FILIPIDARA

FILIPIDARA

¹ Mɛr Pol na Timothe, sɛrkɛ dɔnι Jeju Kirisitii thɔ̃dara, thɔna sɛbɛɛkɛ a ha Jeju Kirisitii tɩɩ phusɔɔkɛ hanɩ Filipi, na we gbɛbɩdaraa hɩɩndara, na we gbɛbɩdaraa thɔ̃ dodara. ² Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra. ³ Bɔɔ fɛʋʋkɛ ma-n jɩna nɩnɩ mɩ-n khɩɩrɛ ɩ̃ Thãgba. ⁴ Bɔɔ fɛʋʋkɛ mɩ-n bɩɛlnɩ Thãgba, daʋ mɩ-n bɩɛlna dɩ ma-n pɛ nar fɛʋ. ⁵ Gɩdonɩ nɩ-n bulle tutugo bʋɔɔ thɩmɩɩ mɩɩrɛ, dɩɩ fʋna caca wire a dana nɛnɛ̃kɛ. ⁶ Mɩ jɩrɛ tue dɩ ʋrɛ fɔnɩ anɩ hara thɔ̃ bɔ caakɛ da-n cʋʋ, a na jalna gɛr waa na ba pɩɩr Jeju Kirisitii wirə. ⁷ Gɩ teere kha ɩ̃ hana kpɩɛr caar thakɛ nɛrɛra, gɩdonɩ mɩ fʋ nɛr na ɩ̃ ha, gɩdonɩ nɛrɛ fɛʋ nɩ bulle kha na mɛrɛ bɔ jɩɩrɩkɛ Thãgba kɔɔ jɩ mɩnɩ, a khaɩra mɩ ha, a ɩ̃ kɛ̃kɛrɛnaakɛ mɩ-n kɛ̃kɛrɛnɩ tutugo bʋɔɔ thɩmɩɩ n jɩlɛ kɩbɩ gɩ. ⁸ Thãgba dɔ ʋrɛ tɔ garnɩ yire dɩ ɩ̃ ha hor dɔɔ nɛrɛ fɛʋʋ sora, naʋraakɛ mɩ hana narnɩ ɓoɓo dɩɩ do Jeju Kirisitii pa gɩ the. ⁹ Dɩ gɩrɛ mɩ-n bɩɛlnɩ Thãgbara dʋɔn, anɩ naʋ n khɔna na pɩɛr wire wire na jɩɩr na kpɛsɛ hulone, ¹⁰ nɩ puno na-n jɩ gɩrɛ bʋɔnɔnɩ a jɔ fɛʋ, gɩ do nɔɔ nɩ phu nɩ ’lee dɩ paar Kirisitii wirə; ¹¹ nɩ hinə fɩl sar beekɛ Jeju Kirisiti n cʋʋnɩ dɩ ga-n se, ga-n dʋbɩ Thãgbaa i ga-n khɩɩnaa. ¹² Omɩna, mɩ ƴaalɛ nɩ jɛ dɩ gɩrɛ kɔɔ dana mɩnɩ ka cʋʋrɛ dɩ tutugo bʋɔɔ thɩmɩɩ ka dɩ ga-n jal ƴɔɔ. ¹³ Gɩdonɩ fãgadaarɩ gardɩsɔ fɛʋ na wɩ̃ tibilsɔ paar fɛʋ jɩrɛ dɩ Kirisitiida dɔ nɔɔ dɩ ɩ̃ ha khaɩraakɛ. ¹⁴ Dɩ ɩ̃ khaɩ lona cʋʋrɛ dakha omɩna jɔɔ dɩ wɩ faa haar a ha Kɔ̃tɩn, a hanana ’lar a pɛr dɩ wa-n mɩɩna Thãgbaa thɩmɩɩ, sɩ maar na-n fʋ wa’. ¹⁵ Sobɔr gɩ, ɩkhasɔ n mɩɩrɛ Kirisitiida na gbugi na nɔkhaa, wɛ na-n mɩɩ na ha bʋɔ kpẽgelẽ; ¹⁶ sɩ ha bɔdaraakɛ wer n mɩanɩ naʋra gɩ the, gɩdonɩ wɩ jɩrɛ dɩ Thãgba pɛ marɛ ɩ̃ tea na pɛ tutugo bʋɔɔ thɩmɩɩra. ¹⁷ Sɩ nɔkhadaraale wer n mɩanɩ Kirisitiida, awɩ dɩbara na kpɩɛrra gɩ the, ga do bɩ̃ bʋɔra gɩ tha’. Wɩ-n ƴaalɛ ɩnɩ-n birə na pɛ mar bɔ gaarɛ ɩ̃ khaɩdaar dora. ¹⁸ Anye ga cʋʋ? Gɩdonɩ a gɩ ha mɔ̃ gɩ hanɩ, gɩ dɔ bɩ̃ puu agɩbo bɩ̃ bʋɔ, sɩ Kirisitiida n mɩɩrɛ, dɩ gɩ da marɛ, sɩ ga da marɛrakɛ ga-n jalna. ¹⁹ Gɩdonɩ mɩ jɩrɛ tue dɩ ɩ̃ taadara gele na do fɛʋ, gι the anι Thãgba bιɛlla, na bullelaakɛ Jeju Kirisitii Thu n bulni, ²⁰ mɔ̃kɛ mι-n pιɛrnι gιrɛ na haar fɛʋ, dɩ ma-n pɛna nũu, dɩ yicuru na fʋ ma’, sɩ mɩ ka hananɛ ’lar a jɩ dɩ mɔ̃kɛ gɩ-n kɔɔ hanɩnakɛ wire wire mɛna ga ha nɛnɛ̃kɛ, Kirisiti na ’lɛr cʋrɛ ɩ̃ tomɩra, ado ɩ̃ yi hanana gɩ, ado ɩ̃ khirə gɩ. ²¹ Gɩdonɩ ado mɛrra gɩ, Kirisiti dɔ ɩ̃ yi hana, dɩ khir dɔ khor ’lɛdaa. ²² Sɩ ado ɩ̃ yi hana kɛ thɩɩra na dor nɔɔ ɩ̃ thɔ̃ na-n jal ƴɔɔ, ga dor ma jɩ gɩrɛ ma phiirni bɔɔbɔa’. ²³ Jɛ paar yenyɔ mɩ-n jɛ: Mɩ-n ƴaalɛ ka ɩ̃ thɛ jala tɔɔ kha na Kirisiti, gɛr dɔ gɩrɛ baannɩ; ²⁴ sɩ mɔ̃ ga bɔ narnɩ dɔ kɩrʋ gɩ teere kha ɩ̃ hana yire kɛ tomɩrra. ²⁵ Dɩ gɛr gɩ mɩ jɩnɩ tue dɩɩ do sobɔr gɩ, mɩ jɩrɛ dɩphã ma toore, ma sɩrɔrɛ sɩ ɩ̃ toona nɩ fɛʋ gɩ cʋʋ nɩ na-n bãba ha pɛrɛɛ da hanana; ²⁶ dɩ mɛ̃ bɔɔkɛ ma birni wo na ha anɩ thɩ̃thɩɩn, ɩ̃dara na dor nɔɔ na-n khɩɩrɔ Jeju Kirisiti jɔɔ. ²⁷ Sɩ thɩ̃ bɩɛl, nɩ hanana fɩlɛ gɩ tee kha na Kirisitii tutugo bʋɔɔ thɩmɩɩ, dɩ mɛ̃ ado ma pɔr na yɩ nɩ ado ma-n pɔa’, sɩ ɩ̃ nɩɛ wa-n mɩɩ mɔ̃kɛ nɩ tɩnɩ kɩbɩ kpɩɛr bɩɛl hananɛna, dɩ na-n kɛ̃kɛrɛ̃ na ha bɩɛl ha pɛ kɛ̃kɛrɛnɛ tutugo bʋɔra. ²⁸ Na-n do maar na-n fʋ nɩ anɩ lãlaardarasɔɔ phərəra thɩ̃ bɩɛllalaka’, gɛr na nɛ war dɩ wɛr na ka na bũburõ, sɩ gɩ nɩna nɛr dɔ wɩrɛ ’lɛnɩ taarɛ dɩɩ do Thãgbara gɩ the. ²⁹ Gɩdonɩ Thãgba kɔɔ jɩ nɛr bʋɔra, ga do dɩ na pɛ Kirisiti haar dɩbara ga, sɩ na-n gaarɛ bʋɔ ɔɔ sora. ³⁰ Gɛrrara nɩ-n kɛ̃kɛrɛnɔ kɛ̃kɛrɛ̃ ca bɩɛlɩkɛra nɩ kɔɔ yɩ mɩnɩ dɩ ma-n kɛ̃kɛrɛna, dɩ nɩ nɩɛrɛ dɩ kɛ̃kɛrɛnɔna mɩ harakɛ gɩrɛ ’lo.

¹ Anɩ bɩɛl do na Kirisiti dor gɩrɛ n thɔɔ nɩnɩ bɛ? Dɩ naʋ n ma narɛ bɛ? Dɩ Thu Phuu kuune n hale bɛ? Dɩ bɔ jɩ kpɩɛrɛ na bɔ fʋʋr n hale bɛ? ² Nɩ cʋɛ thale daʋ n hi mar phi, mɔ̃ nɩ-n hananɩ kpɩɛr bɩɛl, na naʋ ca bɩɛl, nɩ dɔ bɩnɛ n donɩ kha bɩɛl, nɩ hanana dakha kpɩɛr ƴɛ bɩɛl. ³ Na-n cʋʋ thɩ̃ bɩɛllakɛ na dɩbara na kpɩɛrɛ na i ƴaala’, sɩ nɩ dɔ dɩbara jor n cʋʋ nɩ, ʋ na-n hɩɩn ʋ, mɔ̃ a kɔ̃tɩnɩ a jʋɔ. ⁴ Na-n ƴaalɛ gɩrɛ na bɔnɩ ʋkhasɔra, ga do gɩrɛ dɔnɩ anɩda dɩbara ga. ⁵ Nɩ hanana ha caakɛ Jeju Kirisiti kɔɔ hananɩ: ⁶ “Kɛkɛkɛrarakɛ bɩɛlla a do na Thãgba, sɩ aa kɔɔ hɩɩn ɔɔ Thãgba doole dɩɩ do thɩ̃ɛɛkɛ a na fʋnɩ na khɩmɩnɔ kĩkĩkə̃’. ⁷ Sι ɔɔ thɛthɛ kɔɔ faa ɔɔbara sa debi a gba dee dʋʋr, a hana tomιr tibil khaa, dι mɔ̃ a debini a do tibil, ⁸ a wurre ɔɔbara a nι nũu a dana khir, kʋkʋ thιrʋra a khirakɛ ɓoɓo. ⁹ Gɛrra gɩ dɩ Thãgba thʋ̃ ɩɩrʋʋ dɩ do dakpɩɛ, a hanaa ire dɩɩ kəə iera fɛʋ. ¹⁰ Dɩ ireelera a hananɩ da-n do Jeju, na dor nɔɔ, nɛkhilə fɛʋ thãgbara ƴũ, na thɩɩra, a gbana tɩɛrdara fɛʋ, na gulẽgaraarɛ, ¹¹ dɩ delẽbe fɛʋ na caan phasɩ nayɩ: Jeju Kirisitira dor Kɔ̃tɩn, dɩ Thãgba Thɩrɛ na ’lɛr i dʋbɩrɛ.” ¹² Mɛ̃ gɩ ɩ̃ omisɔɔkɛ mɩ-n nanɩ, mɔ̃kɛ nɩ-n kɔɔ nɩ mɩnɩ nũu wire fɛʋ, na-n dɔ thɔma anɩ taarara na cʋrɛ na jẽu, ga-n do bɔɔkɛ mɩ-n hanɩ kha na nɛrɛ dɩbara ga, sɩ nɩ ka na cʋɛ ga-n jɔ mɛ̃ bɔɔraakɛ ma hanɩ kha na nɛrɛ bã. ¹³ Gɩdonɩ Thãgba dɔ ʋrɛ n pɩɛrnɩ ƴaalɛ anɩ hara na punone dɩ na-n cʋʋna gɩrɛ a-n ƴaalnɩ ga-n cʋɛ. ¹⁴ Na-n cʋɛ thɩ̃ɛ fɛʋ sɩ na-n ƴɛa’, na-n bana thɩ̃ banaa dakha ga; ¹⁵ mɛ̃ na ’lee dɩ paar, na hana sɩ paara’, nɩ do Thãgbaa bɩsãsɔɔkɛ ’leanɩ sor tɩbɩlaakɛ golonenɩ a kʋɛna dakhaa thɩ̃thɩɩn, kãkɛra nɩ-n caranɩ dahɩrɛ khaa thɩɩra, ¹⁶ dɩ na-n ’laana yi thɩmɩɩr; thale na dɔ ɩ̃ məbida Kirisitii wi, dɩ ga do mɔlɔ mɩ kɔɔ ca ɩ̃ kɔlɔ̃kɔa’, ga do mɔlɔ mɩ kɔɔ do dakha thɔma woa’. ¹⁷ Anɩ ha pɛ dor bonɩ ji thɩ̃ɛɛkɛ nɩ-n hanɩ Thãgba, sɩ ado gɩ teenanɛ ɩ̃ tɔmɩ̃ n deere ga bonɩ jirəəle dakha, gɩ da marɛ, dɩ gɩ da marɛrakɛ wo na nɛrɛ. ¹⁸ Nɛrɛ dakha nɩ dɔ ga-n da nar ɔmɛ̃, dɩ nɛrɛ na mɛrɛ nɩ dɔ ga-n da sar kha. ¹⁹ Mɩ pɛrɛ haar ado Jeju Kɔ̃tɩn tu, kɩɛr na gbe ma thɔ̃ narɛ Timothe, ɩ̃ puno ɩ̃ nɩ anɩ tutugo ɩ̃ faa haar mer. ²⁰ Gɩdonɩ ma hana tibilikɛ sɩ-n ’linəni kha ɔɔ kha, kɛ n kpɩɛrna nɩnɩ na haar vʋ̃ʋa’. ²¹ Gɩdonɩ tɩbɩla fɛʋ gɩrɛ na bɔ warnɩ dɩbara wɩ-n ƴaal, sɩ wa-n ka ƴaal Jeju Kirisitiida ga. ²² Nɩ jɩrɛ mɔ̃ jʋʋrɛ kɔɔ nɩnanɩ Timothee tιι bɔ do, dι mɔ̃kɛ bιsaan n hanι na ɔɔ thɩ, mɛ̃ a kɔɔ ha na mɛrɛ tutugo bʋɔɔ thɔna. ²³ Mι pɛrɛ haar ɔr ma thɔ̃ dapaara ado mι jιι jɩ mɔ̃ thɩ̃ɛ na ha marnɩ. ²⁴ Sɩ mɩ hananɛ ha pɛrɛ gel Kɔ̃tɩnna, dɩ mɛrɛɛ thɛthɛ na pɔr le kɩɛr na gbe. ²⁵ Mɩ yɩɛrɛ dɩɩ bɔr dɩ ma thɔ̃ nar Epafʋrɔdɩtɩra ɩ̃ omi, kɛ dɔnɩ ʋrɛ sɩ kɔɔ donanɩ kha thɔma, na ʋrɛ sɩ kɔɔ kɛ̃kɛrɛnanɩ kɛ̃kɛrɛ̃ bɩɛl, kɛ dɔnɩ ʋrɛ nɩ kɔɔ thɔnɩ dɩ bul mi. ²⁶ Gɩdonɩ anι thu fʋʋrɛ ka, dι gι pιɛraarɛ dɛr nιɛrɛraakɛ nι nιɛnι ɔɔ khora. ²⁷ Sobɔr gι, gι kɔɔ khʋʋrɛ waa dɩ thɔɔ khir, sɩ Thãgba kɔɔ jɩɩrɛ bʋɔra, sɩ ga do ɔr dɩbara Thãgbara kɔɔ jɩ bʋɔra ga, sɩ mɛrɛɛkɛrakɛ dakha, dɩ mɛ̃ ma hana gbobire na bir na dɛbɩ gbobirera ga. ²⁸ Gɛr gɩ mɩ thʋɔnɛ kɔrɔ dɩ mɛ̃ ga da nar mɔ̃ na birni na yɩɩ, gɩ do nɔɔ dakha ɩ̃ gbobi n ba gbe. ²⁹ Dɩ nɩ teaa na daʋ vʋ̃ʋ Kɔ̃tɩnɩ tee, na-n cɔ tibil ca wele. ³⁰ Gɩdonɩ Kirisitii thɔ̃ dɔ nɔɔ dɩ danɔ khir, fɩɩʋ sɛra sɩ ɔɔ yi n bu, mɔ̃ a gbanɩ thɔmaakɛ nɛrɛɛ thɛthɛ na kɔɔ punoni a cʋʋ mara’, da-n cʋʋ.

¹ Gɩrɛ sɛnɩ ɩ̃ omisɔ, na-n hana daʋ mɔ̃ nɩ donɩ Kɔ̃tɩnɩda. Ga-n yaa mɩ fɩɩʋrakɛ dɩ ma bir na ’loro gɩrɛ mɩ kɔɔ khere narnɩ mamara ga, dɩ gelela anɩ bulda gɩ do. ² Na-n jɩɛ hɩɩn benasɔ, na-n jɩɛ hɩιn thɔ̃daar puusɔɔlera, na-n jιɛ hιιn wιrɛɛkɛ n ƴaalɛnι na-n liirene tomιr. ³ Gιdonι wιrɛ n kuroni khʋ̃ kur bʋɔ, sɛr wɛ, kɛ n fʋɔrɛnι Thãgba dιι do Thu Phuu pa gι-n the, kɛ Jeju Kirisiti donι nɔɔ dι sa-n məbi, a dona wιrɛ na-n bɔnι dι wa-n ιι gιrɛraakɛ tibil yinə n yɩna’. ⁴ Mɛrɛ dakha mι punone pɛr haar mer gιrɛraakɛ tibil yinə n yιnι, dι ado gιrɛ tibil yinə n yιnι wι yι wι bɔ na ιarɔ, ga dor mɛr ka jɔ: ⁵ Wι kɔɔ kur mer khʋ̃ʋ wire makõther wirera, Ɩjιrayɛl bire ha mι, dι ɩ̃ do Bɛ̃jamɛ̃ɛ ca, Ebirə kɔna mι dι ɩ̃ do Ebirə bʋɔ; ado jɔfʋ hιιnɛna gι, jɔfʋ bʋ dʋdaar ha mι, ⁶ ado gbɛ̃gbɛrɛ̃daara gι, we gbɛbιdaraa kpoodaar ha mι, ado fιl sar ’lɛrra gι jɔfʋ hɩɩnɛna, sι paar na ha mar gɛrra ga. ⁷ Sι ga thɩ̃sɔɔlera kɔɔ dɔ marnι khor, mɔlɔ thɩ̃ɛ mι-n hιιn gι gιrɛ dιι do, dιι do Kirisiti dɔ nɔɔ. ⁸ Thɩ̃ɛ fɛʋrakɛ mɩ-n hιιn dιι do mɔlɔ thɩ̃ɛ, gι do gιrɛ baannι fĩi, kɛ dɔnι jɩɩrɩkɛ ma jɩnɩ Jeju Kirisiti ɩ̃ Kɔ̃tɩ̃ ma-n pɛr, dɔ nɔɔ; ʋrɛra dɔnɩ nɔɔ dι ɩ̃ faarɔ thɩ̃ɛ fɛʋʋlera. Mι-n hɩɩn gɛr dιι do puuyʋ thιn ɩ̃ puno ɩ̃ ’lɛ Kirisiti, ⁹ ɩ̃ haaraa sι ga do na ɩ̃ thɛthɛɛ fιl sarιkɛ mι ’lɛnι jɔfʋ hιιnɛna gι tha’, sɩ gɩ do gɩrɛ mɩ ’lɛnɩ ha pɛrɛraakɛ mɩ hananɩ Kirisitira gɩ, kɛ dɔnι fɩl sarʋʋkɛ thɛnɩ Thãgbara, kɛ tibil n ’lɛnɩ ha pɛrɛra. ¹⁰ Mɩ-n ƴaalɛ ɩ̃ jɩ Kirisiti na mɔ̃ ɔɔ khi ɩɩr fãga hanɩ, ɩ̃ bul kha dakha na ɔɔ bɔ gaar, ma-n khinə khirikɛ dɔnι ɔɔda, ¹¹ ma-n pɛna nũu ado ma punone a na ’lɛ khi ιιrɛ. ¹² Ga do mι yι mι ’lɛr pa’, dɩ agɩbo mɩ bɔrɛ ka pa’, sɩ mɩ-n yɩrrɛ ɩ̃ ’lɛ gɩ, gɩdonɩ gɛrra Jeju Kirisiti kɔɔ ’lɛ mι. ¹³ Omιna, ado mɛrra gι, ma-n kpιɛr mι ’lɛr pa’; sι thɩ̃ bιɛlιkɛ mι-n cʋʋnι dʋɔn: Mι-n diinəne gιrɛ hanι khiro, sι dι ma-n yιrna gιrɛ hanι ƴɛbʋrɔ. ¹⁴ Khu paar mι-n yιr ɩ̃ ca ɩ̃ dã ɩ̃ ’lɛ khorιkɛ Thãgba n we mιnι ɩ̃ ’lɛ Thãgbaa dʋɔ, gɩ do Jeju Kirisiti dɔ nɔɔ. ¹⁵ Sɛrɛ fɛʋʋkɛ khɔnanɩ pɩ a bɩ̃, sɩ hanana ga kpɩɛr caalera, sɩ ado anɩ kpɩɛr har kpɩɩ, Thãgba na cʋɛ gɩ dɩ ga hɩrɛ nar. ¹⁶ Sɩ ka sɩ danɩ gɩrɛ, sɩ fɔ ɔmɛna a ɩrɛ na jalana. ¹⁷ Omɩna, nɛrɛ fɛʋ nɩ dɔ ɩ̃ phɛldara, na-n hɩnɛ dakha bɔɔbɔɔ wɩrɛɛkɛ n ɩrɛnɩ mɔ̃kɛ asɩ fɩl hanɩ. ¹⁸ Gɩdonɩ tibil jɔjʋɔ hale awɩ ɩɩr para wɩ dor Kirisitii kʋkʋ thɩr lãlaardara; mɩ-n kɔɔ mɩɛ nɛr bɔɔ jɔɔjɔɔ awɩda, na nɛnɛ̃kɛrakɛ mɩ-n mɩɩ gɛr ’lo na bɩwɛ dɩ ɩ̃ yɩ: ¹⁹ Awɩ khu pa na dor bũburone, gɩrɛ n danɩ awɩ tomɩra dɔrɔɔm dʋɔn awɩ thãgba, awɩ yicur cʋʋ wι-n khιι, wa-n kpιɛrna thɩ̃ɛ saagado thɩɩkɛɛ thɩ̃ gaaga. ²⁰ Sɩ se wer, asɩ dɩ Thãgbaa dʋɔ gɩ ha, le Taadaarɩkɛ dɔnɩ Jeju Kirisiti Kɔ̃tιnɩkɛ sɩ-n pɩɛrnɩ na the na ɩ̃. ²¹ Ɔr na deba asɩ tomɩɩkɛ yɔɔnɩ a cʋʋ gɩ hona ɔɔ tomɩɩkɛ ɓɔnanɩ, gɩ the ɔɔ fãgaraakɛ a hananɩ a cʋʋna thɩ̃ɛ fɛʋ dɩ gɩ jʋʋraa.

¹ Mɛ̃ gɩ, ɩ̃ omisɔɔkɛ mɩ-n nanɩ, kɛ n kɔ mɩnɩ thue, nɛrkɛ dɔnɩ ɩ̃ kãkada na ɩ̃ məbida, nɩ tɛ kɩbɩ gɩrɛ Kɔ̃tɩnɩ hʋra, nɛrkɛ mɩ-n nanɩ. ² Mɩ-n bɩɛlɛ Evodɩ, mɩ-n bɩɛlɛ Sɛ̃tɩsɩ dɩ wa ’li kha mɔ̃ wɩ donɩ Kɔ̃tɩnɩda. ³ Dɩ fɛrɛ dakha, kɛ dɔnɩ yʋ gbuu tibil thɔmana, mɩ-n bɩɛl fɛr dɩ fa bul wi, gɩdonɩ wɛr kɔɔ tɛrɔ tutugo bʋɔɔ thɩmɩɩ mɩɩrɛ nakha mɛrɛ, na Kilemã na wɩ̃ tibil ɩkhasɔɔkɛ kɔɔ dɔna mɩnɩ kha thɔma, kɛ awɩ i hanɩ yi sɛbɛra. ⁴ Na-n hana daʋ wire fɛʋ mɔ̃ nɩ donɩ Kɔ̃tɩnɩda, ɔɔ mɩ bire so wo na-n hana daʋ. ⁵ Dɔ tɩbɩla fɛʋ na-n yɩ mɔ̃ nɩ hananɩ hɛlɛlɛ fɩlɛ. Kɔ̃tɩn wɔrɔnɛ dɔdɔdɔ. ⁶ Na-n jẽ haar thɩ̃ bɩɛllalaka’, sɩ thɩɛna fɛʋ na-n sɔ Thãgbara gɩrɛ n ɓɔra nɩnɩ na bɩɛlɛ, na phʋʋrɛ, na fʋɔrɛ. ⁷ Dɩ Thãgbaa ha ieekɛ kəəneni dɩ tibil na-n jɩ kɩrʋa’, na-n bɛra anɩ ha na anɩ kpɩɛr mɔ̃ nɩ hanɩ Jeju Kirisitira. ⁸ Gɩrɛ sɛnɩ omɩna, nɩ dɔ gɩrɛ fɛʋʋkɛ dɔnι sobɔr, na gιrɛ fɛʋʋkɛ teananι cʋʋr, na gιrɛ fɛʋʋkɛ telenenι, na gιrɛ fɛʋʋkɛ phonɩ, na gɩrɛ fɛʋʋkɛ dɔnɩ danananɛ, na gɩrɛ fɛʋʋkɛ thɛnɩ ire, na thɩ̃ɛ wo thɩ̃ɛɛkɛ thʋnanɩ ɓɔ̃ ka a teena khɩirɛ, n do anɩ kpɩɛrnɔ. ⁹ Gɩrɛɛkɛ nɩ kɔɔ dɩɩrnɩ, kɛ nɩ ’lɛnɩ ɩ̃ pa, na gɩrɛ nɩ kɔɔ nɩɛnɩ a yɩna gɩ ɩ̃ pa, na-n cʋɛ gɛr, dɩ Thãgbaakɛ ha ɩɩ n thernɩ na ha kha na nɛrɛ. ¹⁰ Mɩ-n khɩɩrɛ Kɔ̃tɩn na daʋ ka gɩrɛraakɛ nɩ birni a kpɩɛrna mɩ wo. Nɩ kɔɔ mãa kpɩɛrna gar wer, sɩɩ do fʋ paar ɓɔra nɩ. ¹¹ Ga do ɩ̃ thɩ̃ ɓɔra dɔ nɔɔ dɩ ma-n mɩɩ thaka’, gɩdonɩ a mɩ ha mɔ̃kɛ mɩ hanɩnakɛ, sɩ gɩ-n da marɛ. ¹² Mɩ-n marrɛ dɩ ɩ̃ too na thɩ̃ ’leere, mɩ-n marrɛ dɩ ɩ̃ too ado mɩ hana thɩ̃ɛ jɔɔ; thɩ̃ɛ fɛʋra na paar fɛʋ, mɩ jɩrɛ thɩ̃ doo n dɔnɩ hiir na thɩ̃ doo n dɔnɩ kɔmɛr, a jɩ thɩ̃ jɔ hananɛ na thɩ̃ ɓɔrɛ. ¹³ Mɩ-n punone thɩ̃ɛ fɛʋʋ cʋʋ dɩ gɩ the fãgaraakɛ Kirisiti n pɛ marnɩ; ¹⁴ sɩ gɩ bɔrɛrakɛ nɩ kɔɔ bul mini ɩ̃ bɔ gaarra. ¹⁵ Nɛr Filipidara nɩ jɩrɛ bɔɔbɔɔ dɩ ɔbɔɔkɛ ma kɔɔ thenɩ Masedʋan caca bɔɔkɛ sɩ kɔɔ mɩɩnɩ tutugo bʋɔɔ thɩmɩɩ, nɛr dɔ we gbɛbɩdaraakɛ dɩbara kɔɔ bulo mini na war thɩmɩɩr. ¹⁶ Gɩdonɩ ɔbɔɔkɛ mɩ kɔɔ hanɩ Tesalonɩkɩ, nɩ kɔɔ thɔnanɛ khaardaa balanyɔsɔ a ha mɩ dɩɩ bul mi ɩ̃ thɩ̃ ɓɔrra. ¹⁷ Ga do khaardaa mɩ-n ƴaala’, sɩ gɩrɛ mɩ-n ƴaalnɩ dʋɔn khorɩkɛ gelela n ɩna narnɩ. ¹⁸ Mɩ ’lɛr thɩɛna fɛʋ dɩ thɩ̃ jɔdaar ha mɩ, nyɔ̃korʋ hi mer phi na khaardaakɛ Epafʋrɔdɩtɩ kɔɔ thenanɩ anɩ pa a ɩna ha mɩ; thɩ̃ɛ gɩɩkɛ n hʋnanɩ Thãgba daʋ latɩkolo khaa, a dʋʋraa bonɩ ji thɩ̃ɛɛkɛ daaraanɩ haar dɩ tee. ¹⁹ Ɩ̃ Thãgba na ha nɛr thɩ̃ɛ fɛʋʋkɛ n ɓɔra nɩnɩ, mɔ̃kɛ ɔɔ leekɛ a lenɩ dɩɩ və̃vĩə hanɩ, gɩ do Jeju Kirisiti dɔ nɔɔ. ²⁰ Thãgbaakɛ dɔnɩ asɩ Thɩ ɔɔ i n dʋbarɔ na jala waa khorr vʋ̃ʋ. ²¹ Nɩ fʋɔrɛ tɩɩ phuusɔ fɛʋ bɩɛlbɩɛl, kɛ dɔnɩ Jeju Kirisitii too. Omɩnaakɛ hanɩ kha na mɛrɛ wɩ fʋɔr nɛr. ²² Tɩɩ phuusɔ fɛʋ fʋɔr nɛr, sɩ cacara Sejaarɩ cɔdara wɛ. ²³ Jeju Kirisiti Kɔ̃tɩn na-n jɛ nɩ fɛʋ bʋɔra.