Jeamij

JEAMIJ

Wargahng Agweed Jeamije

Rob Ke Nying Warga

Warga gihn agweed Jeamije ngo beehda luub cohg wihj. Cohg wudh nyoge yihdh giih me thoohdh ke dhe yoohn giih atiihj. Warga gihn ngo agweed ke yihr yaa akeedho ke bang upiny cang giih acub rog gen yihr Juog. Jeamij agweehdo kaa dhe yoohn ucaale ke duol me teeg ne cohg luube piny ke nying loohng gihr tiihj kedea nyoadh dhe yoohn jo yiiho ne kaahn gene. Ngo arubo ke nying nyepinye me thoohdh mee giih yug rog gen keew jo yiiho, neehn lonyo kedea kahj, giih utum, beehdo me beer, kwany kiin nyoge, mad yiiho ke tiihj, rob ne yahng, loohng, weehr, nhyaam, dhaahl, beel, guum kedea kway Juog.

Warga gihn ni niing ngo kejea yiiho ge caahdh kaa tiihj tiehd keew jo ayiih Juog.

Kaa Acaan Luube

Lum umodho 1:1

Yiiho kedea loohng 1:2-8

Kahj kedea lonyo 1:9-11

Med cwihny kedea utum 1:12-18

Lihng kedea tiihy nyepinye 1:19-27

Toohn ke nying paahng keew nyoge 2:1-13

Yiiho kedea tiihj 2:14-26

Ngad yiiho kedea leebe 3:1-18

Ngad yiiho kedea yaa upiny 4:1-5:6

Dhog yiehdhe me thoohdh ne cohg nyepinye 5:7-20

¹1:1 Mat 13:55; Tiihy 12:17; 15:13; 21:18; 1Kor 15:7; Gal 1:19; 2:9; 1Pii 1:1 Beehda an, a Jeamij ge ubaahng Juog kedea ubaahng Ruohdh Jeacuu Kriihjto an ne gweehd yihru wu Judea ke karu noono nahgu tien miehr apaar wonge ariow, wu ge akeedho ke bang upiny cang. Wu amaahdha.

Guum Giih Me Reje

²1:2-3 Rom 5:3-5; 1Pii 1:6-7 Jo’a mihn cwihnyu keraahyo nea wu apahdh yihdh giih utum me thoohdh. ³Bang gihn ngo ngahyu nea ka yiihu kii ngo ke tumo e naa kaa abeehnu ne ngahy guum giih me reje. ⁴Dhiilu guum giih me reje ke keehl guge e wu be dhaahr. Nea wu buu udhaahr e naa ka unieng lum Juoge yi cwihnyu ne cohg utoor gihn me daage. ⁵Nea dhaano kiinu yoohn beehdo me beer ge nhyaar Juoge kwihye, e kea kway ngaan nu Juog ge muoj nyoge cang ke med cwihny e ngaa me caye tooro. Kwaye Juog bang gihn ngo ucub Juoge yihre. ⁶1:6 5:13; Mat 7:7; 21:21-22; Epi 4:14 Abea nea dhaano ukwahyo e kea gaahne gihn kwaye kedea e yea be diiw. Bang gihn kwaad ngaa yea diiw uroomo wa athewo yi naam duohng ge wiihe loang yame. ⁷Kwaad ngaan nu wiihe keá pare kejea gihn muu ucub Jeacuu Ruohdhe yihre nud, ⁸bang gihn kwaad ngaan nu gihn daahde kwihye noono e ngo neehn uthuohn ariem goohy ariow.

Ngad Ngoohngo Kedea Ngad Lonyo

⁹1:9 2:5 Ngad akuud yaa ayiiho maa angoohng dhiile nhyaam bang gihn wiihe atihng Juoge maalo. ¹⁰1:10 5:1 Abea ngad akuud yaa ayiiho maa alony mihn cwihnye bang gihn ngo ameehg Juoge doohng ne ngaa me ne bahdh laah. Lonye noono ukeedh wa mar thiiw yaadh maa aryaaw. ¹¹Cahng me moohl e liehdh ge cea ne keehd piny ke leehdho e yaadh ryaawe ryaawo ubeehn thiiw giihe ulwaar gene oogo kedea uryaaw yaadhe raaj mee. Wa gihn nu thiow ngaa maa alony, giih lonye ge uryaaw oogo yi cinge maano e ngo cong yihdh giihe.

Juog Nyoge Be Tume

¹²1:12 5:11; 1Kor 9:24-25 Mihn cwihny ngaa guum giih me reje bang gihn nea ngo atum ugoohge nyoge, e kuowo gihn akob Juoge kea ngo ucube yihr yaa anhyaare, ngo uyoade.

¹³1:13 1Kor 10:13 Nea dhaano ree ayoade e apahdh yihdh giih utum e keá koohbo kea, “Juog a ameehge pahdh yihdh giih utum.” Keá koohbo wa gihn nu bang gihn Juog be tum gihn me raaje kedea Juog dhaano be tume upahdhe yi gihn me raaj. ¹⁴1:14-15 Rom 6:19-21; 7:7-10; 1Jon 2:16-17 Dhaano e keede e ne meehg ree pahdh yihdh giih utum ge yuohd cwihnye rog giih me reje. Noono e cwihnye urwaahnyo upahdhe yihdh giih utum. ¹⁵Kaano nea gihn ayuohd cwihnye rih ngo, ngo ayoade, e adhemuohm atiihye kedea nea adhemuohm adoongo rih dhaano e ngo kahl thoo.

¹⁶Jo’a maa anhyaara nea wa gihn nu e rogu keá meehgu dwaahngo upahdhu yihdh giih utum. ¹⁷1:17 Mat 7:11 Kwaad gihn me beer kedea muuny me ne cohg ge beehn ke bang Juog ke yoohn maalo. Juog e naa acag giih meeny piny ge yi maalo kedea Juog ree be waare wa mar tubo. ¹⁸1:18 Jon 1:13; Rom 8:19-23; 1Pii 1:23 Juog en naa apar ngo umuoje won ke kuowo me guge tooro ke dhe yoohn Ciig Beer ge rob adiehr beere wo naa ateehg gihr umodho ge akuong ke cubo yihr Juog keew giih acage cang.

Lihng Kedea Tiihj

¹⁹1:19 3:2 Jo’a maa anhyaara, cubu gihn ni yi cwihnyu beer mee. Beehn kwaad dhaane cege yihdhe beer ne lihng kedea ngo keá guo paahr yi rob, maa cwihnye keá laar rahnyo. ²⁰Bang gihn rahny cwihny dhaano be yuge naa abiohgrwaal ke Juog wa kaa adaahd Juoge. ²¹1:21 Klo 3:8; 1Pii 2:1 Nea maano kea logu giih reje kedea giih anyoohne ge anyoohr ngahdhu kedea yugu rogu ne nyoge maa now uyiihu lum Juog ge apuohny yihru. Bang gihn lum nu e nuu uboadh wun.

²²1:22 2:17; Mat 7:24, 26; Rom 2:13 Nahgu yaa tiihy giih apuohny yihru ke nying lum Juog. Rogu keá kangu uyugu rogu ne yaa lihng cog abea gihn me tiihyu tooro. ²³Ngaa me lihng lum Juoge abea gihn rob lum Juoge be tiihye, uroomo ke ngaa maa aniid kuohme yi madhara ge maany wonge keehde ni. ²⁴Batien kaa amaanye wonge, e ngo a’aay. Abea naa a’aaye kar madhara e wiihe aguo wulo ukwihye kaa anaa aniide wonge kii ngo. ²⁵1:25 2:12, 24; Jon 13:17; Rom 8:2; Gal 6:2 Abea ngaa cub cwihnye piny ne cohg ne maany yihdh loohnge maa athiir ge cub laahw wihj kedea e ngo be dhaahr ke maany yihdh loohnge, kedea e yihdh gen deade deado thiow, ngaan tiihy giih nu ngo udooj yi tiihye.

²⁶1:26 3:2, 10 Ngaa me koohbo kea e ngad lum Juog abea leebe be koare urube oogo ne pahy, e ngaan nu ree akange kedea gihn anahge ngad lum Juog gihr nyinge tooro. ²⁷1:27 Mat 25:35-36 Lum Juog me ne cal cal me yea tooro giih nyooro e man: maany kiihye kedea gule me ne yi ngoohng wong, kedea koar rog ubahnge dhaano ree be meehge raanyo yihr giih reje wiih piny. Giih ni ge naa dhe yoohn wuor Juog me ne cohg.

Kwany Kiin Nyoge Amahn

¹2:1 2:1-9; Mat 5:45; Tiihy 10:34; Rom 2:11; 10:12; Gal 2:6; Epi 6:9; Klo 3:25; 1Pii 1:17 Jo’a wa ka nahgu nyoge maa ayiiho yi lum Ruohdho Jeacuu Kriihjto ge wiihe amoar ni, kiin nyoge keá kwanyu kejea ngaa moogo beer kedea ngaa moogo raaj. ²Koohbo kejea nyoge ariow ge abeehn ka maa amahd yaa akuud yaa yiihoe yea. Ngaa moogo kiin gen beehda ngaa maa alony maa angaab waare maa awuob me ngien gen teeg kedea lweede ne joadh gihr dhaahb. Kedea ngaa moogo beehda ngaa maa angoohng maa angaab jwaahd waare. ³Nea ngaan angaab waare maa awuob e ne ngahyi ke loro urubi yihre kobi, “Ngaan duohng, kar piih maa awuob e man. Piihi.” Abea yihr ngaan angaab jwaahd waare yih urubo yihre kobi, “Nyieh, cuung kari noono wale beehn ne piih piny yi ngoom kan thaahdh tiena,” ⁴ngahda e kiinu akwanyu kedea rogu ayugu ne nyoge me kihmo abea giih paru ge giih anyoohne ne?

⁵2:5 1:9; Luk 6:20-21; 1Kor 1:26-28; Any 2:9 Lihngu gihn jo’a maa anhyaara. Ngahda Juog akwany nyoge maa angoohng me giih wiih piny tooro yihr gen kedea uyuge gen ne nyoge me lony gen beehda yiiho ne? Kedea ngahda Dhaahr Juog gihn akob Juoge kejea ngo ucube yihr yaa anhyaare, ucube yihr gen ne? ⁶Yaa angoohng koohm gen adhahlu ne cohg! Ngahda yaa alony ge ne kaahn wun ke cing nyooro ne? Ngahda ge naa yaa piej wun ne kedh nyum ruohdhe yi lug ne? ⁷Ngahda ge ne rob giih me reje ke nying Jeacuu ngaan adoohngu ne yaae ne?

⁸2:8 Mat 22:39; Rom 13:9 Yih unahg ngaa maa atiihy gihn maa athiir me ne cohg nea loohng ruohdh gihn agweed yi kitaab Juog naa,

“Nhyaar wadu wa ka nhyaari rihi,”

ngo be dhahli. ⁹2:9 2:1 Abea nea ke dhe yoohn gihn niidi e ne poji kiin nyoge pojo e adhemuohm ayugi kedea yih ke kihmo wa mar yaa toar loohnge. ¹⁰2:10 Mat 5:19; Gal 3:10; 5:3 Bang gihn keehd maa amagi loohnge cang unahge ke nye gihn me thiin mee e naa atoari yihdh gen, e beehd loohng nu cang ge naa atoari. ¹¹Bang gihn ngaa anaa arob ngo kea, “Kea ngaa kaab dhaago,” anaa arubo thiow kea, “Kea ngaa nahg dhaano.” Nea yih kuu akahbo ke dhaago abea dhaano e naa anahgi, e poohde loohng yea atoari.

¹²2:12 1:25 Nea yih urubo, kea rubi kedea tiihyi neehn nyoge me kedh ne kihmo ke loohng me cub laahw wihj. ¹³2:13 Mat 5:7; 7:1; 18:32-35 Rubi kedea tiihy wa gihn nu bang gihn ukihm me cwihny be duu caahn yug Juoge yihr ngaan cwihnye be duu caahn rih dhaano. Duu cwihny caahn en ne wiihe ne maalo yihr ukihm.

Yiiho Caahdh Kaa Tiihj Me Beer

¹⁴2:14 Mat 7:21; 1Jon 3:17 Jo’a gihn e ne konye nea dhaano ukoohbo kea yihre ne yiiho abea giih me beeye me tiihye tooro? Wahye be rom kwaad yiiho me wa gihn nu ke boadho. ¹⁵2:15 Mat 25:35-36 Koohbo kejea umiiho wale nyemiiho maa ngad yiiho yihre tooro waare kedea gihn me came. ¹⁶Nea dhaano kiinu urubo yihre kea, “Yih ucaahdhi ke yoohm rihi. Yih uyihdi ke waaro me wumi rihi yi koohyo kedea cam uyoadi.” Nea giih nu ge arob ngaan nu yihr umen wale nyemen maa ngad yiiho abea gihn me cube tooro ne kony ngo, e ngaan nu akony gihn? ¹⁷2:17 Gal 5:6, 16, 22-24; 1Jon 3:18 Wa gihn nu thiow, yiiho e keede, nea be caahdh kaa tiihy giih beeye e ngo beehda yiiho me koany gihre tooro.

¹⁸Abea ngo ubeehr ngaa mooge kea, “Mari yihri ne yiiho abea mara yihra ne giih me beeye maa atiihya.”

Kea noono nyoadh yiiho gihri yihra ge yea tooro tiihy giih me beeye, e yiiho gihra ke dhe yoohn tiihy giih me beeye ngo nyoadha nyoadho yihri. ¹⁹2:19 Atiihb ukeehg: Mat 8:29; Mak 1:24 Ngahdu kejea yiiho kejea Juog beehda acielo cog e ne boadh wun? Keehd atiihb ukeehg e ayiih gene kejea Juog beehda acielo cog kedea ge utudo yihre kwaade tooro.

²⁰Yih ngaa maa gihn ge wiihi atahg! Yih daahd gihn me nyoadh ngo yihri kejea yiiho me yea tooro tiihy giih me beeye, ngo yiiho me gihr nyinge tooro ne? ²¹2:21 Rom 4:1-5, 13-16, 19-22; Judea 11:17 Ngahda kuowo Abraahm anaa anyoadh Juoge ne ngaa maa abiohgrwaal ke en ke nying gihn atiihye naa aceje waahde ke naah ne gihr kweehr yihr Juog wiih kar lam ne? ²²Kuu aniidu kaa abeehn yiiho gihre kedea giih atiihye ucaahdh gene tiehd kedea e naa kaa abeehn gihn atiihye unienge ne cohg utoor gihn me daage ke nying gihn atiihye. ²³2:23 Rom 4:3 E naa kaa abeehn gihn agweed yi kitaab Juog upahdhe kare. Agweed naa,

“Abraahm Juog ayiihe ke cwihnye acielo

e naa kaa anyoadh Juoge en ne ngaa maa abiohgrwaal ke Juog.”

Kedea maa acuohne ne gom Juog. ²⁴Kuu aniidu kejea dhaano ngo nyoadh Juoge naa abiohgrwaal kaa nying tiihy giih me beeye abea padh ke nying yiiho e keede!

²⁵2:25 Mat 1:5; Judea 11:31 Ke dhe yoohn ni, Raahb ge anahg ajaba, ngo anaa anyoadh Juoge naa abiohgrwaal ke nying gihn atiihye naa acube kar budo yihr yaa Yijarael giih anaa aoohr ne leng kedea unyoadhe ke dhe yooh moogo yihr gen ne aay. ²⁶2:26 2:17, 20 Yiiho neehn kuohm. Nea wahy a’aay oogo rih kuohm e athow. Wa gihn nu yiiho me be tiihy giih me beeye ngo athow thiow.

Ngaa Keá Rub Oogo Ne Pahy

¹Jo’a, nyoge me thoohdh kiin nu ge keá doohng ne yaa puohny bang gihn ngo ngahyu kejea wa yaa puohny wa ukihm ke dhe yooh maa angwaahn thiin yea. ²3:2 1:26 Wo cang awuohj beehde tiihyo tiihyo ke dhog yiehdhe me thoohdh. Dhaano me be waahj urobe gihn me raaj, e ngaan nu dhiil nahg ngaa me ne cohg, me ree cang ngahye kaa koaro.

³Nea thool kaabo kaabo ukaare yi dhe cieny upaahro wiihe ne meehg ngo yug gihn daahdo, e kare nud ulogo wiih cieny kun daahdo. ⁴Wale baabuur thiow keehd maano nahge gihn me duohng me yamo me teeg e ne kool ngo, e ngo rom dhaane kaa kiiwo keehd coohd ge thiin ne ci ka daahd. ⁵Wa gihn nu thiow, leeb beehda gihn me thiin mee yi kuohm dhaano abea thoohn giih nhyaam me doonge ge robe robo. Thiow maany piin maaj ge waang deeh dom cang. ⁶3:6 Mat 15:11, 18-19 Leeb thiow uroomo wa maaj, leeb en ne wiihe naa anyoohne giih nud wiih piny kiin giih rih dhaano utaahngo. Noono e gihn akob naa kuohm dhaano cang ngo raanye raanyo kedea uraanye dhe yoohn beehdo gihr dhaano. Batiene e leeb ke ngude gihn cub teeg raahnyo yihre, beehda gihn beehn ke yoohn paar maaj.

⁷Kwaad giih me kuow cang, laahy, winy maa giih muun ke piny kedea giih beed yihdh piih ge rom dhaane kaa maango paajo wa mar diehg. Kedea ge giih maa anaa amaang paajo. ⁸3:8 Rom 3:13; Epi 4:29 Abea leeb ngaa me rom ngo ke maango tooro udoge wiih ngo. Beehda ngad anyoohne me thare be piih piny. Leeb beehda cim me naah.

⁹Leeb e ne poongo Ruohdho Juog Wuro keehde kedea e noono acielo e ne lam dhaano keehde beere yoad gihn me raaje yoado. Dhaano ge acag Juoge, wa cahd Juog, ngo lam leebe lamo. ¹⁰Dhog gihn acielo e ne beehn puoje kedea lame oogo kii ngo. Jo’a gihn nu ngo awaahj. ¹¹Kare nud ubeehn piih me yihdh gen tooro melo kedea piih melo utuom gen yi abuulo acielo? ¹²3:12 Mat 7:16 Jo’a kare nud ubeehn dhaane upone apuomo wiih gumelo? E naa ka bahnge piih me yihdh gen tooro melo ge be tuom yi abuulo me piihe beehda melo.

Dhog Yiehdh Ngahy Beehdo

¹³3:13 Rom 12:16 Ngaa kiinu e ne ngahy dhe yoohn beehdo me beer kedea e ne ngahy dead yihdh nyepinye? Kwaad ngaa me wa gihn nu nyoadhe dhe yoohn ngahy luube kedea dead nyepinye kaa dhe yoohn tiihy gihn me beer me yea ne ngahy luube kedea beehdo ke bahdh yej. ¹⁴3:14 1Kor 3:1-3; Gal 5:20–6:4 Abea wu keá nhyaam kedea toohd keá robu ke nying giih tiel kedea lahj cwihny ge apahng yi yihdhu. ¹⁵3:15 1:5, 17 Kwaad giih nu ge tooro yi ngahy luube ge yoad ke dhe yoohn Paar Maalo. Giih nu ge yoad ke bang giih wiih piny kedea ke bang atiihb ukeehg. ¹⁶Bang gihn kuohn ne giih tiele yihdh gen kedea giih lahj cwihny, beehda giih alyaahb kedea kwaad giih reje ge tiihj ge ne yoad yihdh gen.

¹⁷3:17 Mat 5:48; 1Kor 13:4-7; Gal 5:22-23; Pihp 1:9-11 Abea ngahy beehdo gihn yoad bang Juog ngo ne wag wag yea tooro gihn me raaj, batiene e ngo nhyaar beehdo ke doohr e liny tooro. Thiow yea yoohd kedea yea ne nhyaahro maa wiihe be teeg kedea tiihy giih me beeye kedea kiin nyoge be poje kedea lubo me kane tooro. ¹⁸3:18 Mat 5:9 Yaa doohr nyoge me nyoadh dhe yoohn doohr ge neehn nyoge maa apiidh kohnho piny noono e gihn tuohl beehda nyoge maa abiohgrwaale.

Cubu Rogu Yihr Juog

¹4:1 Rom 7:5; 1Pii 2:11 Gihn e ne kahl weehr kedea liny kiin nu? Beehda giih reje ge yuohd cwihnyu bang gen ge ne kahl weehr kedea liny kiinu. ²4:2 1Jon 3:16 Cwihnyu yuohd rog giih nyepinye abea kar yoad gen wu goohge goohgo. Noono keehd dhaano utaahngo e ngo nahgu nahgo abea gihn daahdu poohd be yoadu. Noono e wu beehde e cwihnyu ne bang nyepiny keter abea ngo be yoadu e naa gihn weehru kedea ukagu kag. Gihn me yoadu tooro bang gihn wu be kwahyo bang Juog beere wu muoje muojo. ³Abea keehd ge kwahyu e gihn ngo be yoadu, bang gihn giih daahdu ge be daahdu kaa nying gihn me beer, ge giih wiih piny ge nhyaar koohmu cog.

⁴4:4 Mat 6:24; Jon 15:18-19; 1Jon 2:15 Wu yaa nhyaar giih wiih piny wu uroomo ke yaa nhyaar budo ke maahn nyoge abea yihr gen ne maahn, bang gihn nhyaar giih wiih piny beehda mahn ke Juog. ⁵Wale nea maru e lum yea gihn agweed yi kitaab Juog kuu ayiihu, ge anaa agweede naa, “Wahy Juog ge acub Juoge ne beehd ke won piny be rome ke nywaago keehd giih ungoom ge yuohd cwihny rog gen?” ⁶4:6 4:10; Mat 23:12; 1Pii 5:5 Abea keehd maano e Juog tee me duohng cube cubo yihro beere cwihnyo be yuohd rog giih reje. Wa kaa agweede yi kitaab Juog naa,

“Juog tee cube cubo yihr yaa tooro nhyaame rog gen

abea yaa nhyaam ge atiehnge ater.”

⁷4:7 Epi 6:12; 1Pii 5:8-9 Nea maano e kea cubu rogu yihr Juog. Kweeru ke giih atiihb ukeehg beere ngo goohd oogo rogu. ⁸Beehnu buud Juog beere ngo ubeehdo buudu. Wu yaa cwihnyu be piih yi nyepiny acielo cidhu bang Juog e adhemuohme giihu awiiu ngahdhu kedea e cwihnyu cang. ⁹4:9 Luk 6:25 Cidhu e wu ukuumo wa nyoge me yuog thoo utoor ngaa me ngier woj piih nyingu ke nying giih anyoohne naa atiihyu. Yuog aduunu kedea rahny cwihnyu ke nying giih reje naa atiihyu. Ngaa keá ngiero kedea beehdu kaa kuumo utoor ngaa me cwihnye med. ¹⁰4:10 4:6; 1Pii 5:6 Yugu rogu ne nyoge me ne bihdh nyum Juog kaano e Juog wudhu utihnge maalo.

¹¹4:11 1Pii 2:1 Jo’a rogu keá cayu kedea ngaa keá rob giih me reje rih wad gen. Nea giih nu tiihyu tiihyo e loohng Juog ge koohbo kejea, “Nhyaaru rogu,” e naa ayugu ne gihn me raaj kobu ngo padh loohng me tiihy nyoge keehde. Abea ngo padh tiihyu ne rob ngo kejea loohng ngo beer wale ngo raaj. Gihn daahd Juoge yihru beehda tiihj e ne tiihyu giih arob loohnge. ¹²4:12 Rom 14:4; 1Kor 4:5 Juog cog e naa ngaa cub loohng kedea e naa ngaa rom rob kejea loohng ngo beer wale raaj. Ngaan nu e ne yihre ne tee cub kuowo kedea thoo. Kare tooro unahge wun e ne piih ne kihm wadu maa ngad wong akeewo ke wun.

Nhyaam Ke Nying Giih Keroo

¹³4:13-14 Luk 12:18-20 Lihngu gihn wu yaa koohbo kejea, “Tihn noon ni wale keroo e wa caa geen angihno ne yug giih thaajir kedea wa ubeehdo kun nu ke kar wong acielo e wa yug giih thaajir beere wa uyihdo ke giih lonyo.” ¹⁴Gihn utiihy ree keroo ngo ngahyu ne? Nihn ubeehdu wiih piny ge uroom wa mar ruohj. Ruohj nea ke nyango e ngo uneehno abea batien ka me thiin e ngo naa weehny utoore. ¹⁵4:15 Tiihy 18:21; Rom 1:10; 1Kor 4:19; 16:7 Ne beero nea wu ne koohbo kejea, “Nea ngo gihn maa anhyaar Juoge e wa umeehg Juoge beehdo utiihy wane gihn kedea gihn.” ¹⁶4:16 1Tim 6:17; 1Jon 2:16 Tooro, e gihru unahg nhyaam kedea maahg ke nying giihu ge gweehgu. Kwaad nhyaam me wa gihn nu, ngo raaj. ¹⁷4:17 Luk 12:47 Wudhu keá wul thiow. Ngaa ngahy gihn beer ge tiihj, kedea ukweere ke tiihy ngo e ngaan nu ayug adhemuohm.

Yaa Alony Ge atoohn

¹5:1 1:10; Luk 6:24 Kea lihngu mara wu yaa alony. Awaahn ni, e naa cahng yuogu ke cwihnyu me keej ke nying giih me reje ge ubeehn ne pahdh wudhu. ²5:2-3 Mat 6:19 Keehd awaahn kan, e giih alonyu ke gen ge beehd e ge uroomo wa yaadh maa acam uthoadhe. Waare giihu ge beeye ge acam apuohj maahne. ³Keehd dhaahb kedea demare giihu ge beehda giih maa akeadh. Keadh gen noono e nuu unyoadh ngo kejea dhe yoohn atiihyu giih lonyo giihu kii ngo padh dhe yooh me beer. Kaano e koohmu urahny cang neehn giih maa awaang maaj, bang gihn giih lonyo ge anaa acongu ne cohg kedea ukanu gen yihdh nihn ni adoohng ukihm Juoge cahng. ⁴Abea noono lihngu gihn! Ngiihny yaa adooy puohdho ge kuu acubu yihr gen, noono e ge ayuog rih Juog ke nyingu, kedea lan yaa akaj giih puohdhu, ngo alihngo yihr Juog Aciehg. ⁵Wu abeehdo wiih piny e wu beed yi mow kedea unahge ke cam e naa acubu yi wudhu. Wu nhyaar cam ucwaadhu noono e wu unahg wa mar muor me nahg yi puohdho. ⁶Anahg wu naa akihm nyoge me yihdh gen tar unahgu gen, nyoge me padh yaa mahn ke wun.

Guum Giih Raahyo Kedea Kwaj

⁷5:7 2Pii 3:3 Jo’a wu keá dhaahr abea kuru uwahdhe cahng ubeehn Ruohdhe. Maanyu ka na beehn ngaa me pure ucube cwihnye ne koar cahng ubeehn puohdhe uciege kedea maanyu ka bahnge ngo be dhaahr ke koar puohj kodh uwahdhe gug kuunhe. ⁸5:8 Rom 13:11-12; 1Th 5:5-8; Judea 10:25, 37 Wu thiow, wu keá dhaahr kedea deedu cwihnyu teeg bang gihn beehn Ruohdh adoohng cahng. ⁹5:9 Mat 7:1-2 Jo’a, rogu keá waayu. Nea maru kuu ngaa me kihm wun tooro ne? Ruohdh duohng ge kihmo, ngo ne dhe kala.

¹⁰5:10 Mat 5:12; Judea 11:32-38 Jo’a romu rogu rog yaa agamloohngjuog ge aguum giih raahyo abea ge kuu adhaahr ge ne rub gene ke nying Ruohdh. ¹¹5:11 1:12 Mihn cwihny gihn ayoad gene awaahn ni ngo ngahyo bang gihn ge aguum. Romu rogu rih Job ge abar maalo ke gaahn Juog maano e deeh raahyo me duohng apahdh wiihe. Yihdh amahr giih me reje ge ayoade cang e gihn agweehg Juoge ke nying Job ge anaa abeehn oogo ne gihn me beer ngo ngahyu. Bang gihn Juog yihre ne nhyaahro kedea cwihnye luue ke bang yaa ayoad raahyo.

¹²5:12 Mat 5:34-37 Jo’a, gihn wiihe ne maalo beehda ubahnge dhaano ree be kuohnge. Dhaano ree keá kuohnge ke maalo wale ke piny wale ke kwaad gihr nyepiny moogo. Nahge ke lubo acielo cog e ne robi kii ‘Ayiihi’ wale ‘Gahng’ nea gihn ngo beehda athiir wale gihn ngo padh athiir. Beere rogu be yoadu yi ukihm gihr Juog.

Kwaj Yihr Juog Ke Gaahno Yi Cwihny

¹³5:13 1:5-6; Tiihy 16:25 Ngaa me gihn me raaj apahdh wiihe keewu kea dhiile Juog ke kwayo ke nying gihn nu. Yaa cwihny gen med ke nying gihn me beer maa ayoad gene, piih gene ne puoj Juog. ¹⁴5:14 Mak 6:13 Ngaa me ree ledh cuohne yaa doonge giih akuud yaa ayiiho ne beehn ne kway Juog wiihe. Kedea beehn yaa doonge rey gene ngo ke mow e ge rob nying Juog beere ngo ke thiehdho. ¹⁵5:15 Mat 9:2; Mak 16:18 Nea jo doonge ge akwahyo ke yiiho yi cwihny gen e ngo udoohng beer bang gihn ngo uthiehdh Juoge yihr gen. Nea atwaany gihre ayoade kaa nying adhemuohm maa atiihye, e adhemuohme uwii Juoge piny yihre. ¹⁶5:16 1Jon 1:8-9 Nea maano e adhemuohme maa atiihyu keá kanu yihr ngadu beere Juog kwaye kwayo ke nyingu uthiehdh Juoge wun bang gihn kway ngaa maa abiohgrwaal ke Juog giih me teeg ge tiihye tiihyo kedea giih me beeye ge ke yoado ke nying kwaj gihre.

¹⁷Eliija anahg dhaano utaahngo me neehn won. Abea naa akwahye, e ngo agaahne ke cwihnye acielo kejea kodh buu ucwii, e kodh kuu acwii ke kar run adahg ke nuuj. ¹⁸Naa adoge kwaj beere kodh ucwii, e ngo acwii utuuy nyepinye ucieg gene.

¹⁹5:19 Gal 6:1 Jo’a, nea ngaa maa a’aay oogo yi lum Juog kiinu udog ngaa mooge ngo ke duuo yi lum Juog, ²⁰e kea paru gihn: Kwaad ngaa kony ngad adhemuohm uduue yi lum Juog, e ngaan nu aboadh wahy ngo yi thoo kedea umeehge Juog wii amahr adhemuohme piny.