PIITA

Gbanseaa

PIITA

ŋɔn daa daŋŋi n‑sɔbi

¹Gbaŋŋu wa yi la man Piita saani n‑tiri ninvugseeba ban yi ba toori tiŋŋa n‑wurigi m‑bɛ Pɔntusi tingbaŋŋu, ni Galɛseaa, ni Kappadɔsii, ni Ɛseaa, ni Bitinii tingbana m‑paasi la. ²Yarima ka Naawunni ti Ba daa pun baŋŋi ya yɛla, ka yiisi ya, n‑kyɛ ka ya leebi u dinni, m‑bɛ kasi u Sii Kasi zugu la, ni ya sakki n‑ti Yisa Kirisita, ka u ziim zugu ka ya nin niŋi kasi. M puusiri ya zaa suŋŋa, ni, Naawunni ti ya alaafɛ ni sufudoaa zaa.

³Kyɛ ka ti pɛ’ai Naawunni, ŋɔn nyɛ ti Dugma Yisa Kirisita Ba la, u namboo la zugu. Ŋɔn daa yisigi Yisa Kirisita kum ni la zugu, u daa yiisi nyɔvuri paalli na n‑ti ti. Ka lala zugu ti mari tama, ni, ti ti nya beesigu paalli ti kum nyaaŋŋa. ⁴Lala ka ti nin di faari. Faari wa mun nyɛ la ban zaali seaa arizana ni n‑guri ti la. Ka ku toaai n‑sa’am, bee, m‑baasi, bee, n‑suui hoo moori ŋɔn suuri seem. ⁵Dama ya yɛdda niŋbu nin kyɛ ka Naawunni yiiko mari ya, halli ka tiliginsim din pun maali siri la ti paai ya na, duniya wa naari saha. ⁶Di sumni ni ya mari sufupeelli di zugu, halli ni ya yi na kpalim n‑nyari namsigu ni wahala beela - ay! di bu ya yuui. ⁷Wahala balibubalibu wa nin kyɛ ka ya yɛdda nin nya zamsigu kaman ban yi zamsiri salima bugum ni seem la. Amaa salima ŋɔn nin ti naai, ya yɛdda mun nin zamsi n‑yi bummaŋni, ka mari anfaani pam. Di nin ti ti ya pɛ’abu, ni gyirima, ni tibsim, Yisa Kirisita yi ti yi paalu sahanseaa la. ⁸Ya na bu nya u, ka wuri u; halli ni yan bu nyari u zaa yɔri ya niŋi u yɛdda, ka nyari sufupeelli pam ni sufumaasim zaa. ⁹Dama ya yi nyari la ya yɛdda nyoori, di nyɛ la ya siisi tiliginsim.

¹⁰Tiliginsim dinŋɔ ka anabidima daa guri la, saha an gaari la ni, ban daa daŋŋi n‑tɔ’asiri Naawunni ŋɔn ya n‑zaŋŋi u wurilim piini n‑ti yarima la yɛla; dizugu ba daa viisi m‑boori di gbinni suŋŋa. ¹¹Yisa Kirisita Sii Kasi daa bɛ ba ni n‑daŋŋi n‑wulisiri ba ŋɔn Yisa Kirisita wahala yɛla - ni u gyirima din nin dɔli nyaaŋŋa na yɛla gba. Ka ba daa boori nimmoosi ni ba ti baŋŋi dinŋɔ saha, ni din ti ya n‑nyɛ seem. ¹²Amaa di daa kasigi n‑ti ba, ni, ba bu tumni n‑tiri la ba mansi, amaa ba tumni n‑tiri la yarima. Lala zugu, pampaŋŋɔ saha wa ka ba tum Sii Kasi ka u yi arizana n‑sigi na ni u ti wulisi lahabasuŋŋu n‑ti ya - alahazibu seesi malaakadima ŋɔn guusiri ni ba nya maa.

¹³Anŋɔ zaa zugu, see ka ya maali siri ya sufu ni, ka mari ya mansi. Ya zaŋŋma ya sufu ni teesa ba’aba zaa n‑niŋi ya tama maa yɛla ni, zaŋŋi n‑kyaŋŋi bunsunseesi Naawunni ŋɔn ya n‑zaŋŋi n‑ti ya, Yisa Masiiya ŋɔn ti ya yi paalu na dahinseaa la. ¹⁴Ya n nyɛ ban deaai Naawunni noori la hoo u bisuma, ka di zugu yan di kyɛ ka kɔrisi su ya sufu yɛla, hoo din daa niŋi yan daa na zi sɛseela sahanseaa la seem maa. ¹⁵Dizugu ya beebu zaa puuni, see ka ya bɛ kasi hoo Naawunni ŋɔn booli ya maa ŋɔn bɛ kasi seem la. ¹⁶Tɔ; di sɔbi n‑dooli Naawunni Bukku ni, ni, Naawunni yɛliya, “Ya bɛ kasi dama m bɛ la kasi.”

¹⁷Ya puusiri Naawunni, ni, ya Ba: ka ŋɔn Naawunni mun bɛ la sɔ ŋɔn katti sɔkam sariya hoo nira maa tuma ŋɔn nyɛ seem, ka bu deaari sɔ nini. Di yi ti bɛ lala, see ka ya zɔ dabeem, yan na bɛ duniya wa ni sahanseaa la ka na bu kuli Naawunni saani maa. ¹⁸Dama ya mi halli, ni, Naawunni ŋɔn daa tiligi ya n‑yiisi ya ya badima yɛttɔ’akyɔ’ama tuma maa ni, pa anzulifa ka u daa zaŋŋi m‑pa talima n‑yiisi ya, bee, salima, bee lala bunseelli zaa kan sa’amna. ¹⁹Ay! - Yisa Masiiya ziim ka u daa zaŋŋi n‑niŋi, hoo ban zaŋŋi pɛbilisɔ ŋɔn bu pɔrisi, bee, m‑mari da’ari zaa, m‑maali seem. Ka lala ziim mari la anfaani pam; din ka ba daa zaŋŋi m‑pa talima n‑tiligi ya. ²⁰Naawunni daa pun daŋŋi m‑pii u pɔi, ka naayi naam duniya wa. Halli ka ŋɔn Yisa daa ti yi paalu zɛmaana baasigu saha wa. Yarima zugu n‑daa la. ²¹Naawunni daa neaai u kum ni, ka ti u gyirima. Ŋɔnŋɔ zugu ka ya niŋni Naawunni yɛdda, ka ya kur kyɛ ka ya yɛdda niŋbu ni ya tama zaa bɛ la Naawunni saani.

²²Ya pun dɔli la yɛlimaŋni soori, ka deaai Naawunni noori n‑leebi u dinni. Ka lala yi kyɛ ka ya siri wuri ya mabiisi ka yɔmsa ka ni. Dizugu ya na wuri ba, ya sufu ni, ni nimmoaa. ²³Naawunni yɛligu kan mari nyɔvuri ka ka naari la daa pun maali n‑dɔ’ai ya buyi dɔ’am. Lala dɔ’am maa pa la duniya wa dɔ’am, ka i dɔ’ai m‑bɛ ni n‑yuui beela ka naayi naai; di nyɛ la dɔ’am seebu ka ba dɔ’ai i n‑kpɛ nyɔvuri kan ka naari. ²⁴Di nyɛ la hoo din daa pun sɔbi n‑dooli seem la, ni#:-

“Ninsaala ŋmanni la moori,

Ba mun gyirima zaa ŋmanni la mɔpuum.

Moori kpiiri ni,

Ka a puum maa suui m‑basi,

²⁵Amaa ya Dugma yɛligu ku ti basi,

Amaa din nin bɛ ni

Halli ni saha din ka naari.”

Lala ‘yɛligu’ maa nyɛ la lahabasunseaa ban daa moonni na n‑ti ya la.

¹Ya yiisim din bu veela zaa m‑basi - yɔmsa, ni ziri, ni nyuuri, ni nangbammalisim. ²Ya nyɛ la hoo bileesi ka ba dɔ’ai ya Naawunni niriba maa ni. Dizugu ya kyɛ ka Naawunni Sii bisim kɔkɔ kɔm mari ya, dama buna wa n nin suŋŋi ya ka ya zoaai na n‑nya tiliginsim. ³Pampaŋŋɔ ya pun nyu bu, ka baŋŋi ti Dugma ŋɔn veela seem. ⁴Ya vuum ya mansi m‑pɔri u. Ŋɔna n nyɛ hoo kugri, halli ni u nɛ ni maa - kugseaa niriba ŋɔn za’asi, amaa kana ka Naawunni yiisi ka u nya ka ka veela. ⁵Ka yarima gba ŋmani la u kuga, ka ya gba n nyɛ seeba ban nɛa. Ba zaŋŋni ya m‑meeri Sii Kasi Gyeeŋŋu Yiri. Ka ya laa n‑nyɛ u gyeeŋŋu toondaandima la, ka mari maaligu na - bunkasiseesi ban maali n‑tiri Naawunni ka u sakki n‑deaari a la, Yisa Kirisita zugu. ⁶Litaafi yɛliya#:-

“Gɔsim man ŋɔn yiisi sunsukka kugri n‑ti Zayɔn,

Bunveelli ka n gamsi n‑tisi:

Ka sɔkam ŋɔn niŋi u yɛdda muna -

Ŋɔna n ku di vi, halli beela.”

⁷Tɔ: ka dinŋɔ wulisiya, ni, ya yɛdda dima maa saani, di nin veeli n‑ti ya; amaa ban ka yɛdda dima maa ŋɔna, u yɛ n‑ŋmani la hoo din sɔbi seem, ni#:-

“Kugseaa tammeeriba ŋɔn daa za’asi la -

Kana daa leebi kan gbaai nyeebri maa,

N‑gbaari ka zaa ni kpeeŋŋu.”

⁸Ni#:-

“Kugseaa kan nin kyɛ ka niriba tuui n nyɛ ka,

Ni tampiiya ŋɔn kyɛ ka ba lu tiŋŋa.”

Ba nin ŋmɛ ba nɔba n‑tuui ka saani n‑lu, dama ba daa bu niŋi yɛligu maa yɛdda. Di daa pun bɛ la lala n‑guri ba.

⁹Yarima gba ka ba daa sɔbi ya yɛla, ni, ‘zuliyaseaa ban yiisi maa, naam gyeeŋŋu toondaandima, Naawunni niriba butiri, ban daa yiisi ninvugseeba n‑zaali kpaŋŋa n‑ti Naawunni ni ba ti mooli Naawunni gyirima yɛla’ - dama ŋɔn Naawunni daa booli ya n‑yiisi ya zibsim ni, ni ya ti kpɛ u alahazibu neesim ni la.

¹⁰Ya yɛla gba ka u daa tɔ’asi, ni#:-

“Sahanseaa sa la ya daa pa u niriba,

Amaa pampaŋŋɔ ya yi nyɛ la Naawunni niriba.

Sahanseaa sa maa Naawunni sugru daa ka ya ni,

Amaa pampaŋŋɔ u sugru maa paai ya na.”

¹¹N kpaamni ya ni, m mabiisi, dama ya kur nyɛ la saamma m‑bɛ ya kyɛnni ni, duniya wa puuni, ni, ya gbaam ya mansi ka kyɛ ningbina kɔri kan zabri n‑sa’amni ya siiya yɛla. ¹²Ka bɛ beesisuŋŋu ban bu dɔli Naawunni maa saani. Ka halli ba yi daŋŋi n‑tuuri ya m‑boonni ya, ni, ninvugbeeri, lala nin kyɛ ka ba nin laa n‑nya ya tunsuma ka mari pɛ’abu n‑tiri Naawunni, u kyɛnni na dabsiri daari maa.

¹³Ya zaŋŋma ya mansi n‑sakki n‑ti fukumsi yiiko kam zaa an bɛ saalidima saani, ti Dugma maa zugu. Di yi nyɛ la Naaba, ¹⁴bee, u tuumuseeba ŋɔn daa tum ni ba darigi ban niŋi taalli la tuba ka pɛ’ai ban niŋi suŋŋa maa. ¹⁵Dama lala n nyɛ Naawunni yuubu: ni, ya ti niŋi suŋŋa ka dizugu ya nin kyɛ ka ban ka bamsim la kpalim la surimm, ka ku laa n‑tɔ’asiri ba yɛttɔ’ayɔya la. ¹⁶Ya bɛ ni hoo ban su ba maŋŋa la, amaa yan di zaŋŋi ya mansuulinsi maa n‑ligi ya mansi ka tumni tumbeeri. Kur kyɛ ka ya bɛ ni hoo Naawunni tuntumniba. ¹⁷Ya tim sɔkam gyirima hoo din sum ni u seem. Ya yɛddaniŋniba maa - ya wuri taaba; ya zɔm Naawunni; ya gyeemni NaaTitaari maa.

¹⁸Ya seeba ban nyɛ daaba, ya zaŋŋma ya mansi n‑wumni n‑tiri ya dugudima ni gyirima, pa la ban niŋni ya suŋŋa la kɔkɔa, amaa halli ban mari ya ni putoo la gba. ¹⁹Dama di mari la pɛ’abu, ninsaala yi bu tum taalli ka deaai putoo tubdarigri ni sugru, ŋɔn mi Naawunni zugu. ²⁰Ya bu nya? - ya yi tum taalli ka ba bu ya di zugu, ya yi deaai di ni sugru, ba nin pɛ’ai ya di zugu, bee? - Ay, pa lala! Amaa ya yi nya namsigu ya tunsuma zugu ka deaai di ni sugru, dina m mari pɛ’abu Naawunni saani. ²¹Dinŋɔ zugu ka ba daa booli ya, dama Kirisita daa nya namsigu ya zugu, ka lala u daa kyɛ n‑zaali n‑wulisiri, ni, ya gba dɔli u soori maa. ²²Ni#:-

“Ŋɔna daa bu niŋi taaliseaa,

Ka ziri bee yɔmsa mun daa zi n‑yi u noori ni na.”

²³Ban daa tu u maa, u daa bu tu n‑labsi; ban daa namsi u la, u daa bu vɔlisi sɔa. Amaa u daa zaŋŋi u maŋŋa n‑ti la Ŋɔn katti sariya ni yɛlimaŋni maa. ²⁴U daa deaai ti tumbeeri taalli n‑niŋi u saani u kum dɔpulli maa zugu; ni di ti kyɛ ka ti kpi zaŋŋi n‑kyaŋŋi ala’akyi ni, ka laa n‑doaai na nti bɛ yɛlimaŋni soori ni. U dansi maa zugu kyɛ ka ti nya alaafɛa. ²⁵Ya daa ŋmanni la hoo peesi ban bɔrigi; amaa pampaŋŋɔ ya labi ya pɛgura saani na, pɛgurisɔ ŋɔn guri ya nyɔvuya suŋŋa.

¹Ya pɔ’aba, di bɛ la lala maa taabu ya saani gba: ya wumma n‑ti ya siridima. Ka di yi nyɛ la ba sɔ m bu niŋi Naawunni yɛligu maa yɛdda, u pɔ’a beesigu nin kyɛ ka u niŋi tuuba ka di nin nyɛ la ya beesisuŋŋu zugu, amaa pa la ya yɛttɔ’a zugu. ²Dama ba nin nya ya beesisuŋŋu, ni, ya dɔli la sɔseesi an mari gyirima ni veelim n‑tiri ba. ³Yan di kyɛ ka ya veelim yiiri la ya sutura bɔbri ni, hoo zugu paaŋŋu bee salima bansi ni nangɔkɔrisi ni kyinkyinveela soobu; ⁴amaa di sum ni di nyɛ la ya sufu ni beesigu bunsɔ’ara zugu, ka ya kpalim n‑sigsiri ya maŋŋa baalimm. Lala sufuveelli maa ku toaai n‑sa’am, ka nyɛ la din mari gyirima Naawunni saani. ⁵Dama lala taabu ka pɔ’aseeba daa bɛ ni, sahanseaa din gaari la. Ba daa nyɛ kasi ka zaŋŋi ba tama n‑niŋi Naawunni ni, ka daa kpalim m‑bɛ lala n‑wulisiri ba veelim ŋɔn daa nyɛ seem. Ba daa wumni n‑tiri ba toori siridima. ⁶Hoo Zaraatu ŋɔn daa wum n‑ti Ibrahim, ka boonni u ‘n daana’ la seem. Ya nin leebi la u bipunsi, ya yi ti tum din sumsi seem ka di kyɛ ka dabeem mari ya.

⁷Ya pɔ’a daandima, see ka ya gba bɛ lala maa taabu: ya teesim pam zaŋŋi n‑kyaŋŋi yan ni ya pɔ’aba beesigu ziiya. Ya niŋni ba hoo ya suŋŋniba ban yaa bu paai, amaa ka yan ni ban nin la’am n‑di nyɔvuri hoo ya faari - di nyɛ la Naawunni piini zaa - Ŋɔn tiri ya bunseaa u wurilim zugu. Ka lala nin kyɛ ka seelli ku ta’ai ya wunsusigu.

⁸Dinŋɔ zaa nyaaŋŋa, ya zaa la’am m‑bɛ ni taaba suŋŋa. Ya zɔm taaba namboo. Ya wuri taaba hoo mabiitiri. Ya mari namboo ni taaba ka di duusiri ya mansi. ⁹Yan di zaŋŋi beeri n‑yɔ beeri, bee, tuuri n‑labsi tuuri; amaa kyɛ ka ya labsigu nyɛ la: ya susi bunsuma n‑tiri ba. Dama dinŋɔ zugu ka ba daa booli ya, ni ya ti di Naawunni bunsuma maa faari. ¹⁰Dama di sɔbi n‑dooli, ni#:-

“Sɔkam ŋɔn nin wuri duniya wa beesigu

Ni u ti nya dabsisuma -

Di sumni u gbaai la u zilimni ka kyɛ yɛttɔ’abeoo,

Ka u noori mun di mi ziri yɛla.

¹¹U yim tumbeeri ni

Ka tumni la tunveela;

U boom beesisuŋŋu

n‑dɔli ka.

¹²Dama Naawunni nini gɔsiri la yɛlimaŋni dima yɛla,

Ka u tuba wumni la ba wunsusigu.

Amaa u nindaa ŋmaligi ni

Ka kyɛ u kpaari m‑basi tumbeeri dima la.”

¹³Ya nini yi moaai tunsuma tumpu ni, ŋɔni nin daam ya? ¹⁴Halli ya yi ti nya wahala ya tunsuma maa zugu, ya mari la zugsuŋŋu. Ni, “Ya di zɔ dabeem zaŋŋi n‑kyaŋŋi ban ŋɔn zɔri bunseesi la zugu; di kyɛ ka ba kpeesi ya dabeem.” ¹⁵Ya sufu ni teesa puuni ya tim Kirisita gyirima hoo ya Dugma. Sɔkam yi ti boosi ya zaŋŋi n‑kyaŋŋi yan mari tama seem maa, ya kyɛ ka ya pun sɛ’asi ni ya labsi n‑wulisi lala nira di gbinni ŋɔn nyɛ seem. ¹⁶Amaa ya tɔ’asim yɛttɔ’anya’asa n‑ti u baalimm, ka ti u gyirima. Ka di kyɛ ka ya tum taalli ka ya sufu daamni ya; lala nin kyɛ ka ninvugseeba ban zaŋŋi ya Kirisita puuni beesisuŋŋu n‑galimni ya la nin ti di vi dizugu. ¹⁷Ya yi ti tum tunsuma ka ba namsi ya dizugu, Naawunni yuubu yi ti zaali ya lala, di sɔ ni ya tum tumbeeri ka nya namsigu dizugu. ¹⁸Ya bu nya? Kirisita daa kpi yimmu ti tumbeeri zugu, ka a yɛla naai; ŋɔna yɛlimaŋni zaa daana daa kpi tirim halibeoo dima zugu, ni u ti zaŋŋi ti n‑taasi Naawunni saani. Ba daa ku u ningbiŋŋu, amaa u siiya daa doaai n‑na vu. ¹⁹Ka lala ka u daa kyaŋŋi nti mooli yɛligu n‑ti ninvugseeba ban kpari dansarika ni la siisi. ²⁰Ban n nyɛ seeba ban daa za’asi Naawunni noori sahanseaa din gaari la, Nuhu saha maa; halli ni Naawunni daa di sugru n‑yuui, Nuhu ŋɔn daa maanni nyarintitaari maa dahinseesi la. Ka lala nyariŋŋu puuni ka niriba beela kɔkɔa - di nyɛ la babanii - daa nya fa m‑basi, ka koom maa daa bu di ba. ²¹Tɔ, ka lala koom wulisi ya ya Naawunni kɔsuubu yɛla, din fa ya m‑basi seem. Di pa la ya su koom m‑peaai ya ningbina da’ari m‑basi, amaa ya ŋmaligi Naawunni saani ni u ti peaai ya sufu ni taalli m‑basi. Ka u niŋi lala Yisa Kirisita kum yisigri zugu. ²²Ŋɔn Yisa daa pun paai arizana ni nti bɛ Naawunni nudirigu ziiya, ka u su malaakadima fukumsi, ni naama ni kpamni zaa dinni m‑paasi.

¹Ti sakkiya, ni, Yisa Kirisita daa namsiya pam, ŋɔn daa bɛ ni hoo ninsaala sahaseaa la: dinŋɔna ya gba sɛ’asim ya mansi n‑di namsigu; dama ŋɔnkam sakki n‑ti ningbiŋŋu namsigu pun yiisi u maŋŋa tumbeeri yɛla ni. ²Lala nin kyɛ ka u tumni Naawunni yuubu halli ni u nyɔvuri naari saha, ka pa la ningbiŋŋu kɔrisi tuma. ³Ya daa yuui pam, dabsa an gaari la, ka ya beesigu daa ŋmani la hoo ban bu mi Naawunni beesigu la, m‑bɛ ni ya yuubu zugu, m‑mari ningbiŋŋu kɔribeeri, n‑nyuuri daam, n‑deemni deenyɔya, ka gyeemni ba’ayuya an bu dɔli soori. ⁴Di yi niŋi ba alahazibu pam, yan bu laa n‑la’amni ba saani m‑bɛ ban bɛ beesiseaa ni maa, kan nyɛ bumbeoo zaa maa zugu; ka ba tuuri ya di zugu. ⁵Amaa ba nyɛ la seeba ban nin ti wulisi ba duniya wa beesigu yɛla ŋɔn daa nyɛ seem n‑ti Naawunni, dama u pun maali siri ni u ti kari ninvugvuya ni kpiimma zaa sariya la. ⁶Lala zugu ka ba daa yiisi lahabasuŋŋu wa’azu n‑ti ninvugseeba ban pun kpi la gba. Ban daa bɛ ninsaalidima beebu sahanseaa la, ba daa kari ba sɔkam duniya wa ni sariya maa, di nyɛ la kum sariya. Amaa Sii Kasi yiiko zugu ba nin ti bɛ nyɔvuri ni Naawunni saani.

⁷Bunseelli kam zaa naari ni maa, dizugu ya mari ya mansi n‑guri suŋŋa, ka susiri Naawunni. ⁸Din gaari a zaa nyɛ la, ya zaŋŋma ya sufu zaa n‑wuri taaba ni yɛlimaŋni, dama wurilim sɔ’ai la tumbeeri pam taalli. ⁹Ya deaam taaba ya yiya ni hoo saamma, ka di fabli di zugu m‑mɔŋŋi taaba. ¹⁰Dama Naawunni ŋɔn zaŋŋi piiniseesi n‑ti ya la, ya sɔkam zaŋŋma ŋɔn deaai piiniseaa n‑tumni n‑suŋŋi u taaba - hoo yiri dima ŋɔn suŋŋni taaba n‑tumni ba yiri tuma zaa seem. ¹¹Dinŋɔna ŋɔn tɔ’asiri yɛttɔ’a, ŋɔn tɔ’asim Naawunni ŋɔn zaŋŋi yɛttɔ’aseesi n‑ti u la; ka ŋɔn tumni n‑suŋŋni niriba, ŋɔn zaŋŋma yaseaa Naawunni ŋɔn zaŋŋi n‑ti u la n‑tumna. Lala zugu ka Naawunni nin nya pɛ’abu Yisa Kirisita zugu, dama ŋɔn Yisa nyɛ yiiko daana ni gyirima daana, n‑su a ni, halli ni saha din ka naari. Ammi.

¹²M mabiwutta, ya yi nyari wahala hoo bugum ŋɔn vuuli ŋɔn paari ya seem la, yan di teesiri, ni, din na zi n‑niŋi sɔ n niŋi ya maa. ¹³Amaa ya mari sufupeelli, yan ni Masiiya maa ŋɔn la’am n‑namsi la zugu, dama ya nin mari sufumaasim pam sahanseaa u gyirima ŋɔn ti yi paalu na la. ¹⁴Ba yi galim ya ka tuuri ya Kirisita yuuri zugu, ya mari la zugsuŋŋu, dama Naawunni Sii Kasi ni u gyirima bɛ ya ni. ¹⁵Tɔ; amaa ya sɔ di leebi ŋɔn kuuri niriba, bee n‑zuura, bee n‑tumni tumbeeri zaa, halli yan di kpeeri niriba yɛla ni gba, ka nya namsigu lala taalli zugu. ¹⁶Amaa nira yi nya namsigu ŋɔn nyɛ Kirisita dinni zugu, ŋɔn di kyɛ ka vi mari u, amaa ŋɔn pɛ’am Naawunni ba n zaŋŋi Kirisita yuuri m‑boonni u la zugu. ¹⁷Saha paaya ni sariya karibu piili. Naawunni niriba mun ya daŋŋi tooni sariya maa ni: tɔ - ka di yi piili ti saani, wula ka di ti ya n‑naai ban bu sakki n‑wum Naawunni yɛligu lahabasuŋŋu la saani?

¹⁸Di sɔbi n‑dooli, ni#:-

“Di yi tɔa, ni ban dɔli Naawunni la n‑nya tiliginsim:

Tɔ, ka ban za’asi u yɛla, ni ala’akyi dima muna -

Di ya n‑niŋi ba la wula?”

¹⁹Dinzugu ninvugseeba ban nyari namsigu Naawunni yuubu la zugu. Tɔ - di sumni ni ba kur tumni din tuusi ka zaŋŋi ba nyɔvuri n‑niŋi ba Naamna nuusi ni, Sɔ ŋɔn kur zɛ u nangbambasiri nyaaŋŋa la.

¹N tɔ’asiri n‑tiri yaseeba ban nyɛ kpamma Yisa nyaandɔliba la’aŋŋu puuni, dama man gba nyɛ la kpeema. N nini daa nya Yisa ŋɔn daa namsi seem, ka u gyirima maa yi ti yi paalu ni sahanseaa, man nin mari n tɔrli. ²Ya niŋi hoo bunkɔbguriba n‑guri Naawunni peesi n‑ti u: ba bɛ la ya saani, dizugu see ka ya guri ba suŋŋa hoo Naawunni ŋɔn boori seem, pa la sɔ ŋɔn mugsi ya zugu amaa ya sufu yuubu. Ya tumma ya tuma suŋŋa, pa la ligri boobu zugu, amaa ya maŋŋa ŋɔn boori nimmoosi ka ya tumni zugu. ³Yan di leebi ban diisi ya mansi nadima n‑su ba fukumsi, amaa ya kyɛ ka ya beebu maa nyɛ bunveelli, ka ba nin nya ka dɔla. ⁴Ka Bunkɔbgura Zuguraana maa yi ti yi paalu na, u nin zaŋŋi ban nyaŋŋi la laara piini n‑ti ya, ka a ku baasi sahakam.

⁵Ya na’akyimbisi la, ya sakkma n‑tisi ban gaari ya la. Ya zaa kyɛ ka mansigsigu bɛ ya saani, ka tumni n‑tiri taaba, dama Litaafi ni ka di yɛli#:-

“Naawunni za’asiri karimbaani dima,

Ka u tumni la wurilim n‑suŋŋni ban sigsi ba mansi.”

⁶Lala zugu ya sigsim ya mansi Naawunni Yiikodaana tooni, ka u nin ti duusi ya u toori sahasuŋŋu. ⁷Ya zaŋŋma ya yɛla zaa n‑niŋi u nuu ni, dama u ba’a zaa bɛ la ya yɛla ni.

⁸Ya gbaam ya mansi suŋŋa sahakam, dama Sintaani ŋɔn nyɛ ya dindaana maa kur goori hoo gbigimni la n‑kaasiri m‑boori sɔ ni u gbaai n‑ŋɔbi. ⁹Ya za’asim u yɛla, ka zɛ yimmu ya yɛdda maa puuni. Ya mi halli, ni, di nyɛ la lala n‑ti ya nyaandɔlitaaba maa, duniya wa ni lugri kam zaa. ¹⁰Ka ya yi sakki n‑namsi beela, ti Dugma Naawunni nin mari ya suŋŋa n‑ti ya yaa, ka seelli ku daam ya. Ŋɔn Naawunni n nyɛ sɔ ŋɔn tiri piinisuma zaa maa, ka u daa booli ya ni ya laa n‑di u nya’asim din ku naai, Yisa Kirisita zugu. ¹¹Yiiko zaa nyɛ la u dinni sahakam, sahakam. Ammi.

¹²Mani n sɔbi gbambila wa n‑zaŋŋni n‑tiri Sailivanisi ni u mari na n‑ti ya. U nyɛ la m mabiiya, ka n niŋi u yɛdda. N sɔbi ka, ni n ti suŋŋi ya ka kpamsi ya, ka kyɛ ka ya baŋŋi, ni, Naawunni wurilim yɛla siri bɛ la lala, ka ana n nyɛ an nin kyɛ ka ya zɛ yummu. ¹³Yisa nyaandɔliseeba ban la’amni la tiŋŋa wa puuni, ni, ‘Babɛlɔn’ la, - ba zaa puusiri ya: m bii Maaki gba puusiri ya. ¹⁴Ya puusima taaba suŋŋasuŋŋa, ti wurilim puusigu ni. Sufudoaa ni alaafɛ bɛ ya saani, ya zaa ban bɛ Yisa puuni.