GYƆNI

Gbanseaa

GYƆNI

ŋɔn daa daŋŋi n‑sɔbi

¹Ti sɔbri n‑tiri ya la nyɔvuri yɛligu maa zugu. Yɛligu maa daa bɛ ni piiligu ni sa. Tin daa wum bunseesi maa ka ti ya n‑sɔbi zaŋŋi n‑kyaŋŋi u yɛla maa, ni tin daa gɔsi seesi, ka ti nini nya, ka ti daa zaŋŋi ti nuusi n‑siisi. ²Nyɔvuri maa n daa yi paalu na, ka ti daa nya; di zugu ka ti tɔ’asiri m‑moonni lahabaari n‑tiri ya. Ti lahabaari nyɛ la nyɔvuri kan ka naari wa yɛla, nyɔvuridaansɔ ŋɔn daa bɛ Naawunni ti Ba saani la, ka pampaŋŋɔ u yi paalu na ka ti nya. ³Tin nya ka wum seelli maa ka ti moonni n‑tiri ya gba, ni ti ti kyɛ ka tin ni yan nin la’am m‑bɛ ni. Halli ti beebu nin ti bɛ ti Ba saani, ni u Bii Yisa Kirisita Masiiya saani. ⁴Ti sɔbi kanŋɔ ni ti zaa sufumaasim leebi bummunni zaa.

⁵Tɔ; lahabaseaa tin daa wum Naawunni Bii maa saani ka moonni n‑tiri ya nŋɔa#:- Naawunni nyɛ la neesim, ka zibsim halli fiiŋ ka u saani. ⁶Dinzugu, ti yi yɛtti, ni, ti bɛ la u beesigu maa taabu amaa ka na kpalim m‑bɛ zibsim ni lala saha maa, ti ma’ari la ziri ti yɛttɔ’a maa ni, ni ti beesigu maa ni m‑paasi. ⁷Amaa ti yi bɛ neesim ni - hoo Ŋɔn bɛ neesim ni seem maa - dinŋɔna tin ni ŋɔn beesigu maa sakkri n‑tiri taaba. Ka Naawunni Bii Yisa ŋɔn daa kpi n‑ti ti maa zugu, u ziim nin ti peaari ti n‑yiisiri ti tumbeeri zaa taalli ni. ⁸Ti yi ti yɛli, ni, ti ka la tumbeeri, ti yɔmsiri la ti maŋŋa ka yɛlimaŋni ka ti ni. ⁹Amaa ti yi ti yiisi ti tumbeeri yɛla n‑yɛli Naawunni, u nin niŋi hoo ŋɔn daa pun yɛli seem la, ka tum din nyɛ deede; u nin kyɛ ti tumbeeri taalli m‑pɛŋŋi ti, ka nyeesi ti galiŋŋu yɛla ni a da’ari zaa m‑basi. ¹⁰Amaa ti yi yɛtti, ni, ti bu tum tumbeeri, lala gbinni n nyɛ, ni, Naawunni nyɛ la ziri daana; dizugu ti yi yɛli lala di wulisi, ni, u yɛligu ka ti ni.

¹Tɔ, m biisi, dinŋɔ ka n sɔbri n‑tiri ya na, ni ya di tum tumbeeri. Amaa sɔ yi ti tum tumbeeri, u mari la sɔ ŋɔn zɔri sindaani u zugu n‑tiri Naawunni ti Ba maa - Yisa Kirisita nla, sɔ ŋɔn tumni yɛlimaŋni tuma deede. ²Ka ŋɔn Kirisita leebi la maaligu kan ti ti soori n‑kyɛ ka ti nya kyɛ-m‑pɛŋŋi ti tumbeeri zugu. Ka di pa la tirima kɔkɔ tumbeeri, amaa sɔkam zaa dina. ³Tin dɔli Naawunni zaaligu zugu nin wulisi, ni, ti siri mi u. ⁴Ninvugsɔ yi yɛli, ni, “M mi u.”, ka bu dɔli u zaaligu maa, lala nira nyɛ la ziri daana ka yɛlimaŋni ka u ni. ⁵Amaa ŋɔn dɔli u yɛligu maa nyɛ la sɔ Naawunni wurilim maa ŋɔn siri paali u zaa. Dinŋɔ nin kyɛ ka ti niŋi yɛdda, ni, ti la’am m‑bɛ Naawunni saani. ⁶Ŋɔnkam yɛnni, ni, u la’am m‑bɛ la Yisa saani, di sumni ni di daama bɛ la hoo Yisa ŋɔn daa bɛ seem la.

⁷N zɔdima: di pa la n sɔbri la zaalipaaliseaa n‑tiri ya na, amaa n teaari ya la bunkurigu yɛla, seaa yan daa deaai piiligu ni la. Zaalikurigu wa kur nyɛ la lahabaseaa yan daa pun wum la. ⁸Halli zaalipaalli n nyɛ ka gba, ka n tiri ya; dama ka nyɛ la yɛlimaŋni Yisa Masiiya zugu, ni yɛlimaŋni yarima saani gba. Ka nin kpalim m‑bɛ lala n‑tiri ya gba; dama zibsim la viiri ni, ka yɛlimaŋni neesim neaara. ⁹Ninvugsɔ yi ti yɛli, ni, u bɛ la neesim maa ni, ka yaai u mabiiya, u na kpalim m‑bɛ zibsim ni. ¹⁰Ŋɔn mun wuri u mabiiya kpalim m‑bɛ la neesim maa ni, ka seelli ka u ni kan nin toaai n‑kyɛ ka u taraana ti tuui n‑tum taalli. ¹¹Amaa ŋɔn mun yaai u mabiiya bɛ la zibsim ni n‑kyɛnna. U bu mi ŋɔn kyɛnni m‑paari seela, dama zibsim maa kyɛ ka u nini bu nyara.

¹²M biisi, man sɔbri n‑tiri ya wa,

yan pun deaai ya tumbeeri kyɛ-m‑pɛŋŋi zugu -

ya deaai di Yisa yuuri zugu.

¹³M badima, n sɔbri n‑tiri ya gba,

Yan mi Sɔ ŋɔn daa bɛ ni zugu -

duniya piiligu saha ka u daa bɛ ni.

Na’akyimbisi, n sɔbri n‑tiri ya gba,

yan pun zabi Sintaani n‑nyaŋŋi u la zugu.

¹⁴M‑paasi yaasa#:-

M bibisi, n laa n‑sɔbi n‑ti ya,

yan mi Naawunni ti Ba la zugu.

M badima, n laa n‑sɔbi n‑ti ya gba,

Yan mi Sɔ Ŋɔn Daa Bɛ ni la zugu -

duniya piiligu saha ka u daa bɛ ni.

Na’akyimbisi, n laa n‑sɔbi n‑ti ya gba,

yan mari yaa zugu;

ka Naawunni yɛligu ŋɔn bɛ ya ni zugu,

ka yan pun zabi Sintaani n‑nyaŋŋi u la.

¹⁵Ya wumma! Yan di wuri duniya wa, bee, bunseesi an bɛ ka ni la. Sɔ ŋɔn boori duniya wa yɛla, ti Ba Naawunni wurilim ka u ni. ¹⁶Dama bunseelli kam kan bɛ duniya wa ni, hoo ningbinkɔrisi ni bunveela zaa ti nini ŋɔn nya ka boora, ni saalidima ŋɔn gyeemni bunseelli zaa - anŋɔ zaa bu yi la ti Ba Naawunni saani na, amaa duniya buna n nyɛ a, ka yi la duniya wa ni na. ¹⁷Ka duniya wa paari ka naari ni, kan ni ka kɔrisi yɛla zaa. Amaa ban tumni Naawunni ŋɔn boori ni ba tum seem la - lala niriba nin kpalim m‑bɛ ni halli saha kan ka naari.

¹⁸M biisi, saha maa nŋɔa. Ba daa pun yɛli ya, ni, Masiiya Dindaana maa nin ti kyɛ na; tɔ, ka u dindaandima pam pun kyɛ na. Dinŋɔ nin kyɛ ka ti baŋŋi, ni, saha maa nŋɔa. ¹⁹Ba daa yi ti saani m‑bakki, amaa ba daa pa la ti niriba ni yɛlimaŋni; ba yi siri daa nyɛ ti niriba, ba naa n‑kpalim ti saani. Ban yi m‑bakki seem la zugu ka ba wulisiri, ni, ba zaa pa la ti niriba. ²⁰Amaa yarim zaa pun deaai Naawunni kpaam soosigu, lala zugu ya zaa baŋŋiya. ²¹Din kyɛ ka n sɔbri yɛla wa n‑tiri ya maa, di pa la n teesi, ni, yan ka bamsim zugu. Ay! - n sɔbri n‑tiri ya yan pun mi la zugu, ka ziri ni yɛlimaŋni ku toaai n‑kpɛ laa yinni ni. ²²Ŋɔni n nyɛ ziri daana? - Pa ŋɔn kyiisiri, ni, Yisa pa la Masiiya maa? Di daama nyɛ la Masiiya Dindaana maa; u nyɛ la ninvugsɔ ŋɔn za’asiri ti Ba Naawunni ni u Bii Yisa zaa yɛla. ²³Ninvugsɔ ŋɔn za’asiri Naawunni Bii la, u Ba Naawunni gba ka u za’asira. Ŋɔn mun sakki n‑ti Bii maa, u sakkri n‑tiri u Ba maa gba. ²⁴Ya kyɛ ka yan daa daŋŋi n‑wum seem la kpalim m‑bɛ ya saani. Yan daa daŋŋi n‑wum seela la yi kpalim m‑bɛ ya saani, ya gba nin kpalim m‑bɛ Bii maa saani, ni u Ba maa gba saani. ²⁵Tɔ, dinŋɔ ka Naawunni daa basi noori n‑ti ti maa - nyɔvuri kan ka naari.

²⁶Lala ka n sɔbri n‑tiri ya, ka teesiri la seeba ban boori ba burigi ya la yɛla. ²⁷Yarima muna - ya daa pun deaai Naawunni kpaam soosigu. Lala piini maa nin ti kpalim m‑bɛ ya saani. Di zugu di pa la ya boori ninsaalisɔ ni u ti wulisi ya yam yɛla, dama Naawunni Siiya soosigu wulisiri ya yɛla kam zaa bamsim ŋɔn nyɛ seem; ka yɛtti ya yɛlimaŋni, ka bu ma’ari ziri. Dinzugu ya kpalimma m‑bɛ u saani, hoo ŋɔn daa wulisi ya seem maa.

²⁸Tɔ; ka pampaŋŋɔ, m biisi, ya kpalimma m‑bɛ u saani; ka u yi ti labi n‑yi paalu sahanseaa na, ti nin nya soori m‑paai u saani na, ka ti ku ti di vi. ²⁹Ya mi halli, ni, Ŋɔna n nyɛ yɛlimaŋni daana. Lala zugu ya baŋŋma, ni, sɔkam zaa ŋɔn tumni yɛlimaŋni muna - Naawunni nyɛ la u Ba.

¹Ya baŋŋma Naawunni ŋɔn zaŋŋi wurilim n‑ti ti la, ni, din galisi seem! U kyɛ ka ba boonni ti, ni, Naawunni biisi. Ka u biisi n siri nyɛ ti gba. Din kyɛ ka duniya wa na zi ti la nyɛ la: ka daa bu mi Ŋɔn gba. ²N zɔsuma, pampaŋŋɔ ti nyɛ la Naawunni biisi, ka ti na bu baŋŋi tin nin nyɛ seem. Amaa tin mi bunseelli nŋɔa: ni, u yi ti yi paalu na, ti nin ti nya u hoo ŋɔn nyɛ seem ni yɛlimaŋni, ka dizugu ti nin ŋmanni hoo ŋɔn bɛ seem maa. ³Nira kam ŋɔn mari lala tama maa maanni la u maŋŋa kasi hoo ŋɔn Naawunni ŋɔn nyɛ kasi seem la.

⁴Tɔ: ŋɔnkam zaa tumni tumbeeri tuma, u galimni zaaligu maa, dama tumbeeri tumpu ni zaaligu galiŋŋu nyɛ la yummu. ⁵Amaa ya mi halli, ni, Kirisita daa yi na nti zaŋŋi ti tumbeeri taalli m‑basi. Ka u mammaŋŋa saani ka tumbeeri sɛseelli ka ni. ⁶Sɔ ka ni n bɛ u ni ka kpalim n‑tumni taalli tuma; ŋɔn mun kpalim n‑tumni taalli tuma zaa na zi n‑nya u, bee, m‑mi u. ⁷M biisi, yan di kyɛ ka sɔ yɔmsi ya ka ya burigi. Ŋɔn tumni din tu zaa nyɛ la yɛlimaŋni daana, hoo ŋɔn Naawunni ŋɔn nyɛ seem maa. ⁸Ŋɔn mun kpalim n‑tumni taalli tuma nyɛ la Sintaani nira, dama ŋɔn Sintaani kur tumni la taalli zaŋŋi n‑yi piiligu ni sa na. Lala zugu ka Naawunni Bii maa daa yi na; u daa kyɛ na nti sa’am ŋɔn Sintaani tuma maa. ⁹Sɔkam ŋɔn nyɛ Naawunni biiya ku kpalim n‑tumni tumbeeri, dama Naawunni nyɔvuri bɛ u ni; u ku toaai n‑kpalim n‑tumni taalli tuma, dama Naawunni soori ni ka ba dɔ’ai u. ¹⁰Dinŋɔ n kyɛ ka ti baŋŋi ban nyɛ Naawunni biisi ni Sintaani biisi: ni, ŋɔn tumni din bu tuusi zaa pa Naawunni biiya, ka ŋɔn bu wuri u taraana gba pa Naawunni biiya.

¹¹Dama lahabaari kanŋɔ ka ba daa wulisi ya piiligu ni, ni, ti kyɛ ka ti wuri taaba. ¹²Yan di dɔli Kyeen soori - Sintaani ŋɔn daa su sɔ sufu teesa la, ka u daa ku u sunzɔ maa. Wula zugu ka u daa ku u? - U toori tuma n daa nyɛ tumbeeri, ka u sunzɔ mun dina daa nyɛ bunsuma. ¹³Ti gba, m mabiisi, ka duniya dima n yaai ti ni; dinŋɔna yan di kyɛ ka di niŋi ya alahazibu. ¹⁴Ti wuri ti mabiisi, ka lala kyɛ ka ti mi, ni, ti yisigi la kum ni n‑lɔkki n‑kpɛ nyɔvuripaalli puuni. Ninvugsɔ ŋɔn za’asiri wurilim la mun kur kpalim m‑bɛ kum ni. ¹⁵Ŋɔnkam yaai u mabiiya zaa nyɛ la ninvugkuura; ka ya mun mi halli, ni, nyɔvuri kan ka tariga ku kpalim m‑bɛ ninvugkuura saani. ¹⁶Nŋɔ zugu ka ti baŋŋi wurilim ŋɔn nyɛ seela: ni, tirima zugu ka ŋɔn Yisa daa bu za’asi ka ba ku u. Tirim gba, di sumni ti di za’asi kum ti mabiisi zugu. ¹⁷Ninvugsɔ yi mari bunseela duniya wa ni, ka u nya ka u mabisɔ bɛ la fara ni, amaa u ku sakki, ni, u zɔ faradaana wa namboo, ka mɔŋŋi, ni, u ku suŋŋi u - wula ka Naawunni wurilim bɛ di daama saani? Ay! - di ku bɛ ni. ¹⁸M biisi, yan di kyɛ ka ti taaba wurilim bɛ la noori ni yɛttɔ’a kɔkɔa. Ay! - ya kyɛ ka ti wuri taaba n‑tumni tunsuma n‑tiri taaba ni yɛlimaŋni.

¹⁹Tɔ; lala zugu nin kyɛ ka ti baŋŋi, ni, ti nyɛ la yɛlimaŋni maa niriba, ka ti teesa nya sufudoaa Naawunni saani. ²⁰Dama sahaseaa ti sufu ni teesa ŋɔn yi ti galimni ti, ti baŋŋi, ni, Naawunni yiiko gaari ti teesa zaa, ka u mi bunseelli kam zaa. ²¹Amaa ti teesa yi bu galimni ti, n zɔdima, dinŋɔna ti teesa zaa nin bɛ la Naawunni saani, vi ka ni. ²²Di yi ti bɛ lala, ti yi ti susiri seelli zaa u saani, ti nin nya; dama ti dɔli la u zaaligu yɛla ka tumni u sufu yuubu ŋɔn nyɛ seem maa. ²³U lala zaaligu maa nŋɔa: ni, ti niŋi Naawunni Bii maa yɛdda, Yisa Kirisita, ka laa n‑wuri taaba hoo ŋɔn Naawunni ŋɔn wulisi ti seem la. ²⁴Ŋɔnkam dɔli u zaaligu yɛla zaa nyɛ la ŋɔn bɛ ŋɔn Naawunni saani, ka Naawunni mun gba bɛ u saani. Din kyɛ ka ti baŋŋi, ni, u kpalim m‑bɛ ti saani nyɛ la: ni, ŋɔn daa zaŋŋi u Siiya n‑ti ti maa zugu.

¹M mabiisi, yan di deaai sɔkam zaa ŋɔn yɛnni, ni, u mari Naawunni Sii maa, n‑niŋi u yɛligu yɛdda; amaa ya zamsim di daama n‑nya u yɛligu yiiko yi la Naawunni Sii maa saani na, bee? - Dama ziri anabidima pam pun yi duniya wa na. ²Yan nin niŋi seem m‑baŋŋi yiikoseaa din yi la Naawunni Sii ni na, ni din pa Naawunni dinni, nŋɔa#:- ŋɔnkam zaa sakkri, ni, Yisa Masiiya daa leebi ninsaala n‑kyɛ na, ŋɔna n nyɛ sɔ ŋɔn mari Sisɔ ŋɔn yi Naawunni saani na. ³Sɔ mun yi bu sakki lala, di daama yɛligu yiiko bu yi la Naawunni Siiya saani na. U sii maa yiiko yi la Masiiya Dindaana la saani na. Ya daa pun wum, ni, lala Dindaana ya kyɛ na; u mun pun bɛ duniya wa puuni. ⁴M biisi, yarima ŋɔna - Naawunni n su ya; ya mun nyaŋŋi ziri anabidima wa, dama ŋɔn bɛ ya saani maa mari yiiko n‑gaari ŋɔn bɛ duniya wa dima saani maa. ⁵Ban muna - duniya wa yiiko n su ba yɛla, ka ba tɔ’asiri la duniya wa yɛttɔ’a; di zugu duniya wa dima wumni n‑tiri ba. ⁶Tirima ŋɔna, Naawunni n su ti yɛla: ŋɔnkam mi Naawunni wumni n‑tiri ti. Ŋɔn mun pa Naawunni nira ku wum n‑ti ti. Dinŋɔ nin kyɛ ka ti baŋŋni yɛlimaŋni yiiko ni ziri dinni.

⁷Tɔ, n zɔdima, ya kyɛ ka ti wuri taaba, dama wurilim yi la Naawunni saani na. Ŋɔnkam zaa yi mari wurilim, u nyɛ la Naawunni biiya, ka mi Naawunni. ⁸Wurilim yi ka sɔ zaa ni, di daama zi Naawunni, dama Naawunni nyɛ la wurilim. ⁹Dinŋɔ ka Naawunni daa tum n‑wulisi ti u wurilim soori: u daa tum u Bii yinni duniya wa na, ni ti ti nya nyɔvuri u zugu. ¹⁰Wurilim mun ŋɔn nyɛ seem nla#:- pa la tirima n wuri Naawunni, amaa Ŋɔna n wuri ti ka tum u Bii la na ni u ti leebi maaligu kan ti ti soori n‑kyɛ ka ti nya kyɛ-m‑pɛŋŋi ti tumbeeri zugu. ¹¹N zɔdima, Naawunni ŋɔn siri wuri ti lala, dinŋɔna ya kyɛ ka ti wuri taaba. ¹²Sɔsɔ na zi n‑nya Naawunni; amaa ti yi ti wuri taaba, ŋɔn Naawunni nin la’am m‑bɛ ti ni, ka u wurilim maa zaa siri nin bɛ ti saani.

¹³Ti mi halli, ni, ti la’amni m‑bɛ la Naawunni ni, ka ŋɔn Naawunni mun la’am m‑bɛ ti ni, dama u pun zaŋŋi u Sii maa n‑ti ti. ¹⁴Ka ti gba nya ka yɛtti n‑wulisiri tin ŋɔn nya seem maa, ni, ti Ba maa tum la u Bii la na ni u ti leebi duniya wa Tiligra. ¹⁵Ŋɔnkam zaa yɛnni, ni, Yisa nyɛ la Naawunni Biiya, di daama la’am m‑bɛ ni ni Naawunni, ka Naawunni nin la’am ni u m‑bɛ ni. ¹⁶Ka ti mammansi mi wurilim seaa Naawunni ŋɔn mari n‑tiri ti maa, ka ti niŋni lala wurilim yɛdda.

Naawunni nyɛ la wurilim, ka sɔ yi bɛ wurilim beesigu ni, di daama la’am la ni Naawunni m‑bɛ ni, ka Naawunni gba la’am ni u m‑bɛ ni. ¹⁷Wurilim paari ka tariga ti saani, ka lala nin kyɛ ka ti mari sufukpeemni ka ku ti di vi, sariya karibu daari maa; dama ti duniya wa ni nyɔvuri ni ti Dugma Yisa dinni nyɛ la yummu. ¹⁸Dabeem ka wurilim ni; wurilim seaa din nyɛ bummaŋni zaa, di katti dabeem zaa m‑basira. Tubdarigri zugu ka dabeem bɛ ni, ka ninvugsɔ ŋɔn zɔri dabeem maa na ka wurilim ni yɛlimaŋni. ¹⁹Tirim mari la wurilim maa, Naawunni ŋɔn daŋŋi n‑wuri ti la zugu. ²⁰Sɔ yi yɛli, ni, u wuri Naawunni, ka na yaai u mabiiya - ziri daana n nyɛ u. U nini pun nya u mabiiya ka u bu wuri u, dizugu u ya niŋi la wula n‑wuri Naawunni, sɔ u nini ŋɔn na zi n‑nya? ²¹Zaaligu seaa Yisa ŋɔn daa zaŋŋi n‑ti ti maa nyɛ la nŋɔa#:- ŋɔnkam zaa wuri Naawunni, di sumni ka u wuri u mabii gba.

¹Tɔ: ŋɔnkam zaa niŋi yɛdda, ni, Yisa nyɛ la Masiiya maa, di daama nyɛ la Naawunni biiya. Ka ŋɔnkam wuri ninvugsɔ, see ka u wuri di daama bii maa gba. ²Dinŋɔ n kyɛ ka ti baŋŋi, ni, ti wuri Naawunni biisi maa: tin wuri Naawunni ka tumni u zaaligu tuma zugu nla. ³Ti Naawunni wurilim nŋɔa: ti yi tumni u zaaligu tuma maa. Ka u zaaligu tuma bu tɔ ni, ⁴dama Naawunni bii zaa nyaŋŋni la duniya wa. Ka lala nyaŋŋni din nyaŋŋi duniya wa nyɛ la bɔa? - Ti yɛdda niŋbu nla. ⁵Ka ŋɔni n nin nyaŋŋi duniya wa? - Pa la ŋɔn niŋi yɛdda, ni, Yisa nyɛ la Naawunni Biiya? - Ii, ŋɔna!

⁶Ŋɔn Yisa Masiiya Kirisita n nyɛ ŋɔn daa dɔli koom soori, ni ziim soori m‑paasi, n‑kyɛ na. Pa koom kɔkɔ n‑daa la, amaa koom ni ziim zaa. Ka Naawunni Sii maa n nyɛ ŋɔn diri di sɛhara, dama ŋɔn Naawunni Sii maa nyɛ la yɛlimaŋni. ⁷Dizugu sɛhara dima ata m‑bɛ ni: ⁸Naawunni Sii Kasi m bɛ ni, ni koom suubu yɛla bɛ ni, ni ŋɔn daa kpi ka u ziim yi na yɛla m‑paasi: ka babata wa sakkri n‑tiri la taaba. ⁹Ti deaari ninsaala sɛhara n‑niŋni di yɛdda; amaa Naawunni sɛhara gaari lala zaa. Dama Naawunni sɛhara nla, ŋɔn di sɛharaseaa zaŋŋi n‑kyaŋŋi u Bii maa yɛla. ¹⁰Nira kam ŋɔn niŋi Naawunni Bii maa yɛdda mari la lala sɛhara maa u maŋtoori sufu ni. Ŋɔn kam mun ku sakki, ni, u niŋi Naawunni yɛla yɛdda, di daama n kur yɛtti, ni, Naawunni nyɛ la ziri daana, dama u bu niŋi Naawunni ŋɔn di sɛharaseaa yɛdda, sɛhara zaŋŋi n‑kyaŋŋi u Bii maa yɛla maa. ¹¹Ka sɛhara maa nŋɔa: Naawunni ti ti la nyɔvuri kan ka naari, ka lala nyɔvuri wa bɛ la u Bii maa saani. ¹²Nira kam ŋɔn mari Naawunni Bii maa mari la nyɔvuri; ka ŋɔn mun ka Naawunni Bii maa ka nyɔvuri.

¹³Tɔ: n sɔbri anŋɔ n‑tiri yaseeba ban niŋi Naawunni Bii maa yuuri yɛdda la, ni ya ti baŋŋi, ni, ya mari nyɔvuri kan ka naari. ¹⁴Lala sufukpeemni ka ti mari m‑paari Naawunni saani, ka vi ka ti: ni, ti yi ti susi bunseelli kam u saani, ka di dɔli la u yuubu ŋɔn nyɛ seem, u nin wum n‑ti ti. ¹⁵Ka ti yi mi, ni, u wumni ti susigu zaŋŋi n‑kyaŋŋi bunseelli kam zaa, ti laa m‑mi, ni, ti nin nya di u saani.

¹⁶Sɔ yi ti nya ka u mabisɔ tum tumbɛseelli kan ku taasi u kum ni, ŋɔn susima Naawunni u mabii wa zugu, ka Naawunni nin kyɛ ka tumbeeri daana maa laa n‑nya nyɔvuri. Tumbɛseesi m bɛ ni n‑taasiri niriba kum ni - pa ana ka n yɛtti maa. ¹⁷Tunseesi an bu tuusi zaa maa nyɛ la taalli tumbeeri, amaa taalli tumbɛseesi m bɛ ni an bu taasiri kum ni.

¹⁸Tɔ: ti mi halli, ni, ninvugsɔ zaa ŋɔn nyɛ Naawunni biiya - u bu kpalim n‑tumni tumbeeri; dama Yisa, Naawunni ŋɔn dɔ’ai sɔ, nin ti gɔsi u yɛla; ka Sintaani ŋɔn su tumbeeri fukumsi la ku niŋi u seela. ¹⁹Ti laa m‑mi, ni, Naawunni n su ti yɛla, ka duniya wa zaa mun bɛ la ŋɔn su tumbeeri fukumsi maa nuusi ni. ²⁰Ti mi, ni, Naawunni Bii maa daa kyɛ na ni u ti ti ti bamsim, ni ti baŋŋi Naawummaŋni maa. Ka ti bɛ la Naawummaŋni maa saani - di nyɛ la: ti bɛ la u Bii Yisa Kirisita saani. Ŋɔna n nyɛ Naawummaŋni, ka laa n‑nyɛ nyɔvuri kan ka naari maa. ²¹Tɔ, ka dinŋɔna, m biisi, ya mari ya mansi ka di gyeem ba’a bee buga.