2 TIMOTHE

¹ Mɛr Polɩkɛ dɔnɩ Jeju Kirιsitii thɔ̃thɔn mɔ̃ Thãgba tuni dɩ ma-n mɩɩ yidaakɛ hanɩ Jeju Kirisitira, kɛ Thãgba yɩnɩ ɩna ’laarɛ, ² mɛr thɔna sɛbɛɛkɛ a ha Timotheekɛ dɔ marnɩ bikuunikɛ mɩ-n nanɩ: Thãgba Thιrɛ, na asι Kɔ̃tɩ̃ Jeju Kirisiti na-n jɛ fι bʋɔra a na-n dɔna fι dakha bʋɔ, a na-n hana fι dakha ha ιι. ³ Mι-n khιɩrɛ Thãgbaakɛ mɩ-n doronɩ thɔma ɩ̃ thɩthɩsɔɔ kha na kpɩɛrnɔ phuu; bɔɔ fɛʋʋkɛ mɩ-n jɩna fɩnɩ ɩ̃ Thãgba bɩɛlla dɩtɩnɛ na dɩwɩlʋ, mɩ-n khɩɩrɛ Thãgba. ⁴ A ma jɩna afɩ yilẽbi mɩ-n ƴaalɛ ka ɩ̃ yɛ fɩ daʋ n fʋ mɩ vʋ̃ʋ. ⁵ Mɩ-n jɩnanɛ dakha afɩ ha pɛɛkɛ na hananɩ fɩɩla’; dɩ afɩ nɩ kɔ̃tɩ̃ Lʋιsι na afι nι Enɩsɩ kɔɔ hana gɩ ɓo, dɩ mɩ jɩrɛ fι hana gɛr dakha. ⁶ Gɛr gι dɩ ma-n so far dι fa cʋʋ Thãgbaa khaardaakɛ fι kɔɔ ’lɛnɩ ɩ̃ nyɛ̃ dɛɛna ga-n jɩɩ le dɔ khaa. ⁷ Gɩdonɩ Thueekɛ Thãgba ha sɩnɩ na pɛ sar ha phaarɛ kpɩɩraka’, sɩ fãga a na-n ha sɩ, na naʋ, na dɩbara fʋʋr. ⁸ Gɛr gɩ fa-n do yicuru na-n fʋ fɩ asɩ Kɔ̃tɩ̃ɩ sobɔ so jɩ thɩmɩɩra ga, dɩ mɛrɛraakɛ dɔnɩ ɔɔ khaɩdaar ga, sɩ gaarɛ bʋɔ na mɛrɛ tutugo bʋɔɔ thɩmɩɩra, gɩ the Thãgbaa fãgara. ⁹ Ɔr gɩɩkɛ kɔɔ taa sɩnɩ a we sɩ sɩ pho, sɩ ga do asɩ thɔ̃ cʋʋra gɩ tha’, sɩ mɔ̃kɛ ɔɔ ƴaal hanɩ gɩ, na ɔɔ bɔ jɩɩkɛ a kɔɔ maanɩ thɩɩn sar kɛkɛkɛ dɩɩ do Jeju Kirisitii pa gɩ the. ¹⁰ Gɛr dɔ gɩrɛ yɩranɩ nɛnɛ̃ Jeju Kirisiti asɩ Taadaarɩ ɩna, kɛ kɔɔ bũburoneni khir, sa gba tutugo bʋɔɔ thɩmɩɩ a nɩnana yireekɛ na dɔnɩ dapɩnana’, dɩɩ yɩr dɩphã. ¹¹ Ga tutugo bʋɔɔ thɩmɩɩra Thãgba pɛ mar dɩ ɩ̃ do ga mɩmɩɩ na thɔ̃thɔn na dɩɩrdaar. ¹² Gɛr dɔ nɔɔ dɩ ma-n gaar bʋɔ thakɛ sɩ yicuru na-n fʋ ma’, gɩdonɩ mɩ jɩɛ jɩ ntɛɛkɛ mɩ pɛrnɩ haar, dɩ mι jɩrɛ tue gel dɩ a hananɛ punone a na hɩɩnna gɩrɛ a kɔɔ gbanɩ a dʋ mɩ nyɔ̃kɔɔ gɩ dana ga Wiile. ¹³ Gba thɩmɩɩ bʋɔɔkɛ mɩ kɔɔ ha fɩnɩ gɩ do far thɩ̃ nɩrɔrɛ fɩ jɩɩllɔ ha pɛrɛra, na naʋraakɛ sɩ hananɩ dɩɩ the asɩ bɩɛl dora na Jeju Kirisiti. ¹⁴ Thu Phuukɛ hanɩ asɩ bɩnɔ, jɩɛ fʋrɔ na ɔɔ fãga thɩ̃ bʋɔɔkɛ Thãgba dʋ fɩnɩ nyɔ̃kɔɔ. ¹⁵ Fɩ jɩrɛ dɩ wɩrɛ fɛʋʋkɛ hanɩ Ajɩ kɔɔ faa mɛr, ɩkhasɔ wɛrra dʋɔn Fɩjɛl na Ɛrmojɛn. ¹⁶ Kɔ̃tɩn n jɛ Onejɩfɔɔrɩ cɔdara wer bʋɔra, gɩdonι bɔ jɔjʋɔra ɔr n kɔɔ ƴɔla mɩ haar, dɩ yicuru na kɔɔ fʋʋ ɩ̃ khaιdaar dora ga; ¹⁷ sι ɔbɔɔkɛ a hanι Rɔm dιιra a ka kɔɔ ƴaal mɛr jɔɔ ka sa yι mι. ¹⁸ Kɔ̃tιn n jιɛnɛɛ bʋɔra ga Wirəəle gι the Kɔ̃tιnι pa. Fι jιrɛ bɔɔbɔɔ mɔ̃kɛ a kɔɔ bul mini jɔɔ Efɛjι dιιra.

¹ Sι fɛr ɩ̃ bikuun, hanana fãga gι the bɔ jιιrraakɛ hanι Jeju Kirisitii pa. ² Gιrɛ fι nιɛnι dι ɩ̃ mιιna tibil jɔjʋɔɔ ƴɛra, gba hana sobɔ tιbιlaakɛ na punoneni na dιιr dakha wɩ̃ tibil. ³ Gaarɛ bʋɔ nakha mɛrɛ a hɔ Jeju Kirisitii sɔrasι bɔ. ⁴ Tibil na ha sɔrasι cʋʋ paar sι a bir a faa ɔɔ kpιɛr nɛnɛ̃ bɔɔkɛɛ thιna, ado a-n ƴaalɛ a da ɔɔ sɔrasι kɔ̃tɩ̃ haara’. ⁵ Kɔlɔ̃kɔɔ can na ’li khor cacadaar dʋʋrra ado aa kɔɔ ca mɔ̃kɛ ga jɔfʋ sonaa ga. ⁶ Dɔ kokol n kɔɔ gbʋʋ yʋʋ kʋʋlɛla ɓo sɩ khar na-n kpaan. ⁷ Kpɩɛrɛ gɩrɛ mɩ sonɩ a hɩnɛ; Kɔ̃tɩn na hana fɩ kpɛsɛrɛ thɩ̃ɛ fɛʋra. ⁸ Na jɛna Jeju Kirisitiikɛ dɔnɩ Davɩdɩɩ məl, ʋrɛɛkɛ kɔɔ ɩrɛnɩ a the khirera mɔ̃kɛra tutugo bʋɔɔkɛ mɩ-n mɩɩnɩ sonɩ, ⁹ kɛ mɩ-n gaarɔnɩ bʋɔ gɩrɛ dɩ wɩ ba linə mi dɩ ɩ̃ ho puu cʋʋ tibil, sɩ Thãgbaa thɩmɩɩ wer na ha li paara’. ¹⁰ Gɛr gɩ dɩ ɩ̃ hana yɩrrɛ thɩ̃ɛ fɛʋra, wɩrɛ Thãgba phiirni n puno wɩ ’lɛ taarɛɛkɛ hanɩ Jeju Kirisitira na i dʋbɩrɛɛkɛ dɔnɩ khorrdaa. ¹¹ Sobɔr thɩmɩɩrɩkɛ do gɩ yɩ: “Ado sɩ kɔɔ khire kha na ɔr, sa hananɛ kha dakha yire na ɔr. ¹² Ado sa yɩr, sa bulle kha na ɔr ɔɔ fãgadaar dora. Ado sɩ bʋʋ, oti a na bo sɩ. ¹³ Ado sa do sobɔ tibilə’, sobɔ tibillə or na dorakɛ ’lo, gɩdonɩ a na puno na debi ɔɔ fɩl dɩ ga ha kpɩɩ na gɩrɛ a dona’.” ¹⁴ Cʋɛ tɩbɩla wɩ jɩna ga thɩ̃ɩkɛ, dɩ na kpãkpaanɛ war kheu Thãgbaa ƴɛra wa-n bana mɔlɔ thɩ̃ banaa ga, ga do thɩ̃ bʋɔ ga, kʋɛrɛ gɩ-n do wɩrɛraakɛ n pɛ gɩnɩ nũu. ¹⁵ Gbuoro yʋʋ na jɩlɛ Thãgbaa ƴɛra mɔ̃ fɩ donɩ thɔ̃daarɩkɛ daaraanɩ haar sɩ yicuru na fʋ fa’, sɩ fɩ do ʋrɛ n ’laanɛnɩ Thãgbaa thɩmɩɩ dẽdẽdẽ. ¹⁶ Golone folo folola na khaakhaar thɩmɩara, gɩdonɩ wɩrɛ n cʋɛnɩ ga thɩ̃ɩle gɩ-n cʋʋ wɛr dɩ awɩ Thãgba fɩl ’lee n puuro dɩ ga-n pɛr. ¹⁷ Awɩ thɩmɩɩ dakha n ƴɛrrɛ nɔr khaa, mɛ̃ gɩ ha na Imene na Fɩlɛtɩ, ¹⁸ kɛ kɔɔ dɛnɩ hʋɛra a lɛ̃ sa faa sobɔr dɩ wa-n mɩɩ ayɩ: Khi ɩɩrɛ mãa kpãsɛrɛ; dɩ wɩ cʋʋrɛ ɩkhasɔɔ ha pɛ dɩɩ kʋɛ. ¹⁹ Sɩrakɛ Thãgbaa gookɛ a kpɛɛnɩ gɩ jɩɩlɛ kɩbɩ, a hana thɩmɩɩrɩkɛ dɔnɩ jɩɩn dɩɩ so ayɩ: “Kɔ̃tɩn jɩrɛ wɩrɛɛkɛ dɔnɩ ɔɔda.” Wo: “Tibil wo tibilikɛ yɛnɩ Kɔ̃tɩnɩda ɩnɩ do, dɔ a hʋnɔna sopugo.” ²⁰ Cɔ kɔ̃tɩɩna, ga-n do bʋlaakɛ wɩ cʋʋnanɩ dɛ na gɩrɛ wɩ cʋʋnanɩ dɛ bulona n haanle dɩbara ga, sɩ thɩrdaa n hale dakha na jadaa, dɩ yɛ n dor bʋla ɓʋ̃ɔ sɩ yɛ n do thɔ̃ pɔɩ cʋʋdaa. ²¹ Dɩ ado tibil fʋ dɩbara a phu ga sopugosɔraale, ɔr na dɔ bʋla ɓʋ̃ɔ, kɛ Thãgba thɩɩnnɩ kpɩɩ, dɩɩ do bɔ taa thɩ̃ɛ Kɔ̃tɩnna, a too ga too a na-n do thɔ̃ bɔ caar dɩɩdɩɩ fɛʋ. ²² Gɩrɛ n kɔnɩ daɓola thue, fe khiru pɛ gar, sɩ na ƴaalɛ fɩl sarʋ, na ha pɛrɛ, na naʋ, na ha ɩɩ, nakha wɩrɛɛkɛ n fʋɔrɛnɩ Kɔ̃tɩn na ha phuu. ²³ Bɔ də̃bəəl thɩ̃ bananɛɛkɛ na hananɩ kɩrʋa’, gɩdonɩ fɩ jɩrɛ gɛr n ɩrɛna kɩla. ²⁴ Dɩ ga teena Kɔ̃tɩnɩ thɔ̃daar na-n ɩrɛna kɩla ga, a ka teenanɛ a hanana hɛlɛlɛ fɩlɛ na tɩbɩla fɛʋ, a dɔ dakha tibilikɛ n punoneni da-n dɩɩr tibil thɩ̃ɛ; a dɔ ha fʋ tibil, ²⁵ a hanana ha bulole mɔ̃ a-n narnɩ wɩrɛ na-n tuonni dɩɩra’, a na pɛna nũu mɔ̃ ga donɩ Thãgba cʋʋ wɛr dɩ wɩ debi haar a jɩ gɩrɛ n dɔnɩ sobɔr, ²⁶ gɩ cʋʋ dakha kpɩɛrɛ gɩ lõ war wɩ taa Satãa pherra, kɛ fɔ wɩnɩ ɩɩrɔ wa-n cʋɛ ɔɔ tuur.

¹ Jɛna dɩ pɩpɩɩ wiresɔra bɔ puu na hale. ² Gɩdonɩ tɩbɩla na dor dɩbara nadara, war nadara, nɔfa mɩɩdara, i yaaldara, Thãgbaa i kʋɛdara, thɛ na nɛɛ nũ nʋʋrdara, wa jɩ fɛr hɩna fʋɔra’, wa dor Thãgba bodara, ³ wa hana pərrə’, wa dor nɔ ɓaar tɩbɩla, tibil i kʋɛdara, dɩbara fʋ ’leedara, ha khedara, fɩl bɔ bodara, ⁴ tibil liirdara, wolo wolodara, i kadara, gɩrɛ n kɔnɩ tibil thuee ƴaal na har awɩ hara a na jɔ Thãgba ƴaalɛ; ⁵ sɩrakɛ wɩ hor Thãgba fʋɔrdara sɩɩ do wɩ bor ga fãgaale. Hʋnɔnɛna wa tibil casɔɔle. ⁶ Wɛ n hale awɩ thɩ̃thɩɩn dɩ wɩ wolõ a lõ tɩbɩlaa cɔ a fʋlɛ khɛr surosɔɔkɛ sopugo doronɩ dɛr a ɩɩrɔ, kɛ dɔnɩ khɛ ƴɩrɛ thɩ̃ caar dɩɩdɩɩ n kʋnɩ thue ka, ⁷ kɛ n ƴaalɛnɩ wa-n dɩɩr thɩ̃ɛ wire koo, sι wa-n mar kpɩɩrakɛ a na dã a na jɩ gɩrɛ dɔnɩ sobɔra’. ⁸ Mɔ̃kɛ Janɛsɩ na Jãbɩrɛsɩ kɔɔ bãbaranɩ Mʋɩjɩ, mɛna wa tibil casɔɔle n bãbarã sobɔr. Tɩbɩla wɛɛkɛ awɩ kpɩɛr na telena’, dɩ wa do bɔ taa tɩbɩla ha pɛdaara ga. ⁹ Dɩ wa puno na jal ƴɔɔ bã, gɩdonɩ awɩ də̃bəəl na yɩrrɛ tɩbɩlala fɛʋ mɔ̃kɛ kona yenyɔɔleeda kɔɔ yɩrnɩ. ¹⁰ Sɩ fe wer, fɩ kpaanɛ ɩ̃ dɩɩrra dɔdɔdɔ, na ɩ̃ cʋʋ para, na gɩrɛ mɩ jɩɩllɔnɩ, na ɩ̃ ha pɛra, na ɩ̃ ha fʋra, na ɩ̃ naʋra, na ɩ̃ yʋ gbuurə, ¹¹ na ɩ̃ kpoora, na ɩ̃ bɔ gaarra. Fɩ jɩrɛ gɩrɛ fɛʋʋkɛ kɔɔ dana mɩnɩ Ãtɩyɔsɩ, na Ɩkɔn, na Lisitiri, kpoore mɩ kɔɔ yɩ gɩmɔ̃, sɩ Kɔ̃tɩn kɔɔ taa mɛr gelela fɛʋ. ¹² Dɩrakɛ wɩrɛ fɛʋʋkɛ n ƴaalɛnɩ ɩna-n ɩrɛ na Thãgba fɩlɛ awɩ bɩɛl dora na Jeju Kirisiti, wa yɩrɛ kpoore. ¹³ Sɩ tɩɩ puusɔ na tɩɩ fɩɩldara wa puurore wa-n pɛr, wa dor tɩɩ fɩɩldara wɩ dona dakha wɩrɛ n fɩlɛnɩ dɩbara. ¹⁴ Sɩ fɛrɛ, jɩɛ jɩɩl gɩrɛraakɛ fɩ kɔɔ dɩɩrnɩ, kɛ fɩ jɩnɩ tue dɩɩ do gɛr dɔ sobɔr, gɩdonɩ fɩ jɩrɛ dakha tibil ʋrɛ kɔɔ dɩrɛ fɩnɩ. ¹⁵ Dɩ a fʋna afɩ bɩsã bu bɔɔ, fɩ jɩrɛ Thãgbaa sɛbɛ phu, gɛr na punone na ha fɩ kpɛsɛrɛ taa ’lɛrraakɛ fa ’lɛnɩ gɩ the ha pɛrɛraakɛ fa hananɩ Jeju Kirisitira. ¹⁶ Thãgbaa sɛbɛɛ thɩmɩɩ fɛʋ dɔ gɩrɛ thɛnɩ Thãgbaa nɔɔ, dɩ gɩ dor dabʋɔ ka a na dɩɩr tibil thɩ̃ɛ, a na nɩna tibil dι paar, a na naar tibil, a na dιιr tibil a na pɛ dateleena, ¹⁷ gι do nɔɔ Thãgbaa tibil n ’li dιbara, a gbɛbι a ma thɔ̃ bɔ cʋʋrɛra fɛʋ.

¹ Mɩ-n kpãkpãa farɛ gɩrɛ Thãgbaa ƴɛra na Jeju Kirisitii ƴɛra, na mɔ̃ gɩ donɩ Kirisitira na bire na ɩ̃ a na kɩɩlna yidara na khe, saa gba ɔɔ fãga, mɩ so farɛ gɩrɛ ayɩ: ² Na mɩa Thãgbaa thɩmɩɩ, na yɩrana gɩ, a fɩ yɩrɛ fʋ paar a fa yɩ fʋ paara’; na nɛna tɩbɩla awɩ dɩ pa, na naarɛ wɩ, na kpãkpaanɛ war, sɩ na cʋɛ gele na ha fʋrɛ fɛʋʋkɛ dɩɩrdaar teenanɩ a hanana. ³ Gɩdonɩ bɔ bɩɛl na daan kɛ tɩbɩla na tuni dɩɩr bʋɔ bã, sɩ mɔ̃kɛ awɩ bɩ̃ n nanɩ dɩ awɩ nũ na-n hʋʋl wɩ thɩ̃ kpɩɩ nɩɩrra, wa ƴaalɛ dɩɩrdara wa-n ɓã dɩɩrdarara. ⁴ Wa kpʋʋ garɛ nũu sobɔ nɩɩrra, sɩ wa-n pɛ kpuro nɩɛsɔ nũu. ⁵ Sɩ fe wer, a gɩ ha mɔ̃ na fɔ haar, fa-n hə̃jə̃ə bɔ gaarɛra ga, dɔ thɔ̃ don tutugo bʋɔɔ thɩmɩɩ mɩɩrɛra, na dɔ afɩ thɔ̃ ga-n pɩ ɓibi. ⁶ Gɩdonɩ ado me wer gɩ, bɔɔ daan dɩ ɩ̃ tɔmɩ̃ na deer, ɩ̃ kɔ̃ bɔ wɔrɔnɛ dɩphã. ⁷ Mɩ kɔɔ kɛ̃kɛrɛnɛ kɛ̃kɛrɛ̃ bʋɔ; mɩ car ɩ̃ kɔlɔ̃kɔɔ pɩ, mɩ fʋrɛ ha pɛrɛ kĩkĩ. ⁸ Nɛnɛ̃ dɩphã khorɩkɛ ma ’lɛnɩ cacadaar dʋʋrra n pɩɛrɛ mɩ mɛ̃, gɛr dʋɔn so hɛl khaardaakɛ Kɔ̃tɩnɩkɛ dɔnɩ ʋrɛ n kɩlɛnɩ kɩɩl telẽe na ha mɩnɩ ga Wirəəle, sɩ ga do mɛr dɩbara a na ha ga, sɩ wɩrɛ fɛʋʋkɛ n naannɩ ɔɔ bir ɩ̃. ⁹ Dɔ bʋɔ sa ɩna ɩ̃ pa kɔrɔ, ¹⁰ gɩdonɩ Demasɩ faa mɛr dɩ gɩ ther naʋraakɛ a-n nanɩ nɛnɛ̃ bɔɔkɛɛ thɩna, Tesalonɩkɩ a jal, dɩ Kiresã jal Galasɩ, Tɩtɩ jal Dalmasɩ; ¹¹ Luki dɩbara haan kha na mɛrɛ; kpa Markɩ nɩ ɩ̃ kha gɩdonɩ a do marɛ bɔ taa tibil thɔmana. ¹² Tɩsɩkɩ wer mɛr thɔnaa Efɛjɩ. ¹³ A fa ɩ̃ gba ɩ̃ delkeba jakparaakɛ mɩ faanɩ Tʋrʋasι Karpusii pa, a gbana dakha sɛbɛsɔ, sι caca thɩ̃ɛ dʋɔn ɩ̃ lo sɛbɛ. ¹⁴ Phube Alesãdɩɩr kɔɔ cʋʋ mɛr puure ka; Kɔ̃tɩn na lɩmaa mɔna ɔɔ thɔna hanɩ. ¹⁵ Fɛrɛ dakha na jɩɛ dʋʋraa bʋrɛ dɛ, gɩdonɩ a bana mɛr waa gel ɩ̃ thɩmɩɩsɔraakɛ mɩ kɔɔ mɩɩnɩ. ¹⁶ Caca bɔɔkɛ mɩ kɔɔ jɩɩlnɩ ɩ̃ hɛl ɩ̃ so, tibil bɩɛllakɛ na kɔɔ jɩɩl mara’, sɩ fɛʋ kɔɔ faa mɛr. Thãgba na-n gba gele wɩ kɔɔ cʋʋnɩ a heen wa’. ¹⁷ Kɔ̃tɩn dɔ ʋrɛ kɔɔ jɩlɛna mɩnɩ a ha mɩ fãga dɩɩ do nɔɔ dɩ ɩ̃ kɔɔ mɩɩ tutugo bʋɔɔ thɩmɩɩ waa dιɩ dã thu, dɩ ca kpala fɛʋ nɩɛ. Kɔ̃tɩn kɔɔ taa mɩ sidũ’ũ gbuokhorə. ¹⁸ Kɔ̃tɩnna na-n taa mɩ thɔ̃ puu caarra fɛʋ, dɩ a na fʋ marɛ na cʋʋ mɩ dɩ ma lõ ɔɔ ƴũ fãga dιra. Ɔɔ i n dʋbarɔ na jala waa khorr vʋ̃ʋ. Amɛn. ¹⁹ Fʋɔrɛ Pirisika na Akɩlasɩ na Onejɩfɔɔrɩ cɔdara. ²⁰ Erasɩtɩ wer toore Korɛ̃tɩ, sɩ gɩ-n khor Tʋrofɩm dɩ ɩ̃ sɩɩraa dɩ too Mɩle. ²¹ Bãbanɛ a dana kɛ sɩ yʋʋr n yo. Ebulusi, Pudãsɩ, Linusi, Kʋlodιa na omɩna fɛʋ wɩ fʋɔr fɛr. ²² Kɔ̃tɩn n hana kha na fɛrɛ. Thãgba na-n jɛ nɩ bʋɔra.