JUUDI

JUUDI

¹ Mɛr Juudiikɛ dɔnɩ Jeju Kirisitii thɔ̃daar, a dona Jakɩɩ õkuun, thɔna sɛbɛɛkɛ a ha wɩrɛɛkɛ Thãgba Thɩrɛ wenɩ a na na wɩ dakha, kɛ dɔnɩ wɩrɛ Jeju Kirisiti n bɛrnɩ. ² Thãgba na-n dɔna nɩ bʋɔ jɔɔ, a na-n hana nɩ dakha ha ɩɩ jɔɔ, a cʋɛ nɩ nɩ jɩɩ jɩ ɔɔ naʋ jɔɔ. ³ Nɛrɛɛkɛ mɩ-n nanɩ, ƴaalɛɛkɛ mɩ kɔɔ hananɩ ɩ̃ hara dʋɔn ɩ̃ khere nar sɛbɛ taarɛraakɛ sɩ bulni khaa thɩmɩɩra, dɩ mɩ yɩ gɛr dɩɩ do dɔ ɩ̃ khere nar ger phubi ɩ̃ kpãkpãa nar nɩ kɛ̃kɛrɛ̃ na-n pɛ ha pɛdaaraakɛ tɩɩ phuusɔ ’lɛnɩ babɩɛl khorr. ⁴ Gɩdonɩ ɩkhaa tibilsɔ kɔɔ wolone a lõ anɩ thɩ̃thɩɩn; tɩbɩla wɛɛkɛ na-n therananɩ Thãgba ga, wɩ debire Thãgbaa bɔ jɩ thɩmɩɩ ga-n jala mɔ̃kɛ awɩ khaakhaar thɩ̃ cʋʋ hanι, wι bor dakha Jeju Kirisiti asι Kɔ̃tɩ̃ bιɛl ’lẽ’lẽ’lẽekɛ dɔnι fãgadaar. Wɛr dɔ tιbιlaakɛ awι so heen kɔɔ maanι kherere. ⁵ Nɛrkɛ jιɛnnι ga thɩ̃sɔɔlera fɛʋ mɔ̃kɛ gι hanι, sι mι-n ƴaalɛ ɩ̃ bir ɩ̃ khe nar wo nι jιna dι ɔbɔɔkɛ Kɔ̃tιn kɔɔ taanι ɔɔ too Ejipiti dιιra pι, wιrɛ na kɔɔ pιɛnι haara’, a kɔɔ bũburõ wer. ⁶ Nι jɛna dakha dι thɔ̃thɔ̃daar thusɔɔkɛ kɔɔ faanι gιrɛ wι pɛ warnι, wa kɔɔ too dakha awι pa ga, a kɔɔ li wer khorr a faa dahulõ paar dabirəra, phaphapha gι dana wi kɔ̃tɩ̃ιkɛ a na kιιlna wιnι. ⁷ Nι jɛna dakha Sɔdɔm na Gɔmɔɔr na awι dι khudaraada, kɛ kɔɔ faanι awιbara bɔdɛl cʋʋrɛra oti, dɩ wa-n cʋʋna gɩrɛ Thãgba na kɔɔ tini tibil a cʋɛa’; wɩ kɔɔ ’lɛr so heene khorr dɔɔra, dɩ gɩrɛra dana wɩnɩ dor gɩrɛ thɩ̃ nɩrɔrɛ tɩbɩlala fɛʋ. ⁸ Mɛna tɩbɩlaale n yɛnɩ thɩ̃ɛ ɩnɩ yɩ ha dakha, awɩ tomɩ wɩ-n bise, wɩ-n beesire dakha Kɔ̃tɩnɩ fãga hana dɩ wa-n kpɛna ƴũ fãgadarasɔ. ⁹ Mɩsɛlɩkɛrakɛ dɔnɩ Thãgbaa thɔ̃thɔ̃daar thu kɔ̃tɩ̃ɩ, ɔbɔɔkɛ sʋʋ kɔɔ ιιrnι dι wa-n bana kha na Satã Mʋιjιι forra, sιrakɛ aa kɔɔ heenuu sor na kpɛra’, sι gιrɛ a sʋʋraanι dιbara dʋɔn: Kɔ̃tιn n pɛ far sor. ¹⁰ Sι tιbιlaale wer, gιrɛ wa jιnιnaka’ wι-n kpɛ gɛr, sι gιrɛ wι jιnι hɔ̃ nʋ̃ khaa dιι do mɛ̃ gι-n do, gɛr dɔ gιrɛ na kʋɛa wιnι. ¹¹ Ga puu warɛ dɛ, gιdonι Kayɛ̃ɛ hʋ wι gba a lona dakha dι paarra war ƴaalɛla Balamι kha, wι bũburone mɔ̃ wι ιιrnanι lãʋ Koree kha. ¹² Pheru wɩ do mɔ̃ wɩ-n hanɩ anɩ naʋ dɩko kho pa sɩ dɩ wɩ gɔ lõ khaakhaar cʋʋrɛra, sɩ yicuru na-n fʋ wa’; wa-n therna tibil saagado awɩbara gaaga. Wɩ hʋrɛ thãgbaakɛ n jonanɩ sɩ dɩ jɩɛ n ti gi; wɩ hʋrɛ dakha thɩraakɛ dananɩ sɩɩr sɩ ga-n sa’; thɩr khɩna yɛɛkɛ wɩ phiirni faa. ¹³ Wɩ hʋrɛ lanyʋɔnɩkɛ jɩɛ na-n sɩrɔnɩ cɔcɔa’, awɩ yicur thɔ̃ cʋʋ n ther yɔkhɔrɔ̃ khaa. Wɩ hʋrɛ dakha ƴepələ̃beekɛ n fileneni bababa; pa hulõ paarιkɛ birəneni tĩtĩtĩ Thãgba thιιn khorr dι ga-n pιɛr wι. ¹⁴ Sι Enɔkι, mama kɔ̃tιn, kɛ dɔnι makonyɔdaarιkɛ Adã karɔnι sι dι kpaan, a kɔɔ mιιrɛ awιda dιι do bʋʋr gι dι bo ayι: “Kɔ̃tιn ιnɛ na ɔɔ thɔ̃thɔ̃daar thusɔ tə̃tə̃tə̃, ¹⁵ a kιιlna tιbιla fɛʋ, a heen wιrɛ fɛʋʋkɛ na-n theranaana’ sor, gι the awι thɔ̃ puurəəkɛ wι kɔɔ cʋʋnι Thãgbara, na awι thιmιι kpallaakɛ wɛr sopugodaraalera na-n theranaana’ kɔɔ mιιraanι.” ¹⁶ Tɩbɩla wɛɛkɛ hũhuune donɩ awɩda na cɩ̃cɩmanɛ; wɩ-n ɩɩrɛ mɔ̃ awɩ ha pɩɛr hanɩ; i ƴaal thɩmɩɩ haar n thɛ wɩ nɔɔ; wɩ-n fɩɩlɛ tɩbɩla wa-n ’lɛrɔ khor. ¹⁷ Sɩ nɛrɛɛkɛ dɔnɩ omɩnaakɛ mɩ-n nanɩ, na-n jɛna thɩmɩaakɛ asɩ Kɔ̃tɩ̃ Jeju Kirisitii thɔ̃thɔ̃sɔ kɔɔ maanɩ mɩɩrɛ. ¹⁸ Wɩ-n kɔɔ so narɛ ayɩ: A pɩpɩɩ bɔɔ na dã, wɩrɛɛkɛ na-n maanɛ nɩnɩ na hale, wa-n ɩɩr mɔ̃kɛ awɩ thɩ̃ puu ƴaal n kʋ wɩnɩ thue. ¹⁹ Wɛr dɔ tɩbɩlaakɛ na-n pɩɛrnɩ leere; thɩɩkɛɛda wɩ do, wa hana Thãgbaa Thuə’. ²⁰ Sɩ nɛrɛɛkɛ mɩ-n nanɩ, nɩ khɔna na pɩɛr anɩ ha pɛ bɔraakɛ nɩ hananɩ; na-n bɩɛlnɛ Thãgba na Thu Phuu fãga. ²¹ Nɩ jɩɛ too naʋraakɛ Thãgba na sɩnɩ, mɔ̃ nɩ-n pɩɛrnɩ yire khorrɩkɛ asɩ Kɔ̃tɩ̃ Jeju Kirisiti na ha nɩnɩ, gɩ do ɔɔ bɔ donana gɩ the. ²² Wɩrɛ n ƴeƴerenenɩ na-n bulo wi; ²³ na-n taa wɩ a vənə wi dɔɔra na te; ɩkhasɔ wo, na-n jɛ wɩ bʋɔra sɩ nɩ dɔ gɩ do bɔ jɩɩrɩkɛ hananɩ maar, nɩ thʋ̃ na-n laarnanakɛ khələlələ kɩ̃kɩɩnɩkɛ thɩ̃ puu ƴaalɛɛkɛ n kɔ wɩnɩ thue cʋʋnɩ dɩɩ bise. ²⁴ Ʋrɛɛkɛ na punoneni na fʋ nɩ dɩ na jə’, a cʋʋ nɩ dakha nɩ jɩɩlna kãkar ɔɔ ƴɛraakɛ n carbaranɛnɩ, nɩ ’lee dɩ paar; ²⁵ ʋrɛɛkɛra dɔnɩ Thãgba bɩɛl dɩbara gɩ, kɛ kɔɔ taa sɩnɩ dɩɩ do asɩ Kɔ̃tɩ̃ Jeju Kirisitii pa gɩ the, dɔ gɩ do ɔr hɩna i dʋbɩrɛ, na wabɩrɛ, na fãga, na punone, bɔɔ fɛʋraakɛ kɔɔ kanɩ, na nɛnɛ̃, na bɔɔ fɛʋ waa khorr vʋ̃ʋ. Amɛn.