IUWÃU MINÃPIN SA’AWY’IWUAT

¹ Uito ti Iesui miky’e Iuwãu. Mesuwat uimiwan atipo’oro ehowawi uiwyria’in. Iesui etiat atiwan ehowawi.

Aheĩne’en hap e’yianmete Iesui toĩne’en are. Pywo ti rat uruto ipotmu’eria urueha wo uruta’akasa ra’yn mesuwe mekewat Tupana ehay Miit kawiat rakat. I’ewyte mi’i turan uruewaure ka’a wo uruikuap ihay wakuat. I’ewyte ti urutemig urupo wo mekewat aipiit ewywuat rakat. ² Sa’awy’i yt heremo i toĩne’en Tupana ehay wakuat rakat ma’ato mi’i hawyi tuwepit nug na’yn tuwemoherep ta’yn Miit no sese ra’yn ahowawi are. Mi’i Miit wyti uruta’akasa ra’yn. Mi’i hap ti koitywy uruimoherep ta’yn ehepuo uruehay wuat. Mi’i ti wuat’i e’at piat ieĩne’en hat uruta’akasa ra’yn. Sa’awy’i To’ywot atipy piat wywo yn toĩne’en ma’ato koitywy toimoherep ahepe Tosa’yru. ³ Aiwywo ra’yn toĩne’en. Mi’i hap uruikuap uruewaure ka’a pe. Urueha’at hap uruimoherep ehepe katupono uru’ewy aiwo’o’ewy’ewy watopyhu’at hap uruiky’esat kahato I’ywot wywo Ha’yru wywuat aiwo’owese hap. Uru’ewywuat Aipotypot Iesui ewywuat hap uruiky’esat. ⁴ Mi’i hap ky’ewi ti mesuwat urumiwan atipo’oro ehowawi uruehay eimowepit kahato hamuat.

⁵ Pyno Ha’yru wẽ pywiat imienoi uruimoherep ta’yn ehepe sa’awy’itewuat imienoi mio tã e hap. Tupana yn nyti ariãty sese e hap. Tupana kai ti yt kat i i’ypyryp hap toĩne’en. Yt naku i nug hap yt kat i ikai. ⁶ Pyno Tupana wywo uruto’owese kahato wato’e ma’ato watunug ne seko sa’ag nug hap pote i’ypyryp wiat watoĩne’en hap ewy. Mi’i pote ti — Atikuap Tupana wato’e ma’ato yt naku i watunug sa’ag pytkai. Mi’i pote aiwema’at hap ne’i topyhu’at yt kat i wyti ai’e pywo piat hap pote are. ⁷ Ma’ato watopyhu’at hẽtyhot pe Aika’iwat ewy pote pywo pe watoĩne’en. Mi’i pote ti iwywuat aiwo’owese hap topyhu’at kahato are. Mi’i hap kaipyi ti Tosa’yru Iesui suu wo Tupana tikoho yne aiminug sa’ag ko’i. Mekewat kat ko’i kat ko’i aiminug sa’ag ko’i toi’atukoho at ka’ap ahewyry Iesui wywo imiky’esat ewywuat pote. Mi’i hawyi tomiky’esat nug haria watopyhu’at. ⁸ I’ewyte ti — U yt karãpe i sa’ag atunug wato’e pote i’ewyte koitywy yt karãpe i ati’aparap Tupana pe wato’e pote heso rakano watopyhu’at katupono i’aparap kahato haria aito pote. — Yt kat i sa’ag atunug wato’e pote aiwema’at hap topyhu’at mio tã ai’e hap kaipyi are. Yt kat i hin i topyhu’at pywo ai’e hamuat hap e. Mi’i hawyi heso rakaria wo watoĩne’en. ⁹ Ma’ato wato’e Tupana pe aipy’a pyi — Ui’ywot ati’aparap kahato epe uhehay wo uiminug sa’ag wo wato’e pote aimohãpyk kahato. Mi’i hawyi — Waku pe ereĩne’en mesup e ahepe watoiat yne aiminug sa’ag hawyi. Tupana aiky’e kahato pote toĩne’en kahato aikawiano hamo. Yt ai’atoiat teran hin i wati’aparap topiat pytkai aiky’e kahato. Ai’apiheg hamuat pytkai aiky’e hap wywo ai’apiheg are. ¹⁰ Ma’ato wato’e — Yt karãpe i ati’aparap Tupana pe miit’in me wato’e pote ti — Heso rakaria wo eipe e Tupana ahepe katupono yne miit’in i’aparap haria atikuap kahato e Tupana ahepe. Atikuap yne eiwanẽtup sa’ag hap ko’i e ahepe.

¹ Pyno uha’yru’in ko’i uhaki’yt’in ko’i yt atiky’esat i ti ewei’aparap Tupana pe i’ewyte miit’in me. Mi’i hap etiano ti mesup atiwan ehowawi. Ma’ato wati’aparap Tupana pe miit’in me pote waku wahenoi ahepiat i’aparap hap. Mi’i hawyi Aika’iwat timoherep To’ywot pe aimohãpyk hamuat to’e. ² Aika’iwat Iesui ti ihay kuap kahato aikawiano hamo katupono mi’i ti yt karãpe i i’aparap Tupana piat hat. Ai’apiheg hap tutu’u yne. I’ewyte ai’apiheg hap sa’up tutum yne. Ma’ato yt aiwat aha’up mo yn i tuweium ma’ato yne yi totiaria yne ywania sa’up mo tuweium To’ywot pe ai’apiheg hap sa’up mo are.

³ Karãpe watunug Tupana miky’esat ewy ainãpin hap ok tã mi’i hawyi watikuap ta’yn aipy’a pe Tupana kuap haria sese wo watoĩne’en hap. ⁴ Ma’ato — Atikuap ti Tupana wato’e yt imiky’esat ewywuat nug hin i pytkai mi’i pote heso rakano watoĩne’en. Mio tã wato’e pote yt kat i aipy’a pe topyhu’at pywo ai’e hap. ⁵ Ma’ato watunug ihay ewy imiky’esat ewywuat pote iky’e sese hano watoĩne’en watunug imiky’esat ewy pote. Mi’i tã watunug pote watikuap kahato Tupana wo’owese hap. ⁶ Uito ti Tupana wywo sese wato’e pote waku watoĩne’en ha’yru ewy haki’yt ewy are. Waku watunug Aika’iwat Iesui minug ewywuat yn waku watunug.

⁷ Uhekatuwyria yt kat i einãpin pakup i hap ahenoi ehepe ma’ato ahenoi sa’awy’iwuat ainãpin hap te aikotã sa’awy’ite ainãpin hap ewy yn ahenoi ehepe. Pyno Tupana e hap sa’awy’iwuat ahenoi ehepe. Eiwo’oky’e ro e hap yn ahenoi ehepe. ⁸ Ipot’i rakat sehay ma’ato ti yne e’at pe wyti ipakup takano topyhu’at aikotã Aika’iwat aiky’e hap ewy waku wato’oky’e are. Mi’i tã watunug hawyi pywo imohey haria mi’iria i’atu’e aru irania’in. ⁹ Ma’ato uito ti Tupana mohey kahato hat hẽtyhot puo uhewyry wato’e wen ma’ato ti aiwyria’in ete aipy’ahak yn watoĩne’en pote i’ypyryp we wãtym muat ewy ra’yn watopyhu’at are. ¹⁰ Ma’ato uwe uwe towyria’in Iesui mohey haria wywo waku kahato toĩne’en to’oky’e kahato mi’i pote ti pywo ariãty hot puo hewyry rakat ewy topyhu’at. Mi’i hat ti yt ta’at kuap i kat pote yt i’ypyryp we i hewyry pote. I’ewyte yt kat i ikai miit’in ma’at hamuat ne’i. ¹¹ Ma’ato aiwyria’in Iesui mohey haria ete aipy’ahak mi’i hap kaipyi i’ypyryp wiat ewy watukupte’en aikotã yt ihapytig i rakaria sese wo watoĩne’en. ¹² Uimẽpyt’in eiminug sa’ag ko’i yne Tupana timohãpyk ta’yn watomohey Aika’iwat Iesui hawyi.

¹³ Mi’i pote woroho’onãpin neran kahato uimiwan me ui’ywot’in. Eipe ti wuat’i nug hap e’yianote wuat ieĩne’en haria ti eipe. Tupana kuap kahato haria eipe. I’ewyte mi’i pote woroho’onãpin uimiwan me kurum’in makuptiaria katupono wuat’i sa’ag ka’iwat akit haria ti eipe ahiag akit haria. Mi’i pote woroho’onãpin uimiwan me. ¹⁴ Uimẽpyt’in eweikuap kahato Ai’ywot sese. Mi’i pote woroho’onãpin eipe uimiwan me. Ui’ywot’in eipe ti yi nug hap e’yianmete wuat’i wo’omoieĩne’en hat kuap haria eipe. Tupana sese kuap haria eipe are mi’i pote woroho’onãpin eipe uimiwan me. Kurum’in ehesaika kahato katupono Tupana ehay ahyt eiam ni eipe. Mi’i pote wuat’i sa’ag nug haria akag akit haria ti eipe. Mi’i pote ti uimiwan me woroho’onãpin. ¹⁵ Pyno yt eweiky’esat i ra’yn o irania’in miky’esat sa’ag ko’i. I’ewyte yt eweiky’esat i ra’yn o mesuwiaria yi totiaria sa’ag ko’i. Ma’ato watiky’e mesuwarotiat minug sa’ag pote yt kat i ra’yn Ai’ywot atipy piat ky’e hap aikai. Pyno ahenoi teran ehepe kat ko’i kat ko’i yt naku i watiky’e mesuwarotiat ko’i aipiit miky’esat ko’i yt nakuat i nug hap. ¹⁶ Ta’i eheha tiky’esat kat ko’i kat ko’i yt Tupana miky’esat ewy i i’ewyte — Uito po’og wato’e hap yn watiky’esat. Uimõtypot hap yn atiky’esat wato’e pote mi’i hap ko’i yt Ai’ywot atipy kaipywiat piat yt aimu’e hap i. ¹⁷ Ma’ato mesuwarote pywiat kaipyi yn aimu’e sa’ag ko’i miit’in miky’esat ko’i ti aru tuweityk yne. Ma’ato uwe uwe Tupana miky’esat ewywuat nug haria ti aru te’eropyhu’at wuat’i e’at pe.

¹⁸ Uhaki’yt’in uha’yru’in put’ok’e irane ikahuro hap e’at katupono ti put’ok’e irane Aipotypot Iesui ewanĩkaptia are. Mi’i ti Aipotypot Iesui pohari teran haype. Koitywy typy’i kahato mi’i ewywuaria tukupte’en. Mi’i hap kaipyi ti watikuap ta’yn yt pya i ra’yn ikahuro hap e’at hap. ¹⁹ Sa’awy’i te ti ai’ewy kahato tukupte’en tuereto aipy’asetpe ma’ato mesup ti ai’atoiat ra’yn. Tuwat yne ra’yn mi’iria. Tuwat ra’yn ahiag upi kat pote yt aimimohey ewywuat i mi’iria pote. Ma’ato aimimoheyria pote ti te’eropyhu’at aiwywo. Mi’i pote ahok’iwat ra’yn. ²⁰ Ma’ato aito ti yt mi’i tã haria hin i ra’yn katupono ti Tupana Pã’ãu topyhu’at kahato ra’yn ahete. Ahowapy kahato ra’yn Iesui tum ahepe Topã’ãu hawyi. ²¹ Mi’i hap kaipyi watikuap yne kahato ra’yn pywuat sese sehay Tupana Pã’ãu aimu’e pote. Ehepiat ikuap pytkai ra’yn ti woroho’omu’e i ra’yn sehay pywuat sese rakano. ²² — Iesui yt Tupana Mipo’oro Aiporekuat nuat i e haria ti heso yn nakaria wo te’eropyhu’at. Iesui ewanĩkaptia wo wyti mi’iria. ²³ Mi’iria ti I’ywot Ha’yru ewanĩkaptia sese mi’iria. Uwe uwe irania’in me — U yt atimohey i ti Iesui toĩne’en Tupana Sa’yru hap e hat. Mi’i hat ti yt Tupana wywo i sese toĩne’en. Ma’ato uwe uwe irania’in me — Uito Iesui mohey hat e mi’i hat ti Tupana wy sese toĩne’en. Ta’i watipun ne’i ra’yn Ha’yru pote i’ewyte I’ywot pun haria wo ra’yn watoĩne’en. Ma’ato — Iesui En nyti Tupana Sa’yru sese wato’e pote I’ywot mohey haria wo watoĩne’en. Tupana toĩne’en aipy’a pe. ²⁴ Sa’awy’iwuat aimikuap aikai pot’i toĩne’en pote mi’i hawyi Ha’yru I’ywot wywo watoĩne’en wo’owese kahato haria wo. ²⁵ Mi’i tã eweikupte’en pote — Atum pot’i eheĩne’en wuat’i e’at piat hamuat hap e Aipotypot ahepe. ²⁶ Pyno arehay po’oro hamuat ehowawi eiwe’eg wo o eima’at sehay wuat haria pupi. ²⁷ Aipotypot Iesui Pã’ãu aimu’e hap sese topyhu’at katupono toĩne’en Ipã’ãu aikai pote mi’i yn aimu’e. Mi’i hawyi yt uwe i aimu’e pytkai toĩne’en. Mi’i ti aimu’e at ka’ap. Yne e’at pywo rakat etiat aimu’e kahato Ipã’ãu. Yt kat i sa’ag ete aimu’e. — Pyno uipap eupi wato’e. Uimu’e ro wato’e Ipã’ãu me. Mi’i tã watunug mote aiwo’owese hap yn topyhu’at Aika’iwat Iesui wywo. ²⁸ Uimẽpyt’in waku kahato ti aipap Aika’iwat upi. Mi’i pote ti aru karãmuo Aika’iwat ta’aipok i ra’yn meikowo mi’i hawyi yt kat i aiwemõti hap toĩne’en ipupiat hap. Yt watuwemig hin i ipupi ma’ato watuwehum yn hut turan. Yt kat i aheha yi kape hut turan. Aipotypot ewywuat hap wahekatup kahato pote yt kat i ai’apiheg hap Tupana kaipyi. — Waku yn e ahepe. Mi’i pote aito i’ewyte waku pe yn watoĩne’en i’ewy aito pote. ²⁹ Ta’i watikuap kahato ra’yn mekewat wakuap yn nug hat Aika’iwat Tupana Sa’yru. Mi’i hawyi Aika’iwat ewy wakuap nug haria aito pote i’ewyte Tupana mẽpyt’in sese wo ra’yn watukupte’en are.

¹ Katupono ti iwato kahato Ai’ywot piat aiky’e hap. Toimoherep kahato ti aiky’e hap tomẽpyt’in wuat ra’yn ainug hawyi. Ta’i tegyi’at hap toimoherep kahato aiky’e hap. Pyno yt ta’atukuap i Tupana pote i’ewyte yt ta’atukuap i aito Tupana mẽpyt’in ko’i hap. ² Uimiky’eria koitywy ti aito Tupana mẽpyt’in na’yn. Ta’i yt watikuap hin i ti aikotã miat aheĩne’en hamuat hap. Iesui ut hawyi ti aru watikuap aikotã me watoĩne’en hamuat katupono topiit ewy ti ainug hamuat. Mi’i hawyi ti aru mekewat e’at pe wata’akasa ra’yn Iesui sese. Mi’i hawyi ti aru watopyhu’at aikotã i’ewy ra’yn are. ³ Mi’i hap watomohey yne e’at pe pote ti yt kat i sa’ag aipitpit hap topyhu’at. Mi’i hawyi ti ma’ato po’og po’og aikoho hap toĩne’en. Mi’i hawyi ti watoĩne’en aikotã topiit kahu hap ewy ainug. ⁴ Ma’ato uwe uwe yt inug i Tupana piat tonãpin hap ko’i mi’i hat Tupana piat yt naku i nug hat topyhu’at katupono karãpeĩ wati’aparap Tupana piat ainãpin hap mot’i mi’i hawyi yt naku i nug haria watoĩne’en Tupana wanẽtup hawe. ⁵ Katupono Aika’iwat yt karãpe i i’aparap Tupana pe. Ma’ato Aika’iwat tuut hamuat yne yt nakuat i hep hamo. Mi’i hap eweikuap ta’yn. ⁶ I’ewyte uwe uwe toĩne’en Aika’iwat wywo kahato mi’i hat yt i’aparap teran i Aika’iwat pe. Toiky’e kahato haype. Ma’ato irania’in Aika’iwat ma’at haria mi’iria kaipyi watikuap Aika’iwat yt kuap i haria hap. Yt karãmuat i Aika’iwat mohey hanuaria i ra’yn. ⁷ Uhaki’yt’in uha’yru’in eiwe’eg wo o wẽtup sehay pupi. Eiwe’eg wo o eima’at hap pupi. Waku nug haria waku pe tukupte’en Tupana wanẽtup hawe aikotã Aika’iwat toĩne’en waku pe Tupana wanẽtup hawe hap ewy. ⁸ Ma’ato uwe uwe inug sa’ag Tupana pe mi’i hat ahiag wano topyhu’at katupono sa’awy’iwuat yt nakuat i nug hat sese ahiag. Mi’i pote yt nakuat i akit hamo tuwemoherep Tupana Sa’yru yne ahiag minug sa’ag ko’i moma hamo tuwemoherep. ⁹ Uwe uwe tuwemoherep Tupana mẽpyt no mi’i hat yt toiky’esat i Tupana piat i’aparap hap katupono Tupana Pã’ãu toĩne’en ipiit pe. Mi’i pote To’ywot atipy piat ewy topyhu’at. Yt toiky’esat i po’og sa’ag nug hap Tupana mẽpyt pote ti ra’yn. ¹⁰ Pyno yt to’o’ewy hin i Tupana mẽpyt’in ahiag wat wywo yt to’okupitu hin i. Katupono uwe uwe wakuat nug hano topyhu’at i’ewyte uwe uwe Tupana mẽpyt’in ky’e hano topyhu’at mi’i hat ti topyhu’at Tupana sa’yru wo Tupana saki’yt ko’i wo are. ¹¹ Pyno ahenoi i ra’yn sa’awy’iwuat sehay sese yianmiat Tupana ainãpin hap — Eiwo’oky’e ro e Tupana sa’awy’i. ¹² Sa’awy’i sese toĩne’en Kãi e hap het rakat. Mi’i yt iky’e hin i toywyt. Toi’auka ne’i. Mi’i pote yt naku i watoĩne’en Kãi minug ewy ne’i. ¹³ Uiwyria’in tukupte’en miit’in mesuwarotiaria mekewat Kãi ewywuat yt naku i nug haria ahiag wywuaria ai’auka teran haria. Karãpe i’atupy’ahak ahete mi’i pote yt naku i watuwanẽtup ko’i ko’i ne’i mi’iria yt i’atuwese i ahete hap kape. ¹⁴ Sa’awy’i watukupte’en iku’uro rakaria ewy Tupana wanẽtup hawe katupono yt watikuap i ihay pote. Katupono yt kat i aikai Tupana aimoieĩne’en pakup i hap. Ma’ato mio watoĩne’en Tupana wywo katupono koitywy aiwo’oky’e hap toĩne’en. Ma’ato yt kat i aiwo’oky’e hap aikai pote iku’uro rakaria ewy watoĩne’en Tupana wanẽtup hawe. ¹⁵ Ma’ato wato’oweuka’i ne’i pote watukupte’en wo’o’auka haria ewy watukupte’en Tupana wanẽtup hawe. Ma’ato wo’opot’auka hat aito pote yt kat i Tupana kapiat aheĩne’en hap. ¹⁶ Kat pote Aika’iwat Iesui iku’uro aikawiano hamo ra’yn. Iku’uro hawyi yt kat i aiku’uro hap sese topyhu’at aikai. Pyno iku’uro ahetiano hap watikuap hawyi watikuap aiky’e hap sese. Koitywy waku wati’atupowyro wuat’i aiwyria’in Iesui mohey haria aiku’uro hap kape. ¹⁷ Hekat rakaria aito pote waku watimõ’ẽ ihaky’e’i rakat pe watipuẽti hawyi. Waku ahekat watum i’atuepe. Yt naku i wato’e aiwepe — Pyno yt naku i atimõ’ẽ uhekare’en ihaky’e’i rakaria pe. Mio tã wato’e pote yt kat i Tupana ky’e hap aikai. Yt ahegyi’at i pote yt naku i wato’e irania’in me — Tupana ky’e kahato hat uito yt naku i wato’e katupono yt pywo pe i wato’e. ¹⁸ Yt naku i wato’oky’e ahehay wo yn uimẽpyt’in. Waku watimoherep aiwo’oky’e hap aiwo’opowyro hap wywo are. ¹⁹ Aiwo’oky’e sese pote mi’i hap kaipyi watikuap ta’yn pywo rakaria aito hap. Mi’i pote karãpe watoĩne’en Tupana ehamo yt watuwemõti hin i Iesui mohey haria ky’e haria aito pote. ²⁰ Wati’aparap Tupana pe hawyi watuwemõti i ra’yn ma’ato Tupana tikuap aiwanẽtup hap. Toikuap yt watunug neran i hap. Watuwemõti pytkai aiky’e te koran. ²¹ Ma’ato po’og waku yt kat i hin i aiwemõti hap Tupana ehamo watoĩne’en turan. Watunug yne Tupana miky’esat ko’i ainãpin hap ko’i mi’i hawyi Tupana mowepit haria wo watoĩne’en. ²² Mi’i hawyi kat e hap kat e hap wahẽtup tope hawyi tutum aimiẽtup ok tã watunug imiky’esat ewy pote. ²³ Pyno ahenoi ehepe Tupana miky’esat sese. Mio tã e — Eweimohey ro Uha’yru e. Ewetunug Mi’i Eiporekuat no e. Mi’i hawyi eiwo’oky’e ro aikotã Eika’iwat Iesui e hap ewy e Tupana ahepe. ²⁴ Uwe uwe Tupana piat tonãpin hap inug mi’iria ti tukupte’en kahato Tupana wanẽtup hawe. Tupana tomoieĩne’en tomohey haria wo tukupte’en hap. I’ewyte Tupana toĩne’en i’atupy’a pe. Tupana tum na’yn Topã’ãu ahepe hawyi watikuap kahato watoĩne’en hap sese tepiat hamuat. Mi’i hawyi watikuap kahato ra’yn Tupana toĩne’en aipy’a pe hap.

¹ Uiwyria’in yt eweimohey tei’o yne wo’omu’e haria — Uito Tupana Pã’ãu eiam i’atu’e pytkai. Waku eweikat i kat i mi’iria sio Tupana Pã’ãu eiam sio yt hap kuap hamo. Katupono i’atu kahato wo’omu’e haria mesuwat yi totiaria yt pywo piat haria i katupono wẽtup pã’ãu i’atupiit pe. ² Pyno ahenoi teran ehepe aikotã aikotã waku wahã’ãg mi’iria sio waku sio yt naku i hap kuap hamo sio Tupana Pã’ãu kaipyi sio yt hap kuap hamo. Mi’i pe waku apo’ere o — Mehĩ mana etimohey apo uhyt Tupana Mipo’oro Aiporekuat nuat Iesui tuwemoherep miit kawiat hap sio yt apowato’e. Mi’i pote aiwesat — Ta’i atimohey kahato mi’i uito e pote Tupana eiam kahato mi’i. ³ Ma’ato — Yt atimohey i mi’i e pote i’ewyte yt Iesui mohey hat i mio tã e hat yt Tupana eiam hin i topyhu’at. Kat pote wẽtup Pã’ãu eiam pote. Aikotã to’e Tupana sa’awy’i hap ewy koitywy topyhu’at ra’yn. — Tuut aru wẽtup pã’ãu porekuat nuat ewanĩkap ti mi’i. Koitywy watikuap mi’i mã’ãu sa’ag toĩne’en na’yn aipy’asetpe hawyi aima’at’i ma’at’i ra’yn. ⁴ Uimẽpyt’in aito ti Tupana wanuat ko’i sese. Yt pywo piat sehay akit hanuaria i aito. Aimu’e haria yt pywo piat i yt Tupana kaipywiat ko’i akit hanuat haria aito. Ma’ato Tupana Pã’ãu aipiit piat po’og hesaika aimu’e sa’ag haria pã’ãu kai. Aito Tupana ehay moherep haria ma’ato mi’iria mesuwarotiat seko sa’ag enoi haria. ⁵ Tupana ehay ta’atuhenoi sa’ag kahato ahepe. Mi’i hawyi irania’in yt Iesui mohey i haria — Pywo i’atu’e katupono miit’in eko sa’ag ewywuat waku watunug i’atu’e pote. Mi’iria ahiag wanuaria tukupte’en. ⁶ Ma’ato aito Tupana wanuaria watoĩne’en. Mi’i hawyi yne Tupana wanuaria te’eruwewaure ka’a kahato aimienoi kape. Ma’ato irania’in yt te’eruwewaure ka’a i aimienoi pywuat kape. Mi’i hap kaipyi meremo watikuap uwe Tupana Pã’ãu pywuat ehay upi toĩne’en sio uwe ahiag pã’ãu sa’ag ehay upi ne’i toĩne’en hap.

⁷ Uiwyria’in to’iro wato’oky’e katupono aiwo’oky’e hap nug hat Tupana. Wo’oky’e haria wo watoĩne’en pote Tupana mẽpyt’in no watukupte’en. Tupana kuap sese haria wo watopyhu’at. ⁸ Ma’ato yt wo’oky’e i haria aito pote yt Tupana kuap haria wo i aito katupono wo’opotky’e hat sese ti Tupana. ⁹ Tupana timoherep ta’yn ahepe aiky’e kahato hap katupono toipo’oro Tosa’yru sese ahowawi aimoieĩne’en pakup i hap nug hamo. ¹⁰ Sa’awy’i yt watiky’e hin i Tupana. Mi’i pytkai aiky’e kahato hawyi toipo’oro Tosa’yru aiminug sa’ag ko’i atumoma yne hamo. Ha’yru iku’uro hawyi ai’apiheg hap tutu’u yne ra’yn. ¹¹ Pyno waku wato’oky’e aikotã Tupana piat aiky’e hap ewy waku wato’oky’e. ¹² Uiwyria’in yt karãpe i wata’akasa Tupana ma’ato mi’i pytkai watikuap kahato toĩne’en aiwywo. Mi’i hawyi wati’atuky’e miit’in pote Tupana toĩne’en po’og aikai. Aimoesaika kahato miit’in ky’e hap hãpyk nug hamo tepiat aiky’e hap ewywuat nug hamo. ¹³ Tupana tum na’yn ahepe Topã’ãu hawyi meremo watikuap Tupana wywuat aheĩne’en hap watoĩne’en hap. I’ewyte aipy’a pe Tupana toĩne’en hap. ¹⁴ Tupana tipo’oro ra’yn ahepe Tosa’yru ahehakyera’at hamo. Mi’i kape uruta’akasa ra’yn. Mi’i hawyi uruimoherep ta’yn wuat’i miit’in me uruehay wo. ¹⁵ Uwe uwe to’e irania’in me — Uito atimohey kahato Iesui toĩne’en Tupana Sa’yru sese hap e mi’i hat Tupana eiam mo topyhu’at. I’ewyte Tupana topyhu’at heiam mo. ¹⁶ Mi’i pote watikuap ta’yn Tupana aiky’e hap watomohey kahato ra’yn hawyi. Tupana ti wo’opotky’e hat sese. Mi’i pote uwe uwe wo’opotky’e hat sese toĩne’en Tupana wywo mi’i pote Tupana toĩne’en iwywo ipy’a pe. ¹⁷ Aipotypot saipepiaria ti aito. Mi’i pote i’ewy sese waku watoĩne’en miit’in py’asetpe hãpyk kahato Aika’iwat ewaku hap ewy. Mi’i tã watoĩne’en pote yt watuwemõti hin i mekewat karãpe Tupana timoherep ahewaku hap sio yt hap e’at pe. Mi’i hap e’at pe yt watuwemõti hin i katupono wo’oky’e haria wo Tupana ainug towat miit’in ky’e hap ewywuat no ainug. ¹⁸ Watiky’e sese irania’in pote yt watoken’ẽ hin i i’atupupi katupono toĩne’en aikai i’atuky’e hap sese Tupana miium kaipywiat hawyi yt watoken’ẽ kuap i i’atupupi. Ma’ato watoken’ẽ ne’i pote yt kat i i’atuky’e hap aikai. Mi’i hawyi watoken’ẽ po’og katupono Tupana piat ai’apiheg hap pupi. ¹⁹ Yt watiky’e i te Tupana turan aiky’e Mi’i. Mi’i hap kaipyi watiky’e Tupana mesup. Aiky’e yianmete pote mesup aito watiky’e Tupana. ²⁰ Karãpe wẽtup ok to’e ahepe — Uito atiky’e Tupana e ma’ato mi’i yt topotky’e hin i pytkai mi’i watikuap ta’yn heso rakat. Karãpeĩ yt wati’atuky’e i aiwyria’in mi’i pote yt watiky’e hin i Tupana. Katupono yt heremo hin i Tupana ma’ato irania’in heremo kahato mi’i pote po’og yt niatpo i watiky’e hamo mi’iria heremo pote. ²¹ Pyno ahenoi i ra’yn Aika’iwat piat ainãpin hap sese. Mio tã e hap — Ewei’atuky’e ro eiwyria’in e. Yt ewei’atuky’e eiwyria’in pote pyno yt Tupana ky’e haria hin i eweikupte’en are.

¹ Uwe uwe imohey Iesui Tupana Mipo’oro Aipotypot nuat mi’i hat Tupana mẽpyt sese wo topyhu’at. Karãpe watiky’e Ai’ywot mẽpyt’in mi’i hawyi Ai’ywot mowepit hano watopyhu’at. Mi’i hawyi watoĩne’en Ai’ywot ky’e hano sese. ² Karãpe watiky’e Tupana i’ewy karãpeĩ watunug Tupana piat ainãpin hap ko’i mi’i hawyi Tupana mẽpyt’in ky’e hano watoĩne’en. ³ Iesui Ywot ky’e haria ti imiky’esat nug haria wo tukupte’en. Karãpe irania’in ahã’ãg yt naku i nug hamo Tupana mẽpyt’in aito mi’i pote Ai’ywot ehay upi yn waku watoĩne’en. ⁴ Ta’i yt niatpo hin i watunug Ai’ywot ainãpin hap ko’i katupono Ai’ywot mohey haria kahato aito pote. Karãpeĩ irania’in ahã’ãg yt naku i nug hamo mi’i hawyi yt i’atuehay upi hin i watoĩne’en katupono Tupana mẽpyt’in aito pote. ⁵ Karãpeĩ watomohey kahato Iesui Tupana Sa’yru e hap mi’i hawyi Tupana aipowyro kahato miit’in miat ahã’ãg hap akit hamo. Mi’i hawyi po’og ahesaika watoĩne’en i’atueko sa’ag nug hap kai.

⁶ Iesui ti Tupana mi’airo Ahehakyera’at hanuat. Mi’i pote put’ok’e hawyi Tupana miky’esat ok tã yne tutunug. Hãpyk kahato toĩne’en To’ywot ehay ewy toĩne’en. Sa’awy’i toto toset’ok hamo. Meiũran iku’uro. Mi’i hawyi huu ta’at yne yi tote To’ywot miky’esat ewy. Koitywy Tupana to’e wuat’i pe — Uha’yru ti uimi’airo wuat’i Porekuat nuat e. I’ewyte Tupana Pã’ãu mio tã e. — Yt heso hin i e Tupana Pã’ãu ahepe. ⁷ Toĩne’en mye’ym aimu’e haria mesuwat yi totiaria pywo Iesui Tupana Mipo’oro Eiporekuat nuat e haria. ⁸ Ta’i Tupana Pã’ãu ihay Iesui ete. I’ewyte I’ywot ihay Tosa’yru set’ok turan. I’ewyte Iesui suu aimu’e kahato. Mi’iria mye’ym ok ihay te Iesui mõtypot haria to’o’ewy’ewy i’atumienoi. ⁹ I’ewyte typy’i kahato miit’in ihay Iesui etiat rakaria. Mi’iria — Waku watomohey Tupana e hap Tosa’yru piat hap. Pywo pe ti Mi’i po’og po’og hesaika miit’in mienoi kai — Uha’yru kahato En e hap waku watomohey. ¹⁰ Ma’ato — Yt atimohey i Tupana e pote — Heso rakat En wato’e tope. Ma’ato watomohey Iesui Tupana Sa’yru hawyi i’ewyte toĩne’en aipy’a pe ihay rakat pywuat e hap ewy. Ma’ato aipiit yt e i pote yt kat i Tupana pywo e hap aikai — Heso heso yn wato’e Tupana pe. ¹¹ Mio tã e aipy’a pe — Tupana tum na’yn uhepe Tosa’yru. Mi’i pote areĩne’en na’yn wuat’i e’at piano wato’e aiwepe. ¹² Pywo pe ti rat uwe uwe topyhu’at Tupana Sa’yru eiam mo mi’i hat yn toĩne’en wuat’i e’at pe ma’ato uwe uwe yt Tupana Sa’yru yt eiam mo i mi’i hat yt kat i heĩne’en wuat’i e’at piat hamuat hap. ¹³ Eipe ti Tupana Sa’yru mohey haria sese eipe. Mi’i pote atiky’esat eweikuap eweikupte’en wuat’i e’at piat hamuat hap. Mi’i hap kuap hamo atiwan mesuwat uimiwan ehepe. ¹⁴ Karãpeĩ wahẽtup Tupana pe imiky’esat ewy hawyi watikuap ta’yn ahehay Tupana ewaure ka’a pe teke ra’yn ahehay. Mi’i hawyi watuwehum at howawi aimiẽtup ium hat kape. ¹⁵ Karãpe wahẽtup imiky’esat ok tã hawyi tuwewaure ka’a kahato ahehay kape hawyi — Pywo wato’e tutum aru aimiẽtup wato’e aiwo’ope. ¹⁶ Uiwyria’in karãpe wẽtup ok aiwyria’in Aipotypot Iesui mohey hat yt naku i nug hat pote waku wato’e Tupana pe — Waku waure wo ereĩne’en aiwy minug sa’ag ete waku wato’e. Etihep aiwy iminug sa’ag myi wato’e katupono yt tuwepyi hin i tutunug sa’ag waku wato’e. Emohey te ma’ato yt hesaika kahato i te yt naku i nug hap akit hamo waku wato’e Tupana pe. Toĩne’en mekewat sa’ag nug hat sese emohey hap pun hat ma’ato mi’i hawyi yt tutunug i mi’i pote waku waure wo ereĩne’en aiwy minug sa’ag ko’i kai waku wato’e Tupana pe. Mio tã wato’e pote meremo Tupana topyhu’at waure wo i’ewyte tutum aiwy pe imoehãite hap imoesaika hamo are uiwyria’in. Ma’ato karãpe wẽtup ok Iesui mohey hat topyhu’at ipy’ahak Tupana ete Iesui ete ahete i’ewyte — Yt atimohey i te Iesui e mio tã to’e haype yt imohey i hat ewy tutunug tuwepyi. Mi’i hawyi Tupana ipy’ahak kahato topyhu’at mi’i hat ete. Yt kan hamo i wato’e Tupana pe — Waure wo ereĩne’en aiwy minug sa’ag kai katupono tuwepyi i ipy’ahak toĩne’en Tupana ete wato’e. ¹⁷ Yne aiminug sa’ag ko’i yt naku i topyhu’at Tupana wanẽtup hawe wen ma’ato wẽtup aiminug sa’ag po’og sa’ag torania kawiat katupono karãpe aiwepyiat hap — Yt woromohey i En po’og wato’e Tupana pe Ha’yru pe mi’i hawyi yt kat i po’og paa’ai’e hap sa’ag nug hap etiat. Mi’i hawyi Tupana yt aimohãpyk kuap i katupono aiwepyi watipun ahehakyera’at hap pote. Aiwepyi watikat ai’apiheg hap wuat’i e’at piat hap. Yt naku i kahato watipun imohey hap are. ¹⁸ Uiwyria’in karãpe watomohey Iesui hawyi Tupana ainug tosa’yru’in tosaki’yt’in wo. Mi’i hawyi imẽpyt’in ko’i wo watopyhu’at. Mi’i hawyi Ai’ywot ewy watoĩne’en yt kat i sa’ag yt kat i yt naku i hap watunug neran. Aheko yt watunug neran i po’og aiminug sa’ag ko’i sa’awy’iwuat aheko sa’ag ko’i katupono Tupana ainug tomẽpyt’in no Tosa’yru Pã’ãu wo aipyt’atnug hawyi. Koitywy ahowapy kahato Tupana Pã’ãu wywo. Mi’i hawyi Tupana eiam mo kahato watoĩne’en. Mi’i hawyi karãpe Ahiag ahã’ãg neran kat sa’ag kat sa’ag nug hamo mi’i hawyi Tupana Pã’ãu ai’ãuka kahato ainãpin kahato aihep ahiag aima’at’i ma’at’i hap po pyi. Mi’i hawyi yt kat i ahewaure ahiag ahã’ãg hap kape — Yt rei’o yt rei’o wato’e ahiag me. ¹⁹ Pywo ti rat irania’in mesuwarotiaria ahiag ehay upi yn te’eruwewanẽtup at ka’ap katupono ahiag emiit no te’eropyhu’at are. Ma’ato aito Tupana mẽpyt’in nuat watoĩne’en pote yt irania’in ewy i aito yt kat i aikai ahiag wat. ²⁰ Koitywy watikuap kahato Tupana sa’yru’in saki’yt’in aito hap. Ta’i watikuap Tupana Sa’yru hawyi Tupana moherep hat sese topyhu’at po’og po’og mekewat pywuat etiat kuap hamo. Mi’i tupono mekewat Tupana Mipo’oro Aiporekuat nuat hat watikuap hawyi topo’oro hat Tupana watikuap i’ewyte. Sa’awy’i watikuap teran uwe Tupana hap ma’ato yt heremo hin i Tupana ahepe. Ma’ato mesup heremo ra’yn Ahetupana katupono Ha’yru imoherep ahepe. Tupana Ha’yru ti To’ywot ewywuat wẽtup miit ewy. Karãpe wata’akasa Ha’yru kape pote I’ywot kape ti ra’yn wata’akasa wy are. Mi’i pote mesup — Worokuap kahato En wato’e yn Tupana pe. Koitywy uiwyria’in watoĩne’en Tupana pe aikotã Tupana eiam ewy mi’i pe watopyhu’at. Sa’awy’i watomohey Iesui ti Tupana Sa’yru e hap hawyi Iesui po pe watopyhu’at. Ipy’a pe kahato watoĩne’en. Aika’iwat yat piaria ewywuaria watopyhu’at. Iesui ti Tupana sese mi’i pote Tupana pe watoĩne’en Iesui pe watoĩne’en pote. Iesui ti wuat’i e’at piat ieĩne’en hat i’ewyte aito wuat’i e’at piat watoĩne’en Iesui wywo wẽtup miit piit ewywuat pote are. ²¹ Uimiky’e ko’i uha’yru’in uhaki’yt’in uito Iuwãu ti e’ywot uito. Uimẽpyt’in ewywuat eipe mi’i pote woroho’onãpin. Ewei’atu’atoiat ro tupanaria yne yne aipo wuat aiminug sa’ag koi are. Mi’i hawyi ewetunug no Tupana yn Ehetupana wo are uito Iuwãu. Pyno toran na’yn uimiwan are’e.

Uito ti Iesui potpo’oro Iuwãu.