2 TESSALONICENSES

TAWA TESARONIKA KAPIAT PAURU MIENOI TYPUAT

¹ Uiwyria’in Tawa Tesaronika piaria koitywy Uito Pauru atipo’oro uimiwan ehowawi i’ewyte aiwy Sira aiwy Timoteu’in wywo kuekatu uru’e hap uruipo’oro ehowawi Ai’ywot Tupana mẽpyt’in Aika’iwat Iesui emiit’in torania kape.

² Uruhẽtup kahato ehupi — Tupana uruto’e etum no aiwyria’in me yt kat sa’up i egyi’at hap i’ewyte i’atuwo’owese hamuat etum kahato uruto’e Ai’ywot kape Aipotypot Aika’iwat Iesui kape uruhẽtup.

³ Uruwyria’in karãpe urutuwekuekatu ehowawi turan — Waku kahato En Tupana uru’e hap yn topyhu’at. Tupana urutuwehum kahato eete katupono itag na’yn po’og po’og i’atukai emohey hap uruto’e. Koitywy wo’oky’e kahato haria wo ra’yn tukupte’en waku kahato uruto’e. Mi’i tupono ehewaku hap upi urutuwehum at ka’ap Tupana ete. ⁴ Irania’in itotiaria to’okyry’i kahato ehete. Iesui mohey ehepiat pote ehaty’i haty’i kahato. Ta’atuky’esat kahato waure’ei’e Tupana etiat hap. Yt ikahu hin i i’atu’e ehepe ma’ato yt eweiwaure teran hin i Iesui mohey ehepiat hap. Mi’i pote irania’in me uruhenoi — Meiẽ mi’iria tawa Tesaronika piaria waku kahato rakaria uruto’e. Yt ta’atu’atoiat hin i Iesui mohey ta’atuepiat hap ta’atusaty’i saty’i pytkai uruto’e. Mio tã uruto’e yn irania’in tawa piaria imohey haria puo. ⁵ Eweikuap kat pote eweho’opot hap. Ta’i Tupana mẽpyt’in eipe pote — Waku kahato eipe e Tupana. Ta’i ehewaku hap put’ok’e ui’yatypiat wuat’i e’at piat eikupte’en hamo. Katupono i’atumikyry’i pytkai yt ui’atoiat hin i eipe e aru Tupana ehepe. ⁶ Tupana tomoherep hãpyk kahato wakuap sio yt hap. Mi’i tupono ti yt toiwaure hin i ehetiat mikyry’i haria. Toi’atuporera’aipok i’atupotsaty’i saty’i hap eimoso’opot hap kaipyi. ⁷ Mi’i hawyi ti aru Tupana timonik yne ra’yn ho’opot ehepiat hap. I’ewyte uruwat miit’in mikyry’i hap monik hamo. Tut Aipotypot Iesui atipy kaipyi. Tuwemoherep temiit’in hesaika rakaria atipy piaria wywo. ⁸ Ehaty’i haty’i haria apiheg hamo tut. Yt Tupana kuap i haria apiheg hamo tut. Aika’iwat wo’onãpin wakuap yt nug i haria apiheg hamo tut. Atipy kaipyi Iesui aria wo toi’atu’apiheg irane mi’iria. ⁹ Mi’i hawyi mi’iria ewywuaria toi’atu’apiheg aru wuat’i e’at piat i’atumoewasat hamo. — Eweiwat ro aikope yt ui’akasa i hap kape. Eweiwat ro wo’opugha hap kape. Yt karãpe i aru uikahu hap mõtypot hap kape ewei’akasa. Yt karãpe i ti aru uhesaika hap Morekuat nuat uheĩne’en hap kape ewei’akasa e. ¹⁰ Karãpe ta’aipok i ra’yn mi’i hap e’at pe ti aru imohey haria hemiit’in torania imõtypot kahato Ta’atuporekuat koro. Mi’i hap e’at pe eipe i’ewyte eweimõtypot kahato wy katupono uru’e hap mohey kahato haria eweikupte’en.

¹¹ Mi’i tupono uruhẽtup kahato wuat’i e’at pe ehupi — Tupana uruiky’esat hãpyk kahato gupte’en haria wo emohey haria tawa Tesaronika piaria uruto’e. Yt wẽtup ok i toĩne’en itote ewemõti ehay pupiat hat uruto’e. Etum i’atuepe esaika hap emiky’esat wakuap yn nug hamuat hap uruto’e. Uru’ywot mi’iria Esa’yru mohey haria sese mi’i tupono po’og uruiky’esat i’atuehãite imohey hap etiat hap uruto’e. ¹² Mi’i tã ta’atunug itote pote irania’in itotiaria yt to’okyry’i hin i Uruka’iwat Iesui set ete. Emõtypot kahato itote irania’in Papai uruto’e. I’ewyte emi’atumõtyporia wo tukupte’en emohey haria itotiaria Papai uruto’e. Mi’i hap uruhẽtup ewawi etum ne’en ne’i hamuat hap Uruka’iwat Uruporekuat Iesui egyi’at hap kaipyi uruhẽtup Kahato wuat’i e’at pe ehupi uruto Pauru’in.

¹ Pyno uruwyria’in koitywy uruhenoi pakup i teran ehepe Aipotypot Aika’iwat Iesui aipok hap etiat aikotã aikotã ai’atunug tuwewawi hap etiat uruhenoi teran ehepe. ² Irania’in wo’omu’e haria ti — Tut kahu ra’yn ti Iesui i’atu’e aimu’e yt pywo pe i ma’ato. Tut kahu ra’yn ti e ti Pauru miwan me i’atu’e eimo’akag’aia teran haype. Yt ewei’atuehay mohey tei’o mio tã e haria — Pywo ti Tupana ehay wahenoi i’atu’e haty wo pytkai. Yt i’atumima’aria wo tei’o eweikupte’en. ³ Aiwe’eg wo o aima’at i’atuepiat hap pupi katupono yt tut i te rat Iesui. Yt he’at i te katupono ti aru Iesui mohey haria sok ihay atoiat haria tukupte’en aru hut hap owakai. I’ewyte hut hap e’yianme ti aru tuwemoherep Tupana ewanĩkap mekewat ahiagnia akag. Mi’i ti yne sa’ag eiam tuwemoherep Iesui e’yianmete. ⁴ Mi’i miit ti aru Tupana mohey hap moma miit’in kaipywiat hat. Mi’i ti wuat’i puo Tupana kuap haria ewanĩkap mo toĩne’en — Uito ti wuat’i Tupana kawiat po’og nakat e. Mi’i hawyi ti aru teke Tupana mõtypot yat koro pe tawa Ierusarẽi me ta’apyk Tupana eiam note — Uito ti Tupana to’e hamo. ⁵ Yt eiwatetup i ra’yn apo karania wo ne’i ra’yn ahenoi ehepe mi’i miit etiat pytkai are. ⁶ Ma’ato yt tuwemoherep kuap i te katupono topyhyp hawe te toĩne’en. Watikuap kahato ra’yn ti uwe ipyhyp hat. Ma’ato meiũran te’at put’ok’e ra’yn hawyi ti tuwemoherep hamuat wuat’i sa’ag sepap nug hat koro Iesui ut hap e’yianmete tuwemoherep. ⁷ Koitywy yt herep wyi i te ipotpap sa’ag nug hap ete. Hemiit yn heremo. Mig’i pyi ipotpap ma’ato meiũran ti herep wyi hamuat ra’yn ipotpap. Ma’ato koitywy yt tuwemoherep kuap i te hewãi hat toĩne’en ne pote. ⁸ Mi’i hawyi tuwemoherep mekewat sa’ag nug hat koro ma’ato Aipotypot Iesui ti aru i’auka wẽtup tehay wo yn topyhu wo yn teẽtyhot kahato wywo tut hap e’at pe. ⁹ Mi’i miit sa’ag tuwemoesaika ahiag esaika hamo iwemoherep hap put’ok’e turan. Mi’i hawyi ti aru miit’in ma’at hap iwato kahato tutunug tesaika hap moherep hamo. Topo wo yt uwe miit’in minug ewy i tutunug miit’in miat tomõtypot hamo teso hap ko’i. Mi’i hawyi miit’in te’eruwanẽtup kahato iminug ko’i kape — Aikotã som tutunug i’atu’e aru. ¹⁰ Mi’i hawyi ti aru ho’owasat rakaria wo miit’in toi’atuma’at kahato ra’yn mekewat topo wuat tominug wo yt miit’in minug kuap i wo. Mi’i hawyi imima’at ko’i tuwehyt’ok yne aria pe katupono ta’atumohey kahato ra’yn heso hap ko’i po’og pywuat sese sehay kai. Yt ta’atuky’esat i po’og ta’atuehakyera’at hanuat Tupana miium. ¹¹ Yt ta’atuky’esat i pywuat sehay pote mi’i hawyi Tupana ti’atupo’oro heso rakaria i’atumu’e hamo. Mi’i hawyi heso rakaria pe yn pywo i’atu’e. ¹² Mi’i tupono tukupte’en mi’i haria wuat’i e’at pe Tupana mi’apiheg wo katupono ta’atupun na’yn pywuat sehay i’ewyte ta’atuky’esat ta’atunug sa’ag hap yn.

¹³ Uruwyria’in Tupana mi’atuky’eria kahato eipe. Ta’i urutuwehum kahato Tupana ete wuat’i e’at pe uruwatetup ehowawiat hawyi katupono Tupana mi’airoria ra’yn eipe. Tutum na’yn ni ehehakyera’at hap ehepe pywuat sese tomohey hap upi. Mi’i hawyi mio Tupana Pã’ãu esaika hap wywo yn na’yn eweikupte’en. Mi’i hap ete urutuwehum kahato Tupana kape uruwyria’in uruto’e. ¹⁴ Sa’awy’i woroho’omu’e mekewat sehay wakuano mi’i hawyi eweikupte’en imohey haria wo. Mi’i hap e’at pe to’e Tupana ehepe — Pyno woroho’onug eipe ikahu rakaria wo aikotã Uha’yru ewywuat no. ¹⁵ Mi’i tupono uruwyria’in waku kahato ti mot’i mekewat sehay pywuat eweimohey mekewat uruwẽ pywiat sehay urumiwan urumienoi ko’i. ¹⁶ Uruhẽtup kahato Aipotypot Aika’iwat Iesui pe i’ewyte Ai’ywot hegyi’at rakat kape — Eti’atumoesaika ro emohey haria tawa Tesaronika piaria yt kat pupiat i i’atuwuwu hamo uruto’e. Eti’atumoesaika ro mi’iria wakuap nug hamo i’ewyte wakuap enoi hamo. ¹⁷ Mi’i yn uruhẽtup kahato aimiekatup kape yt kat pupiat i eiken’ẽ hamuat hap ium hat kape uruhẽtup uruto Pauru’in.

¹ Uruwyria’in mi’i tupono waku ewehẽtup Tupana kape urupowyro ihay sytpok merep’i ran hamuat hap aikotã waku hamuat hap aikotã ei’ewywuat miit’in ewaku kahato hamuat hap waku ewehẽtup. ² Ewehẽtup o yt nakuaria i po pywiat heso’ok takaria po pywiat Tupana piat uruehakyera’at hamuat hap. Katupono yt imohey yne i haria tukupte’en mesuwat yi tote. ³ Aika’iwat wyti temiit yt atoiat hat i toĩne’en ma’ato aimoesaika kahato hano toĩne’en Aika’iwat. Aikawiano kahato ti ahiagnia akag mupi. ⁴ Koitywy eipe urui’atumohey kahato Aika’iwat mohey kahato rakaria eipe pote. Tohenoi ra’yn uruepe imohey ehepiat hap. Mi’i pote urui’atumohey kahato eipe urumienoi nug yne mũki’ite mesup hamuat hap katupono uruhẽtup kahato ehupi. ⁵ — Uruka’iwat uruto’e eti’atumoherep tawa Tesaronika piaria pe aikotã aikotã eti’atuky’e kahato hap uruiky’esat. Ta’atukuap ta’atupy’a pe epiat ta’atuky’e hap aikotã Esa’yru Uruka’iwat iperup’i kahato tepiat ho’opot hap ko’i ete. Mot’i kahato hap ewy eti’atumoesaika i’atuwanẽtup hawe i’atupiit pe uruto’e.

⁶ Uruwyria’in tukupte’en aipy’asetpe iperup kahato rakaria — Uito ti Iesui mohey hat e haria pytkai. Mi’iria ti yt ipotpap teran i rakaria wo gupte’en haria. Mi’iria ti tukupte’en eipy’asetpe — Yt atunug neran Pauru mienoi e haria. Mi’i haria o yt ewetunug nei’o eiwy wo. ⁷ Eweikuap ta’yn ipotpap takaria wo urukupte’en hap mi’i tupono waku ewehã’ãg uru’ewywuat hap uruto’e. Pyno uruiã’ãkap wo eweikupte’en itote urusaipepiano urueiam mo uru’ewywuat hewyry rakaria wo eweikupte’en. ⁸ Yt uwe yat upi i uruesy’at uruto’e put’ok’uruto’e turan katupono uruewyry hap upi ta’i urumisa’up nug kaipyi yn urutenuk. Ta’i motpap urutunug uruepiat turan urusero kahato wãtym muo ihot’ok puo. Mi’i kaipyi ti uruipuẽti urumi’u sa’up ko’i i’ewyte uruesokpe uruekare’en sa’up ko’i uruto’e. Yt uruiky’esat hin i urutuweteweru ehepiat hap. ⁹ I’ewyte eimu’e sa’up yt uruhekatup hin i eikaipyi. Uruhẽtup teran pote uruhẽtup kuap ma’ato yt urutunug i mi’i tã. Waku eweikupte’en ipotpap kahato rakaria wo uru’ewy. ¹⁰ Katupono urutukupte’en eipy’asetpiat turan mio tã uruto’e yt ipotpap teran i rakat pe. Pyno yt naku i mi’i hat pe waho’oium imi’u wo uruto’e. Waku merup wuaria hesy’at rakaria wo te’eropyhu’at uruto’e.

¹¹ Ma’ato tukupte’en Iesui mohey haria eipy’asetpiaria yt ipotpap takaria i yt wo’opowyro teran i haria. Pyno mi’i haria pe waku wãiwato’e. I’ewyte wo’oeremõpusu hap ete yn i’atupotpap ta’atuewyry hap upi ta’atunug. Mi’iria pe waku wãiwato’e. ¹² Mi’i tupono waku wãiwato’e iperup takaria pe. Aika’iwat Aipotypot Iesui yt tiky’esat i sẽtup i sẽtup i e haria wo watoĩne’en hap waku wato’e mi’i hat pe. Iesui tiky’esat watoiat mekewat aipot’eremopusu hap hawyi waku aiwepotpap aimosakup i hap aiwemosero hap kaipyi yn waku aimi’u ahekat toĩne’en waku wato’e aiwo’ope. ¹³ Uruwyria’in yt naku i kahato aipohep ahero pytkai yt naku i aipohep wakuap nug hap ete pyi.

¹⁴ I’ewyte toĩne’en mote wẽtup ok eipy’asetpe — Yt atiky’esat i Pauru’in piat uinãpin hap e hat waku yt eiwehik tei’o mi’i tã hat ete. Mi’i tã watunug hawyi mono te’eruwemõti ra’yn hawyi tuwat urumienoi kape i ra’yn to’e haype. ¹⁵ Ma’ato yt naku i ewei’e — Koitywy en uhewanĩkap ta’yn yt naku i mio tã ewei’e mi’i miit pe ma’ato waku eweinãpin perup’i popuo aikotã aheywyt aheinyt nãpin hap ewy. ¹⁶ Aiwo’omowese hap nug hat sese ti Aipotypot. Mi’i pe uruhẽtup kahato — Etum o aiwyria’in tawa Tesaronika piaria pe to’owese wuat’i e’at piat hamuat hap uruto’e. Karãpe i’atusatek turan etum o i’atumowepit hap i’ewyte i’atuehãite hap. Ereĩne’en wuat’i e’at pe i’atupy’asetpe uruto’e uruhẽtup Tupana pe ehupi uruwyria’in. ¹⁷ Pyno mesup kurin atiwan uiwewi uipo wuat mesuwat Pauru piat mienoi sese moherep hamo. Pywuat uiat yne uimienoi sehay toĩne’en mesuwe hap kuap hamo uhet Pauru e hap atiwan. ¹⁸ — Uika’iwat Uipotypot Iesui eti’atuky’e te’en ne’i o aiwyria’in tawa Tesaronika piaria are’e yn ahẽtup yn ehupi Aika’iwat pe.

Waku ra’yn uhehay. Toran na’yn.

Uito ti Pauru hawyi mehĩ Sira hawyi mehĩ Timoteu Iesui potpo’ororia uruto.