Pihlihbi

PIHLIHBI

Wargahng Poal Yihr Yaa Pihlihbi

Rob Ke Nying Warga

Warga gihr Poal naa agweede yihr yaa Pihlihbi ngo anaa agweede ke yihr akuud umodho gihr yaa ayiiho ge anaa akwanye yi piny Yurop. Poal anaa yi thijin ge agweede kitaab gihn ni, kedea kuohme anaa ayihny jo mahne mooge maa yaa yiiho me tiihyo ree. Poal cwihnye anaa arahnyo ke nying giih ucahb ge puohny kiin akuud yaa yiiho yi Pihlihbi. Abea keehd maano, e cwihny Poal amedo yi warga gihn ni bang gihn ngo arubo ke rob me cwihny be diiw yea ke dhe yoohn yiiho gihre naa ayiihe Jeacuu Kriihjto keter.

Poal yaa yiiho geen Pihlihbi ge aleeye yi warga gihn ni ke nying gihn aoohr gene giih nyepinye maa anaa akonye ree ke gen. Warga agweed Poale ne ciihm cwihny jo yiiho giih Pihlihbi beere cwihny gen deed gene deedo ubahnge yihdh gen be baadh ke nying alyaahbe giih apahdh wiih Poal kedea wudh gen ke ngud gen. Cwihny gen aciihme kejea ngoor gene dhe yoohn beer gihr Jeacuu beere wudh gen be kadh ke giih upiny kan e pahdh aduule yihdh gen kedea giih nhyaam. Ngo ateede yihr gen kejea beehd gen naa anweehd ke Jeacuu ngo beehda muuny Juog maa ayoad gene ke nying yiiho gihr gen. Ngo kuu ayoad gene kaa nying wuor loohng Judea kedea giih yaay ne yug Judea. Poal agweehdo ke nying med cwihny kedea doohr ne cub Juoge yihr yaa beehdo naa anweehd ke Kriihjto.

Gihn wiihe ne maalo yi warga gihn beehda med cwihny, diiw cwihny, nweehd kedea kwany dhe yoohn yiiho kedea beehdo gihr jo yiiho. Warga lan cwihny Poal ke nying akuud jo yiiho giih Pihlihbi, ngo anyoadhe thiow.

Kaa Acaan Luube

Lum umodho 1:1-11

Giih ayug rog gen rih Poal ke ngude 1:12-26

Kuowo tiehd ke Kriihjto 1:27-2:18

Gwiihdo ke nying Timodhy kedea Epabrodiitoj 2:19-30

Toohn ke nying jo mahn kedea giih krahg 3:1-4:9

Poal kedea gome giihe maa yaa Pihlihbi 4:10-20

Gug luube 4:21-23

Maahdh

¹1:1 Timodhy: 1Kor 4:17 A Poal kedea Timodhy wa ge yaa tiihj giih Jeacuu Kriihjto, wa ne gweehdo yihru wu yaa nii cing Juog ge anweehd ke Jeacuu Kriihjto. Wu ge beed Pihlihbi, ge ayiiho ke dhe yoohn Jeacuu Kriihjto kedea yihr jo doonge giih ne kiin yaa yiiho maa jo kony gen yi tiihy gen.

²Beehn Juog Wuur kedea Jeacuu Kriihjto Ruohdh cub gene muuny kedea doohr.

Poal Muohj Koohr Juog Kedea Kwahyo Kaa Nying Yaa Yiiho Giih Pihlihbi

³1:3 Rom 1:8-10; 1Kor 1:4; 1Th 1:2-3 Juog gihn wuora koohre beehde muohja muohjo nea bangu para paro. ⁴Thiow ge kwaaya kwaj ke nyingu cang, e a kwahy kaa med cwihny, ⁵bang gihn akonyu an keehd tiihj ke nying Ciig Beer. Kuny gihru noono ngo athubo ke wong cahng ayiihu Ciig Beer uwahnhe cahng tihn. ⁶1:6 2:13; 1:10 Cwihnya med thiow bang gihn ngo ngahya kejea Juog ngaa athubo ke tiihj yi koohmu ke dhe yooh me beer wa kwaad man ubar maalo ke tiihj kiinu ukeehle ngo guge uwahdhe cahng uduu Jeacuu Kriihjto.

⁷1:7 2Kor 7:3; Epi 3:1 Cwihnya med ke nyingu kedea kare nud umihn cwihnya bang gihn wu beed yaa aduuna. Keehd maa amag an yi thijin wale keehd me naa yi kala ne puohnya Ciig Beer ukeede piny e wo cang muuny Juog unywaago nywaago. ⁸1:8 1Kor 16:24Nhyaahro gihr Jeacuu: 2Kor 5:14 Beehda gihn me keehd Juog e ngo ngahye kejea cwihnya ayuohd bangu cang ke dhe yoohn nhyaahro gihr Jeacuu Kriihjto.

⁹1:9 Klo 1:9-10 Juog beehde ngo kwaya kwayo ke nyingu beere nhyaahro gihru ke kiinu ree jwage jwago ke dhe yoohn ngahy nyepinye kedea ke dhe yoohn dead yihdh gen. ¹⁰1:10 Rom 12:2; Epi 5:27; Judea 5:14Cahng Ngad Boadh nyoge: 1Kor 1:8; 2Kor 5:10; Pihp 1:6; 2:16 Dhog yiehdh nu ge nuu ukony wun ungeyu gihn maa adiehr beere cahng duu Ngad Boadh nyoge e awuohj me thiin me yoade rogu tooro. ¹¹1:11 Jon 15:8; Jeam 3:17 Awuohj utooro rogu bang gihn wu ayug Jeacuu Kriihjte, naa abiohgrwaale beere e nying Juog ke leeyo kedea upoonge.

Kar Beehdo Keehd Kriihjto

¹²1:12 Epi 3:1; 2Tim 2:9 Jo wan, cwihnya ne bange ungahyu ngo kejea kwaad giih ayug rog gen riha, ge ne kony Ciig Beer udoohnge ne gihn me bar maalo. ¹³Noono, e yaa koar paar jaah kedea nyoge mooge thiow ngo ngahy gene kejea a beehdo ne maabuuj kan kaa nying gihn nahga ngad Jeacuu Kriihjto. ¹⁴Beehdo gihra yi thijin thiow cwihny yaa yiiho me thoohdh aweehge ngahmo ubahnge cwihny gen be diiw rih Jeacuu, kedea upuohny gene Ciig Beer e lwahr tooro rog gen.

¹⁵1:15-17 2Kor 2:17 Ngo beehda adiehr kejea nyoge mooge kiin gen ge upuohnyo ke nying Ngad Boadh nyoge e yihdh gen pahng ke giih tiel kedea ke giih ater. Kedea ngo adiehr kejea nyoge me thoohdh nud thiow me cwihny gen ne tiihy gihn me beer ¹⁶Kwaad yaa ni tiihyo beer ngo yug gene wa maano bang gihn nhyaahro nud yi cwihny gen kedea ngo ngahy gene thiow kejea Juog e naa ayug an ne ngaa me rubo ke nying Ciig Beer. ¹⁷Abea kwaad yaa yihdh gen pahng ke tiel, Ciig Beer be puohny gene kaa cwihny gen me cang bang gihn ngo par gene paro kejea gihn nu a athoohre yi gihn me raaj kara ge beeda yi thijin. ¹⁸Abea nea mara, e gihn me raaj yi puohny nu tooro. Bang gihn keehd me puohny nyoge ke tiel yi yej wale me puohny nyoge ke dhe yooh me beer e poohd e Ciig Beer ke nying Ngad Boadh nyoge e ne puohny. Noono e gihn me rahny cwihnya ke nyinge tooro.

Adiehr muon cwihnya ubeehde e med bang gihn ¹⁹1:19 Rom 15:30 ngo gihn me ngahya ke yaa aduuna kejea a uluny oogo yi thijin. Giih umeehg an luny oogo beehda kwaj gihru bang Juog ke nyinga kedea kuny gihr Wahy Juog ge yoad bang Jeacuu Kriihjto. ²⁰Giih daahda ke cwihnya kedea ge gaahna ge amuu: A daahd ngo ubahnge tiihya ge tiihya yihr Juog be gaahg, kedea a daahd ngo ukedh Juoge ngabo yaa aduuna awaahn ni, wa kwaad kaa acoon, beere riha cuba cubo ne weehg wiih Ngad Boadh nyoge moaro yihr nyoge. Kaano, e gihn me raaj tooro bang wiih Ngad Boadh nyoge umoar kaa nying kuowo gihra keehd me kuowa wale maa athow. ²¹1:21 Gal 2:20; Klo 3:3-4 Beehd wiih piny kan gihr nyinge tooro yihra nea padh ke nying tiihj yihr Ngad Boadh nyoge kedea thona e ne beer keraahyo bang ne yoad Ngad Boadh nyoge. ²²Abea nea a bar maalo ke kuowo wiih piny kaa nying thaahb tiihy Ngad Boadh nyoge, e ma roma ke kwanyo kiin kuowo ke thoo wiiha adhiehdhe. ²³1:23 2Kor 5:8-9 A ne kiin nyepinye ariow: ma beer yihra beehda ubahnge a be cahg beehdo wiih piny kan, ne ci bang Ngad Boadh nyoge. ²⁴Abea beehdo gihra wiih piny kan e ne ngweehn yihra bang ukonya wun. ²⁵Gihn ni ngo beehde e ayiiha kejea a poohd ubeehdo ke wun bang ne kony wun yi dhe yoohn beehdo yihr yaa yiiho kedea ne jwag yiiho gihru ubeehdu ke med cwihny wu yaa Pihlihbi. ²⁶A tiihyo wa maan ni beere ge beehna bangu, e kare nud umaahgu ke nying gihn atiihy Ngad Boadh nyoge yihra.

²⁷1:27 Klo 1:10; 1Th 2:12 Gihn teeg keter beehdu ke dhe yoohn beehdo gihn arob Ciig Beere yihru ke nying Ngad Boadh nyoge. Keehd me kobe kejea a ubeehno ne maany wun wale a be rom wahnho ne maany wun, e ngo dhiila kaa ngahyo kejea wu beehdo kaa cwihny acielo yi yiiho gihru. Ke dhe yoohn beehdo gihn nu e wu dhiil cuungo naa acielo yi yiiho gihru ke nying Ciig Beer. ²⁸Wu kea tudo yihr jo mahn giihu. Beehdu e cwihnyu adeedu. Gihn nu nyoadh ngo yihr gen kejea ge nyoge me nying gen arwaahny Juoge abea wu aboadh Juoge. ²⁹Giih nu cang rog gen uyug gene bang gihn Juog tee acube yihru ne tiihj ke nying Jeacuu. Wu tiihyo yihr Ngad Boadh nyoge kaa dhe yoohn gihn ayiihu lume kedea wu tiihyo yihre kaa dhe yoohn raahm gihn ayoadu ke nyinge. ³⁰1:30 Tiihy 16:19-40; Pihp 1:13 Awaahn ni rogu amadu banga ne buohj ke tiihy Ciig Beer gihn. Ngo beehda tiihj maa abuohja ke tiihy ngo coon, uwahnhe tihn, e ngo uneehno yihru kejea a poohd ubuohj ke bar maalo ke tiihj ke nying Ciig Beer.

Jeacuu Beehda Ngaa Me Cwihnye Puol Kedea Ngo Teeg

¹Dhe yoohn kuowo gihru naa agwiir Ngad Boadh nyoge ge beehdu kii ngo awaahn ni tee acube yihru, kedea nhyaahro gihre naa ayuge yihru wu buu weehge diero keehdo. Koohmu amor Wahy Juoge ubeehdu beer ke keewu. ²2:2 Jon 13:34; 1Kor 1:10-11; Gal 6:10; Epi 5:2; 1Jon 4:12 Ke nying giih nu e nyingu akwaya kejea meehgu cwihnya mihno keter bang gihn yihru ne par acielo, kedea yihru ne nhyaaro maa yihru ne beehdo ke cwihny acielo. ³2:3 Rom 12:10; Gal 5:26 Giih lahj cwihny keá yugu, kedea gihr nyepiny keá yugu ke nying nhyaam. Beehdu ke dhe yoohn puol cwihny, nahg dhaane ree piny udoohnge wa nyoge mooge ge ne beeye yihre. ⁴2:4 1Kor 10:24 Dhiilu ngo ke ngahyo kejea dhaano tiihyo kaa nying ngaa moogo, abea ngo be tiihyo kaa ke nying mar ngude keede.

⁵2:5 Jon 13:15; Rom 13:14; 15:5 Gihn tiihyu dhiile roomo keehd kwaad kaa atiihy Jeacuu Kriihjte.

⁶2:6 Jon 1:1-2; 17:5; Judea 1:3 Jeacuu e yihre ne cahdo gihr Juog ni,

naa adoohng ne dhaano,

e ngo kea tero kejea wiihe rome romo ke Juog.

⁷2:7 Jon 1:14; Rom 8:3; 2Kor 8:9; Judea 2:14, 17 Abea gihn ayuge beehda yiiho e naa ayiihe ngo ke kar wiihe e keede

udoohnge ne dhaano utaahngo uduoge ree piny ne baahng yihr nyoge.

⁸2:8 Jon 10:17; Judea 5:8; 12:2 Ree abeehne ne yugo ne ngaa me tee tooro yihre

kedea uyiihe thoo keehd thoo me raaj wa thoo rih yaadh maa ariihw.

⁹2:9 Tiihy 2:33; Epi 1:21; Judea 1:4 Ke nying gihn ayiihe kwaad beehd nu, e wiihe abeehn Juoge ne tihng maalo ucube tee yihr ngo kedea ucube ngo yi ruohdh.

¹⁰2:10-11 Jon 5:23; Rom 10:9; Any 5:13 Noono e lihng nying Jeacuu

e kwaad jo ne Paar Maalo kedea yaa wiih piny maa yaa athow cang cung gen rung gene ke piny nyume.

¹¹Noono thiow e kwaad dhaano cang rob ngo kea

Ngad Boadh nyoge beehda Ruohdh.

Ne rob wa maano, beehda leej e ne yug gene yihr Juog Wuur.

Wu Neehn Daahr Ciehro Ge Meeny Piny

¹²Wu ge jo’a maa anhyaara wa kwaad kaa anaa awuoru leeba maano e a poohd ne bangu, kea noono baru maalo ke wuor leeba, keehd me toora kiinu. Kedea baru maalo ke tiihyu, maano e wu tud ke rih Juog cog, beere dhe yoohn tiihy boadh wahy baaru ke maalo. ¹³2:13 1:6; Jon 15:5; Rom 7:18; 15:18; 1Kor 12:6; 15:10; 2Kor 3:5 Baaru ngo bang gihn ke nying nihn e Juog beehde ne kiinu ne cub tee yihru kedea cwihnyu loge logo ne meehg wun yug gihre ge daahde yihru.

¹⁴Wu keá peehmo kedea wu keá duohr ke nying giih me reje ke kiinu udoohnge wa gihn yugu ngo padh athiir. ¹⁵2:15-16 1:10; Mat 5:14; 10:16; 1Kor 1:31; 2Kor 1:14; Gal 2:1-2; Epi 5:8; 1Th 2:19 Noono e wu ubeehdo ne nyethen Juog me awuohj tooro rogu keehd me beedu wiih piny me yea apahng ke giih me reje kedea yea apahng ke nyoge maa yaa adhemuohme. Beehdu ke beehdo me beer ne yug rogu kiin gen neehn ciehr ge meeny piny yihr nyoge ni. ¹⁶Wa kwaad kaa apuohnyu Ciig Beer ge rubo ke nying kuowo yihr nyoge, e kwaad puohny gihru noono wiiha utihngu maalo cahng uduu Ngad Boadh nyoge, bang gihn ka beehdu kii ngo kedea dhe yoohn tiihyu e nuu unyoadh ngo kejea gihn atiihya kuu anahg gihn me gihr nyinge tooro. ¹⁷2:17 Rom 15:16; 2Tim 4:6; 1Jon 3:16 Ka moogo e remo gihra uwoj piny wa gihn maa anahg piny yihr Juog beere yiiho gihru nieng piny. Nea e naa gihn uyug ree noono e cwihnya med kedea unywaaga mihn cwihny gihn nu ke wun tiehd. ¹⁸2:18 3:1; 4:4 Kedea thiow cwihnyu udhiil mihno bang gihn uyug ree ge umeehg cwihnya mihno keehd wu tiehd.

Poal Arubo Ke Timodhy Kedea Epabrodiitoj

¹⁹2:19 1:1 Jeacuu Ruohdh gaahna gaahno kejea dhe yooh ucube yihra ne oohr Timodhy bangu piow piow beere cwihnya naa yum ke nying lum ulihnga ke nyingu. ²⁰2:20 Tiihy 16:2 Bang gihn Timodhy e naa ngaa me cwihnye ngahya kedea e naa ngaa me daahd ukonye wun ne cohg. ²¹2:21 2Tim 4:10 Kwaad dhaano cang par mar ngude e keede ne maany ka konye ree kii ngo abea padh me tiihye ke nying Jeacuu Kriihjto. ²²Keehd wu keedu e ngo ngahyu kaa arome cuungo yihdh nyepinye kii ngo. Kedea ngo ngahyu kaa atiihye ke an. Ngo atiihyo wa mar nyedhoohg me tiihyo ke wahn. Wa atiihyo keehde tiehd keraahyo ne puohny Ciig Beer. ²³Noono e ngo acuba yi cwihnya uoohra ngo bangu ka me cahng nea lug gihra ayug. Ka moogo e a ulony oogo wale a buu ulony oogo yi thijin. ²⁴Abea Jeacuu gaahna gaahno kejea a urom beehn bangu ka me cahng.

²⁵2:25 4:18 Ngo apara kejea ngweehn uoohra ngadu ge cuohn ne Epabrodiitoj bangu. Ngo beehda ngad wuohdo gihru maa anaa aoohru banga kedea ngo acuungo ke an yihdh giih me teeg ne kony an yi tiihy Ciig Beer. ²⁶Cwihnye ayuohd ne liew wun, kedea udiero kea yihdhu abaadh ke nying atwaany gihre naa alihngu. ²⁷Anahg atwaany me yea atooro wahy. Abea gihn me beer keter ngo abeehn Juoge ne yugo yihre, kedea padh yihre keede abea keehd an thiow e Juog lan cwihny me duohng ayuge utoore. ²⁸Cwihnya amada yi lum oohr ngo bangu beere cwihnyu umihno keehdo ge niidu ngo kedea beere lan aduuna doo piny. ²⁹2:29 1Kor 16:16, 18 Loru ngo ke med cwihny ke nying Jeacuu, bang gihn ngo beehda ngaa maa ayiih lum Jeacuu. Kwaad nyoge me wa en wuoru gen wuoro. ³⁰Wahye ge anaa agwaaye yi thoo adhaahr wonge anaa acej rwaahnyo bang gwiihdo yihr Ngad Boadh nyoge ke dhe yoohn kony an. A akonye ke dhe yoohn ne konyu an keehde.

Dhe Yoohn Doohng Naa Abiohgrwaal Ke Juog

¹3:1 2:18 Wu jo’a ge ayiih Ciig Beer, ne gihn muu ukuonga ke robo yihru ce gooya wiih loohnga piny. Beehdu ke med cwihny ke nying gihn atiihy Jeacuue yihru. Abea a be dhieg ke ber lubo maa agweeda piny yihru coon. Ngo beer ubera ngo beere wu udoohng teeg yi yiiho gihru.

²3:2 2Kor 11:13 Koaru rogu beer mee ke nying jo nu yug giih me reje. Ge beehda nyoge me room kaa goohy, kwaad yaa nhyaar liir dehn nyoge ke nying thoam. ³3:3 Rom 2:28-29 Wo naa yaa athoam abea padh gen. Wo naa athoam bang gihn Juog wuoro kaa dhe yoohn Wahy Juog kedea cwihnyo med bang gihn kuowo gihro ngo anweehd keehd Jeacuu Kriihjto. Gihn me gaahno tooro yihdh giih yug yi kuohm dhaano neehn thoam kejea dhaano yuge yugo naa abiohgrwaal ke Juog. ⁴3:4 2Kor 11:18, 21 Nea giih wiih piny ge naa ke gaahno, e giih nyepinye me thoohdh me ne roma ke gaahno nud.

Nea ngaa me koohbo kejea giih tiihye ge gaahne gaahno, e an ne yihra ne giih me thoohdh me gaahna. ⁵3:5 Luk 1:59; Rom 11:1 A abeehn ne thoamo ke batien nihn abiihjberiow batien cahng anyuol an, kedea yaa tien Paar wan ge beehda yaa Yijarael dhe wod Paar Benjamin. Wura ge ke miiha ge beehda yaa Yijarael. E thiow loohng gihr yaa Judea awuora ne cohg ke dhe yoohn wuor wane ngo wa yaa Paarijea. ⁶3:6 Tiihy 8:3; 22:4; 26:9-11 A anahg ngaa me nhyaar yug kwaad gihn ngahya ge daahd Juoge yihra ni. Noono e giih ajohr me thoohdh ge ayuga rog yaa ayiih lum Jeacuu cuohna kaa tiihy nu e ne meehg cwihny Juog mihno. Nea dhaano doohng naa abiohgrwaal kaa dhe yoohn wuor loohnge, e a anahg ngaa maa abiohgrwaal me kwaade tooro.

⁷3:7 Mat 13:44, 46 Giih nu na tiihya kaa nying wuor loohng, wiiha anaa apara kejea gihn me beer uyoada. Abea awaahn ni abeehna ne yoado kejea gihn me beer me kahl gene yihra tooro nea a daahd tiihj ke nying Ngad Boadh nyoge. ⁸Padh giih nu keed gen, nyepinye cang ge niida e gihr nying gen tooro nea a daahd ungahya Jeacuu Kriihjto Ruohdha. Kwaad giih na yuga ge abeehna ne wiio cang. Kedea giih nu cang ge niida wa yuu dhe kala bang gihn Jeacuu Kriihjto Ruohdh cog e naa acuba yi cwihnya, ⁹3:9 Rom 1:17 beere riha yuuda e a nweehd keehde naa acielo. Dhe yooh me beehda naa abiohgrwaal a keeda ngo tooro bang gihn dhe yoohn nu beehda gihr loohng. Juog e naa ameehg an doohng ne abiohgrwaal ke nying yiih Ngad Boadh nyoge. ¹⁰3:10-11 Rom 6:8-11Udoohnga wa en yi thone: 2Kor 4:10-11Cahro: Tiihy 4:2; Rom 5:17 Gihn daahda beehda ne ngahy Kriihjto kedea ne ngahy teeg ameehg Juoge ngo cahro yi thoo. A adaahd unweehda keehde uyoada raahm udoohnga wa en yi thone. ¹¹Wale beere ngo gaahna gaahno kejea a ke nguda a udhiil Juoge weehg cahro yi thoo uyoada kuowo me be gug.

Dhe Yoohn Gihn Daahd

¹²3:12 1Tim 6:12; 2Tim 4:7; Judea 12:1 Kea paru kejea a adoohng ne ngaa me ka me daag ree tooro. A poohd ubuohj ne yoad dhe yooh me doohnga wa Jeacuu Kriihjto. Ne doohng wa Jeacuu e naa gihn acuohne an ke nyinge. ¹³Jo paar wan a ke nguda riha be kwaana ne ngaa maa adoohng wa Jeacuu Kriihjto. Abea gihn nud a daahd uthaahba kwaad gihn poohd kaa ayugo, ge ne wong maalo ni. ¹⁴3:14 1Kor 9:24-25 Noono e a utiihyo keraahyo udoohnga wa Jeacuu Kriihjto, batiene e Juog a ukedhe paare ke nying gihn atiihy Jeacuue yihra.

¹⁵Wo cang ge yihro ne yiiho me teeg, cubo wudho ne doohng ne Jeacuu Kriihjto. Abea nea nyoge mooge nud kiinu me yihr gen ne par moogo me ne keede, e ge umeehg Juoge ngey gihn maa adiehr. ¹⁶3:16 Gal 6:15-16 Nyepiny acielo me teeda gen, baro maalo ke beehdo ke yoohn acoon e daahd Juoge.

¹⁷3:17 1Kor 4:16; 1Pii 5:3 Jo’a madu rogu bang yaa tiihj kwaad giih tiihya. Cubu cwihnyu piny ne ngoor dhe yoohn beehdo naa anyoadh wane yihr nyoge. ¹⁸3:18 1Kor 1:23; Gal 6:12 Gihn daahda ke robo yihru ngo aroba coon yihru tiel me thoohdh kedea awaahn ni ngo bera bero ke piih wonga ne cur. Nud ke nyoge me thoohdh me dhe yoohn beehdo gihr gen ge aweehge doohng ne jo mahn keehd Ngad Boadh nyoge naa athow ngahy yaadh maa ariihw ne boadh won. ¹⁹3:19 Rom 16:18 Ge nyoge me caa paar maaj bang gihn giih ungoom kan ge naa aroony gene ne Juog yihr gen. Kwaad giih kahl yaahr kuohm ge ne beel gene ke gen kedea giih ungoom kan ge naa acub gene yi cwihny gen. ²⁰3:20 Epi 2:6; Judea 13:14 Ke kur maro Paar Juog e naa kar beehdo yihro, kedea ge beehdo awaahn e wo koar Ngad Boadh won, Ruohdho Jeacuu Kriihjto ge beehn ke yoohn Paar Juog. ²¹3:21 Rom 8:29; 1Kor 15:25, 28, 43-53; Klo 3:4 Koohmo ge thow ni, ge ubeehne ne waaro udoohng gene wa kuohme ge be thow, keehd teege noono ameehg ngo doohng ne ruohdh nyepinye cang.

Maahdh Kedea Cuohn Loohng

¹4:1 1Th 2:19-20 Noono jo’a, wu ge anhyaara keter, kedea ge bangu acana keraahyo! Cwihnya med keter kedea wiiha mor ne rob ke nyingu ke nying nihn yihr nyoge. Caahn e wu keá dhaahr ke beehdo tiehd keehd Ruohdho Jeacuu.

²Wu ge nyemiiha ge cuohn naa Yudya kedea Centiihje nyingu akwaya kejea madu lumu naa acielo, bang gihn wu beehda yaa yiiho me wuor Ruohdh Jeacuu. ³4:3 Tiihy 3:5 Kedea yih thiow ge beehda ngada me tiihy ke an tiehd kedea me cwihnyi gaahna gaahno a daahd ngo ukonyi maahn giih ni ariow bang umahd gene naa acielo, bange a akony gene keraahyo ke puohny Ciig Beer gihn ni yihr nyoge. Gen maa Kelmen kedea jo atiihyo cang ke an, ge abuohj ke puohny Ciig Beer noono e nying gen amad keew yaa nying gen nii kitaab kuowo.

⁴4:4 2:18 Kwaayu beehdo ke med cwihny ke nying giih atiihy Jeacuue yihru. Ngo bera bero yihru jo wan, kejea beehdu ke med cwihny ke nying giih atiihy Jeacuue yihru. ⁵4:5 1:10; Rom 13:11-12; 1Kor 16:22; Judea 10:25; Jeam 5:8; 1Th 5:1-2 Nyoadhu rogu ne nyoge me beeye yihr kwaad dhaano cang. Ruohdh beehne adoohng cahng. ⁶4:6 Mat 6:25; 1Pii 5:7 Cwihnyu keá baadh ke nying kwaad nyepiny me yug ree, abea nea wu ukwahyo e kea kwayu gihn daahdu ke cwihnyu cang yihr Juog kedea ke muohj koohre. ⁷4:7 Jon 14:27; Klo 3:15 Noono e doohr gihr Juog ge be rom dhaano utaahnge maa now ke ngeyo, wu umeehge beehdo e wu be dier bang gihn wu anweehd ke Jeacuu Kriihjto.

⁸4:8 Rom 12:17-18 Jo’a, awaahn ni teeda teedo yihru kejea cubu giih me beeye ge yihr gen ne leej ke raahyo yi wudhu. Giih me beehda ather, giih me meehg kuohm wuoro, giih me beeye yi wong Juog kedea yi nying nyoge, maa giih me kahl nhyaahro kiin nyoge ge ne dhiilu ke cub yi wudhu. ⁹4:9 3:17; 1Kor 13:11 Dhiilu wudhu ke cub piny ne yug kwaad gihn apuohnya yihru uwiia ngo yi cingu cang, kwaad gihn alihngu e roba robo kedea gihn aniidu e yuga yugo. Noono e Juog ngaa cub doohr yihro ubeehdo tiehd ke wun.

Maahdh Ke Nying Muuj

¹⁰A abeehdo kaa med cwihny keraahyo ke nying giih atiihy Jeacuue yihra. Cwihnya med naa acahgu nyepinye ke oohr yihra keehdo kedea gihn nu nyoadh ngo kejea banga poohd paru paro. A be kob ngo kejea wudhu anaa awul riha, abea ka nahg ka maa aromu ngo ke nyoadho e naa atooro. ¹¹4:11 1Tim 6:6-8; Judea 13:5 Kea paru kejea a teed ngo kejea a angoohng, a daahd gihr nyepiny. Padh wa gihn nu, bang gihn dhe yoohn beehdo e gihr nyepiny ne yihra kedea e gihr nyepiny tooro yihra ngo ngahya. ¹²Beehdo e gihn me ne yihra tooro ngo ngahya kedea beehdo e yihra ne kwaad giih daahda cang ngo ngahya. Dhog yiehdh wan beehdo e diero tooro yihdh giih nyepinye cang ngo ngahya: ne beehd yi yahng wale beehd yi kahj kedea thiow beehd yi lonyo wale beehd yi ngoohngo. ¹³4:13 2Kor 12:9-10 Ngad Boadh nyoge e ne cub tee yihra me roma beehdo yihdh giih me beeye wale giih me reje.

¹⁴Abea gihn me beer atiihyu ge akonyu an yihdh giih me thoohdh naa apahdh wiiha. ¹⁵4:15 2Kor 11:8-9 Thiow ngo beehde ngahyu keraahyo wu yaa yiiho giih Pihlihbi, kejea umodho ge anaa athubu ke ngey Ciig Beer ni, ge anaa aaya yi paaru ge cuohn ne Macedoanya, akuud yaa yiiho moogo maa akony an atooro nea padh wu cog. ¹⁶4:16 Tiihy 17:1 Keehd ge anaa yi paan cuohn ne Thecaaloanika ni e giih adaag, ge daahda ni, ge aoohru yihra tiel me thoohdh. ¹⁷4:17 1Kor 9:11 Padh kony e naa gihn daahda e keede, abea adaahd uyoadu gihn me beer ke nying tiihyu. ¹⁸4:18 2:25 Giih ni ge naa luube giih muohja koohdhu ke gen ke nying giih kony naa acubu yihra. Kony gihn ayugu yihra duohng uyoohme ka daahda ke cwihnya. Giih akonyu an keehd gen ge akahl ngaa nyinge Epabrodiitoje yihra. Ge neehn ngwahj adung dung gihn duung yihr Juog ne wuor ngo beere Juog cwihnye umihno rih dhaano. ¹⁹Juog gihn ni wuora ni ge yihre ne kwaad gihr ukuom cang deeh muunye ge duohng ucube yihru utoor gihn me daage bang wu anweehd ke Jeacuu Kriihjto.

²⁰Leeyu Juog Wuur ge wuoro ke wong ke wong. E noono.

Maahdh Yihr Yaa Yiiho Giih Pihlihbi

²¹Wu yaa akuud yaa yiih giih Jeacuu Kriihjto wu amaahdha, kedea akuud yaa yiih giih ne kan wu maahdh gene. ²²Jo yiiho giih Juog ge beehd kan ni wu amaahdh gene cang adoohnge yaa ni tiihyo paar Jaah Roama.

²³Beehn muuny gihr Jeacuu Kriihjto Ruohdho beehde ke wun cang. E noono.