MEHĨ TIAKU MINÃPIN

¹ Uito Iesui ywyt sese Tiaku. Iesui ti uheyke’et sese are. Pyno meiũ uito Tiaku uimiwan atipo’oro ehowawi. Uito ti Tiaku Tupana eropat hat i’ewyte Aika’iwat Aipotypot Iesui eropat hat uito are. Koitywy atipo’oro ui’e hap torania kape Tupana mẽpyt’in aimẽpuo aimẽpuo yi wato hap ok tã tukupte’en hap kape. ² Uiwyria’in karãpe put’ok’e ahete aikotã aikotã mikyry’i hap ho’opot hap ahã’ãg hap mi’i pote waku watuwehum kahato Tupana kape. ³ Mi’i hap watunug mote po’og ihãite ahepiat imohey hap. Mi’i hawyi wahaty sepap ne’i ra’yn karãpe wẽtup ok kaipyi ra’yn ahã’ãg hap put’ok’e turan. ⁴ Waku yt watuwemig i ahã’ãg hap pupi. — Waku arakosap aru ho’opot hap sakpo wato’e yn waku yn aipy’a pe. Mi’i hap watunug mot’i pote Iesui mohey haria wo kahato watoĩne’en hãpyk sese rakat hap ete. Wahupit kuap waho’opot hap ahã’ãg hap pote ti hekat kahato rakaria ewy watoĩne’en Tupana wanẽtup hawe.

⁵ Karãpe yt watikuap i kat som waku watunug hãpyk takat ahã’ãg hap put’ok’e turan mi’i hap e’at pe waku wahẽtup kahato wuat’i kuap sese hat Tupana kape. Mi’i hawyi aikotã waku hamuat tohenoi kahato ahepe towese popuo aimu’e yt ahaty’i haty’i popuo hin i ainãpin Tupana. ⁶ Imohey kahato hap wywo yn waku wahẽtup aimowe’eg hamuat wahẽtup Tupana pe. Yt naku i wahẽtup Tupana pe imohey ran hap wywo. Ma’ato karãpe wahẽtup imohey ran hap wywo ne’i pote ahehay yt aiwesat i wyti aru imohey ran nywo ne’i wahẽtup wote. Yt naku i imohey hap kowo’i kowo’i aiwanẽtup hap mywo wahẽtup. Ma’ato mi’i hap wywo wahẽtup pote watopyhu’at aikotã y’y hyemueri piat ewy ne’i aiwanẽtup hap. Aikowo aikowo wasere wato upi hap ewywuat watoĩne’en aiwanẽtup hawe imohey hap upi. Yt naku i are. ⁷ Aikowo aikowo ne’i imohey hap aiwanẽtup hawe pote yt naku i kahato watopyhu’at katupono atimohey kahato Tupana wato’e irania’in me ma’ato yt pywo pe i katupono typy ihay rakat ewy watoĩne’en aiwanẽtup hawe. ⁸ Karãpe wahẽtup Tupana kaipyi aimiky’esat ko’i ma’ato yt watomohey kahato i hap wywo pote typy ehay rakat ewy watoĩne’en. Yt naku i wato’e Tupana pe — Woromohey En Tupana wen ma’ato yt atikuap i sio etum aru uimiẽtup sio yt wato’e pote kowo’i kowo’i watomohey typy wanẽtup haria watopyhu’at. Mi’i hap ewy wahẽtup pote aimiẽtup yt heremo hin i Tupana wanẽtup hawe. Mi’i pote yt tutum kuap i aimiẽtup Tupana tuwekaipyi.

⁹ Karãpe watomohey Iesui hawyi ho’opot kahato hap topyhu’at ahete katupono irania’in yt imohey i haria yt i’atuwese hin i ahete — Yt naku i kahato eipe i’atu’e ahepe. Mi’i hawyi ahehaky’e’i kahato hap toĩne’en ahete. Mi’i pote yt naku i aiwanẽtup hap yi kape are. Yt naku i watuwemõti imohey hap ete katupono Tupana wanẽtup hawe waku pe watoĩne’en. ¹⁰ Hekat rakaria miit’in mimõtypot ko’i tukupte’en mesuwarote i’atu’e ma’ato Tupana wanẽtup hawe imohey haria hekat rakaria ewy tukupte’en katupono yne Tupana wanuat toĩne’en imohey haria po pe. Mi’i tupono waku hekat rakaria mesuwarote aito pote waku watuwehum Tupana kape are ma’ato yt naku i watuwehum ahekat ete — Uito po’og uhekat wato’e aiwanẽtup hawe. Waku paa’e haria wo watopyhu’at ahekare’en ko’i ete katupono iku’uro irane mi’iria hekat rakaria pytkai. Mi’i hawyi aiku’uro hawyi yt kat i ahekat mesuwarote. Ta’i aheĩne’en hap mesuwarote ipohyt ko’i ewy kahato. At hakup kahato hawyi igag ipohyt hawyi iteneg na’yn hawyi iku’uro. ¹¹ Pywo ipohyt ewy kahato hekat rakaria tukupte’en. Mesup hekat kahato rakaria tukupte’en mi’i hawyi mũki’ite satek hap e’at pe hawyi ihaky’e’i kahato rakaria wo tukupte’en ipohyt teneg ewy. Karãpe Tupana ainug hekat rakano mi’i pote waku watuwehum kahato ahekat nug hat Tupana ete. I’ewyte karãpe yt ahekare’en kahato i hap put’ok’e ahete waku watuwehum kahato wy Aimowepit hat Tupana ete are katupono watikuap yt ahekat kaipyi i aimowepit sese hap tut. Waku wato’e — Ta’i ahekat mesuwarotiat ipohyt ewy waku wato’e mesup. Ikahu kahato tig wen ma’ato mũki’ite toto ra’yn. Mi’i hap ewy ahekat yt toĩne’en mot’i hin i waku wato’e ahatek hap e’at pe mesuwe.

¹² Ma’ato uwe uwe tepiat ho’opot turan te haky’e’i turan yt iwaure i imohey hap mi’i hat ti Tupana mimowaku wo toĩne’en i’ewyte Tupana mimowepit kahato wo topyhu’at wuat’i e’at pe katupono ho’opot hap sakpo gosap hat toĩne’en imohey hat. Mi’i hat pe Tupana to’e aru — Uiky’e hat sese en e. Mi’i pote woromoieĩne’en kahato wuat’i e’at pe e yt tewaure i haria pe. ¹³ Karãpe ahã’ãg hap toĩne’en ahete yt naku i nug hamuat mi’i pote yt naku i wato’e aipy’a pe — Tupana ti uhã’ãg kahato yt naku i nug hamo yt naku i wato’e katupono Tupana yt ahã’ãg kuap i sa’ag nug hamo i. I’ewyte yt wahã’ãg kuap i Tupana sa’ag nug hap ete aito. ¹⁴ Aiwanẽtup hap miky’esat sa’ag kaipyi ti tuwẽtem ahã’ãg sa’ag nug hamuat hap. Aimiky’esat sa’ag aipy’a piat aima’at hamuat topyhu’at aikotã ewamiri miat hã’ãg hap ewy. Aimiky’esat ahã’ãg kahato yt naku i nug hamuat. Wahã’ãg hawyi watopyhu’at aima’at hawe aikotã hapiri topyhu’at ewamiri pe hap ewywuat. ¹⁵ Aimiky’esat sa’ag ko’i ahepiat i’aparap hap toĩne’en. Aiwanẽtup sa’ag hap aikotã aikotã waku watunug aru aiminug sa’ag ainug yt naku i nug haria sese katupono meremo watuwat aiwanẽtup sa’ag hap ko’i upi. Watunug aimiky’esat sa’ag ko’i hawyi sa’ag nug haria wo ra’yn watopyhu’at Tupana wanẽtup hawe. Mi’i hawyi Tupana ui’apiheg hap yn topyhu’at aiwanẽtup hawe. ¹⁶ Yt naku i watuwema’at uiwyria’in are. Yt naku i watunug aimiky’esat sa’ag. Waku watoiat aimiky’esat ko’i yt naku i nug neran hap ko’i.

¹⁷ Tupana ti hẽtyhot kahato rakat ewy toĩne’en. Tupana ti at nug hat waty nug hat i’ewyte wuat’i waikiru nug hat wyti Mi’i. Tupana yne wakuap nug hat. Yt kat hin i sa’ag Tupana tunug. Yne imienoi ko’i hãpyk yn na’yn. Ewaty at yt hẽtyhot mot’i i ahowawi. Hẽtyhot rokirẽ yt ra’yn tuereto at waty waikiru ko’i wen ma’ato Tupana sese yt mi’iria tominug ko’i yt ewywuat hin i toĩne’en. Tupana ti po’og po’og aipowyro hat tominug at waty waikiru ko’i kai. Mi’i ti po’og po’og ipotpap at ka’ap wyti aipoityro hamuat. Yt kat sa’up i watum pytkai tutum yne yne ahepe tekat ko’i aimowepit hamuat ko’i. Hẽtyhot at ka’ap Tupana. ¹⁸ Tehay pywuat sese wo ainug tomẽpyt’in ko’i. Mi’i hawyi aito watopyhu’at Tupana mowepit kahato haria aikotã aimikoi pakup haat rakat aimowepit hap topyhu’at. Mi’i hap ewy aito Iesui mohey haria watopyhu’at Tupana mowepit hanuaria wo sese katupono — Po’og po’og uimiky’eria eipe torania uiminug ko’i kai e Tupana ahepe tosa’yru’in me tosaki’yt’in me.

¹⁹ Uiwyria’in waku wyti watuwewaure ka’a kahato aimu’e haria mienoi kape. Waku watuwanẽtup kahato hawyi waku aiwe’eg ahehay. Yt naku i iũte’en hap wywo. Yt naku i aipy’ahak hap wywo ne’i watiwesat aiwy are. Yt etiwaure tei’o mi’i hap nug hamuat. Uiwyria’in waku ehewaure ka’a kahato aimu’e haria ehay kape. Waku watuwanẽtup kahato. Waku aiwe’eg hap wywo ahehay yt kat i iũte’en hap wywo. Yt naku i aipy’ahak hap wywo watiwesat iũte’en. Yt etiwaure tei’o mi’i hap nug hamuat. Uiwyria’in waku ehewaure ka’a kahato aimu’e haria ehay kape. Waku watuwanẽtup — Uimu’e o uiwy e hap yn aiwanẽtup hawe waku wato’e. ²⁰ Tupana tiky’esat kahato wyti hãpyk takat yn mi’i tupono ti aiwo’opy’ahak hap kaipyi ne’i yt watunug kuap i Tupana miky’esat ewywuat ko’i. ²¹ Waku ti watoiat yne yne aiminug yt naku i hap ko’i i’ewyte yne aheko sa’ag nug hap ko’i. Mi’i hawyi ti waku watuwewaure ka’a kahato Tupana ehay kape paa’ai’e hap wywo yn katupono Tupana yn ahehakyera’at kuap tehay wo. Mi’i pote — Uimu’e kahato ro ehay nug hamo waku wato’e Tupana pe. Tupana etikoi kahato o ehay uiwanẽtup hawe waku wato’e. Yt naku i aheko sa’awy’iwuat ewywuat ahewaire waire nug hap. ²² Yt naku i ti ahewaure ka’a wo yn watuwewanẽtup Tupana ehay kape. Ahewaure pe yn Tupana ehay toĩne’en mote ti aiwema’at hap yn toĩne’en katupono ihay watunug hap kaipyi Tupana miky’esat wy. Toiky’esat kahato aheko towat ewy hap toiky’esat. Toiky’esat tehay hẽtyt rakat ewy hap aimikoi ewy hap toiky’esat. Tomiky’esat nug hepiat hap wyti toiky’esat. ²³ Y’y kape wateha’at aipã’ãu kape watuwepiok kahato aipã’ãu kape. Aikotã aipiit aikotã aipainug hap aikotã aikahu hap wateha’at aipã’ãu y’y piat kape. Ma’ato wateha’at kahu hawyi wato i ra’yn hawyi meremo watiwaure ra’yn aikotã ahowapy aikotã hap. ²⁴ Mi’i hap ewy ti Tupana ehay watikuap sa’ag hawyi wato hawyi watiwaure ra’yn watikuap sa’awy’i rokirẽ wuat pytkai. ²⁵ Ma’ato ahewaure ka’a kahato Tupana ehay kape — Atikuap teran kahato ehay wato’e Tupana pe hawyi watuwewaure ka’a kahato Tupana piat ainãpin hãpyk takat kapiat hawyi watuwemu’e kahato hawyi watikuap kahato inug hamuat hap. Watunug Tupana miky’esat ewy hawyi Tupana aimowepit kahato aiminug upi katupono watunug i’e hap ewy kahato hawyi aipoityro kahato yne aiminug ete.

²⁶ Karãpe yt wãiwato’e i ahehay sa’ag hap miit’in ete mi’i pote yt kan hamo i — Tupana mohey kahato hat uito wato’e katupono wema’at haria wo i watoĩne’en. Yt kan hamo i ahehay miit’in mu’e hap ete katupono ta’atukuap typy ihay rakaria aito hawyi ahehay Tupana ete ihay se wen ma’ato ahehay irania’in ete yt naku i katupono sehay i’ewyte sa’ag tuwẽtem aiwẽ pyi wy. ²⁷ Uwe uwe yt ity i yt i’ywot i rakat powyro hap kaipyi Ai’ywot atipy piat Tupana tikuap kahato tomohey hat sese pywo sio yt hap. Uwe uwe hiwuria powyro hap ko’i toikuap aito tomohey hat sese pywo sio yt hap e. Uwe uwe hatek takaria powyro hap ko’i toikuap tomohey hat sese pywo sio yt hap e. Karãpe irania’in ahã’ãg yt naku i nug hamo ma’ato yt watuwat i i’atu’e hap upi — Uito Iesui mohey hat pote yt atunug neran i te wato’e. Mio tã wato’e hawyi Ai’ywot atipy piat tikuap kahato aito tomohey sese haria wo ra’yn aikuap are uito Tiaku.

¹ Uiwyria’in Apotypot Koro Iesui ti wuat’i mimõtypot nuat topyhu’at. Mi’i tupono ti waku wati’atumõtypot irania’in. Yt naku i uimi’airoria yn i miit’in wati’atuky’e. Ma’ato Aika’iwat ti’atuky’e yne miit’in torania hap ewy waku wati’atuky’e yne. Yt naku i wati’airo aiwyria’in i’atuekat hap upi i’atuwepainug hap upi ne’i are. Yt naku i wati’atuky’e ai’ywania ko’i yn. ² Karãpe aiwo’omu’e hawe tut wẽtup ok miit hekat rakat wuat’i iwat toĩ tuwepainug hesokpe ikahu ipu’iãpiat imehit. I’ewyte tut wy wẽtup ok yt hekat i rakat hesokpe sa’ag wywo tut. ³ Mi’i hawyi wato’e hekat rakat pe — Uiwy kahato en. Waku era’apyk mesuwe e’amyap ikahu rakat rote ma’ato mi’i hawyi yt hekat i rakat pe — Pyno waku en itote y’am me ro ereĩne’en sio yi tote ro era’apyk wato’e hap kaipyi Ai’ywot Tupana aikuap. ⁴ Uiwyria’in yt naku i watimohit hatek takaria yt hekat i rakaria. Ma’ato watimohit miit’in yt hekat rakaria i yt uwe wat i mimõtypot ko’i yt hekat i rakaria pote meremo Tupana tikuap aiminug yt naku i hap. Tupana ti’atuky’e yne aito sio aipiit ikahu sio yt. Sio ahesokpe ikahu sio yt kat i ahesokpe toi’atuky’e torania aitoria topy’a pe. Waku Tupana ewy wati’atuky’e torania miit’in sio hekat rakat sio yt. Waku wati’atuky’e irania’in Tupana aiky’e hap ewy. Miit’in ekat ky’ewi hap ne’i wati’airo aiwyria’in mote — Uito po’og e hat ewy watoĩne’en Tupana wanẽtup hawe katupono watiky’e miit’in i’atukat ky’ewi hap wywo ne’i. Wẽtup ky’e hamo yn waku wati’atuky’e miit’in sio morekuaria sio miit emiit ko’i. ⁵ Pyno ewetum no ehewaure ka’a uhepe uimiky’e ko’i. Yt eweikuap i te apo aikotã Tupana ti’airo kahato yt hekat i rakaria Iesui mohey kahato hanuaria wo hap. Po’og toi’airo ihaky’e’i rakaria temiit no tetama pianuaria wo irania’in kai katupono sa’awy’i to’e — Uhemiit sese wyti aru tukupte’en miit emiit haria wo karãpe arepyhu’at Wuat’i Miit’in Morekuat Koro mesuwarote e Tupana miwan me sa’awy’i. Mio tã to’e hap ewy ra’yn ti mesup te toi’airo temiit’in no miit yt uwe mikuap ewywuat ko’i i yt uwe miky’e ewywuat ko’i i e. Mi’iria pe ti — Woroho’o’airo eipe miit’in porekuaria wo uimohey sese haria eiperia pote e. Woroho’onug eipe morekuat no yne mesuwat yi tote e hatek takaria pe toky’e sese haria pe. Woroho’omoesaika uimohey kahato hap wywo wuat’i nug hamo e Tupana tomohey haria pe. ⁶ Eiperia yt hekat i rakaria pote hekat rakaria eimohit reran ne’i. Yt naku i ta’atunug hekat rakaria. Ta’atu’atuky’esat wyti eiweteweru ta’atuepiat hap yn ta’atuky’esat. Mi’i hawyi yt eweha’up nug i ra’yn eiweteweru hap hawyi ti ehereto ra’yn surara’in kape ei’apiheg hamo. Yt ewenug nei’o mi’iria ewy ne’i are. ⁷ Aipotypot Iesui set mohit kahato haria wyti hekat rakaria. Yt i’atuwe’eg hin i mi’iria katupono Tupana ahet’ok Iesui set upi. Yt kat set i po’og Iesui set kai ikahu rakat ahepe. Iesui ti Aika’iwat koro ma’ato yt ta’atumõtypot hin i Aika’iwat.

⁸ Sa’awy’i Aipotypot Iesui aimu’e tehay pywuat sese wo. Mio tã e — Waku wati’atuky’e kahato irania’in aiweky’e kahato hap ewy e ahepe ainãpin hap sese. ⁹ Pyno waku watunug Aika’iwat koro ainãpin hap ewy yn waku watunug. Waku wati’atuky’e torania miit’in aiweky’e hap ewy. Ma’ato waho’oky’e miit’in hekat hap upi ikahu hap upi mi’i pote Aimu’e hat ainãpin hat ehay pun haria wo watopyhu’at. Mi’i hawyi yt nakuaria i wo watopyhu’at Tupana wanẽtup hawe. Waku wati’atuky’e torania miit’in watuweky’e kahato hap ewy e ahepe.

¹⁰ Tupana tiky’esat kahato watunug wuat’i tepiat ainãpin hap ma’ato wati’aparap wẽtup ainãpin hap mi’i hawyi yt naku i nug haria wo ra’yn watoĩne’en. Wẽtup yn aimi’aparap hawyi yt naku i watopyhu’at Tupana wanẽtup hawe katupono wẽtup ainãpin hap pe toĩne’en yne Tupana piat ainãpin hap wẽtup sehay pe — Aikotã ewei’atuky’e irania’in eiweky’e hap ewy e hap. Mi’i hap yt watunug i mote wati’aparap yne Tupana piat ainãpin hap ko’i. ¹¹ Katupono sa’awy’ite Tupana ainãpin miwan me — Yt eweipohari tei’o wẽtup ok ihary’i ete he’aito ete e. I’ewyte to’e — Yt ewei’auka tei’o miit e tomiwan nu kawiat puretig etiat. Mi’i hawyi yt watipohari i wẽtup ok ihary’i ete he’aito ete ma’ato wati’auka wẽtup ok hawyi Tupana wo’onãpin hap wati’aparap kahato katupono miit auka hano ra’yn watopyhu’at ra’yn.

¹² Ma’ato ahowawi Tupana iha’at kahato sio watunug imiky’esat ewy sio yt hap kape yn. Tupana iha’at ahowawi sio wati’atuky’e irania’in aiweky’e hap ewy. Mi’i tupono waku wati’atuky’e miit’in Iesui ewy. Waku aiwe’eg wo aiminug ko’i kai ahehay ko’i kai sio miit’in ky’e hap toĩne’en aikai Iesui miky’esat ewy sio yt Iesui miky’esat ewy i watunug hap ko’i. ¹³ Tupana piat miit’in apiheg hap e’at put’ok’e ra’yn turan mi’i hap e’at pe wyti yt kat i ra’yn Tupana kai i’atuehaky’e’i hap meimuẽ waria miit’in yt ehaky’e’i kuap i haria ete. Ma’ato irania’in wo’ohaky’e’i kuap haria kape yt kat i hin i aru i’atu’apiheg hap topyhu’at katupono Tupana tuwehum wo’ohaky’e’i kuap haria ete.

¹⁴ Pyno uiwyria’in yt naku i ti ahehay wo yn watomohey Iesui katupono yt watomoherep i ahepiat imohey hap miit’in me aiminug wakuap ko’i mi’i pote ti yt kat hamo i ahehay se — Uito atimohey kahato Tupana wato’e. Uito ti Iesui mohey hat sese ai’e hap toĩne’en aikai hawyi yt kat i aiminug wakuap ko’i miit’in ky’e hap moherep hamuat aikai mi’i pote ti yt kat i Iesui mohey hap sese toĩne’en aipy’a pe ma’ato heso rakaria wo watoĩne’en irania’in wanẽtup hawe i’ewyte Tupana wanẽtup hawe. ¹⁵ Karãpe put’ok’e ai’yat pe hatek takat Iesui mohey hat yt imi’u i rakat yt hesokpe i rakat hawyi yt kat i watum tope ma’ato wahenoi Tupana pe yn — Pyno waku mehĩ mana ahẽtup aru Tupana pe eipowyro hamuat wato’e yt kat i watum pytkai — Tupana aru epoi mehĩ mana wato’e yt kat i mi’u watum pytkai. ¹⁶ Ma’ato yt kat i watum mote yt karãpe i ta’atumohey ahehay — Uruto ti Iesui mohey kahato haria ai’e hap. Tupana eipainug wato’e yt kat i sokpe ium wywo i’atupowyro hamo hawyi yt ta’atumohey i ahehay — Uruimohey kahato Iesui ai’e hap. ¹⁷ Mi’i tã watunug pote yt watomoherep hin i i’atuepe ahepiat Iesui mohey sese hap are. Mi’i pote heso rakaria wo watoĩne’en i’atuwanẽtup hawe i’ewyte Tupana wanẽtup hawe. Uiwyria’in iku’uro rakat nem kahato rakat yt ikahu hin i toĩne’en. Yt uwe miky’esat ewy hin i toĩne’en aikotã i’okpuk nem nakat ewy watoĩne’en aitoria Iesui mohey haria yt hegyi’at i rakaria aito hawyi. ¹⁸ Mi’i hawyi te’ero’e irania’in ahepe — Ma’ato tukupte’en ni Iesui mohey haria yt kat i ta’atuminug wakuap ko’i e haria. Mi’i hawyi eheso kahato are i’atuepe katupono Iesui mohey hap sese kaipyi tuwẽtem wuat’i waku nug hamuat ko’i are. Yt pote yt kat i Iesui mohey sese hap aikai are i’atuepe. Uito ti atimoherep uhepiat Aika’iwat mohey hap miit’in ky’e hap wywo are. ¹⁹ — Uruto ti uruimohey kahato Tupana i’atu’e uhepe irania’in. Uruimohey sese Tupana wẽtup yn toĩne’en i’atu’e uhepe. Pyno waku mi’i tã watomohey i’atuepe wen ma’ato eiwe’eg wo o katupono i’ewyte ahiag timohey kahato wy wẽtup yn Tupana toĩne’en hap token’ẽ popuo. Ahiagnia timohey Tupana toĩne’en hap wen ma’ato yt Tupana miky’esat ewywuat nug hin i haria wo tukupte’en. Ahiagnia ta’atumohey sa’ag pytkai. ²⁰ Yt kan hamo i — Atomohey kahato Tupana wato’e hawyi yt kat i watunug wakuap miit’in me. Mi’i tã watunug pote — Heso kahato rakaria eipe i’atu’e irania’in ahepe te’eruwanẽtup hawe. Ahehay wo yn watomohey Iesui pote yt aiwe’eg hin i aito. ²¹ Watikuap ta’yn aikotã sa’awy’ite aha’ase’i Aparãu tunug nu kawiat heiam aikope aihũ watiwuk Tupana mowepit hamuat hap ewy. Mi’i hap tote toiporokpun tosa’yru Isaki i’auka hamo Tupana piat ipo’oro hap ewy. Mi’i hawyi mi’i tã iminug kapiat teha’at howawi Tupana hawyi — Waku kahato rakat en Aparãu e Tupana tope. Eminug kaipyi mesup atikuap sese ra’yn uimohey hat sese en e Tupana tope. ²² — Waku en Tupana katupono aha’ase’i pot timoherep tepiat Tupana mohey hap tominug wo. Imohey hap toimoherep kahato wuat’i pe tominug wo. To’okupitu kahato imohey hap iminug ko’i. I’e hap tutunug hap kaipyi Tupana tikuap tomohey hap sese aha’ase’i pot Aparãu sa’awy’i. ²³ Aikotã Tupana to’e sa’awy’i hap ewy — Uiwy kahato ti en Aparãu e. Uimohey hat sese ti en e. Hãpyk kahato rakat en uiwanẽtup hawe uiwy e Tupana tope. ²⁴ Uiwyria’in imohey hap toĩne’en ahehay pe yn mote Tupana yt aimohãpyk kuap i katupono uiminug wakuap kaipyi yn watimoherep kuap Tupana mohey hap sese toĩne’en aipy’a pe. Ma’ato yt kat i imohey hap moherep hap aikai waku nug hap ko’i mi’i pote yt toĩne’en i Iesui mohey hap sese aikai ma’ato heso rakaria wo watopyhu’at aito. ²⁵ Sa’awy’i mana Irapi timoherep kahato Tupana mohey tepiat hap katupono toi’atuporereke to’yat pe typy ok surara Isareu ywania Tupana mipo’oro ko’i sepiok e hanuaria. Mi’iria pe mana Irapi timoherep mu’ap wẽtup i’atupopy hamuat mig’i wo toimoherep i’atuehakyera’at hap katupono irania’in surara tikat mi’iria i’atu’uka hamo. Mi’i hap ewywuat mana Irapi tunug hawyi Tupana tikuap ta’yn tomohey hat ra’yn toĩne’en hap. Mi’i hawyi toiehakyera’at mekewat haryporia yt iwe’eg i rakat wuat’i ihainia’in wywuat ieĩne’en hat pytkai. ²⁶ Pywo ti rat uhekatuwyria yt kat i aipã’ãu pote yt kat hamo i aipiit katupono iku’uro ra’yn. Aheha piat toto hawyi — Iku’uro sese ra’yn i’atu’e. Mi’i hap ewy ti yt kat i miit’in powyro hap Iesui mohey hap moherep hap aikai hawyi iku’uro rakat ewy ra’yn watoĩne’en yt iwese rakat ewy i yt kat nug hat wo i ra’yn watoĩne’en. Yt watimoherep Iesui piat miit’in ky’e hap irania’in me ahegyi’at hamo pote yt kan hamo i wato’e hatek takaria pe — Uruimohey kahato Iesui wato’e ai’e hap. Pywo ti rat uimienoi are uito Tiaku.

¹ Uiwyria’in eiwe’eg wo o — Uito po’og torania kawiat wo’omu’e hat ei’e hap wywo katupono miit’in mu’e haria kape yn Tupana po’og iha’at sio ta’atumu’e hap ewy ta’atunug sio yt te’eropyhu’at sio ta’atunug ta’atuepiat miit’in nãpin hap ewy sio yt hap kape teha’at kahato Tupana. Ma’ato yt watunug i ahepiat miit’in nãpin hap mi’i pote po’og ai’apiheg hap topyhu’at aipotmu’eria kai katupono yt watunug i Tupana ainãpin hap ko’i pote mi’i pote ti — Typy ihay haria eipe e aru ahepe Tupana mekewat e’at pe karãpe Tupana timoherep yne miit’in me uwe waku uwe yt naku i hap airo hap e’at pe. Mi’i tupono waku perup’i puo wati’atumu’e miit’in are. Waku wato’e aiwanẽtup hawe — Yt hãpyk i ahenoi pote ati’aparap kahato Tupana pe waku wato’e aipy’a pe. ² Pyno torania aito i’aparap haria watoĩne’en. Ma’ato ahehay wo ahẽku wo yt wati’aparap i pote yt karãpe i sa’ag nug hano watoĩne’en katupono aipy’a piat aiwanẽtup hap moherep hap ahehay topyhu’at. Karãpe yt wati’aparap i ahehay wo pote hãpyk pe kahato watoĩne’en aheĩne’en hap tote. Ahehay hãpyk takat watunug kuap pote watuwepo’oro kuap yne aipiit wakuap nug hamo.

³ Aihũ Kawaru wẽ sakpo watikytyt saity hawyi mi’i ete watimohãpyk aikotã hewyry aimiky’esat ewy hamo. Kurin kat ete pyi watimoewyry aihũ iwato sese pytkai. ⁴ I’ewyte ahe’yara iwato kahato rakat pytkai watimohãpyk kahato y’y puo apukuita kurin kat no. Mi’i hawyi aimiky’esat ewy toto ahe’yara iwato kahato pytkai. Imohãpyk hap kurin hetu’a pe toĩne’en wen ma’ato totomoesaika kuap yne wasere wato pytkai waku ahewyry. ⁵ Mi’i hap ewy ahẽku topyhu’at kurin aipiit kai mekewat saity aihũ Kawaru wẽ sakpuat ewy mekewat imohãpyk hap kurin hetu’a piat ahe’yara etiat hap ewy. Ta’i ahẽku ti yt iwato i pytkai — Uito po’og torania kai wato’e ahẽku hit no. I’ewyte aikotã aria hit ta’at go iwato rakat rote igag nakat rote hap ewy meremo aria iwato kahato topyhu’at itote. Mi’i hap ewy ahẽku hit kaipyi iwato kahato sa’ag tuwenug. ⁶ Ahehay sa’ag ni aiwanẽtup hap ma’at kuap hat toĩne’en. Aima’at hat kahato ti rat ahẽku. Wo’oeremopusu hap tuwẽtem ahẽku pyi aiwo’oma’at’i ma’at’i hamo. Aikotã aria ahekare’en wuk hap ewy ahehay toĩne’en. Ahehay aikotã mekewat sa’ag nug hat eiam wyti aria wato yn toĩne’en. Ahehay sa’ag ahẽku kaipywiat miit’in wuk hap ewy topyhu’at. Ahehay wo miit’in ma’at hap topyhu’at katupono aheĩne’en hap moko’i moko’i hap aiwanẽtup hap pyi tuwẽtem ahẽku pyi are. Ta’i aimohun hap wyti ahehay sa’ag. ⁷ Ta’i watikuap kahato haiwot rakaria ga’apy piaria moperup’i aihũ wuat hap i’ewyte weitaria aihũ wo atimoperup’i kuap i’ewyte topyhu’at hewyry rakaria aihũ wo watunug. I’ewyte piraria watimoperup’i kuap aito. ⁸ Ma’ato mi’i pytkai ahẽku yt watimoperup i kuap i katupono ahẽku miit’in auka kuap hap topyhu’at. Ahehay wo watima’at kuap kahato miit’in. Moi haiwot rakat ewy ahẽku toĩne’en katupono mi’i wo wati’atu’uka kuap miit’in aimima’at ko’i. ⁹ Ahehay sa’ag ahẽku pyi gu’uro hy ewy toĩne’en katupono — Waku kahato en wato’e Ai’ywot Aika’iwat Tupana pe wen ma’ato miit’in me — Motoro meiũpepyi aria wato kape wato’e sa’ag ahewanĩkaptia pe miit’in me Tupana minug toiã’ãkap ko’i pe. Ahẽku wo — Waku kahato En Tupana wato’e mi’i hawyi mekewat ahẽku wo wati’atukuasa Tupana minug miit’in ko’i. Yt naku i kahato mi’i tã are. ¹⁰ Wẽtup ahehay pyi tuwẽtem Tupana mõtypot hap i’ewyte wẽtup ahehay pyi tuwẽtem miit’in mohit hap. Yt naku i ti rat mi’i tã are. Are pãi yt aiwe’eg hin i ahẽku moperup’i hap ete aito. Aiwemõti hap kahato ahehay. ¹¹ Yrasa pyi yt karãmuo i y’y tuwẽtem he rakat nop takat wẽtup ka’a pyi yn. Mi’i hap ewy yt naku i ahehay he rakat ahehay nop takat ahẽku pywiat. ¹² I’ewyte yt karãpe i Paku’a yp kaipyi hewo muse saat ne’i. I’ewyte yt karãpe i hewo Warana yp kaipyi Wasa’i saat ne’i. I’ewyte yrasa ihy nop takat yt tum kuap i aimi’u he rakat. ¹³ Mi’i hap ewy kahato yt naku i ahehay sa’ag yt Tupana Pã’ãu miky’esat ewy i ahẽku wo. Waku watunug wakuat yt kat i aiwemõtypot hap wywo. Mi’i hap ewy waku aheĩne’en hap he rakat ewy aiminug wo’owese hap wywo yt kat i — Uito po’og ai’e hap aiwanẽtup hawe. Waku yne ahehay wakuap wo watimoherep aiwe’eg hap imõtypot hamuat. ¹⁴ Karãpeĩ wato’oeha’ywywi hawyi yt kat i aiwo’owese hap aikai topyhu’at. Mi’i pote yt kan hamo i — Uito ti po’og irania’in kai wato’e ne’i. Ma’ato mi’i tã mote watuwema’at ne’i. ¹⁵ Karãpeĩ watu’uka aiwo’ope Tupana piat aimu’e hap kaipyi mi’i pote yt we’eg hin haria wo i watopyhu’at. Karãpe wato’oeha’ywywi aiwo’ope watopyhu’at irania’in yt imohey i haria ewy ne’i. Aikotã ahiag potmu’eria ewy watoĩne’en. Aikotã ta’atumiky’esat yn nug haria ewy watopyhu’at. Yt naku i kahato watu’uka aiwo’ope Tupana piat aimu’e hap kaipyi. Mi’i tã watunug mote yt karãpe i Tupana mimu’eria watopyhu’at ma’ato ahiag potmu’eria watoĩne’en. ¹⁶ Karãpe wato’oeha’ywywi aiwo’ope — Uito ti po’og eikai ai’e hap aipy’a piat kaipyi mi’i hawyi meiũran wanĩkaptia wo watopyhu’at itote hawyi aiwo’oma’at’i ma’at’i hap yt ikahu hin i rakat topyhu’at aiwo’opiat. Yt naku i are.

¹⁷ Ma’ato Ai’ywot atipy piat iwe’eg sakpo toĩne’en. Mi’i ti aimu’e kahato aipy’a pe towe’eg hap yt ahiag wat ewywuat hin i. Mio tã e ahepe — Pywuat kahato eweikupte’en no Ui’ewy e ahepe. Wo’owese haria wo ro eweikupte’en e. Wo’oky’e haria wo wo’opowyro haria wo wo’owesat kahu hanuaria ui’ewy o eweikupte’en o e ahepe. Waku wo’oky’e hap moherep hanuaria wo eweikupte’en e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikupte’en no e ahepe. Waku yt typy ehay rakaria wo eweikupte’en e. Waku to’o’ewy’ewy wuat’i miit’in ky’e haria wo eweikupte’en e ahepe aimu’e kahato hat atipy piat Ai’ywot. ¹⁸ Watikoi aikope aimikoi wakuat pote waku kahato hẽtyt hawyi ma’ato yt pote yt kat i aimi’u wakuat watipuẽti aru hat hawyi. Mi’i hap ewy kahato wo’oky’e hap watikoi hawyi aiwo’owese hap toĩne’en aru aiwo’ope hawyi aimowepit hap toĩne’en aiwo’ope. Mi’i hawyi hewo kahato aru waku hap ahete aimi’u he kahato hap ewy aimikoi he hap ewy. Uito eimu’e hat pot Tiaku are.

¹ Koitywy ahenoi teran ehepe kat kaipyi kat kaipyi aiwu’uka hamuat aiwo’oehay poepyk hamuat hap tuwemoherep hap ko’i. Pyno ahenoi ehepe — Uiat uipo pe atiky’esat ewat ekat ai’e hap sa’ag kaipyi ti watu’uka. — Uimiky’esat yn waku watunug e hap kaipyi watu’uka. Mi’i hap kaipyi yt aiwo’owese i hap toĩne’en. ² — Atiky’esat ewat uiano wato’e irania’in me ma’ato — Yt atum i i’atu’e ahepe hawyi — Pyno yt etum i pote yt uiwese i aru wato’e aipy’a pe aiwyria’in me. Mi’i hawyi wato’o’auka teran irania’in ete i’atuekat ky’ewi. Yt naku i mi’i tã are. Po’og waku wahẽtup hẽtup Ai’ywot Tupana pe aimiky’esat ko’i are. Yt kat i aimiky’esat ko’i toĩne’en aipo pe katupono yt wahẽtup Ahekat nug hat Tupana pe i pote e. ³ Mi’i hawyi aimiky’esat Tupana pe wahẽtup tuereto wen ma’ato yt tutum i aimiẽtup katupono yt tomiky’esat ewy i wahẽtup pote. Aimiky’esat ewy sa’ag ne’i wywo yn wahẽtup wote aimowepit hamuat kape yn wahẽtup pote yt tutum kuap i aimiẽtup.

⁴ Aikotã ahehary’i ete aipohari hap ewy yt ikahu hin i mi’i hap ewy kahato yt ikahu hin i typy ahetupana pote. Yt naku i typy ok miky’esat ewy watunug Tupana miky’esat wakuat i’ewyte mesuwarotiaria miky’esat ewywuat yt naku i nug haria miky’esat ewywuat pote. Yt ikahu hin i mi’i tã watoĩne’en are. Tupana ewanĩkaptia miky’esat ewy watunug mote Tupana ewanĩkaptia wo watoĩne’en. Uwe uwe mesuwarotiat yt naku i nug haria seko sa’ag wo tuwewy’inug mi’i hat Tupana ewanĩkap mo topyhu’at. ⁵ Ewe’eg wo e Tupana sa’awy’iwuat pupi — Uiwano yn woroky’esat e ahepe. Ma’ato wẽtup tupana eweimohey hawyi uheha’ywywi kahato tupanaria ete e Tupana Pã’ãu ahepe. ⁶ — Ati’atumoesaika kahato waure wuat gupte’en haria pe. Mi’iria pe atum ne’en kahato wakuap mi’iria pe ma’ato irania’in me — Uito po’og e haria ewanĩkap wo areĩne’en e Tupana ahepe. Uhegyi’at hap po’og atum paa’e haria pe e Tupana ahepe. ⁷ Tupana tiky’esat ai’e hap — Tupana atiky’esat emiit sese wo waku wato’e aiperup’i popuo e. Ui’ywot uimoesaika kahato uiminug sa’ag ko’i akit hamo waku wato’e. Tupana eti’akit o ahiag ui’okpe totiat wato’e waku. Uimoesaika Epã’ãu wo ahiag sopo hamo ehay wo — Motoro ui’yatypepyi ahiag me e hamo waku wahẽtup Tupana pe. Mi’i hawyi waku wato’e — Tupana etisopo ro ahiag uhã’ãg hat mesuwe waku wato’e. Mi’i hawyi ahiag topopy ra’yn meremo ai’yatypepyi Tupana pupi.

⁸ Pyno karãpe watiky’esat watukupte’en Tupana wywo mi’i pote waku watuwat Tupana kape aimiky’esat ẽtup hamo. Aiwanẽtup hap kaipyi aipy’a pyi ahehay hawyi tut ahowawi aimiky’esat ewy. Mi’i hawyi aikotã watuwei aipitpit potiat hap ewy ra’yn y’y pe waku mi’i hap ewy waku wato’e Tupana pe — Ui’ywot uikoho Esa’yru suu wo uimi’aparap sa’ag ko’i waku wato’e. Uipo ti iminug yt naku i hap ko’i pote uipo ipitpit hap ewy. Mi’i pote etikoho uipo yt naku i nug hap hep hamo waku wato’e. Ui’ywot atipy piat pe uiwanẽtup hap uipy’a piat typy sehay potiat uipiit yt naku i topyhu’at. Mi’i pote etikoho kahato uhepiat i’aparap hap ko’i yne waku wato’e Tupana pe. ⁹ Waku paawato’e Tupana pe aiminug sa’ag upi aikotã haty kahato hap aipy’a pe hap ewy aikotã aiwy sese iku’uro hawyi haty hap ewy waku aiwak hap aipy’a pe hawyi — Tupana sakpo’e atunug sa’ag wato’e. Yt ikahu hin i atunug eete. Mi’i tupono uimõti te kahato rat uipy’a pe waku wato’e aiwak popuo. Tupana uhepiat ema’at hap ko’i yt ikahu hin i uipy’a pe uiwanẽtup hawe. Ahaty’u kahato yt kat i hin i uiwepit hap toĩne’en. Uimõti hap yn toĩne’en uikai waku wato’e yt kat i aimikyry’i hap wywo. ¹⁰ — Ehamo Tupana aremõti kahato uipy’a pe paa’e hap wywo wato’e. Pywo pe pote Tupana mimõtypot sese ko’i watopyhu’at wuat’i e’at pe wuat’i ehamo.

¹¹ Uiwyria’in yt naku i ahehay sa’ag wẽtup ok ete irania’in ete katupono Tupana to’e miwan me — Eiwo’oky’e ro eiwo’ope e. Mi’i pytkai watimohit ne’i wẽtup ok irania’in ehamo pote — Yt naku i meiẽwat miit wato’e pote Tupana wo’onãpin hap pun hanuaria wo watoĩne’en katupono yt i’e hap ewy hin i watunug mote. Uiwyria’in yt naku i watimohit wẽtup ok ahehay yt naku i rakano. — Eti’atumõtypot ro irania’in e Tupana sa’awy’i miwan me. Karãpe wati’atusaty’i saty’i miit’in ahehay wo hawyi wati’aparap kahato Tupana piat ainãpin hap yt watimõtypot i aiwy pote. Mi’i hawyi watimohit Tupana piat ainãpin ko’i katupono ai’e hap aiwenãpin hap sa’ag yn watunug. Po’og waku watunug ainãpin hap sese Tupana iwe’eg sese rakat piat ainãpin hap. Yt naku i ewei’atumohit wẽtup ok miit e Tupana pote. ¹² Tupana yn aikuap sese sio waku aito sio yt hap katupono Tupana yn ni ikuap aiwanẽtup hap wakuap ko’i sio yt nakuap i ko’i. Mi’i tupono kat poteĩ pyno — Yt naku i en wato’e wẽtup ok miat pe yt watikuap i kahato ipy’a piat pytkai. Tupana yn ikuap wakuat sio yt hap. Mi’i yn ikuap ainug ko’i. Mi’i pote Tupana yn ahehakyera’at kuap i’ewyte Tupana yn ni ai’apiheg kuap. Mi’i pote yt naku i wato’e wẽtup ok etiat — Yt kan hamo i mekewat miit. Yt naku i kahato mi’i tã wato’e katupono yne miit’in Tupana miky’e ko’i tukupte’en. — Wuat’i miit’in torania ahekat ko’i ewy tukupte’en e Tupana ahepe. Mi’i pote yt eweimohit rei’o uhekat ko’i e Tupana yt miit’in mõtypot i haria pe.

¹³ Waku aiwe’eg wo kahato ahehay pupi — Uimiky’esat yn atunug neran e hap pupi — Pyno mũki’ite uimiky’esat ewy uiwepyi areto wẽtup tawa kape hawyi itote areĩne’en mot’i hawyi itote atunug uiko iwato’in nakat uimiky’esat ok tã hawyi uhekat kahato ra’yn areĩne’en itote ai’e hap pupi waku aiwe’eg wo. — Pywo ti rat ui’e hap ewy atunug aru uimiky’esat ok tã hawyi uiwepyi arepotpap kahato itote hawyi ati’atunug iwato kahato uhekat ko’i hawyi areĩne’en hekat kahato rakano itote uito. Ta’i uimiky’esat ewy yn aru ati’atunug e hap pupi waku aiwe’eg wo uiwyria’in. ¹⁴ Katupono yt watikuap hin i aikotã mũki’ite aipore’ihot’ok hap pytkai i aikotã aru watoĩne’en sio are. Tupana yn mi’i tã kuap hat i’ewyte yt watikuap hin i karania e’at re aheĩne’en hamuat hap ko’i. Ta’i aikotã hunete y’y he’yhig am hawyi atposake hawyi yt kat i ra’yn toĩne’en itote. Mi’i hap ewy kahato aheĩne’en hap topyhu’at mesuwarote. Ta’i aheĩne’en porap i hawyi aiku’uro ra’yn meremo hap ewy watoĩne’en mesuwat yi tote uiwyria’in. ¹⁵ Mi’i pote po’og waku wato’e aipy’a pe — Tupana atunug neran emiky’esat ewy po’og waku wato’e. Tupana etum uhepe ehesaika hap uipowyro hamuat. Mi’i pote ti aru areto motpap nug hamo po’og waku wato’e aipy’a pe. ¹⁶ Yt naku i kahato watuwemowato kahato ahehay wo — Atunug kuap yne ai’e hap ete uiwyria’in. Yt naku i wato’e — Uito po’og yne miit’in kai ai’e hap ete. Yt naku i aito watopyhu’at aiwehay pyi. Yt naku i — Uito po’og ekai e hano watopyhu’at.

¹⁷ Uimimu’eria karãpe watikuap kat som waku Tupana tiky’esat watunug hap hawyi ma’ato yt watunug i imiky’esat ewy hawyi wati’aparap kahato Tupana pe yt watunug i imiky’esat pote. Yt nakuaria i wo watopyhu’at yt kat i hin i watunug pytkai. Mi’i tã hap atiky’esat eweikuap ta’yn uiwyria’in are uito Tiaku.

¹ — Eiwe’eg wo o hekat rakaria. Eiwe’eg wo o wo’opo’oro i po’oro i te’en ne’i haria pupi e Tupana. Koitywy yt pya hin i eiwo’okak’i hamuat hap e’at e Tupana. Yt pya hin i kynkyn’ei’e hap e’at ehepiat ho’opot hap wuat’i e’at piat hamuat e katupono eiwemoekat kahato miit’in ma’at hap kaipyi e Tupana. ² Mekewat e’at pe ti aru eimisoknug ni hokpyp ne’i ra’yn topyhu’at e Tupana. Ehesokpe sok ko’i nupi’a yat no ra’yn topyhu’at yne yne aru e Tupana. ³ Ehekat ikahuria rakat ahyt aru yt kan hamo i ra’yn topyhu’at i’ytyk tutu’u yne ra’yn hawyi e. Mekewat e’at ehekat ikahu miit’in mipugha wo ra’yn topyhu’at nem ne’i pote e. Sa’awy’i imehit rakat yn ehekat ma’ato mekewat e’at pe i’ytyk kahato rakano ra’yn topyhu’at ikamhig sa’ag nakano ra’yn topyhu’at e. — Kat pote kahu yt eweimõ’ẽ i ehekat ko’i nimo te uruepe i’atu’e ti aru ehepe ewyria’in hatek takaria. Kat pote yt ehegyi’at hin i uruepe nimo i’atu’e aru ehepe ihaky’e’i rakaria. — Mi’i hawyi ehekat ko’i i’ytyk kaipyi ti aru ta’atukuap meremo ra’yn yt ehegyi’at hin i kahato hap e Tupana — Uiwano yn neran e haria pe. — Ehekat ahyt topyhu’at aru aria wato mi’u wo e Tupana. Mi’i hawyi eipe ekat wuk hap pe eweikupte’en at ka’ap ei’apiheg hamuat wuat’i e’at pe e Tupana aru hatek takaria pohari haria pe. ⁴ — Sa’awy’i eimikoi eropat haria i’atupotpap kahato eiko nug hamuat pytkai ma’ato yt kat i ewetum i’atuepe. — Pywo ti rat mũki’ite aru atum eipotpap sa’up ewei’e pytkai yt kat hin i ewetum i’atuepe. Yt ehegyi’at i hap kape ara’akasa yne ra’yn Uito e aru Tupana yt imõ’ẽ i haria pe. I’atuesy’at kahato ehemiit’in e. Yt i’atuesokpe hin i rakaria mi’iria. I’atuehaky’e’i kahato te’erepotpap at ka’ap pytkai yt kat hin i ewetum e. Sa’awy’i kak’i’atu’e kak’i’atu’e ahetiat — Tupana yt urupoi i urupo’oro haria uruka’iwaria hekat rakaria i’atu’e uhepe e. Yt ta’atumõ’ẽ hin i uruepe urupotpap hap sa’up i’atu’e irane to’okak’i popuo uhepe ihaky’e’i rakaria e Tupana. ⁵ Yt ehegyi’at hin i eipe e aru ehepe katupono eiwemowepit hap yn ewetunug eheĩne’en hap turan e. Kat ko’i kat ko’i eimiky’esat ok tã ewei’atunug atunug kahato. Ei’yat wakuat pe ienuk hap yn ewetunug. Eimi’u ikahu kahato ma’ato eiweran ewei’atumo’ok kahato. Yt kat i ewetum hesy’at sese rakaria pe e Tupana aru ihaky’e’i rakaria ma’at haria pe. Aikotã sa’awy’i eihũria ewei’atumokyt kahato awati wo i’atu’uka hamuat i’u hamuat hap ewy kahato eiperia tukupte’en ikap kahato rakaria wo e aru Tupana yt hegyi’at rakaria i pe. Ikap kahato rakaria wo koitywy eweikupte’en eihũria ewy e. Eikap ti waku kahato aria mi’u wo pote mesup ta’yn waku pe eweikupte’en kahato ma’ato uimi’apiheg wuanuaria wo e Tupana mi’iria pe yt ta’atupoi hin i ta’atupotpap nug haria hawyi. ⁶ — Sa’ag nug haria ti eipe katupono miit’in wakuat kuasa haria wo eweikupte’en are’e aru ehepe e Tupana. I’atuekat ky’ewi — Ewei’atu’uka mi’iria ewei’e yn esurara’in me wakuap yn ta’atunug pytkai e. Ewei’atu’uka yt kat i sa’ag i’atu’e i ehepiat pytkai e aru Tupana yt hegyi’at i rakaria hekat rakaria pe.

⁷ Uiwyria’in waku aiperup’i po’og po’og watoĩne’en Iesui ekatup haype miit’in aimoweuka’i pytkai. Aikotã aikopiat aimikoi wahekatup hepamo hap ewy. Sa’awy’i watikoi hawyi i’aman hap wahekatup imoẽtyt hamo. Mi’i hawyi wahekatup i i’aman tuereto hap imotag hamo. Perup’i popuo wahekatup haat hap kape imo’apuhup hamuat kape. Mi’i hap ewy waku wahekatup Iesui ut hap. ⁸ — Yt pya hin i ti Iesui ut hap waku wato’e yn aiwo’ope aiwemoesaika hamo. Yt naku i watoiat hut hap mohey hap katupono tut aru Aika’iwat. Waku wahekatup hut hap aiwemowepit hap wywo. ⁹ Uiwyria’in yt naku i wato’oehay petek petek hekatup haype katupono wo’oehay petek petek haria pe ti aru — Yt nakuaria i eipe e aru Tupana. Yt pya hin i aika’iwat ut hamuat uwe waku uwe yt naku i to’e hamo. Yt pya hin i Aika’iwat ut hap aikotã oken’ypy og me hap ewy yn ni toĩne’en meke — Areke teran e hat ewy toĩne’en.

¹⁰ Uiwyria’in yt naku i ti watiwaure aipy’a pe sa’awy’iwuat Tupana ehay moherep haria piat ho’opot hap ko’i. Ta’i nimo te ti ta’atuho’opot pot’i kahato miit’in mikyry’i ta’atuetiat imohey hap wywuat hap. Ta’i yt i’atuwẽpohep hin i ti Tupana e hap moherep hap ete miit’in ti’atusaty’i saty’i pytkai. Mi’i tupono waku watunug mi’iria ewy. ¹¹ Mi’iria sa’awy’i tokoka’at ra’yn ho’opot hap sakpo. Mi’i tupono koitywy Tupana mi’atuewaku ko’i wo tukupte’en eimi’atumõtypot no ra’yn tukupte’en. Watikuap ta’yn ti aikotã nimo aha’ase’i Io ho’opot pot’i kahato hap ma’ato yt toiwaure hin i Tupana mohey tepiat hap. Imohey mot’i hap po’og iwato ho’opot hap kai. Mi’i pote ho’opot kahato hap sakpo tokosap ase’i Io. Mi’i pote Tupana mipoitynug wo ra’yn topyhu’at. Uiwyria’in Tupana tikuap kahato ahepiat ho’opot hap. Ta’i Aika’iwat aiky’e kahato tohaty’u kahato ahepiat ho’opot hap.

¹² Ahehay pywo piat hap yn Tupana tiky’esat. Karãpe irania’in me — Atunug aru wato’e pote waku watunug ai’e hap ewy hap. Yt naku i aheso — Atunug aru ai’e hap ete. Ma’ato aheso hap ne’i pote Tupana ai’apiheg e. I’ewyte ti yt naku i Tupana set watipehik — Atunug aru e hap ete. Yt naku i wato’e — Yt atunug i aru ui’e hap ewy pote waku Tupana ui’auka wato’e. Po’og waku — Atunug aru mehĩ mana wato’e hawyi waku watunug ai’e hap ok tã po’og waku are. I’ewyte yt naku i miit’in set watipehik pywo ai’e hap moheg hamo. Ma’ato Tupana tiky’esat pywo piat yn ahehay hap — Atunug aru ai’e hap ete.

¹³ Ahatek pote watemoehamana’i hawyi waku wahẽtup Tupana kape aikawiano hamuat hap. Ma’ato toĩne’en ahehãite hap aiwepit hap yn ahete pote waku watuwehum Tupana ete aiwepy hap wywo.

¹⁴ Wẽtup ok i’ahu aipy’asetpiat pote waku mekewat i’ahu rakat ti’atukaykay tuwewawi Iesui mohey haria apykok haria ko’i ta’atuhẽtup Tupana kapiat hamo i’ahu kosap hamuat hap. Mi’i hawyi ikap takat mohag wo waku ta’atupag i’ahu rakat ete. Mi’i hawyi waku ta’atuhẽtup — Tupana etimoehãite kahato mesuwat i’ahu rakat esaika hap mywo Esa’yru Iesui mõtypot hamo waku i’atu’e itote i’ahu rakat moehãite hamuat. ¹⁵ Mi’i tã ta’atunug Iesui mohey hap mywo pote ti aru ipoĩ’ãm na’yn te’yni pyi ihãite ra’yn topyhu’at i’ahu rakat. I’ewyte iminug sa’ag kaipywiat i’ahu pote Tupana timoweityk ta’yn iminug yt naku i sa’ag hap ko’i. ¹⁶ Mi’i pote waku wahenoi aiwo’ope aiminug sa’ag ko’i i’ewyte waku wahẽtup kahato Tupana kape aiwyria’in kawiano hamuat. Wahẽtup aipy’a pyi pote aiwo’opoityro kahato hap ewy topyhu’at ahete aiwo’oky’e hap ewy aiwo’ope. Mi’i hawyi toĩne’en kahato aimoehãite kahato hap Tupana kaipywiat hap. Aipy’a hãpyk kahato Tupana wywo hawyi meremo tutum aimiẽtup niatpo kahato rakat pytkai. Meremo tutum waku miẽtup ko’i. ¹⁷ Sa’awy’i mekewat Tupana ehay moherep hat Eria ai’ewywuat miit kahato ma’ato tohẽtup kahato tepiat imohey kahato hap mywo yn — Tupana etipyhyp to i’aman mye’ym anu 6 ewaty hap atiky’esat e. Mi’i hawyi hẽtup ewy Tupana tunug itote. ¹⁸ Mi’i hawyi tohẽtup i ra’yn — Etum i ro i’aman e hawyi i’aman kahato i ra’yn hap Tupana tunug i’e hap ewy. Mi’i hawyi itote ihãite kahato i ra’yn i’atumikoi ko’i.

¹⁹ Uiwyria’in toĩ wẽtup ok wẽtup ok tuereto aipy’asetpiaria wemig Tupana po piat haria ta’atuminug sa’ag ky’ewiat haria. Waku mi’iria watekyi ahehay wo te’era’aipok Tupana ewawiat hamo. ²⁰ Uwe uwe yt nakuat i nug hat porerokosap Tupana kapiat iminug sa’ag myi mi’i hat tihep wẽtup ok miit wo’o’apiheg hap kaipyi iminug sa’ag ahyt po pyi toiporenõtem Tupana piat iehakyera’at hamo. Uiwyria’in yt eweiwaure ro mi’i tã nug hamo yt waure wo tei’o.

Uito Tiaku ti mekewat Iesui ywyt sese. Uheyke’et sese Iesui uruty Maria pote. Koitywy toran na’yn uimiwan.