TƐSALƆNIKA DIMA

Gbanseaa Pɔla ŋɔn daa sɔbi m‑pa buyi n‑ti

TƐSALƆNIKA DIMA 2

¹Man Pɔla, ni Sailivanisi, ni Timɔti n sɔbri gbaŋŋu wa n‑tiri ya Tɛsalɔnika niriba ban la’amni n‑gyeemni Yisa maa. Ya nyɛ ti Ba Naawunni ni ti Dugma Yisa Kirisita Masiiya ŋɔn su seeba la. ²Naawunni niŋma yɛlisuma n‑niŋi ya, ka ti ya sufudoaa.

³Ti mabiisi, ti kur pɛ’ari Naawunni ya zugu, ka di sum ni lala, dama ya yɛdda kur zoaari m‑paasira, ka ya wurilim zaŋŋi n‑kyaŋŋi ya taaba saani gba zoaari pam. ⁴Dinzugu ti kur nyuuri la bara n‑yɛtti Naawunni niriba zaa n‑wulisiri ba yan zɛ yummu seem, ni ya yɛdda niŋbu yɛla, halli ni ya nyari namsigu ka diri wahala zaa. ⁵Dinŋɔ n wulisi, ni, Naawunni sariya karibu tuusiya zaa, ni, ya nyɛ la ban sum ni Naawunni naam, halli ni ya diri wahala u naam la zugu. ⁶Naawunni nin niŋi din tuusi. U nin kyɛ ka ban namsiri ya la ti nya namsigu. ⁷Ka yarima muna, yan ŋɔn nya namsigu la, u nin taasi yɔlisimma na nti ya, ka laa n‑zaŋŋi n‑ti tirima gba. U nin niŋi lala ti Dugma Yisa ni u malaaka yiikodaandima ŋɔn yi ti yi arizana ni na sahanseaa. ⁸U nin zaŋŋi bugum din dira n‑kyɛ na, ni u ti darigi ban bu mi Naawunni maa tuba, ni ban za’asi ti Dugma Yisa lahabasuŋŋu maa tuba gba. ⁹Ba nin ti yɔ ba ba taalli samni m‑basi ba yɔri, saha kan ka naari; ka ba nin kpalim n‑zɛ wa’aligu n‑kɔŋŋi ti Dugma gyirima ni u yiiko ni beebu maa. ¹⁰Ti Dugma Yisa nin labi na di daari maa, nti nya gyirima u niriba saani, ni tibgri ban pun niŋi u yɛdda saani. Ya gba nin ti bɛ niriba wa sunsukkuni, yan daa deaai lahabaseelli tin daa tɔ’asi n‑ti ya la zugu. ¹¹Di zugu ka ti kur susiri Naawunni n‑tiri ya. Ti susiri Naawunni, ni, u ti kyɛ ka ya bɛ beesisuŋŋu hoo ŋɔn booli ya ni ya bɛ seem la, ka zaŋŋi u yiiko n‑suŋŋi ya ka ya tum ya sufu yuubu tuma, ni ya yɛdda tuma, n‑naai; ka bu pɔsigi seela. ¹²Ka ti susiri Naawunni lala, ni, ti Dugma Yisa yuuri nin nya gyirima, ka ya gba nya gyirima u saani, ti Dugma Naawunni ni ti Dugma Yisa Masiiya suŋŋsim la zugu.

¹N ya n‑tɔ’asi n‑ti ya zaŋŋi n‑kyaŋŋi ti Dugma Yisa Masiiya lappu na, ni tin ti ya la’am n‑tuusi u soori la. Ti susiri ya ni, ti mabiisi, ²ni, yan di kyɛ ka ya yɛm ŋmaara, bee, n‑gyigra, seeba ŋɔn yɛtti, ni, ti Dugma lappu na pun gaari la zugu, halli sɔ yi ti tɔ’asi anabitiri n‑yɛli lala, bee, sɔ yi tɔ’asi Yɛligu maa yɛttɔ’a n‑yɛli lala, bee, ba yi ti sɔbi gbaŋŋu, ni, ka yiiri la tirima saani na, n‑yɛli lala ka puuni. ³Yan di kyɛ ka sɔ yɔmsi ya seelli ni, dama dabsiri maa ku toaai m‑paai na, di yi pa la niriba pam daŋŋi n‑la’am taaba n‑za’asiri Naawunni noori pɔi, ka ninvugsɔ ŋɔn nyɛ Zaaliguza’asira ni Baasiyɔri Daana maa naayi yi paalu. ⁴Ŋɔnŋɔ nin ti za’asi bunseelikam din zɛ Naawunni zugu, ni Naawunni gyeeŋŋu, ka duusi u maŋŋa n‑gaari seelikam. U nin ti kpɛ Naawunni Gyeeŋŋu Duu n‑yɛli, ni, ŋɔna n‑nyɛ Naawunni. ⁵Ya bu teaai man ŋɔn daa bɛ ya saani ka yɛli ya seem la? ⁶Ka pampaŋŋɔ ya pun mi din goaari u, ni, di kyɛ ka u ku ti yi paalu see sahasuŋŋu maa deede. ⁷Yɛlisɔ’ara an nyɛ zaaligu za’asigu yɛla pun piili a tuma, amaa ŋɔn goaari a maa kur nin bɛ ni, halli nti paai sahaseaa ban nin yiisi u soori ni. ⁸Di saha ka Zaaliguza’asira maa nin yi paalu. Di saha ka ti Dugma Yisa nin ti zaŋŋi u vuusim pɛsiŋŋu din yiiri u noori ni na n‑ku u, ka u lappu na gyirima nin ti sa’am u yɛla zaa. ⁹Ŋɔn Zaaliguza’asira maa kyɛnni na nin ti dɔlisi la ni Sintaani yiiko soori, nti mari kpeeŋŋu ni alahazibu tuma balibu kam, ni sisa, ka a zaa nyɛ la ziri. ¹⁰Ka u nin ti zaŋŋi ala’akyi tuma n‑yɔmsiri ninvugseeba ban baasiri yɔri. Ba nin baasi yɔri dama ba za’asiya, ni, ba ku wuri yɛlimaŋni maa ka nya tuliginsim. ¹¹Dinŋɔ zugu ka Naawunni tum la kyiriŋŋu din mari yiiko nti ba, ka ba niŋi ziri maa yɛdda. ¹²Ka di naari ti ya nyɛ la: ba kari ba sariya n‑lusi ba - ninvugseeba ban ku sakki, ni, ba niŋi yɛlimaŋni maa yɛdda, ka ba sufu boorim nyɛ la ba tum ala’akyi.

¹³Amaa tirima muna - di kpa la talasi ni ti pɛ’ai Naawunni ya zugu, yaseeba ban nyɛ ti mabiisi. Ka ti Dugma wuri ya, dama piiligu ni ka u daa pun yiisi ya, ni ya ti nya tuliginsim Naawunni Sii Kasi tuma puuni, ni yan niŋi yɛlimaŋni maa yɛdda zugu. ¹⁴U daa kyɛ ka ti wulisi ya u lahabasuŋŋu, ka lala ka u daa booli ya ni ya ti nya lala tuliginsim; ni yan ni ti Dugma Yisa Kirisita nin ti la’am n‑nya gyirima. ¹⁵Dizugu, m mabiisi, ya zɛ yummu ka mari wulisigu seelli tin daa zaŋŋi n‑wulisi ya la, di yi daa nyɛ yɛttɔ’a maa ni, bee, ti daa sɔbi nti ya. ^16-17Ti Dugma Yisa Masiiya mammaŋŋa kpamsima ya sufu, ŋɔn ni Naawunni ti Ba zaa, dama Naawunni wuri ti, halli nti tisi ti sufudoaa din ka naari, ni tama suŋŋu wa. Ka ti Dugma Yisa ni ti Ba Naawunni nin laa n‑kpaŋŋi ya, ya tunsuma ni ya yɛttɔ’asuma kam zaa ni.

¹Ti mabiisi, din kpalim nyɛ la nŋɔa: ya susim Naawunni n‑ti ti, ka lala nin kyɛ ka ti Dugma yɛligu moonni n‑kyɛnni tooni yooma, ka ba deaai di ni gyirima, hoo yarima ŋɔn daa deaai seem la. ²Ka laa n‑susiri Naawunni n‑tiri ti, ni, u yiisi ti putoo dima ni ninvugbeeri nuusi ni, dama pa sɔkam zaa n‑niŋi ti lahabaari maa yɛdda. ³Amaa ti Dugma nyɛ la ŋɔn zɛ yummu, ka u nin ti ya yaa, ka ta’ai ya Yɛlibeoo Daana maa nuusi ni. ⁴Halli ti siri niŋi ti Dugma maa yɛdda zaa, ni, ya tumni hoo tin daa wulisi ya seem la, ka kur nin niŋni lala sahakam. ⁵Ti Dugma kyɛ ka ya baŋŋi u wurilim ŋɔn nyɛ seem, ka ya diri sugru hoo Kirisita Masiiya ŋɔn diri di seem la zaa.

⁶Ti mabiisi, ti kpaamni ya ni, ti Dugma Yisa Masiiya zugu, ni, ya gbaam ya maŋŋa ka kyɛ ya mabiseeba ban nyɛ gbinnya’ari dima, baseeba ban bu dɔli wulisigu seelli tin daa wulisi ba la. ⁷Ya mammaŋŋa mi, ni, di sum ni ya niŋi hoo tin daa niŋi seem la. Ti daa pa gbinnya’a dima, tin daa bɛ ya saani sahanseaa la. ⁸Ti daa bu di diseelli sɔ saani ka bu yɔ di samni. Amaa ti daa yi tumni ti tuma halli ka di wum ti; ti daa tumni la sahakam zaa, ni ti di ziili ya zitibsiri. ⁹Pa la ti daa ka la soori ni ti deaai suŋŋsim ya saani zugu ka ti daa tumni lala maa, amaa ti daa niŋi lala ni ya nya, ka dɔli ti soori maa. ¹⁰Tin daa bɛ ya saani, ti daa yi yɛtti ya ni, ni, “Ŋɔn za’asi, ni, u ku tum, ba di kyɛ ka u di!” ¹¹Ti wumiya, ni, ninvugseeba ban bɛ ya saani n‑nyɛ gbinnya’a dima: ba bu boori ni ba tum seelli, ka na’a gyinni n‑kpeeri la niriba yɛla ni. ¹²Lala taabu niriba ka ti kpaamni ka susiri ba ti Dugma Yisa Masiiya zugu, ni, ba zinnma baalimm ka tum ba tuma n‑gɔsi ba maŋŋa. ¹³Ti mabiisi, yan di gyɛ ya tunsuma tumpu ni. ¹⁴Ka sɔ yi bu deaai ti wulisigu seelli tin sɔbi wa, yan kpasim u ka di laa m‑puusiri u; lala nin kyɛ ka vi gbaai u. ¹⁵Yan di zaŋŋi u ka u leebi ya dindaana, amaa ya kpaam u hoo ya mabiiya.

¹⁶Ti Dugma nyɛ la sufudoaa daana: ŋɔn mammaŋŋa tim ya sufudoaa sahakam zaa, ni yɛlikam puuni. Ti Dugma nin bɛ ya zaa saani.

¹⁷Tɔ, nyama sɔppu wa - man sɔbri m‑puusiri ya n toori nuu ni sɔppu: Pɔla . Lala ka n daalim n gbaŋŋu kam. N nuu sɔppu n‑siri la. ¹⁸Ti Dugma Yisa Kirisita Masiiya wurilim nin bɛ ya zaa saani.