GYƆNI

Gbanseaa

GYƆNI

ŋɔn daa sɔbi m‑pa buta

¹Mani ŋɔn sɔbri gbaŋŋu wa - man kpeema maa nla: n sɔbri n‑tiri nyini, Gayusi. N wuri i ni n sufu zaa, yɛlimaŋni maa zugu.

²N zɔsuŋŋu, m puusiri i ni, ka susiri Naawunni, ni, bunseelli kam zaa niŋi suŋŋa n‑ti i, ka i mari alaafɛa, hoo man mi suŋŋa, ni, i sii maa mari alaafɛ zaa seem la. ³Ti Kirisita mabitaaba ŋɔn daa paai na ka yɛli ma i yɛdda ŋɔn nyɛ seem, ni, i na dɔli la yɛlimaŋni sɔsuŋŋu ni nimbirimoaa, ka di daa niŋi ma nya’asim pam. ⁴Dama seelli ka ni m‑maari n sufu n‑gaari n yi wum, ni, m biisi maa bɛ la yɛlimaŋni beesigu.

⁵N zɔsuŋŋu, i tumni yɛdda tuma n‑suŋŋni ti Kirisita mabitaaba la, halli ni ba daa pa ya timbiisi gba. ⁶Ba daa pun tɔ’asi i wurilim yɛla n‑wulisi n‑ti ti kpa wa mabiisi maa. Kur kpaŋŋma i maŋŋa n‑suŋŋi ba ba kyɛnni maa ni, hoo Naawunni ŋɔn boori seem. ⁷Dama Yisa yuuri zugu ka ba yi soori, ka dizugu ba ku sakki ni ba deaai sɛseelli ninvugseeba ban bu dɔli Yisa maa saani. ⁸Di sumni ni ti deaai niriba wa taabu ti yiya ni, ka lala nin kyɛ ka ti zaa la’amni taaba n‑tumni yɛlimaŋni maa tuma.

⁹Tɔ: n daa pun sɔbi gbaŋŋu n‑ti ya bɛni sa niriba ban la’amni n‑gyeemni Naawunni la, amaa Diyɔtirifiisi ŋɔn boori u su ba fukumsi maa ku sakki n‑deaai n noori. ¹⁰N yi ti kyɛ ya saani na, n nin kyɛ ka u baŋŋi ma zaŋŋi n‑kyaŋŋi ŋɔn niŋi seem maa zaa - halli yɛlibɛseesi ni ziriseesi ŋɔn ma’ari n‑tiri ma la. Ni lala maa zaa di na bu sakki u: u ku sakki ni u deaai ti Kirisita mabitaaba ban yi kyɛnni ya saani na. Halli seeba yi boori ni ba deaai ba, u bu sakkra, ka katti lala niriba n‑yiisiri gyeemniba la’aŋŋu maa ni.

¹¹N zɔsuŋŋu, di dɔli ban tumni din bu dɔli soori nyaaŋŋa. Ay! - see ka i dɔli ban tumni din tuusi soori maa. Dama ŋɔnkam tumni din tuusi yi la Naawunni saani na, ŋɔn mun tumni din bu tuusi maa na zi n‑nya Naawunni. ¹²Sɔkam zaa tɔ’asiri Dimitiriyusi yɛla, ni, u nyɛ la ninvugsuŋŋu; yɛlimaŋni maa gba tɔ’asiri u yɛla la suŋŋa. Tirima gba zaŋŋi tin mi seem m‑paasi n‑wulisi u veelim ŋɔn bɛ seem, ka i mi, ni, tin yɛtti seem maa nyɛ la yɛlimaŋni.

¹³Tɔ. N na mari yɛla pam ni n ya n‑yɛli n‑ti i, amaa di zaa yɔri, n bu boori n sɔbi a n‑niŋi gbaŋŋu ni n‑ti i na. ^14-15Dama m mari tama, ni, di bu ya n‑yuui ka n nin kyɛ i saani na n‑kaai i, ka ti nini nya taaba ka ti di taaba azama. Alaafɛ ni sufudoaa bɛ i saani. I zɔdima m puusiri i ni. Puusima ti zɔdima zaa yinniyinni.