PETERU MINÃPIN SA’AWY’IWUAT

¹ Uito ti Peteru Aipotypot Iesui eropat hat sese uito. Uito ti Iesui mipo’oro miit’in mu’e hanuat ihay moherep hat uito are.

Uiwyria’in Iesui mohey haria mesup uimiwan Iesui etiat atipo’oro ehowawi aikope aikope eweikupte’en mesuwat yi wato hap ok tã are. Atipo’oro einãpin hamuat ehowawi tama Puntu puaria i’ewyte yi Karasia puaria kape. Atipo’oro wy ui’e hap yi Kapatusia totiaria kape i’ewyte yi wato Asia puaria kape i’ewyte yi Pitinia puaria kape. Mesuwat sehay miwan miat atipo’oro ehowawi uiwyria’in torania imohey haria kape aikope aikope eweikupte’en hap kape. Sa’awy’i aitoria yne watukupte’en tawa wato Ierusarẽi me ma’ato mesup ahewanĩkaptia aimohan mohan kahato ai’atu’uka hamo mesuwat yi wato hap ok tã are. Mi’i pote atipo’oro ehowawi uimiwan uipotmu’eria aikope aikope wesytpok hap ewywuaria hap kape uimiwan atipo’oro.

² Sa’awy’i sese ti Ai’ywot atipy piat Tupana ai’airo Tosa’yru sese eropat hanuaria wo. Mesuwat yi e’yianmete Tupana aikuap kahato yt uwe i te aitoria mesuwarotiaria pytkai aikuap yne. Pywo ti rat sa’awy’i Tupana to’e tuwepe — Meiũran ti aru atipo’oro Uha’yru sese wuat’i miit’in uiminug ko’i Potypot nuat e tuwepe. Uwe uwe aru topyhu’at Uha’yru mohey haria wo mi’iria ti aru uimimoewaku ko’i wo tukupte’en. Katupono Uha’yru suu wo ati’atumoewaku mi’iria hawyi Uipã’ãu Wakuat atum i’atupiit piat ieĩne’en hanuat e Tupana tuwepe nimo te yt kat i te tutunug ne turan. — Mi’i hawyi Uipã’ãu yne i’atupiit puo atopag i’atumoewaku hamo e ahepe. Mi’i hawyi atiky’esat kahato imohey haria imiky’esat yne nug haria wo hap etiat atiky’esat. Mi’i hap atiky’esat e Tupana Ai’ywot koro sa’awy’i sese atipy piat pe.

³ Sa’awy’i Aipotypot Iesui iku’uro hawyi Tupana timoieĩne’en gu’uro pyi. Sa’awy’i yt watomohey hin i aiku’uro hawywiat aheĩne’en i hamuat hap. Ma’ato mesup koitywy watomohey kahato kat pote Ai’ywot Tupana tihep ta’yn Aika’iwat iku’uro hap kaipyi. Mi’i pote koitywy — Waku kahato En Tupana. Po’og wakuat torania kai uruto’e kat pote egyi’at kahato uruepe. Uruky’e kahato En. Po’og po’og torania miit’in kai uruky’e hat En katupono etihep ta’yn Uruka’iwat hyp hawyi uruto’e. ⁴ Waku kahato En Tupana katupono koitywy urutukupte’en esa’yru’in esaki’yt’in. Mi’i pote ewywo irane urutukupte’en wuat’i e’at pe aru atipy pe e’yat pe. Mi’i tote urutukupte’en kat pote esa’yru’in esaki’yt’in uruto pote. Uruekat atipy piat yt tuweityk kuap i. Yt tuwepik pik kuap i. Yt ikahuro kuap i katupono iheg me toĩne’en ai’yat pe atipy piat Tupana uruto’e. ⁵ Tupana pywo ti rat En yn Uruehakyera’at kuap hat ereĩne’en. Koitywy uruto emẽpyt’in pote Uru’apykok hat kahato En Tupana. Esaika kahato En. Uruimohey kahato En. Meiũran aru yne miit’in tikuap uruimohey kahato En hap Uruehakyera’at Hat En hap. Mi’i pote urutukupte’en aikotã hekat kahato rakat ewy katupono epowat’yp yne tukupte’en urupo pe Tupana. Hekat rakat En ewy urutukupte’en. Yt urui’atoiat hin i aru katupono urumoesaika ra’yn Epã’ãu wo. Mi’i pote yt wẽtup ok i uruto ho’owasat rakaria wo uruto’e ewawi Tupana. ⁶ Urumowepit kahato En. Mi’i pote urutuwehum kahato ewawi Tupana. Uruho’opot kahato wen mesuwe ma’ato yt mot’i i. Uruho’opot hap uruipuẽti tuereto ma’ato tokosap aru uruto’e. Uruiã’ãg kahato ahiag. Urumo’arot’i kahato ahiag. Uruiã’ãg kahato urusatek hap wywo uruto’e Tupana pe.

⁷ Uiwyria’in waku aho’opot hap katupono mi’i kaipyi Tupana tikuap tomohey sese sio yt haria aito are. Mesuwarotiat miit’in tikat kahato mekewat nu mehit rakat hekat kahato rakat kawiat Uru e hap het rakat. Ma’ato i’ytyk kahato i’atumipuẽti yi puat pote. Mi’i hawyi ta’atupag aria pe hawyi ihywap ta’yn hawyi i’ytyk hap toto yne. Mi’i hawyi imehit hawyi ikahu kahato mekewat nu Uru kawiat. Mi’i hap ewy kahato aito uruwyria’in are. Uito ti Peteru uhepiat ho’opot hap uhatek hap miit’in mikyry’i hap aria ewy i’ytyk uhepiat hap ewy hep hamuat. Mi’i hawyi po’og hesaika rakat areĩne’en Tupana mõtypot hamuat. Waho’opot turan mekewat Tupana mõtypot hap Tupana kapiat aiwehum hap po’og po’og aimoesaika sa’awy’iwuat kai are. Meiũran aru Aika’iwat Aipotypot Iesui tuut mesuwat yi kape tuut Morekuat nuat hamo. Mi’i hap e’at pe ti aru aitoria watukupte’en imehit rakaria ewy aikotã mekewat Uru mehit hap ewy are. Kat pote waho’opot hap kaipyi waku pe ra’yn watoĩne’en. Mi’i hawyi aikotã hekat rakaria ewywuaria wo watoĩne’en mekewat nu imehit rakat ewy watoĩne’en mekewat e’at pe aru Iesui ut hap e’at pe ti aru. Mi’i hap e’at pe urumowepit kahato mesuwarotiat uruepiat ho’opot hap katupono yt urui’atoiat hin i Iesui mohey uruepiat hap urusatek pytkai uru’ahyk ahyk pytkai i’ewyte urupyhik pytkai uru’atu’uka pytkai are.

⁸ Ta’i atikuap kahato Iesui uito katupono ara’akasa uito ma’ato eiperia yt ewei’akasa i eheha wo Aika’iwat Iesui. Ma’ato yt ewei’akasa pytkai i eweimohey kahato ra’yn. Mi’i hawyi eimowepit hap kahato toĩne’en imohey hap kaipyi. Mekewat wepit hap Iesui tum tomohey hap kaipyi. Waku kahato mekewat. Yt watimoherep kuap i miit’in me Iesui piat aimowepit sese hap. Ahowapy kahato Iesui mõtypot hap wywo mi’i pote aimowepit kahato po’og torania kai. Yt heremo i ma’ato aipy’a pe toĩne’en aimiky’e sese aimimohey Iesui are. ⁹ Sa’awy’i wo’owy’inug Iesui mohey hap ete. Koitywy watomohey te. Mũki’ite ti aru watomohey te. Sa’awy’i watomohey hawyi ahehakyera’at aipy’a aipiit piat aiwanẽtup hap yne toiehakyera’at. Meiũran aru wuat’i e’at pe ahehakyera’at hap toĩne’en katupono mekewat e’at pe heremo kahato Tupana miium sa’awy’iwuat ahepiat ahehakyera’at hamuat are.

¹⁰ Sa’awy’i sese ahe’yianmiaria Tupana ehay moherep haria henoi kahato aikotã aru Tupana topyhu’at hegyi’at kahato wuat’i ywania piat hap ete i’atuehay. Aikotã aikotã aru tutunug hap ete i’atu’e Iesui etiat. Ta’atumoherep kahato aikotã Tupana ahehakyera’at hap. Ta’atukuap teran sese sa’awy’i ma’ato i’ypyryp hap ewy ta’atukuap. Ma’ato ta’atumikuap ok tã ta’atumoherep Tupana Pã’ãu kaipyi ahepe Iesui ut hap etiat katupono miwan myi sa’awy’iwuaria imoherep Tupana yn mikuap ko’i sehay are. ¹¹ Kat e’at pe aru Aipotypot Iesui tuut e hap kape te’eruwanẽtup kahato ta’atukat kahato. Ta’i sa’awy’iwuaria Tupana ehay moherep haria i’atuehay kahato Aika’iwat Pã’ãu mimoherep ko’i ete. Ta’i ta’atumoherep yianmete aikotã aru Aipotypot iku’uro ho’opot hap rokire hamuat ko’i ta’atuwan kahato miwan me. I’ewyte ta’atuwan kahato Tupana Pã’ãu kaipyi aikotã me Aipotypot wuat’i miit’in potypot no topyhu’at hamuat ko’i ta’atuwan are. ¹² Aikotã i’atumu’etu wuat ewy Tupana Pã’ãu timoherep i’atuepe aikotã aru Aipotypot toku’uro hap e’yianmete toĩne’en hap ko’i aikotã tuwẽtem gu’uro pyi hap ta’atukuap kahato Tupana Pã’ãu kaipyi. Mi’i hawyi put’ok’e mekewat e’at pe hawyi uruepe topotmu’eria sese pe tuwemoherep ta’yn Aipotypot. Mi’i hawyi uruimoherep ta’yn ehepe i’atu’e hap ewywuat sa’awy’iwuat Tupana ehay moherep haria e hap ewywuat. Uruta’akasa yne i’atu’e hap ewywuat Aika’iwat moherep hap. Uruta’akasa yne mi’i hawyi mesup uruimoherep yne Iesui etiat ehepe uru’akasa hap ko’i. Uruimoherep kahato uruehay wywo Iesui etiat Tupana Pã’ãu urupiit piat uruwanẽtup hap ko’i. Uruimoherep mesuwat sehay wakuat Iesui etiat kat pote uruta’akasa ra’yn Tupana Mipo’oro atipy kaipywiat. Koitywy uruikuap Tupana miehakyera’at ko’i wuat aito hap. Mekewat atipy piaria te’eruwanẽtup kahato kat pote sa’awy’i yt uruimohey hin i ma’ato mesup uruimohey ra’yn. Sa’awy’i yt Tupana kape hin i uruwanẽtup hap. Koitywy Tupana kape yn na’yn uruwanẽtup hap. Mi’i hap ete atipy piaria te’eruwanẽtup kahato. Ta’atukuap teran haype ma’ato yt ta’atukuap i kat pote mesup Tupana miehakyera’at ko’i wuat ra’yn mesup uruto are.

¹³ Uiwyria’in meiũran ti aru Tupana tipo’oro Aiporekuat nuat. Tuwemoherep mesuwat yi tote i ra’yn wuat’i ehamo. Mi’i pote waku aiwanẽtup hap Ahehakyera’at hat kape yn watuwanẽtup. Yt naku i aiwanẽtup hap kowo’i kowo’i ne’i. Waku wahekatup kahato Aipotypot hut hap kape iwemoherep hap kape katupono mekewat e’at pe tuut irane Ahehakyera’at hat. Mi’i hawyi iwese kahato ahete hegyi’at kahato ahepe tomohey haria aito pote. Mi’i pote waku aikotã watopag aiwe’ok kytyt hap aipiit ete ahesokpe moheg hamo mi’i hap ewy waku watimoheg kahato aiwanẽtup hap Iesui kape yn hap ewy are ehepe uiwyria’in. Uito ti Peteru are.

¹⁴ Pywo ti rat waku aito Tupana mẽpyt’in no watukupte’en aikotã Ai’ywot miky’esat ewy yn waku watunug are. Waku i’ywot kahato rakat ewy watoĩne’en Sa’awy’i watukupte’en aikotã piku piku ko’i ewy yt i’ywot rakaria ewywuat i watoĩne’en aito uiwyria’in. Ma’ato watunug mesuwarotiaria ainãpin hap ewy yn pote sa’ag ko’i upi yn watuwat. Watunug sa’awy’iwuat aimiky’esat ewy pote yt watunug kuap Ai’ywot atipy piat miky’esat ewy hin i are. Mi’i hawyi mekewat e’at pe yt we’eg hin i haria wo watopyhu’at. Aipiit miky’esat ko’i aiwuk kahato yne yt naku i nug ahepiat hap ko’i. Ma’ato mesup Ai’ywot toĩne’en na’yn. Mi’i hawyi yt piku piku ko’i ewy i ra’yn aito. Mi’i pote waku Ai’ywot atipy piat miky’esat ewy yn waku watunug are. ¹⁵ Ai’ywot atipy piat waku sese rakat. Yt kat i hin i i’aparap hap Tupana kaipyi. Mi’i tupono waku aito Ai’ywot Tupana ewaku hap ewy waku watunug mesuwarote aheĩne’en turan are. ¹⁶ Katupono sa’awy’i Tupana to’e — Uiat uiminug ko’i wyti hãpyk yne e. Yt karãpe i ati’aparap Uito Tupana pote. Mi’i pote atiky’esat kahato eiperia ui’ewywuaria wo e Tupana sa’awy’i tomiwan me.

¹⁷ Pyno eipe wyti Tupana saki’yt’in Tupana sa’yru’in eipe mi’i pote i’ewyte Tupana wywuat ihay rakaria wo eipe pote pyno waku eiwe’eg kahato mesuwarote eiminug sa’ag ko’i pupi i’aparap ehepiat hap ko’i pupi are. Kat pote meiũran Ai’ywot Tupana ti’atu’apiheg kahato yt naku i nug haria sio aitoria hekat rakaria sio yt sio aitoria miit’in akag ko’i sio yt sio aitoria ikuap kahato rakaria sio yt are. Mekewat e’at pe Tupana ti’atu’apiheg miit’in i’atuminug sa’ag upi. Toimoherep yne aiminug sa’ag ko’i. Yt toimõtypot hin i aiminug sa’ag miit’in akag aito pytkai. Mi’i pote ti waku aiwe’eg wo kahato ahepiat i’aparap hap pupi are. ¹⁸ Mi’i tupono waku watikoho kahato aiminug sa’ag ko’i Aika’iwat suu wo. Waku watimoweityk yne aiminug sa’ag ko’i are. Ahekat yt ahehakyera’at kuap i kat pote ahekat yt toĩne’en mot’i i pote. Meiũran ahekat ipyp i’ytyk topyhu’at aikotã ahewahi aiminug imehit rakat ewy Paratu kawiat Uru kawiat ewy. Porap ne’i imehit ma’ato meiũran yt ikahu i hap ewy ra’yn topyhu’at. Mi’i ko’i wo yt watikyi’at kuap i aheĩne’en wuat’i e’at piat hamuat hap are. Uiwyria’in sa’awy’iwuaria ai’ywania ai’ywot’in tikyi’at teran wuat’i e’at piat ta’atuieĩne’en hamuat hap. Kat pote ta’atunug neran Tupana mowepit hamuat ta’atuesokpe ete ta’atumi’u ete ta’atueko ete ma’ato yt put’ok’e hin i mu’ap Tupana kapiat ete. Koitywy watikuap yt mi’i kaipyi i ahehakyera’at hap aheĩne’en wuat’i e’at piat hamuat hap are. ¹⁹ Koitywy watikuap ta’yn mekewat sa’up iwato’in nakat kaipyi ahehakyera’at hap. Ta’i Iesui Aipotypot suu kaipyi yn ahehakyera’at hap. Koitywy watikuap ta’yn Aika’iwat iku’uro aikotã sa’awy’iwuaria ti’auka ta’atuhũria Kuteiru hap ewy. I’atuhũria ikahuria kahato rakat yt kat i ipiit ete sa’ag hap ewy ikytsig kahato rakat ta’atu’auka Tupana mowepit hamo hap ewy Aika’iwat Aipotypot iku’uro. Mi’i hawyi huu ta’at yne itote Tupana kapiat ahehakyera’at hap sa’up mo are. ²⁰ Sa’awy’i sese Tupana to’e tuwepe. Mesuwat yi yt kat i te turan Tupana to’e — Atipo’oro aru Uha’yru wuat’i ywania minug sa’ag sa’up mo e nimo sese turan. Koitywy tuwemoherep ta’yn iku’uro ra’yn Tupana Sa’yru. Aihũ Kuteiru ewy iku’uro. Ga’atpo e’at iku’uro ra’yn Aika’iwat. Howapy hap e’at pe hap ewy iku’uro are. ²¹ Mi’i pote mesup yt niatpo hin i watomohey Tupana aipy’a pe kat pote uruehamo Aika’iwat toihep gu’uro pyi. Mi’i hawyi Tupana to’e itote wuat’i ehamo — Miit’in Ehakyera’at hanuat Mi’i Miit e. Mi’i pote koitywy Iesui yn watomohey ahehakyera’at hamo. Waku wato’e tope — Uruimohey En yn Iesui Uruehakyera’at hanuat waku wato’e Iesui pe are.

²² Uiwyria’in karãpe Aipotypot suu topyhu’at aheha ete aipy ete aiwanẽtup hawe aipiit ete mi’i hawyi ikytsig kahato rakat ewy topyhu’at aikai. Yt sa’awy’iwuat aiminug sa’ag ko’i ewywuat hin i. Mi’i hawyi waku watunug yne Tupana mimoherep tomiky’esat ko’i pywuat ko’i waku watunug. Yt watunug kuap i wen ma’ato Tupana Pã’ãu aimoesaika kahato mekewat pywuat sehay nug hamo are. Waku Tupana Pã’ãu ainug miit’in ky’e sese haria wo yt kat i aheso hap aipy’a piat miit’in ky’e hap wywo ma’ato aipy’a pyi miit’in ky’e sese hap yne ahesaika hap wywo. Waku wati’atuky’e miit’in Tupana Pã’ãu aimoesaika hap kaipyi are. ²³ Kat pote aito Tupana sa’yru’in sese Tupana saki’yt’in sese ewy aitoria katupono Tupana Pã’ãu aity ewy aimoherep pakup i ra’yn. Sa’awy’i aimoherep haria aity ai’ywot. Aipiit nug hap ta’atunug mekewat to’upi’a kaipyi mekewat iã’ỹi kaipyi ainug. Mi’i ti waku kahato wen ma’ato yt toĩne’en mot’i i aipiit. Aikotã aipiit nug haria ewy aiku’uro ne’i are. Meiũran iku’uro ra’yn i’atuminug aipiit ma’ato aiwemoherep pakup i hap Tupana kaipywiat mekewat hã’ỹi Tupana ehay aity ai’ywot ewy topyhu’at. Mi’i ti ainug wuat’i e’at piat aimoieĩne’en hamuat. Yt karãpe i ikahuro Tupana ehay ma’ato toĩne’en wuat’i e’at pe. Mi’i kaipyi aiwemoherep hawyi watoĩne’en wuat’i e’at pe are. ²⁴ Ma’ato aito ti ipu’i kawiat. Aipiit aimikoi ewy katupono meiũran ti aru ipot’i hawyi igag na’yn hawyi iku’uro. Aimimõtypot mesuwarotiat aikotã ipohyt ewy ikahu kahato sa’awy’i ma’ato meiũran ta’at ra’yn hawyi yt ikahu i ra’yn hap ewy topyhu’at. Mi’i hap ewy watoĩne’en mesuwarote aimikoi ewy ipohyt ewy are. ²⁵ Ma’ato Tupana e hap wuat’i e’at pe toĩne’en. Yt aimikoi i yt pohyt pot’i rakat i ewy Tupana ehay. Sehay wakuat tuwemoherep wuat’i miit’in me. Mi’i tã ti sehay wakuat atimoherep ehepe uiwyria’in are.

Uito ti Peteru are.

¹ Pyno uiwyria’in waku watoĩne’en Tupana mẽpyt’in no ipakup i rakaria ewy kurin nakaria ewy. Aikotã mihy sym haria ewy watukupte’en katupono Tupana mimoherep pakup i ko’i ra’yn aito. Mi’i tupono waku watoiat yne aiminug ko’i sa’awy’iwuat yt naku i hap ko’i. Mekewat miit’in ma’at hap ko’i mekewat miit’in mohit hap ko’i mekewat typy sehay nug hap ko’i mekewat irania’in ekat ky’esat hap ko’i mekewat sehay sa’ag nug hap ko’i mekewat miit’in ekat ky’esat hap ko’i uheha’ywywi hap ko’i waku watoiat yne aikotã watoiat ahesokpe yt ikahu i rakat hap ewy waku watoiat. ² Kat pote Tupana saki’yt’in Tupana sa’yru’in sok aito mi’i pote waku watiky’esat kahato Tupana ehay aikotã aimẽpyt hit tiky’esat kahato mihy hap ewy. Pyno watu’u kahato Tupana ehay hawyi ahehãite aikap aipiit hesaika aimotag hap topyhu’at aikotã aimẽpyt pakup mihy ete itag hap ewy. ³ Pyno watikuap kahato mi’u ete aimotag hap. Mi’i hap ewy wahã’ãg Aika’iwat egyi’at hap ete aiky’e hap ete. Mi’i hawyi watikuap ta’yn iwese kahato rakat he kahato rakat Aipotypot Iesui hap. ⁴ Uiwyria’in sa’awy’i mesuwarotiaria ipun kahato haria Aika’iwat ta’atumimohey wuanuat. Aikotã miit’in tikat nu ikahu rakat ta’atu’yat nug hamuat hap ewy. — Wẽtup waku wẽtup yt naku i watikat nu turan. Mi’i hap ewy sa’awy’iwuaria ta’atupugha mekewat nu — Yt naku i meimẽwat nu ai’yat nug no i’atu’e. Mi’i yt kan hamo i ai’yat ha’awy nug hamo i’atu’e. Mi’i hap ewy ti Iesui topyhu’at Tupana mi’airo ai’yat nug nu kawiat hamo. Ma’ato mi’i Nu hekat kahato rakat mekewat ai’yat wuat — Po’og waku torania kai mesuwat Nu e’yat nug hamo e Tupana. Uimi’airo kahato mesuwat Nu e Tosa’yru Iesui etiat. Waku etopag mesuwat Nu sa’awy’iwuat e’yat nug hamo e Tupana ahepe. ⁵ I’ewyte aitoria Iesui mohey haria watopyhu’at nu ko’i ewy Tupana yat nug hamuat hap ewy. Pyno i’atu kahato nu Tupana yat nug hap wẽtup nu uito wẽtup nu en wẽtup nu eipe hap ewy. Tupana yat nu ko’i aito hap ewy watopyhu’at. I’ewyte ti aito Tupana epa’i ko’i ewywuat watoĩne’en katupono ahehay kuap Tupana wywo aikotã sa’awy’iwuaria ta’atu’atu’uka ta’atuhũria hawyi ta’atuwuk Tupana mowepit hamo. Mi’i hap ewy watunug mesup. Watimohey Iesui Aipotypot hawyi Tupana mowepit haria wo watopyhu’at Tupana hũ Aika’iwat pote. Mi’i aihũ watum Tupana pe imowese hamuat imowepit hamo aikotã pa’i ko’i ewy aito. ⁶ Mio tã Tupana to’e sa’awy’i tehay moherep haria wẽ pyi miwan me. Mio tã e — Toĩne’en uhetama pe tawa Ierusarẽi me yity’ok Siãu note aha’awynug uimõtypot yat sese mekewat Nu wato tote mekewat Nu uimi’airo tote mekewat Nu ikahu rakat rote mekewat Nu hekat rakat rote aha’awynug uimõtypot yat sese e. Sa’awy’i sese atopag mekewat Nu yity’ok Siãu tote. Irania’in yt tiky’esat i mekewat Nu ma’ato uwe uwe iky’esat uwe uwe imohey mekewat miit topyhu’at iheg kahato rakat aikotã mekewat Nu totiat e’yat iheg nakat kahato hap ewy. Uwe uwe inug to’yat mekewat Nu tote mi’i pote yt karãpe i ta’at i’atu’yat. ⁷ Ikahu kahato mekewat Nu wato’e imohey haria aito pote. Ma’ato irania’in yt imiky’esat nug neran i haria — Yt kan hamo i mekewat Nu i’atu’e. Yt naku i watunug ai’yat itote i’atu’e. Mi’i hawyi ta’atu’atoiat mekewat Nu ma’ato Tupana yt totoiat hin i. Mi’i pote pyno — Mekewat Nu irania’in mi’atoiat wakuat kahato rakat Uimẽpyt ewywuat e. Irania’in mi’atoiat wo topyhu’at ma’ato Mi’i tote atunug uimõtypot yat koro e kat pote atipuẽti mekewat Nu po’og hãpyk takat torania kai e Tupana. ⁸ Karãpe toĩne’en nu mu’ap tote hawyi wata’at tuereto mekewat nu ete aimõpy’ahak kahato. — Yt naku i mekewat nu aipu’ap tote wato’e ma’ato iheg me toĩne’en. Mi’i hap ewy kahato irania’in yt Iesui mohey i haria tukupte’en Tupana e hap Iesui etiat pe. Ta’atupuẽti mekewat sehay wakuat hawyi i’atumõpy’ahak hap topyhu’at — Yt naku i i’atu’e.

⁹ Ma’ato aito ti aikotã wẽtup ywania Tupana mi’airo wẽtup ywania ewywuat ko’i aito. Kat pote Tupana sa’yru’in saki’yt’in aito. Mi’i pote Tupana ai’airo tepa’i ko’i wo ma’ato yt mesuwarotiat pa’i ko’i ewywuat i. Katupono aito morekuaria ewy watopyhu’at Tupana wanẽtup hawe. Aitoria aikotã wẽtup tama piaria ewywuat Tupana e’yi ka’iwaria aito. Aiwanẽtup hap ko’i yt mesuwarotiaria minug ko’i mesuwarotiaria wanẽtup hap ko’i ewy hin i. Mi’i pote — Eiperia yt miit ewy i i’atu’e ahepe. Mi’i pote Tupana mõtypot hap yn watiky’esat mesuwarote. — Waku kahato Uruetupana wato’e irania’in me. Sa’awy’i urutukupte’en aikotã i’ypyryp we hap ewy. Ma’ato mesup urutukupte’en hẽtyhot puo hap ewy. Sa’awy’i Tupana yt heremo hin i uruepe. Koitywy heremo hap ewy urupy’a pe uruimohey pote. ¹⁰ Sa’awy’i watoĩne’en aikotã piku piku ko’i ewy yt i’ywot i yt ity i rakaria ewy. Ga’apy piat hewyry rakaria ewy yt uwe ywania ewy i ahewyry. Ma’ato watomohey Aika’iwat Iesui hawyi Tupana ainug tosaki’yt’in sese tosa’yru’in sese wo ra’yn. Mi’i hawyi Tupana ywania wo watopyhu’at. Sa’awy’i yt uwe i aiky’e haria — Yt kan hamo i eipe i’atu’e ahepe. Ma’ato koitywy Tupana miky’e ko’i kahato aito. Ahehakyera’at ra’yn Tupana yt ahewaku pytkai hin i aiky’e. Mi’i pote Tupana etama puaria aito watopyhu’at.

¹¹ Uito ti Peteru. Uimiky’eria sese eipe. Mi’i pote atiky’esat kahato ewetunug uimiky’esat ewy. Atiky’esat kahato ewei’atoiat yne ehewaire hap ky’esat hap ko’i eipiit miky’esat sa’ag ko’i. Karãpe wẽtup ok ehã’ãg hawyi — Yt atiky’esat i ewei’e. Ta’i aimiky’esat sa’ag ko’i aipy’a piat toĩne’en at ka’ap hawyi meiũran yt kat i Tupana ky’e hap toĩne’en aikai kat pote mekewat aimiky’esat sa’ag ko’i tu’uka kahato Tupana miky’esat hap wywo aipy’a pe. Mesuwat rotiaria ewy yt naku i watopyhu’at kat pote atipy piaria aito pote. Ahewyry mesuwarote wen ma’ato ahetama sese yt mesuwarote i. Mi’i pote yt naku i irania’in miky’esat ewywuat watunug sa’ag i’atuwywo. ¹² Irania’in te’eraha’at kahato ahowawi sio pywo pe watomohey sio yt hap kape. Mi’i pote aheĩne’en hap mesuwarote aikotã Iesui ewy hãpyk kahato rakat ewy waku watopyhu’at are. Uiwyria’in waku watunug hãpyk kahato i’atuehamo. Mi’i pote meiũran ho’opot hap e’at put’ok’e i’atuete hawyi meremo ta’atumohey aikotã aito hap ewy. Mi’i hawyi Tupana mõtypot hap ete aikotã ai’ewy tukupte’en hãpyk kahato watunug wakuat pote. Mesup i’atumikyry’i hamo watoĩne’en watomohey Iesui pote — Yt naku i nug haria i’atu’e ma’ato yt pywo pe i. Katupono aikotã wẽtup ywania mi’iria tukupte’en yt Tupana ywania hin i yt ai’e hap ewywuat i mi’iria. ¹³ Pyno watoĩne’en mesuwarote turan waku watunug aika’iwaria piat aipo’oro hap ok tã ahetu’isa piat aipo’oro hap ok tã ai’akag ko’i piat aipo’oro hap ok tã. Mi’i watunug pote ai’akag sese atipy piat mõtypot haria wo watoĩne’en. — Wãi yt etunug nei’o i’atu’e pote pyno — Waku wato’e. — Mi’i tã o etunug i’atu’e pote pyno — Waku morekuaria wato’e. ¹⁴ Morekuaria ti Tupana mi’airo ko’i tukupte’en. I’atuesurara’in i’ewyte Tupana mi’airo ko’i tukupte’en. Mi’iria tukupte’en yt naku i nug mupiat monik hamuat mesuwat yi totiat. I’ewyte waku nug haria mõtypot hamuat. Mi’i hamo ta’atu’airo mesuwarotiaria morekuaria tu’isaria aipowyro hamuat. ¹⁵ Mesuwat rotiaria yt iwe’eg i rakaria i ihay sa’ag nakaria aimohit reran ta’atuehay wuat rakaria ma’ato wati’atunug wakuat kahato yne miit’in kape hawyi yt i’atuehay sa’ag kuap i po’og ahete. Mi’i hap ewy Tupana tiky’esat kahato. ¹⁶ Pyno pywo pe ti aitoria Iesui mohey haria watukupte’en aikotã yt kat i i aipyhyp hap ewy kat pote Tupana eropat haria watukupte’en Tupana miky’esat watunug i’e hap ewy pote. Yt naku i wato’e morekuaria pe — Pyno yt po’og i atunug emiky’esat ewy katupono mi’i hawyi ti aru Tupana miky’esat ewy yn atunug yt naku i wato’e. Yt naku i wato’e aika’iwaria pe — Uito Iesui eropat hat mesup pote yt atunug i po’og emipo’oro ewy naku i wato’e ahetu’isaria pe. ¹⁷ Waku wati’atumõtypot yne mesuwarotiat miit’in. Yt naku i watimohit mesuwarotiaria miit’in. Waku i’ewyte wati’atuky’e kahato yne Iesui mohey haria aikotã wẽtup yat piaria ewy waku watukupte’en. Waku wato’oky’e aikotã watiky’e aheywyt’in aheinyt’in aheyke’et’in aikywyt’in aikypy’yt’in aheki’it’in watiky’e hap ewy. Waku watimõtypot kahato Ahetupana yne aiky’e hap wywo. Waku tyry’wato’e aipy’a pe Tupana pupi. I’ewyte waku wati’atumõtypot kahato mesuwarotiat aiporekuaria are. ¹⁸ Uiwyria’in toĩne’en aika’iwaria ahetu’isaria aiporekuaria mesuwarotiaria iwese kahato rakaria. I’ewyte toĩne’en yt iwese hin i rakaria. Toĩne’en wakuaria i’ewyte toĩne’en yt nakuaria i. Mi’i pote woroho’onãpin eipe. Waku ewetunug eika’iwaria ehetu’isaria eiporekuaria miky’esat ewy sio iwese rakaria sio yt sio ipy’ahak takaria sio yt hap. Pyno waku watopyhu’at i’atueropat haria wo i’atumõtypot hanuaria wo aito Tupana eropat haria aito pote. ¹⁹ Karãpe irania’in mesuwarotiaria aimohit kahato ta’atuehay wo ai’apiheg kahato yt kat i watunug sa’ag pytkai ahaty’i haty’i kahato ta’atuwepyi mi’i hawyi yt watipoepyk hin i i’atuewawi. Yt kat wato’e i. Watimohey te ti Tupana. Mi’i hawyi mi’i hap watunug pote Tupana — Waku kahato eipe e ahepe. ²⁰ Karãpeĩ watunug yt naku i hawyi surara’in morekuaria ai’apiheg kahato aiminug sa’ag sa’up ta’atuium kahato ahepe. Mi’i hap e’at pe yt waho’owesat kuap i kat pote yt naku i nug haria aito pote. Ma’ato karãpe morekuaria esurara’in ko’i ai’apiheg yt kat i watunug sa’ag pytkai Iesui mohey haria aito pote mi’i turan yt wati’atuwesat i pote yt watuwemõpy’ahak i. Waku watuwehum yn Tupana kape ai’apiheg turan. Mi’i watunug pote Tupana mõtypot hap sese topyhu’at ahepe — Waku kahato eiperia e Tupana ahepe. ²¹ Aika’iwat Aipotypot Iesui sa’awy’i ho’opot kahato miit’in i’atumikyry’i kahato tuwete. Yt kat i tutunug sa’ag pytkai ta’atu’ahyk ta’atu’auka ma’ato yt kat i to’e sa’ag i’atuepe. Yt toi’atupoepyk hin i mi’i tã ta’atunug pytkai kat pote toimoherep teran ahepe aikotã waku watunug ai’apiheg haria pe hap. Toiky’esat kahato watunug tominug hap ok tã toiky’esat. Mi’i hap kape aikaykay aikotã topiat ho’opot hap ewy hamuat hap kape. ²² Pywo pe ti rat Aika’iwat yt kat sa’ag hin i tutunug pytkai ta’atu’auka. Yt wẽtup sehay sa’ag tutunug towẽ pywiat pytkai i ta’atu’ahyk ahyk Aika’iwat are. ²³ Ta’atumohit kahato Aika’iwat Iesui ta’atuehay sa’ag wywo ma’ato yt kat i i toi’atuwesat sa’ag. Yt toi’atupoepyk hin i sa’ag wywo. Ta’atu’ahyk ahyk Iesui turan ho’opot kahato tepiat turan yt kat e hin i i’atuepe — Meiũran woroho’o’ahyk eipe yt e i ma’ato to’e Tupana pe — Atikuap Papai aikotã aru uhewaku hap etimoherep wuat’i ehamo. Ewẽ pyi yn waku uwe waku uwe yt enoi hamo. En yn etikuap e Iesui To’ywot pe. ²⁴ Pywo ti rat Aika’iwat Iesui tuut irane kat pote yne aiminug ai’apiheg sa’ag ko’i yne miit’in mesuwarotiaria minug sa’ag ko’i topyhu’at Aika’iwat piit pe. Mekewat aria’yp tote toho’opot kahato topiit ete. Tupana mi’apiheg wo topyhu’at. Tuwepyi Aika’iwat yne Tupana piat ai’apiheg hap aiminug sa’ag ko’i u hamo tuut. Mi’i hawyi ai’apiheg hap yne topyhu’at Iesui piit ete mekewat aria’yp posak tote. Ipiit ete yne topyhu’at Tupana kaipywiat ai’apiheg hap ko’i ai’ahyk ahyk hap tutu’u yne. Haty kahato tuete. Mi’i hawyi aimoehãite hamuat hap topyhu’at. Haty hap yne tutu’u yne hawyi iku’uro aheiam me. Aiku’uro hap tutu’u yne. Mi’i pote aito watoĩne’en iku’uro rakaria ewy iwywo mekewat aiminug sa’ag ete. Yt ahesaika i po’og aito watoĩne’en. Aikotã iku’uro rakat yt wahã’ãg kuap i yt naku i nug hamo hap ewy. Mi’i hap ewy watopyhu’at mesup. Ma’ato wakuat yn sake i watunug kuap mesup kat pote watuwẽtem gu’uro pyi Aika’iwat wywo hap ewy. Mi’i hawyi waku nug haria wo watopyhu’at iwywo. ²⁵ Ma’ato sa’awy’i aitoria watukupte’en aikotã aihũria mi’apykok ko’i ewy piku piku ko’i ewy aikotã aihũria Kuteiru ko’i ho’owasat ga’apy piat hap ewywuaria watukupte’en sa’awy’i. Ma’ato mesup aitoria Aika’iwat Koro hũria wo watukupte’en. Mi’i ti ai’apykok hat akag. Mi’i upi ti watuwat atipy kape Ahepa’i Koro Mi’i Miit Iesui pote are.

¹ Pyno waku watunug morekuaria miky’esat ewywuat. I’ewyte waku etunug e’aito miky’esat ewywuat uheinyt’in are. E’aito toĩne’en pote etunug o imiky’esat ewywuat. Ma’ato e’aito yt Iesui mohey hat i pote i’ewyte waku etunug imiky’esat ewy. Mi’i tã etunug mote meremo etekyi Iesui mohey hap kape. Kat pote te’eraha’at kahato ewese hap kape ma’ato yt ehenoi hin i Tupana ehay tope pytkai. Eheĩne’en hap ikahu rakat kaipyi topyhu’at Iesui mohey hano sa’awy’i yt tutunug neran hin i Tupana ehay pytkai are. Mi’i pote waku etunug e’aito e’akag wo uheinyt’in are. ² Waku etum epiit e’aito pe yn yt kat i ewaire waire hap wywo. Mi’i hawyi waku etimõtypot kahato e’aito. Mi’i hap kape teha’at hawyi meremo ehekyi kuap Iesui kape. ³ Mi’i hawyi waku ewepainug hap ko’i eipy’a pe eiwese hap wywo ewepit hap wywo eiwanẽtup hawe. Waku pe eweikupte’en Tupana miky’esat ewywuat. I’ewyte eweikupte’en hekat rakat ewy mekewat ewepainug hap wuat’i e’at piat hap ewy. Waku ewetopag wahi ko’i eimokahu hamuat eiwanẽtup hap ikahu rakat. I’ewyte eipy’a piat ikahu hap ewywuat are. Irania’in haryporia’in mesuwarotiaria te’eruwanẽtup ta’atukahu hap kape yn ta’atupiit kape yn te’eruwanẽtup. ⁴ Ta’atukyi’at ta’atuekat ikahu kahato rakat mekewat mehit rakat hekat rakat kawiat Uru kawiat saity ko’i hawyi ta’atupag yne ta’atu’asap ta’atupiit ko’i ete Uru imehit rakat yn ta’atupag. Te’eruwepainug kahato wen ma’ato ta’atupiit ete yn. Ma’ato eipe waku po’og ewetunug eipy’a pe ehekat ikahu hap eiwanẽtup hawe eiwese hap eiwepit hap ko’i. Mi’i ewetunug mote ikahu rakat sese wo eweikupte’en Tupana wanẽtup hawe. Hekat rakaria sese wo eweikupte’en Tupana wanẽtup hawe Tupana miky’esat ewy ewetunug mote. ⁵ I’atu kahato sa’awy’iwuaria haryporia’in Tupana mohey haria wakuap nug kahato haria are. Mi’iria inug kahato ta’atue’aito miky’esat ewywuat. Ta’atue’aito eropat haria kahato mi’iria tukupte’en. Mi’iria te’eruwepainug kahato Tupana mohey hap wywo. ⁶ Sa’awy’i sese ahehary mana Sara tunug yne aha’ase’i pot Aparãu miky’esat ewy. — Uika’iwat en e te’aito pe. Pyno waku haryporia’in eweikupte’en ehehary pot ko’i ewywuaria wo. Pywo ti rat ewetunug ehe’aito miky’esat ewy ewetunug wakuat pote yt uwe i pupi i eweiken’ẽ aru are. Yt kowo’i kowo’i hin i eiwanẽtup hap topyhu’at kat pote eika’iwat ehe’aito topyhu’at pote. ⁷ I’ewyte woroho’onãpin neran yne eipe mehĩ’in. Toĩne’en ehary’i pote mio tã are’e ehepe — Eiwe’eg wo o yt eiwe’eg i hap pupi are. Ereĩne’en ehary’i wywo aikotã iwe’eg nakat ewy are. Etimõtypot ro ehary’i are. Epiit po’og hesaika ehary’i kai pote etipowyro ehary’i epiit wywo. Pyno wẽtup miit ewywuat eweikupte’en mote waku eweiwat atipy kape eiwo’oky’e hap wywo eiwo’owese hap wywo eiwo’ogyi’at hap wywo are. Waku wo’omowepit haria wo eweikupte’en. Mi’i ewetunug mote karãpe ehehay Tupana kape ehehary’i wywo hawyi meremo Tupana eiwesat eipe wẽtup miit wanẽtup hap ewy eweikupte’en mote.

⁸ Pyno mesup ahenoi teran uiwenãpin hap yne Iesui mohey haria pe. Mio tã are aikotã wẽtup miit ewy waku eweikupte’en eiwanẽtup hawe. Waku wo’oky’e kahato haria wo eweikupte’en are. Waku eipy’a pe eiwo’oky’e eiwo’ope are. Waku eiwo’oky’e Iesui mohey haria pote aikotã eheywyt’in eheyke’et’in eheinyt’in ky’e hap ewywuat are. Aikotã eikywyt’in eikypy’yt’in eheki’it’in ky’e hap ewy wẽtup mẽpyt’in sok ewy waku eiwo’oky’e are. Karãpe ho’opot hap put’ok’e wẽtup ok Iesui mohey hat ete hawyi etipowyro o mi’i. I’ewyte karãpe irania’in hatek pote etipowyro mi’i eipy’a pyi iky’e hap wywo. Waku eweikupte’en eiwese kahato irania’in etiat rakaria wo. Waku ewei’e irania’in Iesui mohey haria pe — Wẽtup yn aimimohey uhyt mana ewei’e o are. Ereke uhyt mana mimi ewei’e. Era’apyk o ewei’e. Mi’i hawyi hegyi’at rakaria wo aru eweikupte’en Iesui mohey hap wywo are. ⁹ Karãpe Iesui mohey haria irania’in yt i’atuwese i ehete hawyi waku eweikupte’en iwese rakaria wo. Yt eweipoepyk tei’o irania’in tunug sa’ag ehetiat pote. Ta’atunug sa’ag hawyi — Waku ewei’e emohit mi’iria pote. Eti’atumõtypot mi’iria uhyt’i’in mana’in. Mi’i tã ewetunug mote Tupana mipoityro ko’i wo eweikupte’en. Yne Tupana ekat topyhu’at eiwanuat atipy pe. Mi’i tã ewetunug mote — Woroho’opoityro eipe e Tupana ahepe. ¹⁰ Uiwyria’in eweikupte’en mesuwarote iwese kahato rakaria wo iwepit sese rakaria wo eweikupte’en are. Ma’ato eheĩne’en hap mesuwarotiat i’ewyte wepit hap ikahu sese hap ko’i eweiky’esat pote eiwenãpin ihay nug hap ete irania’in wywo. Eweimu’e ro ehẽku sehay wakuat nug hamo are. Karãpe ehẽku ihay teran sa’ag nug hap ete pote — Wãi’ewei’e o ehẽku pe. Karãpe ehẽku timohit reran irania’in mote — Wãi’ewei’e o ehay sa’ag nug hap ete. ¹¹ Waku eweimu’e ehẽku sehay iwese rakat nug hamuat hap ete miit’in wywo. Mi’i hawyi eimowepit hap mesuwarotiat eweipuẽti Tupana kaipyi are. Yt naku i aiwẽ pyi ahehay haiug nakat yt iwese rakat i yt hẽ’ẽ i rakat. Waku watuwemu’e sehay miit’in mowepit hamuat e hap nug hamuat ete are. Waku wati’atoiat yne aiminug sa’ag ko’i aimiky’esat ko’i aiminug sa’awy’iwuat hap ewy. Mi’i hawyi waku watikat at ka’ap wo’owese nug hamuat hap. Aikotã watimohan miat yne ahesaika hap wywo hap ewy. Mi’i hap ewywuat yne ahesaika hap wywo watimohan aiwo’omowepit hap are. ¹² Ta’i uiwyria’in Tupana tikuap kahato uwe uwe topyhu’at waku nug hat waku wanẽtup hat iwese rakat. Mi’i hat kape Tupana ewaure ka’a tuwehik kahato. Tupana tikuap kahato mekewat miit miẽtup ko’i. Mekewat miit ihay hawyi meremo Tupana tiwesat. Ma’ato irania’in yt naku i nug haria ete Tupana yt tuwehum hin i i’atuewawi ma’ato topyhu’at yt naku i nug haria ewanĩkap mo are. ¹³ Watunug Tupana miky’esat ewy pote waku mekewat watimohan kahato inug hamo kat pote yt uwe i mesuwarotiat aima’at kuap hat topyhu’at.

¹⁴ Uiwyria’in karãpe mesuwarotiaria yt i’atuwese i kahato ahete waku nug haria aito pote waku watuwemowepit mesuwarote. Yt naku i watoken’ẽ i’atupupi. Yt naku i aiwanẽtup hap kowo’i kowo’i mi’iria pupi. ¹⁵ Waku po’og watimõtypot Tupana aipy’a pe. Mi’i hawyi waku watikat sehay wakuat aiwanẽtup hawe yne miit’in wesat hamuat hap. Karãpe put’ok’e wẽtup ok ahowawi hawyi to’e ahepe — Kat pote etimohey Iesui. Mi’i hawyi waku watimoherep i’atuepe aimimohey Iesui ahehay perup’i puo yt kat i — Uito po’og eikai ai’e hap wywo. Ma’ato aikotã paa’e haria ewy waku wati’atuekyi miit’in aimimohey Iesui kape. ¹⁶ Uiwyria’in waku watoiat yne aiminug ko’i aiwanẽtup sa’ag hap ko’i. Mi’i hawyi waku ahewyry yt kat i haty aipy’a piat wywo aiwanẽtup hawiat aiminug sa’ag wywo. Mi’i hawyi karãpe irania’in i’atu’e sa’ag kahato ahete i’atueso hap kaipyi yt kat i aiwemõti hap topyhu’at kat pote watikuap yt kat i i sa’ag watunug pote. Watikuap Aika’iwat Iesui miky’esat ewy watunug mesuwarote pote. ¹⁷ Pyno Tupana tiky’esat tuereto ho’opot ahepiat hap waku nug haria aito pote. Mi’i hawyi mesuwarotiaria ahaty’ihaty’i haria wo tukupte’en. Karãpe ho’opot hap toĩne’en waku nug haria aito pote mi’i pote waku watuwehum Tupana kape. Ma’ato karãpe aito Iesui mohey hat pytkai watunug sa’ag mote mesuwarotiaria ahaty’ihaty’i hawyi haty sese hap topyhu’at kat pote yt watuwehum kuap i Tupana kape. ¹⁸ Sa’awy’i Aipotypot Aiporekuat Iesui miit’in mikyry’i hamo topyhu’at mesuwarote aikotã aikotã ta’atunug sa’ag tuwete waku rakat pytkai ta’atu’auka. Ma’ato yt kat i sa’ag tutunug pytkai toho’opot kahato. Ma’ato aiminug sa’ag upi toho’opot. Iesui hãpyk kahato rakat ma’ato iku’uro yt hãpyk i rakaria mohãpyk hamo. Iku’uro mu’ap nug hamo To’ywot Tupana kapiat mu’ap nug hamuat. Koitywy toĩne’en mu’ap Tupana kapiat Iesui ho’opot hap kaipyi. Yt hãpyk i sese rakat toimohãpyk kuap ta’yn. Pyno ipiit iku’uro aria’yp posak ete ma’ato mi’i hawyi Tupana Pã’ãu timoieĩne’en Aika’iwat. ¹⁹ Iku’uro aria’yp posak ete hawyi Iesui toto aikope miit’in pã’ãu sem tukupte’en hap kape aikope miit’in pã’ãu sem tukupte’en i’atupyhyp hap kape toto. Mi’i tote toimoherep i’atuepe tehay ikahu rakat toku’uro hawyi. ²⁰ I’atu kahato miit itote yt naku i nug haria. Mi’i haria kape toto. Aikope tukupte’en Nu’e mimu’eria. Sa’awy’i Nu’e ti’atumu’e mi’iria. Tutunug mekewat yara wato koro turan toi’atumu’e ma’ato yt ta’atumohey i. Tupana ti’atuky’esat kahato mi’iria tuwewawiat hap. Toi’atuekyi kahato Nu’e ehay wo ma’ato yt ta’atumohey i. Mi’iria kape Iesui toto toku’uro hawyi aikope tukupte’en iku’uro rakaria hap kape. Mi’i hawyi toimoherep i’atuepe mekewat sehay wakuat. Katupono sa’awy’i mesuwat yi tote Nu’e’in yn Tupana miehakyera’at ko’i topyhu’at. Mekewat yara wato pe tukupte’en 8 ok yn Nu’e’in ko’i. Mi’i hawyi i’aman iwato ti’atu’uka yne mesuwarotiaria ma’ato mekewat Nu’e minug yara wato ti’atuehakyera’at 8 ok takaria katupono mekewat yara wato pe tukupte’en Nu’e’in mekewat y’y wato yowa tote. ²¹ Mi’i hap ewy kahato ahet’ok hap topyhu’at. Y’y piat wateke aikotã Iesui iku’uro hap ewy. Watuwẽtem y’y pyi hawyi aikotã Iesui tuwẽtem gu’uro pyi hap ewy watoĩne’en. Ma’ato mekewat y’y yt aikoho kuap i aipitpit ok hap aiminug sa’ag ko’i ma’ato ahet’ok hap watunug hawyi yt kat i haty hap aiwanẽtup hawe kat pote Tupana miky’esat ewy watunug aikotã Nu’e ewy y’y sakpo watuwat ahe’yara puo hap ewy. ²² Mesup ta’yn Aheyke’et Iesui teke ra’yn atipy pe. Koitywy ta’apyk Tupana po sese kai ta’apyk. Mi’i tote Tupana mimõtypot no topyhu’at — Koitywy Uha’yru woronug En wuat’i miit’in Akag wuat’i porekuaria Akag wuat’i atipy piaria akag wo woronug En e Tupana Tosa’yru pe. Yne esaika hap atum epe e Tupana Tosa’yru pe Iesui pe.

¹ Pyno uiwyria’in Aipotypot Iesui ho’opot kahato topiit no mesuwat yi tote ma’ato yt tominug sa’ag upi hin i toho’opot miit’in mi’apiheg wo ma’ato aiminug sa’ag upi i toho’opot ai’apiheg hap upi. Pyno waku watuwanẽtup Aika’iwat ewy waku waho’opot irania’in ehakyera’at hamo hap ewy. Karãpe watimowepit aipu’i hawyi yt kat i aho’opot hap watiky’esat wen ma’ato yt kan hamo i watoĩne’en katupono aipiit miky’esat sa’ag hap yne watunug. Po’og waku watunug Iesui miky’esat wakuap ko’i are. Po’og waku waho’opot Aika’iwat ewy miit’in ehakyera’at hamo are. ² Ma’ato yt naku i watoĩne’en mesuwarote aiku’uro hap kape yt naku i nug hanuaria wo aikotã sa’awy’i yt watomohey i te Iesui turan wuat ewy are. Yt naku i aipiit miky’esat sa’ag watunug. Ma’ato watunug mote yt kat hamo i watoĩne’en. Waku watoĩne’en mesuwarote Tupana miky’esat nug hamo Tupana mowepit hamo are. ³ Sa’awy’i yt aiwe’eg hin i yt watikuap i te Iesui turan. Sa’awy’i aimiky’esat yn watunug i’ewyte irania’in mesuwarotiaria miky’esat ewy yn watunug. Mekewat e’at pe yt watikuap i Iesui te turan yt watunug hin i Tupana miky’esat ewy. katupono watunug at ka’ap irania’in miky’esat ewy yn watunug. Ta’i yt Tupana kuap i haria miky’esat ewy yn watunug. Mi’i turan watunug ahewaire waire hap yn aiwanẽtup hawe. Aipiit miky’esat sa’ag ko’i yn watunug neran mekewat e’at pe. I’ewyte mahy u hap at ka’ap hap watiky’esat watunug mekewat e’at pe. Watu’uka teran yne miit’in wywo ahehay wo aipiit wywo yt aiwese hin i. — Uito po’og e hap yn aiwanẽtup hawe. Ta’i sa’awy’i ienuk hap nug hap kape yn watuwat. Yt miit’in ewywuat i watenuk. Ai’ok hap sakpo watenuk mekewat e’at pe. Mi’i hawyi ahetupanaria sem karania ahetupanaria sa’awy’i aheĩne’en hap yt watikuap i Iesui turan. ⁴ Koitywy aiwyria’in sa’awy’iwuaria — Kat pote uru’atoiat i’atu’e. Kat pote yt etunug i te aikotã sa’awy’i etunug hap ewy i’atu’e. To’iro uhyt’i’in mana’in pĩ’ã’in kurum’in i’atu’e ahepe ma’ato — Yt wato’e. To’iro i’atu’e ma’ato yt watuwat i hawyi i’atuehay sa’ag ahete. Ta’atuky’esat watunug sa’ag aikotã ta’atunug hap ewy. ⁵ Ma’ato aito yt watuwat i i’atupi mekewat sa’ag nug hamo kat pote watikuap ta’yn tuut irane yt pya hin i Aika’iwat Iesui ut hap. Mi’i hawyi toipo’oro miit’in aikotã aikotã imohey hap etiat kuap hamo. Wẽtup kai totopag yne tomohey haria. Wẽtup kai yt tomohey haria i ko’i totopag. Mekewat e’at pe toimoherep wuat’i ehamo uwe waku uwe yt sio watoĩne’en sio aiku’uro hut turan ma’ato yne miit’in sio toĩne’en wakuaria ihãite rakaria sio iku’uro rakaria toipat’ok mekewat e’at pe. Towanuat sio yt towanuat ko’i i hap moherep hamo toipat’ok. ⁶ Mi’i pote toto toku’uro hawyi aikope miit’in pã’ãu tukupte’en hap kape wo’opyhyp hap kape toto toku’uro hap totepyi mekewat Nu’e mimu’eria mu’e hamo. Yt ta’atukuap i te iku’uro ta’atukawiano hamuat hap. Yt ta’atukuap i te pote toto. Mi’i pote koitywy iku’uro rakaria ikuap i’ewyte ihãite rakaria ikuap. Mi’i hawyi meiũran aru toi’atupat’ok uwe imohey haria uwe yt rakaria i. I’ewyte iku’uro rakaria ihãite rakaria Tupana Pã’ãu tomoherep yne. ⁷ Pywo ti rat yne mesuwarotiat mesuwat yi i’ewyte ahekare’en ai’yat ko’i aiko hawyi waikiru waty at ga’apy yne mesuwarotiat ikahuro hamuat ko’i e’at yt pya hin i. Pywo ti rat tuut irane uiwyria’in yne mesuwat ikahuro hap e’at. Yt pya hin i are. Mi’i pote waku we’eg haria wo watukupte’en mesuwarote. Waku wahẽtup at ka’ap Tupana kape mesuwarotiaria ehakyera’at hamo. Waku wahekatup Iesui ut hap. ⁸ Pyno mesuwat ikahuro hap e’at yt pya hin i pote Tupana tiky’esat kahato aito tomohey haria wo wẽtup miit ewy aiwo’oky’e hap toiky’esat. mi’i tã Tupana tiky’esat kahato. Uiwyria’in toiky’esat wati’atuky’e irania’in Iesui mohey haria yne ahesaika hap wywo. Toiky’esat watimoherep aiwo’ope aiwo’oky’e hap aimiium kaipyi aimimõ’ẽ hap kaipyi aiminug kaipyi toiky’esat aiwo’oky’e hap. Pywo ti rat toĩne’en aiwo’oky’e hap sese aiwo’opiat hap hawyi yt kat i aiwo’oma’at’i hap toine’en. Yt heremo i aiwo’o’aparap hap ko’i aiwo’oky’e kahato hap toĩne’en mote. Aiwu’uka hap yt tuwemoherep i. Aiwo’oky’e hap toĩne’en pote yt watikat aiwyria’in kai i’atuminug sa’ag ko’i aiwo’o’aparap hap ko’i. ⁹ Uiwyria’in waku — Eiwehyt’ok o wato’e irania’in me. Waku eiwehyt’ok wato’e aiwo’ope. Ewei’apyk o waku wato’e. Waku — Uru’yat aiwanuat wato’e irania’in me. Waku watipowyro hatek takaria ai’yat pe. Yt naku i wato’e irania’in me — Yt atiky’esat hin i irania’in ui’yat piat wato’e. ¹⁰ Pyno Tupana tum ahepe tesaika hap wakuat moherep hamuat miit’in powyro hamuat. Yt to’o’ewy hin i tutum ahepe tesaika hap. Pyno kat som watipuẽti Tupana esaika hap kaipyi waku watimõ’ẽ irania’in me. Kat som watikuap waku rakat pyno waku wahenoi irania’in me Tupana mienoi hepiat ko’i. Waku watipowyro irania’in aipo wywo Tupana miium aimisepap ko’i wywo aikotã Tupana piat aimu’e hap ewy. Watikuap pote waku wati’atupowyro irania’in aimisepap ko’i wywo aikotã Tupana aimu’e hap ok tã. Aimisepap ko’i yne Tupana miium ko’i tukupte’en yne aimikuap ko’i Tupana aimu’e hap ko’i. Yt kat sa’up i tutum ahepe pote waku watum miit’in me yt kat sa’up i. Waku watopyhu’at Tupana eropat haria wo wakuaria ewy. Waku Tupana miium watimõ’ẽ irania’in me ahegyi’at kahato hap wywo aikotã Tupana hegyi’at hap ewy. ¹¹ Pyno irania’in aitoria Tupana mimu’eria kahato ahehay se kahato Iesui etiat moherep hamo aimu’e kahato. Ahẽku ete tutum tesaika hap tehay moherep hamuat. Mi’i pote karãpe wati’atumu’e miit’in waku ahehay watimoherep aipy’a pyi aikotã Tupana ihay aiwẽ pyi Topã’ãu kaipyi hap ewy waku watimoherep Tupana ehay. Ma’ato irania’in yt ahehay kuap i rakaria Tupana tiky’esat aipo wywo aipy wywo wati’atupowyro miit’in hap. Mi’i pote tutum ahepe irania’in me tesaika hap miit’in eropat hamuat. Tupana aimu’e kahato aipy’a pyi aikotã aikotã waku watunug miit’in eropat hap ete. Mi’i hawyi tutum ahepe tesaika hap wakuat sese nug aipo wywo aipiit wywo hamuat hap. Pyno kat som tutum ahepe sepap nug hamuat hap ko’i mi’i pote waku i ok tã watimõ’ẽ miit’in me Tupana mõtypot hamuat Aipotypot Tupana Mipo’oro Iesui mõtypot hamuat hap ko’i are. Pyno ahẽtup uiwy Iesui pe — Atiky’esat kahato ereĩne’en Wuat’i Miit’in Porekuat no hap. Atiky’esat En Wuat’i Miit’in Mimõtypot no. Mesup wuat’i e’at pe aru atiky’esat En yne mesuwarotiaria emiit’in sem akag wo. Mi’i ti mesup ahẽtup are waku. ¹² Uimiky’esat ko’i Iesui mohey haria karãpe put’ok’e ehete ehatek hap miit’in mikyry’i hap ko’i eho’opot hap ko’i aikotã aria haty hap ewy put’ok’e ehete yt eiwanẽtup tei’o kowo’i kowo’i — Kat pote mi’i tã uhete yt ewei’e tei’o eiwanẽtup hawe. Katupono mi’i tã yne Iesui mohey haria ete toĩne’en tuereto uiwyria’in uimiky’e ko’i. Mi’i pote yt eweiwanẽtup tei’o — Ta’i yt irania’in ewy hin i aho’opot yt ewei’e i kat pote yne aitoria Iesui mohey haria ihaky’e’i rakaria watukupte’en tuereto. Mi’i tã Tupana tunug ahete ahã’ãg hap ko’i sio watoĩne’en Ha’yru mohey haria sese wo sio yt haria wo i kuap hamo. ¹³ Karãpe put’ok’e ahã’ãg hap ahatek hap miit’in mikyry’i hap ai’ahu hap yne mekewat ko’i put’ok’e pote waku meremo watuwemowepit hawyi waku wato’e Tupana pe aho’opot hap put’ok’e hawyi — Tupana koitywy atikuap ta’yn Esa’yru Emipo’oro Uruporekuat nuat ho’opot hap. Yt atikuap yne i ma’ato aho’opot hap kaipyi atikuap Emipo’oro ho’opot hap. Waku kahato atu’u Iesui ewy mekewat ho’opot ko’i waku wato’e Tupana pe. Meiũran aru atikuap Esa’yru Uruporekuat nuat put’ok’e mesuwe Wuat’i Mimõtyot no tuwemoherep mesuwe. Mi’i hap e’at pe uimowepit hap sese wuat’i e’at piat hap toĩne’en waku wato’e Tupana pe. ¹⁴ Pywo ti rat uiwyria’in karãpe miit’in ihay sa’ag kahato ahetiat pote watomohey Aiporekuat nuat pote mi’i hap e’at pe waku watuwemowepit kahato. Eweikuap kat pote. Aimowepit hap sese topyhu’at aru ahete wuat’i e’at pe katupono watopyhu’at Tupana mimõtypot ko’i sese. Tupana Pã’ãu eiam kahato watopyhu’at. Katupono Tupana yt ai’atoiat hin i waho’opot turan. Katupono mesuwarotiaria i’atuehay sa’ag Aika’iwat Iesui ete ma’ato aitoria watimõtypot kahato Aika’iwat. Mi’i hap kaipyi Tupana aikuap. Mi’i pote tutum ahepe Topã’ãu pywuat imõtypot ko’i watopyhu’at pote. ¹⁵ Pyno waku watopyhu’at miit’in mesuwarotiaria mikyry’i hamo. Waku watopyhu’at miit’in misaty’i saty’i ko’i wo Iesui mohey haria aito pote. Ma’ato yt naku i kahato waho’opot mesuwarotiat sero’ok’e haria aito pote yt naku i nug haria pote miit’in ma’at haria aito pote miit’in ekat porera’at haria aito pote miit’in potpap pyhyp haria aito pote ahehay sa’ag irania’in etiat aito pote. Mi’i hap upi aipyhyp ahaty’i haty’i pote yt nakuaria i wo watopyhu’at. Ma’ato waho’opot Iesui potpap nug pote waku. ¹⁶ Ta’i karãpe ahaty’i haty’i Iesui Aipotypot emiit’in pote waku watuwemowepit. Yt naku i watuwemõti ne’i Aika’iwat pupi ahaty’i haty’i Iesui etiat turanuat pote. Po’og waku wato’e Tupana pe — Tupana waku kahato En kat pote aho’opot Esa’yru mohey hap upi waku wato’e. ¹⁷ Pyno waho’opot hap kaipyi miit’in irania’in minug sa’ag kaipyi ai’apiheg hap mesuwarotiaria piat hap kaipyi Tupana tikuap sio aito Iesui mohey haria sese sio yt hap sio aito imẽpyt’in sese aito sio yt hap. Pyno sa’awy’i ahã’ãg Tupana mi’i hawyi waku pe aito aipuẽti aheĩne’en wuat’i e’at piat hamo. Ma’ato aikotã aru irania’in meimuẽ wuaria yt sehay wakuat Iesui etiat yt ky’esat i haria ete aikotã aru mi’iria ete. Kat som aru Tupana tunug mi’iria ete yt tomiky’esat nug neran i haria ete. Ta’i mi’iria ete po’og po’og sa’ag topyhu’at i’atuepiat ho’opot hamo. Mesuwat rotiat ho’opot hit i’atuepiat hap kaipyi ho’opot hap te topyhu’at wuat’i e’at pe i’atuete. ¹⁸ Pyno niatpo kahato ahehakyera’at hap Tupana mimoewaku ko’i aito pytkai. Ma’ato aikotã aru irania’in yt Tupana ky’esat i haria irania’in mesuwarotiaria yt naku i nug haria ete aikotã aru mi’iria ete mekewat e’at pe. Ta’i aitoria watopyhu’at Tupana miehakyera’at ko’i wo ma’ato mi’iria yt karãpe i i’atuehakyera’at hap topyhu’at. ¹⁹ Pyno are’e ehepe — Miit’in mikyry’i hamo o eweikupte’en Iesui mohey haria eipe pote waku eweikupte’en no Iesui mohey haria wo are. Waku ewetunug no Tupana miky’esat ewywuat. Waku ewei’e Tupana kape — Tupana atum uipiit uiwanẽtup hap uipy’a piat uheĩne’en hap yne atum epe. Uiku’uro pote uiku’uro ma’ato yt atoiat hin i waku nug hap. I’ewyte yt atoiat hin i emohey hap uinug hat En mote Tupana wato’e waku. Mi’i pote atikuap yt ui’atoiat hin i hap. Mi’i pote epo pe atum uipiit uipã’ãu uiwanẽtup hap uinug hat waku wato’e miit’in mikyry’i hano watoĩne’en turan Iesui mohey haria aito pote.

¹ Pyno uito Peteru iporo rakat areĩne’en. Ei’apykok hat areĩne’en. Pyno uhehay teran Iesui mohey haria apykok haria pe. Woroho’onãpin neran eipe. Uito ti Iesui potmu’e sese uito. Ara’akasa yne Aika’iwat iku’uro hap kape. Ara’akasa aikotã ho’opot hap kape. I’ewyte ara’akasa Iesui wẽtem gu’uro pywiat hap kape. Ara’akasa Iesui Tupana mõtypot hawe hẽtyhot hap py’asetpe ara’akasa. Mi’i hap ewy tut irane. Mi’i hap kape i’ewyte ara’akasa uimu’etu wuat ewy are. ² Mi’i pote woroho’onãpin eipe uipy’a pyi aikotã watopoi aihũria yne e’at pe aikotã wati’apykok aihũria wãtym muo. Mi’i hap ewy ewei’atupoi Tupana ehay wo Iesui mohey haria Tupana hũria eimi’apykok ko’i are. Ewei’atu’apykok o Tupana hũria ahiag mupi yt naku i nug hap pupi are. Ewei’atoiat ro mekewat eiwanẽtup hawe — Yt atunug neran i e hap. Mi’i hawyi ewei’atu’apykok Iesui mohey haria yne eipy’a pyi yne ehepiat ky’esat hap wywo. Uiwyria’in karãpe put’ok’e mekewat eiwanẽtup hawe — Atiky’esat uhekat kahato Tupana hũria kaipyi. I’ewyte areĩne’en neran hekat rakano Tupana hũria apykok hap sa’up kaipyi e hap pupi eiwe’eg wo kahato o are. Katupono yt naku i watiky’esat kahato Iesui mohey haria ekat ko’i. Pyno waku watuwepotpap i’atumu’e hap ete po’og miit’in ky’e hap aikai waku. Yt naku i watoket ne’i. Waku aiwanẽtup hawe aiperup yn aipotpap turan miit’in mu’e Iesui etiat hap turan are ehepe nagnia pe ai’apykok haria pe are. ³ Yt naku i wati’atupo’oro po’oro ahehay pirik hap wywo aihũria kat pote aihũria Tupana sa’yru’in saki’yt’in. Mi’i pote po’og waku watimoherep Tupana hũria pe mu’ap ikahu rakat. Waku watopyhu’at Iesui iã’ãkap ko’i wo ewywuat no. Mi’i hawyi waku wato’e aimimu’eria pe — Ereĩne’en no eweikupte’en no aikotã areĩne’en waku hap ewy waku wato’e. Waku watuwepotpap po’og aihũria kai. Mi’i hap kaipyi ta’atukuap aikotã waku ta’atunug hap ko’i wakuap ko’i are. ⁴ Pyno karãpe wati’atu’apykok aihũria turan waku watuwanẽtup kahato Ai’apykok hat toĩne’en hap kape. Mi’i kaipyi aha’up sese tut aru. Mekewat sa’up waku rakat aimõtypot hap sese wuat’i e’at piat tut Ai’apykok hat Iesui kaipyi aru wato’e aiwanẽtup hawe. Morekuaria mesuwarotiaria te’eruwepainug kahato nu imehit rakat wywo te’erewepainug kahato ta’atu’akag ete. Hekat kahato rakat ewy te’erewepainug morekuaria mesuwarote. Mi’i hap ewy Tupana tum aru ahepe aipotpap sa’up. Ma’ato aipainug hap wuat’i mimõtypot ko’i watopyhu’at aru wuat’i e’at piat morekuaria ewywuat aipainug hap are.

⁵ Pyno uito Peteru ati’atunãpin neran mesuwe kurum’in. Makuptiaria woroho’onãpin neran eipe. Uiwyria’in eweimõtypot ro nagnia are. Ewetunug no ei’apykok haria miky’esat ko’i. Karãpe ei’apykok haria eipo’oro hawyi meremo ewetunug i’atumiky’esat ko’i. Eweikupte’en no miit’in mimu’e ko’i wo — Uimu’e ro ewei’e ro nagnia pe. Eweimõtypot ro irania’in eiwo’omõtypot eiwo’ope are ehepe. Ewei’atoiat ro mekewat — Uito po’og irania’in kai e hap. Mi’i hawyi aikotã watopag sokpe pakup hap ewy eweipag wẽtup wanẽtup hap ikahu rakat eipy’a pe mekewat — Atikuap teran uhyt mana e hap mekewat — Uimu’e ro e hap mekewat paa’ei’e hap wywo eiwepainug o aikotã sokpe pakup hap ewy. Katupono — Uito po’og irania’in kai e hat Tupana mimohit no aru topyhu’at. Tupana yt tiky’esat i — Uito po’og irania’in kai e haria wo watukupte’en. Ma’ato paa’e haria kape yn teha’at. Mi’iria pe tutum kahato hegyi’at hap kaipyi tekat yne tomimõtypot ko’i pe are. ⁶ Pyno uiwyria’in ipakup takaria waku ewei’e Tupana kape — En ni po’og po’og uikai. Uimu’e ro. Aremohit epy’asetpe Tupana. Paa’are areĩne’en epo pe Tupana. I’ewyte areĩne’en neran yt uwe i uimõtypot mesuwarote. Atikuap ta’yn uito kurum te ipakup takat re waku ewei’e Tupana pe. Mio tã ewei’e pote meiũran Tupana mimõtypot no eweipyhu’at mesuwat yi tote. I’ewyte miit’in akag wo miit’in apykok hano eweipyhu’at. Kurum hin pĩ’ã hin Tupana miky’e ko’i kahato wo eipe are. ⁷ Mi’i pote waku ewei’e Tupana pe — Tupana aikotã miit’in timohy yrysakag ipotyi rakat hero i’akag ete mi’i hap ewy etihep uhetiat uhero hap uipy’a piat hap. Wẽtup ok po pe wẽtup ok akag note aikotã ta’atuereto mekewat yrysakag ipotyi rakat ewy. Mi’i hap ewy atoiat yne uiwanẽtup hap ipotyi rakat ewywuat kowo’i kowo’i hap ko’i. Aikotã aikotã aru atunug ui’e hap ko’i atoiat yne epo pe e’akag ete Tupana ewei’e. Kat pote uiky’e kahato hat En waku ewei’e kurum iwasuria makuptiaria are.

⁸ Pyno eiwe’eg wo o ahiag mupi kurum iwasuria makuptiaria i are. Aikotã surara’in ewy eweikupte’en. Eiwe’eg wo kahato o ahiag mupi kat pote ehewanĩkap sese toĩne’en ahiag kurum iwasu ko’i makuptiaria. Pyno eweikupte’en aikotã mory’a epo pe hap ewy. Kat pote ahiag awyato marak’a hap ewy toĩne’en kowo’i kowo’i hewyry rakat ewy hesy’at rakat ewy. Toikat kahato Tupana hũria ipakuptia u hamo are. ⁹ Pyno eti’awa ahiag — Wãi’ewei’e ahiag me. Iesui mohey hat uito ewei’e. Karãpe eweho’opot kahato Iesui mohey haria eipe pote yt eweheha’at rei’o yi kape kat pote irania’in mesuwarotiaria py’asetpe kurum iwasuria makuptia eiperia ewy tukupte’en ho’opot hawe. Ta’atukuap wy mi’i pote waku hesaika rakaria ewywuat eweikupte’en ahiag sopo hamo are. ¹⁰ Ma’ato Tupana ti eipowyro kahato hat toĩne’en uiwyria’in ipakup takaria. Tutum neran ehepe yne tesaika hap yt kat sa’up i. Toiky’esat kahato eiperia tomimõtypot ko’i wuat’i e’at piat hano. Kat pote Aipotypot Iesui mohey haria eipe pote. Pyno ho’opot hap yt mot’i hamuat i toĩne’en. Mũki’ite e’ihot’ok e’ihot’ok hap ewy tokosap ta’yn. Pyno waku etu’u ho’opot hap mesup mi’i hawyi meiũran Tupana mimotag ko’i wo eweikupte’en waku rakaria hãpyk kahato rakaria wo. Yt uwe mima’at ko’i wo i eweikupte’en. Meiũran Tupana ehay wywo ehesaika eweikupte’en. Mi’i hawyi meiũran eiwanẽtup hap yt kowo’i kowo’i hin i toĩne’en. Hesaika rakaria wo Tupana mohey haria ewy eweikupte’en eweho’opot hap tokosap hawyi ehã’ãg hap tokosap hawyi are yne pe nagnia pe makuptiaria pe kurum iwasuria pe hirakaria pe yne pe are. ¹¹ Uito ei’apykok hat Peteru mio tã are yn Tupana pe — Atiky’esat kahato emõtypot hap mesuwarote are. Atiky’esat yne miit’in epo pe are. Mesup mũki’ite wuat’i e’at pe atiky’esat En Miit’in Potypot Koro wo are. Pyno waku toran na’yn ui’e hap uito Peteru. ¹² Pyno uito Siwanu atunug mesuwat miwan. Peteru wẽ pyi atiwan yne mesuwat sehay. Uhet wyti Siwanu. Uito areĩne’en aikotã eheywyt eikywyt yt eima’at hat hin i ewywuat i areĩne’en. Atipo’oro mesuwat Peteru miwan Peteru e hap ehowawi uimiwan miat. Yne miit’in tikuap uimiwan aikotã aikotã atunug hap. Ta’i heremo kahato uimiwan kaipyi uwe uito hap. Yt iwato hin i uimiwan. Pyno pywo kahato aimu’e mesuwe Peteru. Ui’e hap ewy kahato to’e mesuwe. Are’e Peteru e hap ewy uito. Ta’i watopyhu’at ahã’ãg hap turan waho’opot turan mi’i pote watopyhu’at wuat’i e’at pe Tupana mipoityro ko’i wo. Tupana aiky’e kahato pote waku watopyhu’at y’am me hap ewy surara’in ewy. Yt karãpe i watoiat aiky’e hat hegyi’at kahato pote are. ¹³ Pyno Iesui mohey haria mesuwe kuekatu ta’atupo’oro ehowawi are. Sa’awy’i ti Iesui ui’airo mesuwe Tosa’yru eropat hat wo ui’airo are. Aikotã ta’atu’airo eipe hap ewy. Mi’i pote kuekatu atipo’oro ehowawi. I’ewyte yne uiwyworia Iesui mohey haria kuekatu ehowawi ta’atupo’oro. Urupo wywo y’am me urueko ewy uruipo’oro kuekatu ehowawi. Uha’yru i’ewyte toĩne’en mesuwe. Uha’yru set Maku. Mi’i i’ewyte kuekatu toipo’oro ehowawi are. ¹⁴ Uiwyria’in eiwo’oky’e ro eiwo’ope. Waku eiwo’oky’e eiwo’ope aikotã wẽtup mẽpyt’in ko’i ewy. Pyno ahẽtup Tupana pe — Tupana etunug no mi’iria Esa’yru mohey haria wẽtup miit ewy are. Etunug mi’iria wo’oky’e kahato haria wo Tupana are kat pote ta’atumohey Esa’yru Iesui pote are. Ta’atumohey Emipo’oro Uruporekuat nuat pote are. Pyno toran na’yn ui’e hap are.

Uito ti Peteru