PETERU MINÃPIN TYPUAT

¹ Uito ti Peteru Aipotypot Iesui eropat hat sese uito. Uito Iesui mipo’oro miit’in mu’e hanuat ihay moherep hat uito. Uito ti 12 ok hap Iesui emiit uito. I’ewyte imohey haria nãpin hat uito. Aimimohey ikahu rakat moherep hat uito. Hekat kahato rakaria ewywuaria watukupte’en katupono imohey hap sa’up iwato kahato hap ewy topyhu’at imohey hap kaipyi. — Uha’yru mohey haria ti eipe uiwanẽtup hawe uipy’a pe e Tupana ahepe. Mi’i pote atum yne wakuat ehepe e Tupana. ² Atiky’esat kahato eipe Iesui kuap kahato haria wo eweikupte’en. Ta’i eweikuap Aipotypot Iesui hawyi Tupana tum ne’en ne’en ne’i tegyi’at hap ehepe. I’ewyte tutum wo’owese hap tutum yt kat sa’up i. Aipoityro kahato Tupana tuwehay pyi. Iwese pote tutum yne ahepe. Tutum iwato kahato typy sakpo itote. Toimõ’ẽ kahato tegyi’at hap are. Tutum ahepe wuat’i tokuap hap Tosa’yru kuap hap kaipyi tutum yne yne ahepe are. ³ Tutum ahepe yne yne towanuat yt kat sa’up i. Tesaika hap toieĩne’en hap tewaku hap tutum ahepe are. Watikuap Ha’yru Iesui hawyi tutum yne yne tomõtypot hamuat hap tutum. Ta’i i’ewyte watomohey Iesui hawyi Tupana ai’airo topotpo’ororia ko’i wo are. ⁴ Tutum ahepe tehay wakuat. Koitywy mio tã e ahepe — Atum aru yne yne ehepe e. Pywo yt uheso hin i e. Woroho’oky’e haype e. Ta’i sa’awy’i ti watoĩne’en yi totiaria ewy ne’i yt naku i hap nug haria wo are. Katupono yt watuwẽtem kuap i ti aipiit miky’esat seko sa’ag myi. Aiminug sa’ag yt nakuat i po pe yn watoĩne’en. Ma’ato koitywy ti watuwẽtem na’yn mekewat kaipyi Tupana piat ainug pakup i ra’yn hap kape. Mi’i tupono ti koitywy aito ipakup takaria wo ra’yn watoĩne’en Tupana to’e hap ewy — Woroho’onug ti aru eipe ipakup takaria wo e hap ewy watukupte’en are mesuwe.

⁵ Pyno toĩne’en na’yn aikai Iesui mohey hap. Mi’i tupono ti Tupana tiky’esat po’og Tosa’yru ewywuat watopyhu’at hap uiwyria’in are. I’ewyte aikaipyi toiky’esat aiwanẽtup hap aheko Tosa’yru ewywuat ikahu rakat yn toiky’esat. Mi’i hawyi toiky’esat ahepiat tokuap hap aikotã aiwo’o’ewy’ewy hap toiky’esat are. ⁶ Waku hawyi i’ewyte toiky’esat aiwewãi kuap hap toiky’esat. Mi’i hap watikuap hawyi toiky’esat aiwo’oky’e hap. I’ewyte toiky’esat yt aipohep i tomohey hap etiat hap toiky’esat. Mi’i watunug kuap hawyi toiky’esat aito toiã’ãkap ko’i ewy hap toiky’esat are. ⁷ Mi’i toĩne’en hawyi toiky’esat aiwo’oky’e sese hap aikotã watiky’e aheywyt aheinyt hap ewy aikywyt aikypy’yt hap ewy are. Mi’i watunug kuap hawyi toiky’esat aiwo’oky’e pot’i sese hap. Itag sa’awy’itewuat imohey hap kaipyi hap toiky’esat are. ⁸ Mi’i tã watukupte’en mote ti aru ikahu kahato watoĩne’en are. Mi’i hawyi ti aru hekat kahato rakaria wo watoĩne’en Tupana mõtypot hanuaria aito hawyi are. Mi’i hawyi ti ihãite rakano watukupte’en are. Mi’i hawyi aikotã mekewat mikoi haat kahato rakat ewy watoĩne’en are. Mi’i hawyi ti aru watukupte’en Aika’iwat Iesui kuap haria kahato are. Mi’i hawyi ti aru Aiporekuat no kahato topyhu’at Aika’iwat are. ⁹ Ma’ato meimuẽwat wakuat ko’i yt iwato i aikai pote ti aru yt ihapytig i rakaria wo watoĩne’en uiwyria’in katupono sa’awy’i yt eweikuap hin i Iesui eipe. Mi’i turan ti yt ihapytig i rakaria ewy eweikupte’en. Yt kat i heremo Tupana etiat uiwyria’in sa’awy’i mekewat e’at pe. Sa’awy’iwuat eiminug sa’ag ko’i yn topyhu’at. Mi’i pote ti yt ihapytig i rakaria ewywuaria wo eweikupte’en. Mi’i pote ti eiminug sa’ag ko’i tukupte’en ne ei’ymyẽpe katupono ti kurin kat Iesui mohey hap kaipyi wyti yt watikuap i mekewat pywuat sese hap. Yt wato’e kuap i pywo sio yt katupono yt watomowato i Iesui mohey hap ahepiat pote. ¹⁰ Pyno uheywyt’in uheinyt’in eiwemu’e ro haty wo mekewat Tupana mi’airo sio uito sio yt hap kuap ehepiat hamo are. Mi’i hawyi ti aru eweimowato ro mekewat seko pakup i eiwanẽtup hawe hawyi ti aru eweikuap ta’yn — Pywo ti rat uito Tupana emiit no areĩne’en e hap eweikuap. Uito ti Tupana mi’airo areĩne’en hap eweikuap. Mi’i hawyi ti aru eweimowato mekewat seko pakup i eiwanẽtup hawe ui’e hap ewy. Mi’i hawyi ti aru eweikuap kahato ra’yn — Pywo ti Iesui wanuat uito hap eweikuap are. Mi’i pote ti aru yt karãpe i ra’yn ewei’atoiat mekewat ahehakyera’at hap mohey hap kaipyi. ¹¹ Mi’i hawyi ti aru mekewat e’at put’ok’e turan — Ereke ro e Tupana. Aikotã aiwy sese pe wato’e — Ereke ro wato’e hap ewy ti aru topyhu’at. Mi’i hawyi ti aru itote watukupte’en na’yn wuat’i e’at pe ra’yn aikope Iesui toĩne’en Aiporekuat no ahehakyera’at hap tote. Mi’i hawyi ti aru Aika’iwat yat pe ra’yn watukupte’en. ¹² Mi’i pytkai yt uipohep hin i eimowe’eg hamo. Yt eweiwaure tei’o Tupana piat einãpin hap ko’i are yn katupono eweikuap ta’yn sa’awy’ite. Mi’i tupono po’og waku watikuap pakup i hap po’og waku. Waku watikuap kahato aipy’a pe. ¹³ Pyno ti waku wuat’i e’at pe pywo ai’e hap yn. Pyno to’iro watuwemu’e i mu’e i kahato iwan miat ete. ¹⁴ Pyno koitywy areĩne’en eipy’asetpe Tupana Pã’ãu uipiit piat wywo ma’ato yt atikuap i karãmuo yt uwe i ra’yn uipiit piat hap. Meiũran ta’at hawyi yt uwe i ra’yn. Koitywy ui’yat toĩne’en ne. Mi’i tupono areĩne’en eimu’e hamo. Pyno sa’awy’iwuat meimuẽwat eimiwaure ko’i koitywy atimopakup i. Moroho’omu’e pakup i ra’yn. Meimuẽwat eimiwaure ko’i ahenoi pakup i ra’yn. Pyno uito ti eimu’e hat. Meiũran yt uwe i mesuwe katupono uheiam iku’uro rakat nuat ne’i. Aikotã ai’yat ipot’i ra’yn hawyi watipun hap ewy areĩne’en. Katupono Uika’iwat Iesui to’e uhepe — Wuat’i e’at pe eieĩne’en hap yt pya i e. Porap yn na’yn eku’uro hap e. Mio tã to’e hamo Uika’iwat tuwemoherep wuat’i e’at pe uhepe. ¹⁵ Mi’i tupono moroho’omu’e po’og po’og katupono uiku’uro hawyi eiwanẽtup hawe uimienoi topyhu’at re — Ta’i Peteru mienoi ewy kahato ti tut irane Aiporekuat Iesui i’e hap ewy ewei’e aru uiku’uro hawyi. ¹⁶ Pywo ti rat uruta’akasa hap sese Iesui ieĩne’en hap. Mi’i kape urueha wo uruta’akasa are. Uruto uruikuap kahato Mi’i Miit katupono uruewyry kahato iwywo are. Iesui hesaika kahato hap uruikuap ta’yn are. Yt urumu’etu wuat hap kaipyi hin i urui’atumu’e eipe Iesui ete are. Pywo ti rat uruta’akasa ra’yn Tupana Mipo’oro Wuat’i Potypot Koro wuat. Waku kahato Mi’i Miit po’og po’og torania miit’in kai are. Uruikuap kahato Mi’i uruewyry at ka’ap hawyi. Uruikuap kahato Tupana Mimõtypot sese Iesui hap. Urumimoherep Iesui etiat ehepe yt urumu’etu wuat hap kaipyi i ma’ato urueha wuat uru’akasa hap kaipyi urui’atumu’e eipe Mi’i Miit sese ete are. ¹⁷ Pyno sa’awy’i Tupana henoi atipy kaipyi uruehamo Tosa’yru etiat tohenoi. Mio tã e Ai’ywot Tupana itote — Mi’i ti Uha’yru sese uimiky’e kahato e. Uimowepit sese Mi’i Miit e. Pywo ti rat uimõtypot kahato hat Mi’i e Tupana teiam ywyhig muo ikytsig nakat ikahu rakat kaipyi mekewat tomõtypot hap teiam kaipyi mio tã e are. ¹⁸ Pyno sa’awy’ite mio tã e Tupana atipy kaipyi uruehamo. Ta’i urutukupte’en Iesui wywo mekewat yity’ok wakuat hap tote turan mio tã to’e. ¹⁹ Sa’awy’iwuaria Tupana ehay moherep haria ti’atumu’e kahato Tupana Mipo’oro Aiporekuat nuat ete. Mesup wẽtup ihay po’og hesaika mi’iria kai katupono koitywy I’ywot ihay atipy kaipyi uruehamo — Mi’i ti Uha’yru sese uimowepit hat sese Mi’i Miit e atipy kaipyi ahowawi. Ta’i Tupana kaipywiat ti sehay po’og hesaika torania irania’in mienoi ko’i kai are. Mi’i pote waku watomohey kahato mi’i e hap katupono mi’i Tupana wẽ kaipywiat sehay sese are. Pywuat sese ti topyhu’at mi’i e hap po’og torania kai are. Mi’i tupono eiwanẽtup kahato o mio tã e Tosa’yru piat hap kape are uiwyria’in e. Katupono ti mekewat sehay ti Tupana ehay moherep haria timoherep kahato Tupana Mipo’oro Aiporekuat nuat hap etiat. Aikotã ariãty i’ypyryp wiat hẽtyhot hap ewywuat. Pyno mi’i sehay eweikuap eipy’a pe Tupana Sa’yru hap mi’i hawyi aikotã at tuwemoherep hune pyi hẽtyhot tuerut hap ewy eipy’a pyi wyti aru hẽtyhot hap tuwemoherep are. Aikotã waikiru wato tuwẽtem hunete mi’i hap ewy eipy’a pyi tuwẽtem hẽtyhot tuerut eweimohey ra’yn Iesui Tupana Sa’yru hap hawyi. ²⁰ Pyno ahenoi hamuat Tupana ehay aikope pyi tut sa’awy’i hap mekewat miwan miat. Pyno ti yt miit’in wanẽtup hap kaipyi i tut are. Yt yne miit’in mikuap kaipyi i tut mi’i wuat are. Yt miit’in mu’etu wuat kaipyi hin i ti. ²¹ Pyno miit’in wakuaria Tupana kuap haria kaipyi ti tuwẽtem Tupana ehay. Sa’awy’i yianmete ta’atuhenoi Tupana Pã’ãu mienoi aikotã aikotã hamuat ko’i. Ta’i Tupana Pã’ãu mienoi ko’i ahepiat ti ta’atumoherep kahato ra’yn.

¹ Sa’awy’i tukupte’en Tupana ehay enoi haria ma’ato ti yt pywuat sese ko’i i te. Mi’i hap ewy te ti mesup tukupte’en ne eimu’e haria heso rakaria eipy’asetpe. Mi’iria ti imoherep yt pywo piat i sehay eima’at hamuat ne’i Tupana etiat. Mi’iria ti — Iesui ti yt Ahehakyera’at hat i e haria. Yt Iesui kaipyi i ti ahehakyera’at hap sa’up e haria. Aiporekuat pun haria ne’i mio tã e haria. Pyno mio tã e haria ti Aiporekuat Iesui atoiat haria. Mi’i haria ti te’eruwe’atu’uka aima’at hap kaipyi. ² Mi’iria ehay aimu’e hap topyhu’at i’atuehay se ma’ato yt pywo piat i. Mi’i hawyi irania’in tuwat i’atumienoi upi. Ta’atunug sa’ag kahato ta’atumu’e haria minug ewy. Mi’i hawyi haryporia’in sehary’i wo haryporia’in wywo i’ewyte ihainia’in se’aito wo ihainia’in wywo hap ta’atunug iwaire waire hap ewy. Yne mi’i tã sa’ag hap ewy ta’atunug. Mi’i hawyi irania’in weha’at haria mekewat pywuat sese hap ete i’atuehay sa’ag sa’ag ne’i meimuẽ waria wẽtup sehay upiaria inug sa’ag hap haria kaipywiat. ³ Pyno ehekat ky’ewi yn eimu’e haria. Ta’i ehekat ta’atuky’esat ei’atumu’e hap eima’at hamuat hap kaipyi. Mi’iria ti eiky’esat ta’atuemiit no i’ewyte ta’atuky’esat torania ta’atupo puo hap ehekare’en eimẽpyt’in. Mi’i tã hap yn ta’atuky’esat. Pyno Tupana toĩne’en ne mi’iria apiheg hamo. Ta’i Tupana toĩne’en eima’at hanuaria moma hanuat. Ta’i Tupana ti yt pya hin i i’atukai i’atu’uka hamo. ⁴ Sa’awy’i sese ti atipy piaria Tupana wywuat hap ta’atu’atoiat kahato ra’yn. Mi’i pote ti yt naku i nug haria te’eropyhu’at mi’iria. Mi’i pote ti Tupana ti’atu’apiheg na’yn. Yt toihep hin i i’atu’apiheg hap kaipyi ma’ato ti aria koro kape toi’okhytpugha atipy kaipyiaria are. I’ypyryp hap kape toi’atupo’oro po’oro are i’atupyhik hap i’ypyryp takat kape. Mi’i hawe ti tukupte’en ta’atupyhik hawe iheg me. Meiũran ti aru put’ok’e mekewat uwe waku uwe yt naku i hap moherep hap e’at pe hawyi Tupana timoherep ta’yn i’atuminug sa’ag ko’i wuat’i puo. ⁵ Sa’awy’i te tukupte’en kahato yt nakuaria mesuwarotiat. Mekewat e’at turan Nu’e wywuaria to’yat piaria 7 ok takaria yn wakuaria Tupana tipuẽti. Mi’i pote mi’iria yn toi’atuehakyera’at. Ma’ato irania’in yt Tupana mohey i haria yt naku i nug haria Tupana ti’atumoma yne yne y’y wato wo i’aman 40 e’at piat 40 wãtym miat tutunug hawyi. Mekewat aha’ase’i Nu’e ti’atumu’e kahato wen — Ewei’atoiat ro eiminug sa’ag ko’i hawyi ewei’aipok to Tupana kape e wen ma’ato yt te’eruwemorem hin i Tupana kape yt ta’atu’atoiat teran i i’atuminug sa’ag hap ko’i pote. Mi’i pote ti Tupana tikaykay y’y kahato i’atu’atu’uka hamo. Mi’i hawyi te’eropap kahato Tupana yt miky’esat ewy i gupte’en haria. Te’eruwe’ãpyhyka ãpyhyka miit’in. Tupana yt ipohep hin i i’atu’apiheg hap ete. Mi’i hawyi aha’ase’i Nu’e’in 8 ok takaria imohey haria yn Tupana ti’atuehakyera’at ra’yn.

⁶ I’ewyte ahenoi teran tawa Sutuma tawa Kumura e hap etiat are. Itotiaria ti yt nakuap i nug kahato haria torania. Sa’ag nug hap kape yn te’eruwanẽtup. Mi’iria ti Tupana timoma ra’yn aria wato wo. Toi’atuwuk kahato i’atu’yat ko’i yne yne i’atuetawa ko’i. Yne yne Tupana tiwuk ta’yn torania. Mi’i hawyi itup yn topyhu’at itote. Mi’i hawyi yt wẽtup ok i topyhu’at itote. Toi’atu’akit yne ra’yn mi’iria. Mi’i tupono koitywy eiminug sa’ag hap kai eiwe’eg wo o. Yt eweiwaure tei’o tawa Sutuma tawa Kumura Tupana piat i’apiheg hap ko’i. Yt nakuaria i minug upiat mi’i tã hap. Mi’iria ti Tupana kuap hap pun haria. Mi’i pote waku i’atu’apiheg hap aimu’e hap aimoken’ẽ hamuat hap topyhu’at are. Mi’i ete ti aimu’e kahato ra’yn aimoken’ẽ hap ete are. Mi’i hawyi watikuap yt naku i nug motiat yt naku i kue pãi ai’e aiwanẽtup hawiat hamo. ⁷ Ma’ato toĩne’en tawa Sutuma pe wẽtup ok Tupana mohey sese hat wakuat nug neran hat Iro e hap het rakat. Mi’i ti Aparãu ywyt sa’yru — Yt naku i yn nug haria mesuwe uhetawa piaria e. Sewaire hap kape yn wanẽtup haria e. Yt naku i kahato atipuẽti mi’iria e Iro tawa Sutuma totiat gupte’en haria minug sa’ag ko’i ete. Iro yt tiky’esat hin i itotiat seko sa’ag ko’i. Mi’i tupono Tupana tiehakyera’at Iro tosaki’yt’in wywo. Mi’i pote mekewat aria yt tu’u hin i iro’in mekewat tawa wuk turan katupono yt toiky’esat hin i i’atuminug sa’ag itotiat hap ko’i. ⁸ Itotiaria yt ta’atunug hin i Tupana miky’esat ewy. I’ewyte yt miit’in miky’e ewy hin i ta’atunug. Ta’i i’atuminug ko’i yt miit’in eko ewy hin i ta’atunug. Mi’i hap ko’i Iro yt tiky’esat i pote Tupana miehakyera’at wo topyhu’at. ⁹ Ta’i Tupana ahehakyera’at kuap kahato ahã’ãg hap kaipyi inug hap kaipyi imohey haria aito pote. Yne mekewat yt tomiky’esat ewywuat i hap ko’i kaipyi aihep kuap. I’ewyte toikuap yt nakuaria i apiheg hap. Pyno ti yt nakuaria i apiheg hamuat Tupana po pe toĩne’en. Ta’i yt pya hin i mekewat e’at Tupana piat — Yt naku i kahato eipe e hamuat hap e’at are. ¹⁰ Tupana timoma yne ra’yn tawa Sutuma tawa Kumura piaria. Katupono Tupana yt tiky’esat hin i i’atuwat i’atuieĩne’en hap. Wuat’i yne ta’atupu’i miky’esat ewy yn ta’atunug wuat’i haryporia’in wywo wuat’i ihainia’in wywo. Ta’atupiit miky’esat hap ko’i yn ta’atunug to’ope to’ope. — Yt kan hamo i Tupana miky’esat hap ko’i ta’atu’e haype. Ta’atumiky’esat ewy yn ta’atunug. Yt ta’atumõtypot hin i Tupana wãi’e hap i’ewyte miit’in wãi’e hap yt ta’atumõtypot i. Yt te’eruwemõti hin i ta’atuminug sa’ag hap ko’i ete. — Atunug mote atunug e haria yn. Ta’i mi’iria ti to’okyry’i kahato ne’i wakuaria ete. I’ewyte atipy piaria ete to’okyry’i. Ta’i atipy piaria ti sakpo’e ikahuria i’ewyte po’og hesaika rakaria. Mi’i pytkai wemu’e haria yt pywuat i enoi haria — Uruto po’og irania’in kai i’atu’e yn i’ewyte mio tã i’atu’e atipy piaria pe. ¹¹ Ta’i atipy piaria ikahu rakaria hesaika kahato rakaria. Ta’i po’og hesaika mekewat eima’at haria kai wen ma’ato yt kat i sa’ag i’atu’e Tupana pe yt pywo piat i henoi haria ete. ¹² Mekewaria ti aikotã miat haiwot rakaria ewywuaria. Aikotã miat wati’auka teran meremo hap ewywuaria mi’iria. Mi’i haype to’okyry’i kahato mekewat wakuap wuat’i mikuap wuat ete. Ma’ato ti yt ta’atukuap i haype. Mekewat seko sa’ag ta’atuminug wo ne’i ti te’eruwe’atu’uka kahato. ¹³ — Urumiky’esat ewy yn urutunug neran i’atu’e sa’ag. Mi’i hawyi miit’in py’asetpuo ihot’ok puo yt naku i kahato ta’atunug irania’in ehamo. Ma’ato Tupana ha’up nug irane i’atuminug sa’ag hap ko’i. Yne i’atumiky’esat ewy ta’atunug hawyi yt te’eruwemõti hin i. Ma’ato eipe ti eiwemõti kahato eweipyhu’at mekewaria te’erenuk eipy’asetpe turan katupono te’eruwemo’ok sa’ag kahato. Ta’i eima’at kahato ti eimi’u wuat te’erenuk turan. I’atupiit mo’ok hap mowepit hap yn ta’atuky’esat. Mi’iria ti te’eruwanẽtup hap ywyk hanuaria. Ta’i sa’ag nug hap ete ti to’omowepit kahato ra’yn. Ma’ato i’atusa’up i’atuminug sa’ag hap ete put’ok’e irane. Ta’i Tupana ti’atusaty’i saty’i irane yt naku i nug hap ko’i ete. Ta’atumoso’opot hap ewy ta’atupuẽti irane. ¹⁴ Mi’iria eha pe ti toĩne’en haryporia’in ihainia’in ky’esat hap ko’i yn ti ra’yn. Mi’iria ti — Ta’i yt karãmuo hin i ti aru ahero aiminug sa’ag wo e haria. Mi’i hawyi Tupana mohey haria yt hesaika kahato rakaria ma’at haria wo te’eropyhu’at mi’iria. Ta’i miit’in ekare’en ko’i ta’atuky’esat yne ta’atuwano hap. Mio tã hap ewy i’atuieĩne’en hap yt naku i kahato. Pywo ti rat mi’iria Tupana mikuasa wuanuaria wo te’eropyhu’at. ¹⁵ Ta’i mi’iria ti mu’ap hãpyk takat atoiat haria wo te’eropyhu’at. Aikotã ga’apy piat ho’owasat rakaria ewy tukupte’en. Mekewat Tupana ehay moherep sa’ag hat Parãu e hap Posu sa’yru upiaria mi’iria. Kat pote Parãu ti ha’up etiat Tupana ywania ma’at hat — Pyno ha’up ewetum uhepe pote kat e kat e hap sa’ag atunug e hat mi’i. Ma’ato inug sa’ag hat ete Tupana ihay pirik kahato ne’i. Wãi’e kahato ne’i Tupana mekewat ete. ¹⁶ Mi’i hawyi Tupana tinãpin yt we’eg i hat wẽ pyi mekewat ihũ wẽ pyi wãi’e Parãu me. Mi’i hawyi ihay mekewat ihũ miit ehay ewy — Wãi’e etiwaure ro eso hap e. Heso’ok takat ewy ereĩne’en e mekewat Iumentu ihay mekewat kat ko’i kat ko’i moherep hat pe mekewat Tupana ehay moherep ran hat pe. ¹⁷ Pyno mekewaria yt pywuat sehay enoi haria i yrasa gag ewy mi’iria. Aiwe’y’utui turan y’y hit’i yrasa kaipyi waku kahato watipuẽti ma’ato wẽtup tuereto igag na’yn pote yt kat i y’y watipuẽti aiwe’y’utui hap monik hamuat. Mio tã hap ewy yt kat i waku watipuẽti mi’iria kai. Aikotã ywyhig ko’i ywytu uato turan hewyry kahato wasere upi hap ewy mi’iria. Ta’i mi’iria eiam ti Tupana tunug na’yn i’ypyryp sese yt wẽtup i’ypyryp ewywuat’i ti i’atueiam Tupana minug. Mi’i hawyi ti aru mi’iria tukupte’en i’ypyryp we yn na’yn wuat’i e’at pe. ¹⁸ Mi’iria i’atuehay se wen ma’ato yt kat i’atu’e pytkai i ra’yn. Ta’i i’atuehay kahato ma’ato kat i’atu’e kat i’atu’e yt watikuap i. — Uruto ti iwe’eg kahato rakaria i’atu’e. Mi’i wo ti ahekyi te’eruwewawi. Mi’i hawyi ta’atupiit ko’i wywo ta’atuma’at ne’i irania’in Iesui mohey pakup haria yt hesaika kahato rakaria i te. Irania’in te’eruwẽtem neran yt naku i nug hawyi ma’ato mi’iria ta’atuiã’ãg kahato irania’in ta’atupiit minug sa’ag wo. Mio wyti ta’atunug aikotã pina puta ewy miit’in pytyk teran haype. Mi’i hawyi sa’ag nug hap kaipyi wẽtem neran haria yt hesaika i pote wo’opyhik hawiat ewywuaria te’eropyhu’at. Mi’i tã me ti ta’atuho’oma’at reran Iesui mohey pakup i haria. ¹⁹ Mi’i hawyi — Eweiwat uruupiat pote ti ren eweikupte’en eimiky’esat ewy e haria. Yt uwe po pe i eweikupte’en e haria ti. Mi’i pote yn ti ren waku kahato rakaria wo eweikupte’en e haria. Ta’i eweiwat uruupiat pote yt uwe i eipo’oro hat e haria. Mi’i tupono po’og waku pe eweikupte’en i’atu’e sa’ag. Ma’ato ti i’atueso kahato ne’i katupono mi’iria yt te’eruwenõ’ẽ kuap i mekewat ta’atuminug sa’ag pyi. Pywo pe ti ta’atuminug sa’ag ko’i eropat haria mi’iria. I’atueko sa’ag ni topyhu’at i’atu’okpe tote i’atu’akit hamo. — Yt uwe i uruka’iwat i’atu’e pytkai i’atuminug sa’ag hap ko’i i’atuka’iwat sese topyhu’at. Pyno ti mi’iria iheg me tukupte’en mekewat seko sa’ag eiam me. Pyno uwe po pe watoĩne’en pote pyno mi’i ti ra’yn aika’iwat no toĩne’en. Yt watoiat kuap i aiminug sa’ag pote aiminug sa’ag topyhu’at aipotypot no ti ra’yn are. ²⁰ Ma’ato tukupte’en yt naku i nug hap atoiat haria Iesui kuap haria ma’ato meiũran te’era’aipok i mekewat sa’awy’iwuat seko sa’ag kape ra’yn mesuwat yi totiaria wemohun hap kape i ra’yn. Mi’i hawyi ti aikotã kiã e’yni pianuaria ewy tukupte’en. Mi’i hawyi ti yt te’eruwenõ’ẽ kuap i ira’yn mekewat ta’atuminug sa’ag hap sa’awy’iwuat kaipyi. Mi’i hawyi ta’atuminug sa’ag hap ko’i po pe i ra’yn tukupte’en. Mi’i hawyi po’og po’og sa’ag sa’awy’iwuat kai te’eropyhu’at. ²¹ Mi’i hawyi ti yt naku i kahato ra’yn tukupte’en. Ta’i po’og waku mi’iria yt karãpe i ta’atupuẽti mu’ap hãpyk takat wakuap nug hap sio ta’atukuap hawyi te’era’aipok i ra’yn sa’awy’iwuat yt naku i nug hap kape. Mi’i hap ewy pote po’og na’yn sa’ag te’eropyhu’at sa’awy’iwuat kai. ²² Aikotã aware te’en hawyi tutu’u i hap ewy are. Hã’ãkap aimikuap awareria etiat hap ewy mi’iria. Aikotã hamaut tuwei hawyi meiũran ta’at i ra’yn ipitpit pe hap ewy tuwei hawyi. Tuwesot sot ihy nem nakat pe hap ewy mi’iria are. Pyno typuat ra’yn uimiwan ewawi.

¹ Typuo ra’yn atipo’oro uimiwan ehowawi uiwyria’in. I’ewyte mesuwat uimiwan aikotã sa’awy’i einãpin hap ewywuat re. Yt eweiwaure tei’o aikotã sa’awy’i ho’owasat rakaria ewy eweikupte’en. Koitywy ti eiwanẽtup hap yt ipitpit hin i ra’yn toĩne’en. Pyno o yt eweiwaure tei’o aikotã sa’awy’i ho’owasat rakaria eweikupte’en eiwanẽtup hawe hap. I’ewyte yt eweiwaure tei’o aikotã meiũran tut eima’at hanuaria ikahuro turan wuat hap ete. Mi’i ti aru Tupana ehay etiat wekyry’i hat e hap. ² Aikotã sa’awy’iwuaria mienoi iwan miat Tupana ehay ewy put’ok’e. Aikotã uruto Aika’iwat Iesui potmu’eria e hap ewy. ³ Tut wyti aru eimu’e hanuaria. Mi’iria ti aru ta’atumiky’esat ete yn eimu’e. Ta’atupiit piat miky’esat sa’ag ko’i hap ta’atunug kahato eiky’ewi i’ewyte ehekare’en ky’ewi. Mi’i hawyi eimimohey Iesui tut aru e hap ete ta’atukyry’i kahato. ⁴ — Yt tut i wyti Eika’iwat Iesui i’atu’e irane ahepe. Pyno eipe i’ewyte sa’awy’iwuaria Tupana mohey haria — Tut irane uruka’iwat ewei’e ra’yn wen ma’ato yt tut i te i’atu’e irane ahepe. Ta’i sa’awy’iwuaria Tupana mohey haria i’ewyte Iesui potpo’ororia 12 ok takaria topap yne pytkai yt tut i te i’atu’e. Sa’awy’iwuat mesuwat mytyp waha’awynug hap ewy ra’yn topyhu’at mesup. Mi’i tupono ti yt put’ok’e hin i irane aiminug sa’ag ai’apiheg hamuat Tupana piat i’atu’e irane mesuwarotiaria wo’okyry’i haria. ⁵ Pyno ti aru te’eruwepyi ra’yn yt iwe’eg i rakaria wo te’eropyhu’at mi’iria katupono mi’iria ti yt Tupana ehay kaipyi i te’eruwemu’e. Katupono Tupana to’e — Sa’awy’i ti waikiru ko’i tukupte’en mi’i hawyi i’ewyte mesuwat yi. Mi’i hap ewy te ti mesuwat yi toĩne’en. Mi’i hawyi y’y toĩne’en mesuwat yi tote. Pyno ti mi’i tã sa’awy’ite toĩne’en y’y yn ma’ato y’y pe yi toĩne’en. Mi’i hawyi meiũran pe’am’e ra’yn yi y’y pyi. Mi’i hawyi y’y tuwepat’ok ta’yn. Mi’i hawyi yi po’og ywaiti y’y kai toĩne’en. Ma’ato i’ewyte toĩ y’y ywyt’okpype. ⁶ Mi’i hawyi meiũran aikotã sa’awy’iwuat ewy y’y i ra’yn po’og iwato mekewat Nu’e e’at pe. Heremo rakaria min’i’atu’e i ra’yn. Mi’i hawyi ti mekewat sa’awy’iwuat yi heremo rakat min’e yne i ra’yn. Mi’i hawyi ti topyhu’at yt sa’awy’iwuat ewy i ra’yn mytyp. ⁷ Aikotã mekewat e’at pe Tupana to’e Nu’e pe mi’i hap ti tutunug na’yn. Ma’ato koitywy ti mekewat sa’awy’iwuat ewy sehay wẽtup te toĩ. Ma’ato ti mekewat yi wuk hap etiat ra’yn Tupana tohenoi — Pyno ti aru meimuẽwat aria wo yi waikiru yne atimoma aria wo e ti Tupana. Aikotã sa’awy’ite atimoma yne y’y wo hap ewy te ti aru. Ta’i tut ti aru mekewat e’at katupono mi’i hap ewy atunug e ti Tupana. Mi’i hawyi ti aru yt nakuap i nug haria apiheg hap e’at put’ok’e ra’yn e ti Tupana are. Ma’ato mio tã e Tupana pytkai yt tut i aru i’atu’e ne’i meimuẽ waria ta’atuwanẽtup hap kaipyi ne’i. ⁸ Ma’ato uimiehakyera’at ko’i uimiky’eria yt eweipyhu’at rei’o i’atuehay upi. Eweikuap to aikotã mekewat Tupana e’at. Ta’i Tupana yt tomorania i ti yne e’at aikotã aikotã hap ko’i. Wẽtup e’at yn ni Tupana po pe toĩne’en aikotã wẽtup 1000 anu hap ewy. Tupana wanẽtup hawe wẽtup e’at wẽtup 1000 anu hap ewy i’ewyte wẽtup 1000 ano wẽtup e’at hap ewy Tupana wanẽtup hawe. ⁹ Katupono sa’awy’itewuat — Atunug aru e hap tutunug na’yn. Pyno ti Aika’iwat wyti sa’awy’iwuat — Atunug aru e hap tutunug na’yn. Yt aima’at hin i are. Ta’i Tupana ti yt waure’e hin i sa’awy’iwuat tehay — Ati’atu’apiheg ti aru yt nakuaria i te hap ete. Ma’ato ahowawi ti iperup’i kahato. Yt tutunug neran i te aiky’e haype katupono toiky’esat yt wẽtup i ho’owasat hap. Yne torania topo piat hap toiky’esat. Kat pote yt meremo i ai’apiheg neran i ma’ato ti hepamo put’ok’e mekewat mio tã e hap. Toiky’esat miit’in te’eruwemorem tewawiat yt naku i pywiat hap haype. Mi’i pote hepamo put’ok’e mekewat — Atunug aru e hap. Yt toiky’esat i miit’in moma hamuat hap. ¹⁰ Ma’ato pywo put’ok’e irane mekewat e’at pe. Ta’i pywo ti aru put’ok’e Aika’iwat piat miit’in apiheg hap. Ma’ato ti karãmuo kat e’at pe yt uwe i ikuap ma’ato ti put’ok’e hamuat. Aikotã sero’ok’e hat ewywuat tut irane. Kat e’at pe yt uwe i ikuap are. Mekewat e’at pe ti aru ikahuro ra’yn wakiru ko’i. Mekewat e’at pe tehay pirik wo toimoweityk ta’yn waikiru ko’i. I’ewyte mesuwat yi tuweityk ta’yn. Mi’i hap e’at pe ti aru yi ihywap ta’yn hakup wote yt aikopiat wẽtup hakup i’ewy’ewy i hakup sese ti ra’yn. Mi’i hawyi ti aru wuk’e yne ra’yn mesuwarotiat miit’in minug sa’ag ko’i. I’ewyte yi ikahuro ra’yn. ¹¹ Pyno uiwyria’in watikuap ta’yn mesuwat yi ihywap irane hap. Mi’i hawyi yt kat i ra’yn. Mi’i tupono waku watomohãpyk yne aiwanẽtup hap ko’i. Mi’i hawyi wakuaria Tupana ewaku hap ewywuat watukupte’en. Waku Tupana kape yn aiwanẽtup hap watukupte’en mesuwarotiat turan. Mi’i hawyi ti aheko pakup wywo yn ra’yn ahewyry waku kat pote wakuaria yn na’yn aito. ¹² Mi’i hawyi ti waku — Eriot ro Mehĩ Eriot ro Mimi wato’e yn na’yn. Mi’i pote ti wateha’at kahato ra’yn Tupana put’ok’e hap e’at kape. Yt pya i ra’yn wato’e yn na’yn. Ta’i wuk’e ti aru waikiru ko’i. Mi’i hawyi ti aru tuweityk yne ra’yn wato’e. Watikuap ta’yn mio tã e hap. Ta’i meiũran ti aru yne ra’yn iheg nakat i’ewyte yt iheg i rakat i ti aru wuk’e ra’yn hakup pote ihywap yne. Ma’ato ti aito watikuap ta’yn. ¹³ Mi’i hawyi i’ewyte Tupana to’e — Atunug ti aru mi’i rẽ wẽtup yi ipakup takat. I’ewyte ti waikiru ko’i ipakup takat ra’yn atunug e. Ma’ato ti aru mi’i hawyi itote sa’awy’iwuat ko’i kai hãpyk sese rakaria yn na’yn. Mi’i hawyi ti aru wakuat nug haria yn na’yn tukupte’en itote Tupana mimoewaku ko’i mio tã wato’e ti aiwo’ope. Uiwyria’in mi’i watikuap ta’yn hawyi ti aru merep ta’yn watiky’esat put’ok’e yi pakup hap i’ewyte waikiru pakup ko’i. ¹⁴ Mi’i pote ti hãpyk yn watiky’esat watoĩne’en Tupana wywuat hap. Irania’in wywuat aiwo’owese hap yn waku watikat. Tupana wywuat aiwo’owese hap yn watiky’esat. Pyno uiwyria’in waku watoĩne’en iwywo mekewat e’at pe. Waku yt kat i i’aparap hap aiwanẽtup hawe. Waku yt kat i yt nakuap i aikai Tupana wanẽtup hawe. Waku yt kat i hin i ra’yn aiminug sa’ag aikawiat ko’i. ¹⁵ Ta’i eweheha’at kahato mekewat e’at pe hekatup turan. Yt perup’i puo hin i ewehekatup ma’ato Tupana miky’esat nug hap ete ewehekatup are katupono Tupana tunug irane to’e hap ewy wen ma’ato yt waure’e hin i ahehakyera’at hamuat hap ete. Toiky’esat wuat’i miit’in ehakyera’at hamuat pote yt merep i tut. Yt tut i te katupono toiky’esat yne eiperia tomiehakyera’at ko’i wo eweipyhu’at hap. Aikotã aheyke’et Pauru henoi hap ewy are. Tuwe’eg hap Tupana kaipywiat wo eimu’e mi’i hat ti meke. Tupana miium ewy kahato eimu’e. Ta’i toiwan kahato ti mesuwat ehowawi. ¹⁶ Ta’i mio tã e Pauru Tupana ut hap etiat tohenoi tomiwan miat. Yne tomiwan me mio tã e. Aimu’e kahato mekewat sehay wo. Pyno niatpo kahato aimu’e wen mekewat sehay wo. Yt watikuap i kahato ti yne aiwy Pauru miwan ko’i. Mi’i pote tukupte’en yt we’eg i haria mekewat Pauru ehay ywyk haria. Mi’i pote ti mehĩ Pauru miwan kaipyi eimu’e wen ma’ato ti yt aimu’e hat Pauru mienoi ewy sese i. Ta’i mi’i haria ti i’atu kahato. Kat pote mekewat Pauru miwan etiat yt wemu’e kahato haria pytkai i are. Mi’i pote Iesui mohey ran haria i’ewyte Tupana mipo’ororia ran nakaria pote Tupana ehay pun haria mi’iria. I’ewyte ta’atuero’ok ta’yn imienoi kat e hap kat e hap. Mi’i hawyi ti ta’atuwanẽtup hap kaipyi ra’yn ta’atunug yt Pauru e hap ewy i. Mi’i hap kaipyi ti te’eruwema’at Tupana ehay ran enoi hap ete. Mi’i hawyi Tupana mimoma haria te’eropyhu’at. ¹⁷ Pyno uhekatuwyria eiwe’eg wo o mi’i haria pupi are. Mi’iria yt aiwy Pauru ewy hin i ta’atuhenoi — Ta’i Pauru e hap mi’i i’atu’e pytkai. Yt ehewyry tei’o i’atuehay upi are. Yt nakuaria i mi’iria are. Yt Tupana miky’esat ewywuat nug haria i mi’iria. I’ewyte yt miit’in miky’esat ewywuat nug haria i. Pyno mesup yianmete uimiwan me ahenoi ra’yn yne yne eimowe’eg hap. Aikotã aru aikotã aru miit’in eima’at reran haria put’ok’e aru ehete hap turan. Mi’iria ti aru wẽtup Iesui e hap ran ta’atumoherep wen ma’ato yt to’e hap ewy hin i are. Karãpe aru meimuẽwat ewywuat put’ok’i’atu’e ehã’ãg hamo mi’i hawyi ti aru — Yt rat ewei’e yn no i’atuepe. — Kopuo yn mu’ap meiko yn mu’ap i’atu’e pytkai ti aru. — Yt rat ewei’e o i’atuepe Iesui ehay sese upiaria uruto ewei’e ro. Eheso i rat ewei’e i ro i’atuepe. Mi’i hawyi ti aru yt eima’at kuap i ra’yn mi’iria. Ta’i mi’iria eima’at teran haype wẽtup sehay upi. Mi’i hawyi awyato ewy tõ’ẽ ei’u hamo. Ta’atuky’esat Iesui mohey hap ahepiat hep hamuat. Ta’atuky’esat watunug yt naku i ta’atuminug sa’ag hap ewy. Eiwe’eg wo mi’iria pupi are. Pyno yt ewei’atoiat tei’o Iesui mohey hetiat hap i’atumimohey wẽtup sehay upi pãi are. Ma’ato iheg me kahato imohey hawe waku eweikupte’en pote waku pe ra’yn eweikupte’en wuat’i e’at pe are pãi.

¹⁸ Pyno eiwemotag o Tupana ehay wo hegyi’at hap kaipyi are i’ewyte Tupana eiky’e hap kaipyi. Ahehakyera’at hat Aipotypot Iesui mohey hamo eiwemotag o. Imohey kahato haria wo eweikupte’en hawyi ihãite kahato rakaria eipe. Imohey hap upi ihay wakuat upi yn atiky’esat eweikupte’en uito are’e ehepe uimiwan me ahenoi.

Uito ti Peteru Iesui potpo’oro sese uito.