NƖRƆRƐ

¹ Gɩrɛɛkɛ dʋɔn nɩrɔrɛɛkɛ Thãgba kɔɔ hanɩ Jeju Kirisiti a gba nɛna Thãgbaa thɔ̃darasɔ thɩ̃ɛɛkɛ na dananɩ kɔrɔ. Dɩ Kirisiti thʋɔn ɔɔ thɔ̃daar thu a cʋɛ ɔɔ thɔ̃daar Jã a jɩ gɩ, ² kɛ dɔnɩ ʋrɛ mɩanɩ gɩrɛ fɛʋʋkɛ a yɩnɩ, kɛ dɔnɩ thɩmɩɩrɩkɛ thɛnɩ Thãgbaa pa na sobɔrɩkɛ Jeju Kirisiti kɔɔ mɩgʋʋnɩ. ³ Ga dar ʋrɛraakɛ n hɩnɛnɩ sɛbɛɛkɛ na wɩrɛraakɛ n pɛnɩ Thãgbaa bobonɩ thɩmɩɩkɛ nũu, dɩ wa-n nɩ nũu dakha gɩrɛraakɛ kherenenɩ, gɩdonɩ bɔɔkɛ ga thɩ̃sɔɔkɛra na danɩ gɩ daan. ⁴ Jã thɔna fʋɔrɛɛkɛ a ha we gbɛbɩdaraa cɔ makonyɔɔkɛ hanɩ Ajɩ ayɩ: Bɔ jɩɩr na ha ɩɩ n dana nɩ, kɛ n thɛnɩ Thãgbaraakɛ hanɩle gɩrɛ, kɛ dakha kɔɔ hanɩle, kɛ na ɩnanɩ, kɛ n thɛnɩ dakha thue makonyɔraakɛ hanɩ ɔɔ fãga too pa ƴɛ bʋrɔ, ⁵ kɛ dakha n thɛnɩ Jeju Kirisitii pa, kɛ dɔnɩ sobɔ so jɩdaar, na cacadaarɩkɛ Thãgba kɔnɩ, kɛ kɔɔ ɩrɛnɩ a the khirera, kɛ dɔnɩ gɩrɛ Fãgadaar kpɩɛ fãgadarara kɛ thɩɩra. Ʋrɛɛkɛ naan sɩnɩ a thʋbɩ sɩ sopugo pɔ̃ɔ na ɔɔ tɔmɩ̃, ⁶ ɔr gɩɩkɛ kɔɔ cʋɛ sɩnɩ dɩ sɩ do fãgadaraakɛ dɔnɩ bonɩ jidara Thãgbaraakɛ dɔnɩ ɔɔ Thɩ, dɔ ɔr n hɩ̃ i dʋbɩrɛ na fãga bɔɔ fɛʋ waa khorr vʋ̃ʋ. Amɛn. ⁷ Hɩnɛ a-n ɩnɛ na ndɔlɔ̃pana, dɩ tɩbɩla fɛʋ na yɩɩrɛ narakɛ wɩrɛ kɔɔ gʋɔnɩ na khalʋ, dɩ tibil caar fɛʋ thɩɩra na-n bɩrɛ ɔɔdara. Sobɔr gɩ thalera ga ha. Amɛn. ⁸ Mɛr dʋɔn Alfa na Omega, Kɔ̃tɩnɩkɛ dɔnɩ Thãgbaakɛ dɔnɩ fãga fɛʋʋ hɩ̃daar, kɛ hanɩle gɩrɛ, kɛ dakha kɔɔ hanɩle, kɛ na ɩnanɩ, mɛr sɔ. ⁹ Mɛr Jã anɩ omiikɛ buloni kha na nɛrɛ bɔ gaarɛ, na fãgadaar dɩɩ, nakha yɩrrɛ dɩɩ do asɩ bɩɛl dora na Jeju gɩ the, mɩ kɔɔ har yɔ dɩɩraakɛ wɩ-n wenɩ Patɩmɔsɩ gɩdonɩ Thãgbaa thɩmɩɩ na sobɔrɩkɛ dɔnɩ Jejuuda mɩ-n kɔɔ mɩɩ. ¹⁰ Thu Phuu kɔɔ ɩɩrna mɛr Kɔ̃tɩnɩ wi dɩ mɩ kɔɔ nɩrɛ nɔ khɩɩr ɩ̃ khiro dɩɩ ho mɔ̃ wɩ-n ʋnɩ tutuu, ¹¹ dɩɩ so ayɩ: Gɩrɛra fɩ yɩnɩ, khera gɩ sɛbɛra, a thɔna hana we gbɛbɩdaraa cɔ makonyɔɔkɛ hanɩ Efɛjɩ, na Sɩmɩrnɩ, na Pɛrgam, na Tɩatɩɩr, na Saardɩ, na Fɩladɛlfɩ, na Laʋdɩse. ¹² Dɩ mɩ kɔɔ kɩɩlɛ ɩ̃ hɩɩn wi dɔɔlera n mɩana mɩnɩ, dɩ ɔbɔɔkɛ mɩ kɩɩlnɩ, mɩ yɩrɛ dɔ carã dɛ̃ɛ paarɩkɛ dɔnɩ dɛdaa makonyɔ, ¹³ dɩ tibil hale a jɩɩl thɩ̃thɩɩn da-n hona tibili bikuun, a to kẽkẽ gbãa dɩɩ dã nɛɛ, sa khɩmɩ dɛ lo phɛrɛ kũkuno. ¹⁴ Ɔɔ yʋsũ bulolole phɩphɩphɩl a ho phũgə̃, a hona dakha mɩlɛ, sɩ ɔɔ yisɔ hʋrɛ dɔlɩnanɛ. ¹⁵ Ɔɔ nɛsɔ n carbararɛ mɔ̃kɛ the sɩɛ n hɩlnɩ dɔɔra, sɩ ɔɔ nɔ so pa ho yɔ jɔ helle. ¹⁶ Ɔɔ nyɔ̃bɔra ƴepələ̃be makonyɔ hale dɩ fʋrɔ, dɩ khalgbãakɛ n khɛnɩ bilə yenyɔ fɛʋ kɔɔ hale a thɩɩ nʋɔra, sɩ ɔɔ ƴɛ wer hʋrɛ mɔ̃ wire n carbaranɩ ʋlkhɔɔ. ¹⁷ Dɩ ɔbɔɔkɛ mɩ yɩɩnɩ mɩ jire ɔɔ ƴɛ thɩ̃thɩɩn a ho khire, sɩ a tha marɛ na nyɔ̃bɔɔ sa so ayɩ: Fa-n do maar n fʋ fa’. Mɛr dɔ cacadaar na pɩpɩɩdaar, ¹⁸ a dona yidaar. Mɩ kɔɔ khire, sɩ hɩnɛ mɩ hananɛ yire gɩrɛ waa khorr vʋ̃ʋ, dɩ mɛr n punone khir na khĩdi dɩɩ dakha. ¹⁹ Gɛr gɩ khera gɩrɛɛkɛra fɩ yɩnɩ, kɛ hanɩle gɩrɛ, na gɩrɛ na pɩrɔnɛnɩ na kpaan. ²⁰ Ado ƴepələ̃be makonyɔɔdaakɛ fɩ yɩnɩ ɩ̃ nyɔ̃bɔra gɩ, na dɔ carã dɛ̃ɛ paarɩkɛ dɔnɩ dɛdaa makonyɔɔda, thɩ̃ gbul gɩ, dɩ ga kɩr dʋɔn: Ƴepələ̃be makonyɔɔle dʋɔn thɔ̃thɔ̃daar thusɔɔkɛ hanɩ we gbɛbɩdaraa cɔ makonyɔ, sɩ dɔ carã dɛ̃ɛ paar makonyɔɔle dʋɔn we gbɛbɩdaraa cɔ makonyɔ.

¹ Khera thakɛ a hana thɔ̃thɔ̃daar thuukɛ dɔnɩ Efɛjɩ we gbɛbɩdaraada. Hɩnɛ gɩrɛɛkɛ ʋrɛɛkɛ fɔrɔnɩ ƴepələ̃be makonyɔ ɔɔ nyɔ̃bɔra, kɛ dɔnɩ ʋrɛ n kpaarɛnɩ dɔ carã dɛ̃ɛ paarɩkɛ dɔnɩ dɛdaa makonyɔɔ thɩ̃thɩɩn sonɩ ayɩ: ² Mɩ jɩrɛ afɩ thɩ̃ cʋʋ, na afɩ thɔ̃, na afɩ ha fʋ. Mɩ jɩrɛ mɔ̃ fa-n punoni a na bɔ kha na puu cʋʋdara ga. Wɩrɛ yɛnɩ thɔ̃thɔna ɩnɩ do sɩɩ do wa doa’, fɩ kɔɔ be wer bɩnɛ a hɩɩn a yɩɛ dɩɩ do sõsodara wɩ do. ³ Fɩ hananɛ ha fʋrɛ, fɩ kɔɔ fʋrɛ dakha haar bʋɔraakɛ fɩ kɔɔ gaarnɩ dɩɩ do ɩ̃ i dɔ nɔɔ sɩ fa kɔɔ vɔa’. ⁴ Sɩ sorɩkɛ mɩ hana fɩnɩ dʋɔn mɔ̃ fɩ faanɩ naʋʋkɛ fɩ kɔɔ hananɩ cacara. ⁵ Jɛna ka fɩ thenɩ ɓoɓo a thʋ̃ ji sa deba haar, a birə na cʋɛ afɩ caca thɔ̃, agado mɛ̃ ga, ma pɔ farɛ dɩ ma gbaar afɩ dɔ carã dɛ̃ɛ pa, agado haar fɩ deba’. ⁶ Sɩ gɩrɛ fɩ hananɩ wer dʋɔn mɔ̃ fɩ-n laarnɩ Nɩkolayɩtɩsɔɔ thɔ̃ khələlələ, kɛ dɔnɩ thɔmaakɛ mɛrɛɛ thɛthɛ n laarnɩ dakha. ⁷ Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. Ʋrɛɛkɛ na kəəneni, ma haarɛ hʋɛ dɩ na kho yi thɩrʋʋ biikɛ hanɩ hɩɩr paar Thãgbaa kal ƴɔɔ. ⁸ Khera thakɛ a hana thɔ̃thɔ̃daar thuukɛ dɔnɩ Sɩmɩrnɩ we gbɛbɩdaraada. Hɩnɛ gɩrɛɛkɛ ʋrɛɛkɛ dɔnɩ cacadaar na pɩpɩɩdaar, kɛ kɔɔ khenɩ sa bir ɩɩr a hana yire sonɩ ayɩ: ⁹ Mɩ jɩrɛ afɩ bɔ gaar na afɩ bɔdaar do phuphuphul, sɩɩ dorakɛ lẽledaar fɩ do. Mɩ jɩrɛ dakha i kʋɛrɛɛkɛ wɛkɛ yɛnɩ Juifisɔ ɩnɩ do n kʋɛ fɩnɩ, sɩɩ do wa do Juifisɔa’, Satã wɩ-n kpa jɛ a na fʋɔr. ¹⁰ Fa-n do maar n fʋ fɩ gɩrɛraakɛ fa gaarna’. Hɩnɛ Satã na cʋʋrɛ dι wa fʋlɛ ιkhasɔ anι thɩ̃thιιn a na to khaιra gι be nι bιnɛ gι hιιn, dι na gaarɛ bʋɔ wire yʋɔr. Dɔ sobɔ cʋʋdaar a danana khir dɩ fa ’lɛr ɩ̃ pa khorɩkɛ dɔnɩ yidaa. ¹¹ Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. Ʋrɛɛkɛ na kəəneni, balanyɔ khir na puno na cʋgʋʋ thɩ̃a’. ¹² Khera thakɛ a hana thɔ̃thɔ̃daar thuukɛ dɔnɩ Pɛrgam we gbɛbɩdaraada. Hinɛ gɩrɛɛkɛ ʋrɛɛkɛ hananɩ khalgbãakɛ n khɛnɩ bilə yenyɔ fɛʋ sonɩ ayɩ: ¹³ Mɩ jɩrɛ ka fɩ-n cɔnɩ, dɩ liir Satãa fãga too pa ha, sɩ fɩ fʋrɔrɛ ɩ̃ i. Ãtɩpasɩɩ bɔɔrakɛ, sɩ fa kɔɔ faa ha pɛrɛɛkɛ fɩ hana marna’. Ãtɩpasɩra sobɔ tibil a kɔɔ do mar da-n mɩɩ ɩ̃ dabɔ, dɩ wɩ kɔɔ kʋʋ anɩ ƴɛ thɩ̃thɩɩn kãkɛ Satã n cɔnɩ. ¹⁴ Sɩ dɩ pa ɩkhaakɛ mɩ yɩ farnɩ dʋɔn mɔ̃ ɩkhaa tibilsɔ hanɩ afɩ pa, dɩ wɩ bo dɩ wa-n ma Balamɩ dɩɩrra, kɛ dɔnɩ ʋrɛ kɔɔ dɩrɛnɩ Balakɩ dɩ pɛr bara paar Ɩjɩrayɛl bɩsanana dɩ wa kho thɩl thɩ̃ɛ, a na faana dakha dɩbara bɔdɛl cʋʋrɛra. ¹⁵ Mɛna gɩ ha gɩrɛ dakha, fɩ hananɛ tɩbɩla afɩ pa kɛ n bɔnɩ dɩ wa-n ma Nɩkolayɩtɩsɔɔ dɩɩrra. ¹⁶ Gɛr gɩ deba haar dɛ, ado mɛ̃ ga, ma pɔ farɛ kɔrɔ a na kɛ̃kɛrɛna wɩ na ɩ̃ nɔ khalgbã. ¹⁷ Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. Ʋrɛɛkɛ na kəəneni ma haarɛ maan kɛ keranɩ, ma haarɛ dakha boka bulo, dɩ boka bulolaalera i phaa na khere, kɛ tibil na jɩnɩ saagado ɔrkɛra ’lɛnɩ gaaga. ¹⁸ Khera thakɛ a hana thɔ̃thɔ̃daar thuukɛ dɔnɩ Tɩatɩɩrdaraada. Hɩnɛ gɩrɛɛkɛ Thãgbaa Bikuunikɛ ɔɔ yisɔ honɩ dɔlɩnanɛ, dɩ nɛɛ na-n carbara mɔ̃kɛ the sɩɛ n hɩlnɩ dɔɔra sonɩ ayɩ: ¹⁹ Mɩ jɩrɛ afɩ thɩ̃ cʋʋ, na afɩ naʋ, na afɩ ha pɛ, na afɩ thɔ̃ do, na afɩ ha fʋ, na afɩ nɛnɛ̃ thɔ̃ɔkɛ jɔnɩ mamadaa. ²⁰ Sɩ sorɩkɛ mɩ hana fɩnɩ dʋɔn mɔ̃ fɩ sɩnɩ khɛrraakɛ wɩ-n wenɩ Jejabɛl, kɛ yɛnɩ khɛ bobon ha nɩ, da-n dɩɩr da-n fɩɩlna ɩ̃ thɔ̃daarsɔ dɩ wa faa dɩbara bɔdɛl cʋʋrɛra, wa-n kho dakha thɩl thɩ̃ɛ. ²¹ Mɩ kɔɔ haarɛ bɔɔ dɩ a na debi haar, sɩ aa-n ƴaal a deba haar ɔɔ bɔdɛl cʋʋrara ga. ²² Fa yɩ gaa, ma tʋɔrɛ na kpɛɛ phɩ̃ paar sɩ ɩ̃ thɔnanaa bɔ gaarɛ, gɩ wabɩ na wɛkɛrara n phɩnanaanɩ dakha. agado haar wɩ debi a faa ɔɔ thɔ̃ɔlera ga. ²³ Ma cʋʋrɛ ɔɔ bɩsãsɔ dɩ wa khiir, dɩ we gbɛbɩdara fɛʋ na jɩrɛ dɩ mɛr dʋɔn bɩɛlɩkɛ n bəəreni tibili kpɩɛr na ɔɔ ha, dɩ ma ’laa narɛ fɛʋ bɩɛlbɩɛl thɩ̃ɛ mɔ̃ anɩ thɩ̃ cʋʋ hanɩ. ²⁴ Sɩ ado nɛrkɛ sɛnɩ Tɩatɩɩr, kɛ na-n tuonni ga dɩɩrɩla’, kɛ na jɛnɩ thɩ̃ dookɛ welela n wenɩ Satãa thɩ̃ hulõə’, ma gba heenda kpɩɩ na heen nɩ bã; ²⁵ sɩ gɩrɛ nɩ hananɩ, nɩ jɩɛ fʋ gɩ kĩkĩkĩ phaphapha ɩ̃ pɔ. ²⁶ Ʋrɛɛkɛ na kəəneni, kɛ dɔnɩ ʋrɛ fɔrɔnɩ ɩ̃ thɔ̃ a dana khu paar, ma haarɛ punone tibil caarra, ²⁷ dɩ ga ha mɔ̃kɛra mɩ ’lɛ gɩnɩ ɩ̃ Thɩɩ nyɔ̃kɔɔ, dɩ “ɔr na khɛ wɩ na the gbʋʋl, a na-n cɔ wɩ khʋma khʋma ce khaa”, ²⁸ dɩ ma haarɛ dakha dɩwɩl ƴepələ̃bire. ²⁹ Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra.

¹ Khera thakɛ a hana thɔ̃thɔ̃daar thuukɛ dɔnɩ Saardɩ we gbɛbɩdaraada. Hɩnɛ gɩrɛɛkɛ ʋrɛɛkɛ hɩnanɩ Thãgbaa Thu makonyɔ na ƴepələ̃be makonyɔ sonɩ ayɩ: Mɩ jɩrɛ afɩ thɩ̃ cʋʋ. A wɩ yɩ fɩ wɩ-n ka jɩna yidaar ha fɩ sɩɩ do fɩ khire. ² Jaga a cʋɛ gɩrɛ sɛnɩ sɩ dɩ ga-n jal khiir paar gɩ hana yire, gɩdonɩ ma yɩ afɩ thɔ̃ dɩɩ thʋ̃ bɔr a dã thu ɩ̃ Thãgbaa ƴɛra ga. ³ Jɛna gɩrɛ fɩ kɔɔ ’lɛnɩ a nɩɛna, dɩ na ɔ gar sa deba haar. A fa jaga, ma ɩnɛ yudaar khaa, dɩ fa jɩ bɔɔkɛ ma phuro fina’. ⁴ Sɩ ɩkhasɔ hale anɩ thɩ̃thɩɩn le Saardɩ, kɛ na kɔɔ biseneni awɩ kẽkẽsɔa’. Wɛr na-n ɩrɛ kha na mɛrɛ na kẽkẽ bulona gɩdonɩ wɩ teena gɛr. ⁵ Ʋrɛɛkɛ na kəəneni a na ’lɛr kẽkẽ bulo a na to, dɩ ma pɩɩn ɔɔ i yi sɛbɛra ga, sɩ ma caan ɩ̃ Thɩɩ ƴɛra na ɔɔ thɔ̃thɔ̃daar thusɔɔ ƴɛra nayɩ ɩ̃da a do. ⁶ Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. ⁷ Khera thakɛ a hana thɔ̃thɔ̃daar thuukɛ dɔnɩ Fɩladɛlfɩ we gbɛbɩdaraada. Hɩnɛ gɩrɛɛkɛ ʋrɛɛkɛ dɔnɩ daphuu na sobɔdaar, ʋrɛɛkɛ fɔrɔnɩ Davɩdɩɩ lakile, ʋrɛɛkɛ n khɛranɩ dɩ tibil na-n puno dɩ khaana’, kɛ dɔnɩ ʋrɛ n khaanɛnɩ dɩ tibil na-n puno dɩ khɛra’ sonɩ ayɩ: ⁸ Mɩ jɩrɛ afɩ thɩ̃ cʋʋ. Afɩ fãga na kpɛra’, sɩɩ do fɩ kɔɔ fʋrɛ ɩ̃ nɔ, fa kɔɔ bananɔ ɩ̃ iə’. Hɩnɛ mɩ faarɛ loo dɩɩ khɛr hoo afɩ ƴɛbʋrɔ, kɛ tibil na punoni na khaana’. ⁹ Hɩnɛ gɩrɛ ma cʋʋnɩ wɩrɛɛkɛ n kpanɩ jɛ a na fʋɔr Satã, kɛ n sõsonenɩ dɩ wɩ yɩ, Juifisɔ ha nɩ, sɩɩ do wa do Juifisɔa’, ma cʋʋ wɛr dɩ wa tha na thʋnɔ sɩ na gburõku far, dι wa jιrɛ dakha mι na fɛr. ¹⁰ Gιdonι fι kɔɔ fʋrɛ ɩ̃ nɔ a hana ha fʋrɛ, mɛrɛ dakha ma bɛr fɛr bɔ gaar bɔɔkɛ na ιnanι na gba thιιkɛ koo gι be tιbιla bιnɛ gι hιιn. ¹¹ Ma ιnɛ kɔrɔ. Jιɛ fʋ gιrɛ fι hananι kĩkĩkĩ, dι mɛ̃ tibil na taa far khorιkɛ fa ’lɛna’. ¹² Ʋrɛɛkɛ na kəəneni ma cʋgʋʋrɛ dɩ na do thɩkarʋ cʋɔrraakɛ dɔnɩ ɩ̃ Thãgbaada, dɩ a na the le bã. Ma gbaar ɩ̃ Thãgbaa i a na khereraa, na ɩ̃ Thãgbaa dɩɩ i, kɛ dɔnɩ Jerujalɛm phaakɛ thɛnɩ ɩ̃ Thãgbaa pa ƴũ a gbũ, ɩ̃ kherenanaa dakha ɩ̃ i pha. ¹³ Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. ¹⁴ Khera thakɛ a hana thɔ̃thɔ̃daar thuukɛ dɔnɩ Laʋdɩse we gbɛbɩdaraada. Hɩnɛ gɩrɛɛkɛ ʋrɛɛkɛ dɔnɩ Amɛn, a dona sobɔ so jɩdaar bʋɔ, a dona Thãgbaa thɩ̃ tinə fɛʋʋ the pa sonɩ ayɩ: ¹⁵ Mɩ jɩrɛ afɩ thɩ̃ cʋʋ. Fa ɩa’, fa kpora’; mɩ-n ƴaalɛ fɩ ie agɩbo fɩ kpor. ¹⁶ Sɩ gɩdonɩ fɩ har bɔnɔnɔnɔ, fa ɩa’, fa kpora’, ma kpee fer na faa. ¹⁷ Gɩdonɩ fɩ sor ayɩ, fɩ ler aa, thɩ̃ɛ fɩ ’lɛ a le, dɩ dakha wo thɩ̃ɛ na-n ɓɔr fa’, sɩɩ do fa jɩ dɩ fɛrɛ, fa do tibiləə ga, bɔ kʋ tibil ha fɩ, fɩ dor dakha bɔdaar bulo, a dona yaarʋ, a hanana sãɓɔlɔ̃. ¹⁸ Gɛr gɩ mɩ-n ha fɛr fɩlɛ, a fɩ jɩ thɛ mar dɛɛkɛ wɩ thiini dɔɔ dɩɩ bɔr, mɛ̃ fa debi na do lẽledaar dɩphã; na kẽkẽ bulo dakha fɩ to fɩ kɛɛna yicuru, tibil na yɩ afɩ sãɓɔlɔ̃a’; na dakha wo yi thɩɩkɛ fa pɛnɩ yiro fɩ puno fa-n yɩ. ¹⁹ Mɛrɛ, wɩrɛ fɛʋʋkɛ mɩ-n nanɩ wɛr mɩ-n nɩna dɩ paar dɩ ma-n wɛbɩna wɩ. Gɛr gɩ hanana ƴaalɛ jɔɔ a deba haar. ²⁰ Hɩnɛ, mɩ hakɛ a jɩɩl lõfonɔɔ dɩ ma-n be. Ado tibil nɩ ɩ̃ nɔ, a khɛr mɩ loo, ma lʋʋn na too ntɛɛ pa sa-n kho kha dɩkɔ. ²¹ Ʋrɛɛkɛ na kəəneni ma haarɛ hʋɛ da too kha na mɛrɛ ɩ̃ fãga too para, mɔ̃kɛ mɛrɛ dakha kəəni sa too gɩrɛ na ɩ̃ Thɩ ɔɔ fãga too para. ²² Ʋrɛɛkɛ hananɩ nũu, dɔ a na-n nɩ gɩrɛɛkɛ Thʋ Phuu n sonɩ we gbɛbɩdarasɔra.

¹ A gele pɩ, mɩ-n kɔɔ hɩɩnɛ dɩɩ do lõfonʋɔ gɩ a khɛr Thãgbaa dʋɔ, dɩ caca nʋɔɔkɛ mɩ kɔɔ nɩɛnɩ dɩ a-n mɩɩna mɩ a ho tutuu ʋʋn gɩ so marɛ ayɩ: Jʋnɛ kɛ, ma nɩ farɛ gɩrɛ teananɩ gɩ dana bɔɔraakɛ na kpaanɛnɩ. ² Dapaara Thu Phuu kɔɔ ɩɩrna mɛr dɩ ɩ̃ yɩ fãga too paar dɩɩ hale Thãgbaa dʋɔ, dɩ tibil hale a too fãga too paarraalera. ³ Dɩ ʋrɛɛkɛra kɔɔ tɔɔrɔnɩ n carbararɛ jasɩpɩ boka khaa na sardʋan boka khaa, kɛ dɔnɩ bokanaakɛ khiinoni the nʋɔ ka, dɩ thãgba khalʋ kɔɔ hale a dii fãga too paarraalera dɩ a-n hona emərodi bokaarɩkɛ khiinoni dakha the nʋɔ ka. ⁴ Dɩ fãga too pa kpelẽ yenã hale a dii fãga too paarraalera, dɩ kɔ̃tɩna kpelẽ yenã hale a too fãga too paarsɔrara, a to kẽkẽ bulona, a suunə dɛ fãgadaar kpɩɛr yʋɔ. ⁵ Dɩ thãgba jʋ khor, na nɔ khena, na thãgba tiire n ther le fãga too paarraalera; dɩ lãphã makonyɔ hale a do dɔ haar dɩ ga-n le fãga too pa ƴɩɛraalera, gɛr dʋɔn Thãgbaa Thu makonyɔ. ⁶ Dɩ fãga too pa ƴɩɛraalera thɩ̃ɛ hale dɩ ga-n hona lanyʋɔn wɩwɩwɩl sa ho hɩɩnʋ. Dɩ fãga too pa thɩ̃thɩɩn thɩ̃ ye yenã hale a diiro, dɩ yinə hire awɩ tomɩra ƴɛbʋrɔ na khiru fɛʋ. ⁷ Caca thɩ̃ yire hor sidũ’ũu, balanyɔ thɩ̃ yire ho na ɓolʋ, balãther thɩ̃ yire hana tibil ƴɩɛ, sɩ balanã thɩ̃ yire ho gbʋɔrɛɛkɛ n dɩɛnnɩ. ⁸ Dɩ thɩ̃ ye yenãale bɩɛlbɩɛl hananɛ gbɛla maadõ maadõ, wɩ hinəne yinə bɩnɔ na tomɩrra dakha, dɩ wa hana pɩrrɛ kpɩɩ dɩwɩlʋ na dɩtɩnɔa’, sɩ mɛ̃ wɩ-n so aa: “Daphuu, daphuu, daphuu, Thãgba Kɔ̃tɩnɩkɛ dɔnɩ fãga fɛʋʋ hɩ̃daar do, kɛ kɔɔ hanɩle, kɛ hanɩle gɩrɛ, kɛ na ɩnanɩ.” ⁹ Dɩ ɔbɔɔkɛ thɩ̃ yeele n dʋbɩnɩ ʋrɛ tɔɔnɩ fãga too paar, kɛ hɩnanɩ yire bɔɔ fɛʋ waa khorr vʋ̃ʋ, dɩ wa-n kpãganaa, dɩ wa-n khɩɩnaa, ¹⁰ kɔ̃tɩna kpelẽ yenãale gburõkure ʋrɛraakɛ tɔɔnɩ fãga too paarraale ƴɩɛra, dɩ wa-n fʋɔr ɔrkɛra hɩnanɩ yire bɔɔ fɛʋ waa khorr vʋ̃ʋ, dɩ wɩ phubire awɩ fãgadaar kpɛsɔ a kpɛɛ fãga too pa ƴɛ thɩ̃thɩɩn sɩ wa-n so: ¹¹ Asɩ Kɔ̃tɩ̃ na asɩ Thãgba wei, fɛr teana a na ’lɛ i dʋbɩrɛ, na cʋʋr, na punone; gɩdonɩ fɛr kɔɔ te thɩ̃ɛ fɛʋ, dɩ afɩ tuur dɔ nɔɔ dɩ gɩ hale gɩrɛ a hana yire.

¹ Dɩ mɩ yɩrɛ sɛbɛ dɩ ʋrɛɛkɛ tɔɔnɩ fãga too paar thɛbɩ na nyɔ̃bɔɔ, dɩɩ khere bɩnɔ na jɩɛra fɛʋ, dɩ jena makonyɔ hale a dʋrɔ dɩɩ do gɛr khaanɛ gɩ. ² Dɩ mɩ yɩrɛ thɔ̃thɔ̃daar thuukɛ hananɩ fãga dɩɩ və̃vĩə, dɩ hulẽ nʋɔ dɩɩ khɩɩr ka ayɩ: Amɛ teana a na cʋɔr jɩɩnsɔɔle dɩ sɛbɛɛle na phubi? ³ Dɩ tibil bɩɛllakɛ na hale Thãgbaa dʋɔ, dɩ thɩɩra gɩ, dɩ thɩɩraakɛ tɩɛr gɩ, a na puno na phubi sɛbɛra ga, a na puno dakha wo a na hɩɩna’. ⁴ Dɩ mɩ kɔɔ khɩɩrɛ jɔɔ ka gɩrɛraakɛ tibil na yɩnɩ, kɛ teananɩ a na phubi sɛbɛra agɩbo a hɩɩna’. ⁵ Sɩ kɔ̃tɩ̃ bɩɛl kɔ̃tɩnanaalera so marɛ ayɩ: Fa-n khɩa’. Hɩnɛ sidũ’ũukɛ thɛnɩ Judaa cara, a dona Davɩdɩɩ məl, ɔr kəəne a na cʋɔr jena makonyɔɔlera sɩ na phubi sɛbɛra. ⁶ Dɩ mɩ yɩrɛ fãga too pa thɩ̃thɩɩnɩle, na thɩ̃ ye yenãale, na kɔ̃tɩnaa thɩ̃thɩɩn, Bana bii dɩ jɩɩl le sa ho mɔ̃ wɩ kʋʋnɩ, sɩ a hananɛ ʋma makonyɔ na yinə makonyɔɔkɛ dɔnɩ Thãgbaa Thu makonyɔ, kɛ a thɔnɩ thɩɩraakɛ koo. ⁷ Dɩ a pɔr, a tee sɛbɛɛle olelaalera hana gɩnɩ a fʋrɔ nyɔ̃bɔɔra a toona fãga too paarra. ⁸ Ɔbɔɔkɛ a teenɩ sɛbɛɛle pɩ, thɩ̃ ye yenãale, na kɔ̃tɩna kpelẽ yenãale gburõkure Bana bɩɩ ƴɛ thɩ̃thɩɩn; wɛr fɛʋ bɩɛlbɩɛl kɔɔ fʋrɔrɛ salãa na dɛ bilẽse dɩɩ hinə latɩkolookɛ dɔnɩ tɩɩ phuusɔɔ Thãgba bɩɛl. ⁹ Dɩ wɩ khɩnɛ nɩ phaakɛ sɔnɩ ayɩ: Fɛr teana fɩ tee sɛbɛra fɩ cʋɔr dakha jɩɩnsɔ, gɩdonɩ wɩ kɔɔ kʋ fɛr dɩ fɩ gba afɩ tɔmɩ̃ a birsena tɩbɩla, caarra fɛʋ, na thɩmɩɩrra fɛʋ, na tɩbɩla fɛʋʋ thɩ̃thɩɩn, na ca kpalala fɛʋ a ha Thãgba. ¹⁰ Fɩ cʋʋ wɛr dι wι do fãgadaraakɛ dɔnι bonι jidara asι Thãgbara, dι wa dor fãgadara thιιra. ¹¹ Dι mι-n kɔɔ hιιnɛ a nιɛ thɔ̃thɔ̃daar thu jɔjʋɔɔ wi, kɛ awι ther nɔ kanιkɛ gbιlanι der paar gbιlanι, wι thʋnɛ və̃vĩə, a dii fãga too paarra, na thɩ̃ yera na kɔ̃tιnanaale, ¹² dι wι so na nɔ kheu ayι: Bana biikɛ wι kɔɔ kʋnι a teenanɛ a ’lɛ punone, na ler, na kpɛsɛrɛ, na fãga, na cʋʋr, na i dʋbιrɛ, na khιιrɛ. ¹³ Dɩ thɩ̃ tinəne fɛʋʋkɛ hanɩ Thãgbaa dʋɔ, na thιιra, na thιιraakɛ tιɛr, na lanyʋɔnna, na thɩ̃ɛ fɛʋʋkɛ harɔnι bιnɔ, mι nιɛrɛ dι wele fɛʋ na-n so ayι: Ʋrɛ tɔɔnι fãga too paar na Bana bii, dɔ ɔr n hɩ̃ khιιrɛ, na cʋʋr, na i dʋbιrɛ, na fãga bɔɔ fɛʋ waa khorr vʋ̃ʋ. ¹⁴ Dι thɩ̃ ye yenãale dee aa: Amɛn. Dι kɔ̃tιnaale gburõku dι wa-n fʋɔr.

¹ Dι mι yιɛrɛ ɔbɔɔkɛ Bana bii kɔɔ cʋɔrnι caca jιιn jena makonyɔraale, mι nιɛrɛ thɩ̃ yi bιɛl thɩ̃ ye yenanaale dι so nʋɔ dιι ho thãgba phɛɛrɛ ayι: Ɩna. ² Dι ma hιιn dιι do gãgo bulo gι a the, dι ʋrɛ kɔɔ jʋnɛɛnι kɔɔ hananɛ thaa na tʋʋ, dι wι haarɛ fãgadaar kpιɛr dι a ther mɔ̃ a donι kəkəədaar a ’lɛ kəəre. ³ Dι ɔbɔɔkɛ a cʋɔrnι balanyɔ jιιn, mι nιɛrɛ balanyɔ thɩ̃ yire dι so: Ɩna. ⁴ Dι gãgo sιɛ khəkhəkhə ther, dι ʋrɛ jʋnɛɛnι kɔɔ ’lɛr punone a na tinə ha ιι thιιra na faa, dι mɛ̃ tιbιla na-n kʋʋr kha; dι a ’lɛr dakha bajιna kɔ̃tɩ̃ι. ⁵ Dι ɔbɔɔkɛ a kɔɔ cʋɔrnι balãther jιιn, mι nιɛrɛ balãther thɩ̃ yire dι so ayι: Ɩna. Dι ma hιιn a yι gãgo biru, dι ʋrɛ jʋnɛɛnι fʋrɔrɛ thɩ̃ mιɛdaa ɔɔ nyɔ̃kɔɔ. ⁶ Dι mι nιrɛ nʋɔ dιι the thɩ̃ ye yenãa thɩ̃thιιnιle a so ayι: Jʋ mιɛ nɔ bιɛl, gɛr dɔ wi bιɛl thɔ̃ lιmιnɛ; ɔljʋ mιɛ nʋɔ yẽther, gɛr dɔ wi bιɛl thɔ̃ lιmιnɛ; sι niin wer na taan, fa-n cʋʋrɔ thɩ̃a’. ⁷ Dι ɔbɔɔkɛ a kɔɔ cʋɔrnι balanã jιιn, mι nιɛrɛ balanã thɩ̃ yire dι so ayι: Ɩna. ⁸ Dι ma hιιn a yι gãgʋʋkɛ hanι phʋaphʋa, dι ʋrɛ jʋnɛɛnιι i n dʋɔn khir, dι khĩdi dιι na-n kpaaraa sιkaar, dι wι ’lɛr punone a na gbana bajιna, na kɔmɛr, na kho puu, na hɔ̃ nʋma thιιra a na bũburona tιbιla thι phɛrɛ yenana bιɛlbιɛl. ⁹ Dι ɔbɔɔkɛ a kɔɔ cʋɔrnι balamɔι jιιn, mι yιrɛ tιbιlaa thusɔ bonι ji pa ballɔ, kɛ dɔnι wιrɛ wι kɔɔ kʋʋrnι Thãgbaa sora, na awι sobɔdaar doraakɛ wι jιιlnι. ¹⁰ Dι wι hulene dιι khιιr ka ayι: Kɔ̃tιn, daphuu na sobɔdaar, ka ga dã sι fa kιιl kιιlʋ a na tiir asι tɔmɩ̃ hel thιdarara? ¹¹ Dι wɛr fɛʋ bιɛlbιɛl ’lɛr kẽkẽ bulo gbana a to, sι dι wι so war ayι, wι tɔɔ ɓo cɔcɔcɔ phaphapha wιrɛ dɔnι thɔ̃ dona awι kha, na awι omisɔɔkɛ wa kʋʋrnι awι kha, awι nɔ n dã ɓo. ¹² Dɩ mɩ yɩɛrɛ ɔbɔɔkɛ a kɔɔ cʋɔrnɩ maadõ jɩɩn, thɩ jɩɩn kɔɔ hale a kɔ̃tɩ̃ ka, dɩ wire debire a biiro tĩtĩtĩ a ho bʋ bir lokaar, dɩ por biləni debi a sɩɛrɔ a ho tɔmɩn. ¹³ Dɩ ƴepələ̃be na-n jɛ thɩɩra, mɔ̃kɛ jɩɛ na-n və̃viləni thɩr khonanɛ dɩ bi pholoo na-n jɛ. ¹⁴ Dɩ thãgbara ƴũ pur kʋla kʋla mɔ̃ wɩ-n purni dɛbɛ, dι gɔ̃gɔnasɔ fɛʋ na yɔ dιιsɔ fɛʋ kɔɔ əəle a ha dιkhãa pa. ¹⁵ Dι le fãgadara thιιra, na kɔ̃tιnasɔ, na sɔrasɛɛ kɔ̃tɩ̃sɔ, na lẽledara, na fãga hɩ̃dara, na dea ɓibi, na waιasɔ n wɔ̃ wιwιl kanana na boka kɔ̃tɩ̃ ballɔsɔɔkɛ hanι gɔ̃gɔnana; ¹⁶ sι wa-n so gɔ̃gɔnana na boka kɔ̃tιnana ayι: Nι je the sarrakɛ a phe sι, sι hʋnɔna ʋrɛɛkɛ tɔɔnι fãga too paar na Bana bii nĩkhirə. ¹⁷ Gιdonι awι nĩkhi wi kɔ̃tɩ̃ phaan, dι ʋmɔ̃ hale na jιιl?

¹ A gele pι, mι yιrɛ thɔ̃thɔ̃daar thu yenã dι wι jιιl thι khu paar yenã, sa fʋ jιɛ yenãakɛ n thɛnι thιιra a fʋrɔ, dι mɛ̃ jιɛ na-n the thιιra, dι lanyʋɔnna gι, dι thιr bιɛlla gιraka’. ² Dι ɩ̃ bir yι thɔ̃thɔ̃daar thu kpιι wo dι the wi phã paar da-n jʋʋn, a fʋrɔ Thãgba yidaarι jẽ pɛda sa hulẽ nʋɔ dιι khιιr ka thɔ̃thɔ̃daar thu yenanaale kɔɔ ’lɛnι hʋɛ a na cʋʋna thιι puure na lanyʋɔn, ³ a so ayι: Na-n cʋʋ thιιra puure na lanyʋɔn pa’, dι thιra ga, phaphapha sι pɛ asι Thãgbaa thɔ̃darasɔra jιιn kobera ɓo. ⁴ Dι mɩ nɩrɛ wɩrɛ wɩ pɛrnɩ jɩɩnnaa nɔ dɩ wɩ yɩ tɩbɩla gbɩlanɩ tamaa na kpalanyɔ na gbɩlanɩ yenã wɛ, kɛ thɛnɩ Ɩjɩrayɛl bɩsanaa cara fɛʋ bɩɛlbɩɛl. ⁵ Judaa cara, gbɩlanɩ yʋɔr yenyɔ wɩ dʋrɔ jɩɩnna, Rubɛnɩ cara, gbɩlanɩ yʋɔr yenyɔ, Gaadɩɩ cara, gbɩlanɩ yʋɔr yenyɔ, ⁶ Ajɛɛrɩ cara, gbɩlanɩ yʋɔr yenyɔ, Nɛfɩtalɩɩ cara, gbɩlanɩ yʋɔr yenyɔ, ⁷ Manasee cara, gbɩlanɩ yʋɔr yenyɔ, Sɩmɛ̃ʋʋ cara, gbιlanι yʋɔr yenyɔ, Levιι cara, gbιlanι yʋɔr yenyɔ, ⁸ Ɩsakaarι cara, gbιlanι yʋɔr yenyɔ, Jabʋlɔ̃ɔ cara, gbιlanι yʋɔr yenyɔ, Jojɛfιι cara, gbιlanι yʋɔr yenyɔ, Bɛ̃jamɛ̃ɛ cara, gbιlanɩ yʋɔr yenyɔ, wɩ dʋrɔ jɩɩnna. ⁹ A gele pɩ mɩ-n kɔɔ hɩɩnɛ dɩɩ do tibil jɔ wɛ tə̃tə̃tə̃, kɛ tibil na punoni na thera’, a the ca kpalala fɛʋ, na caarra fɛʋ, na tɩbɩla fɛʋʋ thɩ̃thιιn, na thɩmɩɩrra fɛʋ, dɩ wa-n jɩɩl fãga too pa ƴɩɛra na Bana bii ƴɛ thɩ̃thɩɩn, a to kẽkẽ bulo gbana sa fʋrɔ kalã jɛ̃ɛ nyɛɛna. ¹⁰ Dɩ wɩ-n hulene nɔ khena ayɩ: Asɩ Thãgbaakɛra tɔɔnɩ fãga too paar, ɔrra taarɛ n the na Bana biirə. ¹¹ Dɩ thɔ̃thɔ̃daar thusɔ fɛʋ jɩɩlɛ a dii fãga too paarra, na kɔ̃tɩnana, na thɩ̃ ye yenana, a gburõku fãga too pa ƴɩɛra dɩ wa-n fʋɔr Thãgba, ¹² dɩ wa-n sona ayɩ: Amɛn. Khɩɩrɛ, na i dʋbɩrɛ, na kpɛsɛrɛ, na fʋɔrɛ, na cʋʋr, na punone, na fãga, asɩ Thãgba hɩna bɔɔ fɛʋ waa khorr vʋ̃ʋ. Amɛn. ¹³ Dɩ kɔ̃tɩ̃ bɩɛl kɔ̃tɩnanaale bule mi ayɩ: Welela tɔnɩ kẽkẽ bulo gbana, ana wɛ dɩ ka wɩ the? ¹⁴ Dɩ ɩ̃ sʋʋraa: Ɩ̃ kɔ̃tɩ̃ ya mee fɛr ka jɩ gɩ. Dɩ a so marɛ ayɩ: Wɛr dʋɔn tɩbɩlaakɛ thɛnɩ bɔ gaar kɔ̃tɩɩnaale; wɩ kɔɔ cɔcɔɔrɛ awɩ kẽkẽsɔ a cʋʋ gɩ na Bana bii tɔmɩ̃ dɩɩ bulolo. ¹⁵ Gɛr dɔ kɩrʋ dɩ wɩ ha Thãgbaa fãga too pa ƴɩɛra, dɩ wa-n dʋʋraa thɔma dɩwɩlʋ na dɩtɩnɛ ɔɔ cɔra; dɩ ʋrɛɛkɛ tɔɔnɩ fãga too paarra na dʋrɛ ɔɔ wa na thi war. ¹⁶ Kɔmɛr na fʋ wɩ bã, yɔlkhaa na fʋ wɩ bã, dɩ ɩtʋɛ na dakporuu na ’lɛ wɩ dakha bã. ¹⁷ Gɩdonɩ Bana biikɛ hanɩ fãga too pa thɩ̃thɩɩn na-n khɛ wɩ a thɔɔ wɩ a na-n jalna yi yɔ bu kanana, dɩ Thãgba na pɩɩnɛ yilẽbe fɛʋ awɩ yirə.

¹ Ɔbɔɔkɛ Bana biirə kɔɔ cʋɔrnɩ makonyɔ jɩɩn, pɩrrɛ kɔɔ hale Thãgbaa dʋɔ a cʋ lɩɛr kuru. ² Dɩ mɩ kɔɔ yɩrɛ Thãgbaa thɔ̃thɔ̃daar thu makonyɔɔkɛ n jɩlɛnɩ Thãgbaa ƴɛra, dɩ wɩ ’lɛr tutuu makonyɔ. ³ Dɩ thɔ̃thɔ̃daar thu kpɩɩ pɔr a jɩɩl bonɩ ji pa kɩrɔ, a hana latɩkolo ’wiidaakɛ wɩ cʋʋnanɩ dɛ; dɩ a ’lɛr latɩkolo jɔɔ a gba a na-n ’laa, nakha tɩɩ phuu fɛʋʋ Thãgba bɩɛl, dɛ bonɩ ji paarraalera hanɩ fãga too pa ƴɩɛra. ⁴ Dɩ latɩkoloolee isi gbɛbɩnanɛ tɩɩ phuusɔɔ Thãgba bɩɛl a the thɔ̃thɔ̃daar thuulee nyɔ̃kɔɔ, dɩ ga-n jʋʋn Thãgbara. ⁵ Dɩ thɔ̃thɔ̃daar thuule gbaar latɩkolo ’wiidaale a ti bonɩ ji dɔɔ pɛr dɩɩ hi, dɩ dʋna faa thɩɩra, dɩ thãgba tiire kɔɔ hale na nɔ khena, na thãgba jʋ khor na thɩ jɩɩn. ⁶ Dɩ thɔ̃thɔ̃daar thu makonyɔɔkɛ fɔrɔnɩ tutuu makonyɔ kɔɔ gbɛbɩrɛ ʋ̃ ʋ̃ gbɛbɩrʋʋ. ⁷ Dɩ cacadaar kɔɔ ʋnɛ ɔɔ tutuu, dɩ thãgba bara hale na dɔɔ a nyanyaana tɔmɩn dɩ ga-n cʋr thɩɩra, dɩ thɩ phɛrɛ bɩɛl thɩ phɛrɛ yẽtherra kɔɔ hɩnɛ koo, dɩ thɩr der pa bɩɛl der paar yẽtherra kɔɔ hɩnɛ dakha, dɩ hɔ̃ ƴolosɔ fɛʋ kɔɔ hɩnɛ. ⁸ Dɩ balanyɔ thɔ̃thɔ̃daar thu kɔɔ ʋnɛ ɔɔ tutuu, dɩ dɩkha gɩ, a ho gɔ̃gɔ̃ kɔ̃tɩ̃ɩ, a do dɔ haar, a əl ji lanyʋɔnna, dɩ lanyɔ̃ phɛrɛ bɩɛl yẽtherra debi a do tɔmɩn. ⁹ Dɩ thɩ̃ tinə der pa bɩɛl der paar yẽtherra, kɛ hanɩ lanyʋɔnna a do yidara kɔɔ khiire, dɩ bato kɔ̃tĩ jɛ pa bɩɛl jɛ paar yẽtherra kɔɔ wɩɛlɛ fɛʋ. ¹⁰ Dɩ balãther thɔ̃thɔ̃daar thu kɔɔ ʋnɛ ɔɔ tutuu, dɩ ƴepələ̃bi kɔ̃tɩ̃ɩ gɩ, a hana dɔɔ dɔlɩna khaa, a the ƴũ, a ji mɩɩr phɛrɛ bɩɛl mɩɩr phɛrɛ yẽtherra na yɔ bu kanasɔra. ¹¹ Ƴepələ̃biree iilera n dʋɔn Dakhaa, dɩ yɔ ɓɛl bɩɛl yɔ kuur paar yẽtherra debire a khar kpakpakpa, dɩ tibil jɔjʋɔ kɔɔ khiire, dɩɩ do nyʋɔnɩlera debanɩ a khar dɔ nɔɔ. ¹² Dɩ balanã thɔ̃thɔ̃daar thu kɔɔ ʋnɛ ɔɔ tutuu, dɩ thɩ̃ɛ kɔɔ cʋʋrɛ wi ɓɛl bɩɛl ɓɛl paar yẽtherra, na po ɓɛl bɩɛl daɓɛla yẽtherra, na ƴepələ̃bi der pa bɩɛl der paar yẽtherra, dɩ ga ɓɛlsɔɔle fɛʋ debire a birə, dɩ dɩwɩl ɓɛl bɩɛl ɓɛl paar yẽtherraa dahɩrɛ bure, mɛna gɩ ha dakha na dɩtɩnɛ. ¹³ Dɩ mɩ-n kɔɔ hɩɩnɛ a nɩɛ dɩ gbʋɔrɛ ubi da-n ka thãgbara ƴũ fii, sɩ da-n so nɔ khɩɩr ayɩ: Ga puurore, ga puurore, ga puure thɩdarara ɔbɔɔkɛ thɔ̃thɔ̃daar thu yẽtherɩkɛ sɛnɩ na ʋnɩ awɩ tutuu.

¹ Dɩ balamɔɩ thɔ̃thɔ̃daar thu kɔɔ ʋnɛ ɔɔ tutuu, dɩ ɩ̃ yɩ ƴepələ̃bireekɛ kɔɔ thɛnɩ ƴũ a ji thɩɩra, a ’lɛ thɛrɛ ’lee kõkor lakile. ² Dɩ a gbaar a khɛrna thɛrɛ ’lee kõkorʋra, dɩ isiir the le dɩ ga-n jʋʋn a ho dɔ kɔ̃tɩ̃ isiir, dɩ wire na jɩɛ birəre kõkor isiirraale. ³ Dɩ toosõosɔ kɔɔ ther isiirraale a bɩ̃bɩlã thɩɩra, dɩ wɩ kɔɔ ’lɛr punone dɩɩ mãkhana punoneekɛ lana thɩɩra n hananɩ. ⁴ Dɩ wɩ kɔɔ so warɛ ayɩ, wa-n cʋʋ hʋɔn thɩɩra thɩ̃ɛ, dɩ thɩ̃ɛɛkɛ phonɩ gɩ, dɩ thɩra ga, sɩ tɩbɩla dɩbara, kɛ na hananɩ Thãgbaa jẽ awɩ kobirə ga. ⁵ Wa kɔɔ ’lɛ hʋɛ a na kʋ tibilə’, sɩ kpoore wa kpoo war a na cʋʋna pora yemɔɩ; dɩ kpooreekɛra wa kpoo warnɩ mɔ̃ laan n thanɩ tibil dɩ a-n khʋʋ, mɛ̃ ga ha. ⁶ Ga bɔɔle tιbιla na-n ƴaalɛ khir sι wa yι ga; khi thue na fʋ wɛr, sι khir na car sι na sι war. ⁷ Toosõosɔɔle hʋrɛ gãgʋʋsɔɔkɛ wι-n gbɛbιnι wι jalna kʋʋr. Wɩ subire thɩ̃ɛɛkɛ hɔnɩ dɛ fãgadaar kpɩɛr awɩ yʋɔ, sɩ awɩ ƴɛ ho tibil ƴɩɛ. ⁸ Wɩ hananɛ yʋsuune dɩɩ ho khɛraa yʋsũ, sɩ awɩ nyɩ̃ ho sidũ’ũ nyιma. ⁹ Dι wι hananɛ dakha kũkũ kɛɛdaa dιι ho thɛ dι wι kɛɛ, dι awι gbɛl n helle mɔ̃kɛ gãgo hotoro jɔjʋɔ n canι lõ kʋʋrra dι a-n tii. ¹⁰ Wι hananɛ sʋʋ dιι ho lã sʋʋ a hana tha paar cιba cιba, dι awι sʋraalera awι puno ha, kɛ wa-n cʋʋnanι tιbιla puure gι dana pora yemɔι. ¹¹ Awι fãgadaarιkɛ dɔ warnι yʋʋ dʋɔn thɛrɛ ’lee kõkorʋʋ thɔ̃thɔ̃daar thu. Ɔɔ i na ebirə thιmιιr n dʋɔn Abadɔ̃, sι gιrɛkι thιmιιr wι-n wena Apolιyɔ̃; i kιrʋ dʋɔn gbõgolõdaar. ¹² Caca puu ’lɛr kar, sι agιpι yenyɔ puu ’lɛr hale wo a na kpaan. ¹³ Dι thɔ̃thɔ̃daar thu maadõdaar kɔɔ ʋnɛ ɔɔ tutuu, dι ɩ̃ nιɛ nʋɔ dιι the dɛ bonι ji paar ʋma yenana, kɛ hanι Thãgbaa ƴɛra, ¹⁴ a so thɔ̃thɔ̃daar thu maadõdaarraakɛ hananι tutuu ayι: Thʋba thɔ̃thɔ̃daar thu yenãakɛ wι lini Efιratι mιιr kɔ̃tιιna a faa. ¹⁵ Dι wι kɔɔ thʋbιrɛ thɔ̃thɔ̃daar thu yenãale kɛ gbɛbanι pι ga lιɛrraale, na ga wirəəle, na ga poraale, na ga yɛraale, wι kʋrɛ tibil der pa bιɛl der paar yẽtherra. ¹⁶ Dι awι sɔrasιsɔɔkɛ tɔɔnι gãgʋʋsɔra kɔɔ har gbιlanι der paar gbιlanι ɔɔ der pa taanyɔ. Thale mι kɔɔ nιɛ dι wι ha. ¹⁷ Ɩ̃ thɩ̃ nιrɔra thakɛ mι kɔɔ yι gãgʋʋsɔ na wɩrɛ jʋnɛ wɩnɩ dɩ wɩ ha: Wɩ kɔɔ hananɛ kũkũ kɛɛda sɩɛsɔ dɩɩ ho dɔɔ, na dathʋ̃phʋaasɔ, na dodaasɔɔkɛ hɔnɩ girbi. Sɩ gãgʋʋsɔɔ yʋʋle hor sidũ’ũ yʋʋ, sɩ dɔɔ na-n the awɩ nɔɔ, na isiir, na girbi. ¹⁸ Dɩ tibil der pa bɩɛl der paar yẽtherra kɔɔ khiire thɩlkena yẽtherraale kɛ dɔnɩ dɔɔ, na isiir, na girbi, kɛ n thɛnɩ gãgonaalee nɔɔ. ¹⁹ Gɩdonɩ gãgʋʋsɔɔlee puno, awɩ nɔra gɩ ha na awɩ sʋra. Awɩ sʋ hor siisɔ, a hana yʋʋ, dɩ gɛrra wɩ-n cʋʋna puurera. ²⁰ Sι tibil ƴιrɛ sɛnι, kɛ thιlke caale na kʋna’, wa-n debi haarrakɛ sι wι faa gιrɛ awι nyɛ̃ n cʋʋna’, na mɔ̃ wι-n fʋɔrnι kɔ̃tɛɛbiisɔa’, na thιlaakɛ dɔnι dɛ na dɛ buloə’, na thɛ na bokana ga, na thιra ga, kɛ na hananι yire dɩ wɩ yɩna ga, dɩ nũu gɩ dɩ wɩ nɩna ga, dɩ nɛɛ gɩ dɩ wɩ ɩɩrna ga. ²¹ Wa-n debi haar dakha sɩ wɩ faa awɩ tɩɩ kʋa’, na awɩ sidumo thɩ̃ cʋa’, na awɩ bɔdɛl cʋa’, na awɩ yuə’.

¹ Dɩ mɩ kɔɔ yɩrɛ thɔ̃thɔ̃daar thu kpɩɩ wo kɛ hananɩ fãga dɩɩ və̃vĩə, dɩ the Thãgbaa dʋɔ da-n gbũ a paar ndɔlɔ̃paar, dɩ thãgba khalʋ hale ɔɔ yʋɔ, sɩ ɔɔ ƴɛ hor wire, dɩ ɔɔ nɛ ho dɔɔ. ² A fʋrɔrɛ sɛbɛ buu dɩɩ phubi ɔɔ nyɔ̃kɔɔ, dɩ a sar lanyʋɔn na nyɔ̃bɔ nɔɔ, sɩ nyɔ̃bɩlã nɔɔ sa thɩɩ, ³ sɩ dɩ hulẽ nʋɔ dɩɩ khɩɩr ka a ho mɔ̃ sidũ’ũu n oornι. Ɔbɔɔkɛ a huleni thale thãgba phɛɛrɛ makonyɔ ther. ⁴ Ɔbɔɔkɛ thãgba phɛɛrɛ makonyɔɔle thenι pι, mι marra ɩ̃ khere sa nιɛ wire dιι the Thãgbaa dʋɔ ayι: Kpalanɛ na jιιn gιrɛ thãgba phɛɛrɛ makonyɔɔle kɔɔ sonι, sι fa-n khere ga. ⁵ Dι thɔ̃thɔ̃daar thuukɛra mι kɔɔ yιnι dι jιιl lanyʋɔnna na thιιra, ’laarɛ nyɔ̃bɔ nyɔ̃ɔ thãgbara ƴũ, ⁶ sa ʋlfɛ da-n wena ʋrɛ dɔnι Yi hɩ̃daar bɔɔ fɛʋ waa khorrι i, kɛ kɔɔ tenι ƴũ na thɩ̃ɛ fɛʋʋkɛ ha garnι, na thιι na thɩ̃ɛ fɛʋʋkɛ ha garnι, na lanyʋɔn na thɩ̃ɛ fɛʋʋkɛ ha garnι ayι: Pʋɔrɛ na hale bã; ⁷ sι bɔɔkɛ thɔ̃thɔ̃daar thu makonyɔdaar na ʋnι ɔɔ tutuu, Thãgbaa thɩ̃ gbul na daan, mɔ̃kɛ a kɔɔ sonι ɔɔ thɔ̃daarsɔraakɛ dɔnι bobona. ⁸ Dι wireekɛ mι kɔɔ nιɛnι, kɛ thɛnι Thãgbaa dʋɔ, bire mιιna mι wo ayι: Jala, tea sɛbɛ buulera thɔ̃thɔ̃daar thurəəkɛ jιlɛnι lanyʋɔnna na thιιra hananι ɔɔ nyɔ̃kɔɔ dιι phubi. ⁹ Dι mι jaal thɔ̃thɔ̃daar thurəəle a sʋʋraa ayι, a ha mι sɛbɛ buurə. Dι a so marɛ ayι: Gba, khɔ. Ga kharrɛ wer afι bιnɔ, sι nɔɔ ga daarɛ a na ho thʋʋr. ¹⁰ Dι mι teere sɛbɛ buurə thɔ̃thɔ̃daar thuu nyɔ̃kɔɔ a kho, dιι daar nɔɔ a ho thʋʋr, sι ɔbɔɔkɛ mι khonι pι, gι kha marɛ bιnɔ kpakpakpa. ¹¹ Dι thιmιιr dã mɛr wo ayι: Dɔ fa n mιι gιrɛ Thãgba sonι, kɛ telenenι tιbιlasɔ, na caarsɔ, na thιmιιrsɔ, na fãgadaar jɔjʋɔ.

¹ Dι mι kɔɔ ’lɛr jʋmũu dιι ho gbʋʋl, sa nɩ nʋɔ dɩɩ so mar ayɩ: Ɩrɛ, a mɩɛnɛ Thãgbaa cɔ hɩnɛ, na bonɩ ji paar, a therana wɩrɛ dɔnɩ fɔfɔraakɛ hanɩle. ² Sɩ Thãgbaa cɔ phel gbaya wer, sɛ gar, fa-n mɩa’, gɩdonɩ ca kpala wɩ ha, kɛ dɔnɩ wɩrɛ na kpɔ̃kpɔrɔnɛnɩ dɩ phuurə na nɛɛ na cʋʋna pora kpalanyɔ yenyɔ. ³ Ma har ɩ̃ sobɔ so jɩdara yenyɔɔkɛ tɔnɩ bɔrɔ kẽkena punone, dɩ wa mɩɩ gɩrɛ Thãgba sonɩ na cʋʋna wire gbιlanι na taanyɔ na kpalãther. ⁴ Wɛr dɔ olιvι thιra yenyɔ na dɔ carãa yenyɔ kɛ n jιlɛnι Kɔ̃tιnnaakɛ dɔnι thιιkɛɛ Kɔ̃tɩ̃. ⁵ Dι ado tibil ƴaal a cʋʋ wι puure, dɔɔ na ther awι nɔɔ na thii awι lãlaardara; dι ado tibil ƴaal a cʋʋ wɩ puure thalera wa kʋʋ ger. ⁶ Wι hananɛ punone a na khaanna ƴũ, dɩ thãgba nyʋɔn na ɩ̃ thɩɩra bɔɔkɛ wɩ hanɩ dɩ wa-n mɩɩ gɩrɛ Thãgba sona’. Wɩ hananɛ dakha punone a na debina nyʋɔn dɩ ga do tɔmɩn, a na gbana thɩlke lɩɩlɩɩ a na to thɩɩraakɛ bɔɔ fɛʋʋkɛ wɩ-n ƴaalnɩ. ⁷ Ɔbɔɔkɛ wa mɩɩnɩ awɩ Thãgba thɩmɩɩle na pɩ, nʋmɩkɛ thɛnɩ thɛrɛ ’lee kõkorʋra na kena wɛr kʋʋr, a na kəə war, a na kʋ wɩ. ⁸ Sɩ awɩ for na phɩnɛ dɩ kɔ̃tɩ̃ kʋlã hʋ thɩ̃thɩɩn, kɛ wɩ-n wenɩ na sokpaa Sɔdɔm na Ejipiti, ka tɩbɩla kɔɔ kpanɩ dakha wɛrɩleraa Kɔ̃tɩ̃. ⁹ Tɩbɩla tɩbɩlaa thɩ̃thɩɩn, na caarra, na thιmιιrra, na ca kpalala, ιkhasɔ na hιιnɛ awι for na cʋʋna wire yẽther na dakuru, wa tu awι for n dɔ kaʋa’. ¹⁰ Dι awιdara na dor nɔɔ dι daʋ na kãkar na fʋlɛ tιbιla thιιra, wa-n thɔna kha khaardaasɔ bιɛlbιɛl, gιdonι Thãgbaa bobona yenyɔɔle kɔɔ kpoore tιbιlala thιιra. ¹¹ A wire yẽther na dakuruule ka pι, fesueeke n ’laanɛnι yire, kɛ thɛnι Thãgbaa pa, lõ warɛ dι wι pal ιιr jιιl, dι ma kɔ̃tɩ̃ι fʋlɛlɛ wιrɛ kɔɔ yɛ wιnι. ¹² Dɩ Thãgbaa bobona yenyɔɔle nɩrɛ nɔ khɩɩr dɩɩ the Thãgbaa dʋɔ ayɩ: Nɩ jʋnɛ kɛ. Dɩ wɩ jʋʋnɛ Thãgbaa dʋɔ na ndɔlɔ̃paar, dɩ awɩ lãlaardara kɔɔ yɩ wɛr. ¹³ Ga bɔɔraalera thɩ jẽ kɔ̃tɩ̃ɩ kɔɔ ɩɩrɛ, dɩ dɩ phɛrɛ bɩɛl dɩ phɛrɛ yʋɔrra kɔɔ jiire, dɩ tɩbɩla gbɩlanɩ makonyɔ kɔɔ khiire thɩ jɩɩnnaale, sɩ maar fʋlɛ wɩrɛ sɛnɩ ka, dɩ wa-n dʋbɩ Thãgba ire, kɛ hanɩ ƴũ. ¹⁴ Balanyɔ puu ’lɛr kar, sɩ hɩnɛ, balãtherdaa hale a na kpaan kɔrɔ. ¹⁵ Dɩ thɔ̃thɔ̃daar thu makonyɔdaar kɔɔ ʋnɛ ɔɔ tutuu, dɩ nɔ khena the Thãgbaa dʋɔ a so ayɩ: Fãgadaar dʋʋr thιιra koo, asι Kɔ̃tɩ̃ na ɔɔ Kirisiti hιna nɛnɛ̃ dιphã, dι ɔr na dɔ Fãgadaar bɔɔ fɛʋ waa khorr vʋ̃ʋ. ¹⁶ Dι kɔ̃tιna kpelẽ yenãale tɔɔnι Thãgbaa ƴɛra awι fãga too para gburõkure dɩ wa-n fʋɔr Thãgba, ¹⁷ ayɩ: Sɩ-n khɩɩ fɛr, fɛr Kɔ̃tɩnɩkɛ dɔnɩ Thãgbaakɛ dɔnɩ fãga fɛʋʋ hɩ̃daar, kɛ hanɩle gɩrɛ, kɛ dakha kɔɔ hanɩle, gɩrɛraakɛ fɩ teenɩ afɩ fãga kɔ̃tɩ̃ a hɩ̃, a do gɩrɛ Fãgadaar. ¹⁸ Nĩkhii kɔɔ fʋrɛ tibil caar fɛʋ, sɩ afɩ nĩkhi wi phaan dɩ fa kɩɩlna gɩrɛ khe, sɩ na ka dakha afɩ thɔ̃dara Thãgbaa bobona na tɩɩ phuusɔ, na wɩrɛ n maannɩ afɩ i, tɩɩ mɔlɔ a gbana kɔ̃tɩna, sɩ dɩ fa-n kʋɛ wɩrɛra n kʋɛanɩ thɩɩ. ¹⁹ Dɩ Thãgbaa cɔ kɔɔ khɛrrɛ Thãgbaa dʋɔ, dɩ ʋlfɛ khɛɛsʋʋ kɔɔ yɩrrɛ ɔɔ cɔrara, dɩ thãgba jʋ khor kɔɔ hale, na nɔ khena, na thãgba tiire, na thɩ jɩɩn, dɩ thãgba bar kɔ̃tɩna gbũgbũu na-n jɛ.

¹ Dɩ jẽ kɔ̃tɩ̃ɩ yɩrrɛ thãgbara ƴũ, khɛr gɩ a to wire kẽkẽ khaa, sɩ por ha ɔɔ nɛ ballɔ, sa subi fãgadaar kpɩɛr dɩɩ hana ƴepələ̃be yʋɔr yenyɔ. ² Dɩ khɛrra hananɛ pɛmɛr, dɩ mɔ̃ wallɛ fʋʋnɩ a jʋɔraa, a hulene ɔɔ bi kɔ̃ para. ³ Dɩ jẽ kpɩɩ bire yɩr wo le thãgbara ƴũ; gbakho sɛ kɔ̃tɩ̃ɩ gɩ a hana yʋʋ makonyɔ, na ʋma yʋɔr, sa subi fãga kpɛra makonyɔ ɔɔ yʋsɔrara. ⁴ Ɔɔ sʋ kɔɔ kpabɩrɛ ƴepələ̃bi der pa bɩɛl der paar yẽtherra le ƴũ, a der thɩɩra. Dɩ gbakhora jɩɩlɛ khɛrɩlee ƴɛra, kɛ ƴaalɛnɩ a kɔ̃ bi, ado a kʋɔn birə a gba a kho. ⁵ Dɩ khɛrra kʋɔn bɩsaan dɩ do kũubir, dɩɩ do ɔr dɔ ʋrɛ na-n khɛnɩ tibil caar fɛʋ na the gbʋʋl; sɩ wɩ vəən ɔɔ birə, a gba jʋʋnna ka Thãgba hanɩ na ka ɔɔ fãga too pa hanɩ. ⁶ Sɩ khɛr fʋʋ a jal bəənnə, ka dɔnɩ paarɩkɛ Thãgba gbɛbɩnɩ a thɩɩnʋʋ, dɩ mɛ̃ wa haanʋʋ wire gbɩlanɩ na taanyɔ na kpalãther. ⁷ Dɩ kʋʋr kɔɔ ɩɩrɛ le thãgbara ƴũ. Mɩsɛl na ɔɔ thɔ̃thɔ̃daar thusɔɔkɛ a doronɩ kɔ̃tɩn n kɔɔ kɛ̃kɛrɛna gbakhoolera, dɩ gbakhora na ɔɔ thɔ̃thɔ̃daar thusɔ kɔɔ kɛ̃kɛrɛna wɛr. ⁸ Sɩ gbakhora na puno wa’, dɩ wa yɩ too paar le ƴũ bã. ⁹ Dɩ wɩ tinəne gbakho kɔ̃tɩ̃ɩle, kɛ dɔnɩ si tɩ̃ɩ, kɛ wɩ-n wenɩ kɔ̃tɛɛbiisɔɔ kɔ̃tɩ̃, kɛ n dɔnɩ dakha Satã, kɛ dɔnɩ ʋrɛra n fɩlɛnɩ tɩbɩla fɛʋ thɩɩra, wɩ tinəəne a weguu faa thɩɩra, mɔ̃ wɩ tinəəni mɛ̃ wɩ tinə ɔɔ thɔ̃thɔ̃daar thusɔ. ¹⁰ Dɩ mɩ nɩrɛ nɔ khɩɩr dɩɩ the Thãgbaa dʋɔ a so ayɩ: Nɛnɛ̃ dɩphã asɩ Thãgbaa taa daan, na ɔɔ fãga, na ɔɔ fãgadaar do, na ɔɔ Kirisitii puno hana, gɩdonɩ omɩnaa so pɛdaarra, kɛ dɔnɩ ʋrɛ n kɔɔ pɛ warnɩ sor dɩwɩlʋ na dɩtɩnɛ Thãgbaa ƴɛra, a kɔɔ tinəəne a weguu faa. ¹¹ Sɩ asɩ omisɔ kɔɔ punoone dɩɩ do Bana bii tɔmɩna gɩ the, na awɩ sobɔ so jɩ thɩmɩɩra; wa kɔɔ na awɩ yi sa ma khirə’. ¹² Gɛr gɩ Thãgbaa dʋɔ na kãkanɛ, na nɛrɛ fɛʋʋkɛ harɔnɩ, sɩ ga puure thɩɩra na lanyʋɔnna, gɩdonɩ Satã gbune anɩ pa, nĩkhii fʋʋrɛ jɔɔ ka, gɩdonɩ a jɩrɛ dɩ bɔɔ fɩɩʋ sɩɛ dɩbara. ¹³ Dɩ ɔbɔɔkɛ gbakhora yɩɛnι dιι do wι tinəəne a wee faa thιιra, a ιιrɛ̃ da-n wee khɛrιlera kɔnanι kũubirile. ¹⁴ Dι khɛrιle ’lɛ gbʋɔr gbɛl kɔ̃tιna yenyɔ, dι mɛ̃ a na ubinə a na jal bəənnə ka dɔnι ɔɔ pa, ka wa-n haanʋʋnι gι cʋʋna yɛna yẽther na dakuru, a hʋnɔna siilera. ¹⁵ Sι siile kɔɔ cιrrɛ nyʋɔn ɔɔ nɔra dιι ho mιιr, dι ga-n kpaan khɛrraale gι halʋʋ gι kpɛɛ nyʋɔnɔ. ¹⁶ Sι thιι kɔɔ taarɛ khɛrιle a ha nʋɔ a dιι nyʋɔnna gbakho cιrnι dιι do mιιr. ¹⁷ Dι nĩkhii kɔɔ fʋrɛ gbakhoole ka khɛrraale, dι a gbaar jal da-n ke kʋʋr na khɛrι məlikɛ sɛnι, kɛ dɔnι wιrɛ n hιnɛnι Thãgbaa jɔfʋ, kɛ fɔrɔnι sobɔrιkɛ Jeju kɔɔ mιιnι. ¹⁸ Sι lanyɔ̃ gbalãkothιnna gbakhoole jιιl.

¹ Agιpι mι kɔɔ yιrɛ nʋm dι ιιr lanyʋɔnna da-n jʋʋn, a hana ʋma yʋɔr na yʋʋ makonyɔ, dι fãgadaar kpɛra yʋɔr hale ɔɔ ʋ̃sɔrara, dι i kʋɛ thιmιιr hale ɔɔ yʋsɔrara dakha. ² Dι nʋmιlera mι yιnι a-n honanɛ kpe, sι ɔɔ nɛ na-n hona sιɓɛlɛ̃ nɛɛ, sι ɔɔ gbuokhu ho sidũ’ũ gbuokho. Dι gbakhoolera kɔɔ haarɛ ɔɔ fãga, na ɔɔ fãga too pa, na punone dιι kɔ̃tĩ ka. ³ Dι mι yιrɛ ɔɔ yʋsɔɔlera bιɛl dιι ho tɔmĩ sɛ khoo a ’lɛ, kɛ dɔnι khikhi khoo. Sι ɔɔ khikhi khoolera kɔɔ kpɛɛrɛ. Dι tιbιla thιιra koo n kɔɔ kpar nʋmιnaale na nɔ kpaarɛ. ⁴ Dι wι-n gburõkure gbakhoraale gιdonι a kɔɔ har nʋmιle ɔɔ puno. Dι mɛ̃ wι-n gburõku nʋmιnaalera dι wa-n sona ayι: Amɛ hale a ho nʋmιle, dι amɛ na punone a na kɛ̃kɛrɛnaa? ⁵ Dι nʋmιle ’lɛr hʋɛ da-n sona kuune, da-n mιιna dakha i kʋɛ thιmιa, a ’lɛr punone a na-n cʋʋna thĩɛ pora kpalanyɔ yenyɔ. ⁶ Dι a har ɔɔ nɔra da-n kpɛna Thãgba, da-n kʋɛna ɔɔ i, da-n sʋʋrna Thãgbaa pa na wιrɛ hanι Thãgbaa dʋɔ. ⁷ A kɔɔ ’lɛr hʋɛ a kena tιι phuusɔ kʋʋr a puno wi, a ’lɛr dakha punone caarra fɛʋ, na tιbιlala fɛʋ, na thιmιιrra fɛʋ, na ca kpalala fɛʋ. ⁸ Dι tιbιla fɛʋ thιιra n gburõkuraarɛ, kɛ dɔnι wιrɛ awι i na kherenι yi sɛbɛraakɛ dɔnι Bana biida ga, kɛ dɔnι ʋrɛ wι kɔɔ kʋnι sι thιιkɛ na kɔɔ ti pa’. ⁹ Ʋrɛɛkɛ hananι nũu, dɔ a na-n nιɛ. ¹⁰ Ʋrɛɛkɛ ga teenanι a dɔ dee, deera a na do; dι ʋrɛɛkɛ n kɔnι tibil na bajιna, bajιnana wa kʋnaa phubi. Gιrɛɛkɛra tιι phuusɔ na nιna awι ha fʋ na awι ha pɛ. ¹¹ Agιpι mι kɔɔ yιrɛ nʋ̃ kpιι wo da-n the thιιra, a hana ʋma yenyɔ dιι ho Bana biida, sι da-n mιι gbakhoo kha. ¹² Dι a hananɛ caca nʋmι fãgara da-n dona thɔma ɔɔ ƴɛra; dι a cʋʋrɛ thιι na wιrɛ fɛʋʋkɛ harɔnι dɩ wa-n gburõku caca nʋmɩnaale, kɛ kɔɔ hananɩ tɔmɩ̃ sɛ khookɛ dɔnɩ khikhi khoo, sɩ dɩɩ kpɛɛ. ¹³ Dɩ a n cʋʋrɛ nɔ kpaa thɩ̃ kɔ̃tɩna, dɩ ba cʋʋnanakɛ dɔɔ dιι the ƴũ a na ji thιιra dι tιbιla fɛʋ na-n yιɛ. ¹⁴ Dι nɔ kpaa thɩ̃ɛsɔɔlera a kɔɔ ’lɛnι hʋɛ a na-n cʋʋ caca nʋmɩ ƴɛrara, gɛr a-n fɩɩlna tɩbɩla thɩɩra da-n so war dɩ yɩ, wɩ cʋɛ nʋmɩlera thɩl khaa gbelẽ gbelẽ, kɛ dɔnɩ nʋmɩkɛra wɩ kɔɔ cɩnɩ na bajɩna sɩ dɩ le. ¹⁵ Balanyɔ nʋmɩle ’lɛr punone da-n ’laana fesue thɩɛnaalera wɩ cʋʋnɩ dɩ ho caca nʋmna, dɩ mɛ̃ thɩ̃ɛɛlera wɩ kɔɔ cʋʋnɩ dɩ ho nʋm n mɩɩ nʋɔ, da-n kʋʋrna dakha wɩrɛ fɛʋʋkɛ na-n gburõkuneni thɩɛnaalera wɩ cʋʋnɩ dɩ ho nʋma’. ¹⁶ Dɩ a cʋʋrɛ tɩbɩla fɛʋ tɩɩ mɔlɔ a gbana kɔ̃tɩna, lɛ̃lɛ na bɔdara, waɩa na dea, wɩ pɛ war jɩɩn awɩ nyɔ̃bɔsɔra, na awɩ kobisɔra. ¹⁷ Dɩ tibil bɩɛllakɛ na puno na the thɩ̃ɛ, agɩbo a dolõ thɩ̃ɛ, sɩɩ do aa hana jɩɩnɩkɛ dɔnɩ nʋmɩlee i agɩbo ɔɔ i nɩmɔrɔaa ga. ¹⁸ Kɩɛr dʋɔn kpɛsɛ nɩna paar. Ʋrɛɛkɛ hananɩ yʋʋ a thera a jɛ nʋmɩlee nɩmɔrɔ kɩr, gɩdonɩ tibil nɩmɔrɔ gɩ, dɩ ga nɩmɔrɔ har taa maadõ na kpalãther maadõ.

¹ Dɩ ma hɩɩn dɩɩ do Bana bii gɩ, a jɩɩl Sɩyɔ̃ gɔ̃gʋɔna, dɩ tɩbɩla gbɩlanɩ tamaa na kpalanyɔ na gbɩlanɩ yenã ha kha na ɔr, dɩ ɔɔ i na ɔɔ Thɩɩ i khere awɩ kobisɔra. ² Dɩ mɩ kɔɔ nɩrɛ wire dɩɩ the Thãgbaa dʋɔ a ho yɔ jɔjʋɔ n hela, dɩ ga-n hona dakha thãgba phɛɛ kɔ̃tɩ̃ɩ, dɩ wireelera mɩ nɩɛnɩ gɩ hor salã bɩ̃dara wɛ dɩ wa-n bɩ̃ salãa. ³ Dɩ wɩ-n khɩnɛ nɩ phaa fãga too pa ƴɩɛra, na thɩ̃ ye yenã na kɔ̃tɩnasɔɔ ƴɛra. Dɩ tibil na hale a na puno nɩɛɛlera a na dɩɩr, saagado tɩbɩla gbɩlanɩ tamaa na kpalanyɔ na gbɩlanɩ yenãale Thãgba kɔɔ birseni thɩɩraakɛ gaaga. ⁴ Wɛr dɔ wɛkɛ na kɔɔ biseneni dɩbara na khɛra ga, gɩdonɩ wa kɔɔ phɩna khɛrrakɛ a yɩ ga, dɩ wɛrra n kpaanɛ Bana biirə paar fɛʋʋkɛ a-n jalnι. Wɛr dɔ wɩrɛ Thãgba kɔɔ tini tɩbɩlala, a birse wɩ do caca tɩbɩla Thãgbara na Bana biirə. ⁵ Dɩ awɩ nɔra sõso thɩmɩɩ bɩɛllakɛ na kɔɔ the la’, wɛr dɔ tɩbɩlaakɛ na hananɩ dɩ paara’. ⁶ Dɩ ɩ̃ yɩ thɔ̃thɔ̃daar thu kpɩɩ wo dɩ ubi da-n ka thãgbara ƴũ fĩi, a hana tutugo bʋɔɔkɛ dɔnɩ khorrdaa a na-n mɩɩ tɩbɩla thɩɩra, na ca kpalala fɛʋ, na caarra fɛʋ, na thɩmɩɩrra fɛʋ, na tɩbɩlala fɛʋ; ⁷ sɩ nɔ khɩɩr a-n mɩɩna da-n so ayɩ: Na-n ma Thãgba, na-n dʋba ɔɔ i, gɩdonɩ bɔɔkɛ a na kɩɩlnanɩ tɩbɩla gɩ daan. Na-n kpãganɛ ɔrkɛ kɔɔ cʋɛnɩ ƴũ, na thɩɩ, na lanyʋɔn, na yɔ bu kanasɔ fɛʋ. ⁸ Dɩ balanyɔ thɔ̃thɔ̃daar thu kpɩɩ kpaan da-n so ayɩ: Babɩlɔn dɩ kʋkʋʋra jire, a jire pɩ, ɔrkɛra kɔɔ cʋɛnɩ tibil caar fɛʋ dɩ wɩ yɔ ɔɔ bɔdɛl ta kha kpakpakpa. ⁹ Dɩ balãther thɔ̃thɔ̃daar thu kpɩɩ kpaan da-n sona nɔ khɩɩr ayɩ: Ado tibil na gburõku nʋmɩnaale na gɩrɛ wɩ cʋʋnɩ dɩ ga-n hʋʋ, a ’lɛna dakha ɔɔ jẽ kobiro na nyɔɔna, ¹⁰ ntɛ na yɔr dakha taanɩkɛ dɔnɩ Thãgbaa nĩkhida, kɛ dɔnɩ ta khaa kpakpakpa, kɛ a pɛrnɩ ɔɔ nyɔ̃kpona sɩ dɩkha na nyanyaanɔa’, dɩ a na ’wãgarɛ dɔɔra na girbi thɔ̃thɔ̃daar thu phuusɔɔ ƴɛra na Bana bii ƴɛra. ¹¹ Dɩ awɩ ’wãga isi baan dɩ ga-n jʋʋn bɔɔ fɛʋ waa khorr vʋ̃ʋ. Hιιrɛ na hale kpιιrakɛ dιwιlʋ na dιtιnɛ wιrɛraakɛ n gburõkuneni nʋmιnaale na thιɛnaakɛ wι cʋʋnɩ dɩɩ hʋa’, na tibil wo tibilləəkɛ kɔɔ ’lɛnɩ ɔɔ i jã’. ¹² Gɩrɛɛkɛra tɩɩ phuusɔɔkɛ n hɩnɛnɩ Thãgbaa jɔfʋ, a hanana ha pɛrɛ Jejura, na nɩna awɩ ha fʋ. ¹³ Dɩ mɩ nɩrɛ nʋɔ dɩɩ the Thãgbaa dʋɔ ayɩ: Khera gɩrɛra: Nɛnɛ̃ bɔɔkɛ dɩphã ga-n dar wɛkɛra n khenɩ mɔ̃ wɩ donɩ Kɔ̃tɩnɩda; dɩ Thu Phuu dee aa: Ɔɔ sobɔr gɩ, wɩ thʋ̃ wɩ hɩɩrrakɛ awɩ thɔ̃ khe dorara mɛ̃, gɩdonɩ awɩ thɔ̃ɔkɛ wɩ kɔɔ cʋʋnɩ ’lor nɛɛ dɩ ga-n kpa war. ¹⁴ Dɩ ma hɩɩn dɩɩ do ndɔlɔ̃pa bulo gɩ, dɩ tibil hale a too ndɔlɔ̃paarrara a ho tibili bikuun, a subi dɛ fãgadaar kpɩɛr, sa fʋrɔ hɔ̃ khabɩda khɩɩ ɔɔ nyɔ̃kɔɔ. ¹⁵ Dɩ thɔ̃thɔ̃daar thu kpɩɩ ther Thãgbaa cɔ a hulẽ dɩɩ khɩɩr ka olela tɔɔnɩ ndɔlɔ̃paarra ayɩ aa: Laanɛ afɩ hɔ̃ khabɩdara a na khaba jɔ, gɩdonɩ jʋ kha bɔɔ daan, dɩ thɩɩra daan khar jʋ khaa. ¹⁶ Dɩ olera tɔɔnɩ ndɔlɔ̃paarra ’laarɛ ɔɔ hɔ̃ khabɩda thɩɩra dɩ ga-n khabɩ thɩɩ jʋ khaa. ¹⁷ Dɩ thɔ̃thɔ̃daar thu kpɩɩ ther Thãgbaa cɔɔkɛ hanɩ Thãgbaa dʋɔ, a fʋrɔ dakha hɔ̃ khabɩda khɩɩ. ¹⁸ Dɩ thɔ̃thɔ̃daar thu kpɩɩ wo, kɛ hananɩ punone dɔɔra, the bonɩ ji paar, a so nɔ khɩɩr olela hananɩ hɔ̃ khabɩda khɩɩle ayɩ: ’Laanɛ afɩ hɔ̃ khabɩda khera, a kurona dɩvɛ̃ thɩr beele sɛnɩ jɩrkpɩrɩɩ, kɛ hanɩ thɩɩra, gɩdonɩ bera bɩnɛ. ¹⁹ Dɩ thɔ̃thɔ̃daar thurə ’laa ɔɔ hɔ̃ khabɩdara thɩɩra dɩɩ kuur dɩvɛ̃ thɩr bera thɩɩra, dɩ gba a dʋna Thãgbaa nĩkhi bi nã pa kɔ̃tɩ̃. ²⁰ Dɩ wɩ kɔɔ naan beelera le bi nã paar dɩ khuirə, dɩ bi nã paarra tɔmɩn ther le, a deer a jal dã kilə tãather, gɩ jʋʋnɛ dakha a dã gãgʋʋ gbã.

¹ Agɩpɩ dɩ ɩ̃ yɩ jẽ kpɩɩ wo Thãgbaa dʋɔ, dɩɩ kɔ̃tɩ̃ ka a kpaa nʋɔ; thɔ̃thɔ̃daar thu makonyɔ wɛ a fʋrɔ thɩlkena makonyɔɔkɛ dɔnɩ pɩpɩɩdaa, gɩdonɩ gɛr na cʋɛ Thãgbaa nĩkhi dɩ ga pɩɩr waa vʋ̃ʋ. ² Dɩ mɩ yɩrɛ thɩ̃ɛ dɩɩ ho lanyʋɔnɩkɛ hɔnɩ hɩɩnʋ, dɩɩ nyanyaana dɔɔ, a yɩna dakha wɩrɛ kɔɔ punoneni nʋmɩle na thɩ̃ɛɛkɛ wɩ cʋʋnɩ dɩɩ hʋʋ, na ɔɔ nɩmɔrɔ i, dɩ wɩ jɩɩl lanyʋɔnnaalera hɔnɩ hɩɩnʋ, sa fʋrɔ Thãgbaa salã, ³ sɩ dɩ wa-n khɩ̃ Mʋɩjɩɩkɛ dɔnɩ Thãgbaa thɔ̃daarɩ nɩ, na Bana bii nɩ, dɩ wa-n sona ayɩ: Afɩ thɩ̃ cʋʋ kɔ̃tɩnɛ a kpaa nʋɔ ya Kɔ̃tɩn, Thãgba fãga fɛʋʋ hɩ̃daar; afɩ hʋsɔ sarrɛ a do sobɔr, fɛr caar fɛʋʋ Fãgadaar. ⁴ Ʋmɔ̃ na bɔ fɛr Kɔ̃tɩn maar na afɩ i cʋʋr? Gɩdonɩ fɛr bɩɛl dɩbara pho, dɩ tibil caar fɛʋ na ɩnɛ na gburõku far ƴɛ thɩ̃thɩɩn, gɩdonɩ afɩ fɩl sar thɔ̃ yɩrrɛ dɩphã. ⁵ A gele pɩ, ma hɩɩnɛ a yɩ Thãgbaa cɔ kãkɛ kẽkẽ waa hanɩ, dɩ Thãgba harɔ dɩ ga-n khɛr le Thãgbaa dʋɔ. ⁶ Dɩ thɔ̃thɔ̃daar thu makonyɔɔkɛ fɔrɔnɩ thɩlkena makonyɔ ther Thãgbaa cɔ, a to kẽkẽ bulona dɩ a-n carbara, sa khɩmɩ dɛ lophɛrɛ kũkuno. ⁷ Dɩ thɩ̃ ye yenãale bɩɛl har thɔ̃thɔ̃daar thu makonyɔɔle dɛ bilẽse makonyɔ, dɩɩ hinə Thãgbaakɛ hananɩ yire bɔɔ fɛʋ waa khorrɩ nĩkhi. ⁸ Dɩ Thãgbaa cɔ kɔɔ hinəne isiirikɛ thɛnɩ Thãgbaa i dʋbɩra na ɔɔ puno hanana, dɩ ga do tibil bɩɛllakɛ na punone a na lõ Thãgbaa cɔa’, phaphapha thɩlkena makonyɔɔle thɔ̃thɔ̃daar thu makonyɔ fʋrɔnɩ n pɩɩr wɩbɩ.

¹ Dɩ mɩ nɩrɛ nɔ khɩɩr dɩɩ the Thãgbaa cɔ, a so thɔ̃thɔ̃daar thu makonyɔraale ayɩ: Nɩ jala na deere thɩɩra bilẽse makonyɔɔle hananɩ Thãgbaa nĩkhi. ² Dɩ cacadaar jaal a deer ɔɔ bilẽsi thɩɩra, dɩ nɔr kpal dɩkhaakɛ n helanɩ fʋlɛ tɩbɩlaakɛ hananɩ nʋmɩlee jẽ, dɩ wa-n fʋɔrna thɩ̃ɛɛkɛ wɩ cʋʋnɩ dɩɩ hʋʋ. ³ Dɩ balanyɔdaar deer ɔɔ bilẽsi lanyʋɔnna, dɩɩ debi a ho tɔmɩnɩkɛ n ƴɔnɩ khirera, dɩ thɩ̃ ye fɛʋʋkɛ hanɩ lanyʋɔnna khiire. ⁴ Dɩ balãtherdaar deer ɔɔ bilẽsi mɩɩrra na yɔ bu kanana, dɩɩ debi a do tɔmɩn. ⁵ Le mɩ nɩɛ thɔ̃thɔ̃daar thuukɛ dɔnɩ yɔdaar da-n so ayɩ: Fɛr Tɩɩ phuu, kɛ hanɩle gɩrɛ, kɛ kɔɔ hanɩle, fɩ sarrɛ kɩɩlɛlaakɛ fɩ kɩɩlnɩ; ⁶ gɩdonɩ wɩ kɔɔ deere tɩɩ phuusɔɔ tɔmɩ̃, na Thãgbaa bobonasɔɔ tɔmɩ̃, dɩ nɛnɛ̃ dɩphã fɩ ha wɛr dakha tɔmɩnna wɩ yɔ, gɩdonɩ gɛr wɩ teena. ⁷ Dɩ ɩ̃ nɩɛ bonɩ ji paar dɩɩ so aa: Ɔɔ Kɔ̃tɩn, Thãgba fãga fɛʋʋ hɩ̃daar, afɩ kɩɩlsɔra sarrɛ gɩ dor dakha sobɔr. ⁸ Dɩ balanãdaar deer ɔɔ bilẽsi wirera, dɩ wire ’lɛr punone a thii tɩbɩla na dɔɔ. ⁹ Dɩ daphʋɛ kpõkpõkpõ kɔɔ thiire tɩbɩla, sɩ wa-n debi haar wɩ dʋbɩ Thãgbaa iə’, sɩ wɩ-n kpɛr Thãgbaakɛ hananɩ punone thɩlke caarsɔraale. ¹⁰ Dɩ balamɔɩdaar deer ɔɔ bilẽsi nʋmɩ fãga too para, dɩ ɔɔ fãga dɩ birəre, dɩ tɩbɩla na-n dʋɔn nɔfaar khooraakɛ gɩ-n kho wɩnɩ. ¹¹ Sɩ wa-n debi haar sɩ wɩ faa awɩ thɔ̃ cʋʋra ga, sι wι-n kpɛr Thãgbaakɛ hanιle ƴũ hellelaakɛ gι-n hel wιnɩ, na awι nɔrraakɛ wι hananι. ¹² Dι maadõdaar deer ɔɔ bilẽsi Efιratι mιιr kɔ̃tιιna, dι ɔɔ nyɔ̃ ι fɛʋ, dι mɛ̃ hʋɛ na har dι fãgadara na the wi phã paar na ɩ̃. ¹³ Dι ɩ̃ yι kɔ̃tɛɛbi hɔ̃hɔla yẽther, dι wι ho sιbɔna, bιɛl na-n the gbakhoo nɔra, bιɛl na-n the nʋmιlee nɔra, bιɛl na-n the sõso bobonιlee nɔra. ¹⁴ Gιdonι wɛr dʋɔn kɔ̃tɛɛbiisɔɔkɛ n cʋɛnι nɔ kpaa thɩ̃ɛsɔ, kɛ n jalanι fãgadarasɔra thιιraakɛ fɛʋ, dι wι kpa wι a gbɛbιrι kʋʋrraakɛ na hanɩ Thãgbaakɛ dɔnɩ fãga fɛʋʋ hɩ̃daarɩ wi kɔ̃tɩna. ¹⁵ Hɩnɛ, ma ɩnɛ yudaar khaa. Ga dar ʋrɛraakɛ n jʋrɛnɩ da-n jɩɩ hɩɩnna dakha ɔɔ kẽkẽsɔ, dɩ mɛ̃ a na-n ɩɩrna sãɓɔlɔ̃ gɩ ba phuroo yicuru n fʋʋa’. ¹⁶ Dɩ kɔ̃tɛɛbiisɔɔle kpa wɛr a gbɛbɩ paarɩkɛ wɩ-n wenɩ na ebirə thɩmɩɩr: Armagedɔ̃. ¹⁷ Dɩ makonyɔdaar deer ɔɔ bilẽsi jɩɛra, dɩ nɔ khɩɩr the Thãgbaa cɔ, le ƴũ fãga too paarra, a so ayɩ: Gɩ daan mɛ̃. ¹⁸ Dɩ thãgba jʋ khor, na nɔ khena, na thãgba tiire, na thɩ jẽ kɔ̃tɩ̃ɩ ka kɔɔ hale. Thɩ jɩɩn thale na kɔɔ hale kɛkɛra tɩbɩla kɔɔ thenɩ dɩɩra ga, gɩ thʋnɛ kɔ̃tɩ̃ ka. ¹⁹ Dɩ dɩ kɔ̃tɩ̃ɩ tɩnɛ tɩnɛ paar yẽther, dɩ tibil caar fɛʋʋ dɩsɔ kɔɔ jiire, dɩ thãgba jɩnanɛ Babɩlɔn dɩ kɔ̃tɩ̃ɩle a haa nyɔ̃kpʋʋnɩkɛ ɔɔ nĩkhi khe tã hironi a yɔ. ²⁰ Dɩ yɔ dɩɩsɔ fɛʋ kɔɔ fuulele, dɩ gɔ̃gɔna na ha yɩrra bã. ²¹ Dɩ thãgba bar kɔ̃tɩna gbũgbũu, kɛ bɩɛlɩ dʋbɩ mãkhananɩ nã kɔ̃tɩ̃ɩ dʋbɩ, the ƴũ dɩ ga-n bɩɩr tɩbɩla, dɩ tɩbɩla n kpɛr Thãgba thɩlkɩɩrraale dɔnɩ thãgba bara, gɩdonɩ thɩlkɩɩrɩle thʋnɛ kɔ̃tɩ̃ ka.

¹ Agɩpɩ thɔ̃thɔ̃daar thu bɩɛl makonyɔraale fʋrɔnɛnɩ bilẽse makonyɔ pɔr, a so mar ayɩ: Ɩna kɛ, ma nɩ farɛ khɛ bɔdɛl kɔ̃tɩ̃ɩlee kɩɩl, kɛ tɔɔnɩ yɔ jɔjɔ nʋɔra. ² Ɔr dɔ ʋrɛra fãgadara thɩɩra n cʋʋrɔnι bɔdɛl thɔma, dι tιbιla thιιra yɔr ɔɔ bɔdɛl tã dι ga-n kʋ wι. ³ Dιι do Thu Phuu gι a gba mι a jalna bəənnə, dι le mι yι khɛr dι too nʋ̃ sιɛra kpakpakpa, dι i kpɛ thιmιιr haar khere ɔɔ tomιra koo, sι dι hana yʋʋ makonyɔ na ʋma yʋɔr. ⁴ Khɛrra tor kẽkẽ sιɛ himə himə, na kẽkẽ sιɛ kpakpakpa, sa gba dɛ, na boka the nɔ khena, na lẽbii a gbɛbιna biire. Dι khɛrra hananɛ dɛ bilẽsire a fʋrɔ nyɔ̃kɔɔ, dιι hinə kpɔ̃kpɔrɔ̃ thɩ̃ɛ na thɩ̃ biseekɛ dɔnι ɔɔ bɔdɛl cʋʋ thɩ̃. ⁵ Dι ire hale a khere ɔɔ kobirə sa do i gbul ayι: Babιlɔn dι kʋkʋʋra, bɔdɛlasɔ na thιιkɛɛ kpɔ̃kpɔrɔ̃ thɩ̃ι nι gι. ⁶ Dι mι yιrɛ khɛrra dι yɔ tιι phuusɔɔ tɔmɩ̃, na wιrɛ wι kʋʋrnι Jejuu soraa tɔmɩ̃, dι ga-n kʋʋ. Ɔbɔɔkɛ mɩ kɔɔ yɩɩnɩ, nʋɔ kɔɔ kpaa mɛr dɩɩ pho ka. ⁷ Dɩ thɔ̃thɔ̃daar thu bule mi aa: Mɔ̃gɩdo dɩ nʋɔ kpaa fɩ? Ma mɩɛ fɛr thɩ̃ gbulikɛ dɔnɩ khɛrɩdaalera na nʋmɩle a tooronɩɩda, kɛ hananɩ yʋʋ makonyɔ na ʋma yʋɔr. ⁸ Nʋmɩle fɩ kɔɔ yɩnɩ dɩ kɔɔ hale, sɩ aa hale nɛnɛ̃ bã, a na ther thɛrɛ ’lee kõkorʋra, a na jal bu paar, dɩ tɩbɩlaakɛ hanɩ thɩɩra, kɛ awɩ i na kɔɔ kherenɩ yi sɛbɛra sɩ dɩ thɩɩkɛ tə’, nʋɔ na kpaa wɛr mɔ̃ wa yɩnɩ nʋmɩle, gɩdonɩ a kɔɔ hale, sɩ aa hale nɛnɛ̃ bã, sɩ dɩɩ do a na bire na ɩɩr wo. ⁹ Kɩɛr dʋɔn yʋ bʋɔ na kpɛsɛ nɩna paar. Yʋʋ makonyɔɔle dʋɔn gɔ̃gɔna makonyɔɔkɛ khɛrra tooronɩ. ¹⁰ Fãgadara makonyɔ gɩ nɩna dakha. Yemɔɩ kɔɔ jire, sɩ bɩɛl bo jɩɩl, sɩ bɩɛl hale aa ɩ̃ pa’. Sɩ ado a ɩ̃, bɔɔ gbe teana a tɔɔ. ¹¹ Nʋmɩkɛ kɔɔ hanɩle sɩ aa hale bã, ɔr thɛthɛra dʋɔn fãgadaarɩkɛ dʋɔnnɩ makõtherdaar, ɔrra dɔ dakha bɩɛl makonyɔdarara, sɩ bu paar a-n jal thale. ¹² Ʋma yʋɔrɩkɛ fɩ yɩnɩ dʋɔn fãgadara yʋɔr, sɩ wa fʋ awɩ fãgadaar thɔ̃ pa’, sɩ wɩ ’lɛr fãga wer, a na do fãgadara lɩɛr bɩɛl na nʋmɩle. ¹³ Kpɩɛr bɩɛl wɩ hana dɩ wa gbaar awɩ fãga na awɩ puno a na ha nʋmɩle. ¹⁴ Wa kɛ̃kɛrɛnanɛ Bana bii, sɩ Bana bii na puno wer gɩdonɩ ɔr dʋɔn Kɔ̃tɩ̃ kpɩɛ kɔ̃tɩnana, na Fãgadaar kpɩɛ fãgadarara, dɩ wɩrɛ Thãgba wenɩ, kɛ a phiirni, kɛ dʋɔraanɩ sobɔ tɩbɩlaakɛ hanaanɩ kha, na puno wer dakha. ¹⁵ Dɩ a so marɛ ayɩ: Nyʋɔnsɔɔkɛ fɩ yɩnɩ, dɩ khɛ bɔdɛlɩle tooro, tɩbɩla wɛ, na tibil jɔ bərəəm, na tibil caarsɔ, na thɩmɩɩ caarsɔ. ¹⁶ Dɩ ʋma yʋɔrɩle fɩ yɩnɩ na nʋmɩle, wa laarɛ khɛ bɔdɛlɩle, a na phʋʋnʋʋ sι na sιιraa da toona sãɓɔlɔ̃; wa khor ɔɔ nʋ̃ wa hιιnɛ dakha dɔɔra. ¹⁷ Gιdonι Thãgba pιɛr awι hara wι cʋɛ thĩɛɛle gι ha mɔ̃kɛ ιnɛr Thãgba n ƴaalnι, wι cʋɛ dakha thɩ̃ɛɛle na kpιɛr bιɛl, a gba awι fãgadaar do a hana nʋmιle phaphapha Thãgbaa thιmιι n dã gι ha oti. ¹⁸ Sι khɛrιle fι yιnι, ɔr dɔ dι kɔ̃tɩ̃ιkɛ hananι fãga fãgadarara thιιra.

¹ A gele pι, ma hιιnɛ a yι thɔ̃thɔ̃daar thu kpιιkɛ hananι punone jɔɔ ka, dι the Thãgbaa dʋɔ da-n gbũ, dι ɔɔ carbara hιrɛ thιι. ² Dι a hulene nʋɔ dιι khιιr ka ayι: A jire, a jire, Babιlɔn dι kɔ̃tιιna jire. Gι debire a do kɔ̃tɛɛbiisɔɔ cɔ pa mɛ̃, na kɔ̃tɛɛbi puunə fɛʋʋ wɔ̃ pa, na ’lominə fɛʋʋkɛ biseneni dι tιbιla na-n laarι wɔ̃ pa. ³ Gιdonι tibil caar fɛʋ kɔɔ yɔr ɔɔ bɔdɛl tãakɛ n ιnananι Thãgbaa nĩkhi. Ɔr dɔ ʋrɛ fãgadara thιιra kɔɔ cʋʋrɔnι bɔdɛl thɔma, dι dakha ƴaƴaba thιιra debire a do lẽledara dιι do ɔɔ nũfe thɩ̃ ƴaal jɔɔ dɔ nɔɔ. ⁴ Dι ɩ̃ nι wi kpιι wo dιι the Thãgbaa dʋɔ a so ayι: Ɩ̃ too wei, nι thɛ ɔɔ pa, a mɛ̃ gaa ga hor na lʋʋn ɔɔ sopugorara nι ba ’lɛ thιlkιιrιkɛ teleneenι. ⁵ Gιdonι ɔɔ sopugosɔra thʋnɛ cõcool waa a ba dã Thãgbaa dʋɔ, dι Thãgba jιnanɛ ɔɔ thɩ̃ gõgolõsɔ. ⁶ Nι lιmaa mɔna a kɔɔ lιmιnι, nι birə birsene balanyɔ a hanaa mɔna ɔɔ thɔ̃ hanι; nyɔ̃kpõ ʋrɛra a kɔɔ deernanι a ’laa, nι birə mιɛna wa nyɔ̃kpona balanyɔ a hanaa. ⁷ Mɔ̃kɛra a-n kɔɔ kanι ire a hanana nũfe thɩ̃ɛ jɔɔ, nι hanaa ɔmɛna ’wãgarɛ na nιwɛ. Gɩdonɩ a-n sor le ɔɔ hara dɩ yɩ aa, khɛ nũfe toore ɩnɩ too aa, ga do khikhɛrʋ ɩnɩ doa’, ɩna yɩ bɩwɛ kpɩɩraka’. ⁸ Dɩ gɛrra na dɔ nɔɔ wi bɩɛl ’lẽ’lẽ’lẽ dɩbara thɩlkenaakɛ dɔnɩ kho puunə, na bɩwɛ, na kɔmɛr na daanɛ, dɔɔ na hɩnaa dakha; gɩdonɩ Kɔ̃tɩnɩkɛ dɔnɩ Thãgbaakɛ n kɩlɛnaanɩ, aa hana fãga kpãkpalã ga. ⁹ Fãgadara fɛʋ thɩɩraakɛ kɔɔ cʋɛnaanɩ bɔdɛl thɔma, a mʋʋnaa kha nũfe thɩɛna, wa khɩɩrɛ wa-n bɩna ɔɔdarara ɔbɔɔkɛ wa yɩnɩ isiirikɛ n thɛnɩ ɔɔ hɩna. ¹⁰ Ƴɔɔ wa jɩɩl maar n fʋlɛ wɩ ɔɔ ’wãgara, dɩ wa sor nayɩ: Gɩ puurore, gɩ puure Babɩlɔn dɩ kɔ̃tɩɩnana, dι kʋkʋʋ thakɛ sι dιι do lιɛr bιɛl dapaara afι kιιl dã fɛr. ¹¹ Dι ƴaƴaba thιιra khιιrɛ dι wa-n bιna ɔɔdara, gιdonι tibil na-n the wι thɩ̃ɛsɔ bã, ¹² kɛ dɔnι thɩ̃ɛɛkɛ wι cʋʋnanɩ dɛ, na dɛ bulosɔ, na boka ƴɩrɛ khiinoni the nʋɔ, na lẽbiisɔ, na kẽkẽ ɓɔna, na kẽkẽ sɛna himə himə, na kẽkẽ hɩlʋsɔ, na kẽkẽ sɛna kpakpakpa, na thɩr caarsɔɔkɛ n nɛnɩ yɩrra, na thɩr ƴɩrɛ wɩ cʋʋnanɩ thũgbu khɛla, na thɩr khena, na the sɛna, na thɛsɔ, na boka bulosɔ; ¹³ na bi kakɔ, na ni hʋ̃ʋ, na latιkolo, na thɩ̃ɛsɔɔkɛ hɔnι latιkolo ni caar, na thɩ̃ɛɛkɛ n hʋnanι daʋ, na dιvɛ̃, na niin, na mιιn, na thɩ̃ ƴιrɛ hɔnι jɔ, na nʋma, na banaa, na gãgʋʋsɔ, na gãgo hotorosɔ, na deasɔ, narakɛ tibil dolõosɔ. ¹⁴ Gιrɛra n kɔ fιnι thue gι hʋnɔna fɛr dιphã; dι gιrɛra fɛʋʋkɛ kɔɔ dɔ farnι nũfe thɩ̃ɛ, na thɩ̃ ɓɔna, gι buur farɛ fɛʋ, ga do dayιnanɛ bã. ¹⁵ Wιrɛ n ƴabananι ga thɩ̃sɔɔle a debi do lɛ̃lɛ dιι do dιιle dɔ nɔɔ, ƴɔɔ wa jιιl maar n fʋlɛ wι ɔɔ ’wãgara, wa khιιrɛ wa-n bιna, ¹⁶ wa-n sona aa: Gι puurore, gι puure dι kɔ̃tιιnaakɛ n kɔɔ tɔnι kẽkẽ ɓɔna, na kẽkẽ sɛna himə himə, na kẽkẽ sɛna kpakpa, dι gbana dɛ, na bokanaakɛ khiinoni the nʋɔ ka, na lẽbii, dι gbɛbιna dιbara, ¹⁷ gιdonι lιɛr bιɛl dapaara thakɛ lẽle thɩ̃ jɔjʋɔɔkɛ kʋɛrɛ koo. Dι bato vιrdara fɛʋ, na wιrɛ hanι kpaarɔ lanyʋɔnna, na wιrɛ n dɔnι thɔma bato bιnɔ, na wιrɛ hananι awι nyɛ̃kιɛr thɔ̃ dι wa-n do lanyʋɔnna, wι jιιlɛ ƴɔɔ. ¹⁸ Mɔ̃ wι yιnι isiir dι ga-n bã ɔɔ hιna, wι-n hulene dι wa-n sona ayɩ: Ʋmɔ̃ɔ dɩ hale a thʋ̃ hona kha dɩ kɔ̃tɩ̃ɩkɛ? ¹⁹ Sa kɛl thɩlãkobe dɩ wa-n dʋna yʋɔsɔ, a khɩɩna dɩ wa-n bɩna, dɩ wa-n hulena ayι: Gι puurore, gι puure dι kɔ̃tιιnana, kɛ ɔɔ lẽle thɩ̃ donι nɔɔ dι wιrɛ fɛʋʋkɛ hananι bato lanyʋɔnna debiro a do lɛ̃lɛ, gιdonι dapaara lιɛr bιɛl thakɛ a bũburone koo. ²⁰ Sι fɛr Thãgbaa dʋɔ na kãkanɛ ɔɔ bũburona, na nɛr tιι phuusɔ, na thɔ̃thɔnasɔ, na Thãgbaa bobonasɔ, gιdonι Thãgba kιιlnaanɛ puureraakɛ a cʋʋ nιnι. ²¹ Dι thɔ̃thɔ̃daar thuukɛ hananι fãga dιι və̃vĩə kɔɔ gbaar bokaarιkɛ kɔ̃tιnanι a ho nãa tə̃ə, a dʋna lanyʋɔnna sa so: Thakɛra wa dʋna na fãga Babιlɔn dι kɔ̃tɩ̃ιkɛ dι tibil na yιι bã. ²² Wa nι salã bιιn na nι wire afι bιnɔ bã; wa nι dakha bel ʋʋn na tutuu ʋʋn afι bιnɔ bã; wa yι nyɛ̃kιɛr thɔ̃ don wo thɔ̃ don afι bιnɔ bã; wa nι dakha jʋ naan afι bιnɔ bã. ²³ Wa yι lãphã dahιrɛsɔ afι bιnɔ bã; wa nι dakha kũu her na khɛ he tutugore afι bιnɔ bã, gιdonι afι ƴaƴabιdara kɔɔ dor kɔ̃tιna thιιra, afι sidumo thɩ̃ cʋʋ kɔɔ dor nɔɔ dι tibil caar fɛʋ kɔɔ buuro. ²⁴ Fɛr Babιlɔn dι bιnɔ wι kɔɔ yι Thãgbaa bobonasɔɔ tɔmɩ̃, na tιι phuusɔɔ tɔmɩ̃, na wιrɛ fɛʋʋkɛ wɩ kɔɔ kʋʋrnɩ thɩɩraakɛɛ tɔmɩ̃.

¹ A gele pɩ, mɩ nɩrɛ nɔ khena dɩɩ ho tibil jɔjʋɔɔ wi le Thãgbaa dʋɔ, dɩ wa-n so ayɩ: Aleluya, asɩ Thãgba hɩna taarɛ, na i dʋbɩrɛ, na fãga; ² gɩdonɩ ɔɔ kɩɩlsɔ sarrɛ gɩ dor dakha sobɔr. A kɩɩlnanɛ khɛ bɔdɛl kɔ̃tɩ̃ɩlera kɛ n kɔɔ kʋɛanɩ thɩɩ na ɔɔ bɔdɛl cʋʋ. A tiire ɔɔ thɔ̃daarsɔɔ tɔmɩ̃ hel a lʋʋrʋʋrɛ a tee. ³ Dɩ wɩ bir a ’loro balanyɔ wo aa: Aleluya. Dɩ ɔɔ isi bã dɩ ga-n jʋʋn bɔɔ fɛʋ waa khorr vʋ̃ʋ. ⁴ Dɩ kɔ̃tɩna kpelẽ yenã na thɩ̃ ye yenãale gburõku a fʋɔr Thãgbaakɛ tɔɔnɩ fãga too paarra dɩ wa-n sona ayɩ: Amɛn, aleluya. ⁵ Dɩ wire kɔɔ ther fãga too paar ayɩ: Na-n khɩa asɩ Thãgba, nɛrɛ fɛʋʋkɛ dɔnɩ ɔɔ thɔ̃darasɔ, na nɛrɛ fɛʋʋkɛ n maanɛɛnɩ tɩɩ pɔɩ a gbana tɩɩ kɔ̃tɩna. ⁶ Dɩ mɩ kɔɔ nɩrɛ nʋɔ dɩɩ ho tibil jɔjʋɔɔ wi, a hona yɔ jɔjʋɔ n hela, a hona dakha thãgba phɛɛ kɔ̃tɩ̃ɩ, dɩɩ so ayɩ: Aleluya, gιdonι Kɔ̃tιnιkɛ dɔnι asι Thãgba na fãga fɛʋʋ hɩ̃daar, ɔr ιrɛna ɔɔ fãgadaar do. ⁷ Sa-n kãkanɛ, sι dɔ daʋ n fʋ sι dakha, sa-n dʋba ɔɔ i, gιdonι Bana bii he wi daan, dι ɔɔ khɛr gbɛbιrɛ pι. ⁸ Thãgba haarɛ hʋɛ dι to kẽkẽ ɓɔ̃ bulo phιphιphιl; kẽkẽ ɓʋ̃ɔ dʋɔn tιι phuusɔɔ fιl sar thɔ̃ɔkɛ wι kɔɔ cʋʋnι. ⁹ Dι thɔ̃thɔ̃daar thu so marɛ ayι: Kherene ayɛ: Gι da wɛkɛra Thãgba wenι Bana bii he dιkora. Sι a so marɛ: Gekɛra dɔ Thãgbaa sobɔ thιmιι waa gel. ¹⁰ Dι mι kɔɔ jire ɔɔ ƴɛra ɩ̃ fʋɔrʋʋra, sι a so marɛ ɩ̃ jιɛ hιιn ma-n cʋa’ aa, thɔ̃ don ha nι dakha ɩ̃ kha, na ɩ̃ omisɔɔ kha, kɛ fɔrɔnι sobɔrιkɛ Jeju kɔɔ mιιnι; aa, ɩ̃ fʋɔrɛ Thãgba dɔrɔɔm. Jeju sobɔɔkɛ a kɔɔ mιιnι, gɛr n hana Thãgbaa bobonasɔ gιrɛ wι-n mιιnι. ¹¹ Agιpι mι yιrɛ Thãgbaa dʋɔ dιι khɛr, dιι do gãgo bulo gι, dι ʋrɛ jʋnɛnι gãgʋʋlera ɔɔ i n dʋɔn Sobɔ cʋʋdaar na Sobɔ bire. Kιιlʋʋkɛ a-n kιιlnι na kɛ̃kɛrɛnɛɛkɛ a-n kɛ̃kɛrɛnι gι sarrɛ. ¹² Ɔɔ yisɔ hʋrɛ dɔlιnanɛ, sι a subire fãga kpɛra jɔɔ ɔɔ yʋra, dι ire hale a khereraa kɛ tibil na jιnι sι agado ɔrra gaaga. ¹³ A tor kɩ̃kιιnιkɛ mʋanι tɔmιnna, sι ɔɔ i n dʋɔn: Thãgbaa so. ¹⁴ Dι Thãgbaa dι sɔrasɛ ha sιkaar na gãgo bulona dι wa-n kpaan, a to kẽkẽ bulona phιphιphιl. ¹⁵ Dι khalgbãakɛ n khɛnι bilə yenyɔ hale a thιι nʋɔra, kɛ a na kʋʋrnanι tibil caar fɛʋ. Ɔr na-n khɛ wι dakha na the gbʋʋl, dι ɔrra na nana be bi nã paar, dι dιvɛ̃ɛkɛ n nɛnanι Thãgba fãga fɛʋʋ hɩ̃daarι nĩkhi khe na ther. ¹⁶ A hananɛ ire dιι khere ɔɔ kẽkena na ɔɔ huurə ayι: Ɔr dʋɔn Fãgadaar kpιɛ fãgadarara, na Kɔ̃tɩ̃ kpιɛ kɔ̃tιnana. ¹⁷ Dι mι yιrɛ thɔ̃thɔ̃daar thu bιɛl dι jιιl wirera sa hulẽ dιι khιιr ka, a so ’lominə fɛʋraakɛ n uboni ƴũ dι wa-n kpaar ayι: Nι ιna a gbɛba pa bιɛl a khɔ Thãgbaa dιko kɔ̃tɩ̃. ¹⁸ Nι ɩna a khɔ fãgadaraa tomɩ, na sɔrasɛɛ kɔ̃tɩ̃sɔɔ tomɩ, na fãga cʋʋdaraa tomɩ, na gãgʋʋsɔ na wɩrɛ n jʋnɛ wɩnɩɩ tomɩ, na tɩbɩla fɛʋʋ tomɩ, waɩa na dea, tɩɩ mɔlɔ na tɩɩ kɔ̃tɩnasɔ. ¹⁹ Dɩ mɩ yɩrɛ nʋm, na thɩ fãgadara, na awɩ sɔrasɩsɔ fɛʋ, dɩ wɩ kpa jɛ pa bɩɛl wɩ ke kʋʋr na ʋrɛ jʋnɛnɩ gãgʋʋle wɩ kena dakha ɔɔ sɔrasιsɔ. ²⁰ Sι wι kɔɔ fʋrɛ nʋmιle na sõso bobonιle dakha, kɛ n kɔɔ cʋɛnι nɔ kpaa thɩ̃ɛ ɔɔ ƴɛra, kɛ dɔnι gιrɛ a-n kɔɔ gbanι da-n fιιlna wιrɛ kɔɔ ’lɛnι nʋmιlee jẽ, kɛ n gburõkuneni thιɛnaakɛ wι cʋʋnι dιι hʋʋ. Wι gba wɛr yenyɔ fɛʋ na yire a dʋna lireraakɛ dɔnι dɔ haar, ka girbi hanι dι ga-n hɩ̃. ²¹ Sι wιrɛ sɛnι khalgbãakɛ thɛnι gãgo jʋʋndaarιlee nɔra kɔɔ kʋrɛ wι, dι ’lominə fɛʋ kɔɔ hire awι nʋ̃ waa phi.

¹ Agιpι mι yιrɛ thɔ̃thɔ̃daar thu bιɛl dι the Thãgbaa dʋɔ da-n gbũ, a fʋrɔ thɛrɛ ’lee kõkor lakile na jɔrkɔ kɔ̃tɩ̃ι tə̃ə ɔɔ nyɔ̃kɔɔ. ² Dι a fʋrɛ gbakhookɛ dɔnι si tɩ̃ιlera, kɛ n dɔnι kɔ̃tɛɛbiisɔɔ kɔ̃tɩ̃, kɛ n dɔnι dakha Satã, a lii faa yɛna gbιlanι; ³ a dʋnaa a faa le thɛrɛ ’lee kõkorʋra sa kpala pɛr, a kpalana dakha jιιn, dι mɛ̃ a na yι hʋɛ a na-n fιιl tibil caar fɛʋra bã, phaphapha yɛna gbιlanι n ka gι pι. Sι agιpι dɔ wι thʋbʋʋ wι faa bɔɔ gbe. ⁴ Agιpι mι yιrɛ fãga too paarsɔ, dι wιrɛɛkɛ tɔɔrɔnι ’lɛr hʋɛ dι wa-n kιιl kιιlʋ; dι mι yιrɛ tιbιlaa thusɔ, kɛ dɔnι wιrɛ wι kɔɔ kuurni yʋʋ dιι do sobɔrιkɛ wι-n kɔɔ mιιnι Jejura na Thãgbaa thιmιιra dɔ nɔɔ, na wɛkɛ na kɔɔ gburõkuneni nʋmιnaale na thιɛnaakɛ wι kɔɔ cʋʋnι dιι hʋa’, kɛ dakha na kɔɔ ’lɛnι jιιn kobera dι nyɔɔna ga, dι wι bire a hana yiresɔ dιι do wɛr kɔɔ dɔ kha fãgadara na Kirisiti yɛna gbιlanιιlera. ⁵ Wɩ̃ khisɔɔkɛ sɛnι na bir na ’lɛ yirə’ foo yɛna gbιlanιιle n ka ɓo. Gιrɛ dɔ caca khi ιιrɛ. ⁶ Gι da wιrɛraakɛ na hanι caca khi ιιrɛraale, wι dor dakha tιι phuusɔ. Balanyɔ khir na puno na cʋʋ wɩ thɩ̃ɛ bã, sɩ Thãgba na Kirisitii bonɩ jidara wa do, dɩ wɛr na dɔ kha na ɔr fãgadara na cʋʋna yɛna gbɩlanɩɩle. ⁷ A yɛna gbɩlanɩɩle ka pɩ, gɛr wa khɛrrɔ Satã ɔɔ khaɩra na faa. ⁸ Dɩ a na ther a na-n fifilə tibil caarsɔɔkɛ hanɩ thɩ khu paar yenã, kɛ dɔnɩ Gɔɔgɩ na Magɔɔgɩ, a kpa wɩ a jɛ pa bɩɛl kʋʋrra, wa jɔrɛ na ho gbalãkothɩn lanyɔ̃ nʋɔra. ⁹ Wɩ ɩɩrɛ a gba thɩɩra a dii tɩɩ phuusɔɔ jɛ pa, na dɩɩkɛ Thãgba nanɩ. Sɩ dɔɔ ther Thãgbaa dʋɔ a thii wi. ¹⁰ Dɩ Satãalera n kɔɔ fɩlɛ wɩnɩ, wɩ dʋnaanɛ dɩphã a faa lireraakɛ dɔnɩ dɔ haar na girbi, ka nʋmɩle hanɩ na sõso bobonɩle, liir wa-n ’wãga dɩwɩlʋ na dɩtɩnɛ bɔɔ fɛʋ waa khorr vʋ̃ʋ. ¹¹ Dι mι kɔɔ yιrɛ fãga too pa bulo tə̃ə na ʋrɛɛkɛ kɔɔ tɔɔrɔnι; dι ɔɔ ƴɛbʋrɔ thιι na ƴũ fuure sa sιι; wa hale bã. ¹² Le mι yι khe kɔ̃tιna na tιι mɔlɔsɔ, dι wa-n jιιl fãga too pa ƴιɛra, dι sɛbɛ phubire, dι sɛbɛ kpιι hale wo a phubi, kɛ dɔnι yi sɛbɛ; dι Thãgba kιιlnanɛ khe mɔ̃ a yιɛnι dιι khere sɛbɛraalera mɔ̃ awι thɔ̃ hanι. ¹³ Dι lanyʋɔn ’laarɛ kheekɛ haaraanι, dι khir na khĩdi dιι ’laa kheekɛ hanι awι pa dakha, dι Thãgba kιιlnanɛ kheele fɛʋ bιɛlbιɛl mɔ̃kɛ awι thɔ̃sɔ hanι. ¹⁴ Dι wι gbaar khir na khĩdi dιι a dʋna faa lireraakɛ dɔnι dɔ haar. Lireele dɔnι dɔ haar gɛr dʋɔn balanyɔ khir. ¹⁵ Dι ʋrɛ ɔɔ i na kherenι yi sɛbɛra ga, wι dʋnaanɛ faa lireraakɛ dɔnι dɔ haar.

¹ Dι mι kɔɔ yιrɛ ƴũ phaa na thι phaa, gιdonι caca ƴũukɛ na caca thιιkɛ kɔɔ phor ka, dι lanyʋɔn dakha na hale bã. ² Dι ĩ yι dι phuukɛ dɔnι Jerujalɛm phaa dιι the Thãgbaa pa dι ga-n gbũ, a gbɛbιrι pι a ho khɛ biireekɛ gbɛbanι pι ɔɔ ko n kpaa. ³ Dι mι kɔɔ nιrɛ nɔ khιιr dιι the fãga too paar a so ayι: Hιnɛ, Thãgbaa cɔ pa ha kha na tιbιla dιphã, dι ɔr na-n tɔɔ kha na wɛr. Wɛr na dɔ ɔɔ too dι Thãgbaa thɛthɛra na haan kha na wɛr. ⁴ Ɔr na pιιnɛ yilẽbe fɛʋ awι yirə. Khir na hale bã, benιɛ na hale bã, khιιrɛ na hale bã, nιwɛ na hale bã, gιdonι caca thĩɛ phor ka. ⁵ Dι ʋrɛɛkɛ tɔɔnι fãga too paar sor ayι: Hιnɛ, mι cʋʋrɛ thɩ̃ɛ fɛʋ dιι do daphaa. Dι a so marɛ ayι: Khera gιdonι sorιkɛra sobɔr gι waa gel, a do thιmιιrιkɛ teananι ha pɛrɛ. ⁶ Dι a so marɛ wo ayι: Gι daan mɛ̃. mɛr dʋɔn Alfa na Omega, kιrʋ dʋɔn fʋ paar na khu paar. Ʋrɛɛkɛ yɔlkhaa fʋnι, ma haarɛ yi yɔ bu ka nyʋɔn khaar da yɔ; ⁷ gɛr dɔ gιrɛ ʋrɛ kəəneni na ’lɛnι, dι ma dor ɔɔ Thãgba a do ι bikuun. ⁸ Sι ado wιrɛ na hananι ’laraa gι, na ha pɛ ’leedara, na khaakhaardara, na tιι kɔ, na bɔdɛl cʋʋdara, na dɔdɔɔdara, na thɩl je, na sõsodara fɛʋ, awι pa na dɔ lireekɛ dɔnι dɔ haar na girbi, gɛr dɔ balanyɔ khir. ⁹ Agɩpɩ thɔ̃thɔ̃daar thu bɩɛl thɔ̃thɔ̃daar thu makonyɔraakɛ fʋrɔnɛnɩ bilẽse makonyɔɔkɛ henəni pɩpɩɩ thɩlkena makonyɔ pɔr, a so mar ayɩ: Ɩna kɛ, ma nɩ farɛ khɛrɩkɛ dɔnɩ Bana bii khɛr. ¹⁰ Dɩɩ do Thu Phuu gɩ, a gba mɩ jʋʋnna gɔ̃gɔ̃ kɔ̃tɩɩnaakɛ gbaanɔnɩ, a nɩ mar dɩ phuukɛ dɔnɩ Jerujalɛm, kɛ thɛnɩ Thãgbaa pa ƴũ a gbũ, ¹¹ kɛ Thãgbaa i dʋbɩ donɩ nɔɔ dɩ ga-n carbara. Ɔɔ carã pa n hʋrɛ kha na bokanaakɛ khiinoni the nʋɔ, gɩ hor jasɩpɩ bokaarɩkɛ n hɩlanɩ hɩɩn khaa. ¹² Go kɔ̃tɩ̃ gbãa diire dɩɩrara, kɛ hananɩ lõfonʋɔ yʋɔr yenyɔ, dɩ thɔ̃thɔ̃daar thu yʋɔr yenyɔ hale lõfonʋɔ yʋɔr yenyɔrara, dɩ Ɩjɩrayɛl bɩsanaa ca yʋɔr yenyɔɔ i hale a khere lõfonʋɔsɔrara. ¹³ Wi phã paar lõfonʋɔ yẽther; ka wire n phanɩ dɩ pɛ nyɔ̃bɔɔ lõfonʋɔ yẽther; ka wire n phanɩ dɩ pɛ nyɔ̃bɩlã lõfonʋɔ yẽther; gananɔ lõfonʋɔ yẽther. ¹⁴ Dɩ dɩɩlee gora dɛɛnɛ go kpɛɛrɛ yʋɔr yenyɔra, ka Bana bii thɔ̃thɔna yʋɔr yenyɔɔ i kherenɩ. ¹⁵ Ʋrɛɛkɛ n mɩana mɩnɩ a fʋrɔrɛ jʋmũu, dɩɩ do thɩ̃ mɩɛdaa sa do dɛ haar, kɛ a na mɩɛnanɩ dɩɩlera, na ɔɔ lõfonɔsɔ, na ɔɔ go. ¹⁶ Mɔ̃ dɩɩra mɩnɩ ʋ̃ dɩ gãgã mãkhananɛ ʋ̃ dɩ gãgã phɛrɛ; mɔ̃ a gbaannɩ na mɔ̃ a pɩɛrnɩ gɩ mãkharɛ. Dɩ a mɩɛrɛ dɩɩra na jʋmuunə, dɩ gbãʋ thɔɔrɛ kilə gbɩlanɩ yenyɔ na taanyɔ. Gbãʋ, na pɛʋ, na jʋʋnɛ mãkharɛ wɛrɛ. ¹⁷ A mɩɛrɛ gʋʋ dɩɩ thɔɔ mɛtɛrɛ kpalãther yenã; mɩɛdaakɛ tibil n mɩɛnanɩ thɔ̃thɔ̃daar thuule mɩɛna. ¹⁸ Gʋʋra mɩrɛ na jasɩpɩ bokana, dɩ dɛ haar dɩɩra mɩna dɩɩ ho hɩɩn haar. ¹⁹ Dɩɩlee go kpɛɛsɔra bokanaakɛ khiinoni the nʋɔ ka gɩ kɔɔ gbɛbɩna: Caca go kpɛɛrɛ jasɩpɩ bokana gɩ, balanyɔdaa do safɩɩr bokana, balãtherdaa do agatɩ bokana, balanãdaa do emərodi bokana, ²⁰ balamɔɩdaa do onɩsɩ bokana, maadõdaa do sardʋan bokana, makonyɔdaa do kirijoliti bokana, makõtherdaa do beril bokana, yʋɔr phe bidaa do topajɩ bokana, yʋɔrdaa do kirijopɩrasɩ bokana, yʋɔr bɩɛldaa do turkʋajɩ bokana, yʋɔr yenyɔdaa do amɛtɩsɩtɩ bokana. ²¹ Lõfonʋɔ yʋɔr yenyɔɔlera dor lẽbii yʋɔr yenyɔ. Ʋ lõfonɔ do lẽbu bɩɛl, ʋ do lẽbu bɩɛl; sɩ dɩɩlee kʋlã hʋ dɛ haarra gɩ do koo, a ho hɩɩnʋ cacaca. ²² Sɩ ma yɩ Thãgbaa cɔ dɩɩraalera ga, gɩdonɩ Kɔ̃tɩnɩkɛ dɔnɩ Thãgba fãga fɛʋʋ hɩ̃daar ɔr na Bana bii dɔ Thãgbaa cɔ mɛ̃. ²³ Dɩɩra na hana wiree ƴaal dɩ por gɩ gɩ hɩrɛnɛna’, gɩdonɩ Thãgbaa carbara hɩrɛnɛɛ, dɩ Bana bii do dakha ɔɔ lãphã. ²⁴ Dι ɔɔ dahιrɛrara tibil caar fɛʋ na-n ιιr, dι fãgadara thιιraakɛ na gbaar awι nyɔ̃kor bɔ a na pɔnanaa. ²⁵ Gιdonι dιtιnɛ na hala’, ɔɔ losɔ na hana khaanɛ dιwιlʋla ga. ²⁶ Tibil caar fɛʋ na gbaar awι nyɔ̃kor bɔ na cʋʋr a na pɔnanaa. ²⁷ Thɩ̃ bɩɛlɩkɛrakɛ dɔnɩ thɩ̃ bise na lõ la’, na tɩbɩlaakɛ n cʋɛnɩ kpɔ̃kpɔrɔ̃ thɩ̃ɛ na wɩrɛ n kureni sɔ̃sɔ na lõ la’; wɩrɛ dɩbara awɩ i kherenɩ yi sɛbɛraakɛ dɔnɩ Bana biida, wɛr na lona.

¹ Dɩ thɔ̃thɔ̃daar thuule kɔɔ nɩ marɛ mɩɩr yɔ yire wɩwɩwɩl, kɛ n carbaranɛnɩ a ho hɩɩnʋ, a the Thãgba na Bana bii fãga too para, ² dɩ ga-n cel dɩɩlee kʋlã hʋ thɩ̃thιɩn. Dɩ mɩɩr gɛla yenyɔraale thɩr yire hale phonɩ dɩ ga-n se nyẽbe yʋɔr yenyɔ yɛ bɩɛlla, pora pora gɩ-n se, dɩ ɔɔ fa dor thɩɩ tibil caarra. ³ Sʋɔn na hale bã. Thãgba na Bana bii fãga too pa na haan dɩɩraalera, dɩ ɔɔ thɔ̃dara na-n dʋʋraarɛ fɔfʋɔr thɔma, ⁴ wa yɩrɛ ɔɔ ƴɛbi, dɩ ɔɔ i na hale awɩ kobisɔra. ⁵ Dɩtɩnɛ na hale bã, dɩ tibil na hana lãphã ƴaalɛ dɩ wiree dahɩrɛ ƴaal gɩ bã, gɩdonɩ Thãgbaakɛ dɔnɩ Kɔ̃tɩn na-n hɩrɛnɛ wɩ; wa dor fãgadara bɔɔ fɛʋ waa khorr vʋ̃ʋ. ⁶ Dɩ a so marɛ ayɩ: Thɩmɩasɔɔkɛra, sobɔr gɩ waa gel, a do thɩmɩaakɛ teananɩ ha pɛrɛ. Kɔ̃tɩnɩkɛ dɔnɩ Thãgbaakɛ n ’laanɛnɩ ɔɔ Thu bobonasɔra, ɔr thɔna ɔɔ thɔ̃thɔ̃daar thu a nɛna ɔɔ thɔ̃daarsɔ thɩ̃ɛɛkɛ na dananɩ kɔrɔ. ⁷ Hɩnɛ, ma ɩnɛ kɔrɔ. Gɩ da ʋrɛraakɛ n cʋɛnɩ gɩrɛ Thãgbaa bobonɩ thɩmɩɩkɛ hanɩ sɛbɛraakɛ sonɩ. ⁸ Mɛr Jã kɔɔ nɩɛnɛ ga thɩ̃ɩkɛra a yɩna gɩ. Dɩ ɔbɔɔkɛ mɩ nɩɛnɩ pɩ a yɩna gɩ, mɩ kɔɔ jire thɔ̃thɔ̃daar thuulee ƴɛra kɛ n nɛ marnɩ ga thɩ̃sɔɔlera ɩ̃ fʋɔrʋʋra. ⁹ Sɩ a so marɛ ayɩ, ɩ̃ jɩɛ hɩɩn ma-n cʋa’ aa, thɔ̃ don ha nɩ dakha ɩ̃ kha, na ɩ̃ omisɔɔkɛ dɔnɩ bobonaa kha, na wɩrɛ n cʋɛnɩ gɩrɛ sɛbɛɛkɛ sonɩ aa, ɩ̃ fʋɔrɛ Thãgba dɔrɔɔm. ¹⁰ Dɩ a so marɛ ayɩ: Thãgbaa bobonɩ thɩmɩɩkɛ hanɩ sɛbɛraakɛ, fa-n kpala na jɩɩna’, gɩdonɩ bɔɔ n daan. ¹¹ Tibilikɛ gõgolonenɩ, a na-n jalana ɔɔ gõgolona; dɩ ʋrɛɛkɛ biseneni, a na-n jalana ɔɔ bisera; tɩɩ sarʋ dakha na-n jalana ɔɔ fɩl sarra; dɩ ʋrɛɛkɛ phonɩ a na jalana ɔɔ phurə. ¹² Hɩnɛ, ma ɩnɛ kɔrɔ, dɩ mɩ hananɛ khaardaa a na lɩmɩ tɩbɩla fɛʋ bɩɛlbɩɛl mɔ̃kɛ ntɛɛ thɩ̃ cʋʋ hanɩ. ¹³ Mɛr dʋɔn Alfa na Omega, kɩrʋ dʋɔn cacadaar na pɩpɩɩdaar, fʋ paar na khu paar. ¹⁴ Gɩ da wɛkɛra n cɔcɔɔnɛnɩ awɩ kẽkẽ, mɛ̃ wa hana hʋɛ a na kho thɩr yiree bi, a na lõ dakha na dɩɩlee lõfonɔ. ¹⁵ Sɩ bena, na sidumodara, na bɔdɛla, na tɩɩ kɔ, na thɩl je, na wɩrɛ sõso kuure n danɩ haarra dɩ wa-n kuur sɔ̃sɔ, wele fɛʋ na hale dɩ bɩnɔa’. ¹⁶ Mɛr Jeju, mɛr thɔna ɩ̃ thɔ̃thɔ̃daar thu a mɩa ga thɩmɩɩsɔɔkɛra a hana we gbɛbɩdara. Mɛr dʋɔn Davɩdɩɩ ca, ɔɔ bi məl ha mɩ, dɩ ɩ̃ dona duur ƴepələ̃bireekɛ n caranɛnɩ. ¹⁷ Dɩ Thu Phuu na Bana bii khɛr dee ayɩ: Ɩna. Ʋrɛɛkɛ nɩɛnɛnɩ dɔ a dee dakha ayɩ: Ɩna. Dɩ ʋrɛɛkɛ yɔlkhaa fʋnɩ a pɔ, na ʋrɛ n ƴaalɛnɩ yɔ yire a pɔ gba khaar. ¹⁸ Sɩ mɩ-n kpãkpaanɛ tibil wo tibilləəkɛ n nɩɛnɛnɩ Thãgbaa bobonɩ thɩmɩɩkɛ hanɩ sɛbɛraakɛ ayɩ: A ntɛ gba dɩkha a ɓaan, Thãgba na gbaar thɩlkenaakɛ kheranɩ kɩɛr sɛbɛraakɛ a na pɩɛraa. ¹⁹ A ntɛ tiro dɩkha Thãgbaa bobonɩ thɩmɩɩraakɛ hanɩ sɛbɛraakɛ, Thãgba na tire ɔɔda dakha thɩr yirera na dɩ phuurəəkɛ kheranɩ kɩɛr sɛbɛraakɛ. ²⁰ Dɩ ʋrɛɛkɛ gbaannɩ thɩmɩaakɛ da-n mɩɩ dɩɩ do sobɔr gɩ ayɩwɔɔ aa: Ɔɔ, ma ɩnɛ kɔrɔ. Amɛn, ɩna Jeju Kɔ̃tɩn. ²¹ Jeju Kɔ̃tιn na-n jɛ nɛrɛ fɛʋ bʋɔra.