EFÉSIOS

TAWA EWESU PIARIA NÃPIN HAP PAURU MIENOI

¹ Uiwyria’in tawa Ewesu piaria koitywy atipo’oro uimiwan ehowawi. Mesuwat miwan nug hat ti uito Pauru. Eipe ti Tupana sa’yru’in Tupana saki’yt’in koitywy eipe Aika’iwat Iesui mohey pot’i haria ti eipe. Sa’awy’i Tupana ui’airo hawyi uinug tosa’yru wo Aipotypot Iesui potpo’oro wo tomiky’esat ewy ui’airo. ² Pyno mio tã ahẽtup ehowawi Ai’ywot Tupana kaipyi i’ewyte Aika’iwat Iesui kaipyi — Etum o ewese hap tawa Ewesu piaria pe emohey haria pe are i’ewyte eti’atupoityro kahato mi’iria are ahẽtup Tupana pe i’ewyte Iesui pe ehowawi uiwyria’in are.

³ Ta’i Aika’iwat Iesui i’ewyte To’ywot Tupana ai’atupoityro poityro kahato ra’yn. — Waku kahato En wato’e Tupana pe i’ewyte Aika’iwat Iesui pe wato’e — Waku kahato En Tupana wato’e aito Iesui mohey haria. Ta’i atipy kaipyi put’ok’e ahete aipoityro kahato hap. Ahehakyera’at hap tutum na’yn ahepe. Wuat’i e’at piat aimoieĩne’en Tupana kapiat hap tutum ahepe towanuaria aito pote are. ⁴ Ta’i sa’awy’i mesuwat yi nug hap e’yianmete Tupana ai’airo Tosa’yru emiit no. Ta’i ahe’yianmete ai’airo temiit’in no are. Mi’i hawyi to’e — Uha’yru mohey haria wo aru mi’iria hap ati’atukuap e. Mi’i pote ti atunug aru hãpyk mi’iria ui’ewywuaria wo ra’yn e. Yt kat i sa’ag nug haria wo ati’atunug mi’iria e. Pyno yt uwe i te aito turan ai’airo Tosa’yru emiit no. Aiky’e haype yn ai’airo mesuwat yi yt kat i te hap e’at pe turan ai’airo. ⁵ Ta’i atunug aru Uha’yru mohey haria yne uha’yru’in uhaki’yt’in no e. Atum aru Uha’yru i’atuepe I’atuka’iwat no e ahetiat. Atunug aru mi’iria uimẽpyt’in no uimiky’esat ewywuat uimowepit hamuat e Tupana ahowawi sa’awy’i yt uwe i te mesuwarotiat turan. ⁶ Pyno to’iro watuwehum Tupana kape — Egyi’at hap yt uwe ewywuat hin i waku wato’e. Po’og po’og torania kai ewese hap waku wato’e. Uruky’e hap moherep hamuat etum Esa’yru uruepe. Wẽtup yn Esa’yru pytkai etum ne’en ne’i uruepe yt kat sa’up mo i etum uruepe uruto’e waku wato’e. Mi’i ti Esa’yru Emiky’e kahato etum na’yn uruepe uruehakyera’at hamuat. Waku kahato En Tupana uruto’e ewawi. ⁷ Ta’i Emipo’oro Uruporekuat no iku’uro hawyi uruminug sa’ag po pyi urutuwẽtem na’yn i’ewyte uruminug sa’ag ha’awytewuat eti’atuwaure waure ra’yn En. Waku kahato En. En ni po’og po’og torania kai hegyi’at rakat uruto’e ewawi Tupana uruto’e. Esa’yru suu ti urukyi’at ewanuat hap uruto’e. ⁸ Etum ne’en ne’i yne yne iwato kahato sakpo emiium etum yne yne. Waku kahato En uruto’e. Ewese kahato uruto yt uruwese i pytkai uruto’e. Ewe’eg hap ok tã egyi’at hap ok tã uruky’e hap uruto’e. Urutuwehum kahato ewawi Tupana katupono koitywy etunug na’yn ere’e sa’awy’iwuat hap emiky’esat ok tã uruto’e ewawi. ⁹ Sa’awy’i emiky’esat ewy ere’e ewepe — Atum aru Uha’yru pe wuat’i ywania ere. Atum ne’en ne’i aru Uha’yru wuat’i miit’in me I’atuporekuat no. Uimowepit hap ewy atum aru ere’e sa’awy’i ewepe ewanẽtup hawe yt kat i miit’in te turan. Tupana uruikuap teran kat pote uruky’e kahato hap. Mi’i tã yt uruikuap hin i te wen ma’ato uruky’e hap mi’i uruikuap ta’yn. Waku kahato En uruto’e epe Tupana.

¹⁰ Mio tã e sa’awy’i Tupana — Put’ok’e uhe’at aru hawyi atunug sese ti Uha’yru wuat’i Porekuat no e tuwepe i’ewyte yne atipy piaria Porekuat no i’ewyte yne yi totiaria Porekuat no e tuwepe. Uha’yru suu wo ati’atumowehik sok torania yi totiaria atipy piaria uhowawi e. Mi’i hawyi wẽtup piit ewy yn na’yn watopyhu’at wuat’i uiminug ko’i uikai tukupte’en e tuwepe Tupana wuat’i tominug ko’i pe tukupte’en yianmete turan. ¹¹ Yne tomiky’esat ewy Tupana sa’awy’i ai’airo ra’yn tomiky’esat ewy. Mi’i hawyi ainug tosaki’yt’in no tosa’yru’in no Aheyke’et Aikywyt Iesui ewywuat ainug wẽtup miit mẽpyt’in ko’i ewywuat ainug na’yn aito watimohey Iesui hawyi. Tomiky’esat ewy tutum aru ahepe topowat’yp yne yne. Hekat kahato rakaria wo watopyhu’at wuat’i e’at pe aikotã to’e sa’awy’iwuat hap ewy ra’yn tutum ahepe. ¹² Pyno to’iro watuwehum Tupana kape katupono aito ti irania’in e’yianmiat imohey haria irania’in e’yianmiat watunug Iesui Aiporekuat no. Waku kahato wato’e aiwo’ope mi’i hap ete ma’ato meiũran aru i’atu kahato ahaipepiaria Iesui mohey haria tukupte’en kahato Tupana mõtypot wuat’i e’at piaria. Waku kahato are.

¹³ Pyno mesup ta’yn uru’ewywuaria ra’yn Tupana ehay pywuat rakat Iesui etiat uruwẽ pyi hawyi mekewat sehay Ehehakyera’at hat moherep hap topyhu’at. Mi’i e hap etikuap hawyi Aika’iwat Iesui mohey haria sok eweikupte’en. Waku kahato are. Mi’i hawyi ti aru Tupana tum na’yn Topã’ãu ahepe to’e hap ewy tutum. Mi’i hawyi mesup — Mi’iria ti uianuaria e ehepe. Tutunug toset ehepe — Mi’iria wyti uiat e wuat’i miit’in me Tupana Pã’ãu. ¹⁴ Tupana tum na’yn Topã’ãu ahepe. Mi’i tutum mote mesup watikuap i’ewyte tutum aru ahepe kat e hap kat e hap — Atum aru uimẽpyt’in me e hap ko’i ewy. Tutum na’yn yne sa’up yne aiminug sa’ag hep hamuat Tosa’yru suu. Mi’i pote watikuap ta’yn mesup yt kat i sa’ag toipuẽti aikai. Watoĩne’en iwywo turan tuwehum ahowawi yt kat i aikai yt naku i pote yt kat i aipitpit hap. — Waku kahato En Tupana wato’e aru wuat’i e’at pe. Waku En waku En katupono uruhep ahiag po pywiat hat En uruto’e aru wuat’i e’at pe aru.

¹⁵ Ga’atpo atikuap ehetiat sehay — Koitywy tawa Ewesu piaria Aipotypot Iesui mohey kahato haria tukupte’en. Po’og imohey haria mio sa’awy’iwuat kai i’atu’e uruepe. I’ewyte Tupana emiit’in ky’e kahato haria tukupte’en mi’iria i’atu’e ehepiat pe. ¹⁶ Mio tã i’atu’e hap atikuap hawyi arehum kahato at ka’ap mesuwe — Uhetupana are waku kahato En katupono mesup tawa Ewesu piaria Esa’yru mohey kahato haria tukupte’en na’yn mesup i’ewyte wo’oky’e haria tukupte’en are at ka’ap Tupana pe. ¹⁷ — Uru’ywot koro En ni Urupotypot Iesui eTupana are. Etum no Epã’ãu po’og tawa Ewesu piaria pe ekuap po’og po’og mono are’e Tupana pe. Uwe En sese hap kuap hamuat atiky’esat. Epã’ãu kaipyi iwe’eg kahato rakaria wo tukupte’en hap atiky’esat are. Eti’atumoẽtyhot ro i’atuwanẽtup hap are. Etihep yt i’atuehapytig i hap mi’i hawyi heremo i’atuwanẽtup hawe etum Esa’yru mohey hap Tupana are. ¹⁸ Tupana are’e etum no Esa’yru mohey haria tapy’yia Ewesu piaria pe ewanẽtup hap kuap hamo hap are. Etum no i’atuepe ewanẽtup kuap hap kat hamo eti’atu’airo mi’iria emiit’in no are. Etimoherep to i’atuepe emiky’esat ko’i nug neran hap ko’i are. Etimoherep i’atuepe aikotã aru tukupte’en atipy pe esa’yru’in wo esaki’yt’in wo hap are. Etimoherep i’atuepe kat som atipy pe are. Etimoherep i’atuepe aikotã aru atipy pe emõtypot haria tukupte’en hap are. Etimoherep i’atuepe aikotã aru ewaku hap ewywuaria tukupte’en hap are. Tupana ewaku hap ekahu hap ewato hap etimoherep emiit’in me tawa Ewesu piaria pe are at ka’ap ehetiano uiwyria’in. ¹⁹ Tupana are’e etimoherep emiit’in me esaika hap kuap hap are. Esaika hap iwato kahato uruewawi Esa’yru mohey haria pe aikotã karãpe sa’awy’i etihep Esa’yru gu’uro pyi hap ewy esaika hap. Tupana etimoherep mi’i tã esaika hap Esa’yru mohey haria pe are. ²⁰ Tupana esaika hap iwato kahato uruete are aikotã sa’awy’i etihep Uruka’iwat gu’uro pyi hap ewy esaika are. Mi’i hawyi — Era’apyk o meiũpe uipo sese kai ere itote Esa’yru pe. Era’apyk to mesuwe atipy pe ere. Mi’i hawyi topyhu’at e’e hap ewy esaika sese hap ewywuat topyhu’at. Esaika kahato hap ewy etimoherep uruepe Esa’yru mohey haria pe are Tupana pe at ka’ap.

²¹ Ai’akag Iesui topyhu’at Wuat’i Akag wo. Toĩne’en ni Morekuat Koro wo are. Ai’akag wo toĩne’en ma’ato i’ewyte Wuat’i Akag wo atipy pe toĩne’en. Morekuaria Porekuat no topyhu’at Iesui are. Tu’isaria Porekuat no topyhu’at. Surara Akag Koro wo topyhu’at. Iesui set po’og Tupana mimõtypot no wuat’i miit’in set kai. Po’og po’og wuat’i kai Aika’iwat mesuwat i’ewyte wuat’i e’at pe. ²² Katupono Tupana tunug yne yne Iesui py ywyt’okpype. Aika’iwat wuat’i okpe tote toĩne’en. Mi’i hawyi i’ewyte aito imohey haria Akag Koro wo topyhu’at Iesui Tupana miky’esat ewy. ²³ Pyno yne aito Iesui mohey haria watopyhu’at Iesui wywo wẽtup piit ewy yn. Iwywo watoĩne’en wẽtup ok miit ewy. Iesui piit no watoĩne’en mesup mesuwat yi tote are. Atipy pe i’ewyte watoĩne’en irania’in imohey haria wẽtup piit ewy yn watoĩne’en aito. Imohey haria ipiit ewywuat watopyhu’at. Aikope Aikope Atipy pe mesuwat yi tote yne tote Aipotypot Iesui toĩne’en Morekuat Koro wo.

¹ Ha’awyte kahato yt uwe i eimu’e hat Iesui etiat turan yt Iesui mohey haria i eipe turan mi’i hap e’at pe yt eweikuap hin i Tupana etiat aikotã iku’uro rakaria yt tikuap hin i ahehay hap ewy mekewat e’at pe. Sa’awy’i yt eweikuap hin i Tupana ehay are. ² Mi’i hawyi mekewat e’at pe yt ewetunug hin i yne yne Tupana wãi’e hap ko’i e hap. Sa’awy’i imohey hap e’yianmete ti ewetunug miit’in minug sa’ag ko’i yne yne mekewat e’at pe. Mekewat e’at pe wẽtup eika’iwat toĩne’en mi’i ti ahiag. Mi’i heso rakat kape — Uruetupana en ewei’e ahiag me. Emiky’esat ewy atunug neran ewei’e mekewat mã’ãu sa’ag me. Uruetupana uruetupana ewei’e at ka’ap mekewat yt nakuaria i nug haria porekuat kape mekewat ahiag me. ³ Pyno sa’awy’i yne aito watopyhu’at ahiag emiit no yt nakuaria i ewy. Sa’awy’i aimiky’esat sa’ag he watipuẽti. Mekewat e’at pe aiminug aipiit miky’esat sa’ag ko’i kape yn po’og po’og ahepap wãi’e Tupana pytkai watunug sa’ag ne’i. — Mi’i tã ewetunug mote woroho’o’apiheg ne’i eipe e Tupana ahepe pytkai watunug yne yne yt imiky’esat i ko’i. ⁴ Ma’ato sa’ag watunug tuete pytkai aiky’e kahato te Tupana. Yt tuwepyk hin i katupono haty aiky’e hap tuete. ⁵ Towese hap kaipyi ahehakyera’at Tupana. Aikotã iku’uro rakat yt ihay i hap ewy yt ahehay hin i Tupana kape mekewat e’at pe. Ta’i yt ahehay kuap i. Karãpe Tupana ihay ahowawi turan mekewat e’at pe yt watiwesat kuap i kat pote iku’uro rakaria ewy watoĩne’en Tupana ewawi pote. Ma’ato mi’i pytkai aiwy’inug tuwewawi Aipotypot Iesui ehay upi. ⁶ Mi’i hawyi aimoieĩne’en Tosa’yru suu wo. Mi’i hawyi Tupana ainug Aipotypot Iesui emiit no wẽtup piit ewy watoĩne’en iwywo. Mi’i hawyi karãpe Iesui tuwẽtem gu’uro pyi mi’i hap i’ewyte watuwẽtem gu’uro pyi hap ewy wẽtup pu’i yn aito watomohey hawyi. ⁷ Mi’i hawyi Tupana to’e Tosa’yru pe — Era’apyk to mesuwe uikai atipy pe wuat’i Porekuat no e Tosa’yru pe. Mi’i tote hap ewy aito i’ewyte watoĩne’en iwywo morekuaria wo are. Mi’i hap ewy watoĩne’en iwywo katupono aito wẽtup ok miit ewy iwywo. Pyno mesup toimoherep ta’yn towese hap ahepe wuat’i e’at pe. Mi’i pote — Egyi’at kahato wato’e Tupana pe. Yt uwe i po’og ekai iwese rakat wato’e. ⁸ Ma’ato yt aiminug wakuap kaipyi hin i Tupana ahehakyera’at. Ta’i yt hin i uiwyria’in. Ahewaku hap yt put’ok’e hin i Tupana wat hewaku hap ewy are. Aiky’e hap kaipyi towese hap kaipyi tutum ahehakyera’at hap ahepe. Watimohey Iesui hawyi tutum ahepe wuat’i e’at piat aheĩne’en hap yt kat i watunug pytkai tutum. Pywo pe ti tuwekaipyi tutum watomohey Iesui hawyi are. ⁹ Pyno yt naku i wato’e — Uito ti wakuat pote Tupana uhehakyera’at yt naku i wato’e katupono i’aparap haria watoĩne’en Tupana wanẽtup hawe mi’i tupono yt watuwehakyera’at kuap i.

¹⁰ Sa’awy’i Tupana topo wo ainug. Koitywy Ha’yru mohey haria watopyhu’at wẽtup ywania ewy yn na’yn watopyhu’at. Ainug hap e’yianmete Tupana to’e — Meiũran aru atipowyro kahato uimiky’esat nug neran haria e. Wakuaria sok ewy aru atunug mi’iria e sa’awy’i tuwepe. ¹¹ Ma’ato ha’awyte eipe tawa Ewesu piaria yt kurin i eweikuap Tupana etiat katupono wẽtup ywania eipe. Sa’awy’i sese aha’ase’i pot Aparãu emiariru’in yn Tupana ywania tukupte’en mekewat e’at pe. Mekewat we’ahit sokpe tek haria mi’iria yn sa’awy’i Tupana ehay kuap haria tukupte’en. Ma’ato eipe wẽtup ywania eweikupte’en sa’awy’i yt Aparãu emiariru ko’i hin i eipe. Nimo urupusu puo uruhet’ok eipe ti yt we’ahit sokpe tek haria i uruto’e. ¹² Katupono sa’awy’ite eipe yt Tupana mohey haria ywania hin i eipe ma’ato wẽtup ywania eweikupte’en. Mi’i hap e’at pe yt kat hin i eweikuap Tupana Mipo’oro Aiporekuat etiat katupono sa’awy’i Tupana ti’airo Aparãu emiariru’in ko’i yn temiit’in no sa’awy’i. Yt ei’airo hin i sa’awy’i. — Aparãu emiariru emiariru ati’atupoityro e Tupana. Atunug esa’yru’in esaki’yt’in ui’ywania wo e. Ma’ato ehepe yt mio tã e hin i sa’awy’i. Yt kat i Tupana eipy’a pe sa’awy’i mi’i pote yt uwe i eipe — Areĩne’en aru wuat’i e’at pe e haria are. ¹³ Ma’ato mesup ti yt pya hin i ra’yn eweikupte’en Tupana kai Tupana Sa’yru wuaria eipe pote. Sa’awy’ite ti pya kahato eweikupte’en Tupana kai ma’ato mesup Iesui suu eimowo’osat kahato ra’yn Tupana ete. ¹⁴ Koran eipe yt pya hin i Tupana kai katupono Iesui tunug na’yn ni Tupana wywuat aiwo’owese wese hap. ¹⁵ Aika’iwat iku’uro aria’yp posak ete hawyi wo’owese hap tutunug ei’ywania wywuat hamo i’ewyte uru’ywania wywuat hamo. ¹⁶ Mi’i hawyi Ha’yru mohey haria wẽtup ywania ewy ra’yn watopyhu’at. Wẽtup piit ewy yn. Iesui mohey haria aito pote yt kat i po’og aiwo’opy’ahak hap yt kat i aiwu’uka hap aiwo’ope. I’ewyte yt kat i po’og Tupana wywuat hap aiwu’uka hap are. ¹⁷ Tupana tipo’oro Tosa’yru Aika’iwat no. Put’okto’e hawyi ai’atumu’e kahato hamuat. Irania’in ywania pya kahato tukupte’en Tupana kuap hap kai. Uru’ywania Iuteu ywania po’og yt pya i ma’ato torania aito wẽtup sok yn sa’awy’i watukupte’en pya kahato Tupana kai. Mi’i hap e’at pe Iesui timoherep ahepe mu’ap To’ywot kapiat hap. ¹⁸ Mekewat mu’ap ti ahera’aipok Tupana kapiat hap Aipotypot Iesui kawiat katupono tutum na’yn Topã’ãu ahepe. Mi’i hawyi uruto Iuteuria i’ewyte eipe yt Iuteuria i Tupana Pã’ãu wẽtup takat eiam aito. Mi’i pote mesup waku watuwat Tupana kape uruto Iuteuria i’ewyte eipe wẽtup ywania waku wateke Ai’ywot Tupana ehamo mesup Iesui aimowo’osat Tupana wywuat pote. ¹⁹ Sa’awy’i areto eimu’e hamuat hap e’at pe eipe yt Tupana mẽpyt’in hin i. Yt eweikuap hin i mekewat e’at pe Tupana sese yt kuap i haria eipe ma’ato mesup Tupana etawa piaria ewy ra’yn eweikupte’en. Mio Tupana sa’yru’in no saki’yt’in no ra’yn eweikupte’en. Koran Tupana yat piaria wo ra’yn eweikupte’en imẽpyt’in no eipe mesup. ²⁰ Mio Tupana yat nug hat ewy watukupte’en. Aikotã ai’yat watunug nu kawiat hawyi toĩne’en mot’i hap ewy. Mi’i hap ewy Tupana tunug to’yat mesup ma’ato miit’in kawiat. Toha’awynug to’yat nug hap hamuat ewy toĩne’en mesup. Waku yne hawyi totopag Tosa’yru mohey haria nu ewywuat to’yat iheg nakat pe hamuat are. ²¹ Ma’ato mekewat nu wato yne ai’ywyt’okpype aimoesaika hap mi’i nu ewywuat ti Aika’iwat Iesui. Mi’i hawyi watomohey Iesui hawyi ainug to’yat motag hamo. Mi’i hawyi meiũran Tupana yat ikahu rakano watopyhu’at hap ewy are. ²² Koitywy Tupana toĩne’en to’yat pe katupono Ipã’ãu toĩne’en aipy’a pe pote. Mi’i hawyi aito imohey haria yne yne aito watopyhu’at aiwo’opype wẽtup yat ikahu rakat ewywuat Tupana eiam sese aitoria yne are.

¹ Mesup ti uito Pauru wo’opyhik hawe areĩne’en katupono morekuaria yt tiky’esat i po’og miit’in mu’e uhepiat hap Iesui etiat hamo. Mi’i pote uipyhyp mesuwe wo’opyhik hawe. Yt ta’atuky’esat i irania’in ywania ikuap Iesui hap. Mi’i pote uipyhik mesuwe wen ma’ato yt uipyhik kuap i meiũwat wo’opyhik hawe katupono mesuwe ahẽtup Tupana kape eipowyro hap at ka’ap. I’ewyte arepotpap kahato miwan nug hap ete mesuwe uimipo’oro einãpin hamuat hap ete. ² Uiwanẽtup hawe Iesui mipyhyp areĩne’en toiky’esat pote are. Waku kahato Tupana hegyi’at kahato. Uipowyro kahato mesuwe wo’opyhik sa’ag hawe topotpap nug hap ete. ³ Katupono mesuwe koitywy Tupana timoherep kahato uhepe sa’awy’iwuat yt uwe mikuap i sehay toimoherep uhepe aikotã wẽtup ywania ipakup imohey haria tutunug hap. Ta’i ipakup takaria tutunug mesup wuat’i ywania kawiat. Aikotã to’ywania pakup tutunug mesup hap toimoherep mesuwe uipyhyp hawe uhepe. Waku kahato Tupana yt uwe i ipyhyp kuap are.

⁴ Mi’i ko’i atiwan mesup ehowawi yt iwato i wen uimiwan mesuwe ma’ato mesup uimiwan hit ete waku eiwemu’e kahato are at ka’ap. Mi’i hawyi eweikuap ui’ewy Tupana mienoi mig’i wuat sehay mi’i Aipotypot ywania pakup etiat. ⁵ Sa’awy’iwuaria yt uwe i ikuap mesuwat sehay mig’i wuat Tupana — Atunug aru e hap. Tupana yn ikuap. I’ewyte ihay moherep haria sa’awy’iwuaria yt ikuap i ma’ato mesup Tupana Pã’ãu timoherep ta’yn uruepe tehay moherep haria pe uruto Iesui potpo’ororia 12 ok takaria pe toimoherep tehay mig’i wuat Topã’ãu wo. ⁶ Koran Tupana Pã’ãu to’e ahepe — Sa’awy’i irania’in ywania yt uikuap hin i ma’ato mesup atipo’oro uhehay wakuat wuat’i ywania ewawi aikotã are’e sa’awy’i miwan me. Atunug aru e hap ewy mesup atunug na’yn e. Koran atunug na’yn Irania’in ywania Porekuat no ra’yn Uha’yru e. Mi’i imohey haria sok wẽtup piit ewywuat yn na’yn te’eropyhu’at aru e. Aikotã sa’awy’i atipoityro Iuteu ywania ati’atupoityro mesup yne yne ywania aikotã are’e sa’awy’i ui’e hap ewy atunug mesup e Tupana uhepe. Sa’awy’i mig’i wo sese yt uwe mikuap mo i mesuwat ui’e hap are ma’ato koitywy atimoherep mi’i ui’e hap yne miit’in me uimiwan kaipyi uhehay kaipyi e Tupana ahepe. ⁷ Uito Pauru sa’awy’i Aipotypot Iesui uinug topotpo’oro wo tehay sytpok hamo tehay moherep hamo miit’in me wuat’i ywania piat hamo uinug. Mi’i hap atunug kahato uito ma’ato yt uhesaika hap upi i katupono Ipã’ãu tum uhepe tesaika hap sehay wakuat moherep miit’in miat hamo. ⁸ Uhewaku hap yt put’ok’e hin i Aipotypot eropat hamo are. Ta’i uito ti po’og kurin kano areĩne’en po’og yi kape torania Iesui mohey haria kai areĩne’en uito ma’ato mi’i pytkai Tupana ui’airo irania’in ywania mu’e hamo tehay ikahu rakat ete uhewaku hap yt put’ok’e hin i heropat hamo pytkai are. Yt naku i uito pytkai towese kahato hap mywo ui’airo katupono yt po’og hin i uito. Koitywy atimõ’ẽ kahato irania’in ywania pe. Tupana ekare’en mõ’ẽ hat ewywuat areĩne’en uito aikotã wuat’i e’at piat hekat rakat tomõ’ẽ hap ewy areĩne’en. Aika’iwat Iesui ekat iwato kahato aikotã po’og po’og wuat’i kai toĩne’en po’og po’og Mi’i ekat mõ’ẽ hat ewy areĩne’en uito Pauru. ⁹ Sa’awy’itewuat mig’i wuat Tupana mimoherep aikotã toiky’esat yne ywania towanuat hap toimoherep mesup uiwẽ pyi. Tupana ti wuat’i wuat’i nug hat ma’ato kat hamo ainug sa’awy’i yt tohenoi i. Mi’i kape miit’in sa’awy’iwuat te’eruwanẽtup kahato ma’ato yt ta’atukuap kuap i. Ma’ato koitywy toimoherep ta’yn mi’i e hap ahepe. ¹⁰ Koitywy koran mesuwat e’at pe Ai’akag Iesui timoherep kahato towe’eg kahato hap mo ahepe i’ewyte yne atipy piaria pe. Koitywy atipy piaria Surara Akag wo toĩne’en Iesui i’ewyte Tupana etawa piaria atipy piaria tikuap ta’yn Tupana we’eg kahato hap ko’i katupono ahowawi Iesui mohey haria kape te’eraha’at kahato hawyi te’ero’e to’ope — Pywo ti Tupana iwe’eg po’og torania kai katupono yne ywania toi’atuehakyera’at kuap i’atu’e. ¹¹ Wuat’i e’yianmete Tupana tunug towe’eg hap upi yne tomiky’esat upi. Mio tã e — Ati’atuehakyera’at yne ywania yne miit’in e. Uimipo’oro I’atuporekuat nuat po wo Uha’yru minug upi ati’atuehakyera’at wuat’i ywania e Tupana sa’awy’i yt kat i te mesuwat yi turan yianmete mio tã e tuwepe mig’i wo. Mi’i hap toimoherep ta’yn uhepe mesuwe uipyhik hawe. ¹² Mi’i pote mesup yt watoken’ẽ hin i Tupana kapiat ahehay hamo. Yt kat i aiwemõti hap ahehay iwywuat hamo katupono koitywy Ha’yru upi imohey hap upi watuwat kahato Tupana kape aikotã wẽtup piit ewy yn watoĩne’en Ha’yru wywo Aheyke’et Aikywyt wywo.

¹³ Uiwyria’in tawa Ewesu piaria morekuaria uipyhik mesuwe iheg me mesup yt ta’atuky’esat i woroho’omu’e po’og hap wote. Uhaty’i haty’i kahato mesuwe. Aho’opot kahato wen ma’ato waku aho’opot eimu’e hap ete are. Pywo ti rat yt paa’ewei’e tei’o are uipyhik ne’i hap upi kat pote meiũpe areĩne’en Ai’ywot atipy piat Tupana ehamo are. ¹⁴ Mi’i tã ahẽtup mesuwe at ka’ap — Uru’ywot atipy piat arepỹ’ãtutuk ewawi mesuwe katupono wuat’i ywania ehakyera’at kuap hat En are. ¹⁵ Wuat’i ywania mesuwat yi totiat nug hat En are i’ewyte yne ywania atipy piaria nug hat En are. ¹⁶ Wuat’i wuat’i mimõtypot En are. Yt uwe i po’og ekai are. Mi’i pote ahẽtup ekawiano etum no emohey haria pe tawa Ewesu piaria pe Epã’ãu wakuat i’atumoesaika hamuat hap ahẽtup epe. Atiky’esat kahato i’atuwanẽtup hap hesaika rakat ewy emohey hap ete. ¹⁷ — Etunug no Emipo’oro Iesui kawiat e’yat sese itote. Ereĩne’en itote emohey haria py’asetpe. Atiky’esat i’atusapo yi pe iheg me aria’yp wato ga’apy piat hap ewy. Atiky’esat mi’iria iheg me wo’oky’e hawe i’ewyte eky’e hawe hap atiky’esat are. ¹⁸ Ahẽtup kahato ti ewawi Tupana. Atiky’esat kahato ti itotiaria tikuap Esa’yru piat ta’atuky’e hap are. Atiky’esat yne urutoria Esa’yru moheg haria ikuap haria. Etum no esaika hap i’atuepe kat kupitu kat kupitu Esa’yru piat i’atuky’e hap kuap hamo are katupono iwato kahato Esa’yru piat uruky’e hap i’ywop kahato hap ewy i’anam kahato hap ewy. Mi’i hap kuap hamo atiky’esat ta’atukuap ta’atuky’e hap Esa’yru piat hap atiky’esat Tupana are. ¹⁹ Yt karãpe i uruikuap yne kat kupitu kat kupitu uruky’e hap Iesui piat hap ma’ato ahẽtup kahato ewawi Tupana etimoherep emohey haria pe tawa Ewesu piaria pe aikotã aikotã Esa’yru ta’atuky’e hap ahẽtup epe are. Mi’i hap ta’atukuap hawyi te’eropyhu’at eiam sese wo ra’yn Tupana are i’ewyte ereĩne’en no i’atuwywo kahato are ahẽtup Tupana pe mỹ’ãtutuk pepyi mesuwe wo’opyhik hawe.

²⁰ Ta’i uiwyria’in Ahetupana hepap kahato aimiẽtup ium hamo po’og po’og iwato tutum kuap aimiẽtup ko’i kai are. Yt karãpe i teke aiwanẽtup hawe kat kupitu kat kupitu hegyi’at hap are. Tutum po’og po’og kuap ahepiat hẽtup kuap hamo kai katupono Ipã’ãu hesaika aikai ahepiat hẽtup hamo Tupana pe are. ²¹ — Uruetupana uruimõtypot kahato En uruto’e. Emipo’oro Uruporekuat nuat mohey haria sese uruto. Ta’i urutuwehum kahato ewawi wuat’i e’at pe aru uruto’e ewawi Tupana waku ra’yn uruto’e.

¹ — Uimimu’eria tawa Ewesu piaria mesup uito Pauru areĩne’en meiũpe wo’opyhik hawe. Wanĩkaptia uipyhyp ta’yn Aika’iwat potpap nug hap pyhyp hamo uipyhik wen ma’ato mi’i pytkai woroho’omu’e te uimiwan myi uiwyria’in. Sa’awy’i Tupana ai’airo temiit’in no tomõtypot hamo. Mi’i pote are’e ehepe — To’iro watimõtypot Ai’airo hat haty wo are. Aikotã aimẽpyt’in hãpyk takaria ewy aimowepit ta’atupotpap wakuat nug hap ete aimiky’esat nug hap ete mi’i hap ewy waku watimowepit Ai’ywot atipy piat wakuat nug hap kaipyi. ² Yt naku i wato’e aiwanẽtup hawe — Uito po’og irania’in imohey haria kai yt naku i wato’e. Pyno to’iro watoĩne’en hãpyk kahato rakaria wo. Waku watuwepotpap Aika’iwat kape aiperup’i wywo yt kat i aipy’ahak hap mywo waku are. Waku watimoherep irania’in miit’in ky’e hap yne aiminug ko’i ete are. Waku wati’atuky’e irania’in yt i’atuwese i pytkai. ³ Waku watoĩne’en yt kat i aiwu’uka hap mywo katupono Tupana Pã’ãu tiky’esat aiwo’owese kahato hap are. Mi’i pote waku watuwat Ipã’ãu upi. Waku wẽtup mẽpyt’in ko’i wẽtup piit ewy watopyhu’at Iesui wywo. ⁴ Katupono aito Aika’iwat piit aga ko’i ewywuat are. I’ewyte Aipã’ãu Tupana miium Aika’iwat Iesui wanuat e. Mi’i pote aito imohey haria wẽtup pã’ãu wẽtup piit ewywuat watopyhu’at mesuwe aito imohey haria. Aito ti wẽtup piit imohey haria aito pote aiwo’o’ewy’ewy katupono Iesui wywo watukupte’en. — Mũki’ite ti aru watoĩne’en wuat’i e’at pe e haria sok aito wato’e. ⁵ Wẽtup yn Aika’iwat. Aito aitypy’i kahato wen ma’ato wẽtup yn Aika’iwat pote wẽtup yn aimimohey wẽtup set upi yn ahet’ok hap. Mi’i pote wẽtup piit ewy yn watoĩne’en. ⁶ Wẽtup yn ni Ai’ywot Atipy piat. Mi’i ti Tupana wuat’i miit’in nug hat. Mi’i ti Ai’akag Koro wo toĩne’en e. Wẽtup yn Ahetupana. Tupana ti toĩne’en ahepuo ipotpap nug hamo. Mi’i pote aito watopyhu’at ipiit ewy miit’in sem kahato aito pytkai. ⁷ Mi’i hawyi wẽtup ok pe wẽtup ok pe tomohey haria pe toimõ’ẽ tomisepap ko’i nug hap tomiky’esat ewy. Toi’atumõ’ẽ ahepuo tomisepap nug hap ipotpap ko’i nug hamuat. Aipotypot Iesui miky’esat ewy Tupana ti’atumõ’ẽ tomisepap ko’i ahepe. ⁸ Mi’i tutunug aikotã to’e sa’awy’i morekuat Tawi miwan me e hap ewy — Meiũran ti aru Tupana Mipo’oro topyhu’at wuat’i Porekuat Koro wo e. Mi’i Miit ti’akit yne tewanĩkaptia hawyi ta’am aru atipy kape e. Mi’i tote pyi toimõ’ẽ aru tesaika hap tomisepap ko’i nug hamuat temiit’in me mesuwe e morekuat Tawi sa’awy’i tomiwan me tuwepy hawe 68.18 hawe. ⁹ Pyno ti ta’am e miwan me ma’ato ta’am hap tohenoi pote i’ewyte tohenoi tut hamuat yi ywyt’okpype topot’apyk hap i’ewyte ti tohenoi yt to’e i pytkai. ¹⁰ Mekewat ta’apyk hap tohenoi i’ewyte mekewat yi ywyt’okpypiat toto hap tohenoi morekuat Tawi miwan me. — Pyno mekewat toto po’og yi ywyt’okpype i’ewyte mesup ta’am na’yn po’og atipy kape po’og ta’am na’yn torania kai. Ywaiti hap tote ta’apyk ta’yn Morekuat no. Iesui toto ra’yn waikiru apy tote i’ewyte toĩne’en Morekuat no aipy’asetpe. ¹¹ Koitywy toimõ’ẽ kahato ahepuo tomisepap ko’i topotpap nug hamuat aikotã to’e miwan me hap ewy — Wẽtup ok pe wẽtup ok pe tomi’airoria pe tutum tesaika hap tehay moherep hamo wẽtup ywania pe wẽtup tama totiaria pe e. Wẽtup ok pe wẽtup ok pe tutum tesaika hap Tupana ehay sese moherep miit’in miat hamo e. Wẽtup ok pe wẽtup ok pe tutum tesaika hap tehay sytpok kahato hamo miit’in sem miat hamo hap tutum e. Wẽtup ok pe wẽtup ok pe ti tutum tesaika hap temiit tohũria apykok hamuat hap tutum e. Wẽtup ok pe wẽtup ok pe ti tutum tesaika hap temiit’in atupowyro hamuat hap tutum e. Wẽtup ok pe wẽtup ok pe tutum tesaika hap yne miit’in atumu’e hap kuap kahato hamuat hap tutum. ¹² Wẽtup ok pe wẽtup ok pe tutum tesaika hap tomisepap ko’i yt uwe minug kuap i nug hamuat hap tutum e. Pyno yt to’o’ewy’ewy hin i toimõ’ẽ tesaika hap tomisepap nug hamuat ko’i tominug kuap hap ewywuat nug hamuat hap ko’i are. Ta’i toimõ’ẽ kahato ahepe tomiium ko’i are. Yt to’o’ewy’ewy hin i tutum. Ewat emikuap uiat uimikuap Tupana miium ko’i aimisepap ko’i yt to’o’ewy hin i are. Tomohey haria mowe’eg hamo tutum tesaika hap ahepe topotpap nug kuap hamo tutum e. Tupana tiky’esat kahato aito tomipo’oro ko’i Tosa’yru Iesui ewywuat e. Mi’i pote aimoesaika Tosa’yru Pã’ãu wo topotpap nug hamuat. ¹³ I’ewyte Tupana tiky’esat aito Aika’iwat Iesui ewywuat aito torania iwywo wẽtup piit ewy hap toiky’esat e. ¹⁴ Yt toiky’esat i wẽtup ok wẽtup ok mienoi sa’ag upi watopyhu’at hap kat pote toiky’esat Tosa’yru mienoi upi yn watopyhu’at hap. Imohey haty wuat hap toiky’esat. I’atu kahato aimu’e iwe’eg kahato rakaria aimu’e kuap kahato haria ma’ato yt pywo pe i yt Iesui mienoi upi i haria aimu’e ma’ato ahekat ky’ewi yn aimu’e haria e. Mi’iria ehay upi watopyhu’at hawyi i’atuewamiri pe watopyhu’at hap ewy aikotã wasere owa kape wato teran ihyemyi’a wato sakpo teran ma’ato yt wato kuap i ipoity’i pote hap ewy katupono mi’iria te’eruwanẽtup at ka’ap aima’at’i ma’at’i hap ete i’atuehay wẽtup upi. Yt eweimohey tei’o mi’iria yne miit’in miat aimu’e hap are. Yt naku i watopyhu’at hirakaria ewy aimikuap ete are. Hirakaria imohey yne yne miit’in ehay sio pywo sio yt hap ta’atumohey. Waku watomohey aimu’e hat Iesui e hap ewy aimu’e pote. Waku watimoheg aimimohey Iesui aipy’a pe aiwanẽtup hawe e. Tupana wywo wẽtup piit ewy watukupte’en. Mi’i hawyi ai’ywania uru’ywania wẽtup ywania ewy yn na’yn ainug e. Koitywy Tupana ywania ra’yn aito. Sa’awy’i Iuteu ywania ei’ywania tukupte’en to’ope to’ope to’oewanĩkap mo te’eropyhu’at. Mekewat e’at pe toĩne’en eipyhyp hap ewywuat Iuteu etawa kapiat eweiwat hamo. Ma’ato mekewat eipyhyp hap Tupana kapiat hap Iesui ti’aporok yne ra’yn topy wo. ¹⁵ Iuteu eko i’ewyte wãi’i’atu’e hap ko’i yt Tupana miwan ewy i toimoweityk mi’i hawyi towano tutunug mote Iuteu ywania i’atupy’ahak kahato ehete kat pote yt i’atueko yt ewy i ra’yn aheko pote i’atuwo’onãpin hap ko’i i’atuwo’oewãi hap ko’i. Mi’i pote i’atupy’ahak — Wãi wãi’i’atu’e ma’ato yt eweiwat i wãi’i’atu’e hap upi hawyi wo’oewanĩkaptia wo eweikupte’en.

Typy ywania eweikupte’en sa’awy’i. Mi’i hawyi put’ok’e Aika’iwat Iesui hawyi toi’atukaykay yne miit’in tuwewawi yne ywania. Mi’i hawyi tutunug yne miit’in Tupana ywania wo. Koitywy ipat’ok yne ywania Iuteu ywania ei’ywania irania’in ywania tukupte’en Iesui mohey haria. Mi’i hawyi watukupte’en mesup yne yne ra’yn wẽtup piit ewy Iesui wywo wo’owese rakaria ra’yn watopyhu’at. ¹⁶ Sa’awy’i aito wu’uka yne ywania wywuat haria aito wuat’i ewanĩkaptia wo watukupte’en. Pya kahato watukupte’en Tupana kai aito torania.

Aipiit ete ipoity ahaga ko’i ma’ato wẽtup piit yn watoĩne’en aito wẽtup piit yn aito. Yt tuweran hin i ma’ato ahaga ko’i. To’osat kahato ahaga ko’i. Mi’i hawyi aipiit iheg aipiit wẽtup yn. Aipu’i aikag ko’i ahaga to’osat to’oete kahato. Karãpe watunug Ai’akag Iesui miky’esat ewy hawyi watopyhu’at aikotã haga ko’i ewy ipiit ewy. Mi’i hawyi wahewyry aikotã ihãite rakat ewy. Karãpe aito Iesui mohey haria wato’oky’e yne yne aiwo’ope mi’i hawyi wato’opowyro mi’i hawyi watopyhu’at aito Iesui piit ihãite rakat ewy. ¹⁷ Pyno woroho’omu’e teran Aika’iwat Iesui ehay ete. Ewe’eg wo o eiminug sa’ag ko’i eimiky’esat sa’awy’i eheko sa’awy’iwuat pupi are. Yt imohey i te turan wuat sa’ag nug hap ete yt aiwe’eg hin i sa’awy’iwuat aiminug sa’ag ko’i kai — Ewei’atoiat ro mi’i ko’i e Tupana pytkai. Uiwyria’in yt naku i watuwanẽtup po’og aikotã yt imohey i haria wanẽtup hap ewy ne’i katupono mi’iria yt naku i nug hap yn i’atuwanẽtup hawe. — Uito po’og po’og torania kai i’atu’e ta’atuwanẽtup hawe. Yt paa’i’atu’e hin i ta’atuminug yt naku i hawyi. Mi’i tã i’ewyte aito sa’awy’i ma’ato mesup waku watuwenãpin mi’i e hap pun hamuat e. ¹⁸ Yt karãpe i te’eruwanẽtup Iesui ewawi mi’iria. I’atuwanẽtup hap ho’owasat kahato hap ewy aikotã miit’in i’ypyryp we ho’owasat hap ewy tukupte’en. Katupono irania’in yt imohey i haria yt karãpe i Tupana mohey haria. — Mi’i pote yt karãpe i areĩne’en I’atu’ywot no e Tupana i’atuepe. Yt te’eruwanẽtup hin i uhehay kape e. I’atuewaure ka’a yt uikuap i hap e. Ta’atuky’esat kahato wẽtup mu’ap e. Yt kat i uikuap hap ta’atuky’esat e. — Yt urumu’e tei’o yt uimu’e tei’o i’atu’e yn at ka’ap uhepe e. Ta’atunug sa’ag sese sakpo yt uimiky’esat ewy i are e Tupana sa’awy’i mi’iria piat pe. ¹⁹ Karãpe ta’atunug sa’ag wemõti hap ewy mi’i hawyi yt te’eruwemõti hin i. — Yt naku i mi’i tã eweikupte’en e Tupana pytkai yt paa’i’atu’e hin i. Te’eruwepyi ta’atupiit miky’esat sa’ag hap ok tã yn ta’atunug neran yt naku i. Ta’atuewaire hap kape yn te’eruwewanẽtup ta’atupy’a pe. Yt te’eruwewãi teran hin i yne sa’ag nug hap ete. Ta’atueko sa’ag nug hap kape yn te’eruwepotpap miit’in ehamo ta’atunug. Aikotã aikotã miit’in mõti hap ewy yn ta’atunug wuat’i ehamo ma’ato yt te’eruwemõti hin i pytkai. ²⁰ Ma’ato Aipotypot Iesui — Yt eweikupte’en nei’o mi’iria ewywuat e. Waku eweikupte’en ui’ewywuat e Aimu’e Hat Koro ahepe. ²¹ Uiwyria’in pywo ti waku watoĩne’en Aika’iwat Iesui ewy are. Waku watikuap kahato ieĩne’en hap etiat i’ewyte sehay etiat aimu’e hap etiat hãpyk kahato rakat ewywuat. Waku wati’atunug yne Ai’akag minug ewywuat aikotã aimu’e Iesui hap ewy. Ma’ato yt naku i watunug mote watikuap ta’yn yt imimu’eria i aito hap watikuap. ²² Pyno waku watoiat aiwẽ piat sa’ag nug hap ete aheko yt naku i nug hap sa’ag sa’awy’iwuat. Waku yne watipugha aiminug sa’ag ko’i sa’awy’iwuat aiminug ko’i are kat pote sa’awy’i aiwanẽtup sa’ag hap yn watunug neran. Yne aimiky’esat sa’ag koi aima’at hap ewywuat topyhu’at. Ma’ato yt watoiat i aiminug sa’ag sa’awy’iwuat mi’i pote aheko ewy topyhu’at ahete. Mi’i hawyi aiwema’at hap yn topyhu’at iheg me aiwanẽtup hap hawyi heso heso rakaria wo watopyhu’at wema’at haria ewywuat wo watoĩne’en. ²³ Waku wato’e Tupana pe — Uinug o ipakup takat wo waku wato’e. Uinug o waku wanẽtup hano i’ewyte uinug o waku kapiat wanẽtup hat wo waku wato’e. Areĩne’en neran ipakup takano areĩne’en neran uiwanẽtup hawe uipy’a pe waku wato’e Tupana pe. Mi’i yn waku katupono Tupana yn aihep kuap i aheko sa’ag nug at ka’ap hap po pyi e. ²⁴ Aikotã watopag ahesokpe aipiit pe ipakup takat hawyi aikahu hap ewy ra’yn topyhu’at. Mi’i hap ewy waku watopag ahete Tupana aimokahu hap ewywuat aipainug hap ewywuat. Tupana wanẽtup hap ewy waku watopag aiwanẽtup hawe. Tupana wanẽtup hap watopag aiwanẽtup hawe hawyi ipakup takaria ewywuat sokpe pakup we ahewyry hap ewy Tupana wanẽtup hawe. Waku watuwepainug Tupana ehay wo. Waku watunug yne Tupana tunug hãpyk hap ewy. Waku yt kat hin i miit’in ma’at hap aikai. Waku hãpyk Tupana ewy wahewyry mesuwarotiaria py’asetpe. Mi’i watunug mote watopag ahesokpe pakup ewywuaria aipainug hap ewy watopyhu’at hap yt aipu’i ete i ma’ato aipy’a pe aipainug kahato hap toĩne’en hap ewy. ²⁵ Aito ti Aimimohey Iesui piit ewywuat watopyhu’at yne aito haga ewy. Pyno yt naku i aheso aiwo’ope aikotã sa’awy’i watunug hap ewy. Waku watipugha aiwo’ope aheso heso hap aikotã watipun ahesokpe hiot’e rakat ewy. Koitywy waku pywuat sehay yn aiwo’ope ahehay are. Mi’i watunug mote aipainug hap aipy’a piat aiwanẽtup hawiat ikahu kahato Tupana ehamo. ²⁶ Karãpe aipy’ahak put’ok’e wẽtup ok etiat hap yt naku i watipowyro mekewat aipy’ahak hap are. Waku aipohep mekewat aipy’ahak hap toĩne’en ahete turan. Waku meremo aipohep mekewat aipy’ahak mot’i hap ete. Waku meremo watuwemoperup’i aipy’ahak hap ete. Yt naku i watopyhu’at typy e’at aipy’ahak hap wywo. Waku waure wo watopyhu’at at min’e hap e’yianmete. ²⁷ Karãpe ahã’ãg ahiag yt naku i nug hap ete mi’i pote waku yt ahehay upi i are. ²⁸ Sa’awy’i watero’ok irania’in ekat ma’ato koitywy waku watoiat mekewat ahesokpe nem hap ewy are. Yt naku i Iesui mohey hat sero’ok’e hano topyhu’at. Waku mesup ipakup we watoĩne’en motpap nug haria wo waku watoĩne’en. Waku ahe’at hakup wywo aipotpap at. Mi’i hawyi aipotpap hap sa’up wywo waku ahekat. Yt naku i miit’in ma’at’i ma’at’i hano aipotpap are. Waku watikat ahekat iwato hawyi ahegyi’at hap wywo hatek takaria powyro hanuaria watukupte’en. Mi’i hawyi satek haria poi haria wo watopyhu’at aiko wato kaipyi. Mi’i hap watunug mote ahegyi’at hap topyhu’at ahete aipainug hap ikahu rakat ewy topyhu’at mesuwe Tupana wanẽtup hawe. ²⁹ Waku ahehay hẽ’ẽ rakat ewy are. Waku iwese kahato rakat ewy watoĩne’en. Waku irania’in mowepit ahehay kuap hanuaria watikuap are. Mi’i tã watunug mote pywo i’atu’e hamo ahehay kuap haria. Mi’i hawyi ahehay kuap haria poityro hat ewy watopyhu’at. Yt naku i watopotkuasa ahehay wo. Yt naku i watipoepyk ahehay wo are.

³⁰ Karãpeĩ sa’awy’i watopyhu’at Tupana Pã’ãu eiam mo mi’i hap e’at pe Tupana to’e ahepe — Wuat’i e’at pe aru ereĩne’en uianuat uhemiit no e ahepe. Uimiehakyera’at wuaria eipe e ahepe. Pywo yt uheso hin i ui’e hap e ahepe Tupana. Pyno uhehay moheg hamuat atum Uipã’ãu ehowawi e ahepe sa’awy’i. Mesup Uipã’ãu to’e ehepe — Woroho’onug eipe uhemiit sese nuaria e. Worokuap kahato eipe mesup e ahepe Tupana. Uheiam mo Uipã’ãu eiam mo eweikupte’en e mesup ahepe. Mi’i pote yt naku i watimo’arot ne’i Tupana Pã’ãu aiminug sa’ag wo are. ³¹ Watimo’arot kahato Tupana Pã’ãu karãpe aipy’ahak irania’in ete pote. Mi’i pote waku watoiat mekewat yt naku i haiug nakaria are. Yt naku i watuwehum haryporia kape ihainia kape ipiit ky’esat hap wywo ahewaire teran hap wywo. Mi’i watunug mote Tupana Pã’ãu aipiit pe i’arot kahato hap ewy are. Yt naku i watopotwesat ahehay pirik hap wywo ahehay sa’ag wywo. Yt naku i marak’a wo watoĩne’en. Mi’i tã watoĩne’en mote mi’i tã watunug mote Tupana Pã’ãu mo’arot hat watoĩne’en. ³² Ma’ato waku watoĩne’en iwese kahato rakaria wo. Waku aiwo’owese hap ahehay perup’i popuo. Waku meremo watiwaure aima’at hat aikotã Aika’iwat waure wo toma’at hap aiminug sa’ag kai toĩne’en hap ewy. Waku watukupte’en waure wo yne yne aima’at hap ko’i kai are. Uito ti Pauru. Woroho’onãpin kahato waku iwese kahato rakaria wo Iesui ewywuat eweikupte’en are.

¹ Pyno aito Tupana sa’yru’in haki’yt’in watopyhu’at mi’i pote waku wahã’ãg kahato Ai’ywot Tupana waku nug hap ewywuat nug hamo Ai’ywot mõtypot hamuat Ai’ywot pote. ² Aikotã Aipotypot Iesui aiky’e kahato sa’awy’i aiky’e kahato te. Aiky’e kahato hawyi aiky’e hap upi iku’uro. Tutum na’yn heĩne’en hap aikawiano hap aikotã sa’awy’iwuaria tum ta’atuhũria aria pe Tupana mowepit hamo. Mi’i hap ewy iku’uro aria’yp posak ete aiky’e kahato haype. Aiky’e sese hat Iesui pote iku’uro ai’apiheg hap u hamo. Mi’i pote aikotã aiky’e hap ewy waku watiky’e irania’in aiku’uro hap kape.

³ Pyno koitywy aito Tupana ywania sese ko’i aito mi’i pote waku iwe’eg kahato rakaria wo waku watoĩne’en are. Waku ihary’i rakaria wo watoĩne’en i’ewyte he’aito kahato rakaria wo waku watoĩne’en. Yt naku i aheĩne’en hap totiaria i’atuehay sa’ag ahete sio iwe’eg sio yt i’atu’e hap ete sio tuwanẽtup sa’ag sio yt i’atu’e hap ete. Mi’i pote waku hãpyk kahato watoĩne’en haryporia wywo ihainia wywo iwe’eg nakat ewywuat powyro hap are. Mi’i pote miit’in yt uwe i ahete i’atuehay sa’ag sio aiwe’eg sio yt i’atu’e hap ete. Waku yt naku i yt i’atu’e hin i ahepe. Yt naku i aito Iesui mohey haria yt hegyi’at i rakano watopyhu’at are. Yt naku i watiky’esat sa’ag irania’in ekat aipy’a pe aheha wo. Yt naku i watuwanẽtup at ka’ap uruwat e hap kape. Waku po’og watikat ahegyi’at hap irania’in hatek takaria powyro hap are. ⁴ Koitywy aito Iesui mohey haria mi’i pote waku watoiat yne sa’awy’iwuat ahehay sa’ag hap ko’i yt iwe’eg i rakat ewywuat. Waku watoiat yne ahehay sa’ag miit’in muat ahehay sa’ag hap ko’i miit’in wemõti hap ko’i. Waku watoiat yne sehay sa’ag. Koitywy po’og waku sehay aiwẽ pyi Tupana kapiat aiwehum hap. ⁵ Pyno uiwyria’in waku aiwe’eg wo katupono pywo ti yt uwe hin i ti aru yt nakuat i wanẽtup sa’ag haria tukupte’en aru atipy pe aikope Aipotypot Iesui toĩne’en Morekuat no hap tote are. Yt uwe i itote atipy pe uiano yn mo e haria yt hegyi’at i rakaria. Ewe’eg wo o mi’i pupi katupono yt ahegyi’at i hap yt naku i sese Tupana wanẽtup hawe aikotã irania’in tupanaria mõtypot haria yt naku i nug hap ewywuat minug mõtypot hap ewy yt ahegyi’at i hap are. Yt uwe i aru atipy pe wuat’i haryporia wywuat ieĩne’en haria wuat’i ihainia wywuat ieĩne’en haria yt uwe i itote katupono aito Aipotypot Iesui emiit. ⁶ Mi’i tupono waku aiwe’eg wo mi’i ko’i sa’ag nug hap pupi katupono i’atu kahato ahã’ãg haria i’atuehay se ahã’ãg neran yt naku i nug hamo. Yt te’eroken’ẽ hin i mi’i sa’ag nug hamo. Mi’iria aima’at kuap kahato. Waku aiwe’eg wo are. I’atu irania’in — Atunug yne Tupana wãi’e hap e haria. Aiwe’eg wo o mi’i ewywuat aheĩne’en pote katupono Tupana ipy’ahak kahato yt tomiky’esat i nug haria ete. Toi’atu’apiheg mi’iria. ⁷ Pyno yt naku i watuwat i’atuehay upi are. Yt naku i watunug sa’ag mi’iria ewy are. Yt naku i mi’iria watunug aiwy sese wo. ⁸ Pyno mi’i ko’i sa’ag nug haria ewy yne sa’awy’i aito nimo. Yt watikuap hin i Tupana mekewat e’at pe. Nimo ho’owasat i’ypyryp we rakaria ewywuaria watoĩne’en ma’ato mio Aika’iwat eropat haria watopyhu’at. Mi’i pote koitywy watoĩne’en mu’ap upi hẽtyhot puo ikohyewyry rakat ewy yt wata’at kuap i ra’yn. Waku watunug wakuat yn wuat’i ehamo Tupana ehamo. Waku watunug waku hap yn aikotã Tupana kuap haria ewy. ⁹ At ipotpap kahato aimikoi ete mi’i pote aimikoi ihãite kahato. Mi’i hawyi hewo kahato kat kat ywa. Ahe’u’i ra’yn aimi’u ra’yn at motpap hap kaipyi. Mi’i hap ewywuat kahato karãpe Tupana Pã’ãu put’ok’e ahete turan ahehãite hap toĩne’en aipã’ãu me. Mi’i hawyi pywo e haria wo wotopyhu’at waku nug haria wo watopyhu’at hãpyk nug haria wo watopyhu’at aimikoi ihãite kahato hap ewy are. ¹⁰ Pyno waku watikat kat som Aika’iwat tiky’esat hap. Mi’i hawyi waku watunug imiky’esat ewy imowepit hamuat aikotã aimikoi hewo kahato aimowepit hap ewy. ¹¹ Yt naku i nug haria hepap kahato sa’ag nug hap ete wãtym nuran aikotã aikotã hap yt naku i nug hap ete yt kat i Tupana mõtypot hap i’atuminug ete pote. Aikotã yt naku i nug haria i’ypyryp we ta’atunug sa’ag mi’i hap ewy yt naku i nug haria. Waku wãiwato’e i’atuepe — Yt Tupana miky’esat ewy hin i ewetunug wato’e i’atuepe. Yt naku i watuwat i’atuminug hap upi. Yt naku i watopyhu’at mi’iria ewy are. ¹² Mi’iria inug sa’ag kahato mig’i wo watuwemõti hap ewy. Yt are’e kuap i aiwo’ope i’atuminug sa’ag ko’i ete katupono aiwemõti hap sese topyhu’at. Yt miit ewy i ta’atunug sa’ag i’ypyryp we are. ¹³ Ma’ato meiũran yne i’atuminug sa’ag mig’i wuat tuwemoherep wuat’i ehamo. Tupana timoherep i’atuminug sa’ag ko’i wuat’i ehamo. Mi’i toimoherep hawyi watikuap ta’yn i’atuminug sa’ag ko’i. Heremo kahato toĩne’en hẽtyhot rakat hap ewy toĩne’en heremo are. ¹⁴ I’ypyryp sese pote yt kat i heremo ma’ato hẽtyhot put’ok’e hawyi heremo kahato ra’yn mi’i hap ewy miit’in minug sa’ag. Karãpe watunug sa’ag waku Tupana pe wato’e — Ati’aparap kahato ti Tupana wato’e. Mi’i pote atoiat ra’yn sa’ag waku wato’e aipy’a pe. Mi’i watunug pote Iesui aimomehit ra’yn hawyi toimoherep ahepe mu’ap hãpyk takat aiporera’aipok Tupana kapiat hap. Mi’i pote to’e wepy hawe — Erehymut ro eket hawyi erehymut ro eku’uro hap kaipyi mi’i hawyi Eipotypot Iesui eimomehit ra’yn e ahepe aiminug sa’ag ko’i aiket hap ewywuat aiku’uro hap ewy pote. ¹⁵ Waku aiwe’eg wo yt naku i nug hap pupi. Waku watikat’i kat’i kahato waku hãpyk nug hamo. Pyno waku aiwe’eg wo kahato watoĩne’en mesuwarote. Yt naku i yt aiwe’eg wo i watoĩne’en mesuwe miit’in ehamo. ¹⁶ Koitywy sa’ag nug haria sok tukupte’en mesuwe mi’i pote waku watuwepotpap po’og waku nug hap ete sa’awy’iwuat kai. Karãpe watikuap hatek takaria ete pote waku watipowyro meremo. Waku wati’atumu’e yt Iesui kuap i te haria. ¹⁷ Waku watikuap Tupana miky’esat. Watikuap hawyi waku watunug haty wo. Yt naku i watopyhu’at yt Tupana miky’esat yt kuap i te haria ewywuat yt iwe’eg i rakaria ewywuat. ¹⁸ Mi’i tupono yt naku i aimopẽ’ã mahy wo ma’ato mahy u hat meiũran topyhu’at toieĩne’en hap pun hat. Mahy kape yn tuwanẽtup hap pote yt miit ewy i aru topyhu’at. Miit’in mikyry’i wo yne yt naku i nug hano are. Waku wato’e Tupana Pã’ãu me — Uimowepit ro En aikotã mahy irania’in mowepit hap ewywuat waku uimowepiit waku wato’e Tupana Pã’ãu me. Waku po’og aito Tupana Pã’ãu eiam mo mahy eiam kai. Tupana Pã’ãu aimowepit kuap kahato ma’ato mahy yt kahato i.

¹⁹ Eiwo’omu’e ro morekuat Tawi wepy hap ko’i ete sa’awy’iwuat ko’i ete. Waku watimõtypot Tupana wepy hap wywo. Waku watuwepy Tupana Pã’ãu kaipyi aiwehum hap wywo. Waku wepy nug haria wo watukupte’en Aika’iwat mõtypot hap ko’i wywo watoĩne’en. ²⁰ Karãpe put’ok’e ahete sio waku sio yt hap waku wato’e Tupana pe — Waku kahato En Tupana. Arehum kahato ewawi Emipo’oro ete emiium ete katupono Esa’yru Iesui mohey hat uito waku wato’e.

²¹ Pyno Aipotypot mõtypot haria aito pote i’ewyte waku wato’omõtypot katupono hemiit’in aito pote are. Pyno mana’in etimõtypot ro e’aito. Etunug no imiky’esat ewy are. ²² Mi’i tã etunug hawyi Tupana mõtypot hat ereĩne’en. ²³ Katupono e’aito topyhu’at e’akag wo Tupana wanẽtup hawe aikotã aikotã aipotypot Iesui Ai’akag wo topyhu’at hap ewy. ²⁴ Mi’i hap ewy waku mana’in waku eweipyhu’at e’aito eropat hano wo imiky’esat nug hamuat aikotã watopyhu’at Iesui eropat haria ewy. Ai’akag sese Iesui. Imohey haria torania Akag wo topyhu’at wuat’i e’at pe. Imohey haria torania ipiit no topyhu’at mi’i hawyi Ai’akag wanẽtup hap watunug ipiit aito pote. ²⁵ Mehĩ’in etiky’e kahato ehary’i aikotã sa’awy’i Ai’akag Iesui ti’atuky’e kahato aito temiit’in tomohey haria hap ewy. Etiky’e kahato ehary’i aikotã Iesui tum ahepe toieĩne’en hap ahehakyera’at hamuat mi’i tã aiky’e. Mi’i tã waku etiky’e ehary’i eku’uro hap kape Iesui ewy. ²⁶ Mi’i hawyi tomohey haria yne tutum To’ywot po pe — Ewano mesup e tope. Ati’atumu’e ra’yn mi’iria ehay nug hamo e. Mi’i pote wei haria ewy tukupte’en yt i’atupitpit hin i e. ²⁷ Mi’i pote aito imohey haria yne watopyhu’at ihary’i ewywuat ma’ato aikyi’at e’yianmete ainug ikahu kahato rakat ewy iwe’eg kahato rakat ewy. Yt karãpe i i’aparap hat ewy ainug tehay wo. Ihay y’y ewywuat aikoho hap ma’ato ihay ainug ihãite kahato rakat ewywuat ipe ikahu rakat ewy ipiit kahu rakat ewywuat tehary’i ewy ainug. Aipiit yt ipitpit hin i hap ewy ainug imohey haria yt kat i sa’ag ahete aiwei tehay wo hawyi. ²⁸ Uhyt’i’in mehĩ’in etiky’e ro ehary’i eweky’e hap ewy katupono uwe uwe tiky’e tehary’i tuweky’e i’ewyte uwe uwe tipowyro tehary’i tuwepowyro are. ²⁹ Aito ahesy’at hawyi watuwepoi i’ewyte haty aipiit ete hawyi meremo watikat mohag haty monik hamo. Mi’i hap ewy waku etiky’e ehary’i ereky’e hap ewy. Yt naku i aipiit ete aipy’ahak. Yt naku i mi’i tã watunug aiwete. Watipowyro kahato aipiit. Pywo ti mi’i hap ewy Ai’akag Iesui ti’atuky’e tomohey haria. Waku etiky’e ehary’i Iesui ky’e hap ok tã. ³⁰ Pyno aito imohey haria torania. Aika’iwat Iesui piit aga ko’i ewy watopyhu’at. ³¹ Sa’awy’i Tupana to’e miwan me — Waku etiky’e ehary’i po’og torania miit’in kai mi’i pote waku etoiat e’ywot ety hawyi waku ehary’i wywo kahato ereĩne’en wẽtup piit ewy yn na’yn e Tupana sa’awy’i miwan me. ³² Pyno mio tã to’e Tupana miwan me — Karãpe ihainia ihary’i to’okyi’at hap hawyi topyhu’at wẽtup piit kawiat yn na’yn topyhu’at typy ok miit pytkai e. Niatpo hap tohenoi mesuwe ma’ato watomohey Iesui hawyi aito yne watopyhu’at Iesui ehary’i ewywuat. Mi’i iã’ãkap tohenoi ihay sa’awy’iwuat pe. ³³ Ihainia’in etiky’e kahato o ehary’i aikotã eweky’e hap ewy e. Mana’in etimõtypot kahato o e’aito e Tupana ahepe are.

¹ Hirakaria kurum’in ko’i pĩ’ã’in ko’i Iesui mohey haria eipe pote ewetunug no e’ywot ety e hap ewy. Etunug e’ywot ety piat epo’oro hap pote waku rakaria wo hãpyk takaria wo ereĩne’en wuat’i wanẽtup hawe. ² Katupono mio tã e Tupana sa’awy’i sa’yru’in me saki’yt’in me — Etimõtypot ro e’ywot ety pote woropoityro aru eipe e. Pywo etimõtypot e’ywot ety pote ti aru ereĩne’en mot’i mesuwat yi tote e i’ewyte eweikupte’en waku pe kahato mesuwe at ka’ap e Tupana sa’awy’i ahepe. ³ Pyno waku watimõtypot aity ai’ywot i’e hap ewy katupono Tupana piat ainãpin hap wẽtup yn watunug hawyi Tupana to’e — Koitywy ereĩne’en waku pe mot’i aru e. ⁴ Ai’ywot’in ko’i eiwe’eg wo o emẽpyt’in nãpin hap ete. Waku eti’atu’apiheg wen ma’ato i’atuky’e hap wywo yn o waku eti’atu’apiheg. Yt ewei’atumopy’ahak tei’o ma’ato eti’atunãpin Aipotypot Iesui piat ainãpin hap ewy are.

⁵ Uiwyria’in miit emiit eweiwat ro eika’iwat mesuwarotiat ehay upi eiperup’i popuo imõtypot popuo yt kat i eheso hap popuo. Waku watuwehum howawi aipy’a pyi. Waku wateropat kahato aika’iwat mesuwarotiat aikotã Aika’iwat Iesui eropat hap ewy. ⁶ Waku wateropat kahato haipe kai aikotã heĩne’en turanuat ewy. Waku imowepit hap wywo wateropat. Karãpe wateropat aika’iwat mesuwarotiat waku wato’e aipy’a pyi — Tupana woromõtypot teran mesuwat uipotpap ete katupono areĩne’en Esa’yru eropat hat waku wato’e Tupana pe ahekaraiwa mesuwarotiat potpap nug hap turan. ⁷ Waku aika’iwat mesuwarotiat wateropat aiwepit hap popuo. Waku haty wo watunug imiky’esat ewy. Waku aika’iwat mesuwarotiat potpap ete watimowepit Aika’iwat atipy piat. Yt naku i aika’iwat mesuwarotiat mowepit hap kape yn watuwanẽtup hap. Waku Aika’iwat atipy piat mowepit hap wy aiwanẽtup hawe wateropat aika’iwat mesuwarotiat turan. ⁸ Waku aiwatetup hap aipotpap sa’up ium hap sese toĩne’en atipy pe hap kape. Yt naku i mesuwarotiat kape yn aheha katupono meiũran ti aru Tupana tum aipotpap wakuat sa’up ahepe. Tutum aru wuat’i miit’in me sio miit’in akag sio miit emiit Tupana tum wakuat sa’up watunug yne imõtypot hap wywo pote.

⁹ Mehĩ’in mana’in eweikupte’en miit akag wuat mesuwarote pote waku eti’atupowyro kahato o emiit’in emipo’ororia ko’i. Yt ewei’e tei’o ehemiit’in me — Yt ewetunug i uimiky’esat ewy pote woroho’o’apiheg yt ewei’e i katupono emiit’in Ka’iwat sese toĩne’en atipy pe. Yt eti’atumohit emiit’in mesuwe katupono meiũran ti aru Ai’akag sese timoherep wuat’i pe aiminug wakuat ko’i sio aiminug sa’ag ko’i. Mekewat e’at pe heremo yne aiminug ko’i sio miit eropat hat watoĩne’en sio miit akag wo watoĩne’en are.

¹⁰ Pyno Uito Pauru. Waku ra’yn uimiwan. Ahenoi hit hawyi toran na’yn are. Pywo uiwyria’in Aika’iwat Iesui aimoesaika kahato hat toĩne’en. Mi’i pote — Urumoesaika ro emohey hap ete waku wato’e Iesui pe. Waku watopyhu’at wẽtup miit ewy aiwanẽtup hawe Mehĩ waku wato’e Iesui pe. Uinug o hesaika kahato rakat waku nug hap ete waku wato’e Aipotypot pe. ¹¹ Iesui mohey haria aito pote watoĩne’en surara’in ewywuat ahiag akit hanuaria. Waku watopag aipiit pe surara esokpe ewywuat Tupana miium. Waku watat yne Tupana miium wu’uka hamuat. Mi’i hawyi put’ok’e ahewanĩkap ahiag hawyi aima’at hamo hawyi waku watu’uka mekewat ahiag mupiat Tupana miium ahiag akit hamuat hap wywo. Yt naku i ahesaika hap wywo aipiit esaika hap wywo watu’uka ahiag wywo katupono po’og po’og hesaika aikai. Katupono aito yt watu’uka i miit’in wywo ma’ato ahiag wywo watu’uka. ¹² Katupono ahiag ahewanĩkap sese topyhu’at. Ahiag esurara’in wywo watu’uka mã’ãu sa’ag kawiat. Ahiag emiit ko’i atipy piaria ewywuat Ahiagnia tukupte’en mesuwat yi tote miit’in yt naku i nug haria akag wo. Yt heremo i mã’ãu sa’ag wen ma’ato hesaika kahato miit’in powyro yt naku i nug hamo. Yt naku i nug haria akag wo tukupte’en mi’iria. ¹³ Mekewat atipy kaipywiaria ahewanĩkaptia kahato mi’iria i’ewyte yne imohey haria ewanĩkaptia ahiagnia. Mi’i pote waku watuwat Tupana miium ko’i wywo aipiit piat ahiag sopo hamuat mã’ãu sa’ag ko’i sopo hamo. Waku watopag koran Tupana miium ko’i wu’uka hap ekare’en hawyi waku watopag yianmete yne aipiit pe Tupana miium mekewat surara’in wat ewywuat. Mi’i wywo yn watu’uka kuap ahiag wywo aimoma teran hap e’at turan. Mekewat e’at pe tu’uka tu’uka kahato ahete at ka’ap. Ma’ato mi’i pytkai yt ai’akit kuap i katupono Tupana miium ahiag sopo hap po’og hesaika. Mi’i pote watopyhu’at ahiag okpe tote. ¹⁴ Pyno waku watoĩne’en surara’in ewywuat ahewanĩkap ekatup hamo. Waku aipiit ete ai’auka hap pupiat sokpe surara’in wat ewywuat. Waku wahẽtup Tupana kape ahesokpe ahiag akit hamuat. Waku sa’awy’i watopag aiwanẽtup hawe pywuat sehay yn Tupana ehay aikotã surara’in topag iwe’ok kytyt hap iheg nakat ewywuat. Mi’i hamo ahiag pory’a ewywuat yt teke kuap i aipy’a pe. Mi’i wo watisopo kuap ahiag miat ai’auka hap ko’i pupi. Waku wahẽtup Tupana pe — Uinug no hãpyk kahato rakano waku wato’e aikotã surara’in topag sokpe iheg nakat sumu wato pupiat ewy. Mi’i hap ewy waku watopag Tupana miium aimohãpyk hamuat. ¹⁵ Topy ete surara’in topag iheg nakat surara’in py sokpe. Mi’i wywo te’eruweput kuap kahato tu’uka hamo. Mi’i hap ewy waku watopag aipy sokpe ewywuat Tupana miium tehay ereto wuat’i miit’in kapiat hamuat hap mekewat sehay wakuat wo’owese hap Tupana wywuat hap ete. ¹⁶ Surara’in topag ta’atupo ete iheg nakat mory’a aria kawiat pupiat. Mory’a pupiat surara’in topag to’o’og me hap ewy. Mi’i ewy Tupana miium ahepiat tomohey hamuat waku aipo pe yne e’at pe ahiag pory’a sem sopo hamo. Waku watomohey at ka’ap aiku’uro hap kape. Mekewat sa’ag nug hat ahiag ahewanĩkap kahato. Mi’i ai’awa’awa surara ewy ihay sa’ag mory’a ewy ai’awa’awa surara pory’a wuat hap ewy ma’ato yt put’ok’e i ahete katupono surara’in ewy ahe’og iheg nakat aipo pe Iesui mohey pote yt put’ok’i’atu’e i ahete. ¹⁷ Surara’in topag i’atu’akag ete surara’in akag wepainug hap iheg nakat. Mi’i ewywuat Tupana tum neran ahepe. Mi’i ti aheĩne’en wuat’i e’at pianuat tutum. Surara’in po sese kai toĩne’en kyse wu’uka hap iwato’in nakat typy kai hãi hyk kahato rakat. Mi’i hap ewy Tupana Pã’ãu tum ahepe Tupana ehay ahiag wywuat wu’uka hamo ahiag atek tek hamo. ¹⁸ Karãpe watu’uka ahiag wywo waku wato’e meremo — Tupana uipowyro ahiag akit hamo yne e’at pe wakuat nug hamo waku wato’e. Aikope aikope areĩne’en waku uhewyry Tupana Pã’ãu upi waku wato’e Tupana pe. Etipowyro o emiit’in ewe’eg wo o ahiag mupi waku wato’e. Yt urutuwat reran i ahiag ehay upi. I’ewyte irania’in Iesui mohey haria upi waku uruhẽtup wy. Yt uruiky’esat i ahiag ehay upi urutuwat hap. Yt karãpe i uru’atoiat emohey hap waku wato’e Tupana pe.

¹⁹ Uito ti Pauru atiky’esat ewehẽtup o Tupana pe uipowyro hamuat. Karãpe ewehẽtup irania’in powyro hamo yt uiwaure tei’o eipe. — Etunug o Pauru ewẽ wo ehay moherep hamo wuat’i miit’in me ewei’e ro uikawiano. Karãpe toimoherep ehay wakuat turan etum o tope iwe’eg kahato hap i’ewyte ikuap kahato hamuat hap ewat ewywuat hap ewei’e o. — Ehay pywuat yt uwe i mikuap sa’awy’i miwan miat hamo etimoesaika Pauru Iesui etiat moherep hamo ewei’e yt kat i miit’in ken’ẽ hap wywo waku ewei’e Tupana pe uipowyro hamo.

²⁰ Mesuwarote morekuaria koro ko’i tipo’oro kahato ta’atuemiit’in irania’in etawa kape ta’atuehay moherep hamuat. Ta’atuehay ereto hamo ta’atupo’oro wẽtup ok ta’atuemiit po’og ta’atumimohey. Mi’i hap ewy kahato uito Pauru. Mi’i hap ewy kahato areĩne’en. Uiporekuat Tupana mipo’oro areĩne’en tehay moherep hamuat irania’in ywania kape. Mi’i ehay moherep hamo ui’airo. Ma’ato mi’i pytkai koitywy areĩne’en wo’opyhik hawe. Mesup yt uhewyry kuap i Tupana ehay sytpok hamo. Pyno waku ewehẽtup o Tupana pe mesuwat wo’opyhik hawiat uipowyro hamo are. Ewehẽtup o yt kat i uiwemõti hap Tupana ehay moherep hamuat mesuwe katupono atiky’esat surara’in sem mu’e hano areĩne’en mesup are.

²¹ Pyno Aika’iwat emiit sese Tikiku e hap het rakat atipo’oro ehowawi. Uhehay wywo atipo’oro aikotã aikotã areĩne’en mesuwe hap enoi hamo. Tikiku waku kahato atipuẽti. Mi’i ti Tupana ehay yt i’atoiat hin i aheywyt sese aikywyt miit sese mi’i. ²² Mi’i pote atipo’oro Tikiku ehowawi katupono atiky’esat tohenoi ehepe aikotã urutukupte’en hap enoi hamo. Mi’i hap eweikuap hawyi eiwepit kahato. Ta’i eimoesaika aru eipy’a pe aimimohey Iesui mohey hap ete aiwo’oky’e hap ete are. ²³ — Uru’ywot Tupana Uruka’iwat koro Iesui ahẽtup ewawi. Etunug o emohey haria tawa Ewesu piaria wo’oky’e haria wo. Etunug o mi’iria wo’owese haria wo emohey sese haria wo are. ²⁴ Tupana ereĩne’en hegyi’at kahato rakano emohey haria pe katupono Esa’yru Uruka’iwat Koro Iesui ky’e kahato haria mi’iria are. Eti’atuky’e te’en ne’i mi’iria katupono Emipo’oro Uruporekuat ky’e wuat’i e’at piat haria mi’iria are’e at ka’ap Tupana pe mesuwe wo’opyhik hawe. Woroho’oky’e eipe are.

Uito ti IESUI potpo’oro PAURU.