2 TIMÓTEO

TIMOTEU NÃPIN HAP PAURU MIENOI TYPUAT

¹ Timoteu mesup uimiwan atipo­’oro kuekatu ui’e hap. Uito e’ywot Pauru mekewat Aipo­typot mi’airo tehay moherep wuat’i miit’in mianuat hat. Karãpe etomohey Iesui hawyi pywo Aipo­rekuat sese ere o wuat’i pe. Mi’i pote ti aru ereĩne’en wuat’i e’at pe Tupana wywo ere o katu­pono mio tã e hap ti sa’a­wy­’ite Tupana tomo­herep uhepe. ² Ta’i uha’yru sese ewy ereĩne’en Timoteu. Woro­ky’e kahato en. Ai’ywot sese ti Tupana i’ewyte Aika­’iwat sese ti Iesui. At ka’ap mio tã are Tupana pe — Waku etipo­wyro ro Timoteu egyi’at hap kaipyi. Waku eraha’at Timoteu kape iky’e hap wywo are. Iwanẽtup hap wẽtup yn etum iwepit hamuat are Tupana pe meiũpepyi eupi. ³ I’ewyte — Waku kahato En Uru’ywot are. Ta’i Tupana eheropat kahato hat uito Pauru. Emiky­’esat ewy yn atunug neran. Aikotã sa’a­wy’i ai’y­wania tunug emiky­’esat ewy i’ewyte uito atunug mesup are Tupana pe. Karãpe uiwa­tetup ewawi turan Timoteu — Waku kahato En Tupana are yn wãtym muo ihot’ok ewy ewy are Tupana pe. ⁴ Timoteu yt atiwaure kuap i aikotã e’yatypiat areĩne’en turanuat aikotã erewak uiky’e epiat haype hap. Uipap kahato ewawiat ui’a­kasa hamo hawyi atikuap uimo­wepit kahato en hap. ⁵ Uimo­wa­nẽtup kahato en Iesui mohey sese hap kape mekewat pywuat sese hap yt eso hin i Iesui mohey hap ete. Sa’a­wy’i ti ehary Iroiti i’ewyte ety Eunise tukup­te’en imohey sese haria. Mi’i hawyi koitywy en i ra’yn i’atu ewywuat imohey sese hare en ereĩne’en. ⁶ Mi’i tupono woro­nãpin Timoteu. Sa’a­wy’i woro­’atoiat en itote Iesui mohey haria akag wo. Mi’i hap e’at pe areponug e’akag ete hawyi Tupana tum tesaika hap topotpap nug epiat hamo. Pyno waku ewatetup o mi’i hap kape. ⁷ Tupana tum na’yn ahepe Topã’ãu aimoe­saika kahato hap yt uwe pupiat i aiken’ẽ hamo. Koitywy Topã’ãu wo aipyt’at nug kahato ra’yn wo’o­ky’e hamo. Mi’i kaipyi koitywy watu­we­nãpin kuap ta’yn sa’ag nug hap akit hamuat.

⁸ Yt eremõti tei’o Aika­’iwat ehay moherep hamo. I’ewyte uito areĩne’en wo’o­pyhik hawe Iesui mohey hap upi pytkai yt eremõti tei’o — Uito Pauru mẽpyt e hamo. Ma’ato waku ere — Uito i’ewyte aho’opot hawe areĩne’en wy mesuwat sehay wakuat moherep hap upi waku ere o Tupana pe. Uimoe­saika hap ok tã aru atunug ere o Tupana pe Timoteu. ⁹ Tupana aheha­kye­ra’at hawyi ainug temiit’in wo. Yt aiwa­nẽtup kahu hap upi i yt ahewaku hap upi i ma’ato tomi­ky­’esat no tegyi’at hap ok tã aheha­kye­ra’at wuat’i e’at piat aikotã Tupana to’e nimo sa’a­wy’i tutunug yne wuat’i hap yianmete — Ati’a­tue­ha­kye­ra’at ti aru Uha’yru mohey haria e Iesui etiat hap ewy. ¹⁰ Pyno koitywy watikuap kahato hegyi’at ahepiat hap katu­pono Aika­’iwat Iesui ut hawyi tuwe­mo­herep ta’yn ahepe aikotã aiku­’uro hap kaipywiat aimo­herep hamo. Tehay wakuat toimo­herep ta’yn ahepe aheĩne’en wuat’i e’at piat hamuat hap.

¹¹ Ta’i Tupana ui’airo topot­po­’oro sese wo wuat’i puat tehay moherep hamo miit’in atumu’e uhepiat hamo. ¹² Mi’i hap upi ti aho’opot aikotã aikotã hap ko’i. Miit’in i’atu­mi­ky­ry’i kahato uhete ma’ato yt aremõti hin i Tupana ehay ete katu­pono atikuap kahato uiwy uimi­mohey Iesui. Mi’i hap toikuap i’ewyte uito atikuap are. Yne uimiium tepiat toi’a­tunug iheg me itote tut hamuat kape. ¹³ Timoteu epap kahato o uimienoi epiat pywuat sese sehay upi. Ewatetup mi’i e hap ko’i upi katu­pono aikotã aikotã ereĩne’en hamuat ahenoi epe. Mi’i hap tote ereĩne’en wuat’i e’at pe. Etomohey Aika­’iwat Iesui. Etiky’e kahato Mi’i. Mi’i hawyi wẽtup piit ewy yn watoĩ­ne’en Iesui wywo. ¹⁴ Tupana Pã’ãu esaika hap topy­hu’at kahato ahepe. Kat e hap kat e hap wakuap ko’i tutum epe emohey haype. Mi’i ko’i o etat kahato etomoheg kahato ewanẽtup hawe uha’yru.

¹⁵ Uhyt Wikeru i’ewyte uhyt Emosene yi Asia piaria ui’atoiat ra’yn i’ewyte itotiaria irania’in yt i’atu­wese i ra’yn uhete. ¹⁶ Ma’ato mehĩ Onesi­wuru ti yt ui’atoiat hin i pãi. Uipo­wyro kahato mi’i. — Tupana are etum o wakuap yn aiwy Onesi­wuru pe imẽpyt’in me are torania i’yaty­piaria wywo karania wo etum o wakuap Tupana are. Ta’i uimo­wepit hat kahato mi’i. Yt token’ẽ hin i uipyhik hap pupi. Tut tuereto uipyhik hap kape. Yt tuwe­mõti hin i — Uito Pauru ekatuwy to’e hamo. ¹⁷ Put’ok’e Huma pe hawyi yt toikuap i aiũpe uipyhik hap tawa Huma piat hap ma’ato mi’i pytkai uikat kahato. Meremo put’ok­to’e itotiat hawyi mi’i hawyi uipuẽti. ¹⁸ Tupana ahẽtup aiwy Onesi­wuru upi. Etum egyi’at kahato hap Onesi­wuru pe are. Eti’a­tu­moe­hãite i’yaty­piaria wywo are yn. Pyno Iesui tut turan atiky­’esat Onesi­wuru pe ha’up ikahu rakat are Tupana pe. Pywo etikuap kahato ra’yn Timoteu aikotã sa’a­wy’i areĩne’en tawa Ewesu piat turanuat uipo­wyro kahato hat Onesi­wuru topy­hu’at itote. Mi’i hawyi ipoityro hap ahẽtup kahato Tupana kaipyi uito Pauru.

¹ Timoteu Aipo­typot Iesui hegyi’at kahato tesaika hap ium ahepiat hamo. Mi’i hap kaipyi ereĩne’en hemiit hesaika kahato rakano hap wẽtup piit ieĩne’en hap ewy ra’yn ereĩne’en iwywo. ² Uimienoi kuap kahato hat en uha’yru katu­pono uiwywo yn ereĩne’en uipot­mu’e turan. Yt etiwaure tei’o ui’e hap ma’ato etomo­herep yne o Iesui mohey kahato haria pe — Imohey hap yt atoiat hin i haria pe. Ahaipe­piaria piat uimienoi moherep hanuat ereĩne’en.

³ Aikotã surara tuwe­mo­so­’o­pot’i hap ewy eremo­so­’opot uha’yru. Surara sese ewy o ereĩne’en Iesui emiit wakuano. ⁴ Katu­pono ti topotpap hawe ti surara tiky­’esat topo­’oro hat mowepit hap yn toiky­’esat. Mi’i pote toto topo­’oro hat miky­’esat nug hamuat. Sa’a­wy­’iwuat tekat ko’i kape yt tuwe­wa­nẽtup i ra’yn ma’ato tuwa­nẽtup surara akag miat topo­’oro hap kape yn. Mi’i hap ewy ro ereĩne’en Aipo­typot piat epo’oro hap ewy. ⁵ Karãpe aheput hap ete wato­’oiã’ãg hap ewy uwe po’og ihyha hap kuap hamo waku hãpyk kahato rakat morekuat piat ainãpin hap ewy waku watunug. Yt mi’i hap ewy i pote yt uwe i mi’i po’og i’atu’e ahepe aihyha pytkai. Ma’ato i’e hap ewy wateput mi’i pote miit’in mimõ­typot no watoĩ­ne’en. Mi’i hap ewy ti waku watoĩ­ne’en hãpyk kahato imohey hap ete to’o­’e­wywuat seput kahato haria ewy Timoteu. ⁶ Karãpe — Aiwe­so­’o­pot’i popuo watikoi aiko wato’e mi’i rokirẽ ti ma’ato karãpe haat hawyi aiwano topy­hu’at sa’a­wy­’i­tewuat haat. Mi’i hap ewy ti Iesui ehay upi waku watu­we­so­’o­pot’i popuo watu­we­potpap. ⁷ Erewa­nẽtup to uimienoi kape Timoteu. Mi’i pote ti aru Aika­’iwat tum epiat wuat’i etiat kuap hamo.

⁸ Timoteu ewatetup o Aika­’iwat Iesui kape. Ta’i mi’i ti morekuat Tawi emiariru Emiariru sese. Mi’i Miit Tupana mimoieĩ­ne’en pakup i ra’yn hat ahenoi wuat’i puo. ⁹ Mi’i mienoi upi ti aho’opot te. Uipo’i po’i ra’yn haity wo wo’o­’auka hat ewy. Uito uipyhik kuap ma’ato Tupana ehay ti yt uwe i ipyhik kuap yt uwe i i’akit kuap. ¹⁰ Ma’ato yt uiwẽ­pohep hin i Iesui mohey hap ete wãi’i­’a­tu’e pytkai. Ui’auka pote ui’auka ma’ato yt uipohep hin i te. Katu­pono Tupana ti’a­tue­ha­kye­ra’at teran kahato tomi­’ai­roria aho’opot kahato Iesui mohey i’atuepiat hamuat pytkai. Mi’i hap kaipyi Tupana ti’a­tue­ha­kye­ra’at mi’iria. Mi’i hawyi Iesui kahu hap ewywuaria ra’yn tukup­te’en iwywo wuat’i e’at pe ra’yn. ¹¹ — Uiku­’uro pote uiku­’uro ma’ato yt woro­’atoiat Tupana wato’e pote watoĩ­ne’en iwywo wuat’i e’at pe waku wato’e. Hãpyk kahato sehay mi’i. ¹² — Iwywo waho­’opot pote iwywo morekuat no watoĩ­ne’en waku wato’e ma’ato — Atoiat Iesui mohey hap wato’e pote i’ewyte — Yt uimohey hat i meiẽ e ahepe e. ¹³ Watoiat pytkai yt ai’atoiat hin i. Yt ai’atoiat i kat pote yt heso i. — Yt karãpe i ti aru woro­ho­’o­’atoiat e. Mi’i e hap ko’i ti aimi­mohey wuat wato’e waku kahato.

¹⁴ Timoteu eti’a­tu­nãpin no haty wo epotmu­’eria — Tupana yt tiky­’esat i wyti aiwo­’oe­wa­nĩkap hap ne’i watunug tehay enoi turanuat hap. Yt kan hamo i watu­’uka sehay hit kuap hap ete e ma’ato aiwu­’uka i pote ti yt kat i aiwo­’o­wehik hap itote ere o. Ewe’eg wo o mi’i hap pupi katu­pono Tupana toĩne’en aipy­’a­setpe aiwa­’a­tunug turan. ¹⁵ Eremu’e kahato at ka’ap Tupana ehay enoi hãpyk hamuat hap ete. Yt epohep hin i o Tupana miky­’esat nug hamuat. Mi’i hawyi — Waku kahato epotpap uhepiat hap e Tupana epe. Mi’i hawyi yt eremõti hin i Tupana pupi hãpyk kahato epotmu’e tehay sese wuat pote. ¹⁶ Waku watoiat kahato yt aiwe’eg i hap aiwo­’o’ehay wuat wu’uka hap aiwo­’o­mu’e turanuat hap katu­pono mi’i hap yt kan hamo i ma’ato watunug mi’i ne’i pote Tupana tuwe­mõti aipupi i’ewyte wati­’a­tu­putsit ne’i irania’in Tupana kuap teran hap kaipyi. ¹⁷ Uhyt Imeneu uhyt Wiretu mi’iria tu’uka kahato sehay wo aiwo­’o­mu’e turan. Yt ikahu hin i iwu’uka hap. Haty kahato aiwo­’o­ky’e hap ete. Topy­hu’at aikotã ahepihi haty kahato hap ewy. Sehay wuat iwu’uka hap miit’in wo’o­’atoiat hap ewy. Yt kan hamo i watu­’uka sehay wo. ¹⁸ Ha’a­wyte aimu’e haria uhyt Imeneu uhyt Wiretu pywo sehay upiat haria tukup­te’en wen ma’ato mio ti ta’a­tu­’atoiat ra’yn. Mi’i hawyi wẽtup sehay kape — Tupana ti’a­tu­hymut kahu ra’yn map haria i’atu’e. Mio tuwat ra’yn yne ra’yn Iesui upi i’atu’e. Mio tã i’atu’e pote aimogyt kahato ahepiat imohey hap etiat waure­wa­to’e pote. I’atuepiat aimu’e hap toĩne’en aikotã hepihi wato yt uwe i imog kuap hap ewywuat are. Sat’e ra’yn irania’in ete hap ewy. ¹⁹ Ma’ato aito yt watoiat hin i te pywuat sehay mohey hap katu­pono Tupana sa’y­ru’in saki­’yt’in aito. Watunug i’yat iheg nakano pote yt ta’at i. Mi’i hap ewy wato­mohey kahato. Pywo kahato pote yt watoiat i. Aikotã Tupana to’e sa’a­wy’i hap ewy — Woro­ho­’okuap ti eipe uimẽ­pyt’in e. I’ewyte uwe uwe to’e — Uito Tupana wano e mi’i hat pe — Pyno eminug sa’ag etoiat yne e Tupana.

²⁰ Hekat rakat yat koro pe tukup­te’en kahato seiam ko’i yt to’o­’e­wywuat ewywuat rakaria i. Irania’in wuat’i e’at piat ahenuk hap ma’ato irania’in aiwy­ria’in sese poi hap ewy tukup­te’en. Mi’i ko’i yt wẽtup kawiat yn i irania kui’a kawiat irania yi kawiat irania hekat rakat kawiat imehit rakat. Mi’i ko’i heiam wati­puẽti getap wato pe. ²¹ Watoiat yne sa’ag nug hap pote hekat rakat kui’a ewy watoĩ­ne’en ekui’a wo i’yat koro pe ikahu kahato imowepit kahato hamo. Mi’i hawyi — Waku ti rat uimi­ky­’esat nug hamo en e ahepe Tupana. Mi’i hawyi Tupana emiit sese wo watoĩ­ne’en. Mi’i hawyi kat ko’i kat ko’i imiky­’esat yn na’yn watung. ²² Timoteu yt erewa­nẽtup tei’o emotag hap turan epiit miky­’esat sa’ag nug hamuat kape ma’ato meremo o etoiat. Erepik meremo o mi’i hap kaipyi hãpyk nug hap kape Tupana mohey hap kape wo’o­ky’e hap kape wo’o­wese nug hap kape irania’in Iesui mohey haria upi urupo­wyro Tupana e haria upi wanẽtup kahu haria upi. ²³ Uha’yru tukup­te’en kahato ti sehay wuat wu’uka teran haria yt kan nuat i ihay rakaria. Mi’iria pe waku u pãi u an wato’e yn na’yn i’atuehay pe. Yt wati­’a­tu­wesat i ra’yn iwu’uka hap sehay enoi pote. ²⁴ Katu­pono yt uwe i Aika­’iwat eropat hat wakuat wu’uka hano toĩne’en. Ma’ato hemiit sese ti iwese yne miit’in ete. Wo’o­mu’e kuap kahato hat yt ipy’ahak hin i ma’ato hepamo ikuap haria ete Tupana eropat hat. ²⁵ Hepamo towese popuo toi’a­tu­nãpin kuap kahato ipy’ahak teran tetiat rakaria. Eti’a­tu­mu’e mio tã irania’in mote meiũran Tupana tum kuap i’atuepe paa’i­’a­tu’e hamuat ta’a­tu­’atoiat mono ta’a­tu­minug sa’ag — Pywo ra’yn ta’a­tu’e haype. ²⁶ Mi’i hap kaipyi ti aru te’e­ra­’aipok ta’yn ta’a­tu­mo­we’eg hap kape. Mi’i hawyi ti aru toi’a­tue­ha­kye­ra’at ra’yn ahiag ewamiri pyi aikope ahiag miky­’esat yn ta’a­tunug. Mi’i hap kaipyi wati­’a­tu­mu’e wanĩ­kaptia aiwese kahato hap wywo wati­’a­tu­mu’e. Mi’i hap ewy waku watunug Timoteu are uito e’ywot Pauru.

¹ Timoteu niatpo ti aru watoĩ­ne’en wuat’i sa’ag nug haria e’at put’ok’e turan katu­pono imohey haria piat ho’opot hap e’at mekewat e’at pe. ² Katu­pono mekewat e’at pe yt hegyi’at i rakaria tukup­te’en kahato — Ewat uiano yne i’atu’e. Uito po’og ekai e haria. Uito po’og atikuap ekai i’atu’e. To’o­ky­ry’i kahato Tupana ete. I’atuehay ta’a­tu­’ywot ta’a­tuty piat yt ta’a­tu­mohey hin i. Etum ne’en ne’i ikahu rakat i’atuepiat hawyi — Waku yt i’atu’e hin i egyi’at hawe. — Yt kat i Tupana i’atu’e i. ³ Yt uwe etiat i iwese rakaria mi’iria. Ehaky­’e’i hap yt kuap i haria. Ta’a­tu­mo­weu­ka’i yn miit’in. Meremo wu’uka teran haria haiwot rakaria wakuap nug hat etiat ipy’ahak takaria. ⁴ Ta’a­tu­wy­ria’in ma’at’i ma’at’i hanuaria wo i tukup­te’en. I’atu­hu­hai’i yn tukup­te’en. — Uito po’og e hap yn i’atu­wa­nẽtup hawe. Ta’a­tu­wepit hap kape yn te’e­ru­wa­nẽtup. Yt Tupana mowepit hap yt kape i te’e­ru­wa­nẽtup. ⁵ Te’e­ru­wa­’a­tunug Tupana mõtypot hamo ma’ato yt pywo pe i. Yt ta’a­tu­ky­’esat hin i Tupana esaika hap ta’a­tu­mo­pakup i hamuat. Mi’i ewywuaria ti aru pywo tukup­te’en kahato. Mi’i tupono o ero’oksep yn na’yn mi’i haria pupi. Eiwe’eg wo o mi’i haria ewamiri pupi. ⁶ Hary­poria yat pe yt we’eg i hat yat pe tuwe­hyt’ok yt uwe mikuap mo i wẽtup sehay wuat imu’e hamo ima’at hamuat haype. Ta’a­tu­ma’at kuap kahato katu­pono mekewat hary­po­ria’in yt i’atoiat teran hin i ta’a­tu­minug yt ta’a­tu­we’eg i hap ko’i. Mi’i hary­poria iky’esat kahato teha­kye­ra’at Tupana piat hap ma’ato yt totoiat teran hin i tominug yt naku i yt iwe’eg i hap ko’i pytkai. ⁷ Pywuat sehay atikuap teran i’atu’e wen ma’ato yt ta’a­tukuap i ta’a­tu­mu’e kahato pytkai. ⁸ Aikotã sa’a­wy’i pywuat sehay pun haria mehĩ Iane i’ewyte mehĩ Iãpere ewywuat gupte’en haria mi’iria. Sa’a­wy’i mi’iria Musei ehay pywuat yt ta’a­tusat i. Mi’i haria ewywuaria ti aru mesuwe tukup­te’en aru. Yt te’e­ru­wa­nẽtup kuap i pywuat sese sehay kape katu­pono ta’a­tuepiat imohey sa’a­wy­’iwuat hap ta’a­tupun ne’i. ⁹ Aima­’at’i ma’at’i hap kaipyi wuat’i miit’in ti’a­tukuap ta’yn wo’o­ma’at haria wo mi’iria. Aikotã sa’a­wy’i Iane Iãpere ewywuaria mi’iria.

¹⁰ Ma’ato en yt mi’iria ewywuat hin i Timoteu katu­pono en uhaipepiat kahato emu’e uhepiat hap ewy kahato nug hat en. Uiminug wakuat e hamuat ewy kahato nug hat en. Uipy­’ãtap upiat ewyry ra’yn. Iesui mohey uhepiat hap upi hewyry mot’i kahato rakat ra’yn en. Yt uihyha i hap upi hin i ewyry en. Uhepiat miit’in ky’e hap upi uhepiat ho’opot hap kuap hamo ewyry ra’yn. ¹¹ I’ewyte etikuap kahato i’atu­mi­ky­ry’i uhaty’i haty’i hap ko’i. Sa’a­wy’i karãpe areĩne’en tawa Atiokia pe tawa Ikuniu pe tawa Iritara pe ta’a­tu­mi­ky­ry’i sa’ag kahato uhete. Uhaty’i haty’i uimo­so­’opot uimo­ha­ky­’e’i ma’ato uipo­re­ro­kosap ne’i Uika­’iwat Iesui. ¹² Uwe uwe topy­hu’at teran Aika­’iwat Iesui ewy hewaku hap ewy mi’i hat wyti miit’in miky­ry’i hamo topy­hu’at miit’in misa­ty’i saty’i wo topy­hu’at. ¹³ Ma’ato miit’in sa’ag nug haria wo’o­ma­’at’i ma’at’i haria ti aru po’og po’og tuwe­mo­herep. I’atu­minug sa’ag kaipyi meiũran po’og sa’ag te’e­ro­py­hu’at. Mi’i hawyi wuat’i ma’at hamo te’e­ro­py­hu’at. I’ewyte mi’i hawyi wuat’i miit’in ma’at hano te’e­ro­py­hu’at. ¹⁴ Ma’ato Timoteu yt atiky­’esat i en mi’i tã ereĩne’en. Ma’ato uhepiat emu’e hap ete at ka’ap ereĩne’en po’og po’og katu­pono sa’a­wy­’ite mi’i hap ete pywo haty wo eremu’e. Mi’i hap ewy te mesup etimohey te Timoteu katu­pono etikuap sese ra’yn uiwẽ pywiat emu’e hap. ¹⁵ Katu­pono ehire pyi te etikuap Tupana ehay miwan miat hap ete pywuat sese hap kaipyi etipuẽti Eka’iwat Iesui etiat kuap hamuat. Katu­pono yianmete ta’a­tu­henoi Aika­’iwat Iesui etiat. Mi’i hap kaipyi ti wati­puẽti aiwe’eg hap Iesui mohey hamuat. Mi’i hawyi wato­mohey hawyi aheha­kye­ra’at hap topy­hu’at. ¹⁶ Wuat’i yianmiat Tupana ehay miwan miat tuwẽtem hemiit’in wẽ pyi Tupana Pã’ãu ihay. Waku kahato aimu’e pywuat sehay wo. Ainãpin kahato kat som waku watunug i’ewyte aimu’e kahato sa’ag kaipyi aipo­re­ro­kosap hamo wakuap yn nug hamo aimu’e. ¹⁷ Aimo­hãpyk kahato hamuat Tupana ainãpin tehay wo. To’e hap kaipyi Tupana ti’a­tu­moe­saika kahato teropat haria wuat’i sepap hap kuap yne hamo wuat’i wakuap nug hamo are epe e’ywot uito Pauru.

¹ Pyno Timoteu woro­nãpin kahato haty wo Tupana ehamo Aipo­typot Iesui ehamo — Etimohey kahato o Tupana ehay ere’e o epotmu­’eria pe. Yt ewẽpohep hin i nei’o mi’i hap ete. Yt epohepap pytkai i yt epohep tei’o i’atu­mu’e hap ete. Katu­pono tut irane Aika­’iwat uwe waku uwe yt naku i rakaria hap enoi hamo ihãite rakaria kape i’ewyte map haria kape. ² Yt etoiat rei’o ihay moherep hap. Wãi ere o miit’in minug sa’ag ko’i ete. Yt eweipun nei’o ehepiat imohey hap ere o wuat’i pe. Eiwepit ro ere o epotmu­’eria pe. Yt kat i i’atu­mõ­py­’ahak hap wywo ma’ato hepamo perup’i wo eti’a­tuekyi kahato ro emienoi wo Tupana kape katu­pono tut irane wuat’i Porekuat no emienoi wo. ³ Pywo ti aru meiũran aimi­mu­’eria yt tiky­’esat i kahato ta’a­tu­mu’e hãpyk takanuat hap. Mi’i haype ti aru — Wãi’i­’a­tu’e yt he i i’atu’e yt watu­wa­nẽtup teran i mio tã e hap kape i’atu’e aimu’e ihãite rakat etiat hap ete. Mi’i hawyi ti aru ta’a­tu­mi­ky­’esat ewywuat ta’a­tu­mu’e haria ta’a­tukat. ⁴ I’atue­waure ka’a yt kat i ra’yn sehay pywuat kape. Ta’a­tu­ky­’esat yt ta’a­tu­we’eg i hap haype. ⁵ Ma’ato en Timoteu ewe’eg wo o mio tã i’atu’e hap kai. Yt eremoe­ha­ma­na’i tei’o ma’ato Tupana ehay pywuat sese po pe ereĩne’en o. Epiat ho’opot pytkai yt ewẽpohep tei’o. Ma’ato en woro­ky­’esat wuat’i puat Tupana ehay wakuat sytpok hamo. Etimoehãite yne o epotpap Tupana miium epiat uha’yru.

⁶ Aikotã aihũ wati­’auka Tupana mõtypot hamo hap ewy uito porap put’ok’e ra’yn uiku­’uro hap Tupana mõtypot hamuat hap pãi. ⁷ Surara wakuat ewy uipotpap ui’akag Iesui miky­’esat ete. Seput hap etiat po’og ihyha rakat ewy areĩne’en. Irania’in ta’a­tu­ku­’uro hap pupi te’e­ro­ken’ẽ kahato i ma’ato uito yt mi’i hat i. Irania’in aipok haria ne’i ma’ato uito put’ok­’are aheput hap ete. Mi’i hap ewy areĩne’en imohey hap mywo. ⁸ Karãpe wateput turan seput hat akag to’e — En po’og ihyha rakat e wuat’i ehamo. Mi’i hap ewy ti meiũran Ai’akag Iesui to’e irane uhepe — En ni wakuat kahato Tupana wanẽtup hawe e irane uhepe ma’ato yt uhepe yn i ma’ato i’ewyte uwe uwe toky’e haria pe torania — Ati’a­tu­ky­’esat Iesui ta’aipok i e haria pe. ⁹ Timoteu atiky­’esat kahato eriot uhowawi. Mi’i tupono yne esaika hap mywo eriot meikowo uha’yru. ¹⁰ Katu­pono aiwy Tema ui’atoiat ra’yn. Kat pote tekat po’og ky’esat Tupana kawiat haype. Mi’i pote tawa Tesa­ro­nika kape toto. Aiwy Kesente toto yi Karata kape. Titu ti toto ra’yn tawa Taumasia kape mi’i tupono waku eriot meikowo. ¹¹ Ma’ato aiwy Iruka yn ti topy­hu’at uiwywo. Timoteu atiky­’esat etikat o aiwy Maku mi’i hawyi eterut ewywo eut turan katu­pono mi’i waku ra’yn aipo­wyro aipotpap etiat hamo. ¹² Uhyt Tikiku ti atipo­’oro tawa Ewesu kape. ¹³ Timoteu atoiat uheka­misa wato uipysop uhyt Kapu yat pe tawa Turate piat. Mi’i atiky­’esat eterut hap eut tuwywo. I’ewyte miwan ko’i itote tukup­te’en. Mi’i i’ewyte eterut o wy. Atiky­’esat po’og ipe totiat miwan.

¹⁴ Uhyt Aresã­tere yne imehit rakat tupa­naria iã’ãkap ko’i nug hat etiat uima’at kahato hat. Uimo­so­’opot kahato mi’i. Ta’i haiwot kahato aipot­mu’e hap ete. Toimoma teran uipot­mu’e hap. ¹⁵ Pyno ewe’eg wo o ipupi. Waku wahẽtup Tupana kape — Etipoepyk to Aresã­tere iminug sa’ag ok tã uruma’at hap ok tã ha’up iminug sa’ag waku wato’e Tupana pe.

¹⁶ Mi’i hap e’at pe yt i’atu­wese hin i uhemiit’in ran ko’i. Yt uipo­wyro i haype. Yt naku i atipuẽti sehay wuat haria uhemiit’in ui’atoiat yne. Mi’i hawyi ui’atoiat uiwy­ria’in wanĩ­kaptia py’a­setpe uito waku sio yt e hamo. — Tupana waure wo ereĩne’en uiwy­ria’in ui’atoiat haria kai are Tupana pe. ¹⁷ Ui’atoiat ma’ato Aika­’iwat yt ui’atoiat hin i. Tutum uhepe tesaika hap tehay wakuat enoi hamuat. Ta’i Tupana uheha­kye­ra’at ui’auka tet pupi aikotã aihũ wati­ka­wiano awy’ato pupi hap ewy. ¹⁸ Ta’i Aika­’iwat uhero’ok kuap kahato ui’auka teran haria po pyi uima’at teran haria tok pyi. Mi’i hawyi ui’ãuka i’atu pupi. Tetama atipy piat pe uhereto. — Arehum at ka’ap ewawi Tupana. Ekahu kahato En are aru wuat’i e’at pe. Ta’i mi’i tã wyti pyno. ¹⁹ Uhekue­katu atipo­’oro mehĩ Akuira kape ihary’i Pisira kape. I’ewyte kuekatu mehĩ Onesi­wuru pe torania i’yaty­piaria kape. ²⁰ Uhyt Eratu topy­hu’at tawa Kurintiu pe. Aiwy Towimu atimõ­py­hu’at tawa Miretu pe kat pote i’ahu pote.

²¹ Atiky­’esat eriot mesup uhowawi Timoteu i’aman mot ewakai te.

Eyke­’et’in Iesui mohey haria Eũpuru Putensi Irinu i’ewyte mana Kautia i’ewyte torania meiũpiaria Iesui mohey haria kuekatu i’atu’e ewawi.

²² Atiky­’esat ihãite kahato ehepiat imohey hap. Mi’i hap ahẽtup Tupana pe — Etum o Timoteu pe egyi’at hap are ti Tupana pe.

Pyno toran na’yn. Uito Pauru