1 Piihter

1 PIIHTER

Wargahng Umodho Naa Agweed Piihtere

Rob Ke Nying Warga

Wargahng Umodho gihr Piihter anaa agweede ke yihr jo yiiho e cuohn ne “Yaa Juog naa akwanye.” Ge anahg nyoge maa anaa akeedho ke bang yi piny Aacya Gihn Thiin. Warga gihn ni agweed kaa nying ciihm cwihny yaa kwaan ngo, bang gihn bahng anaa akedh rog gen keter ke nying gihn ayiih gene lum Juog. Cwihny yaa nu aciihm Piihtere kaa dhe yoohn ber Ciig Beer ke nying Jeacuu Kriihjto ngaan gaahn gene. Ke nying thone maa cahre kedea ciig gihre kejea e uduu. Noono, e ge dhiil yiiho uguum gene giih bahng. Kedea ungahy gene ngo kejea yiiho gihr gen e ne yea med, abea keehd maano e akweehn me beer uyoad gene “Cahng uduu Jeacuue naa akwany Juoge.”

Piihter nying yaa kwaan warga gihn ni, akwaye beere ge ubeehdo ke dhe yoohn daahd Juoge.

Kaa Acaan Luube

Lum umodho 1:1-2

Gaahno maa adiehr 1:3-12

Beehdo e adhemuohm tooro rog 1:13-2:10

Gihn tiihy jo yiihe nea giih ajohr pahdh wudh gen 2:11-4:19

Kar kaahn jo yiiho 5:1-11

Gug luube 5:12-14

¹1:1 2:11; Jeam 1:1 Yihr yaa akeedho ke yihdh miehy Poantuj kedea Galaadya, maa Kapadoacya kedea Aacya kedea Bihdhihnya. A Piihter ngaan aoohr Jeacuu Kriihjte, a ne gweehdo yihru. ²1:2 2:9; Rom 8:29; Epi 1:4; 2Th 2:13; 2Pii 1:10; 1:19 Wu ge beehda aleye wiih piny kan ge angahy Juog Wuur kedea umiege wun kuu umodho kedea Wahy Juog en ne yug wun ne nyoge me beey bang utiihyu ke lum Jeacuu Kriihjto kedea bang ne yor wun ke reme. Beehn Juoge cube deeh muuny kedea doohr me ne cohg yihru.

Gaahno Maa Adiehr

³1:3 1:23; 2Kor 1:3; Tii 3:5 Nying Juog ge Wur Ruohdho Jeacuu Kriihjto, ke wuoro bang gihn wo angwaahne keraahyo udoohngo ne nyoge maa anyuol nyaahn. Wahy me nyaahn acube yihro, me weehg wo gaahno ke dhe yoohn cahro gihr Jeacuu Kriihjto naa acahre uyedhe maalo yi dahg nihn batien naa athowe. ⁴Kaano arumo e yihru unaa giih me beeye maa aguog Paar Maalo muu ulagu. Giih me ge be kwaahl kedea ge be tob maa ge be rahny. ⁵Giih nu beey ge giihu wu yaa koar Juoge keehd tee gihre ke nying yiiho gihru beere wahy me be gug naa agwiire ke nyingu paare yoadu yoado cahng gug piny. ⁶1:6-7 2Kor 4:17; Jeam 1:2-3 Kea noono mihn cwihnyu ne cohg bang gihn giih me beeye ge nud wong maalo ke nyingu. Abea keehd maano e wu ukuong toohng yihdh giih me reje umodho. ⁷1:7 1Kor 3:13 Wu utoohng yihdh giih reje umodho beere kaa ayiihu kii ngo ke tumo nea yea teeg wale giih nyooro ge ne yea. Ke tumo wa gihr ngiihnyo maa aleehdho upiire. Abea yiiho gihru wiihe ne maalo rih ngiihnyo bang gihn ngiihnyo beehda gihn muu uthumo. Nea yiiho gihru atum uyoade e ngo teeg, e leej kedea puoyo me duohng uyoadu cahng uduu Jeacuu Kriihjte. ⁸1:8 Jon 20:29; 2Kor 5:7 Ngo anhyaaru keehd me bahnge kihde kuu aniidu. Abea keehd me bahnge ngo be niidu awaahn ni, e lume ayiihu kedea yihru ne med cwihny me duohng muu uneehno ne dahr. ⁹1:9 Rom 5:2; 6:22; Epi 1:14 Cwihnyu med bang gihn akoohg gihn ucub yihru ke nying gihn gaahnu ngo beehda boadh wahy ge uyoadu.

¹⁰1:10-11 Luk 24:46; 1Kor 15:3-4; 2Pii 1:19-21 Anahg boadh wahy e naa apiih agamloohngjuoge ne dead yea kedea ucaar gene muuny gihn ubeehn Juoge ne cubo yihru. ¹¹Yaa gamloohngjuog ge ake peehyo ke nying giih raahm rog kedea giih moar wihj ge utiihy rog gen rih Ngad Boadh nyoge. Giih nu anahg Wahy Juog ge aoohr Jeacuu Kriihjte, e naa anaa arob gen yi aduun yaa agamloohngjuog. Ge ake peehyo thiow kejea weehne e nuu utiihy giih nu rog gen kedea rog gen utiihy gene ke rih ngaa. ¹²1:12 Epi 3:9-10 Ngo anaa arob yihr gen kejea padh ke nying mar ngud gen abea anahg ke nyingu. Run ngo ge giih nahgu yihdh gen. Awaahn ni Ciig Beer ge arob yihro cang. Ciig Beer ge apuohny yihro kaa teeg Wahy Juog naa aoohr ke yoohn Paar Maalo. Keehd wuohdjuog e cwihny gen ne bang ngey yihdh Ciig Beer.

Beehdo E Adhemuohm Toor Rog

¹³Kea noono thubu kaa awaahn kan ke gwiir rogu ne tiihy gihn ubeehn kedea koaru rogu beer mee kedea piihu ne gaahn muuny gihn ucub nea Jeacuu Kriihjto uduuo. ¹⁴1:14 Rom 12:2; Epi 2:3; 4:17-18 Lihngu lum Juog bang gihn wo beehda nyethen Juog kedea wiiu dhog yiehdh acoon ge na beehdu kii ngo e gihn maa angahyu atooro. ¹⁵Kwaad giih tiihyu nahg gene giih me yihdh gen tooro giih adhemuohm wa ka nahg Juog ngaa me ree tooro adhemuohm. ¹⁶Agweed yi kitaab Juog naa,

“Beehdi e rihi tooro adhemuohm

bang gihn riha tooro adhemuohm.”

¹⁷1:17 Mat 6:9; 16:27; Rom 2:6; Jeam 2:1; 1Pii 4:5 Me neehn kaano kwahyu yihr Wuru ge ne Maalo kedea ngo ngahyu kejea be luuo ke tiel, kea noono beehdu e wu lwaahr keehde wa ka nahgu aleye wiih piny kan. ¹⁸1:18 Mat 20:28; 1Kor 7:23; 6:20 Juog gihn maa acube piny nud ne kahl wun oogo yi yoohn rwaahny wun ge adaahd ge wuru wun ke kahlo kii ngo. Gihn acub Juoge piny padh gihn me thum wa mar dhaahb wale damaro me neehn kaano ngahyu ngo. ¹⁹1:19 1:1-2; Jon 1:29; Tiihy 20:28; 1Kor 5:7; Epi 1:7; Judea 9:12 Juog beehda Ngad Boadh nyoge e naa akaabe ne gihr remo ne nahg piny ke nyingu. Gihr remo me ngiene teeg kedea adhemuohm tooro ree. ²⁰1:20 Epi 1:4 Ngo akwany Juoge ne gihr remo me ngiene teeg ke coon e wiih piny poohd kuu acag, unahge kaa awaahn yi gug nihn e naa abeehn Juoge ukahle gihr remo oogo ne naah ne dooj wun. ²¹1:21 Ruohdh: 5:1; Rom 5:2 Juog ngaa atihng Jeacuu maalo yi thoo ucube ruohdh yihr ngo ayiihu kaa bang Jeacuu, noono e yiiho gihru kedea gaahno gihru naa yi cing Juog.

²²1:22 2:17; 3:8; 4:8; Rom 12:9; Gal 6:10; 2Pii 1:7; 1Jon 4:11 Awaahn ni Juog adhemuohme giihu ge aluoge oogo bang naa ayiihu lume ge adiehr. Ke nying gihn ni e kare nud unud nhyaahre yi cwihnyu ke nying kwaad dhaano utaahngo, adoohng e yaa akuud yiiho ge neehn wun. Kea noono nahgu nyoge me nhyaar rogu ke cwihny cang. ²³1:23 Jon 1:13; Judea 4:12; Jeam 1:18 Wu anyuol nyaahn. Wu kuu atuohl ke rih kohnh dhaano ge rahny, abea wu atuohl ke rih kohnh Ngad Boadh nyoge ge be rahny. Kohnh Ngad Boadh nyoge yoad kaa dhe yoohn lum Juog ge kahl kuowo me guge tooro kedea lum ngo be yiid. ²⁴1:24-25 Jeam 1:10-11 Bang gihn kohnh dhaano ngo neehn lum ge tal kedea tee dhaano utaahngo neehn thiiw ge lwaar oogo. ²⁵Abea lum Juog ree be waare. Lum nu e naa Ciig Beer gihn anaa apuohny yihru.

¹2:1 Epi 4:25; Jeam 1:21; 4:11 Noono wiiu yug giih me reje kedea wiiu giih toohd maa giih waane. Wiiu nyahg kedea wiiu waaj nyoge. ^2-32:2 1Kor 3:2 Awaahn ni ngo aniidu e ka beer Jeacuue ke wun. Nea wa maano keá wiiu tiihy giih adhemuohm kedea wiiu giih acamo. Nea wa maano kea nahge ke giih Paar Juog ge ne cubu yi cwihnyu wa mar nyethiin ge cub cwihnye rih caag men. Tiihyu giih nu bang udoongu yi lum Juog.

⁴Awaahn ni beehnu bang ngaa neehn meehn wod gihn anaa akweer yaa geere keehde maa abeehn Juoge ngo ne kwanyo bang gihn e naa anhyaar Juoge. ⁵2:5 2:9; Rom 12:1; Epi 2:21-22 Wu thiow, wu neehn meehn wod gihn ugeer Wahy Juoge wod Juog keehd gen. Wu akwanye beere wu udoohng ne yaa lam me Wahy Juog e naa akwany wun yihr Juog. Noono e giih lamu ge nhyaar Juoge nhyaaro ke nying Jeacuu Kriihjto. ⁶2:6 Rom 9:33 Ngo agweed yi kitaab Juog naa,

“Beeh niidu kaa akwanya meehn wod maa anhyaara

me maga wiih wod keehde.

Wod gihn ageera yi geen Jaayon.2:6 Beehda Jeruucalem e gihn nu cuohn ne Jaayon, Yicaaya 40:6-8

Ngaa yiih luma

cwihnye buu udaag yi gihn utiihya yihre.”

⁷2:7 Mat 21:42; Tiihy 4:11 Yihru wu yaa ayiiho, ngaan akwanya ngo anhyaaru abea yihr yaa kuu ayiiho,

“E naa kaaw gihn akweer yaa geere keehde e adoohng ne meehn gihn amag

wiih wod keehde.”

⁸2:8 Rom 9:33 Thiow agweed yi kitaab Juog naa,

“Ngaan akwany Juoge

e nuu unahg leen cwahny nyoge keehde

ge umeehg gen pahdho.”

Yaan nu ge nyoge maa acwahnyo bang gihn lum Juog kuu ayiih gene kedea e naa gihn agweehg Juoge ke nying gen.

⁹2:9 1:2; Tiihy 26:18; Rom 5:17; 2Kor 4:6; Epi 5:8; Tii 2:14; Judea 13:12; 1Pii 2:5; Any 1:6; 20:4 Abea maru wu beehda nyoge me Juog e naa akwany wun. Wu beehda yaa lam me tiihyo yihr Ruohdh. Wu nyoge maa acub rogu yihr Juog, wu beehda joe. Noono, e kare nud yihru unyoadhu kaa akahl Juoge wun oogo yi muudho kedea ukedhe wun yi daahr gihre me cang ne wij wij kedea wu ukwany ne rob giih beeye ge atiihye. ¹⁰2:10 Rom 9:25 Umodho coon wu kuu anahg yaa Juog abea awaahn ni wu beehda joe. Coon Juog cwihnye kuu anaa aduue caahn ke nyingu abea awaahn ni ngo ayoadu kejea cwihnye aduue caahn ke nyingu.

¹¹2:11 1:1, 17; Rom 7:15, 17-23; Gal 5:17; Judea 13:14 Wu goma me nhyaara nhyaaro keraahyo, wu neehn aleye me beed wiih waahdh me piny me beedu tooro. Naa anahgu nyoge me wa gihn nu kea cwihnyu keá yuohd rog giih nhyaar dhaano utaahnge ge yihr gen ne mahn keehd wahy dhaano. ¹²2:12 Mat 5:16; 2Kor 5:10 Beehdu beer mee kiin yaa kuu ayiiho keehd maano koohb gene kejea wu tiihy giih me reje, bang gihn cahng ungey gene gihn beer ge atiihyu, e Juog uleej gene cahng beehn Jeacuue ne liew won.

Wuoru Ruohdh Paajo

¹³2:13-14 Rom 13:1-7; Tii 3:1 Wuoru ruohdhe giih wiih piny kan ke nying Jeacuu Ruohdho, wuoru ruohdh duohng yi paajo. ¹⁴Thiow wuoru kwaad yaa acub ruohdh duohnge piny nyum nyoge ne kihm yaa ayug giih me reje, maa ne muohj koohdh yaa yug giih beey. ¹⁵2:15 3:16 Beehda Juog e ne daahd wun utiihyu gihn me beer beere yaa kwihj luube ge be rubo rogu. ¹⁶2:16 1Kor 6:11, 19-20; Gal 5:13 Beehdu ke beehd nyoge me padh baahng, abea kwaad beehd nu keá logu ne dhe yooh me koolu giih reje ge yugu. Wu dhiil nahg baahng giih Juog. ¹⁷2:17 1:22; 3:16; Mat 22:21; Gal 6:10; Pihp 2:12 Nyoge keá dhahlu kedea nhyaaru wadu ge ayiiho, wuoru Juog kedea wuoru ruohdh gihn amag paajo.

¹⁸2:18–3:7 Epi 5:21–6:92:18 Epi 6:5-8 Wu baahng wuoru yaa tiihyu yihr gen kedea tiihyu gihn teed gene yihru. Wu keá lihng luub yaa beey cog, lihngu luub yaa reje thiow. ¹⁹2:19-20 5:12 Ngo beehda gihn me beer uyoad gihn me raaj ke nying gihn me beer maa atiihj bang gihn ngahyu gihn daahd Juoge. ²⁰2:20 4:14 Gihn me beer me yoadu tooro ne guum apoohdo gihr gihn me raaj e ayug dhaane. Abea Juog wu udooje ne guum giih raahm me gihn me raaj maa ayugu tooro. ²¹2:21 Mat 16:24; 20:26-28; Jon 13:15; Rom 15:5 Wu acuohn kaa nying gihn ni: Ngad Boadh nyoge ke ngude abang uguume giih me reje ke nyingu kedea wu naa awiie piny ne yaa ukwany yihdh buy tiene. ²²2:22 Jon 8:46; Judea 4:15 Adhemuohm maa atiihy Jeacuue atooro kedea toohd maa arobe atooro. ²³2:23 3:9; Mat 26:55-56, 67; 27:14, 27-31 Naa abeehn nyoge uyeny gene ngo e dhee kuu ne kweg uluunye kedea naa ayoade giih raahm kuohm e ngaa maa acehme tooro. Ree acube yihr Juog ngaa be luuo ke lug tiel. ²⁴2:24 Rom 6:2, 11; Klo 2:14; Judea 9:28 E ke ngude adhemuohme giihu ge atihnge ke en e ngo ne rih yaadh maa ariihw, beere giih adhemuohm be cahgo ke tiihyo unahge giih beeye ge ne tiihyo. Kuohn ka me ledhe giihe ge naa athiehdh won. ²⁵2:25 Mat 9:36; Jon 10:16; Judea 13:20 Bang gihn wu ake roomo wa roohme maa arwaahnyo, abea awaahn ni wu aduu bang ngad kwaah ge koar wun.

Maahn Kedea Cuow Gen

^1-23:1 1Kor 7:16; Epi 5:22-24 Wu maahn, tiihyu kwaad gihn arob cuowu yihru. Tiihyu gihn daahd gene keehd me kweer gene ke lihng lum Juog e lum Juog udhiil gene ke yiiho ke nying gihn beehdu beer ke gen. Dhe yoohn beehdo beer gihru ke gen akaal wiih luub na robu yihr gen ke nying Juog. ³3:3 1Tim 2:9 Wudhu keá paru kejea kahd wihj ke wuohbo kedea ruug rog ke tiiy wale ngaab waare me ne jieng jieng ge ne yug wun ne jur. ⁴Jur me ne cohg naa yi nud cwihny kedea e naa juro me be thum maa e ne nhyaar Juoge bang gihn ngo beehdo e beer. ⁵Bang gihn maahn acoon, ge anhyaar Juog, cuow gen na wuor gene wuoro e naa gihn anahg gene jure. ⁶Wa mar Caara naa awuor Abraahm cuore ucuohne ngo cuohno ne wur paare. Nea gihn me ne cohg atiihyu kedea utoor gihn me tudu yihre e wu unahg kwaay Caara.

⁷3:7 Epi 5:25-28; 1Tim 2:8 E wu cuow thiow yi beehdu gihru ke maahn ngahyu ngo kejea tee gen be room ke tee maru. E naa gihn dhiilu gen ke wuoro thiow bang gihn Juog muuny gihre ge yoad kuowo me be gug buu ucube ke yihru cog, ngo ucube yihr maahn thiow. Beehdu ke maahnu wa gihn nu beere gihn me gahl kwaj gihru yihr Juog tooro.

Raahm Rog Yoad Yi Tiihy Gihn Me Beer

⁸3:8 1:22; Epi 4:2-3; Pihp 2:2-3 Lum ni beehda ke nyingu cang: beehdu ke beehd yaa paajo acielo. Beehdo me wudhu be tihngu maalo. Beehdo me yej amad kedea nhyaaru rogu ke dhog yiehdhe beehde. ⁹3:9 2:23; Mat 5:44; Rom 12:17 Wiih gihn me raaj keá coalu ke gihn me raaj kedea wiih ayaany keá duogu kaa ayaany. Abea nea kaa ngo ne cohg kwayu Juog ukonye yaa nu bang gihn wu akwany Juoge ne tiihy giih nu, beere Juog wu dooje doojo. ¹⁰3:10-12 Jeam 1:26 Wa kaa agweede yi kitaab Juog naa,

“Kwaad ngaa daahd ngo uyoade wahy,

maa uniide giih me beeye kea koare leebe,

kedea dhee keá meehge rob toohd.

¹¹Wiie tiihy gihn me raaj uloge wiihe ne tiihy gihn me beer.

E thiow doohre nyoge doohro.

¹²Juog wonge be loge oogo rih ngaa abiohgrwaal,

kedea kwaj gihr ngaa maa abiohgrwaal lihnge lihngo ne cohg.

Abea yaa tiihy giih reje,

Juog wonge beehde aloge oogo rog gen.”

¹³3:13 Rom 13:3 Ngaa e ne kedh ngwiil rihi nea yih nhyaar yug gihn me beer? ¹⁴3:14 4:14; Mat 5:10 E thiow keehd me yoadu ngwiilo ke nying tiihy gihn me beer, e ngo beehda dooj. Wu keá tud yihr gen wale keehd koohdhu keá paahr. ¹⁵3:15 1:3-5; Klo 4:6 Abea nahge ke gaahn Ngad Boadh nyoge e ne cubu yi aduunu kedea nahge en e naa Ruohdhu. Nea wu ke peehnyo ke nying gihn gaahnu Ngad Boadh nyoge ke nyinge kea beehdu e ka beehru ngo kii ngo ngahyu. ¹⁶3:16 2:15 Kedea beehru wiih lum gen ke lubo me beer kedea ke wuohdo. Duogu wiih lum nu e gihn me dieru ke nyinge tooro kedea ke dhe yooh me beere wudh yaa rob giih me reje rogu, wu ge yaa batien Ngad Boadh nyoge, wudh gen ulaahyo ne ngahyu rob. ¹⁷Ngo ngweehn uyoad dhaane bahng ke nying tiihy gihn me beer, nea gihn ngo beehda kar cwihny Juog, yihr man yoad bahng yi tiihy gihn me raaj. ¹⁸3:18 2:21; Rom 5:6-8; 6:10; Judea 4:15; 7:27 Ngad Boadh nyoge ke ngude athow ne cielo ke nying adhemuohme giih nyoge cang, Ngad Boadh nyoge ge beehda abiohgrwaal athow ke nying yaa reje. Ngo athow beere wo kedhe ke Paar Juog. Anahg kuohme en naa athow abea wahye ge akuowo. ¹⁹3:19-20 2Pii 2:4; Juud 6 Noono maa a’aaye uwiie kuohme piny ne ci ne puohny Ciig Beer yihr atiihbe giih anaa acoon ge amag ne maabuuye. ²⁰Atiihbe giih yaa acoon yi run Nooh ge anaa akweer ke lum Juog. Yaa anaa abuohj Juoge ke koar gen e cwihnye kuu angol rog gen kaano anaa geer Noohe yaahy geero. Noono unahge ke nyoge abiihjbedahg cog ge naa abodh e ge kuu amud. ²¹3:21 Rom 6:3-4; Judea 10:22Ukwiihj: Mat 22:44; Rom 8:34; Tiihy 2:33 Piih nu amud nyoge anyoadh dhe yoohn nud awaahn ni ge yoad piih luogwahy uwoj gen yi wiih dhaano ne cub luogwahy. Luogwahy e ne cub boadh wahy yihr dhaano. Piih woj wihj ge be luog nyooro oogo rog, abea ge nyoadh ngo kejea dhaano ree akuohnge nyum Juog ne beehdo ke dhe yooh me beer. Kedea piih nu wahy dhaano boadh gene boadho ke dhe yoohn abeehn Jeacuu Kriihjte ucahre. ²²3:22 Tiihy 1:9; Epi 1:21 Jeacuu Kriihjto e naa ngaa acidh Maalo kedea upiihe ukwiihy Juog yi ruohdh. Kedea uyug Juoge ngo ne ngad duohng yihr wuohdjuog maa yihr ruohdhe giih atiihbe.

Cub Rog Yihr Juog

¹4:1 2:24; 2Kor 4:10; Gal 5:24 Wa kaa ayoad Jeacuue raahm rog, e wu thiow gwiiru rogu uparu giih raahm rog wa mar Ngad Boadh nyoge. Bang gihn ngahyu ngo kejea raahm kuohm e ne kahl dhaano oogo yi cing adhemuohm. ²4:2 2:21 Kedea wu buu unahg nyoge me koag ke log cwihnyu rog giih adhemuohm uwahdhe cahng thoo. Wu unahg nyoge me koag ke log cwihnyu yi tiihy gihn daahd Juoge. ³4:3 Gal 5:19-21; Epi 2:3; Tii 3:3 Yihdh run abar wu abuohj ke tiihy giih reje ge nhyaar yaa kuu ayiih lum Juoge. Giih reje me neehn bal kedea maadh kuong, maa tiihy giih cwaahne maa maang pey yiehdhe me neehn aroap, maalo, macaahrdiihd, bang gihn ge be nhyaar Juoge. ⁴Naa angolu tiihy giih nu ne ngwedh e nyoge ge agaahy. Noono e ge apiih ne rob giih me reje ke nyingu. ⁵4:5 1:17; 2Tim 4:1 Giih nu rob gene rogu ge keá cubu yi cwihnyu bang gihn giih gen noono tiihy gene, yihdh gen ubeehn gene ne kwanyo yihr ngaan agwiir ree ne beehn ne ngol lubo yihr yaa kuow maa yaa athow. ⁶Ke nying gihn nu e naa apuohny Ciig Beer yihr yaa athow, beere keehd maa akihm koohm gen wa ka kihm dhaano ukar upiny kan, e wahy gen dhiil rom kuow wa mar Juog.

⁷4:7 1Kor 10:11; 1Th 5:5-8; 1Jon 2:18 Wun, paru wudhu uyabu nyingu maa koaru rogu ne kwaj ne cohg bang gihn gug nyepiny cang acahngo. ⁸4:8 1:22; Jeam 5:20 Gihn wiihe ne maalo beehda nhyaar rog bang gihn nhyaaro adhemuohme wuunye ke oogo. Nhyaaru rogu naa aciel acielo ke keewu cang. ⁹4:9 Judea 13:2 Loru weehle yihdh miehyu ke mihn cwihny. ¹⁰4:10 Rom 12:6-8 Juog wu amuoje kaa amahr muuny me be room me romu tiihy nyepinye. Ngaa keá piih wiih muuny acub yihre. Dhiilu muunye ke nywaag e cwihny be daag keehd nyoge beere ge dooj Juoge doojo thiow. ¹¹4:11 Rom 12:7; 1Kor 10:31; 12:8; Jeam 3:1 Ngaa puohnyo e giih robe nahg gene luub Juog kedea ngaa tiihyo dhiile tiihy ke tee acub Juoge yihre. Noono gihn nu e Juog ke leeyo yi kwaad nyepinye cang, ke nying Jeacuu Kriihjto ge e ne wuor kedea e ne yihre ne tee me guge tooro. E noono.

Giih Ajohr Ge Yoad Ngaa Maa Ayiiho

¹²4:12 1:7 Goma maa anhyaara keraahyo, cwihnyu keá daag kejea gihn me maahn en naa atiihy ree yihru nea giih ajohr ge pahdh wudhu. ¹³4:13 5:1; 2Kor 4:10; Rom 5:2 Mihn cwihnyu bang gihn ayoadu giih ajohr wa mar Ngad Boadh nyoge. Kaano arumo e cwihnyu umed keraahyo cahng uduue e kaa amoar Juoge wiihe anyoadhe. ¹⁴4:14 2:20; 3:14; Mat 5:10-12; Mak 13:11; Tiihy 7:55 Nea wu acay ke nying Ngad Boadh nyoge, e gihn beehda dooj bang gihn ngo nyoadh ngo kejea Wahy Juog, e yihre ne tee, ngo ne rogu. ¹⁵Nea wu ke joohro e ajohr keá beehno kaa nying nahg dhaano, wale ke nying kahw, wale tiihy gihn me raaj wale paahr yi gihn me nying dhaano tooro yea. ¹⁶4:16 2Tim 1:8 Ngaa yoad giih ajohr ke nying gihn ayiihe Jeacuu, e wiihe keá laahy, abea muohje koohr Juog ke nying gihn amade ngo kiin yaae. ¹⁷4:17 2Th 1:8 Nihn ngol lug piny ge acahngo kedea lug thub ke wudh yaa ayiih lum Juog. Nea wo ge ayiiho e ne thub luge wudho, nea unahg mar yaa kuu ayiiho, e gihn upahdh wudh gen unahg gihn me teeg. ¹⁸Wa kaa agweede yi kitaab Juog naa,

“Nea ngo teeg yihr yaa abiohgrwaal uyoad gene boadh wahy,

e mar yaa kuu ayiiho kedea yaa adhemuohm unaa ngihde?”

¹⁹Nea wa gihn nu kea beehn yaa ayoad giih ajohr wa ka daahd Juoge cub gene rog gen yihr Juog, Juog ge be waar lume kedea bar gene maalo ke tiihy giih beeye.

Yihr Yaa Doonge Kedea Yaa Rihj

¹5:1 1:21 A ge beehda ukiihj wa wun kedea a ge aniid kaa ajoohr Jeacuu Kriihjto kii ngo kedea ngo ngahya kejea boadh wahy uyoada, nyingu kwaya kwayo wu ukiihye, ²5:2 Jon 21:15-17; Tiihy 20:28; 1Tim 6:5 ungahyu nyethen Juog ke kwaago beer mee. Kaahnu gen beer mee padh ke nying dhaano maa ater wun yi tiihy nu, abea bang gihn beehda tiihj, me wu naa apar ngo wu keedu wa ka daahd Juoge. Kedea padh tiihj maa adeehju yi cwihnyu ke nying koog. ³5:3 2Kor 1:24; Pihp 3:17; Tii 2:7 Ge keá kaahnu ke cing nyooro, kaahnu gen beer bang ungoor gene kaa atiihyu kii ngo. ⁴5:4 1Kor 9:24-25; 1Pii 1:4 Kaahnu gen beer mee beere muuny me guge tooro yoadu yoado bang Jeacuu ngad kwaag wun.

⁵5:5 Epi 5:21; Jeam 4:6 Wa gihn nu thiow, wu yaa rihj lihngu lum yaa doonge kedea konyu rogu konyo ke dhe yooh me dhaano ree be leeye. Keá ngaa beel wa kaa agweede yi kitaab Juog naa,

“Juog be daahd ngad nhyaam

kedea muuny gihre cube ke yihr ngaa me padh ngad beel.”

⁶5:6 Jeam 4:10 Nahgu nyoge me padh yaa beel nyum Juog ge yihre ne tee me duohng beere cahng pare ngo e wudhu tihnge ke maalo. ⁷5:7 Mat 6:25-30; Pihp 4:6 Wiiu giih dieru ke nying gen yi cinge bang gihn e naa ngaa kwaag wun.

⁸5:8 1Th 5:5-8 Ngahyu rogu ke kaahno bang gihn atiihb ukeehg ngad mahnu ngo uwihno ne daahd ngaa me dwaahnge wa gihr nguu maa awaahdh ge cej ngaa me came. ⁹5:9 Epi 6:11-12; Jeam 4:7 Rogu keá meehgu dwaahngo yihre kedea magu yi yiiho gihru teeg mee kedea ngahyu ngo kejea kwaad giih ajohr ge ayoad wun ge ke tiihyo rog yaa ayiiho ke bang upiny cang.

¹⁰5:10 1Th 2:12 Juog ngaa cub muuny, ge acuohn wun yi dhaahre ne beehdo tiehd ke Jeacuu Kriihjto, ubeehn ke ngude ucube thaahdhu piny beer mee uyuge wun teeg ubahnge yiiho gihru yea be lwagu batien kaa abuohju yihdh giih ajohr. ¹¹Kedea e ne yihre ne tee me guge tooro. E noono.

¹²5:12 Cihla: 1Th 1:1 Beehda warga me thiin mee e gihn agweeda yihru kedea ngo acuba yi Cihla. Cihla, nea ke kur mara, e ngo umiiho maa ayiih lum Juog ne cohg. Ngo gaahna gaahno kejea wargahng ni cwihnyu umeehge teehngo bang gihn, dhe yooh maa adiehr, ge beehn Juoge udoge nyoge, ngo agweeda yihru. Dhe yoohn nu, baru maalo keehde.

¹³5:13 Maarko: Pihl 24 Akuud yaa ayiih ge beed geen Baabihloanya ge akuud gen akwany Juoge wa akuud maru, wu amaahdh gene kedea Maarko waahda ke nying Jeacuu wu amaahdhe. ¹⁴Maahdhu rogu naa aciel acielo ke cing apaar.

Beehdu ke yoohm rogu wu yaa anweehd Juoge ke Jeacuu Kriihjto.