TƖTƖ

TƖTƖ

¹ Mɛr Polιkɛ dɔnι Thãgbaa thɔ̃daar na Jeju Kirisitii thɔ̃thɔn, gι cʋʋ wιrɛ Thãgba phiirni wι ’lɛ ha pɛrɛ, wι ’lɛna dakha sobɔ jιιrιkɛ n cʋranι kha na Thãgba fιlɛ, ² wa-n pɛna nũu yire khorrιkɛ Thãgbaakɛ na-n sõsonena’ kɔɔ maanι ʋlfɛrɛ kɛkɛkɛ ιna ’laarɛ, ³ dι ɔbɔɔkɛ bɔɔkɛ a pɛrnι danι, a kɔɔ nιnanɛ ɔɔ thιmιιkɛra ɔr Thãgba asι Taadaar yιnι ma-n mιa; ⁴ mι thɔnanɛ sɛbɛɛkɛ ɩ̃ ha fɛr Tιtɩɩkɛ dɔ marnι bikuun ha pɛrɛraakɛ sι bulni kha. Thãgba Thιrɛ, na Jeju Kirisiti asι Taadaar na-n jɛ nι bʋɔra, a na-n hana nι dakha ha ιι. ⁵ Mι kɔɔ faa fɛr Kιrɛtι fι gbɛbι thɩ̃ɛ fɛʋʋkɛ sɛnι gɩ telẽ, dɩ fɔ mɔ̃ mɩ kɔɔ so farnɩ sa pɩɛr we gbɛbɩdaraa kɔ̃tɩ̃sɔ dɩɩdɩɩsɔra; ⁶ sɩ dɔ ntɛ n do kuunikɛ na hananɩ so paara’, a hanana khɛ bɩɛl, a hanana bɩsanaakɛ dɔnɩ ha pɛdara, kɛ tɩbɩla na pɛrnɩ sor dakhaba dʋʋrra dɩ nũ nʋʋrɛra ga. ⁷ Gɩdonɩ we gbɛbɩdaarɩ hɩɩndaar teenanɛ a dɔ ʋrɛ na hananɩ so paar mɔ̃ a donɩ Thãgbaa thɩ̃ hɩɩndaara’, a na-n do tibilikɛ na-n wuronəə ga, a na-n gba nĩkhii kɔrɔa’, a na-n do ta laardaar na kιl ƴaal tibilə’, a na-n phʋʋn tιbɩla na fãga bɩɩ ɔɔ war ƴaalla ga, ⁸ sɩ a dɔ kpakpal tee tibil, a dɔ tibilikɛ n naannɩ gɩrɛ telenenɩ, a dɔ yʋ bɔ tibil, a dɔ tɩɩ sarʋ, a hanana fɩl phuu, a dɔ dɩbara fʋdaar. ⁹ A teenanɛ a jɩɛ ma bɔɔbɔɔ sobɔ thɩmɩɩrraakɛ n thɛnɩ dɩɩrɛra, dɩ mɛ̃ a na mar a gba dɩɩr bʋɔ a na-n dɩɩr tibil, a na-n punona dakha thɩ̃ banadara. ¹⁰ Gɩdonɩ jɔɔ hale khʋ̃ kurdaraa thɩ̃thɩɩn, kɛ na-n tuonni thɩmɩɩra’, kɛ dɔnɩ mɔlɔ thɩ̃ banadara na tɩɩ fɩɩldara, ¹¹ kɛ teananɩ sɩ khaanɛ wɩ nʋɔ; a wɩ lõ cɔ dɔɔra wɩ-n nyanyãa gɛr koo, wɩ-n dɩɩrɛ thɩ̃ɛɛkɛ na teananɩ dɩɩra’ wɩ puno wa-n ’lɛ yicur war. ¹² Awɩ thɛthɛɛ bobon bɩɛl yɛrɛrakɛ sor ayɩ: “Kɩrɛtɩdara wer, sɔ̃sɔ wɩ-n kuur wire fɛʋ, hɔ̃ nʋ̃ puunə ha wɩ, khãkhalaakɛ n kɛbanɩ wɩ do.” ¹³ Dɩ sobɔrra gɩ do ger; gɛr gɩ phaanɛ wɩ dakɔ̃tɩ̃ɩ wɩ jɩɛ hana ha pɛ bʋɔ, ¹⁴ dɩ wa-n bo na pɛ nũu Juifisɔɔ kpuro nɩra ga, dɩ jɔfʋraakɛ tɩbɩlaakɛ faanɩ sobɔr pɛrnɩ ga. ¹⁵ Thɩ̃ɛ fɛʋ phure wɩrɛraakɛ phonɩ, sɩ thɩ̃ bɩɛllakɛ na phu wɩrɛraakɛ bisenenə’, kɛ dɔnɩ ha pɛ ’leedara ga; awɩ fɩl na awɩ kpɩɛrnɔ bisere. ¹⁶ Sɩ nʋɔ wer n mɩɩrɛ ɩnɩ jɩrɛ Thãgba, sɩ awɩ cʋʋ pa na-n jal kha na gιrɛ wι-n sona’. Tιι sʋ̃ɔ ha wι na nũ nʋra, wa-n puno thɩ̃ bɔ cʋʋrɛ fιιʋraka’.

¹ Sɩ ado fɛr gɩ, na dɩrɛ ga-n jal mɔ̃kɛ dɩɩr bʋɔ hanɩ. ² Sɔ kũu kɔ̃tɩnana dɩ wa hana dɩbara fʋrɛ, wɩ dɔ dakha tɩɩ cʋnanɛ, a dɔna yʋ bɔ tɩbɩla, wɩ tɛ ha pɛrɛra, na naʋra, na ha fʋrɛra. ³ Sɔ dakha khɛ kpɛɛnana wɩ dɔ awɩ cʋʋ pa na-n nɩna gɩrɛ n dɔnɩ phur; wa-n do i kʋɛ khɛra ga, wa-n do taanɩ dea’, sɩ wɩ dɔ khɛraakɛ hananɩ dɩɩr bʋɔ, ⁴ dɩ mɛ̃ wa puno a na dɩɩr khɛ bɩsana wa-n na awɩ ko, nakha awɩ bɩsãsɔ, ⁵ wɩ do dakha khɛraakɛ hanɩ hɛlɛlɛ, wɩ hanana fɩl phuu, wɩ dona dakha wɩrɛ n jɩɛnnɩ do awɩ cɔka thɔ̃, wɩ dona dakha khɛraakɛ bʋɔnɔnɩ, wɩ jo dakha awɩ kora gɩ do nɔɔ tibil na puno na kpɛ Thãgbaa soa’. ⁶ Sɔ daɓolala dakha dɩ wa fʋ dɩbara; ⁷ sɩ fɛrɛ dakha fɩ do thɩ̃ nɩrɔrɛ thɩ̃ɛ fɛʋra thɔ̃ bɔ cʋʋrɛra mɔ̃ fɩ-n dɩɩrnɩ tɩbɩla na fɩl bʋɔ na cʋ hananɛ, ⁸ ga-n dɔ thɩmɩɩ bʋɔɔkɛ tibil na yɩnɩ kpɛ paara’, dɩ mɛ̃ yicuru na fʋ asɩ lãlaardaar a na yɩ asɩ dapuu mɩɩ pa ga. ⁹ Sɔ deara dɩ wa jo dɩbara awɩ kɔ̃tɩ̃sɔra, a na da war haar thɩ̃ɛ fɛʋra, wa-n bana wɩ thɩ̃ banaa ga, ¹⁰ wa-n yu thɩ̃a’, sɩ wa-n nɛna wɩ wire fɛʋ awɩ sobɔdaar do, gɩ do thɩ̃ɛ wo thɩɛna gɩ cʋʋrɛ Thãgba asɩ Taadaarɩ dɩɩr dɩ ga hana cʋrɛ. ¹¹ Gɩdonɩ Thãgbaa bɔ jɩɩkɛ dɔnɩ tɩbɩla fɛʋʋ taa ’lɛ pa gɩ yɩrrɛ dɩphã; ¹² gɩ-n dɩɩr sɛr dɩ sa faa thɩ̃ gõgolõ na thɩɩkɛɛ ha pɩɛr, sɩ sɩ too nɛnɛ̃ bɔɔraakɛra sɩ hana dɩbara fʋrɛ, na fɩl telẽe, na Thãgba fɩlɛ, ¹³ sa-n pɩɛrna kãka wireekɛ sa tornɩ yire gɩrɛra sɩ-n kɔɔ pɛnɩ nũu, kɛ dɔnɩ mɔ̃ asɩ Thãgba Kɔ̃tɩ̃ na Taadaar Jeju Kirisiti na-n ɩnɩ na i dʋbɩrɛ. ¹⁴ Ʋrɛɛkɛ kɔɔ faanɩ ɔɔbara asɩ sora, dɩ mɛ̃ a birse si a ti si sopugosɔra fɛʋ, sa phʋɔl sɩ sɩ dɔ caarɩkɛ dɔnɩ ɔɔ thɛthɛɛda, kɛ thɔ̃ bɔ cʋʋrɛ n kʋnɩ thue. ¹⁵ Na mɩa ga thɩ̃ɩkɛ, na kpãkpaanɛ tɩbɩlala, na nɛna wɩ awɩ dɩ pa, gɩdonɩ Kɔ̃tɩn ha fɛr hʋɛ. Fa-n do tibil na-n beesi fa’.

¹ Na khɛ war wa-n jɔ dɩbara fãgadarasɔra na kɔ̃tmasɔra, wa-n nɛ nũu, wɩ tɔɔ thɔ̃ bʋɔ fɛʋʋ cʋʋ too, ² wa-n mɩɩ thɩmɩɩ puu tibillə ga, sɩ wɩ dɔ ha ie ƴaal tɩbɩla, na bɩ̃ bɔ tɩbɩla, na hɛlɛlɛ fɩldara tɩbιlala fɛʋ. ³ Gιdonι sɛrɛ dakha thalera sι kɔɔ ha, sι kɔɔ dor də̃bələ, na nũ nʋra, sι kɔɔ buure, a dona dakha ha pιɛr dea thɩ̃ɛsɔraakɛ n kɔ sɩnɩ thue; sι kɔɔ hananɛ bɩ̃ puu na gbugi, dι sι kɔɔ teenanɛ laarɛ dι dakha sι-n laarɛ khasɔ. ⁴ Sι ɔbɔɔkɛ Thãgbaakɛ dɔnι asι Taadaarι ha bulo fιl na ɔɔ naʋ tιbιlala yιrnι, ⁵ gɛr a kɔɔ taa sar, sι ga do fιl sar thɔ̃ dιkha sι kɔɔ cʋa’, sι ɔɔ bɔ jιra gι, mɔ̃ a cɔcɔɔ sιnι a cʋʋ sɩ dι sι kɔ̃ daphaa, kɛ dɔnι tibil pha dʋʋrιkɛ Thu Phuu cʋʋ sιnι dι sι do; ⁶ dι Jeju Kirisiti asι Taadaar dɔ nɔɔ dι sι ’lɛ Thu Phuulera dιι və̃vĩə, ⁷ gι do nɔɔ gιdonι sor hɛl sarɛ bɔ jιιrra pι, sι debi sι do wιrɛ na ’lɛnι yire khorrιkɛra sι-n pɛnι nũu. ⁸ Sobɔr thιmιιrιkɛ do, dι mι-n ƴaalɛ fι bɔ na ιa gar, dι mɛ̃ wιrɛ pιɛrnι haar Thãgbara na gbuuro yʋʋ wa-n cʋʋ thɔ̃ bʋɔ; gɛr dɔ gɩrɛ telenenι a bɔr tιbιlala dι wa cʋʋ. ⁹ Sɩ golone də̃bəəl thɩ̃ bana bananɛna, na thɩ kɔ̃ jɔfʋ thɩmɩɩrra, na kɩlasɔ, na thɩ̃ banaa jɔfʋdaara, gɩdonɩ ga do bɔ taa thɩ̃ɛ ha gela’, mɔlɔ thɩ̃ɛ gɩ. ¹⁰ A fɩ kpãkpãa ʋrɛraakɛ n pɩɛrnɩ leere dɩɩ dã babɩɛl na balanyɔ dɔrɔɔm, fa-n do nɩ ha kha dɩkha bã. ¹¹ Jɛna dɩ tibil ca ole kʋɛrɛ koo, sopugo a-n cʋʋ da-n heen sor dɩbara. ¹² Ɔbɔɔkɛ ma thɔ̃ farnɩ Artemasɩ agɩbo Tɩsɩkɩ bãbanɛ sa caanɛ mɩ Nɩkopolɩsɩ, gɩdonɩ mɩ kpɩɛrɛ sa yɩ le ma too yʋʋrɔ. ¹³ Gʋrɛ thɩ̃ɛ fɛʋʋkɛ dɔnɩ Jenasɩ jɔfʋ dɩɩrdaar na Apolɔsɩɩ kpaarda a pɛ wɩ, dɩ mɛ̃ thɩ̃ɛ na ɓɔr wa’. ¹⁴ Dɔ asɩ too dakha n dɩɩr wa-n do thɔ̃ bʋɔ wɩ puno wa-n bul wɩrɛ gɩ-n ɓɔrnɩ ɓɔr bʋɔ, wa-n too gɩ do ga do bɔ taa tɩbɩla ha waa ga. ¹⁵ Wɩrɛ fɛʋʋkɛ hanɩ kha na mɛrɛ wɩ fʋɔr fɛr. Fʋɔrɛ wɩrɛ fɛʋʋkɛ n naan sɩnɩ, kɛ sɩ donanɩ kha ha pɛdara. Thãgba na-n jɛ nɛrɛ fɛʋ bʋɔra.