GYƆNI

Gbanseaa

GYƆNI

ŋɔn daa sɔbi m‑pa buyi

¹Mani ŋɔn sɔbri gbaŋŋu wa - man kpeema maa nla: n sɔbri n‑tiri nyini, m ma: Naawunni pun yiisi i n‑niŋi u dinni, ni i biisi maa m‑paasi i zugu. N wuri ya ni n sufu zaa, yɛlimaŋni maa zugu - halli di pa la man kɔkɔ n wuri ya, amaa seeba zaa ban mi yɛlimaŋni la gba wuri ya ni. ²Ti wuri ya lala yɛlimaŋni maa zugu; yɛlimaŋni maa mun na kur kpalim m‑bɛ ti saani saha din ka tariga. ³M puusiri ya zaa, ni, ti Ba Naawunni, ŋɔn ni Yisa Kirisita u Bii maa zaa, nin suŋŋi ti ka zɔ ti namboo, ka kyɛ ka ti nya sufudoaa. Anŋɔ zaa ka ti nin nya, ka kpalim yɛlimaŋni ni wurilim puuni.

⁴Di daa niŋi ma nya’asim pam, man ŋɔn daa nya ka i biisi la seeba dɔli la yɛlimaŋni soori maa, kaman ti Ba Naawunni ŋɔn daa zaali ti seem la. ⁵Tɔ, m ma, wumma! Pampaŋŋɔ n susiri i, ni, ti kyɛ ka ti wuri taaba. Di pa la n sɔbri la zaalipaalli n‑tiri i, amaa di nyɛ la zaaliseaa tin daa deaai piiligu ni la maa. ⁶Ka wurilim wa nyɛ la: ni, ti dɔli Naawunni zaaligu yɛla zaa. Ya daa pun wum lala n‑yi piiligu ni, halli ni zuna - ni, zaaligu mun nyɛ la: ni, ti dɔli wurilim soori. ⁷Dama pampaŋŋɔ ka ninvugseeba ban yɔmsiri niriba yiiri la duniya wa na, ba bɔbgu gba. Ba nyɛ la seeba ban ku sakki, ni, Yisa Masiiya daa leebi ninsaala n‑kyɛ duniya wa ni na. Sɔ ŋɔn yɛli lala zaa nyɛ la ŋɔn yɔmsira, halli n nyɛ sɔ ŋɔn nyɛ la Masiiya Dindaana maa. ⁸Dizugu ya mari ya mansi suŋŋa, ka di zaŋŋi yan pun tum tunseesi maa anfaani la m‑basi ka ka yi ya nuusi ni; ay! - see ka ya nya a sanyoaa ka bu pɔsigi seela. ⁹Ninvugsɔ ŋɔn bu dɔli Yisa wulisigu yɛla, amaa ka yakkri a maa, di daama ku kpalim m‑bɛ Naawunni saani; amaa ŋɔnkam sakki n‑ti Yisa wulisigu ka kpalim m‑bɛ lala, di daama mari la ti Ba Naawunni u saani, ni Naawunni Bii maa m‑paasi. ¹⁰Dizugu sɔ yi ti kyɛ ya saani na ka bu mari wulisigu wa yɛla na, yan di sakki ka u kpɛ ya yiya ni, halli yan di puusi u gba. ¹¹Dama halli ninvugsɔ ŋɔn gyaari di daama gba, di ŋmanni hoo ŋɔn paasi u zugu ka ba la’am n‑tumni tumbeeri maa seem.

¹²Tɔ. N na mari yɛla pam ni n ya yɛli n‑ti ya, amaa ni lala zaa yɔri, n bu boori n sɔbi a m‑pa gbaŋŋu zugu n‑ti ya na. Dama m mari tama, ni, n nin kyɛ ya saani na n‑kaai ya, ka ti nini nya taaba ka ti di taaba azama, dinŋɔ nin kyɛ ka ti nya sufupeelli pam. ¹³Tɔ: i sunzɔ bɛ la n saani; ŋɔn gba ka Naawunni yiisi n‑niŋi u dinni ka ŋɔna ni u biisi gba puusiri i ni suŋŋasuŋŋa.