FILEMƆ̃

FILEMƆ̃

¹ Mɛr Polιkɛ dɔnι khaιdaar Jeju Kirisitii sora, na asι omi Timothe, thɔna sɛbɛɛkɛ a ha fɛr Filemɔ̃ɔkɛ sι-n nanι, kɛ sι-n donanι kha thɔma, ² a hana dakha asι õkhɛr Afιa na Arsιpιιkɛ sι-n kɛ̃kɛrɛnanι kɛ̃kɛrɛ̃ bιɛl, na we gbɛbιdaraakɛ n gbɛbanι kha afι cɔ. ³ Thãgba asι Thι na Jeju Kirisiti Kɔ̃tιn na-n jɛ nι bʋɔra a na hana nι dakha ha ιι. ⁴ Wire fɛʋ mι-n khιι ɩ̃ Thãgba dι ma-n bιɛlna dι ma-n pɛ far, ⁵ gιdonι mι nιɛrɛ mɔ̃ afι naʋʋkɛ fι hananɩ Jeju Kɔ̃tɩnna na tɩɩ phuusɔra fɛʋ hanɩ, na mɔ̃ afɩ ha pɛ hanɩ. ⁶ Mɩ-n bɩɛlɛ Thãgba dɩ afɩ ha pɛ hana n dɔ thɩ̃ɛɛkɛ hananɩ thɩ̃ cʋʋrɛ gι do Kirisitiida dɔ nɔɔ, gι cʋʋ tιbιla wa-n yι sar thɔ̃ bɔ cʋʋ caar dɩɩdɩɩ. ⁷ Daʋ fʋ mɛr jɔɔ ka dɩ afɩ naʋ dor nɔɔ dɩ ɩ̃ faa haar; gɩdonɩ fɛr dɔ nɔɔ, ɩ̃ omi, dɩ mãthɩ̃ɩ na-n the tɩɩ phuusɔɔ nɔɔ. ⁸ Kirisiti ha mɛr hʋɛ gbobi dɩ ma puno na so far nayɩ: Fɩ teenanɛ; ⁹ sɩ naʋ dɔ nɔɔ dɩ ma-n phʋʋr fɩ, mɛr Polɩkɛ dɔnɩ kũu kɔ̃tɩ̃ɩ, a dona dakha nɛnɛ̃ khaɩdaar Jeju Kirisitii sora. ¹⁰ Mɩ-n phʋʋr fɛr ɩ̃ bɩsã Onejɩmɩdara, kɛ debanɩ a do ɩ̃ bikuun bɔɔraakɛ mɩ hanɩ khaɩra, ¹¹ kɛ mamara na kɔɔ dɔ farnɩ bɔ taa tibilə’, sɩ nɛnɛ̃ bɔ taa tibil a do, sɩ ga do fɛrɛra dɩbara ga, sɩ na mɛrɛra dakha. ¹² Mɩ bire thɔnaa ma-n ha fɩ sɩ ɩ̃ yi bi a do. ¹³ Mɩ kɔɔ ƴaalɛla dɩ na toona mɩ a na-n do mɩ thɔmaakɛ fa kɔɔ do mɩnɩ bɔɔraakɛ mɩ hanɩ khaɩra tutugo bʋɔɔ thɩmɩɩra. ¹⁴ Sɩ ma ƴaal ɩ̃ cʋʋ thɩ̃ɛ sɩ ga do fɛr hana mɩ hʋɛa ga, dɩ mɛ̃ ga-n do afɩ bɔ cʋʋ dor fɛrɛ pɛra’, sɩ gɩ do afɩ ƴaalla gɩ the. ¹⁵ Anaa gɛr a kɔɔ faa far bɔɔ gbe, sɩ fɩ bir fɩ ’lɩɛ waa khorr; ¹⁶ sɩ ga do dee khaa bã, sɩ a ba dee, omineekɛ fa-n nanɩ a na do. Mɩ naarɛ ka, sɩ fɛr na naanɛɛnakɛ na ka na jɔ, mɔna a donɩ dee na Kɔ̃tɩnɩda. ¹⁷ Dɩ gɛr gɩ ado fɩ-n hɩɩn mɛr dɩ ɩ̃ do afɩ kuun, teaa mɔ̃ fa tee mɩnɩ. ¹⁸ Dɩ ado a cʋʋ fɛr puu dɔɔ mɔnakɛ, dɩ a helu gɩ dɩ hana fɩ, dɔ gɩ ha ɩ̃ yʋɔ. ¹⁹ Mɛr Pol khera gɩrɛ na ɩ̃ thɛthɛɛ nyɛ̃ ayɩ: Mɛr na lɩma fɛʋ. Sɩ ma so far nayɩ, yireekɛ fɩ hananɩ helu gɩ dι fι hana ma’. ²⁰ Mɛ̃ gι ɩ̃ omi, cʋɛ mι bɔ ca ʋrɛ gι do Kɔ̃tιn dɔ nɔɔ; cʋɛ mãthɩ̃ι n the mι nɔɔ Kirisitiida dʋʋrra. ²¹ Mɔ̃ mι jιnι dι fa pɛ mɛr nũu mι khere farɛ sɛbɛɛkɛ, mι jιrɛrakɛ dι fa cʋʋrɛ dι ga jɔ gιrɛɛkɛ mι sonι. ²² Sι wo, gbɛbιrɛ mar cɔ paar gιdonι mι pɛrɛ haar anι Thãgba bιɛlla na dor nɔɔ dι wa faa mι. ²³ Epafιrasιιkɛ sι hananι kha khaιra dιι do Jeju Kirisitiida dɔ nɔɔ, a fʋɔr fɛr. ²⁴ Wιrɛ fɛʋʋkɛ sι-n donanι kha thɔma, Markι na Arιsιtarkι na Demasι na Luki, wι fʋɔr fɛr dakha. ²⁵ Asɩ Kɔ̃tɩ̃ Jeju Kirisiti na-n jɛ nɛrɛ fɛʋ bʋɔra.