2 Joon

1 JOON

Wargahng Umodho Naa Agweed Joone

Rob Ke Nying Warga

Warga gihr Joon naa agweede umodho, ngo agweed kaa nying nyepinye ariow me teeg. Mar umodho beehda ne ciihm cwihny yaa kwaan ngo beere ge ubeehdo yi wad ke Juog kedea Waahde Jeacuu Kriihjto. Riown gen beehda ne toohn yaa kwaan warga gihn ni ubahnge puohny gihr yaa ucahb be lihng gene. Puohny gihn nu wad ke Juog raanye raanyo. Puohny gihn nu aniing ngo kejea giih reje yug rog gen ke nying beehdo upiny kan nyoadh ngo kejea Jeacuu Waahd Juog be rom nahg dhaano utaahngo. Yaa ucahb giih nu ngo atahr gene kejea boadh wahy yoad kii beehdo e dhaano be dier ke nying kuowo upiny gihn ni. Ge arubo kejea boadh wahy be naa yi nud cwihny kedea nhaahro maa wad.

Ne duog wiih lubo gihn ni, e Joon agweehdo urube ne dahr kejea Jeacuu Kriihjto anahg dhaano utaahngo ke ngude, kedea ubare maalo ke rob kejea dhiil gene rog gen ke nhyaaro naa acielo acielo.

Kaa Acaan Luube

Lum umodho 1:1-4

Daahr kedea muudho 1:5-2:29

Nyethen Juog kedea nyethen atiihb ukeehg 3:1-24

Adiehr kedea gihn me raaj 4:1-6

Jo yiiho dhiil gene rog gen ke nhyaaro 4:7-21

Teeg yiiho 5:1-21

Ngaa Yihre Ne Kuowo Me Ne Cohg

¹1:1 2:13-14; Jon 1:1-2, 14Kuowo: Jon 4:14; 6:35; 8:12; 11:25 A gweehdo yihru kaa nying ngaa beehda Ciig Juog naa acub Juoge yihr nyoge. Ngaan nu e ne cub kuowo me ne cohg yihr nyoge. Ngo ngaa maa anudo umodho e piny poohd kuu acag. Abea wa jo aoohr ngo aniid wane uboar wane ngo. Duone alihng wane e ngo urubo kedea giihe anaa atiihye ge aniid wane uboar wane en. Ngo amaahdh wane ke cing wan. ²1:2 Gihn teed wane: Jon 15:27 Ngaa cub kuowo me ne cohg ameehg Juoge doohng ne dhaano beere ngo niid nyoge niido. E naa kaa aniid wane ngo noono. Gihn teed wane yihru beehda gihn maa atiihy ree kedea uniid wane ngo. E naa gihn koohb wane yihru kejea ngaa cub kuowo me ne cohg ngo anudo tiehd coon ke Juog Wuur. Abea ngo abeehn Juoge ne nyoadho yihr wan. ³Awaahn ni wa rubo yihru kaa nying ngaan aniid wane kedea ulihng wane duone. Wa rubo yihru ke nyinge beere giih anaa arobe naa ayiih wane ge yiihu yiiho thiow beere wu unweehd naa acielo keehd wan. Kaano arumo e wo unweehd ke Juog Wuur kedea Waahde Jeacuu Kriihjto. ⁴1:4 Jon 15:11 E naa gihn gweehda yihru ke nying giih me nweehd wun ke wan, beere med cwihny me duohng yoado yoado.

Nweehd Naa Acielo Ke Juog

⁵1:5-7 Jon 8:121:5 1Tim 6:16 Awaahn ni, Ciig gihn alihng wane bang Waahd Juog, ge daahd wane ke kahl yihru e gen: Juog beehda daahr. Kedea tiihj yi muudho tooro yihre. ⁶1:6 2:4 Nea wo tiihy giih yi muudho abea wo ukoohbo kejea wo anweehd ke Juog e wo beehda yaa toohd, maa akweer ke tiihj ke giih beeye ge anyoadh Juoge. ⁷1:7 3:5; Judea 9:12; Any 1:5 Abea nea wo beed yi daahr gihr beey Juog wa kaano nahg Juoge abiohgrwaal ke dhe yoohn beeye nu, e nyoadh ngo kejea wo anweehd ne cohg, kedea e rem Jeacuu Kriihjto Waahde naa awoj piny ke nyingo adhemuohme giiho ge luoge ke oogo udoohngo ne nyoge me beeye yihr Juog.

Jeacuu E Ne Wuuny Adhemuohme Oogo

⁸Nea wo ukoohbo kejea adhemuohme be yugo, e rogo akango kedea adiehj gihn anyoadh Juoge ngo kwihyo ne weey weey. ⁹Abea nea ayiiho nyum Juog kejea adhemuohme ayugo, e Juog adhemuohme giiho ge wiie ke piny kedea ukahle ge oogo wudho. Ke dhog yiehdh nu wo beehne ke ne yugo ne nyoge me beeye yihre. Giih nu ge arob Juoge kejea ge utiihye kedea gihn arobe ngo tiihye tiihyo bang gihn Juog beehda abiohgrwaal. ¹⁰Abea nea wo ukoohbo kejea adhemuohme maa akuongo ke yugo tooro, e Juog ke ngude e naa akoohbo toohd. Akoohbo toohd bang gihn akob Juoge kejea nyoge cang ge yaa adhemuohm. Kaano e naa ka bahnge luub arob Juoge ge be yiiho naa adiehr.

¹2:1 Rom 8:34; Judea 7:25 Nyethena a gweehd yihru ke nying giih beere giih adhemuohm ge be tiihyu. Abea nea dhaano kiino adhemuohm ayuge, e adhemuohm gihre uwii Juoge piny yihre. Uwiie piny yihre bang gihn nud ke dhaano me cuung nyum Juog Wuur me rubo ke nyingo beere adhemuohme giiho ge wii Juoge ke piny. Beehda Jeacuu Kriihjto e ree tooro adhemuohm e naa ngaa rubo ke nyingo. ²2:2 4:10; Jon 1:29 Jeacuu athow beere ukihm gihr Juog pahdh wiie ke nying adhemuohme giiho. Kaano e Juog adhemuohme ge uwiie piny; padh adhemuohme giiho cog abea keehd adhemuohme giih nyoge me beed kuohn mooge wiih piny beehd.

Tiihj Ke Loohng Juog Kedea Nhyaar Rog

³Gihn nyoadh ngo yihro ne cohg kejea wo nyoge me Juog ngahyo beehda tiihj gihn arob Juoge kea dhiilo ngo ke tiihyo. ⁴2:4 1:6; 4:6; Jon 3:21; 8:44; 16:13 Ngaa koohbo kejea Juog ngahye abea gihn akob Juoge be tiihye, e ngaan nu rob toohd kedea giih beey ge anyoadh Juoge ge kwihye. ⁵2:5 2:17; 5:3; Jon 14:15; 2Jon 6 Abea ngaa tiihy gihn arob Juoge, e ngaan nu Juog anhyaare ne cohg. Gihn nyoadh ngo yihro ne cohg kejea wo anweehd keehd Juog, e man: ⁶2:6 Jon 13:15; 15:5 kwaad ngaan koohbo kejea e anweehd tiehd ke Juog kea dhiile beehdo ke dhe yoohn kaa abeehd Jeacuue kii ngo.

⁷2:7-8 4:11; Jon 13:342:7 2:24; 3:11 Jo’a maa anhyaara gihn gweehda yihru ke nyinge padh loohng me nyaahn me kuu akuong ke lihngo. Ngo beehda loohng me ngahyu ke coon ge anaa ayiihu lum Jeacuu. Nyoadh ngo kejea beehda loohng maa arob yihru ke coon, bang gihn beehda Ciig gihr Juog naa arob yihru. ⁸2:8 Jon 1:9-10; 8:12; Rom 13:12 Abea keehd maano e gihn me nyaahn nud yi loohng gweeda yihru. Dhe yoohn kaa abeehd Jeacuue kedea dhe yoohn ka beehdu ge ne nyoadh ngo yihro kejea gihn me nyaahn nud yi loohng ni. Gihn me nyaahn nud yea bang gihn wu nyoge me giih reje ge adoohng e ge wiiu ke piny. Noono e nyoge giih beeye, ge anyoadh Juoge, ge niid gene niido yi kaa abeehd Jeacuue kii ngo kedea ka beehdu kii ngo.

⁹2:9 3:10, 15; 4:20 Nea neehn gihn nu, kwaad ngaa rubo kejea e ngahy beehdo ke dhe yoohn nhyaar Juoge abea wad gen maa ngad akuud yaa ayiiho maane maano, e ngaa nu poohd nhyaar tiihy yi muudho kedea uwahdhe awaahn ni e giih nyepinye kwihye. ¹⁰2:10 Rom 14:13 Beehda ngaa nhyaar wad gen, maa ngad akuud yaa yiiho, e naa ngaa beehdo ke dhe yoohn nhyaar Juoge kedea gihn me ne ree me meehg ngo pahdh yihdh giih adhemuohm tooro. ¹¹2:11 Jon 12:35-36 Kwaad ngaa yug giih ajohr rih wad gen maa ngad akuud yaa ayiiho e naa ngaa me beed yi muudho me gihn me ngahye tooro. Ngo ngaa me tiihy giih me reje kedea ngo be tiihyo ke dhe yoohn daahd Juoge. Noono e gihn tiihye ngo kwihye bang gihn giih reje e tiihye ge naa acoore.

Wii Giih Reje Ge Tiihj Wiih Piny

¹²2:12 Tiihy 4:12 Wu nyethena loohnge giih ni

ge gweeda ke yihru bang gihn

Juog adhemuohme giihu ge awiie piny yihru

ke nying gihn ayug Jeacuu Kriihjte yihru.

¹³2:13-14 1:1-2 Wu jo ayiih lum Juog coon,

loohnge giih ge agweeda yihru

bang gihn wu adoohng ne nyoge me ngahy Jeacuue.

Jeacuu ge abeehdo e nud ke coon umodho

e piny poohd kuu acag.

Wu yaa nyaahn ge ayiih lum Juog,

loohnge giih ni ge agweeda yihru

bang gihn atiihb ukeehg ngo ataaju.

Wu nyethena loohnge giih ni

ge gweeda ke yihru bang gihn wu adoohng

ne nyoge me Juog Wuur ngahyu.

¹⁴Wu jo ayiih lum Juog coon,

loohnge giih ni ge gweeda ke yihru,

bang gihn wu adoohng ne nyoge me ngahy Jeacuu.

Jeacuu ge abeehdo e nud ke coon

e piny poohd kuu acag.

Wu yaa nyaahn ge ayiih lum Juog,

loohnge giih ni ge gweeda ke yihru

bang gihn Jeacuu gaahnu gaahno keter

kedea Ciig Juog acubu yi cwihnyu

maa atiihb ukeehg ataaju.

¹⁵2:15 Jeam 4:4 Awaahn ni aroba yihru cang kejea giih reje ge nud wiih piny kan ge keá deehju yi cwihnyu bang gihn kwaad ngaa nhyaar giih reje ge nud wiih piny kan, kare tooro unhyaare Juog Wuur thiow. ¹⁶2:16 Rom 13:14; Epi 2:3; Jeam 4:16 Giih reje wiih piny wa nhyaar giih me kahl mihn cwihny yihr dhaano e keede wa kwaad me neehn thama kedea nhyaam ke nying giih ne yihr dhaano; dhog yiehdh nu cang ge beehn kaa nying nhyaar giih me reje ge nud wiih piny. Ge padh giih arob Juog Wuure kejea tiihyo gen. ¹⁷2:17 Mat 7:21; 1Kor 7:31 Thiow Juog athubo ke raany giih reje ge nud wiih piny kedea yaa nhyaar giih nu ge uthow. Abea ngaa tiihy gihn daahd Juoge, yihre unaa kuowo me guge tooro.

Koaru Rogu Ke Nying Yaa Mahn Giih Jeacuu

¹⁸2:18 4:3; Mat 7:15; 2Jon 7 Nyethena, aroba yihru kejea rahny piny adoohng cahng. Ngahyu kejea anaa arob wane yihru kejea ngad mahn Jeacuu ngo ubeehn nea rahny piny adoohng cahng. Wa kaa arob wane ngo yihru, ngo aniidu ke nyingu awaahn ni, kejea jo mahn giih Jeacuu me thoohdh ge atuohl. Gihn nu e ne nyoadh ngo yihru kejea cahng rahny piny ngo adoohng cahng. ¹⁹2:19 Tiihy 20:30 Yaa mahn Jeacuu ge anaa bango kedea awaahn ni ge a’aay oogo bango. Ne cohg ge kuu anahg jo’o. Nea ge ne nahg jo’o maa yaa ayiiho, e ge be ne aay oogo bango. Abea waahdh gen nyoadh ngo kejea gahng ke dhaano acielo kiin gen maa anahg ngado.

²⁰2:20 2:27 Abea wun, Jeacuu Wahy Juog acube yihru kedea giih beeye ge anyoadh Juoge ni, ge beehde e ge ngahyu cang. ²¹Warga gihn agweeda yihru padh ke nying me kwihyu giih beeye ge anyoadh Juoge. Agweeda yihru bang gihn giih beeye ge nyoadh Juoge ge ngahyu ne cohg kedea bang gihn ngo ngahyu kejea giih beeye ge anyoadh Juoge puohny me raaj tooro yihdh gen. ²²2:22 4:3; 2Jon 7 Abea aroba yihru kejea ngad toohd raaj ni beehda ngaa koohbo kejea Jeacuu ngo padh Ngad Boadh nyoge naa aoohr Juoge wiih piny. Ngaa me rubo kea Jeacuu ngo padh Ngad Boadh nyoge, e beehda Juog Wuur kedea Jeacuu Waahd Juog ge naa akweere ke gen. Kedea gihn nu nyoadh ngo kejea ngaa nu e ne room keehd ngaan ngahj e wiihe ne mahn keehd Jeacuu. ²³2:23 4:15; 5:1; Jon 5:23; 15:23; 2Jon 9 Gihn beehda lubo maa athiir bang gihn ngaa kweer ke Waahd Juog e ngo be rom nweehd keehd Juog Wuur. Abea ngaa yiih ngo nyum nyoge kea Jeacuu beehda Waahd Juog, e ngaa nu ngo anweehd naa acielo keehd Juog Wuur thiow.

²⁴2:24 2:7 Nea wa gihn nu, e kea magu puohny gihn ngahyu coon ke nying Jeacuu beer mee. Nea puohny gihn nu amagu beer mee, e naa ka ubaru maalo e wu anweehd naa acielo keehd Waahd Juog kedea keehd Juog Wuur. ²⁵2:25 Jon 5:24 Nea wo abeehdo e wo anweehd keehd Juog wa maano, e kuowo me guge tooro ngo yoado yoado. Kuowo gihn akob Jeacuue kea ngo ucube yihro.

²⁶A toohn wun yi warga gihn kejea yaa nu a’aay oogo bango, ge daahd udwaahng gene wun keehd puohny giih gen noono. ²⁷2:27 Jon 14:16; 16:13 Abea nea ke kur maru, e ngaa me romu ke dwaahngo tooro bang gihn Wahy Juog naa acub Jeacuue yihru wu konye konyo. Nea wa gihn nu, e wu padh nyoge me cahg daahd ke ngaa me puohny wun keehd giih mooge me ne keede me padh giih nyoadh Juoge yihru. Gihn ni ngo beehda Wahy Juog ge aoohr Jeacuue yihru e ne puohny wun ne ngey athiir ke nying giih nu cang. Thiow gihn puohny Wahy Juoge yihru yea tooro toohd. Nea wa maano e aroba yihru kejea beehdu e wu anweehd keehd Kriihjto wa kaa arob Wahy Juoge ngo yihru.

Beehdu Wa Nyethea Juog Kedea Wiiu Giih Adhemuohm

²⁸2:28 3:21; 4:17; Jon 5:22; 15:5 Noono nyethena, aroba yihru ubaru maalo ke beehdo e wu anweehd keehd Kriihjto. Beehdu e wu anweehd keehde beere e duue wiih piny kan ke yoohn Paar Maalo, e wo ungahmo utoor laahy wihje rogo ne lore.

²⁹2:29 3:10 Ngo ngahyo kejea Jeacuu beehda ngaa maa abiohgrwaal ke Juog. Nea wa gihn nu kea dhiilu ngo ke ngahyo kejea kwaad ngaa beehda abiohgrwaal ke Juog e ngaan nu beehda nyethiin Juog.

¹3:1 3:10; 4:6; Jon 1:12; 3:16 Juog Wuur wo anhyaare ne cohg! Wo anhyaare keter adhaahr ucuohne won ne nyethene. Adiehr muon, wo adoohng ne nyethen Juog. Abea keehd maano, e yaa nhyaar giih wiih ngoom ngo be yiih gene kejea wo nyethen Juog. Ngo be yiih gene bang gihn, Juog kwihy gene. ²3:2 2Kor 3:18; Pihp 3:21 Wu jo’a ge anhyaara, awaahn ni ngo ngahyo kejea wo beehda nyethea Juog. Abea ka udoohngo kii ngo, ngo poohd kuu anyoadh. Abea gihn ngahyo, cahng uduu Jeacuue wiih piny, e naa ka ungeyo ngo utoor gihn me cahgo ke kwihyo ke nyinge. Kaano e wo udoohng wa en. ³Thiow kwaad ngaa me yihre ne gaahno kiinu kejea ngo uneehn Jeacuu Kriihjto ree keá meehge pahdh yaa adhemuohm. Ree keá meehge pahdh yaa adhemuohm wa mar Jeacuu e ree tooro adhemuohm.

⁴Abea ngaa me koag ke yug giih adhemuohm, ngo beehda ngaa maa akweer ke loohng Juog. Adiehr muon, ngad adhemuohm beehda ngaa maa apaahr oogo rih Juog. ⁵3:5 1:7; 2:2; 4:10; Jon 1:29; 8:46; 2Kor 5:21; Judea 4:15; 9:14; 1Pii 1:19; 2:22, 24; 3:18 Ngo beehda gihn me ngahyu kejea Jeacuu abeehn wiih piny kan beere ukihm gihr Juog ke nying adhemuohme giihu kahle ke oogo wudhu. Kedea ngo dhiilu kaa ngahyo kejea adhemuohm maa akuonge ke yugo ngo tooro. ⁶3:6 3:9; 5:18; Jon 15:5; Rom 6:2, 14 Nea ne maano e ngaa maa anweehd tiehd keehd Jeacuu keá beehdo e yug giih adhemuohm. Ngaa beehd e yug giih adhemuohm, nyoadh ngo kejea gihn me rome ke deado ke nying Jeacuu tooro, kedea Jeacuu kwihye ne weey weey.

⁷Nyethena, koaru rogu beer mee utoor ngaa me dwaahng wun. Ngaa abiohgrwaal ke Juog beehda ngaan tiihy gihn akob Juoge kea tiihye wa mar Jeacuu ge abiohgrwaal ke Juog. ⁸3:8 Mat 12:26-29; Jon 8:44 Abea ngaa koag ke yug giih adhemuohm e ngo beehda ngad atiihb ukeehg, bang gihn atiihb ukeehg athubo ke yug adhemuohm maano e piny poohd kuu acag. Waahd Juog abeehn wiih piny kan ne raany giih atiihy atiihb ukeehge utoor gihr nying gene. ⁹Ngaa maa adoohng ne nyethiin Juog ree be yuge ne dhaano me koag ke yug giih adhemuohm bang gihn kihd Juog ke niido ree. Ree keá kuonge ke yugo ne ngaa me beehd e yug giih adhemuohm bang gihn ngo beehda nyethiin Juog. ¹⁰3:10 2:9, 29 Gihn nyoadh nyethea Juog kedea gihn nyoadh nyethea atiihb ukeehg yihro ne cohg e man: kwaad ngaa be tiihy gihn daahd Juoge e ngaan nu padh nyethiin Juog. Kedea ngaa kweer ke nhyaar wad gen maa ngad akuud ngo padh nyethiin Juog thiow.

Tiihj Ke Loohng Juog Kedea Nhyaar Rog

¹¹3:11 2:7-8; 4:11; Jon 13:34 Ciig Juog ge kob kejea nhyaaro rogo nhyaaro ngo alihng ke coon cahng ayiihu lum Jeacuu. ¹²Nea neehn maano, e rogo keá yugo wa Kaayn3:12 Kaayn beehda waahd Adam ge beehda kuow nyoge cang. Kaayn anahg kaya, e yihre anaa umen maa abeehn ke batiene me nyinge Abel. Giih tiihy Kaayn ge kuu beero yi wong Juog. Cahng man e ge apiih ne cub giih kweehr yihr Juog. Juog kaa ayug Abele kweehr yihre kii ngo, ngo anhyaar Juoge. Abea kaa ayug Kaayne gihr kweehr kii ngo, ngo amaan Juoge. Gihn nu e Kaayn cwihnye araahnyo uwahdhe kaa anahge umen. ngaa aweehg ree dwaahngo yihr atiihb ukeehg naa amaane umen kedea unahge ngo. Umen anahge bang gihn giih tiihy Kaayne ge kuu abeero yi wong Juog, unahge giih tiihy umene ge naa apahdh yi cwihny Juog. ¹³3:13 Jon 15:18 Jo paar miiha maa anhyaara, nea wa gihn nu e wu keá gaahy nea yaa wiih piny wu maan gene maano. ¹⁴3:14 2:11; Jon 5:24; 13:35 Abea won, ngo ngahyo kejea wo tooro yi cing atiihb ukeehg ge kahl thoo, bang gihn yihro ne kuowo me guge tooro. Ngo ngahyo kejea wo tooro yi cing atiihb ukeehg bang gihn yaa ayiiho ge nhyaaro nhyaaro. Kwaad ngaa be nhyaar wade maa ngad akuud, e ngaan nu poohd nii yi cing atiihb ukeehg ge kahl thoo. ¹⁵3:15 Mat 5:21-22; Any 21:8 Kwaad ngaa maan ngad gen uroom yi wong Juog ke ngaa me naahng nyoge. Ngahda beehde e ngo ngahyu kejea ngaa naahng nyoge padh ngaa me beehdo ke dhe yoohn kuowo gihn cub Juoge? E guge tooro.

¹⁶3:16 Jon 15:13; Gal 1:4; Pihp 2:17; 1Th 2:8 Jeacuu Kriihjto ree agwaaye yi thoo ke nyingo, ne nyoadh ngo yihro ne cohg ka dhiilo nyoge ke nhyaaro. Nea wa gihn nu e wo keá kweer ke gwaay rogo thiow ke nying joe ge yaa akuud. ¹⁷Ngaa maa alony maa akweer ke kony ngad akuud maa angoohng, kare tooro ukobe ngo kejea yihre ne nhyaaro gihr Juog ge meehg dhaano nhyaar ngaa moogo. ¹⁸3:18 Jeam 2:15-17 Nyethena, nea ne maano, e giih med dhog ge keá yugo nea wo rubo kaa nying nhyaar rogo. Giih med dhog ge keá yugo abea dhiilo rogo ke konyo wa ka nhyaar Juoge won. ¹⁹Nea rogo anhyaaro ke dhe yoohn nu, e ngo ungahyo ne cohg kejea wo beehda nyethea Juog. Juog ge e ne nyoadh gihn adiehr yihr nyoge. Thiow nea rogo nhyaaro nhyaaro e aduuno naa yum ge kwahyo yihr Juog, ²⁰keehd me rob aduule ngo yihro kejea wo yaa adhemuohm. Aduuno naa yum bang gihn giih ngahy Juoge ge akaal wudh giih rob aduule yihro. Juog, giih tiihyo cang ge ngahye.

²¹3:21 2:28 Jo’a maa anhyaara, nea ngahy aduuno kejea wo be bar maalo ke yug adhemuohm, e gihn me tudo ke nyinge tooro ge kwahyo yihr Juog. ²²3:22 Jon 15:16 Kedea ge toor adhemuohme me baro maalo ke yuge, e Juog gihn kwayo yihre ngo ucube yihro. Ngo ucube yihro bang gihn wo tiihyo kaa gihn arobe kedea bang gihn wo beehdo kaa dhe yooh me nhyaar Juoge. ²³3:23 Jon 2:23; 13:34 Loohnge giih arob Juoge kejea tiihyo ke gen, ge aman: Dhiilo ngo ke yiiho kejea Jeacuu Kriihjto ngo Waahd Juog kedea dhiilo rogo ke nhyaaro wa kaa arob Jeacuue ngo yihro. ²⁴3:24 4:13; Jon 14:16; 15:5; Rom 8:5, 9, 14 Kwaad ngaa tiihy gihn arob Juoge, e ngaan nu ngo anweehd keehd Juog kedea Juog beehda anweehd keehde thiow. Gihn nyoadh ngo yihro kejea Juog beehda anweehd keehd won, beehda gihn abeehn Juoge ucube Wahy Juog yihro ne beehd ke won.

Koaru Rogu Ke nying Yaa Mahn Giih Jeacuu

¹4:1 2:18; Mat 7:15; 1Th 5:21 Jo’a maa anhyaara, paajo yea apahng ke yaa ucahb ge koohbo kejea ge yaa agamloohngjuog. Ke nying yaa nu, e naa gihn roba ngo yihru ubahnge lum ngaa me koohbo kejea yihre ne Wahy Juog be yiihu. Abea kuongu yihdh giih robe ke deado beer mee ne ngahy giih ngo ne cohg nea yihre ne Wahy Juog. ²4:2 Jon 1:14; Rom 10:9; 1Kor 12:3 Beehda ke dhog yiehdh ni e nuu ungahy ngaa yihre ne Wahy Juog. Ngaa koohbo kejea Jeacuu Kriihjto abeehno wa dhaano utaahngo, e ngaan nu puohnye aay ke bang Wahy Juog. ³4:3 2:18, 22 Abea ngaa kweer ke yiih adiehj nu, e ngaan nu Wahy Juog tooro ree, kedea beehda ngad mahn gihr Jeacuu. Ngad mahn Jeacuu ge bange alihngu kejea ngo ubeehn, awaahn ni ngo abeehno maa ngo nud wiih piny.

⁴4:4 5:5 Abea wun ge nyethena maa anhyaara, wu beehda nyethea Juog. Kedea wu akweer keehd giih toohd ge puohny yaa ucahbe. Wu akweer ke puohny yaa ucahb bang gihn Wahy Juog ge ne rogu, teege duohng keter ukaale wiih tee mar atiihb ukeehg ge e naa ruohdh yaa wiih piny giih kwihy Juog. ⁵4:5 Jon 3:31 Yaa ucahb ge padh yaa Juog. Noono e ge rubo kaa nying giih wiih piny ge be nhyaar Juoge. E naa gihn beehn yaa wiih piny ge kwihy Juog unhyaar gene lihng giih puohny yaa ucahbe kedea uyiih gene gen. ⁶4:6 2:4; 3:1; Jon 8:47; 18:37 Abea wa jo oohr, wa beehda yaa Juog. Noono e kwaad ngaa ngahy Juog, puohny wan lihnge lihngo. Abea kwaad ngaa kuu ayiih lum Juog, puohny wan be yiihe. Nea maano e naa ka ungahyu ngaa yihre ne Wahy Juog kedea ngaa beehda ngad ucahb e yihre tooro Wahy Juog. Ngaa yihre ne Wahy Juog puohny wan yiihe yiiho. Abea ngad ucahb, e yihre tooro Wahy Juog, puohny wan be yiihe.

Rob Ke Nying Nhyaahro

⁷Jo’a maa anhyaara, dhiilo beehdo e rogo nhyaaro nhyaaro. Gihn ni aroba yihru bang gihn beehda Juog e ne meehg won nhyaar nyoge. Kwaad ngaa nhyaar nyoge kiinu, e ngaa nu beehda nyethiin Juog kedea Juog ngahye. ⁸4:8 4:16 Ngaa be nhyaar nyoge, e ngaan nu Juog kwihye ne weey weey. Gihn ni ngahyo bang gihn Juog gihre beehda nhyaar nyoge. ⁹4:9-10 Jon 3:16 Dhe yoohn anyoadh Juoge ngo yihro ne cohg kejea nyoge nhyaare nhyaaro beehda gihn aoohre Waahde ge acielo cog ne beehn wiih piny. Ngo aoohre beere kuowo me ne cohg yoado yoado ke nying Waahde. ¹⁰4:10 2:2; 3:5; Rom 5:8, 10 Padh gihn nhyaaro Juog e naa meehn nhyaaro gihn ne kiino ke Juog. Meehn nhyaahro beehda gihn anhyaar Juoge won ke dhe yoohn aoohre Waahde ne thoo beere adhemuohme giiho ge wiie ke piny yihro. ¹¹4:11 3:11; 4:21; Mat 5:44-45; 18:33; Jon 13:34; 2Jon 5 Jo’a maa anhyaara, me neehn maano anhyaar Juoge won keter, kea noono nhyaaro rogo ke karo cang. ¹²4:12 2:5; 4:17; Jon 1:18 Dhaano utaahngo maa akuong Juog ke niido tooro. Abea keehd maano toor ngaa maa aniid Juog, nea rogo nhyaaro nhyaaro e wo beehda anweehd ke Juog. Kaano e Juog nyoge nhyaare nhyaaro ke nyingo ke kar cwihnye me daahde.

¹³4:13 3:24 Ngahyo kejea wo anweehd ke Juog kedea Juog anweehd ke won kaa nying gihn abeehne ucube Wahy Juog yihro. ¹⁴4:14 Jon 15:27 Wa jo oohr, ngo beehda athiir maa aniid wane kedea uteed wane ngo yihr nyoge kejea Juog Wuur Waahde aoohre wiih piny ne boadh nyoge. ¹⁵4:15 2:23 Kwaad ngaa yiih ngo kejea Jeacuu beehda Waahd Juog e ngaan nu ngo anweehd ke Juog kedea Juog anweehd keehde. ¹⁶4:16 4:8-10; Jon 15:5 Ngo beehda gihn me ngahyo kejea Juog wo anhyaare ke raahyo kedea Juog gaahno gaahno kejea ngo ubar maalo ke nhyaar won.

Juog gaahno gaahno bang gihn Juog gihre beehda nhyaar nyoge. Kwaad ngaa nhyaar Juog kedea nyoge mooge, e ngaan nu anweehd ke Juog kedea Juog anweehd keehde thiow. ¹⁷4:17 2:28; 4:12 Juog nyoge anhyaare ke nyingo wa ka daahde ke cwihnye, e naa gihn bahnge wo be tud cahng lug Juog. Wo be tud cahng lug Juog bang gihn wo ubeehdo naa anweehd keehde tiehd wiih piny wa mar Jeacuu naa abeehdo naa anweehd keehde wiih piny. ¹⁸Kwaad ngaa me ngahy ngo kejea e anhyaar Juoge, e ngaan nu be tud yihr Juog. Noono nea nyoge nhyaar Juoge nhyaaro ke nyingo wa ka daahde ke cwihnye, e wo be tud yihr Juog ne lihg lihgi. Nea nyoge ge tud yihr Juog e beehda ke nying gihn ngahy gene ngo kejea ge ukihm Juoge. Noono nea dhaano utudo yihr Juog, e nyoadh ngo kejea Juog be meehge nhyaar nyoge ke nyinge wa ka daahd Juoge ke cwihnye.

¹⁹Gihn cub tee yihro ne nhyaar Juog kedea ne nhyaar nyoge mooge, beehda bang gihn Juog wo anhyaare ke coon maano e ngo poohd koa nhyaaro. ²⁰4:20 2:9 Ngaa koohbo kejea Juog anhyaare abea wad gen maa ngad akuud be nhyaare, e ngaan nu beehda ngad toohd. Ngo beehda ngad toohd bang gihn kare tooro unhyaare Juog ge be neehn yihre unahge ke wad gen ge kwaaye ke niido e ne be nhyaare. ²¹4:21 4:11; Mat 22:34-40 Thiow dhiilo yaao ge yaa akuud yaa ayiiho ke nhyaaro bang gihn e naa gihn arob Juoge kejea yugo ngo. Akobe kejea kwaad ngaa nhyaar en, kea dhiile wad gen maa ngad akuud ke nhyaaro thiow.

Rob Ke Nying Yiiho

¹5:1 1Pii 1:22-23 Kwaad ngaa ayiih ngo kejea Jeacuu beehda Ngad Boadh nyoge gihn aoohr Juoge wiih piny, e ngaan nu beehda nyethiin Juog. Kedea ngaa nhyaar wur nyethiin e beehde nyethiin nhyaare nhyaaro thiow. ²E naa ka ngahyo ngo ne cohg kejea nyethea Juog ge nhyaaro nhyaaro nea Juog anhyaaro ke dhe yoohn yug giih arobe yihro. ³5:3 2:5; Mat 11:30 Ka nhyaaro Juog kii ngo beehda ne tiihy giih arobe kejea yugo gen. Giih arob Juoge kejea dhiil gen ke yugo, ge padh giih me teeg ke yugo. ⁴5:4 Jon 16:33 Ge be teeg bang gihn ngaa nyethiin Juog yihre ne tee me meehg Juoge en kweer ke tiihy giih reje ge tiihy dhaano utaahnge. Yihro ne tee me meehge won kweer ke yug giih reje bang gihn wo beehda nyoge maa ayiih lum Jeacuu. ⁵5:5 4:4; Rom 8:37 Ngaa moogo me nud tooro me yihre ne tee me meehg ngo kweer ke yug giih reje nea padh ngaa maa ayiih ngo kejea Jeacuu beehda Waahd Juog.

⁶5:6 Jon 16:13; 19:34 Beehda Jeacuu Kriihjto e naa ngaa abeehno ke yoohn Paar Maalo wiih piny kedea beehda en e ne wiihe anaa amuoj Joone ke piih luogwahy, kedea anahg en e ne reme anaa awuoj piny naa anaa anahge. Padh gihn amuoje ke piih luogwahy e naa adiehj ngahyo cog ke nyinge, bang gihn thone uwuoj reme piny beehda adiehr moogo thiow me ngahyo ke nyinge. Wahy Juog, ge nyoadh gihn maa adiehr, e naa anyoadh ngo yihro kejea giih nu ge beehda giih maa adiehr. ⁷5:7-9 Jon 5:36-37 Nud ke nyepinye adahg me meehg won ngey gihn maa adiehr ke nying Jeacuu. ⁸Acielo beehda dhe yoohn rub Wahy Juoge ke won. Riown gen beehda dhe yoohn kaa amuoj Jeacuu ke piih luogwahy. Kedea dahg gen beehda dhe yoohn kaa anahge uwuoj reme piny. Dhog yihdh ni adahg ge nyoadh nyepiny acielo, kejea Jeacuu beehda Waahd Juog. ⁹Nea dhaano ubeehno urube yihro ke nying gihn me ngahye, ngahda lume yiiho yiiho ne? Nea maano e giih anyoadh Juoge yihro ge dhiilo kaa yiiho. Ge dhiilo kaa ayiiho bang gihn, gihn teed Juoge yihro kejea ngo adiehr, e ne wiihe ne maalo rih mar dhaano utaahngo. Wiihe ne maalo bang gihn beehda Juog ke ngude e naa arob ngo, kedea Juog arubo kaa nying Waahde. ¹⁰5:10 Rom 8:16; Gal 4:6 Nea neehn maano, e kwaad ngaa yiih ngo kejea Jeacuu beehda Waahd Juog, e ngo ngahy ngaan nu ne cohg kejea giih anyoadh Juoge ge beehda giih maa adiehr me cwihny be daag rog gen. Abea kwaad ngaa be yiih gihn arob Juoge, e ngaan nu Juog akoohbe toohd. Juog akoohbe toohd bang gihn akweer ke yiih gihn arob Juoge ke nying Waahd Juog. ¹¹5:11 Jon 3:16-18 Cwihnyo be diiw ke nying gihn maa arob Juoge bang gihn kuowo me ne cohg acube yihro. Kuowo me yoad ke bang Waahd Juog. ¹²5:12 Jon 3:36; 5:24 Noono arumo e ngaa anweehd ke Waahd Juog kuowo gihn nu ayoade. Abea ngaa kuu anweehd ke Waahd Juog, kuowo gihn nu tooro yihre.

Kuowo Me Ne Cohg

¹³5:13 Jon 20:31 Giih ni ge agweeda ke yihru wu jo yiiho kejea Jeacuu beehda Waahd Juog. Ge agweeda yihru beere cwihnyu be diiw ke nying kuowo me ne cohg ge ne yihru.

¹⁴5:14 Jon 15:16 Nea maano yihro tooro lwahr nyum Juog bang gihn Juog gaahno gaahno kejea kwaad gihn kwayo yihre, e ngo ucube yihro. Ngo ucube yihro nea gihn kwayo e naa gihn daahde kejea kwahyo ke nyinge. ¹⁵Ngahyo kejea Juog kuu akuong kweer nea wo kway gihn daahde kejea kwahyo ke nyinge, e naa gihn ngahyo ngo kejea gihn apeehnyo ngo ucube yihro.

¹⁶5:16 Mat 12:31; Judea 6:4-6 Noono nea ngahy ngaa me ne kiinu kejea nud ke ngad akuud yaa ayiiho me yug adhemuohm, kedea adhemuohm ngo padh adhemuohm me paahng kiin gen ke Juog ne weey weey, e kea dhiile Juog ke kwayo ke nying ngaan nu, kedea Juog kuowo me ne cohg ucube yihr ngaan nu. A rubo yihru kaa nying nyoge maa adhemuohme giih gen padh kwaad adhemuohme giih paahng kiin gen keehd Juog ne weey weey. Abea nud kaa adhemuohme me paahng kiin nyoge keehd Juog ne weey weey. Kwaad yaa yug adhemuohm nu, a be rubo kejea dhiil dhaane kwaj yihr Juog ke nying gen. ¹⁷Kwaad giih anyoohne me yug dhaane ge reje yihr Juog. Abea nud keehd adhemuohme me thoohdh me be paahng kiin nyoge keehd Juog.

Gooy Wudh Luube Piny

¹⁸5:18 3:6, 9-10; Jon 17:15; 2Th 3:3 Ngo ngahyo kejea ngaa nyethiin Juog, giih adhemuohm ge be kwaaye ke yugo bang gihn ngo kony Waahd Juoge konyo beere gihn me raaj me yug atiihb ukeehge ree tooro. ¹⁹5:19 Jon 12:31; Gal 1:4 Ngo ngahyo kejea wo beehda nyethea Juog kedea ngo ngahyo thiow kejea atiihb ukeehg e naa ruohdh yaa beed wiih piny ge kuu ayiih lum Juog. ²⁰5:20 Jon 1:14, 18; 11:25; 17:3; 20:28 Ngo ngahyo thiow kejea Waahd Juog abeehn wiih piny kan kedea umeehge won ngahy Juog Aciehg ge rob gihn maa adiehr. Wo beehda anweehd keehd Juog Aciehg ge rob gihn maa adiehr bang gihn wo beehda anweehd keehd Waahde Jeacuu Kriihjto. E noono, e naa Juog Aciehg, Juog moogo tooro, kedea e ne cub kuowo me ne cohg.

²¹Wu nyethena maa anhyaara, koaru rogu ubahnge wudhu be cubu rog giih yiehdhe.