JAKƖ

¹ Mɛr Jakɩɩkɛ dɔnɩ Thãgbaa thɔ̃daar na Jeju Kirisiti Kɔ̃tɩnɩda, thɔna sɛbɛɛkɛ a fʋɔrna caar yʋɔr yenyɔɔkɛ bɩ̃bɩlanɛnɩ a ha paar fɛʋ. ² Ɩ̃ omisɔ, bɔ gaar caar dɩɩdɩɩkɛ nɩ-n yɩnɩ, nɩ gba gɩ ga-n do nar da kɔ̃tɩ̃ɩ, ³ na-n jɩnana, ado anɩ ha pɛ bo jɩɩl ɔbɔɔkɛ nɩ ’lɛnɩ bɩ̃ ber pɩ, ga dor gɩrɛ na hana nɩhɩ ha fʋrɛ; ⁴ dɩ nɩ dɔ ha fʋrɛ n do ɔɔ thɔ̃ gɩ jɩɩ dã, nɩ jɩɩ bɔr nɩ ka nɩ dã, na thʋ̃ thɩɛna ga. ⁵ Dɩ ado tibil bɩɛl nɛrɛra ’lee kpɛsɛrɛ, dɔ ntɛ n bɩɛl Thãgbaraakɛ n ’laanɛnɩ na haar sɩ phaanɛ na-n hala’, dɩ Thãgba na haarɛ. ⁶ Sɩ a bɩɛlnɛ gɩ na ha pɛrɛ sɩ a na-n baalɔ fɩɩʋraka’, gɩdonɩ ʋrɛɛkɛ n baalɔnɩ a hʋrɛ lanyɔ̃ khɔrɔ̃ɔkɛ jɩɛ n benɩ dɩ ga-n phe bababa. ⁷ Tibil ca ole na-n kpɩɛr ɩna ’lɛr dɩkharakɛ Kɔ̃tɩnɩ pa ga. ⁸ Tibil gɩɩkɛ n ƴeƴerenenɩ, aa-n jɩɩl pa bɩɛla’. ⁹ Dɔ omineekɛ wa-n thernana’ na-n kãka ɔɔ ɩɩrra, ¹⁰ dɩ lẽle dakha na-n kãkanɛ ɔɔ wurrə; lẽle dor ʋrɛ na phɔnɩ na ka hɔ̃ phɩ̃ khaa. ¹¹ Wireekɛ n phananɩ na kporre phãphãphã a-n khιrɛ hʋɔn, dɩ phɩ̃ɩ n jɛ dɩɩ do ɔɔ ɓɔ̃ kʋɛrɛ koo; mɛ̃ lẽle na ɔ̃’ɔɔlɔ̃ ɔɔ thɩ̃ cʋʋ pa a na jɛ. ¹² Gɩ da tibilləəkɛ n fʋɔnnɩ haar fifiləlela, gɩdonr ado a ’lɛ bɩ̃ ber pɩ, a na ’lɛr khor cacadaar dʋʋrra, kɛ dɔnɩ yidaa, kɛ Kɔ̃tɩn kɔɔ ʋlfɛnɩ ɩna har wɩrɛ n naan nɩnɩ. ¹³ Sɩ ɔbɔɔkɛ tibil n yɩnɩ fifiləle a na-n yɩ, Thãgba n fifiləne na’; gɩdonɩ Thãgba na ha fifilə paar puure n dʋʋraa fifιləla’, dɩ ɔɔ thɛthɛrakɛ na-n fifɩlə tibilə’. ¹⁴ Tibil n ’lɛr fifiləle ɔbɔɔkɛ thɩ̃ puu ƴaalɛ n kʋʋnɩ thue dɩɩ fʋʋ a ɩɩrɔ. ¹⁵ Dɩ ado thɩ̃ puu ƴaalɛɛlera hana pɛmɛr sopugo a-n kɔ̃, dɩ a sopugo kɔ̃ pɩ dɩɩ do khir a kɔ̃. ¹⁶ Ɩ̃ omisɔɔkɛ mɩ-n nanɩ na-n dədəa koe; ¹⁷ thɩ̃ bɔɩ fɛʋʋkɛ sɩ-n ’lɛnɩ na khaarda ɓɔna fɛʋ ƴũ gɩ the dahɩrɛ Thɩrɛɛ pa, kɛ na dɔnɩ dadebinaa ga, aa-n file mɔ̃ jəəre n filena’. ¹⁸ Ɔɔ thɛthɛɛ ƴaalla gɩ the dɩ kɔ̃ sɩ dɩɩ do sobɔ thɩmɩɩrra gɩ the, dɩ mɛ̃ ga do sɛr hʋɔn cacadara ɔɔ thɩ̃ tinəsɔraakɛ a tini. ¹⁹ Gɛr gɩ ɩ̃ omisɔɔkɛ mι-n nanɩ, dɔ tɩbɩla fɛʋ bɩɛlbɩɛl na-n pɛ thɩmɩɩr nũu kɔrɔ, sɩ wa-n phana kɔrɔ a na mɩɩ thɩ̃a’, wa-n phana kɔrɔ a na gba nĩkhiə’. ²⁰ Gɩdonɩ tibil nĩkhii na-n cʋʋ dasarʋʋkɛ Thãgba n ƴaalnɩ ga-n cʋɛa’ ²¹ Gɛr dɔ kɩrʋ, nɩ dɔna thɩ̃ bise fɛʋ na bɩ̃ kpallɛsɔ fɛʋ a faa, sɩ na tea na hɛlɛlɛ fɩlɛ sorɩkɛ n direni anɩ bɩnɔ, kɛ hananɩ fãga a na taa nɩ. ²² Na-n dɔ Thãgbaa so cʋʋdara, na-n do nũ pɛdara dɩbara gɩ ho dɩbara nɩ-n fɩɩla’. ²³ Gɩdonɩ ado tibil na pɛ Thãgbaa so nũu sɩ aa-n cʋa’, a hʋrɛ tibilikɛ n hɩnɛnɩ ɔɔ ƴɛ hɩɩnʋna dɩ jɩ mɔ̃ a hanɩ. ²⁴ A a hɩɩn sɩ na tɔ gbe dɩɩ do a diinəne dapaara mɔ̃ a hanɩ. ²⁵ Sɩ ʋrɛɛkɛ ganɩ ɔɔ yi jɔfʋ ɓʋɔna, kɛ dɔnɩ wa do jɔfʋ da-n yɩrrɔ, dɩ ga-n do aa-n pɛ nũu a bir a diinə ga, sɩ a na-n cʋʋ gιrɛ gι-n sonι, wa tibil caale na ’lɛr bɔnanɛ ɔɔ cʋʋrara a-n cʋʋnι. ²⁶ Ado tibil yι Thãgba fɔr ha nι, sι aa-n fʋ ɔɔ delẽbi bɔɔbɔa’, ɔɔbara a-n fιιl, ntɛɛ Thãgba fʋɔrιle mɔlɔ gι. ²⁷ Thãgba fʋɔr bʋɔɔkɛ na hananι dι paar Thãgba Thιrɛɛ ƴɛra ga dʋɔn khilə̃bi hιιnɛ na khikhɛra awι bɔ gaarra, fι fʋna dakha dιbara fa bise na thιιkɛɛ thɩ̃ bisə’.

¹ Ɩ̃ omisɔ, nɛrkɛ pɛnι haar asι Kɔ̃tɩ̃ Jeju Kirisitiraakɛ dɔnι i dʋbιdaar, na-n hana tibil hιιnɛ dιιdιa’. ² Ado tibilikɛ tɔnι dɛ nyɛ̃bi tʋʋ na kẽkẽ ɓʋ̃ɔ, kɛ dɔnɩ lẽledaar lõ anɩ gbɛbɩ pa, dɩ a bɔdaar dakha to ɔɔ kẽkẽ sɛlɛ a lona, ³ dɩ ado nɩ hɩɩnɛ ʋrɛ tɔnɩ kẽkẽ ɓʋ̃ɔɔle a sʋʋraa ayɩ: Tɔɔ kɩɛr too pa ɓʋɔnaakɛ lee; sa ka so bɔdaarra: Fer n jɩlɛ liir; agɩbo: Tɔɔ kɩɛr thʋnɔ ɩ̃ nɛ ballɔ. ⁴ Ga do gele n dɔ tibil hɩɩnɛ dɩɩdɩɩ anɩ thɩ̃thɩɩnaa? Dɩ ga do kɩɩl gõgolõ nɩ-n kɩɩlaa? ⁵ Ɩ̃ omisɔɔkɛ mɩ-n nanɩ, nɩ pɛ nũu: Thãgba na kɔɔ phiir wɩrɛ dɔnɩ bɔdara thɩɩraakɛ dɩ wa debi na do lɛ̃lɛ ha pɛdaara na wɩrɛ na lonanɩ Thãgba fãgadaarɩ dɩraakɛ a kɔɔ ʋlfɛnanɩ wɩrɛ n naanɛɛnaa? ⁶ Sɩ ner na-n beesi bɔdaarɩ. Ga do lɛ̃lɛ n hʋɔlɛ nar dɩ wɩ pɛ nar nyɛ̃ kheu a haal nɩ na jalna kɩɩl paarraa? ⁷ Ga do wɛr n kpɛ i ɓʋ̃ɔɔkɛ wɩ ha nɩnaa? ⁸ Ado ger nɩ-n cʋʋrɛ gɩrɛ Thãgba fãgadaar jɔfʋ sonɩ ɔɔ sɛbɛra ayɩ: “Fa-n na afɩ ’walãkha tibil mɔ̃kɛ fɩ-n nanɩ afɩbara”, ga dor nɩ-n cʋʋrɛ bɔɔ. ⁹ Sι ado nι hananɛ tibil hιιnɛ dιιdιι sopugo nι-n cʋʋ, dι jɔfʋ na heen ner sor anι nũ nʋʋrra. ¹⁰ Gιdonι tibil wo tibilikɛ n hιnɛnɩ jɔfʋ fɛʋ sɩ a a dɩ jɔfʋ bɩɛlla ’lẽ’lẽ’lẽ, jɔfʋ fɛʋ a dɩrɔ. ¹¹ Gɩdonɩ ʋrɛɛkɛ sɔnɩ ayɩ: “Fa-n hana khɛ kpɩɩ ƴaala’, fa-n hana kũu kpιι ƴaala’”, ɔrra sɔ dakha wo ayι: “Fa-n kʋ tibilə’.” Dɩ ado fa-n ƴaal khɛ kpɩa’, fa-n ƴaal kũu kpɩa’, sɩɩ do tibil fɩ kʋ, jɔfʋ kʋɛdaarra fɩ do. ¹² Mɛ̃ gɩ na-n mɩa thɩmɩa a na cʋɛna thɩ̃ɛ mɔ̃kɛ nɩ donɩ tɩbɩlaakɛ wa do jɔfʋ na kɩɩlnanɩ. ¹³ Gɩdonɩ ʋrɛɛkɛ na hananɩ bɔ jɩɩra’, ɔɔ kɩɩlɩkɛ a na ’lɛnɩ ga hana bɔ jɩɩr dakha ga, dɩ bɔ jɩɩr n punone kɩɩlʋ. ¹⁴ Ɩ̃ omisɔ, anyee bɔ ca ga taa tibil da so nayɩ, ɩnɩ hananɛ ha pɛrɛ, sɩ gɩ do thɩ̃ cʋʋrɛ na hala’. A na punone na ’lɛ taarɛ na ha pɛ ca ole ya? ¹⁵ Ado õkona wɛ, a õkhɛna wɛ a ’lee kɩ̃kɩɩn, a ’leena wire fɛʋ dɩkɔ, ¹⁶ dɩ tibil bɩɛl nɛrɛra so war ayɩ: Nɩ kɔna bɔɔ, a tɔ kɩ̃kɩɩn gɩ kpor nar, a khɔna dakha dɩkɔ a he; sɩ na ha wɩ gɩrɛ teananɩ gɩ bul wa’, anyee bɔ ca gele na taa? ¹⁷ Mɛ̃ gɩ ha na ha pɛrɛ, ado ga hana thɩ̃ cʋʋra’, gɩ khire juu. ¹⁸ Sɩ ʋkha na sor: Fe wer fɛr hana ha pɛrɛ, sɩ mɛrɛ dɩ ɩ̃ hana thɩ̃ cʋʋrɛ. Sɩ ma birseere: Dɩ nɛ mar mɔ̃ afɩ ha pɛ fʋnɩ sa hale, sɩ ga hana thɩ̃ cʋʋra’. Sι mɛrɛ ma nιna fɛr na ɩ̃ thɩ̃ cʋʋ mɔ̃ ɩ̃ ha pɛ hanι. ¹⁹ Fι pɛrɛ haar Thãgba bιɛl haanlaa? Gι bɔrɛ. Kɔ̃tɛɛbiisɔ n pɛrɛ mɛ̃ haar wer sι dι wa-n jẽ. ²⁰ Sι fɛr də̃bəəlu, fa-n ƴaal fι jι dι ado ha pɛrɛ na-n hana thɩ̃ cʋʋra’, ga do bɔ taa ha pɛrɛ gaagaa? ²¹ Thãgba na kɔɔ we asι mama thι kɔ̃tɩ̃ Abιraham tιι sarʋ thɩ̃ cʋʋrɛra, dιι do gιrɛraakɛ a kɔɔ gbanι ɔɔ bikuun Ɩjakι a jinə bonιɛ gι thaa? ²² Fa yι gaa, ɔɔ ha pɛ na thɩ̃ cʋʋrɛ fʋrɛ kha, dι dakha ɔɔ thɩ̃ cʋʋra dor nɔɔ dι ɔɔ ha pɛ thʋ̃ bɔr ka. ²³ Mɛ̃ gιrɛ kherenenι Thãgbaa sɛbɛra dã oti ayι: “Abιraham kɔɔ pɛr Thãgba haar dιι do gɛr Thãgba hιιn sa wιι tιι sarʋ” na Thãgbaa kuun. ²⁴ Na yι gaa, thɩ̃ cʋʋrɛra Thãgba n hɩɩn tibil dɩ do tɩɩ sarʋ, ga do ha pɛrɛra gɩ dɩbara ga. ²⁵ Rahabɩ khɛ pɔɩ, ga do ɔr dakha Thãgba hɩɩnʋʋnɛ dɩ do tɩɩ sarʋ gιrɛraakɛ a kɔɔ cʋʋnι, kɛ dɔnι mɔ̃ a teenι thɔ̃thɔna a cʋʋ wι dι wι fuunə hʋ kpιaa? ²⁶ Gιdonι mɔ̃ tomιr na-n hananι thueə’, dιι do gι khire, mɛ̃ gι ha pɛrɛɛkɛ na-n hananι thɩ̃ cʋʋra’, ha pɛ khire gι.

¹ Ɩ̃ omisɔ, tibil jɔjʋɔ na-n ƴaal ιnι-n dɔ dιιrdara ga, gɩdonɩ nɩ jɩrɛ dɩ sɛr dɩɩrdara na ’lɛr kɩɩlʋ dɩ ga khɩɩr na ka. ² Sɛrɛ fɛʋ sɩ-n dɩrɛ thɩ̃ jɔjʋɔra ka. A tibil na-n dɩ thɩmɩɩ mɩɩrɛra ga ɔr dɔ tɩɩ bʋɔ ka, a na puno ɔɔ tomɩ na fʋ kĩkĩ. ³ A sɩ pɛ gãgʋʋ ther nɔɔ wa-n nɛ sɩ nũu, sɩ-n punone dɩ sɩ ma awɩ tomɩra koo. ⁴ Nɩ yɛ dakha mɔ̃ bato kɔ̃tɩna n hanɩ; gɩ-n kɔ̃tɩnɩnakɛ thale dɩ jɛ kʋkʋʋlʋ n cʋʋ gɩ dɩ ga-n ca, sɩ fɩɩʋ vɩrdaa n ha, kɛ vɩvɩr n vɩrnanɩ dɩ ga-n jal kãkɛ a-n ƴaalnɩ ga-n jala. ⁵ Mɛ̃ dakha delẽbire ha; tomɩ ɓã buu gɩ fɩɩʋ, sɩ a-n punone nɔ fa mɩɩrɛ ka. Nɩ hɩnɛ mɔ̃ dɔkpõbire n thiini bə̃ kʋkʋʋ tə̃ə. ⁶ Dɩ delẽbire dakha dɔɔ gɩ. Delẽbire hʋrɛ puureekɛ henɩ gɩrɛ thɩɩra; a har asɩ tomɩ ɓãsɔra da-n bise tomɩr koo. Ɔr n ləbire si asɩ yi hanana koo na dɔɔkɛ bu pa dɔɔ n ləbinaanɩ. ⁷ Hɔ̃ nʋ̃ caar ɓibi, na ’lomĩ caarsɔ, na thɩ̃ ƴɩrɛ n puulonenisɔ, na thɩ̃ ƴɩrɛ hanɩ lanyʋɔnna, thɩ̃ɛsɔ gɩɩkɛ tibil na punoni na jo dɩ wɩ ’lire puno wɩrakɛ dɩ wɩ jo. ⁸ Sɩ delẽbire tibil na-n puno dɩ maaraa dɩ joa’, thɩ̃ puu gɩ aa ha ma paara’, khi kpal haar a hinə koo. ⁹ Ɔrra sɩ-n khɩɩna Kɔ̃tɩn asɩ Thɩ, dɩ ɔrra wo sɩ-n nɩɩrna tɩbɩlaakɛ Thãgba tini dɩ wɩ hʋʋ. ¹⁰ Nɔ bɩɛllaalera khɩɩrɛ na nɩɩrɛ n the. Ɩ̃ omisɔ ga teena ga-n hana thala’. ¹¹ Yɔ bu ka bɩɛlla na-n bure yɔ daa wo a bir a na-n bunə yɔ ƴʋ̃ɔ ya? ¹² Barʋ punone se thɩn ya ɩ̃ omisɔ? Dɩ ’lʋɔ punone se baar ya? Mɛ̃ gɩ, yɔ bu kaarɩkɛ n bonɩ lanyʋɔn na puno na bu yɔ yɔnana’. ¹³ Ʋmɔ̃ɔ tibil anɩ thɩ̃thɩɩn hana kpɛsɛrɛ a dona thɩ̃ jɩn? Dɔ ɔɔ fɩl bɔ na ɔɔ thɔ̃ɔkɛ a-n cʋʋnι na hɛlɛlɛ fιlɛ na-n nιna dι tιι kpɛsɛ haa. ¹⁴ Sι ado nɩ hananɛ gbugi tə̃tə̃tə̃ anι hara na dɩbara na kɛ̃kɛrɛnɛ, na-n too na məbi khaar a kuur sɔ̃sɔ na pɛ sobɔrra ga. ¹⁵ Kpɛsɛ ca gele ga do ƴũ gι tha’, thιdaa gι, a do tibilikɛ na hananι Thãgbaa Thuəəda, kɔ̃tɛɛbiisɔɔ pa gι the. ¹⁶ Gιdonι kãkɛ gbugi n hanɩ na dɩbara na kɛ̃kɛrɛnɛ, liir nyanyaanɛ na puu cʋʋ caar fɛʋ n the. ¹⁷ Sɩ kpɛsɛrɛɛkɛ thɛnɩ ƴũ mɔ̃ a-n hanɩnakɛ dʋɔn: Aa-n hana dɩ paara’, ha ie haar a do, a-n hananɛ bɩ̃ bʋɔ, ɔɔda na-n khɩɩra’, bɔ jɩɩr jʋɔraarɛ, a-n hananɛ dakha bɔ cʋʋrɛ, datelẽ haar n thɛ ɔɔ pa, aa hana bɩnɛ yenyɔa’. ¹⁸ Wɩrɛ n cʋɛnɩ gɩrɛ n ’laanɛnɩ ha ɩɩ, ha ɩɩ wɩ-n diirnə, dɩɩ do gɩrɛ gɩ-n senɩ dʋɔn fɩl sarʋ.

¹ Anye n ɩnana kɩla na kɛ̃kɛrɛnɛ anɩ thɩ̃thɩɩn saagado anɩ thɩ̃ ƴaal kpãkpãa kheekɛra n hərəne nini ga? ² Nɩ-n pɩɛrɛ haar sɩ na yɩ ga; tɩɩ kɔ ha nɩ na yeye, sɩ na puno na ’lɛ thɩ̃ɛ kpɩɩraka’. Nɩ hananɛ kɛ̃kɛrɛnɛ na kɩla sɩ na hana dɩkha dɩ ga do anɩda fɩɩʋraka’, gɩdonɩ na-n bɩɛl Thãgba ga. ³ Nɩ-n bɩɛlɛ sɩ na-n ’la’ gɩdonɩ kpιɛr puu nι-n bιɛlna, nι gba na-n kʋɛ anι thɩ̃ ƴaal kpãkpãa khera. ⁴ Nι hʋrɛ khɛrιkɛ hananι kuun sι da-n ƴaal kũu kpιι. Na jι dιι do a tibil na thιιkɛɛ thɩ̃, gι-n pɛr laarɛ na Thãgba gaa? Tibil wo tibilikɛ n naannι thιιkɛɛ thɩ̃, a-n debire dι do Thãgbaa lãlaardaar. ⁵ Thueekɛ Thãgba tinəni tibil, nι pɛrɛ haar mɔlɔ Thãgbaa sɛbɛ so ayι, a hananɛ gbugi thɩ̃ ƴaalɛ ya? ⁶ Sι Thãgba n ’laarɛ bɔ jιιr dιι jɔr dιι ha mɔ̃kɛ ɔɔ sɛbɛ sonι ayι: “Thãgba n bãbaranɛ i ƴaaldara, sι a-n jιrɛ dιbara jodara bʋɔra.” ⁷ Dι gɛr gι na-n jɔ anιbara Thãgbara, nι pιɛrɛ Satã kĩkĩ a fuu saa faa nι. ⁸ Na-n wɔrɔnɛ Thãgba a na wɔrɔ̃ nɛr. Nɛr sopugodara, na-n hulo nyɛ̃ɛ, nι dɔ anι ha na-n phu nɛrkɛ n ƴeƴerenenι. ⁹ Nι yɛ mɔ̃ nι donι bɔ kʋ tɩbɩla; na-n bɛ dɩ na-n khɩa. Nɩ dɔ anɩ mãthɩ̃ n debi gɩ do benɩɛ, anɩ da n debi gɩ do gbobire. ¹⁰ Na-n jɔ dɩbara Kɔ̃tɩnɩ ƴɛra dɩ ɔr na ɩrɛ nɩ. ¹¹ Omɩna na-n mɩɩ thɩmɩɩ puunə na pɛ khasɔa’. Ʋrɛ mɩanɩ dapuu ɔɔ omina, agɩbo dɩ ’laa da-n yɩ ɔɔ omiida, jɔfʋ a mɩɩrɔ puure da-n kɩɩlna gɩrɛ jɔfʋ sonɩ. Dɩ a fa kɩɩlna gɩrɛ jɔfʋ sonɩ, ga do jɔfʋ hɩ̃hɩn ha fa’, sɩ kɩɩldaar ha fɩ. ¹² Bɩɛl dɩbara dʋɔn jɔfʋ ’laadaar na kɩɩldaar; ɔr dɔ ʋrɛ na punoneni na cʋʋ tibil da ’lɛ taarɛ, agɩbo a bu. Sɩ fɛrɛ, amɛ fɛrkɛ do dɩ fɩ ’laa na yɩ afɩ ’walãkha tibilida. ¹³ Dɩ nɛnɛ̃, nɛrkɛ n sɔnɩ dɩ nɩ yɩ: Nĩ agɩbo cʋɔ sa jaal dɩ ʋrɛra, na too yɛ bɩɛl sɩ ƴabɩ sa-n ’lɛ mũsumo, ¹⁴ sɩ na jɩ mɔ̃ anɩ yi na hanɩ cʋɔa’. Anye anɩ yi do? Ɩsiirikɛ n bananɩ bɔɔ gbe fɩɩʋ sɩ dɩɩ kur nɩ do. ¹⁵ Nɩ teenanɛ nɩ ka na sɔ: A Kɔ̃tɩn tu dɩ sɩ hana yire, sa cʋʋrɛ gekɛ na gekɛ. ¹⁶ Sɩ nɛnɛ̃ na-n ƴaal ire kpãkpalã ga, dɩ na-n sona kuune. I ƴaal caar thakɛ puurore ka. ¹⁷ Mɛ̃ gɩ ʋrɛ jɛnɩ thɩ̃ bɔ cʋʋrɛ sɩ aa-n cʋa’, sopugo a-n cʋʋ.

¹ Dɩ nɛnɛ̃, nɛr lɛ̃lɛ, nɩ pɛ nũu, na-n khɩa a na bɛna lɩɛrɛra puureraakɛ na dana nɩnɩ. ² Anɩ lẽle thɩ̃ n hɩrɛ dɩ ophɛphɛlɛɛ n khor anɩ kẽkẽsɔ. ³ Anɩ dɛ na anɩ war dɩrɛ dʋʋn, dɩ awɩ do dɩɩle ɩɩrɛ dɩ ga-n pɛ nar sor, dɩ gɛr na kʋɛa anɩ tomɩ mɔ̃ dɔɔ n hɩnɩ thɩ̃ɛ. Pɩpɩɩ bɔɔ gɩ, sɩ nɩ khɩɩrɛ thɩ̃ɛ a thɩɩn. ⁴ Nɩ hɩnɛ thɔ̃daraakɛ kɔɔ khanɩ anɩ jʋ sɩ nɩ tɔ̃ wɩ lɩmɩnɛ n hulene, dɩ jʋ khaa hulẽbirə jʋʋnɛ a lõ Kɔ̃tɩnɩkɛ dɔnɩ fãga koo hɩ̃daarɩ nũ kaar. ⁵ Nɩ hananɛ nũfe thɩ̃ɛ kɛ thɩɩra a too kãkarra; nι hire phi a khɔ̃, sιι do kʋkʋ togʋʋ nι too. ⁶ Nι kɔɔ heene tιɩ sarʋ sor a kʋ, sɩ aa kɔɔ so thɩ̃a’. ⁷ Na-n fɔ haar omɩna phaphapharakɛ Kɔ̃tɩn na bire na ɩ̃. Nɩ hɩnɛ kokol n fʋrɛ haar sɩ da-n pɩɛr phaphapha lɩɛra n haa thĩ bʋɔ. A-n fʋ garɛ haar waa dɩ thãgba khaa na pɩpɩɩ thãgba n dana. ⁸ Nɛrɛ dakha na-n fɔ haar ɔmɛ̃ a jɩlɛ kɩbɩ, gɩdonɩ Kɔ̃tɩnɩ ɩ̃ bɔ wɔrɔnɛ. ⁹ Na-n hũhuun na pɛ khasɔa’ omɩna, dɩ mɛ̃ na ’lɛ kɩɩlʋa’. Nɩ hɩnɛ kɩɩldaar har lõfonɔɔ a jɩɩl. ¹⁰ Ɩ̃ omisɔ, nɩ gba Thãgbaa bobonasɔɔkɛ kɔɔ mɩanɩ thɩ̃ɛ Kɔ̃tɩnɩ irəə bɔ gaar na awɩ ha fʋ, gɩ do nar thɩ̃ nɩrɔrɛ. ¹¹ Nɩ hɩnɛ, sɩ-n sor dɩ sɩ yɩ: Gɩ da wɩrɛraakɛ kɔɔ gaarɛnɩ bʋɔ na ha fʋrɛ. Nɩ kɔɔ nɩɛrɛ mɔ̃ Jɔbɩ kɔɔ fʋnɩ haar, dɩ nɩ jɩrɛ dakha gɩrɛ Kɔ̃tɩn kɔɔ cʋʋraanɩ pɩpɩɩ paar, gɩdonɩ bɔ fʋdaar Kɔ̃tɩn do na bɔ jɩdaar. ¹² Thɩ̃ kɔ̃tɩɩnakɛ ɩ̃ omisɔ dʋɔn, na-n ʋlfɛna thãgbara ƴũ dι thιɩkɛ ga; na-n ʋlfɛna dιkhaa thɩ̃ kpιιraka’, sι nι dɔ anι “ɔɔ” n do “ɔɔ”, anι “ooho” n do “ooho”, dι mɛ̃ na ’lɛ kιιlʋa’. ¹³ Tibil ʋkha har anι thɩ̃thιιn da-n gaar bʋɔ ya? Ntɛ na-n bιɛlnɛ Thãgba. Tibil ʋkha hale dι daʋ fʋʋ ya? Ntɛ na-n khιna Thãgba nιɛ. ¹⁴ Tibil ʋkha har anι thɩ̃thιιn dι ga-n khʋʋ ya? Dɔ ntɛ n we we gbɛbιdaraa kɔ̃tɩ̃sɔ dι wa bιɛl Thãgba na pιɛraa wι pɛnanaa niin na Kɔ̃tιnι i. ¹⁵ Ha pɛ bιɛlɛ na taarɛ khodaar dɔɔ, dι Kɔ̃tιn na cʋgʋʋrɛ dι na ιιr, dι ado a cʋʋrɛ sopugo Thãgba na faarɛ na haa. ¹⁶ Gɛr gι na-n cana kha sopugosɔ, sa bιɛlnɛ Thãgba na pɛ khasɔ, mɛ̃ khoo na kpɛɛ nar. Tιι sarʋʋ Thãgba bɩɛl hananɛ fãga ka dɩɩ cʋʋ thɩ̃ɛ. ¹⁷ Tibil Elι do dakha mɔ̃kɛ sι hanι, sι a kɔɔ bιɛlɛ Thãgba na yιrrɛ ƴɛrr thãgba nyʋɔn na-n ɩ̃a’, dι thãgba na kɔɔ ɩ̃ ger dιɩ cʋʋna yɛna yẽther na pora maadõa’. ¹⁸ Sɩ agɩpɩ a bire bɩɛl Thãgba dɩ thãgbara ƴũ ’laa nyʋɔn dɩphã dɩ thɩɩ bir phu thɩ̃ɛ. ¹⁹ Ɩ̃ omisɔ, ado tibil ha anɩ thɩ̃thɩɩn a lɛ̃ sa faa sobɔr dɩ tɩɩ kpɩɩ bir kpaa a pɛ hʋɛra, ²⁰ nɩ jɛna dɩ ntɛɛle na kpanɩ sopugodaar dɔɔle ɔɔ bu pa a na birnə, tibil a taa khirrə, dɩ ga dor sopugo jɔjʋɔ thero.