ne pwadan tieŋtin a ɔki? ⁸ Ɔci moki kan ṭuoŋ kuudi ma ne pwadan bɛɛy, a menɛ warɛ ywaŋdɛ te lañy? ⁹ Ɔci moki kan ɛkkɛ gɔkɛ te tugga pookɛn tugga tieŋtan ma bɛɛy, oŋ ɛkkɛn jyeka guagdɛ ɛkkɛ wanna jitkɛn ŋeettan a ɔki? Jyek ɛkkɛ neeni peedɛ jwami bora budan. ¹⁰ Awarɛ, tugga pookɛn bala ne coŋɔn baan konɛ warda, ɔci ɛkkɛn jitkɛn tieŋtan ma waakɛnda. ¹¹ Kan ‘ya jyeka guagdɛ mena neeni kuoliwiyɛ, ‘ya a miiŋ te jyeka guagdɛ ɛkɛ wanna. ¹² Te bwakta ɛkkɛ buagɛ waka ma ‘wondɛ Booŋyɛ, dala ɛkkɛ toottɛ Jwaŋa Tolanti aŋka ɛkkɛ ‘wondɛ ɛkɛ waka kaniica ciɛndi ñamuy. ¹³ A ɔŋŋiyɛ, kan mena gɔki te tugga pookɛnyɛ, dala ɛkɛ cɔkti Juaŋti aŋka ɛkɛ yɔɔrdi war tɛɛn te lwoŋi jyeka neeni. ¹⁴ Oŋ kan ‘ya cɔk te tuka parɛyɛ, gena boŋ ‘ya cɔkiy, oŋ yeti paŋi ‘ya yɔɔrdi genga bɛɛ. ¹⁵ Oŋ ‘ya noŋja a ɔki? ‘Ya cɔkca te boŋ ‘ya, ɔci moki cɔkca te paŋi ‘ya, ɔci ‘ya ‘ualja te boŋ ‘ya, ɔci ‘ya ‘ualja te paŋi ‘ya moki. ¹⁶ Kan i jiey Juaŋ te booŋy, oŋ mena balkɛ waka ma ‘wondɛ booŋ bɛɛ neeni, ɛkɛ yaaktanti ñoodi iki i te cɔŋi a ɔki ne i cɔkiy? Acaan ɛkɛ jyeka guaga i wanna ŋeejɛ bɛɛ. ¹⁷ I waanu cɔk ne pwadan awarɛ, yeti i moodɔ maŋŋi bɛɛ. ¹⁸ ’Ya gɔk Juaŋti a pwatcin, acaan ‘ya gɔk te tugga pookɛn ne tolan te ɛkkɛ. ¹⁹ Kan ‘ya loṭi kaniicaji te jyeka jitkɛn wɔkin ne dɔɔyɔyɛ, yɔmjin ne tolan te jyek tuka parɛ jyeka a alpn a inyaakkɛn (10,000) jitkɛn wɔkin bɛɛ neeni. ²⁰ Modg ɔɔn, naa paŋi ɛkkɛ bala ba paŋi kɛɛgin ḍyɛrin bɛɛ. Yeti dala ɛkkɛ baldɛ ba kɛɛgin ḍyɛrin te naŋki nɔjjo, oŋ yeti dala paŋi ɛkkɛ bala ba paŋi maka ḍwaŋin. ²¹ Ɔci bala ba kiiwɛ ma ganuunji agi, “Te tuk maka pookɛn, ɔci te tuk wɛlga kwoyinyɛ, ‘ya gɔkca maka neeniti, oŋ yeti ɛkkɛn tieŋdi jwali ‘ya bɛɛ. Gena Ciɛggɔn gɔki a ɔɔn neeni.” ²² Oŋ yeti jyeka te tugga pookɛnyɛ, a naŋka tɛyan te maka jyeti Juaŋti neeni bɛɛy, yeti ɛkkɛn te maka jyeti Juaŋti bɛɛ. Ɔci miti jiekyɛ, te maka jyeti Juaŋti baaw bɛɛ, ɛkkɛn te maka jyeti Juaŋtiy. ²³ Kan ma kaniica wyetkɛn ḍɔɔlɛ waakɛnda kaniicaji, ɔci ma gɔkti te tugga pookɛn, ɔci kan maka baan konɛti, walla maka jyeti Juaŋti bɛɛ gɛɛg bɛya ɛkkɛti kaniicajiy, ɛkkɛn ɛkkɛ guaktɛ agi ɛkkɛ agjɛ maka wyetkɛn yeyin bɛɛ? ²⁴ Yeti kan ma waakɛnda mieti ma te jyek Juaŋ ɔci mena jyeti Juaŋti bɛɛ, walla mena baan konɛti gɛɛl bɛɛn orɔyɛ, ɛkɛ wiakti yomɛti te nɔji ɛkɛ te jyeka tieŋni ɛkɛ neeni, ɔci jyeka tieŋni ɛkɛ neeni nɔji ɛkɛ lɛɛltan bora a ɛkɛ a mena nɔɔdɔn. ²⁵ Ɔci jyeka bala ɛkɛ yomɛti a coggin neeniyɛ, bɛya bora ɔci ɛkɛ ḍwondi iñɔ, ɔci morti Juaŋti, ɔci yomɛ wiakti, ɔci gɔkti agi, “Jwaŋa Tolan balgi iki ɛkkɛ awarɛ, hay!” ²⁶ Modg ɔɔn, ɔɔn gɔktɔn a ɔki? Ne ɛkkɛ ḍwoṭɛ wyetkɔ a cyɛɛlɔ kaniicajiyɛ, ɛkkɛ men da balki ɔɔli, ɔci mena parɛ balki lali, ɔci mena parɛ balki gena ɛkɛ lɛɛrnɛ Juaŋy, ɔci mena parɛ balki lali jiek te tuka parɛ, ɔci mena parɛ balki lwoŋi jieko. Waka neeni waakɛndayɛ, kaniica ciɛntan ñamu. ²⁷ Kan menga gɔki te tuka parɛyɛ, ma ne yyɛɛwɔ ɔci walla ne ḍoogɔyɛ, dala ɛkkɛn menga da jɔŋdi te wɔɔka ɛkɛ parɛ, oŋ yeti mena lwoki jiek jitkɛnyɛ, a cyɛɛlɔ. ²⁸ Kan mena lwoki jiek baawyɛ, dala ma waakɛnda ciya lieda kaniicaji, ɔci men da gɔkti war ɛkɛti parɛ, ɔci gɔgdi i Jwaŋa Tolan. ²⁹ Dala maka mieti jyek Juaŋ ne yyɛɛwɔ ɔci walla ne ḍoogɔ neeniyɛ, dala ɛkkɛn gɔkti, ɔci dala maka pookɛn neeniyɛ, tieŋdi jyeka guaktan ɛkkɛny. ³⁰ Kan Boŋ Juaŋ jiek lɛɛlnɛ bora mena ciyi iñɔ neeni gɛɛltiyɛ, dala mena gɔki ñamu neeni yɔɔda te jieko. ³¹ A ɔŋŋiyɛ, ɛkkɛ yaaktɛti agdɛ maka lwoki jiek waakida, menga da te wɔɔka ɛkɛ parɛ aŋka ma waakɛnda urtanti jiek, ɔci ɛkkɛn waakɛnda yomgɛn tɛya ɔci ñɔya. ³² Maka mieti mayɛ, ɛkkɛn gɔki amaam bɛɛ, ɛkkɛn mwoki jyek Juaŋ ne pwadan. ³³ Jwaŋa Tolanyɛ, nwoci jiek bɛɛ, ɛkɛ a mena yɔŋi jieko. Bala ba ma kaniican waakɛnda, maka pwadgin Juaŋtiy, ³⁴ dala moong ɛkkɛ ciya lieda kaniicanji. Ɛkkɛn balkɔn pɔɔdg aŋka gɔkti bɛɛ, oŋ yeti dala ɛkkɛn jyeddi ba jyeka guagdɛ ganuuny. Naa ɛkkɛn wyetkɛn eetan ñaalɔ ḍwaŋdi te maka ‘uay bɛɛ. ³⁵ Kan moong buagɔn genga ŋeettanyɛ, dala ɛkkɛn tootti ‘uay ɛkkɛnti baanji. Acaan yaayɛ a lɔɔn ɛɛŋti ne ɛkɛ gɔkti jiek kaniicajiy. ³⁶ Jyek Juaŋ bɛɛn te ɛkkɛtɛ? Walla ɛkkɛn bɛɛn ɛkkɛti pookɔ? ³⁷ Kan men gɛɛl poŋi gɔki agi ɛkɛ agjɛ mena mieti ma ɔci walla balkiti Boŋ Juaŋyɛ, dala ɛkɛ jyeka kiid ‘ya ɛkkɛti neeniyɛ, ŋeeddɛ ɛkɛ a jyek Ciɛggɔn. ³⁸ Kan ɛkɛ jyeka neeni naŋŋɛ a wyeñ boojyɛ, ɛkɛ daŋkun naŋdɛ ɛkkɛ a mena wyeñɛ baawy. ³⁹ Modg ɔɔn, dala ɛkkɛ bwaktɛ waka ma ‘wondɛ Boŋ Juaŋ te miti, ɔci naa menga dɛɛdɛ ɛkkɛ te jyek tugga pookɛn bɛɛ. ⁴⁰ Oŋ yeti dala waak waakɛnda bala te pɔya awarɛ, ɔci a ywaŋgɔny.

¹ Modg ɔɔn, ‘ya buaga ɛkkɛ myettin moki te jyeka ɛkkɛ lallin ‘ya a jyeka wonkɛn jyeka pwadin jyeka muŋŋɛ ɛkkɛ aŋka ɛkkɛ yɔdgɛ ne tɛyan neeniy. ² Kan ɛkkɛ jyeka neeni tiektɛ ne tɛyanyɛ, ɛkkɛ yɔɔtɛ ɛkkɛn. Yeti kan ɛkkɛ jyettɛ jyeka pookɛn gɛɛgtiyɛ, ɛkkɛ yɔɔrdɛ yɔɔt bɛɛ. ³ ’Ya ɛkkɛ ‘wonnin waka pwadin ne tolan waka muŋi ‘ya ñamu daŋkun, agi Yaccu Kiṭɔ tuun te nɔji ikin ba jyeka kiiwɛ ma te ɛkɛy. ⁴ Ɛkɛ jokci ma koolji ɔci ɛkɛ jɔŋŋin ñaalɔ te ninna akki ne ḍoogɔ tɛɛti moki ba jyeka a kiigin. ⁵ Ɛkɛ warɛ lɛɛlnɛ bora Butructi, hayya, ɛkɛ oŋ warɛ lɛɛlnɛ bora Cuudan A Inyaakkɛn Wyetkɛn Ne Yyɛɛwɔti oŋo. ⁶ Ɛkɛ oŋ moki warɛ lɛɛlnɛ bora maka a miyyan ne dɔɔyɔti (500) te oŋŋa ne cyɛɛlɔ. Maka neeni gɛɛg bala ciyi tɛɛti acca men, yeti ɛkkin pookɛn tuun doki. ⁷ Ɔci ɛkɛ warɛ lɛɛlnɛ bora Yaakubti, ɔci ɛkɛ moki oŋ warɛ lɛɛlnɛ bora cuudanti waakɛnda oŋo. ⁸ Ɔci ne ŋoyɔyɛ, ‘ya baali ba kacca a guoṭi ne ɛkɛ warɛ lɛɛlnɛ bora ‘yatiy. ⁹ Acaan ‘ya a mena ḍiɛran te cuudan pookɛn waakɛnda, ‘ya a mena te naa bartan ma a cuuda bɛɛy, acaan ‘ya baal noŋ ne yaayan kaniica Juaŋti. ¹⁰ Yeti te yom pwani Jwaŋa Tolanyɛ, ‘ya baal ba bolji ‘ya bolja te baaṭi moki bɛɛ, ɔci yom pwani Juaŋ yom pwani ‘wonnata ‘ya neeni ḍakcin budan bɛɛ. Yeti ‘ya kanŋan ne tolan te maka pookɛn waakɛnda. Yeti a ‘ya bɛɛ, gena yom pwani Jwaŋa Tolan yom pwanna bala ‘yati neeniy. ¹¹ Ɔci kan a ‘ya, walla maka waayiyɛ, ɔɔn waakida loṭɔn a ɔŋŋi, ɔci ɛkkɛ jyettɛ a ɔŋŋi. ¹² Ɔci kan ma loṭi ma te jyek Kiṭɔ agi ɛkta jɔŋnɔ ñaalɔ te lientiy, oŋ ma gɛɛg ɛkkɛti gɔki agi jɔŋŋin ma jɔŋti ñaalɔ te kolk jitin baawɔ ogo? ¹³ Te jɔŋŋin ma jɔŋti ñaalɔ baawyɛ, te Yaccu Kiṭɔ jɔŋŋin ñaalɔ bɛɛ. ¹⁴ Kan te Kiṭɔ jɔŋŋin ñaalɔ bɛɛyɛ, te lali ɔɔn neeni budan, ɔci te jyenna jyettɛ ɛkkɛ neeni daŋkun yɔmdi te genga bɛɛ. ¹⁵ Kan Juaŋ te Kiṭɔ jɔɔŋnɛ ñaalɔ te lienti bɛɛyɛ, ɔci kan maka tuun neeni jɔŋdi ñaalɔ te lienti bɛɛyɛ, ɔɔn aŋŋɔn maka jomi jiek Juaŋti, acaan ɔɔn loṭɔn ma ka Kiṭɔ jɔɔŋnɛ Juaŋ ñaalɔ te lienti. Yeti kan te jyeka guaktan ma agi maka tuunɔ jɔŋdɔ ñaalɔ moki bɛɛ wanna a jyeka awarɛyɛ, te Kiṭɔ daŋkun jɔŋŋin ñaalɔ bɛɛ. ¹⁶ Kan maka a tuutan jɔŋdi ñaalɔ bɛɛyɛ, te Kiṭɔ daŋkun jɔŋŋin ñaalɔ bɛɛ. ¹⁷ Ɔci kan te Kiṭɔ jɔŋŋin ñaalɔ bɛɛyɛ, te jyeni ɛkkɛ wanna budan, te ɛkkɛ men balgɛ te nɔji jitin men ɔɔn. ¹⁸ Ɔci te maka jyeti Kiṭɔti oŋ tuun neeniyɛ, te ɛkkɛn ḍakcin daŋkun budan. ¹⁹ Kan te ikin ciyin kɛɛyin a tɛɛtin acca neeni parɛyɛ, te ɔɔn a maka beeldi ne tolan. ²⁰ Yeti awarɛ awarɛyɛ, Kiṭɔ jɔŋŋin ñaalɔ te lienti doki. Ɛkɛ a juati maka jɔŋdi ñaalɔ te kolk jitiny. ²¹ Bala ba lien bɛɛn mati te mena ne cyɛɛlɔ, ɔci jɔŋŋin ma jɔŋti ñaalɔ daŋkun bala te mena ne cyɛɛlɔ. ²² Bala ba ma waakɛnda tuun te naŋki Adam, a ɔŋŋiyɛ, ma waakɛnda tɛɛti te Yaccu Kiṭɔ. ²³ Yeti menga da te non ɛkɛ. Kiṭɔyɛ, ɛkɛ a juatto, ɔci maka jyeti ɛkɛtiyɛ, ɛkkɛn oŋ jɔŋdi ñaalɔ daŋkun te oŋŋa ɛkɛ bɛɛdɛy. ²⁴ Naŋka neeni wyeñɛ bala oŋ te oŋŋa cyɛgji luldɛ weegɛn Jwaŋa Tolan te Kiṭɔti, ne Kiṭɔ akuuman ɔci cyekin ḍwaŋin ɔci war tɛɛn waakɛnda lɛɛŋŋɛ jitin dokiy. ²⁵ Acaan ɛkɛ aga Ciɛggɔn ɔɔn, ne maka yoyi ñin iki ɛkɛ neeni buurtɛ ɛkɛ iñɔ ɛkɛ ciegɛti ɔɔn. ²⁶ Mena yoyi ñin iki ɛkɛ aŋka lɛgdɛ ɛkɛ jitin ne ŋoyɔyɛ, gena lieno. ²⁷ Worga Jwaŋa Tolan gɔki agi, “Acaan Jwaŋa Tolan waak waakɛnda ḍuannɛ iñɔ ɛkɛ ciegɛti.” Jwali konɛ wɔɔkcin ne jiek gɔkki agi “waak waakɛnda” Juaŋ waanɛ bala i waka neeni bɛɛ, ɛkɛ a mena waak waakɛnda ḍuannɛ Kiṭɔ bieŋɛtiy. ²⁸ Ne ɛkɛ waak waakɛnda ḍuattɛ iñɔyɛ, Yaccu Kiṭɔ Kaci ɛkɛ daŋkun warɛ ḍuattɛ Juaŋ bieŋɛti, ɛkɛ a mena waak waakɛnda bala ɛkɛ bieŋɛtiy. A ɔŋŋiyɛ, Jwaŋa Tolan aga mena waak waakɛnda bala ɛkɛ bieŋɛtiy. ²⁹ Oŋ maka buuli ma te maka tuun neeni noŋdi a ɔki? Oŋ kan maka tuun neeni jɔŋdi ñaalɔ bɛɛy, oŋ ma bultan ma te ɛkkɛn moki ogo? ³⁰ Oŋ ‘ya baal nona yaayan a lien oŋki waakɛnda ogo? ³¹ ’Ya gɔkka awarɛ te naŋka noŋa ‘ya waru te ɛkkɛy. Modg ɔɔn, ‘ya baal nona yaayan a lienti oŋkanda te Yaccu Kiṭɔ. ³² ’Ya gɔk ba jyek ma baano. A gena yɔmjin te ‘ya, kan te ‘ya noonin iki wak luom ban Ɛpacacy? Kan maka tuun jɔŋŋin ñaalɔ bɛɛyɛ, dala ikin noŋtin ba jyek maka gɔki agi, “Dala ikin omtin ɔci mottin, acaan ikin tuutin ne liidɔ.” ³³ Naa ɛkkɛ maaldɛ menga bɛɛ acaan jiek gɔki agi, “Ñoowin ikin ñoowin i maka yeyinyɛ, wyeña pwadan yaadɛ.” ³⁴ Dala ɛkkɛ bɛɛdɛ wyeñ ɛkkɛ wyeña pwadanti, ɔci noŋdɛ nɔji moki bɛɛ. Acaan ma gɛɛg balkɛ ñing tɛɛn Jwaŋa Tolan bɛɛ. ‘Ya gɔk a ɔŋŋi, aŋka ɛkkɛ waakɔ aga lɔɔno. ³⁵ Yeti menga tootti agi, “‘Yeeñg jɔŋdi ñaalɔ moki? Ɛkkɛn bɛya ati te wara ɔkiy?” ³⁶ Hay, i mena poŋi amaam nɛ, gena piitca i iñɔ ṭɛɛrji, kan ɛkɛ jada bɛɛyɛ, ɛkɛ yaakinti ywoldi bɛɛ. ³⁷ Ɔci gena piinni i wanna ɛkɛ yorti ba bolja piinni i wanna bɛɛ, yeti gena cyɛni ɛkɛ aŋka yulay, kan a yimi walla poka pookɛn gɛɛgy. ³⁸ Yeti Juaŋ gena neeni ‘wondɛ warɛ ba bolja ɛkɛ buagɛ, ɔci ɛkɛ waak ñingɛn waakɛnda ‘wondɛ ñingɛn waakɛnda men da ‘woñgi war ɛkɛ. ³⁹ Acaan war a cyɛɛlɔ bɛɛ, war gɛɛl a war ma baano, ɔci gɛɛl a war maalo, ɔci ɛka parɛ a war ḍiirgo, ɔci ɛkan a war yako. ⁴⁰ Wara pɔliji bala, ɔci wara ṭɛɛrji da bala, yeti wara pɔliji da te pwani ɛkɛ, ɔci wara ṭɛɛrji da te pwani ɛkɛ. ⁴¹ Pwani wɔɔka bala. Ɔci paan daŋkun, pwani ɛkɛ da parɛ moki. Ɔci kɛltan daŋkun balkɛ pwani ɛkkɛn, ɔci kɛltan gɛɛg pwani ɛkkɛn bala ñamu te makɛn pookɛn. ⁴² Jɔŋŋin ma jɔŋti ñaalɔ daŋkun bala a ɔɔn. Wara jogɛ mayɛ, ɛkɛ baadi jada, yeti wara jɔŋdi ñaalɔ mokiyɛ, ɛkɛ baadi bɛɛ. ⁴³ Ɛkɛ jogɛ ma te jwoljo, yeti ɛkɛ jɔŋdi ñaalɔ pwanna pwanno, ɛkɛ jogɛ ma te war koñño, yeti ɛkɛ jɔŋdi ñaalɔ te war tɛɛno. ⁴⁴ Ɛkɛ jogɛ ma te war ma baan wara baadi neeni budan, yeti ɛkɛ jɔŋdi ñaalɔ te war booŋo. Kan wara baadi neeni balayɛ, war booŋ daŋkun bala. ⁴⁵ A ɔŋŋiyɛ, jyeka a kiigin gɔki agi, “Adam mena aŋŋɛ Juaŋ ñamu neeniyɛ, ɛkɛ bala ciyi tɛɛti.” Yeti Adam ne ŋoyɔyɛ, ɛkɛ aŋi mena ma ‘wondɛ tɛɛtin. ⁴⁶ Adam mena ñamu neeni balkɛ war booŋ bɛɛ, yeti ɛkɛ a war budan. Hayya mena balkɛ war booŋ oŋ bɛɛn ne ŋoyɔ oŋo. ⁴⁷ Adam mena ñamuyɛ, ɛkɛ bɛɛn te ṭɛɛrji, ɔci ɛkɛ a ṭɛɛro. Yeti Adam akki ne yyɛɛwɔyɛ, ɛkɛ aŋka bɛɛn te ñaalɔ pɔliji. ⁴⁸ Ba bolji Adam mena bɛɛn te ṭɛɛrti neeniyɛ, ma baan maka bɛɛn te ṭɛɛrti neeni waakɛnda daŋkun bala ba ɛkɛ ɔɔn. Ɔci ba bolji Kiṭɔ mena bɛɛn te ñaalɔ pɔliji neeniyɛ, maka jyeti ɛkɛti neeni daŋkun aga maka ñaalɔ pɔliji ba ɛkɛ ɔɔn. ⁴⁹ Bala ba ne ikin balkinti bolji Adam mena bɛɛn te ṭɛɛrti neeniyɛ, bolji Yaccu mena bɛɛn te pɔliji neeni daŋkun bɛya ikinti. ⁵⁰ Hay, modg ɔɔn, ‘ya ɛkkɛ myettin te gena neeni ka war ikin wara acca neeniyɛ, ooddi cyɛgji Jwaŋa Tolanti bɛɛ, ɔci moki waak ikin waaka baadi neeniyɛ, tɛɛtin baadi bɛɛ neeni yuartan ɛkkɛn bɛɛ. ⁵¹ Gɔṭṭɛ, ‘ya ɛkkɛ myettin gena konɛ a coggɔn neeni. Ikin tuutin waakida bɛɛ, yeti ikin waaki aktin. ⁵² Naŋka neeni bɛya ne pɛñan ba men ne woŋgɛ moortiti ne ṭwoŋa ne ŋoyɔ wiaktiy. Acaan ṭuoŋ wiakti, ɔci maka tuun jɔŋdi ñaalɔ te wara woonɛ, wara baadi bɛɛy, ɔci ikin da waaki aktin. ⁵³ Acaan bolja baadi neeni ɛɛŋdi bolja baadi bɛɛy, ɔci yoŋi lien neeni ɛɛŋdi yoŋŋa lienɛ baawy. ⁵⁴ Ne wara a jadɔn ɛɛŋdi wara jannɛ baawyɛ, ɔci ne war lien ɛɛŋdi wara lienɛ baawyɛ, jyeka a kiigin neeni bɛya bora oŋ agi, “Lien lannɛ bɔnnin.” ⁵⁵ “Hay, i lieno, ba war tɛɛn bɔɔni i ma bɛ? Hay, i koolo, ba pɛñi i bɛ?” ⁵⁶ War tɛɛn lienyɛ, ɛkɛ a nɔjjo. Ɔci war tɛɛn nɔjiyɛ, a jyek ganuun. ⁵⁷ Yeti dala gɔktin a pwatcin Juaŋti mena ikin ‘wonnin war tɛɛn te Ciɛggɔn ikin Yaccu Kiṭɔ aŋka ikin yaakinti jyek lien bwantin neeniy. ⁵⁸ A ɔŋŋiyɛ, hay modg ɔɔn maka ana ‘yay, dala ɛkkɛ yɔɔttɛ iñɔ ne tɛyan, naa ɛkkɛ kɛɛtɛ waakɔ bɛɛ, dala ɛkkɛ ciɛndɛ ñamu coŋdɛ oŋkanda kanŋa Juaŋti. Dala ŋeeddɛ ɛkkɛ kanŋa ɛkkɛ neeni ḍakti budan bɛɛ.

¹ Acca ‘ya gɔkka ɛkkɛti te jyek waka limtin te Ma Kiṭɔ neeniyɛ, bala ba ‘ya kaniican ban Galatiya myetkan doki. A ɔŋŋiyɛ, dala ɛkkɛ daŋkun noŋdɛ ba ɛkkɛn ɔɔn. ² Te oŋki Juaŋ waakɛndayɛ, dala ɛkkɛ waakida men da ḍɔccɛ genga bora, ɔci bwogdɛ ñino. Ɛkɛ ḍɔtti ba waka bala ɛkɛti aŋka ne ‘ya bɛɛda naa ɛkkɛ moki ɔgdɛ lyemɛ a limi ɔɔn bɛɛ. ³ Ɔci ne ‘ya dɛnda aŋanyɛ, waka limmɛ ɛkkɛ te yom pwani neeniyɛ, cundi ‘ya ban Urcaliim iki worgan i maka muonɛ ɛkkɛ bora wanna. ⁴ Kan jwali warɛ liɛllɛ a ‘ya oottayɛ, ɛkkɛn ooddin iki ‘ya a cyɛɛlɔ. ⁵ ’Ya bɛɛd ḍieŋŋa ɛkkɛti ne ‘ya gorda ban Macɛdɔɔnyajiy, acaan ‘ya buaga gora ban Macɛdɔɔnyaji. ⁶ ’Ya coottin i ɛkkɛ ne ḍiɛran kaapun, walla ‘ya wɛɛñi wyeñɛ cwamja aŋan aŋka ɛkkɛ yaakɛti ‘ya ‘yeettatɛ te won ‘ya nona oodda ‘yay. ⁷ Acaan ‘ya buaga naa ɛkkɛ yuardin gordinyɔ a gorti ɔɔn bɛɛ. ‘Ya buaga nink ṭɔlgɛn gɛɛg noktin i ɛkkɛ kan Ciɛggɔn ‘ya pɔŋna pɔyy. ⁸ Yeti ‘ya cood te ban Ɛpacac ne oŋ Iid Ninka A Ma Baan Ne Yyɛɛwɔ Mena Parɛ Byeŋkɛ (50) neeni bɛɛdi ɔɔn. ⁹ Acaan pɔy tuka tolan warɛ pɔŋŋɛ te kanŋa ‘yati, ɔci maka yookɔn te ‘ya bala kɔɔna kɔɔnno. ¹⁰ Ne Timutawuc bɛɛdi ɛkkɛtiyɛ, dala ɛkɛ gwaldɛ ɛkkɛ ne pwadan, acaan ɛkɛ noŋi kanŋa Ciɛggɔn ba ‘ya daŋkun. ¹¹ A ɔŋŋiyɛ, naa menga wooki ɛkɛ bɛɛ. Yeti dala ɛkɛ magdɛ ɛkkɛ pɔɔjɔ te pwani aŋka ɛkɛ dɔɔkti ‘yati. Acaan ɔɔn balgɔn kɛɛyɔn ɛkɛ i modg ikin. ¹² Bala ba ‘ya gɔkcan mod ikin Apɔɔlɔcti ne pɛñan ka dala ɛkɛ bɛya ḍieŋdi ɛkkɛti, yeti ɛkɛ yomɛ buagɔn bɛya acca bɛɛ. Ɛkɛ bɛya ne oŋŋa ɛkɛ yɔɔrdi wɔɔkay. ¹³ Dala ɛkkɛ woŋgɔ tiittɛ, dala ɛkkɛ yɔɔddɛ ne tɛyan te jyeni ɛkkɛ, dala ɛkkɛ yomgɔ tɛya, naa ɛkkɛ buayɛ bɛɛ, dala ɛkkɛ tɛɛdɛ. ¹⁴ Dala waka naŋdɛ ɛkkɛ waakɛnda naŋdɛ te oonnin yɔtin. ¹⁵ Acca modg ɔɔn, ŋeejɛ ɛkkɛ on tukɛ Ictɛɛpanuc ɛkkɛn a maka bɛɛn Juaŋti ñamu ban Akeeya, ɔci ɛkkɛn waakɛn ‘woñgi kanŋa Ma Kiṭɔ. ¹⁶ Modg ɔɔn, ‘ya gɔk ɛkkɛti ne pɛñan ka dala ɛkkɛ tieŋdɛ jyek maka noŋi kanŋa Juaŋ a ɔɔn wanna, ɔci moki dala ɛkkɛ tieŋdɛ jyek maka pookɛn maka noŋi kanŋa Juaŋ ba ɛkkɛn ɔɔny. ¹⁷ ’Ya yomu ñɔɔn ne Ictɛɛpanuc bɛɛni ɔci Pɔrtyunaatac, ɔci Akaaykacy, acaan ɛkkɛn non ɛkkɛ mugɛ aŋka ‘ya makta ne ɛkkɛ baagɛy. ¹⁸ Acaan ɛkkɛn ‘ya makka yomuti ba ɛkkɛ moki ɔɔn. Maka ba maka neeniyɛ, dala kanŋa ɛkkɛn yuartanji ma ɔci dala ma noŋdɛ ne pwadan ɛkkɛnti. ¹⁹ Kaniican ban Ecya cuoññin ñiimi ɛkkɛti. Akwilla ɔci Pricilla i kaniica on ɛkkɛn ban Ecya wɛnniyɛ, ñiepi ɛkkɛ te yoma pwadan te yenti Kiṭɔ. ²⁰ Modg ikin waakɛnda ñiepi ɛkkɛ. Dala ɛkkɛ ñiebdɛ yɔtin pookɔ waakida te ñiebbin pwadan. ²¹ Gena ‘ya, Buuluc kiewan jyek ñiimma neeni te byeŋ ‘ya paru ɛkkɛti neeni. ²² Kan men gɛɛl balki ani Ciɛggɔn bɛɛyɛ, dala ɛkɛ aga ‘walgɔn! Ciɛggɔn ɔɔn, dala i bɛɛdi! ²³ Dala Ciɛggɔn ikin Yaccu yomɛ pwada a pwani ɛkkɛti. ²⁴ Dala ani bala ɛkkɛti waakida te yenti Yaccu Kiṭɔ.