GALASƖDARA

¹ Mɛr Pol thɔ̃thɔn, sι ga do tιbιla kɔɔ pɛ mara’, dι tibili pa gι the woa’, sι Jeju Kirisitii pa gι the, na Thãgba Thιrɛɛ pa kɛ kɔɔ ιrɛɛnι khirera; ² mɛrɛ na omιna fɛʋʋkɛ sι hananι kha thɔna sɛbɛɛkɛ Galasι we gbɛbιdarara. ³ Thãgba asι Thι na Jeju Kirisiti Kɔ̃tιn, n hana nι ha ιι a jɛ nι dakha bʋɔra. ⁴ Ɔr dɔ ʋrɛ kɔɔ ’laanɛnι dιbara asι sopugosɔra a puno a ti si nɛnɛ̃ bɔ puurəəkɛ mɔ̃ Thãgbaakɛ dɔnι asι Thι tuni; ⁵ ɔɔ i n dʋbarɔ na jala waa khorr vʋ̃ʋ. Amɛn. ⁶ Nʋɔ kpaa mɛr mɔ̃kɛ nι faanι dapaara ʋrɛɛkɛ kɔɔ wɛ nιnι dιι the Kirisitii bɔ jιra, sa bir kɛr na-n hιιn tutugo bɔ kpιι, ⁷ sιι dorakɛ tutugo bɔ kpιι na hala’; sι tιbιla haanle dι wa-n bũburõ ni kpιɛrɛ, dι wι-n ƴaalɛ ιnι-n deba Kirisitii tutugo bʋɔ. ⁸ Dι ado sɛrɛɛ thɛthɛ gιrakɛ, dι ado Thãgbaa thɔ̃thɔ̃daar thu gιιkɛ thɛnι ƴũ n mιa nar tutugo bʋɔ dιι ha kpιι na gιrɛɛkɛ sι kɔɔ mιιnι, dɔ sʋɔn n ’lii. ⁹ Sι kɔɔ mãa sor, sι dι mι birrakɛ ma-n ’loro gιrɛ wo, ado tibil na mιι nι tutugo bʋɔ dιι ha kpιι na gιrɛɛkɛ nι kɔɔ ’lɛnι, dɔ sʋɔn n ’lii. ¹⁰ Dι nɛnɛ̃ tιbιla mι-n ƴaal wa-n khιa mι yaa, Thãgba mι-n ƴaal a na-n khιa mι? Agιbo tibil mι-n ƴaal ɩ̃ da haar kã? A ma ƴaal ’lo ma-n da tιbιla haar ma do Kirisitii dea’. ¹¹ Mι so narɛ gιrɛ omιna, dι tutugo bʋɔɔkɛ mι kɔɔ mιιnι, ga do tibildaa ga; ¹² gιdonι ga do tibili pa mɩ kɔɔ ’lɛ ga, dɩ tibil kɔɔ dιrɛ mι woa’, sι Jeju Kirisitii nιrɔra mι kɔɔ ’lɛ gι. ¹³ Gιdonι nι kɔɔ nιrɛ mɔ̃kɛ ɩ̃ fιl kɔɔ hanι mamara ɔbɔɔkɛ mι-n kɔɔ fʋɔrnι Juifi Thãgba fʋɔrɛ, dι ma-n kpoo gbõgolonena Thãgbaa we gbɛbιdarara dιι ho ma hərə wer, ¹⁴ na mɔ̃kɛ mι-n kɔɔ fʋɔrnι Juifi Thãgba fʋɔrɛ a jɔ tibil jɔjʋɔɔkɛ dɔnι ɩ̃ ’walãkhasɔɔkɛ sι donanι kha ca bιɛl, na mɔ̃ mι kɔɔ hananι dakha gbɛ̃gbɛrɛnɛ ɩ̃ mama thι kɔ̃tɩ̃sɔɔ sora. ¹⁵ Sι Thãgbaakɛ kɔɔ thιnɛ mιnι kpιι ɩ̃ nιι kɔ̃lora a we mι dakha ɔɔ bɔ jιra, dι ɔbɔɔkɛra gι kɔɔ daaraanι haar, ¹⁶ a gbaar ɔɔ Bikuun a nιna mι ɩ̃ gbaanɛɛ na mιa ca kpala, gɛr gιrakɛ dapaara ma kɔɔ therna tibilə’, ¹⁷ dι ma kɔɔ jal dakha Jerujalɛm a yι wιrɛ kɔɔ kʋlɛ mιnι ƴιɛ a do thɔ̃thɔna ga, sι Arabι mι kɔɔ jal, agιpι dι ɩ̃ kɛr bir Damasι wo. ¹⁸ A yɛna yẽther ka, gɛr mι kɔɔ jaal Jerujalɛm sι jι kha na Pιɛr, dι mι kɔɔ cɔr le ɔɔ pa wire yʋɔr yemɔι; ¹⁹ sι tιι kpιιsɔɔkɛ dɔnι thɔ̃thɔna ma yι bιɛllakɛ saagado Jakι Kɔ̃tιnι õkuun gaaga. ²⁰ Gιrɛ mι khere narnι gιrɛ Thãgbaa ƴɛra gι, ma sõsoaa koe. ²¹ Sι a gι pιrɔ, mι gbaar jal Siri dιιra na Silisi dιιra. ²² Sι Jude we gbɛbιdaraakɛ hanι Kirisitira na kɔɔ to mar yirə’; ²³ dιbarara wι nιɛ ayι: Ʋrɛɛkɛ n kɔɔ kpoone sarnι mamara hale nɛnɛ̃ da-n mιι ha pɛrɛɛkɛra a-n kɔɔ yιrnanι kʋɛrɛ; ²⁴ dι wι-n kɔɔ khιιrɛ Thãgba ɩ̃ sora.

¹ A yɛna yʋɔr yenã ka, mι bire jal Jerujalɛm nakha Barnabasι, dι mι kɔɔ kpar dakha Tιtι dι sι ha kha. ² Sι thɩ̃ nιrɔrɛɛkɛ thɛnι Thãgbara mι kɔɔ yι, gɛr gι dι ɩ̃ kɔɔ jal. Dι mι kɔɔ gbaar tutugo bʋɔɔkɛ mι-n mιιnι ca kpala a mιɛ wι dι wι hιιn; sι wιrɛ dɔnι yʋʋ wɛr mɩ kɔɔ mɩɩ hɛllɩ, agado mɛ̃ gaa, ga hor thɔmaakɛ mɩ kɔɔ cʋʋnι, na gιrɛ mι hanι cʋʋrɔ gιrɛ, na dor mɔlɔ thɔma. ³ Dι Tιtιιkɛ sι kɔɔ hananι kha Gιrɛkι gι, sι tibil na kɔɔ fɛrɛɛrakɛ a kuro khʋ̃a’. ⁴ Dι ka kpιɛrɛɛle the, wιrɛ n yɛnι omιna hanιι pa gι, kɛ kɔɔ wolonenι a lõ asι thɩ̃thιιn dι wa-n gιιl asι waʋ do Jeju Kirisitira, dι awι ƴaal dʋɔn sι birə dɔ dea. ⁵ Sι sa kɔɔ tha thʋnɔ a ’larrakɛ sa tu awιda fιιʋa’, gι do nɔɔ tutugo bʋɔ na-n jalna ɔɔ sobɔra ƴɛrr anι thɩ̃thιιn. ⁶ Wιrɛ wι-n hιιnnι dι wɛr dɔ yʋʋ, a wι kɔɔ har mɔ̃ wɩ hanɩ yo, ga do gele mɩ-n hɩɩna’, Thãgba na-n hɩɩnnɩ tɩbɩla dɩɩdɩa’, wɩrɛ wɩ-n hɩɩnnɩ dɩ wɛr dɔ yʋʋ, wa kɔɔ hana dakpɩɩ na dɛbɩ ɩ̃ dɩɩrra ga. ⁷ Sɩ mɔ̃ wɩ kanɩ yɩɛ dɩɩ do mɛr Thãgba pɛr ma-n mɩa tutugo bʋɔɔ thɩmɩɩ wɩrɛraakɛ na dɔnɩ Juifisɔa’, mɔ̃ Thãgba pɛrnɩ Pɩɛr a na-n mɩa Juifisɔra, ⁸ gɩdonɩ ʋrɛra hananɩ Pɩɛr punone dɩ do thɔ̃thɔn Juifisɔra, ɔrra dakha hana mι punone dι ɩ̃ do thɔ̃thɔn ca kpalala, ⁹ dɩ mɔ̃ wɩ yɩnɩ bɔ jɩɩrɩkɛ Thãgba jɩ mɩnɩ bʋɔra hanɩ, Jakɩ na Sefasɩɩkɛ n dɔnɩ Pɩɛr, na Jã, kɛ wɩ-n hɩɩnnɩ dɩ wɛr dɔ thɩkara, wɩ kɔɔ fʋɔrɛ mɛrɛ na Barnabasɩ bɩɛl do fʋɔrʋʋ, mɔ̃ sι donι kha kũu bιnɔ, sι puno sa-n jal ca kpalaa pa, sι wɛr wa-n jal Juifisɔɔ pa. ¹⁰ Gιrɛ wι so sarnι dιbara dʋɔn sa-n jɛna nι bɔdara, dι mι kɔɔ ture na haar fɛʋ dι ma-n cʋʋ. ¹¹ Sι ɔbɔɔkɛ Pιɛr kɔɔ pɔnι Ãtιyɔsι, mι kɔɔ bor ɔɔda kpei ma mʋʋnaa ga, gιdonι a heene sor dɩbara. ¹² Gιdonι ɔbɔɔkɛ ιkhaa tibilsɔɔkɛ thɛnι Jakιι pa na kɔɔ pɔnι pa’, ca kpala a-n kɔɔ khona dιkɔ, sι bɔɔkɛ wι danι, a-n mə̃mə̃ləne dι tɔ dι khokhιa, gιdonι maar n fʋɔnɛɛ wιrɛraakɛ n bɔnι dι wa-n ιι khʋ̃ kurrera. ¹³ Dι wɩ̃ Juifisnɔ phɛl a wolõ dι wa-n cʋʋ, dι awι bιnɛ yenyɔ fιlla ba hal Barnabasι dι lʋʋn. ¹⁴ Dι mɔ̃ mι yιɛnι dιι do wa-n ιιr dιι telẽ mɔ̃kɛ tutugo bʋɔɔkɛ dɔnι sobɔr hana’, mι kɔɔ sor Pιɛrra tιbιla fɛʋʋ ƴɛra ayι: Ado fɛrkɛ dɔnι Juifi hana ca kpalaa fιl, sι fa hana Juifi fιla’, mɔ̃gιdo dι fa-n fɛrɛ ca kpala wɩ hanana Juifi fιlɛ? ¹⁵ Ado se wer, Juifi dʋʋr wι kɔna sι, sa do sopugodara mɔ̃kɛ ca kpala hana’. ¹⁶ Sιrakɛ sι jιrɛ dι ga do jɔfʋ thɔ̃ cʋʋrɛra tibil na ’lɛr so hɛlla’, sι ha pɛrɛ Jeju Kirisitira gι; sɛrɛ dakha sι kɔɔ pɛr Jeju Kirisiti haar sor n hɛla sar, gι the ha pɛrɛraakɛ sι hananι Kirisitira, ga-n do jɔfʋ thɔ̃ cʋʋrɛra gι tha’, gιdonι tibil bιɛllakɛ na ’lɛ so hɛllɛ jɔfʋ thɔ̃ cʋʋrɛra ga. ¹⁷ Sι mɔ̃ sι-n ƴaalnι sor n hɛla sar Kirisitira, sopugodarara sι do ser, dι Kirisiti ba cʋɛ sι dι sι do sopugodara kã? Kpei. ¹⁸ Gιdonι ado mι bir na mι gιrɛɛkɛ mι kɔɔ wιɛlnι, ɩ̃ sopugodaar do mι-n nιna. ¹⁹ Me wer, jɔfʋʋ sora mι khirore, gι do nɔɔ ɩ̃ hana yire Thãgbara. ²⁰ Wι kɔɔ kpa mɛr kʋkʋ thιrʋra nakha Kirisiti, dι ga do mɛr gιιkɛ hananι yire gιrɛ bã, sι Kirisitiikɛ hanι ɩ̃ bιnɔ dɔ ɩ̃ yi; sι yireekɛ mι hananι gιrɛ, ha pɛrɛra mι hana gι Thãgbaa Bikuunnaakɛ n naan mιnι a ba faana dιbara ɩ̃ sora. ²¹ Ma bo bɔ jιιrιkɛ thɛnι Thãgbara ga, gιdonι ado jɔfʋra so hɛllɛ n the ga dor khaar Kirisiti kɔɔ khi pɔι.

¹ Nɛr Galasι də̃bələ amɛ ka li ninakɛ tɔr? Nɛrɛɛkɛ wι mιɛnι casι Jeju Kirisitii thιr kpa dιι ho nɛr tʋɔr yire. ² Thĩ bɩɛl dιbara hale mι-n ƴaalnι ɩ̃ jι nar: Jɔfʋ thɔ̃ cʋʋrɛra nι kɔɔ ’lɛ Thu Phuu yaa, ha pɛ thιmιιrraakɛ nι kɔɔ nιnι gι? ³ Ãyaal dι nι thʋ̃ də̃bəəl mɛ̃, a ka ’li fʋʋr na Thu Phuu sι na-n ƴaal nɛnɛ̃ nι pɩɩr na anι thɛthɛɛ fãgaa? ⁴ Gι do khaar nι thʋ̃ gaar bʋɔ thale bɛɛ? Dι gι hor khaar khʋʋra gι-n jalna. ⁵ Dι ʋrɛɛkɛ n hana nιnι Thu Phuu, kɛ n cʋɛnι dakha nɔ kpaa thɩ̃ɛ anι thɩ̃thιιn, jɔfʋ thɔ̃ cʋʋrɛra gɩ the yaa, ha pɛ thɩmɩɩ nɩɩrra gɩ? ⁶ Mee gɩ kherere Thãgbaa sɛbɛra ayɩ: “Abɩraham kɔɔ pɛr Thãgba haar dɩɩ do gɛr Thãgba hɩɩn sa wɩɩ tɩɩ sarʋ.” ⁷ Nɩ jɛ gɩ do wɩrɛ hananɩ ha pɛrɛ Thãgbara wɛr dɔ Abɩrahamɩ bɩsãsɔ. ⁸ Mɔ̃ Thãgbaa sɛbɛ kɔɔ ’laanɩ yɩɛ dɩ Thãgba na cʋʋrɛ sor dɩ ga-n hɛl ca kpalala ha pɛrɛra, gɛr gɩ dɩɩ kɔɔ mãa mɩɩrɛ tutugo bʋɔ Abɩrahamna ayɩ: “Fɛr na dɔ nɔɔ dɩ tibil caar fɛʋ na ’lɛ bɔnanɛ.” ⁹ Dɩ mɛ̃ wɩrɛ fɛʋʋkɛ n pɩɛrnɩ haar n ’lɛ bɔnanɛ na Abɩraham ha pɛdaar. ¹⁰ Gɩdonɩ wɩrɛ fɛʋʋkɛ n bɔnɩ dɩ wa-n yɩrna jɔfʋ thɔ̃ cʋʋrɛ, sʋɔn n ’li wer; gɩdonɩ gɩ kherere Thãgbaa sɛbɛra ayɩ: “Sʋɔn n ’le tibil wo tibilikɛ na-n hɩnɛnɩ da-n nɩna nũu gɩrɛra fɛʋʋkɛ sɔnɩ jɔfʋ sɛbɛra ga.” ¹¹ Wo, tibil bɩɛllakɛ na ’lɛ so hɛllɛ Thãgbaa ƴɛra jɔfʋra ga, dɩ sobɔr gɩ, gɩdonɩ gɩ kherere wo ayɩ: “Ʋrɛ Thãgba hɛllɔnɩ sor dɩɩ do ha pɛrɛ dɔ nɔɔ, ɔr na hana yire.” ¹² Dɩ jɔfʋ na ha kha dɩkha na ha pɛra’, sɩ Thãgbaa sɛbɛ sor ayɩ: “Ʋrɛɛkɛ na-n cʋɛnɩ gɩrɛ jɔfʋ sonɩ, a na hana garɛ yire.” ¹³ Kirisiti birse ser sɔ̃ ’lirrə jɔfʋra, gɩdonɩ sɛr dɔ nɔɔ dɩ firo ’lɛ sʋɔn, gɩdonɩ gɩ kherere Thãgbaa sɛbɛra ayɩ: “Sʋɔn gɩ do tibil wo tibilləəkɛ wɩ-n juni kʋkʋ thɩrʋra.” ¹⁴ Dɩ mɛ̃ bɔnanɛɛkɛ Abɩraham kɔɔ ’lɛnɩ na do dakha ca kpalaada, dɩ Jeju Kirisitira gɩ-n the, dɩ dakha ha pɛrɛra sa ’lɛ Thu Phuukɛ Thãgba kɔɔ ʋlfɛna sɩnɩ. ¹⁵ Omɩna wei, tibiile mι-n mιι gιrɛ, a tιbιla ƴɛrɛrakɛ ʋlfɛ ʋlfɛrɛ, tibil na hale na puno na phii agιbo a dɛbιrɔ dιkha ga. ¹⁶ Sι Abιraham ʋlfɛrɛɛle kɔɔ telẽ na ɔɔ məl, ga so ɔɔ məlsɔ dιι ho wι jɔra’, sι bιɛl gι so, gιdonɩ Thãgbaa sɛbɛ sor ayɩ: “afɩ məl”, a thɩɛna gaa Kirisiti gι. ¹⁷ Nɩ yɛ gɩrɛ mɩ-n ƴaalnɩ ɩ̃ so: Nɔ bɩɛl ʋlfɛrɛɛkɛ Thãgba kɔɔ ’lini ʋlfɛrɛ, jɔfʋʋkɛ pɩrɔnɩ kpaan yɛna taanã na kpelẽ yʋɔr na puno gi na phii, gɩ do gɛr cʋɛ ʋlfɛrɛɛle dɩɩ kʋkʋʋla’. ¹⁸ Gɩdonɩ ado jɔfʋ hɩɩnɛ na dɔ nɔɔ dɩ sa ’lɛ gɩrɛ Thãgba thɩɩn sarnɩ, ga do ʋlfɛrɛra gɩ the bã, sɩ mee Thãgba kɔɔ ha gɛr Abɩraham dɩɩ do ʋlfɛrɛ dɔ nɔɔ. ¹⁹ Sɩ jɔfʋ anyera gɩ hale? Wɩ pɩrɔrɛ ’laa dɩɩ do sopugo cʋʋrɛ dɔ nɔɔ, phaphapha məlleele n ɩ̃, ʋrɛɛkɛ ʋlfɛrɛɛle kɔɔ telenι; dι jɔfʋʋle thɔ̃thɔ̃daar thusɔ kɔɔ gbaan a dʋ thιmιι gʋʋrdaar nyɔ̃kɔɔ. ²⁰ Dι thιmιι gʋʋrdaar na-n hale tιι bιɛlla ga, sι ado Thãgba wer gι, ɔr bιɛl gι. ²¹ Dɩ jɔfʋ n ba kɛ̃kɛrɛnanɛ Thãgbaa ʋlfɛsɔ yaa? Kpɩɩraka’. Ado jɔfʋ kɔɔ hale dɩ wɩ ’laa dɩɩ ’laa yire, ga dor jɔfʋra so hɛllɛ na the bɔɔbɔɔ. ²² Sɩ Thãgbaa sɛbɛ n nɩnanɛ dɩ tɩbɩla fɛʋ sopugoo nyɔ̃kɔɔ wɩ ha, dɩ mɛ̃ ga dor wɩrɛɛkɛ n pɩɛrnɩ haar n ’lɛr ʋlfɛrɛ, ga-n the ha pɛrɛraakɛ wɩ hananɩ Jeju Kirisitira. ²³ Ɔbɔɔkɛ ha pɛrɛ na kɔɔ ɩnɩ pa’, jɔfʋ khaɩdara sɩ kɔɔ do, sa-n pɩɛrna ha pɛrɛɛkɛ na yɩranɩ phubi. ²⁴ Mɛ̃ jɔfʋ kɔɔ do thɔthɔɔkɛ na thɔɔ sɩnɩ na dana Kirisiti, sor n puno gɩ hɛl sar ha pɛrɛra. ²⁵ Dɩ ha pɛrɛ ιnɩ sa ha kha dɩkha na thɔthɔɔdaarɩle ’lo bã. ²⁶ Gɩdonɩ nɛrɛ fɛʋ Thãgbaa bikona nɩ do ha pɛrɛraakɛ nɩ hananɩ Jeju Kirisitira; ²⁷ nɛrɛ fɛʋʋkɛ wɩ kpɛɛnɩ nyʋɔnɔ bɩɛl dʋʋrra nakha Kirisiti, Kirisitira nɩ to. ²⁸ Juifi dʋʋr na hale dι wιrɛ na dɔnι Juifisɔ waa ga; dee na hale dι waι ga; kuun na hale dι khɛr ga; gɩdonɩ nɛrɛ fɛʋ bɩɛl nɩ do Jeju Kirisitira. ²⁹ Dɩ ado Kirisitiida nɩ do, ga dor nɛr dʋɔn Abɩrahamɩ məlsɔ, dɩ thɩ̃ hɩna hanɩ mɔ̃kɛ ʋlfɛrɛ sonɩ.

¹ Gɩrɛ mɩ sonɩ dʋɔn wɔɔ, ɔbɔɔkɛ thɩ̃ hɩn donɩ bɩsaan, gɛr aa-n har kpɩɩ na dea’, sɩɩ dorakɛ ɔr dʋɔn kɔ̃tɩn thɩ̃ɛ fɛʋra; ² sɩ wɩrɛɛkɛ n hɩnɛɛnɩ na kɔ̃tɩnasɔɔ nyɔ̃kɔɔ a-n ha, phaphapha bɔɔkɛ thɩrɛ pɛrnɩ n dã. ³ Sɛrɛ dakha mɛna gɩ ha sar, ɔbɔɔkɛ sɩ kɔɔ honɩ bɩsana, sɩ kɔɔ dor dea dɩɩrɛraakɛ na dɔnɩ bɔ taa dɩɩra’, kɛ dɔnɩ thɩ̃ tinəneeda. ⁴ Sɩ ɔbɔɔkɛ bɔɔ kɔɔ danɩ, Thãgba kɔɔ thɔnanɛ ɔɔ Bikuun, khɛr kɔɔ kɔnaa, jɔfʋ hʋɛra wɩ kɔɔ kʋ̃ɔ, ⁵ dɩ mɛ̃ a na puno na birse wɩrɛ hanɩ jɔfʋ hʋɛra, gɩ do nɔɔ a gba sɩ sɩ do ɔɔ bikuunsɔ. ⁶ Dɩ gɩdonɩ bikona ha nɩ, Thãgba thʋɔn ɔɔ Bikuuni Thu dɩ lõ anɩ hara da-n wɩɩ: Aba; kɩrʋ dʋɔn: Thɩrɛ. ⁷ Mɛ̃ gɩ fa do dee bã, sɩ bikuun fɩ do, dɩ ado bikuun fɩ do, fɛr dʋɔn thɩ̃ hɩn, dɩɩ do Thãgba dɔ nɔɔ. ⁸ Mamara na kɔɔ jɩnɩ Thãgba ga, nɩ kɔɔ dor dea dɩkhasɔraakɛ na dɔnɩ thãgba ga. ⁹ Sɩ nɛnɛ̃ nɩ jɩrɛ Thãgba, dɩrakɛ Thãgba ka kɔɔ jɩ nɩ, sɩ mɔ̃ gɩ fʋ dɩ nɩ bir kɛr na-n bir dɩɩrɛraalera na-n taanɩ bʋɔa’, kɛ n kɔnɩ bʋɔ; anye hale dɩ nɩ ƴaal nɩ birə dɔ gar dea wo? ¹⁰ Nɩ hananɛ pərre wi hɩɩnɛnasɔ, na porasɔra, na bɔɔsɔra, na yɛnasɔra. ¹¹ Maar fʋ mɛr dɩ agakpaana ɩ̃ thɔ̃ɔkɛ mɩ kɔɔ donɩ jɔɔ nɛrɛra ga dor mɔlɔ gɩ. ¹² Mɩ-n phʋʋr nɛr omɩna, nɩ hana mɔ̃kɛ mɩ hanɩ, gɩdonɩ mɛrɛ dakha mɩ har mɔ̃kɛ nɩ hanɩ. ¹³ Na kɔɔ cʋʋ mɩ puure fɩɩʋraka’; nɩ jɩrɛ dɩ caca bɔɔkɛ mɩ kɔɔ mɩɩ nɩnɩ tutugo bʋɔɔ thɩmɩɩ, ɩ̃ tomɩ sɩ kɔɔ dɔ nɔɔ. ¹⁴ Ɩ̃ kho kɔɔ do narɛ nɩwɛ, sɩ na kɔɔ ƴʋɔn ma’, ma kɔɔ yaa nɩ dakha woa’; nɩ kɔɔ tee mer dɩ ɩ̃ ho Thãgbaa thɔ̃thɔ̃daar thu a ho Jeju Kirisiti. ¹⁵ Kana ga kãka caalera jal gɩrɛ kper? Gɩdonɩ mɩ-n mɩɩrɛ anɩda ayɩ: Ado hʋɛ kɔɔ harrɛra ga dor na kɔɔ tire anɩ yi a na ha mɩ. ¹⁶ Mɩ debire do nar lãlaardaar nɛnɛ̃ sobɔrraakɛ mɩ-n so narnɩ yaa? ¹⁷ Gbɛ̃gbɛrɛ̃ ca gele tibil ca wele hana narnɩ, ga do gbɛ̃gbɛrɛ̃ bʋɔ ga, wɩ-n ƴaalɛ ɩnɩ-n lea sɩ kha nɩ bir nɩ ma wɩ. ¹⁸ Gbɛ̃gbɛrɛ̃ hananɛ wer bɔɔ fɛʋ thɩɛnaakɛ bʋɔnɔnɩ, gɩ bɔrɛ, sɩ ga-n do bɔɔkɛ mɩ hanɩ kha na nɛrɛ dɩbara ga. ¹⁹ Ɩ̃ bɩsãsɔ wei, anɩ wal birə gɩrɛ fʋ mɩ wo, phaphapha Kirisiti n jɩɩ ɩɩr anɩ bɩnɔ. ²⁰ Mɩ narra a ho wɩ yɛ nɛnɛ̃ ɩ̃ birə hana anɩ pa a jɛ mɔ̃ ma mɩɩnɩ, gɩdonɩ ma thʋ̃ jɩ gɩrɛ ma cʋʋnι anιdarara bã. ²¹ Nɩ sɔ mar, nɛrkɛra n ƴaalɛnɩ nɩ birə hana jɔfʋra, na nɩ gɩrɛ jɔfʋ sonaa? ²² Mee gɩ kherere ayɩ: Abɩraham kɔɔ hananɛ bikona yenyɔ, bιɛl do deekhɛrι bi, bιɛl do wa khɛrι bi. ²³ Sι deekhɛrι bi wer, birə gι dι wι kɔ̃ mɔ̃ wɛ n kɔnι; sι wa khɛr wer, Thãgbaa ʋlfɛ bi a kɔ̃. ²⁴ Thɩ̃ɛɛle sokpaa gι, gιdonι khɛra yenyɔɔle n nɛna nɔ bιɛl ʋlfɛrɛ yenyɔ. Agaar n nɛna mɔ̃ ʋlfɛ bιɛl hanι, kɛ dɔnι Sιnaι gɔ̃gʋ̃ɔɔda, ɔr kɔna dee bi. ²⁵ Gιdonι Agaar hʋɔn Sιnaι gɔ̃gʋ̃ɔɔkɛ hanι Arabι dιιra, a hona dakha nɛnɛ̃ Jerujalɛmkɛ gιrɛ, kɛ hanι dee paar na ɔɔ bιsãsɔ. ²⁶ Sι ƴũ Jerujalɛm waʋ gι, dι ɔr dɔ asι nι. ²⁷ Gιdonι gι kherere Thãgbaa sɛbɛra ayι: “Na kãkanɛ fɛr kʋ̃ʋbʋʋkɛ na kɔɔ kɔnanɩ bə’, mana na bɛna hulẽbe, fɛrɛɛkɛ wallɛ na kɔɔ fʋnɩ kpɩɩa’, gɩdonɩ khɛrɩkɛ wɩ faanɩɩ bisɔ jɔrɛ ka, a ka jɔ khɛr ʋrɛ hananɩ kuun.” ²⁸ Sɩ ado nɛr wɛ omɩna, nɛr dʋɔn ʋlfɛ bɩsana Ɩjakɩɩ kha. ²⁹ Dɩ mɔ̃kɛ gɩ kɔɔ hanɩ dɩɩ do biikɛra wɩ kɔnɩ wɛɛ kha n kɔɔ kpoone ʋrɛraakɛ wɩ kɔnɩ dɩɩ do Thu Phuu pa gɩ the, mɛna gɩ ha gɩrɛ nĩ. ³⁰ Sɩ anye Thãgbaa sɛbɛ so ayɩ: “Wea deekhɛr na ɔɔ bikuun a faa, gɩdonɩ deekhɛrɩ bi na do thɩ̃ hɩna’, sɩ wa khɛrɩ bi na dɔ thɩ̃ hɩn.” ³¹ Gɛr gɩ omɩna wei, sa do deekhɛrɩ bisɔa’, sɩ wa khɛrɩ bisɔ sɩ do.

¹ Wa dʋʋrra Kirisiti kɔɔ birse si, gɛr gɩ nɩ fɔ gɩ ma, na-n do dee dʋʋr n bir gɩ ’li ni bã. ² Nɩ hɩnɛ mɛr Pol mɩ so narɛ ayɩ, ado na kur khʋ̃ʋ ga dor Kirisiti na taa nɩ bʋɔ bã. ³ Dɩ mɩ-n kpãkpãa narɛ wo ayɩ, ado tibil kur khʋ̃ʋ, jɔfʋ ntɛ yɩ ɩna-n hɩɩnɛ fɛʋ. ⁴ Nɩ leere na Kirisiti nɛrɛ fɛʋʋkɛ n ƴaalɛnɩ sor n hɛla nar jɔfʋ cʋʋrɛra, nι ’leere dakha Thãgbaa bɔ jι. ⁵ Ado se wer so hɛl nũ pɛrɛ sι-n pιɛr, kɛ Thu Phuu na cʋʋnι dι sa ’lɛ ha pɛrɛra. ⁶ Gιdonι a fι ha Jeju Kirisitira a fι kurre khʋ̃ʋ yo, a fa kur khʋ̃a yo, ga-n cʋʋ thɩ̃a’, sι ha pɛrɛɛkɛ hananι naʋʋkɛ n cʋɛnι thɩ̃ɛ, gɛr dɔ thɩ̃ɛ. ⁷ Nι kɔɔ car waa gel, sι amɛ jιlɛ nι a pιɛr nι na-n nι sobɔr nũə? ⁸ Kpιɛr ca gele na the ʋrɛraakɛ kɔɔ wɛ nιna’. ⁹ Tabιιr fιιʋ n cʋʋrɛ buru mɩ̃ boloo fɛʋ dιι bʋ̃. ¹⁰ Mι hana narɛ ha pɛrɛ Kɔ̃tιnna, dι na hana kpιɛr kpιa’, sι ʋrɛɛkɛ nyanyaanɛ nιnι ado a ha mɔnakɛ, sι sor na heenuune. ¹¹ Sι ado me wer omɩna, ado ɩ̃ Thãgba thɩmɩɩ mɩɩra mɩ yɩ wa-n kuro khʋ̃ʋ, anyera ma-n yɩ kpoore ’lo? Gιdonι Kirisitii kʋkʋ thιr thιmιιkɛ n dɔnι nɛ baradaa, gι bure mɛ̃. ¹² Dι wιrɛra n pιɛrnι nyanyaanɛ anι thɩ̃thιιn wι yιra kuro kpɔ khorr. ¹³ Omιna wei, wa dʋʋrra Thãgba kɔɔ we nι, sι na-n gba wa dʋʋrra a phiro sι na cʋʋ gιrɛɛkɛ anι tibil do pa n ƴaalna’, sι nι ka dɔ kha dea bιɛlbιɛl naʋra. ¹⁴ Gιdonι jɔfʋ fɛʋ, thιmιι nɔ bιɛllaakɛ gι ha ayι: “Fa-n na afι ’walãkha tibil mɔ̃kɛ fι-n nanι afιbara.” ¹⁵ Sι ado nι-n dʋɔnɛ kha a na phʋʋna khasɔ, na-n jιɛ hιιn na-n kʋɛ khasɔa koe. ¹⁶ Gɛr gι dι ɩ̃ so nar ayι: Na-n jala mɔ̃kɛ Thu Phuu n so narnι, ga cʋʋ nɛr dι na cʋʋ gιrɛ anι tibil do pa n ƴaalna’. ¹⁷ Gιdonι gιrɛ tibili tibil do pa n ƴaalnι, ga-n ’li kha fιιʋrakɛ na gιrɛ Thu Phuu n ƴaalna’; dι gιrɛɛkɛ Thu Phuu n ƴaalnι, ga-n ’li kha fιιʋrakɛ na gιrɛ tibili tibil do pa n ƴaalna’; wɛr yenyɔ wι-n kɛ̃kɛrɛnɛ kha, dι gɛr gι na-n puno na cʋʋ gιrɛɛkɛ nι pɛrnι haara’. ¹⁸ Sι ado Thu Phuuda nι-n pɛ nũu jɔfʋ na puno na’. ¹⁹ Dι gιrɛra tibili tibil do pa n cʋʋnɩ gɩ yɩrrɛ gbelẽ gbelẽ, gɛr ha gɩrɛ: Bɔdɛl cʋʋrɛ, thɩ̃ bise cʋʋrɛ, dakhaba cʋʋrɛ, ²⁰ thɩl jir, dɔɔrɛ, tɩɩ laarɛ, kɩla, gbugi, nĩkhii, dɩbara na kɛ̃kɛrɛnɛ, dɩɩdɩɩ leere, thʋ̃ kha, ²¹ ha pɩɛrɛ, ta laarɛ, gbõgolõ dɩko khor, na yɛ̃ thĩsɔɔkɛ n hɔnɩ kha na gɩrɛra. Mɩ maanɛ dɩ ma-n so nar gɩrɛ mɔ̃kɛra mɩ kɔɔ sonɩ, dɩ wɩrɛ n cʋɛnɩ ga thɩ̃sɔɔkɛ wa lõ Thãgba fãgadaarɩ dʋɔa’. ²² Sɩ beekɛ Thu Phuu n senɩ dʋɔn: Naʋ, daʋ, ha ɩɩ, ha fʋrɛ, ha bulo fɩlɛ, bɔ cʋʋrɛ, sobɔ cʋʋrɛ, ²³ hɛlɛlɛ fιlɛ, dιbara fʋrɛ; jɔfʋ na hale dιι pιɛr ga thɩ̃sɔɔka’. ²⁴ Dι wιrɛ hanι Jeju Kirisitira wι gbaar tibili tibil do pa na gιrɛ na-n kʋɔnι thue kpãkpalã ga, na dakha ɔɔ ƴaal a kpa kʋkʋ thιrʋra. ²⁵ Dι Thu Phuu donι ʋrɛ n hana sιnι yire, sa-n ιrɛ mɔ̃kɛ Thu Phuurə n so sarnι. ²⁶ Sa-n ƴaal mɔlɔ i ka thɩ̃ɛ ga-n ιna sar nãbɛɛrɛ, sa-n gba kha gbugisɔa’.

¹ Omιna wei, ado nι yι tibilikɛ hanι sopugo cʋʋrɔ, nɛrɛɛkɛ dʋɔnnι Thu Phuudara nι naarɛɛ na hɛlɛlɛ fιlɛ, sι jιɛ hιιn afιbara a mɛ̃ gaa fa ’lɛr fifiləle fer. ² Na-n dea kha heendaasɔ, thale dɔ Kirisitii jɔfʋ hɩɩnɛ. ³ Ado tibil na kpɩɛr dɩ ɩnɩ dor thɩ̃ɛ sɩɩ do aa do thɩ̃a’, dɩbara a-n fɩɩl. ⁴ Tɩbɩla fɛʋ bɩɛlbɩɛl n jʋrɛ awɩ thɛthɛɛ thɔ̃ a na hɩnɛ, dɩ mɛ̃ tibil na hana ɔɔ thɛthɛɛ məbida dɩbara, sɩ a na-n too na barana haanɩda ga; ⁵ gɩdonɩ gɩrɛ telenenɩ tibil, dɔ a na-n hɩɩn gɛr. ⁶ Dɔ ʋrɛ wɩ-n dɩɩrnɩ Thãgbaa thɩmɩɩ na-n bɔna ʋrɛ n dɩrɛɛnɩ na ɔɔ thɩ̃sɔ fɛʋʋkɛ a hananɩ. ⁷ Na-n fɩɩl dɩbara ga; wa-n ɓoɓoro Thãgbara ga, gɩrɛ tibil n diirni gɛrra a na kha. ⁸ Ʋrɛɛkɛ direni dɩɩ ha mɔ̃kɛ tibili tibil do pa n ƴaalnɩ, tibili tibil do padara a na kha gɩ do kʋɛrɛ, sɩ ʋrɛɛkɛ direni dɩɩ do Thu Phuudaa gɩ, Thu Phuudaara a na kha gɩ do yire khorr. ⁹ Sa-n do nyɛ̃ɛ n khiir si bɔ cʋʋrɛra ga, gιdonι ado bɔɔ dã sa khar ado sa kɔɔ pɛr dokhʋʋra’. ¹⁰ Mɛ̃ gι nɛnɛ̃ bɔɔkɛ sι yιnι hʋɛ, sa-n cʋɛ tιbιla fɛʋ bɔɔ, sι cacaca wιrɛ dɔnι ha pɛdara. ¹¹ Nι hιnɛ mɛrɛɛ thɛthɛ khera nar sɛbɛ beekɛ gbõgbõo na ɩ̃ nyɛ̃. ¹² Wιrɛ n ƴaalɛnι i bɔ wer gιrɛraakɛ tibil yinə n yιnι, wɛr n yιrana nι nι kuro khʋ̃ʋ, kιrʋ dʋɔn kpoore wa-n ƴaal Kirisitii kʋkʋ thιrdara ga. ¹³ Gιdonι welela yɛnιnakɛ khʋ̃ʋ ιnι kur, sι wa-n hιιn jɔfʋa’, sι wι-n ƴaalɛ nι kuro khʋ̃ʋ wι yι hʋɛ wa-n məbi jιιnnaale wι pɛ narnι tomιrra. ¹⁴ Sι ado merra wer, thɩ̃ kpιι na hale ma-n məbironi saagado asι Kɔ̃tɩ̃ Jeju Kirisitii kʋkʋ thιrdara gaaga. Kʋkʋ thιrʋra dʋɔn gιrɛ cʋɛnι dιι do thιιkɛɛda do marɛ thɩ̃ khire dι mɛrɛ dakha mι khire gιrɛraakɛ dɔnι thιιkɛɛda. ¹⁵ Gιdonι a fι kurre khʋ̃ʋ yo, a fa kur khʋ̃a yo, ga-n cʋʋ thɩ̃a’, gιrɛ dɔnι thɩ̃ɛ gɛr dʋɔn tιι pha dʋʋr. ¹⁶ Wɩrɛ fɛʋʋkɛ na tuonni dιιrɛɛkɛ kɛ dɔnι Thãgbaa Ɩjιrayɛlιda, Thãgba na-n hana wι ha ιι a na-n dɔna wι dakha bʋɔ. ¹⁷ Nɛnɛ̃ dιphã tibil na-n thʋ̃ na pɛ mar nιwɛra bã, Jejuu i dɔ nɔɔ mι ’lɛrɔnι pɔnaakɛ ɩ̃ tomιra. ¹⁸ Omιna wei, asι Kɔ̃tɩ̃ Jeju Kirisiti na-n jɛ nɛrɛ fɛʋ bʋɔra. Amɛn.