KƆRINTI DIMA

Gbanseaa Pɔla ŋɔn daa daŋŋi n‑sɔbi n‑ti

KƆRINTI DIMA 1

¹Man Pɔla n‑sɔbri gbaŋŋu wa n‑ti ya, man ni ti mabii Sɔsitɛniisi. Man nyɛ sɔ Naawunni ŋɔn booli ma ni n ti leebi u tuumu, dama lala ka u sufu yuubu daa wulisi. ²N sɔbri n‑tiri yarima, yaseeba ban la’amni Kɔrinti tiŋŋa maa ni n‑gyeemni Naawunni: yan bɛ Yisa Kirisita Masiiya saani maa zugu n kyɛ ka ya nyɛ la Naawunni maŋtoori niriba. Lala zugu ka u boonni ya u saani, ka laa m‑paasiri ya zugu ninvugseeba ban leebi Naawunni dinni tiŋŋa kam zaa ni, ka ba zaŋŋi la Yisa Kirisita yuuri m‑puri ba, dama u nyɛ la ba Dugma, ni ti gba Dugma. ³Ti Ba Naawunni, ni ti Dugma Yisa Kirisita, zaŋŋma u piinisuma ni alaafɛ zaa n‑tisi ya.

⁴M puusiri Naawunni barika ya zugu sahakam, ŋɔn daa zaŋŋi u piinisuma n‑ti ya la zugu, ka di nyɛ la Kirisita Yisa saani. ⁵Dama ŋɔn saani ka ya pun deaai bunsuma pam gba - di nyɛ la yɛttɔ’a zaa, ni bamsim zaa, ziiya. ⁶Lala zugu ka ya beebu kur wulisiri, ni, lahabasuŋŋu zaŋŋi n‑kyaŋŋi Kirisita yɛla maa nyɛ la yɛlimaŋni deede. ⁷Dinzugu ya bu kɔŋŋi Naawunni piinisuma, halli yinni gba, ka kpalim n‑guusiri ti Dugma Yisa Kirisita Masiiya yiibu na saha. ⁸U siri nin mari ya suŋŋa halli nti paai di tɔriga, ka ya nin zɛ yummu ti Dugma Yisa dabsiri daari maa ni, galinseelli ka ni. ⁹Naawunni nyɛ la yɛdda daana, ka ŋɔna zugu ka ba daa booli ya, ni ya yi na n‑la’amni m‑bɛ u Bii Yisa Kirisita ti Dugma saani.

¹⁰Tɔ: ka n susiri ya, m mabiisi, ti Dugma Yisa Kirisita zugu, ni, ya zaa mari nangbanyinni ni taaba; yan di ŋmeeri nangbankpeemni n‑wɔligri ka kyɛri taaba. See ka ya kpamsiri taaba ka mari sufu yinni ni teesiyinni. ¹¹M mabiisi wumma! N wumni ya yɛla Kloowi yiri dima maa saani, ni, zaba m bɛ ya saani. ¹²Man tɔ’asiri seem maa nyɛ la: ni, ya ninvugsɔ n yɛtti, ni, u dɔli la man Pɔla, ka sɔ yɛtti, ni, u dɔli la Apɔloosi, sɔ mun gba yɛtti, ni, Siifasi Piita ka u dɔla, halli ka sɔ yɛtti yaasa, ni, “Man mun dɔli la Kirisita!” ¹³Ammi, ba purigi Kirisita zii bunaasi? Ba daa kpaasi Pɔla n‑tabli dɔpulli zugu ni ya ti nya tuliginsim, bee? - Ay! pa lala. Bee, ba daa su ya Pɔla koom? - Ay, halli fiiŋ gba! ¹⁴Di niŋi ma nya’asim Naawunni zugu, ni, n daa bu su ya ninvugsɔ koom, na’ala Krispusi ni Gayusi kɔkɔa. ¹⁵Dama lala zugu ya ku toaai n‑yɛli, ni, n daa su ya koom m mammantoori yuuri zugu. ¹⁶(Ay, n tamna: Sitɛfanasi ni u yiri dima gba ka n daa su Naawunni koom. M bu laa n‑teaari suŋŋa: ni, n daa su ninvugsɔ m‑paasi ba zugu, bee, n daa bu su.) ¹⁷Ya bu nya? - di daa pa la koom suubu yɛla zugu ka Kirisita daa tum ma ya saani na, amaa lahabasuŋŋu mooligu zugu; ka m bu zaŋŋi ninsaala yɛm m‑moonna, dama lala kyɛ ka Kirisita dɔpulli zugu kum yɛla ti basi yɔri.

¹⁸Dama dɔpulli maa lahabaari muna - ninvugseeba ban bɛ baasiyɔri soori ni maa yi ti wum di, ba yɛtti, ni, gyɛrilim; amaa tirima mun ban bɛ tuliginsim soori maa ni la saani ka di mari la Naawunni yiiko. ¹⁹Dama di sɔbi n‑dooli, ni#:-

“N nin sa’am yɛm dima bamsim maa;

N nin gbarigi ba miilinsi.”

²⁰Tɔ, ka yɛm daana la lee? Bamsim daana la lee? Ŋɔn viisiri m‑baŋŋni pampaŋŋɔ duniya beesigu yɛla la bɛ la yani? Naawunni n zaŋŋi duniya wa yɛm n‑leebi gyɛrilim, bee, m ma’ari ni? ²¹Naawunni mammaŋŋa yɛm zugu daa kyɛ ka duniya wa dima daa zaŋŋi ba toori yɛm ni ba ti baŋŋi u yɛla n‑kɔŋŋi. Ka u sufu yuubu zugu ka baseeba ban wum lahabaari mooligu din ŋmani hoo gyɛrilim la n‑niŋi yɛdda la muna - ban nyari fa-m‑basi. ²²Tɔ: Yɛhudiya dima maa boori la alahazibu tuma nyaabu, ka Griika dima maa mun boori yɛm yɛla wumpu; ²³amaa tirima ŋɔn moonni lahabaseaa maa nyɛ la Yisa Kirisita Masiiya yɛla: ni, ba daa kpaasi u n‑tabli dɔpulli zugu. Ka Yɛhudiya dima maa yɛtti, ni, din kyisiri nla; ka Griika dima maa mun yɛtti, ni, gyɛrilim n nyɛ di. ²⁴Amaa Naawunni ŋɔn booli seeba la ŋɔna, u siri nyɛ la Masiiya n‑ti ba, ka laa n‑nyɛ Naawunni yɛm ni u yiiko gba - halli ba yi nyɛ Yɛhudiya dima, ni Griika dima zaa. ²⁵Dama Naawunni gyɛrilim mari yɛm n‑gaari saalidima yɛm, ka Naawunni bugsim mari yaa n‑gaari saalidima yaa.

²⁶M mabiisi, ya teesima yan daa bɛ seem ka ba daa booli ya. Ya sunsukkuni ya ka niriba pam ban mari duniya wa yɛm; ya ka niriba pam ban mari yiiko, bee, n‑yi naam zuliya ni. ²⁷Amaa Naawunni yiisi la bunseesi an mari gyɛrilim duniya wa dima saani, ka mari a n‑diisiri yɛm dima maa vi: Naawunni yiisi la an nyɛ bumbugsa duniya wa dima saani, ka mari a n‑diisiri yaa dima maa vi. ²⁸U yiisi la tarimma, ni niriba ŋɔn zeemni bunseesi, halli bunseesi an ka ni gba, ka mari a n‑kyɛ ka bunseesi an bɛ ni maa ti basi yɔri. ²⁹Ka lala kyɛ ka sɔ ku toaai n‑nyu bara ŋɔn Naawunni saani. ³⁰Ŋɔn Naawunni zugu ka ya bɛ Yisa Kirisita ni; ŋɔna ka Naawunni kyɛ ka u leebi yɛm n‑ti ti, ni yɛlimaŋni, ka u laa n‑kyɛ ka ti leebi Naawunni mammaŋŋa niriba kasi kasi, ka laa n‑nya fa-m‑basi. ³¹Dizugu - hoo din pun sɔbi n‑dooli - “Ŋɔn ya n‑nyu bara zaa, kyɛ ka u nyuuri a ni Naawunni yuuri zugu kɔkɔa.”

¹Tɔ: m mabiisi, man daa kyɛ ya saani na maa, ni n ti tɔ’asiri Naawunni yɛligu n‑tiri ya, ni ya ti baŋŋi Naawunni yɛlisɔ’ara - lala saha n daa bu kyɛ na ni n ti zaŋŋi yɛlinya’asa an mari bamsim n‑tɔ’asira. ²Ay! - n daa yɛli, ni, man ŋɔn bɛ ya saani la m bu ya sakki m‑baŋŋi seelli na’ala Yisa Kirisita Masiiya yɛla kɔkɔ ka n nin baŋŋi - halli ban daa kpaasi u n‑tabli dɔpulli zugu gba. ³N daa bɛ ya saani ka daa kɔŋŋi yaa ni yiiko, ka n daa zɔri dabeem halli nti gyigi di zugu. ⁴N yɛligu maa, ni man daa mooli lahabaari la gba, daa pa la yɛm yɛttɔ’anya’asa, amaa a daa wulisiri la Naawunni Sii maa yiiko yɛla, ⁵ni lala ti kyɛ ka ya yɛdda niŋbu ku bɛ saalidima yɛm zugu, amaa Naawunni yiiko zugu.

⁶Yɛm yɛla ka ti siri yi tɔ’asiri n‑tiri ban gbaai kpamni la saani, amaa di pa la pampaŋŋɔ saha yɛm maa, pa din yi ban su pampaŋŋɔ duniya fukumsi la saani na - ban kur naari yɔri. ⁷Ay! Naawunni yɛm ka ti tɔ’asira - bunsɔ’arigu din daa bu yi paalu na. Lala yɛm ka Naawunni daa zaali pɔi ka naayi naam pampaŋŋɔ duniya wa; ka niŋi lala ni u ti kyɛ ka tirima nin nya gyirima. ⁸Yɛm wa muna - ban su pampaŋŋɔ duniya fukumsi la sɔsɔ daa bu baŋŋi di gbinni; halli ba yi daa baŋŋi, ba naa n‑ku kpaasi ti Dugma gyirima daana n‑tabli dɔpulli zugu. ⁹Ba siri daa bu baŋŋi, hoo din pun sɔbi n‑dooli, ni#:-

“Bunseesi sɔ nimbiri ŋɔn na bu nya,

Bunseesi sɔ tubri ŋɔn na bu wum,

Bunseesi ninsaalisɔ sufu ŋɔn na bu teesi a yɛla -

Anŋɔ ka Naawunni pun maali siri,

U nin zaŋŋi a n‑ti ban wuri u maa.”

¹⁰Tirim muna - ŋɔn Naawunni zaŋŋi anŋɔ taabu n‑wulisi ti; u Sii maa zugu ka u wulisiri a ni, dama Sii maa viisiri la seelikam, halli Naawunni yɛlizulima gba. ¹¹Ka saalidima saani, ŋɔni m mi u saalitaraana yɛla deede? - Ay, sɔsɔ bu mi, na’ala di daama maŋtoori sufu ni sii maa m mi u yɛla. Lala ka sɔ na zi Naawunni yɛla deede, na’ala Naawunni Siiya. ¹²Pa duniya wa siiya ka ti daa deaai; amaa Sisɔ ŋɔn yi Naawunni saani na. Ka lala n kyɛ ka ti baŋŋi Naawunni ŋɔn ti ti piiniseesi la zaa. ¹³Tɔ: lala ka ti wulisira. Di bu yi la duniya wa yɛm wulisigu ni na, amaa hoo Sii maa ŋɔn wulisiri ti seem; ka ti mari n‑suŋŋni Sii maa niriba, ni ba ti baŋŋi u yɛla. ¹⁴Ninvugseeba ban ka Sii maa bu deaari yɛliseesi an yiiri Naawunni Sii maa ni na, dama a nyɛ la gyɛrilim ba saani. Ba bu baŋŋi a gbinni, dama sɔ ku toaai m‑baŋŋi, di yi pa la u dɔli Sii maa soori n‑viisiri a. ¹⁵Nira ŋɔn mari Sii maa viisiri la seelikam, amaa sɔ mun bu viisiri ŋɔna. ¹⁶Ni#:-

“Dama ti Dugma sufu ni teesa muna -

Ŋɔni n na mi m‑baŋŋi a?

Ŋɔni mun ŋmeeri u saawara?”

Tirima mun mari la Kirisita Masiiya sufu ni teesa.

¹M mabiisi, n ku toaai n‑tɔ’asi n‑ti ya hoo ban mi Sii maa yɛla la, amaa hoo ban mi ninsaala yɛla la kɔkɔa, dama ya na nyɛ la bileesi zaŋŋi n‑kyaŋŋi Kirisita yɛla. ²Dizugu n daa mɔ’asiri ya la bisim, pa dikpeema; dama ya daa bu sa’ai ditibsa diibu. Halli ni zuna ya na ku toaai n‑deaai ninvugkura diibu, ³dama ya na zi Sii maa yɛla. Nyuuri zappu ni suuri yisigri ŋɔn na bɛ ya saani, pa duniya wa saalidima yɛla ka ya dɔla? ⁴Ya bu nya? - sɔ yɛtti, ni, Pɔla ka u dɔla; ka sɔ mun yɛtti, ni, Apɔloosi ka u boora: pa duniya wa ninsaalidima yɛttɔ’a nŋɔa? ⁵Apɔloosi nyɛ la ŋɔni? Bee, Pɔla nyɛ la ŋɔni? Ti zaa nyɛ la Naawunni tuntumniba, ka di kyɛ ka yarima niŋni yɛdda dima, amaa bunseelikam yi la Naawunni saani na n‑ti ti. ⁶Zaŋŋi n‑kyaŋŋi ya yɛdda yɛla, mani n daa buri bumbura la, ka Apɔloosi mun daa yɔ’ai bumbula la koom, amaa Naawunni yiiko zugu ka a zoaai na n‑niŋna. ⁷Lala zugu ka ŋɔn butti la pa seela, ka ŋɔn yɔ’ari koom la gba pa seela; din kpa la talasi nyɛ la Naawunni tuma, dama ŋɔna n kyɛ ka di zoaari na n‑niŋna. ⁸Ŋɔn butti ni ŋɔn yɔ’ari koom la zaa tumni la tumni yinni, ka ti Dugma nin yɔ ba zaa hoo ban tumni seem la. ⁹Tirima zaa la’am n‑tumni Naawunni tuma: yan mun nyɛ la Naawunni puu ka ti koora, ka laa n‑nyɛ u yiri ka ti meera.

¹⁰Mani n nyɛ tammeera ni yɛlimaŋni, hoo man deaai piiniseesi Naawunni saani la, ka n daa nyeebi nyeebri maa; ka sɔ mun deaai m‑meeri n‑tɔmna: tɔ! see ka sɔkam mari u maŋŋa ka baŋŋi ŋɔn tumni u meebu tuma seem. ¹¹Ba daa pun nyeebi nyeebri la suŋŋa, ka sɔsɔ ku toaai n‑nyeebi seaa m‑paasi ka zugu - Yisa Kirisita yɛla ka n tɔ’asiri wa. ¹²Amaa sɔ zaŋŋi salima m‑mɛ m‑pa nyeebri wa zugu, ka sɔ mun zaŋŋi anzulifa m‑pa, bee kugveela; ka seeba gba zaŋŋi daari, bee moori ni kika’a m‑pa. ¹³Amaa sariya karibu daari yi paai na, di nin yiisi sɔkam tuma paalu ni na, n‑wulisi an bɛ seem, dama bugum n ya zamsi sɔkam zaa tuma. ¹⁴Tɔ; ka bugum yi bu ti nyaŋŋi sɔ tuma, di daama nin deaai u laara sanyoaa. ¹⁵Amaa bugum yi di sɔ tuma zaa, di daama nin kɔŋŋi marigu; u mammaŋŋa ku baasi yɔri, amaa u nin ŋmanni la hoo ŋɔn kpeeri bugum ni n‑gatta. ¹⁶Ya bu baŋŋi, ni, yarima n nyɛ Naawunni Gyeeŋŋu Duu, bee? Halli Naawunni Siiya bɛ ya ni gba. ¹⁷Ninvugsɔ yi sa’am Naawunni gyeeŋŋu ziiya, Naawunni gba nin sa’am di daama. Naawunni Gyeeŋŋu Duu nyɛ la u dinni, kan nyɛ bunkasikasi: ka yarim n nyɛ u Gyeeŋŋu Duu wa.

¹⁸Tɔ: yan di kyɛ ka ya sɔ yɔmsi u maŋŋa; ninvugsɔ yi bɛ ya saani ka teesi, ni, u nyɛ la yɛm daana duniya wa saani, kyɛ ka di daama leebi gyɛrigu; ka lala zugu nin kyɛ ka u leebi yɛm daana ni yɛlimaŋni. ¹⁹Dama duniya wa yɛm nyɛ la gyɛrilim Naawunni saani. Lala zugu ka di pun sɔbi n‑dooli, ni, “Yɛm daandima maa muna - Naawunni zaŋŋi ba toori yɛmgɔliŋŋa m‑bɛtti n‑gbaari ba.” ²⁰Ka di laa n‑sɔbi, ni, “Ti Dugma m mi yɛm dima teesa zaa, ka a nyɛ la yɔri.” ²¹Dinŋɔ zugu, di kyɛ ka ya sɔ nyuuri bara ninsaalidima yɛla zugu. Dama bunseelikam zaa nyɛ la ya dinni. ²²Ii! - Pɔla nyɛ la ya dinni, ni Apɔloosi, ni Siifasi Piita; yarima n su beesigu ni kum fukumsi; din bɛ ni pampaŋŋɔ ni din nin niŋi zaa - anŋɔ zaa nyɛ la ya dinni. ²³Ka ya mun nyɛ la Kirisita Masiiya ŋɔn su ninvugseeba, ka ŋɔn Kirisita nyɛ la Naawunni dinni.

¹Tɔ, ka dinŋɔna see ka ba nyari ti, ni, Kirisita tuntumniba, ni seeba Naawunni ŋɔn zaŋŋi u yɛlisɔ’ara fukumsi n‑niŋi ba nuu ni. ²Din kpalim ka ba boori tuntumniba saani nyɛ la, ni, ba zɛ yummu n‑tumna. ³Man mun ba’a ka ni, ni, yarima yi katti n sariya, bee ninsaalidima kootu sɛseelli yi katta; halli m mammaŋŋa gba - man bu katti n yɛla sariya. ⁴M bu nya teesibeeri n sufu ni, amaa lala ku toaai n‑kyɛ ka n niŋi yɛlimaŋni daana; ti Dugma kɔkɔ nin ti kari ma sariya. ⁵Lala zugu yan di daŋŋi n‑kari sariya ka saha maa na bu paai na; halli ni ti Dugma kyɛnni na. Ŋɔna nin kyɛ ka din sɔ’ai zibsim ni zaa nin ti yi paalu na, ka wulisi saalidima sufu ni teesa an bɛ seem. Di saha ka sɔkam zaa nin ti nya pɛ’abu din sumsi u, Naawunni saani.

⁶M mabiisi, yarima zugu ka n zaŋŋi man ni Apɔloosi yɛla wa n‑wulisiri ya, ni ya baŋŋi yɛligu wa gbinni ŋɔn nyɛ seem, ni#:- “See ka ya ti dɔli din sɔbi n‑dooli seem, ka ku yakki Naawunni ŋɔn zaali seem.” Ni, yan di gyeemni sɔ ka laa n‑zeemni u taraana. ⁷Bɔ n wulisi, ni, ya wɔligiya ni ka kyɛ ya taaba? Bɔ ka ya mara, di yi pa la ya daa deaai ka la piini? Ka ya yi deaai piini maa, bɔ n kyɛ ka ya nyuuri bara, hoo yan bu deaai di zaa? ⁸Ni, bundaandima n nyɛ ya, fa! Ni, ya tigiya ka bu kɔŋŋi seela. Ni, ya pun di naam ka kyɛ ti. Tɔ: ya yi siri di naam, di veela! - dama ti gba naa n‑la’am n‑di naam maa. ⁹N teesi, ni, Naawunni zaŋŋi tirima, u tuumudima maa, ka labsi ti yɛla nyaaŋŋa. Ti ŋmanni la hoo ninvugseeba ban kari ti sariya n‑lusi ti, ni, ti sum la kum; ka ti diri lala wahala ni sɔkam ti gɔsira - halli malaakadima ni ninsaalidima zaa gba. ¹⁰Tirima siri nyɛ la gyɛra, Kirisita zugu; ka yarima mun wulisiri ninneesim Kirisita saani, fa! Bumbugsa n nyɛ ti, ka ya mun mari kpeeŋŋu. Ya nyari gyirima, ka ti mun nyari fiiliŋŋu. ¹¹Halli ni zuna ti kpiiri la kɔm ni kɔnyuuri, n‑ka bunyeera, ka laa n‑nyari mugsigu ti gyiliŋŋu la puuni. ¹²Ti namsiri n‑tumni tuma ni ti nuusi. Ka niriba tuuri ti, ka ti mun kaari kasuma n‑tiri ba; ba namsiri ti ni, ka ti mun bu za’asiri ba yuubu. ¹³Ba tɔ’asiri yɛttɔ’abeeri n‑niŋni ti, amaa ti kpaŋŋi ti maŋŋa n‑sakki n‑ti ba baalimm. Ti ŋmanni la duniya zaa sa’ari, hoo ninsaalidima maa sa’atampuuri, halli ni zuna.

¹⁴M bu sɔbri wa ni n ti diisi ya la vi, amaa n kpaamni ya ni hoo m biwutta. ¹⁵Dama halli ya yi mari ya karimbadima tusa tusa zaŋŋi n‑kpa Kirisita ziiya gba, ya ka badima pam, see yinni kɔkɔa. Yɛlimaŋni, mani n nyɛ sɔ ŋɔn daa dɔ’ai ya zaŋŋi n‑kpa lahabasuŋŋu beesigu ziiya ka di nyɛ la Kirisita Yisa saani. ¹⁶Lala zugu ka n susiri ya, ni, ya dɔli n beesigu soori. ¹⁷Dinŋɔ zugu ka n tum Timɔti ya saani na; u nyɛ la m biwuttigu ni yɛlimaŋni, ka laa n‑nyɛ sɔ ŋɔn zɛ yummu ti Dugma yɛla zugu. Ŋɔna nin toaai n‑teaari ya man Kirisita beesigu sɔya yɛla, hoo man ŋɔn wulisi seem lugri kam man la’amni ni Naawunni niriba zaa. ¹⁸Man na bu kyɛ ya saani na zugu ka ya seeba mari karimbaani. ¹⁹Amaa di siri ku yuui ka n nin kaai ya na, Naawunni yi ti ti ma lala soori. Di saha n nin baŋŋi karimbaani dima maa gbinni, pa ba yɛttɔ’a yɛla kɔkɔa, amaa ni ba yiiko ŋɔn bɛ seem. ²⁰Dama Naawunni naam pa la yɛttɔ’a kɔkɔa, amaa yiiko ni gba. ²¹Bɔ ka ya boora? - N kyɛm na nti darigi ya tuba? - bee, n zaŋŋi Sii maa wurilim ni nirilim n‑kyɛ ya saani na?

¹Lahabaari siri yi na, ni, zina m bɛ ya saani - ka ka taabu ka ni, halli ban bu dɔli Naawunni soori la saani gba: ni, dɔsɔ n di u ba pɔ’a. ²Ka ya mun nyuuri la bara, fa! Di da bu sum ni ya sufu sa’am di zugu? - ka ya yi da zaŋŋi ŋɔn tumni lala maa n‑yiisi ya la’aŋŋu ni, di da sɔa. ³Tɔ, halli ni man ka ya saani maa zaa, n siiya bɛ la ya saani, ka m pun kari di daama sariya hoo man bɛ ya saani n‑wumni lala doo wa yɛttɔ’a seem. ⁴Ya yi ti la’am taaba ti Dugma Yisa yuuri zugu, ka n gba sii bɛ la ya saani, ti Dugma Yisa yiiko kur bɛ la bɛni. ⁵Di saha ya zaŋŋma lala doo maa n‑ti Sintaani ka u sa’am u ningbina, ka di yi pa seem lala nin kyɛ ka u sii maa nin nya tuliginsim, ti Dugma dabsiri daari. ⁶Ay! ya bara nyuubu wa bu veela! Ya bu mi paanu dabina yɛla - ni, ba zaŋŋi a beela n‑niŋi boroboro zum puuni, ka a nin nyaŋŋi n‑tum m‑pitti paanu n‑fuusiri a zaa gba. ⁷Tɔ, ka dinŋɔna ya yiisim dabinkura la m‑basi, ka ya leebi boroboropaalli, an ka dabina. Halli, ya siri pun bɛ la lala, dama ba pun kɔrigi Kirisita, hoo ti Yakki-n‑Gaari pɛbila maaligu la - pa paanu kan ka dabina n nyɛ Yakki-n‑Gaari dinni? ⁸Dizugu ya kyɛ ka ti maali Kyuu wa suŋŋa: ti di mari dabinkura paanu an kyisira, bee, tumbeeri ni putoo buna; amaa bumpaala, an ka dabina, an nyɛ la yɛdda ni yɛlimaŋni dina.

⁹N daa pun sɔbi n‑ti ya n gbaŋŋu la ni, ni, yan di la’am m‑bɛ ni ni zina dima. ¹⁰Tɔ - pa la duniya wa niriba ban tumni zina la yɛla ka n daa tɔ’asi, bee, beem dima, bee, ban yɔmsiri n‑faari niriba, halli baseeba ban gyeemni buga la gba: di yi da nyɛ la lala, ya naa n‑yi la duniya wa ni zaa. ¹¹Amaa man yi sɔbri n‑tiri ya wa, ni, ninvugsɔ yi bɛ ni ka boonni u maŋŋa, ni, ya mabiiya Yisa yuuri zugu, ka tumni zina m‑mari beem, halli n‑gyeemni buga gba, bee, n‑zuuri niriba nyaaŋŋa, bee n‑nyuuri daam m‑bugra, bee, n‑yɔmsiri n‑faari niriba - lala tataabu daana ka n yɛtti ya, ni, yan di la’amni ni u n‑diri diibu. ¹²Ammi, m ba’a bɛ la ban pa ti niriba yɛla ni, bee? - ni n ti kari ba sariya. Ay, pa lala! Yan mun katti la ti toori niriba yɛla, bee m ma’ari ni? ¹³Seeba ban pa ti niriba muna - Naawunni nin kari ba sariya. Ni, “Ya karima putoo daana n‑yiisi ya puuni.”

¹Ya sɔ yi mari yɛttɔ’a ni u taraana, ka u zaŋŋi lala yɛttɔ’a maa n‑kyaŋŋi ban bu gyeemni Naawunni la saani ka kyɛ Naawunni niriba maa - lala mari soori? - Ay! lala ka soori. ²Ammi, ya bu mi, ni, Naawunni niriba maa nin ti kari duniya wa zaa sariya? Ka ya yi ya kari duniya wa sariya, ya ku toaai n‑kari sarabisi? ³Bee, ya bu mi, ni, ti nin kari halli malaakadima sariya gba? Ka ku toaai n‑kari saalidima maa yɛla, fa? ⁴Amaa yarima yi mari yɛttɔ’a anŋɔ taabu, ya kyɛnni seeba saani ni ba kari n‑ti ya, ka ba pa la ninvugseeba Naawunni niriba ŋɔn tiri gyirima. ⁵N yɛtti dinŋɔ la, ni n ti diisi ya vi. Ammi, sɔ ka ya saani ŋɔn mari yɛm n nin toaai m‑maali ya yɛla maa? - halli ninvugu yinni gba? ⁶Ka ya ziiri taaba n‑kyɛnni kootu ni, halli seeba ban ka yɛdda saani. ⁷Yan zaŋŋni taaba n‑kyɛnni kootu ni maa kur wulisi, ni, ya pun lu. Ni, ba tum la taalli ya saani; tɔ, ka wula zugu ka ya ku kyɛ taalli maa m‑pɛŋŋi ba? Ni, ba fa ya buna yɔri; tɔ, ka wula zugu ka ya ku kyɛ di yɛla m‑basi? ⁸Amaa yarima n tumni taalli ka faari buna - halli ya taaba saani la gba! ⁹Ammi, ya bu mi, ni, ban tumni taalli la ku nya Naawunni naam maa? Yan di yɔmsi ya mansi: see ka ya baŋŋi, ni, zina dima ku nya Naawunni naam, ka ba’amaanniba gba ku nya, bee gyɛ’amiru dima ni dɔppa ban tumni lala, bee ban zaŋŋni ba dɔtaaba n‑doontira; ¹⁰ni na’ayigsi, ni beem dima, ni danyuuriba, ni minaafigsi, ni ban yɔmsiri niriba - banŋɔ sɔsɔ ku nya Naawunni naam; ba nuu ka lala faari maa yɛla ni, halli beela. ¹¹Ya seeba mun daa bɛ la lala. Amaa ya daa nya koom suubu; ba daa kyɛ ka ya leebi Naawunni niriba kasikasi; ba daa deaai ya, ni, yɛlimaŋni dima, ti Dugma Yisa Kirisita Masiiya yuuri zugu, ni ti Ba Naawunni Vuusim Kasi la saani.

¹²Ni, ‘M mari la seelikam yiiko.’ - tɔ, amaa pa seelikam zaa m paasiri suŋŋsim. Ni, ‘M mari la seelikam yiiko’ - tɔ, amaa di kyɛ ka seelikam zaa nyaŋŋi ma. ¹³Ni, ‘Diibu nyɛ la puuri dinni, ka puuri mun su diibu yɛla.’ - tɔ, amaa Naawunni nin kyɛ ka abayi wa zaa ti baasi yɔri. Pa zina n su ningbina fukumsi, amaa ti Dugma n su a; ningbina maa Dugma n nyɛ u. ¹⁴Naawunni yiiko ka u daa zaŋŋi n‑yisigi ti Dugma kum ni, ka u nin yisigi ti gba lala. ¹⁵Ya bu mi, ni, ya ningbina nyɛ la Kirisita ningbinluga? Ka n ya niŋi la wula n‑zaŋŋi Kirisita ningbinlugri n‑la’am n‑leebi gyɛ’amiru ningbiŋŋu lugri? Ay! - lala ka soori. ¹⁶Bee, ya bu mi, ni, ŋɔn la’am n‑tabli ni gyɛ’amiru, ni, babayi maa zaa leebi la yummu? Dama di yɛliya, ni, “Babayi maa zaa nin la’am m‑bɛ ni kaman bunni yinni.” ¹⁷Ŋɔn mun la’am u maŋŋa ni ti Dugma, ba leebi la sii yinni. ¹⁸Ya zɔma n‑yi zina tuma ni; dama tumbeeri zaa pa la nira ningbiŋŋu puuni yɛttɔ’a, na’ala zina tuma nyɛ lala; amaa ŋɔn niŋi zina tuma zaa niŋni lala tumbeeri u toori ningbiŋŋu ni. ¹⁹Bee, ya bu mi, ni, ya ningbina maa nyɛ la Sii Kasi gbeebu ziiya? - u Gyeeŋŋu Duu. Dama ya daa deaai Sii Kasi maa Naawunni nuu ni, ka u bɛ la ya saani. Ya bu su ya maŋtoori yɛla; ²⁰ay! - ba daa da ya ni. Dizugu ya zaŋŋma ya ningbina n‑tiri Naawunni gyirima.

¹Tɔ: ka zaŋŋi n‑kyaŋŋi yɛttɔ’aseesi yan daa sɔbi a yɛla la: di veela ni doo bɛ ni ka bu di pɔ’a. ²Amaa zina kɔrisi zugu, ya kyɛ ka doo zaa mari u pɔ’a, ka pɔ’a zaa mari u sira. ³Kyɛ ka doo maa tiri u pɔ’a din sumsi u, ka pɔ’a maa gba tiri u sira, hoo din tuusi seem. ⁴Dama pɔ’a maa ningbiŋŋu pa la u toori dinni kɔkɔa, amaa u sira gba dinni; ka lala doo maa ningbiŋŋu pa la u toori dinni kɔkɔa, amaa u pɔ’a gba dinni. ⁵Yan di za’asi taaba, ka di yi pa la ya niŋi la nangbanyinni, ni, ya zaŋŋi lala saha maa n‑susiri Naawunni; ka laa n‑la’am taaba yaasa. Ka di kyɛ ka Sintaani zamsi ya n‑nyaŋŋi, yan ku toaai m‑mari ya mansi zugu. ⁶Man yɛtti la nŋɔa, di pa la n zaali ya lala zaaligu, amaa ya yi tumni lala, n nin sakki. ⁷Man saani, n da boori la sɔkam dɔli la n toori soori. Amaa sɔkam mari la u toori soori Naawunni piini zugu: yinni mari la piini kanŋɔa, ka sɔ mari la seaa.

⁸Tɔ: ka n yɛtti n‑tiri seeba ban na bu di pɔ’a, bee, n‑kuli doowa, ni pukɔya gba, ni, ba yi kpalim m‑bɛ hoo man bɛ seem wa, di sɔa. ⁹Amaa ba yi ku toaai n‑gbaai ba mansi, ba dim pɔ’aba, bee, n‑kuli dɔppa. Ya yi niŋi lala di veela n‑gaari ya kyɛ ka pɔ’aba bee dɔppa yɛla ti mugsi ya. ¹⁰Ban mun mari pɔ’aba, bee, siridima ka n yɛtti wa - amaa pa mani n‑yɛtta, amaa ti Dugma zaaligu nŋɔa - ni, pɔ’a di yi u sira yiri: ¹¹amaa u yi yi, ŋɔn di laa n‑kuli dɔsɔa, bee, ŋɔn labma u sira maa yiri. Ka doo mun di yiisi u pɔ’a. ¹²Ban kpalim muna ka n yɛtti wa - mani n‑yɛtta, pa ti Dugma zaaligu nŋɔa - ni, Kirisita bisɔ yi mari u pɔ’a ka pɔ’a maa pa la yɛdda nira amaa u sakki ni u kpalim m‑bɛ u saani, tɔ, ŋɔn di yiisi u pɔ’a maa. ¹³Ka pɔ’a mun yi mari u sira ka sira maa pa la yɛdda nira amaa u sakki ni u kpalim m‑bɛ u saani, tɔ, ŋɔn di yi. ¹⁴Dama doo ŋɔn ka yɛdda maa leebi la Naawunni dinni u pɔ’a la zugu, ka pɔ’a sɔ ŋɔn ka yɛdda la gba leebi la Naawunni dinni u sira la zugu: di yi pa lala, ya biisi naa m‑pa la Naawunni dinni, amaa ka ba siri nyɛ la u dinni. ¹⁵Amaa ŋɔn ka yɛdda la yi ya bakki, kyɛ ka u bakki. Yɛdda daana la ka taalli dinŋɔ ni: Naawunni m booli ti ni ti bɛ sufudoaa ni. ¹⁶I bu nya, pɔ’a? - di bu ta’ai ni i fa i sira m‑basi. Bee nyini bu nya, doowa? - di bu ta’ai ni i fa i pɔ’a m‑basi.

¹⁷Di zaa yɔri, ya kyɛ ka sɔkam kpalim m‑bɛ beesiseaa ti Dugma ŋɔn daa zaali u, sahanseaa Naawunni ŋɔn daa booli u maa. N zaaligu n‑kur la, man yi bɛ Naawunni niriba la’aŋŋu kam zaa ni. ¹⁸Dɔsɔ m bɛ ni ka ba daa guni u pɔi ka Naawunni naayi booli u? - Tɔ, u di kpiisi gunibu maa. Sɔ mun bɛ ni ka ba daa bu guni u ka Naawunni booli u? - Tɔ, u di laa n‑kyɛ ka ba guni u. ¹⁹Gunibu bee bu guni zaa nyɛ la yɔri: din kpa talasi nyɛ la Naawunni zaaligu zaa dɔligu. ²⁰Kyɛ ka sɔkam kpalim m‑bɛ ŋɔn daa bɛ seem sahanseaa Naawunni ŋɔn daa booli u. ²¹I yi daa nyɛ la daabri i booligu saha maa, nyin di kyɛ ka di mugsi i - amaa i yi ti nya soori ni i ti yi daabtiri maa na, kur dɔla ka n‑yi. ²²Yɛlimaŋni, ŋɔn daa nyɛ daabri u booligu maa saha zaa mari la yɔlisim ti Dugma saani, ka ŋɔn mun daa su u maŋŋa u booligu maa saha leebi la daabri n‑ti Kirisita. ²³Ba daa da ya ni n‑yɔa; dizugu yan di leebi daaba n‑ti saalidima. ²⁴Dizugu sɔkam ŋɔn daa bɛ seem zaa ka Naawunni daa booli u, u kpalimma m‑bɛ lala, Naawunni zugu.

²⁵Tɔ; ka ban na bu di pɔ’aba muna, ni pɔ’aseeba ban na bu kuli dɔppa gba - n ka ti Dugma zaaligu zaŋŋi n‑kyaŋŋi ba yɛla; amaa man ŋɔn nyɛ sɔ Naawunni ŋɔn zɔ namboo n‑ti ma la, ka u kyɛ ka n niŋi yɛdda daana di zugu, m mari la saawara n‑ti ba. ²⁶Ni, n teesiya, ni, zuna mugsigu ŋɔn bɛ seem zugu, ba yi kpalim m‑bɛ lala, di sɔa. ²⁷Ni, i pun di pɔ’a? - tɔ, di yiisi u. I na ka pɔ’a - tɔ, di bɔ pɔ’a. ²⁸Amaa i yi di pɔ’a, i bu tum taalli; ka pɔ’asariga yi kuli doowa, u gba bu tum taalli. Amaa ban mari pɔ’aba, bee siridima, nin di wahala duniya wa puuni, ka m boori ni n kyɛ ka ya ku di lala wahala. ²⁹Man wulisiri seelli maa nŋɔa, m mabiisi: saha maa ku yuui. Pampaŋŋɔ zaŋŋi n‑wa, see ka ban mari pɔ’aba gba bɛ hoo ban ka. ³⁰Lala yaasa, kyɛ ka ban kumni la bɛ hoo ban bu kumna, ka ban mari sufumaasim bɛ hoo ban mari sufusa’aŋŋu, halli ban daari neema gba bɛ hoo ban bu su marigu. ³¹M‑paasi lala, ban mari duniya buna n‑tumna, ba di kyɛ ka ba ba’a zaa bɛ a ni. Dama duniya kanŋɔ gatti ni maa. ³²M bu boori ni seelli ti mugsi ya. Dakoori ba’a zaa bɛ la ti Dugma yɛla ni; ni u baŋŋi ŋɔn nin niŋi seem ka ti Dugma sufu maai. ³³Pɔ’adaana mun ba’a bɛ la duniya yɛla ni; ni u baŋŋi ŋɔn nin niŋi seem ka u pɔ’a sufu maai; ³⁴ka u ba’a puri buyi. Lala ka pukoori, bee, pɔ’asariga ba’a zaa bɛ la ti Dugma yɛla ni; ni u baŋŋi ŋɔn nin niŋi seem ka bɛ kasi n‑ti ti Dugma, u ningbiŋŋu ni, ni u sii ni gba. Pɔ’a sɔ ŋɔn mari u sira muna - u ba’a bɛ la duniya yɛla ni; ni u baŋŋi ŋɔn nin niŋi seem ka u sira sufu maai. ³⁵N yɛtti dinŋɔ la ya suŋŋsim zugu; pa la man ya ta’ari ya yɛla. N ya wulisiya ya ya nin niŋi seem ka ya teesa ku puri, amaa ka ya tumni din tuusi, ka kur gyeemni ti Dugma la suŋŋasuŋŋa.

³⁶Tɔ: ka zaŋŋi n‑kyaŋŋi dɔsɔ ŋɔn su pɔ’asariga yɛla maa: pɔ’a maa yuuma yi paai doo kulibu ka dɔsɔ ŋɔn su u yɛla maa teesi, ni, u bu tumni din tu seem n‑tiri u, kyɛ ka u niŋi u sufu ŋɔn boori seem: ba yi ti niŋi amriya di ka taalli. ³⁷Amaa lala doo maa yi niŋi u sufu ni yɛdda, ka sɔ bu mugsiri u, u yi nyaŋŋi u maŋŋa ka gbaai gbaari kirikiri - tɔ, u yi kyɛ ka pɔ’a maa kpalim la pɔ’asariga, lala gba veela. ³⁸Dinŋɔna pɔ’a maa yi ti kuli doowa, lala dɔli la soori amaa u yi bu kuli doowa, di sɔa.

³⁹Pɔ’a sɔ yi kuli doowa, di sum ni u bɛ la u sira maa saani, halli ni doo maa nyɔvuri tɔriga. Amaa u sira maa yi ti kpi, u mari soori ni u kuli dɔsɔ ŋɔn boora; amaa see ka doo maa nyɛ la ti Dugma nira. ⁴⁰Di zaa yɔri, u yi kpalim la pukoori u nin mari sufumaasim n‑gaari lala - man teesi seem nŋɔa, ka m mi, ni, n gba mari Naawunni Siiya.

¹Tɔ; ka zaŋŋi n‑kyaŋŋi bunseesi ban zaŋŋi m‑maali ba’a la yɛla: ni, ‘Ti zaa mari la bamsim.’ - tɔ, ti siri mi lala halli, amaa bamsim lala taabu zugu ka niriba kur duusiri ba mansi; wurilim mun nyɛ la din paasiri niriba beesisuŋŋu. ²Ka nira ŋɔn teesi, ni, ŋɔn mi la seelli la - di daama na ka miilinsi din dɔli soori. ³Amaa nira ŋɔn wuri Naawunni, Naawunni mi u yɛla. ⁴Tɔ: zaŋŋi n‑kpa ba’a bundira diibu ziiya, ti mi, ni, ba’ari pa la bunseelli kam duniya wa ni, ka wunni ka ni di yi pa la Naawunni kɔkɔa. ⁵Ba yi tɔ’asi ba’a ni wuna yɛla duniya wa puuni, saazugu bee tingbaŋŋu ni - halli ka ba siri tɔ’asiri la wuna ni dugmadima pam yɛla - ⁶di zaa yɔri, dama tirima saani ka Naawunni yinni bɛ ni. Ti Ba Naawunni n nyɛ u, ka bunseelli kam yi la u saani na, ka ti gba bɛ ni n‑tiri u. Ka ti Dugma yinni gba bɛ ni: Yisa Kirisita n nyɛ u, ka bunseelli kam bɛ ni ŋɔn Yisa zugu, halli ŋɔn zugu ka ti gba bɛ ni.

⁷Yɛlimaŋni nla: amaa pa sɔkam zaa m mari bamsim wa. Seeba na kpalim m‑miili la ba’a yɛla, halli ka ba yi ti di lala diibu ba teesiri, ni, ba diri a ni n‑tiri ba’ari maa. Lala ka ban bu mi taalli ni din tu la yɛla galimiya ni. ⁸Pa diibu zugu ka ti pɔtti Naawunni saani na: ti yi bu di, ti ku pɔsigi seelli; ti mun yi di, lala ku paasiri ti seelli. ⁹Amaa ya baŋŋma ka ya yuubu niŋbu di kyɛ ka ban yɛdda bu zɛ deede la ti burigi n‑lu. ¹⁰Ya bu nya? - ŋɔn bu mi taalli ni din tu la yi ti nya ka nyini bamsim daana wa bɛ la ba’a duri ni n‑diri diibu, ammi, lala ku kyɛ ka u di ba’a diibu? - Ii, u nin di. ¹¹Ka lala nin kyɛ ka ŋɔn na zi yɛla suŋŋa wa baasi yɔri nyin bamsim maa zugu - halli ni u nyɛ la i mabiiya, ka ŋɔn gba zugu ka Kirisita daa kpi. ¹²Ya yi tum taalli wa taabu n‑niŋi ya mabiisi, ka kyɛ ka ba burigi ban na zi soori deede zugu, ya tumni la taalli n‑niŋi Kirisita. ¹³Dizugu n numni wa ŋɔppu yi nin kyɛ ka n taraana burigi, dinŋɔna n ku laa n‑ŋɔbi numni yaasa, dama di nin kyɛ ka n taraana burigi n‑lu.

¹Man bu su m mammaŋŋa? Pa tuumu n nyɛ ma? Bee, m pun bu nya ti Dugma Yisa? Ay! - n daa nya u ka leebi u tuumu, ka ŋɔna n ti ma yɔlisimma: halli n tuma zugu ka yarim gba leebi Naawunni niriba. ²Dizugu n yi pa la tuumu n‑ti seeba, n nyɛ la tuumu n‑ti yarima - man zugu ka ya nyɛ la Naawunni niriba, ka lala zugu kyɛ ka ba baŋŋi, ni, tuumu n nyɛ ma.

³N labsigu nŋɔa, n‑tiri ban ya boosi ma boosa. ⁴Ammi, tirima ka soori ni ti nya ti bundira ni bunnyuura? ⁵Halli tirima kɔkɔ n ka soori ni ti di pɔ’a ŋɔn nyɛ yɛddaniŋna, ka kyɛ ka u dɔli ti ti gyiliŋŋu ni, bee? - hoo tuumuseeba la ŋɔn tumni seem, ni ti Dugma tunzɔppa la, ni Siifasi gba. ⁶Bee, kulla man ni Baanabasi kɔkɔ n ka soori ni ti ku ti bukaata, see ka ti tumni ti toori nuusi tuma? ⁷Sɔ m bɛ ni m‑mari u toori samni n‑tumni soogya tuma? - Ay, ba yoori ba zaa! Bee, sɔ bɛ ni n‑sa tiisi ka ku di a wala? - Ay, ŋɔn saari zaa n deaari wala! Yaasa, sɔ m bɛ ni n‑guri bunkɔbri ka ku nyu ba bisim? - Ay, ba zaa nyuura! ⁸M bu tɔ’asiri lala n toori ninsaala teesa zugu, amaa Naawunni zaaligu gba yɛtti la lala. - Bee, m ma’ari ni? ⁹Dama di sɔbi n‑dooli Musa zaaligu sɔppu ni, ni, “Nigi yi tumni kyi buubu tuma, yan di lɔ ba nɔya.” - Tɔ, nigi yɛla m mugsi Naawunni, bee? ¹⁰Ay! - U yɛtti dinŋɔ zaa n‑ti la tirima, bee wula? Ii! - tirima zugu ka ba daa sɔbi a zaa, ni lala kyɛ ka ŋɔn koora ni ŋɔn buuri kyi zaa nin la’am m‑mari tama, ni, ba nin deaai ba tɔra. ¹¹Tɔ; ka tin daa tum ya saani seem la ŋmanni la hoo kyi koobu tuma ka di bɛ la ya siisi ziiya; ka di yi bɛ lala, ammi, ti ka soori ni ti nya anfaani ya saani duniya wa ziiya? ¹²Soori mun yi bɛ ni ka baseeba nyari lala anfaani ya saani ka di bu sum ni tirima gba nya?

Amaa di zaa yɔri, ti daa bu zaŋŋi lala soori maa. Ti daa yɔ ti toori samni zaa, dama ti daa bu boori ni Kirisita lahabasuŋŋu tuma labi nyaaŋŋa. ¹³M‑paasi lala, ya bu mi, ni, ban tumni Naawunni Gyeeŋŋu Yiri ni maa nyari ba diibu la lala tuma zugu? Ii! - ban deaari bunkɔbri niriba saani m‑maanni n‑tiri ba kur mari ba tɔra. ¹⁴Lala taabu ka ti Dugma zaali, ni, ban tumni u lahabasuŋŋu tuma maa nin nya lala tuma maa yoori. ¹⁵Soori bɛ ni, amaa man mun daa bu deaai lala anfaani. M bu sɔbri yɛla wa ni ya ti niŋi lala n‑ti ma. Ay! - n yi da kpi di naa n‑sɔa! M bu boori ni ba ta’ari m bara nyuubu. ¹⁶Ya bu nya? - n yi mooli lahabasuŋŋu maa yɛla, lala bu ti ma soori ni n ti nyuuri bara. Yɛlimaŋni, di nyɛ ma la talasi - halli n yi bu moonna, n nin di wahala. ¹⁷N yi tumni lala tuma maa m mammaŋŋa sufu yuubu zugu, n nyari anfaani di ni; amaa di yi pa la n yuubu zugu, n kur kpalim n‑tumni tunseesi ban zaali ma la. ¹⁸Ka n yoori anfaani nyɛ la bɔa? Dinŋɔ kɔkɔa: ni, n yi moonni lahabasuŋŋu maa ka ba deaari yɔri, man ŋɔn bu boori ligri zugu, anfaani nla n‑ti ma.

¹⁹Tɔ: ni man su n toori maa zaa, n sakki, ni, n leebi la daabri n‑ti sɔkam, ni lala ti kyɛ ka n nya niriba pam ka ba ti tuligi. ²⁰Yɛhudiya dima maa saani ka n daa leebi hoo Yɛhudiya doowa, ni lala nin kyɛ ka n nya ba ka ba ti tuligi; n siri pa la zaaligu ŋɔn su sɔ fukumsi, amaa n leebi la hoo lala nira n‑tiri zaaligu ŋɔn su seeba fukumsi la, ka lala ti kyɛ ka zaaligu niriba wa ti nya tuliginsim. ²¹Ban mun ka zaaligu la saani ka n yi leebi ba taraana n‑gba kɔŋŋi zaaligu: n siri pa la sɔ ŋɔn bu dɔli Naawunni ŋɔn zaali soori la, dama Kirisita zaaligu su n yɛla zaa, amaa lala kyɛ ka n nya ban ka zaaligu la ka ba ti tuligi. ²²Halli ban ka yaa la saani n daa sakki n‑leebi ŋɔn gba ka yaa; yɛlimaŋni, saalidima zaa ŋɔn bɛ seem man gba daa sakki, ni, n ti leebi lala; ka lala ti kyɛ ka n nyaŋŋi n‑fa seeba m‑basi. ²³Anŋɔ zaa ka n niŋna, Naawunni lahabasuŋŋu zugu, ni man gba nin toaai n‑la’am n‑di ka bunsuma.

²⁴M‑paasi, ya bu mi zoaa yɛla? - ni, ban zɔri zoaa ni la saani, zɔzɔttiba maa zaa zɔra, amaa yinni kɔkɔ n yi zɔ n‑di. Dizugu ya kpaŋŋma ya mansi n‑zɔ suŋŋa din nin kyɛ ka ya zɔ n‑di. ²⁵Ŋɔn ya zɔ zoaa ni, bee, n‑ŋmɛ bɔla muna - ba zaa yi mugsiri la ba mansi ni nimmoaa m‑bamsiri deema maa. Ba niŋni la lala ni ba ti di n‑deaai yaanni kan bu yuura; tirima mun ya di seaa kan bu naara. ²⁶Dizugu man mun bu zɔri zoaa la ni hoo ŋɔn zɔri yɔriyɔri; m bu zabri hoo ŋɔn buuri pɛsigu. ²⁷Ay! - n mari n toori ningbiŋŋu ka gbaari ka ni nimmoaa, ni lala zugu kyɛ ka m pa la sɔ ŋɔn yiisi wa’azu n‑ti seeba, ka m mammaŋŋa kɔŋŋi nyaabu.

¹M mabiisi, m bu boori ya kpalim ziilinsi ni, see ka ya baŋŋi, ni, ti badima zaa daa la’am m‑bɛ sangbaŋŋu la lɔŋni, ka ba zaa daa la’am n‑kpɛ teeku maa puuni n‑lɔŋŋi. ²Tɔ, lala n daa nyɛ di: ka di ŋmanni la hoo ban daa su ba zaa koom n‑ti Musa, sangbaŋŋu ni teeku la puuni. ³Ba zaa daa la’am n‑di diseebu din daa pa duniya wa diibu, ⁴ka daa nyu bunnyuuriseebu bun daa pa duniya wa dinni. Ni, tampii maa daa dɔli ba - pa duniya wa tampii n‑daa la - ka koom daa yi ka ni na; ka lala tampii maa daa nyɛ Kirisita Masiiya. ⁵Di zaa yɔri, ba pam n daa nyɛ seeba Naawunni sufu ŋɔn daa bu maai ba zugu; ka ba daa kpi n‑kpalim n‑dɔya yoo maa ni. ⁶Tɔ, ka anŋɔ n nyɛ an kpaamni tirima n‑wulisiri ti, ni, ti di dɔli kɔribeeri hoo ban daa dɔli seem. ⁷Halli yan di leebi ban maanni ba’a, hoo ban seeba daa maanni la - hoo din pun sɔbi n‑dooli seem, ni, “Niriba maa daa zinni ni ba ti di ka nyu, ka naayi doaai na nti deemna.” ⁸Ti di laa n‑niŋi zina tuma, hoo ban seeba ŋɔn daa niŋi seem, ka ba niriba tusa pisi ni ata daa kpi dahinyinni la. ⁹Ka ti di zamsiri ti Dugma, hoo ban seeba ŋɔn daa zamsira ka wigi daa ku ba. ¹⁰Yaasa, ti di nyurimna, hoo ban seeba ŋɔn daa nyurimni maa ka malaaka kum daana daa kyɛ ka ba baasi yɔri. ¹¹Tɔ: anŋɔ zaa daa paai ba na, ka a wulisiri ti yɛla, ka ba daa sɔbi a n‑dooli ni ba ti kpaamni ti a zugu - tirima ban kpalim nti nya duniya naari saha paari na. ¹²Dizugu, i yi teesi, ni, i zɛ la deede, nyin baŋŋma ka di lu! ¹³Yan nya zamsigu seem, di bu yakki n‑gaari ninsaalidima ŋɔn nyari seaa. Yɛdda daana n nyɛ Naawunni, u ku kyɛ ka zamsigu seaa kan gaari ya paai ya. Halli zamsigu yi ti paai ya na, u nin bɔ sɔseaa kan nin kyɛ ka ya nyaŋŋi.

¹⁴Dinŋɔna, m mabiwutta, ya zɔm ka yi ba’a ni buga gyeeŋŋu ni. ¹⁵Ya nini n neaai, ka di zugu ka n tɔ’asiri lala n‑tiri ya. Ya mammansi kur baŋŋma n yɛttɔ’a maa gbinni ŋɔn nyɛ seem. ¹⁶Ti yi mari bunnyuura kɔbeaa la m‑puusi Naawunni barika, pa la tin la’amni n‑tɔtti Kirisita ziim la zugu? Ti mun yi zaŋŋi diibu la n‑ŋmaari n‑tiri taaba, pa la tin la’amni n‑tɔtti Kirisita ningbina zugu? ¹⁷Tɔ, ka diibu yinni m bɛ ni, ka tirim ban zoaai la’amni n‑ŋɔbra, ka ti ti leebi ninvugyinni ningbina, dama ti zaa la’am n‑diri diibu yinni. ¹⁸Ya bu ya teesi Izraɛli dima maa yɛla? Ban nyɛ Izraɛli dima duniya wa soori zugu la, niriba zaa ban la’amni m‑maanni sara la, ba laa n‑la’amni n‑tɔtti numni maa n‑ŋɔbra. ¹⁹Bɔ ka n wulisiri wa? - Ni, ba’ari numni nyɛ seelli? bee, ni, ba’ari nyɛ seelli? ²⁰Ay! - amaa ba’amaanniba bu maanni Naawunni, arizimbeeri ka ba maanna. Ka m bu boori ni ya la’amni n‑deaari arizimbeeri yɛla tɔra. ²¹Yɛlimaŋni, ya ku toaai n‑nyu ti Dugma bunnyuura kɔbeaa ni, ka laa n‑nyu arizimbeeri dinni m‑paasi - lala ka soori. Ya ku toaai n‑di ti Dugma laa ni, ka laa n‑di arizimbeeri dinni ni - lala gba ka soori. ²²Bee, ti ya kyɛ ka ti Dugma nyuuri yisigi? Ammi, ti mari yaa n‑gaari u? Ay - ti ka, walla!

²³Ni, ‘M mari la seelikam yiiko.’ - tɔ, amaa pa seelikam zaa m paasiri suŋŋsim. Ni, ‘M mari la seelikam yiiko.’ - tɔ, amaa pa seelikam zaa m paasiri niriba beesisuŋŋu. ²⁴Yan di kyɛ ka sɔkam bɔ u mammaŋŋa yɛla, amaa u taraana yɛla ka u boora. ²⁵Ya ŋɔbma nakoosidima numkoosa zaa, amaa di boosiri numseesi yɛla ni ya ti nya galinsi a zugu. ²⁶Dama di sɔbiya, ni, “Duniya wa, ni din bɛ ka ni maa - a zaa nyɛ la ti Dugma dinni.” ²⁷Tɔ. Sɔ ŋɔn bu niŋi yɛdda yi ti zuusi ya u bundirigu ka ya boori kyɛnni, yan dima ban zaali seelli na zaa; yan di boosiri a yɛla ni ya ti nya galinsi a zugu. ²⁸Amaa sɔ yi ti yɛli ya, ni, “Ba’ari numni nŋɔa.”, dinŋɔna yan di di, ninvugsɔ ŋɔn yɛli ya lala maa zugu, ni yan ku ti galim sɔ sufu ni teesa zugu. ²⁹- Tɔ, lala nira maa sufu ni teesa yɛla ka n tɔ’asiri maa, pa ya mammaŋŋa dina. Mani n su m mammaŋŋa yɛla, ka dizugu n ku kyɛ ka sɔ zaŋŋi u sufu ni teesa n‑galim ma ka di mugsi ma. ³⁰N yi puusi Naawunni ka di diibu maa, ba ya niŋi la wula n‑galim ma, diibu wa zugu? - dama m pun puusi Naawunni di zugu. ³¹Dizugu ya yi diri diibu, bee, n‑nyuuri bunnyuura, bee, ya yi niŋni seelli zaa, ya kyɛ ka ya tumni lala n‑tiri Naawunni gyirima. ³²Yan di kyɛ ka sɔsɔ burigi n‑lu ya yɛla zugu - pa Izraɛli dima, bee ban pa Izraɛli niriba, halli Naawunni niriba gba. ³³Lala ka man moora, ni n kyɛ ka sɔkam sufu maai n yɛla zugu. M bu boori m mammaŋŋa anfaani yɛla, see din mari anfaani n‑tiri sɔkam - di nyɛ la: ni, ba nya tuliginsim.

¹Ya dɔli n soori maa, hoo man gba dɔli Kirisita Masiiya soori seem la.

²Tɔ: ka m pɛ’ari ya, dama ya teaari n yɛla sahakam ka kpalim n‑dɔli wulisigu maa zaa, hoo man daa zaali ya seem la. ³Amaa m boori ni ya baŋŋi, ni, dɔppa saani sɔkam zaa zuguraana n nyɛ Kirisita Masiiya, pɔ’a mun zuguraana nyɛ la u sira, hoo Kirisita zuguraana ŋɔn nyɛ Naawunni. ⁴Dɔsɔ ŋɔn pili u zugu ka susiri Naawunni, bee, n‑tɔ’asiri anabitiri yɛttɔ’a, di daama diisiri u maŋŋa vi. ⁵Amaa pɔ’asɔ ŋɔn mun bu pili u zugu ka susiri Naawunni, bee, n‑tɔ’asiri anabitiri yɛttɔ’a, lala pɔ’a diisiri u maŋŋa vi. U yi ti niŋi lala, di ŋmanni la hoo ŋɔn laa m‑puni u zugu ka doaai ni zugkoaa n‑tɔ’asira. ⁶Dama pɔ’a yi ku sakki, ni, u bɔbi u zugu, dinŋɔna ŋɔn kyeema, bee, m‑puni ka doaai n‑zaani zugkoaa. Ka lala mun yi nyɛ la vi, dinŋɔna see ka u bɔbi u zugu. ⁷Doo bu sum ni u pili u zugu, dama Naawunni ŋmaari n nyɛ u, n‑tisiri Naawunni gyirima; pɔ’a mun tisiri doo maa gyirima. ⁸Dama ba daa bu zaŋŋi pɔ’a m‑maali doowa, amaa ba daa naam doowa pɔi ka naayi yiisi pɔ’a u saani na. ⁹Dizugu pa pɔ’a zugu ka doo daa bɛ ni, amaa doo maa zugu ka ba daa maali pɔ’a maa. ¹⁰Dinŋɔna see ka pɔ’a maa bɔbi u zugu suŋŋa, ban su u fukumsi zugu, ni malaakadima la zugu. ¹¹Ni dinŋɔ zaa, ti Dugma saani pɔ’a pa u kɔkɔa ka kyɛ doowa, ka doo gba pa u kɔkɔa ka kyɛ pɔ’a. ¹²Ba daa naam doo ka yiisi pɔ’a u saani na, ka pɔ’a mun yi laa n‑dɔ’ari doowa. Ka seelikam yi la Naawunni saani. ¹³Ya mammansi teesim din sumsi ni: pɔ’a yi bu pili u zugu ka susiri Naawunni - di mari soori? ¹⁴Duniya wa beesigu kaari wulisiri ti lala - ni, doo yi mari zɔbwɔ’ala, di mari la vi. ¹⁵Pɔ’a mun yi mari u zɔbwɔ’ala, di mari la gyirima n‑ti u. Ba ti u lala zɔbri ni a ti leebi bɔbsuŋŋu n‑ti u. ¹⁶Sɔ yi ya laa n‑ŋmɛ nangbankpeemni dinŋɔ zugu, kyɛ ka n yɛli ya, ni, tirima bu dɔli lala soori, halli ya’aseelikam Naawunni niriba ŋɔn la’amni n‑gyeemna.

¹⁷Tɔ: ka man ŋɔn ya tɔ’asi yɛliseesi n‑ti ya wa, di pa la pɛ’abu zugu ka n nin tɔ’asi. Dama yan la’am taaba sahanseaa la, di bu kyɛ ka ya yɛla maa kyɛnni tooni: ay! - amaa a labri la nyaaŋŋa. ¹⁸Dama, daŋŋni, n wum ya lahabaari, ni, ya yi la’am taaba ni ya gyeem Naawunni, ya mari la nangbanwala - ka n sakki n sufu ni, ni, di bu ta’ari ni ya bɛ lala. ¹⁹Dama see ka nangbanwala bɛ ya ni, ka lala nin kyɛ ka Naawunni nini ŋɔn tigi seeba la yɛla ti yi paalu ni. ²⁰Tɔ, ka dizugu ya yi la’am taaba, di pa la ti Dugma diibu ka ya dira. ²¹Dama ya yi diri ni, sɔkam diri la u mammaŋŋa diibu n‑daŋŋni u taraana; ka kɔm mari seeba, halli ka seeba mun nyuuri nti bugra. ²²Wula? Ya ka yiya n‑nin toaai n‑di ka nyu a puuni, bee? Bee, Naawunni niriba gyeeŋŋu la’aŋŋu maa ka ya gɔsi yɔri, halli nti zeemni ban ka, ka diisiri ba vi? Ammi, n nin pɛ’ai ya di zugu? - Ay! n ku pɛ’ai ya, walla!

²³Dama man daa deaai seelli ti Dugma saani la ka n daa zaŋŋi n‑wulisi ya: ni, yunseaa ban daa figsi ti Dugma Yisa maa, u daa daŋŋi n‑zaŋŋi diibu la ²⁴m‑puusi Naawunni pɛ’abu n‑yɛli, ni, “N ningbina nŋɔa n‑ti yarima; ya niŋma lala ka teaari n yɛla.” ²⁵Ka ban daa di n‑naai maa, u daa zaŋŋi kɔbeaa gba lala, ni, “Naawunni nangbanyinni zaalipaalli maa nŋɔa; n ziim nin maali lala zaaligu maa n‑ti ya. Ya yi kur ti nyu kanŋɔ sahanseaa zaa, yan teaama n yɛla.” ²⁶Tɔ, ka sahanseaa kam ya yi ti di bundira wa ka nyu kɔbeaa wa bunnyuura, ya moonni la ti Dugma kum yɛla, halli ni u lappu na.

²⁷Dizugu ŋɔn mi, ni, u bu dɔli soori, ka laa n‑di bundira wa, bee, n‑nyu bunnyuura wa, u galimni la ti Dugma ningbina ni u ziim maa. ²⁸See ka nira viisi u maŋŋa suŋŋa pɔi ka naayi di bundira maa ka nyu kɔbeaa maa bunnyuura. ²⁹Dama ŋɔnkam di ka nyu ka bu baŋŋi di gbinni, ni, ti Dugma ningbina ni u ziim maa nŋɔa, di daama bɔ la sariya karibu m‑basi u maŋŋa zugu. ³⁰Lala zugu kyɛ ka ya niriba pam kɔŋŋi yaa ka beera; halli ya seeba mun pun ka ni. ³¹Amaa ti yi viisi ti mansi ka kari ti toori sariya, ba ku ti laa n‑kari ti sariya n‑lusi ti. ³²Amaa ti Dugma yi viisiri ti yɛla ka kari ti sariya, u wubsiri ti n‑zaanni ti soori ni, ni lala ti kyɛ ka ba ku la’am ti ni duniya wa dima n‑kari ti sariya n‑lusi ti. ³³Ka dinŋɔna, m mabiisi, ya yi la’am taaba ni ya ti di, see ka ya guri taaba. ³⁴Kɔm yi mari sɔa, ŋɔn dima u yiri ni pɔi, ka lala nin kyɛ ka ya yi la’am taaba ya ku nya galinsi di zugu. Tɔ: n yi ti kyɛ ya saani na, n nin laa n‑wulisi ya din kpalim la zaa.

¹Tɔ; ka n ya tɔ’asi Sii Kasi piini yɛla n‑tiri ya: m mabiisi, m bu boori ni seelli ti kpalim ka ya bu baŋŋi di. ²Ya mi halli, ni, yan daa na bu niŋi tuuba la, ba daa yɔmsi ya ka ya dɔli ba’a an bu nyaŋŋi n‑tɔ’asira. ³Dizugu n yɛtti ya, ni, Naawunni Sii ŋɔn bɛ sɔ saani zaa, di daama ku toaai n‑yɛli “Yisa baasima yɔri!” Ka di yi pa Sii Kasi maa zugu, sɔ mun ku toaai n‑yɛli, ni, “Yisa nyɛ la ti Dugma!”

⁴Tɔ: ka piini balibubalibu m bɛ ni, amaa Sii yinni maa bɛ ni n‑tisira. ⁵Gyeeŋŋu sɔya balibubalibu m bɛ ni, amaa ti Dugma yinni ka ti gyeemna. ⁶Tuma balibubalibu gba bɛ ni, amaa Naawunni yinni maa n tumni a zaa sɔkam puuni. ⁷Sii maa wulisiri u maŋŋa n‑tiri sɔkam zaa, ni di zaa ti maali ka kyaŋŋi tooni. ⁸Sii maa zugu ka ninvugsɔ mari yɛm yɛttɔ’a; ka sɔ mun mari bamsim, lala Sii yinni maa zugu. ⁹Sɔ yaasa mari la yɛdda lala Sii maa zugu, ka sɔ mun bɛ ni ka u deaai baaridima tippu, Sii yinni maa zugu. ¹⁰Seeba yaasa deaari la alahazibu tuma yiiko, bee, anabitiri yɛttɔ’a, bee, m‑baŋŋi siisi yɛla viisigu, bee, n‑tɔ’asiri yɛttɔ’a balibubalibu, bee, m‑baŋŋi lala yɛttɔ’a maa gbinni n‑wulisira. ¹¹Anŋɔ zaa nyɛ la Sii yinni maa tuma, ka u mari n‑tisiri u sufu ŋɔn boori seem.

¹²Di ŋmani la hoo ninsaala ningbiŋŋu ŋɔn nyɛ seem: ka nyɛ la bunyinni, amaa ka mari la luga pam; ka luga mun zaa, halli ni an zoaai seem maa zaa, a la’amni n‑niŋi ningbiŋŋu yinni. Tɔ: ka Kirisita Masiiya bɛ la lala. ¹³Sii yinni maa zugu ka ti zaa daa su Naawunni koom, ka di daa kyɛ ka ti la’am n‑niŋi ningbiŋŋu yinni; halli ni ti seeba daa nyɛ Yɛhudiyadima ka seeba mun daa nyɛ Griikadima gba; ka seeba daa nyɛ daaba, seeba mun daa su ba mansi; ti zaa daa la’am n‑nyu Sii yinni maa. ¹⁴Tɔ, ka ningbiŋŋu muna - pa lugri yinni kɔkɔ nla, amaa luga pam. ¹⁵Ya bu nya? - Sɔ nɔbri yi ti yɛli, ni, “Tɔ, m pa la nuu, dizugu m pa ningbiŋŋu maa lugri, halli fiiŋ gba!”, lala maa ku kyɛ ka ka siri pa ningbiŋŋu maa luginseaa. ¹⁶Bee, sɔ tubri yi ti yɛli, ni, “Tɔ, m pa la nimbiri, dizugu m pa ningbiŋŋu lugri kɔtaa!”, lala maa ku kyɛ ka ka siri pa ningbiŋŋu maa luginseaa. ¹⁷Ya bu nya? - ningbiŋŋu zaa yi da nyɛ la nimbiri, ba ya niŋi la wula n‑wumna? Bee, ka zaa yi da nyɛ la tubri, ba ya niŋi la wula n‑wumni nyuu? ¹⁸Amaa din nyɛ seem maa, Naawunni daa niŋi luga maa zaa la a lugri a lugri, hoo ŋɔn Naawunni ŋɔn boori seem. ¹⁹Yɛlimaŋni, a zaa yi da nya lugri yinni kɔkɔa, yani ka ningbiŋŋu da ya bɛ ni? ²⁰Din nyɛ seem maa, luga maa zoaai ni, amaa a la’amni n‑niŋi ningbimmunni. ²¹Nimbiri ku toaai n‑yɛli nuu, ni, “I ka bukaata man saani!”, bee, zugu yɛli nɔba, ni, “Ya ka ma bukaata!” ²²Ay! - halli luginseesi an ka yaa mari la bukaata gba. ²³Ka luginseesi tin yɛtti, ni, an ka gyirima la n nyɛ a, ana ka ti gɔsiri suŋŋa; ka a seesi an bu veela la, ana ka ti mari suŋŋa vi zugu ²⁴- halli ka a bunveela la bu boori lala suŋŋsim. Amaa Naawunni ŋɔn maali ningbiŋŋu seem maa, u zaŋŋi la gyirima n‑ti luginseesi an yɛla bu mugsi pam la. ²⁵Naawunni tum lala ni u ti kyɛ ka nangbankpeemni ni wɔligri ka ningbiŋŋu maa ni, amaa ka luga maa zaa ti suŋŋni m‑mari taaba. ²⁶Lugri yinni yi ti namsi, a zaa yi la’am n‑namsi ni; lugri yinni mun yi nya pɛ’abu, sufu maari n nyɛ di n‑tiri a zaa.

²⁷Tɔ: yarima mun n la’am n‑nyɛ Kirisita ningbiŋŋu, ka ya zaa yinni yinni n nyɛ u ningbinluga. ²⁸Ka Naawunni daa yiisi u niriba ka ba tumni tuma balibubalibu n‑tiri taaba: u daa daŋŋi n‑zaali seeba ni ba ti niŋi u tuumudima maa; ka laa n‑zaali seeba m‑pa anabidima; nta karimbadima, m‑paasi ban tumni alahazibu tuma, ban tibri baaridima, ban suŋŋni niriba, ni Naawunni niriba toondaandima, ni ban tɔ’asiri yɛttɔ’a balibubalibu. ²⁹Sɔkam zaa nyɛ la tuumu? - Ay! Sɔkam nyɛ la anabi, bee, karimba? Sɔkam n toaai n‑tumni alahazibu tuma? - Ay! di pa lala. ³⁰M‑paasi yaasa: sɔkam tibri la baaridima? Sɔkam n toaai n‑tɔ’asiri yɛttɔ’a balibu? Bee, m‑baŋŋi lala yɛttɔ’a gbinni? - Ay! ³¹Tɔ: ka dinŋɔna ya booma piiniseesi an tibsa la.

Halli ya kyɛ ka n wulisi ya sɔseaa kan veeli n‑gaari zaa#:-

¹N yi nyaŋŋi n‑tɔ’asiri ninsaalidima yɛttɔ’a kam zaa, halli ni malaakadima yɛttɔ’a gba, ka mun ka wurilim, dinŋɔna n ŋmanni la gbiliŋŋa bee feeŋŋa n‑kumni yɔri. ²N yi niŋi anabitiri, ka laa m‑mari bunsɔ’ara zaa bamsim, m‑mari yɛdda halli nti kyɛ ka zɔya vuui m‑paai seela, ka mun ka wurilim, dinŋɔna m pa seelli. ³Halli n yi zaŋŋi n ligri ni n neema zaa n‑tɔri fara dima, ka laa n‑zaŋŋi n ningbiŋŋu n‑kyɛ ka ba nyɔ ka bugum, ka mun ka wurilim, n ka anfaani anŋɔ zaa zugu.

⁴Wurilim mari la sugru ni nambɔzoaa; wurilim bu zabri nyuuri; ka mun bu nyuuri bara, bee, m‑mari karimbaani. ⁵Wurilim bu tumni gyɛrilim; di bu boori di mammaŋŋa yuubu, bee, n‑gyɛ suuri yooma: wurilim bu teaari taalli n‑guri ni di ti boosi. ⁶Wurilim sufu bu maara ninvugseeba tumbeeri zugu; amaa ka mari la sufumaasim yɛlimaŋni zaa zugu. ⁷Wurilim ta’ari ni, m‑mari yɛdda seelikam puuni, ka laa m‑mari tama ka diri sugru seelikam puuni.

⁸Wurilim bu naara: amaa anabitiri yɛla yi bɛ ni, a nin paai a tɔriga; ka ba yi ti tɔ’asiri yɛttɔ’a balibubalibu, ba nin naa n‑sini ba noori; bamsim gba nin paai di naari. ⁹Dama ti bamsim maa pa la bamsimunni, ka ti anabitiri gba pa la bummunni. ¹⁰Ka din nyɛ bummunni deede la yi ti paai na, lala saha ka an pa bummuna la nin gaari n‑naai. ¹¹Ya bu nya? man daa nyɛ bibila sahanseaa la, n daa mari la biilim n yɛttɔ’a puuni, ni n teesa ni n yɛm yɛla zaa ni. Amaa man daa leebi bunkurigu maa, n daa zaŋŋi biilim yɛla maa zaa m‑basi. ¹²Dama pampaŋŋɔ ti nyari liisaliisa hoo mansɔ’asi ni, amaa ka ti nin nya kasi hoo nini ŋɔn kpa taaba, din daari maa. Pampaŋŋɔ n na bu mi yɛla zaa suŋŋa, a seesi kɔkɔ ka m mi; amaa din daari maa n nin ti baŋŋi di zaa kasi, hoo ban baŋŋi ma seem la. ¹³Dizugu an kpalim m‑bɛ ni n nyɛ yɛdda, ni tama, ni wurilim, abata wa; amaa din gaari a zaa nyɛ la wurilim.

¹Ka dinŋɔna ya dɔli wurilim sɔya, ka bɔ Sii maa piini; ka kan daŋŋi tooni la nyɛ la anabitiri yɛla piini. ²Dama ŋɔn tɔ’asiri yɛttɔ’a balibubalibu maa bu tɔ’asiri n‑tiri saalidima, amaa Naawunni ka u tɔ’asira. Halli sɔsɔ bu baŋŋni a gbinni, ka u kpalim n‑yɛtti yɛlisɔ’ara u siiya puuni. ³Ŋɔn mun tɔ’asiri anabitiri yɛttɔ’a maa yi tɔ’asiri n‑tiri niriba, di paasiri ba beesigu ka kpamsiri ba. ⁴Ii - ŋɔn tɔ’asiri yɛttɔ’a balibu maa paasiri u maŋtoori beesigu, ŋɔn mun yɛtti anabitiri yɛla la paasiri Naawunni niriba zaa beesigu. ⁵Tɔ, n da boori la ni ya zaa toaai n‑tɔ’asiri yɛttɔ’a balibubalibu, ka laa m‑boori ni ya yɛtti anabitiri yɛla, ka lala yi sɔa. Anabi gaari ŋɔn tɔ’asiri yɛttɔ’a balibu, di yi pa la sɔ bɛ ni n‑wulisiri yɛttɔ’a balibu maa gbinni ka lala nin paasi Naawunni niriba beesigu.

⁶Tɔ, m mabiisi: n yi kyɛ ya saani na n‑tɔ’asiri yɛttɔ’a balibubalibu, n suŋŋni ya la wula? Ay, zaalim! - ka di yi pa la n laa m‑mari yɛlisɔ’ara kasigri, bee, bamsim yɛla, bee, anabitiri yɛla, bee, wulisigu n‑ti ya na. ⁷Halli bunseesi an ka nyɔvuri saani di kur bɛ la lala: ya bu nya? - bunŋmeera hoo yiiya bee goongyi yi bu ŋmɛ n‑gɔligi suŋŋa, wula ka nira ya baŋŋi ŋmeebu maa gbinni? ⁸Ka bunseaa ban ŋmeeri m‑moonni tɔppu yɛla la muna - ka yi bu ŋmɛ n‑gɔligi, wula ka ba ya baŋŋi n‑niŋi tɔppu siri? ⁹Ya mammansi yɛttɔ’a ni gba, ya yi bu kyɛ ka ya yɛla yiiri suŋŋa, wula ka sɔ ya niŋi m‑baŋŋi yan yɛtti seelli maa gbinni? Ay! - lala kur ŋmanni la yan tɔ’asiri n‑tiri pɛsigu. ¹⁰Yɛttɔ’a balibu pam siri bɛ duniya wa puuni, ka a seelikam zaa mari ka gbinni. ¹¹Amaa sɔ yi ti tɔ’asi n‑ti ma ka m bu wum u yɛttɔ’a maa, u nin gɔsi ma, ni, tinzunnira, ka man mun gɔsiri u gba lala. ¹²Tɔ: dizugu ya mansi ŋɔn boori Sii maa piini la, ya kpaŋŋma n‑nya an paasiri la Naawunni niriba beesigu, ka ya zaa ti kyaŋŋi tooni. ¹³Dinŋɔna, kyɛ ka ŋɔn tɔ’asiri yɛttɔ’a balibu zaa la ti susiri Naawunni ni u kyɛ ka u toaai n‑wulisiri di gbinni gba. ¹⁴Dama n yi tɔ’asi yɛttɔ’a balibubalibu m‑puusi Naawunni, n sii maa puusiri ni, amaa n yɛm ka anfaani di puuni. ¹⁵Dinŋɔna - n ya niŋi la wula? N nin zaŋŋi n sii maa m‑puusi Naawunni, ka laa n‑zaŋŋi n yɛm m‑puusi u; n nin zaŋŋi n sii maa n‑yuum yuuma n‑ti Naawunni, ka zaŋŋi n yɛm n‑yuumni m‑paasi. ¹⁶Bee, i yi puusiri Naawunni i sii puuni, wula ka ninvugsɔ ŋɔn bɛ bɛni nin niŋi m‑baŋŋi n‑niŋi “Ammi!” n‑ti i puusigu maa? - dama ŋɔn bu wumni nyin yɛtti seelli wa. ¹⁷Nyin ŋɔn puusiri suŋŋa maa zaa yɔri, di ku toaai m‑paasi i taraana beesigu. ¹⁸Halli man tɔ’asiri yɛttɔ’a balibubalibu n‑gaari ya zaa, ka m puusi Naawunni di zugu. ¹⁹Ni di zaa yɔri, n yi bɛ la Naawunni niriba sunsukkuni, m boori ni n zaŋŋi n yɛm n‑tɔ’asi beela ni n ti wulisi n taaba, ka di gaari n yi tɔ’asi pam yɛttɔ’azuna ni ka ba bu wumna.

²⁰Tɔ, m mabiisi: yan di teesiri hoo bibisi: yɛlibeeri ziiya ka ya siri nin bɛ ni hoo bileesi, amaa yɛm ziiya see ka ya nin bɛ ni hoo ninvugkura. ²¹Di sɔbiya, Naawunni zaaligu maa ni, ni#:-

“N nin zaŋŋi yɛttɔ’azuna

Ni yan bu mi seeba maa yɛligu

N‑tɔ’asi n‑ti butiri wa niriba,

Ni di zaa ba ku wum n‑ti ma.

- Lala ka ti Dugma yɛli.”

²²Dinŋɔna yɛttɔ’azuna bulisiri yɛla n‑tiri ban ka yɛdda la, pa ban mara; anabitiri yɛla mun bulisiri yɛla n‑tiri ban mari yɛdda, pa ban ka. ²³Ya bu nya? - Naawunni niriba yi la’am n‑gyeemna, ka ba zaa tɔ’asiri yɛttɔ’a balibubalibu, ka saamma bee ban ka yɛdda dima kpɛ na, ba ku yɛli, ni, ya kpɛ la yinyaari? ²⁴Amaa ya zaa yi tɔ’asiri anabitiri yɛla ka lala nira ti kpɛ na, ya zaa zugu ka u nin ti baŋŋi u taalli ŋɔn bɛ seem, ni, ba kari u sariya ka lusi u. ²⁵Di saha ka u nin yɛli u sufu yɛlisɔ’ara an bɛ seem zaa, ka gbaani tiŋŋa n‑gyeem Naawunni ka yɛli, ni, “Naawunni siri bɛ ya saani.”

²⁶Bɔ n yi kpalim, m mabiisi? - Ya yi la’am taaba, sɔkam mari u yuumni, bee, u yɛliwulisira, bee, u bunsɔ’ara kasigri yɛla, bee, u tɔ’asiri yɛttɔ’a balibu bee n‑wulisiri lala yɛttɔ’a gbinni. Tɔ - ya kpaŋŋma ya mansi n‑kyɛ ka anŋɔ zaa nin paasi Naawunni niriba beesigu. ²⁷Seeba yi ya tɔ’asi yɛttɔ’a balibu yɛla, kyɛ ka di nyɛ la babayi-ata kɔkɔa, ka ba tɔ’asi yinniyinni n‑deaai taaba; ka laa n‑kyɛ ka sɔ bɛ ni n‑wulisiri a gbinni ŋɔn nyɛ seem. ²⁸Amaa sɔ yi ka ni n‑wulisiri a gbinni, kyɛ ka yɛttɔ’a balibu daana sini Naawunni niriba la’aŋŋu ni, ka naayi tɔ’asi n‑tiri u maŋŋa ni Naawunni. ²⁹Anabidima maa muna - ya kyɛ ka ba gba ti tɔ’asi ba niriba ayi-ata, ka ban kpalim la kpasi ba yɛttɔ’a maa. ³⁰Ka yɛttɔ’a yi kyɛ sɔ ŋɔn ziya saani na, kyɛ ka ŋɔn pun tɔ’asiri la ti tɔ’asi n‑naai pɔi, ka ŋɔnla naayi deaai yɛttɔ’a. ³¹Dama ya zaa nin toaai n‑tɔ’asi ya anabitiri yɛla n‑deaari taaba yinniyinni, ka sɔkam bamsi ka di kpamsi ba. ³²Anabidima maa n su ba mammaŋŋa anabitiri yɛla fukumsi, ³³dama Naawunni pa la ŋɔn burimna, amaa ŋɔn maanna.

See ka ya dɔli ban la’amni n‑gyeemni Naawunni la zaa kaari, ³⁴ka kyɛ ka pɔ’aba kpalim m‑bɛ surimm ya la’aŋŋu maa ni. Ba ka soori ni ba tɔ’asira, see ka ba dɔli soori hoo zaaligu maa ŋɔn yɛli seem la. ³⁵Pɔ’a yi boori ni u baŋŋi yɛttɔ’aseaa gbinni, see ka ba naayi kuli yiri ni ka u ti boosi u sira. Pɔ’a yi ti tɔ’asiri Naawunni niriba la’aŋŋu ni, di mari la vi. ³⁶Wula! Naawunni yɛligu daa piili yarima saani, bee? Bee, ya kɔkɔ saani ka di paai?

³⁷Sɔ yi yɛli, ni, u nyɛ la anabi, bee, ŋɔn mi Sii maa yɛla, di daama nin sakki, ni, man ŋɔn sɔbri seelli n‑tiri ya wa nyɛ la ti Dugma zaaligu. ³⁸Sɔ mun yi bu wumni n‑tiri yɛligu wa, yan di wumni n‑tiri di daama gba. ³⁹Tɔ, ka dinŋɔna, m mabiisi, ya boom suŋŋa anabitiri yɛla, amaa ka di ta’ari yɛttɔ’a balibubalibu yɛla. ⁴⁰See ka bunseelikam niŋi suŋŋa ka dɔli soori deede.

¹Tɔ, m mabiisi, n ya teaai ya la man ŋɔn daa mooli lahabasuŋŋu maa n‑ti ya seem. Lahabaari wa ka ya daa deaai, ka lahabaari maa zugu ka ya kpalim n‑zɛ yummu. ²Halli lala lahabasuŋŋu zugu ka ya nya tuliginsim, ya yi kpalim n‑dɔla wulisiseaa man daa mooli n‑ti ya la suŋŋa. Di yi pa lala, ya yɛdda bɛ la yɔri. ³Lahabaari wa ka n daa deaai seeba saani ka laa n‑zaŋŋi n‑ti ya, ka di yɛttɔ’akpanni nŋɔa: ni, Kirisita Masiiya daa kpi ti tumbeeri zugu, hoo Litaafi maa ŋɔn daa pun wulisi seem. ⁴Ka di laa n‑wulisi, ni, ba daa sɔ’ai u, ni, dabsa ata daari ka u daa neaai kum ni, hoo Litaafi maa ŋɔn daa pun wulisi seem. ⁵Ni, u daa kyɛ ka Siifasi Piita nya u pɔi, ka u nyaandɔliba pii ni ayi gba daa naayi nya u. ⁶Di nyaaŋŋa ka u daa kyɛ ka ti mabiisi bɔbgu daa nya u, ka ba daa zoaai n‑gaari ninvugkɔbsinu. Niriba wa pam na bɛ ba nyɔvuya ni, amaa baseeba laa n‑ka ni. ⁷Ka u daa laa n‑kyɛ ka Gyeemsi nya u, ka u tuumudima zaa gba daa nya u. ⁸Anŋɔ zaa nyaaŋŋa, u daa naayi kyɛ ka n gba nya u, hoo ban gbirigi n‑dɔ’ai sɔa. ⁹Dama mani n kpalim tuumudima maa zaa nyaaŋŋa, halli m bu sum ni ba booli ma Naawunni tuumu gba, dama n daa katti Naawunni niriba n‑namsiri ba. ¹⁰Amaa Naawunni piini zugu kyɛ ka m bɛ la man bɛ seem; ka lala piini maa bu basi yɔri, dama n daa tum tuma n‑gaari ba zaa - halli di pa la mani n‑tumna, amaa Naawunni piini ŋɔn mari ma n‑tumna. ¹¹Tɔ, di yi nyɛ la mani bee bana, lala ka ti moonna, ka lala ka ya daa niŋi yɛdda.

¹²Tɔ: ti moonni n‑yɛtti, ni, Kirisita daa neaai kum ni; ka wula ka ya seeba yɛtti, ni, kum neaari ka ni? ¹³Kum neaari yi ka ni, dinŋɔna Kirisita daa bu neaai. ¹⁴Kirisita mun yi daa bu neaai kum ni, dinŋɔna ti moonni la lahabaari maa yɔri, ka ya yɛdda niŋbu gba nyɛ la yɔri. ¹⁵M‑paasi lala, ba nin nya ti la, ni, zirima’ariba zaŋŋi n‑kyaŋŋi Naawunni yɛla. Dama ti yɛtti, ni, Naawunni n daa neaai Kirisita kum ni: amaa ban kpi la yi ku toaai n‑neaai kum ni, dinŋɔna u daa bu neaai u. ¹⁶Ii! - ban kpi yi ku toaai n‑neaai kum ni, dinŋɔna Kirisita gba daa bu neaai. ¹⁷Kirisita mun yi bu neaai kum ni, dinŋɔna ya yɛdda ka gbinni ka ya na kpalim m‑bɛ ya tumbeeri ni. ¹⁸Ka lala naa n‑kyɛ ka Kirisita niriba ban ka ni la gba baasi yɔri. ¹⁹Di yi nyɛ la: ni, ti ka tama Kirisita ni, di yi pa la duniya wa ni kɔkɔa, dinŋɔna ti wahala gaari sɔkam zaa dinni.

²⁰Amaa yɛlimaŋni ka Kirisita daa siri neaai n‑yisigi kum ni; u pun daŋŋi ban kpi la zaa lala - hoo ban daŋŋi n‑kyɛ naara pɔi ka naayi nya puri antaam maa zaa seem la. ²¹Ya bu nya? - ninsaalisɔ zugu ka kum daa paai ti zaa na, ka dizugu kum ni neaari gba daa paai ti na ninsaalisɔ zugu. ²²Ii! - Adam zugu ka sɔkam kpiira; Kirisita mun zugu ka sɔkam nin neaai kum ni. ²³Amaa sɔkam ni u saha: Kirisita daŋŋi hoo naara ŋɔn daŋŋi seem la, ka ban pa nyɛ la Kirisita niriba - ba saha nyɛ la u lappu na dabsiri daari. ²⁴Di nyaaŋŋa ka di nin naai: Kirisita nin sa’am yiiko dima ni fukumsi dima zaa yɛla ka kyɛ ka ba baasi yɔri pɔi, ka naayi zaŋŋi naam maa yɛla n‑niŋi u Ba Naawunni nuusi ni. ²⁵Dama see ka u di naam halli nti nyaŋŋi u dindaandima zaa. ²⁶Ka u dindaansɔ ŋɔn ti ya kpalim nyaaŋŋa ka u sa’am u yɛla nyɛ la kum. ²⁷Ni, “U zaŋŋi bunseelikam n‑kyɛ ka u nyaŋŋi ka su a fukumsi.” Tɔ, ka ŋɔn Naawunni yi ti zaŋŋi ‘bunseelikam’ n‑ti u, di wulisi, ni, di pa la ŋɔn Naawunni fukumsi ka u su. ²⁸Ka Naawunni Bii maa muna - u yi ti nyaŋŋi n‑naai, u mammaŋŋa gba nin kpɛ u Ba maasim ni, sɔ ŋɔn zaŋŋi seelikam n‑ti u ni u ti nyaŋŋi; ka lala nin kyɛ ka Naawunni naayi leebi seelikam sɔkam saani.

²⁹Tɔ: ka ba yi yɛtti, ni, kum ni neaari ka ni, ka ban suuri Naawunni koom n‑tiri ban pun kpi la ya niŋi la wula? Ban kpi maa yi bu neaari fass, wula zugu ka ba suuri koom n‑tiri ba? ³⁰Tirima muna - wula zugu ka ti diri wahala sahakam? ³¹N kpiiri ni beoo kam - lala n siri nyɛ di, m mabiisi - hoo man mari sufumaasim n‑duusiri m maŋŋa ya zaa yɛla zugu seem la, ti Dugma Yisa Kirisita saani la. ³²Halli n daa bɛ la Ɛfɛsusi timpuuni n‑zabri ni mooni bunkɔbbeeri. Tɔ, di yi nyɛ la kulla ninsaala beesigu wa yɛla zugu kɔkɔa, n ku nya anfaani di zugu. Ban kpi yi bu neaara, ni,

“Ya kyɛ ka ti diri ka nyuura,

Dama beoo ti sa nin kpi.”

³³Yan di kyɛ ka ba yɔmsi ya: ni,

“Zɔbeoo sa’amni la halli beesisuŋŋu gba soori.”

³⁴Ya maalima n‑teesi yɛlimaŋni yɛla, ka di laa n‑tumni tumbeeri. Yaseeba bɛ ni m‑bu mi Naawunni yɛla. Ya vi yɛttɔ’a ka n yɛtti wa.

³⁵Tɔ: di yi pa seem sɔ nin boosi n‑yɛli, ni, “Kpiimma neaari la wula n‑doaari na? Wula, ningbimbɔ ka ba ya zaŋŋi n‑yisigi?” ³⁶Nyin gyɛrigu wa! I yi buri bumburiseelli, ka ku toaai m‑buli na n‑niŋi di yi pa la ka daŋŋi n‑kpi. ³⁷I yi buri, pa kan ya buli n‑yi na la ka i butta, kulla bumburli hoo kawanni, bee, kyi bumburiseaa. ³⁸Amaa Naawunni n yi tiri ka ningbinseaa ŋɔn boori maa; bumbutiri zaa ni ka u tisiri ka ningbiŋŋu. ³⁹Ningbina zaa pa yummu: ninsaala ningbiŋŋu m bɛ ni, ni bunkɔbri dina ŋɔn bɛ ni, niinsi gba dina bɛ a kɔkɔa, ni zimi gba dina. ⁴⁰Saazugu ningbina bɛ ni, ka kyɛ duniya wa ni ningbina, ka a zaa mari a veelim, ka a nyɛ la a kookooba. ⁴¹Wuntaŋŋa mari ka veelim, ka namboaa mun mari ka dinni, ni saŋmariwuusi gba mara; ka saŋmariwuseaa veelim bu ŋmanni la ka taraana dinni.

⁴²Tɔ: ka kum ni neaari nin nyɛ la lala. Ba zaŋŋi bunseesi an sa’amni ni la n‑sɔ’ai, ka bunseesi an nin bɛ ni sahakam la nin doaai na. ⁴³Ban zeemni seelli la ka ba sɔ’ara, ka ka nin doaai na n‑nya gyirima. Bumbugsiri m butti tiŋŋa, bunkpeeŋŋu mun nin buli n‑doaai na. ⁴⁴Ba zaŋŋi duniya wa ni ningbina n‑sɔ’ara; ka ka nin neaai na hoo ningbinseaa Sii maa ŋɔn zaŋŋi nyɔvuri n‑tiri ka maa. Duniya wa ni ninsaala ningbina siri bɛ ni, ka ningbina laa m‑bɛ ni seesi Sii maa ŋɔn zaŋŋi nyɔvuri n‑tisiri maa. ⁴⁵Di sɔbi n‑dooli, ni, “Daŋŋni nira la, Adam, daa leebi la ninsaala.”, sɔ ŋɔn vu la: halli ka Adam sɔ naayi kyɛ na nti leebi siiya n‑tiri sɔkam nyɔvurimaŋni. ⁴⁶Amaa sii maa daana daa bu daŋŋi na: ay! - duniya dinni la n daa daŋŋi n‑kyɛ na ka sii maa daana la naayi pa. ⁴⁷Ba daa zaŋŋi tanni m‑maali daŋŋni ninsaala maa, amaa ŋɔn mun pa buyi la ŋɔna, u yi la arizana ni na. ⁴⁸Hoo tanni daana ŋɔn daa bɛ seem la, lala ka u duniya wa taaba gba bɛ ni; ka arizana niriba mun bɛ la hoo ba mun toondaana, arizana ni doo la. ⁴⁹Dizugu ti pun mi tanni doo wa beesigu beebu, n‑ŋmanni hoo ŋɔna ŋɔn bɛ seem; ka lala yaasa ti nin ŋmanni hoo arizana doowa nti bɛ u gba beesigu.

⁵⁰M mabiisi, n yɛtti ya wa, ni, duniya wa ningbina kur nyɛ la numni ni ziim, a ku toaai n‑nya Naawunni naam beebu; halli ka kan sa’amni ni la ku toaai n‑di faari kan bu naara. ⁵¹Ya wumma! N yɛtti ya la yɛlisɔ’ara yɛla: pa ti zaasa n nin kpi, amaa ba nin takki ti zaa. ⁵²Ba nin takki ti yoomyooma, hoo nimbiri kamsigu saha. Lala saha ka ba nin kyɛ ka kikaa ti kum n‑wulisi duniya naari saha paari na. Dama ba nin peebi, ka ban kpi la zaa nin doaai ka ku laa n‑kpi; ka tirima mun nin takki. ⁵³See ka kan sa’amni la ti deaai beesigu din bu naara, hoo ban deaari sutura n‑yeeri seem la. Ka kan kpiiri la nin deaai beesigu din bu kpiira n‑yɛa. ⁵⁴Lala saha maa ka kan sa’amna ka kpiiri la ti deaai kan bu laa n‑kpiira n‑yɛ, ka di siri nin niŋi hoo ban daa pun sɔbi n‑dooli seem la, ni#:-

“Ba vɔli kum n‑nyaŋŋi.”

⁵⁵ni#:-

“Ha! Kum, i nyaŋŋsim bɛ la yani?

Ha! Kum, i dumpu yiiko lee?”

⁵⁶Dama dumpu seaa kum ŋɔn mari n‑dumni ti la nyɛ la tumbeeri taalli; ka taalli maa yiiko bɛ la zaaligu la ni. ⁵⁷Dinŋɔna ti puusiri Naawunni barika! Dama ŋɔna n kyɛ ka ti nyaŋŋi, ti Dugma Yisa Kirisita Masiiya zugu. ⁵⁸Lala zugu, m mabiwutta, see ka ya bɛ yummu deede; yan di bɛ kpa, ka bɛ kpa. Ya zaŋŋma ya mansi zaa n‑ti ti Dugma tuma maa sahakam, dama ya mi halli, ni, ya yi tumni pam n‑tiri ti Dugma, ya bu tumni la yɔri.

¹Tɔ: zaŋŋi n‑kyaŋŋi toosigu n‑ti Naawunni niriba la yɛla: man daa wulisi Galɛseaa dima maa seem la, ya gba niŋma lala. ²Di nyɛ la: ni, bakwai piiligu dabsiri daari zaa, see ka ya sɔkam yinniyinni yiisiri beela n‑zaali m‑mara, hoo Naawunni ŋɔn lɔrigi u yɛla seem maa; lala nin kyɛ ka man yi ti kyɛ na sahanseaa la, toosigu yɛla ku laa m‑bɛ ni yaasa. ³N yi ti paai na, n nin sɔbi gbana n‑zaŋŋi a n‑ti yan yiisi seeba la, ni ya piini la m‑paasi, ka tum ba ni ba ti zi a n‑kyaŋŋi Gyɛrusalɛm. ⁴Di mun yi sum ni man gba kyaŋŋi, ba nin beeli ma ka ti kyaŋŋi.

⁵N yi dɔli Masidoonya tingbaŋŋu n‑gaari, n nin kyɛ ya saani na. Ii, n siri ya n‑dɔli Masidoonya pɔi, ⁶ka di bu ya’ai ka n niŋi dabsa ayi ya saani, bee, n nin kpalim ya saani halli ni waari saha ti naai. Lala ka ya nin nyaŋŋi n‑zaali ma soori ni, ni n ti kyaŋŋi n kyɛnni maa, di yi nyɛ Gyɛrusalɛm bee seela zaa. ⁷Dama m bu boori ni n nyɛ ya ka n nɔba n zɛ saazugu ka gaari yooma; m boori ni Naawunni yi sakki, ni, n niŋi la dabsa ayi ya saani. ⁸Amaa n nin kpalim m‑bɛ Ɛfɛsusi halli ni DaPisinu Daari Pɛntikoosi Kyuu la saha. ⁹Dama ba lɔrigi soori n‑ti ma ni n tum tunsuma pam, amaa ka niriba pam ta’ari ma di ni.

¹⁰Timɔti yi ti paai ya na, yan kyɛ ka u bɛ ya saani ka dabeem ka u, dama u tumni la ti Dugma tuma maa hoo man gba ŋɔn tumni seem la. ¹¹Ya sɔ di zeem u. Ya zaalima u soori zugu ni sufu maasim, ka u ti labi n saani na. Dama n guri la u kyɛnni na, ŋɔn ni ti mabiisi zaa.

¹²Ti mabii Apɔloosi ŋɔna - n daa susi u nimbirimoaa, ni, u kpaŋŋma u maŋŋa n‑dɔli ti mabiisi wa n‑kyɛ ya saani na; amaa u daa bu boori ni u kyɛ na pampaŋŋɔ, halli fiiŋ: ni, u yi ti nya sahasuŋŋu, u nin kyɛ na.

¹³Tɔ: ka dinŋɔna ya baŋŋma suŋŋa! Ka zɛ deede ya yɛdda ni, m‑mari sufukpeemni ka kpamsiri ya mansi. ¹⁴See ka ya niŋi bunseelli kam wurilim zugu.

¹⁵Ma mabiisi, ya pun mi Sitɛfanasi yɛla: ni, ŋɔn ni u yiri dima maa daa niŋi Yisa yɛdda n‑daŋŋi Akaaya dima zaa; ka ba zikki zaa bɛ la yɛdda dima la suŋŋsim ni. Dizugu ya kpaŋŋma ya mansi, m mabiisi, ¹⁶ni ya wumni n‑tiri lala niriba, ni ba nimmoosi tuntuntaaba zaa. ¹⁷Sitɛfanasi ŋɔn daa paai ma na, ŋɔn ni Fɔtunaatusi ni Akaayakusi, n sufu daa maai, dama ba nin zɛ ya zaazii maa ni, yan ka n saani maa zugu. ¹⁸Dama ba daa labsi n sii na, ni ya gba siisi m‑paasi. Yan di tam lala niriba yɛla.

¹⁹Ti kpa wa mabiisi m puusiri ya ni - Naawunni niriba ban la’amni m‑bɛ ni Ɛseaa tingbaŋŋu tinsi ni zaa. Akwila gba puusiri ya na, ni u pɔ’a Prisila, ni ban la’amni ba yiri maa ni n‑gyeemni Naawunni la. ²⁰Halli ti mabiisi zaa puusira. Ya puusima taaba suŋŋasuŋŋa ti wurilim puusigu ni.

²¹Ya nyam sɔppu wa - man sɔbri m‑puusiri ya n toori nuu ni sɔppu: Pɔla. ²²Sɔ yi bu wuri ti Dugma, mbusu bɛ di daama zugu. Marana ta!, ni, Kyɛm na, ti Dugma! ²³Ti Dugma Yisa piinisuma bɛ ya saani. ²⁴N wurilim bɛ ya saani, Kirisita Yisa Masiiya saani.