KOLOSƖDARA

¹ Mɛr Polιkɛ dɔnι Jeju Kirisitii thɔ̃thɔn mɔ̃ Thãgba tuni na Timothe asι omi, ² thɔna sɛbɛɛkɛ a ha tιι phuusɔɔkɛ dɔnι sobɔ omιna, kɛ Kirisiti hιnι dι wι ha Kolosι. Thãgba asι Thι n hana nι ha ιι a jɛ nι dakha bʋɔra. ³ Wire koo sι-n khιι Thãgba asι Kɔ̃tɩ̃ Jeju Kirisitii Thι dι sι bιɛlnaa dι sa-n pɛ nar, ⁴ gιdonι sι nιɛrɛ mɔ̃ nι pɛnι Jeju Kirisiti haar na naʋʋkɛ nι hananι tιι phuusɔra fɛʋ. ⁵ Gιdonι ɔbɔɔkɛ sobɔ thιmιιrιkɛ dɔnι tutugo bʋɔ kɔɔ danι anι pa gι cʋʋ nɛr dɩ nɩ jɩ nũ pɛrɛɛkɛ gɩ-n ’laanɩ, dɩ mɛ̃ anɩ ha pɛ na anɩ naʋ jɩɩl gɩrɛraakɛra nɩ-n pɛnɩ nũu, kɛ dɔnɩ gɩrɛ Thãgba thɩɩn narnɩ le ƴũ. ⁶ Dɩ tutugo bʋɔɔkɛra ƴɛrrɛ a pɩ paar fɛʋ thɩɩraakɛ, a ha mɔ̃kɛ gɩ kɔɔ danɩ anɩ pa dabɔɔkɛ nɩ kɔɔ nɩɛnɩ cacara Thãgbaa bɔ jɩda, dɩ nɩ kɔɔ jɩ gɛr dɩɩ do gɛr dɔ sobɔr. ⁷ Epafɩrasɩɩkɛ sɩ-n nanɩ, kɛ sɩ donanɩ kha thɔ̃ dona ɔr kɔɔ dɩrɛ nɩ, sobɔ tibil gɩ Kirisitii thɔna anɩ sora; ⁸ ɔr mɩɛnɛ sɩ naʋ caakɛ Thu Phuu kɔɔ pɛ narnɩ. ⁹ Gɛr gɩ dɩ sɛrɛ dakha a fʋna wireekɛ sɩ kɔɔ nɩɛnɩ, sa-n pɩr kpɩɩ sa-n bɩɛl Thãgba sa-n pɛ naraa ga. Sɩ-n bɩɛlɛ dɩ na ’lɛ kpɛsɛrɛ na jɩɩrɩkɛ dɔnɩ Thu Phuuda, a na jɩna gɩrɛ dɔnɩ Thãgbaa tuur bɔɔbɔɔ. ¹⁰ Mɛ̃ na hana fɩlɛ na-n ɩɩr mɔ̃ Kɔ̃tɩn n ƴaalnɩ na-n cʋʋ gɩrɛ n daaraanɩ haar wire fɛʋ, na-n cʋʋna thɔ̃ bɔ caar dɩɩdɩɩ, anɩ Thãgba jɩ n kɔ̃tɩ̃ dakha ga-n pɛr. ¹¹ Ɔɔ fãgaakɛ na hanɩ mɩɛrɛra ga n cʋɛ nɩ nɩ ’lɛ punone thɩɛna fɛʋ dɩɩdɩɩ, gɩ do nɔɔ na-n yɩr na ha fʋrɛ na daʋ. ¹² Na-n fʋɔrɛ Thɩrɛ ʋrɛɛkɛ hana nɩnɩ punone dɩ na ’lɛ anɩda na tɩɩ phuusɔ ɔɔ fãga dɩ hɩrɛra. ¹³ Ɔr kɔɔ taa sɩ dabirəə fãgara, sa gba sɩ a pɛ ɔɔ Bikuunikɛ a nanɩɩ fãga dɩra. ¹⁴ Ɔr dɔ ʋrɛ kɔɔ birsene sini a faa asɩ sopugosɔ a ha sɩ. ¹⁵ Kirisitiikɛ dɔnɩ dayɩnanɛ ɔr n nɛ sar mɔ̃ Thãgbaakɛ na dɔnɩ dayɩnana’ hanɩ. Ɔr dɔ cacadaarɩkɛ Thãgba kɔnɩ dɩ do yʋʋ thɩ̃ tinənena fɛʋ; ¹⁶ gɩdonɩ ɔɔ pa thɩ̃ɛ fɛʋʋkɛ tenɩ the, gɩrɛ hanɩ thãgbara ƴũ na thɩɩra, kɛ dɔnɩ dayɩnanɛ na gɩrɛ na dɔnɩ dayɩnana’, a thɔ̃thɔ̃daar thusɔɔkɛ dɔnɩ dakpɛna yʋʋsɔ wɛ, na kɔ̃tɩnasɔ, na fãgadarasɔ, na punodarasɔ. Ɔr Thãgba tinə thɩ̃ɛ fɛʋ, dɩ thɩ̃ɛ fɛʋ ɔɔ ti gɩ ti. ¹⁷ Ɔr kɔɔ haanle sɩ thɩ̃ bɩɛllakɛ na kɔɔ ti pa’; ɔr dɔ nɔɔ dɩ thɩ̃ɛ fɛʋ ha dapa a too. ¹⁸ Ɔr dɔ yʋʋ tomιrraakɛ dɔnι we gbɛbιdara; ɔr dɔ caca fʋ paar, cacadaarɩkɛ Thãgba kɔnɩ gɩ, kɛ kɔɔ ɩrɛnɩ a the khirera, gɩ dɔ nɔɔ ɔr n do cacadaar thɩɛna fɛʋ. ¹⁹ Gɩdonɩ gɩ dar Thãgba haar dι mɔ̃kɛra a hanɩ ɔmɛna ɔɔ Bikuun na ha gbelẽ gbelẽ. ²⁰ Gɩ daaraarɛ dakha haar dɩ gba ɔɔ Bikuun a cʋʋna thɩ̃ɛ fɛʋ dɩ gɩ bir kũu kha na ɔr Thãgba, ado gɩrɛ hanɩ thɩɩra gɩ, ado gɩrɛ hanɩ thãgbara ƴũ gɩ; ɔɔ Bikuuni tɔmɩ̃ɩkɛ kɔɔ deerenɩ kʋkʋ thɩrʋra dɔ nɔɔ dɩ thɩ̃ɛ fɛʋ bir ’lɛrɔ ha ɩɩ na Thãgba. ²¹ Nɛrɛ dakha mamara nɩ kɔɔ dor kpakpala Thãgbaadara na ɔɔ lãlaardara, dɩɩ the anɩ kpɩɛrra na anɩ puu cʋʋra. ²² Sɩ nɛnɛ̃ Thãgba cʋʋ nɛr dɩ nɩ bir kũu kha na ɔr, dɩι the ɔɔ Bikuuni khirə mɔ̃ a debini a do tibil, gι cʋʋ nι nι jιιl ɔɔ ƴɛ thɩ̃thιιn nι phu, nι ’lee dι paar, na hana sι paara’; ²³ ado nι fʋrɔrɛ ha pɛrɛ dι na-n jalna a jιιllɔ a ma kĩkĩ, dι ga do nι kɛrrɛ sa faa nũ pɛrɛɛkɛ nι hananι dιι the tutugo bʋɔraakɛ nι kɔɔ nιɛna’, kɛ dɔnι gιrɛ wι kɔɔ mιιnι tιbιlala fɛʋ thιιra, kɛ mɛr Pol doronι gιrɛ thɔ̃ don. ²⁴ Nɛnɛ̃ daʋ fʋ mɛr ka ɩ̃ bɔ gaarraakɛ mι-n gaarnι nɛrɛra; bʋɔɔkɛra mι-n gaarnι ɩ̃ tomιra, Kirisitii we gbɛbιdaraa sora, kɛ dɔnι ɔɔ tomι, gι ɓaanɛ dι ga-n pιιr Kirisitiidaakɛ a kɔɔ gaarnι awι sora; ²⁵ dι we gbɛbιdaraa thɔ̃ dodaarra mι do gιrɛ, dιι ha mɔ̃ thɔmaakɛ Thãgba pɛ marnι ma-n dɔ nar hanι, gɛr dʋɔn ma-n mιa ɔɔ thιmιι koo, ²⁶ kɛ dɔnι thɩ̃ gbulikɛ kɔɔ keranι kɛkɛkɛ tιbιlala fɛʋ, sι Thãgba cʋʋ gι dι gι yιr nɛnɛ̃ ɔɔ tιι phusɔra. ²⁷ Thãgbaa ƴaalla gι the dι cʋʋ wι wι jɛ mɔ̃ thɩ̃ gbullə donι thɩ̃ ɓʋ̃ɔ ka a kpaa nʋɔ tibil caarra fɛʋ, gɛr dʋɔn: Kirisiti ha anι bιnɔ, kɛ dɔnι nũ pɛrɛɛkɛ nι hananι mɔ̃ na ’lɛnι i dʋbιrɛ na Thãgba. ²⁸ Ɔr dɔ Kirisitira sι-n mιιnι. Sι-n kpãkpaanɛ tιbιlala fɛʋ bιɛlbιɛl dι sa-n dιιrna wι na kpɛsɛrɛ fɛʋ, gι cʋʋ tιbιla fɛʋ wι bɔr wι ka Thãgbaa ƴɛra, gι the awι bιɛl dora na Kirisiti. ²⁹ Gɛrra dɔ nɔɔ dι ma-n gbũgbulõ thɔmana dι ma-n kɛ̃kɛrɛna gι, na Kirisitii fãga kʋkʋʋkɛ a ha mιnι dι ga-n do thɔma ɩ̃ pa.

¹ Gιdonι mι-n ƴaalɛ nι jɛ mɔ̃ kɛ̃kɛrɛ̃ kɔ̃tɩ̃ιkɛ mι-n kɛ̃kɛrɛnι anι sora hanι, na wιrɛraakɛ hanι Laʋdιse, na wιrɛraakɛ na yɛ mιnι ƴɛbiro pa’, ² gι do nɔɔ wɩ yɩ ha ƴɔllɛ, wɩ gbɛbɩ wɩ do bɩɛl naʋra, wι hana tu jιιrιkɛ thɛnι jι bʋɔra, wι puno wa-n jιna Thãgbaa thɩ̃ gbulikɛ dɔnι Kirisitii thɛthɛ. ³ Ɔr cʋɛ Thãgbaa kpɛsɛ na jιιrιkɛ hɔnι tιι ko thɩ̃ɛɛkɛ keranι dιι yιr. ⁴ Mι-n mιιrɛ thakɛ gι do nɔɔ tibil na fιιl nι na nɔ da thιmιa ga. ⁵ Mɛrɛɛ thɛthɛ na hanɩ anɩ parakɛ gɩra’, sɩ ɩ̃ thu har kha na nɛrɛ, dɩ daʋ fʋ mɛr mɔ̃ mɩ yɩnɩ fɩl bʋɔ dɩɩ ha anɩ thɩ̃thɩɩn, na mɔ̃ anɩ ha pɛɛkɛ nɩ hananɩ Kirisitira tɩnɩ kĩkĩ. ⁶ Mɛ̃ gɩ mɔ̃kɛ nɩ ’lɛnɩ Jeju Kirisiti dɩ do Kɔ̃tɩn, na-n ɩrɛ kha na ɔr na wa fɩl, ⁷ a gɔ nɛɛ gɩ hulono ɔrra; nɩ jɩlɛ ɔrra kɩbɩ, nɩ tɛ ha pɛrɛraakɛ nɩ hananɩ mɔ̃kɛ dɩɩrɛɛkɛ wɩ kɔɔ dɩɩr nɩnɩ hanɩ. Nɩ dɔ Thãgba khɩɩrɛ n too nɩ nɔɔ. ⁸ Na-n jɩɛ dʋ bʋrɛ, na-n do tibil n fʋ nɩ a ɩɩrɔ na tibil jɩɩrɩkɛ dɔnɩ mɔlɔdaa wɩ-n fɩɩlna nɩna’, gele fɛʋ kpamna gɩ the na dɩɩrɛraakɛ na dɔnɩ bɔ taa dɩɩra’, kɛ dɔnɩ thɩ̃ tinəneeda, ga do Kirisitii pa gɩ tha’. ⁹ Gɩdonɩ Thãgba dʋʋr koo har Kirisitii tomɩra. ¹⁰ Dɩ anɩ yi hanana na Kirisiti, dɩkha na ɓɔr nɩ fɩɩʋraka’. Ɔr dɔ yʋʋ kɔ̃tɩnasɔra fɛʋ na fãgadarasɔra fɛʋ. ¹¹ Mɔ̃ nɩ donɩ kha bɩɛl na Kirisiti wɩ kɔɔ kur nar khʋ̃ʋ, sɩ ga do tibil nyɛ̃ɛ kuro ga, sɩ Kirisiti n kuro gɩ; a thɩɛna gaa gɛr dɔ taarɛ tɩɩ tɩ̃ dʋʋrra. ¹² Yɔ kpɛɛrɛra wɩ kɔɔ dʋ nɩ kha na Kirisiti, sɩ Thãgba ɩɩr nɩ kha dakha khirera wo na ɔrra, dɩɩ the ha pɛrɛraakɛ nɩ hananɩ Thãgbaa fãgaraakɛ kɔɔ cʋgɛɛnɩ dɩ ɩɩr a the khirera. ¹³ Nɛrɛɛkɛ mamara anɩ sopugo na mɔ̃ na kɔɔ kurni khʋ̃a’ dɔnɩ nɔɔ dɩ nɩ kɔɔ khi, sɩ nɛnɛ̃ Thãgba bire ha nɩ kha yire na Kirisiti a faana asɩ sopugosɔ fɛʋ. ¹⁴ Jɔfʋʋkɛ kɔɔ kheranɩ asɩ so heen khere dɩɩ do a thɩɛna gaa sor heene sɩ asɩ Thãgbaa jɔfʋ kʋɛrara, Thãgba bũburõ ger a faa mɔ̃ a gba gɩnɩ a kpa thɩrʋra. ¹⁵ Kʋkʋ thιrʋʋ pa gι the dι Kirisiti puno kɔ̃tιnasɔ na fãgadarasɔɔ fãga a tagιrι, sa nιna tιbιla fɛʋ dι ɔr punone wi. ¹⁶ Gɛr gι na-n do tibil n yι hʋɛ a na-n yι nar dιι gιrɛraakɛ nι-n khonι dι na-n yɔna ga, agιbo gι do fɛtι thιmιιrra, na sιpo pha hιιndaara dι hιιr widaara gι woa’. ¹⁷ Gelesɔ fɛʋ dʋɔn gιrɛ na ɩnanɩɩ jəər, sι gιrɛ dɔnι sobɔ bire Kirisiti gι. ¹⁸ Na-n do tibil n fιιl nι na sõso dιbara jor, na thɔ̃thɔ̃daar thusɔɔ fʋɔrda, gι cʋʋ nι nι ’lee khorιkɛ na ’lɛna’. Tibil ca ole ire a-n ka thιɛnaakɛ a yιnι ιnι yɩrɛ, gɩdonι ɔɔ kpɩɛrra aa-n kpιɛrna Thãgba ga; ¹⁹ sι aa-n ka dι ma Kirisitiraakɛ dɔnɩ yʋa’, kɛ dɔnɩ ʋrɛ n cʋɛnɩ tomɩr fɛʋ dɩ ɔɔ ƴɔɔ pa na cela fɛʋ n li gi dɩɩ coor a do bɩɛl, a khɔ̃ dɩɩ do Thãgbaa pa gɩ the. ²⁰ Gɩdonɩ nɩ kɔɔ khire kha na Kirisiti, na ha kha dιkha na dιιrɛɛkɛ na dɔnι bɔ taa dιιra’, kɛ dɔnι thɩ̃ tinəneeda ga, mɔ̃gιdo dι na hana fιlɛ ’lo gι ho thιιkɛɛda nι do, nι sιrɔ wa-n ha nι jɔfʋ wι yι: ²¹ Fa-n gba ga, fa-n ’lɛ hιιna’, fa-n thara’. ²² Sι gelesɔ fɛʋ thɩ̃ kʋɛna gι do a fι yι fι gba gι a na cʋɛna thɩ̃ɛ, dιrakɛ wo tibil jɔfʋ gι na tibil dιιrɛ. ²³ A fι yιɛ wer gι-n hʋrɛ kpɛsɛrɛ, mɔ̃ gι-n hananι dιbara fɛrɛ Thãgba fʋɔrɛ, na dιbara jor, na tomι hʋɔlɛ dιbara, sιι dorakɛ ga do bɔ taa thɩ̃ɛ ha gela’, sι tomιrιkɛ gι-n kʋnɩ thue dɔrɔɔm, dɩɩ do gɩ daaraarɛ gɩ.

¹ Mɔ̃ nɩ ɩɩrnɩ khirera nakha Kirisiti, na-n ƴaalɛ ƴũ thɩ̃ɛ, ka Kirisiti hanɩ gɩrɛ a too Thãgbaa nyɔ̃bɔra. ² Na-n kpɩɛrna ƴũ thɩ̃ɛ, na-n kpɩɛrna gɩrɛ hanɩ thɩɩra ga. ³ Gɩdonɩ nɩ kɔɔ khire dɩ anɩ yi ha Kirisitira dɩphã a ker Thãgbaa pa. ⁴ Dɩ ɔbɔɔkɛ Kirisitiikɛ dɔnɩ anɩ yi hana na yɩrnɩ, le na yɩr kha dakha na ɔr ɔɔ i dʋbɩra. ⁵ Gɛr gɩ nɩ kɔ anɩ thɩ thɩ̃ ƴaal, kɛ dɔnɩ bɔdɛl cʋʋrɛ, na thɩ̃ bise cʋʋrɛ, na thɩ̃ puu ƴaalɛ, na thɩ̃ puu kpɩɛrɛ, na ha pɩɛrɛɛkɛ dɔnɩ bɩɛl na thɩl jir. ⁶ Gɛrra n cʋɛ nĩkhii dɩɩ fʋ Thãgba. ⁷ Dɩ nɛrɛ dakha nɩ kɔɔ hananɛ ga fɩlɩlera mamara ɔbɔɔkɛ nɩ kɔɔ ha garnɩ. ⁸ Sɩ nɛnɛ̃kɛ nɩ dɔna gelesɔ fɛʋ a faa: Nĩkhii, nĩkhi khɩɩ, kpallɛ, tibil i kʋɛrɛ na khaakhaar thɩmɩaakɛ n thɛnɩ anɩ nɔra. ⁹ Na-n kuur sɔ̃sɔ na pɛ khasɔa’, gɩdonɩ nɩ kɔɔ thʋbɩrɛ tɩɩ tɩ̃ dʋʋr na ɔɔ thɔ̃ a faa, ¹⁰ sa to tɩɩ pha dʋʋrɩkɛ n dʋɔnnɩ daphaa da-n pɛr, da-n hona Thãgbaakɛ tieni dɩ a na jɩɩ hananaa jɩ bʋɔ. ¹¹ Liir Juifi na ha kpɩɩ dɩ wɩrɛ na dɔnɩ Juifisɔa ha kpɩa’, dɩ ʋrɛ wɩ kurni khʋ̃ʋ gɩ dɩ ʋrɛ wa kurni khʋ̃aa ga, dɩ hɔ̃ baldara wɛ dɩ wɩrɛ na phuoni yire paa ga, dɩ dee gɩ dɩ waʋ ga; sɩ Kirisiti dʋɔn thɩ̃ɛ fɛʋ a har dakha thɩ̃ɛ fɛʋra. ¹² Gɛr gɩ mɔ̃kɛ nɩ donɩ wɩrɛ Thãgba phiirni dɩ nɩ phu, a dona dakha wɩrɛ a-n nanɩ, nɩ hanana bɔ jɩɩr gɩ kɔ̃tɩ̃ gɩ ka, na ha bulo fɩlɛ, na dɩbara jor, na hɛlɛlɛ fɩlɛ, na ha fʋrɛ. ¹³ Ado tibil hana sor na ʋ̃ tibil, nɩ hanana kha ha fʋrɛ a faa na hana kha; mɔ̃kɛ Kirisiti kɔɔ faanι anι sopugosɔ, nɛrɛ dakha nι faa sopugosɔ na hana kha. ¹⁴ Sι gιrɛ jɔnιnakɛ thɩ̃ɛ fɛʋ dʋɔn nι hanana naʋʋkɛ dʋɔnnι bιɛl do lidaakɛ n cʋɛnι tibil dι bɔr dι ka. ¹⁵ Ha ιιkɛ n thɛnι Kirisitira, kɛ Thãgba we narnι nι ’lɛ mɔ̃ nι donι tomι bιɛl, nι dɔ ha ιιra n do kɔ̃tιn anι hara, na-n hana dakha fɔfʋɔr haar. ¹⁶ Nι dɔ Kirisitii thιmιιkɛ ɓɔnanι ka n too anι hara jɔɔ. Na-n dιrɛ kha thɩ̃ɛ a na kpãkpaana khasɔ bιɛlbιɛl na kpɛsɛrɛ fɛʋ. Na-n khιna Thãgbaa khιkhιι nι, na ɔɔ fɔfʋɔr nι, na Thu Phuu nιɛsɔ; na-n khιna gιsɔ na fɔfʋɔr haar ga-n khιι Thãgba. ¹⁷ Dι thɩ̃ɛ wo thɩ̃ɛɛkɛ nι-n cʋʋnɩ, a thɩmɩɩr nɩ-n mɩɩ, a thɔma nɩ-n do, na-n cʋɛ thɩ̃ɛ fɛʋ mɔ̃ nɩ donɩ Jeju Kɔ̃tɩnɩda, a na khɩana Thãgba Thɩrɛ gɩ do ɔɔda dɔ nɔɔ. ¹⁸ Khɛra, na-n jɔ anɩbara anɩ kora mɔ̃ nɩ donɩ Kɔ̃tɩnɩda. ¹⁹ Kona, na-n na anɩ khɛr, na-n hananaa fɩl khɩa’. ²⁰ Bɩsana, na-n nɛ anɩ thɩ na anɩ nɩ nũu thɩɛna fɛʋ, gɩdonɩ gɛr n da Kɔ̃tɩn haar. ²¹ Thɛ, na-n gba bɩsanana fɩl khɩɩ awɩ kpɩɛr n kʋɛa’. ²² Dea, na-n nɛ nũu thɩ̃ɛ fɛʋra anɩ kɔ̃tɩ̃sɔraakɛ nɩ donanɩ kha tibil kɛ thɩɩra, sɩ ga-n do awɩ ƴɛra dɩbara gɩ ho tɩbɩla nɩ-n ƴaal nɩ da haara’, sɩ na-n cʋɛ na ha bʋɔ gɩdonɩ Kɔ̃tɩn nɩ-n ma. ²³ Thɩ̃ɛ wo thɩ̃ɛɛkɛ nɩ-n cʋʋnɩ na-n cʋɛ na haar fɛʋ, gɩ ho Kɔ̃tɩnna nɩ-n cʋʋ ga-n do tɩbɩlala ga; ²⁴ na-n jɩnana dɩ Kɔ̃tɩn na ka nɩ na thɩ̃ɛɛkɛ a thɩɩnnɩ gɩ dɔ anɩda. Gɩdonɩ Kirisiti dʋɔn Kɔ̃tɩnɩkɛ nɩ-n doronɩ thɔma. ²⁵ Gɩdonɩ ʋrɛɛkɛ n cʋɛnɩ puure a na ’lɛr lɩmɩnɛ ɔɔ puu cʋʋrara, dɩɩdɩɩ hɩɩnɛ na hala’.

¹ Kɔ̃tɩna, nɩ telene a bʋɔnɔ anɩ deesɔra, na-n jɛna dɩ nɛrɛ dakha nɩ hananɛ bɩɛl dɩ do Kɔ̃tɩn a ha ƴũ. ² Na-n yɩra Thãgba bɩɛlɛla, nɩ hanana gar pərre a na khɩa Thãgba. ³ Nɩ jɩɛ bɩɛlna dakha Thãgba na pɛ sar, Thãgba n khɛr sɩ loo Thãgbaa thɩmɩɩ mɩɩrɛraakɛ dɔnɩ Kirisitii thɩmɩɩkɛ dɔnɩ thɩ̃ gbul, kɛ dɔnɩ nɔɔ dɩ ɩ̃ ha gɩrɛ khaɩra, ⁴ ɩ̃ puno ma-n jɩɩ mɩɩ gɩ gɩ yɩr casɩ mɔ̃kɛ gɩ teenanɩ. ⁵ Na-n hana kpɛsɛrɛ wɩrɛraakɛ na dɔnɩ ha pɛdara ga. Ƴɩɛɛkɛ nɩ yɩnɩ na-n faa gɩ ka fɩɩʋraka’. ⁶ Wire fɛʋ nɩ dɔ anɩ thɩmɩɩ na-n do gɩrɛ bʋɔnɔnɩ, gɩ dɔ thɩmɩɩ daa, nɩ jɩ mɔ̃ na birseni tɩbɩla fɛʋ bɩɛlbɩɛl. ⁷ Tɩsɩkɩɩkɛ dɔnɩ omineekɛ mɩ-n nanɩ, kɛ dɔnɩ sobɔ tibilikɛ sɩ donanɩ kha thɔ̃ dona Kɔ̃tɩnɩ thɔna, ɔr na mɩɛnɛ nɩ mɔ̃ thɩ̃ɛ fɛʋ hanɩ ɩ̃ pa. ⁸ Gɩrɛ mɩ thʋɔnaanɩ anɩ pa dʋɔn nɩ jɛ mɔ̃ thɩ̃ɛ hanɩ asɩ pa, gɩ cʋʋ nι nι faa haar. ⁹ Mι thʋɔnɛ nakha Onejιmιkɛ dɔnι sobɔ tibil, a dona omineekɛ mι-n nanι, kɛ dɔnι dakha anι tibil. Wɛr na mιɛnɛ nι mɔ̃ thɩ̃ɛ fɛʋ hanι kɛkɛ. ¹⁰ Arιsιtarkιιkɛ sι hananι kha khaιra a fʋɔr nɛr, na dakha Markιιkɛ dɔnι Barnabasιι omi, kɛ dɔnι ʋrɛɛkɛ mι kɔɔ so narnι ayι: Ado a pɔ anι pa nι teaa. ¹¹ Jejuukɛ wι-n wenι Jusitusi a fʋɔr nɛr dakha. Khʋ̃ kurdaraa thɩ̃thιιn, wɛr yẽther dιbara dɔ tιbιlaakɛ n dɔna mιnι kha Thãgbaa fãgadaar do thɔma; wɛr dɔ wιrɛ n kɔɔ ƴɔla mιnι haar. ¹² Epafιrasιιkɛ dɔnι anι tibil a fʋɔr nɛr; Jeju Kirisitii thɔ̃daar a do; bɔɔ fɛʋ a-n kɛ̃kɛrɛ̃ Thãgba bιɛlɛla da-n pɛ nar, gι dɔ nɔɔ nι jιιl kιbι mɔ̃ nι donι ha pɛdaraakɛ bιnanι, a hana tu jιιr dɩ na-n cʋʋ gιrɛ fɛʋʋkɛ Thãgba tuni. ¹³ Mι punone so ɔɔdara ayι: Tibil gιιkɛ n gbɛ̃gbɛrɛnɛnι thɔmana anι sora, na wιrɛraakɛ hanɩ Laʋdɩse na Yerapolɩsɩ. ¹⁴ Luki dɔtɔrɔ kuunikɛ sɩ-n nanɩ na dakha Demasɩ n fʋɔr nɛr. ¹⁵ Nɩ fʋɔrɛ omɩnaakɛ hanɩ Laʋdɩse na Nɛ̃fasɩ na we gbɛbɩdaraakɛ n gbɛbanɩ kha ɔɔ cɔ. ¹⁶ Ado sɛbɛɛkɛ hɩɩn anɩ pa pɩ, nɩ dɔ dakha wɩ hɩɩn gɩ Laʋdιse we gbɛbιdarara, nɛrɛ dakha n hιιn ʋrɛ na thɛnι Laʋdιsedaraa pa. ¹⁷ Sι nι sɔ Arsιpιra ayɛwɔɔ, a na-n jιɛ hιιn thɔmaakɛ a kɔɔ ’lɛnι Kɔ̃tιnι pa, a cʋɛ gι ga-n dã bɔɔbɔɔ. ¹⁸ Mɛr Polι thɛthɛ khera fʋɔrɛɛkɛ na ɩ̃ nyɛ̃. Na-n jɛna mɔ̃ mι hanι khaιra. Thãgba na-n jιɛ nι bʋɔra.