FILIPAAI DIMA

Gbanseaa Pɔla ŋɔn daa sɔbi n‑ti

FILIPAAI DIMA

¹Gbaŋŋu wa yi la man, Pɔla, saani na - man ni Timɔti gba: tirim mun nyɛ Yisa Kirisita Masiiya daaba, ka ti sɔbri n‑tiri ya Naawunni niriba, yaseeba ban bɛ Filipaai tiŋŋa ka bɛ ni ni Yisa Kirisita taaba, yan ni ya gyeeŋŋu kpamma ni ban suŋŋni ba zaa. ²Ti Ba Naawunni tim ya sufudoaa ni alaafɛa, ŋɔn ni ti Dugma Yisa Kirisita.

³N pɛ’ari la m Ba Naawunni saha kam zaa, n yi ti teaari ya yɛla sahanseaa maa. ⁴Man yi puusi u saha kam, n susiri zaŋŋi n‑kyaŋŋi ya zaa yɛla; ka n lala susigu bɛ la ni sufumaasim, ⁵yan daa la’am n‑suŋŋi ma zugu - ya suŋŋni ma zaŋŋi n‑kyaŋŋi Naawunni lahabasuŋŋu tuma ziiya, piiligu ni halli ni zuna. ⁶Dama n niŋi yɛdda, ni, Naawunni ŋɔn pun piili tunsunseesi ya saani la, u nin kyɛ ka a na kyɛnni tooni lala halli ni a naari, Kirisita Masiiya Dabsiri daari saha. ⁷Ya bɛ la n sufu ni saha kam, ka di zugu di tuya, ni, n niŋi lala yɛdda zaŋŋi n‑kyaŋŋi ya yɛla. Ya la’amni n‑suŋŋni ma n‑nyari Naawunni piinisuma. Di nyɛ la lala man ŋɔn lɔ la kyɔrimi seem ziiya, ni man ŋɔn gyɛrigi sarikatta maa tooni ka wulisiri lahabasuŋŋu maa yɛlimaŋni ŋɔn zɛ seem ziiya m‑paasi. ⁸Halli Naawunni mammaŋŋa nin sakki, ni, n sufu siri boori ya yɛla hoo Yisa Kirisita sufu ŋɔn boori ya yɛla nimmoosi seem la. ⁹Ka man susiri Naawunni seem maa nŋɔa: ni, u kur kyɛ ka ya na maali n‑wuri sɔkam pam, ka di dɔli la ya yɛm ni ya sufu ni bamsim an zoaai seem maa. ¹⁰Lala nin kyɛ ka ya nin toaai m‑baŋŋi din tu, halli nti paai Kirisita Dabsiri daari la; ka lala saha ya nin ti zaani, galinsɛseelli ka ni. ¹¹Di saha ka yɛlimaŋni tuma zaa nin paali ya, ka a taabu yi la Yisa Kirisita kɔkɔ saani na: di nin kyɛ ka pɛ’abu ni tibsim ti bɛ ni n‑tiri Naawunni.

¹²Tɔ: ka dinŋɔna, m mabiisi, m boori ya baŋŋi, ni, yɛttɔ’aseesi an paai ma na zaa - ay! a naari nyɛ la: ni, lahabasuŋŋu yɛla kur kyɛnni tooni. ¹³Dama dinŋɔ n kyɛ ka sɔkam baŋŋi, ni, di nyɛ la Yisa Kirisita zugu ka ba lɔ ma kyɔrimi lala: halli Naaba Kambɔnsi maa ni ban kpalim zaa ti baŋŋi lala. ¹⁴Ka ban daa lɔ ma maa zugu n kyɛ ka ti mabiisi pam maali m‑mari sufukpeemni nti moonni Yɛligu maa paalu ni, dabeem ka ni: baseeba ban niŋi Yisa yɛdda pam niŋni lala.

¹⁵Tɔ, seeba m bɛ ni n‑niŋni lala karimbaani ni nyamaŋŋa zugu, ni ba yuuri ti du n‑gaari ba taaba; ka seeba mun moonni Kirisita yɛla ba sufu ni yɛlimaŋni ni yɛdda zugu. ¹⁶Ii, lala niriba siri moonni ka la wurilim zugu, dama ba baŋŋi, ni, di nyɛ la lahabasuŋŋu zugu ka n zɛya wa, ni n ti wulisi di yɛlimaŋni ŋɔn bɛ seem la. ¹⁷Banla muna moonni la Kirisita yɛla nyuuri zappu zugu; ba sufu ni teesa bu dɔli soori, ka ba yɛtti, ni, man ŋɔn kpalim n‑lɔ zugu ba nin kyɛ ka n sufu sa’am. ¹⁸Amaa m ba’a ka ba yɛla maa ni: n nya ka Kirisita yɛla yi paalu, ni niriba ti wum, ka n sufu maai di zugu. Di yi nyɛ ba sufu ni yɔmsigu zugu ka ba moonna, bee, ba sufu yɛlimaŋni zugu gba, di ka taalli. Ii, n sufu nin maai ¹⁹dama m mi, ni, di zaa nin naayi kyɛ ka n nya fa-m‑basi, ka di nyɛ la yarim wunsusigu zugu, ni Yisa Kirisita Sii la suŋŋsim zugu gba. ²⁰Ii! - m mari la tama ka bu birisira, ni, n bu ya di vi seelikam zaa puuni. Ni, n nin mari dablim n‑tɔ’asi yɛligu maa paalu ni pampaŋŋɔa, hoo man daa pun tɔ’asi ka sahakam. Ka lala nin kyɛ ka Kirisita yuuri du n yɛla zugu, di yi ti nyɛ la man na bɛ ni maa zugu, bee, man ka ni la gba zugu. ²¹Man saani, n yi ti bɛ n nyɔvuri ni, Kirisita nla: man mun yi ti kpi, anfaani n nyɛ di n‑ti ma. ²²Tɔ - n yi ti kpalim m‑bɛ n duniya wa ningbina la ni, n nin toaai n‑tumni n tuma m‑paasi n‑nyari tuma maa bukyi. Ay! - n ku toaai m‑baŋŋi man nin yiisi sɔseaa. ²³Sɔya ayi wa n dɔya, ka di mugsi ma ka n ku toaai n‑yiisi yinni: m boori n bakki n‑kyaŋŋi nti bɛ Kirisita saani - lala n sɔa: bee, m ma’ai ni? ²⁴Amaa di mun kpa la talasi ni n kpalim m‑bɛ kpa, ka di nyɛ la yarima suŋŋsim zugu. ²⁵Tɔ: n siri mi halli, ni, lala n nyɛ di. Ni, ka di zugu n nin kpalim n‑na bɛ ya saani, ni ya ti kyɛnni tooni n‑nyari sufupeelim pam ya yɛdda niŋbu zugu. ²⁶Dama n nin laa m‑bɛ ya saani yaasa, ka lala zugu nin kyɛ ka ya sufu maai zaa, ka ya tibgri Kirisita Yisa man yɛla zugu.

²⁷Yɛttɔ’a seelikam zaa yɔri, ya na kpalimma m‑bɛ beesisuŋŋu din sumsi Kirisita lahabasuŋŋu niriba la. Di yi bɛ lala, man yi kyɛ ya saani na n‑nya yan bɛ seem, bee, n na bɛ wa’aligu ka kur wumni ya damni, di zaa nyɛ la yimmu. Dama n nin baŋŋi, ni, ya la’amni m‑bari n‑zaani Sii maa nangbanyinni ni, n‑tumni lahabasuŋŋu yɛdda tuma ni nimbirimoaa. ²⁸Ninvugseeba m bɛ ni m bu boori ya yɛla halli. Amaa yan di zɔri ba yɛla dabeem seelikam zaa zugu. Ba zabboobu wulisiri la ya zaa yɛla, ni, ban nin baasi yɔri, yarim mun nin nya tuliginsim, ka di yi la Naawunni saani na. ²⁹Ya deaari la piini Kirisita yuuri zugu: di pa la yan niŋi u yɛdda seem la kɔkɔa, amaa halli yan di wahala u zugu gba n nyɛ piinisuŋŋu n‑ti ya. ³⁰Ya bu nya? - yan moori seem la, di nyɛ la yan pun nya ka wumni pampaŋŋɔ, ni, man gba moori lala.

¹M mabiisi, ya beebu ŋɔn bɛ ni Yisa Kirisita zugu seem n kpamsiri ya sufu, ka u wurilim n tisiri ya sufudoaa; yan mun bɛ ni ni taaba Naawunni Vuusim Kasi zugu, halli ya mari nirilim ni namboo n‑tiri taaba. ²Tɔ: ka anŋɔ zaa yi siri bɛ lala, dinŋɔna n susiri ya ni, ni, ya sakkri taaba, ka laa n‑wuri taaba, ka ya sufu la’am n‑leebi yummu, nti mari nangbanyinni ni taaba: lala nin kyɛ ka n sufu maai zaa. ³Yan di kyɛ ka beem bee fugbu bɛ ya saani, amaa ya sigsima ya mansi n‑tiri taaba, ka kyɛ ka ya sɔkam gɔsiri u taraana yɛla, ni, u tibsi n‑gaari u mammaŋŋa. ⁴Ya kyɛ ka ya sɔkam ba’a bɛ la u taraana bukyi ni, pa la u mammaŋŋa dinni. ⁵Ya laa n‑kyɛ ka ya sufu ni teesa dɔli la ya taaba beebu Kirisita Yisa Masiiya saani. Dama ŋɔn Yisa muna#:-

⁶U kur mari la Naawunni beesigu saha kam,

Ka di zugu u bu yɛli, ni, u faama lala beesigu

Ni u ti sa’ai ni Naawunni beebu.

⁷U daa sigsi u maŋŋa

n‑kyɛ u toori yuubu yɛla zaa;

U daa zaŋŋi u maŋŋa n‑labgi daabri,

Ka laa n‑ŋmanni hoo ninsaalidima.

Ka ŋɔn daa baŋŋi, ni, u ŋmanni hoo ninsaala,

⁸U daa sigsi u maŋŋa ka daa sakki kum -

halli dɔpulli zugu kum gba.

⁹Dinzugu Naawunni daa duusi u n‑tibgi u zaa,

Ka ti u yuuri

Ka ka gaari yuya zaa.

¹⁰Dinŋɔ zugu ka sɔkam zaa nin ti gbaani u tooni:

Ban bɛ saazugu nin gbaani u tooni,

Ban bɛ duniya wa ni gba nin ti gbaani u,

Ni ban bɛ tinlɔŋŋu ni gba m‑paasi.

¹¹Ka sɔkam zaa nin ti mooli u yuuri

Ka sakki, ni, Yisa Kirisita nyɛ la ti Dugma,

Ka di kyɛ ka u Ba Naawunni nya gyirima.

¹²M mabiisi, di veeli pam yan daa sakki n‑ti ma, man ŋɔn daa bɛ ya saani la, halli ni man laa n‑ka ya saani wa gba. Amaa ya kur kpalimma n‑kpaŋŋni ya mansi n‑tumna, ni ya ti paai ya tuliginsim zaa ni nimmoosi. ¹³Dama Naawunni kur kpalim m‑bɛ ya saani, ka ŋɔn la’amni n‑tumna, ni ya ti sakki ŋɔn boori seem ka laa n‑nyaŋŋi n‑tum. ¹⁴Tɔ; ya kpalimma n‑tumni lala ka di kyɛ ka birisigu ni nangbankpeemni ti bɛ ya saani. ¹⁵Ka lala zugu nin kyɛ ka galinsi seelli ku paai ya, ka ya nin nyɛ la Naawunni bisuma m‑bɛ duniya wa dima sunsukkuni, halli ni ba zaa n nyɛ tumbeeri dima zaa yɔri. Ya nin ŋmanni hoo saŋmariwuusi ŋɔn nɛ seem la, ka ba nin nya. ¹⁶Ya nin ŋmani lala, yan zaŋŋni nyɔvuri lahabaari n‑tiri ba sahanseaa la. Ya yi niŋi lala, n sufu nin mari yaa Kirisita Dabsiri maa daari, dama din nin ti wulisi, ni, n kpaŋmaŋni ni n tuma maa zaa daa pa yɔri. ¹⁷Di ŋmanni la yan maanni la sara ka man mun nyɛ ka koom ka ba kpaara - di nyɛ la: ya niŋni yɛdda n‑kyɛnni tooni, halli n kum daari ti paai na. Ni di zaa yɔri, n sufu yi maai ka n sufumaasim wa nin paai ya. ¹⁸Lala yaasa, ya gba sufu nin maai ka ya sufumaasim wa nin paai ma na.

¹⁹Tɔ: di yi nyɛ ti Dugma Yisa yiiko zugu, m mari tama, ni n nin tum ti mabii Timɔti ya saani na pampaŋŋɔa, ka u nin tiri ma ya lahabaya ka n nin mari sufudoaa. ²⁰Ŋɔn kɔkɔ n nyɛ ŋɔn suŋŋni ma n yɛla kam puuni, ka laa n‑nyɛ ŋɔn gɔsiri ya zugu ni nimbirimoaa. ²¹Banla zaa ba’a bɛ la ba maŋtoori yɛla ni, pa Yisa Kirisita yɛla ni. ²²Amaa ŋɔn Timɔti muna, yan mi u beebu ŋɔn nyɛ seem, ni, u suŋŋni ma zaŋŋi n‑kyaŋŋi lahabasuŋŋu tuma hoo biiya ŋɔn suŋŋni u ba seem la. ²³Dinzugu m mari tama, ni, n tum u ya saani na: ka n nin niŋi lala man ŋɔn mi din kyɛnni seem n‑ti ma sahanseaa. ²⁴Halli ni di zaa yɔri, n niŋi Yisa yɛdda, ni, di ku yuui ka n nin kyɛ ya saani na m mammaŋŋa.

²⁵M mabiisi, n nya ka di nyɛ la talasi ni n tum ti mabii Ɛpafrɔditusi ni u labi ya saani na. U nyɛ la sɔ ŋɔn la’am ni ma n‑tumna, hoo soogyadima ayi ŋɔn yi suŋŋni taaba seem la. Ŋɔna ka ya daa tum n saani na ni u zɛ ya zaani ni n‑suŋŋni ma. ²⁶N nin tum u lala, dama u sufu zaa bɛ la ya yɛla ni; ka din paasi lala nyɛ la: u baŋŋiya, ni, ya daa wum u alaafɛ kaalinsi lahabaari, ka di daa niŋi u sufusa’aŋŋu pam. ²⁷U siri daa ka alaafɛa, ka di daa bu veeli gba - halli ni u ti ya n‑kpi gba. Amaa Naawunni daa zɔ u namboo, halli pa la ŋɔn kɔkɔ amaa man gba daa nya lala namboo maa. Di yi pa lala n naa n‑nya sufusa’aŋŋu m‑paasi n sufusa’aŋŋu ni. ²⁸Anŋɔ zaa zugu ka n yɛli, ni, see ka n tum u ya saani na yooma. Lala nin kyɛ ka ya nin laa n‑nya u ka ya sufu maai di zugu, ka man mun ku laa n‑nya sufusa’aŋŋu u yɛla zugu. ²⁹Dinŋɔna ya deaama u ti Dugma zugu, ka kyɛ ka ya sufu maai u zugu. Halli lala taabu niriba zaa ka ya pun deaari n‑tiri ba gyirima. ³⁰Dama ŋɔn Ɛpafrɔditusi daa tumni n‑tiri Kirisita, halli nti pɔri kum; u daa zaŋŋi u nyɔvuri m‑pa talima, ka u daa niŋi lala ni u ti zɛ ya zaani ni n‑suŋŋni ma, sahanseaa yan daa bu nyaŋŋi n‑kyɛ n saani na la.

¹Tɔ, m mabiisi, din kpalim nyɛ la: ni, ya mari sufupeelli ti Dugma zugu. M maali n‑sɔbri man pun sɔbi seem n‑ti ya, amaa lala bu tɔ n saani, ka yarima mun nin nya suŋŋsim di zugu, ka yɛttɔ’abeoo ku ti paai ya na. ²Ya baŋŋma ninvugseeba ban ŋmani la baasi la, tumbeeri zaa tumniba la, ban boori ningbina ŋmaari yɛla kɔkɔa! ³Ya bu nya? Tirim ŋɔn mari seelli maa nyɛ la gunibu ni yɛlimaŋni - ni, ti mari Naawunni Sii maa suŋŋsim n‑gyeemna, ka zaŋŋi ti sufu zaa n‑tibgri Kirisita ni sufumaasim: di pa la ningbina yɛttɔ’ari, yɛdda niŋbu n nyɛ di. ⁴Halli man nyɛ la sɔ ŋɔn nin nyaŋŋi n‑zaŋŋi yɛdda n‑niŋi ningbina yɛla maa. Sɔ zaa yi yɛnni, ni, u mari yɛdda u ningbina yɛla zugu, man gaari u. ⁵Ii! - Izraɛli butiri nira n nyɛ ma, ka ba daa dɔli la soori n‑guni ma n dɔ’am dabsa anii daari: Bɛngyamin za’anɔri bii gba n nyɛ ma, Hibrudoowa halaali zaa, ka n daa dɔli la Farisii dima zaaligu bamsim soori la. ⁶Lala soori nimbirimoaa yɛla zugu muna, n daa kari Yisa nyaandɔliba n‑namsi ba; ka Yɛhudiya dima zaaligu dɔligu beesigu ziiya ka n daa bu pɔsigi seelikam. ⁷Anŋɔ zaa daa bɛ la n saani hoo an mari bukyi; amaa di zaa yɔri, pampaŋŋɔ m ba’a ka anŋɔ zaa ni, halli beela, Kirisita yɛla zugu. ⁸M‑paasi lala, m ba’a ka bunseelikam zaa ni, di yi pa la man mari bamsim seaa m‑baŋŋi n Dugma Yisa Kirisita la - lala gaari a zaa halli nti yakki. Ŋɔn Kirisita zugu ka n gɔsiri bunseelikam hoo sa’ari ni bunkyɔ’ama: m bukyi zaa nyɛ la, ni, n nin nya ŋɔn Kirisita Yisa Masiiya, ⁹ka n laa n‑kpalim m‑bɛ u saani. Ka di pa ni m mari m maŋtoori yɛlimaŋni din yi la n zaaligu soori dɔligu ni na; ay! - n yɛlimaŋni beebu ni kur yi la n Kirisita yɛdda niŋbu ni na. Naawunni saani yɛlimaŋni n nyɛ di, yɛdda niŋbu zugu. ¹⁰M boori m baŋŋi u kum yisigri yiiko ŋɔn bɛ seem, ka laa n‑la’am n‑diri u wahala diibu, ka naayi leebi ŋɔn dɔli u soori, halli nti kpi. ¹¹Ka dinŋɔna, di nin kyɛ ka n paai kum yisigri zii la.

¹²Tɔ; ka di pa la m pun deaai a; bee, m pun paai anŋɔ zaa ni na; amaa n kpalim n‑kyɛnni tooni n‑katti a nɔba, ni n ti naayi deaai, hoo Kirisita Yisa ŋɔn pun deaai ma seem maa. ¹³Ii, m mabiisi, m mammaŋŋa bu yɛtti, ni, m pun deaai a. N ka seela, di yi pa la: ni, n tamni la bunseelikam kan pun gaari, ka kyɛ ka ka kpalim n nyaaŋŋa, man mun ŋɔn kyɛnni la tooni ni n ti paai bunsuma maa ziiya. ¹⁴N ŋmani la hoo ninvugsɔ ŋɔn zɔri zoaa: m moori n‑kyɛnni tooni ni n ti daŋŋi m‑paai tɔriga maa na n‑deaai ŋɔn daŋŋi tooni piini maa. Ka di nyɛ la: Naawunni ŋɔn booli ma ni m paai u saani saazugu na, Kirisita Yisa zugu. ¹⁵Ti zaa yi ti kyɛ biilim ni na’akyimni yɛla ka paai ninvugmaŋni ziiya, lala teesa ka ti zaa nin teesira. Ya sɔ yi bu teesiri lala, anŋɔ gba ka Naawunni nin kasigi n‑wulisi n‑ti u. ¹⁶Amaa tin pun paai zaaziseaa ni, ya kyɛ ka ti bari n‑zaani bɛni.

¹⁷Ka dinŋɔna ya la’am n‑dɔli beesisuŋŋu sɔseaa man ŋɔn pun wulisi ya la, ka laa n‑gɔsiri ninvugseeba ban dɔli lala taabu soori maa. ¹⁸Dama m pun yɛli ya, ni, niriba pam beebu pa lala: ka n labi n‑yɛtti ya lala yaasa, halli ni sufusa’aŋŋu gba, ni, niriba wa leebi la Kirisita dɔpulli yɛla dindaandima. ¹⁹Ban gyeemni wunsɔ la nyɛ la ba bundira kɔrisi, halli ka ban boonni seelli, ni, ‘gyirima’ la nyɛ la vi yɛla, dama ba teesa zaa bɛ la duniya wa buna ni: ba naari nyɛ la baasi yɔri zaa. ²⁰Tirim mun nyɛ arizana timbiisi; ti guusi la ti Tuligra kyɛnni na, ka u nin yi arizana m‑paai na - ti Dugma Yisa Kirisita Masiiya nla. ²¹Ŋɔn Yisa ti Tuligra mari la yiiko din nin kyɛ ka u su bunseelikam zaa fukumsi, ka u nin zaŋŋi lala yiiko maa n‑takki ti ningbinkyɔ’ama wa n‑kyɛ ka a leebi hoo u mammantoori gyirima ningbina taabu.

¹Lala maa zugu, m mabiisi, n wuri ya pampam, ka n sufu bu maai man bu nyari ya la zugu. Sufumaasim ka ya tiri ma, halli nti kyɛ ka m mari la karimbaani ya zugu gba, hoo n pun di naam ya zugu. Dinzugu, m mabiisi, lala maa n sumni ni ya zɛ yummu ya beesigu puuni n‑ti ti Dugma maa.

²Tɔ; ka nyin, Yuwɔdia, ka n susiri i ni, ni nyin, Sintikyi, gba; n susiri ya ni, ni, ya mari nangbanyinni ni taaba, ti Dugma maa zugu. ³Ka nyin gba, n zɔsuŋŋu, nyin ŋɔn daa bɛ n saani n‑tumni la, n susiri i gba, ni, i suŋŋi ba lala. Dama pɔ’aba ayi wa daa suŋŋi ma pam zaŋŋi n‑kyaŋŋi lahabasuŋŋu tuma, ban ni Klɛmɛnsi ni n tuntuntaaba ban kpalim la m‑paasi. Naawunni siri pun sɔbi ba yuya n‑niŋi nyɔvuri gbaŋŋu la ni. ⁴Ya kyɛ ka sufupeelli bɛ ya saani sahakam, ti Dugma zugu. Ii, m maali n‑yɛtti ya, ni, ya mari sufupeelli. ⁵Ya kyɛ ka sɔkam baŋŋi ya nirilim ŋɔn nyɛ seem. Ti Dugma pɔri ti saani na. ⁶Dinŋɔna yan di kyɛ ka seelli mugsi ya, amaa ya puusim Naawunni ya susigu zaa ni, ka kyɛ ka u baŋŋi yan boori seelikam zaa, ka laa m‑puusi u taari. ⁷Naawunni siri tisiri sugru ni sufudoaa ka di gaari ti nin toaai m‑baŋŋi seem zaa. U nin kyɛ ka lala sugru ni sufudoaa guri ya sufu yɛla, ni ya sufu ni teesa zaa, yan bɛ Kirisita Yisa saani zugu.

⁸Di naari, m mabiisi, ya kyɛ ka ya teesa zaa paali la ni bunseesi an nyɛ bunsuma, ni an sumni pɛ’abu - di nyɛ la: bunseesi an nyɛ yɛlimaŋni, ni bunveela, ni seesi an dɔli soori, m‑paasi niriba ŋɔn wuri bunseesi n‑tibgri a, ni seesi an mari gyirima. ⁹Ya zaŋŋma man wulisi ya seem maa n‑tumni lala, ka dɔli yan nya ka wum zaŋŋi n‑kyaŋŋi n tuma soori la. Ka Naawunni nin bɛ ya saani, ka ŋɔn mun nyɛ ŋɔn tisiri sufumaasim maa.

¹⁰Di daa niŋi ma nya’asim pam ti Dugma zugu, man ŋɔn daa nya ka ya laa n‑teaari n yɛla maa: halli ya daa pun teaai n yɛla, amaa ya daa kɔŋŋi soori. ¹¹Di pa la n yɛtti, ni, n kɔŋŋi seela, dama n pun bamsi man nin niŋi seem n‑kyɛ ka man mari seesi la ti sakki ma. ¹²N na mi n‑kɔŋŋi seela, ka laa m‑mi m‑mari halli nti yakki. Ya’aseaa, bee, sahaseaa, m bamsi yɛm suŋŋa, ka n nin nyaŋŋi bundira diibu, bee, nangbantoo beebu; n nin nyaŋŋi m‑mari pam, bee, m‑mari beela; a zaa sakki ma. ¹³Yisa Kirisita ti ma yaa, ka di kyɛ ka n nyaŋŋi yɛla zaa n beesigu puuni. ¹⁴Amaa ya daa niŋi suŋŋa pam, yan daa suŋŋi ma n yɛlimugsa puuni la.

¹⁵Ya mi halli, ya Filipaai dima, man ŋɔn daa daŋŋi n‑yi Masidoonya tingbaŋŋu sa m‑moonni lahabasuŋŋu yɛla maa, yan daa suŋŋi ma seem lala saha maa. Ka ya mi, ni, lala piiligu saha maa Yisa nyaandɔliba la’aŋŋu seelli daa bu suŋŋi ma zaŋŋi n‑kyaŋŋi tisibu ni deaari yɛla, na’ala yarima kɔkɔa. ¹⁶Ya laa m‑mi yaasa, ni, ya daa ti ma suŋŋsim halli man ŋɔn daa bɛ Tɛsalɔnika tiŋŋa gba, ka di daa pa la yummu. ¹⁷Di pa la m boori la piini, amaa n nya ka piini tisibu paasiri ya la nyoori. ¹⁸Man mun daa pun deaaya, ka di gaari zaa. N nya man boori seelikam, dama Ɛpafrɔditusi daa mari ya piini maa zaa na n‑ti ma. Ka di niŋi Naawunni nya’asim, hoo turaali nyoobu nyunya’asiri, bee, hoo ban maanni maaligu n‑ti u ka u deaai ni sufumaasim. ¹⁹M Ba Naawunni mari la buna ni arizikki zaa, ka a bɛ la Kirisita Yisa gyirima ziiya, ka u nin zaŋŋi yan boori seelikam zaa n‑ti ya. ²⁰Ŋɔn Naawunni ti Ba maa nin nya pɛ’abu, saha din ka tɔriga. Ammi.

²¹Ya puusima Naawunni niriba la n‑ti ma - ninvugseeba ban nyɛ Yisa Kirisita suulinsi. Ti mabiseeba ban bɛ kpa zaa puusiri ya na. ²²Naawunni niriba zaa puusiri ya na, halli ban bɛ NaaTitaari yiri maa ni. ²³Ti Dugma Yisa Kirisita Masiiya piinisuma nin bɛ ya sufu ni sahakam. Ammi.