2 TESALONƖKƖDARA

2 TESALONƖKƖDARA

¹ Mɛr Pol na Sɩlvɛ̃ na Timothe thɔna sɛbɛɛkɛ a ha we gbɛbɩdaraakɛ hanɩ Tesalonɩkɩ, kɛ Thãgba asɩ Thɩ na Jeju Kirisiti Kɔ̃tɩn hɩnɩ. ² Thãgba Thɩrɛ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra. ³ Omιna, asιda dʋɔn dɔ sa-n khιι Thãgba wire wire anιdara, dι gι teenanɛ dι sa cʋʋ mɛ̃ gιdonι anι ha pɛra kɔ̃tιnɛ dι ga-n pɛr, dι anι naʋʋkɛ nι-n nanι kha bιɛlbιɛl dakha gι-n dɛɛnɔnɛ. ⁴ Dι gι dor nɔɔ dι sɛrɛɛ thɛthɛ na-n məbi anιdara, Thãgbaa we gbɛbιdarasɔɔ thɩ̃thιιn, gιdonι anι kιbι jιιl dɔ nɔɔ, na anι ha pɛɛkɛ nι hananιnakɛ kpoore na bɔ gaarɛra fɛʋʋkɛ nι-n yιnιι thɩ̃thιιn. ⁵ Gɛr n nɛna Thãgbaa kιιl sar, gι do nɔɔ gι do nι teenanɛ lʋʋn Thãgbaa fãgadaar dora, kɛra nι-n gaarɔnι bʋɔ mɛ̃. ⁶ Gιdonι Thãgba sarrɛ gɛr a na gbaar bɔ gaarɛ ana lιmι wιrɛ n gaarɛ nιnι, ⁷ dι nɛrɛɛkɛ wι-n gaarnι gιrɛ, a na gbaar hιιrɛ a na ha nι nakha sɛrɛ dakha, ɔbɔɔkɛ Jeju Kɔ̃tιn na thenι Thãgbaa dʋɔ a na-n ɩ̃ gbelẽ gbelẽ na ɔɔ thɔ̃thɔ̃daar thusɔ na fãga, ⁸ na dɔlιnanɛ. A na tiire helu wιrɛraakɛ na jɛnι Thãgba ga, na wιrɛraakɛ na-n nɛnι asι Kɔ̃tɩ̃ Jejuu tutugo bɔ thɩmɩɩ nũə’. ⁹ Awɩ so heen na dor bũburone khorr, wɩ hʋnɔnanɩ Kɔ̃tɩn a ’leena ɔɔ fãgaakɛ thɛnɩ ɔɔ puno hanana. ¹⁰ Ɔbɔɔkɛ Wireelera na danɩ a na-n ɩ̃ kpãgarɛ na-n ther ɔɔ tɩɩ phusɔɔ pa, wɩrɛ fɛʋ pɩɛrnɩ haar na hananaanɛ cʋʋr, dɩ nɛrkɛ pɩɛrnɩ thɩmɩɩrɩkɛ sɩ kɔɔ mɩɩ nɩnɩ haar na harrɛ ner. ¹¹ Gɛr gɩ dakha dɩ sɩ bɩɛl Thãgba bɔɔ fɛʋ dɩ sa-n pɛ nar, asɩ Thãgba n cʋɛ nɩ nɩ teena ɔɔ wera, a gba ɔɔ fãga a cʋʋna nɩ nɩ puno na-n cʋʋ bɔɔkɛ nι-n ƴaalnι, a cʋʋna anι ha pɛ thɩ̃ cʋʋ ga-n dã otirə. ¹² Dι mɛ̃ na do nɔɔ dι asι Kɔ̃tɩ̃ Jejuu i na ’lɛ kpãgarɛ, dι na ’lɛr dakha kpãgarɛ gι do ɔr dɔ nɔɔ, gι the asι Thãgba na asι Kɔ̃tɩ̃ Jeju Kirisitii bɔ jιra.

¹ Sι-n bιɛl nɛr omιna, ado gιrɛ dɔnι asι Kɔ̃tɩ̃ Jeju Kirisitii bir ɩ̃da gι, na asι gbɛbι kha na ɔr, ² na-n do kpιɛrɛ nyanyãa nι kɔrɔa’, dι na-n do dakha haar na-n jɛ̃ nι gιrɛraakɛ tibil na yιnι aa, Thu Phuu mιana nɩ agɩbo thɩmɩɩr ɩnɩ nɩ agɩbo aa, sɛbɛ thɛ asɩ pa ayɩ, Kɔ̃tɩnɩ wi daan pa’. ³ A gɩ ha mɔnakɛ na-n do tibil n fɩɩl na’, gɩdonɩ dɔ Thãgba so bʋʋrɛ n kɔɔ ɩ̃ ɓo wɩ yɩ Sopugo tibilile a yɩr, kɛ wɩ thɩɩnnɩ bũburõ thɩɩnʋʋ, ⁴ Thãgbaa vardaar gɩɩkɛ na ɩrɛnɩ na yʋ bʋʋn gɩrɛ fɛʋraakɛ wɩ-n wenɩ Thãgba na gɩrɛraakɛ tibil n fʋɔrnɩ, a ba toorakɛ Thãgba fʋɔr cɔ kɔ̃tɩɩna sɩ ayɩ, ɩnɛrɛɛ thɛthɛra dɔ Thãgbara. ⁵ Na jιna mɔ̃ mι-n kɔɔ mιɛ nιnι ga thɩ̃ιlera ɔbɔɔkɛ mι kɔɔ hanι anι pa gaa? ⁶ Dι nɛnɛ̃ nι jιrɛ thɩ̃ɛɛkɛ pιɛrɛɛnι dι agado bɔɔ dana ga hʋɛ na yιr da tha’. ⁷ Gιdonι fãga gbulikɛ dɔnι sopugodaa ’lire har dι ga-n do thɔma, foo ʋrɛ pιɛrɛɛnι nɛnɛ̃ n tɔ a khokhιa ɓo dιphã. ⁸ Liir Sopugodaarιlera na yιr dι wa yιι, kɛ Jeju Kɔ̃tιn na phʋʋnι na kʋ, a na hɛlʋʋlɛ dι ɔɔda na ther mɔ̃ a na-n ιnι ga-n carbara. ⁹ Sopugodaarι ɩ̃ιle Satãa fãgara ga the, na nɔ kpaa thɩ̃ɛsɔ, na jιιnsɔ, na ma kʋ thɩ̃ɛsɔ, dι gelesɔ fɛʋra na jɔrɛ na ka a na do tιι fιιldaa. ¹⁰ A na gbaar gιrɛ dɔnι thɩ̃ puu caar dιιdιι fɛʋ a na-n fιιlna wιrɛ n buureni, gιdonι wa na sobɔr a na ’lɛ taara’. ¹¹ Gɛrra dɔ kιrʋ dι Thãgba thɔna war fãga ga-n fιιl wι wa-n pɛr sõsor haar. ¹² Dι mɛ̃ wιrɛ fɛʋʋkɛ na pιɛrnι sobɔr haara’, sιι do thɩ̃ puu ka da war, na ’lɛ kιιlʋ. ¹³ Sι ado sɛr wɛ, omιnaakɛ Kɔ̃tιn n nanι, sι teenanɛ sa-n khιa Thãgba wire wire anι sora, gιdonι Thãgba kɔɔ phire ni caca fʋ paar dι na ’lɛ taarɛ, gι the Thu Phuurəəkɛ lea nιnι kpιι, gι the dakha ha pɛrɛraakɛ nι pɛrnι sobɔr haar. ¹⁴ Gɛr dɔ gιrɛ a gbarɔnι tutugo bʋɔɔkɛ sι-n mιιnι a wena nι, nι puno nι bul kha na asι Kɔ̃tɩ̃ Jeju Kirisitii i dʋbɩ. ¹⁵ Gɛr gɩ gɩrɛ omɩna, nɩ fɔ gɩ ma, nɩ fɔ dɩɩrɛɛkɛ nɩ kɔɔ ’lɛnɩ, ado na asɩ nɔ gɩ, ado na asɩ sɛbɛsɔ gɩ. ¹⁶ Dɔ asɩ Kɔ̃tɩ̃ Jeju Kirisitii thɛthɛ, na Thãgba asɩ Thɩ, kɛ kɔɔ naan sɩnɩ, kɛ kɔɔ hana sɩnɩ khorr ha faarɛ na nũ pɛ bʋɔ bɔ jɩɩrra, ¹⁷ n cʋʋ nɩ na-n faa haar, a cʋʋ nι dakha nι ’lɛ fãga thɔ̃ bɔ cʋʋrɛra fɛʋ na thιmιι bɔιra fɛʋ.

¹ Gιrɛ sɛnɩ omɩna, nɩ bɩɛlnɛ Thãgba na pɛ sar Kɔ̃tɩnɩ thɩmɩɩ n puno gɩ ca ga-n kpaar ga-n ’lɛ cʋʋr, mɔ̃kɛ gɩ hanɩ gɩrɛ anɩ pa; ² gɩ do nɔɔ dakha Thãgba n taa sɩ gõgolõdarara na tɩɩ puusɔɔ nyɔ̃kɔɔ, gɩdonɩ ga do tɩbɩla fɛʋ hana ha pɛra’. ³ Sɩ sobɔdaar Kɔ̃tɩn do, ɔr gɩɩkɛ na cʋɛ nɩnɩ dɩ na tɩ kɩbɩ, a na bɛr nɛr dakha puu cʋʋ hɩ̃daarra. ⁴ Dɩrakɛ sɩ hana narɛ ha pɛrɛɛkɛ thɛnɩ Kɔ̃tɩnna, dɩ gɩrɛ sɩ kɔɔ so narnɩ nɩ-n cʋʋrɛ, dɩ thalera na cʋʋrakɛ na-n jalna. ⁵ Kɔ̃tɩn n thɔɔ anɩ ha a na pɛ naʋraakɛ dɔnɩ Thãgbaada na Kirisitii ha fʋra. ⁶ Asι Kɔ̃tɩ̃ Jeju Kirisitii i sι gba dι sa-n kpãkpaana nar omιna, dι na hʋnɔ kha na omine wo omineekɛ dɔnι khãkhal, kɛ na-n ιrɛnι mɔ̃kɛ dιιrɛɛkɛ nι kɔɔ ’lɛnι asι pa hana’. ⁷ Nɛrɛɛ thɛthɛ jιrɛ anιbara mɔ̃kɛ gι teenanι nι phɛla sι, gιdonι ɔbɔɔkɛ sι kɔɔ hanι anι pa sa do khãkhala ga. ⁸ Sa kɔɔ kho tibili dιko sι sa lιmaa ga, sι dιtιnɛ na dιwιlʋ sι-n kɔɔ do thɔ̃ khena na vɔɔrɛ dι sa do heendaa tibil bιɛllalakɛ anι pa ga. ⁹ Sɩ ga do hʋɛ sa kɔɔ hana gaaga, sɩ thɩ̃ nɩrɔrɛ sɩ ƴaal sɩ do nar na-n phɛl sɩ. ¹⁰ Gɩdonɩ ɔbɔɔkɛ sɩ kɔɔ hanɩ anɩ pa sɩ-n kɔɔ kpãkpãa narɛ ayɩ: Tibilikɛ n bɔnɩ thɔ̃ dʋʋr aa hana hʋɛ na kho dɩkor dakha ga. ¹¹ Sɩ sɩ nɩɛrɛ dɩ ɩkhasɔ har anɩ thɩ̃thɩɩn a do khãkhala, wa-n do thɔma ga, sɩ dɩ wa-n hɩɩn gɩrɛ na ba wɩna’. ¹² Ado wa tibil casɔɔle wɛ, sɩ gba Jeju Kirisiti Kɔ̃tɩnɩ i a na kpãkpaana wɩ a tɔna wɩ na pɩɛr wa-n dɔ awɩ thɔ̃ mʋmʋr, a yɛ awɩ nyɛ̃kɩɛr thɩ̃ɩkɛ na-n haanɛ wɩnɩ. ¹³ Sɩ ado nɛr wɛ omɩna, na-n vɔɔ bɔ cʋʋrɛra ga. ¹⁴ Sɩ ado tibil na-n nɩ thɩmɩaakɛ sɩ kherenɩ sɛbɛraakɛ nũə’, nɩ dʋɔraa bʋrɛ, na-n bɔ kha na tibil ca ola’, gɩ do nɔɔ yicuru n fʋʋ. ¹⁵ Sɩ na-n hɩɩnʋʋ lãlaar hɩɩnʋa’, sɩ na-n dɩrɛɛ omi dɩɩrɛ. ¹⁶ Kɔ̃tɩnɩkɛ ha ɩɩ n thernɩ, ɔɔ thɛthɛ na-n ha nɩ ha ɩɩ bɔɔ fɛʋ, thɩ̃ɛ fɛʋra. Kɔ̃tɩn na-n hana kha na nɛrɛ fɛʋ. ¹⁷ Mɛr Pol khera fʋɔrɛɛkɛ na ɩ̃ nyɛ̃. Gɛr dɔ jɩɩn ɩ̃ sɛbɛsɔra fɛʋ, thale dɔ ɩ̃ khere. ¹⁸ Asɩ Kɔ̃tɩ̃ Jeju Kirisiti na-n jɛ nɛrɛ fɛʋ bʋɔra.